ཟབ་ལམ་ཐུགས་ཀྱི་ནོར་བུ་ལས་རྩ་བའི་སྒྲུབ་ཆེན་དང་བདུད་རྩི་སྨན་སྒྲུབ་གཉིས་ཀྱི་སྒྲུབ་ཁོག་ཟུང་འབྲེལ་དུ་བཀོད་པ་གྲུབ་གཉིས་བདུད་རྩིའི་ཟ་མ་ཏོག
ཟབ་ལམ་ཐུགས་ཀྱི་ནོར་བུ་ལས། རྩ་བའི་སྒྲུབ་ཆེན་དང་བདུད་རྩི་སྨན་སྒྲུབ་གཉིས་ཀྱི་སྒྲུབ་ཁོག་ཟུང་འབྲེལ་དུ་བཀོད་པ་གྲུབ་གཉིས་བདུད་རྩིའི་ཟ་མ་ཏོག་ཅེས་བྱ་བ་བཞུགས་སོ། །
ན་མོ་གུ་རུ་དྷེ་བ་དྷཱ་ཀི་ནཱི་ཡཻ། རྩ་གསུམ་རབ་འབྱམས་ཐུགས་ཀྱི་ནོར་བུ་ནི། །ཡེ་ཤེས་སྙིང་པོའི་བཅུད་དུ་འཁྱིལ་བ་གང་། །སྙིང་གི་པདྨོར་བྱིན་རླབས་བདུད་རྩིའི་རྒྱུན། །འབེབས་བཞིན་བཞུགས་ལ་བདེ་ཆེན་རྡོ་རྗེར་སྒྲུབས། །འབྲེལ་ཚད་རྣམ་གྲོལ་ས་ལ་དབུགས་འབྱིན་པ། །གསང་སྔགས་ཚོམ་བུ་ཚོགས་སུ་སྒྲུབ་པ་ཉིད། །བདུད་རྩི་སྨན་དང་འབྲེལ་བའི་ལས་ཀྱི་རིམ། །བཀོད་ལ་རྩ་གསུམ་སྲུང་མས་གནང་བ་སྩོལ། །དེ་ལ་སྤྱིར་ཟབ་ལམ་འདི་ཉིད་བླ་མ་དགོངས་པ་འདུས་པའི་ཐེམས་མེད་རྩ་བའི་ཐུགས་སྒྲུབ་གསལ་བྱེད་ཐུགས་ཀྱི་ནོར་བུ་ཁོལ་དུ་ཕྱུངས་བའི་ཆོས་སྡེ་ཡིན་འདུག་སྟབས་ཚིག་དོན་ཐམས་ཅད་དེའི་སྙིང་པོ་བསྡམ་པ་ཁོ་ནར་སྣང་བས་ཆོས་བཀའ་མ་བུ་འབྲེལ་ཆགས་པའི་དབང་གིས་དེ་ཉིད་ཁུངས་སུ་བྱས་ཏེ་འགོད་པ་ལ་གསུམ། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ། བསྙེན་སྒྲུབ་ཡན་ལག་བཞིས་སྒྲུབ་པའི་གཞུང་བསྲང་བ། །རྗེས་ཀྱི་ལས་
རིམ་རྣམས་ཀྱིས་སྒྲུབ་པ་མཐའ་རྒྱས་སུ་བྱ་བའོ། །དང་པོ་ལ་སྟོན་པ་གནས་འཁོར་དུས་ཡོ་བྱད་ལྔར་གྲགས་ཆེ་བ་ལས། སྟོན་པ་རྡོ་རྗེ་སློབ་དཔོན་རང་བཞིན་བརྒྱད་སོགས་མཚན་ཉིད་དང་ལྡན་ཅིང་ཁྱད་པར་འདི་ཉིད་ཀྱི་དབང་ལུང་མན་ངག་བསྙེན་སྒྲུབ་ཉམས་ལེན་མཐར་ཕྱིན་པ། གནས་གུ་རུས་བྱིན་གྱིས་བརླབས་ཤིང་གྲུབ་ཐོབ་གོང་མའི་སྒྲུབ་གནས་བཀྲ་ཤིས་བྱིན་ཆགས་མཐུན་རྐྱེན་ཚང་བ། འཁོར་རྡོ་རྗེ་དང་ལས་ཀྱི་རྒྱལ་ཐེབས་གཟུངས་མ་སོགས་ནས་རྡུལ་ཕྱགས་ཡན་ཆད་གཞུང་བཤད་མཚན་ཉིད་དང་ལྡན་ལ་ཐ་ནའང་དམ་ཚིག་ལ་སེལ་དང་ཐེ་ཚོམ་གྱི་སྐྱོན་མེད་ཅིང་དད་མོས་ཤེས་རབ་ལྡན་པ། དུས་བཀྲ་ཤིས་བདེ་ལེགས་འབྱུང་བ་ར་བ་བཞིའི་ཡར་ངོ། །ལྟས་བཟང་བཅས་སྒྲུབ་པ་འཕེལ་བ་ཉ་སྟོང་བརྒྱད་གསུམ། གུ་རུའི་བྱིན་གྱིས་བརླབས་པ་ཡར་ངོའི་ཚེས་བཅུ། རྒྱལ་ཕུར་སོགས་གཟང་སྐར་འཕྲོད་སྦྱོར་དགེ་བ། ཡོ་བྱད་
བླ་མ་ཡི་དམ་མཁའ་འགྲོའི་སྐུ་གསུང་ཐུགས་ཀྱི་རྟེན་སོགས་སྒྲུབ་པའི་རྟེན་རྫས། མཆོད་པའི་ཡོ་བྱད། ཉེ་བར་མཁོ་བའི་ཆ་རྐྱེན་གཞུང་ནས་ཇི་སྐད་བཤད་པ་བཞིན་གལ་ཆུང་དེས་ཆོག་ལེ་ལོའི་དབང་དུ་མི་གཏོང་བར་འབྱོར་བས་གང་ལྕོགས་ནུས་པའི་སྟོབས་བསྐྱེད་ན། ཐམས་ཅད་རྟེན་འབྲེལ་གྱི་རྒྱུ་རྐྱེན་ལས་འབྱུང་བའི་ཕྱིར་ཚོགས་རྫོགས་ཤིང་དངོས་གྲུབ་མྱུར་དུ་འགྲུབ་པའི་ཉེར་ལེན་ཏུ་འགྱུར་རོ། །ཁྱད་པར་བདུད་རྩི་སྨན་སྒྲུབ་ནི་ཤིན་ཏུ་ཁེ་ཉེན་ཆེ་བའི་སྒྲུབ་པ་ཟབ་མོ་ཡིན་པས་སྒྲུབ་མཆེད་ནང་ཕན་ཚུན་དམ་སལ་འཁོན་བློས་མ་ཞུགས་ཤིང་གསང་སྔགས་ལྟ་སྤྱོད་ལ་ཐེ་ཚོམ་ལོག་ལྟ་མེད་པ། དང་མོས་བརྩོན་འགྲུས་དང་ལྡན་པ་ཤིན་ཏུ་གལ་ཆེ་བ་དང་། སྨན་རྣམས་རྒྱུ་དག་ཅིང་སེར་སྣས་མ་བཅིངས་པ་དགོས་པས་རང་གིས་དབང་བ་ཡིན་ཀྱང་རྒྱ་བ་ལ་ཚོང་པའི་ཆས་ཅན་ལས་གསེར་དངུལ་གྱི་རིན་གཞལ་ནས་ཉོ་ཚོང་གི་ཚུལ་བྱ་བ་རྟེན་འབྲེལ་གྱི་གནད་དུ་ཆེ་བ་གསུངས་པ་དང་། བདུད་རྩི་བསྒྲུབ་བྱ་དངོས་བདུད་རྩི་ལྔ་དང་ཤ་ལྔ། རྩ་བ་བརྒྱད་ལ་ཡན་ལག་སྟོང་སྦྱོར་ཚུལ་རྒྱུད་མན་ངག་རྣམས་ལས་རྒྱ་ཆེར་གསུངས་བ་ལྟར་ཚོགས་དགོས་ཀྱང་། ད་ལྟ་བཤད་ཚོད་ལག་ཏུ་མི་ཐེབས་པས་གང་ཡང་འདྲ་འབག་དང་མོས་སྒྲུབ་ཙམ་བྱེད་པའི་ལུགས་ལྟར་ན། གོང་སྨོས་དེ་རྣམས་གཏེར་བྱོན་ཚད་ལྡན་དངོས་སམ། དེ་ལ་གཞི་བྱས་ནས་རིག་འཛིན་གོང་མས་བསྒྲུབས་བའི་ཆེས་སྨན་ལ་ཚང་བས་ཁུངས་ལྡན་གྱི་བབ་རྒྱུན་ཙམ་རྙེད་པ་གཞིར་བཞག །རང་གཞུང་འདིར་ཕྱིའི་བདུད་རྩི་དང་སྐྱོབས་སུ་བཤད་པའི་སྨན་རྣམས་དང་། རྩ་བ་བརྒྱད་ཕྱོགས་མཐུན། རུ་རྟ། ཙནྡན་དམར་པོ། ལི་ཤི། མ་ནུ། གུར་གུམ། ཛཱ་ཏི། ག་བུད་
ཤིང་ཚ་རྣམས་ལ་བྱ་ཞིང་། ཡན་ལག་རྒྱ་བོད་ཀྱི་སྨན་རིགས་ཇི་ཙམ་འཚོགས་པར་སྦྱར་ཆོག་པ་ལ་བཏང་དུ་མི་རུང་བ། །མདོག་དང་མེ་ཏོག་གི་སྤྱང་ཀི་སྤང་རྒྱན་སྔོན་པོ་རི་ཤོ་སྲན་མའི་མེ་ཏོག་སོགས། དྲིའི་སྤྱང་ཀི་ཤིང་ཀུན་ཤུ་དག་ནག་པོ་སྒོག་པ་བྱེའུ་རུག་པ་སོགས། །རོའི་སྤྱང་ཀི། ཧོང་ལེན། བོང་ང་དཀར་དམར། ཐལ་ཚྭ། བ་ཚྭ། གཞོབ་དྲི་ཅན་སོགས། ནུས་པའི་སྤྱང་ཀི་བཙན་དུག་གཙོས་དུག་རིགས་ཐམས་ཅད་སྤང་། གཏེར་གཞུང་རྣམས་ལས་འདབ་ཆགས་གཅན་གཟན་སོགས་དུད་འགྲོའི་རིགས་རེ་རེ་བཞིན་ཤ་སྣ་སྟོང་སྟོང་བསགས་པར་གསུངས་པས་ཤ་སྣ་ཇི་ཙམ་ཚོགས་པ་དཀོས། ཕྱིས་ཀྱི་གསུང་རྒྱུན་ཁ་ཅིག་ཏུ་བཏང་མི་རུང་བ་མང་དུ་བཤད་ཀྱང་ཡོངས་གྲགས་ཤའི་སྤྱང་ཀི་བུ་ཤུད་ཟེར་མོང་བོ་ཏོ་རོག་པོ་མཛོ་དྲེལ་གྱི་ཤ་རྣམས་མི་བཏང་བར་བཞེད། རྒྱ་བོད་ཀྱི་སྨན་རིགས་ཤ་སྣ་སོགས་གང་མང་བམ་རུལ་འཁེང་སད། རླུང་དང་ཉི་མས་དྲི་རོ་ཉམས་པ། དུད་པ་སོགས་རྫས་གཞན་གྱི་དྲིས་སྦགས་པ་སོགས་སྐྱོན་གྱིས་མ་གོས་པ། ཧ་ཅང་རྙིང་ཆེས་བ་མ་ཡིན་པ། གཙང་ལ་མ་ཉམས་པ་ཁོ་ན་འཚོགས་པ་གལ་ཆེ། ཤ་སྣ་མ་འཛོམ་ན་གསང་འདུས་རྒྱུད་ལས་གསུངས་པ་ལྟར། ཕྱེ་ཞི་བ་ལ་མི་དང་དུད་འགྲོའི་གཟུགས་བརྙན་མང་པོ་འབུར་གཟོ་དང་སྤར་བཏབ་ལ། ནྲྀ་ལྗང་གུ་ལས་མི་དང་། སུ་སེར་པོ་སྟོང་ཕྲག་མང་པོ་འོད་དུ་ཞུ་བ་ལས་འདབ་ཆགས། གཅན་གཟན། རི་དྭགས། གཡུང་དགས། ཆུ་གནས། ས་འཛུལ་སོགས་རིགས་མི་འདྲ་བ་མཐའ་ཡས་པའི་རྣམ་པར་གྱུར་པ་ཉིད་སོ་སོའི་ལས་ཀྱིས་ཤི་བར་གྱུར་པའི་ཤ་ཡིན་པར་མོས་ལ་སྦྱར་བར་བཤད་པ་ཉིད་གནད་
ཆེའོ། །ཁྱད་པར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཐུགས་དམ་བསྐང་བའི་ཕྱིར། གླང་ཆེན། རྨ་བྱ། སེང་གེ། གྱི་ལིང་། ཤང་ཤང་ལྔའི་ཤ་མེད་དུ་མི་རུང་བས་མ་འཛོམ་ན་དེ་རྣམས་ཀྱི་ཚབ་གཡག་ཞོལ་ཅན། བྱ་ཝང་ངམ་ངང་པ། ཁྱི་དཀར་པོ། རྟ་དཀར་པོ། ཁྲུང་ཁྲུང་དཀར་མོའི་ཤ་ལ་བྱ་བར་གསུངས་པས་དངོས་སམ་གཟུགས་བརྙན་ལའང་དེ་རྣམས་གལ་ཆེ། སྨན་རིགས་ལྔར་དབྱེ་ཚུལ་རང་གཞུང་ལས་ཞིབ་པར་གསུངས་པ་ལྟར་གྲུབ་ན་ལེགས་ཀྱང་བཤད་ཚེད་ལག་ཏུ་ཐེབས་དཀའ་བས་ཁ་དོག་རོ་ཙམ་གྱིས་དབྱེ་སླ་བའི་དབང་དུ་བྱས་ན། ཛཱ་ཏི་སོགས་མདོག་དམར་སེར། ཨ་རུ་ར་སོགས་རོ་བསྐ་བ་དང་ཤིང་མངར་སོགས་མངར་བ་རིན་པོ་ཆེ་གསེར་དང་འབྲུ་གྲོ་དང་ཟར་མ་སོགས་དམར་སེར་གྱི་རིགས་ཐམས་ཅད་དབུས། ཅུ་གང་སོགས་མདོག་དཀར་པོ། ཏིཀྟ་སོགས་རོ་ཁ་བ། རིན་པོ་ཆེ་དུང་དང་འབྲུ་འབྲས་སོགས་དཀར་པོའི་རིགས་རྣམས་ཤར། ཀ་ཀོ་ལ་སོགས་མདོག་སྔོན་པོ། སྐྱུ་རུ་ར་སོགས་རོ་སྐྱུར་བ། རིན་པོ་ཆེ་མུ་མན་སོགས་སྔོན་པོའི་རིགས་རྣམས་ལྷོ། ཙན་དམར་སོགས་མདོག་དམར་པོ། སྒ་སྐྱ་སོགས་རོ་ཚག །ཚྭ་སྣ། རིན་པོ་ཆེ་བྱེ་རུ་དང་ཁྲག་སྣ་ཚོགས་མདོག་དམར་པོ་ཐམས་ཅད་ནུབ། སྔོ་སྨན་སོགས་མདོག་ལྗང་གུ། རོ་ཐ་དད་སྣ་ཚོགས་འདྲེས་པ། རིན་པོ་ཆེ་གཡུ་ལ་སོགས་པ་ལྗང་གུའི་རིགས་ཐམས་ཅད་བྱང་གི་སྨན་ཏུ་སྦྱར་ཞིང་། འབྲུ་དང་མེ་ཏོག་ཤིང་ཏོག་གི་རིགས་ཀྱང་མདོག་སོ་སོའི་དབྱེབས་དེ་བཞིན་ཏུ་སྦྱར་ཏེ་ཚོ་ལྔ་སོ་སོར་འཐགས་གྲུབ་ན་ལགས་མོད། འོན་ཀྱང་དེང་སང་བྱ་སླ་སྟབས་བདེའི་ལག་ལེན་ཏུ་ཁྲོལ་སྒྲུབ་རྟན་རིགས་དབྱེ་མཚོན་ཙམ་སོ་སོར་བཞག །
བྱིངས་རྣམས་ཕྱོགས་གཅིག་འཐགས་ནས་སྔ་ཚགས་ཚུད་པ་བྱེད་པ་ལྟར་ན་སྨན་སྦྱོར་ཚད་ལྟར་བསྡུ། ཤིན་ཏུ་ཞིབ་མོར་བརྡུངས་ནས་དར་ཚགས་ལ་དྲངས། ཞིབ་པ་ལྟར་སྣང་ཡང་རླན་གྱིས་སྦོལ་སྐབས་རྩིས་སྐྱོན་འབྱུང་བས་དར་ཚགས་ཀྱང་ཞིབ་དགོས། ཁྲོལ་སྒྲུབ་རྟེན། གཙོ་བོ་དབུས་སུ་དི་ཆེན་དང་མིའི་ཤ །ཤར་དུ་བྱང་སེམས་དཀར་པོ་དང་བ་གླང་གི་ཤ །ལྷོར་ཀླད་པ་དང་ཁྱིའི་ཤ། ནུབ་དུ་པདྨ་རཀྟ་དང་རྟའི་ཤ །བྱང་དུ་དྲི་ཆུ་དང་གླང་པོ་ཆེའི་ཤ་རྣམས་འཇོག་དགོས་པ་ཡིན་ཀྱང་ཕབ་རྒྱུན་ཙམ་ལས་དངོས་རྣམས་རྟོག་པས་མི་ཆུན་པས་སྨན་སྣ་འཇོག་རྒྱུ། དབུས་སུ་ཨ་རུ་ར། ཛཱ་ཏི། སུག་སྨེལ། ཨ་ག་རུ། སྨད་འབྲས་གསུམ། ཤར་དུ་ཙྪ་གང་། ག་བུར། ཐལ་ཀར་རྡོ་རྗེ། ཙནྡན་དཀར་པོ། རིང་བསྲེལ། ལྷོར་བ་རུ་ར། ཀ་ཀོལ། ཞོ་ཤ་རྣམ་གསུམ། ཙི་ཏྲ་ཀ །ནུབ་ཏུ་ལིཤི། ཙནྡན་དམར་པོ། སྐྱུ་རུ་ར། སེ་འབྲུ། སྟར་བུ། སིནྡྷཱུ་ར། ཚབ་གསུམ། བྱང་དུ་གུར་གུམ། ཅོང་ཞི། བྲག་ཞུན། སྤོས་དཀར། ལིག་དུར་རྣམས་ཉུང་ངུ་རེ་ཐུམ་བྱ། བརྡེའི་བདུད་རྩི་ལྔའམ་སྐྱོབས་སུ་གྲགས་པ། དྲི་ཆེན་གྱི་ཨ་རུ་ར། བྱང་སེམས་ཀྱི་ག་བུར། ཤ་ཆེན་གྱི་ཙནྡན་དམར་པོ། རཀྟའི་དུ་རུ་ཀ །དྲི་ཆུའི་གླ་རྩི་རྣམས་ཀྱང་སོ་སོར་བསྡོགས། སྨན་གྱི་སྦྱར་ཚད་གཞུང་དང་ལག་ལེན་རྣམས་ལས་འདྲ་མིན་མང་ཡང་ཕྱག་ལེན་དངོས་གཙང་བའི་ལུགས་ལྟར་ན། ཨ་རུ་ར་ལ་གཞི་བྱེད་དགོས་པས་གང་མང་བྱ། དེའང་རུས་པ་དང་བྲལ་བ་བྱུང་ན་ལེགས། བ་རུ་ར། སྐྱུ་རུ་ར། གུར་གུམ་རྣམས་དེའི་བཞི་ཆ་རེ། ཙནྡན་དཀར་དམར། ཨ་ག་རུ་
ནག་པོ་རྣམས་བསྡོམས་པ་བཞི་ཆ་གཅིག །ན་གི་དུལ་མ་གི་ཝཾ་ལི་ཤི་རྣམས་བསྡོམས་པ་བརྒྱད་ཆ་གཅིག །བཟང་སྨན་གཞན་ཐམས་ཅད་བསྡོམས་པ་བཞི་ཆ་གཅིག །སྔོ་སྨན་རིགས་ཐམས་ཅད་བསྡོམས་པ་དང་། ཤ་སྣ་སོགས་ནང་སྨན་ཕྱོགས་བསྡོམས་བརྒྱད་ཆ་རེ། དབང་ལག་བཞི་ཆ་གཅིག ལིག་དུར་རྒྱ་གར་མ་གང་འཛོམ་དང་། །རྟ་མོན་པ་ཕྱེད་ཆ། སྦྲང་ཕུར་ཀ་ར་རྣམས་བཞི་ཆ་ཙམ་བསྲེ་བ་ཡིན་ལ། ཁམས་ཕྱོགས་ལྟ་བུ་བཟང་སྨན་དཀོན་པ་དང་འབྱོར་འཁོས་དམན་པའི་རིགས་ཀྱིས་བུང་བསྐྱེད་འབྲས་རྩམ་མམ་ཕྱེ་ཞི་བ། རུ་རྟ་དང་རྟ་མོན་བའི་ཕྱེ་མ་སོགས་ཅུང་མང་བ་བཏང་ཆོག །སྤང་སྤོས་ཀྱིས་མཚོན་པའི་སྔོ་སྨན་རིགས་རྣམས་ནི་མང་མི་རུང་ངོ་། །གཞན་ཡང་འོག་ནས་འབྱུང་བའི་དགོས་ཆ་ཐམས་ཅད་ཚོགས་པར་བྱ། དུས་ཀྱང་དཔྱིད་ཀ་དང་སྟོན་ཀར་བསིལ་དྲོད་སྙོམས་པ་རུལ་འཁྱག་གི་སྐྱོན་མི་འབྱུང་བའི་ཕྱིར་ལེགས་ཤིང་ཡང་ངོའི་ཚེས་བརྒྱད་ལ་ཁྱད་པར་གྱི་དུས་སུ་བཤད་པས་དབུ་འཛུགས་སམ་དངོས་གཞི་ཁེལ་ན་ཤིན་ཏུ་ལེགས་སོ། །གཉིས་པ་དངོས་གཞི་ལ་གཉིས། སྔོན་དུ་འགྲོ་བའི་ལས་རིམ། དངོས་གཞི་ཇི་ལྟར་བྱ་བའོ། །དང་པོ་ལ་གཉིས། སྤྱི་དང་ཁྱད་པར་རོ། །དང་པོ་ནི། སྤྱིར་སྒྲུབ་པ་ལ་འཇུག་པ་རྣམས་ཀྱིས་ཚོགས་བསགས་ཤིང་བར་ཆད་བསལ་བའི་དོན་དུ་བྱ་དགོས་པ་བླ་མ་དགོང་པ་འདུས་ལག་ཁྲིད་ལས། གེགས་སེལ་ཉེས་སྦྱོང་ཁྲུས་ཀྱི་ཆོ་ག་སོགས་རྣམ་གྲངས་དགུར་གསུངས་པ་ལྟར་གལ་ཆེ་བས། ཐོག་མར་སྒྲུབ་པ་ལ་འཇུག་ཁར་སྒྲུབ་མཆེད་དུ་ཡོད་སོ་སོ་ནས་སཱཙྪ་ནང་གཞུག་ལྡན་པ་ཅི་འགྲུབ་བཏག །ཞི་ཁྲོ་ལྟ་བུའི་བཤགས་སྐོང་རྒྱས་པ་བཏང་། གླིང་
བཞི་སྤྱི་མདོས་རྒྱས་བསྡུས་གང་རུང་། བརྒྱ་བཞི། རྒྱལ་པོ་གསོལ་མགྱོགས། མ་མོ་འཁྲུགས་སྐོང་ཚར་གྲངས། །ལྷ་བསང་རྒྱགས་བརྔན་དང་བཅས་པ། ཞི་བ། སྣང་བརྒྱད། བསག་སྡེ་བརྒྱད་ཆ་སྙོམས་སོགས་གསེར་སྐྱེམས། །དམ་སྲི་གླུད་མདོས་སོགས་བླུད་བསྔོ་གྲངས་ལྡན་བྱ། ཕུར་པའི་ཟློག་པ་ཞག་གསུམ་མམ་ཉིན་རྫོགས་ལྟ་བུའི་ཞར་བྱུང་དམ་སྲིའི་མནན་ལིང་འོག་ནས་འབྱུང་བ་ལྟར་བྲིས་པ་ལའང་འགུགས་བསྟིམས་ནན་ཏན་དུ་བསྒྲུབས་ལ་མནན་ཆས་བྱའོ། །གཉིས་པ་ཁྱད་པར་སྔོན་འགྲོ་དངོས་ལ་ལྔ། སའི་ཆོ་ག །མཚམས་གཅོད་པ། རྟེན་གྱི་དཀྱིལ་འཁོར་བཅའ་བ། སྒྲུབ་བོ་རྣམས་ཕྲིན་ལས་ལ་འཇུག་རུང་བྱ་བ། སྣོད་བཅུད་བྱིན་གྱིས་བརླབ་པའོ། །དང་པོ་ནི། གཏེར་གཞུང་སྒྲུབ་ཁོག་ལས་ཐོག་མར་སློབ་དཔོན་ལ་གསོལ་གདབ་གནང་སྦྱིན་འབྱུང་བ་སོགས་ནི་དབང་སྒྲུབ་ལ་དགོངས་པས་འདིར་དོན་གྱིས་སོང་ཟིན་པས་མི་དགོས་པས་ས་སློང་བ་ནི། དཀྱིལ་འཁོར་གང་དུ་བཞེངས་པའི་གནས་ཁང་གཙང་མར་བྱས་ལ་སྐུ་གསུང་ཐུགས་རྟེན་དང་རྒྱན་གྱི་ཁྱད་པར་རྣམས་ཀྱིས་མཛེས་པར་བརྒྱན། སྟེགས་བང་རིམ་གཉིས་པ་ཁེབས་ལྡན་གྱི་དང་པོར་བདག་བསྐྱེད་མཆོད་པ་བླ་གཏོར་དམར་པོ་ཉི་ཟླ་སོགས་ཀྱིས་བརྒྱན་པའི་གཡས་སུ་སྨན་དང་གཡོན་དུ་རཀྟའི་ཐོད་པ། གཉིས་པར་གཡོན་ནས་བརྩམས་ཏེ་ཆུ་གཉིས་ཉེར་སྤྱོད་ལྔ་བྲེང་ཚར་དུ་བཀོད། དེའི་མདུན་ཕྱོགས་དཀྱིལ་འཁོར་གང་ལ་བྱ་བའི་དབུས་སུ་མེ་ཏོག་གམ་འབྲུའི་ཚོམ་བུ་གཅིག་བཀོད་པའི་མདུན་ཏུས་ལྷའི་དཀར་ཟླུམ་བཤམ། མཐའ་སྐོར་དུ་བྱང་ཤར་མཚམས་འཛིན་མེ་
ཏོག་ནས་བརྩམས་ཆུ་གཉིས་ཉེར་སྤྱོད་ལྔ་གཡས་སྐོར་དུ་བཀོད། ཁྲུས་བུམ་ཉེར་ལྔའི་བཅུད་ལྡན་ཁ་རྒྱན་དང་མགུལ་ཆིངས་ལྗང་གུ་ཅན་མེ་ལོང་བཅས་པའང་ཅི་བདེར་བཞག །གཞན་ཡང་གཏོར་མ་ཆ་གསུམ་དང་བསང་ཆུ་སོགས་ཉེར་མཁོའི་ཡོ་བྱད་རྣམས་འཚོགས་པར་བྱའོ། །དེ་ནས་སྒྲུབ་པ་པོ་རྣམས་གྲལ་ཕྱག་དང་ཚུལ་ཕྱག་བཅས་གྲལ་ལ་འཁོད་དེ། ཐོག་མར་ཚིག་བདུན་གསོལ་འདེབས་དང་རང་གཞུང་བརྒྱུད་འདེབས་བཏང་། ལས་བྱང་གྲུབ་གཉིས་འདོད་འཇོའི་སྐྱབས་སེམས་ནས་བསྟོད་པའི་བར་བཏང་ལ་བཟླས་པ་ཅི་འགྲུབ་མཐར་སྟོང་ཚིགས་ཕུལ། སྣོད་བཅུད་སྐྱེ་འགྲོ་སོགས་འོད་གསལ་དུ་བསྡུ་ཞིང་སླར་གཉུག་མའི་ལྷར་ལྡང་། དེ་ནས་ཆ་གསུམ་གཏོར་མ་གསང་བ་སྤྱི་ལྟར་བཏང་། ས་ལྷའི་མཆོད་གཏོར་རྣམས་སྔགས་དྲུག་ཕྱག་དྲུག་གིས་བྱིན་གྱིས་བརླབས་པར་གསུངས་པ་ལྟར་སྤྲོ་ན་སྤྱི་ལྟར་བྱ། དཀྱུས་ཙམ་དུ། བཛྲ་ཨ་མྲྀ་ཏ་སོགས་ཀྱིས་བསང་། རྃ་ཡྃ་ཁྃ་གིས་སྦྱང་། ཐམས་ཅད་སྟོང་ཉིད་ནམ་མཁའི་ངང་༔ བྷྲཱུྃ་ལས་རིན་ཆེན་སྣོད་ནང་དུ༔ ཨོཾ་ལས་ཕྱི་ནང་མཆོད་པའི་ཚོགས༔ སོ་སོའི་ལྷ་མོའི་རོལ་པར་བཅས༔ རབ་འབྱམས་ནམ་མཁའ་གང་བར་གྱུར༔ ཨོཾ་བཛྲ་པུཥྤེ་དྷཱུ་པེ་ཨཱ་ལོ་ཀེ་བྷནྡྷེ་ནཻ་ཝི་དྱཱ་ཤབྡ་པཱུ་ཛ་ས་མ་ཡ་ཧཱུྃ༔ ཞེས་དང་། གཏོར་གཞོང་རཏྣའི་གཞལ་ཡས་སུ༔ གཏོར་མ་འདོད་ཡོན་ཕུང་པོར་སྤུངས་༔ ཨོཾ་ཨཱཿཧཱུྃ༔ ལན་གསུམ་རྒྱ་དང་བཅས་པས་བརླབ། དེ་ནས་ཐམས་ཅད་ཀྱིས་རྡོ་རྗེ་དང་བཅས་ལག་གཡས་ས་ལ་རྡེག་པའི་ཚུལ་བྱ་ཞིང་། ཧཱུྃ་ཧཱུྃ་
