ཟབ་ཆོས་ཞི་ཁྲོ་དགོངས་པ་རང་གྲོལ་ལས། ཚེ་འདས་གནས་འདྲེན་འགྲོ་དྲུག་རང་གྲོལ་བཀླགས་ཆོག་ཏུ་བསྡེབས་པ་ཡིད་གཉིས་རང་གྲོལ།
ཟབ་ཆོས་ཞི་ཁྲོ་དགོངས་པ་རང་གྲོལ་ལས། ཚེ་འདས་གནས་འདྲེན་འགྲོ་དྲུག་རང་གྲོལ་བཀླགས་ཆོག་ཏུ་བསྡེབས་པ་ཡིད་གཉིས་རང་གྲོལ་ཞེས་བྱ་བ་བཞུགས་སོ། །
ཡེ་ནས་མ་བཅོས་ལྷུན་གྱིས་གྲུབ་པ་ཡི། །སྐུ་དང་ཞིང་ཁམས་རང་བྱུང་རང་ཤར་བ། །གྲོལ་བ་བཞི་ལྡན་ཞི་དང་ཁྲོ་བོའི་སྐུ། །ཀློང་ཡང་ཐིག་ལེ་ཆེན་པོར་ཕྱག་འཚལ་ལོ། །རྒྱུད་ཀྱི་དགོངས་པ་པདྨའི་རྡོ་རྗེའི་ལུང་། །རང་བློས་མ་བཅོས་འཐད་ལྡན་ཡན་ལག་གིས། ལེགས་པར་བརྒྱན་པའི་བཀླག་ཆོག་ཏུ། །བཀོད་ལ་དམ་ཅན་སྲུང་མས་གནང་བ་སྩོལ། །ཞི་ཁྲོ་དགོངས་པ་རང་གྲོལ་གྱི་སྒོ་ནས་རིགས་དྲུག་གནས་འདྲེན་བྱ་བ་ལ་དོན་གསུམ། སྔོན་འགྲོ། དངོས་གཞི། རྗེས་སོ། །དང་པོ་ནི། ལས་བྱང་ཆེ་ཆུང་གང་ལ་བརྟེན་པའི་དཀྱིལ་འཁོར་གཏོར་མཆོད་སོགས་ལག་ལེན་ལྟར། རིགས་ལྔའི་བུམ་པ་བུམ་རྫས་ལྔ་ཚན་སོ་སོར་བླུགས་པ། །ལས་བུམ་བཅས་
དྲུག་གམ། མ་འབྱོར་ན་རྣམ་བུམ་ལས་བུམ་གཉིས་སུ་བསྡུས་ཀྱང་རུང་ཙམ་ཡིན་ལ། དབང་རྒྱས་བསྡུས་གང་བསྐུར་གྱི་ཙཀླི། གསང་ཐོད། རིག་ཙཀ །ཤེལ་རྡོ་མེ་ལོང་སོགས་བཀོད། དཀྱིལ་འཁོར་ལྷོ་སྒོར་ཚེ་འདས་ཀྱི་གཟུགས་ལ་ནྲྀ་ཡིག་གདན་གྱི་སྟེང་དུ་བྲིས་པའི་སྟེང་དུ་གདུགས། གཡས་གཡོན་དར་འཕན། རྒྱབ་ངོས་སུ་སྙིང་པོ་དང་ཡིག་བརྒྱ་སོགས་ཀྱི་མཐར། འཇིག་རྟེན་འདི་ནས་ཕ་རོལ་དུ་ཚེ་དུས་ལས་འདས་པཆྒཾ་མོ་ཞེས་བྱ་བ་སྐྱབས་གནས་དཀོན་མཆོག་གསུམ་དང་རྒྱལ་བ་ཞི་ཁྲོ་རབ་འབྱམས་ཀྱི་ཚོགས་ལ་སྐྱབས་སུ་མཆིའོ། །འཁོར་བ་དང་ངན་སོང་བར་དོའི་འཇིགས་པ་ཆེན་པོ་ལས་སྐྱོབ་ཏུ་གསོལ། ཞེས་བྲིས་པའི་མཚན་བྱང་
སྨྱུག་རྒོད་ཚིགས་གསུམ་པ་ལ་མེ་ལོང་དང་ལྷན་ཅིག་བཏགས་པ་རས་དཀར་གྲུ་བཞིའི་སྟེང་དུ་བཞག །རིགས་དྲུག་དཀྱིལ་འཁོར་ཐུབ་དྲུག་སྐུ། བགེགས་གཏོར་བདུན། འབྱུང་བཞིའི་སྦྱོང་ཆས། ཟས་བསྔོ། བྱེ་ཡུངས་སོགས་མཁོ་བའི་ཡོ་བྱད་རྣམས་ཚོགས་པར་བྱ། དེ་ནས་ལས་བྱང་ཆེ་ཆུང་གང་བཏང་ཡང་བློ་རང་ཀྱིས་བདག་མདུན་བུམ་གསུམ་དབྱེར་མེད་རང་བྱུང་ལྷུན་གྲུབ་སྣང་སྲིད་གཞིར་བཞེངས་ཀྱི་དཀྱིལ་འཁོར་ཆེན་པོར་གསལ་གདབ་པ་ནི་གཞུང་གི་དགོངས་པ་དངོས་ཡིན་ལ། འབྲིང་རྣམས་ཀྱིས་ཐོག་མར་བདག་མདུན་དབྱེར་མེད་དུ་བསྐྱེད། བཟླས་པའི་མགོར་སླེབས་པ་ན། བྷྲཱུྃྃ་བི་ཤྭ་བི་ཤུངྡྷེ་མཎྜ་ལ། བོ་དྷི་ཙིཏྟ་སོགས་ཀྱི་མཐར། ཕཊ་ཛཿབཏགས་པས་ཛབ་ཁང་དབྱེ། བདག་མདུན་གཉིས་ཀའི་ཟུགས་ཕྲོག་དང་སྔགས་ཕྲེང་འོད་ཟེར་སྤྲོ་བསྡུ་ལ་དམིགས་པའི་བཟླས་པ་ཅི་འགྲུབ་མཐར། ཉི་ཟླ་ཁ་སྦྱོར་ཆེན་པོའི་རྒྱུད་ལས་གསུངས་པའི་རིགས་ལྔའི་ས་བོན། ཨོཾ་ཨཱཿཧཱུྃ་སྭཱ་ཧཱ༔ ཞེས་དང་རིགས་དྲུག་སྐྱེ་སྒོ་གཅོད་པའི་སྔགས། ཨོཾ་ཨ་བྷྱ་རྒྱ་ཏཾ་ཀཾ། ཆྒཻའི་སྡིག་པ་དང་སྒྲིབ་པ་ཐམས་ཅད་ཤཱནྟི་ཾ་ཀུ་རུ་སྭཱ་ཧཱ། ཞེས་དང་། ངན་སོང་དོང་སྤྲུགས་ཀྱི་སྔགས། མ་མ་ཀོ་ལིང་ས་མནྟ། །ཆྒཻའི་ལས་དང་བག་ཆགས་ཐམས་ཅད་ཤཱནྟི་ཾ་ཀུ་རུ་སྭཱ་ཧཱ། ཞེས་པ་རྣམས་ཀྱང་མི་འགྲུབ་བཟླ་ཞིང་བྱེ་མལ་ཕུས་
གདབ། བུམ་པ་རང་བྱུང་གི་གཞལ་ཡས་ཁང་དུ་ལྷ་རྣམས་དྭངས་མའི་མཚོལ་གཟའ་སྐར་ཤར་བ་བཞིན་སྐད་ཅིག་གིས་གསལ་བར་གྱུར། ཅེས་བུམ་པར་ཞི་ཁྲོའི་དཀྱིལ་འཁོར་སྐད་ཅིག་གིས་གསལ་གདབ། གཟུངས་ཐག་བླངས་ལ། རང་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་།ཐུགས་ཀར་ཞུགས། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུ་དབྱེར་མེད་རོ་གཅིག་གྱུར། ཅེས་དམིགས་ལ་སྙིང་པོ་ཅི་འཐུབ་བཟླ། སྟོང་ཚིགས་མཆོད་བསྟོད་ཕུལ། སྡེ་བདུན། བརྒྱ་ཕྱག །འགྲུབ་ན་རྒྱུད་ནས་གསུངས་པའི་རིགས་ལྔའི་ཡིག་བརྒྱའམ། མི་འགྲུབ་ན་རྡོར་སེམས་ཡིག་བརྒྱའི་བསྒོམ་བཟླས། ཀློང་བཤགས་རྣམས་མཐར་ཆགས་སུ་བཏང་ནས་ལས་བུམ་བསྒྲུག་སྐོང་ཆོག་དང་སྦྲེལ་བའི་ཚོགས་མཆོད་བཏང་། ཚོགས་ལ་མ་རོལ་བའི་གོང་དུ་གནས་འདྲེན་བྱ་བ་གཞུང་དོན་ཡིན་ཀྱང་། དེང་སང་ལག་ལེན་སླ་ཐབས་སུ། ཀློང་བཤགས་རྗེས་བྱང་གཏེར་ལྟ་བུའི་སྐོང་ཆོག་བསྡུས་པ་བཏང་། ལས་བུམ་བསྒྲུབ་ཅིང་རིགས་པའི་མེ་ཏོག་དོར་བའམ་པད་གླིང་ལུགས་ཀྱི་དབང་ལེན་བྱ། གནང་བ་ནོད་ནས་གནས་འདྲེན་ལ་འཇུག་པར་སྣང་ངོ། །གཉིས་པ་དངོས་གཞིའི་གནས་འདྲེན་ལ། དཀྱིལ་འཁོར་གྱི་ལྷོ་ཕྱོགས་
སམ་སློབ་དཔོན་གྱི་མདུན་ཏུ་རིགས་དྲུག་གི་དཀྱིལ་འཁོར་དང་ཐུབ་དུག་གི་སྐུ་བཀོད། མཚན་བྱང་གདན་ཏུ་བཞག་པ་སོགས་ཆས་རྣམས་ཚོགས་པར་བྱས་ལ། ཐོག་མར་ར་མདའ་སྦྲན་བ་ནི་ཐལ་མོ་སྦྱར་ལ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐུགས་རྗེ་དང་ལྡན་པ༔ མཁྱེན་པ་དང་ལྡན་པ༔ སྤྱན་དང་ལྡན་པ༔ བརྩེ་བ་དང་ལྡན་པ༔ འགྲོ་བའི་སྐྱབས་སུ་གྱུར་པ་རྣམས་ཐུགས་རྗེའི་དབང་གིས་གནས་འདིར་བྱོན་ཅིག༔དངོས་སུ་འབྱོར་པ་དང་ཡིད་ཀྱིས་སྤྲུལ་པའི་མཆོད་པ་བཞེས་ཤིག༔ཐུགས་རྗེ་ཅན་ཁྱེད་རྣམས་ལ་མཁྱེན་པའི་ཡེ་ཤེས༔ བརྩེ་བའི་ཐུགས་རྗེ༔ མཛད་པའི་ཕྲིན་ལས༔ སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས༔ ཐུགས་རྗེ་ཅན་ཁྱེད་རྣམས་ཀྱིས་ཚེ་ལས་འདས་པ་ཆེ་གེ་མོ་ཞེས་བྱ་བ་འདི་ནི་འཇིག་རྟེན་འདི་ནས་ཕ་རོལ་དུ་ནི་འགྲོ༔ འཇིག་རྟེན་འདི་ནི་བོར༔ སྐྱེས་ཆེན་པོ་ནི་འདེགས༔ གྲོགས་ནི་མེད༔ སྡུག་བསྔལ་ནི་ཆེ༔ སྐྱབས་ནི་མེད༔ མགོན་ནི་མེད༔ དཔུང་གཉེན་ནི་མེད༔ ཚེ་འདིའི་སྣང་བ་ནི་ནུབ༔ འགྲོ་བ་གཞན་ཏུ་ནི་འགྲོ༔ མུན་ནག་འཐུག་པོར་ནི་འཇུག༔ གཡང་ས་ཆེན་པོར་ན་ལྟུང་༔ ༔
ནགས་ཁྲོད་འཐུག་པོར་ནི་འཇུག༔ ལས་ཀྱི་དབང་གིས་ནི་དད༔ དགོན་པ་ཆེན་པོར་ནི་འགྲོ༔ རྒྱ་མཚོ་ཆེན་པོས་ནི་ཁྱེར༔ ལས་ཀྱི་རླུང་གིས་ནི་བདས༔ ས་ཚུགས་མེད་པའི་ཕྱོགས་སུ་ནི་འགྲོ༔ གཡུལ་ངོ་ཆེན་པོར་ནི་འཇུག༔ གདོན་ཆེན་པོས་ནི་ཟིན༔ གཤིན་རྗེའི་ཕོ་ཉ་ལ་ནི་འཇིགས་ཤིང་སྐྲག༔ ལས་ཀྱི་སྲིད་པ་ན་ཡང་སྲིད་པ་ལ་ནི་འཇུག༔ དབང་ནི་མེད༔ གཅིག་པུར་འགྲོ་དགོས་པའི་དུས་ལ་བབས་ན༔ ཐུགས་རྗེ་ཅན་ཁྱེད་རྣམས་ཀྱིས་ཚེ་ལས་འདས་པ་ཆེ་གེ་སྐྱབས་མེད་པ་རྣམས་ལ་སྐྱབས་མཛོད་ཅིག༔ མགོན་མེད་པ་རྣམས་ལ་མགོན་མཛོད་ཅིག༔ དཔུང་གཉེན་མེད་པ་རྣམས་ལ་དཔུང་གཉེན་མཛོད་ཅིག༔ བར་དོའི་མུན་ནག་ཆེན་པོ་ལས་སྐྱོབས་ཤིག༔ ལས་ཀྱི་རླུང་དམར་ཆེན་པོ་ལས་ཟློག་ཅིག༔ གཤིན་རྗེའི་འཇིགས་སྐྲག་ཆེན་པོ་ལས་སྐྱོབས་ཤིག༔ བར་དོའི་འཕྲང་རིང་ཆེན་པོ་ལས་སྒྲོལ་ཅིག༔ ཐུགས་རྗེ་ཅན་ཁྱེད་རྣམས་ཐུགས་རྗེ་མ་ཆུང་ཞིག༔ རབ་མདའ་མཛོད་ཅིག༔ ངན་སོང་གསུམ་དུ་མ་བཏང་ཞིག༔ སྔོན་གྱི་དམ་བཅའ་མ་གཡེལ་བར༔ ཐུགས་རྗེའི་ཤུགས་མྱུར་དུ་ཕྱུངས་ཤིག༔ སངས་རྒྱས་དང་བྱང་ཆུབ་སེམས་
དཔའ་རྣམས་ཀྱིས་ཆེ་གེ་མོ་འདི་ལ་ཐུགས་རྗེ་དང་ནུས་པ་མ་ཆུང་ཞིག༔ ཐུགས་རྗེས་ཟུངས་ཤིག༔ སེམས་ཅན་ལས་ངན་པའི་དབང་དུ་མ་བཏང་ཞིག༔ དཀོན་མཆོག་གསུམ་གྱིས་བར་དོའི་སྡུག་བསྔལ་ལས་བསྐྱབ་ཏུ་གསོལ༔ཚིག་རྗེས་ལ་ལན་གསུམ་བྱ། དེ་ནས་གཏེར་གཞུང་ལས་ས་བཅད་བཅུར་གསུངས་པའི་དང་པོ་གཤེད་དང་བྲལ་བ་ལའང་། ཐོག་མར་རྟེན་བསྐྱེད་པ་ནི། མཚན་བྱང་ལས་བུམ་ཆུས་བྲན་ལ། ཨོཾ་མ་ཧཱ་ཤྲཱི་ཧེ་རུ་ཀ་ཨུཙྪ་ཊ་ཡ་ཕཊ༔ ཨོཾ་སྭ་བྷཱ་ཝ་སོགས་ཀྱིས་བསང་སྦྱང་། སྟོང་པའི་ངང་ལས་ཡི་གེ་ནྀྲ་ཡིག་ལས་ཚེ་འདས་དེ་ཉིད་གསོན་པོའི་གནས་སྐབས་དང་འདྲ་བ་ལས་བཀྲག་མདངས་འོད་དང་ལྡན་པ། ཕྱག་ན་མེ་ཏོག་པདྨ་འདབ་བརྒྱད་བསྣམས་ནས་ཕྱོགས་བཅུའི་བླ་མ་དཀོན་མཆོག་ལ་སྐྱབས་ཞུ་བའི་འདུན་པ་མཛད་པར་གྱུར༔ རྣམ་ཤེས་འགུགས་པ་ནི། ཧཱུྃ། བདག་ཉིད་རྡོ་རྗེ་སེམས་དཔའི་ཐུགས་ཀ་ནས༔ ཧཱུྃ་ལས་འོད་འཕྲོས་ཚེ་འདས་རྣམ་ཤེས་དེ༔ རིགས་དྲུག་གང་ན་ཡོད་པའི་ས་དེ་ན༔ བདག་གིས་འོད་ཀྱིས་རེག་མ་ཐག་ཏུ་ནི༔ རྣམ་ཤེས་ནྀྲ་དེ་ཨ་དཀར་གཅིག་ཏུ་གྱུར༔ མདུན་ཏུ་བཀུག་ནས་མཚན་བྱང་རྟེན་ལ་བསྟིམ༔ ཨོཾ་བཛྲ་སཏྭ་སོགས་ཡིག་བརྒྱ་
དང་། ནྲི་ཡཾ་ཛཿབཛྲ་ཨཾ་ཀུ་ཤ་ཛཿ ཞེས་དང་། སློབ་དཔོན་གྱིས་ལྕགས་ཀྱུའི་ཕྱག་རྒྱ་དང་བྱམས་སྙིང་རྗེ་བསྒོམ་ཞིང་། ན་མོ། སངས་རྒྱས་ཀྱི་བཀའ་བདེན་པ་དང་༔ ཆོས་ཀྱི་བཀའ་བདེན་པ་དང་༔ དགེ་འདུན་གྱི་བཀའ་བདེན་པ་དང་༔ བཅོམ་ལྡན་འདས་ཀུན་ཏུ་བཟང་པོ་རྡོ་རྗེ་སེམས་དཔའ་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱི་བཀའ་བདེན་པས༔ ཆེ་གེ་མོའི་རྣམ་པར་ཤེས་པ་ས་འོག་ས་སྟེང་ས་བླ་འགྲོ་བ་རིགས་དྲུག་ལམ་རྒྱུད་ལྔ་སྲིད་པ་བར་དོ་གར་ཡོད་པའི་ས་ནས་མཚན་བྱང་འདི་ལ་ཁུག་ཅིག༔ ལན་གསུམ། ཚེ་འདས་ལུས་བརྗེས་རིག་ཀྱི་བུ་ཁྱོད་ཀྱང་༔ བྱམས་སྡུག་བརྩེ་བའི་གཉེན་བཤེས་གྲོགས་རྣམས་དང་༔ རྟག་ཏུ་འགྲོགས་པའི་སྐལ་དང་དབང་མེད་པས༔ མི་ལུས་ཚེ་འཕོས་འཇིག་རྟེན་སྣང་བ་ནུབ༔ རྣམ་ཤེས་སེམས་ནི་མི་རྟག་ཚུལ་བསྟན་ཏེ༔ ལས་ཀྱི་དབང་གིས་ཕ་རོལ་ལུས་ཤིག་བླངས༔ ཉོན་མོང་འཁོར་བའི་སྡུག་བསྔལ་སྐྱེད་པ་ཡི༔ སྐྱེ་གནས་བཞི་པོ་ལྟུང་བའི་སར་སྐྱེས་ཀྱང་༔ གར་སྐྱེས་གང་ན་གནས་པའི་ས་ཕྱོགས་ནས༔བརྩེ་གདུང་ཡིད་ལ་གཅགས་པའི་གཉེན་འབྲེལ་གྱིས༔དཀོན་མཆོག་
གསུམ་ལ་སྐྱབས་གསོལ་མཐུ་རྩལ་དང་༔ སངས་རྒྱས་མཐུ་སྟོབས་ཆེན་པོའི་བྱིན་རླབས་དང་༔ ཆོས་ཉིད་རྣམ་པར་དག་པའི་བདེན་པ་དང་༔ སྔགས་འཆང་རྩེ་གཅིག་བསྒྲུབས་པའི་བྱིན་རླབས་དང་༔ ཞི་ཁྲོ་རབ་འབྱམས་ལྷ་ཚོགས་ཐུགས་རྗེ་ཡིས༔ ལུས་མེད་སྟོང་གཟུགས་བར་དོའི་རྣམ་ཤེས་ཁྱོད༔ ལས་དང་ཉོན་མོངས་དབང་གིས་གར་འཁྱམས་ཀྱང་༔ དཀོན་མཆོག་གསུམ་གྱི་བདེན་པས་འདིར་ཁུག་ཅིག༔ གཤེར་ཕྲལ་བ་ལ། གཏོར་མ་ཆང་བུ་མར་མེ་བཅས་པ་བཤམས། ཨོཾ་བཛྲ་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་ལན་ཆགས་བགེགས་ཀྱི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་དང་ལྡན་པར་གྱུར༔ ཨོཾ་ཨཱཿཧཱུྃ་ན་མ་སརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱ་སརྦ་ཐཱ་ཁཾ་ཨུཏྒ་ཏེ་སྥ་ར་་ཨི་མཾ་ག་ག་ན་ཁཾ་གྲྀཧྞེ་དཾ་བ་ལྱཱ་དི་སྭཱ་ཧཱ༔ཞེས་ལན་གསུམ་དང་། ཚེ་ལས་འདས་པ་གསོན་གྱི་དུས་སུ་ཚེ་ལ་བར་དུ་གཅོད་ཅིང་། གཤིན་གྱི་དུས་ན་སྡིག་པ་སྦྱོང་བ་ལ་བར་དུ་གཅོད་པའི་གདོན་བགེགས་ཐམས་ཅད་གཏོར་མ་
འདིས་ཚིམ་པར་གྱིས་ལ་དཔག་ཚད་དང་རྒྱང་གྲགས་སུ་མ་གནས་པར་སོང་ཞིག༔ གལ་ཏེ་མི་འགྲོ་ན་ཡེ་ཤེས་ཀྱི་རྡོ་རྗེ་འབར་བས་མགོ་བོ་ཚལ་པ་བརྒྱར་འགས་པར་གྱུར་ཏེ་རེ། ས་དང་ལམ་ལ་བར་དུ་གཅོད་བྱེད་ཅིང་༔ སྲོག་གཅོད་མདངས་འཕྲོག་གཤེད་མའི་བགེགས་ཚོགས་རྣམས༔ མཐུ་སྟོབས་བྱིན་རླབས་མཐུ་ཡིས་གཞན་དུ་དེངས༔ ཧཱུྃ། ང་ཉིད་ལྷ་ཡི་ང་རྒྱལ་གྱིས༔ འོད་དང་འོད་ཟེར་ཕྱོགས་བཅུར་འཕྲོས༔ སྟེང་འོག་ཕྱོགས་མཚམས་ཐམས་ཅད་ཀུན༔ རང་རིག་སྟོང་གསལ་རིག་པའི་མདངས༔ ཀུན་བཟང་རིགས་ལྔ་རྡོ་རྗེ་སེམས༔ རབ་འཇིགས་ཁྲག་འཐུང་སྤྲུལ་པའི་ཚོགས༔ སྣང་ལ་རང་བཞིན་མེད་པ་ཡིས༔ རབ་ཏུ་གང་ནས་འོད་འཕྲོས་པས༔ ཚེ་འདས་འདི་ལ་གནོད་བྱེད་ཅིང་༔ སྲོག་གཅོད་མདངས་འཕྲོག་གཤིན་ལྕགས་བགེགས༔ ཉོན་མོངས་མ་རིག་རྒྱུ་ལས་བྱུང་༔ རྒྱུ་དྲུག་འཁོར་བའི་ལམ་དགག་ཕྱིར༔ འདི་རུ་མ་འདུག་གཞན་དུ་དེངས༔ ཧཱུྃ་ཧཱུྃ་ཨུ་ཙ་ཏ་ཡ་ཕཊ༔ ཨོཾ་སུ་མྲ་བྷ་ནི་སོགས་དྲག་ཏུ་བརྗོད་ཅིང་ཡུངས་ཐུན་འཐོར། མཚོན་ཆ་ལྔ་ཡི་གུར་དུ་གྱུར་ནས་
