ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ཚེ་འདས་གནས་འདྲེན་ཐུགས་རྗེའི་ལྕགས་ཀྱུ་ཁྱེར་བ་དེར་བཀོད་པ།
ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ཚེ་འདས་གནས་འདྲེན་ཐུགས་རྗེའི་ལྕགས་ཀྱུ་ཁྱེར་བ་དེར་བཀོད་པ་བཞུགས་སོ། །
རིགས་བརྒྱ་ཡོངས་འདུས་རིགས་གཅིག་རྡོ་རྗེ་སེམས། །དཀྱིལ་འཁོར་དབང་ཕྱུག་མཚོ་སྐྱེས་བླ་མར་འདུད། །བྱ་སླ་ཁྱེར་བདེ་ཀུན་ལ་ཕན་པའི་ཕྱིར། །བརྒྱུད་པའི་ཕྱག་བཞེས་སྙིང་པོ་བསྡུས་ཏེ་དགོད། །ཞི་ཁྲོའི་གནས་འདྲེན་བརྒྱ་སྟོང་སོགས་གྲངས་གསོག་པའི་སྐབས་སུ་ཐོག་མར་ལས་བྱང་རྒྱས་པ། བཀའ་སྲུང་། བརྒྱ་ཕྱག །ཀློང་བཤགས། སྐོང་ཆོག་མདོར་བསྡུས། ལས་བུམ་སྒྲུབ་པ། རིག་པའི་མེ་ཏོག་དོར་ཅིང་གནང་བ་ཞུ་བ་རྣམས་སྔོན་ཏུ་བཏང་ནས། གནས་འདྲེན་རྒྱས་པ་དབང་བསྐུར་ཡན་ཆད་ཚར་གཅིག་བྱ། དེ་ནས་ཚར་ཆུང་ཚར་གསུམ་དང་གནས་འདྲེན་བསྡུས་པ་དབང་བསྐུར་ཡན་ཚར་གསུམ། དེ་ལྟར་ཉིན་གཅིག་ལ་གང་འགྲུབ་མཐར་ལམ་བསྟན་སོགས་གནས་འདྲེན་རྒྱས་པས་མཐར་དབྱུང་། སྐོང་ཆོག་རྒྱས་པ་དང་ཚོགས་ཕྱིན་ཆད་ཚོར་ཆེན་གྱིས་མཇུག་སྡུད་པ་ཡིན་ལ། མགྱོགས་ཁྱད་དང་བཅའ་གཞི་མི་འཇོམ་པ་ལྟ་བུས་བསྡུས་པ་ཁོ་ན་བྱེད་ན། ལས་
བྱང་ཚོར་ཆུང་དང་བཀའ་སྲུང་། བརྒྱ་ཕྱག་མཚར་ན་ཆོས་རྣམས་རྣམ་དག །བཤགས་པ་ཡེ་ཤེས་སྐུ་མཆོག་གམ། དུས་གསུམ་བདེ་གཤེགས་ཕྱིན་ཆད་ཀྱིས་འཐུས་པར་བྱས་ཏེ། རིག་ཆེ་གནང་ཞུ་གྲུབ་ནས་འདིར་འཇུག་པ་ཡིན་ནོ། །བསྡུས་པའི་སྐབས་འདིར་སློབ་དཔོན་མདུན་ཏུ་ཀྱང་སྟེགས་པདྨ་འདབ་བརྒྱད་སྟེང་བྱང་བུ་བཀོད། རིགས་དྲུག་དཀྱིལ་འཁོར་པདྨ་འདབ་དྲུག་ལ་ཨ་ནྀྲ་སུ་ཏྲི་པྲེ་དུ་དྲུག་འགོ་ཕྱིར་བསྟན་ཏུ་བྲིས་པ། གཤེད་ཕྲལ་ཀླུད་གཏོར་གཅིག །བགེགས་གཏོར་གྲངས་ག་གར་བྱེད་ལྟར་དང་། གཞན་ཡང་ཁྲུས་ཆས། ཡུངས་བཀར། བྱེ་མ། ཟས་བསྔོ་སོགས་འོག་ཏུ་དགོས་པ་རྣམས་འདུ་བྱའོ། །ལས་བྱང་སྐབས་བདག་མདུན་དབྱེར་མེད་དུ་བསྐྱེད་པ་ནི་གཞུང་གི་དགོངས་པ་ཡིན་ལ། རྟོགས་པས་མཆུན་ན་བཟླས་པའི་དབུར་ཛབ་ཁང་དབྱེ། བཟླས་པ་གྲུབ་པ་དང་། བུམ་པ་རང་བྱུང་གི་གཞལ་ཡས་ཁང་གི་ནང་དུ་ལྷ་རྣམས་དྭངས་པའི་མཚོ་
ལ་གཟའ་སྐར་ཤར་བ་བཞིན་སྐད་ཅིག་གིས་གསལ་བར་གྱུར། རང་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་ཀར་ཞུགས། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་དབྱེར་མེད་རོ་གཅིག་གྱུར། ཅེས་དམིགས། གཟུངས་ཐག་བླངས་ལ་བྷོ་དྷི་ཙིཏྟ་བརྒྱ་རྩ་ཙམ་བཟླ། ལས་བུམ་ནང་དུ་བཅོམ་ལྡན་འདས་དཔལ་རྡོ་རྗེ་སེམས་དཔའ་སྐད་ཅིག་གིས་གསལ་བའི་སྐུ་ལས་དག་བྱེད་བདུད་རྩིའི་རྒྱུན་བབས་པས་བུམ་པ་གང་བར་གྱུར། ཅེས་དམིགས་ལ་ཡིག་བརྒྱ་ཉེར་གཅིག་གམ་བདུན་ཙམ་བཟླ། མཐར་མཆོད་བསྟོད་དང་བུམ་པར་མཆོད་ཡོན་ཕུལ་ལ། ཨོཾ་ཨཱཿཧཱུྃ། ལྷ་རྣམས་འོད་དུ་ཞུ་ནས་བུམ་པའི་ཆུ་དང་རོ་གཅིག་ཏུ་གྱུར། ཅེས་བུམ་སྒྲུབ་བསྡུས་པ་འདི་ཙམ་ནི་ཆད་དུ་མི་རུང་། ཆགས་མེད་ཞབས་ཀྱིས་བདག་མདུན་བུམ་གསུམ་གྱི་དཀྱིལ་འཁོར་གསུམ་དུས་གཅིག་ལ་བསྒོམ་པར་བཞེད་ཀྱང་དེང་སང་དེ་ཙམ་ཡང་གསལ་ཐབས་མཁན་དཀོན་ནམ་སྙམ་ཞིང་མོས་བསྐྱེད་ཙམ་གྱིས་གོ་མི་ཆོད་དོ། །གནས་འདྲེན་ཆོ་ག་དངོས་ལ་གཏེར་གཞུང་ཉིད་ལས་དོན་ཚན་བཅུར་གསུངས་ཀྱང་བླ་མ་རྣམས་ཀྱིས་སོ་སོའི་རང་བཞེད་དང་བསྟུན་པའི་ཕྱག་བཞེས་མི་འདྲ་བ་མང་དུ་མཛད་འདུག་ཀྱང་འདིར་ཆགས་མེད་རིན་པོ་ཆེའི་གསུང་གཙོར་བཏན་ཏེ་དགོད་པ་ལ་དང་པོར་མདའ་སྦྲན་ཅིང་གསོལ་བ་གདབ་པ་ནི། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐུགས་རྗེ་དང་ལྡན་པ། མཁྱེན་པ་དང་ལྡན་པ། བརྩེ་བ་དང་ལྡན་པ་རྣམས་ཐུགས་རྗེའི་དབང་གིས་གནས་