ཧྲཱིཿཧྲཱིཿ ས་དེ་བརྡོལ་བ་ལས་སའི་ལྷ་མོ་བརྟན་མ་སྐུ་མདོག་སེར་མོ་ཕྱག་གཡས་བུམ་པ་བསྣམས་ཤིང་གཡོན་དཔང་པོར་ཁས་འཆེ་བའི་ཕྱག་རྒྱ་ཅན། ལྟེ་བ་ཡན་ཆད་ས་སྟེང་དུ་ཐོན་པ་དམ་ཡེ་དབྱེར་མེད་དུ་སྣང་བས་བདག་གི་ཚོགས་ཀྱིས་བསྐོར་བ་སྤྱན་དྲངས། ཧཱུྃ། ཇི་ལྟར་སྔོན་གྱི་དཔང་མཛད་ལྟར༔ སེམས་ཅན་ཀུན་གྱི་དོན་བྱེད་ཕྱིར༔ བདག་གིས་བྱང་ཆུབ་དེས་བསྒྲུབ་པས༔ མཆོད་འབུལ་དཔང་མཛོད་ས་འདི་ཞུ༔ བཅུ་གཉིས་ལོ་ཡི་རྟ་ལ་ཞོན༔ ཀོ་ལོང་ཆེ་བའི་ལྷ་དགུ་སོགས༔ འབྱུང་པོའི་ཚོགས་རྣམས་མ་ལུས་པ༔ ས་གླུད་མཆོད་སྦྱིན་འདི་བཞེས་ལ༔ ས་ཕྱོགས་འདི་དག་བདག་ལ་སྩོལ༔ གནས་རྟེན་གཞན་དུ་ཁྱེད་སྤོས་ལ༔ ས་འདིར་བཀྲ་ཤིས་མཛད་དུ་གསོལ༔ སརྦ་བྷཱུ་ཏ་པཱུ་ཙ་གྲྀཧྞ་ཁཱ་ཧི༔ ལན་གསུམ། ཤཱིནྟིང་ཀུ་རུ་ཡེ་སྭཱ་ཧཱ༔ བདེན་པ་བརྡར་ཏེ༔ སྔོན་བཅོམ་ལྡན་འདས་ཤཱཀྱ་ཐུབ་པས་བདུད་བཏུལ་ནས་སངས་རྒྱས་ཏེ༔ ཆོས་ཀྱི་འཁོར་ལོ་རིམ་པ་གསུམ་བསྐོར་བ་ཡང་ས་གཞི་རིན་པོ་ཆེའི་སྟེང་དུ་མཛད་ཅིང་ལྷ་མོ་ཁྱོད་ཀྱིས་སྦྱིན་པར་བྱས་པ་ཡིན་པས༔ དེ་རྗེས་བདག་རྡོ་རྗེ་འཛིན་པས་ཚོགས་གཉིས་རྫོགས་ཤིང་སྒྲིབ་གཉིས་སྦྱང་བ་དང་སློབ་མ་བྱང་ཆུབ་ཀྱི་ལམ་ལ་འཇུག་པའི་ཕྱིར༔ རྩ་གསུམ་ཐུགས་ཀྱི་ནོར་བུའི་དཀྱིལ་འཁོར་འདེབས་པར་འཚལ་བས༔ སའི་བདག་པོ་འཁོར་དང་
བཅས་པ་ཁྱེད་རྣམས་ཀྱིས་ས་གླུད་མཆོད་སྦྱིན་འདིས་ཚིམ་པར་མཛད་ནས༔ གནས་འདིར་བཀྲ་ཤིས་བྱིན་བཙན་པར་མཛོད་ཅིག༔ ལྷ་མོས་གནང་བ་བྱིན་ནས་ས་དེ་ཉིད་དུ་ཐིམ་པར་གྱུར། ཅེས་མོས་ལ་མཆོད་གཏོར་སྒོར་ཕུལ། མཆོད་པ་རྣམས་བསལ། གཞུང་གི་དགོངས་པ་གཏེར་བུམ་འཇོག་པའང་མ་ཆད་པ་བྱེད་པའི་ཕྱག་སྲོལ་ཡོད་པས་བུམ་གཏེར་ཚད་ལྡན་སློབ་དཔོན་གྱིས་ཐོགས་ལ། ཏྲཱྃ་ལས་རིན་པོ་ཆེའི་མཆོད་སྡོང་དགོས་འདོད་ཐམས་ཅད་འབྱུང་བར་བསམས་ལ། ཨོཾ་ཨཱཿཧཱུྃ༔ ལན་བདུན་གྱིས་བརླབ། ས་ཡི་ལྷ་མོ་འཁོར་དང་བཅས༔ སྔོན་གྱི་རྒྱལ་བ་རྣམས་ཀྱིས་བསྔགས༔ བྱང་ཆུབ་སེམས་ཀྱི་གཏེར་བུམ་འདི༔ དཀྱིལ་འཁོར་བྲི་ཕྱིར་གཏེར་དུ་འབུལ༔ ཞེས་བརྗོད་ལ་སྟེགས་བུའི་དབུས་སུ་གཞུག་ཅིང་ཡེ་དྷར་བརྗོད་ལ་འབྲུ་འཐོར། ཤིས་པ་བརྗོད། གཞུང་འདི་ཤིན་ཏུ་བསྡུས་པའི་དབང་གིས་ས་སྦྱོང་བ། བཟུང་བ། སྲུང་བ་རྣམས་མ་བཤད་ཅིང་སྒྲུབ་གནས་རྙིང་པ་སོགས་དགོས་པའང་མིན་པས་གཞན་ནས་ཁ་འགེངས་མི་དགོས་ལ། སྨིན་དབང་གཙོ་བོར་བཏོན་ན་སྐབས་འདིར་ལྷ་དང་བུམ་པ་སློབ་མ་སྟ་གོན་རྣམས་བྱ་དགོས་ཀྱང་ཚོགས་སྒྲུབ་ཁ་རྐྱང་ལ་དེ་དག་མི་དགོས་པས་བཀའ་བརྒྱད་སོགས་ཡོངས་གྲགས་ཕྱག་ལེན་གཞན་ལས་ཀྱང་མི་འབྱུང་བ་དང་། ལྷ་སྟ་གོན་ཙམ་བྱས་ན་དཀྱིལ་འཁོར་བྲི་བར་གནང་བ་ཞུ་བའི་ཆེད་ཡིན་པས་མི་འོས་པ་མེད་ཀྱང་གསང་བ་སྤྱིའི་འགྲོས་ལྟར་འོག་ནས་འཆད་པར་འགྱུར་རོ༔ གཞུང་འཚོགས་ཐོ་འཛུགས་བྱོན་སྐབས་རྡོར་སློབ་གཞན་ཞིག་ནས་རྣམ་འཇོམས་དང་སྨེ་བརྩེགས་ཁྲུས་བདུན་རིག་པ་བཅས་
བཟླས་ནས་ཁྲུས་བུམ་བསྒྲུབ། ཕྱི་བཤགས་ཀྱིས་བཅད། སྒྲུབ་ཁང་ཤར་དུ་ཤེར་ཕྱིན་དང་ཕལ་པོ་ཆེའམ་མི་ནུས་ན་བཟང་སྤྱོད། ལྷོར་མཚན་བརྗོད་སྟོབས་པོ་ཆེ། ནུབ་ཏུ་ལང་ཀ་གཤེགས་དང་བཀྲ་ཤིས་བརྩེགས་པ། བྱང་དུ་གྲྭ་ཏོག་དང་ཡུམ་ཆེན་མོའི་མཚན་བརྒྱ་རྣམས་བཀླག་གོ། །གཉིས་པ་མཚམས་བཅད་པ་ལ་གསུམ། དང་པོ་ཕྱི་མཚམས་ནི། དཀྱིལ་འཁོར་གྱི་ཁང་པའི་ཕྱི་རོལ་གྱི་ཕྱོགས་བཞིར་ཐོ་བཞི་ལ་རྒྱལ་ཆེན་སོ་སོའི་སྐུའམ་སྔགས་བྱང་རྒྱལ་མཚན་ནམ་བ་དན་ཕྱོགས་མདོག་བཙུགས་པ་དང་། །སཙྪ་དཀར་སྔོ། དམར་སེར་བཞིའང་བཞག །སོ་སོའི་མདུན་དུ་སྟེགས་གཙང་མར་མཎྜལ་པདྨ་འདབ་བཞིའི་སྟེང་གཏོར་མ་དཀར་ཟླུམ་མདུན་དུ་ཐེབས་ཀྱུ་རིལ་བུས་མཚན་པ་རེ་དང་། དེའི་མདུན་ཏུ་གཡོན་ཕྱོགས་ནས་བརྩམས་པའི་ཆུ་གཉིས་ཉེར་སྤྱོད་ལྔ་བཅས་བཤམས། སྒྲུབ་པ་པོ་རྣམས་རོལ་ཆས་སོགས་སེར་སྦྲེང་གི་ཚུལ་གྱིས་སྒྲུབ་ཁང་ནས་དོན་ཏེ་ཤར་གྱི་ཐོ་མདུན་དུ་འཁོད་ལ། བསང་སྦྱངས་ནས་མཆོད་གཏོར་བྱིན་རླབས་ས་སློང་སྐབས་ལྟར་བྱ། ཐོ་སྐུ་རྟེན་དང་བཅས་པ། ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་དྷྲྀ་ཡིག་ཡོངས་སུ་གྱུར་པ་ལས་རྒྱལ་ཆེན་ཡུལ་འཁོར་སྲུང་དཀར་པོ་པི་ཝཾ་འཛིན་ཅིང་དྲི་ཟའི་ཚོགས་ཀྱིས་བསྐོར་བའི་གནས་གསུམ་འབྲུ་གསུམ་དང་། རང་གི་ཐུགས་ཀ་ནས་འོད་ཟེར་འཕྲོས་པས་རི་རབ་ཀྱི་ཤར་ཕྱོགས་ནས་རྒྱལ་པོ་ཆེན་པོ་ཡུལ་འཁོར་སྲུང་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿ ས་རྟེན་ལ་བསྟིམ། ཨོཾ་དྷྲྀཥྚཱ་རཥྚཱ་ཡ་སྭཱ་ཧཱ༔ ལན་བདུན།
ཨོཾ་བཛྲ་ཨརྒྷཾ་སོགས་ཀྱིས་མཆོད། སྔགས་སྔ་མའི་མཐར། བ་ལི༚་ཏ་ནཱ་ནཱ་བ་དནྟུ་གྲྀཧྞ་ཧཱུྃ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་གཏོར་མ་ཕུལ་ལ། ཧཱུྃ། ཤར་ཕྱོགས་རྒྱལ་པོ་ཡུལ་འཁོར་སྲུང་༔ ཞི་མཛད་དཀར་གསལ་པི་ཝཾ་བསྣམས༔ མཆོད་སྦྱིན་གཏོར་མ་འདི་བཞེས་ལ༔ དྲི་ཟའི་གདོན་ཚོགས་མ་ལུས་སྲུངས༔ ཨོཾ་དྷྲྀཥྚཱ་རཱཥྚཱ་ཡ་སྭཱ་ཧཱཿ ཞེས་ཕྲིན་ལས་བཅོལ། མེ་ཏོག་འཐོར་ལ། སུ་པྲ་ཏིཥྛས་བརྟན་བཞུགས་བྱའོ། །དེ་ནས་ལྷོར་ཕྱིན་ལ་མཆོད་གཏོར་བྱིན་བརླབ། བསང་སྦྱང་། སྟོང་པའི་ངང་ལས་བཻ་ཡིག་ཡོང་སུ་གྱུར་པ་ལས་རྒྱལ་ཆེན་འཕགས་སྐྱེས་པོ་སྔོན་པོ་རལ་གྲི་འཛིན་ཅིང་གཤིན་རྗེའི་ཚོགས་ཀྱིས་བསྐོར་བའི་གནས་གསུམ་འབྲུ་གསུམ་དང་། རང་གི་ཐུགས་ཀ་ནས་འོད་ཟེར་འཕྲོས་པས་རི་རབ་ཀྱི་ལྷོ་ཕྱོགས་ནས་རྒྱལ་པོ་ཆེན་པོ་འཕགས་སྐྱེས་པོ་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿ ས་རྟེན་ལ་བསྟིམ། ཨོཾ་བཻ་རུ་དྷ་ཀཱ་ཡ་སྭཱ་ཧཱ། ལན་བདུན། ཨོཾ་བཛྲ་ཨརྒྷཾ་སོགས། རང་སྔགས་དང་གཏོར་སྔགས་སྦྱར་བ་ལན་གསུམ་དང་། ཧཱུྃ། ལྷོ་ཕྱོགས་རྒྱལ་པོ་འཕགས་སྐྱེས་པོཿ མངོན་སྤྱོད་མདོག་སྔོན་རལ་གྲི་བསྣམས༔ མཆོད་སྦྱིན་གཏོར་མ་འདི་བཞེས་ལ། གཤིན་རྗེའི་གདོན་ཚོགས་མ་ལུས་སྲུངསཿ ཨོཾ་བྷེ་རུ་དྷ་ཀཱ་ཡ་སྭཱ་ཧཱ༔ སྔར་ལྟར་བརྟན་བཞུགས་བྱ། ནུབ་ཏུ་ཕྱིན་ལ་མཆོད་གཏོར་བྱིན་བརླབ། བསང་སྦྱང་། སྟོང་པའི་ངང་
ལས་བི་ཡིག་ཡོངས་སུ་གྱུར་པ་ལས་རྒྱལ་ཆེན་སྤྱན་མི་བཟང་དམར་པོ་པུ་རི་དང་སྤྲུལ་ཞགས་བསྣམས་ཤིང་ཀླུའི་ཆོགས་ཀྱིས་བསྐོར་བའི་གནས་གསུམ་འབྲུ་གསུམ་དང་། །རང་གི་ཐུགས་ཀ་ནས་འོད་ཟེར་འཕྲོས་པས་རི་རབ་ཀྱི་ནུབ་ཕྱོགས་ནས་རྒྱལ་པོ་ཆེན་པོ་སྤྱན་མི་བཟང་འཁོར་དང་བཅས་པ་བཛྲ་ས་མཱ་ཛཿ ཛཿཧཱུྃ་བྃ་ཧོཿ ཨོཾ་བི་རཱི་པཀྵཱ་ཡ་སྭཱ་ཧཱ༔ ལན་བདུན། རང་སྔགས་མཐར་གཏོར་སྔགས་སྦྱར་བ་ལན་གསུམ། ཧཱུྃ༔ ནུབ་ཕྱོགས་རྒྱལ་པོ་སྤྱན་མི་བཟང་༔ དབང་ཆེན་མདོག་དམར་སྦྲུལ་ཞགས་འཛིན༔ མཆོད་སྦྱིན་གཏོར་མ་འདི་བཞེས་ལ༔ ཀླུ་ཡི་གདོན་ཚོགས་མ་ལུས་སྲུངས༔ ཨོཾ་བི་རཱུ་པཱཀྵཱ་ཡ་སྭཱ་ཧཱ༔ བརྟན་བཞུགས་བྱ། བྱང་དུ་ཕྱིན་ལ། མཆོད་གཏོར་བྱིན་བརླབ། བསངས་སྦྱང་། སྟོང་པའི་ངང་ལས་ཀུ་ཡིག་ཡོངས་སུ་གྱུར་པ་ལས་རྒྱལ་ཆེན་རྣམ་ཐོས་སྲས་ལྗང་ནག་རྒྱལ་མཚན་དང་ནེའུ་ལེ་འཛིན་ཅིང་གནོད་སྦྱིན་གྱི་ཚོགས་ཀྱིས་བསྐོར་བའི་གནས་གསུམ་འབྲུ་གསུམ་དང་། རང་གི་ཐུགས་ཀ་ནས་འོད་ཟེར་འཕྲོས་པས་རི་རབ་ཀྱི་བྱང་ཕྱོགས་ནས་རྒྱལ་པོ་ཆེན་པོ་རྣམ་ཐོས་སྲས་འཁོར་དང་བཅས་པ་བཛྲ་ས་མཱ་ཛཿ ཛ་ཧཱུྃ་བྃ་ཧོ༔ ཨོཾ་བཻ་ཤྲ་མ་ཱ་ཡ་སྭཱ་ཧཱ༔ ལན་བདུན། རང་སྔགས་མཐར་གཏོར་སྔགས་སྦྱར་བ་ལན་གསུམ། ཧཱུྃ༔ བྱང་ཕྱོགས་རྒྱལ་པོ་རྣམ་ཐོས་སྲས༔ཡོན་ཏན་མདོག་ལྗང་རྒྱལ་མཚན་
འཛིན༔ མཆོད་སྦྱིན་གཏོར་མ་འདི་བཞེས་ལ༔ གནོད་སྦྱིན་གདོན་ཚོགས་སྲུང་མཚམས་མཛོད༔ ཨོཾ་བྷཻ་ཤྲ་མ་་ཡ་སྭཱ་ཧཱ༔ ཧཱུྃ༔ རྒྱལ་བའི་བཀའ་ཉན་བསྟན་པ་སྲུང་བའི་བདག༔ ཕྱོགས་སྐྱོང་རྒྱལ་པོ་ཆེན་པོ་སྡེ་བཞི་པོ༔ མཆོད་སྦྱིན་གཙང་སྦྱར་གཏོར་མ་འདི་བཞེས་ལ༔ མ་དག་བགེགས་ཀྱི་ཚོགས་རྣམས་མཚམས་ཆོད་ཅིག༔ ཅེས་ཐུན་མོང་དུ་ཕྲིན་ལས་བཅོལ། ཁོར་ཡུག་ཐམས་ཅད་དུ་རྒྱལ་ཐབས་བཞིས་རྡོ་རྗེའི་གུར་ཕུབ་པར་བསམས་ལ། བརྟན་བཞུགས་དང་ཤིས་བརྗོད་ཤློ་ཀ་གསུམ་ཙམ་བྱའོ། །གཉིས་པ་བར་མཚམས་ལ་གཉིས་ཡོད་པའི་ད་ལོ་དམ་སྲི་མནན་པ་ནི། གསེར་སྐྱེ་མས་ཆས། མནན་ལིང་། ལྕགས་ཟངས་རྡོ་ཕྱེ་ཡུངས་ཀར་སོགས་ཀྱི་ཐུན་རྫས། གུ་གུལ། དུར་རྡོ་རི་གླིང་དང་རྒྱབ་ཏུ་རྡོ་རྗེ་རྒྱ་གྲམ་བྲིས་པ། ་ས་ཆུ་མེ་རླུང་། སཱཙྪ་ནག་པོ་སོགས་ཉེར་མཁོའི་ཡོ་བྱད་འདུ་བྱ། སྒོའི་ཕྱི་རོལ་དུ་དོང་གྲུ་གསུམ་བྲུས་པར། དུག་ཤོག་ལ་དམ་སྲིའི་ལིངྒ་བྱ་མཆུ་ཅན་ཡན་ལག་ལྕགས་སྒྲོག་གིས་བསྡམས་པའི་སྙིང་གར་ཛ་ཏྲི་།།།ཁ་སྤྲོད་ཀྱི་མཐར་མགྲིན་པ་ནས་བརྩམས་ཏེ་མགོ་བོ་ཕྱིར་བསྟན་པས། ཡ་མ་དམ་སྲི་གཾ་པ་རི་མཱ་ར་ཡ་ཛཿཛཿཛནན༔ ཏྲིའུ་ཏྲིའུ་མཱ་ར་ཡ་ན་མ་ཤོ་ཛཿ ཁུག་ནན༔ ཞེས་དང་། གཟུགས་ཀྱི་མཐར་ཡིག་མགོ་ནང་དུ་བསྟན་ལ། དུས་དྲུག་དང་བཅུར་རྒྱུ་བའི་ཉུལ་ལེ་དམ་སྲི་རྒྱལ་འགོད་འབྱུང་པོའི་ཚེགས་དང་བཅས་པའི་ལུས་ངག་ཡིད་གསུམ་མཐུ་སྟོབས་རྫུ་འཕྲུལ་ནུས་སྟོབས་ཐམས་ཅད་ནོན་ཅིག༔ བསྐལ་པ་མ་སྟོང་གི་བར་དུ་མ་ལྡངས་ཤིག༔ ཨོཾ་ལྃ་ཧཱུྃ་ལཾ་སྟཾྭ་བྷ་ཡ་ནན༔
ཞེས་པ་རྣམས་ཀྱི་མཐར་ཛ་ཁྲོམ་གྱིས་བསྐོར་ལ་གན་རྐྱལ་དུ་བཞག་པའམ༔ ཡང་ན་སྔར་ནས་བསྒྲུབས་ཟིན་པའི་མནན་ཐོད་དེར་བཀོད་ལ། ཐོག་མར་འབྲུ་སྣ་བཏབ་པའི་གསེར་སྐྱེམས་རྡོར་སློབ་ཀྱིས་ཐོགས་ལ། རྃ་ཡྃ་ཁྃ། གཅིག །ཨོཾ་ཨཱཿཧཱུྃ་ཧ་ཧོཿཧྲཱིཿ ལན་གསུམ། འདོད་ཡོན་ཟག་པ་མེད་པའི་བདུད་རྩིའི་རྒྱ་མཚོར་གྱུར༔ ཧཱུྃ༔ རྩ་བརྒྱུད་བླ་མ་ཡི་དམ་ཞི་ཁྲོའི་ལྷ༔ ཁྱད་པར་དཔལ་ཆེན་དབང་དྲག་ཧེ་རུ་ཀ༔ བཀའ་སྡོད་སྲུང་མ་དམ་ཅན་རྒྱ་མཚོའི་ཚོགས༔ གསེར་སྐྱེམས་འདི་བཞེས་སྔགས་འཆང་མཐུ་དཔུང་སྐྱེད༔ གཙང་རིགས་དཔལ་མགོན་སྣང་སྲིད་ལྷ་འདྲེའི་ཚོགས༔ ཁྱད་པར་ས་ཕྱོགས་འདིར་གནས་ལྷ་ཀླུ་སོགས༔ གཉུག་མར་གནས་དང་གློ་བུར་ལྷགས་པ་ཀུན༔ གསེར་སྐྱེམས་འདི་བཞེས་སྔགས་འཆང་སྟོངས་གྲོགས་མཛོད༔ ས་བདག་རྗེ་བློན་འབངས་འཁོར་བཅས་པ་དང་། ལོ་ཟླ་ཞག་དུས་གནས་འགྱུ་ལེགས་ཉེས་སྟོན༔ ཀོ་ལོང་སྡོམ་པའི་རིགས་ཀུན་གསེར་སྐྱེམས་བཞེས༔ རུ་ང་ཀུན་སྤོངས་མཐུན་པའི་སྟོང་གྲོགས་མཛོད༔ ཅེས་པའི་ཚིག་མཚམས་གསུམ་པོར་གསེར་སྐྱེམས་འབུལ། ཨོཾ་པདྨཱནྟ་ཀྲྀ་ཏ་མ་ཧཱ་ཀྲོ་དྷ་ཧ་ཡ་གྲཱྀ་བ་ཧུ་ལུ་ཧུ་ལུ་ཧཱུྃ་ཕཊ༔ རང་ཉིད་དབང་ཆེན་རྟ་མགྲིན་གཟི་བརྗིད་དུས་མཐའི་མེ་ལྟར་འབར་བའི་སྐུར་གྱུར། ཨེ་ཡཾ་ཛྲ་ལ་རཾ། བྲུབ་ཁུང་ཡངས་ཤིང་གཏིང་ཟབ་པའི་ནང་དུ་ཧྲི་ལས་དམ་
སྲི་ཕོ་མོ་རིད་ཅིང་ཉམ་ཐག་པའི་ལུས་ཅན་ཏུ་གྱུར། འགུགས་པའི་རྒྱ་བཅས། ན་མོ། བླ་མ་སངས་རྒྱས་ཆོས་དང་དགེ་འདུན་ཏེ་དཀོན་མཆོག་རིན་པོ་ཆེ་རྣམ་པ་གསུམ། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱི་ལྷ་ཚོགས། བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ། ཁྱད་པར་དུ་ཡང་དཔལ་ཆེན་དབང་དྲག་འབར་བའི་ལྷ་ཚོགས་འཁོར་དང་བཅས་པ་རྣམས་ཀྱི་བཀའ་བདེན་པ་དང་༔ རྣལ་འབྱོར་པ་བདག་གི་ལྷག་བསམ་རྣམ་པར་དག་ཅིང་རྒྱུ་འབྲས་མི་འཆོལ་མི་བསླུ་བའི་བདེན་པ་དང་། ཏིང་ངེ་འཛིན་སྔགས་རྒོད་རྫས་དང་སྦྱོར་བའི་འཁྲུལ་འཁོར་གྱི་ནུས་པས། བསྒྲུབ་པ་ལ་བར་དུ་གཅོད་པའི་དམ་སྲི་སྒབ་འདྲེ་རྒྱབ་རྟེན་དང་བཅས་པ་རང་དབང་མེད་པར་གླ་བ་ཁྱིས་དེད་པའམ༔ སྦུར་མ་རླུང་གིས་ཁྱེར་བ་ལྟར་གཟུགས་དང་ལིངྒ་འདི་ཉིད་ལ་ཁུག་ཅིག༔ ཨ་མུ་ཀ་སརྦ་ནྀྲ་ཏྲི་ཨངྐུ་ཤ་ཡ་ཛཿཛཿ ལན་གསུམ། ཕོ་ཉ་འགྱེད་པ་ནི། ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ མཐུ་རྩལ་འབྱིན་པའི་དུས་ལ་བབ༔ དགྲ་བགེགས་བསྒྲལ་བའི་དུས་ལ་བབ༔ སྡང་བའི་དགྲ་དང་གནོད་པའི་བགེགས༔ གང་ལ་བྱ་བ་ཁྱོད་ཀྱིས་ཤེས༔ བླ་སྲོག་རྣམ་པར་ཤེས་པ་ཀུན༔ མ་ཤོར་མ་བཏང་ཁུག་ལ་སོད༔ བཏབ་པའི་དུས་ལ་མ་འདའ་བར༔ ཞིང་བཅུ་ཚང་བའི་དགྲ་དང་བགེགས༔ ༔