གཤེད་དང་བགེགས་ཀྱིས་བསྐལ་བར་མི་མཐོང་བར་གྱུར༔ ཨོཾ་བཛྲ་ཏིཀྵ་་ཀརྨ་ཀཱི་ལ་ཡ་ཛྭ་ལ་རཾ་རཾ་ཧཱུྃ་ཧཱུྃ༔ གྲི་ཁྲོལ་དགོས་པ་ཡིན་ན་ཐུགས་གསང་ལས་འབྱུང་བ་ལྟར་སྐབས་འདིར་སྦྱར་དཀྱུས་ལ་མི་དགོས། གཉིས་པ་རིགས་དྲུག་སོ་སོའི་གནས་ནས་འགུགས་པ་ནི། ཧཱུྃ། ཚེ་འདས་ལུས་བརྗེས་བར་དོའི་རྣམ་ཤེས་ཁྱོད༔ གར་སྐྱེས་གང་ན་གནས་པའི་ས་ཕྱོགས་ནས༔ ༔ཀུན་བཟང་ཞི་ཁྲོ་རབ་འབྱམས་ཐུགས་རྗེ་ཡིས༔ འོག་མིན་གནས་སུ་སངས་རྒྱས་སྐུར་བསྐྱེད་ཅིང་༔ ལུས་དང་སེམས་སུ་བྲལ་བའི་ཚེ་འདས་ཁྱོད༔ མིང་གཞིའི་ཕུང་པོ་ཐོགས་པ་མེད་པའི་ལུས༔ དངོས་པོ་གཟུགས་མེད་གནས་སུ་ཕྱིན་པ་སྟེ༔ རྒྱལ་བའི་འོད་ཟེར་ལྕགས་ཀྱུ་རྣོན་པོ་ཡིས༔ མི་ལུས་ཉམས་དགའི་གནས་སུ་འགུགས་བྱེད་པས༔ རེ་དོགས་མེད་པའི་སེམས་ཀྱིས་འདིར་ཤོག་ཅིག༔ ཨ་ནྀྲ་སུ་ཏྲི་པྲེ་དུམ་མ་ཨཾ་ཀུ་ཤ་ཛཿ ཞེས་བཀུག་ནས་བྱང་བུ་ཉེ་འབྲེལ་ལམ་ལས་རྡོར་གྱིས་བཏེགས་ལ། གསུམ་པ་རྣམ་ཤེས་རྟེན་ལ་བསྟིམ་པ་ནི། ཀྱེ་མ༔ དབང་མེད་ལས་ཀྱིས་ཕ་རོལ་ཚེ་འཕོས་ཁྱོད༔ མི་ཡི་ཡུལ་དུ་སྐྱེ་བ་གྲངས་མེད་ཀྱང་༔ ལུས་ཀྱིས་འབྲེལ་བའི་འདུག་ས་འདི་ཡིན་
པས༔ འཕན་ཕྲན་མཛེས་པ་འདི་ནི་ལུས་ཀྱི་རྟེན༔ གསེར་བྱང་མིང་བྲིས་འདི་ནི་ངག་གི་རྟེན༔ མེ་ལོང་གསལ་བ་འདི་ནི་སེམས་ཀྱི་རྟེན༔ རས་ཕྲུག་དྲི་མེད་འདི་ནི་གོས་ཀྱི་རྟེན༔ གདུགས་ཆེན་འབར་བ་འདི་ནི་གཞལ་ཡས་ཁང་༔ ལེབ་ཕྱིང་དཀར་པོ་འདི་ནི་འདུག་པའི་གདན༔ རྦ་སྨྱུག་ལྡེམ་པ་འདི་ནི་འཇུ་པའི་ཤིང་༔ ཐོགས་མེད་འཇའ་ཚོན་འདྲ་བའི་ཡིད་ལུས་ཁྱོད༔ དམིགས་པའི་རྟེན་འཛུག་འདི་ལ་གནས་པར་གྱིས༔ ཚེ་ལས་འདས་པ་ཆེ་གེ་མོ་ཏིཥྛ་བཛྲ་ས་མ་ཡ་ལྷན༔ བྱང་བུ་སློབ་དཔོན་གྱི་མདུན་ཏུ་ཕྱིང་དཀར་གྱི་གདན་ལ་བཞག །བཞི་པ་སྒྲིབ་སྦྱོང་དུག་ཞུས་བྱ་བའི་ཐོག་མར་ལག་ལེན་ལྟར་ལྷ་ཁྲུས་གསོལ་བ་ལ། ལས་རྡོར་གྱིས་དཀྱིལ་འཁོར་མདུན་ཁྲུས་ཀྱི་ཕྱག་ལེན་མཐོང་བརྒྱུད་ལྟར་བྱ་ཞིང་། ཁྲུས་ཀྱི་ཁང་པ་ཤིན་ཏུ་དྲི་ཞིམ་སོགས་ཀྱིས་ཁྲུས་ཁང་བསྐྱེད། ཇི་ལྟར་བལྟམས་པ་སོགས། འདི་ནི་ཁྲུས་མཆོག་སོགས། བརྗོད་མེད་ཤེས་རབ་མི་གཡོ་ཆོས་ཀྱི་སྐུ༔ བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ༔ ཐུགས་རྗེ་ཐབས་མཁས་རྒྱ་ཆེན་རོལ་པའི་ལྷ༔ ཞི་ཁྲོ་སྐུ་གསུམ་ལྷ་ལ་སྐུ་ཁྲུས་གསོལ༔སྔགས་དང་། དེ་བཞིན་གཤེགས་པ་
རྣམས་དང་སོགས་སོ་སོའི་བར་མཚམས་རྣམས་སུ་སྔགས་བཅས་ཁྲུས་གསོལ། དེ་དག་སྐུ་ལ་སོགས་སྐུ་ཕྱི། དེ་ནས་དེ་ལ་སོགས་ཀྱིས་གོས་ཟུང་ཕུལ། དེ་ནས་ཁྲུས་ཆུ་ལས་བུམ་དུ་བླུགས་པ། སློབ་དཔོན་གྱིས་མཚན་བྱང་ལ་ཁྲུས་བྱ་ཞིང་། ཧཱུྃ། འདི་ནི་སྦྱིན་པའི་རང་བཞིན་ཆུ༔ སེར་སྣའི་དྲི་མ་སྦྱང་མཛད་པ༔ སྦྱིན་པ་ཉིད་ལ་ལེགས་འགོད་ཆུ༔ སྦྱིན་པའི་ཆུ་ཡིས་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཨོཾ་བཛྲ་སཏྭ་ས་མ་ཡ༔ སོགས་ཡི་གེ་བརྒྱ་པའི་མཐར། ན་མཿསརྦ་ཏ་ཐཱ་ག་ཏ་ཨ་བྷིཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ༔ འདི་ནི་ཚུལ་ཁྲིམས་རང་བཞིན༴ འཆལ་བའི་དྲི་མ༴ ཚུལ་ཁྲིམས་ཉིད་ལ༴ ཚུལ་ཁྲིམས་ཆུ་ཡིས༴ ཁྲུས་ལེགས་མཛད་ལ༴ སྔགས་སྔར་ལྟར་བརྗོད་པ་འགྲེ། འདི་ནི་བཟོད་པའི༴ ཁང་ཁྲོའི་དྲི་མ་སྦྱང་མཛད༴ བཟོད་པ་ཉིད་ལ༴ བཟོད་པའི་ཆུ་ཡིས༴ ཁྲུས་ལེགས་མཛད་ལ༴ སྔགས་བརྗོད༴ འདི་ནི་བརྩོན་འགྲུས༴ ལེ་ལོའི་དྲི་མ༴ བརྩོན་འགྲུས་ཉིད་ལ་ལེགས་འགོད༴ བརྩོན་འགྲུས་ཆུ་ཡིས༴ ཁྲུས་ལེགས་མཛད་ལ༴ སྔགས་དང་། འདི་ནི་བསམ་གཏན༴ གཡེང་བའི་དྲི་མ༴ བསམ་གཏན་ཉིད་ལ༴ །
བསམ་གཏན་ཆུ་ཡིས༴ ཁྲུས་ལེགས་མཛད་ལ༴ སྔགས་དང་། འདི་ནི་ཤེས་རབ༴ གཏི་མུག་དྲི་མ༔ ཤེས་རབ་ཉིད་ལ༴ ཤེས་རབ་ཆུ་ཡིས༴ ཁྲུས་ལེགས་མཛད་ལ༴ སྔགས་དང་། འདི་ནི་ཐབས་ཀྱི༴ ཐབས་ཀྱི་དྲི་མ༴ ཐབས་ཆེན་ཉིད་ལ༴ ཐབས་ཀྱི་ཆུ་ཡིས༴ ཁྲུས་ལེགས་མཛད་ལ༴ སྔགས་དང་། འདི་ནི་སྟོབས་ཀྱི༴ སྟོབས་ཆེན་ཉིད་ལ༴ སྟོབས་ཀྱི་ཆུ་ཡིས༴ ཁྲུས་ལེགས་མཛད་ལ༴ སྔགས་དང་། འདི་ནི་སྨོན་ལམ༴ སྨོན་ལམ་དྲི་མ༴ སྨོན་ལམ་ཉིད་ལ༴ སྨོན་ལམ་ཆུ་ཡིས༴ ཁྲུས་ལེགས་མཛད་ལ༴ སྔགས་དང་། འདི་ནི་ཡེ་ཤེས༴ མི་ཤེས་དྲི་མ༴ ཡེ་ཤེས་ཉིད་ལ༴ ཡེ་ཤེས་ཆུ་ཡིས༴ ཁྲུས་ལེགས་མཛད་ལ༴ སྔགས་གོང་བཞིན་བརྗོད། དེ་ནས་ཀུ་ཤ་དང་རྨ་བྱའི་སྒྲོས་བྱབ་ལ། འདོད་ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན་དུག་གསུམ་སྟེ༔ རྡོ་རྗེ་སེམས་དཔའ་དུག་མི་མངའ༔ སངས་རྒྱས་བདེན་པས་དུག་བཅོམ་མོ༔ བདེན་པ་གང་གིས་སངས་རྒྱས་རྣམས༔ འཇིག་རྟེན་ཀུན་ཏུ་བླ་ན་མེད༔ བདེན་པའི་མཆོག་
ནི་འདི་དག་གིས༔ ཁྱོད་ཀྱི་ཞེ་སྡང་དུག་རྣམས་ནི༔ རང་བཞིན་མེད་པར་དག་གྱུར་ཅིག༔ འདོད་ཆགས་ཞེ་སྡང་གཏི་མུག༴ འདི་དག་འཇིག་རྟེན༴ རྣམ་པར་སྣང་མཛད་དུག་མི༴ སངས་རྒྱས་བདེན་པས༴ བདེན་པ་གང་གི༴ འཇིག་རྟེན་ཀུན་ཏུ༴ བདེན་པའི་མཆོག་ནི༴ ཁྱོད་ཀྱི་གཏི་མུག་དུག༴ རང་བཞིན་མེད་པར༴ འདོད་ཆགས་ཞེ་སྡང་༴ འདི་དག་འཇིག་རྟེན༴ རིན་ཆེན་འབྱུང་ལྡན་དུག་མི༴ སངས་རྒྱས་བདེན་པས༴ བདེན་པ་གང་གི༴ འཇིག་རྟེན་ཀུན་ཏུ༴ བདེན་པའི་མཆོག་ནི༴ ཁྱོད་ཀྱི་ང་རྒྱལ་དུག༴ རང་བཞིན་མེད་པར༴ འདོད་ཆགས་ཞེ་སྡང་༴ འདི་དག་འཇིག་རྟེན༴ སྣང་བ་མཐའ་ཡས་དུག་མི༴ སངས་རྒྱས་བདེན་པས༴ བདེན་པ་གང་གི༴ འཇིག་རྟེན་ཀུན་ཏུ༴ བདེན་པའི་མཆོག་ནི༴ ཁྱོད་ཀྱི་འདོད་ཆགས་དུག༴ རང་བཞིན་མེད་པར༴ འདོད་ཆགས་ཞེ་སྡང་༴ འདི་དག་འཇིག་རྟེན༴ དོན་ཡོད་གྲུབ་བདུག་མི༴ སངས་རྒྱས་བདེན་པས༴ བདེན་པ་གང་གི༴ འཇིག་རྟེན་ཀུན་ཏུ༴ བདེན་པའི་མཆོག་ནི༴ ཁྱོད་ཀྱི་ཕྲག་དོག་དུག༴ རང་བཞིན་མེད་
པར་དག་གྱུར་ཅིག༔ བསྡུས་པར་བྱེད་ན། འདོད་ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན༴ བཅོམ་ལྡན་སངས་རྒྱས་དུག་མི་མངའ༔ སངས་རྒྱས་བདེན་པས༴ འདོད་ཆགས་ཞེ་སྡང་༴ འདི་དག་འཇིག་རྟེན༴ བཅོམ་ལྡན་དམ་ཆོས་དུག་མི༴ དམ་ཆོས་བདེན་པས༴ འདོད་ཆགས་ཞེ་སྡང་༴ འདི་དག་འཇིག་རྟེན༴ བཅོམ་ལྡན་དགེ་འདུན་དུག་མི༴ དགེ་འདུན་བདེན་པས་དུག་བཅོམ་མོ༔ དེ་ནས་བྱེ་མས་བྲབ་ཅིང་། བདེན་པའི་བདེན་ཚིག་འདི་དག་གིས༔ ཁྱོད་ལུས་དུག་གིས་མི་ཚུགས་ཤོག༔ ཤིན་གང་དུག་དང་བཅས་པ་རྣམས༔ དེ་ཀུན་འདོད་ཆགས་དུག་ལས་བྱུང་༔ འདོད་ཆགས་འདི་ནི་དུག་གི་མཆོག༔ དྲག་པོའི་དུག་ནི་དུག་བཅོམ་མོ༔ ཤིན་གང་བ་ནི་འབྱུང་རྡུལ་ཚོགས་པ་བརྟེན་པ་སྣོད༔ ཤིན་ཏུ་གང་བ་ནི་དེ་སྟེང་ཉོན་མོངས་པའི་སྲོག་ཞུགས་པ་ཡིན་ཅེས་གྲ་ལྔའི་འགྲེལ་པར་བཤད། མཆན། གང་དུག་དང་བཅས་པ་རྣམས༔ དེ་ཀུན་ཞེ་སྡང་དུག་ལས་བྱུང་༔ ཞེ་སྡང་དུག་ནི་དུག་གི་མཆོག༔ དྲག་པོའི་དུག་ནི་དུག་བཅོམ་མོ༔ ཤིན་གང་དུག་དང་བཅས་པ་རྣམས༔ དེ་ཀུན་གཏི་མུག་དུག་ལས་བྱུང་༔ གཏི་མུག་འདི་ནི་དུག་
གི་མཆོག༔ དྲག་པོའི་དུག་ནི་དུག་བཅོམ་མོ༔ ཀཾ་ཀ་ནི་དང་པོ་དྷི་བརྗོད། མ་མ་ཀོ་ལིས་མནྟཿ ཚེ་ལས་འདས་པའི་ལས་དང་བག་ཆགས་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ ཞེས་བྲབ། དེ་ནས་འབྱུང་བཞིའི་དུག་སྦྱོང་བ་ནི། ས་ཆུ་མེ་རླུང་རྣམས་ཀྱིས་རིམ་བཞིན་བསྐོར་ཞིང་བྱ་བ་ལ། ས་ནི་དུག་གི་ཕ་ཡིན་ཏེ༔ ས་ནི་དུག་གི་མ་ཡང་ཡིན༔ བདེན་པའི་བདེན་ཚིག་འདི་བརྗོད་པས༔ དུག་རྣམས་ས་ཡི་ནང་དུ་སོང་༔ གང་བའི་སྣོད་དུ་དུག་སོང་ལ༔ ཁྱོད་ཀྱི་དུག་ནི་དུག་མེད་ཤོག༔ ཆུ་ནི་དུག་གི་ཕ༴ ཆུ་ནི་དུག་གི་མ༴ བདེན་པའི་བདེན་ཚིག༴ དུག་རྣམས་ཆུ་ཡི༴ གང་བའི་སྣོད་དུ་དུག༴ ཁྱོད་ཀྱི་དུག་ནི༴ མེ་ནི་དུག་གི་བ༴ མེ་ནི་དུག་གི་མ༴ བདེན་པའི་བདེན་ཚིག༴ དུག་རྣམས་མེ་ཡི༴ གང་བའི་སྣོད་དུ་དུག༴ ཁྱོད་ཀྱི་དུག་ནི༴ རླུང་ནི་དུག་གི་ཕ༴ རླུང་ནི་དུག་གི་མ༴ བདེན་པའི་བདེན་ཚིག༴ དུགུ་རྣམས་རླུང་གི༴ གང་བའི་སྣོད་དུ་དུག༴ ཁྱོད་ཀྱི་དུག་ནི་དུག་མེད་ཤོག༔ སངས་རྒྱས་རྣམས་ཀྱི་དུག་བཅོམ་པས༔ རྫོགས་སངས་རྒྱས་ལ་སྐྱབས་སུ་སོང་༔ དམ་ཆོས་རྣམས་
ཀྱིས་དུག་བཅོམ་པས༔ དམ་ཆོས་རྣམས་ལ་སྐྱབས་སུ་སོང་༔ དགེ་འདུན་རྣམས་ཀྱིས་དུག་བཅོམ་པས༔ དགེ་འདུན་རྣམས་ལ་སྐྱབས་སུ་སོང་༔ དཀོན་མཆོག་གསུམ་གྱི་བདེན་པ་དང་༔ ཏིང་འཛིན་སྔགས་ཀྱི་བྱིན་རླབས་ཀྱིས༔ ཚེ་འདས་རིགས་ཀྱི་བུ་ཁྱོད་ཀྱི༔ དུག་རྣམས་གཏན་ནས་དག་གྱུར་ཅིག༔ ཡིག་བརྒྱ་དང་ཀཾ་ཀ་ནི། ཨོཾ་ཨཱཿཧཱུྃ་སྭཱ་ཧཱཿ ཨོཾ་ཨ་བྷྱ་རྒྱ་ཏཾ་ཀོ་ཚེ་ལས་འདས་པའི་སྡིག་པ་དང་སྒྲིབ་པ་ཐམས་ཅད་ཤཱནྟི་ཾ་ཀུ་རུ་སྭཱ་ཧཱཿཞེས་བྱམས་བྲབ་བོ།། ༈ །།དེ་ནས་ཆོས་བཤད་མདོར་བསྡུས་བྱེད་ན་སློབ་དཔོན་གྱིས། ཀྱེ་མ། ཚེ་འདས་ཁྱོད་ཉིད་གཅིག་པུར་ཤི་སྙམ་སྟེཿ ཐམས་ཅད་མི་རྟག་འཆི་བའི་ཆོས་ཅན་ཡིན༔ བར་དོར་འཁྱམས་པའི་རྣམ་ཤེས་རྟེན་མེད་ཁྱོད༔ བླ་མ་ལྷ་ལ་བག་ཆགས་དྲན་པར་གྱིས༔ ཐུགས་རྗེས་བཟུང་བའི་གནས་འདིར་མྱུར་དུ་ཤོག༔ དགའ་དང་གུས་པའི་བསམ་པ་རབ་ཏུ་སྐྱེད༔ དགེ་སྡིག་ཆོས་ལ་སྤང་ལེན་ཤེས་པར་གྱིས༔ བདག་འཛིན་འཁོར་བའི་རྩ་བ་རང་སར་གྲོལ༔ ཀྱེ་མ་ཁྱོད་ལ་ཆོས་ཉིད་བར་དོ་ཤར་དུས་འདིར༔ ཀུན་ལ་སྔངས་སྐྲག་འཇིགས་པ་སྤངས་བྱས་ནས༔ གང་
ཤར་རང་སྣང་རེག་པ་ངོ་ཤེས་བྱ༔ བར་དོའི་སྣང་ཚུལ་ཡིན་པར་ཤེས་པར་བྱ༔ དོན་ཆེན་འགག་ལ་ཐུག་པའི་དུས་ཚོད་འདིར༔ རང་སྣང་ཞི་ཁྲོའི་ཚོགས་ལ་འཇིགས་མི་བྱ༔ ཀྱེ་མ་ཁྱོད་ལ་སྲིད་པ་བར་དོ་འཆར་དུས་འདིར༔ འདུན་པ་རྩེ་གཅིག་སེམས་ལ་བཟུང་བྱས་ནས༔ བཟང་པོ་ལས་ཀྱི་འཕྲོ་ལ་ནན་གྱིས་འཐུད༔ མངལ་སྒོ་བགག་ནས་རུ་ལོག་དྲན་པར་གྱིས༔ སྙིང་རུས་དག་སྣང་དགོས་པའི་དུས་ཤིག་ཡིན༔ མིག་སེར་སྤངས་ནས་བླ་མ་ཡབ་ཡུམ་སྒོམས༔ སངས་རྒྱས་ཆོས་དང་དགེ་འདུན་དྲན་པར་གྱིས༔ བླ་མ་ཡི་དམ་ཏིང་འཛིན་དྲན་པར་གྱིས༔ དུག་ལྔ་སྤོངས་ལ་དགེ་བ་ཡིད་ལ་གྱིས༔ ཆོས་ཞུས་དབང་ཞུས་གསང་མཚན་དྲན་པར་གྱིས༔ སྒྲ་འོད་ཟེར་གསུམ་རང་སྣང་ངོ་ཤེས་མཛོད༔ སརྦ་དྷརྨ་ཀཱ་ཡ་ཨཿ ལྔ་པ་རྒྱུད་ལྔའི་ལྷ་ལ་སྐྱབས་སུ་འགྲོ་ཞིང་རིགས་དྲུག་གི་གནས་ནས་དྲང་བ་ལ། འགྱོད་ཚངས་ཀྱི་ལོ་རྒྱུས་བཤད་པ་གསུངས་པ་ལྟར་བརྒྱུད་པ་རྣམས་ཀྱི་ཕྱག་ལེན་ཏུ་འབྱུང་བས་མདོར་བསྡུས་ཙམ་སྨོས་ན། འོ། སྔོན་ཚེ་བྲམ་ཟེ་དུང་གི་ཕྲེང་བ་ཅན་ཞེས་བྱ་བའི་སློབ་མ་རྒྱལ་པོའི་བུ་ལས་ངན་གྱི་དབང་གིས་ན་རག་གི་གནས་སུ་ལྟུང་བ་ལས༔
དཔལ་ཀུན་ཏུ་བཟང་པོ་དང་ཀུན་རིགས་རྣམ་པར་སྣང་མཛད་གཉིས་ཀྱི་ཐུགས་ལས་རྡོ་རྗེ་སེམས་དཔའ་དང་ཕྱག་ན་རྡོ་རྗེ་གཉིས་སུ་སྤྲུལ་ནས། དབང་བསྐུར་བ་དང་འགྱོད་ཚངས་བྱེད་དུ་བཅུག་ནས་རིག་འཛིན་གྱི་གྲལ་དུ་བཀོད་པ་དང་༔ ཡང་སངས་རྒྱས་འོད་མི་འགྱུར་བ་ཞེས་བྱ་བ་འཇིག་རྟེན་དུ་བྱོན་པའི་དུས་སུ༔ རྒྱལ་བུ་དགེ་མཐོང་ཞེས་བྱ་བ་སྡིག་པ་གྲངས་མ་མཆིས་པ་གཅིག་གིས་དཀོན་མཆོག་གསུམ་གྱི་སྤྱན་སྔར་མཐོལ་བཤགས་བྱས་ནས་སྡིག་པ་ལས་གྲོལ་བ་དང་༔ ཁྱད་པར་དུ་དཔལ་ཀུན་ཏུ་བཟང་པོས་རྣལ་འབྱོར་ཕོ་མོ་རྣམས་ལ་ཉམས་ཆགས་སྐོང་བའི་ཐབས་སུ་བསྟན་པའི་འགྱོད་ཚངས་ཀྱི་རྒྱལ་པོ་འདི་ལྟ་བུའི་དཀྱིལ་འཁོར་མཐོང་བ་དང་༔ ཆོས་དང་འཕྲད་པ་ནི་ཨུ་དུམྦ་རའི་མེ་ཏོག་དང་འདྲ་སྟེ་ཤིན་ཏུ་འབྱུང་བར་དཀའ༔ འདི་ལྟ་བུའི་སྒོར་ཞུགས་ན་བསྐལ་པ་དཔག་ཏུ་མེད་པ་ནས་བསགས་པའི་སྡིག་སྒྲིབ་ཐམས་ཅད་དཀྱིལ་འཁོར་མཐོང་བ་ཙམ་གྱིས་བྱང་ཞིང་དག་པར་འགྱུར་ཏེ༔ རྒྱུད་ལས། གལ་ཏེ་རྣལ་འབྱོར་པ་གང་ཞིག་གིས་དཀྱིལ་འཁོར་གྱི་ལྷ་འདི་རྣམས་ཀྱི་མཚན་རྣ་བར་ལན་