འདིར་བྱོན་ཅིག །དངོས་སུ་འབྱོར་བ་དང་ཡིད་ཀྱིས་སྤྲུལ་པའི་མཆོད་པ་འབུལ་ལོ། །ཐུགས་རྗེ་ཅན་ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། ཐུགས་རྗེ་ཅན་རྣམས་ཀྱིས་ཚེ་ལས་འདས་པ་ཆེ་གེ་མོ་ཞེས་བྱ་བ། འཇིག་རྟེན་འདི་ནས་ཕ་རོལ་དུ་ནི་འགྲོ། སྐྱེས་ཆེན་པོ་ནི་འདེགས། གྲོགས་ནི་མེད། སྡུག་བསྔལ་ནི་ཆེ། སྐྱབས་ནི་མེད། མགོན་ནི་མེད། དཔུང་གཉེན་ནི་མེད། ཚེ་འདིའི་སྣང་བ་ནི་ནུབ། མུན་ནག་འཐུག་པོར་ནི་འཇུག །གཡངས་ས་ཆེན་པོར་ནི་ལྟུང་། ལས་ཀྱི་དབང་གིས་ནི་དེང་། ས་ཚུག་མེད་པར་ནི་འགྲོ། དབང་ནི་མེད། གཅིག་པུར་འགྲོ་དགོས་པའི་དུས་ལ་བབ་པས། ཐུགས་རྗེ་ཅན་རྣམས་ཀྱིས་ཚེ་ལས་འདས་པ་སྐྱབས་མེད་པ་ལ་སྐྱོབ་མཛོད་ཅིག །མགོན་མེད་པ་ལ་མགོན་མཛོད་ཅིག །དཔུང་གཉེན་མེད་པ་ལ་དཔུང་གཉེན་མཛོད་ཅིག །བར་དོའི་མུན་ནག་ཆེན་པོ་ལས་སྐྱོབས་ཤིག །ལས་ཀྱི་རླུང་དམར་ཆེན་པོ་ལས་ཟློག་ཅིག །གཤིན་རྗེའི་འཇིགས་སྐྲག་ཆེན་པོ་ལས་སྐྱོབས་ཤིག །བར་དོའི་འཕྲང་རིང་ཆེན་པོ་ལས་སྒྲོལ་ཅིག །ཐུགས་རྗེ་ཅན་རྣམས་ཐུགས་རྗེའི་ཤུགས་མཆུང་ཞིག །སྔོན་གྱི་དམ་བཅའ་མ་གཡེལ་བར་ཐུགས་
རྗེའི་ཤུགས་མྱུར་དུ་ཕྱུངས་ཤིག །སེམས་ཅན་ལས་ངན་པའི་དབང་དུ་མ་བཏང་ཞིག །དཀོན་མཆོག་གསུམ་གྱིས་ཚེ་ལས་འདས་པ་འདི་རྣམས་བར་དོའི་སྡུག་བསྔལ་ལས་བསྐྱབ་ཏུ་གསོལ། དེ་ནས་རྟེན་བསྐྱེད་པ་ནི། ཨོཾ་བཛྲ་ཤྲཱི་ཧེ་རུ་ཨུཙྪཱ་ཊ་ཡ་ཕཊ༔ཨོཾ་སྭ་བྷཱ་ཝ་སོགས། སྟོང་པའི་ངང་ལས་ཡི་གེ་ནྀྲ་ཡོངས་སུ་གྱུར་པ་ལས་ཚེ་ལས་འདས་པའི་ཕུང་ཁམས་སྐྱེ་མཆེད་ཆ་ལུགས་ཡོངས་སུ་རྫོགས་པ་གསོན་པོའི་རྣམ་པ་ཇི་ལྟ་བར་གྱུར། རྣམ་ཤེས་འགུགས་པ་ནི། ཧཱུྃ༔ བདག་ཉིད་རྡོ་རྗེ་སེམས་དཔའི་ཐུགས་ཀ་ནས༔ ཧཱུྃ་ལས་འོད་འཕྲོས་ཚེ་འདས་རྣམ་ཤེས་དེ༔ རིགས་དྲུག་གང་ན་ཡོད་པའི་ས་དེ་ནས༔ བདག་གི་འོད་ཀྱིས་རེག་མ་ཐག་་ཏུ་ནི༔ རྣམ་ཤེས་ནྲྀ་དེ་ཨ་དཀར་གཅིག་ཏུ་གྱུར༔ མདུན་ཏུ་བཀུག་ནས་མཚན་བྱང་རྟེན་ལ་ཐིམ༔ ན་མོ༔ སངས་རྒྱས་ཀྱི་བཀའ་བདེན་པ་དང་༔ ཆོས་ཀྱི་བཀའ་བདེན་པ་དང་༔ དགེ་འདུན་གྱི་བཀའ་བདེན་པ་དང་༔ བཅོམ་ལྡན་འདས་ཀུན་བཟང་རྡོ་རྗེ་སེམས་དཔའ་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱི་བཀའ་བདེན་པས༔ ཚེ་ལས་འདས་པ་ཆེ་གེ་མོའི་རྣམ་པར་ཤེས་པ་ས་འོག་ས་སྟེང་ས་བླ་འགྲོ་བ་རིགས་དྲུག་ལམ་རྒྱུད་ལྔ་གར་གནས་ཀྱང་མཚན་བྱང་འདི་ལ་ཁུག་ཅིག༔ ཅེས་ལན་གསུམ་བརྗོད། ཧཱུྃ༔ ཚེ་འདས་ལུས་བརྗེས་རིགས་ཀྱི་བུ་ཁྱོད་ཀྱང་༔
མཛའ་སྡུག་བརྩེ་བའི་གཉན་བཤེས་གྲོགས་རྣམས་དང་༔ རྟག་ཏུ་འགྲོགས་པའི་སྐལ་དང་དབང་མེད་པས༔ མི་ལུས་ཚེ་འཕོས་འཇིག་རྟེན་སྣང་བ་ནུབ༔ རྣམ་ཤེས་སེམས་ནི་མི་རྟག་ཚུལ་བསྟན་ཏེ༔ ལས་ཀྱི་དབང་གིས་ཕ་རོལ་ལུས་ཤིག་བླངས༔ ཉོན་མོངས་འཁོར་བའི་སྡུག་བསྔལ་སྐྱེད་པ་ཡི༔ སྐྱེ་གནས་བཞི་པོར་ལྟུང་བའི་སར་སྐྱེས་ཀྱང་༔ གར་སྐྱེས་གང་ན་གནས་པའི་ས་ཕྱོགས་ནས༔ བརྩེ་གདུང་ཡིད་ལ་གཅག་པའི་ཉེ་འབྲེལ་གྱིས༔ དཀོན་མཆོག་གསུམ་ལ་སྐྱབས་གསོལ་མཐུ་རྩལ་དང་༔ སངས་རྒྱས་མཐུ་སྟོབས་ཆེན་པོའི་བྱིན་རླབས་དང་༔ ཆོས་ཉིད་རྣམ་པར་དག་པའི་བདེན་པ་དང་༔ སྔགས་འཆང་རྩེ་གཅིག་སྒྲུབ་པའི་བྱིན་རླབས་དང་༔ ཞི་ཁྲོ་རབ་འབྱམས་ལྷ་ཚོགས་ཐུགས་རྗེ་ཡིས༔ ཡིད་ལུས་སྟོང་གཟུགས་བར་དོའི་རྣམ་ཤེས་ཁྱོད༔ ལས་དང་ཉོན་མོངས་དབང་གིས་གར་འཁྱམས་ཀྱང་༔ དཀོན་མཆོག་གསུམ་གྱི་བདེན་པས་འདིར་ཁུག་ཅིག༔ ཡིག་བརྒྱ་ཚར་གཅིག་གི་རྗེས་སུ། དུ་པྲེ་སུ་ཏྲི་ཨ་ནྲྀ་ཡཾ་ཛ༔ བཛྲ་ཨཾ་ཀུ་ཤ་ཛ༔ བརྟན་པར་བཞད་པ་ནི། ཀྱེ་མ་དབང་མེད་ལས་ཀྱིས་ཕ་རོལ་ཚེ་འཕོས་ཁྱོད༔ མི་ཡི་ཡུལ་དུ་སྐྱེ་བ་གྲངས་མེད་ཀྱང་༔ ལས་ཀྱིས་འབྲེལ་བའི་འདུག་ས་འདི་ཡིན་པས༔ འཕན་ཕྲན་མཛེས་པ་འདི་ནི་ལུས་ཀྱི་རྟེན༔ གསེར་བྱང་