ཐམས་ཅད་མ་ལུས་མྱུར་དུ་ཁུག༔ ལྕགས་ཀྱུ་ཅན་གྱིས་སྙིང་ནས་ཁུག༔ ཞགས་པ་ཅན་གྱིས་ཡན་ལག་ཆིངས༔ ལྕགས་སྒྲོག་ཅན་གྱིས་དྲ་བར་ཆུག༔ དྲིལ་བུ་ཅན་གྱིས་སྨྱོ་རུ་ཆུག༔ ལས་ཀྱི་རླུང་གིས་རྒྱབ་ནས་ཕུལ༔ བསྐལ་པའི་མུན་པས་མདུན་ནས་བསུས༔ སྐད་ཅིག་ཐང་ཅིག་ཡུད་ཙམ་ལ༔ རང་དབང་མེད་པར་ཁུག་ལ་ཤོག༔ ཏྲི་ཡཾ་ཛཿཏྲི་བཛྲ་ཨང་ཀུ་ཤ་ཛཿ ཛཿཧཱུྃ་བྃ་ཧོཿ འབེབས་ཆེན་རིང་བའི་འོག་དྲག་སྔགས་སོ་ལྔ་བཟླ་ཞིང་ཕུར་སྐོར་ཚམ་རྔམས་བྱ། འོག་གི་འདོན་ཚིག་དང་བསྒྲིགས་ཏེ་ཕུར་པ་འདེབས་ཚུལ་བྱ། ཐུན་རྫས་བྲབ། གུ་གུལ་གྱི་དུད་པས་བདུག །རྡོ་ལེབ་ཀྱིས་མནན་ལ། ཧཱུྃ༔ དམ་སྲི་བྱ་བའི་སྡིག་ཅན་ཁྱོད༔ བླ་མ་ལ་བསྔོས་དཀོན་མཆོག་དམོད༔ བསྟན་པ་བཤིག་ཅིང་ཡོངས་ལ་འཚོ༔ བཀའ་ལས་འདའ་བྱེད་དམ་སྲི་ཁྱོད༔ མཚོན་ཆ་འབར་བས་དུམ་བུར་གཏུབས༔ ལས་ཀྱི་གཤིན་རྗེའི་ལྟོ་བར་བཅུག༔ གླིང་བཞི་རི་རབ་འོག་ཏུ་མནན༔ བྱང་ཆུབ་བར་དུ་མ་ལྡང་ཞིག༔ དམ་སྲི་མཱ་ར་ཡ་ན་ན༔ སཱཙྪས་མནན། ས་སོགས་འབྱུང་བ་རིམ་པ་དགུས་གཡོགས་ལ་རྒྱས་གདབ་པ་ནི། ཧཱུྃ༔ ཆོས་སྐུ་ཉག་གཅིག་ཐབས་ཤེས་སྐུ་གསུང་། ཐུགས༔ ཚད་མེད་བཞི་དང་ཡེ་ཤེས་རྣམ་པ་ལྔ༔ ཕྱིན་དྲུག་ཡན་ལག་བདུན་དང་རྣམ་ཐར་བརྒྱད༔ ཐེག་པ་རིམ་དགུ་ས་བཅུའི་དབང་ཕྱུག་རྒྱལ༔ དོན་རྟགས་གཉིས་མེད་ཆེན་པོའི་
རྒྱས་གདབ་བོ༔ ཨོཾ་ཨཱཿཧཱུྃ་ལཾ་སྟཾྭ་བྷ་ཡ་ནན༔ འབྱུང་བཞི་རི་རབ་དང་བཅས་པའི་སྟེང་དུ་ཁྲོ་རྒྱལ་འཁོར་བཅས་བཞུགས་པར་བསམས་ལ། མཆེད་ལྕམ་རྣམས་སྲིན་ལག་ལུ་གུ་རྒྱུད་དུ་སྦྲེལ་ཏེ་རྟ་བྲོ་བརྡུང་བ་ནི། ཧཱུྃ༔ བདག་ཉིད་རྟ་ཡི་བརྟུལ་ཞུགས་ཀྱིས༔ ཐབས་ཤེས་གཉིས་མེད་རོལ་བ་ལས༔ རྡོ་རྗེའི་བྲོ་བརྡུངས་ཆེམས་སེ་ཆེམ༔ ཧཱུྃ་ཕེ༚་ང་རོ་དི་རི་རི༔ ཁམས་གསུམ་ཡོངས་སྒྲོལ་དཀྱིལ་འཁོར་དུ༔ ཡེ་ཤེས་ཁྲོ་ཚོགས་འཁྲུགས་པ་རྣམས༔ གཟུང་འཛིན་བསྒྲལ་བའི་ལས་བྱས་པས༔ རུ་དྲ་མནན་པའི་ཆོ་ག་རྫོགས༔ ཨོཾ་ལྃ༔ ཨཱཿལྃ༔ ཧཱུྃ་ལྃ༔ སྟཾྭ་བྷ་ཡ་ནན༔ ཅེས་སོ། །གཉིས་པ་སྒོ་བྱང་གདགས་པ་ནི། ཕྱི་སྒོའི་གོང་དུ་ལུག་གི་སོགས་བ་ལ་གཤིན་རྗེ་མངོན་རྟོགས་ལྟར་བྲིས་པ་དང་སྐྱེར་ཕུར་ལ་སྙིང་པོ་བྲིས་པ་རྒྱབ་ཏུ་བཏགས་ཏེ། དམར་གཏོར་གྲུ་གསུམ་ཐེབས་རིལ་གྱི་ས་མཚན་པ་དང་། ཆུ་གཉིས་ཉེར་སྤྱོད་བཤམ། མཆོད་གཏོར་བྱིན་རླབས་གོང་བཞིན་བྱ། སྐུ་རྟེན་བསང་སྦྱང་། སྟོང་པའི་ངང་ལས་ཧཱུྃ་ལས་གཤིན་རྗེ་ཆོས་ཀྱི་རྒྱལ་པོ་མཐིང་ནག་བེ་ཅོན་དང་ཁྲམ་ཤིང་འཛིན་པ་ཁྲོ་གཏུམ་འཇིགས་པའི་སྐུར་གསལ། ཡེ་ཤེས་པ་བཛྲ་ས་མཱ་ཛཿ ཛཿཧཱུྃ་བྃ་ཧོཿ ཞེས་དྲངས་ཏེ་བསྟིམ། ཨོཾ་བཛྲ་ཀརྨ་ཡ་མ་རཱ་ཛཿཧཱུྃ་ཕཊ། ཅེས་བདུན་ནམ་ཉེར་གཅིག་བཟླ། ཨོཾ་བཛྲ་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱ། སྙིང་པོའི་གཤམ་དུ། བ་ལི༚་ཏ་ནཱ་ནཱ་ཁ་དནྟུ་གྲྀཧྞ་ཧཱུྃ་ཁཱ་ཧི་ཁཱ་ཧི། ལན་གསུམ་གྱིས་
གཏོར་མ་ཕུལ་ལ་ཕྲིན་ལས་བཅོལ་བ་ནི། ཧཱུྃ༔ གསང་ཆེན་ལྷུན་གྲུབ་ཕོ་བྲང་དུ༔ བཅོམ་ལྡན་རྡོ་རྗེས་བཀའ་སྩལ་བཞིན༔ ལས་ཀྱི་ཁྲོ་བོ་ཆེན་པོ་ལ༔ སྒྲུབ་ཁང་སྒོ་སྲུང་གཉེར་དུ་གཏད༔ སྒྲུབ་ལ་བར་དུ་གཅོད་པ་ཀུན༔ ས་འདི་ཡན་ཆད་མ་བཏང་ཞིག༔ དཀྱིལ་འཁོར་སྐྱོང་བའི་སྲུང་མ་རྣམས༔ རྡོ་རྗེའི་ཡལ་གམ་ །ཐུབ་པར་སྲུངས༔ རྟེན་ལ་མེ་ཏོག་འཐོར་ཞིང་བརྟན་བཞུགས་བྱ། ནང་སྒོར་ར་སོག་ལ་བདུད་རྩི་འཁྱིལ་བའི་སྐུ་དང་སྐྱེར་ཕུར་སྔགས་ལྡན། མཆོད་གཏོར་བཤམས་ཤིང་བྱིན་རླབས་སོགས་སྔར་ལྟར་ལ། བསང་སྦྱང་། སྟོང་པའི་ངང་ལས་ཧཱུྃ་ལས་ཁྲོ་བོ་བདུད་རྩི་འཁྱིལ་བ་ལྗང་ནག་རལ་གྲི་དང་རྒྱ་གྲམ་འཛིན་པ་ཁྲོ་གཏུམ་བཟོད་པར་དཀའ་བའི་གཟི་བརྗིད་ཅན་མེ་འབར་བའི་ཀློང་དུ་གསལ། ཡེ་ཤེས་པ་བཛྲ་ས་མཱ་ཛཿ ཛཿཧཱུྃ་བྃ་ཧོ༔ ཞེས་དྲངས་ཏེ་བསྟིམ། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ བདུན་ནམ་ཉེར་གཅིག །མཆོད་པ་དང་། གཏོར་འབུལ་སྔར་ལྟར་ལ། ཕྲིན་ལས་བཅོལ་བ་ནི། ཧཱུྃ༔ གསང་ཆེན་ལྷུན་གྲུབ་སོགས་གོང་བཞིན་བརྗོད་ལ་བརྟན་བཞུགས་བྱ། ནང་དུ་འཇུག་པའི་སྐབས་སུ་རྡོ་རྗེ་མཚམས་པ་དཔོན་སློབ་ནས་རྣམ་འཇོམས་དང་སྨེ་བརྩེགས་ཀྱི་ཁྲུས། གིང་དཀར་ནག་ཆས་སུ་ཞུགས་པས་དྲག་སྔགས་བཟླ་བཞིན་དུ་མེ་ །ཐུན་ཆུ་ཐུན་བརྡེག །དེ་བྱིན་ཆད་ནས་ཐོ་དང་ཐུན་གྱི་འོག་ཏུ་མ་ཚུད་པའི་ངོ་གསར་རིགས་སྒྲུབ་པ་མ་
གྲོལ་གྱི་བར་དུ་ནང་དུ་མི་བཏང་ཞིང་གདོང་མི་སྤྲད། ཕྱི་ནང་མངགས་གཞུག་པ་རྣམས་ལ་སྔགས་བཏབ་ཅིང་ཡུངས་ཐུན་བཏགས་པའི་ཕུར་པ་རེ་བསྐུར་བརྐེད་ལ་གཟེར་ནས་མ་བྲལ་བར་བྱ། འཐུང་ཆུ་སོགས་ཡོ་བྱད་ནང་དུ་མི་ལེན་ཀ་མེད་ཡོད་ན་རྡོ་རྗེ་མཚམས་པས་ཐུན་བརྡེག་ཅིང་བགེགས་བསྐྲད་ལ་གིང་པ་རྣམས་ཀྱིས་ལེན། ཆང་བཟི་འཐབ་འཛིངས། སྡོམ་པ་དམ་ཚིག་དང་འགལ་བའི་ལོག་སྤྱོད། ཁྱད་པར་བླ་མ་མཆེད་ལྕམ་བསྒྲུབ་བྱའི་ལྷ་སྔགས་ལ་ལོག་ལྟ་སོགས་རྣམ་པ་ཀུན་ཏུ་སྤངས་ཏེ་ཐམས་ཅད་དད་མོས་ཏིང་ངེ་འཛིན་རྩེ་གཅིག་པའི་ངང་འཛབ་སྔགས་རྒྱུན་བཟླས་དང་མ་བྲལ་བར་བྱའོ། །འདིར་རང་གཞུང་ལས་མིག་ཚོན་གྱི་བྱ་བ་འབྱུང་ཡང་ལག་ལེན་བདེ་ཞིང་གོ་རིམ་སྤྱི་དང་མཐུན་པ་ཉིད་ལེགས་བས་འོག་ཏུ་འཆད་དོ། །གསུམ་པ་ནང་མཚམས་ལའང་གཉིས་ཡོད་པ་ལས། དང་པོ་མ་ཏྲཾ་བསྒྲུལ་བ་ནི། མ་ཏྲཾ་གཟུགས་སྔོ་སྐྱ་མགོ་གསུམ་ལག་དྲུག་རྐང་པ་བཞི་པ་དཀྱིལ་འཁོར་གྱི་གཞིར་མགོ་ལྷོ་ནུབ་ཏུ་བསྟན་ཏེ་གན་རྒྱལ་དུ་བཞག །སློབ་དཔོན་སྔགས་ཆས་གསོལ་ཏེ་ཁྲིའུའི་ཁར་ཤར་ནས་ནུབ་ཏུ་ཞལ་ཕྱོགས་པས་འཁོད་ལ། ཨོཾ་བཛྲ་ཀྲོ་ཏ་ཧ་ཡ་གྲཱྀ་ཝ་ཧུ་ལུ་ཧུ་ལུ་ཧཱུྃ་ཕཊ། བདག་ཉིད་སྐད་ཅིག་གིས་དཔའ་བོ་རྟ་མགྲིན་དྲེགས་པ་ཐམས་ཅད་ཀྱི་རྗེ་བཙན། ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པའི་སྐུར་གྱུར། དཀྱིལ་འཁོར་གྱི་ས་མི་དམིགས་པ་ལས་མ་ཏྲཾ་རུ་དྲ་མཱ་ར་ཡ་ཛཿ ཞེས་པས་བདུད་པོ་མ་ཏྲཾ་རུ་དྲ་མགོ་གསུམ་ལག་དྲུག་ཁ་དོག་ཐལ་སྐྱ་གཟུགས་ཆེ་ལ་
མི་སྡུག་པ་འདར་ཞིང་དངངས་པའི་རྣམ་པར་གསལ་བར་གྱུར། རང་གི་དུག་གསུམ་གྱི་རང་མདངས་རུ་དྲ་སྡེ་གསུམ་དུ་ཤར་བའི་ངེས་པ་བསྐྱེད་པ་ལས་ཕྱི་ནས་འགུགས་བསྟིམ་མི་དགོས་པར་བཞེད། དྲག་སྔགས་སོ་ལྔ་དབྱངས་རོལ་བཅས་བརྗོད་ལ་ཕུར་སྐོར་ཚམ་རྔམས་བྱས་ཏེ། ཧཱུྃ༔ མ་ཏྲཾ་བྱ་བའི་མ་རུངས་པ༔ སྔོན་ཡང་སྒྲུབ་ལ་བར་དུ་བཅད༔ དཔའ་བོ་ཆེན་པོས་བསྒྲལ་ནས་ཀྱང་༔ ཁོག་པ་གཞལ་ཡས་ཁང་དུ་བརླབས༔ བདག་མེད་ཕུར་པས་བསྣུན་ཏེ་བསྒྲལ༔ ཨོཾ་མ་ཧཱ་ཤཱུ་ཛྙཱ་ཏ་ཛྙཱ་ན་བཛྲ་ཨཱཏྨ་ཀོ྅ཧཾ༔ ཕུར་པ་བཏབ། རལ་གྲིས་ལྷུ་ཕྲལ་ལ་ཕྱོགས་མཚམས་བརྒྱད་དུ་བཀོད་པའམ་དེ་གར་བཞག་ཀྱང་ཆོག །མ་ཏྲཾ་རུ་ཏྲ་ཨེ་རཱ་ཙམ་དྷ་ལ་བྷྲཱུྃ༔ རང་གི་ཐུགས་ཀ་ནས་བྷྲཱུྃ་འཕྲོས་ཁོག་པ་ལ་ཐིམ་པས་ཁོག་པ་དུར་ཁྲོད་རོལ་པའི་གཞལ་ཡས་ཁང་དུར་ཁྲོད་བརྒྱད་རྭ་བ་མེ་དང་བཅས་པས་བསྐོར་བར་གྱུར། ཅེས་གཡས་སུ་བསྐོར་ཞིང་སྲོག་རྩའི་སྒོ་ནས་གཞལ་ཡས་ཁང་གི་ནང་དུ་ཞུགས་པར་མོས། གཉིས་པ་ཕུར་གདབ་ནི། སློབ་དཔོན་ཁྲིའུའི་ཁར་ཤར་ནས་ནུབ་ཏུ་ཕྱོགས་པར་བཞུགས་པའི་མདུན་ཏུ་འབྲུའི་སྣོད་དུ་ཕུར་པ་དར་གྱི་ཅོད་པན་ཅན་བཅུ་བཀོད། ཕུར་གདན་ཨེ་བཅུ་ཕྱོགས་མཚམས་བརྒྱད་དུ་རེ་རེ། ཤར་ནུབ་ཏུ་གཉིས་རེ་བཞག །ཕུར་འཛབ་ལན་གསུམ་དབྱངས་སུ་གྱེར་བའི་ཚེ། ཕུར་པ་རྣམས་གུ་གུལ་གྱིས་བདུག །ཡུངས་ཀར་གྱིས་བྲབ། རཀྟས་བྱུག་པ་རྣམས་བྱས་ལ། བསང་
སྦྱང་། ཕུར་བུ་མི་དམིགས་པ་སྟོང་པ་ཉིད་དུ་གྱུར༔ སྟོང་པའི་ངང་ལས་ཧཱུྃ་ཡིག་བཅུ་ལས་ཁྲོ་བོ་བཅུ་སྟོད་ཁྲོ་བོའི་གཟུགས་ལ་སྨད་ཕུར་བུ་འབར་བའི་རྣམ་པ་ཅན་ཏུ་གྱུར་པའི་གནས་གསུམ་ཨོཾ་ཨཱཿཧཱུྃ་གིས་མཚན་པའི་ཧཱུྃ་གི་འོད་ཀྱིས་ཡེ་ཤེས་པ་སྤྱན་དྲངས༔ ཛཿཧཱུྃ་བྃ་ཧོ༔ ཨོཾ་བཛྲ་ཀཱ་ཡ་ཝཱ་ཀ་ཙིཏྟ་ཨབྷི་ཥིཉྩ་ཧཱུྃ༔ རང་ལྷར་གསལ་བའི་ཐུགས་ཀ་ནས་ཁྲོ་བོ་ཊ་ཀྐི་རཱ་ཛ་སྤྲོས་ཏེ་ཕྱོགས་སྐྱོང་བཅུ་བཀུག་ནས་སྟེང་འོག་ཕྱོགས་མཚམས་སོ་སོར་ཨེ་བཅུ་བཀོད་པ་ལ་གཟིར་བར་གྱུར༔ སློབ་དཔོན་གྱིས་ཕུར་བུ་རྣམས་རིམ་པར་ཐོགས་ལ་ཚོམ་རྔམས་བཅས་གཡས་སྐོར་དུ་གདབ་སྟེ། སྟེང་ཕྱོགས་ཚངས་པ་བསྣོལ་བའི་སྟེང་༔ ཁྲོ་བོའི་རྒྱལ་པོ་ཧཱུྃ་ཀ་ར༔ རབ་འཇིགས་ལྕགས་ཕུར་ཚྭ་ཚྭ་འཕྲོ༔ ལྷ་ཡི་གདོན་ཚོགས་མ་ལུས་པ༔ ཧཱུྃ་ཀར་ཡིས་མཚམས་བཅད་དོ༔ ཨོཾ་བཛྲ་ཀྲོ་དྷ་ཧཱུྃ་ཀ་ར་ཧཱུྃ་ཕཊ༔ ཤར་ཕྱོགས་དྲི་ཟ་བསྣོལ་བའི་སྟེང་༔ ཁྲོ་བོའི་རྒྱལ་པོ་རྣམ་པར་རྒྱལ༔ རབ་འཇིགས་ལྕགས་ཕུར་ཚྭ་ཚྭ་འཕྲོ༔ དི་ཟའི་གདོན་ཚོགས་མ་ལུས་པ༔ རྣམ་པར་རྒྱལ་བས་མཚམས་བཅད་དོ༔ ཨོཾ་བཛྲ་ཀྲོ་ཏ་བི་ཛ་ཡ་ཧཱུྃ་ཕཊ༔ ལྷོ་ཕྱོགས་གཤིན་རྗེ་བསྣོལ་བའི་སྟེང་༔ ཁྲོ་བོའི་རྒྱལ་པོ་གཤིན་རྗེ་གཤེད༔ རབ་འཇིགས་ལྕགས་ཕུར་ཚ༴ གཤིན་རྗེའི་གདོན་ཚོགས་མ༴ གཤིན་རྗེ་གཤེད་པོས༴ ཨོཾ་བཛྲ་ཀྲོ་དྷ་ཡ་མཱནྟ་ཀ་ཧཱུྃ་ཕཊ༔ ནུབ་
ཕྱོགས་ཀླུ་གདོན་བསྣོལ། ཁྲོ་བོའི་རྒྱལ་པོ་རྟ་མཆོག་དཔལ༔ རབ་འཇིགས༴ ཀླུ་ཡི༴ རྟ་མགྲིན་རྒྱལ༴ ཨོཾ་བཛྲ་ཀྲོ་ཏ་ཧ་ཡ་གྷྲཱི་ཝ་ཧཱུྃ་ཕཊ༔ བྱང་ཕྱོགས་གནོད་སྦྱིན་བསྣོལ༴ ཁྲོ་བོའི་རྒྱལ་པོ་བདུད་རྩི་འཁྱིལ༔ རབ་འཇིགས༴ གནོད་སྦྱིན༴ བདུད་རྩི་འཁྱིལ་པས༴ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུན་དྷ་ལཱི་ཧཱུྃ་ཕཊ༔ ཤར་ལྷོ་མེ་ལྷ༴ ཁྲོ་བོའི་རྒྱལ་པོ་དབྱུག་སྔོན་ཅན༔ རབ་འཇིགས༴ མེ་ལྷའི་གདོན༴ དབྱུག་སྔོན་ཅན༴ ཨོཾ་བཛྲ་ཀྲོ་དྷ་ནཱི་ལ་དཎྜ་ཧཱུྃ་ཕཊ༔ ལྷོ་ནུབ་སྲིན་པོ༴ ཁྲོ་བོའི་རྒྱལ་པོ་མི་གཡོ་མགོན༔ རབ་འཇིགས༴ སྲིན་པོའི་གདོན་ཚོགས༴ མི་གཡོ་མགོན་པོས༴ ཨོཾ་བཛྲ་ཀྲོ་དྷ་ཨཱ་རྱ་ཨ་ཙ་ལ་ཧཱུྃ་ཕཊ༔ ནུབ་བྱང་རླུང་ལྷ༴ ཁྲོ་བོའི་རྒྱལ་པོ་འདོད་པའི་རྒྱལ༔ རབ་འཇིགས༴ རླུང་ལྷའི༴ འདོད་པའི་རྒྱལ་པོས༴ ཨོཾ་བཛྲ་ཀྲོ་དྷ་ཨ་པ་ར་ཛི་ཏ་ཧཱུྃ་ཕཊ༔ བྱང་ཤར་དབང་ལྡན༴ ཁྲོ་བོའི་རྒྱལ་པོ་ཁམས་གསུམ་རྒྱལ༔ རབ་འཇིགས༴ དབང་ལྡན༴ ཁམས་གསུམ་རྣམ་རྒྱལ༴ ཨོཾ་བཛྲ་ཀྲོ་ཏ་ཏྲཻ་ལོ་ཀྱ་བི་ཛ་ཡ་ཧཱུྃ་ཕཊ༔ འོག་ཕྱོགས་ས་བདག་བསྣོལ་བའི་སྟེང་༔ ཁྲོ་བོའི་རྒྱལ་པོ་སྟོབས་པོ་ཆེ༔ རབ་འཇིགས༴ ས་བདག༴ སྟོབས་པོ་ཆེ་ཡིས༴ ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུྃ་ཕཊ༔
ཅེས་ཁྲོ་བཅུའི་ཕུར་པ་རྣམས་མ་ནོར་བར་ཕྱོགས་མཚམས་སྟེང་འོག་རྣམས་སུ་གདབ་བོ༔ བཞི་པ་རྟེན་གྱི་དཀྱིལ་འཁོར་བཅའ་བ་ལའང་ལྔ་ལས། དང་པོ་ཆག་ཆག་གདབ་པ་ནི། དུང་པོར་དུ་དྲི་བཟང་ཆུ་དང་ཨ་མྲྀ་ཏ་སྦྱར་བ་ཐོགས་ཏེ། ཧཱུྃ༔ རྣམ་རྟོག་དངོས་ནི་རྩ་བ་ལྔ༔ དུག་ལྔ་འཁོར་བའི་རྟགས་ཀྱི་རྒྱ༔ ཡེ་ཤེས་ལྔ་རུ་རབ་སྦྱར་ནས༔ དཀྱིལ་འཁོར་སྣ་ལྔ་ཡོངས་སུ་རྫོགས༔ གུ་ཧྱ་ཙཀྲ་ཛྙཱ་ན་མཎྜ་ལ་ཧཱུྃ༔ ཨོཾ་ད་རི་ད་ར་ཡེ་བྷྱཿ ཨོཾ་བྷྲཱུྃ་ཏྲཱྃ་ཧྲཱིཿཨཱཿ ཞེས་བརྗོད་ཅིང་བདུད་རྩིས་དཀྱིལ་འཁོར་གྱི་སྟེགས་བུར་སྙོམས་པར་བྱུག་གོ། །འདི་རང་གཞུང་དུ་མི་གསལ་ཡང་མེད་ཐབས་མེད་པས་གཞན་ནས་ཁ་བསྐངས་པའོ། །གཉིས་པ་ཐིག་བཏབ་པ་ནི། དཀྱིལ་འཁོར་གྱི་གཉིས་འགྱུར་ཚད་ཀྱི་རས་དཀར་སྐུད་པ་ལྔ་བསྒྲིལ་ཕྲ་སྦོམ་སྒོའི་པཉྩ་རེ་ཁཱ་དང་མཉམ་པ་འདུ་བྱ། སློབ་དཔོན་ནུབ་ནས་ཤར་དང་། གཟུངས་མར་མངའ་གསོལ་བའི་ཐིག་གཡོག་ཤར་ནས་ནུབ་ཏུ་ཕྱོགས་པས་འཁོད་ལ། བདག་དང་གཟུངས་མ་བླ་མ་ཐུགས་ཀྱི་ནོར་བུ་ཡབ་ཡུམ་དུ་གསལ་བའི་གནས་ལྔར་རིགས་ལྔ་ཡབ་ཡུམ་གྱིས་མཚན་པར་གྱུར། ཐིག་སྣེ་ལྟེ་བར་བཟུང་ལ། ཧཱུྃ༔ རྩ་བ་གསུམ་གྱི་ལྷ་ཚོགས་རྣམས༔ གསང་བ་ཡེ་ཤེས་ཐིག་གདབ་མཛོད༔ མཚན་ལན་གཟུངས་མ་གཟུགས་མཛེས་མ༔ གསང་བ་རྡོ་རྗེའི་ཐིག་ཐོབ་ཅིག༔ རིགས་ལྔ་སྙོམས་པ་བཞུགས་པའི་བྱང་ཆུབ་སེམས་སྤྲིན་ཡུམ་གྱི་མཁར་སྐར་མདའ་ལྟར་སྦྲེང་བས་རྒྱལ་བའི་ཕོ་བྲང་རང་བྱུང་དུ་བསམ། གཉའ་ནམ་
དྷ་ལ་བྷྲཱུྃ༔ ཞེས་ལན་བརྒྱད་བརྗོད་ཅིང་གནམ་ཐིག་བཏབ་པས། སྔགས་དང་ཐིག་གི་སྒྲས་སངས་རྒྱས་ཐམས་ཅད་སད་པར་བྱས། ནམ་མཁར་ཡེ་ཤེས་ཀྱི་དཀྱིལ་འཁོར་གསལ་བར་མོས། ཐིག་གདབ་ཚུལ་སྤྱི་ལྟར་བྱ། སྔགས་ཙམ་གྱིས་མཆོད་ཅིང་བསྟོད། དེ་ནས་ས་ལ་ལས་ཀྱི་ཐིག་གདབ་པ་ནི། ཧཱུྃ༔ ཐུགས་ཀྱི་ནོར་བུའི་དཀྱིལ་འཁོར་ལྷ༔ མགོན་པོའི་ཡེ་ཤེས་དུས་འདིར་ཐོབ༔ གསང་བ་དབྱིངས་ཀྱི་དཀྱིལ་འཁོར་དུ༔ བྱང་ཆུབ་སེམས་ཀྱི་ཐིག་སྤྲོས་པས༔ རྩ་བ་གསུམ་གྱི་དཀྱིལ་འཁོར་གསལ༔ ཅེས་བརྗོད་ལ་ལས་ཐིག་རྫོགས་པར་གདབ། རྡུལ་ཚོན་མི་འགྲུབ་བའི་རས་བྲིས་ཀྱི་ཕྱོགས་ལའང་འདི་ཡན་ཆད་བྱ་བ་ཕྱག་ལེན་ནོ། །སྐབས་འདིར་ལྷ་སྟ་གོན་བྱ་བ་ནི། དཀྱིལ་འཁོར་གཞི་ལ་དྲིའི་ཐིག་ལེ་གཙོ་འཁོར་ལྔ་བྱས་པའི་སྟེང་དུ། སྙིང་པོའི་སྔགས་བརྗོད་ཅིང་མེ་ཏོག་གི་ཚོམ་བུ་རེ་བཀོད། མདུན་རྒྱབ་གང་བདེར་སྨན་རཀ་གཏོར་གསུམ། ཆུ་གཉིས་ཉེར་སྤྱོད་གཡས་བསྐོར་དུ་བཤམ། ལས་བྱང་ལྟར། མཆོད་པ་བྱིན་རླབས། ལྷ་བསྐྱེད་ནས་མཆོད་བསྟོད་ཡན་ཚང་བ་བཏང་། འགྲུབ་ན་ཚོགས་མཆོད་ཀྱང་བྱས་ལ་གསོལ་བ་གདབ་པ་ནི། ཀྱེ་ཀྱེ་དགོངས་ཤིག་དཀྱིལ་འཁོར་ལྷ་ཡི་ཚོགས༔བླ་མ་ཡི་དམ་མཁའ་འགྲོ་མཆོད་པ་དང་༔ སྐལ་ལྡན་བུ་མཆོག་རྗེས་སུ་འཛིན་པའི་ཕྱིར༔ བདག་ཅག་རྡོ་རྗེའི་རིག་པ་འཛིན་རྣམས་ཀྱིས༔ རྩ་གསུམ་དཀྱིལ་འཁོར་ཟབ་མོ་འབྲི་འཚལ་གྱིས༔ ཐུགས་རྗེས་