གཅིག་ཐོས་པ་ཙམ་གྱིས་ཀྱང་ན་རག་ཆེན་པོར་མི་ལྟུང་ངོ་༔ ཞེས་སོགས་གསུངས་པའི་དོན་དེ་ལ་དགའ་སྤྲོ་ཁྱད་པར་ཅན་དང་ལྡན་པར་མཛོད་ལ་དད་གུས་ཆེན་པོ་སྐྱེད་ཅིང་གསོལ་འདེབས་ཀྱི་ཚིག་རྣམས་ལའང་རིམ་པར་རྗེས་ཟློས་གྱིས་ཤིག༔ ཀྱེ་མ། མགོན་པོ་ཐུགས་རྗེ་ཅན༔ རིགས་དྲུག་གནས་སུ་ལྟུང་བ་ཡི༔ སྐྱབས་བྲལ་མགོན་མེད་སེམས་ཅན་ལ༔ ཐུགས་རྗེའི་ལྕགས་ཀྱུས་བཟུང་དུ་གསོལ༔ ལན་གསུམ། ཀྱེ་མ། ཚེ་འཕོས་ལུས་བརྗེས་བར་དོའི་ཡིད་ལུས་ཁྱོད༔ སྔོན་ཆད་མ་རིག་རྨོངས་པའི་ལས་དབང་གིས༔ དུག་གསུམ་གྱིས་བཅིངས་ངན་སོང་གསུམ་དུ་མནར༔ དེང་ནས་བརྩམས་ཏེ་རྒྱལ་བའི་ཐུགས་རྗེ་ཡིས༔ ཕོ་ཉས་བཟུང་ནས་རིགས་དྲུག་གནས་ནས་དྲངས༔ དོན་འབྲས་འདོད་ཕྱིར་དད་པའ་ིཤུགས་སྐྱེད་ལ༔ འདྲན་པ་ཐུག་ཆེན་དྲུག་ལ་གསོལ་བ་ཐོབ༔ ཅེས་གདམས་ངག་བསྟན། དེ་ནས་དལ་དང་གླུད་སོགས་ལ་ཆབ་བྲན། ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་རིགས་དྲུག་གི་དལ་རྣམས་རིགས་དྲུག་གི་གནས་དང་དབྱེར་མེད་པ། དེ་དག་གི་གཙོ་བོ་ཐུབ་པ་དྲུག་པོ་ཡང་དཀྱིལ་
འཁོར་ནང་གི་ཐུབ་དྲུག་དང་ཐ་དད་མེད་པ། ཕོ་བྲང་གི་དཀྱིལ་འཁོར་ནི་འོག་མིན་ཆོས་ཀྱི་དབྱིངས་ཀྱི་ཕོ་བྲང་དང་དབྱེར་མེད་པ། སློབ་དཔོན་བདག་ཉིད་རྡོ་རྗེ་སེམས་དཔའི་སྐུ་ལ་ཞི་ཁྲོའི་ལྷ་ཚོགས་ཡོངས་སུ་རྫོགས་པའི་ཐུགས་ཀ་ནས་འོད་ཟེར་ཛཿདམར་པོ་ཁ་བརྒྱད་པའི་སྣ་ལ་ལྕགས་ཀྱུས་མཚན་པས་ཚེ་འདིས་དེའི་སྙིང་ག་ནས་བཟུང་སྟེ་བྱམས་པ་དང་ལྡན་པས་སྐད་ཅིག་ཀྱང་འཆུག་དབང་མེད་པར་རིགས་དྲུག་གི་གནས་ནས་རིམ་པར་འདྲེན་པ། གླུད་གཏོར་འདོད་པའི་ཡོན་ཏན་སྣ་ཚོགས་པས་འཇིག་རྟེན་གང་བས་ལན་ཆགས་བུ་ལོན་སོད་ནུས་པའི་རང་བཞིན་ཏུ་གྱུར༔ ཨོཾ་ཨཱཿཧཱུྃ༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷར་སམྦྷ་ར་ཧཱུྃ༔ ལན་གསུམ་མམ་བདུན་གྱིས་བྱིན་བརླབ། མཚན་བྱང་དམྱལ་བའི་དལ་དུ་བཀོད། དམྱལ་བར་སྐྱེས་པ་དེས་གསོལ་བ་གདབ་པར་བསྒོམ་ལ། ཀྱེ་མ་བདག་འདྲའི་སེམས་ཅན་ལས་ངན་པ༔ ཞེ་སྡང་དྲག་པོའི་ལས་དབང་གིས༔ ན་རག་དམྱལ་བའི་གནས་སུ་སྐྱེས༔ བཙོ་བསྲེག་སྡུག་བསྔལ་བརྗོད་ལས་འདས༔ སྡུག་བསྔལ་འདི་ལས་བདག་སྒྲོལ་མཛོད༔ བརྩེ་བ་ཆེན་པོས་བཟུང་དུ་
གསོལ༔ ལན་ཆགས་འཇལ་བ་ནི། ཧཱུྃ། གཏོར་མ་འདོད་ཡོན་ལྔ་དང་ལྡན་པ་འདི༔ ཚེ་འདས་སྲོག་གི་ལན་ཆགས་བསྙག་པ་ཡི༔ གསོན་བདུད་གཤིན་ལྕགས་ལན་ཆགས་ཁྱོད་ལ་སྦྱིན༔ གཏོར་མ་འདི་ཡིས་མགུ་ཞིང་ཚིམ་གྱིས་ལ༔ ཚེ་འདས་འདི་ཡི་ཐར་པའི་གེགས་མ་བྱེད༔ ཨོཾ་སརྦ་བྷཱུ་ཏ་བ་ལི༚་ཏ་ཁཱ་ཧཱིཿ གླུད་དེ་མཚན་བྱང་ལ་གཡས་གཡོན་ཏུ་བསྐོར་ཞིང་ཕྱིར་དོར། དེ་ནས་ལས་བུམ་ཐོགས་ལ་མེ་ལོང་ངོས་སུ་ཁྲུས་བྱས་ཏེ། འདི་ནི་བཟོད་པའི་རང་བཞིན་ཆུ༔ ཁོང་ཁྲོའི་དྲི་མ་སྦྱོང་མཛད་པ༔ བྱམས་པ་ཆུ་ཡིས་ལེགས་བཀྲུས་པས༔ ཁོང་ཁྲོའི་དྲི་མ་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཨོཾ་ཨ་བྷྱ་རྒྱ་ཏཾ་ཀེ༚། ཚེ་འདས་དམྱལ་བའི་ལས་ངན་སྡིག་སྒྲིབ་ཐམས་ཅད་ཤཱིནྟཾ་ཀུ་རུ་སྭཱ་ཧཱ༔ ཅེས་པ་ཀྲུ་ཞིང་བྱེ་མས་བྲབ་ལ། འདོད་ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན་དུག་གསུམ་སྟེ༔ རྡོ་རྗེ་སེམས་དཔའ་དུག་མི་མངའ༔ ཐུགས་མཆོག་རྡོ་རྗེས་དུག་བཅོམ་མོ༔ ཞེ་སྡང་སྒྲིབ་པ་དག་གྱུར་ཅིག༔ ཧཱུྃ་བཛྲཾ་དྷྲི་ཀྲ༔ མ་མ་ཀོ་ལི༚་ས་མནྟ༔ ཚེ་འདས་ཀྱི་དམྱལ་བའི་ལས་དང་བག་ཆགས་ཐམས་ཅད་ཤཱནྟི
ཀུ་རུ་སྭཱ་ཧཱ༔ བྱེ་མ་རྡོར་སེམས་ཞི་ཁྲོའི་འོད་ཟེར་མེ་ལྕེ་ལྟ་བུས་དམྱལ་བའི་ས་བོན་དུ༔ ནག་པོ་བསྲེགས་ནས་དངོས་མེད་དུ་སོང་བར་བསྒོམ། ཉེ་དུ་ཡོད་ན་དད་མེད་ན་ལས་རྡོར་གྱིས་ཕྱག་འཚལ་ལ། ཀྱེ་མ་ཚེ་འདས་ལུས་བརྗེས་རིགས་ཀྱི་བུ༔ཞེ་སྡང་དྲག་པོས་ཀུན་ནས་བསླངས་ནས་སུ༔ མི་དགེ་བཅུ་དང་ཁྱད་པར་སྲོག་གཅོད་ཀྱིས༔ ན་རག་དམྱལ་བའི་གནས་སུ་སྐྱེ་སྲིད་པས༔ དེ་ལ་མགོན་དང་སྐྱབས་སུ་གྱུར་པ་ནི༔ དམྱལ་བའི་ཐུབ་པ་ཆོས་ཀྱི་རྒྱལ་པོ་བཞུགས༔ དེ་ལ་སྐྱབས་སུ་འགྲོ་བའི་ཚིག་འདི་སྨྲོས༔ ཞེ་སྡང་གཟུང་འཛིན་ཀུན་སྤངས་བདེ་བར་གཤེགས༔ བཟོད་པའི་ཆོས་ཐོབ་ཞེ་སྡང་རྣམ་པར་དག༔ དམྱལ་བའི་ཐུབ་པ་མེ་ཆུ་བསིལ་དྲོད་ཅན༔ དམྱལ་བ་ཚ་གྲང་སྡུག་བསྔལ་སྦྱང་དུ་གསོལ༔ ཆོས་ཀྱི་རྒྱལ་པོ་ཁྱེད་ལ་སྐྱབས་སུ་མཆི༔ བུམ་པ་དབུས་མ་ཐོགས་ལ། ཧཱུྃ། ཀུན་བཟང་ཡབ་ཡུམ་བུམ་པ་ན༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ ཚེ་འདས་ཁྱོད་ལ་དབང་བསྐུར་བས༔ དམྱལ་བའི་སྐྱེ་སྒོ་བཅད་ནས་ནི༔ ན་རག་སྡུག་བསྔལ་བྲལ་བར་ཤོག༔ ཧཱུྃ་བཛྲ་ས་ཏྭ་ས་མ་ཡ༔ སོགས་རྡོར་སེམས་
ཡིག་བརྒྱ་དང་། བཛྲ་ཨ་བྷི་ཥིཉྩ་ཨཱ༔ བུམ་ཆུ་ཡེ་ཤེས་ལྔའི་ཆུ་རྒྱུན་རྩིས་བཀྲུས་པར་བསམ་ལ། བུམ་པ་མཚན་བྱང་སྤྱི་བོར་བཞག་ཚུལ་དང་བྱང་བུའི་གཟུགས་བརྙན་མེ་ལོང་དུ་འཆར་བ་ལ་ཁྲུས་བྱ་ཞིང་། ཨ་ཨ་ཨ༔ ཨ་ཨ་ཨ༔ ཨ་ཨ་ཨ༔ མེ་ཆུ་ཐོགས་ལ། ཧཱུྃ། ཚ་གྲང་སྐྱོབ་བྱེད་མེ་ཆུ་བ་སིལ་དྲོད་ལྡན༔ ཚེ་འདས་རིགས་ཀྱི་བུ་ལ་དབང་བསྐུར་བས༔ དམྱལ་བ་ཚ་གྲང་སྡུག་བསྔལ་ལས་གྲོལ་ནས༔ ནར་ཀ་ཡི་སྡུག་བསྔལ་གྲོལ་བར་ཤོག༔ དུ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུཾ་ཧཱུྃ་ཕཊ༔ ཅེས་ཕྱག་མཚན་གྱིས་དབང་བསྐུར་བ་འགྲེ། ཧཱུྃ། ས་འདི་བཅད་པ་མན་ཆད་ནི༔ ན་རག་དམྱལ་བའི་ས་ཡིན་པས༔ བོར་རོ་སྤང་ངོ་རིགས་ཀྱི་བུ༔ ས་འདི་བཅད་པ་ཡན་ཆད་ནི༔ མཐོ་རིས་བདེ་བའི་ས་ཡིན་པས༔ འདོང་ངོ་གཤེགས་སོ་རིགས་ཀྱི་བུ༔ ཕྱིར་མི་ལྡོག་པའི་ས་ཐོབ་ཤོག༔ རིགས་དྲུག་རིམ་གྱིས་བསྒྲལ་བའི་ཕྱིར༔ ཡ་སིང་ར་རླུང་པ་ལ་ཡ༔ ཕྱིར་མི་ལྡོག་པའི་ས་ཐོབ་ཕྱིར༔ ཨེ་ཀ་ར་་བྷེ་ཙག་ཤ༔ དམྱལ་བའི་དལ་བསྡུས་ལ་རྡོ་རྗེས་ཕྱིར་ལམ་བཅད་ཚུལ་བྱ་བ་འགྲེའོ།། ༈ །།མཚན་བྱང་ཡི་དྭགས་ཀྱི་དལ་དུ་བཀོད༔ ཡི་དྭགས་སུ་སྐྱེས་པ་དེས་གསོལ་བ་གདབ་པར་མོས་ལ། ཀྱེ་མ་བདག་འདྲའི་སེམས་
ཅན་ལས་ངན་པ༔ སེར་སྣ་དྲག་པོའི་ལས་དབང་གིས༔ པྲེ་ཏ་ཡི་དྭགས་གནས་སུ་སྐྱེས༔ བཀྲེས་སྐོམ་སྡུག་བསྔལ་བརྗོད་ལས་འདས༔ སྡུག་བསྔལ་འདི་ལས་བདག་སྒྲོལ་མཛོད༔ བརྩེ་བ་ཆེན་པོས་བཟུང་དུ་གསོལ༔ ལན་ཆགས་འཇལ་བ་ནི། ཧཱུྃ། གཏོར་མ་འདོད་ཡོན་ལྔ་དང་ལྡན་པ་འདི༔ ཚེ་འདས་རྐུ་འཕྲོག་ལན་ཆགས་བསྙག་པ་ཡི༔ གསོན་བདུད་གཤིན་ལྕགས་ལན་ཆགས་ཁྱོད་ལ་སྦྱིན༔ གཏོར་མ་འདི་ཡིས་མགུ་ཞིང་ཚིམས་ཀྱིས་ལ༔ ཚེ་འདས་འདི་ཡི་ཐར་པའི་གེགས་མ་བྱེད༔ ཨོཾ་སརྦ་བྷཱུ་ཏ་བ་ལི༚་ཏ་ཁཱ་ཧི༔ གླུད་གཏོར་ཕྱིར་དོར། ལས་བུམ་ཐོགས་ལ། འདི་ནི་སྦྱིན་པའི་རང་བཞིན་ཆུ༔ སེར་སྣའི་དྲི་མ་སྦྱང་མཛད་པ༔ སྦྱིན་པའི་ཆུ་ཡིས་ལེགས་བཀྲུས་པས༔ སེར་སྣའི་དྲི་མ་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཨོཾ་ཨ་བྷྱ་རྒྱ་ཏཾ་ཀེ༚༔ ཚེ་འདས་ཡི་དྭགས་ཀྱི་ལས་ངན་དང་བག་ཆགས་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ ཅེས་འགུ། བྱེ་མས་གྲབ་ལ། འདོད་ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན་དུག་གསུམ་སྟེ༔ སྣང་བ་མཐའ་ཡས་
དུག་མི་མངའ༔ གསུང་མཆོག་རྡོ་རྗེས་དུག་བཅོམ་མོ༔ འདོད་ཆགས་སྒྲིབ་པ་དག་གྱུར་ཅིག༔ ཨོཾ་ཨ་རོ་ལིཀྲ༔ མ་མ་ཀོ་ལི༚་ས་མནྟ༔ ཚེ་འདས་ཡི་དྭགས་ཀྱི་ལས་དང་བག་ཆགས་ཐམས་ཅད་ཤཱནྟི་ཾཀུ་རུ་སྭཱཧཱ༔ བྱེ་མ་སྣང་མཐའ་ཞི་ཁྲོའི་འོད་ཟེར་མེ་ལྕེ་ལྟ་བུས་ཡི་དྭགས་ཀྱི་ས་བོན་པྲེ་དམར་པོ་རང་བཞིན་མེད་པར་བསྲེགས་པར་བསམས་ལ། ཕྱག་འཚལ་བ་ནི། ཀྱེ་མ་ཚེ་འདས་ལུས་བརྗེས་རིགས་ཀྱི་བུ༔ སེར་སྣ་དྲག་པོས་ཀུན་ནས་བསླངས་ནས་སུ༔ མི་དགེ་བཅུ་དང་སེར་སྣ་འཇུར་གེགས་ཀྱིས༔ བཀྲེས་སྐོམ་ཡི་དྭགས་གནས་སུ་སྐྱེ་སྲིད་པས༔ དེ་ན་མགོན་དང་སྐྱབས་སུ་གྱུར་པ་ནི༔ ཡི་དྭགས་ཐུབ་པ་ཁ་འབར་ཞེས་བྱ་བཞུགས༔ དེ་ལ་སྐྱབས་སུ་འགྲོ་བའི་ཚིག་འདི་སྨྲོས༔ འདོད་ཆགས་གཟུངས་འཛིན་ཀུན་སྤངས་བདེ་བར་གཤེགས༔ སྦྱིན་པའི་ཆོས་ཐོབ་སེར་སྣ་རྣམ་པར་དག༔ ཡི་དྭགས་ཐུབ་པ་ཁ་འབར་རིན་ཆེན་སྒྲོམ༔ ཡི་དྭགས་བཀྲེས་སྐོམ་སྡུག་བསྔལ་སྦྱོང་དུ་གསོལ༔ བཅོམ་ལྡན་ཁ་འབར་ཞབས་ལ་སྐྱབས་སུ་མཆི༔ ནུབ་ཀྱི་བུམ་པ་ཐོགས་ལ། ཧཱུྃ། བདུད་རྩི་དྲི་ལྔའི་བུམ་པ་འདིར༔ བདེ་གཤེགས་གསུང་གི་
ལྷ་ཚོགས་བཞུགས༔ ཚེ་འདས་ཁྱོད་ལ་དབང་བསྐུར་བས༔ ཡི་དྭགས་སྐྱེ་སྒོ་བཅད་ནས་ནི༔ བདེ་བ་ཅན་ཏུ་སྐྱེ་བར་ཤོག༔ ཨཱཾ་པདྨ་ས་ཏྭ་ས་མ་ཡ༔ སོགས་སྣང་མཐའི་ཡིག་བརྒྱ་དང་། པདྨ་ཨ་བྷི་ཥིཉྩ་ཨ༔ བུམ་ཆུ་ཡེ་ཤེས་ལྔའི་ཆུ་རྒྱུན་གྱིས་བཀྲུས་པར་བསམས་ལ། བུམ་པ་མགྲིན་པར་བཞག་ཚུལ་དང་ཁྲུས་བྱ་ཞིང་། བྷྱ་བྷྱ་བྷྱ༔ བྷྱ་བྷྱ་བྷྱ༔ བྷྱ་བྷྱ་བྷྱ༔ སྒྲོམ་བུ་ཐོགས་ལ། ཨཱཿ རིན་ཆེན་སྒོམ་གྱི་བུམ་པ་ན༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ ཚེ་འདས་ཁྱོད་ལ་དབང་བསྐུར་བས༔ པྲེ་ཏ་ཀ་ཡི་སྡུག་བསྔལ་བྲལ་བར་ཤོག༔ པྲེ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུཾ་ཧཱུྃ་ཕཊ༔ ཅེས་དབང་བསྐུར། ཧཱུྃ། ས་འདི་བཅད་པ་མན་ཆད་ནི༔ བཀྲེས་སྐོམ་ཡི་དྭགས་གནས་ཡིན་པས༔ བོར་རོ་སྤོང་ངོ་རིགས་ཀྱི་བུ༔ ས་འདི་བཅད་པ་ཡན་ཆད་ནི༔ མཐོ་རིས་བདེ་བའི་ས་ཡིན་པས༔ འདོང་ངོ་གཤེགས་སོ་རིགས་ཀྱི་བུ༔ ཕྱིར་མི་ལྡོག་པའི་ས་ཐོབ་ཤོག༔ རིགས་དྲུག་རིམ་གྱིས་བསྒྲལ་བའི་ཕྱིར༔ ཡ་སིང་ར་རླུང་པ་ལ་ཡ༔ ཕྱིར་མི་ལྡོག་པའི་ས་ཐོབ་ཕྱིར༔ ཨེ་ཀ་ར་ན་བྷེ་ཙག་ཤ༔ མཚན་བྱང་དུད་འགྲོའི་
དལ་དུ་བཀོད༔ དུད་འགྲོར་སྐྱེས་པ་དེས་གསོལ་བ་གདབ་པར་མོས་ལ། ཀྱེ་མ་བདག་འདྲའི་སེམས་ཅན་ལས་ངན་པ༔ གཏི་མུག་དྲག་པོའི་ལས་དབང་གིས༔ ཏརྻ་དུད་འགྲོའི་གནས་སུ་སྐྱེས༔ བཀོལ་སྤྱོད་སྡུག་བསྔལ་བརྗོད་ལས་འདས༔ སྡུག་བསྔལ་འདི་ལས་བདག་སྒྲོལ་མཛོད༔ བརྩེ་བ་ཆེན་པོས་བཟུང་དུ་གསོལ༔ ལན་ཆགས་འཇལ་བ་ནི། ཧཱུྃ། གཏོར་མ་འདོད་ཡོན་ལྔ་དང་ལྡན་པ་འདི༔ ཚེ་འདས་བཀོལ་སྤྱོད་ལན་ཆགས་བསྙག་པ་ཡི༔ གསོན་བདུད་གཤིན་ལྕགས་ལན་ཆགས་ཁྱོད་ལ་སྦྱིན༔ གཏོར་མ་འདི་ཡིས་མགུ་ཞིང་ཚིམ་གྱིས་ལ༔ ཚེ་འདས་འདི་ཡི་ཐར་པའི་གེགས་མ་བྱེད༔ ཨོཾ་སརྦ་བྷཱུ་ཏ་བ་ལི༚་ཏ་ཁཱ་ཧི༔ གླུད་གཏོར་ཕྱིར་དོར། ལས་བུམ་ཐོགས་ལ། འདི་ནི་ཤེས་རབ་རང་བཞིན་ཆུ༔ མི་ཤེས་དྲི་མ་སྦྱོང་མཛད་པ༔ ཡེ་ཤེས་ཆུ་ཡིས་ལེགས་བཀྲུས་པས༔ གཏི་མུག་དྲི་མ་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཨོཾ་ཨ་བྷྱ་རྒྱ་ཏཾ་ཀེ༚༔ ཚེ་འདས་དུད་འགྲོའི་ལས་ངན་སྡིག་སྒྲིབ་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ ཅེས་བཀྲུ་ཞིང་བྱེ་མས་བྲབ་ལ། འདོད་ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན་དུག་གསུམ་སྟེ༔
རྣམ་པར་སྣང་མཛད་དུག་མི་མངའ༔ སྐུ་མཆོག་རྡོ་རྗེས་དུག་བཅོམ་མོ༔ གཏི་མུག་སྒྲིབ་པ་དག་གྱུར་ཅིག༔ ཨོཾ་ཛི་ན་ཛིཀྲ༔ མ་མ་ཀོ་ལི༚་ས་མནྟ༔ ཚེ་འདས་དུད་འགྲོའི་ལས་དང་བག་ཆགས་ཐམས་ཅད་ཤཱནྟིཾ་ཀུ་རུ་སྭཱ་ཧཱ༔ བྱེ་མ་རྣམ་སྣང་ཞི་ཁྲོའི་འོད་ཟེར་མེ་ལྕེ་ལྟ་བུས་དུད་འགྲོའི་ས་བོན་སུ་སྨུག་ནག་རང་བཞིན་མེད་པར་བསྲེགས་པར་བསམ། ཕྱག་འཚལ་བ་ནི། ཀྱེ་མ་ཚེ་འདས་ལུས་བརྗེས་རིགས་ཀྱི་བུ༔ གཏི་མུག་དྲག་པོས་ཀུན་ནས་བསླངས་ནས་སུ༔ མི་དགེ་བཅུ་དང་ཆོས་ལ་མི་མོས་ཤིང་༔ བླུན་རྨོངས་དབང་གིས་དུད་འགྲོར་སྐྱེ་སྲིད་པས༔ དེ་ན་མགོན་དང་སྐྱབས་སུ་གྱུར་པ་ནི༔ བྱོལ་སོང་ཐུབ་པ་སེང་གེ་རབ་བརྟན་བཞུགས༔ དེ་ལ་སྐྱབས་སུ་འགྲོ་བའི་ཚིག་འདི་སྨྲོས༔ གཏི་མུག་གཟུང་འཛིན་ཀུན་སྤངས་བདེ་བར་གཤེགས༔ ཤེས་རབ་མཚོན་ཐོགས་གཏི་མུག་རྣམ་པར་དག༔ བྱོལ་སོང་ཐུབ་པ་སེང་གེ་པུསྟི་འཛིན༔ དུད་འགྲོ་གླེན་ལྐུགས་སྡུག་བསྔལ་སྦྱང་དུ་གསོལ༔ སེང་གེ་རབ་བརྟན་ཞབས་ལ་སྐྱབས་སུ་མཆི༔ ཤར་གྱི་བུམ་པ་ཐོགས་ལ། ཧཱུྃ། རིན་ཆེན་འབྲུ་ལྔའི་བུམ་པ་འདིར༔ བདེ་གཤེགས་སྐུ་ཡི་ལྷ་ཚོགས་བཞུགས༔
ཚེ་འདས་ཁྱོད་ལ་དབང་བསྐུར་བས༔ དུད་འགྲོའི་སྐྱེ་སྒོ་བཅད་ནས་ནི༔ མངོན་དགའི་ཞིང་དུ་སྐྱེ་བར་ཤོག༔ ཨོཾ་བུངྡྷ་ས་ཏྭ་ས་མ་ཡ༔ སོགས་རྣམ་སྣང་ཡིག་བརྒྱ་དང་། བུངྡྷ་ཨ་བྷི་ཥིཉྩ་ཨཱ༔ བུམ་ཆུ་ཡེ་ཤེས་ལྔའི་ཆུ་རྒྱུན་གྱིས་བཀྲུས་པར་བསམ་ལ། བུམ་པ་གསང་གནས་སུ་བཞག་ཚུལ་དང་ཁྲུས་བྱ་ཞིང་། རྒྱ་རྒྱ་རྒྱ༔ རྒྱ་རྒྱ་རྒྱ༔ རྒྱ་རྒྱ་རྒྱ༔ པུསྟི་ཐོགས་ལ། ཨ། ཤེས་རབ་རིག་པའི་པུསྟི་འདི༔ དུས་གསུམ་རྒྱལ་བ་ཞི་ཁྲོའི་གསུང་༔ ཚེ་འདས་ཁྱོད་ལ་དབང་བསྐུར་བས༔ ཏིརྻ་ཀ་ཡི་སྡུག་བསྔལ་བྲལ་བར་ཤོག༔ སུ་མ་ཐ་མ་ཐ་སརྦ་ཏིརྱ་ཀ་ག་ཏེ་ཧེ་ཏུཾ་ཧཱུྃ་ཕཊ༔ ཅེས་དབང་བསྐུར། ཧཱུྃ། ས་འདི་བཅད་པ་མན་ཆད་ནི༔ གླེན་ལྐུགས་དུད་འགྲོའི་གནས་ཡིན་པས༔ བོར་རོ་སྤང་ངོ་རིགས་ཀྱི་བུ༔ ས་འདི་བཅད་པ་ཡན་ཆད་ནི༔ མཐོ་རིས་བདེ་བའི་ས་ཡིན་པས༔ འདོང་ངོ་གཤེགས་སོ་རིགས་ཀྱི་བུ༔ ཕྱིར་མི་ལྡོག་པའི་ས་ཐོབ་ཤོག༔ རིགས་དྲུག་རིམ་གྱིས་བསྒྲལ་བའི་ཕྱིར༔ ཡ་སིང་ར་རླུང་པ་ལ་ཡ༔ ཕྱིར་མི་ལྡོག་པའི་ས་ཐོབ་ཕྱིར༔ ཨེ་ཀ་ར་ན་བྷེ་ཙག་ཤ༔ མཚན་བྱང་ལྷ་མིང་དལ་དུ་བཀོད། ལྷ་མིན་དུ་སྐྱེས་པ་དེས་གསོལ་བ་གདབ་པར་མོས་ལ། ཀྱེ་མ་བདག་འདྲའི་སེམས་
ཅན་ལས་ངན་པ༔ ཕྲག་དོག་དྲག་པོའི་ལས་དབང་གིས༔ གདུག་རྩུབ་ལྷ་མིན་གནས་སུ་སྐྱེས༔ འཐབ་རྩོད་སྡུག་བསྔལ་བརྗོད་ལས་འདས༔ སྡུག་བསྔལ་འདི་ལས་བདག་སྒྲོལ་མཛོད༔ བརྩེ་བ་ཆེན་པོས་བཟུང་དུ་གསོལ༔ ལན་ཆགས་འཇལ་བ་ནི། ཧཱུྃ། གཏོར་མ་འདོད་ཡོན་ལྔ་དང་ལྡན་པ་འདི༔ ཚེ་འདས་འཐབ་རྩོད་ལན་ཆགས་བསྙག་པ་ཡི༔ གསོན་བདུད་གཤིན་ལྕགས་ལན་ཆགས་ཁྱོད་ལ་སྦྱིན༔ གཏོར་མ་འདི་ཡིས་མགུ་ཞིང་ཚེམ་གྱིས་ལ༔ ཚེ་འདས་འདི་ཡི་ཐར་པའི་གེགས་མ་བྱེད༔ ཨོཾ་སརྦ་བྷཱུ་ཏ་བ་ལི༚་ཏ་ཁཱ་ཧི༔ གླུད་གཏོར་ཕྱིར་དོར། ལས་བུམ་ཐོགས་ལ། འདི་ནི་ཚུལ་ཁྲིམས་རང་བཞིན་ཆུ༔ ཕྲག་དོག་དྲི་མ་སྦྱོང་མཛད་པ༔ ཚུལ་ཁྲིམས་ཆུ་ཡིས་ལེགས་བཀྲུས་པས༔ ཕྲག་དོག་དྲི་མ་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཨོཾ་ཨ་བྷྱ་རྒྱ་ཏཾ་ཀེ༚༔ ཚེ་འདས་ལྷ་མ་ཡིན་གྱི་ལས་ངན་དང་སྡིག་སྒྲིབ་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ ཞེས་བཀྲུ། བྱེ་མས་བྲབ་ལ། ང་རྒྱལ་ལོག་ལྟ་ཐེ་ཚོམ་གསུམ༔ འདི་གསུམ་རྩ་བའི་དུག་གསུམ་སྟེ༔ དོན་ཡོད་གྲུབ་པ་དུག་མི་མངའ༔ ཕྲིན་ལས་རྡོ་རྗེས་དུག་
བཅོམ་མོ༔ ཕྲག་དོག་སྒྲིབ་པ་དག་གྱུར་ཅིག༔ ཧཱ་པྲཛྙཱ་དྷྲི་ཀ༔ མ་མ་ཀོ་ལིངས་མནྟ༔ ཚེ་འདས་ལྷ་མ་ཡིན་གྱི་ལས་དང་བག་ཆགས་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ བྱེ་མ་དོན་གྲུབ་ཞི་ཁྲོའི་འོད་ཟེར་མེ་ལྕེ་ལྟ་བུས་ལྷ་མ་ཡིན་གྱི་ས་བོན་ཏྲི་ལྗང་གུ་རང་བཞིན་མེད་པར་བསྲེགས་པར་བསམ། ཕྱག་འཚལ་བ་ནི། ཀྱེ་མ་ཚེ་འདས་ལུས་བརྫེས་རིགས་ཀྱི་བུ༔ ཕྲག་དོག་དྲག་པོས་ཀུན་ནས་བསླངས་ནས་སུ༔ མི་དགེ་བཅུ་དང་འཐབ་རྩོད་ལས་དབང་གིས༔ གདུག་རྩུབ་ལྷ་མིན་གནས་སུ་སྐྱེ་སྲིད་པས༔ དེ་ན་མགོན་དང་སྐྱབས་སུ་གྱུར་པ་ནི༔ ལྷ་མིན་ཐུབ་པ་ཐུགས་བཟང་ཞེས་བྱ་བཞུགས༔ དེ་ལ་སྐྱབས་སུ་འགྲོ་བའི་ཚིག་འདི་སྨྲོས༔ ཕྲག་དོག་གཟུང་འཛིན་ཀུན་སྤངས་བདེ་བར་གཤེགས༔ ཚུལ་ཁྲིམས་ཆོས་ཐོབ་ཕྲག་དོག་རྣམ་པར་དག༔ ལྷ་མིན་ཐུབ་པ་སྐྱོབས་བྱེད་གོ་མཚོན་འཛིན༔ ལྷ་མིན་འཐབ་རྩོད་སྡུག་བསྔལ་སྦྱོང་དུ་གསོལ༔ བཅོམ་ལྡན་ཐུགས་བཟང་རིས་ལ་སྐྱབས་སུ་མཆི༔ བྱང་གི་བུམ་པ་ཐོགས་ལ། ཧཱུྃ། སྙིང་པོ་ལྔ་ཡི་བུམ་པ་འདིར༔ བདེ་གཤེགས་ཕྲིན་ལས་ལྷ་ཚོགས་བཞུགས༔ ཚེ་འདས་ཁྱོད་ལ་དབང་བསྐུར་བས༔
ལྷ་མིན་སྐྱེ་སྒོ་བཅད་ནས་ནི༔ ལས་རབ་ཞིང་དུ་སྐྱེ་བར་ཤོག༔ ཧཱ་ཀརྨ་སཏྭ་ས་མ་ཡ༔ སོགས་དོན་གྲུབ་ཡིག་བརྒྱ་དང་། ཧཱ་ཀརྨ་ཨ་བྷི་ཥིཉྩ་ཨཱ༔ བུམ་ཆུ་ཡེ་ཤེས་ལྔའི་ཆུ་རྒྱུན་གྱིས་བཀྲུས་པར་བསམ་ལ། མཆན་ཁུང་གཡོན་ཏུ་བཞག་ཚུལ་དང་ཁྲུས་བྱ་ཞིང་། ཀེ༚་ཀེ༚་ཀེ༚༔ ཀེ༚་ཀེ༚་ཀེ༚༔ ཀེ༚་ཀེ༚་ཀེ༚༔ གོ་མཚོན་ཐོགས་ལ། ཧཱ། ཤེས་རབ་དོན་མཚོན་རལ་གྲི་དང་༔ བདུད་ཀྱི་མཚོན་སྲུང་གོ་ཆ་འདི༔ དུས་གསུམ་རྒྱལ་བའི་སྦྱོར་སྒྲོལ་ཏེ༔ ཞི་ཁྲོ་རྒྱལ་བའི་ཕྱག་མཚན་འདིས༔ ཚེ་འདས་ཁྱོད་ལ་དབང་བསྐུར་བས༔ ཧེ་ས་ཀ་ཡི་སྡུག་བསྔལ་བྲལ་བར་ཤོག༔ སུ་མ་ཐ་མ་ཐ་སརྦ་ཀརྨ་པྲ་ཝེ་ཤ་ཡ་ཧཱུྃ་ཕཊ༔ ཅེས་དབང་བསྐུར། ཧཱུྃ། ས་འདི་བཅད་པ་མན་ཆད་ནི༔ འཐབ་རྩོད་ལྷ་མིན་གནས་ཡིན་པས༔ བོར་རོ་སྤང་ངོ་རིགས་ཀྱི་བུ༔ ས་འདི་བཅད་པ་ཡན་ཆད་ནི༔ མཐོ་རིས་བདེ་བའི་གནས་ཡིན་པས༔ འདོང་ངོ་གཤེགས་སོ་རིགས་ཀྱི་བུ༔ ཕྱིར་མི་ལྡོག་པའི་ས་ཐོབ་ཤོག༔ རིགས་དྲུག་རིམ་གྱིས་བསྒྲལ་བའི་ཕྱིར༔ ཡ་སིང་ར་རླུང་པ་ལ་ཡ༔ ཕྱིར་མི་ལྡོག་པའི་ས་ཐོབ་ཕྱིར༔ ཨེ་ཀ་ར་ན་བྷེ་ཙག་ཤ༔ མཚན་བྱང་ལྷ་ཡིད་ལ་དུ་བཀོད། ལྷ་ཡི་གནས་སུ་
སྐྱེས་པ་དེས་གསོལ་བ་གདབ་པར་མོས་ལ། ཀྱེ་མ་བདག་འདྲའི་སེམས་ཅན་ལས་ངན་པ། ང་རྒྱལ་དྲག་པོའི་ལས་དབང་གིས༔ འདོད་ཁམས་ལྷ་ཡི་གནས་སུ་སྐྱེས༔ ལྟུང་བའི་སྡུག་བསྔལ་བརྗོད་ལས་འདས༔ སྡུག་བསྔལ་འདི་ལས་བདག་སྒྲོལ་མཛོད༔ བརྩེ་བ་ཆེན་པོས་བཟུང་དུ་གསོལ༔ ལན་ཆགས་འཇལ་བ་ན། ཧཱུྃ། གཏོར་མ་འདོད་ཡོན་ལྔ་དང་ལྡན་པ་འདི༔ ཚེ་འདས་ཕམ་ལྟུང་ལན་ཆགས་བསྙག་པ་ཡི༔ གསོན་བདུད་གཤིན་ལྕགས་ལན་ཆགས་ཁྱོད་ལ་སྦྱིན༔ གཏོར་མ་འདི་ཡིས་མགུ་ཞིང་ཚིམ་གྱིས་ལ༔ ཚེ་འདས་འདི་ཡི་ཐར་པའི་གེགས་མ་བྱེད༔ ཨོཾ་སརྦ་བྷཱུ་ཏ་བ་ལི་ཏ་ཁཱ་ཧི༔ གླུད་གཏོར་ཕྱིར་རོ། ལས་བུམ་ཐོགས་ལ། འདི་ནི་བསམ་གཏན་རང་བཞིན་ཆུ༔ ལྟུང་བའི་དྲི་མ་སྦྱོང་མཛད་པ༔ ཏིང་འཛིན་ཆུ་ཡིས་ལེགས་བཀྲུས་པས༔ ང་རྒྱལ་དྲི་མ་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཨོཾ་ཨབྷྱ་རྒྱ་ཏཾ་ཀེ༚། ཚེ་འདས་ལྷ་ཕམ་ལྟུང་གི་ལས་ངན་དང་སྡིག་སྒྲིབ་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ ཞེས་བཀྲུ། བྱམས་བྲབ་ལ། ང་རྒྱལ་ལོག་ལྟ་ཐེ་ཚོམ་གསུམ༔ འདི་དག་རྩ་བའི་དུག་གསུམ་སྟེ༔ རིན་ཆེན་འབྱུང་
ལྡན་དུག་མི་མངའ༔ ཡོན་ཏན་རྡོ་རྗེས་དུག་བཅོམ་མོ༔ ང་རྒྱལ་སྒྲིབ་པ་དག་གྱུར་ཅིག༔ སྦཱ་རཏྣ་དྷྲི་ཀྲ༔ མ་མ་ཀོ་ལོཾ་ས་མནྟ༔ ཚེ་འདས་ལྷ་ཕམ་ལྟུང་གི་ལས་དང་བག་ཆགས་ངན་པ་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ བྱེ་མ་རིན་འབྱུང་ཞི་ཁྲོའི་འོད་ཟེར་མེ་ལྕེ་ལྟ་བུས་ལྷའི་ས་བོན་ཨ་དཀར་པོ་རང་བཞིན་མེད་པར་བསྲེགས་པར་བསམ། ཕྱག་འཚལ་བ་ནི། ཀྱེ་མ་ལུས་བརྗེས་རིགས་ཀྱི་བུ༔ ང་རྒྱལ་དྲག་པོས་ཀུན་ནས་བསླངས་ནས་སུ༔ མི་དགེ་བཅུ་དང་ཕ་རོལ་ཁྱད་བསད་པས༔ འདོད་ཁམས་ལྷ་ཡི་གནས་སུ་སྐྱེ་སྲིད་པས༔ དེ་ཡང་འཇིག་རྟེན་འཁོར་བའི་གནས་ཡིན་པས༔ དེ་ལ་མ་ཆགས་བྱང་ཆུབ་སེམས་བསྐྱེད་ལ༔ དེ་ན་མགོན་དང་སྐྱབས་སུ་གྱུར་པ་ནི༔ ལྷ་ཡི་ཐུབ་པ་དབང་པོ་བརྒྱ་བྱིན་བཞུགས༔ དེ་ལ་སྐྱབས་སུ་འགྲོ་བའི་ཚིག་འདི་སྨྲོས༔ ང་རྒྱལ་གཟུང་འཛིན་ཀུན་སྤངས་བདེ་བར་གཤེགས༔ བསམ་གཏན་ཆོས་ཐོབ་ལྟ་བ་རྣམ་པར་དག༔ ལྷ་ཡི་ཐུབ་པ་བརྒྱ་བྱིན་པི་ཝཾ་བསྣམས༔ འཆི་ཕོ་ལྟུང་བའི་སྡུག་བསྔལ་སྦྱོང་དུ་གསོལ༔ ལྷ་དབང་བརྒྱ་བྱིན་ཁྱེད་ལ་སྐྱབས་སུ་མཆི༔ ལྷོ་ཡི་བུམ་པ་ཐོགས་ལ། ཧཱུྃ། རིན་ཆེན་ལྔ་ཡི་བུམ་པ་འདིར༔ བདེ་
གཤེགས་ཡོན་ཏན་ལྷ་ཚོགས་བཞུགས༔ ཚེ་འདས་ཁྱོད་ལ་དབང་བསྐུར་བས༔ ལྷ་ཡི་སྐྱེ་སྒོ་བཅད་ནས་ནི༔ དཔལ་ལྡན་ཞིང་དུ་སྐྱེ་བར་ཤོག༔ སྭཱ་རཏྣ་སཏྭ་ས་མ་ཡ༔ སོགས་རིན་འབྱུང་ཡིག་བརྒྱ་དང་། རཏྣ་ཨ་བྷིཥིཉྩ་ཨཱ༔ བུམ་པ་ཡེ་ཤེས་ལྔའི་ཆུ་རྒྱུན་གྱིས་བཀྲུས་པར་བསམ་ལ། བུམ་པ་སྤྱི་བོར་དང་ལྟེ་བར་བཞག་ཚུལ་དང་ཁྲུས་བྱ་ཞིང་། ཏཾ་ཏཾ་ཏཾ༔ ཏཾ་ཏཾ་ཏཾ༔ ཏཾ་ཏཾ་ཏཾ༔ པི་ཝཾ་ཐོགས་ལ། སྭཱ། ལོངས་སྤྱོད་བདུད་ཀྱི་གཡེངས་འཇོམས་པའི༔ པི་ཝཾ་སྙན་པའི་དོན་མཛད་འདིས༔ ཚེ་འདས་ཁྱོད་ལ་དབང་བསྐུར་བས༔ སྐྱེ་བ་གཅིག་གི་ལས་རྫོགས་ཤོག༔ ཨཱཿསརྦ་ཏ་ཐཱ་ག་ཏ་བི་དྱཱན་ཁཌྒ་ཚིནྡྷ་ཚིནྡྷ་ཧཱུྃ་ཕཊ༔ ཅེས་དབང་བསྐུར། ཧཱུྃ། ས་འདི་བཅད་པ་མན་ཆད་ནི༔ རིགས་དྲུག་འཁོར་བའི་གནས་ཡིན་པས༔ བོར་རོ་སྦང་ངོ་རིགས་ཀྱི་བུ༔ས་འདི་བཅད་པ་ཡན་ཆད་ནི༔ ཐར་ལམ་བདེ་བའི་ས་ཡིན་པས༔ འདོང་ངོ་གཤེགས་སོ་རིགས་ཀྱི་བུ༔ ཕྱིར་མི་ལྡོག་པའི་ས་ཐོབ་ཤོག༔ རིགས་དྲུག་རིམ་གྱིས་བསྒྲལ་བའི་ཕྱིར༔ ཡ་སིང་ར་རླུང་པ་ལ་ཡ༔ ཕྱིར་མི་ལྡོག་པའི་ས་ཐོབ་ཕྱིར༔ ཨ་ཀ་ར་ན་བྷེ་ཙཀ་ཤ༔ མཚན་བྱང་མི་ཡིད་ལ་དུ་བཀོད། མིར་སྐྱེས་པ་དེས་གསོལ་བ་གདབ་པར་མོས་ལ།
ཀྱེ་མ་བདག་འདྲའི་སེམས་ཅན་ལས་ངན་པ༔ ཉོན་མོངས་འདོད་པའི་ལས་དབང་གིས༔ འདོད་ཁམས་གླིང་བཞིའི་མི་རུ་སྐྱེས༔ བྲེལ་ཕོངས་སྡུག་བསྔལ་བརྗོད་ལས་འདས༔ སྡུག་བསྔལ་འདི་ལས་བདག་སྒྲོལ་མཛོད༔ བརྩེ་བ་ཆེན་པོས་བཟུང་དུ་གསོལ༔ ལན་ཆགས་འཇལ་བ་ནི། ཧཱུྃ། གཏོར་མ་འདོད་ཡོན་ལྔ་དང་ལྡན་པ་འདི༔ ཚེ་འདས་བྲེལ་ཕོངས་ལན་ཆགས་བསྙག་པ་ཡི༔ གསོན་བདུད་གཤིན་ལྕགས་ལན་ཆགས་ཁྱོད་ལ་སྦྱིན༔ གཏོར་མ་འདི་ཡིས་མགུ་ཞིང་ཚིམ་གྱིས་ལ༔ ཚེ་འདས་འདི་ཡི་ཐར་པའི་གེགས་མ་བྱེད༔ ཨོཾ་སརྦ་བྷཱུ་ཏ་བ་ལི༚་ཏ་ཁཱ་ཧི༔ ཅེས་བླུད་གཏོར་ཕྱིར་དོར། ལས་བུམ་ཐོགས་ལ། འདི་ནི་བརྩོན་འགྲུས་རང་བཞིན་ཆུ༔ ཡིད་གཉིས་དྲི་མ་སྦྱོང་མཛད་པ༔ སྤྲོ་དགའ་ཆུ་ཡིས་ལེགས་བཀྲུས་པས༔ ཐེ་ཚོམ་དྲི་མ་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ། ཨོཾ་ཨབྷྱ་རྒྱ་ཏཾ་ཀེ༚༔ ཚེ་འདས་མིའི་ལས་ངན་དང་སྡིག་སྒྲིབ་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ ཞེས་འབུལ་ཞིང་། བྱེ་མ་ཐོགས་ལ། ང་རྒྱལ་ལོག་ལྟ་ཐེ་ཚོམ་གསུམ༔ འདི་དག་འཇིག་རྟེན་དུག་གསུམ་སྟེ༔ ཀུན་བཟང་ཞི་ཁྲོ་དུག་མི་མངའ༔ སངས་རྒྱས་
བདེན་པས་དུག་བཅོམ་མོ༔ ཚེ་ལས་འདས་པ་འདི་ཉིད་ཀྱི༔ ཐེ་ཚོམ་དྲི་མ་དག་གྱུར་ཅིག༔ ཨོཾ་ཨཱཿཧཱུྃ་བོ་དྷི་།ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱ༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཞེས་རྩ་སྔགས་དག །མ་མ་ཀི་ལིང་ས་མནྟ༔ ཚེ་འདས་མིའི་ལས་དང་བག་ཆགས་ངན་པ་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ བྱེ་མ་དཀྱིལ་འཁོར་ལྷའི་འོད་ཟེར་མེ་ལྕེ་ལྟ་བུས་མིའི་ས་བོན་ནྀྲ་ལྗང་གུ་རང་བཞིན་མེད་པར་བསྲེགས་བར་བསམ། ཕྱག་འཚལ་བ་ནི། ཀྱེ་མ་ཚེ་འདས་ལུས་བརྗེས་རིགས་ཀྱི་བུ༔ ཉོན་མོངས་འདོད་པས་ཀུན་ནས་བསླངས་ནས་སུ༔ ཟག་བཅས་འདོད་པའི་དགེ་བ་བཅུ་སྤྱད་ཀྱང་༔ འདོད་ཁམས་གླིང་བཞིའི་མི་རུ་སྐྱེ་སྲིད་པས༔ དེ་ཡང་འཇིག་རྟེན་འཁོར་བའི་གནས་ཡིན་པས༔ འཁོར་བ་འདི་ལ་ཁབ་ཀྱི་རྩེ་ཙམ་ཡང་༔ བདེ་བ་ནམ་ཡང་ཡོད་པ་མ་ཡིན་གསུངས༔ ཅུང་ཟད་བདེ་ཡང་འགྱུར་བའི་སྡུག་བསྔལ་ཡོད༔ ཁྱོད་ཀྱི་ཉེ་དྲུང་འོ་དོད་འབོད་བྱེད་ཅིང་༔ ཕ་མ་བུ་ཚ་ཉེ་དྲུང་ང་ཡིན་ཞེས༔ ཁང་ཁྱིམ་ཡོ་བྱད་གནས་མལ་ནོར་རྫས་དང་། ཁྱོད་ཀྱི་མིང་ནས་འབོད་པའི་སྒྲ་སྐད་ཀྱང་༔ བྱང་ཆུབ་ལམ་ལ་བར་དུ་གཅོད་བྱེད་བདུད༔ དེ་ལ་མ་ཉན་མ་ལྟ་མ་སེམས་པར༔ དེ་ལ་མ་ཆགས་བྱང་ཆུབ་སེམས་བསྐྱེད་ལ༔ དེ་ན་