མིང་བྲིས་འདི་ནི་ངག་གི་རྟེན༔ མེ་ལོང་གསལ་བ་འདི་ནི་སེམས་ཀྱི་རྟེན༔ རས་ཕྲུག་དྲི་མེད་འདི་ནི་གོས་ཀྱི་རྟེན༔ གདུགས་ཆེན་འབར་བ་འདི་ནི་གཞལ་ཡས་ཁང་༔ ལེབ་ཕྱིང་དཀར་པོ་འདི་ནི་འདུག་པའི་གདན༔ སྦ་སྨྱུག་ལྡེམས་པ་འདི་ནི་འཇུ་བའི་ཤིང་༔ ཐོགས་མེད་འཇའ་ཚོན་འདྲ་བའི་ཡིད་ལུས་ཁྱོད༔ དམིགས་པའི་རྟེན་འཛུགས་འདི་ལ་གནས་པར་གྱིས༔ ཚེ་ལས་འདས་པ་ཆེ་གེ་ཏིཥྛ་བཛྲ་ས་མ་ཡ་ལྷན༔ གཤེད་དང་ཕྲལ་བ་ནི། གླུད་གཏོར་བྲན་ལ། རྃ་ཡྃ་ཁྃ༔ གཏོར་མ་འདོད་པའི་ཡོན་ཏན་ལྔ་དང་ལྡན་པར་གྱུར༔ ཨོཾ་ཨཱཿཧཱུྃ༔ གསུམ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ༔ ལན་གསུམ་གྱིས་བསྔོ། ཧཱུྃ༔ ཞི་ཁྲོ་རབ་འབྱམས་ལྷ་ཚོགས་བདེན་པའི་མཐུས༔ ཚེ་འདས་ལུས་བརྗེས་རིགས་ཀྱི་བུ་འདི་ཡི༔ ས་དང་ལམ་ལ་བར་དུ་གཅོད་བྱེད་པའོ༔ སྲོག་གཅོད་མདངས་འཕྲོག་གཤེད་མའི་ཚོགས་རྣམས་ཀུན༔ མཐུ་སྟོབས་བྱིན་རླབས་མཐུ་ཡིས་གཞན་ཏུ་དེངས༔ ཧཱུྃ༔ རང་ཉིད་ལྷ་ཡི་ང་རྒྱལ་གྱིས༔ འོད་དང་འོད་ཟེར་ཕྱོགས་བཅུར་འཕྲོས༔ སྟེང་འོག་ཕྱོགས་མཚམས་ཐམས་ཅད་ཀུན༔ རང་རིག་སྟོང་གསལ་རིག་པའི་མདངས༔ ཀུན་བཟང་རིགས་ལྔ་རྡོ་རྗེ་སེམས༔ རབ་འཇིགས་ཁྲག་འཐུང་སྤྲུལ་པའི་ཚོགས༔ སྣང་ལ་རང་
བཞིན་མེད་པ་ཡིས༔ རབ་ཏུ་གང་ནས་འོད་འཕྲོས་པས༔ ཚེ་འདས་འདི་ལ་གནོད་བྱེད་ཅིང་༔ སྲོག་གཅོད་མདངས་ཕྲོག་གཤིན་ལྕགས་བགེགས༔ ཉོན་མོངས་མ་རིག་རྒྱུ་ལས་བྱུང་༔ རྒྱུད་དྲུག་འཁོར་བའི་ལམ་དགག་ཕྱིར༔ འདི་རུ་མ་འདུག་གཞན་ཏུ་དེངས༔ ཧཱུྃ་ཧཱུྃ་ཨུཙྪ་ཊ་ཡ་ཕཊ༔ སུམྦྷ་ནི་སོགས་དྲག་སྔགས་ཡུངས་ཐུན་བཅས་པས་བསྐྲད་ཅིང་མཚམས་གཅད་པས་བག་ཕེབ་ཅིང་བདེ་བར་གནས་པར་བསམ། ཅུང་ཟད་སྤྲོ་ན། ཇི་ལྟར་བལྟམས་པ་སོགས་ཤློ་ཀ་གསུམ་ཙམ་གྱིས་ལྷ་ཁྲུས། སྐུ་ཕྱི། ན་བཟའ་འབུལ་བའི་ཚིགས་བཅད་གཅིག་ཙམ་བརྗོད་ལ་རྣམ་བུམ་གྱིས་ལྷ་ཁྲུས་གསོལ་ཞིང་ཁྲུས་ཆུ་ལས་བུམ་དུ་བླུགས། དེ་ནས་ཁྲུས་དང་དུག་དབྱུང་བ་ནི། ཧཱུྃ༔ འདི་ནི་སྦྱིན་པ་ཚུལ་ཁྲིམས་དང་༔ བཟོད་པ་བརྩོན་འགྲུས་བསམ་གཏན་དང་༔ ཤེས་རབ་ཐབས་སྟོབས་སྨོན་ལམ་སྟེ༔ ཕ་རོལ་ཕྱིན་པ་བཅུ་ཡི་ཆུ༔ དྲི་མ་རྣམས་བཅུ་སྦྱོང་མཛད་པ༔ ཕར་ཕྱིན་བཅུ་ལ་ལེགས་འགོད་ཆུ༔ ཕར་ཕྱིན་ཆུ་ཡིས་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཡིག་བརྒྱའི་མཐར། ན་མཿ སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། བྱེ་མས་བབས་ལ། འདོད་ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན་དུག་གསུམ་སྟེ༔ རྒྱལ་བ་རིགས་ལྔ་དུག་མི་མངའ༔ སངས་རྒྱས་བདེན་པས་དུག་བཅོམ་མོ༔ བདེན་
པ་གང་གིས་སངས་རྒྱས་རྣམས༔ འཇིག་རྟེན་ཀུན་ཏུ་བླ་ན་མེད༔ བདེན་པའི་མཆོག་ནི་འདི་དག་གིས༔ ཁྱོད་ཀྱི་དུག་ལྔའི་དུག་རྣམས་ནི༔ རང་བཞིན་མེད་པར་དག་གྱུར་ཅིག༔ འདོད་ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན་དུག་གསུམ་སྟེ༔ དཀོན་མཆོག་གསུམ་པོ་དུག་མི་མངའ༔ དཀོན་མཆོག་བདེན་པས་དུག་བཅོམ་མོ༔ བདེན་པའི་བདེན་ཚིག་འདི་དག་གིས༔ ཁྱོད་ལུས་དུག་གིས་མི་ཚུགས་ཤོག༔ ཤིན་གང་དུག་དང་བཅས་པ་རྣམས༔ དེ་ཀུན་དུག་གསུམ་དུག་ལས་བྱུང་༔ དུག་གསུམ་དུག་ནི་དུག་གི་གཙོ༔ དྲག་པོའི་དུག་ནི་དུག་བཅོམ་མོ༔ པོ་དྷི་སོགས་དང་། ས་ཆུ་མེ་རླུང་འབྱུང་བ་བཞི༔ འབྱུང་བཞི་དུག་གི་ཕ་ཡིན་ཏེ༔ འབྱུང་བཞི་དུག་གི་མ་ཡང་ཡིན༔ བདེན་པའི་བདེན་ཚིག་འདི་བརྗོད་པས༔ དུག་རྣམས་འབྱུང་བཞིའི་ནང་དུ་སོང་༔ གང་བའི་སྣོད་དུ་དུག་སོང་ཞིག༔ ཁྱོད་ཀྱི་དུག་ནི་དུག་མེད་ཤོག༔ དཀོན་མཆོག་གསུམ་གྱིས་དུག་བཅོམ་པས༔ དཀོན་མཆོག་གསུམ་ལ་སྐྱབས་སུ་སོང་༔ ཏིང་འཛིན་སྔགས་ཀྱི་བྱིན་རླབས་ཀྱིས༔ ཚེ་འདས་རིགས་ཀྱི་བུ་འདི་ཡི༔ དུག་རྣམས་གཏན་ནས་དག་གྱུར་ཅིག༔ ཡིག་བརྒྱ་དང་། ཀཾ་ཀ་ནི་བརྗོད་ལ་ཁྲུས་བྱའོ། །དེ་ནས་རིགས་དྲུག་གི་གནས་ནས་དྲང་བ་ནི། བྱང་བུ་རིགས་དྲུག་གི་དཀྱིལ་འཁོར་དུ་བཞག་ལ་གསོལ་བ་འདེབས་པའི་མོས་པས། ཨེ་མ་
