ཕུར་པ་ཡང་གསང་བླ་མེད་ཀྱི་དྲག་པོའི་སྦྱིན་སྲེག་གི་ལག་ལེན།
ཕུར་པ་ཡང་གསང་བླ་མེད་ཀྱི་དྲག་པོའི་སྦྱིན་སྲེག་གི་ལག་ལེན་བཞུགས་སོ།། །།
རྡོ་རྗེ་ཕུར་པའི་ལས་མཐའ་སྦྱིན་སྲེག་སྤྲོ་ན་དྲག་ལས་འབྲེལ་ཆེའི། མཁའ་དྲུང་པའི་སྒྲུབ་ཆེན་ལག་ལེན་ཏུ་ཕུར་པ་བཀའ་མ་ལུགས་ཀྱིས་ཁ་འགེངས་མཛད་པའི་འདོན་ཆ་ཟུར་ཕྱུང་ལྟར། སྒྲུབ་ཁང་གི་ཁྱམས་སོགས་གང་བདེར། རྡོ་རྗེ་སློབ་དཔོན་ས་གའི་སྟབས་ཀྱིས་ཞལ་ལྷོར་ཕྱོགས་པའི་མདུན་ཏུ། དུར་ཁྲོད་ཀྱིས་ལ་སྟེགས་བུ་ནག་པོ་ཟུར་གསུམ་ཞིང་མདའ་གང་། དཔངས་སོར་བཞི་པའི་སྟེང་། དཀར་དམར་མཐིང་པའི་གྲུ་གསུམ་སུམ་རིམ་གྱི་དབུས་དགྲ་གཟུགས་མགོ་ལྷོ་ནུབ་ཏུ་བསྟན་པ་བྲིས་པའི་སྙིང་གར་ཟན་ལིང་ཤ་དུམ་བཞག །དེ་སྟེང་ཚེར་ནག་སྐྱེར་ཚེར་སོགས་གཡོན་བསྐོར་དུ་མེ་ཚང་བཅས་དགུ་བརྩེགས་སམ་སུམ་བརྩེགས་བྱས་པའི་ཟུར་གསུམ་དུ་ཤིང་གསུམ་མཆེ་བའི་ཚུལ་དུ་བསླང་། དབུས་སུ་མེ་དར་དམར་པོ་བཙུགས། མེ་ཡོལ་གྱིས་མཚམས་ཕྱེས་པའི་སློབ་དཔོན་མདུན་ཏུ་རྡོར་དྲིལ། ཌཱ་མ་རུ། ཡུངས་ཐུན། གཡབ་དར། སྔོན་ནས་བྱིན་གྱིས་བརླབས་པའི་བསངས་ཆུ། འཐོར་གཡབ། དགངས་གཟར་བླུགས། ཕུར་བུ་སོགས་བསྒྲལ་ཆས་ཟློག་པའི་སྐབས་ལྟར་ཆ་ཚང་། ལྕགས་ཁང་ནང་དུ་ཤོག་ལིང་སྤྱི་མཚམས་དང་ཟན་ལིང་ཆེ་བ་གཅིག་ཤ་དུ་མ་བཅས། སློབ་དཔོན་གྱི་གཡས་སུ་སྟེགས་རིམ་གཉིས་པ་དང་རས་ནག་པོས་བཀབ་པའི་དང་པོར། གཙོ་
བོར་དམར་གཏོར་ཟུར་གསུམ་ཆེ་བ་གཅིག་གི་གཡས་གཡོན་དམར་གཏོར་ལྔ་རེ་སྟེ་བཅུ། ཤ་ཁྲག་མེ་རིས་བརྒྱན་པ་ཤིང་ལེབ་ལྟ་བུར་ཕྲེང་ཚར་དུ་བཤམ། དེའི་གཡོས་གཡོན་སྨན་རཀ །སྟེགས་འོག་མར་ལྕགས་སྣོད་ཆེ་བ་གཉིས་ཀྱི་ནང་དུ་དམར་གཏོར་ཟུར་གསུམ་ཤ་ཁྲག་གིས་བརྒྱན་པ་ལྔ་རེ་བཞག་པའི་མདུན་ཏུ་དྲག་མཆོད་ཆུ་གཉིས་ཉེར་སྤྱོད་འཛོམས་ན་སྦྱིན་སྲེག་གཞུང་གཞན་ནས་འབྱུང་བ་ལྟར་དངོས་སུ་བཤམས་དགོས་ཤིང་། མ་འཛོམས་ཚེ་ཟློག་པའི་བཅའ་གཞིའི་སྐབས་ལྟར་ཁྲག་གི་མཆོད་ཡོན་སོགས་ཆ་གཉིས་བཤམ། ཐམས་ཅད་དུག་ཁྲག་དུད་པས་ཁ་དོག་ནག་པོར་བསྒྱུར། གསེར་སྐྱེམས་བསྐུལ་བའི་དམར་གཏོར་ཡང་བཤམ། གཡོན་ཏུ་སྟེགས་ནག་པོའི་ཁར་བསྲེག་རྫས་ནི་ཡམས་ཤིང་སྐྱེར་ཚེར་སོགས་གཞི་གཤག་ཟུར་གསུམ་ཐེབ་ཆུང་གི་ཕྲ་སྦོམ་སོར་བཅུ་གཉིས་པ་སུམ་བརྒྱ་ཡན་གང་འབྱོར་ཁྲག་དང་རོ་སོལ་ཚྭ་ཆུས་བྱུགས་པ། འབྲང་འབྲང་ཞེས་པ་མར་ཁུལ་ཤ་ཁྲག་རུས་པ་ཚིལ་ཞག་རྐང་སོགས་བསྲེས་པ། ལྕགས་སྣོད་ཆེ་བ་གཅིག་ཏུ་ཏིལ་དང་བྲ་སྲན་སོགས་འབྲུ་ནག །ཐང་ཕྲོམ་འབྲས་བུ་བཙན་དུ་གསོགས་དུག་རིགས། ནས་ནག་དང་སྲན་མའི་ཆན། །དུ།།།ཀུ་ཤ་དུམ་བུར་གཏུབ་པ། ལྕགས་ཟངས་རྦབ་རྡོའི་ཕྱེ་མ་ཀེ་ཚེ་ཤང་ཚེ་སོགས་ཐུན་རྫས། སྤངས་
སྐམ་གྱི་ཕྱེ་མ་བཅས་ཕྱོགས་གཅིག་ཏུ་བསྲེས་ལ་ཤ་ཁྲག་ལན་ཚས་སྦོལ་བ་བཤམ། དཔལ་འབར། རླུང་གཡབ་སོགས་ཉེར་མཁོའི་ཆས་རྣམས་ཚོགས་པར་བྱས་ཏེ། དཔོོན་སློབ་རྣམས་གདན་ལ་འཁོད། བཟློག་གཞུང་བསྒྲལ་ལས་ཀྱིས་དབར། ན་མོ་ཆོས་ཉིད་ཀྱི་བདེན་པའོ། །ནས། ཕཊ་ཕཊ་ཕཊ། བར། རོལ་འབེབས་དང་སུམ་བརྡུང་། ཚིག་རྔས་སྒྲུབ་ཁོག་གི་གསེར་སྐྱེམས། ཀྱེ། བདག་ནི་མ་ཉེས་ནས། གྲུབ་པར་མཛོད་ཀྱི་མཐར་རོལ་འབེབས་འོག་ལས་རྡོར་པས་གསེར་སྐྱེམས་མཆོད། ༡༢༣ གྱིས་བཞག །མེ་ཐབ་ལ་ཁྲག་ཆང་བླན། ན་མོ། །རིག་འཛིན་གྲུབ་ཐོབ། སོགས། འགུགས་གཞུག་ལན་གསུམ། རོལ་མོ་རྐང་གླིང་གཡབ་དྲིལ་བཅས་སྤྱི་འགྲེ་བྱ། དཔལ་འབར་སྒྲོན་ལ་བསངས་ཆུ་བྲན། ཨོཾ་བཛྲ་ཛྭ་ལ་རཾ། ལན་གསུམ་གྱིས་མེ་ཐབ་ལ་གཡོན་བསྐོར་གསུམ་བཅས་ཤར་ལྷོ་ནས་སྦར། རོལ་མོ་འབེབས་དང་སུམ་བརྡུང་། ཚིག་རྔས་ཧཱུྃ། དུས་གསུམ་སངས་རྒྱས་ནས། ཧཱུྃ་ཕཊ་མཐར་འབེབས་འོག་ཧཱུྃ་བཞིའི་སྔགས་དང་ཡུངས་ཐུན་གྱིས་བགེགས་བསྐྲད་ལ། ༡༢༣ གྱིས་བཞག །སློབ་དཔོན་གྱིས་བསངས་ཆུ་གཡོན་བསྐོར་འཐོར། །ཨོཾ་སྭ་བྷཱ་ཝ་ནས། ཤབྡའི་མཐར་རོལ་འབེབས་དང་བཞག །ཨོཾ་བཛྲ་ཛྭ་ལ་རཾ། ལན་གསུམ་ལ་མར་ཁུ་དགང་བླུགས་གསུམ་འབུལ།