མགོན་དང་སྐྱབས་སུ་གྱུར་པ་ནི༔ མི་ཡི་ཐུབ་པ་ཤཱཀྱ་ཐུབ་པ་བཞུགས༔ དེ་ལ་སྐྱབས་སུ་འགྲོ་བའི་ཚིག་འདི་སྨྲོས༔ ཐེ་ཚོམ་གཟུང་འཛིན་ཀུན་སྤངས་བདེ་བར་གཤེགས༔ བརྩོན་འགྲུས་ཆོས་ཐོབ་ཐེ་ཚོམ་རྣམ་པར་དག༔ ཤཱཀྱ་ཐུབ་པ་གསེག་ཤང་པར་བུ་འཛིན༔ སྐྱེ་རྒ་ན་འཆིའི་སྡུག་བསྔལ་སྦྱང་དུ་གསོལ༔ རྒྱལ་བ་ཐུབ་དབང་ཁྱོད་ལ་སྐྱབས་སུ་མཆི༔ སླར་ཡང་གཙོ་བོའི་བུམ་པར་བུམ་ཆུ་རྣམས་བསྡུས་པ་ཐོགས་ལ། ཧཱུྃ། རིན་ཆེན་བུམ་པ་གཞལ་ཡས་ཁང་༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ ཚེ་འདས་ཁྱོད་ལ་དབང་བསྐུར་བས༔ ལྷ་དབང་ལུས་ལ་ཐོབ་པར་ཤོག༔ བུམ་པ་མགོ་བོའི་གནས་ལྔར་བཞག་ཚུལ་གྱིས། ཧཱུྃ་བཛྲ་ཨ་བྷི་ཥིཉྩ་ཨཱ༔ ཨོཾ་བུངྡྷ་ཨ་བྷི་ཥིཉྩ་ཨཱ༔ སྭཱ་རཏྣ་ཨ་དྷི་ཥིཉྩ་ཨཱ༔ ཨཱཾ་པདྨ་ཨ་བྷི་ཥིཉྩ་ཨཱཿ ཧཱ་ཀརྨ་ཨ་བྷི་ཥིཉྩ་ཨཱ༔ བུམ་ཆུ་ཡེ་ཤེས་ལྔའི་ཆུ་རྒྱུན་གྱིས་བཀྲུས་པར་བསམ་ལ། བུམ་པ་སྙིང་གར་དང་རྣ་ལྟག་གཡོན་དུ་བཞག་ཚུལ་དང་ཁྲུས་བྱ་ཞིང་། ཨོཾ་ཨཱཿཧཱུྃ་སྭཱ་ཧཱཿ ལན་གསུམ་བརྗོད་ལ་བཀྲུའོ། །གཟེག་ཤད་དང་པར་བུ་ཐོགས་ལ། ཧཱུྃ། རིན་ཆེན་པར་བུ་ལྷུང་བཟེད་ན༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ གསེག་ཤང་དྲང་སྲོང་
སྒྲ་སྒྲོག་འདི༔ ཐུགས་རྟགས་ཞི་ཁྲོ་ལྷ་ཡི་རྟགས༔ ཚེ་འདས་ཁྱོད་ལ་དབང་བསྐུར་བས༔ ཨ་ཝ་དཱུ་ཏིའི་དབང་ཐོབ་ཤོག༔ ཨོཾ་ཚིནྡྷ་ཚིནྡྷ་སརྦ་ཨ་ཝ་ར་་ནཾ་ཧཱུྃ་ཕཊ༔ ཅེས་དབང་བསྐུར་རོ། ཧཱུྃ། ས་འདི་བཅད་པ་མན་ཆད་ནི༔ རིགས་དྲུག་འཁོར་བའི་གནས་ཡིན་པས༔ བོར་རོ་སྤང་ངོ་རིགས་ཀྱི་བུ༔ ཡུལ་དང་ཁང་ཁྱིམ་ནོར་རྫས་ཀུན༔ སྒྱུ་མའི་རྟ་གླང་ཇི་བཞིན་དུ༔ མི་རྟག་འགྱུར་བའི་ཆོས་ཅན་ཡིན༔ རྟག་པར་གནས་པ་གཅིག་ཀྱང་མེད༔ མ་ཆགས་མ་ཞེན་རིགས་ཀྱི་བུ༔ ཕ་མ་བུ་ཚ་ཉེ་བྲུང་ཀུན༔ རྨི་ལམ་སྐྱེས་བུ་ཇི་བཞིན་དུ༔ མི་རྟག་འབྲལ་བའི་ཆོས་ཅན་ཡིན༔ ཁྱོད་ཀྱི་མིང་ནས་འབོད་བྱེད་ཅིང་༔ ཕ་མ་ཉེ་དྲུ་ང་ཡིན་ཞེས༔ སྨྲེ་སྔགས་འོ་དོད་འབོད་པ་ཀུན༔ ཐར་ལམ་བར་ཆད་གེགས་ཡིན་པས༔ དེ་ལ་མ་ཉན་རིགས་ཀྱི་བུ༔ ཆགས་པར་མ་བྱེད་རིགས་ཀྱི་བུ༔ ས་འདི་བཅད་པ་ཡན་ཆད་ནི༔ ཐར་བ་བདེ་བའི་ས་ཡིན་པས༔ འདོང་ངོ་གཤེགས་སོ་རིགས་ཀྱི་བུ༔ དགའ་ཞིང་སྤྲོ་བའི་སེམས་བསྐྱེད་ལ༔ ཞིང་མཆོག་གཙང་མའི་གནས་མཆོག་ཏུ༔ བདག་གིས་ཁྱོད་ཉིད་གཞུག་བྱ་ཡི༔ ཕྱིར་མི་ལྡོག་པའི་ས་ཐོབ་ཤོག༔ ཡུལ་ཀུན་ཞེན་
པ་བཟློག་པའི་ཕྱིར༔བུ་ག་རི་ལ་བྷ་དྷུ་ཏྲི༔ ཞེན་པའི་ཕྲེང་ཐག་བཅད་པའི་ཕྱིར༔ ར་མི་སི་ཕི་ཁེ་ཏ་པ༔ མཚན་བྱང་དཀྱིལ་འཁོར་དྲུང་དུ་བཞག་ཚུལ་བྱས་ནས་སློབ་དཔོན་གྱི་མདུན་ཏུ་དབང་སྟེགས་པདྨ་འདབ་བརྒྱད་ཀྱི་སྟེང་དུ་བཞག་གོ། །དྲུག་པ་དཀྱིལ་འཁོར་དུ་གཞུག་པ་ལ། སྤྲོ་ན་སློབ་དཔོན་གྱིས་སེམས་བསྐྱེད་གསལ་གདབ་ལ་དབང་བཤད་མདོར་བསྡུས་དང་མཚམས་སྦྱོར་རྣམས་སྤྱི་ལྟར་བྱས་ལ་ས་གཞི་སྤོས་ཆུས་སོགས་ཀྱིས་མཎྜལ་ཕུལ། ཨོཾ་ཙ་ཀྵུ་བནྡྷ་ཝཱ་ར་མ་ཱ་ཡ་སྭཱ་ཧཱ༔ ཞེས་མིག་དར་དང་། ཨཱཿཁཾ་བཱི་ར་ཧཱུྃ༔ ཞེས་མེ་ཏོག་སྦྱིན། གསོལ་འདེབས་སོགས་ཚེ་འདས་ཀྱིས་རྗེས་ཟློས་བྱེད་པར་བསྒོམ་ལ། ཨེ་མ་མགོན་པོ་ །ཐུགས་རྗེ་ཅན༔ བདག་འདྲའི་སེམས་ཅན་འཁོར་བར་འཁྱམས༔ ལོག་པའི་ལམ་དུ་ཞུགས་ལགས་པས༔ བདེ་ཆེན་ཐར་པའི་ལམ་བསྟན་འཚལ༔ དཀྱིལ་འཁོར་ཆེན་པོར་འཇུག་ཏུ་གསོལ༔ ཞེས་ནུས་པས་སློབ་དཔོན་གྱིས། ཀྱེ་མ་ཚེ་འདས་བུ་ཁྱོད་ལེགས་པར་ཉོན༔ འཁོར་བའི་གནས་ནས་ཐར་པའི་གྲོང་འཇུག་ན༔ །ཚེ་འདིའི་འབྲས་བུ་དོན་དུ་གཉེར་མི་བྱ༔ འཇིག་རྟེན་ཚེ་འདིའི་དོན་དུ་གཉེར་བ་ན༔ ཕ་རོལ་ཐར་པའི་འབྲས་བུ་ཐོབ་མི་འགྱུར༔ འཇིག་རྟེན་ཕ་རོལ་གཞན་དོན་གཉེར་བས་
ན༔ འབད་པ་མེད་པར་འདེ་འབྲས་རང་དོན་འགྲུབ༔ དེ་ཕྱིར་ཕ་རོལ་གཞན་དོན་གཉེར་བར་གྱིས༔ ཡང་ཚེ་འདས་ཀྱིས༔ ཀུན་བཟང་ཞི་ཁྲོའི་ལྷ་ཚོགས་དང་༔ རྡོ་རྗེ་སློབ་དཔོན་དགོངས་སུ་གསོལ༔ རྡོ་རྗེ་ཐེག་པའི་དམ་ཚིག་གང་༔ བྱང་ཆུབ་སེམས་ཀྱང་བདག་ལ་སྩོལ༔ ཐུན་མོང་དང་ནི་ཁྱད་པར་གྱི༔ སྐྱབས་གསུམ་དག་ཀྱང་བདག་ལ་སྩོལ༔ རྒྱལ་བ་ཞི་ཁྲོའི་དཀྱིལ་འཁོར་དུ༔ མགོན་པོས་བདག་ཉིད་འཇུག་ཏུ་གསོལ༔ སློབ་དཔོན་གྱིས། རྟོག་པ་ཐམས་ཅད་ལེགས་པར་བསྡུས་ནས་ནི༔ ཤིན་ཏུ་བསམ་པ་བཟང་པོ་བདེན་པས་ཉོན༔ བརྗེད་ངས་བློ་ལ་རྡོ་རྗེ་སེམས་སོགས་པའི༔ དུས་གསུམ་སངས་རྒྱས་རྣམས་ཀྱིས་བྱིན་མི་རློབ༔ ཅེས་ཉན་པར་བསྐུལ་སྤྲོ་བ་བསྐྱེད་པ་ནི། བུ་ཁྱོད་ཤིན་ཏུ་སྐལ་པ་བཟང་༔ གང་གིས་སྒྱུ་འཕྲུལ་ཞི་ཁྲོ་ཡི༔ དཀྱིལ་འཁོར་ལྷ་ལ་ཕྱག་འཚལ་ན། ཉམས་ཆགས་ཀུན་ཀྱང་བྱང་འགྱུར་ཞིང་༔ མཚམས་མེད་ལྔ་ཡི་སྡིག་ཀྱང་བྱང་༔ ན་རག་གནས་ཀྱང་དོང་སྤྲུགས་ཏེ༔ རིག་འཛིན་རྒྱལ་བའི་ཞིང་དུ་གྲགས༔ རང་བཞིན་སྒྱུ་འཕྲུལ་དཀྱིལ་འཁོར་ལ༔ གང་ཞིག་གུས་པས་ཕྱག་འཚལ་ན༔ ཉམས་ཆགས་ཀུན་
ཀྱང་བྱང་བར་འགྱུར༔ དམ་ཚིག་བསྐངས་ནས་དངོས་གྲུབ་ཐོབ༔ དེ་ཕྱིར་སྤྲོ་བའི་སེམས་ཀྱིས་ལེགས་པར་ཉོན༔ འདིར་བྱང་ཕྱག་འཚལ་བའི་ཕྱག་རྒྱུན་ལྟར་ན། བླ་མ་མཉམ་མེད་སངས་རྒྱས་རིན་པོ་ཆེ༔ དུས་གསུམ་བདེ་གཤེགས་སྲས་བཅས་ཐམས་ཅད་ཀྱི༔ སྐུ་གསུང་ཐུགས་ཀྱི་རང་བཞིན་བྱིན་རླབས་པ༔ བཀའ་དྲིན་ཆེན་པོའི་ཞབས་ལ་ཕྱག་འཚལ་ལོ༔ མ་བཅོས་སྤྲོས་བྲལ་བླ་མ་ཆོས་ཀྱི་སྐུ༔ བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ༔ པད་སྡོང་ལས་འཁྲུངས་བླ་མ་སྤྲུལ་པའི་སྐུ༔ སྐུ་གསུམ་རྡོ་རྗེ་འཆང་ལ་ཕྱག་འཚལ་ལོ༔ སྟོན་པ་བླ་མེད་སངས་རྒྱས་རིན་པོ་ཆེ༔ སྐྱོབས་པ་བླ་མེད་དམ་ཆོས་རིན་པོ་ཆེ༔ འདྲེན་པ་བླ་མེད་དགེ་འདུན་རིན་པོ་ཆེ༔ བླ་མེད་དཀོན་མཆོག་གསུམ་ལ་ཕྱག་འཚལ་ལོ༔ མི་རྟོག་རྡོ་རྗེ་ཐབས་ཀྱི་ཡེ་ཤེས་ནི༔ དམིགས་མེད་ཤེས་རབ་ཡུམ་གྱི་དང་དུ་རྟོགས༔ ཐུགས་རྗེ་བྱེ་བྲག་སྣ་ཚོགས་ཅིར་ཡང་སྟོན༔ རྡོ་རྗེ་སེམས་དཔའ་ཆེ་ལ་ཕྱག་འཚལ་ལོ༔ བརྗོད་མེད་ཤེས་རབ་མི་གཡོ་ཆོས་ཀྱི་སྐུ༔ བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ༔ ཐུགས་རྗེ་ཐབས་
མཁས་རྒྱ་ཆེན་རོལ་པའི་ལྷ༔ ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ༔ ཆོས་སྐུ་ནམ་མཁའ་ལྟ་བུ་ཀུན་ལ་ཁྱབ༔ ལོངས་སྐུ་ཉི་འོད་ལྟ་བུ་སོ་སོར་འཕྲོ༔ སྤྲུལ་སྐུ་འཇའ་ཚོན་ལྟ་བུར་འགྲོ་དོན་མཛད༔ རྒྱལ་བ་ཞི་ཁྲོའི་ལྷ་ལ་ཕྱག་འཚལ་ལོ༔ ཀུན་ཏུ་བཟང་མོ་གསང་བའི་བྷ་ག་ལ༔ ཀུན་ཏུ་བཟང་པོ་ཟག་པ་མེད་པས་བདེ༔ རོལ་པ་ཡེ་ཤེས་རྒྱལ་བ་ཞི་ཁྲོའི་ཚོགས༔ ཡབ་ཡུམ་སྲས་དང་བཅས་ལ་ཕྱག་འཚལ་ལོ༔ དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ༔ ལོངས་སྤྱོད་རྫོགས་པའི་སྐུ་ལ༴ ཅི་ཡང་སྤྲུལ་པའི་སྐུ་ལ༴ མི་འགྱུར་རྡོ་རྗེའི་སྐུ་ལ༴ མངོན་པར་བྱང་ཆུབ་སྐུ་ལ༴ དུས་གསུམ་རྒྱལ་བ་ཀུན་གྱིས་བསྒྲུབ་པ་ཡི༔ ཚོགས་གཉིས་རྫོགས་ཤིང་ཡོན་ཏན་མཐར་ཕྱིན་པའི༔ སྐུ་དང་ཡེ་ཤེས་ཚོགས་ལ༴ ཕྱག་བྱར་འོས་པ་ཐམས་ཅད་ལ༔ ཞིང་རྡུལ་ཀུན་གྱི་གྲངས་སྙེད་ཀྱི༔ ལུས་བཏུད་པ་ཡིས་རྣམ་ཀུན་ཏུ༔ མཆོག་ཏུ་དད་པས་ཕྱག་འཚལ་ལོ༔ ཞེས་ཕྱག་བྱ། ཁྱད་པར་སྐྱབས་སུ་འགྲོ་བའི་སྡོམ་པ་ནི༔ ཚེ་འདས་ཁྱོད་ཀྱིས་ཐལ་སྦྱར་སྐྱབས་སྡོམ་ཟུངས༔ ཕྱོགས་བཅུའི་སངས་རྒྱས་བྱང་སེམས་རྣམས༔
ཚེ་འདས་བདག་ལ་དགོངས་སུ་གསོལ༔ རྐང་གཉིས་གཙོ་བོ་སངས་རྒྱས་དང་༔ ཞི་བ་ཆགས་བྲལ་དམ་པའི་ཆོས༔ ཚོགས་མཆོག་འཕགས་པའི་དགེ་འདུན་ལ༔ འདི་བཟུང་བྱང་ཆུབ་མ་ཐོབ་བར༔ ཚེ་འདས་གུས་པས་སྐྱབས་སུ་མཆི༔ ཀུན་བཟང་ཞི་ཁྲོའི་ལྷ་ཚོགས་ལ༔ དེང་བཟུང་བླ་མེད་བྱང་ཆུབ་བར༔ ཚེ་འདས་གུས་པས་སྐྱབས་སུ་མཆི༔ དཔའ་བོ་དཔའ་མོ་ཆོས་སྐྱོང་བཅས༔ བྱང་སེམས་རྡོ་རྗེ་སློབ་དཔོན་ལ༔ ཚེ་འདས་གུས་པས་སྐྱབས་སུ་མཆི༔ ཚིག་རྗེས་མ་ལན་གསུམ། སྡོམ་གསུམ་རིམ་པར་བཟུང་སྙམ་པས༔ ཚེ་འདས་ཁྱོད་ཀྱིས་རྗེས་ཟློས་མཛོད༔ བླ་མ་ཀུན་བཟང་སྤྱན་སྔ་རུ༔ ལུས་ངག་ཡིད་ཀྱིས་གཞན་རྣམས་ལ༔ གནོད་པ་ལས་བཟློག་དགེ་བ་བསྒྲུབ༔ དགེ་ཚུལ་དགེ་སློང་བྱང་ཆུབ་སེམས༔ སོ་སོར་ཐར་པའི་སྡོམ་པ་ལ༔ རྒྱུན་ཏུ་གནས་ཤིང་དགེ་བ་བསྒྲུབ༔ སྡོམ་པ་ཡོངས་སུ་བཟུང་བར་བགྱི༔ ཧོཿ བླ་མ་ཀུན་བཟང་དགོངས་སུ་གསོལ༔ འདི་བཟུང་བྱང་ཆུབ་མ་ཐོབ་པར༔ འགྲོ་དྲུག་སེམས་ཅན་ཐམས་ཅད་ལ༔ མདའ་བུ་ཡི་འདུ་ཤེས་ཀྱིས༔ མ་བརྒལ་བ་རྣམས་
བསྒྲལ་བ་དང་༔ མ་གྲོལ་བ་རྣམས་དགྲོལ་བ་དང་༔ དབུགས་མ་ཕྱུང་རྣམས་དབུགས་དབྱུང་ཞིང་༔ སྨོན་པ་བྱང་ཆུབ་སེམས་བསྐྱེད་དོ༔ སྔོན་གྱི་རྒྱལ་བ་ཐམས་ཅད་ཀྱང་༔ སྡོམ་པ་ལ་ནི་གནས་པ་ལྟར༔ འདི་བཟུང་འཁོར་བ་མ་སྟོང་བར༔ བླ་མེད་འཇུག་པའི་བྱང་ཆུབ་སེམས༔ ཚེ་ལས་འདས་པས་བསྐྱེད་པར་བགྱི༔ ཕར་ཕྱིན་དྲུག་ལ་བསླབ་ཅིང་བསྒྲུབ༔ བརྩོན་འགྲུས་དག་གིས་ཐམས་ཅད་བསྒྲལ༔ ཀུན་དོན་ཚུལ་ཁྲིམས་གསུམ་ཡང་བཟུང་༔ བདག་གིས་སེམས་བསྐྱེད་སྡོམ་བཟུང་ནས༔ མ་གྲོལ་དགྲོལ་དང་མ་བརྒལ་བསྒྲལ༔ དབུགས་དབྱུང་མྱ་ངན་འདས་ལ་འགོད༔ དཀོན་མཆོག་གསུམ་ནི་མི་སྤང་ངོ་༔ རྡོ་རྗེ་རིགས་ཀྱི་དམ་ཚིག་ཏུ༔ རྡོ་རྗེ་དྲིལ་བུའི་ཕྱག་རྒྱ་དང་༔ བྱང་ཆུབ་སེམས་ནི་སྤང་མི་བྱ༔ རིན་ཆེན་རིགས་ཀྱི་དམ་ཚིག་ཏུ༔ སྦྱིན་པ་རྣམ་བཞི་རྟག་ཏུ་སྦྱིན༔ པདྨ་རིགས་ཀྱི་དམ་ཚིག་ཏུ༔ ཐེག་པ་གསུམ་གྱི་ཆོས་རྣམས་བཤད༔ ལས་ཀྱི་རིགས་ཀྱི་དམ་ཚིག་ཏུ༔ འགྲོ་བའི་དོན་ལ་བརྩོན་པར་བྱ༔ དེ་བཞིན་རིགས་ཀྱི་དམ་ཚིག་ཏུ༔ དཀྱིལ་འཁོར་གསུམ་དང་འབྲལ་མི་བྱ༔ རྩ་བ་ཡན་ལག་དམ་
ཚིག་ཀུན༔ མ་ལུས་བདག་གིས་ཡོངས་སུ་བཟུང་༔ མཇུག་གི་ཚིག་ལན་གསུམ་བྱ། དེ་ནས་ཚེ་འདས་ལྷར་བསྐྱེད་བ་ནི། ལས་བུམ་ཆུས་རྟེན་པ་དྲན་ཏེ། ཨོཾ་མཧཱ་ཤྲཱི་ཧེ་རུ་ཀ་ཨུཙྪཊ་ཡ་ཕཊ༔ ཞེས་བགེགས་བསྐྲད༔ ཧཱུྃ་ལས་ཚེ་འདས་རྡོ་རྗེ་སེམས་དཔའི་སྐུ༔ དཀར་གསལ་ཞལ་གཅིག་ཕྱག་གཉིས་འཛུམ་བཅས་བཞད༔ ཕྱག་གཡས་རིག་སྟོང་རྡོ་རྗེ་ཐུགས་ཀར་འཛིན༔ གཡོན་པས་སྣང་སྟོང་དྲིལ་བུ་དཀུ་ལ་བརྟེན༔ ལོངས་སྤྱོད་རྫོགས་སྐུ་དར་དང་རིན་ཆེན་བརྒྱན༔ གཡས་བརྐྱང་གཡོན་བསྐུམ་རོལ་པའི་སྟབས་ཀྱིས་བཞུགས༔ ཐུགས་ཀར་རྡོ་རྗེ་ཧཱུྃ་ལ་ཡིག་བརྒྱས་བསྐོར༔ བདུད་རྩིའི་རྒྱུན་བབས་ཉམས་ཆགས་སྡིག་སྒྲིབ་ཀུན༔ མ་ལུས་དག་ནས་ཤེལ་སྒོང་ལྟ་བུར་གྱུར༔ ཨོཾ་བཛྲ་ས་ཏྭ་ས་མ་ཡ༔ སོགས་ནས། ཨཱཿཞེས་ཡིག་བརྒྱ་བརྗོད། གཞུང་ལས་དེ་ཙམ་ལས་མ་གསུུངས་ཀྱང་གསུང་རྒྱུན་རྣམས་སུ་སྤྱི་མཐུན་ཡེ་ཤེས་འབེབས་པ་ལྟར་ན། དེ་ལྟར་ཁྱེད་རང་རྡོ་རྗེ་སེམས་དཔར་གསལ་བའི་ཐུགས་ཆོས་དབྱིངས་ཁྱབ་བརྡལ་གྱི་ཀློད་དུ༔ རང་སེམས་ཀ་དག་གི་རིག་མདངས་ཞལ་ཕྱག་གི་རྣམ་པ་ཀུན་བཟང་ཡབ་ཡུམ་ལ་
འཁོར་ཡེ་ཤེས་ལྔའི་རང་འོད་རིགས་ལྔ་ཡབ་ཡུམ་བཅུ༔ སེམས་དཔའ་བརྒྱད༔ སེམས་མ་བརྒྱད༔ ཐུབ་པ་དྲུག༔ སྒོ་བ་ཡབ་ཡུམ་བརྒྱད་དང་བཅས་པའི་རྩལ་མདངས་ལས༔ ཀླད་པ་དུང་ཁང་འབར་བའི་གཞལ་ཡས་འཇའ་འོད་མེ་ཕུང་ཐིག་ལེའི་ཀློང་དུ༔ ཆེ་མཆོག་ཡབ་ཡུམ་ལ་འཁོར་ཁྲག་འཐུང་ཁྲོ་བོ་ཡབ་ཡུམ་བཅུ༔ ཀིའུ་རིམ་བརྒྱད༔ སེང་ཧ་མ་བརྒྱད༔ སྒོ་མ་བཞི༔ དབང་ཕྱུག་མ་ཉི་ཤུ་རྩ་བརྒྱད་ལ་སོགས་ཞི་ཁྲོ་དམ་པ་རིགས་བརྒྱ་དང་༔ མགྲིན་པར་རིག་འཛིན་དཔའ་བོ་ཡབ་ཡུམ་བཅུ་རྣམས་གསལ་བའི་སྐུའི་གནས་གསུམ་དུ་ཨོཾ་ཨཱཿཧཱུྃ་གསུམ་དང་རང་རང་གི་ཐུགས་སྲོག་ས་བོན་ལས་འོད་ཟེར་ཕྱོགས་བཅུར་འཕྲོས་པས༔ རང་བཞིན་གྱི་གནས་ནས་དུས་གསུམ་གྱི་རྒྱལ་བ་ཞི་ཁྲོ་རབ་འབྱམས་དཀོན་མཆོག་རྩ་གསུམ་ཐམས་ཅད་ཆར་སྤྲིན་གཏིབས་པ་ལྟར་བྱོན་ནས་ཁྱེད་རང་རྣམས་ལ་སིབ་སིབ་ཐིམ་པའི་མོས་པ་མཛོད་ཅིག༔ སྤོས་དང་གུ་གུལ་ཚིལ་ཆེན་སོགས་འབེབས་རྫས་བསྲེགས། རོལ་མོ་དབྱངས་དང་བཅས་པས། ཧཱུྃ། ཕྱི་ནང་སྣོད་བཅུད་གཟུང་འཛིན་ནི༔ རྟོག་ཚོགས་རང་གྲོལ་བྱིན་ཕོབ་ཅིག༔ ཉོན་