མགོན་པོ་ཐུགས་རྗེ་ཅན༔ རིགས་དྲུག་གནས་སུ་འཁྱམས་པ་ཡི༔ སྐྱབས་བྲལ་མགོན་མེད་སེམས་ཅན་ལ༔ ཐུགས་རྗེའི་ལྕགས་ཀྱུས་བཟུང་དུ་གསོལ༔ གདམས་ངག་བསྟན་པ་ནི། ཀྱེ་མ་ཚེ་འཕོས་ལུས་རྗེས་བར་དོའི་ཡིད་ལུས་ཁྱོད༔ སྔོན་ཆད་མ་རིག་རྨོངས་པའི་ལས་དབང་གིས༔ དུག་གསུམ་གྱིས་བཅིངས་ངན་སོང་གསུམ་དུ་མནར༔ དེང་ནས་བརྩམ་སྟེ་རྒྱལ་བའི་ཐུགས་རྗེ་ཡིས༔ ཕོ་ཉས་བཟུང་སྟེ་རིགས་དྲུག་གནས་ནས་དྲངས༔ དོན་འབྲས་འདོད་ཕྱིར་དང་བའི་ཤུགས་བསྐྱེད་ལ༔ འདྲེན་པ་ཐུབ་ཆེན་དྲུག་ལ་གསོལ་བ་ཐོབ། སླར་བྱེ་བྲག་ཏུ་གསོལ་བ་འདེབས་པ་མོས་པས། ཀྱེ་མ༔ བདག་འདྲའི་སེམས་ཅན་ལས་ངན་པ༔ ཉོན་མོངས་དྲུག་གི་ལས་དབང་གིས༔ འགྲོ་བ་རིགས་དྲུག་གནས་སུ་སྐྱེ༔ འཁོར་བའི་སྡུག་བསྔལ་བརྗོད་ལས་འདས༔ སྡུག་བསྔལ་འདི་ལས་བདག་དྲོངས་མཛོད༔ བརྩེ་བ་ཆེན་པོས་བཟུང་དུ་གསོལ༔ སློབ་དཔོན་གྱིས་ཕྱག་འཚལ་དུ་གཞུག་པར་མོས་ལ། ཀྱེ་མ་ཚེ་འདས་ལུས་བརྗེས་རིགས་ཀྱི་བུ༔ ཉོན་མོངས་དྲག་པོས་ཀུན་ནས་བསླང་ནས་སུཿ མི་དགེ་བཅུ་དང་ཁྱད་པར་དུག་ལྔ་ཡིས༔ འགྲོ་བ་རིགས་དྲུག་གནས་སུ་སྐྱེ་སྲིད་པས༔ དེ་ན་མགོན་དང་སྐྱབས་སུ་གྱུར་པ་ནིཿ ཤཱཀྱ་ཐུབ་པ་བརྒྱ་བྱིན་ཐག་བཟང་རིསཿ སེངྒེ་རབ་བརྟན་ཁ་འབར་ཆོས་ཀྱི་རྒྱལ༔ རིགས་
དྲུག་འདྲེན་པ་བཅོམ་ལྡན་ཐུབ་དྲུག་བཞུགས༔ ཕྱིན་དྲུག་ཆོས་སྟོན་ཉོན་དྲུག་རྣམ་པར་སྦྱོང་༔ ཡེ་ཤེས་དྲུག་སྟེར་བརྡ་ཡི་ཕྱག་མཚན་འཛིན༔ འགྲོ་དྲུག་སོ་སོའི་སྡུག་བསྔལ་སྦྱོང་དུ་གསོལ༔ སྤྲུལ་སྐུ་ཐུབ་དྲུག་ཁྱེད་ལ་སྐྱབས་སུ་མཆི༔ ལན་ཆགས་ལ་གཏོར་མ་བསྔོ་བ་ནི། ཧཱུྃ༔ གཏོར་མ་འདོད་ཡོན་ལྔ་དང་ལྡན་པ་འདི༔ ཚེ་འདས་རིགས་དྲུག་ལན་ཆགས་སྙགས་པ་ཡི༔ གསོན་བདུད་གཤིན་ལྕགས་འབྱུང་པོ་ཁྱོད་ལ་སྦྱིན༔ གཏོར་མ་འདི་ཡིས་མགུ་ཞིང་ཚིམ་གྱིས་ལ༔ ཚེ་འདས་འདི་ཡི་ཐར་པའི་གེགས་མ་བྱེད༔ ཨོཾ་སརྦ་བྷཱུ་ཏ་བ་ལི༚་ཏ་ཁཱ་ཧི་ཁཱ་ཧི༔ བྱེ་མས་བྲབ་པས་དཀྱིལ་འཁོར་བ་རྣམས་ཀྱི་འོད་ཟེར་མེ་ལྟ་བུས་རིགས་དྲུག་གི་ས་བོན་གཏན་མེད་དུ་བསྲེགས་པར་བསམ་ལ། འདོད་ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན་དུག་གསུམ་སྟེ༔ ཀུན་བཟང་ཞི་ཁྲོ་དུག་མི་མངའ༔ སངས་རྒྱས་བདེན་པས་དུག་བཅོམ་མོ༔ ཉོན་དྲུག་སྒྲིབ་པ་དག་གྱུར་ཅིག༔ འཿཨཿཤཿསཿམཿཧཿ མ་མ་ཀོ་ལིང་ས་མནྟ༔ ཚེ་འདས་ཀྱི་རིགས་དྲུག་གི་ས་བོན་བག་ཆགས་དང་བཅས་པ་ཐམས་ཅད་ཤཱནྟི་ཾཀུ་རུ་སྭཱ་ཧཱ༔ལས་སྒྲིབ་བག་ཆགས་དང་བཅས་པ་བཀྲུས་བར་མོས་ལ་ལས་བུམ་གྱིས་ཁྲུས་བྱ་ཞིང་། འདི་ནི་བཟོད་དང་སྦྱིན་པ་དང་༔ ཤེས་རབ་ཚུལ་ཁྲིམས་བསམ་གཏན་དང་༔ བརྩོན་འགྲུས་ཕ་རོལ་ཕྱིན་དྲུག་ཆུ༔ ཉོན་མོངས་དྲུག་པོ་སྦྱོང་བྱེད་པའི༔ ཕར་ཕྱིན་དྲུག་གི་
ཆུས་བཀྲུས་པས༔ ཉོན་དྲུག་དྲི་མ་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཨོཾ་ཨཱཿཧཱུྃ་སྭཱ་ཧཱ༔ །ཐུབ་དྲུག་གིས་ཕྱག་མཚན་གྱིས་དབང་བསྐུར་བར་བསམ་ལ། ཧཱུྃ༔ མེ་ཆུ་སྒྲོམ་བུ་པུས་སྟི་རལ་གྲི་དང་༔ གོ་ཆ་པི་ཝཾ་པར་བུ་ལྷུང་བཟེད་ཀྱིས༔ ཚེ་འདས་རིགས་ཀྱི་བུ་ལ་དབང་བསྐུར་བས༔ རིགས་དྲུག་སོ་སོའི་སྡུག་བསྔལ་ལས་གྲོལ་ནས༔ འཁོར་བའི་སྡུག་བསྔལ་ཀུན་དང་བྲལ་བར་ཤོག༔ དུ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུན་ཧཱུྃ་ཕཊ༔ པྲེ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུན་ཧཱུྃ་ཕཊ༔ སུ་མ་ཐ་མ་ཐ་སརྦ་ཏི་རྱ་ཀ་ག་ཏེ་ཧེ་ཏུ་ན་ཧཱུྃ་ཕཊ༔ སུ་སརྦ་དུ་ཁ་སརྦ་ཀརྨ་པྲ་ཝེ་ཤ་ཡ་ཧཱུྃ་ཕཊ༔ ཨ་སརྦ་ཏ་ཐ་ག་ཏ་བྷི་དན་ཁངྒ་ཚིནྡྷ་ཚིནྡྷ་ཧཱུྃ་ཕཊ༔ ཨོཾ་ཚིནྡྷ་ཚིནྡྷ་སརྦ་ཨཱ་བ་ར་་ནི་ཧཱུྃ་ཕཊ༔ རྣམ་བུམ་ཐོགས་ལ། ཧཱུྃ༔ ཀུན་བཟང་ཡབ་ཡུམ་བུམ་པ་ན༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ ཚེ་འདས་ཁྱོད་ལ་དབང་བསྐུར་བས༔ རིགས་དྲུག་སྐྱེ་སྒོ་བཅད་ནས་ནི༔ དགེ་བའི་ཞིང་དུ་སྐྱེ་བར་ཤོག༔ ཨོཾ་བཛྲ་སཏྭཧཱུྃ༔ ཨོཾ་བུངྡྷ་སཏྭ་ཨོཾ༔ ཨོཾ་རཏྣ་སཏྭ་སྭཱ༔ ཨོཾ་པདྨ་སཏྭ་ཨཱ༔ ཨོཾ་ཀརྨ་སཏྭ་ཧཱ༔ ཧཱུྃ་བཛྲ་ཨ་བྷི་ཥིཉྩ་ཨཱ༔ ཨོཾ་བུངྡྷ་ཨ་བྷི་ཥིཉྩ་ཨཱ༔ སྭཱ་རཏྣ་ཨ་བྷི་ཥིཉྩ་ཨཱ༔ ཨཱཾ༔པདྨ་ཨ་བྷི་ཥིཉྩ་ཨཱ༔