དགོངས་ལ་བྱིན་གྱིས་བརླབ་ཏུ་གསོལ༔ ལན་གསུམ་གྱིས་གསོལ་བ་གདབ་པས་ལྷས་གནང་བའི་མཚན་མ་ཐོབ་པར་བསྒོམ། ལྷ་རྣམས་བར་སྣང་འོད་ཀྱི་གུར་ཁང་དུ་བཞུགས་པར་མོས་ལ་འདེགས་པའི་རྒྱ་དང་། ཨོཾ་བཛྲ་ཨུཏྟིཥྛ། ཞེས་བརྗོད་ལ་ཚོམ་བུ་མཆོད་གཏོར་བསྡུའོ། །གསུམ་པ་ཚོན་བཀྱེ་བ་ནི། ཚོན་སྣོད་དབུས་དཀར་ཤར་སྔོ་ལྷོ་སེར་ནུབ་དམར་བྱང་ལྗང་གུ་བཞག་ལ། ཨོཾ་ཧཱུྃ་སྭཱ་ཨཱཿཧཱ། ལྔ་བྲིས་ལ་རྡོ་རྗེ་དང་བཅས་པའི་སྲིན་ལག་གིས་རེག་སྟེ། རིགས་ལྔ་ཡབ་ཡུམ་སྦྱོར་བའི་བྱང་སེམས་ཁ་དོག་ལྔ་ལྡན་ལ། རྣམ་པ་རིན་པོ་ཆེའི་རྡུལ་ཚོན་འོད་འབར་བར་བསམས་ལ་འབྲུ་ལྔ་བརྒྱ་རྩ་བརྗོད། ཨེ་ཡཾ་རཾ་སུཾ་ཀེ༚་རཾ་བྷྲཱུྃ༔ ཞེས་བརྗོད་ཅིང་དབུས་ཀྱི་ཕུར་ཁུང་རིམ་པས་མཐིང་ལྗང་དཀར་སེར་དམར་པོ་རྣམས་བླུགས་ལ་བཀང་སྟེ་འབྱུང་བ་རིམ་བརྩེགས་སུ་ཕོ་བྲང་བཞེངས་པར་བསམ། སློབ་དཔོན་ཞལ་ཤར་དུ་ཕྱོགས་ལ་རེ་ཁཱ་གཅིག་དྲངས་ཏེ། ཧཱུྃ༔ སྐུ་ལྔ་ཡེ་ཤེས་ལྔ་ཡི་ངང་༔ རྩ་བ་གསུམ་གྱི་སྐུ་ཐོབ་ཕྱིར༔ ཡེ་ཤེས་ལྔ་ཡི་ཚོན་བཀྱེའོ༔ ཞེས་བརྗོད་ཅིང་ལས་སློབ་སོགས་ཀྱིས་དཀྱིལ་འཁོར་སྒོ་རྟ་བབས་དུར་ཁྲོད་རྡོར་མེ་རི་ལྷ་མཚན་དང་བཅས་པ་མཚན་ཉིད་རྫོགས་ཤིང་གདུལ་བྱ་དང་འདྲེན་ཅིང་ཡིད་དུ་འོང་བ་སླ་ཆོས་དང་ཚར་སྐྱེན་མི་བྱ་ལེགས་པར་བྲི་དགོས་པར་གསུངས་པ་ལྟར་བྱའོ། །རྡུལ་ཚོན་མི་འགྲུབ་ན་ཚོན་གྱི་བྱ་བ་རྣམས་དོང་ནས་རས་བྲིས་ཀྱི་དཀྱིལ་འཁོར་བཏིང་། གང་ལྟར་སློབ་དཔོན་གྱིས་དཀྱིལ་འཁོར་བསྐོར་ཞིང་དྲིལ་བུ་གསིལ། ཡིག་བརྒྱ་དང་རྟེན་འབྲེལ་སྙིང་པོ་བཟླས་པས་
རབ་ཏུ་གནས་པར་བྱ། དེ་ནས་དཔོན་སློབ་ཐམས་ཅད་ལངས་ནས། ཧཱུྃ༔ རྩ་གསུམ་ཐུགས་ཀྱི་ནོར་བུའི་ལྷ་ཚོགས་རྣམས༔ ཆོས་ཀྱི་དབྱིངས་ལས་གཟུགས་ཀྱི་སྐུར་བཞེངས་ལ༔ འགྲོ་བ་སེམས་ཅན་རྣམས་ཀྱི་དོན་གྱི་ཕྱིར༔ གཟུགས་བརྙན་དཀྱིལ་འཁོར་འདི་ལ་བྱིན་གྱིས་རློབས། ཨོཾ་ཨཱཿཧཱུྃ་ཧྲཱིཿ གུ་རུ་དྷེ་བ་ཌཱ་ཀི་ནཱི་གཉའ་ན་ཨཱ་ཝེ་ཤ་ཡ་ཨ་ཨཱཿ ཞེས་རོལ་མོ་བྱ། སྔར་ནམ་མཁར་བཏེགས་པའི་ལྷ་རྣམས་དཀྱིལ་འཁོར་ལ་ཐིམ་པར་མོས། དེས་ཉིན་དང་པོའི་བྱ་བ་གྲུབ་བོ། །བཞི་པ་རྒྱན་འགོད་པ་ནི། བདག་བསྐྱེད་མཆོད་གཏོར་སྨན་རཀཉེར་སྤྱོད་བཅས་ལོགས་གང་བདེར་བཤམ། དཀྱིལ་འཁོར་མདུན་ཕྱོགས་སྟེགས་ཡངས་པར་རྒྱན་འགོད་བྱ་རྒྱུའི་སྒྲུབ་རྫས་རྣམས་བཀོད། དེའང་རང་གཞུང་སྒྲུབ་ཁོག་ནས་གསུངས་པ་ཕལ་ཆེར་དབང་དང་འབྲེལ་བའི་དོན་ཡིན་པས་ཚང་མ་མི་དགོས། འདིར་རྩ་བའི་སྒྲུབ་ཆེན་རྟེན་གུ་རུའི་སྐུ་ཚབ་གཏེར་བྱོན་སོགས་བྱིན་ལྡན། གསུང་རྟེན་རྒྱུད་དམ་སྒྲུབ་ཐབས་གླེགས་བམ། ཐུགས་རྟེན་རྡོ་རྗེ་ཐོད་པ་ཤེལ་རྡོ། སྒྲུབ་གཏོར་ནོར་བུ་འབར་བའི་དབྱིབས་ཅན་འཁོར་བཤོས་ཕྲན་བརྒྱད་ཀྱིས་བསྐོར་བ་རྒྱན་ལྡན་སྐུ་ཙཀ་མེ་ལོང་དར་གདུགས་ཀྱིས་སྤྲས་པ། བུམ་པ་ཉེར་ལྔའི་བཅུད་ལྡན་ཁ་རྒྱན་མགུལ་ཆིངས་གཟུུངས་ཐག་དང་བཅས་པ། ཐོད་པ་མཚན་ལྡན་ཆང་དང་ཆོས་སྨན་སྦྱར་བས་བཀང་བའི་ཁར་མེ་ལོང་སིནྡྷུ་རའི་དཀྱིལ་འཁོར་མཆོག་དབང་ནས་འབྱུང་བ་ལྟར་བྲིས་པས་བཀབ་པ། གཞན་ཡང་འོག་ནས་འབྱུང་
པའི་མཆོད་པ། རྒྱན་ཆས། སྒབ་སྐོར་ལ་སོགས་པ་ཡིན་ལ། འཛོམ་ན་ཐུགས་ཀྱི་ནོར་བུའི་སྒྲུབ་པའི་སྐབས་སུ་བཤད་པའི་བླ་མ་ཡི་དམ་མཁའ་འགྲོ་གསུམ་གྱི་སྲོག་འཁོར་བླ་ནོའི་བཅས་རྣམས་གལ་ཆེ་བར་སྣང་། །སྨན་སྒྲུབ་སྐབས་ཐོག་མར་ཚངས་པའི་ཕོ་བྲང་བཅའ་དགོས་ཤིང་དེའང་གཏེར་གཞུང་རྣམས་ལས་ཇི་སྐད་བཤད་པའི་བཅས་རྒྱས་པ་དང་། སྟབས་བདེའི་བསྡུས་པ་མཛད་པའི་ཕྱག་ལེན་ལུགས་གཉིས་སྣང་བའི་དེང་སང་ཕལ་ཆེར་གྱིས་ཕྱི་མ་གཙོར་བྱེད་པ་ལྟར་ན། དཀྱིལ་འཁོར་གྱི་སྟེང་དུ་གདུགས་དཀར་པོ་ཕུབ་པའི་སྲོག་ཤིང་ལ་གཙོ་བོ་གཉིས་དང་། ཤམ་བུའི་ནང་འཁོར་རྒྱུ་སྐར་ཙམ་བཀོད་པ་ཡིན་ལ། སྟབས་བདེ་བཀོད་མཛེས་ཁྱད་ཕྱི་མ་ལྟར་བྱེད་ན་གདུགས་དབུས་སྲོག་ཤིང་ལ་བཟང་ཤིང་བྱང་ཕུར་སྟེང་དུ་ཆངས་པ་དང་འོག་ཏུ་བརྒྱ་བྱིན། རྒྱབ་ཏུ་སྔགས་བྱང་འདོད་གསོལ་བྲིས་པ་བཏགས་པ་དང་ལྷན་ཅིག་ཀུ་ཤའི་ཆུན་པོ་དང་རྡ་མ་དཀར་པོའང་འདོགས། ཤམ་བུའི་ནང་ཅུང་ཟད་རྒྱས་ན་ལྷ་བརྒྱད་ཀླུ་བརྒྱད་གཟའ་བརྒྱད་རྒྱུ་སྐར་ཉེར་བརྒྱད་སྨན་སྲུང་ལྷ་མོ་བརྒྱད་བཅས་ཚང་བའམ། བསྡུ་ན་རྒྱུ་སྐར་ཉེར་བརྒྱད་ཀྱི་ཙཀླི་ཙམ་དང་གྱི་འཕུར་ལྕེ་དང་ལྡན་པ་སོ་སོའི་སྔགས་བྱང་འདོད་གསོལ་ཅན་ཕྱོགས་མ་འཆོལ་བར་ཞལ་ནང་བསྟན་ཏུ་བཀོད། ཤམ་བུའི་རྒྱབ་ངོས་སུ་མེ་ལོང་བཅུ་ལ་ཁྲོ་བཅུའི་སྔགས་མཆལ་གྱིས་བྲིས་པ་ཕྱོགས་མཚམས་མ་ནོར་བར་གདགས། བནྡྷ་ལྔའི་ནང་དུ་སྨན་ཕྱེ་རྣམས་དང་སྟེང་དུ་སྨན་ཁྲོལ་བུ་རྣམས་ཐེབས་ཚེའམ་ཤོག་ཐུམ་བྱས་ལ་བཞག །དབུས་ཀྱི་བྷནྡྷའི་སྨན་གཞན་ལས་མཐོ་ངེས་པ་བྱ། དབུས་དཀར་ཤར་སྔོ་སོགས་དར་ཕྱོགས་མདོག་གིས་བཀབ། སྨན་ཕྱེ་ཚང་མ་བྷནྡྷར་མ་ཤོང་ན་ཟུར་དུ་རས་ཁུག་
སོགས་སུ་བཞག་ཆོག །གཞན་བཏགས་བཙག་ཕྱེ་སྒྲུབ་ཚུན་ལ་དགོས་ཚད་རྒྱན་འགོད་སྐབས་ཆོགས་དགོས་པས་གྲབ་ཡུལ་བྱ། ལྡིང་ཁྲི་བར་མར་ཁྲོལ་བུའི་དཀྱིལ་འཁོར་མཎྜལ་ལ་དྲི་བཟང་ཆུས་ཕྱོགས་བཞི་དབུས་ལྔར་ཐིག་ལེ་བྱས་པའི་སྟེང་དུ་འབྲུ་དཀར་གྱི་ཚོམ་བུ་གཙོ་འཁོར་ལྔ་བཀོད་པའི་ཁར་རྐང་གསུམ་བརྟན་པོར་འཇོག །དཀྱིལ་འཁོར་མདུན་ཏུ་ལས་བུམ་མགུལ་ཆིངས་ལྗང་གུ་བཅུད་ལྡན་ཁ་རྒྱན་གཟུངས་རྡོར་དང་བཅས་པ་དང་། དེ་མདུན་ལྟ་བུར་དུང་ཞལ་དྲི་བཟང་ཆུས་བཀང་པ་བཞག་པའི་མདུན་ཏུ་ཆུ་གཉིས་ཉེར་སྤྱོད་ཕྲེང་ཚར་དུ་བཤམ། སྔོན་གཏོར་དཀར་བགེགས་སོགས་ཉེར་མཁོ་ཚོགས་པར་བྱ། འདུས་པ་རྣམས་ཀྱིས་ཐོག་མར་ཚིག་བདུན་གསོལ་འདེབས་དང་བརྒྱུད་འདེབས། ལས་བྱང་ནས་སྐྱབས་སེམས་ཡན་ལག་བདུན་པ་ལན་གསུམ་བྱས་ལ་ལས་བུམ་བསྒྲུབ་པ་ནི། ཨོཾ་བཛྲ་ཨ་མྲྀ་ཏ་སོགས་ཀྱིས་བསང་། སྭ་བྷཱ་བས་སྦྱང་། སྟོང་པ་ཉིད་དུ་གྱུར། སྟོང་པའི་ངང་ལས་ལས་ཐམས་ཅད་པའི་བུམ་པ་རྒྱུ་རིན་པོ་ཆེ་སྣ་ཚོགས་ལས་གྲུབ་པ་ཕྱི་བུམ་པ་ལ་ནང་གཞལ་ཡས་ཁང་གི་རྣམ་པར་གསལ་བ། བུམ་ནང་གི་བཅུད་བདུད་རྩིའི་རྒྱ་མཚོར་འཁྱིལ་བའི་དབུས་སུ། པྃ་ལས་པདྨའི་སྡོང་པོ་ཡན་ལག་རགས་ལ་ལོ་འདབ་རྒྱས་པའི་སྙིང་པོར་པདྨ་དམར་པོ་འདབ་མ་བརྒྱད་རབ་ཏུ་གྱེས་པའི་སྟེང་དུ་ཟླ་བའི་གདན་ལ་ཡི་གེ་ཧྲཱིཿདམར་པོ་ཡོངས་སུ་གྱུར་པ་ལས། ངོ་བོ་རྟ་མགྲིན་ལ་རྣམ་པ་ཁྲོ་བོ་བདུད་རྩི་འཁྱིལ་བ་སྐུ་མདོག་ལྗང་སྔོན་ཞལ་གཅིག་ཕྱག་གཉིས་
ཁྲོ་ཞིང་འཛུམ་པ་ལས་ཀྱང་མཆེ་བ་ཅུང་ཟད་གཙིགས་པ། ཕྱག་གཉིས་བདུད་རྩི་ཐབ་སྦྱོར་གྱི་བར་ན་བུམ་པ་བདུད་རྩིས་བཀང་བ་བསྣམས། ཞིམ་ཁྲོའི་རྒྱན་ཆ་ལུགས་རྣམས་དང་ལྡན་པར་གསལ་བའི་གནས་གསུམ་འབྲུ་གསུམ་གྱིས་མཚན་པ་ལས་འོད་ཟེར་འཕྲོས། རང་བཞིན་གྱི་གནས་ནས་རང་འདྲ་བའི་ཡེ་ཤེས་སེམས་དཔའ་སྤྱན་དྲངས་བཛྲ་ས་མཱ་ཛཿ ཨོཾ་ཨེ་ཧྱེ་ཧི། པདྨ་ཀ་མ་ལཱ་ཡ་སྟཾ། ཨོཾ་བཛྲ་ཨརྒྒཾ་ཨཱཿཧཱུྃ། པཱདྱཾ་སྦྱར། ཛཿཧཱུྃ་བྃ་ཧོཿ སླར་ཡང་ས་བོན་གྱི་འོད་ཀྱིས་དབང་ལྷ་རིགས་ལྔ་འཁོར་བཅས་སྤྱན་དྲངས་པ་རྣམས་ཀྱིས་བུམ་པའི་བདུད་རྩིས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་དོན་ཡོད་གྲུབ་པས་དབུར་བརྒྱན། ཨོཾ་བཛྲ་པུཥྤེ་པྲ་ཏཱིཙྪ་སྭཱ་ཧཱ། དེ་བཞིན་དུ། ཤབྡའི་བར་སྦྱར་བས་མཆོད། བསྟོད་པར་འོས་པ་སོགས་ཀྱིས་བསྟོད། བདུད་རྩི་འཁྱིལ་བའི་ཐུགས་ཀར་ཧྲཱིཿདམར་པོའི་མཐའ་སྐོར་དུ་སྔགས་ཀྱིས་གཡས་སྐོར་དུ་འཁོར་ཞིང་། སྔགས་འབྲུ་དང་སྐུའི་ཆ་ཐམས་ཅད་ནས་བདུད་རྩིའི་རྒྱུན་བབས་པས་བུམ་པ་གང་བར་གྱུར། ཅེས་དམིགས། གཟུངས་ཐག་བླངས་ལ། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། བརྒྱ་རྩ་ཙམ་བཟླས་པ་ལ། ཁྲོ་བོ་ཆེན་པོས་དཀྱིལ་འཁོར་གྱི་བྱ་བ་མཐར་ཕྱིན་པའི་ཕྲིན་ལས་མཛད་དུ་གསོལ། ཅེས་ཕྲིན་ལས་བཅོལ། ལྷ་འོད་
དུ་ཞུ་ནས་ཆུ་དང་དབྱེར་མེད་དུ་གྱུར་པས་ཆུ་ནུས་པ་དང་ལྡན་པར་གྱུར། ཞེས་མོས་ལ་ཕྱིན་ཆད་བསང་གཏོར་གྱི་བྱ་བ་ཐམས་ཅད་དེས་བྱའོ། །དེ་ནས་སྨན་སྒྲུབ་སྐབས་སུ། དཀར་གཏོར་གསེར་སྐྱེམས་འབྲུ་སྣ་བཏབ་པ་བཤམ། རྃ་ཡྃ་ཁྃ། གིས་བསང་སྦྱང་། ཨོཾ་ཨ་ཀཱ་རོ་ལན་གསུམ་གྱིས་བྱིན་བརླབས་ནས། ཨོཾ་སརྦ་ལོ་ཀ་པཱ་ལ་ས་པཱ་རི་ཝ་ར་བཛྲ་ས་མཱ་ཛཿ ཞེས་མགྲོན་འགུགས། ཨོཾ་དེ་བ། ནཱ་ག །གྲ་ཧ། ནཀྵ་ཏྲ། ཨོ་ཥ་དྷི་དེ་བཱི་སརྦ་ས་པཱ་རི་བཱ་རེ་བྷྱཿན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྤ་ར་་ཨི་མཾ་ག་ག་ན་ཁཾ་སྭཱ་ཧཱ། ཞེས་ལན་གསུམ་གྱིས་ཕུལ་ལ། ཧཱུྃ། སྔོན་གྱི་ལེགས་སྤྱད་ལས་གྲུབ་ཅིང་། །མཐུ་དང་རྫུ་འཕྲུལ་མཐའ་ཡས་པས། །རང་རང་ཕྱོགས་དང་དུས་སྐྱོང་བའི། །ལྷ་ཀླུ་གཟའ་དང་རྒྱུ་སྐར་དང་། །སྨན་གྱི་ལྷ་མོར་ཕྱག་འཚལ་བསྟོད། །དཀར་ཕྱོགས་སྐྱོང་བ་འཁོར་དང་བཅས། །བདག་གི་མེ་ཏོག་སྤོས་དང་ནི། །གཏོར་མ་འདི་ནི་བླང་བར་མཛོད། །དེ་རྣམས་ཀྱི་ནི་བརྩོན་འགྲུས་དང་། །གཟི་བརྗིད་དབང་ཕྱུག་སྟོབས་ཀྱིས་ནི། །ནད་སོགས་མི་མཐུན་ཕྱོགས་འཇོམས་ཤིང་། །བདག་ཅག་འཁོར་བཅས་སྲུང་བར་མཛོད། །དཀར་པོའི་ཕྱོགས་དང་དུས་ཚོད་སྐྱོང་བར་མཛད་པ་འཁོར་དང་བཅས་པ་རྣམས་ཀྱིས་བདུད་རྩི་སྨན་གྱི་སྒྲུབ་པའི་ཕོ་བྲང་ཆེན་པོ་སྲུང་བ་དང་།
བར་ཆད་མི་འབྱུང་ཞིང་དངོས་གྲུབ་མྱུར་དུ་འགྲུབ་པའི་སྡོང་གྲོགས་གཉན་པོ་མཛད་དུ་གསོལ། ཅེས་གཏོར་མ་གསེར་སྐྱེམས་ཕྱི་རོལ་དུ་འབུལ། སྒྲུབ་ཆེན་རྐྱང་པའི་སྐབས་སུ་འདི་མི་དགོས་པས་སྤྲོ་ན་དཀར་གཏོར་སྤྱི་འགྲོ་བཏང་། དེ་ནས་ལས་བྱང་གི་བགེགས་བསྐྲད་ནས་བརྩམས། བསྟོད་པ་ཡན་བཏང་ལ། འཛབ་བཟླས་ཅི་འགྲུབ་བྱ། བཟླས་ལ་གྲུབ་ཉེ་བ་དང་རྡོར་སློབ་ཐོག་མར་ཕེབས་ནས་བུམ་སྒྲུབ་ནས་འབྱུང་བའི་སྔགས་སོ་སོ་བརྗོད་དེ། བུམ་པའི་བགེགས་བསྐྲད་ནས་བརྩམས་ཁ་རྒྱན་གཟུག་པའི་བར་ཚང་བར་བྱ། དེ་ནས་ལས་བྱེད་པ་རྣམས་ཆོས་གོས་རྣམ་གསུམ་དང་དབུ་ཞུ་གསོལ། རྡོ་རྗེ་སློབ་དཔོན་ནས་དྲིལ་སྤོས་བཅས་སྣ་དྲངས། རྒྱལ་ཚབ་པས་སྨན་གྱི་གཙོ་ཐོད་དམ་ལྔ་ཀ་སྣོད་གཅིག་ཏུ་ཕྱོགས་བསྡུས་བྱས་པ། ཡུམ་གྱིས་རྣམ་བུམ། རྒྱལ་ཐིབས་སོགས་ཀྱིས་སྐུ་གསུང་ཐུགས་རྟེན། གཏོར་ཆེན། ཚོན་སྐུད་སྟོད་སྨད་སྒབ་སྐོར། ཕུར་པ་བཅུ། རལ་གྲི་བཞི། མདའ་དར་མེ་ལོང་ཅན་བཞི། མར་མེ་བཅུ་གཉིས། མ་ཏྲཾ་སྣོད་གཅིག་ཏུ་བཞག་པ་སོགས་ཐོགས་ཟིན་པ་དང་། འདུས་པ་བྱིངས་རྣམས་ཀྱང་དབུ་ཞྭ་བཅས་བཞེངས་ལ། ཡེ་ཤེས་ལྷ་ཚོགས་མཐར་ཞི་རོལ་རིང་བའི་འོག་རྒྱན་འགོད་པ་རྣམས་དཀྱིལ་འཁོར་ལ་གཡས་སྐོར་ལན་གསུམ། མདུན་ནས་དཀྱིལ་འཁོར་ལ་ཕྱོགས་པ་རེ་བཅས་གྲུབ་ནས། སློབ་དཔོན་དཀྱིལ་འཁོར་མདུན་ཕྱོགས་སུ་འཁོད་ལ་སྨན་སྒྲུབ་སྐབས་ཐོག་མར་སྨན་བཀོད་པ་ནི། ཧཱུྃ༔ དབུས་ཀྱི་བྷནྡྷ་སུ་ལ་མང་དུ༔ དྲི་ཆེན་དག་དང་སྦྱར་བའི་སྨན༔ ཛཱ་ཏི་ཕ་ལ་ཨ་རུ་ར༔
ཨ་ཀ་རུ་དང་དུ་རུ་ཀ༔ གླ་རྩི་དག་དང་སྦྱར་བའི་སྨན༔ བསྙེན་པའི་སྙིང་པོ་འཛབ་འདྲེན་ན༔ ལྷ་མོ་བཞི་ཡིས་བྱིན་གྱིས་རློབས༔ རྣམ་སྣང་ཡབ་ཡུམ་ཐུགས་དམ་བསྐང་༔ ཆོས་དབྱིངས་ཡེ་ཤེས་ཐོབ་བགྱིད་སླད༔ དབུས་ཕྱོགས་བྷནྡྷའི་གཞལ་ཡས་སུ༔ དགྱེས་ཤིང་བརྟན་པར་བཞུགས་སུ་གསོལ༔ ཤར་ཕྱོགས་བྷན་དྷ་སུ་ལ་འབྲེང་དུ༔ བྱང་ཆུབ་སེམས་དང་སྦྱར་བའི་སྨན༔ ཤ་རཱི་རཾ་དང་ཉ་རི་རཾ༔ ཅུ་གང་དང་ནི་ག་བུར་དང་༔ ཐལ་ཀར་རྡོ་རྗེ་ལ་སོགས་པ༔ བསྙེན་པའི་སྙིང་པོ་འཛབ་འདྲེན་ན༔ ལཱ་སེ་དཀར་མོས་བྱིན་གྱིས་རློབས༔ རྡོར་སེམས་ཡབ་ཡུམ་ཐུགས་དམ་བསྐང་༔ མེ་ལོང་ཡེ་ཤེས་ཐོབ་བགྱིད་སླད༔ ཤར་ཕྱོགས་བྷན་དྷའི་གཞལ་ཡས་སུ༔ དགྱེས་ཤིང་བརྟན་པར་བཞུགས་སུ་གསོལ༔ ཧཱུྃ༔ ལྷོ་ཕྱོགས་བྷན་དྷ་སུལ་གསུམ་དུ༔ མཱཾ་ས་དག་དང་སྦྱར་བའི་སྨན༔ སྙིང་ཞོ་ཤ་དང་མཁལ་ཞོ་ཤ༔ ཟླ་གོར་ཞོ་ཤ་ཙི་ཏྲ་ཀ༔ ཀ་ཀོ་ལ་དང་སྦྱར་བའི་སྨན༔ བསྙེན་པའི་སྙིང་པོ་འཛབ་འདྲེན་ན༔ མཱ་ལེ་སྔོན་མོས་བྱིན་གྱིས་རློབས༔ རིན་འབྱུང་ཡབ་ཡུམ་།ཐུགས་དམ་བསྐང་༔ མཉམ་ཉིད་ཡེ་ཤེས་ཐོབ་བགྱིད་སླད༔ ལྷོ་ཕྱོགས་བྷན་དྷའི་གཞལ་ཡས་སུ༔ དགྱེས་ཤིང་བརྟན་པར་བཞུགས་སུ་གསོལ༔
ཧཱུྃ༔ ནུབ་ཕྱོགས་བྷན་དྷ་སུལ་མེད་དུ༔ པདྨ་རཀྟ་སྦྱར་བའི་སྨན༔ ཙནྡན་སྨུག་པོ་ལི་ཤི་དང་༔ སྐྱུ་རུ་ར་དང་སྟར་བུ་དང་༔ རྒུན་འབྲུམ་ལ་སོགས་སྦྱར་བའི་སྨེན༔ བསྙེན་པའི་སྙིང་པོ་འཛབ་འདྲེན་ན༔ གྷི་རྟི་དམར་མོས་བྱིན་གྱིས་རློབས༔ སྣང་མཐའ་ཡབ་ཡུམ་ཐུགས་དམ་བསྐང་༔ སོར་རྟོག་ཡེ་ཤེས་ཐོབ་བགྱིད་སླད༔ ནུབ་ཕྱོགས་བྷན་དྷའི་གཞལ་ཡས་སུ༔ དགྱེས་ཤིང་བརྟན་པར་བཞུགས་སུ་གསོལ༔ ཧཱུྃ་བྱང་ཕྱོགས་བྷན་དྷ་རྒྱ་གྲམ་དུ༔ དྲི་ཆུ་དག་ལ་སྦྱར་བའི་སྨན༔ བདུད་རྩི་དྲི་ཆུ་བྲག་ཞུན་དང་༔ ཅོང་ཞི་དང་ནི་གུར་གུམ་དང་༔ ལྕེ་སོག་དཀར་པོ་ལ་སོགས་པ༔ བསྙེན་པའི་སྙིང་པོ་འཛབ་འདྲེན་ན༔ ནི་རྟི་ལྗང་གུས་བྱིན་གྱིས་རློབས༔ དོན་གྲུབ་ཡབ་ཡུམ་ཐུགས་དམ་བསྐང་༔ བྱ་གྲུབ་ཡེ་ཤེས་ཐོབ་བགྱིད་སླད༔ བྱང་ཕྱོགས་བྷནྡྷའི་གཞལ་ཡས་སུ༔ དགྱེས་ཤིང་བརྟན་པར་བཞུགས་སུ་གསོལ༔ ཧཱུྃ་སྨན་རྣམས་སྣ་ཚོགས་ཐ་དད་པ༔ སོ་སོའི་ཡོན་ཏན་བསམ་མི་ཁྱབ༔ རྩ་བ་བརྒྱད་ལ་ཡན་ལག་སྟོང་༔ སྡུག་བསྔལ་ནད་ཀྱི་གསོས་སུ་ཆེ༔ རྩ་གསུམ་ཡོངས་རྫོགས་དཀྱིལ་འཁོར་དུ༔ དགྱེས་ཤིང་བརྟན་པར་བཞུགས་སུ་གསོལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ། ར་ས་ཡ་ན་ས་མ་ཡ་ཏིཥྛ་ལྷན༔ ཅེས་འགོད་ཚིག་སྔ་ཚན་དང་བསྟུན་ཐོག་