མོངས་ཡུལ་དྲུག་འཛིན་པ་ལ༔ གཞི་མེད་རྩ་བྲལ་བྱིན་ཕོབ་ཅིག༔ སྐུ་ལྔ་ཡེ་ཤེས་རིག་རྩལ་ལ༔ སྣང་སྟོང་དག་པས་བྱིན་ཕོབ་ཅིག༔ དབྱིངས་རིག་ངར་འཛིན་དར་བ་ལ༔ རྟོག་གསུམ་བྲལ་བས་བྱིན་ཕོབ་ཅིག༔ སྐུ་གསུམ་དག་པའི་སྣང་བ་ལ༔ རིག་པ་ལུ་གུ་རྒྱུད་བྱིན་ཕོབ་ཅིག༔ ཐབས་ཤིས་རང་རྩལ་རོལ་པ་ལས༔ མ་འགག་ཤུགས་འབྱུང་བྱིན༴ བདག་གཞན་རྟོགས་བའི་ལྟ་སྒོམ་ལ༔ གནས་ལུགས་རང་བབ་བྱིན་ཕོབ་ཅིག༔ མ་འགག་སྣ་ཚོགས་ཆོ་འཕྲུལ་འདི༔ རིག་རྩལ་རང་གྲོལ་དབང་ཐོབ་ཤོག༔ ཨོཾ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷ་ཏུ་ཨཱ༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཨཱ་བེ་ཤ་ཡ་སྟཾྭ་བྷ་ཡ༔ ར་ར༔ ར་ར༔ ཙཱ་ལ་ཡ་ཙཱ་ལ་ཡ་ཧཱུྃ་ཨཱཿཧ་ཛྷེ༚༔ཨེ་ཨཱ་ར་ལླི་ཧྲི༚་ཧྲི༚་ཕེ༚་ཕེ༚༔ ཞེས་དབབ། རྡོ་རྗེ་སྤྱི་བོར་བཞག་ལ། ཛྙཱ་ན་ས་ཏྭ་ཏིཥྛ་བཛྲ༔ ཞེས་བརྟན་པར་བྱ། དེ་ནས་ལས་རྡོར་གྱིས་ཐལ་མོ་སྦྱར་བས་བྱང་བུ་ཐོགས་ལ་དཀྱིལ་འཁོར་ཕྱོགས་བཞིར་རིམ་པར་འཇུག་ཚུལ་དང་ཕྱག་རེ་བྱས་ལ། ཧཱུྃ། དཀྱིལ་འཁོར་ཆེན་པོའི་ཤར་གྱི་སྒོ༔ ཞེ་སྡང་སྒྲིབ་པས་བཅད་ལགས་ན༔ སྙིང་རྗེའི་སྒོ་མ་རྟ་གདོང་མ༔ སྒོ་བ་ཁྲོ་བོ་རྣམ་པར་རྒྱལ༔ སྒོ་མ་ཁྲོ་མོ་
ལྕགས་ཀྱུ་མ༔ ཐབས་ཤེས་ལྕགས་ཀྱུའི་ཕྱག་རྒྱ་ཡིས༔ མེ་ལོང་ཡེ་ཤེས་ཤར་སྒོ་ཕྱེས༔ ཚེ་འདས་དད་པས་འཇུག་པར་བགྱི༔ ཀུན་བཟང་ཞི་ཁྲོའི་ལྷ་ཚོགས་ལ༔ ཚེ་འདས་དད་པས་ཕྱག་འཚལ་ལོ༔ ཡི་དམ་ལྷ་དང་མཇལ་བར་ཤོག༔ པྲ་ཝེ་ཤ་ཡ་ཕཊ༔ ཧཱུྃ། དཀྱིལ་འཁོར་ཆེན་པོའི་ལྷོ་ཡི་སྒོ༔ ང་རྒྱལ་སྒྲིབ་པས་བཅད་ལགས་ན༔ བྱམས་པའི་སྒོ་མ་ཕག་གདོང་མ༔ སྒོ་བ་ཁྲོ་བོ་གཤིན་རྗེའི་གཤེད༔ སྒོ་མ་ཁྲོ་མོ་ཞགས་བ་མ༔ ཐབས་ཤེས་ཞགས་པའི་ཕྱག་རྒྱ་ཡིས༔ མཉམ་ཉིད་ཡེ་ཤེས་ལྷོ་སྒོ་ཕྱེས༔ ཚེ་འདས་དད་པས་འཇུག་པར་བགྱི༔ ཀུན་བཟང་ཞི་ཁྲོའི་ལྷ་ཚོགས་ལ༔ ཚེ་འདས་གུས་པས་ཕྱག་འཚལ་ལོ༔ ཡི་དམ་ལྷ་དང་མཇལ་བར་ཤོག༔ པྲ་ཝེ་ཤ་ཡ་ཕཊ༔ ཧཱུྃ། དཀྱིལ་འཁོར་ཆེན་པོའི་ནུབ་ཀྱི་སྒོ༔ འདོད་ཆགས་སྒྲིབ་པས་བཅད་ལགས་ན༔ དགའ་བའི་སྒོ་མ་སེང་གདོང་མ༔ སྒོ་བ་ཁྲོ་བོ་རྟ་མགྲིན་རྒྱལ༔ སྒོ་མ་ཁྲོ་མོ་ལྕགས་སྒྲོག་མ༔ ཐབས་ཤེས་ལྕགས་སྒྲོག་ཕྱག་རྒྱ་ཡིས༔ སོར་རྟོག་ཡེ་ཤེས་ནུབ་སྒོ་ཕྱེས༔ ཚེ་འདས་དད་པས་འཇུག་པར་བགྱི༔ ཀུན་བཟང་ཞི་ཁྲོའི་ལྷ་ཚོགས་ལ༔
ཚེ་འདས་དད་པས་ཕྱག་འཚལ་ལོ༔ ཡི་དམ་ལྷ་དང་མཇལ་བར་ཤོག༔ ཕྲ་ཝེ་ཤ་ཡ་ཕཊ༔ ཧཱུྃ། དཀྱིལ་འཁོར་ཆེན་པོའི་བྱང་གི་སྒོ༔ ཕྲ་དོག་སྒྲིབ་པས་བཅད་ལགས་ན༔ བཏང་སྙོམས་སྒོ་མ་སྤྲུལ་གདོང་མ༔ སྒོ་བ་ཁྲོ་བོ་འདུད་རྩ་འཁིལ༔ སྒོ་མ་ཁྲོ་མོ་དྲིལ་བུ་མ༔ ཐབས་ཤེས་དྲིལ་བུའི་ཕྱག་རྒྱ་ཡིས༔ བྱ་གྲུབ་ཡེ་ཤེས་བྱང་སྒོ་ཕྱེས༔ ཚེ་འདས་དད་པས་འཇུག་པར་བགྱི༔ ཀུན་བཟང་ཞི་ཁྲོའི་ལྷ་ཚོགས་ལ༔ ཚེ་འདས་གུས་པས་ཕྱག་འཚལ་ལོ༔ ཡི་དམ་ལྷ་དང་མཇལ་བར་ཤོག༔ པྲ་ཝེ་ཤ་ཡ་ཕཊ༔ ཅེས་བསྐོར་ནས་མཚན་བྱ་སླར་སྟེགས་སུ་བཞག །མེ་ཏོག་དོར་ལ། ཧཱུྃ། ཚེ་འདས་རིགས་པའི་མེ་ཏོག་འདི༔ ཡི་དམ་ཞི་ཁྲོའི་ལྷ་ལ་འབུལ༔ སྔོན་ནས་ལས་འཕྲོ་གང་ཡོད་པའི༔ ཡི་དམ་ལྷ་ལ་འབབས་པར་ཤོག༔ པྲ་ཏཱིཙྪ་ཧོ༔ མེ་ཏོག་བྱང་བུའི་སྤྱི་བོར་བཞག །དཀྱིལ་འཁོར་ཁ་དོག་གང་མཐོང་ལས་འགྲུབ་ཅིང་༔ གསང་མཚན་པདྨ་དྲི་མེད་དེ་བཞིན་གཤེགས༔ ཚེ་འདས་ཁྱོད་ཀྱི་མིང་ཡིན་མ་བརྗེད་ཅིག༔ དེ་ནས་ཐུར་མས་མིག་འབྱེད་ཚུལ་ཀྱིས། ཀུན་བཟང་རིགས་ལྔ་རྡོ་རྗེ་སེམས༔ ཁྱོད་ཀྱི་མ་རིག་ལྡོངས་པའི་མིག༔ ཡེ་ཤེས་
སྤྱན་ཏུ་དབྱེ་བར་བྱ༔ དེ་བཞིན་ཁྱོད་ཀྱིས་འགྲོ་བ་རྣམས༔ ཡེ་ཤེས་སྤྱན་ཏུ་དབྱེ་བར་ཤོག༔ ཨོཾ་ཛྙཱ་ན་ཙཀྵུཿཔྲ་ཝེ་ཤ་ཡ་ཕཊ༔ མིག་དར་བསལ་ནས། ཀྱེ་མ་ཚེ་འདས་རིགས་ཀྱི་བུ༔ ཁྱོད་ནི་སྡིག་པ་ཀུན་ལས་གྲོལ༔ དཀྱིལ་འཁོར་བཟང་པོ་འདི་ལ་ལྟོས༔ ལུས་ངག་ཡིད་ཀྱིས་དད་པ་བསྐྱེད༔ རྡོ་རྗེ་སེམས་དཔའི་རིགས་སུ་སྐྱེས༔ སྔགས་དང་ཕྱག་རྒྱས་བྱིན་གྱིས་བརླབས༔ དངོས་གྲུབ་ཐམས་ཅད་ཁྱོད་ཀྱིས་ཐོབ༔ དམ་ཚིག་སྔགས་ལ་བརྩོན་པར་གྱིས༔ སྐབས་འདིར་དཀྱིལ་འཁོར་རྣམ་དག་མཐོང་བ་རང་གྲོལ་ལྟར་ངོ་སྤྲོད་རྒྱས་པར་བྱ་བ་གསུངས་པའི་དོན་ལ་ཕྱག་ལེན་རྒྱས་བསྡུས་སྣ་ཚོགས་འབྱུང་ཡང་ཆགས་མེད་རིན་པོ་ཆེས་མཛད་པ་འདི་ཉིད་སྐབས་དང་འབྲེལ་བས་ངོ་སྤྲོད་རྣམས་སློབ་དཔོན་དང་། སྨོན་ལམ་རྣམས་དཔོན་སློབ་ཀུན་གྱིས་འདོན་ལ། ཀྱེ་མ་ཚེ་འདས་ལུས་བརྗེས་རིགས་ཀྱི་བུ༔ འདི་ལྟར་སྣང་ལ་རང་བཞིན་མེད་པ་ཡི༔ ཕོ་བྲང་གཞལ་ཡས་དཀྱིལ་འཁོར་དམ་པ་འདིརཿ རྒྱལ་བ་ཞི་ཁྲོའི་ལྷ་ཚོགས་བཞུགས་པ་ཡང་༔ཁྱོད་རང་ཤི་ནས་བར་དོའི་སྐབས་འདིར་འཆར༔ ཞི་ཁྲོའི་ལྷ་ཚོགས་མདུན་གྱི་ནམ་མཁའ་ལ༔ འཇའ་འོད་ཀློང་ནས་གསལ་སྟོང་འོད་ལྔའི་སྐུ༔གསལ་
འཚེར་ལྷུན་སྡུག་གཟི་བརྗིད་འོད་ཟེར་འབར༔ མཉེན་ལྕུག་འཁྲིལ་ལྡེམ་གཞོན་ཚུལ་ཞི་བའི་སྐུ༔ མཚན་དང་དཔེ་བྱད་རྒྱན་རྣམས་མཛེས་ཚུལ་ལྡན༔ ཁྱོད་ལ་བར་དོའི་སུན་མ་འབྱོན་པར་འགྱུར༔ དེ་ཚེ་གཙོ་བོ་རིགས་ལྔའི་ཐུགས་ཀ་ནས༔ ཡེ་ཤེས་ལྔ་ཡི་འོད་ལམ་ཞེས་བྱ་བ༔ དཀར་སེར་དམར་ལྗང་མཐིང་མདངས་ཐིག་ལེས་སྤྲས༔ དེ་དང་མཉམ་དུ་རིགས་དྲུག་འོད་ལམ་དྲུག༔ དཀར་ནག་དམར་དང་སེར་ལྗང་དུད་ཁ་དྲུག༔ གཤིབས་ཏེ་ཁྱོད་ཀྱི་སྙིང་གར་ཟུགས་པར་འགྱུར༔ དེ་ཚེ་རིགས་དྲུག་འོད་ལ་མ་ཆགས་པར༔ ཡེ་ཤེས་ལྔ་ཡི་འོད་ལམ་གསལ་བ་ལ༔ འདུན་པ་གཏོད་ལ་སྨོན་ལམ་འདི་སྐད་ཐོབ༔ ཀྱེ་མ་དུག་ལྔ་དྲག་པོས་འཁོར་བར་འཁྱམས་པའི་ཚེ༔ ཡེ་ཤེས་རྣམ་ལྔ་གསལ་བའི་འོད་ལམ་ལ༔ ཞི་བ་ཡབ་རྣམས་ཀུན་གྱིས་ལམ་སྣ་དྲོངས༔ དབྱིངས་ཕྱུག་ཡུམ་རྣམས་ཀུན་གྱིས་རྒྱབ་ནས་སྐྱོར༔ མ་དག་རིགས་དྲུག་ལམ་ལས་བསྒྲལ་དུ་གསོལ༔ བར་དོ་འཇིགས་པའི་འཕྲང་ལས་བསྒྲལ་ནས་ཀྱང་༔ དག་པའི་ཞིང་ཁམས་མཆོག་ཏུ་བསྐྱལ་དུ་གསོལ༔ དེ་བཞིན་དག་པ་
མཁའ་སྤྱོད་ཞེས་བྱ་ནས༔ རིག་འཛིན་དཔའ་བོ་མཁའ་འགྲོའི་སུན་མ་འབྱོན༔ གཙོ་བོ་ལྔ་པོ་རིགས་ལྔའི་མདངས་དང་ལྡན༔ དཔའ་བོ་དཔའ་མོ་མཁའ་འགྲོའི་ཚོགས་དང་བཅས༔ དེ་ཡང་ཁྱོད་ཀྱི་ཡི་དམ་ལྷ་ཡིན་ཏེ༔ ཁྱོད་ལ་བར་དོའི་སུན་མ་འབྱོན་པར་འགྱུར༔ དེ་ཚེ་དུད་འགྲོའི་འོད་ལ་མ་ཆགས་པར༔ ལྷན་སྐྱེས་ཡེ་ཤེས་འོད་ལ་རྩེ་གཅིག་ཏུ༔ འདུན་པ་གཏོད་ལ་སྨོན་ལམ་འདི་སྐད་ཐོབ༔ ཀྱེ་མ་རིག་འཛིན་དཔའ་བོའི་ལྷ་ཚོགས་ཐུགས་རྗེ་ཅན༔ ཐུགས་རྗེ་ཅན་རྣམས་ཐུགས་རྗེ་དེར་མ་ཆུང་༔ གཏི་མུག་དུད་འགྲོའི་ལམ་ནས་བཟློག་ཏུ་གསོལ༔ ལྷན་སྐྱེས་ཡེ་ཤེས་ལམ་ལ་འགྲོ་བ་དྲོངས༔ བར་དོ་རང་ངོ་ཤེས་པར་ཐུགས་རྗེས་ཟུངས༔ རིག་འཛིན་རྒྱལ་བའི་སྲས་སུ་དབང་བསྐུར་ཅིག༔ དེ་བཞིན་ཁྲོ་བོའི་ལྷ་ཚོགས་འཇིགས་སུ་རུང་༔ ཞི་བ་གནས་འགྱུར་མགོན་པོ་ནག་པོ་འཆར༔ ཁྲོ་བོ་རྣམས་ནི་གཤིན་རྗེའི་སྐུ་རུ་མཐོང་༔ འཇིགས་སྐྲག་བསྡངས་ཤིང་བརྒྱལ་ནས་རང་དབང་མེད༔ ཧཱུྃ་ཕཊ་རྒྱོབ་སོད་འབྲུག་སྒྲས་ཀླད་པ་འགེམས༔ མ་སྐྲག་མ་འཇིགས་རང་གི་ཡི་དམ་ཡིན༔ དད་ཅིང་གུས་པས་གསོལ་
བ་འདི་ལྟར་ཐོབ༔ ཀྱེ་མ་བག་ཆགས་དྲག་པོས་འཁོར་བ་འཁྱམས་པའི་ཚེ༔ བསྔངས་སྐྲག་འཇིག་སྣང་སྤང་པའི་འོད་ལམ་ལ༔ བཅོམ་ལྡན་ཞི་ཁྲོའི་ཚོགས་ཀྱིས་ལམ་སྣ་དྲོངས༔ དབྱིངས་ཕྱུག་ཁྲོ་མོོའི་ཚོགས་ཀྱིས་རྒྱབ་ནས་བསྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་བསྐྱོལ༔ དགའ་བའི་གྲོགས་དང་བྲལ་ནས་གཅིག་པུར་འཁྱམས༔ རང་སྣང་སྟོང་པའི་གཟུགས་བརྙན་འཆར་དུས་འདིར༔ སངས་རྒྱས་རྣམས་ཀྱི་ཐུགས་རྗེའི་ཤུགས་ཕྱུང་ནས༔ བསྔངས་སྐྲག་བར་དོའི་འཇིགས་པ་མི་འབྱུང་ཤོག༔ ཡེ་ཤེས་གསལ་བའི་འོད་ལྔ་འཆར་དུས་འདིར༔ མི་འཇིགས་མི་སྐྲག་རང་ངོ་ཤེས་གྱུར་ཤོག༔ ཞི་དང་ཁྲོ་བོའི་སྐུ་གཟུགས་འཆར་དུས་འདིར༔ མི་འཇིགས་གདིང་ཐོབ་བར་དོ་ངོ་ཤེས་ཤོག༔ ལས་ངན་དབང་གིས་སྡུག་བསྔལ་མྱོང་ཙམ་ན༔ ཡི་དམ་ལྷ་ཡིས་སྡུག་བསྔལ་སེལ་བར་ཤོག༔ ཆོས་ཉིད་རང་སྒྲ་འབྲུག་སྟོང་ལྡིར་ཙམ་ན༔ ཐམས་ཅད་ཡིག་དྲུག་སྒྲ་རུ་འགྱུར་བར་ཤོག༔ སྐྱབས་མེད་
ལས་ཀྱི་རྗེས་སུ་འབྲང་དུས་འདིར༔ ཐུགས་རྗེ་ཆེན་པོས་ཚེ་འདས་བསྐྱབ་ཏུ་གསོལ༔ བག་ཆགས་ལས་ཀྱི་སྡུག་བསྔལ་མྱོང་དུས་འདིར༔ འོད་གསལ་བདེ་བའི་ཏིང་འཛིན་འཆར་བར་ཤོག༔ འབྱུང་ལྔའི་ཁམས་རྣམས་དགྲ་རུ་མི་ལྡང་ཞིང་༔ སངས་རྒྱས་རིགས་ལྔའི་ཞིང་ཁམས་མཐོང་བར་ཤོག༔ དེ་ནས་བདུན་པ་དབང་བཞི་ཡོངས་རྫོགས་བསྐུར་བ། ཅུང་ཟད་རྒྱས་པའི་སྐབས་འགྲོ་དྲུག་རང་གྲོལ་གྱི་བུམ་དབབ། རིག་པའི་དབང་ལྔ། ལྷ་དབང་ཡོངས་རྫོགས། དབང་གོང་མ་མདོར་བསྡུས། མཐའ་རྟེན་གཏོར་དབང་རེག་པ་དོན་ལྡན་བཅས་བསྐུར་བ་ཡིན་ལ། བསྡུ་ན་གཙོ་བུམ་ཐོགས་ལ། ཧཱུྃ། བུམ་པ་འདི་ནི་གཞལ་ཡས་ཁང་༔ ནང་ན་ཞི་ཁྲོའི་ལྷ་ཚོགས་བཞུགས༔ ཕྱི་ནང་གསང་བའི་དཀྱིལ་འཁོར་ནས༔ སྐུ་གསུང་ཐུགས་ཀྱི་དབང་བསྐུར་བས༔ ཕྱི་ནང་གསང་བའི་དབང་མཆོག་རྣམས༔ སྐལ་ལྡན་ཁྱོད་ལ་ཕབ་ནས་ཀྱང་༔ ཕུང་ཁམས་ལྷ་དང་ལྷ་མོར་གྱུར༔ བསྐྱེད་རིམ་ལྷ་དབང་ཐོབ་པར་ཤོག༔ ཨོཾ་ཨཱཿཧཱུྃ༔ ཨོཾ་སརྦ་ཏ་ཐཱ་ག་ཏ་ཨོཾ་ཨཱཿཧཱུྃ་ཧྲཱིཿསྭཱ་ཧཱ༔ ཞེས་མགོར་བཞག །བུམ་ཆུ་གཏུང་པོར་དུ་སྦྱིན། གླེགས་བམ་མགྲིན་པར་བཞག་ལ། ཨཱཿ
ཤེས་རབ་རིག་པའི་པུསྟི་འདི༔ དུས་གསུམ་རྒྱལ་བ་ཞི་ཁྲོའི་གསུང་༔ ཚེ་འདས་ཁྱོད་ལ་དབང་བསྐུར་བས༔ གསང་དབང་ཡོངས་རྫོགས་ཐོབ་པར་ཤོག༔ ཨོཾ་བྷོ་དྷི་ཙིཏྟ་མ་ཧཱ་སུ། བ་ཛྙཱ་ན་དྷཱ་ཏུ་ཨཱ༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཝཱ་ཀྲ་ཨ་བྷི་ཥིཉྩ་ཨཱཿ རིགས་ལྔའི་ཕུག་མཚན་སྙིང་གར་བཞག་ལ། ཧཱུྃ། རྡོ་རྗེ་འཁོར་ལོ་རིན་པོ་ཆེ༔ པདྨ་རྒྱ་གྲམ་ཐུགས་ཀྱི་རྟགས༔ རིགས་ཀྱི་བུ་ལ་དབང་བསྐུར་བས༔ འཁོར་ལོ་ལྔ་ཡི་དབང་ཐོབ་ཤོག༔ བཛྲ་ཙཀྲ་རཏྣ་པདྨ་ཀརྨ་ཁཌྒ་ཨ་བྷི་ཥིཉྩ་ཨཱ༔ རིག་པའི་དབང་ལྔའི་རྫས་སོ་སོའམ་བསྡུ་ན་ཙཀླི་གཅིག་བྱས་ལ། ཧཱུྃ། ཞེ་སྡང་མེ་བསད་ཆུ་ཡི་དབང་༔ ང་རྒྱལ་རི་བསྙིལ་དབུ་རྒྱན་དབང་༔ འདོད་ཆགས་དུག་འཇོམས་རྡོ་རྗེའི་དབང་༔ ཕྲག་དོག་ཞེན་ཁྲོལ་དྲིལ་བུའི་དབང་༔ གཏི་མུག་མུན་སེལ་མིང་གི་དབང་༔ ཚེ་འདས་ཁྱོད་ལ་བསྐུར་བར་བྱ༔ ཧཱུྃ་བཛྲ་ཨཱ་དྷཱ་ར་ཤུ་ཛྙཱ་ན་ས་མ་ཡ་ཨ་བྷི་ཥིཉྩ་མཱཾ༔ བུམ་ཆུའོ། སྭཱ་རཏྣ་ཛྙཱ་ན་སྭ་བྷ་ཝ་ཨ་བྷི་ཥིཉྩ་མཱཾ༔ དབུ་རྒྱན་ནོ། ཨཱཾཿཔདྨ་པྲ་ཛྙ་ཨ་བྷི་ཥིཉྩ་མཱཾ༔ རྡོ་རྗེའོ། ཧཱ་ཏིཥྛ་ཨ་ནུ་ཏེ་ཛྙཱ་ན་ས་ཏྭ་བཛྲ་ཀརྨ་ཨ་བྷི་ཥིཉྩ་མཱཾ༔དྲིལ་བུའོ། ཨོཾ་ཏྲི་ཙིཏྟ་
མཏི་ཨ་མི་ཛྙཱ་ན་བཛྲ་ཨ་བྷི་ཥིཉྩ་མཱྃ༔ ཅེས་རྡོར་དྲིལ་ལོ། དེ་ནས་ཞི་ཁྲོའི་ལྷ་ཙཀ་སྤམ་པའམ་རྡོར་སེམས་སྐུ་ཐོགས་ལ། ཧཱུྃ། རིགས་གཅིག་རྡོ་རྗེ་སེམས་དཔའ་ཡི༔ སྐུ་ལ་དམ་པ་རིགས་བརྒྱ་རྫོགས༔ ཚེ་འདས་ཁྱོད་ལ་དབང་བསྐུར་བས༔ ཞི་ཁྲོའི་ལྷ་དབང་ཡོངས་རྫོགས་ནས༔ ལོངས་སྐུའི་ཞིང་དུ་གྲོལ་བར་ཤོག༔ དཀྱིལ་འཁོར་ལྷ་ཚོགས་ལས་སོ་སོའི་སྐུ་འཕྲོས་ཚེ་འདས་ལ་ཐིམ་པས༔ ཚེ་འདས་རྡོ་རྗེ་སེམས་དཔའི་ཐུགས་ཀར་ཞི་བ། གླད་པ་ཁྲག་འཐུང་གི་ལྷ་ཚོགས་མེ་ལོང་ལ་གཟུགས་བརྙན་ཤར་བར་ལྟར་བཀྲ་ལམ་གྱི་གསལ་བར་བསྒོམས་ལ། སྙིང་པོའི་མཇུག་ཏུ། སརྦ་ཤཱནྟི་ཾཀྲོ་ཏ་ཨོཾ་ཨཱ༔ཧཱུྃ་ཨ་བྷི་ཥིཉྩ་ཧཱུྃ༔ བདུད་རྩི་སྦྱིན་ལ། ཧོ༔ ཐོད་པ་མཚན་ལྡན་ཀ་པཱ་ལ༔ ཡེ་ཤེས་བདུད་རྩི་ལྔ་ལྡན་བཅུད༔ ཚེ་འདས་ཁྱོད་ཀྱི་ངག་ཏུ་བླུད༔ རྩ་གསུམ་འཁོར་ལོ་ལྔ་ལྡན་ནས༔ ཐིག་ལེ་རང་དབང་ཐོབ་པ་དང་༔ ཐོགས་མེད་བདེ་ཆེན་མཐར་ཕྱིན་ཤོག༔ བོདྷི་ཙིཏྟ་ཨ་མྲཾ་ཏ་ཨ་བྷི་ཥིཉྩ་ཨོཾ༔ དྲིལ་བུའམ་རིག་ཙ་ཀ་གཏད་ལ། ཧཱུྃ། ཚེ་འདས་རྡོར་སེམས་ཡུམ་བཅས་བསྒོམ༔ །དབབ་བཟུང་འདྲེན་བཀྲམ་ཚོད་སྦྱར་ལ༔ དགའ་བ་བཞི་པོ་ངོ་ཡིས་ཟུངས༔ ཤེས་རབ་ཡེ་ཤེས་དབང་ཐོབ་