ཧཱ་ཀརྨ་ཨ་བྷི་ཥིཉྩ་ཨཱ༔ རིགས་དྲུག་གི་གནས་ནས་དྲངས་པར་བསམ་ལ། ཧཱུྃ༔ ས་འདི་བཅད་པ་མན་ཆད་ནི༔ རིགས་དྲུག་འཁོར་བའི་གནས་ཡིན་པས༔ བོར་རོ་སྤོངས་ཤིག་རིགས་ཀྱི་བུ༔ ཡུལ་དང་ཁང་ཁྱིམ་ནོར་རྫས་ཀུན༔ སྒྱུ་མ་རྨི་ལམ་ཇི་བཞིན་དུ༔ མི་རྟག་འགྱུར་བའི་ཆོས་ཅན་ཡིན༔ རྟག་པར་གནས་པ་གཅིག་ཀྱང་མེད༔ མ་ཆགས་མ་ཞེན་རིགས་ཀྱི་བུ༔ ཕ་མ་བུ་ཚ་ཉེ་དུ་ཀུན༔ རྨི་ལམ་སྐྱེས་བུ་ཇི་བཞིན་དུ༔ མི་རྟག་འབྲལ་བའི་ཆོས་ཅན་ཡིན༔ ཁྱོད་ཀྱི་མིང་ནས་འབོད་བྱེད་ཅིང་༔ ཕ་མ་ཉེ་དུ་ང་ཡིན་ཞེས༔ སྨྲེ་སྔགས་འོ་དོད་འབོད་པ་ཀུན༔ ཐར་ལམ་བར་ཆད་གེགས་ཡིན་པས༔ དེ་ལ་མ་ཉན་རིགས་ཀྱི་བུ༔ ཆགས་པ་མ་བྱེད་རིགས་ཀྱི་བུ༔ ས་འདི་བཅད་པ་ཡན་ཆད་ནི༔ ཐར་པ་བདེ་བའི་ས་ཡིན་པས༔ འདོང་ངོ་གཤེགས་སོ་རིགས་ཀྱི་བུ༔ དགའ་ཞིང་སྤྲོ་བའི་སེམས་བསྐྱེད་ལ༔ ཞིང་མཆོག་གཙང་མའི་གནས་མཆོག་ཏུ༔ བདག་གིས་ཁྱེད་ཉིད་གཞུག་བྱ་ཡིས༔ ཕྱིར་མི་ལྡོག་པའི་ས་ཐོབ་ཤོག༔ བྱང་བུ་པདྨའི་སྟེགས་ལ་བཞག །རིགས་དྲུག་གི་དཀྱིལ་འཁོར་བསྡུའོ། དེ་ནས་དཀྱིལ་འཁོར་དུ་འཇུག་པ་ནི། ས་གཞི་སྤོས་ཆུས་སོགས་མཎྜལ་འབུལ། ཨོཾ་ཙཀྵུ་རྦནྡྷ་ཝཱ་ར་མ་ཱ་ཡ་ཧཱུྃ༔ ཞེས་མིག་དར་དགའ། ཨཱཿཁཾ་བཱི་ར་ཧཱུྃ༔གིས་མེ་ཏོག་བཏང་། ཚེ་འདས་ཀྱིས་གསོལ་བ་འདེབས་པར་མོས་ལ། ཨེ་མ་
མགོན་པོ་ཐུགས་རྗེ་ཅན༔ བདག་འདིའི་སེམས་ཅན་འཁོར་བར་འཁྱམས༔ ལོག་པའི་ལམ་དུ་ཞུགས་ལགས་པས༔ བདེ་ཆེན་ཐར་པའི་ལམ་སྟོན་འཚལ༔ དཀྱིལ་འཁོར་ཆེན་པོར་གཞུག་ཏུ་གསོལ༔ རྡོ་རྗེ་ཐེག་པའི་དམ་ཚིག་གང་༔ བྱང་ཆུབ་སེམས་ཀྱང་བདག་ལ་སྩོལ༔ ཐུན་མོངས་དང་ནི་ཁྱད་པར་གྱི༔ སྐྱབས་གསུམ་དག་ཀྱང་བདག་ལ་སྩོལ༔ དབང་དང་བྱིན་རླབས་སྩལ་དུ་གསོལ༔ སླར་ཡང་སྐྱབས་སུ་གསོལ་ཞིང་སྡོམ་པ་བཟུང་བར་མོས་ལ༔ ཕྱོགས་བཅུའི་སངས་རྒྱས་བྱང་སེམས་རྣམས༔ ཚེ་འདས་བདག་ལ་དགོངས་སུ་གསོལ༔ སངས་རྒྱས་ཆོས་དང་དགེ་འདུན་དང་༔ ཀུན་བཟང་ཞི་ཁྲོའི་ལྷ་ཚོགས་ལ༔ འདི་བཟུང་བླ་མེད་བྱང་ཆུབ་བར༔ ཚེ་འདས་གུས་པས་སྐྱབས་སུ་མཆི༔ སོ་སོར་ཐར་པའི་སྡོམ་པ་དང་༔ བླ་མེད་སྨོན་འཇུག་བྱང་ཆུབ་སེམས༔ རྩ་བ་ཡན་ལག་དམ་ཚིག་ཀུན༔ མ་ལུས་བདག་གིས་ཡོངས་སུ་བཟུང་༔ ལན་གསུམ་བརྗོད། དཀྱིལ་འཁོར་ཕྱོགས་བཞིའི་སྒོ་ཕྱེ་བར་བསམ་ལ། ཧཱུྃ༔ དཀྱིལ་འཁོར་ཆེན་པོའི་ཕྱོགས་བཞིའི་སྒོ༔ ཉོན་སྒྲིབ་བཞི་པོས་བཅད་ལགས་ན༔ སྒོ་བ་ཁྲོ་བོ་ཡབ་ཡུམ་བརྒྱད༔ ཚད་མེད་སྒོ་མ་གདོང་ཅན་བཞི༔ ཐབས་ཤེས་ཕྱག་རྒྱ་བཞི་པོ་ཡིས༔ ཡེ་ཤེས་བཞི་ཡི་སྒོ་བཞི་ཕྱེས༔ ཚེ་འདས་དད་པས་འཇུག་པར་
བགྱི༔ ཀུན་བཟང་ཞི་ཁྲོའི་ལྷ་ཚོགས་ལ༔ ཚེ་འདས་གུས་པས་ཕྱག་འཚལ་ལོ༔ ཡི་དམ་ལྷ་དང་མཇལ་བར་ཤོག༔ པྲ་ཝེ་ཤ་ཡ་ཕཊ༔ པྲ་ཏཱིཙྪ་ཧོ༔ ཞེས་མེ་ཏོག་དོར། ཀྱེ་དྲི་མེད་རང་གྲོལ་ཅེས་བྱ་བའི་དེ་བཞིན་གཤེགས་པའོ། །ཞེས་གསང་མཚན་གདགས། ཨོཾ་བཛྲ་ཛྙཱ་ན་ཙཀྵུཿཔྲ་ཝེ་ཤ་ཡ་ཕཊ༔ ཅེས་མིག་དར་བསལ། དཀྱིལ་འཁོར་བཟང་པོ་འདི་ལ་ལྟོས༔ ལུས་ངག་ཡིད་ཀྱིས་དད་པ་བསྐྱེད༔ རྡོ་རྗེ་སེམས་དཔའི་རིགས་སུ་སྐྱེས༔ སྔགས་དང་ཕྱག་རྒྱས་བྱིན་གྱིས་རླབས༔ དངོས་གྲུབ་ཐམས་ཅད་ཁྱོད་ཀྱིས་ཐོབ༔ དམ་ཚིག་སྔགས་ལ་བརྩོན་པར་གྱིས༔ ཞེས་མཐོང་བ་བསྟན། ལྷར་བསྐྱེད་ཅིང་སྡིག་སྒྲིབ་སྐྱོང་བ་ནི། ཧཱུྃ་ལས་ཚེ་འདས་རྡོ་རྗེ་སེམས་དཔའི་སྐུ༔ དཀར་གསལ་ཞལ་གཅིག་ཕྱག་གཉིས་མཛུམ་བཅས་བཞད༔ ཕྱག་གཡས་རིག་སྟོང་རྡོ་རྗེ། །ཐུགས་ཀར་འཛིན༔གཡོན་པས་སྣང་སྟོང་དྲིལ་བུ་དགུ་ལ་བརྟེན༔ ལོངས་སྤྱོད་རྫོགས་སྐུ་དར་དང་རིན་ཆེན་བརྒྱན༔ གཡས་བརྐྱང་གཡོན་བསྐུམ་རོལ་པའི་སྟབས་ཀྱིས་བཞུགས༔ ཐུགས་ཀར་རྡོ་རྗེ་ཧཱུྃ་ལ་ཡིག་བརྒྱས་བསྐོར༔ བདུད་རྩིའི་རྒྱུན་བབ་ཉམས་ཆགས་སྡིག་སྒྲིབ་ཀུན༔ མ་ལུས་དག་ནས་ཤེལ་སྒོང་ལྟ་བུར་གྱུར༔ ཨོཾ་བཛྲ་སཏྭ་ས་མ་ཡ་སོགས་ཡིག་བརྒྱ་བརྗོད། དེ་ནས་གཏེར་གཞུང་ལས་སྐུ་གསུང་ཐུགས་དབང་། རིག་པའི་དབང་ལྔ། མཆོག་དབང་གསུམ་མཐའ་རྟེན་བཅས་རིམ་