མར་དབུས་ཀྱི་བྷནྡྷ་ལྡིང་ཁྲི་བར་མའི་མཎྜལ་ཚོམ་བུའི་སྟེང་རྐང་གསུམ་བཞག་པ་ལ་དཔྲལ་བ་མདུན་བསྟན་གྱིས་བཀོད། དེ་ནས་ཤར་ཕྱོགས་སོགས་ཕྱོགས་བཞིར་དཔྲལ་བ་ནང་དུ་བསྟན་ལ་བཀོད། ཧཱུྃ༔ སྨན་རྣམས་སྣ་ཚོགས་སོགས་ཀྱི་སྐབས་ལ་ཐོད་པའམ་སྣོད་གཞན་ཏུ་ཤར་ལྷོར་ཆང་སྣ་དང་ཕབ། ལྷོ་ནུབ་ཏུ་འོ་མ་དང་མེ་ཏོག་གི་བཅུད་སྦྲང་རྩིས་མཚོན་པའི་མངར་གསུམ། ནུབ་བྱང་དུ་རིན་ཆེན་ཕྱེ་མ། བྱང་ཤར་དུ་ཆུ་སྣ་རྣམས་སམ། བཞི་ཀ་མེད་ཀྱང་གཞུང་འདིའི་དངོས་བསྟན། འབྲུ་ཆང་། རྒུན་ཆང་། སྦྲང་ཆང་། བུ་རམ་བཅས་ཆང་སྣ་བཞི་དང་། བདུད་རྩི་ལྔའི་ཕབ་རྣམས་མེད་དུ་མི་རུང་བས་དེ་དག་བཞག་པས་ཆོག །བར་མཚམས་གཞན་རྣམས་སུ་སྨན་ཕྱེ་ཐོད་པར་མ་ཤོང་བ་རྣམས་དང་། ཕབས་གཏའ་ཡོད་ན་སྣོད་གཙང་མར་ཆུ་སྣ་དང་སྦྱར་ཏེ་དབུས་ཀྱི་ཐོད་པའི་ཁར་བཞག །ཐོད་པ་རྣམས་ཀྱི་སྟེང་གཟུངས་ཐག་གིས་སྦྲེལ་ལ་གཙོ་བོའི་གཟུངས་ཐག་གི་སྣེ་གཉིས་རྡོར་སློབ་དང་རྒྱལ་ཚབ། ཕྱོགས་བཞིའི་རྒྱལ་ཚབ་རིགས་བཞིའི་ཕྱག་ཏུ་སླེབ་པ་དང་། སྨན་གྱི་ཕོ་བྲང་དང་ཚངས་པ་བརྒྱ་བྱིན་བར་དུ་དམུ་ཐག་དཀར་པོས་སྤྲེལ། །སྒྲུབ་ཆེན་རྐྱང་པའི་སྐབས་སྨན་བཀོད་པ་རྣམས་དོར་རོ། །དེ་ནས་རྒྱན་འགོད་དངོས་ནི་དབྱངས་སྙན་བཅས། ཧཱུྃ༔ རྩ་གསུམ་ཐུགས་ཀྱི་ནོར་བུའི་དཀྱིལ་འཁོར་དུ༔ བསྒྲུབ་པའི་རྫས་མཆོག་ཡིད་འོང་བཀོད་པ་ནི༔ རྣམ་རྒྱལ་བུམ་པ་ཕོ་བྲང་གཞལ་ཡས་ཁང་༔ རྩ་གསུམ་ལྷ་ཚོགས་བཞུགས་པའི་གནས་སུ་གསལ༔ བླ་མ་ཡི་དམ་སྐུ་འབགས་སྐུ་ཡི་རྟེན༔ དམ་རྫས་བདུད་རྩི་གསུང་མཆོག་གསང་བའི་རྫས༔
ཤེལ་དང་མེ་ལོང་དྲི་མེད་སྐྱོན་བྲལ་ཐུགས༔ ཕྱི་ནང་གསང་གསུམ་ཀུན་བཟང་མཆོད་སྤྲིན་གཏིབས༔ སྨན་རཀ་གཏོར་ཚོགས་ཐུགས་དམ་གཉན་པོ་སྐོང་༔ རྡོར་དྲིལ་རྔ་དུང་རོལ་མོ་མཆོད་པའི་སྒྲ༔ ཕུར་པ་རལ་གྲི་མདའ་དར་བར་ཆད་སེལ༔ མེ་ལོང་ཚོན་སྐུད་རྒྱན་རྫོགས་རྟགས་ཀྱི་རྒྱ༔ གདུགས་དང་རྒྱལ་མཚན་མཛེས་ཤིང་ཡིད་དུ་འོང་༔ ཡོལ་བ་བླ་བྲེ་ལྔ་ལྡི་སྣ་ཚོགས་བྲེས༔ དབུ་རྒྱན་ཅོད་པན་རྒྱན་རྫོགས་ཕྲིན་ལས་རྫོགས༔ མཚན་ལྡན་གཟུངས་མ་ཡིད་འོང་བདེ་བའི་ལམ༔ བཟླས་པའི་གྲོགས་དང་གིང་ཆེན་འདོད་པ་སྒྲུབ༔ ཐམས་ཅད་ལྷུན་གྲུབ་བདེ་ཆེན་རོལ་པའི་ངང་༔ ཕོ་བྲང་གཞལ་ཡས་འདིར་ནི་རྣམ་པར་བཀོད༔ ཞི་རྒྱས་དབང་དྲག་ཕྲིན་ལས་ཡོངས་རྫོགས་ཤོག༔ ཅེས་བརྗོད་ལ་ལྡིང་ཁྲི་གོང་མའི་དབུས་སུ་ཡོད་ན་སྒྲུབ་རྟེན་སྲོག་འཁོར་བླ་རྡོའི་བཅས། མེད་ན་སྐུ་གསུང་ཐུགས་རྟེན། གཡས་ཕྱོགས་སུ་རྣམ་བུམ། གཡོན་ཏུ་གཏོར་ཆེན། །མདུན་ཏུ་ཚེ་འབྲང་ཚེ་ཆང་ཚེ་རིལ་སོགས་ཚེ་སྒྲུབ་བདུད་རྩིའི་སྙིང་པོའི་བཅས་བཤམ། རྒྱབ་ཏུ་ཐོད་ཆང་མེ་ལོང་དང་བཅས་པ་རྣམས་བཀོད། སྒྲུབ་རྐྱང་སྐབས་སྟེང་དུ་སྐུ་གསུང་ཐུགས་རྟེན་གཞན་རྣམས་ལྡིང་ཁྲི་བར་མར་བཀོད། བང་རིམ་འོག་མའི་དཀྱིལ་འཁོར་ཀྱི་མཐའ་སྐོར་ཕྱོགས་བཞིར་ཞི་རྒྱས་དབང་དྲག་གི་གཏོར་མ་བཞི་བཀོད། དེ་རྒྱབ་ཤར་དུ་ཆུ་གཉིས་ཉེར་སྤྱོད། ལྷོར་འདོད་ཡོན་རྣམ་ལྔ། བྱང་དུ་ཁྲག་གི་མཆོད་ཡོན་སོགས་དྲག་པོའི་མཆོད་
རྫས་བཤམས་ལ་སྒབ་སྐོར་སྟོད་ཞི་ཆས། སྨད་དྲག་ཆས་སོགས་ཕྱག་ལེན་ལྟར་དཀྲི། ཕྱོགས་བཞིར་རལ་གྲི་དང་མར་མེ་བཞི། ཟུར་བཞིར་མདའ་དར་མེ་ལོང་ལྡན་པ་བཞི་རྣམས་ཚོན་སྐུད་ཀྱིས་དྲྭ་བར་སྦྲེལ། སྟེང་དུ་གདུགས། ཕྱོགས་མཚམས་སུ་རྒྱལ་མཚན་འཕན་དང་བ་དན་རུ་མཚོན་སོགས་བཞི་བཞིས་བརྒྱན། སྲུང་བའི་ཕུར་བུ་བཅུ་པོའང་དཀྱིལ་འཁོར་གྱི་མཐར་སྔར་གདབ་པའི་གོ་རིམ་ལས་མ་འཆུགས་པ་དང་། མ་ཊཱཾྭ་ཡང་དེ་བཞིན་ཏུ་བཀོད། མདུན་ཕྱོགས་འཕྲུལ་སྟེགས་ཆེ་ཞིང་ཡངས་པའི་དབུས་སུ་དཔལ་གཏོར། དེའི་གཡས་ནས་གཡས་སུ་མགོན་པོ་ལེགས་ལྡན། ཆོས་སྐྱོང་སྤྱིའི་གཏོར་སྦུངས། ཆད་མདོ། སྨན་ཐོད། གཡོན་ཏུ་སྔགས་སྲུང་ཤ་ཟ། དམ་ཅན་སྒོས་ཀྱི་གཏོར་སྤུངས། བརྟན་མ། རཀྟའི་སྣོད་བཅས་བཤམ། དཀྱིལ་འཁོར་ཕྱི་རོལ་དུ་སྟོང་མཆོད་སོགས་མཆོད་པའི་བཀོད་པ་གང་རྒྱས་ཅི་མཛེས་ལས་དམིགས་སུ་བསལ་མི་དགོས་ཀྱང་། ཕྱག་རྒྱུན་ཏུ་སྟོང་མཆོད་རྒྱས་པར་ཕྱོགས་བཞིར་སྟེགས་བུ་བང་རིམ་བཅུ་གཅིག་རེ་དང་། འབྲིང་པོར་བདུན། ཐ་མ་གསུམ་དང་ལྡན་པར་བྱས་པའི་སྟེང་ནས་རིམ་བཞིན་སྨན། གཏོར་མ། རཀྟ། རིག་མ་བཅུ་དྲུག་དང་རྫས་རྟགས་སྣ་བདུན་སོགས་འབུར་དུ་བཏོད་པ། མ་འཛོམ་ན་རི་མོར་བྲིས་པ། མཆོད་ཡོན། ཞབས་བསིལ། མེ་ཏོག །བདུག་སྤོས། དྲི་ཆབ། ཞལ་ཟས། ཚོགས་ཤ་དུ་མ་བཅས་ཐམས་ཅད་ཀྱི་མཐར་མར་མེའི་ཕྲེང་བ་བཅས་བརྒྱ་རྩ་རེ་དང་། །ཕྱོགས་བཞིའམ་མདུན་དུ་ཞལ་ཟས་རྒྱན་སྤྲོས་གཟབ་བ་བཞིའམ་གསུམ། མདུན་ཁོ་ནར་བརྗེ་
ཞིང་གསོ་རྒྱུའི་ཆུ་གཉིས་ཉེར་སྤྱོད། ཚོགས་ཀྱི་གདན་ཡངས་པ་ཞིང་གི་ཁེབས་བཅས། སྔོན་འགྲོ་འབུལ་གཏོར་ཕལ་ཆེར་བཤམས་པའི་ལྕོགས་སྟེགས་ཁེབས་ལྡན་ཁྱེར་བཞག་བདེ་བ་སོགས་འོག་ཏུ་དགོས་པའི་རིགས་ཐམས་ཅད་བཀོད་ཅིང་འདུ་བྱའོ། །སྐབས་འདིར་བྱིན་རླབས་བརྟན་བཞུགས་རྒྱས་པར་བྱ་བར་གསུངས་ཀྱང་སྤྱི་ཁྱབ་ཙམ་དུ། བླ་མེད་མཆོག་གི་མཆོད་པ་དམ་པ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ན་མཿསརྦ་ཏ་ཐཱ་ག་ཏེ་བྷྱོ་བི་ཤྭམུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྦ་ར་་ཨི་མཾ་ག་ག་ན་ཁཾ་སྭཱ་ཧཱ། ཞེས་ནམ་མཁའ་མཛོད་ཀྱི་སྔགས་རྒྱས་མཁའ་ཁྱབ་ཏུ་སྤེལ། ཡེ་དྷརྨཱ་བརྗོད་ཅིང་མེ་ཏོག་འཐོར་རོ། །འདི་ཉིན་སྔ་དྲོ་རྡོ་རྗེ་རྒྱལ་ཐེབས་དཔོན་སློབ་ཁ་ཤས་ཀྱིས་ཞི་བའི་སྦྱིན་སྲེག་བྱ་བ་ཡིན་ཀྱང་སྨན་སྒྲུབ་སྐབས་བཏགས་བཙག་ཉིན་བྱའོ། །བཞི་པ་སྒྲུབ་པ་པོ་རྣམས་ལས་ལ་འཇུག་རུང་གི་བྱ་བ་གྲལ་བཤམ་མངའ་གསོལ་གནས་སུ་འཁོད་པ་ནི། ལས་རྡོར་གྱིས་ཐོད་ཆང་མར་ཟེགས་ཅན་དང་། ཕུད་སྐྱོགས་ཐོགས། རྒྱལ་ཚབ་བམ་རྒྱལ་ཐེབས་ཀྱི་གཙོ་བོས། ཞྭ་ཆོས་བཅས་གྲལ་གཤམ་དུ་བཞེངས་ཏེ་གཏོང་ཐུན་སྔོན་དུ་འགྲོ་བའི་དབྱངས་སྙན་པོར་ལེན་ཚུལ་གྱིས། ཀྱེ་ཧོ༔ རྡོ་རྗེ་སློབ་དཔོན་སངས་རྒྱས་ཀུན་གྱི་གཙོ༔ སངས་རྒྱས་ལམ་དུ་འདྲེན་པའི་ལྕགས་ཀྱུ་ཆེ༔ གསང་ཆེན་དབྱིངས་ཀྱི་ལམ་དུ་སྦྱོར་མཛད་པ༔ རྡོ་རྗེ་སློབ་དཔོན་གནས་འདིར་བརྟན་པར་བཞུགས༔ རྡོ་རྗེ་རྒྱལ་ཐེབས་ལས་ཀྱི་རྒྱལ་
ཐེབས་དང་༔ རྡོ་རྗེ་མཚམས་པ་མཚན་ལྡན་གཟུངས་མ་དང་༔ ཕྲིན་ལས་གར་གིང་ལས་ཀྱི་སྒྲོལ་གིང་དང་༔ རྡོ་རྗེ་བྱན་པོ་རྡོ་རྗེ་རྡུལ་ཕྱགས་དང་༔ ཚོགས་གཉེར་གཡོས་པ་ཕྱག་ཚང་སྤོས་འཛིན་སོགས༔ གནས་འདིར་ཐམས་ཅད་ལྷུན་གྱིས་གྲུབ་པར་བཞུགས༔ ཞེས་པའི་ཚིག་དང་བསྟུན་ལ་བདུད་རྩིའི་སྐྱེམས་སོ་སོར་དྲང་ངོ་། །དེ་ནས་མཚན་ཉིད་དང་ལྡན་པའི་རིག་མ་རྒྱན་གྱིས་སྤྲས་པ་དངོས་སམ་གཞུང་གིས་ཁོངས་ཙམ་དུ་གཟུགས་བརྙན་འབུར་རམ་རི་མོར་བྲིས་པ་འདུ་བྱས་ལ། ལས་ཀྱི་རྒྱལ་ཐེབས་ཀྱིས་དབྱངས་དང་བཅས། ཀྱེ་ཧོཿ གཟུངས་མ་མཚན་ལྡན་ཡིད་འོང་ལྷ་མོའི་གཟུགས༔ རྩ་བཟང་ཡིད་འོང་ལྟ་བས་ཚིམས་བྱེད་མ༔ ཐབས་དང་ཤེས་རབ་དབྱེར་མེད་བདེ་བ་སྐྱེད༔ རྡོ་རྗེ་སློབ་དཔོན་དཔའ་བོ་ཁྱེད་ལ་འབུལ༔ ཅེས་རྡོ་རྗེ་སློབ་དཔོན་ལ་འབུལ་བ་དེ་ཡང་གཡོན་ཕྱོགས་སུ་བཀོད་དོ། །གཉིས་པ་བསྲེ་བསྣན་ནི། དབང་མ་ཐོབ་ཅིང་སྔན་ཆད་སྒྲུབ་གྲལ་དུ་མ་ཞུགས་པའི་མཆེད་གསར་བུ་རྣམས་འདུ་ཁང་གི་ཟུར་ལྟ་བུ་སློབ་དཔོན་གྱི་གསུང་ཐོས་པར་ལོགས་སུ་ཕྱེ། སློབ་དཔོན་མདུན། བདུད་རྩིའི་སྣོད། ཡུངས་ཐུན། ཌ་དྲིལ་སོགས་བཀོད་ནས་ལས་བྱང་ལྟར་སྨན་རཀ་གཏོར་གསུམ་བྱིན་རླབས་བྱ། སྐད་ཅིག་གིས་མདུན་གྱི་ནམ་མཁར་བླ་མ་ཐུགས་ཀྱི་ནོར་བུའི་ལྷ་ཚོགས་རྩ་གསུམ་རབ་འབྱམས་རྒྱ་མཚོའི་ཚོགས་དང་བཅས་པ་སྤྲིན་གྱི་ཕུང་པོ་གཏིབས་པ་ལྟར་བཞུགས་པར་གྱུར།
རྩ་བརྒྱུད་བླ་མ། ཡི་དམ། མཁའ་འགྲོ། ཆོས་སྐྱོང་རྣམས་མཚན་སོ་སོར་སྨོས་པ་དང་། སྙིང་པོའི་མཐར། ས་པ་རི་ཝཱ་ར་སརྦ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་བ་ལི༚་ཏ་ཁཱ་ཧི། ཞེས་བཏགས་ལ་རྐང་ཐོན་ཏུ་འབུལ། བསྲེ་བའི་ཆོག་ནི། སྟོན་པ་རྡོ་རྗེ་རྒྱལ་པོ་དཀྱིལ་འཁོར་གཙོ་མཆོག་ཏུ་གསལ་བའི་ །ཐུགས་ཀ་ནས། ཡི་གེ་ཧཱུྃ་ལས་ལས་ཀྱི་ཧེ་རུ་ཀ་རྔམ་ཞིང་བརྗིད་པ་འཕྲོས་པའི་ཐུགས་ཀ་ནས་ཡྃ་མཐིང་ནག་ལས་ལྕགས་ཀྱི་སྡིགས་པ་མགོ་དགུ་རྭ་བཅོ་བརྒྱད་པ་སྤྲོས་ཏེ་བདུད་རྩི་ལ་ཐིམ་པར་གྱུར། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་བ་ཛྲ་ཡཀྴ་ཀྲོ་ཏ་ཧ་ན་ཧ་ན་ཧཱུྃ་ཕཊ༔ ཅེས་བརྒྱ་རྩ་བཟླས་པས་བྱིན་བརླབ། བགེགས་བསྐྲད་པ་ནི། ཧཱུྃ༔ ཡང་དག་གསང་བའི་དཀྱིལ་འཁོར་འདིར༔ འདུ་བ་ལ་ནི་མ་གཏོགས་པ༔ འབྱུང་པོ་ཐམས་ཅད་མི་གནས་ཏེ༔ རང་རང་གནས་སུ་མྱུར་དུ་དེངས༔ ཞེས་དང་ལས་སྔགས། སུམྦྷ་ནི་བརྗོད། རོལ་མོ་གུ་གུལ་ཡུངས་ཐུན་བཅས་པས་བསྐྲད། བླ་མ་རྒྱལ་བ་སྲས་དང་བཅས་པའི་སྤྱན་སྔར་རྒྱུན་བཤགས་ཡན་ལག་བརྒྱད་པ་ཚུལ་བཞིན་བྱ་བའི་ཡིད་ཀྱིས་འདིའི་རྗེས་ཟློས་མཛོད༔ རྡོ་རྗེ་རྒྱལ་པོ་སངས་རྒྱས་དཔལ༔ སོགས་ལན་གསུམ། ཧྲཱིཿ རྒྱུ་ལམ་འབྲས་བུ་དབྱེར་མེད་པའི༔ རིན་ཆེན་གྲུ་གཟིངས་ལྟ་བུའི་ལམཿ ཐེག་མཆོག་སྒོ་འདིར་འཇུག་གོ་ཅོག༔ ལྟ་སྤྱོད་དྲི་མེད་དམ་
ཚིག་བསྲེ༔ ཞེས་བརྗོད་ལ་གསར་པ་རྣམས་ཀྱི་སྤྱི་བོར་རྡོ་རྗེ་བཞག །བྱིན་གྱིས་བརླབས་པའི་བདུད་རྩི་སྦྱིན་ལ། ཧཱུྃ༔ ཇི་སྙེད་སངས་རྒྱས་ཐམས་ཅད་དང་༔ བྱང་ཆུབ་སེམས་དང་རྡོ་རྗེ་འཛིན༔ དེ་བཞིན་སྒྲུབ་པའི་རྣལ་འབྱོར་ལ༔ གལ་ཏེ་སྙིང་རིང་བརྙས་གྱུར་ན༔ ཡཀྴ་རྡོ་རྗེ་གནོད་སྦྱིན་གྱིས༔ ཁྱོད་ཀྱི་སྙིང་ཁྲག་གཞོམ་སྟེ་འཐུང་༔ སྙིང་ལ་ཡང་དག་རབ་གནས་པའི༔ འདི་ནི་སེམས་ཅན་དམྱལ་བའི་ཆུ༔ དམ་ཚིག་བསྲུངས་མཆོག་ཉམས་ན་བརླག༔ ས་མ་ཡ༔ ཨི་དན་ན་ར་ཀ་ན་པ་ག་ཤ་སི་ཡཀྴ་ཧཱུྃ༔ བསྣན་པ་ནི། །གསར་རྙིང་གྲལ་བསྲེས་ཏེ་རང་གྲལ་དུ་འཁོད་དུ་བཅུག་ལ། དེང་ཕྱིན་ཆད་མཆེད་གསར་རྙིང་ཐམས་ཅད་སྐལ་བ་མཉམ་ཞིང་དམ་ཚིག་གཅིག་ཏུ་འདུས་པ་ཡིན་པས་དམ་ཚིག་གཞུང་བཞིན་ཏུ་བསྲུང་བར་བགྱིའོ་སྙམ་པས་འདིའི་རྗེས་ཟློས་མཛོད༔ ཧྲཱིཿ རྣམ་དག་ལྟ་སྤྱོད་བླ་མའི་བཀའ༔ རྒྱུད་ལ་མི་འགལ་དམ་ཚིག་མཆོག༔ འདི་ནི་ཀུན་མཁྱེན་མ་ཐོབ་བར༔ སྲོག་ཕྱིར་མི་གཏོང་དངོས་གྲུབ་སྩོལ༔ སརྦ་ཏ་ཐཱ་ག་ཏ། ཀཱ་ཡ་ཝཱ་ཀ་ཙིཏྟ་སིངྡྷི་ཧཱུྃ་ཨཱཿ ཞེས་བརྗོད་དུ་བཅུག་ལ། བདུད་རྩི་མཆེད་གསར་རྙིང་གཉིས་ཀར་གཡས་སྐོར་གཡོན་སྐོར་བསྣོལ་མར་དྲང་། དམ་ཚིག་གི་བསླབ་བྱ་བརྗོད་པ་ནི་རྡོར་སློབ་ཀྱིས་སྤྱི་ལྟར་རྒྱས་པར་བཤད། བསྡུ་ན། ཀྱེ། འདུས་པའི་མཆེད་ལྕམ་ཐམས་ཅད་ཉོན་
ཅིག༔ སྒྲུབ་ཆེན་གྱི་དཀྱིལ་འཁོར་ཆེན་པོ་འདིར་ཞུགས་ནས་ཉེ་རིང་ཕྱོགས་ལྷུང་ཕྲ་མ་ཚོད་ལེན་ལོག་ཆོས་ལོག་ལྟ་བག་མེད་ཀྱི་བྱ་བ་བྲེ་མོའི་གཏམ་སྨྲ་བ་ལོག་སྤྱོད་ཆང་དང་ལེ་ལོ་གཉིད་དང་རྨུགས་པ་འཐབ་རྩོད་སོགས་སྒོ་གསུམ་གྱི་བྱ་བ་ཁ་ན་མ་ཐོ་བ་ཐམས་ཅད་སྡོམ་ཞིང་༔ བརྩོན་འགྲུས་དག་སྣང་མོས་གུས་དད་པ་ངེས་འབྱུང་སོགས་དང་༔ བླ་མ་ལ་གུས་ཤིང་རྡོ་རྗེ་རྒྱལ་ཐེབས་དང་གཟུངས་མ་རྡོ་རྗེའི་མཆེད་དང་ལྕམ་དྲལ་ཐམས་ཅད་ལ་གུས་ཤིང་གདུང་སེམས་དང་ལྡན་པར་མཛོད་ཅིག༔ གསང་བའི་དཀྱིལ་འཁོར་འདི་ལྟ་བུ་བཞུགས་ནས་མཆོག་གི་དངོས་གྲུབ་དམ་པ་རྩེ་གཅིག་ཏུ་སེམས་པ་མ་གཏོགས་མཐུ་སྟོབས་ཕྲ་མོའི་དངོས་གྲུབ་བསྒྲུབ་པར་མ་སེམས་ཤིག༔ གསང་སྔགས་ཀྱི་ཆོས་ནི་ཨུ་དུམ་ཝ་རའི་མེ་ཏོག་གམ་ཡིད་བཞིན་གྱི་ནོར་བུ་བས་ཀྱང་ཆེས་དཀོན་པ་བསྐལ་པ་རྒྱ་མཚོར་རྙེད་པར་མི་འགྱུར་བའི་ཕྱིར་ན་དེང་འདིར་བརྩོན་པས་བསྒྲུབ་པར་གྱིས་ཤིག༔ ཅེས་པ་ཙམ་བརྗོད་དོ། །གསུམ་པ་ཆས་སུ་འཇུག་པ་ནི། ཞི་ཆས་དར་བེར། རིན་ཆེན་རྩེ་བྲན། དར་གྱི་ཅོད་པན། མགུར་ཆུ་དོ་ཤལ། སྐ་རགས་རྡོར་དྲིལ་བཅས་གཟུགས་སུ་བཅོས་པ་དང་དངོས། ཁྲོ་ཆས་ཐོད་པ་ཚར་གསུམ་ཕྲེང་བ། གླང་ཀོ། སྦྲུལ་ཆུན། ཞིང་ལྤགས། སྟག་ཤམ། དཔལ་འབར་མེ། མཚལ་དང་ཁྲག་ཆེན་བསྲེས་པ། དཀར་དང་ཐལ་ཆེན་བསྲེས་པ། ས་སེར་དང་ཞག་ཆེན་བསྲེས་པ།
འདེབས་སྤྱད་རྡོ་རྗེ་ཕྱེད་པ་དང་ཉི་ཟླའི་སྦར་རྣམས་རེ་རེ་བཞིན་ཐོག་སར་གྲལ་སྟབས་སུ་འཁོད། རྒྱལ་ཚབ་པས་ཞྭ་གོས་བཅས་གྲལ་གཤམ་ནས་གཏོང་ཐུན་སྔོན་ཏུ་འགྲོ་བས་དབྱངས་པོར་ལེན་ཚུལ་གྱིས། ཧཱུྃ༔ གདོད་ནས་མ་སྐྱས་ཐུགས་རྗེ་ཞི་བའི་དབྱིངས༔ སེམས་ཅན་དོན་ལ་སྤྲུལ་བསྒྱུར་སྣ་ཚོགས་ཀྱི༔ ཐབས་དང་ཤེས་རབ་ཕྱག་རྒྱའི་རྟགས་མཆོག་དང་༔ ཡེ་ཤེས་ལྔ་ལྡན་མཛེས་པའི་རྒྱན་ཆ་འདིས༔ སྟོན་པ་རྡོ་རྗེ་རྒྱལ་པོ་ཡབ་ཡུམ་དང་༔ དཔའ་བོ་དཔའ་མོ་རྣམས་ལ་མངའ་གསོལ་ལོ༔ ཞེས་ཞི་ཆས་རྣམས་རྡོ་རྗེ་རྒྱལ་པོ་ནས་བརྩམས་ཏེ་རིམ་པར་འབུལ། ཧཱུྃཿ ཐོད་ཕྲེང་སྐུ་གསུང་ཐུགས་ཀྱི་རྟགས་ཀྱི་རྒྱན༔ སྟོབས་བཅུའི་དོན་གྱི་ཐེག་ཆེན་ཀོ་རློན་རྒྱན༔ དྲེགས་པའི་བདུད་འདུལ་སྦྲུལ་གྱི་ཆུན་འཕྱངས་ལྡན༔ ཚུལ་ཁྲིམས་གོ་ཆ་སྟོང་ཉིད་གཡང་གཞིའི་གོས༔ རྟག་ཆད་མཐའ་བྲལ་དཔའ་བོའི་སྟག་ཤམ་མཛེས༔ གཟི་ཆེན་དོན་དམ་བཅུད་ཀྱི་རྒྱན་དུ་ཆེ༔ ཆགས་བྲལ་སྒྱུ་མར་རོལ་པ་རཀྟས་མཚན༔ གདུག་བྱེད་ཐབས་མཆོག་ཐལ་བའི་ཚོམ་བུར་ལྡན༔ ཐུགས་རྗེ་ཡེ་ཤེས་དབྱིངས་འདུལ་མེ་ཕུང་འབར༔ ཁྲོ་རྒྱལ་དུར་ཁྲོད་རབ་འཇིགས་ཆས་སུ་ཞུགས༔ རང་རང་རྟགས་ཀྱི་ཆ་ལུགས་རྫོགས་པ་དང་༔ ཉོན་མོངས་མ་སྤངས་རང་དག་རྒྱན་དུ་ཆེ༔ དཀྱིལ་འཁོར་ལྟ་རྣམས་དགྱེས་ཕྱིར་ཕྱག་རྒྱར་འབུལ༔ ཅེས་པས་ཁྲོ་