ཤོག༔ པྲཛྙཱ་ཛྙཱ་ན་ཨ་བྷི་ཥིཉྩ་མཱྃ༔ ཤེལ་དང་མེ་ལོང་ཐོགས་ལ། ཧཱུྃ། རྨ་བྱ་ལུག་རྒྱུད་ལག་ཏུ་ཕྱར༔ དཀྱིལ་འཁོར་ལ་སོགས་སྣང་བ་གཏད༔ ཤེལ་མིག་སྦྱར་བ་འདི་ལ་ལྟོས༔ འོད་ལྔ་ཡེ་ཤེས་རྣམ་ལྔ་སྟེ༔ སྣང་སྲིད་སེམས་སུ་མ་གྱུར་མེད༔ ཀ་དག་ཚིག་དབང་ཐོབ་པར་ཤོག༔ དྷརྨ་ཀཱ་ཡ་ཨ་བྷི་ཥིཉྩ་མཱྃ༔ གཏོར་དབང་བསྐུར་ན་ཟུར་གསལ་ལྟར་སྦྱར༔ དཀྱུས་ལ་མི་དགོས། རྒྱལ་སྲིད་དང་རྟགས་བརྒྱད་གཏད་ལ། ཧོ༔ ཚེ་འདས་རིགས་ཀྱི་བུ་ཁྱོད་ལ༔ རྒྱལ་སྲིད་སྣ་བདུན་དབང་བསྐུར་བས༔ བདེ་ལེགས་ཕུན་སུམ་ཚོགས་པ་དང་༔ འཕགས་པའི་ནོར་བདུན་ཕྱུག་ནས་ཀྱང་༔ གཞན་དོན་དཔག་མེད་འགྲུབ་པར་ཤོག༔ ཨོཾ་དྲ་བྱེ་རཏྣ་ཨབྷི་ཥིཉྩ་ཧཱུྃ༔ ཧོ༔ ཚེ་འདས་རིགས་ཀྱི་བུ་ཁྱོད་ལ༔ བཀྲ་ཤིས་རྟགས་བརྒྱད་དབང་བསྐུར་བས༔ རྒྱལ་བུ་རྒྱལ་སར་ཐོན་ནས་ཀྱང་༔ རྒྱལ་འབངས་མངའ་འོག་ཚུད་པ་ལྟར༔ དབང་བཞི་ཡོངས་སུ་རྫོགས་ཐོབ་པས༔ གཞན་དོན་དཔག་མེད་དབང་ཐོབ་ཤོག༔ ཨཥྚ་མངྒ་ལཾ་ཨབྷི་ཥིཉྩ་མཱཾ༔ ཞེས་དང་ཤིས་བརྗོད་གང་རུང་བྱ། དམ་ཚིག་ཁས་བླངས། གཏོར་རག་མཎྜལ། ལུས་འབུལ་
རྣམས་ཀྱང་བྱའོ། །བརྒྱད་པ་ཞིང་ལམ་དུ་སྨོན་ལམ་གདབ་པ་ནི། འདི་ནས་ཤར་ཀྱི་ཕྱོགས་རོལ་ན༔ མངོན་པར་དགའ་བའི་ཞིང་ཁམས་ཡོད༔ ཐམས་ཅད་ས་ཡི་རང་བཞིན་ཏེ༔ ས་ལ་ཤི་ཞེས་བྱ་བ་མེད༔ སེམས་ཅན་སྲོག་ནི་ས་ཡིན་ཏེ༔ ས་ཡི་སྙིང་པོ་སུྃ་ཞེས་བྱ༔ དེ་ལ་བརྟེན་ནས་བུ་ཁྱོད་ཀྱང་༔ བྱང་ཆུབ་མཆོག་ཏུ་སེམས་བསྐྱེད་ནས༔ ཞིང་མཆོག་དེར་ནི་སྐྱེས་གྱུར་ཏེ༔ སངས་རྒྱས་སྤྱན་དང་གཉིས་མེད་ཤོག༔ འདི་ནས་ལྷོ་ཡི་ཕྱོགས་རོལ་ན༔ དཔལ་དང་ལྡན་པའི་ཞིང་ཁམས་ཡོད༔ ཐམས་ཅད་ཆུ་ཡི་རང་བཞིན་ཏེ༔ ཆུ་ལ་ཤི་ཞེས་བྱ་བ་མེད༔ སེམས་ཅན་སྲོག་ནི་ཆུ་ཡིན་ཏེ༔ ཆུ་ཡི་སྙིང་པོ་བྃ་ཞེས་བྱ༔ དེ་ལ་བརྟེན་ནས་བུ་ཁྱོད་ཀྱང་༔ བྱང་ཆུབ་མཆོག་ཏུ་སེམས་བསྐྱེད་ནས༔ ཞིང་མཆོག་དེར་ནི་སྐྱེས་གྱུར་ཏེ༔ མཱ་མ་ཀི་དང་གཉིས་མེད་ཤོག༔ འདི་ནས་ནུབ་ཀྱི་ཕྱོགས་རོལ་ན༔ བདེ་བ་ཅན་གྱི་ཞིང་ཁམས་ཡོད༔ ཐམས་ཅད་མེ་ཡེ་རང་བཞིན་ཏེ༔ མེ་ལ་ཤི་ཞེས་བྱ་བ་མེད༔ སེམས་ཅན་སྲོག་ནི་མེ་ཡིན་ཏེ༔ མེ་ཡི་སྙིང་པོ་རྃ་ཞེས་བྱ༔ དེ་ལ་བརྟེན་ནས་བུ་ཁྱོད་ཀྱང་༔ བྱང་ཆུབ་མཆོག་ཏུ་སེམས་
བསྐྱེད་ནས༔ ཞིང་མཆོག་དེར་ནི་སྐྱེས་གྱུར་ཏེ༔ གོས་དཀར་མོ་དང་གཉིས་མེད་ཤོག༔ འདི་ནས་བྱང་གི་ཕྱོགས་རོལ་ན༔ ལས་རབ་རྫོགས་པའི་ཞིང་ཁམས་ཡོད༔ ཐམས་ཅད་རླུང་གི་རང་བཞིན་ཏེ༔ རླུང་ལ་ཤི་ཞེས་བྱ་བ་མེད༔ སེམས་ཅན་སྲོག་ནི་རླུང་ཡིན་ཏེ༔ རླུང་གི་སྙིང་པོ་ཡྃ་ཞེས་བྱ༔ དེ་ལ་བརྟེན་ནས་བུ་ཁྱོད་ཀྱང་༔ བྱང་ཆུབ་མཆོག་ཏུ་སེམས་བསྐྱེད་ནས༔ ཞིང་མཆོག་དེར་ནི་སྐྱེས་གྱུར་ཏེ༔ དམ་ཚིག་སྒྲོལ་དང་གཉིས་མེད་ཤོག༔ འདི་ནས་དབུས་ཀྱི་ཕྱོགས་རོལ་ན༔ སྟུག་པོ་བཀོད་པའི་ཞིང་ཁམས་ཡོད༔ ཐམས་ཅད་ནམ་མཁའི་རང་བཞིན་ཏེ༔ ནམ་མཁའ་ཤི་ཞེས་བྱ་བ་མེད༔ སེམས་ཅན་སྲོག་ནི་ནམ་མཁའ་སྟེ༔ ནམ་མཁའི་སྙིང་པོ་ཨེ་ཞེས་བྱ༔ དེ་ལ་བརྟེན་ནས་བུ་ཁྱོད་ཀྱང་༔ བྱང་ཆུབ་མཆོག་ཏུ་སེམས་བསྐྱེད་ནས༔ ཞིང་མཆོག་དེར་ནི་སྐྱེས་གྱུར་ཏེ༔ དབྱིངས་ཕྱུག་མ་དང་གཉིས་མེད་ཤོག༔ དགུ་པ་ནད་དང་སྒྲིབ་པ་སྦྱོང་བ་སྟེ༔ འདིའི་ཁོངས་སུ་སྤྱི་མཚུངས་ཟས་གཏད་སྐབས་སུ་བབས་པས། འདོད་ཡོན་རྣམས་བཤམས་ལ། བཛྲ་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་
ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨ་ཨཱཿཧཱུྃ་འོད་དུ་ཞུ་བ་ལས། གཟུགས་སྒྲ་དྲི་རོ་རེག་བྱའི་འདོད་ཡོན་གྱི་དངོས་པོ་ཕུན་སུམ་ཚོགས་པ་ཡིད་དུ་འོང་ཞིང་ཟད་པ་མེད་པའི་གཏེར་ཆེན་པོར་གྱུར། ཨོཾ་ཨཱཿཧཱུྃ༔ གསུམ་དང་། ཨོཾ་ཨ་ཀ་རོ་སོགས་གསུམ་གྱིས་བྱིན་རླབས། ན་མཿསརྦ་ཏ་ཐཱ་ག་ཏ་ས་ཝ་ལོ་ཀི་ཏེ་ཨོཾ་སཾ་བྷ་ར་ས་བྷ་ར་ཧཱུྃ། ལན་བདུན། འཇིག་རྟེན་འདི་ནས་ཚེ་ལས་འདས་པ་འདི་ཉིད་ལ་སྦྱིན་ནོ༔ བསྔོའོ༔ མིག་གི་ཡུལ་དུ་གཟུགས་མཛེས་པ༔ རྣ་བའི་ཡུལ་དུ་སྒྲ་སྙན་པ༔ སྣའི་ཡུལ་དུ་དྲི་ཞིམ་པ༔ ལྕེའི་ཡུལ་དུ་རོ་བྲོ་བ༔ ལུས་ཀྱི་ཡུལ་དུ་རེག་བྱ་འཇམ་པ༔ ཡིད་ཀྱི་ཡུལ་དུ་བདེ་བས་ཚིམ་པ༔ བར་དོ་ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་ཀྱིས་བརྒྱན་པར་གྱུར་ཅིག༔ དེ་ནས་ལས་རྡོར་གྱིས་ལག་གཡས་སུ་རྡོ་རྗེ་སོགས་དང་གཡོན་མེ་ལོང་ཐོགས༔ སློབ་དཔོན་གྱིས་བྱང་བུ་དང་མེ་ལོང་ལ་སེམས་དཔའ་ལྔའི་སྐུ་རིམ་པར་བསྟན་ཅིང་། སྒྲིབ་པ་སོ་སོར་སྦྱངས་ཏེ། ཀྱེ་མ་མུན་པ་ལྟ་བུའི་འཇིག་རྟེན་ཁམས་སུ་འཁྱམས༔ སྡུག་བསྔལ་ཉམ་ཐག་འོ་དོད་འབོད་པ་ཁྱོད༔ རྒྱལ་སྲས་ཐུགས་རྗེ་ཅན་གྱིས་སྐྱོབ་པར་ཤོག༔
མེ་ལོང་ཡེ་ཤེས་ངང་ལས་སྐུ་སྤྲུལ་པའི༔ རྒྱལ་སྲས་ས་ཡི་སྙིང་པོའི་ཐུགས་རྗེ་ཡིས༔ ཚེ་འདས་མིག་གི་དབང་པོའི་སྐྱོན་བསལ་ནས༔ རབ་རིབ་ནད་སེལ་གཟུགས་ལ་བལྟ་བར་ཤོག༔ སྔོན་ཚེ་གོང་ནས་བསྙེན་པའི་ལྷ༔ ཡི་དམ་ལྷ་མཆོག་འཁོར་བའི་སྐྱོབ༔ རྒྱལ་སྲས་བྱང་སེམས་ས་ཡི་སྙིང་༔ ལྷ་མཆོག་ཁྱེད་ལ་སྐྱབས་སུ་མཆི༔ ཐུགས་རྗེས་ཚེ་འདས་བྱིན་གྱིས་རློབས༔ དྲིལ་བུའམ་ཏིང་ཤག་སྒྲོག་ལ། ཀྱེ་མ་མུན་པ་ལྟ་བུའི་འཇིག་རྟེན་ཁམས་སུ་འཁྱམས༔ སྡུག་བསྔལ་ཉམ་ཐག་འོ་དོད་འབོད་པ་ཁྱོད༔ རྒྱལ་སྲས་ཐུགས་རྗེ་ཅན་གྱིས་སྐྱོབ་པར་ཤོག༔ མཉམ་ཉིད་ཡེ་ཤེས་ངང་ལས་སྐུ་སྤྲུལ་པའི༔ རྒྱལ་སྲས་ནམ་མཁའི་སྙིང་པོའི་།ཐུགས་རྗེ་ཡིས༔ ཚེ་འདས་རྣ་བའི་དབང་པོའི་སྐྱོན་བསལ་ནས༔ འོན་པའི་ནད་སལ་གསུང་མཆོག་ཉན་པར་ཤོག༔ སྔོན་ཚེ་གོང་ནས་བསྙེན་པའི་ལྷ༔ ཡི་དམ་ལྷ་མཆོག་འཁོར་བའི་སྐྱོབ༔ རྒྱལ་སྲས་བྱང་སེམས་ནམ་མཁའི་སྙིང་༔ ལྷ་མཆོག་ཁྱེད་ལ་སྐྱབས་སུ་མཆི༔ ཐུགས་རྗེས་ཚེ་འདས་བྱིན་གྱིས་རློབས༔ དྲི་སྤོས་གཏད་ལ། ཀྱེ་མ་
མུན་པ་ལྟ་བུའི་འཇིག་རྟེན་ཁམས་སུ་འཁྱམས༔ སྡུག་བསྔལ་ཉམ་ཐག་འོ་དོད་འབོད་པ་ཁྱོད༔ རྒྱལ་སྲས་ཐུགས་རྗེ་ཅན་གྱིས་སྐྱོབ་བར་ཤོག༔ སོར་རྟོག་ཡེ་ཤེས་ངང་ལས་སྐུ་སྤྲུལ་པའི༔ རྒྱལ་སྲས་སྤྱན་རས་གཟིགས་དབང་ཐུགས་རྗེ་ཡིས༔ ཚེ་འདས་སྣ་ཡི་དབང་པོའི་སྐྱོན་བསལ་ནས༔ མཚུལ་པའི་ནད་སེལ་དྲིལ་སྣོམ་པར་ཤོག༔ སྔོན་ཚེ་གོང་ནས་བསྙེན་པའི་ལྷ༔ ཡི་དམ་ལྷ་མཆོག་འཁོར་བའི་སྐྱོབ༔ རྒྱལ་སྲས་བྱང་སེམས་སྤྱན་རས་གཟིགས༔ ལྷ་མཆོག་ཁྱེད་ལ་སྐྱབས་སུ་མཆི༔ ཐུགས་རྗེས་ཚེ་འདས་བྱིན་གྱིས་རློབས༔ ཟས་སྣ་ཐོགས་ལ། ཀྱེ་མ་མུན་པ་ལྟ་བུའི་འཇིག་རྟེན་ཁམས་སུ་འཁྱམས༔ སྡུག་བསྔལ་ཉམ་ཐག་འོ་དོད་འབོད་པ་ཁྱོད༔ རྒྱལ་སྲས་ཐུགས་རྗེ་ཅན་གྱིས་སྐྱོབ་པར་ཤོག༔ བྱ་གྲུབ་ཡེ་ཤེས་ངང་ལས་སྐུ་སྤྲུལ་པའི༔ རྒྱལ་སྲས་ཕྱག་ན་རྡོ་རྗེའི་ཐུགས་རྗེ་ཡིས༔ ཚེ་འདས་ལྕེ་ཡི་དབང་པོའི་སྐྱོན་བསལ་ནས། དིག་པའི་ནད་སེལ་རོ་མཆོག་མྱོང་བར་ཤོག༔ སྔོན་ཚེ་གོང་ནས་བསྙེན་པའི་ལྷ༔ ཡི་དམ་ལྷ་མཆོག་འཁོར་བའི་སྐྱོབ༔ རྒྱལ་
སྲས་ཕྱག་ན་རྡོ་རྗེ་འཛིན༔ ལྷ་མཆོག་ཁྱེད་ལ་སྐྱབས་སུ་མཆི༔ ཐུགས་རྗེས་ཚེ་འདས་བྱིན་གྱིསརློབས༔ དར་རས་ཐོགས་ལ། ཀྱེ་མ་མུན་པ་ལྟ་བུའི་འཇིག་རྟེན་ཁམས་སུ་འཁྱམས༔ སྡུག་བསྔལ་ཉམ་ཐག་འོ་དོད་འབོད་པ་ཁྱོད༔ རྒྱལ་སྲས་ཐུགས་རྗེ་ཅན་གྱིས་སྐྱོབ་པར་ཤོག༔ ཆོས་དབྱིངས་ཡེ་ཤེས་ངང་ལས་སྐུ་སྤྲུལ་པའི༔ རྒྱལ་སྲས་སྒྲིབ་པ་རྣམ་སེལ་ཐུགས་རྗེ་ཡིས༔ ཚེ་འདས་ལུས་ཀྱི་དབང་པོའི་སྐྱོན་བསལ་ནས༔ ཚ་གྲང་ནད་སེལ་རེག་བྱ་མྱོང་བར་ཤོག༔ སྔོན་ཚེ་གོང་ནས་བསྙེན་པའི་ལྷ༔ ཡི་དམ་ལྷ་མཆོག་འཁོར་བའི་སྐྱོབ༔ རྒྱལ་སྲས་སྒྲིབ་པ་རྣམ་པར་སེལ༔ ལྷ་མཆོག་ཁྱེད་ལ་སྐྱབས་སུ་མཆི༔ ཐུགས་རྗེས་ཚེ་འདས་བྱིན་གྱིས་རློབས༔ གཟའ་བཏུང་རྣམས་ཉེ་དུ་སོགས་ཀྱིས་མེ་བསུར་བྱས་ལ། ཟས་གཏད་རྫོགས་པ་རང་བྱུང་གི་རྒྱུད་ཆིག་ཐུགས་གསང་ལས་འབྱུང་བ་ནི། ཀྱེ་མ་ཚེ་འདས་རིགས་ཀྱི་བུ༔ ཡང་དག་ངེས་པའི་ལུང་འདི་ཉོན༔ རིན་ཆེན་རྟེན་དང་ཕུང་པོའི་དཀྱིལ༔ རང་རིག་གསལ་པའི་སྒོ་ཕྱེ་བས༔ འདི་ནི་སངས་རྒྱས་ཞིང་ཁམས་ཏེ༔ འདི་ལ་བུ་གཅིག་མ་གཡོ་ཞིག༔ ལོངས་སྤྱོད་ཚོགས་འདི་རབ་ཏུ་ལོངས༔ སྟོང་ཉིད་
གསལ་བའི་སྒོ་ཕྱེ་བས༔ རིག་པ་རང་བྱུང་རྟོག་པ་མཉམ༔ ཟས་འདི་ལོངས་ལ་རང་སྣང་ལྟོས༔ འདི་ནི་ཁྱོད་ཀྱི་གཏན་སྲིད་ཡིན༔ འདི་ནི་བུ་དང་བུ་མོ་དང་༔ ཕ་མ་སྤུན་ཟླ་གཟའ་རོག་དང་༔ ཇོ་མོ་མིང་པོ་ལྕམ་སྲིང་དང་༔ ཞང་པོ་མ་སྲུ་གྲོགས་པོ་དང་༔ ཉེ་རིང་བརྩེ་བ་ཐམས་ཅད་ཀྱིས༔ རོ་མཆོག་ལྡན་པའི་ཟས་མང་ཐོགས༔ གདུང་བའི་ཤུགས་ཀྱིས་མཆི་མ་ཕྱུངས༔ ཟས་ཀྱི་ཐ་མ་འདི་ཡིན་པས༔ སྐྱེ་བ་གཏན་གྱི་ལོངས་སྤྱོད་ཟས༔ མི་འཛད་ནམ་མཁའི་མཛོད་ལ་སྤྱོད༔ སྦྱིན་པའི་ཕ་རོལ་ཡོངས་རྫོགས་པའི༔ ཟས་གཏད་འདི་ནི་དགའ་བས་ལོངས༔ གསོན་ཡང་གཤིན་ལེ་མི་འཕྲང་ངོ་༔ གཤིན་ཡང་གསོན་ལ་མ་ཆགས་པར༔ བདེ་ཆེན་དག་པའི་ཞིང་དུ་གཤེགས༔ འཁོར་བ་འདི་ན་སྡུག་བསྔལ་ཆེ༔ བྱས་པས་མི་ཟིན་ལས་ཡོད་པས༔ འཁོར་བ་འདི་རུ་མ་གནས་པར༔ རང་གི་ཆོས་ཉིད་འདི་རིག་པས༔ བདེ་བ་ཅན་གྱི་ཞིང་ཁམས་ན༔ སྟོང་པ་ཆེན་པོ་ཡུལ་རེ་ཡངས༔ འཁོར་བ་རིགས་དྲུག་གཅོང་རོང་ཆེ༔ པདྨོ་བཀོད་པའི་ཞིང་ཁམས་ན༔ ཆོས་ཉིད་འོད་གསལ་ལྷུན་རེ་འཐུག༔ སེམས་དཔའ་སེམས་མ་
གྲོགས་རེ་བཟང་༔ དེ་བས་ཚེ་ལས་འདས་པ་ཁྱོད༔ ཟས་འདི་ལོངས་ལ་བདེ་བར་གཤེགས༔ ཨོཾ་ཨཱཿཧཱུྃ་སྭཱ་ཧཱ༔ ལམ་བྷ་ཏ༔ བྷ་དུ་ཡཱ་ཡ༔ ཨ་ལི་ཨུ་ལི༔ ཏ་ལི་ཏ་ལི༔ ཨརྒྷཾ་པྲ་ཏཱིཙྪ་ཧོ༔ བཅུ་པ་ལམ་བསྟན་དང་གནས་སྤར་གཉིས་ལས་དང་པོ་ལམ་བསྟན་བྱ་བ་ནི། མཚན་བྱང་མདུན་དུ་མར་མེ་བཟུང་ལ། བྃ་དཱི་པཾ་སུ་ཀི་ནི༔ མར་མེ་མ་རིག་པའི་མུན་པ་སེལ་བའི་ཡེ་ཤེས་སྣང་བའི་སྒྲོན་མེ་ཆེན་པོར་གྱུར༔ ཧཱུྃ། རང་བཞིན་ཤུགས་ཀྱིས་དྲངས་བའི་དྲན་པས་ཉོན༔ འཁོར་བའི་རྦ་རླབས་རླུང་ལྟར་འཁྱམས་པ་ལ༔ ཐུགས་རྗེའི་ཤུགས་ཀྱི་སྒྲོན་མེ་འདི་བསྟན་པས༔ ཡེ་ཤེས་འོད་ལ་རྟག་ཏུ་བདེ་བར་ཤོག༔ ཐར་པའི་ཞིང་དུ་འགྲོ་བ་ལ༔ གལ་ཏེ་མུན་པ་འཐིབས་ན་ཡང་༔ སྒྲོན་མེ་འདི་ཡིས་གསལ་གྱུར་ཅིག༔ གལ་ཏེ་མ་རིག་རྨོངས་ན་ཡང་༔ སྒྲོན་མེ་འདི་ཡིས་གསལ་གྱུར་ཅིག༔ གལ་ཏེ་མ་ཤེས་འཁྲུལ་ན་ཡང་༔ སྒྲོན་མེ་འདི་ཡིས་གསལ་གྱུར་ཅིག༔ གལ་ཏེ་དག་པའི་ལམ་སྟོར་ན༔ ཡེ་ཤེས་འདི་ཡིས་རྙེད་གྱུར་ཅིག༔ ཡེ་ཤེས་སྣང་བ་ཆེན་པོ་སྟེ༔ སྔགས་འཆང་རྒྱལ་པོས་སྒྲོན་མེ་སྦྱིན༔ འདི་ལ་བརྟེན་ནས་བུ་ཁྱོད་ཀྱང་༔ འོག་
མིན་ཆོས་དབྱིངས་ཞིང་ཁམས་སུ༔ ཡེ་ཤེས་ལྷ་དང་འཕྲད་པར་ཤོག༔ འདི་ནས་ཤར་གྱི་ཕྱོགས་རོལ་ན༔ མངོན་པར་དགའ་བའི་ཞིང་ཁམས་སུ༔ རྫོགས་པའི་སངས་རྒྱས་རྣམ་སྣང་མཛད༔ གང་ཞིག་དེ་ཡི་མཚན་འཛིན་པ༔ ཞིང་མཆོག་དེར་ནི་སྐྱེ་བར་འགྱུར༔ ཞིང་མཆོག་དེ་རུ་སྐྱེ་བར་ཤོག༔ བཅོམ་ལྡན་རྣམ་པར་སྣང་མཛད་ལ༔ ཚེ་ལས་འདས་པ་འདི་ཉིད་ཀྱི༔ གཟུགས་ཀྱི་ཕུང་པོ་ཡོན་དུ་འབུལ༔ ཡོན་འདི་བཞེས་ལ་ལམ་འདི་སྟོན༔ སེམས་འདི་བྱང་ཆུབ་གནས་སུ་དྲངས༔ འདི་ནས་ལྷོ་ཡི་ཕྱོགས་རོལ་ན༔ དཔལ་དང་ལྡན་པའི་ཞིང་ཁམས་སུ༔ རྫོགས་པའི་སངས་རྒྱས་རིན་ཆེན་འབྱུང་༔ གང་ཞིག་དེ་ཡི་མཚན་འཛིན་པ༔ ཞིང་མཆོག་དེར་ནི་སྐྱེ་བར་འགྱུར༔ ཞིང་མཆོག་དེ་རུ་སྐྱེ་བར་ཤོག༔ བཅོམ་ལྡན་རིན་ཆེན་འབྱུང་ལྡན་ལ༔ ཚེ་ལས་འདས་པ་འདི་ཉིད་ཀྱི༔ ཚོར་བའི་ཕུང་པོ་ཡོན་དུ་འབུལ༔ ཡོན་འདི་བཞེས་ལ་ལམ་འདི་སྟོན༔ སེམས་འདི་བྱང་ཆུབ་གནས་སུ་དྲངས༔ འདི་ནས་ནུབ་ཀྱི་ཕྱོགས་རོལ་ན༔ བདེ་བ་ཅན་གྱི་ཞིང་ཁམས་སུ༔ རྫོགས་པའི་སངས་རྒྱས་འོད་དཔག་མེད༔ གང་ཞིག་དེ་ཡི་མཚན་འཛིན་པ༔ ཞིང་
མཆོག་དེར་ནི་སྐྱེ་བར་འགྱུར༔ ཞིང་མཆོས་དེ་རུ་སྐྱེ་བར་ཤོག༔ བཅོམ་ལྡན་སྣང་བ་མཐའ་ཡས་ལ༔ ཚེ་ལས་འདས་པ་འདི་ཉིད་ཀྱི༔ འདུ་ཤེས་ཕུང་པོ་ཡོན་དུ་འབུལ༔ ཡོན་འདི་བཞེས་ལ་ལམ་འདི་སྟོན༔ སེམས་འདི་བྱང་ཆུབ་གནས་སུ་དྲངས༔ འདི་ནས་བྱང་གི་ཕྱོགས་རོལ་ན༔ ལས་རབ་རྫོགས་པའི་ཞིང་ཁམས་སུ༔ རྫོགས་པའི་སངས་རྒྱས་དོན་ཡོད་གྲུབ༔ གང་ཞིག་དེ་ཡི་མཚན་འཛིན་པ༔ ཞིང་མཆོག་དེར་ནི་སྐྱེ་བར་འགྱུར༔ ཞིང་མཆོག་དེ་རུ་སྐྱེ་བར་ཤོག༔ བཅོམ་ལྡན་དོན་ཡོད་གྲུབ་པ་ལ༔ ཚེ་ལས་འདས་པ་འདི་ཉིད་ཀྱི༔ འདུ་བྱེད་ཕུང་པོ་ཡོན་དུ་འབུལ༔ ཡོན་འདི་བཞེས་ལ་ལམ་འདི་སྟོན༔ སེམས་འདི་བྱང་ཆུབ་གནས་སུ་དྲངས༔ འདི་ནས་དབུས་ཀྱི་ཕྱོགས་རོལ་ན༔ སྡུག་པོ་བཀོད་པའི་ཞིང་ཁམས་སུ༔ རྫོགས་པའི་སངས་རྒྱས་རྡོ་རྗེ་སེམས༔ གང་ཞིག་དེ་ཡི་མཚན་འཛིན་པ༔ ཞིང་མཆོག་དེར་ནི་སྐྱེ་བར་འགྱུར༔ ཞིང་མཆོག་དེ་རུ་སྐྱེ་བར་ཤོག༔ བཅོམ་ལྡན་རྡོ་རྗེ་སེམས་དཔའ་ལ༔ ཚེ་ལས་འདས་པ་འདི་ཉིད་ཀྱི༔ རྣམ་ཤེས་ཕུང་པོ་ཡོན་བུ་འབུལ༔ ཡོན་འདི་བཞེས་ལ་ལམ་འདི་སྟོན༔ སེམས་འདི་