པར་བསྐུར་བར་གསུངས་པའི་སྐུ་གསུང་ཐུགས་དབང་ནི་བུམ་པ་ལ་འདུས་པས་རྣམ་བུམ་ཐོགས་ལ། ཧཱུྃ༔ བུམ་པ་འདི་ནི་གཞལ་ཡས་ཁང་༔ ནང་ན་ཞི་ཁྲོའི་ལྷ་ཚོགས་བཞུགས༔ ཕྱི་ནང་གསང་བའི་དཀྱིལ་འཁོར་ནས༔ སྐུ་གསུང་ཐུགས་ཀྱི་དབང་བསྐུར་བས༔ ཕྱི་ནང་གསང་བའི་དབང་མཆོག་རྣམས༔ སྐལ་ལྡན་རྣམས་ལ་བབ་ནས་ཀྱང་༔ ཕུང་ཁམས་ལྷ་དང་ལྷ་མོར་གྱུར༔ བསྐྱེད་རིམ་ལྷ་དབང་ཐོབ་པར་ཤོག༔ ཨོཾ་ཨཱཿཧཱུྃ་སརྦ་ཏ་ཐཱ་ག་ཏ་ཨོཾ་ཨཱཿཧཱུྃ་ཧྲཱི༔སྭཱ་ཧཱ༔ བུམ་ཆུ་དབུ་རྒྱན་རྡོར་དྲིལ་རྣམས་ཐོགས་ལ། ཧཱུྃ༔ ཞེ་སྡང་མེ་བསད་ཆུ་ཡི་དབང་༔ ང་རྒྱལ་རི་བསྙིལ་དབུ་རྒྱན་དབང་༔ འདོད་ཆགས་དུག་འཇོམས་རྡོ་རྗེའི་དབང་༔ ཕྲག་དོག་ཞེན་ཁྲོལ་དྲིལ་བུའི་དབང་༔ གཏི་མུག་མུན་སེལ་མིང་གི་དབང་༔ བུ་ཁྱོད་རྣམས་ལ་བསྐུར་བར་བྱ༔ ཧཱུྃ་བཛྲ་ཨཱ་ད་རྴ་ཛྙཱ་ན་ཨ་བྷིཥིཉྩ་མི༔ སྭཱ་རཏྣ་ས་མ་ཏཱ་ཛྙཱ་ཨ་བྷིཥིཉྩ་མི༔ ཨཱཾ༔པདྨ་པྲ་ཏྱ་བེ་ཀྵ་་ཛྙཱ་ན་ཨ་བྷིཥིཉྩ་མི༔ ཧཱ་ཀརྨ་ཀྲྀ་ཏྱཱ་ནུ་ཥྛཱ་་ཛྙཱ་ན་ཨ་བྷི་ཥིཉྩ་མི༔ ཨོཾ་བུདྡྷ་ཤཱུ་ནྱ་ཏཱ་ཛྙཱ་ན་ཨ་བྷི་ཥིཉྩ་མི༔ ལྷ་དབང་རྡོར་སེམས་ཙཀླི་ཐོགས་ལ། ཧཱུྃ༔ རིགས་གཅིག་རྡོ་རྗེ་སེམས་དཔའ་ཡི༔ སྐུ་ལ་དམ་པ་རིགས་བརྒྱ་རྫོགས༔ ཚེ་འདས་ཁྱོད་ལ་དབང་བསྐུར་བས༔ ཞི་ཁྲོའི་ལྷ་དབང་ཡོངས་རྫོགས་ནས༔ ལོངས་སྐུའི་ཞིང་དུ་གྲོལ་བར་ཤོག༔ སརྦ་ཤཱནྟི་ཾ་ཀྲོ་དྷ་ཨོཾ་ཨཱཿཧཱུྃ་ཨ་བྷི་ཥིཉྩ་ཧཱུྃ༔ གསང་དབང་
ཐོད་པའི་བདུད་རྩི་སྦྱིན་ལ། ཧོ༔ ཐོད་པ་མཚན་ལྡན་ཀ་པཱ་ལར༔ ཡེ་ཤེས་བདུད་རྩི་ལྔ་ལྡན་བཅུད༔ སྐལ་ལྡན་བུ་ཡི་ངག་ལ་བླུད༔ རྩ་གསུམ་འཁོར་ལོ་བཞི་ལྡན་པ༔ ཐིག་ལེ་རང་དབང་ཐོབ་པ་དང་༔ ཐོགས་མེད་བདེ་ཆེན་མཐར་ཕྱིན་ཤོག༔ བོ་དྷི་ཙིཏྟ་ཨ་མྲྀ་ཏ་ཨ་བྷི་ཥིཉྩ་ཨོཾ༔ ཤེར་དབང་བརྡབ་བསྟན་ལ། ཧཱུྃ༔ ཁྱེད་རྣམས་རྟ་ཕག་ཡབ་ཡུམ་བསྒོམ༔ དབབ་བཟུང་འདྲེན་བཀྲམ་ཚོད་སྦྱར་ལ༔ དགའ་བ་བཞི་པོའི་ངོ་བོ་ཟུངས༔ ཤེས་རབ་ཡེ་ཤེས་དབང་ཐོབ་ཤོག༔ པྲ་ཛྙཱ་ན་ཨ་བྷི་ཥིཉྩ་ཨཱ༔ ཚིག་དབང་ཤེལ་རྡོ་མེ་ལོང་རྨ་བྱའི་སྒྲོ་ཐིག་བསྟན་ལ། ཧཱུྃ༔ རྨ་བྱ་ལུག་བརྒྱུད་ལག་ཏུ་ཕྱར༔ དཀྱིལ་འཁོར་ལ་སོགས་སྣང་བ་གཏད༔ ཤེལ་མིག་སྦྱར་བ་འདི་ལ་ལྟོས༔ འོད་ལྔ་ཡེ་ཤེས་རྣམ་ལྔ་སྟེ༔ སྣང་སྲིད་སེམས་སུ་མ་གྱུར་མེད༔ ཀ་དག་ཚིག་དབང་ཐོབ་པར་ཤོག༔ དྷ་རྨ་ཀཱ་ཡ་ཨ་བྷི་ཥིཉྩ་ཨཱ༔ མཐའ་རྟེན་མངའ་གསོལ་རྒྱལ་སྲིད་རྣམ་བདུན་གཏད་ལ། ཧོ༔ ཚེ་འདས་རིགས་ཀྱི་བུ་རྣམས་ལ༔ རྒྱལ་སྲིད་སྣ་བདུན་དབང་བསྐུར་བས༔ བདེ་ལེགས་ཕུན་སུམ་ཚོགས་པ་དང་༔ འཕགས་པའི་ནོར་བདུན་ལྡན་ནས་ཀྱང་༔ གཞན་དོན་དཔག་མེད་འགྲུབ་པར་ཤོག༔ ཨོཾ་སཔྟ་རཏྣ་ཨ་བྷི་ཥིཉྩ་ཧཱུྃ༔ བཀྲ་ཤིས་རྟགས་བརྒྱད་གཏད་ལ། ཧོཿ སྐལ་ལྡན་རིགས་ཀྱི་བུ་རྣམས་ལ༔ བཀྲ་ཤིས་རྟགས་བརྒྱད་དབང་བསྐུར་བས༔ རྒྱལ་བུ་
རྒྱལ་སར་ཐོན་ནས་ཀྱང་༔ རྒྱལ་འབངས་མངའ་འོག་ཚུད་པ་ལྟར༔ དབང་བཞི་ཡོངས་རྫོགས་ཐོབ་ནས་ཀྱང་༔ གཞན་དོན་དཔག་མེད་དབང་ཐོབ་ཤོག༔ ཨཥྚ་མངྒ་ལ་ཧེ་ཏུ་ཨ་བྷི་ཥིཉྩ་ཧཱུྃ༔ ཞེས་དབང་རྫོགས་པའི་ཚར་རྗེས་མར་དམ་ཚིག་བསྒྲག་བཟུང་། གཏང་རག་མཎྜལ། ལུས་འབུལ་རྣམས་བྱ་བའི་སྲོལ་སྣང་ངོ་། །འདིའི་གཏེར་གཞུང་ལས་དབང་པོ་ལྔའི་ནད་དང་སྒྲིབ་པ་སྦྱོང་བ་ཙམ་ལས་མ་གསུངས་ཀྱང་དེའི་རྗེས་འབྲེལ་དུ་སྤྱི་མཐུན་ལྟར་ཟས་བསྔོ་དང་སྤྲེལ་བ་ནི། སེམས་དཔའ་ལྔའི་སྐུ་གཟུགས་མེ་ལོང་ངོས་སུ་ཤར་བ་བསྟན་ལ། ཀྱེ་མ་མུན་པ་ལྟ་བུའི་འཇིག་རྟེན་ཁམས་སུ་འཁྱམས༔ སྡུག་བསྔལ་ཉམས་ཐག་འོ་དོད་འབོད་པ་ཁྱོད༔ རྒྱལ་སྲས་ཐུགས་རྗེ་ཅན་གྱིས་སྐྱོབ་པར་མཛོད༔ ཡེ་ཤེས་ལྔ་ཡི་ངང་ལས་སྐུ་སྤྲུལ་པས༔ རྒྱལ་སྲས་སེམས་དཔའ་ལྔ་ཡི་ཐུགས་རྗེ་ཡིས༔ ཚེ་འདས་དབང་པོ་ལྔ་ཡི་ནད་བསལ་ནས༔ དབང་པོའི་ནད་བསལ་འདོད་ཡོན་ལྔ་སྤྱོད་ཤོག༔ སྔོན་ཚེ་ཉིད་ནས་བསྙེན་པའི་ལྷ༔ ཡི་དམ་ལྷ་ཚོགས་འཁོར་བའི་སྐྱབས༔ རྒྱལ་སྲས་སེམས་དཔའ་རྣམ་པ་ལྔ༔ ལྷ་མཆོག་ཁྱེད་ལ་སྐྱབས་སུ་མཆི༔ ཐུགས་རྗེས་ཚེ་འདས་བྱིན་གྱིས་རློབས༔ འདོད་ཡོན་རྣམས་ལས་ཆུས་བྲན་ལ། རྃ་ཡྃ་ཁྃ༔ སྟོང་པའི་ངང་ལས་ལྷ་རྫས་དང་ཏིང་ངེ་འཛིན་ལས་གྲུབ་པའི་འདོད་ཡོན་གྱི་དངོས་པོ། གཟུགས་མཛེས་པ། སྒྲ་སྙན་པ།