ཆས་རྣམས་སློབ་དཔོན་ནས་བརྩམས་འདུས་པ་ཀུན་ལ་འགྲིམས་ཤིང་རྒྱན་དང་བགོ་བའི་ཚུལ་བྱ། དཔྲལ་བར་རཀྟའི་ཉི་ཟླ། མ་ཁུར་ཆོས་གཉིས་ལ་ཐལ་ཆེན་རྡོ་རྗེ་ཕྱེད་པ་རེ། ཁལ་ཞག་གི་པདྨ་འདབ་བརྒྱད་བྱའོ། །འདིའི་སྨན་སྒྲུབ་གཏེར་གཞུང་ལས་བསྲེ་བསྣན་དང་ཆས་འཇུག་སྤྱི་གཞུང་ལྟར་བྱ་བར་གསུངས་པས་དགོངས་འདུས་ནས་ཁ་བསྐངས་པའོ། །ལྔ་པ་ཡེ་ཤེས་དབབ་ཅིང་སྣོད་བཅུད་བྱིན་རློབ་པ་ནི། སློབ་དཔོན་སོགས་ཀྱིས་དཀྱིལ་འཁོར་བསྐོར། འདུས་པ་རྣམས་ཀྱང་བཞེངས་ལ་ཞྭ་གོས་བསྟར། དབྱངས་རོལ་གཡབ་དར་ཌ་དྲིལ་བཅས། སྔོན་གྱི་བསྐལ་མ་ལན་གསུམ་དང་། ཧཱུྃ་ཧྲཱིཿ བདེ་བ་ཆེན་པོའི་ཞིང་ཁམས་སུ། །བརྟན་གཡོ་ཀུན་གྱི་ཁྱབ་བདག་ཆེ། །ཐོག་མའི་འདྲེན་པ་འོད་མི་འགྱུར། །ཆོས་ཀྱི་སྐུ་ཡིས་བྱིན་ཕོབ་ཅིག །ཡེ་ཤེས་འོད་ལྔའི་གཞལ་ཡས་སུ། །སྐུ་ལྔ་མི་འགྱུར་སྤྱན་རས་གཟིགས། །ངེས་པ་ལྔ་ལྡན་ཟུང་འཇུག་སྐུ། །ལོངས་སྤྱོད་རྫོགས་སྐུས་བྱིན་ཕོབ་ཅིག །དུས་གསུམ་རྒྱལ་བ་ཐམས་ཅད་ལས། །རྨད་བྱུང་ཐུགས་རྗེས་འགྲོ་བ་འདུལ། །འཆི་མེད་འཇའ་ལུས་རྡོ་རྗེའི་སྐུ། །པདྨ་འབྱུང་གནས་བྱིན་ཕོབ་ཅིག །ཨོ་རྒྱན་དངོས་ཀྱིས་བྱིན་བརླབས་ཤིང་། །བཀའ་འདུས་སྤྱི་ཏིའི་བཀའ་བབས་གཏད། །རྒྱལ་སྲས་མཆོག་གི་རྣམ་རོལ་ཅན། །མཆོག་གྲུབ་རྒྱལ་པོས་བྱིན་ཕོབ་ཅིག །དུས་གསུམ་རྒྱལ་ཀུན་དགྱེས་པའི་ཡུམ། །ཟབ་ཡངས་ཐེག་པའི་མཛོད་ཀུན་འཛིན། །སྐལ་
ལྡན་བྱིན་རློབ་ལུང་སྟོན་མཛོད། །མཁར་ཆེན་མཚོ་རྒྱལ་བྱིན༴ །རྒྱ་བོད་གུ་རུའི་སྤྱན་སྔ་རུ། །ཕུལ་བྱུང་ཞབས་ཏོག་ལེགས་བསྒྲུབས་ཏེ། །གསུང་གི་གསང་བ་སྡུད་མཛད་པའི། །ཨཱ་རྱ་ས་ལེས་བྱིན༴ །ལྡན་མའི་རིགས་འཁྲུངས་སྐད་གཉིས་སྨྲ། །མི་བརྗེད་གཟུངས་ཀྱི་མངའ་བདག་ཅན། །ཤོག་སེར་ཡི་གེའི་རིགས་སུ་སྤེལ། །རྩེ་མང་ལོ་ཙཱས༴ །པད་འབྱུང་ཐུགས་རྗེའི་སྒྱུ་འཕྲུལ་ལས། །སྙིགས་དུས་གདུལ་དཀའ་འདུལ་མཛད་ཕྱིར། །ཟབ་གཏེར་བསྟན་པ་སྤེལ་མཛད་པའི། །ཆོས་རྗེ་གླིང་པས༴ །གུ་རུའི་ལུང་བསྟན་ཇི་བཞིན་དུ། །བདག་དོན་མངོན་གྱུར་ཚད་མེད་ཀྱི། །ཐུགས་རྗེས་འགྲོ་བའི་དོན་མཛད་པའི། །ཆོས་བདག་སྐྱེས་བུས༴ །རང་ལས་ཡེ་ཤེས་ཤར་བའི་སྐུ། །མཆོག་གི་དངོས་གྲུབ་སྒྲུབ་མཛད་ཅིང་། །མི་འབྲལ་རྩེ་གཅིག་ཐུགས་དམ་ཅན། །ཡི་དམ་ལྷ་ཡིས་བྱིན༴ །གནས་ལུགས་དྭངས་མའི་སྲོག་ཟིན་པས། །སྒྲུབ་པ་པོ་ལ་མི་གཡེལ་འཁོར། །རྩེ་གདུང་བྱམས་པའི་ཕྲིན་ལས་མཛད། །མཁའ་འགྲོ་སྲུང་མས་བྱིན་ཕོབ་ཅིག །རིག་འཛིན་བརྒྱུད་པ་ཐུགས་རྗེ་ཅན། །ལུས་ལ་སྐུ་ཡི་བྱིན་གྱིས་རློབས། །བདེ་དྲོད་རང་འབར་བྱིན་གྱིས་རློབས། །ངག་ལ་གསུང་གི་བྱིན༴ །ནུས་པ་ཐོབ་པར༴ །ཡིད་ལ་ཐུགས་ཀྱི་བྱིན༴ །གནས་ལུགས་
རྟོགས་པར་བྱིན༴ །རྟོགས་པས་བདག་རྒྱུད་གྲོལ་བ་དང་། །མཁྱེན་བརྩེས་གཞན་དོན་ནུས་པ་ཡིས། །བདག་གཞན་དོན་གཉིས་ལྷུན་གྲུབ་པར། །རིག་འཛིན་བརྒྱུད་པས་བྱིན་གྱིས་རློབས། །རྩ་གསུམ་དམ་ཅན་ཆོས་སྐྱོང་ཚོགས། །ཐུགས་རྗེ་ཐུགས་དམ་མ་གཡེལ་བར། །བྱིན་རླབས་ནུས་པའི་ཆར་ཆེན་ཕོབ། །དཀྱིལ་འཁོར་འདི་ལ་བྱིན་ཅིག་ཕོབ། །རྣལ་འབྱོར་བདག་ལ་དབང་ཞིག་སྐུར། །སྒྲུབ་རྫས་རྣམས་ལ་བཅུད་ཅིག་སྩོལ། །སྣང་གསལ་མར་མེར་མདངས་ཤིག་ཕྱུང་། །གཏོར་མཆོད་རྣམས་ལ་བྱིན་གྱིས་རློབས། །སྒྲུབ་གནས་གཉན་པོར་གཟི་བྱིན་སྐྱེད། །མཆོག་ཐུན་དངོས་གྲུབ་ཆར་ལྟར་ཕོབ། །རྩ་སྔགས་མཐར། ཨཱ་བེ་ཤ་ཡ་ཨ་ཨཱཿ བཏགས་པ་བརྗོད། མོས་གུས་དྲག་པོ་དང་དཀྱིལ་འཁོར་ལ་བསྐོར་བ་ལན་གསུམ་མཐར་རང་གྲལ་དུ་འཁོད་ལ་འཛབ་དབྱངས་ལན་གསུམ་བྱ། །དེ་ནས་ལས་བྱང་གཤམ་ལྟར་བདག་བསྐྱེད་བསྡུ་ལྡང་། །དགེ་བསྔོ་བྱས་པས་ཉིན་གཉིས་པ་གྲུབ། །གལ་ཏེ་རྡུལ་ཚོན་དང་འགྲེལ་ན་ཉིན་གཉིས་པ་ལ་རྡུལ་ཚོན་བླུགས་པ་སོགས་གཞན་གྱིས་རིགས་འགྲེ། དེ་ཡན་ཆད་ཀྱིས་བསྙེན་པ་དང་ཉེ་བར་བསྙེན་པའི་བྱ་བ་རྣམས་རྫོགས་པའོ། །གཉིས་པ་དངོས་གཞི་སྒྲུབ་པ་ལ་གཉིས། རྩ་བ་དང་། །ཡན་ལག་གོ། །དང་པོ་ལ་གསུམ། ཕྲིན་ལས་ཛབ་བསྙེན་དང་བཅས་པས་དངོས་གྲུབ་བསྒྲུབ་པ། བར་ཆད་བརྟག་ཅིང་བསལ་བ། དངོས་གྲུབ་ཀྱི་མཚན་མ་བརྟག་པའོ། །དང་པོ་ནི། ཉིན་གསུམ་པ་ནས་བརྩམས།
ཕྲིན་ལས་ཀྱི་གཞུང་བསྲངས་ཏེ་ཉིན་ལན་གསུམ་མཚན་གསུམ་སྟེ་ཐུན་དྲུག་གམ། ཉིན་གཉིས་མཚན་གཉིས་ཏེ་ཐུན་བཞི་གང་བདེ་བྱ་བའི་ཉིན་ཐུན་དང་པོར་བརྒྱུད་འདེབས་དང་སྔོན་གཏོར་བཏང་བ་སོགས་ཕྲིན་ལས་དབུ་ནས་བརྩམས་དབྱངས་རོལ་སོགས་རྒྱས་པར་བྱས་ཏེ་ཛབྲ་ལ་སླེབས་པ་དང་ཛབྲ་དབྱངས་བཅས་གཟུངས་ཐག་སློབ་དཔོན་དང་རྒྱལ་ཚབ་པར་ཕུལ། བསྙེན་པ་གྲུབ་ཉེ་བ་དང་རྒྱལ་ཚབ་གཟུངས་ཐག་ཐུན་དཔོན་པར་སྤྲད་ལ་དེ་ནས་བཟུང་སྟེ་དངོས་གྲུབ་ལེན་ཆོག་མ་བྱས་པར་ཉིན་མཚན་ཀུན་ཏུ་མ་ཆད་པའི་རེས་སྐོར་བྱ། ཐུན་མཐར་སྟོང་ཚིགས་མཆོད་བསྟོད་ཕུལ་རྗེས་བཤགས་པ་ནི། ཨེ་མ་ཧོཿ རྩ་གསུམ་ཐུགས་ཀྱི་ནོར་བུའི་དཀྱིལ་འཁོར་དུ༔ རྣལ་འབྱོར་བདག་ཅག་མ་རིག་ལས་དབང་གིས༔ བསྙེན་སྒྲུབ་ཟབ་མོ་བྱེད་པར་དམ་བཅས་ཀྱང་༔ མ་རིག་མ་རྟོགས་ཚོད་ཡོད་ལེ་ལོ་སོགས༔ དམ་ཚིག་འགལ་བ་ཅི་དང་ཅི་མཆིས་རྣམས༔ རྩ་གསུམ་དཀྱིལ་འཁོར་ལྷ་ཡི་སྤྱན་སྔར་བཤགས༔ ཚངས་པར་ཟུང་ལ་དངོས་གྲུབ་སྩལ་དུ་གསོལ༔ བཛྲ་ས་མ་ཡ་ཧོ༔ ཞེས་དང་ཡིག་བརྒྱ་བརྗོད། དམ་བཅའ་བ་ནི། ཧཱུྃ་རྩ་གསུམ་ལྷ་ཚོགས་མ་ལུས་དགོངས་མཛོད་ལ༔ ཁྱེད་འདྲ་ལྟ་བུར་བདག་ཀྱང་འགྲུབ་གྱུར་ཅིག༔ རྩ་གསུམ་དཀྱིལ་འཁོར་ལྷ་ཚོགས་ཐོབ་བྱའི་ཕྱིར༔ སྲོག་ཕྱིར་མི་བཏང་སྒྲུབ་ལགས་བྱིན་གྱིས་རློབས༔ སྙིགས་མའི་དུས་ཀྱི་ཐ་མ་འདི་ཉིད་དུ༔ སངས་རྒྱས་རྣམས་ཀྱི་མཛད་པ་བདག་
གིས་སྤྱད༔ བདག་གི་བསམ་པ་སྐྱོན་མེད་འགྲུབ་གྱུར་ཅིག༔ འདའ་ཀ་ཁྱོད་ཀྱི་གསང་བ་གསུམ་དུ་བསྲུང་༔ དམ་ཚིག་ཟུང་འབྲེལ་ཐུགས་དམ་ལུ་གུ་རྒྱུད༔ རིག་པ་སྲོག་བསྡུས་སྐུ་གསུམ་མ་ཐོབ་བར༔ ལུས་དང་སྲོག་གི་ཕྱིར་ཡང་མི་བཏང་ངོ་༔ ས་མ་ཡ་ཧཱུྃ༔ ཞེས་བརྗོད་པ་འདི་ཐུན་ཕྱི་མ་རྣམས་ལའང་དགོས་སོ། །སླར་ཐུན་ལ་འཇུག་པའི་ཚེ་མཆོད་པ་བྱིན་རླབས་ནས་དབུ་བཟུང་བཟླས་པའི་བར་བསྐྱར། ཕྱི་དྲོའི་བཟླས་པ་གྲུབ་ནས་སྟོང་ཚིགས་བཤགས་པ་དམ་བཅའ་གོང་ལྟར་བྱས་ལ་བཀའ་སྲུང་སྤྱི་དང་བྱེ་བྲག་ལེགས་ལྡན་དང་ཤ་ཟའི་གཏོར་ཆོག་བཏང་། ཚོགས་མཆོད་འབུལ་ཞིང་ལྷག་མ་བཙོན་ཏུ་འཛིན། སྲུང་མའི་གཏོར་སྐྱོང་། ཆད་བརྟན་རྟ་བྲོ། གཏོང་རག་མཆོད་བསྟོད་མདོར་བསྡུས། ནོངས་བཤགས། བརྟན་བཞུགས། བསྔོ་སྨོན། བཀྲ་ཤིས་བར་གྲུབ་ནས་འོག་ཏུ་བཤད་པ་ལྟར་ཉུ་ལེ་བསྐྲད་ཅིང་བྱིན་འབེབས་དང་ཛབ་དབྱངས་བྱས་ལ་འཚོགས་གྲོལ། མཚན་ཐུན་དང་པོ་ལ་སྐྱབས་སེམས་དང་མཚམས་གཅོད་ནས་དབུ་བཟུང་། གཞན་ཉིན། །ཐུན་དང་འདྲ་བ་ལས་ཐོར་ཐུན་གཤམ་དུ་ཚོགས་མཆོད་ཉུ་ལེ་བསྐྲད་པ་བྱིན་འབེབས་ཛབ་དབྱངས་བཅས་བྱ། བསྙེན་རྒྱུན་པ་ཇི་ཙམ་བརྗེ་ལེན་བྱས་ཀྱང་སྔ་མ་རྣམས་གྲལ་མདོར་བཞེངས་ནས་གསུང་མི་བཅད་ལ་རྗེས་མ་གྲལ་ལ་འཁོད་ནས་ཛབྲ་བསྙེན་དབུ་ཚུགས་པའི་ཚེ་སྔ་མ་རྣམས་ཀྱིས་བསྐོར་དང་སྟོང་ཚིགས་འབུལ་ནས་གྱེས་སོ། །རྡོ་རྗེ་མཚམས་པ་དཔོན་སློབ་ནས་ཕུར་པ་ཐུགས་ཀྱི་ཐིག་ལེའི་གཞུང་བསྲང་། །དངོས་གཞིའི་ཉིན་མོ་ནས་ཉིན་ཐུན་གསུམ་ལ་སྒྲབ་ལུང་མ་དང་།
མཚན་ཐུན་གསུམ་ལ་གནམ་ལྷ་དཀར་མོའི་བསྐུལ། སོ་སོའི་རྫས་སྔགས་བཅས་ཀྱིས་དཀྱིལ་འཁོར་དང་འདུས་པ་རྣམས་བསྐོར་ཞིང་ཐུན་བརྡེག །དེ་འཕྲལ་ལས་བྱང་ལྟར་སྲུང་འཁོར་འདོན་བསྒོམ་དུ་བྱ། ཕྱིའི་འགྲུལ་དང་ཡོ་བྱད་ལ་མེ་ཐུན་ཆུ་ཐུན་བརྡེག་པ་སོགས་མཚམས་གཅོད་དང་སྲུང་འཁོར་ལ་གཙོར་བཏོན། ནངས་རེ་བཞིན་དགེ་སློང་བཞི་སྡེ་ཙམ་གྱིས་རྒྱལ་ཐོ་དང་སྒོ་བྱད་ཕྱི་ནང་ཁ་གསོ། འདོན་བྱ་མཆོད་བསྟོད་སྔར་ལྟར་བྱ། སྔ་དྲོ་ཆབ་གཏོར་དང་ཕྱི་དྲོ་ཆ་གསུམ་བཏང་བ་སོགས་ཀྱང་མཛད་པའི་སྲོལ་མཆིས་སོ། །འབྱོར་འཁོས་དང་མི་གྲངས་ཀྱིས་ལྕོགས་ན་དཔོན་སློབ་ཁ་ཤས་ཀྱིས་ཚེ་སྐབས་བདུད་རྩི་སྙིང་པོ་དང་། ཁ་ཤས་ཀྱིས་ན་རཀ་སྐོང་བཤགས་དམ་སྐོང་དོང་སྤྲུགས་བཏང་རྒྱུ་བྱུང་ན་གནད་དོན་དགོས་པ་ཆེ་ཞིང་། དཀྱིལ་འཁོར་དང་མཆོད་པ་ནི་རྩ་དཀྱིལ་བརྟེན་བས་ཆོག །དོང་སྤྲུགས་མི་འགྲུབ་ན་དྲི་མེད་བཤགས་རྒྱུད་འདོན་མཁན་ཞིག་ངེས་པར་གལ་ཆེའོ། །གཉིས་པ་ནི། ཐར་པ་ལ་བར་དུ་གཅོད་པའི་མི་མཐུན་པའི་ཕྱོགས་བདག་འཛིན་གྱི་ཉེར་ལེན་ལས་བྱུང་བ་སྤྱི་དང་། ཁྱད་པར་དངོས་གྲུབ་བསྒྲུབ་པ་ལ་བར་དུ་གཅོད་པའི་དམ་སྲི་ཉུ་ལེ་རྒྱུ་བའི་དུས་རྟགས་གཉེན་པོ་བཀའ་བརྒྱད་སོགས་སུ་རྒྱས་པར་འབྱུང་བ་ལས་ཤེས་དགོས་ཤིང་། མདོར་བསྡུས་སྤྱི་ཙམ་དུ་ད་ལྟའི་ཕྱག་རྒྱུན་གྱི་དཀྱུས་སུ་འབྱུང་བ་ལྟར་ན། རྒྱལ་ཚབ་བམ་རྒྱལ་ཐེབས་རེས་མོས་དཀྱིལ་འཁོར་གྱི་མདུན་དུ་བཞུགས། ཐུན་ཕུར་ལིངྒ་སོགས་བཀོད་ལ། ཨེ་ཡཾ་ཛྭ་ལ་རཾ༔ བྲུབ་ཁུང་ཡངས་པའི་ནང་དུ་དགྲ་བགེགས་དམ་སྲི་དངོས་སུ་གསལ་བར་གྱུར༔ ཞེས་བྲུབ་ཁུང་
བསྐྱེད། ན་མོ། བླ་མ་སངས་རྒྱས་སོགས་བདེན་སྟོབས་གོང་དུ་སྨོས་པ་ལྟར་ལ། འཁྲུལ་འཁོར་གྱི་ནུས་པས། དགྲ་བགེགས་གནོད་བྱེད་ཁྱད་པར་བསྒྲུབ་པ་ཟབ་མོ་ལ་བར་དུ་གཅོད་པའི་དམ་སྲི་ཉུལ་ལེ་སྒབ་འདྲེ་ཐམས་ཅད་གཟུགས་ལིངྒ་འདི་ལ་ཁུག་ཅིག༔ ཏྲི་ཡཾ་ཛཿ ཏྲི་བཛྲ་ཨངྐུ་ཤ་ཛཿ ཛཿཧཱུྃ་བྃ་ཧོཿ ལན་གསུམ། གིང་པ་ལས་ཀྱི་ཕོ་ཉར་གསལ་བའི་ཐུགས་ལས་མཚོན་ཆའི་ཆར་བབས་པས་གནོད་བྱེད་རྡུལ་དུ་བརླག་པར་བསམས་ལ་ཕུར་ཐུན་ཚོམ་བུར་བསྐུལ་བ་ནི། ཧཱུྃ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲོ་བོ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟང་ཁྲོ་གཏུམ་སྐུར་བསྟན་པ༔ དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད༔ ཧཱུྃ༔ ང་ནི་པདྨ་དབང་གི་སྐུ༔ སྲས་འཁོར་སྤྲུལ་པ་བྱེ་བ་འབུམ༔ བཀའ་སྡོད་རབ་འཇིགས་ཕོ་ཉར་བཅས༔ རྟ་མགྲིན་ལྷ་ཚོགས་དུས་ལ་བབ༔ གཡས་ཀྱི་ཕྱག་ན་ཕུར་བུ་འདྲིལ༔ གཡོན་གྱི་ཕྱག་ན་ལྕགས་ཀྱུས་འགུགས༔ ལྕགས་ཀྱུས་ཟུང་ལ་ཕུར་པས་ཐོབ༔ གནོད་བྱེད་དགྲ་བགེགས་རྡུལ་དུ་རློག༔ ཨོཾ་བཛྲ་མ་ཧཱ་ཀྲོ་དྷ་པདྨ་ཀྲོ་དྷཱི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྵ་ཀ་ལ་རཱུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊ༔ གནོད་བྱེད་དགྲ་བགེགས་འབྱུང་པོ་ཐམས་ཅད་མཱ་ར་ཡ་ཧཱུྃ་ཧཱུྃ་ཕཊ༔ ཅེས་དྲག་སྔགས་ཕུར་སྐོར་བཅས་པས་གདབ་ཅིང་ཊཱཀྐི་རྣམས་ཀྱིས་ཐུན་གྱིས་
བྲག །ཁྱད་པར་དཔལ་གྱི་ཕོ་ཉ་ཀུན་ཐུབ་རྒྱལ་མོ་བསྐུལ་བ་ནི། ཉིན་ཐུན་རྣམས་ལ། ཧཱུྃ༔ སྒྲུབ་པ་ལུང་གི་ཕོ་ཉ་ནི༔ ཉི་མའི་དཀྱིལ་ནས་མེ་ཆེན་འབར༔ སྤྲུལ་པ་ཕོ་ཉའི་ཚོགས་དང་བཅས༔ རྔམས་པའི་ཞལ་གདངས་མཆེ་བ་གཙིགས༔ ལྗགས་ནས་ཁྲག་ཚྭ་ཆི་ལི་ལི༔ ཧཱུྃ་ཆེན་འཇིགས་པའི་བག་མ་ནས༔ འཇིགས་པའི་བྷནྡྷ་ཁྲ་ལ་ལ༔ གདུག་བྱེད་ཞེ་སྡང་འཁྲུགས་པ་ཡི༔ གནམ་ལྕགས་ཞུན་མའི་དཀྱིལ་འཁོར་ནས༔ སྲིད་པ་བཞུ་བཏུལ་བྱེད་པ་ཡི༔ སྦུད་པ་འུར་ལྡིར་མེ་ཚྭ་འཕྲོ༔ ཟངས་ཀྱི་སྲིན་མོ་དགུ་བརྒྱར་བཅུས༔ ཁབ་འདྲ་ལྕགས་རལ་སྐྲ་གསེབ་ནས༔ སྤྱན་མིག་མེ་འབར་ཐིག་ལེ་ཡིས༔ འབར་བའི་འཇིག་རྟེན་འཁྲིགས་པའི་ཚུལ༔ ཁྲོ་ཆུ་ཁོལ་མས་སྟོང་ཁམས་ཁེངས༔ སྲིད་པ་སྐྱེ་འགྲོ་རྡུལ་དུ་རློག༔ ང་རྒྱལ་བཞད་པའི་ཚུལ་ཅན་གྱིས༔ གནམ་ལྕགས་སེར་ཆེན་ཁ་ནས་འབེབས༔ གསོད་ལ་དགའ་ཞིང་རྔམས་པའི་གཟུགས༔ སོག་ལེ་གཏམས་པའི་མཆེ་བ་ཅན༔ བདུད་དང་ཞེ་སྡང་སྲིན་པོའི་མགོ༔ ཀཱ་ལ་ཡཀྵ་ལ་སོགས་པ༔ ཚོགས་བདག་འཇིགས་བྱེད་མགོ་བོ་སྟེ༔ བར་ཆད་བགེགས་དང་འབྱུང་པོ་རྣམས༔ རུས་བརྡུང་དོན་སྙིང་གཞོབ་ཏུ་ཁ༔ སོག་ལེ་དགུ་བརྒྱ་ལྟ་བུ་ཡིས༔ རྣོ་དབལ་མཆེ་
བ་རེ་རེ་ལ༔ དམྱལ་བ་ལྟ་བུར་གསོད་གཅོད་བྱེད༔ བ་སྤུ་མཚོན་ཆའི་ཆར་འབེབས་ཤིང་༔ ཚངས་རིས་ཡུལ་ཁམས་སྒྲོལ་བར་མཛད༔ ཚངས་ཐེའུ་སྙིང་ལ་རྡེག་པ་མོ༔ ལན་བུ་ཁྲོ་ཆུའི་སྤུ་གསེབ་ནས༔ ཁྲག་མདའ་སྐར་ཆེན་རླུང་ལྟར་འཚུབ༔ ཞེ་སྡང་སྲིན་པོའི་འཇིག་རྟེན་ཁེངས༔ མ་བདུད་དཔུང་བཅས་དོན་སྙིང་ལ༔ ཁྲག་མདའི་གཟེར་གདབ་དུས་ལ་བབ༔ དཔལ་གྱི་ཕོ་ཉ་བཀའ་ཉན་ཚོགས༔ རྐང་པ་རྒྱུག་ཅིང་སྤྱང་མོ་འགྲོས༔ ལག་པ་རྡོ་རྗེ་ལྕགས་ཀྱུ་ལ༔ མེ་ལྕེ་འཚུབས་མའི་ཕུར་བུ་ནི༔ གནམ་ལྕགས་ཞན་མའི་ཚྭ་ཚྭ་འཁྲུགས༔ ཐེའུ་རང་སྙིང་སྲེག་འདྲེན་ཅིང་སྲེག༔ མཆེ་བ་གནམ་ལྕགས་སྐྱིན་ཐང་འབེབས༔ ཁ་ཆུ་ཞན་མའི་སྐྱིན་གདངས་ཀྱིས༔ ཚངས་པའི་འཇིག་རྟེན་ཐལ་བར་གཏོར༔ གདོན་བགེགས་འབྱུང་པོ་ཉུ་ལེ་སོགས༔ ཐེའུ་རང་དགུ་བརྒྱ་གཞོབ་ཏུ་སྲེག༔ གནམ་ལྷའི་གཟུགས་ཕུང་ཅི་འདྲ་སྟེ༔ སྦྱང་གདོང་དམར་བཅངས་ཆངས་པ་ན༔ ཐོད་ཁྲག་འཕྲེལ་ཚུལ་གནས་བཅས་ནས༔ སྦྲུལ་བསྒྱུར་དུ་མའི་འཁོར་དང་བཅས༔ བདུད་འདུལ་དཔལ་གྱི་བཀའ་ཉན་མ༔ རྒྱལ་བའི་དབང་ཐོབ་ཁྲོ་མོ་ཆེ༔ སྣང་སྲིད་ཐམས་ཅད་སྒྲོལ་མཛད་ཅིང་༔ ཁྲོ་སྦྲུལ་ཚངས་པའི་ལིང་པ་མོ༔ སྔོན་