བྱང་ཆུབ་གནས་སུ་དྲངས༔ ལམ་ལྔ་ས་བཅུ་མཐར་ཕྱིན་ནས༔ རྫོགས་པའི་སངས་རྒྱས་ལྷུན་གྱིས་གྲུབ༔ ཐམས་ཅད་མཁྱེན་པའི་དོན་རྟོགས་ནས༔ འབྲས་བུ་སྐུ་གསུམ་འགྲུབ་པར་ཤོག༔ གཉིས་པ་ཕུང་པོ་ལྔ་གནས་སུ་སྦར་བ་ན། ཡང་ལང་ཞུ་སྦྱར་ནས་རོ་ལ་རེག་ཚུལ་དང་བྱང་བུ་མདེལ་རྩེས། ཚུལ་བྱ་བར་གསུངས་ཀྱང་དེང་སང་ལག་ལེན་མི་མཛད་པས་དེའི་ཕྱག་རྒྱ་ཙམ་བྱས་ལ། ཧཱུྃ། ཐབས་ཀྱི་གཞུ་ལ་ཤེས་རབ་མངའ་བཀང་སྟེ༔ ཡེ་ཤེས་ཐུགས་རྗེའི་ཤུགས་ཀྱི་རྒྱུད་དང་ལྡན༔ བླ་ན་མེད་པའི་གནས་མཆོག་དམ་པ་རུ༔ ཚེ་འདས་མདའ་འཕང་བཞིན་ཏུ་སྐྱེ་བར་ཤོག༔ ཞིང་ཁམས་འདི་ནས་ཤར་གྱི་ཕྱོགས་རོལ་ན༔ མངོན་པར་དགའ་བའི་ཞིང་ཁམས་ཞེས་བྱ་ཡོད༔ དེ་ན་སངས་རྒྱས་རྣམ་པར་སྣང་མཛད་བཞུགས༔ ཡུམ་མཆོག་ལྷ་མོ་སངས་རྒྱས་སྤྱན་མ་བཞུགས༔ གཡས་སུ་སེམས་དཔའ་ས་ཡི་སྙིང་པོ་བཞུགས༔ གཡོན་ཏུ་སེམས་དཔའ་བྱམས་པ་མཻ་ཏྲི་བཞུགས༔ མདུན་ཏུ་སེམས་མ་ལཱ་སེ་དཀར་མོ་བཞུགས༔ རྒྱབ་ཏུ་སེམས་མ་པུཥྤེ་དཀར་མོ་བཞུགས༔ བདེ་གཤེགས་རིགས་ཀྱི་གཙོ་འཁོར་རྣམ་པ་དྲུང་༔ སྤྲུལ་པའི་སངས་རྒྱས་གྲངས་ལས་འདས་པ་ཡོད༔ དགའ་
བདེ་ཡོན་ཏན་བསམ་གྱིས་མི་ཁྱབ་ཡོད༔ དེ་ཕྱིར་མིང་ནི་མངོན་པར་དགའ་བའི་ཞིང་༔ ཞིང་མཆོག་གཙང་མའི་གནས་རབ་དམ་པ་དར༔ ཚེ་འདས་ལུས་བརྗེས་རིགས་ཀྱི་བུ་ཁྱོད་ཀྱང་༔ རྫོགས་པའི་སངས་རྒྱས་དེ་ཡི་སྲས་མཆོག་ཏུ༔ རྩལ་ཆེན་མདའ་འཕང་བཞིན་ཏུ་སྐྱེ་བར་ཤོག༔ ཕཊ༔ ཚེ་ལས་འདས་པའི་གཟུགས་ཀྱི་ཕུང་པོ་ཨོཾ་དཀར་པོར་གྱུར་ཏེ༔ རྩལ་ཆེན་གྱིས་མདའ་འཕངས་པ་བཞིན་དུ་རྣམ་སྣང་ཡབ་ཡུམ་གྱི་སྦྱོར་མཚམས་སུ་ཐིམ་ནས༔ རྒྱལ་བའི་སྲས་སུ་གྱུར་ཏེ་འཚང་རྒྱ་བར་གྱུར་ཅིག༔ ཞིང་ཁམས་འདི་ནས་ལྷོ་ཡི་ཕྱོགས་རོལ་ན༔ དཔལ་དང་ལྡན་པའི་ཞིང་ཁམས་ཞེས་བྱ་ཡོད༔ དེ་ན་སངས་རྒྱས་རིན་ཆེན་འབྱུང་ལྡན་བཞུགས༔ ཡུམ་མཆོག་མཱ་མ་ཀི་ཞེས་བྱ་བ་བཞུགས༔ གཡས་སུ་སེམས་དཔའ་ཀུན་ཏུ་བཟང་པོ་བཞུགས༔ གཡོན་ཏུ་སེམས་དཔའ་ནམ་མཁའི་སྙིང་པོ་བཞུགས༔ མདུན་ཏུ་སེམས་མ་མཱ་ལེ་སྔོན་མོ་བཞུགས༔ རྒྱབ་ཏུ་སེམས་མ་དྷཱུ་པ་སར་མོ་བཞུགས༔ རིན་ཆེན་རིགས་ཀྱི་གཙོ་འཁོར་རྣམ་པ་དྲུག༔ སྤྲུལ་པའི་སངས་རྒྱས་གྲངས་ལས་འདས་པ་ཡོད༔ དཔལ་དང་ཡོན་ཏན་བསམ་གྱིས་
མི་ཁྱབ་ཡོད༔ དེ་ཕྱིར་མིང་ནི་དཔལ་དང་ལྡན་པའི་ཞིང་༔ ཞིང་མཆོག་གཙང་མའི་གནས་རབ་དམ་པ་དེར༔ ཚེ་འདས་ལུས་བརྗེས་རིགས་ཀྱི་བུ་ཁྱོད་ཀྱང་༔ རྫོགས་པའི་སངས་རྒྱས་དེ་ཡི་སྲས་མཆོག་ཏུ༔ རྩལ་ཆེན་མདའ་འཕངས་བཞིན་དུ་་སྐྱེ་བར་ཤོག༔ ཕཊ༔ ཚེ་ལས་འདས་པའི་ཚོར་བའི་ཕུང་པོ་སྭཱ་སེར་པོར་གྱུར་ཏེ༔ རྩལ་ཆེན་གྱིས་མདའ་འཕངས་པ་བཞིན་དུ་རིན་ཆེན་འབྱུང་ལྡན་ཡབ་ཡུམ་གྱི་སྦྱོར་མཚམས་སུ་ཐིམ་པས༔ རྒྱལ་བའི་སྲས་སུ་གྱུར་ཏེ་འཚང་རྒྱ་བར་གྱུར་ཅིག༔ ཞིང་ཁམས་འདི་ནས་ནུབ་ཀྱི་ཕྱོགས་རོལ་ན༔ བདེ་བ་ཅན་གྱི་ཞིང་ཁམས་ཞེས་བྱ་ཡོད༔ དེ་ན་སངས་རྒྱས་སྣང་བ་མཐའ་ཡས་བཞུགས༔ ཡུམ་མཆོག་ལྷ་མོ་ན་བཟའ་དཀར་མོ་བཞུགས༔ གཡས་སུ་སེམས་དཔའ་སྤྱན་རས་གཟིགས་དབང་བཞུགས༔ གཡོན་ཏུ་སེམས་དཔའ་འཇམ་དཔལ་གཞོན་ནུ་བཞུགས༔ མདུན་ཏུ་སེམས་མ་གཱིརྟི་དམར་མོ་བཞུགས༔ རྒྱབ་ཏུ་སེམས་མ་ཨཱ་ལོ་དམར་མོ་བཞུགས༔ པདྨ་རིགས་ཀྱི་གཙོ་འཁོར་རྣམ་པ་དྲུག༔ སྤྲུལ་པའི་སངས་རྒྱས་གྲངས་ལས་འདས་པ་ཡོད༔ བདེ་སྐྱིད་ངོ་
མཚར་བསམ་གྱིས་མི་ཁྱབ་ཡོད༔ དེ་ཕྱིར་མིང་ནི་བདེ་བ་ཅན་གྱི་ཞིང་༔ ཞིང་མཆོག་གཙང་མའི་གནས་རབ་དམ་པ་དེར༔ ཚེ་འདས་ལུས་བརྗེས་རིགས་ཀྱི་བུ་ཁྱོད་ཀྱང་༔ རྫོགས་པའི་སངས་རྒྱས་དེ་ཡི་སྲས་མཆོག་ཏུ༔ རྩལ་ཆེན་མདའ་འཕངས་བཞིན་ཏུ་སྐྱེ་བར་ཤོག༔ ཕཊ༔ ཚེ་ལས་འདས་པའི་འདུ་ཤེས་ཀྱི་ཕུང་པོ་ཨཱ༔ དམར་པོར་གྱུར་ཏེ༔ རྩལ་ཆེན་གྱིས་མདའ་འཕངས་པ་བཞིན་དུ་སྣང་པ་མཐའ་ཡས་ཡབ་ཡུམ་གྱི་སྦྱོར་མཚམས་སུ་ཐིམ་ནས༔ རྒྱལ་བའི་སྲས་སུ་གྱུར་ཏེ་འཚང་རྒྱ་བར་གྱུར་ཅིག༔ ཞིང་ཁམས་འདི་ནས་བྱང་གི་ཕྱོགས་རོལ་ན༔ ལས་རབ་རྫོགས་པའི་ཞིང་ཁམས་ཞེས་བྱ་ཡོད༔ དེ་ན་སངས་རྒྱས་དོན་ཡོད་གྲུབ་པ་བཞུགས༔ ཡུམ་མཆོག་ལྷ་མོ་དམ་ཚིག་སྒྲོལ་མ་བཞུགས༔ གཡས་སུ་སེམས་དཔའ་སྒྲིབ་པ་རྣམ་སེལ་བཞུགས༔ གཡོན་ཏུ་སེམས་དཔའ་ཕྱག་ན་རྡོ་རྗེ་བཞུགས༔ མདུན་ཏུ་སེམས་མ་གྷནྡྷེ་ལྗང་མོ་བཞུགས༔ རྒྱབ་ཏུ་སེམས་མ་ནི་རྟི་ལྗང་མོ་བཞུགས༔ ལས་ཀྱི་རིགས་ཀྱི་གཙོ་འཁོར་རྣམ་པ་དྲུག༔ སྤྲུལ་པའི་སངས་རྒྱས་གྲངས་ལས་འདས་པ་ཡོད༔ ཕྲིན་ལས་
མཛད་པ་བསམ་གྱིས་མི་ཁྱབ་ཡོད༔ དེ་ཕྱིར་མིང་ནི་ལས་རབ་རྫོགས་པའི་ཞིང་༔ ཞིང་མཆོག་གཙང་མའི་གནས་རབ་དམ་པ་དེར༔ ཚེ་འདས་ལུས་བརྗེས་རིགས་ཀྱི་བུ་ཁྱོད་ཀྱང་༔ རྫོགས་པའི་སངས་རྒྱས་དེ་ཡི་སྲས་མཆོག་ཏུ༔ རྩལ་ཆེན་མདའ་འཕང་བཞིན་དུ་སྐྱེ་བར་ཤོག༔ ཕཊ༔ ཚེ་ལས་འདས་པའི་འདུ་བྱེད་ཀྱི་ཕུང་བོ་ཧཱ་ལྗང་གུར་གྱུར་ཏེ༔ རྩལ་ཆེན་གྱིས་མདའ་འཕང་པ་བཞིན་དུ་དོན་ཡོད་གྲུབ་པ་ཡབ་ཡུམ་གྱི་སྦྱོར་མཚམས་སུ་ཐིམ་ནས༔ རྒྱལ་བའི་སྲས་སུ་གྱུར་ཏེ་འཚང་རྒྱ་བར་གྱུར་ཅིག༔ ཞིང་ཁམས་འདི་ནས་དབུས་ཀྱི་ཕྱོགས་རོལ་ན༔ འོག་མིན་ཆོས་དབྱིངས་ཕོ་བྲང་ཞེས་བྱ་ཡོད༔ དེ་ན་སངས་རྒྱས་ཀུན་གྱི་སྤྱི་མེས་ནི༔ ཐོག་མའི་སངས་རྒྱས་ཀུན་ཏུ་བཟང་པོ་བཞུགས༔ དུས་གསུམ་སངས་རྒྱས་ཐམས་ཅད་སྐྱེད་པའི་ཡུམ༔ ཆོས་ཉིད་ཀུན་ཏུ་བཟང་མོ་ཞེས་བྱ་བཞུགས༔ རྒྱལ་བའི་སྲས་མཆོག་རྡོ་རྗེ་སེམས་དཔའ་བཞུགས༔ ཡུམ་ཆེན་ནམ་མཁའི་དབྱིངས་ཕྱུག་ཞེས་བྱ་བཞུགས༔ རིགས་བཞི་ཡབ་ཡུམ་གཙོ་འཁོར་གྲངས་མེད་བཞུགས༔
སྤྲུལ་པའི་སངས་རྒྱས་གྲངས་ལས་འདས་པ་ཡོད༔ ཡ་མཚན་བཀོད་པ་བསམ་གྱིས་མི་ཁྱབ་ཡོད༔ དེ་ཕྱིར་མིང་ནི་སྟུག་པོ་བཀོད་པའི་ཞིང་༔ ཞིང་མཆོག་གཙང་མའི་གནས་རབ་དམ་པ་དེར༔ ཚེ་འདས་ལུས་བརྗེས་རིགས་ཀྱི་བུ་ཁྱོད་ཀྱང་༔ རྫོགས་པའི་སངས་རྒྱས་དེ་ཡི་སྲས་མཆོག་ཏུ༔ རྩལ་ཆེན་མདའ་འཕངས་བཞིན་དུ་སྐྱེ་བར་ཤོག༔ ཕཊ༔ ཚེ་ལས་འདས་པའི་རྣམ་པར་ཤེས་པའི་ངོ་བོ་ཧཱུྃ་མཐིང་ག་གཅིག་ཏུ་གྱུར་ཏེ༔ རྩལ་པོ་ཆེས་མདའ་འཕངས་པ་བཞིན་དུ་རྡོ་རྗེ་སེམས་དཔའ་ཡབ་ཡུམ་གྱི་སྦྱོར་མཚམས་སུ་ཐིམ་པས༔ རྒྱལ་བའི་སྲས་སུ་གྱུར་ཏེ་སངས་རྒྱས་ནས༔ སླར་ཡང་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་ཐོགས་པ་མེད་པར་བྱེད་ནུས་པར་གྱུར་ཅིག༔ གནས་འདྲེན་ཞག་གྲངས་བྱེད་སྐབས་འདི་ཡན་ཆད་ཉིན་རེ་བཞིན་ཏུ་བསྐྱང་། ནུབ་ཐམ་ལ་བྱང་བུ་བསྲེག་པ་ནི། མར་མེ་བསང་སྦྱང་། སྟོང་པའི་ངང་ལས་པད་ཟླའི་སྟེང་དུ་ཧཱུྃ་ལས་ཞི་བའི་ཐབ་ཁུང་དཀར་ལ་ཟླུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པད་ཟླའི་གདན་ལ་ཧཱུྃ་ལས་དམ་ཚིག་པའི་མེ་ལྷ་རྡོ་རྗེ་སེམས་དཔའ་སྐུ་
མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་ཅིང་༔ དར་དང་རིན་པོ་ཆེས་བརྒྱན་པ༔ ཡེ་ཤེས་ཀྱི་མེ་དཔུང་འབར་བའི་དབུས་སུ་ཞབས་སེམས་དཔའི་སྐྱིལ་ཀྲུང་དུ་བཞུགས་པའི་གནས་གསུམ་ལས་འོད་འཕྲོས༔ ཡེ་ཤེས་ཀྱི་མེ་ལྷ་སྤྱན་དྲངས་གཉིས་སུ་མེད་པར་གྱུར༔ ཨོཾ་བཛྲ་སཏ་ཨརྒྷཾ་སོགས་ཀྱིས་མཆོད། མི་རྟོགས་རྡོ་རྗེ་སོགས་ཀྱིས་བསྟོད། དཀྱིལ་འཁོར་གྱི་ལྷ་ཚོགས་རྣམས་ཀྱི་ཐུགས་ཀ་ནས་ཡེ་ཤེས་ཀྱི་མེ་ཁ་དོག་ལྔ་ལྡན་འཕྲོས་ནས་རྡོ་རྗེ་སེམས་དཔའི་སྐུ་ལ་ཐིམ༔ དེའི་སྐུ་ལས་ཡེ་ཤེས་ལྔའི་མེ་འབར་བས་ཚེ་འདས་ཀྱི་ཕུང་ཁམས་སྐྱེ་མཆེད་འཁོར་བའི་ཆོས་ཐམས་ཅད་དམིགས་མེད་ཀ་དག་གི་དབྱིངས་སུ་སྦྱང་བར་བསམ་ལ། ཧཱུྃ། ཚེ་འདས་རིགས་ཀྱི་བུ་ཁྱོད་ཀྱི༔ ཀུན་གཞིའི་རྣམ་ཤེས་ཐབ་ཁུང་དུ༔ གཟུགས་ཀྱི་ཕུང་པོའི་ཡམ་ཤིང་ལ༔ ཆོས་དབྱིངས་ཡེ་ཤེས་མེ་སྦར་བས༔ གཏི་མུག་རྒྱ་མཚོ་སྐེམ་པར་ཤོག༔ ཉོན་མོངས་རྣམ་ཤེས་ཐབ་ཁུང་དུ༔ ཚོར་བའི་ཕུང་པོའི་ཡམ་ཤིང་ལ༔ མཉམ་ཉིད་ཡེ་ཤེས་མེ་སྦར་བས༔ ང་རྒྱལ་རྒྱ་མཚོ་སྐེམ་པར་ཤོག༔ ཉོན་ཡིད་རྣམ་ཤེས་ཐབ་ཁུང་དུ༔ འདུ་
ཤེས་ཕུང་པོའི་ཡམ་ཤིང་ལ༔ སོར་རྟོགས་ཡེ་ཤེས་མེ་སྦར་བས༔ འདོད་ཆགས་རྒྱ་མཚོ་སྐེམ་པར་ཤོག༔ སྒོ་ལྔའི་རྣམ་ཤེས་ཐབ་ཁུང་དུ༔ འདུ་བྱེད་ཕུང་པོའི་ཡམ་ཤིང་ལ༔ བྱ་གྲུབ་ཡེ་ཤེས་མེ་སྦར་བས༔ ཕྲག་དོག་རྒྱ་མཚོ་སྐེམ་པར་ཤོག༔ བདག་འཛིན་རྟོག་པའི་ཐབ་ཁུང་དུ༔ རྣམ་ཤེས་ཕུང་པོའི་ཡམ་ཤིང་ལ༔ མེ་ལོང་ཡེ་ཤེས་མེ་སྦར་བས༔ ཞེ་སྡང་རྒྱ་མཚོ་སྐེམ་པར་ཤོག༔ བདག་ཏུ་འཛིན་པའི་ཕུང་པོ་ལ༔ སྟོང་པ་ཉིད་ཀྱི་མེ་སྦར་བས༔ གནས་ལུགས་ཇི་བཞིན་རྟོགས་པར་ཤོག༔ དུག་གསུམ་འདུས་པའི་ཕུང་པོ་ལ༔ སྐུ་གསུང་ཐུགས་ཀྱི་མེ་སྦར་བས༔ སྐུ་གསུམ་ལྷུན་གྱིས་གྲུབ་པར་ཤོག༔ དུག་ལྔ་འདུས་པའི་ཕུང་པོ་ལ༔ རྒྱལ་བ་རིགས་ལྔའི་མེ་སྦར་བས༔ ཡེ་ཤེས་ལྔ་དང་ལྡན་པར་ཤོག༔ འབྱུང་བཞི་འདུས་པའི་ཕུང་པོ་ལ༔ ཡུམ་ཆེན་བཞི་ཡི་མེ་སྦར་བས༔ ཚད་མེད་བཞི་དང་ལྡན་ནས་ཀྱང་༔ ཕྲིན་ལས་རྣམ་བཞི་ལྷུན་གྲུབ་ནས༔ འཁོར་བའི་རྒྱ་མཚོ་སྐེམ་པར་ཤོག༔ དམིགས་མེད་ཁྱབ་བརྡལ་གྱི་ལྟ་བ་དང་ཐུགས་དགོངས་བསྲེ་པའི་ངང་ནས། བླ་མ་རིན་པོ་ཆེ་པདྨ་འབྱུང་གནས་མཁྱེན་ནོ། ཞེས་རྒྱང་
འབོད་ལན་གསུམ་དང་། གཟུགས་མེད། སྒྲ་མེད། དྲི་མེད། རོ་མེད། རེག་བྱ་མེད། ཆོས་མེད་དོ། ཞེས་དང་བོ་དྷི་ཙིཏྟ། ཡིག་བརྒྱ། ངན་སོང་སྦྱོང་བའི་སྔགས་རྣམས་བཟླ་ཞིང་བྱང་བུ་བསྲེགས་ལ་ཐལ་བས་སཱཙྪ་བཏབ་རབ་གནས་ཀྱི་མེ་ཏོག་འཐོར་ལ་ཚུས་མི་འཇིག་པར་བསྐྱལ་ལོ། །གསུམ་པ་རྗེས་ཀྱི་བྱ་བ་ནི། ལས་གཞུང་གི་ཚོགས་དང་སྒོང་ཆོག་སྔོན་དུ་མ་གྲུབ་ན། ཚོགས་དང་སྐོང་ཆོག་རྒྱས་པར་བྱ། སྔར་གྲུབ་ན་ཚོགས་ལ་རོལ་ཞིང་ལྷག་མ་བཏང་། བསྐུལ་པ། ཆད་བརྟན་རྟ་བྲོ། གཏང་རག་མཆོད་བསྟོད་མདོར་བསྡུས། ནོངས་བཤགས། ཤིས་བརྗོད། རས་བྲིས་དཀྱིལ་འཁོར་ལ་བརྟན་བཞུགས། བདག་བསྐྱེད་བསྡུ་ལྡངས་རྣམས་ལས་བྱང་ཆེ་ཆུང་གང་ཡིན་ལྟར་བྱ་ཞིང་། ཐེག་པ་ཆེན་པོའི་བསྔོ་སྨོན་སྤྱི་དང་ཁྱད་པ་ཀུན་བཟང་སྨོན་ལམ་སོགས་རྒྱས་པར་བྱའོ།། ༈ །།ཨ་ཏི་གཙོར་གྱུར་སྔ་འགྱུར་རྒྱུད་གཞུང་ནས། །ངན་སོང་དོང་སྤྲུགས་ཆེད་དུ་བསྔགས་པ་ཡི། །ལྷ་སྔགས་འདི་ཉིད་ཡང་ནས་ཡང་གསུངས་ཤིང་། །གནས་འདྲེན་འདི་ཡང་རྒྱུད་ལས་གསལ་བར་བསྟན། །ངན་འགྲོའི་སྐྱེ་སྒོ་བཅད་འདོད་ཆོས་འདི་ལས། །ལྷག་པའི་ཟབ་ཆོས་གཞན་ཏུ་མེད་ངེས་ཤིང་། །འབྲེལ་ཚད་རང་གྲོལ་ཉིད་དུ་བསྡགས་པའི་ཕྱིར། །ནོར་བུ་བོར་ནས་འཆིང་བུ་མ་ཚོལ་ཅིག །གདོད་མའི་མགོན་པོའི་ཐ་ཚིག་རྟག་པའི་མཐུས། །འདིར་འབྲེལ་རིགས་ལྔའི་
ཞིང་དུ་དབུགས་དབྱུང་ནས། །འབད་སྩོལ་མེད་པར་གཞི་ཐོག་རང་སར་གྲོལ། །ལོངས་སྐུའི་སྤྲིན་བཀོད་སྤྲུལ་པས་དོན་མཛད་ཤོག །ཅེས་པ་འདིའང་དོན་གཉེར་ཅན་སྔ་ཕྱི་འགའ་ཞིག་གིས་ནན་བསྐུལ་ངོར། ཀརྨ་ངག་དབང་ཡོན་ཏན་རྒྱ་མཚོའམ་བློ་གྲོས་མཐའ་ཡས་པའི་སྡེས། གཞུང་ཉིད་ལས་ཀྱང་དངོས་སུ་བསྟན་ཅིང་དགོས་ངེས་པའི་ཁ་སྐོང་རྣམས་མཁས་གྲུབ་ཀརྨ་ཆགས་མེད་ཀྱི་གསུང་གིས་ཁ་བསྐངས་པ་ཙམ་ལས། གཏེར་གཞུང་དངོས་བསྟན་ལ་འཕྲི་བསྣན་བཅོས་བསླད་ཀྱི་རིགས་ན་འདྲེས་བའི་གཙང་དག་ཉིད་དུ་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་ཟག་གི་སྒྲུབ་སྡེ་ཀུན་བཟང་བདེ་ཆེན་འོད་གསལ་གླིང་དུ་བཀོད་པ་དགེ་ལེགས་འཕེལ། སརྦ་དཱ་ཀ་ལྱཱ་ཾ་མངྒ་ལཾ་བྷ་ཝནྟུ། །།