སྦོ་ཊ་ཧཱུྃ་ཕཊ། འབེབས་དང་སུམ་བརྡུང་ཚིག་རྔས། ཧཱུྃ་ཡེ་ཤེས་ཕུར་བུ་ནས། དངོས་གྲུབ་སྩོལ༔མཐར་འབེབས་ཀྱིས་བཞག །ཛཿཧཱུྃ་བྃ་ཧོཿ གཉིས་སུ་མེད་པར་གྱུར། སྤྲུལ་པ་དྲེད་དང་བྱི་ལའི་མགོ་ཅན་གྱིས་ཕྱག་ཚང་བྱེད་པར་གྱུར། ཨོཾ་བཛྲ་ཀཱི་ལི་སོགས་ཀྱིས་འབྲང་འབྲང་གཙོ་བོ་ལ་གསུམ། ཁྲོ་བཅུ་ལ་རེ་རེ་འབུལ། ཧཱུྃ་ནག་ཅིང་རྩུབ་པ་དང་སོགས་འདོན་བྱ་དང་སྤྲད་ནས་ལས་རྡོར་བས་ཆུ་གཉིས་ཉེར་སྦྱོང་སློབ་དཔོན་གྱི་དགང་གཟར་དུ་ཕུལ་ལ་ཐབ་ཏུ་མཆོད། ཤབྡ་ལ་རོལ་འབེབས་བཞག །གཙོ་བོ་ཁྲོ་བཅུ་བཅས་པའི་སྔགས་ལ་སྨན་རཀ་གཏོར་གསུམ་མཆོད་སྔགས་རེ་རེ་བཞིན་བཏགས་པ་ལན་བཅུ་གཅིག་རེས་སྨན་རཀ་གཏོར་གསུམ་སོ་སོར་སློབ་དཔོན་གྱི་བླུགས་གཟར་དུ་ལས་རྡོར་པས་ཕུལ་ལ་བསྲེག །སྨན་རཀ་ལྷག་མ་ཅུང་ཟད་རེ་བཞག་མཐར་སུམ་བརྡུང་ལན་ཆུང་ཚིག་རྔས། ཧཱུྃ། གཏུམ་ཆེན་ནས། གཡེང་བ་ཆེ་ཧོཿ འབེབས་མཐར་བཞག །ན་མོ་རིག་འཛིན་གྲུབ་ཐོབ་སོགས་འགུགས་གཞུག་ལན་གསུམ། བསྐུལ་བྱང་ལེའུ་དང་པོར། ལྷ་དབྱེ་ནས་རྡུལ་བརླག་པར་ལས་ཟློག་པའི་སྐབས་ལྟར་བྱ། ཞལ་བསྟབས་མི་དགོས། ཤོག་ལིང་དང་ཟན་ལིང་དུམ་བུ་མང་པོར་གཏུབ་པ་བསྲེག་རྫས་སུ་བསྲེ། རྡུལ་བརླག་མཐར་འབེབས་དང་སུམ་བརྡུང་གིས་
སྦྱིན་སྲེག་གཞུང་། ཧཱུྃ་དམ་ཚིག་ཆེན་པོ་ནས། བསྒྲལ་དུ་གསོལ་མཐར་འབེབས་ཀྱིས་བཞག །ལས་རྡོར་པས། ཡམ་ཤིང་དང་བསྲེག་རྫས་ཐམས་ཅད་ཚོ་གཉིས་སུ་བགོས་པའི་ཕྱེད་སློབ་དཔོན་ལ་ཕུལ། སྔགས་གྲངས་གཙོ་བོ་ལ་སུམ་བརྒྱ་བྱེད་ཚེ། ཁྲོ་བོ་བཅུ་རེ་རེ་དེའི་བཅུ་ཆ་སུམ་ཅུ་རེ་དང་། དམ་ཅན་ལ་བདུན་རེ་ཕུལ། གཙོ་བོའི་གྲངས་ཐེམ་ནས་སྔགས་གོང་ལྟར་འབྲང་འབྲང་ཉེར་གཅིག་ཕུལ། རྔ་ཚིག་སྔོན་ལྟར་གྱིས་དམ་ཚིག་ཆེན་པོ་སོགས། བསྲེག་རྫས་ལྷག་ཆ་བཞིར་བགོས་པའི་ཆ་གསུམ་ཁྲོ་བཅུ་ལ་ཕུལ། མཐར་འབྲང་འབྲང་གསུམ་རེ། ལྷག་ཆ་གཅིག་གཡས་ཀྱི་དམར་གཏོར་ཚོ་གཉིས་ལ་བླུགས་ཏེ་སྔར་གྱི་སྨན་རཀ་ལྷག་མས་བྲན། ཁྲོ་བཅུ་གྲངས་ཐེམ་ནས་དམར་གཏོར་ཚོ་གཅིག་ཀ་ཏང་ཀ་ཡེ་སོགས་ཚར་བདུན་བརྗོད་ཚེ་ལས་རྡོར་བས་སློབ་དཔོན་གྱི་བླུགས་གཟར་དུ་བཞག་ནས་ཕུལ་བསྔར་བཞིན། ཡང་དམར་གཏོར་ཚོ་གཅིག །མ་མ་པ་ཤམ་ཀུ་རུ་སོགས་གྲངས་དང་འདུལ་ལུགས་དེ་མཚུངས། སྔགས་དེ་གཉིས་ལ་ཁ་ཁ་ཁཱ་ཧི་ཁཱ་ཧི་བཏགས་པ་ལན་རེ་རེས་འབྲང་འབྲང་འབུལ། ཧཱུྃ་ནག་ཅིང་རྩུབ་པ་སོགས་ཀྱིས་དྲག་མཆོད་ཆ་གཅིག་སྔར་ལྟར་འབུལ། །ཤབྡ་ལ་རོལ་མོ་འབེབས་མཐར་སུམ་བརྡུང་ཚིག་རྔས། ཧཱུྃ་ཐམས་ཅད་ངོ་བོ་ནས། ཕྱག་འཚལ་ལོ༔ མཐར་འབེབས་
ཀྱིས་བཞག་ལ་ཐལ་སྦྱར་བཅས། ཧོ་དགོངས་སུ་གསོལ་ལོ། །སོགས། བརླག་པར་མཛད་དུ་གསོལ་ལ་ཐལ་རྡེབ་ལན་གསུམ། དྲིལ་སིལ་བཅས་ཡིག་བརྒྱ་ལན་གསུམ། དགེ་བ་བསྔོ། བཛྲ་མུཿཡེ་ཤེས་པ་རྟེན་གྱི་གནས་སུ་གཤེགས། དམ་ཚིག་པ་བདག་ཉིད་ལ་ཐིམ་པར་གྱུར། བགེག་རིགས་སྟོང་ཕྲག་བརྒྱད་ཅུ་ཞི་བ་དག །སོགས། འབྱུང་པོ་གང་དག་འདིར་ནི་རྒྱལ་བ་སོགས་བརྗོད་ལ་གྲོལ། མེ་རོ་ལང་སྐབས་ཡོད་ཀྱང་མི་བཞག་པར་དུག་ཆུས་བསད་ལ་ཐལ་བ་ལམ་མདོར་རླུང་ལ་བསྐུར་བར་བྱའོ། །རང་གླིང་རང་གཞུང་དུ་སྦྱིན་སྲེག་འདོན་ཆ་མི་འབྱུང་ཡང་། རྒྱུད་ནས་བསྲེག་པའི་ལས་མཐའ་གསུངས་པའི་དོན་དང་འབྲེལ་བར། ལས་བཞིའི་ཁ་སྐོང་དུ། སྒྱུ་འཕྲུལ་དང་། ཇོ་མོ་ལུགས་སོགས་བཀའ་གཏེར་རྙིང་མའི་ལུགས་སྲོལ་ཁུངས་ཐུབ་རྗེ་མཁར་དྲུང་བས་སྒྲུབ་ཆེན་གྱི་ཁ་ཚར་ཆོག་བསྒྲིགས་མཛད་པ་ཉིད་ཀོང་སྤྲུལ་པས་གུད་དུ་བཀོལ་བ་དགེ་ལེགས་འཕེལ།། །།སརྦ་མངྒ་ལཾ།། །།