གྱི་ཐུགས་དམ་ཅི་འདྲ་བ༔ རཀྟ་ཁཱ་ཧིས་མ་མཉེས་པར༔ ཁ་ཡི་རླུབས་སུ་གསོལ་བའི་ཚེ༔ འདུར་ཞིང་ངར་དང་བཅས་ཏེ་བྱོན༔ ཕུར་བུ་སྙིང་ལ་འདེབས་པའི་ཚེ༔ ཤི་འི་སྒྲ་དང་བཅས་ནས་བྱོན༔ དཔལ་གྱི་བཀའ་ཉན་ཕོ་ཉར་བཅས༔ ཐུགས་དམ་རྒྱུད་བསྐུལ་ཕྲིན་ལས་མཛོད༔ ཅེས་བསྐུལ་ལ་འོག་ནས་འབྱུང་བའི་སྔགས་བརྗོད༔ མཚན་ཐུན་རྣམས་ལ། ཧཱུྃ༔ གནམ་ལྕགས་ཟླ་བའི་དཀྱིལ་འཁོར་དུ༔ ཁྲག་མདོག་བསེ་ཡི་ལན་ཕྲན་ཅན༔ སྤྱན་འོད་ཉི་ཟླ་སྐར་ལྟར་འཁྲུགས༔ སྨིན་མ་གློག་འཁྱུགས་མུན་སྐབས་འབྱེད༔ ཞལ་ནས་བུ་ཡུག་ཐོག་ཆར་འབེབས༔ ཤངས་ནས་རྡོ་རྗེའི་རླུང་ནག་འཁྲུགས༔ བཞད་པ་ཧེ་དཔལ་སྦུ་གྲིས་གཏམས༔ རྔམས་པའི་ལྗགས་འདྲིལ་མེ་ཆེན་འབར༔ ཨག་ཚོམ་མེ་འབར་སྲིད་པ་སྲེག༔ ཞལ་ནས་བསྐལ་པའི་འབྲུག་སྒྲ་སྒྲོགས༔ ལག་དམར་སྤུ་གྲི་འབུམ་གྱིས་གཏམས༔ སེན་མོ་རྣོ་ལྡན་ལྕགས་ཀྱུ་ལ༔ བར་ཆད་བདུད་སྲེག་མེ་ཆེན་འབར༔ བ་སྤུ་གནམ་ལྕགས་ཚྭ་ཚྭ་འཕྲོ༔ སྨིན་མ་ཁྲག་གི་ཆར་ཆེན་འབེབས༔ ཞབས་ཀྱི་ཕུར་པས་སྲིན་མོར་སྦྱོར༔ རལ་གསེབ་ཁྲག་གི་ཆར་རྒྱུན་འབེབས༔ མི་བཟང་གཏུམ་ཆེན་ཁྲག་འཐུང་མ༔ སྲིན་སྙིང་ཆངས་པང་བཅུག་ནས་གསོལ༔ ཤིན་ཏུ་
འབར་བའི་སྐུ་གཅིག་མ༔ དཔག་ཚད་ལྔ་བརྒྱར་ཀླུ་སྲིན་སྒྲོལ༔ ཁྲོས་པའི་ཞལ་མདོག་ཁྲག་སྨུག་མདོག༔ ན་བཟའ་སྲིན་པོའི་གཡང་གཞི་གསོལ༔ ཕྱོགས་བཅུར་ཁ་བལྟས་ཕྱོགས་སྐྱོང་བསྣོལ༔ བདུད་ལ་བབས་ན་སྙིང་ཁྲག་འཐུང་༔ སྲིན་ལ་བབས་ན་སྲོག་རྩ་ཆོད༔ དགྲར་བབ་དུག་གི་ཁ་ཆུ་འདེབས༔ བགེགས་ལ་བབས་ན་ཐལ་བར་རློག༔ དཔལ་གྱི་ཕོ་ཉ་ཐུགས་ལས་སྤྲུལ༔ དམ་ཉམས་དགྲ་བགེགས་འབྱུང་པོའི་ཚོགས༔ གཟུགས་ཕུང་གཏུབས་ལ་དོན་སྙིང་སྲེགས༔ དུས་ལ་བབ་པོ་ཕོ་ཉའི་ཚོགས༔ ཁྱོད་ཀྱི་ཕོ་ཉའི་དུས་ལ་བབ༔ བར་ཆད་འབྱུང་པོ་རྡུལ་དུ་རློག༔ ཨཱོཾ་བཛྲ་ཀྲོ་ཏཱི་ཤྭ་རི༔ དུ་རུ་དུ་རུ་རཀྴ༔ ཚིནྡྷ་ཚིནྡྷ༔ ཛྭ་ལ་ཛྭ་ལ༔ ཤག་ཤག༔ ཨོཾ་ཀྲོ་ཏཱི་ཤྭ་རི་ཨ་ལ་རཀྴ་ཁཱ་ཧི༔ མུ་ཧྲིང་ཧྲིང་༔ རྦད་རྦད་དུ༔ ཞེས་དྲག་སྔགས་རོལ་མོ་རྫས་དྲུད་རྡོ་ཐུན་སོགས་ཀྱིས་བསྐྲད་ཅིང་ཁྱད་པར་གྱི་དབྱུག་པས་བསྡིགས་ཤིང་བསྐྲད་པར་བྱའོ། །གསུམ་པ་ནི། བར་ཆད་དང་དངོས་གྲུབ་ཀྱི་ལྟས་ལ་གནས་སྐབས་དང་མཐར་ཐུག་དངོས་དང་ལྟར་སྣང་ལ་སོགས་པའི་ཚུལ་གྱིས་འབྱུང་བ་རྣམས་གཞུང་སྤྱི་དང་ཁྱད་པར་འདི་ཉིད་ཀྱི་སྒྲུབ་ཁོག་ལས་ཤེས་པར་བྱ་སྟེ། ལྟས་བཟང་གཏན་ལ་ཕེབ་པ་ན་དངོས་གྲུབ་བླང་བ་ལ་འཇུག་གོ། །རྩ་བའི་སྒྲུབ་ཆེན་ཁོ་ན་བྱེད་སྐབས་ཞག་བདུན་སོགས་གྲངས་ཐེམས་ནས་གཤམ་གྱི་སྒྲུབ་པ་ཆེན་པོ་དངོས་གྲུབ་བླང་བ་ལ་འཇུག་ཆོག་ཅིང་། སྨན་སྒྲུབ་གཙོར་བྱེད་པའི་སྐབས་
སུའང་རབ་རྩ་སྒྲུབ་ཞག་བདུན་གྱི་རྗེས་སུ་སྨན་སྒྲུབ་ལ་འཇུག །འབྲིང་ཞག་གསུམ། ཐ་མས་ཀྱང་ཞག་གཅིག་ལ་རྩ་སྒྲུབ་སྔོན་དུ་མ་སོང་ཐབས་མེད་དོ། །གང་ལྟར་རྩ་སྒྲུབ་གྲུབ་པའི་དགོངས་མོ་གཏོང་རག་གི་མཆོད་བསྟོད་རྗེས་སུ་ལས་བྱང་གི་དངོས་གྲུབ་ལེན་པ་བརྗོད་ཅིང་ཐོད་པའི་བདུད་རྩི་བགྱེས་ལ་རྒྱུན་གྱི་དངོས་གྲུབ་བསྐུལ་ལོ། །གཉིས་པ་ཡན་ལག་བདུད་རྩིའི་སྒྲུབ་པ་ལ་གསུམ། ཁྲོལ་གུར་སྦྱང་བས། བཏགས་བཙག་བྱ་བ། ཕྱེ་མར་སྒྲུབ་པའོ། །དང་པོ་ནི། ཐོག་མར་ཕྲིན་ལས་ཀྱི་གཞུང་བསྲངས་ལ་ཛབ་བཟླས་སྟོང་ཚིགས་བཤགས་པ་དུམ་བཅའ་ཡན་ཆད་རྩ་སྒྲུབ་ལྟར་སོང་བ་དང་། རྡོར་སློབ་ཀྱིས་དར་སྣ་གཡབ། ལས་རྡོར་གྱིས་དཀྱིལ་འཁོར་མདུན་ནས་དར་སྣའི་གཡབ་དར་དང་སྤོས་དཀར་གྱི་དུད་པ་ཐོགས། དབྱངས་རོལ་བཅས་སྨན་སྲུང་སྤྱན་འདྲེན་པ་ནི། ཧཱུྃ༔ ཚངས་པ་དྲང་སྲོང་ཀླུ་རྣམས་དང་༔ རྩི་ཤིང་སྨན་གྱི་ལྷ་མོ་དང་༔ ར་ས་ཡཱ་ནའི་སྲུང་མའི་ཚོགས༔ སྔོན་ཚེ་འདས་དུས་དང་པོ་ལ༔ ཀུན་བཟང་ལྷ་ཡི་སྤྱན་སྔ་རུ༔ ཁས་བླངས་དམ་བཅས་དབང་མནོས་ཏེ༔ སྡོམ་ལ་གནས་པའི་རིག་འཛིན་རྣམས༔ དུས་གསུམ་བདེ་གཤེགས་མཆོད་པ་དང་༔ སྨན་གྱི་རིག་འཛིན་བསྒྲུབ་པའི་ཕྱིར༔ འཁོར་དང་བཅས་ཏེ་སྤྱན་འདྲེན་ན༔ ར་ས་ཡཱ་ནའི་དངོས་གྲུབ་སྩོལ༔ ཅེས་བསྐུལ་ཅིང་སྤྱན་དྲངས་པས། སྔོན་བྱོན་སྨན་གྱི་དམ་ཚིག་གི་དངོས་གྲུབ་ཐོབ་ཅིང་སྒྲུབ་པ་པོ་ཡི་སྟོང་གྲོགས་མཛད་པར་དམ་མནོས་པའི་སྨན་གྱི་རིག་
འཛིན་ལྷ་དང་དྲང་སྲོང་སྲུང་མ་རྒྱ་མཚོའི་ཚོགས་དང་བཅས་པ་ཐམས་ཅད་བྱོན་ནས་སྨན་གྱི་ཕོ་བྲང་སྟེང་གི་ནམ་མཁར་སྤྲིན་ཕུང་གཏིབས་པ་བཞིན་བཞུགས་པར་བསམས་ལ། རྟོག་པ་བསལ་བ་ནི། བྱིན་གྱིས་བརླབས་པའི་བདུད་རྩི་འཐོར་ཞིང་། ཧཱུྃ༔ ར་ས་ཡཱ་ནའི་རིག་འཛིན་རྣམས༔ ཚངས་པ་དྲང་སྲོང་གཙང་མ་ཟ༔ དེ་དག་གྲོལ་བར་ངས་མ་བཤད༔ ཁྱི་དང་ཕག་པ་མི་གཙང་ཟ༔ དེ་དག་གྲོལ་བར་ངས་མ་བཤད༔ ཀླུ་དང་བྲམ་ཟེ་གཙང་མ་ཟ༔ དེ་དག་གྲོལ་བར་ངས་མ་བཤད༔ བྱོལ་སོང་རྩ་མཆོག་ཟ་བ་ཡང་༔ ཇི་སྲིད་འཚོ་ཡི་བར་དུ་ཟ༔ དེ་དག་གྲོལ་བར་ངས་མ་བཤད༔ ཡང་དག་དོན་གྱི་ལུང་འདི་ཉོན༔ རྣལ་འབྱོར་ཐབས་ལྡན་རྣམས་ཀྱིས་ནི༔ ཆོས་སྐུ་གཅིག་ལས་ཐ་དད་པའི༔ རིགས་ལྔའི་རང་བཞིན་འདིར་བསྟན་ཏེ༔ དེ་ལྟར་རྟོགས་ན་གྲོལ་ཞེས་བཤད༔ རང་བཞིན་ཡང་དག་དག་པའི་རྫས༔ མཉམ་པའི་དབྱིངས་སུ་རབ་བརྟགས་ན༔ གཉིས་མེད་དོན་གྱིས་ཟིན་པ་ཡིན༔ ཇི་ལྟར་དམིགས་པ་བཞིན་ཏུ་འགྲུབ༔ གཙང་དང་མི་གཙང་རྟོག་པ་ཅན༔ དངོས་དང་མི་དངོས་གཉིས་མེད་པས༔ མཁས་པ་གཙང་སྨེ་གཉིས་མི་བྱེད༔ ཡེ་ཤེས་སྐུ་ལྔར་བསྟན་པའི་ཕྱིར༔ གཙོ་རུ་དང་དུ་བླང་བར་བྱ༔ གཙང་སྨེ་མེད་པར་ཀུན་གྱིས་སྤྱོད༔ དེ་དག་གྲོལ་བ་ངས་བཤད་ཀྱིས༔ ར་ས་ཡཱ་ནའི་རིག་
འཛིན་ཚོགས༔ བཏང་སྙོམས་མེད་པའི་ཕྲིན་ལས་མཛོད། ཐེ་ཚོམ་མེད་ན་ངེས་པར་འགྲུབ༔ དཀྱིལ་འཁོར་འདི་ལ་བྱིན་ཅིག་ཕོབ༔ སྒྲུབ་རྫས་འདི་ལ་བྱིན་ཅིག་ཕོབ༔ སྒྲུབ་པ་པོ་ལ་དབང་ཞིག་སྐུར༔ ཅེས་བརྗོད་པས། སྨན་གྱི་དྲང་སྲོང་རིག་འཛིན་ཐམས་ཅད་གཙང་སྨེའི་གཉིས་འཛིན་དག་ནས་འདོད་པའི་དངོས་གྲུབ་སྩོལ་བ་ལ་དགྱེས་བཞིན་དུ་བཞུགས་པར་བསམ་མོ། །དེ་ནས་ཁྲོལ་བུ་སྦྱོང་བའི་དགོངས་པ་འཕྲོ་འདུ་འཇུ་འདུལ་དང་བཅས་པ་ནི། བདག་ཉིད་ཐུགས་ཀྱི་ནོར་བུ་རྩ་བ་གསུམ་གྱི་དཀྱིལ་འཁོར་དུ་བསྒོམ༔ བྷནྡྷའི་ནང་དུ་དངོས་གཞི་རྣམ་པ་ལྔ་གནས་པའི་སྟེང་དུ་དཔའ་བོ་འབྲུ་ལྔ་གསལ་ཏེ༔ དྲི་ཆེན་སྟེང་དུ་ཨོཾ༔ བྱང་སེམས་སྟེང་དུ་ཧཱུྃ༔ མཱཾ་ས་ལ་སྭཱ༔ པད་རཀ་ལ་མཱཾ༔ དྲི་ཆུ་ལ་ཧཱཿ དེ་ལས་འོད་ཟེར་འཕྲོས༔ ཕྱི་སྣོད་ཀྱི་འཇིག་རྟེན་འབྱུང་བ་ལྔས་བསྡུས་པའི་རྩི་ཤིང་ནགས་ཚལ་ལ་ཕོག༔ འབྱུང་བ་ལྔའི་བཅུད་བསྡུས༔ བཅུད་ཀྱི་འཇིག་རྟེན་ན་སེམས་ཅན་དང་བདག་ཏུ་ལྟ་བ་ཀུན་གྱི་ལུས་ངག་ཡིད་གསུམ་སྒྲིབ་པ་སྦྱངས་ནས༔ སྨན་ལ་འདུས་པས་དངོས་པོ་བྲལ་བའི་བདུད་རྩིའི་རང་བཞིན་དུ་དཀར་ལྡེམ་གྱིས་གྱུར་པ་ནི༔ དཔེར་ན་མུ་ཏེག་དཀར་པོ་དྲི་མས་མ་གོས་པ་བཞིན་དཀར་ལྟེམ་ལྟེམ་དུ་གྱུར༔ ཕོ་བྲང་སྟེང་གི་སྨན་སྲུང་རིག་འཛིན་རྣམས་ཀྱིས་ཀྱང་བརྟན་གཡོའི་
རྩི་བཅུད་བདུད་རྩིའི་ཆར་དུ་འབེབས་པར་གྱུར༔ ཅེས་པའི་ཏིང་ངེ་འཛིན་དང་མ་བྲལ་བར་གཟུངས་ཐག་སོ་སོར་བླངས་ཏེ། ཨོཾ་སརྦ་པཉྩ་ཨ་མྲྀ་ཏ། ར་ས་ཡཱ་ན། སྟ་ན་གྷ་། གྷུ་ཡ་སིངྡྷིྡྷི་། ཧཱུྃ་ཧྲཱིཿཋ༔ ཞེས་པའི་ཛབྲ་སྟོང་རྩ་བཟླ། ཐུན་པ་རྣམས་ཀྱིས་བསྙེན་རྒྱུན་བླངས་ལ་དེ་ཉིད་རྒྱུན་མི་འཆད་དུ་བཟླ། ཐུན་མཐར་ཆེ་བ་བརྗོད་ཅིང་བསྐུལ་བ་ནི། ཧཱུྃ༔ རྣམ་པར་དྲི་ཆེན་རྣམ་སྣང་མཛད༔ ཕྱི་ནང་གཉིས་ཀ་རྣམ་པར་དག༔ མི་བསྐྱོད་བྱང་ཆུབ་སེམས་དཔའ་ཉིད༔ དམིགས་མེད་དག་པ་ཡེ་ཤེས་ཡིན༔ མཱཾ་ས་རིན་ཆེན་འབྱུང་ལྡན་གཙོ༔ མཉམ་དང་མི་མཉམ་དབྱེར་མེད་དོ༔ སྣང་བ་རཀྟ་མཐའ་ཡས་གསུང་༔ སྐྱེ་འགག་མེད་པ་ཡེ་ནས་དག༔ དོན་ཡོད་དྲི་ཆུ་ལས་གྲུབ་པ༔ དྲི་མེད་རྒྱུ་འབྲས་རྣམ་པར་དག༔ ཀུན་ཀྱང་གཙང་ཞིང་དྲི་མེད་པས༔ ཐམས་ཅད་མ་ལུས་སངས་རྒྱས་ལྔ༔ ལུས་པ་མེད་པས་ཡེ་ཤེས་ངང་༔ མ་བཅོས་ཡེ་ཤེས་དེ་ཉིད་དོ༔ དེ་ཕྱིར་སྨན་གྱི་བཅུད་ཀྱི་མཆོག༔ བདུད་རྩི་ཞེས་ནི་དེ་ལ་བྱའོ༔ དེ་ནས་ཉུ་ལེ་བསྐྲད་ཅིང་བྱིན་དབབ། རྩ་བསྙེན་དང་སྨན་ཛབྲ་སྦྲེལ་བའི་ཛབྲ་དབྱངས་ལན་གསུམ་བྱ། ཐུན་གཉིས་བ་ལ་ལས་བྱང་གི་མཆོད་པ་བྱིན་རླབས་ནས་བརྩམས། རྩ་བསྙེན་དང་སྨན་ཁྲོལ་བུ་སྦྱོང་བ་སོགས་སྔ་མ་ལྟར་ཛབྲ་དབྱངས་ཡན་ཚར་གཅིག་བསྐྱར། ཐུན་གསུམ་བར་ཡང་དེ་དང་མཚུངས་པ་ལས་སྨན་ཛབྲ་དང་ཆེ་བ་བརྗོད་པ་བཅས་སོང་རྗེས། ཆོས་སྲུང་གཏོར་ཆོག །ཚོགས་
མཆོད། རྗེས་ཆོག །ཉུ་ལེ་བསྐྲད་ཅིང་བྱིན་འབེབས་ཛབྲ་དབྱངས་བཅས་རྩ་སྒྲུབ་ལྟར། མཚན་ཐུན་གསུམ་ལ་གོང་བཤད་ཐུན་རྗེས་མ་གཉིས་ལྟར་ལ་ཉུ་ལེ་སྐྲོད་སྐབས་ཀྱི་བསྐུལ། གནམ་ལྷའི་ལྕམ་མོ་སྦྱར་བ་སོགས་ཀྱང་སྒྲུབ་ཁོག་ཏུ་བཤད་པ་ལྟར་ལ། སྨན་སྒྲུབ་ཀྱི་སྐབས་འདིར་ཚོགས་མཆོད་ཤིན་ཏུ་གལ་ཆེ་བར་གསུངས་པས་མཚན་ཐུན་ལའང་ཐོ་རངས་ཐུན་མཐར་མེ་ཕྲེང་གི་ཚོགས་བྱིན་རླབས་ནས་ལྷག་མའི་བར་གྱིས་ཚོགས་མཆོད་ཕུལ་རྗེས་ཉུ་ལེ་བསྐྲད་པ་ལེགས། ཐུན་ཕྱི་མའི་སྨན་ཛབ་རྗེས་འོག་ཏུ་སྨན་སྤོལ་པའི་སྐབས་སུ་འབྱུང་བའི་སྔགས་བརྒྱ་རྩ་ཙམ་ར་བཟླས་ལ། མཚམས་གྱི་ཆང་སོགས་བྱིན་རླབས། བཀའ་བརྒྱད་སོགས་གཞུང་ཆེན་རྣམས་ལ་རིགས་བརྒྱ། རིགས་ལྔ། རིགས་གཅིག་གི་ཁྲོལ་སྒྲུབ་རིམ་པར་བཤད་པས་ཞག་གསུམ་མི་བྱེད་ཀ་མེད་ཡིན་ཀྱང་འདིར་སྙིང་བོར་དྲིལ་ནས་རིགས་ལྔའི་སྦྱོང་བ་ཁོ་ན་ལས་མ་གསུངས་པས་ཞག་གཅིག་ནས་གསུམ་བར་གང་བྱེད་འབྱོར་འཁོས་དང་བསྟུན་ཆོག་གོ། །གཉིས་པ་བཏགས་བཙགས་སོགས་བྱ་བ་ལ་བཀའ་དགོངས་གཙོས་གཞུང་ཆེན་རྣམས་ཀྱི་ཕྱག་ལེན་ལྟར་ན་མང་དུ་མཆིས་ཀྱང་ལུགས་འདི་སྙིང་པོ་བསྡུས་པའི་དབང་གིས་དེ་དག་མ་གསུངས་པ་སྤྲོས་མེད་ལུགས་སུ་མངོན་པས་གཞན་ནས་ཁ་བསྐང་བ་སོགས་དགོས་པ་ཆུང་བས་རང་གཞུང་སོར་བཞག་ལྟར་ན་ཁྲོལ་སྒྲུབ་རྫོགས་པའི་ནངས་མོར། དཀྱིལ་འཁོར་མདུན་སྟེགས་བུ་ཁེབས་ལྡན་བཀོད། བཏགས་བཙགས་སོགས་ལ་མཁོ་བའི་ཆས་རྣམས་སྨན་བསྙལ་སྣོད་མི་ཤོལ་བའི་སྟ་གོན་བྱ། འདོད་བྱ་སྔ་ཉིན་ལྟར་ཕྲིན་ལས་བསྙེན་བཟླས་ཁྲོལ་སྐུ་བ་ཛབྲ་དང་
ཆེ་བརྗོད་བཅས་གྲུབ་པའི་རྗེས་ཞི་རོལ་རིང་པོའི་འོག་ཏུ་ལས་རྡོར་ནས་སྨན་ཐོད་རྣམས་དབུས་ཀྱི་ཐོད་པར་བསྡུ། ཁྲོལ་བུའི་ཐུམ་པོ་རྣམས་ཀྱང་ཕྱོགས་གཅིག་བསྲས་ལ་དེ་ཉིད་གཟུངས་མར་མངའ་གསོལ་བས་དར་གྱིས་ལྕིབས་ལ་བླང་། སྤོས་བསུ་དང་དཀྱིལ་འཁོར་ལ་གཡས་སུ་བསྐོར་ནས་སློབ་དཔོན་གྱི་ཕྱག་ཏུ་ཕུལ། སློབ་དཔོན་གྱིས། རིགས་ཐམས་ཅད་གསང་ཆེན་རིགས་གཅིག་བདེ་བ་ཆེན་པོ་ཆོས་ཀྱི་སྐུའི་རང་བཞིན་ཏུ་གྱུར། དེ་ཉིད་དམ་ཚིག་གི་རྫས་ཐབས་ཤེས་དབྱེར་མེད་རོ་གཅིག་ཏུ་ཞུ་ཞིང་འདྲེས་པ་དངོས་གྲུབ་ཀྱི་སྙིང་པོ་འོད་ཀྱི་གོང་བུའི་རྣམ་པས་ཐུགས་ཀྱི་ཐིག་ལེར་ཐིམ་པར་གྱུར་བར་མོས་ནས་དཀྱིལ་མདུན་སྟེགས་བུར་བཀོད། སློབ་དཔོན་རྒྱལ་ཐེབས་སོགས་ཞྭ་ཆོས་མནབས་ལ་དཀྱིལ་འཁོར་བསྐོར། འདུས་པ་རྣམས་ཀྱང་བཞེངས་ལ་ཁྲོལ་བུའི་ཛབྲ་དབྱངས་ལན་གསུམ་བྱ། དེ་ནས་ཐམས་ཅད་བླ་མ་རྩ་གསུམ་ཡོངས་འདུས་ཀྱི་ང་རྒྱལ་བཟུང་ནས་མཆོག་གི་ཧ་སྟག་ཡབ་ཅིང་སྦྱར་བའི་སྤོས་བསྲེགས། རྐང་གི་གླིང་བུ་དང་ཀུ་ཤ་ལི་གླུ་བླངས་པ་སོགས་དྲག་པོའི་རོལ་གར་མང་པོ་དང་བཅས་པས་རྒྱལ་བ་རྣམས་ཀྱི་ཐུགས་དམ་བསྐུལ། མཁའ་འགྲོ་དམ་ཅན་དབང་དུ་བསྡུས་ནས་ལས་ལ་བཙུད། དགྲ་བགེགས་རྣམས་གཟིར་ཞིང་ཚར་གཅོད་པའི་བརྟུལ་ཞུགས་བསྐྱེད་ཅིང་ཉམས་བསྐྱངས་ལ། ལས་བྱང་གི་བསྐུལ་དབྱངས་བཅས་གྱེར། རོལ་འོག་སློབ་དཔོན་སོགས་དཀྱིལ་འཁོར་ལན་གསུམ་བསྐོར་རོ། །དེ་ནས་ཐོག་མར་བཏགས་པ་ནི། དཀྱིལ་འཁོར་གྱི་ཤར་ཕྱོགས་སུ་ཞིང་ཆེ་ཆུང་གི་གཡང་གཞི་དངོས་སམ་རི་མོར་བྲིས་པ་
བརྩེགས་མང་བཏིང་། དེ་ལ་གུ་བུལ་གྱིས་བླུག་ཅིང་རཀྟའི་ཐིག་ལེས་མཚན་པ་བཀོད། དེའི་སྟེང་དུ་གཏན་གཏུན་ཐབས་ཤེས་ཀྱི་བརྡའ་མཚོན་པར་བཞག །འདི་ཕྱིན་ཆད་ཐམས་ཅད་སློབ་དཔོན་ཉིད་དཀྱིལ་འཁོར་ལ་ཞལ་ཕྱོགས། གཟུངས་མ་སློབ་དཔོན་ལ་ཕྱོགས་ནས་འཁོད་དགོས་པས་དེ་ལྟར་འཁོད་ལ། རྐང་པ་གཉིས་སྨན་གཞོང་གི་འགྲམ་གཉིས་སུ་ཕན་ཚུན་བསྣོལ་མར་བརྐྱང་། སློབ་དཔོན་གྱིས་ལག་པ་སོར་མོ་བསྣོལ། མཛུབ་མོ་བསྦྲིང་། མཐེ་བོང་བཀུག་ཁྱོན་དབབ་པའི་རྒྱས་གཏུན་བུ་བཟུང་། ཡུམ་གྱིས་མཁའ་དབྱིངས་ཀྱི་རྒྱས་གཏུན་ཁུང་བཟུང་ལ། གཏུན་ཁུང་ཤེས་རབ་ཡུམ་གྱི་མཁའ་དབྱིངས་སུ། །གཏུན་བུ་ཐབས་མཆོག་ཡབ་ཀྱི་རྡོ་རྗེ་ཡིས། །ལས་ཉོན་མཚན་རྟོག་འཐག་པས་སྨན་གྱི་དངོས། །དབྱིངས་ཡེ་གཉིས་མེད་ཡེ་ཤེས་འོད་འཕྲོར་གྱུར། །ཅེས་དམིགས་ལ། ཨོཾ་ཨཱཿཧཱུྃ་སརྦ་ཨ་མྲྀ་ཏ༔ ཧ་ན་ཧ་ན། ད་ཧ་ད་ཧ། པ་ཙ་པ་ཙ། རུ་ལུ་རུ་ལུ་ཧཱུྃ་ཧྲཱིཿཋཱ༔ ཧུ་ལུ་ཧུ་ལུ་ཧཱུྃ་ཧྲཱིཿཋཱ༔ ཞེས་པའི་ཛབྲ་ཉིད་འདུས་པ་རྣམས་དང་ཐུན་པ་བཅས་ཀྱིས་བཏགས་པའི་ཛབྲ་ཉིད་དབྱངས་ཀྱི་ཚུལ་དུ་བཟླ་བ་འོག་མ་རྣམས་ལའང་འགྲེ། སློབ་དཔོན་གྱིས་འཐག་མི་ནུས་ན་རྒྱལ་ཐེབས་གཞན་གྱིས་ཞིབ་བར་འཐག་པའི་གྲོགས་བྱ། བཙག་པ་ནི། དཀྱིལ་འཁོར་གྱི་ལྷོར་ཡུམ་གྱིས་སྣོད་དང་དར་ཚག་བཟོད། སློབ་དཔོན་གྱིས་སྨན་བླུགས་ལ། ཡབ་ཡུམ་ཐབས་ཤེས་མཉམ་པར་སྦྱོར་བ་ལས། །ཡེ་ཤེས་བདུད་རྩི་དཀར་འཚེར་མེ་རེ་རེ། །འོ་མའི་ཆུ་རྒྱུན་ལྟ་བུར་ལུད་