དྲི་ཞིམ་པ། རོ་མངར་བ། རེག་བྱ་འཇམ་པ། ཟག་པ་མེད་པའི་ལོངས་སྤྱོད་ནམ་མཁའི་མཛོད་ཀྱི་འཁོར་ལོའི་སྤྲིན་ཆེན་པོར་གྱུར། ནམཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱ༔ སརྦ་ཐཱ་ཁཾ་ཨུཏྒ་ག་ཏེ་སྥ་ར་་ཨི་མཾ་ག་ག་ན་ཁཾ་སྭཱ་ཧཱ༔ ཞེས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་སྤེལ་ལ། བསྔོ་བའི་ཚིག་དགོངས་འདུས་ཞི་ཁྲོ་ལས་བྱུང་བ་ནི། ཧཱུྃ༔ ཚེ་འདས་ལུས་བརྗེས་རིགས་ཀྱི་བུ་ཁྱོད་ཀྱང་༔ བྱམས་སྡུག་ཡིད་ལ་གཅགས་པའི་གཉེན་བདུན་དང་༔ སྨོན་ལམ་ལས་འབྲེལ་མཐུན་པའི་གྲོགས་རྣམས་དང་༔ ཡུན་ཏུ་སྡེབས་པའི་སྐལ་དང་དབང་མེད་པས༔ བརྩེ་བའི་སེམས་ཀྱིས་ལོངས་སྤྱོད་སྣ་ཚོགས་བསགས༔ ཐུགས་རྗེ་ཐབས་དང་ལྡན་པའི་སློབ་དཔོན་གྱིས༔ ལོངས་སྤྱོད་གཏེར་ཆེན་འཕྲུལ་གྱི་གཞོང་པ་རུ༔ རོ་བརྒྱ་བཅུད་དང་ལྡན་པའི་བཟའ་བ་དང་༔ ཉོན་མོངས་གདུང་བ་སེལ་བའི་བཏུང་བ་བཤམས༔ ཏིང་འཛིན་སྔགས་དང་ཕྱག་རྒྱས་བྱིན་བརླབས་ཏེ༔ ཚེ་འདས་རིགས་ཀྱི་བུ་ལ་བསྔོས་པ་ཡིས༔ བཀྲེས་སྐོམ་སྡུག་བསྔལ་མ་ལུས་ཞི་ནས་ཀྱང་༔ ཡུན་གྱི་ཟས་དང་སྐོམ་དུ་འབྱུང་བར་ཤོག༔ འདོད་ཡོན་ལོངས་སྤྱོད་འདི་ལྟར་དཔག་མེད་ཀྱང་༔ གཟུགས་སྒྲ་དྲི་རོ་རེག་བྱ་ལ་སོགས་རྫས༔ དངོས་སུ་འབྱོར་བཤམས་ཡིད་ཀྱིས་ལེགས་སྤྲུལ་ནས༔ ཏིང་འཛིན་སྔགས་དང་ཕྱག་རྒྱས་བྱིན་བརླབས་ཏེ༔ ཚེ་
འདས་རིགས་ཀྱི་བུ་ལ་བསྔོས་པ་ཡིས༔ འདོད་ཡོན་ལོངས་སྤྱོད་དཔལ་དུ་སྤྱོད་པར་ཤོག༔ ཨོཾ་ཨཱཿཧཱུྃ་སྭཱ་ཧཱ༔ ལམ་བྷ་ཏ་བྷ་དུ་ཡ་ཡ༔ ཨ་ལི་ཨུ་ལི༔ ཏ་ལི་ཏ་ལི༔ ཨརྒྷཾ་པྲ་ཏཱིཙྪ་སྭཱ་ཧཱ༔ ལམ་བསྟན་པ་ནི་སྒྲོན་མེ་ཐོགས་ལ༔ ཧཱུྃ༔ རང་བཞིན་ཤུགས་ཀྱིས་དྲངས་པའི་དྲན་པས་ཉོན༔ འཁོར་བའི་རྦ་རླབས་མུན་པར་འཁྱམས་པ་ལ༔ ཐུགས་རྗེའི་ཤུགས་ཀྱི་སྒྲོན་མེ་འདི་བསྟན་པས༔ ཡེ་ཤེས་འོད་ལ་རྟག་ཏུ་བདེ་བར་ཤོག༔ཐར་པའི་ཞིང་དུ་འགྲོ་བ་ལ༔ གལ་ཏེ་མུན་པར་འཐོམ་ན་ཡང་༔ སྒྲོན་མེ་འདི་ཡིས་གསལ་གྱུར་ཅིག༔ གལ་ཏེ་མ་རིག་རྨོངས་ན་ཡང་༔ སྒྲོན་མེ་འདི་ཡིས་གསལ་གྱུར་ཅིག༔ གལ་ཏེ་མ་ཤེས་འཁྲུལ་ན་ཡང་༔ སྒྲོན་མེ་འདི་ཡིས་གསལ་གྱུར་ཅིག༔ གལ་ཏེ་དག་པའི་ལམ་སྟོར་ན༔ ཡེ་ཤེས་འདི་ཡིས་རྙེད་གྱུར་ཅིག༔ ཡེ་ཤེས་སྣང་བ་ཆེན་པོ་སྟེ༔ སྔགས་འཆང་རྒྱལ་པོས་སྒྲོན་མེ་སྦྱིན༔ འདི་ལ་བརྟེན་ནས་བུ་ཁྱོད་ཀྱང་༔ འོག་མིན་ཆོས་དབྱིངས་ཞིང་ཁམས་སུ༔ ཡི་དམ་ལྷ་དང་འཕྲད་པར་ཤོག༔ ཞིང་དུ་སྨོན་ལམ་གདབ་ཅིང་གནས་སྤར་བ་ནི། འདི་ནས་ཕྱོགས་བཞི་དབུས་ལྔ་རུ༔ བདེ་བ་ཅན་སོགས་ཞིང་ཁམས་ལྔ༔ ཐམས་ཅད་འབྱུང་ལྔའི་རང་བཞིན་ཏེ༔ འབྱུང་ལྔ་ཤི་ཞེས་བྱ་བ་མེད༔ སེམས་ཅན་སྲོག་ནི་འབྱུང་ལྔ་སྟེ༔ འབྱུང་ལྔའི་སྙིང་པོ་ཡི་གེ་ལྔ༔ དེ་ལ་བརྟེན་
ནས་བུ་ཁྱོད་ཀྱང་༔ བྱང་ཆུབ་མཆོག་ཏུ་སེམས་བསྐྱེད་ནས༔ ཞིང་མཆོག་དེ་རུ་སྐྱེས་གྱུར་ཏེ༔ ཡུམ་ཆེན་ལྔ་དང་དབྱེར་མེད་ཤོག༔ འདི་ནས་ཕྱོགས་བཞི་དབུས་ལྔ་ནས༔ བདེ་བ་ཅན་སོགས་ཞིང་ཁམས་ལྔ༔ རྫོགས་པའི་སངས་རྒྱས་རིགས་མཆོག་ལྔ༔ གང་ཞིག་དེ་ཡི་མཚན་འཛིན་པ༔ ཞིང་མཆོག་དེ་རུ་སྐྱེ་བར་གསུངས༔ ཞིང་མཆོག་དེ་རུ་སྐྱེ་བར་ཤོག༔ བཅོམ་ལྡན་རྒྱལ་བ་རིགས་ལྔ་ལ༔ ཚེ་ལས་འདས་པ་འདི་རྣམས་ཀྱི༔ ཕུང་པོ་ལྔ་པོ་ཡོན་དུ་འབུལ༔ ཡོན་འདི་བཞེས་ལ་ལམ་འདི་སྟོན༔ སེམས་ཉིད་བྱང་ཆུབ་གནས་སུ་དྲོངས༔ ལམ་ལྔ་ས་བཅུ་མཐར་ཕྱིན་ནས༔ རྫོགས་པའི་སངས་རྒྱས་ལྷུན་གྱིས་གྲུབ༔ ཐམས་ཅད་མཁྱེན་པའི་དོན་རྟོགས་ནས༔ འབྲས་བུ་སྐུ་གསུམ་ལྷུན་གྲུབ་ཤོག༔ རྣམ་ཤེས་དབྱིངས་སུ་སྤར་བ་ནི། གཞུང་ལས། རྒྱས་པར་བྱེད་ན་རིགས་ལྔ་ཐམས་ཅད་ལ༔ བསྡུས་པར་བྱེད་ན་དབུས་ཀྱི་གཙོ་བོས་ཆོག༔ ཅེས་གསུངས་པས་མདའ་གཞུའི་ཕྱག་རྒྱ་བྱས་ལ། ཧཱུྃ༔ ཐབས་ཀྱི་གཞུ་ལ་ཤེས་རབ་མདའ་བཀང་སྟེ༔ ཡེ་ཤེས་ཐུགས་རྗེའི་ཤུགས་ཀྱི་རྒྱུད་དང་ལྡན༔ བླ་ན་མེད་པའི་གནས་མཆོག་དམ་པ་རུ༔ ཚེ་འདས་མདའ་འཕོངས་བཞིན་ཏུ་སྐྱེ་བར་ཤོག༔ ཞིང་ཁམས་འདི་ནས་དབུས་ཀྱི་ཕྱོགས་རོལ་ན༔ འོག་མིན་ཆོས་དབྱིངས་ཕོ་བྲང་ཞེས་བྱ་ཡོད༔ དེ་ན་སངས་རྒྱས་ཀུན་གྱི་སྤྱི་མེས་ནི༔ ཐོག་མའི་སངས་རྒྱས་ཀུན་ཏུ་བཟང་
པོ་བཞུགས༔ དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ༔ ཆོས་ཉིད་ཀུན་ཏུ་བཟང་མོ་ཞེས་བྱ་ཡོད༔ རྒྱལ་བའི་སྲས་མཆོག་རྡོ་རྗེ་སེམས་དཔའ་བཞུགས༔ ཡུམ་ཆེན་ནམ་མཁའ་དབྱིངས་ཕྱུག་ཞེས་བྱ་བཞུགས༔ རིགས་བཞི་ཡབ་ཡུམ་གཙོ་འཁོར་གྲངས་མེད་ཡོད༔ སྤྲུལ་པའི་སངས་རྒྱས་གྲངས་ལས་འདས་པ་ཡོད༔ ཡ་མཚན་བཀོད་པ་བསམ་གྱིས་མི་ཁྱབ་ཡོད༔ དེ་ཕྱིར་མིང་ནི་སྟུག་པོ་བཀོད་པའི་ཞིང་༔ ཞིང་མཆོག་གཙང་མའི་གནས་རབ་དམ་པ་དེར༔ ཚེ་འདས་ལུས་བརྗེས་རིགས་ཀྱི་བུ་ཁྱོད་ཀྱང་༔ རྫོགས་པའི་སངས་རྒྱས་དེ་ཡི་སྲས་མཆོག་ཏུ༔ རྩལ་ཆེན་མདའ་འཕོངས་བཞིན་ཏུ་སྐྱེ་བར་ཤོག༔ ཕཊ༔ ཚེ་ལས་འདས་པའི་རྣམ་པར་ཤེས་པ་ཧཱུྃ་མཐིང་ག་གཅིག་ཏུ་གྱུར་ཏེ༔ རྩལ་པོ་ཆེའི་མདའ་འཕངས་པ་བཞིན་ཏུ་རྡོ་རྗེ་སེམས་དཔའ་ཡབ་ཡུམ་གྱི་སྦྱོར་མཚམས་སུ་ཐིམ་པས་རྒྱལ་བའི་སྲས་སུ་གྱུར་ཏེ་སངས་རྒྱས་ནས༔ སླར་ཡང་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་ཐོགས་པ་མེད་པ་བྱེད་ནུས་པར་གྱུར་ཅིག༔ ཅེས་གྱེན་དུ་འཕེན་ཚུལ་བྱ་བར་གསུངས༔ ནུབ་ཐ་མར་བྱང་བུ་བསྲེག་པ་ནི། མར་མེ་སྤར་ལ། ཨཱཿ ཀོང་བུ་རིན་ཆེན་གཞལ་ཡས་ཁང་༔ ར་ཁུ་པདྨ་ཟླ་བའི་སྟེང་༔ སྡོང་བུ་བཅོམ་ལྡན་རྡོ་རྗེ་སེམས༔ སྐུ་ལ་ཞི་ཁྲོའི་ལྷ་ཚོགས་བཞུགས༔ ཡེ་ཤེས་སྤྱན་
དྲངས་དབྱེར་མེད་ཐིམ༔ སྐུ་ལས་ཡེ་ཤེས་མེ་འབར་བས༔ ཚེ་འདས་ལས་ཉོན་སྡིག་སྒྲིབ་བསྲེགས༔ ཧཱུྃ༔ ཚེ་འདས་རིགས་ཀྱི་བུ་ཁྱོད་ཀྱི༔ ཀུན་གཞིའི་རྣམ་ཤེས་ཐབ་ཁུང་དུ༔ ཕུང་པོ་ལྔ་ཡི་བུད་ཤིང་ལ༔ ཡེ་ཤེས་ལྔ་ཡི་མེ་སྦར་བས༔ དུག་ལྔའི་རྒྱ་མཚོ་སྐེམས་པར་ཤོག༔ བདག་ཏུ་འཛིན་པའི་ཕུང་པོ་ལ༔ སྟོང་པ་ཉིད་ཀྱི་མེ་སྦར་བས༔ གནས་ལུགས་ཇི་བཞིན་རྟོགས་པར་ཤོག༔ དུག་གསུམ་འདུས་པའི་ཕུང་པོ་ལ༔ སྐུ་གསུང་ ཐུགས་ཀྱི་མེ་སྦར་བས༔ སྐུ་གསུམ་ལྷུན་གྱིས་འགྲུབ་པར་ཤོག༔ དུག་ལྔ་འདུས་པའི་ཕུང་པོ་ལ༔ རྒྱལ་བ་རིགས་ལྔའི་མེ་སྦར་བས༔ ཡེ་ཤེས་ལྔ་དང་ལྡན་པར་ཤོག༔ འབྱུང་བ་འདུས་པའི་ཕུང་པོ་ལ༔ ཡུམ་ཆེན་བཞི་ཡི་མེ་སྦར་བས༔ ཚད་མེད་བཞི་དང་ལྡན་ནས་ཀྱང་༔ ཕྲིན་ལས་རྣམ་བཞི་ལྷུན་གྲུབ་ནས༔ འཁོར་བའི་རྒྱ་མཚོ་སྐམས་པར་ཤོག༔ ཨོཾ་ཨཱཿཧཱུྃ་སྭཱ་ཧཱ༔ ཨོཾ་བཛྲ་སཏྭ་ས་མ་ཡ་སོགས་ཡིག་བརྒྱ་དང་། ན་མོ་རཏྣ་ཏྲ་ཡཱ་ཡ། ཨོཾ་ཀཾ་ཀ་ནི་སོགས་བརྗོད་ལ་བསྲེག །བྱང་ཐལ་ལ་ས་ཙྪ་བཏབ་པ་རབ་ཏུ་གནས་ཏེ་དབེན་པར་བཞུགས། དེ་ནས་རྗེས་ཀྱི་བྱང་ཚོགས་མཆོད་སྐོང་བ་ནས་ཤིས་བརྗོད་ཀྱི་བར་ལས་བྱང་ཆེ་ཆུང་གང་ལ་བརྟེན་པ་ཉིད་མཐར་དབྱུང་བར་བྱའོ། །ཞི་ཁྲོའི་གནས་འདྲེན་བསྡུས་པ་ཆགས་མེད་རིན་པོ་ཆེས་མཛད་པ་ལ་ཀུན་མཁྱེན་དྷརྨཱ་ཀ་རས་རིགས་དྲུག་གནས་འདྲེན་སྤྲོས་བཅས་ཀྱི་ཕྱག་བཞེས་ལ་དགོངས་ཏེ་ཅུང་ཟད་རྒྱས་སུ་བཏང་བ་ཐུགས་རྗེའི་ལྕགས་ཀྱུ་ཉིད་གྲངས་གསོག་གི་སྐབས་སུ་
མི་ལྕོགས་པས་འདིར་དེ་དག་སོར་བཞག་ལ་གཏེར་གཞུང་གི་དགོངས་པ་དང་བསྟུན་ནས་ཁ་གསལ་མདོར་བསྡུས་སུ་བགྱིས་པ་སྟེ་འདིའང་གྲངས་གསོག་སྐབས། ཐོག་མར་ར་མདའ་སྦྲན་པ། རྟེན་བསྐྱེད། འགུགས་བསྟིམ། གཤེད་ཕྲལ་རྣམས་དང་པོའི་ཚར་གཅིག་དེ་ལས་མི་དགོས་ཤིང་དབང་ཚར་འཕྲལ། ཧཱུྃ༔ འདི་ནི་སྦྱིན་པ་ཚུལ་ཁྲིམས་སོགས་ཁྲུས་ནས་མགོ་བཟུང་སྟེ་བསྐྱར་བ་ཡིན་ལ། དབང་གི་སྐབས་མིག་དར་བཅིང་འགྲོལ། མེ་ཏོག་སྟེར་འབུལ་རྣམས་ཀྱང་དང་པོ་ཚར་གཅིག་དེ་ལས་རྗེས་མ་རྣམས་ལ་མི་དགོས། དབང་གི་མཐའ་རྟེན་རྒྱལ་སྲིད་རྟགས་བརྒྱད་རྣམས་ཀྱང་ཚར་རྗེས་མའི་གཤམ་དུ་ལན་གཅིག་སྦྱོར་བ་ལས་སྔ་མ་རྣམས་ལ་མི་དགོས་པ་སོགས་ཤེས་པར་བྱའོ། །འདིས་ཀྱང་འབྲེལ་ཚད་འགྲོ་བ་རྣམས། །འཁོར་བ་ངན་སོང་དོང་སྤྲུགས་ཏེ། །སྐུ་གསུམ་ཞི་ཁྲོའི་ཐུགས་རྗེ་ཡིས། གདོད་མའི་དབྱིངས་སུ་འཁོད་པར་ཤོག། ཅེས་པ་འདིའང་དོན་གཉེར་ཅན་མང་པོས་བསྐུལ་བ་དང་རང་ལུགས་ཀྱི་ཆོག་བཏང་བ་རྣམས་ལ་ཕན་པའི་སེམས་ཀྱིས་ཀརྨ་ངག་དབང་ཡོན་ཏན་རྒྱ་མཚོས་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་སྦྱར་བའི་ཡི་གེ་པ་ནི་ཉེ་བར་གནས་པ་གསང་སྔགས་བསྟན་འཛིན་གྱིས་བགྱིས་པ་དགེ་ལེགས་འཕེལ།། །།