པར་གྱུར། །ཅེས་དམིགས་ལ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧོ་ས་མ་ཡ་བི་ཤུངྡྷེ་ཧཱུྃ་ཧྲཱིཿཋཱ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀ་མ་ལ་ཀུནྡྷ་ལཱི་སིངྡྷི་སིངྡྷི་ཧཱུྃ་ཧྲཱིཿཋཱ༔ ཞེས་བཟླས་ལ་སྨན་ཐམས་ཅད་ཚགས་སུ་དྲང་། སྔོལ་པ་ནི། དཀྱིལ་འཁོར་གྱི་ནུབ་ཕྱོགས་སུ་སློབ་དཔོན་ཡབ་ཡུམ་གྱི་བར་དུ་སྨན་སྣོད་ལྕགས་གཡའི་དྲི་མ་མེད་ཅིང་འཕུར་དུས་འཐོར་ཟེགས་མི་འགྲོ་བ་ཟངས་དཀར་ལྟ་བུ་གཙང་ཞིང་ཆེ་བ་བཞག །གུར་གུམ་སོགས་དྲི་བཟང་ངང་དམ་རྩིའི་དབང་ལག་སོགས་ཟུར་དུ་ཕྱེས་ལ། སྣོད་ལྟར་སྣང་བ་ཡུམ་གྱི་མཁའ་དབྱིངས་སུ། །བཅུད་སྣང་ཐབས་མཆོག་ཡབ་ཀྱི་རྡོ་རྗེ་ཡིས། །འདྲེས་པར་དཀྲུགས་པས་ཐབས་ཤེས་མཉམ་སྦྱོར་བའི། །བྱང་སེམས་བདུད་རྩི་འོད་དུ་འཁྱིལ་བར་གྱུར། །ཅེས་དམིགས་ལ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་བི་ཤུདྡྷེཀུནྡྷ་ལཱི་ཧཱུྃ་ཧྲཱིཿཋཱ༔ ཞེས་བཟླ་བཞིན་པར་སྨན་ཕྱེ་རྣམས་རླན་མ་ཕོག་བའི་སྐམ་པོ་འདྲེས་པར་བསྲེས་ལ་འབྲུམ་མེད་པར་བྱ། དེ་ནས་སློབ་དཔོན་གྱིས་བྱིན་གྱིས་བརླབས་པའི་ཆང་སོགས་སྦྲེང་ཞིང་། །འཁོར་དང་མྱ་ངན་འདས་པའི་ཆོས་ཐམས་ཅད། །བདེ་ཆེན་དབྱིངས་སུ་རོ་གཅིག་འདྲེས་པར་གྱུར། །ཅེས་དམིགས་ལ། གོང་སྨོས་སྔགས་བཟླ་བཞིན་ཏུ། སྔོན་གྱི་དམ་རྫས་ཕབ་གཏའ་རྣམས་ཀྱང་ཆང་གི་ཉིང་ཁུ་དང་བསྲེས་ནས་སྐབས་འདིར་བླུགས། མཆོག་ཆེན་ལག་གཡོན་ནམ་རྐང་ངམ་རྡོ་རྗེས་དཀྲུགས་པར་བཤད་པ་ལྟར་ཐོག་མར་སློབ་དཔོན་གྱིས་རྟེན་འབྲེལ་མཚོན་བྱེད་བྱས་ལ། གྲོགས་ཤུགས་ལྡན་གཞན་གྱིས་འཕུར་ཞིང་བསྲེས་ལ། བསྐ་སླ་སྙིམས་པར་བཅངས་ནས་
སླར་བསྒྱུར་བས་ཚལ་བར་ཞིག་ཅིང་ཕྱེ་མར་མི་འགྲོ་བ་ཙམ་དུ་བྱ། འོན་ཀྱང་ནམ་ཟླ་དྲོད་ཆེ་དུས་བརླན་ཆུང་ལ། འཁྱག་དུས་རླན་ཅུང་ཟད་ཆེ་བ་ལེགས་སོ། །དེ་ནས་སྔར་ཟུར་དུ་ཕྱེས་བའི་དྲི་བཟང་ཕྱེ་མའི་རིགས་དང་། དམ་རྩིའང་བཏབ་ལ་ཐམས་ཅད་འདྲེས་པར་བྱ། རྒྱལ་བ་བཟང་པོའམ་མ་རྙེད་ན་བོད་ཀྱི་ཆང་རྩིས་ཀྱང་རུང་ལ་མང་ཉུང་ཆང་ནོན་དང་འདྲ་བས་སྨན་གྱི་མང་ཉུང་དང་ནམ་ཟླའི་བབས་དང་བསྟུན་པ་བཏབ་ལ་བསྲེ། དེའང་ཞིབ་བར་བརྡུངས་བའི་ཕྱེ་མ་ཆང་བཟང་དྲོན་མོ་ཉུང་ཙམ་ལ་བསྲེས་ནས་བླུགས་ན་ལེགས་སོ། །དེ་ནས་གཞལ་བ་ནི། དཀྱིལ་འཁོར་བྱང་ཕྱོགས་སུ། ཡུམ་གྱིས་དར་ཁུག་བཟེད། ཡབ་ཀྱིས་དྲིལ་བུས་གཞལ་ཞིང་། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧོ་ས་མ་ཡ་བི་ཤུངྡྷེ་ཧཱུྃ་ཧྲཱི༔ཋཱ༔ ཞེས་བཟླ། རྗེས་སུ་འཕེལ་མ་འཕེལ་བརྟགས་བའི་ཕྱིར་གྲངས་མ་ནོར་བར་བྱ། དེ་ནས་རྒྱས་གདབ་བ་ནི། སྨན་ཁུག་ཁ་དམ་པར་བྱས་ལ་སྟེང་ཕོ་ཐོད་དང་འོག་མོ་ཐོད་གཉིས་ཀྱི་བར་དུ་བཞག །སྨན་མང་ན་དེ་ཉིད་ཟངས་དཀར་སོགས་སྣོད་གཙང་གཡའ་མེད་པའི་ནང་དུ་འཇོག་པ་དང་བར་མཚམས་བལ་བུའི་ཕུར་མ་རླན་ཅན་གྱིས་བཀང་་ཞིང་ནམ་ཟླ་གྲང་ན་དྲོད་ཅུང་ཟད་ཡོད་པར་བྱ། གང་ལྟར་སྨན་སྣོད་ཕྱི་ནས་དར་སྣ་ཚོགས་ཀྱིས་དྲིལ་ལ་སྟེང་དུ་དབུ་རྒྱན་དང་གཡས་གཡོན་ཏུ་རྡོར་་དྲིལ་བཅིངས། རུས་སྦལ་གྱི་ཁོག་པར་གི་ཝཾ་གིས་ཧྲཱིཿབྲིས་པས་སྟེང་ནས་བཀབ། ཐོད་པ་གཉིས་ལ་འཁོར་ལོ་བྱི་བ་སོགས་གཞུང་འདིར་མ་གསུངས་བས་དེ་ཙམ་གྱིས་འཐུས་ཤིང་གཞན་ནས་འབྱུང་བ་ལྟར་བྱས་ན་ལེགས་པའི་ཡན་ལག་གོ། །དེ་དག་གི་ཚེ། ཨོཾ་ཨཱཿཧཱུྃ་སརྦཔཉྩ་ཨ་མྲྀ་ཏ་ཧ་ཡགྷྲཱྀ་ཝ་ས་མ་ཡ་དྷརྨ་དྷཱ་ཏུ་ཧཱུྃ་ཧྲཱིཿཋཱ༔
ཞེས་བཟླས་ལ་རེ་ཞིག་དཀྱིལ་འཁོར་མདུན་གྱི་སྟེགས་བུར་བཞག །ཁྲོལ་སྒྲུབ་ཀྱི་ཚོམ་བུའི་དཀྱིལ་འཁོར་བསྡུ། འདི་དག་གི་སྐབས་རྡོ་རྗེ་རྒྱལ་ཚབ་དཔོན་སློབ་ཀྱིས་ཞི་བའི་སྦྱིན་སྲེག་བྱ། མེའི་པུད་ཀྱིས་དྲོད་འབེབས་ཀྱི་མར་མེ་སྦར། དམ་སྲི་མནན་པ་ལ་སླར་ཡང་བཀུག་གཟིར་དྲག་ཏུ་བྱ་ཞིང་རྟ་བྲོ་བརྡུང་། །སྒོ་བྱང་གཉིས་པོའང་གསོ། ཆ་གསུམ་དང་སྡེ་བརྒྱད་ཆ་སྙོམས་གཞི་བདག་དཀར་གཏོར་སོགས་བཏང་ནས། བར་ཆད་མ་བྱད་པར་དངོས་གྲུབ་སྐྱོལ་ཅིག །པའི་བཀའ་བསྒོ་བ་རྣམས་ནན་ཏུ་བྱ། དེ་ནས་བགེགས་བསྐྲད་པ་ནི། ཐམས་ཅད་ཞྭ་དང་དྲིལ་བསིལ་བཅས་སློབ་དཔོན་སྨན་སྣོད་དང་ཉེ་བའི་སྟེགས་ལ་བཞུགས་ཏེ་ཞི་སྤྱོད་དྲག་སྦྱོང་སྤྱི་ལྟར་བྱས་པའི་གཤམ་དུ་བདེན་བརྗོད་མཐར། བདེན་པ་ཆེན་པོའི་བྱིན་རླབས་ལ་བརྟེན་ནས། དེང་འདིར་བདུད་རྩི་སྨན་གྱི་དངོས་གྲུབ་བསྒྲུབ་པ་ལ་བར་དུ་གཅོད་པའི་བགེགས་དང་ལོག་པར་འདྲེན་པ་ཐམས་ཅད་སའི་ཕྱོགས་འདིར་མ་གནས་པར་གཞན་ཏུ་དེངས་ཤིག །གལ་ཏེ་མི་འགྲོ་ན་རྡོ་རྗེའི་ཁྲོ་བོ་ཆེན་པོ་རྣམས་ཁྲོས་ནས་བརླག་པར་འགྱུར་བ་གདོན་མི་ཟའོ། །ཞེས་བཀའ་བསྒོ། སྨན་སྣོད་ལ་ཛཱ་ཏི། ག་བུར། ཙནྡན། གླ་རྩི། དུ་རུ་ག་སྟེ་དྲིའི་རྒྱལ་པོ་ལྔ་དང་། གུ་གུལ་ཚིལ་ཆེན་སྦྱར་བའི་དུད་པས་བདུག །ཨོཾ་བཛྲ་ཀྲོ་དྷ་སོགས་དྲག་སྔགས་ཡུངས་ཐུན་ཚོམ་རྔམ་བཅས་པས་བགེགས་བསྐྲད། དེ་ནས་རྒྱལ་ཚབ་སོགས་ཀྱིས་སྨན་གྱི་ཕོ་བྲང་བཏེགས། སློབ་དཔོན་དྲིལ་སྤོས་བཅས་སྣ་དྲངས་ལ་དཀྱིལ་འཁོར་བསྐོར་ཞིང་། །སརྦ་པཉྩའི་ཛབྲ་དབྱངས་ལན་གསུམ་གྱི་
མཐར། དཀྱིལ་འཁོར་བར་ལྡིངས་ལྕགས་ཀྱི་རྐང་གསུམ་ཁར་བཀོད་ལ་མངའ་གསོལ་བ་ནི། ཧཱུྃ༔ བླ་མ་ཡི་དམ་མཁའ་འགྲོའི་དཀྱིལ་འཁོར་དུ༔ རྩ་བ་བརྒྱད་དང་ཡན་ལག་སྟོང་ལ་སོགས༔ འབྲས་བུ་སྐུ་གསུང་། །ཐུགས་སུ་བསྒྲུབ་པའི་ཕྱིར༔ དུག་གིས་དུག་བསལ་དུག་ལྔ་ཡེ་ཤེས་ལྔ༔ སྨན་གྱིས་སྨན་སྩལ་སྨན་ལྔ་བདུད་རྩི་ལྔ༔ དུག་ལྔ་མ་སྤངས་སྐུ་ལྔ་ལྷུན་གྱིས་གྲུབ༔ དབྱིངས་ནས་མ་སྤངས་རྒྱལ་བའི་སྐུར་བསྐྱེད་དེ༔ ཕྱོགས་བཅུ་དུས་གསུམ་བདེ་གཤེགས་མཆོད་པ་དང་༔ རྣལ་འབྱོར་དབང་ཕྱུག་ཐུགས་དམ་བསྐང་བའི་ཕྱིར༔ བདུད་རྩི་མཆོག་གི་ཕོ་བྲང་མངའ་གསོལ་བས༔ གསང་བ་མཆོག་གི་དབུས་སུ་བརྟན་པར་བཞུགས༔ ཞེས་པ་མངའ་གསོལ་ཞིང་། ཨོཾ་ཨཱཿཧཱུྃ་བཛྲ་གྷུ་རུ་དྷེ་ཝ་ཌཱ་ཀི་ནཱི་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱཿ ས་མ་ཡ་ཏིཥྛ་ལྷན༔ ཅེས་བརྗོད་ལ་ཞི་རོལ་བྱ། འོག་ཏུ་དྲོད་འབེབས་ཀྱི་མར་མེ་བཞག །ཐམས་ཅད་རང་གྲལ་དུ་བཞུགས་ལ་བརྟན་བཞུགས་སྔགས་ཉེར་གཅིག་བསྒྲིགས་འདོན་བྱ། དེ་ནས། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ ཞེས་དགུ་པའི་ཛབྲ་བརྒྱ་རྩ་བརྒྱད་བཟླ། འདི་ལ་ཉིན་གཅིག་བྱེད་ན་བཀའ་སྲུང་གཏོར་འབུལ། །ཚོགས་སྐོང་ཕྱིན་ཆད་རྗེས་ཀྱི་བྱ་བ་རྣམས་མཐར་དབྱུང་ལ་ཕྱིར་ཉིན་ཕྱེ་སྒྲུབ་དངོས་གཞིའི་དབུ་ཚུགས་པ་ཡིན་ལ། བཏགས་བཙག་པོན་མང་མེད་པའི་སྔ་དྲོ་ཙམ་གྱིས་ཐམས་ཅད་འགྲུབ་ན་ཕྱི་དྲོ་ནས་ཕྱེ་སྒྲུབ་དབུ་ཚུགས་
ནའང་ལེགས་པ་ཡིན་ནོ། །གསུམ་པ་ཕྱེ་མ་སྒྲུབ་པ་ནི། ཕྲིན་ལས་ཀྱི་གཞུང་སྲོང་ལྕགས་སྔར་ལྟར་ལ་རང་གཞུང་གི་དགོངས་པ་ནི་བདག་མདུན་དབྱེར་མེད་དུ་སྒྲུབ་ཚུལ་ཡིན་འདུག་ཀྱང་ལས་དང་པོ་པས་གོ་བ་ཙམ་གྱིས་གཉིས་འཛིན་གྱི་སྒྲོག་མ་གྲོལ་བའི་ཕྱིར་བདག་མདུན་སོ་སོར་ཕྱེས་ན་སྤྱི་དང་ཡང་མཚུངས་པས། ལས་བྱང་གི་བདག་བསྐྱེད་བཟླས་པ་སོགས་གྲུབ་རྗེས་སྨན་གྱི་ཕོ་བྲང་ལ་དམིགས་ཏེ་མཆོད་པ་བྱིན་རླབས་ལྷ་བསྐྱེད་ནས་བསྟོད་པའི་བར་ལས་བྱང་ཚང་བ་བཏང་། དེ་ནས། ཧཱུྃ་ཚངས་དང་དྲང་སྲོང་སོགས་སྨན་སྲུང་སྤྱན་འདྲེན་དང་རྟོག་བསལ་ཁྲོལ་སྒྲུབ་སྐབས་ལྟར་བྱས་ལ། ལས་ཀྱི་རྡོ་རྗེས་གཟུངས་ཐག་གི་སྣེ་མོ་ལྔ་རྡོ་རྗེ་རྒྱལ་པོ་དང་རྡོ་རྗེ་རྒྱལ་ཐེབས་བཞིའི་ཕྱག་ཏུ་ཕུལ་ལ། །དེ་རྣམས་ཀྱི་ལག་གཡོན་པའི་མཐེ་བོང་དང་སྲིན་ལག་སྦྱར་བ་རྟ་མགྲིན་ཡབ་ཡུམ་དུ་བསྒོམ། གུང་མཛུབ་དང་མཐེ་ཆུང་བསྒྲེང་བའི་བར་དུ་བཟུང་ལ་འདི་སྐད་དོ། །ཤེས་རབ་སྒྲོག་གིས་སྦྲེལ་བའི་གཟུངས་ཐག་ལ། །རིག་པ་སྲོག་གིས་འབྲེལ་བའི་ལུ་གུ་རྒྱུད། །སྐུ་གསུང་ཐུགས་ཀྱི་དངོས་གྲུབ་མ་ཐོབ་བར། །སྐྱེ་བ་ཇི་སྲིད་བར་དུ་མི་བཏང་ངོ་། །ཞེས་བཟུང་ལ་གཟུངས་ཐག་རྡོ་རྗེ་ལུ་གུ་རྒྱུད་ཁོང་གསེང་བྲེང་ཆགས་སུ་ཡོད་པ་ལས། བདག་གི་ཐུགས་སྲོག་ས་བོན་དང་བཅས་པའི་འོད་ཟེར་ཕར་སོང་མདུན་བསྐྱེད་ཐུགས་སྲོག་སྔགས་ཕྲེང་དང་བཅས་པ་ལ་ཕོག་པས་ཐུགས་རྒྱུད་བསྐུལ་བར་མོས་ཏེ་ལྷ་ཛབ་དང་སྨན་ཛབ་སྦྲེལ་མ་ཅི་འགྲུབ་བཟླ། དེ་ནས། བདག་མདུན་ཐུགས་ཀྱི་ནོར་བུའི་དཀྱིལ་འཁོར་དུ་གསལ་བའི་ཙིཏྟ་རིན་ཆེན་ཟུར་བརྒྱད་པའི་གཞལ་ཡས་
ཁང་གི་བླ་མའི་ཐུགས་ཀར་པདྨ་དམར་པོའི་ལྟེ་བ་ཧྲཱིཿས་མཚན་པའི་མཐའ་སྐོར་དུ་དགུ་པའི་འཛབ་ཀྱིས་བསྐོར་ཏེ་དབུ་ནང་ཞབས་ཕྱིར་བསྟན་པའོ༔ ཞེས་དམིགས་ལ་དགུ་ཛབ་བརྒྱ་རྩ་བཟླ་བ་ནི་ཐུགས་བསྙེན་ནོ། །དེ་ལས་ངག་གི་ལམ་དུ་ཞུགས་ཏེ་ལྕེའི་སྟེང་དུ་སྣང་བ་མཐའ་ཡས་ཚོན་གང་བའི་མཐའ་མ་ལ་འཛབ་ཀྱིས་བསྐོར་བའོ༔ ཞེས་བརྒྱ་རྩ་བཟླ་བ་ནི་གསུང་བསྙེན་ནོ། །དེ་ལས་ཡར་རྐན་གྱི་དཀྱིལ་ནས་ཕྱུང་ནས་སྣ་ནཱ་སའི་ནང་དུ་ཞུགས་ཏེ་ཀླད་ཁྱིམ་དུང་ཁང་གི་དབུས་ཀྱི་དྲག་པོ་རྩལ་གྱི་ཐུགས་སྲོག་ལ་བསྐོར་བར་གྱུར། ཅེས་བརྒྱ་རྩ་བཟླ་བ་ནི་སྐུ་བསྙེན་ནོ། །དེའང་སྐུར་བསྒོམ་པ་བསྙེན་པ། གསུང་དུ་བསྒོམ་པ་ཉེ་བསྙེན༔ ཐུགས་སུ་བསྒོམ་པ་བསྙེན་པ་ཆེན་པོ་ཞེས་བྱའོ། །དེ་ཡང་ཐུགས་ཀའི་ཡིག་དགུ་པོ་དེ་ལས་འོད་ཟེར་འཕྲོས་པས་བདེ་བར་གཤེགས་པའི་ཐུགས་ལ་ཕོག༔ ཐུགས་མཉེས༔ རྣལ་འབྱོར་པའི་ཡིད་ལ་ཕོག་ཡིད་སྒྲིབ་དག༔ ངག་གི་ལམ་བརྒྱུད་ལྕེ་སྟེང་གི་སྣང་བ་མཐའ་ཡས་ལ་ཐིམ༔ དེ་ལས་འོད་འཕྲོས་དེ་བཞིན་གཤེགས་པ་རྣམས་ཀྱི་གསུང་ལ་ཕོག༔ གསུང་མཉེས༔ རྣལ་འབྱོར་པའི་ངག་ལ་ཕོག་ངག་སྒྲིབ་དག༔ ཡར་རྐན་གྱི་དཀྱིལ་ནས་གཡོན་དུ་ཞུགས༔ སྤྱི་བོ་དུང་ཁང་གི་དྲག་པོ་རྩལ་ལ་ཐིམ༔ དེ་ལས་འོད་འཕྲོས་དེ་བཞིན་གཤེགས་པ་རྣམས་ཀྱི་སྐུ་མཉེས༔ རྣལ་འབྱོར་པའི་ལུས་ཀྱི་སྒྲིབ་པ་སྦྱངས༔ སླར་
འདུས་སྒལ་ཚིགས་ཀྱི་རྟ་ལ་ཞོན་ཚངས་པའི་གཞུང་བརྒྱུད་ཡུམ་གྱི་མཁའ་ལ་བབས་པར་གྱུར། ཅེས་དམིགས་ལ་དགུ་པའི་ཛབ་ཅི་འགྲུབ་བཟླ་བ་ནི་སྒྲུབ་པའོ། །ཡུམ་གྱི་མཁའ་ལས་འོད་འཕྲོས་བདེ་བར་གཤེགས་པ་རྣམས་ཀྱི་ཐུགས་རྒྱུད་བསྐུལ༔ འགྲོ་དོན་བྱས། ཕྱི་འབྱུང་བ་རྩི་ཤིང་ནགས་ཚལ་གྱི་བཅུད་བསྡུས༔ འོད་ཀྱི་གོང་བུ་ཏ་ལེ་བ་ལྟར་དཀར་ཀྱི་ལེར་གནས་པར་གྱུར༔ ཅེས་དམིགས་ལ་ཛབ་ཅི་འགྲུབ་བཟླ་བ་ནི་ཉེ་བའི་སྒྲུབ་པའོ། །དེ་ལས་འོད་འཕྲོས་ལུས་ངག་ཡིད་གསུམ་ལས་དང་ཉོན་མོངས་པའི་སྒྲིབ་པ་བག་ལ་ཉལ་དང་བཅས་པ་བསྲེགས་སྦྱངས་བཞུ་བཏུལ་ནས༔རྩ་བའི་མ་རྡལ་གྱི་བདུད་རྩི་སྨན་ལ་འདུས་པས་དམ་རྫས་ཀྱི་དངོས་པོ་གདོས་བཅས་ཅན་བསྲེགས་སྦྱངས་བཏུལ་ནས༔ སྨན་གྱི་དངོས་པོ་དང་བྲལ་ཏེ་བདུད་རྩིའི་རང་བཞིན་དུ་དཀར་ལྟེམ་གྱིས་གྱུར་པ་ལས༔བདག་ལ་འདུས་པས་རྣམ་པར་རྟོག་པའི་ནད་ཞི་བར་བྱས་ཏེ་འགལ་མེ་ཀླད་ལ་བསྐོར་བ་བཞིན་ཏུ་གྱུར༔ཅེས་དམིགས་ལ་བཟླ་བ་ནི་སྒྲུབ་པ་ཆེན་པོའོ། །ཐུན་མཐར་བདུད་རྩིའི་ཆ་བ་བརྗོད་པ་ནི། ཧཱུྃ༔ ཉི་ཟླ་གསལ་བའི་དཀྱིལ་འཁོར་དུ༔ དགུ་པའི་འཛབ་ཀྱིས་བཅུད་བསྡུས་ཏེ༔ །དུས་གསུམ་སངས་རྒྱས་མཆོད་པའི་ཕྱིར༔ བཀའ་བཞིན་བསྟེན་ནས་དངོས་གྲུབ་བླངས༔ མུ་ཏིག་དཀར་པོ་དྲི་མེད་ལྟར༔ སྒྲུབ་པ་པོས་ནི་ནན་ཏན་བྱ༔ གུ་ཧྱ་ལག་གི་ཕྱག་
རྒྱ་ཡིས༔ གཞུང་བཞིན་བསྟེན་ནས་འཕྲོ་འདུ་བྱ༔ ཨོཾ་ལས་ཡེ་ཤེས་འོད་འབྱུང་ཞིང་༔ ཨཱཿཡིས་མེས་བསྲེགས་ཐལ་བར་བརླག༔ ཧཱུྃ་གིས་བདུད་རྩི་རྣམ་པར་དག༔ སརྦས་ཐམས་ཅད་དབང་དུ་བསྡུས༔ པཉྩ་རྣམ་ལྔ་མངོན་སངས་རྒྱས༔ ཨ་ནི་སྐྱེ་མེད་ཆོས་ཀྱི་དབྱིངས༔ མྲྀས་ནི་བདུད་རྩི་རྣམ་པར་དག༔ ཏས་ནི་འཁོར་བ་སྟོང་པར་བྱེད༔ ཧཱུྃ་ནི་ཐུགས་ཀྱི་ས་བོན་ཏེ༔ ཧྲཱིཿས་ནི་ཆགས་པ་དབང་དུ་སྡུད༔ ཋས་ནི་སྐྱེ་འཆི་མེད་པའོ༔ དགུ་པའི་འཛབྲ་ཅེས་དེ་ལ་བྱའོ༔ ཞེས་བརྗོད་པ་ཉུ་ལེ་བསྐྲད་ཅིང་བྱིན་འབེབས་ཛབ་དབྱངས་བཅས་བྱ། ཐུན་རྗེས་མར་བདག་བསྐྱེད་ལས་བྱང་བཏང་མི་དགོས་བས་མདུན་བསྐྱེད་མཆོད་པ་བྱིན་རླབས་ཕྱིན་ཆད་ཚར་གཅིག་བསྐྱར། གསུམ་པར་དེ་མཚུངས་ལ་བཟླས་པ་གྲུབ་ནས་ཆེ་བ་བརྗོད་པ་སོང་རྗེས། དམ་ཅན་གཏོར་ཆོག །ཚོགས་མཆོད། རྗེས་ཆོག་རྣམས་གྲུབ་ནས་ཉུ་ལེ་བསྐྲད་ཅིང་བྱིན་འབེབས་ཛབ་དབྱངས་བཅས་བྱ། མཚན་ཐུན་གསུམ་པོའང་དེས་འགྲེས་ཏེ་ཐོང་ཐུན་མཐར་ཚོགས་མཆོད་རེ་འབུལ། འདི་དོན་རྩ་བའི་གཞུང་ཉིད་ལས། བདག་ཉིད་ཐུགས་ཀྱི་ནོར་བུ་རྩ་བའི་དཀྱིལ་འཁོར་དུ་དམིགས་ལ་བསྟོད་མཆོད་འབུལ་ཞིང་རྩ་བའི་བསྙེན་པ་ཅུང་ཟད་བཟླ༔ དེ་ནས་ཕྱོགས་བཞི་དབུས་དང་སྔར་གཟུངས་ཐག་བཏགས་ལ་སློབ་དཔོན་མཆེད་རྒྱལ་པོ་ལྔས་འཐེབ་ལ་གཡས་ཕྲེང་བ་བགྲངས་ཞིང་། གཡོན་ཕྱག་རྒྱ་བདུད་རྩིར་གཏད་ལ་འཛབ་གཡོ་འཁྲུལ་མེད་པར་བགྲང་ངོ་། །དེ་ཡང་གཙོ་བོའི་ས་མཱ་དྷི་
མ་ཡེངས་བར་གཏད། ཕྱོགས་ཀྱི་རྒྱལ་ཐེབས་བཞིས་གཟུངས་ཐག་ནས་བརྒྱུད་པའི་འཁྲུལ་འཁོར་གྱི་དམིགས་པ་བྱ་ཞིང་རྒྱུན་འཛབ་བགྲང་༔ མཆེད་བྱིངས་ཚོ་གསུམ་མམ་ལྔར་བཅད་དེ་རེག་བྱ་ཞིང་དཀྱིལ་འཁོར་ལ་བསྐོར་ལ་འཛབ་དབྱངས་རྒྱུན་མི་ཆད་པར་དི་རི་རི་བགྲང་། གཞན་ཡང་ལ་ལས་ཕྲིན་ལས་ཀྱི་གཞུང་བསྲང་༔ ལ་ལས་སྐོང་བཤགས་ཆོ་ག་བྱ༔ ལ་ལས་སྲུང་འཁོར་བསྒོམ་ཞིང་སྲུང་སྔགས་བཟླ༔ ཐམས་ཅད་དང་པོ་དུབ་དུབ་མེ་བྱ་བར་དལ་ཕབ༔ བར་དུ་རྒྱུན་བསྲིང་༔ མཐར་ངར་ཕྱུང་ལ་བྱའོ༔ ཞེས་དང་། དེ་ལྟར་བསྒྲུབས་པས་རྟགས་མཚན་འབྱུང་ཚུལ་ཡང་། རྟགས་དང་མཚན་མ་བདུན་གྱིས་འབྱུང་༔ འོད་དང་དུ་བ་སྒྲ་དང་དྲི༔ ལྷ་མོའི་གཟུགས་ཀྱང་སྟོན་བར་བྱེད༔ མང་དུ་འཕེལ་ན་བསྒྲུབ་ཚད་ཡིན༔ དེ་ལ་ཡ་མཚན་སྐྱེ་མི་བྱ༔ །ཞེས་གསུངས་སོ། །འདི་ཕྱེ་སྒྲུབ་ཀྱི་དངོས་གཞི་ཡིན་པས་ཞག་གསུམ་ལས་ཉུང་མི་རུང་ངོ་། །དེ་ལྟར་འགྲུབ་རྟགས་བྱུང་བའམ་ཞག་གྲངས་ཐེམས་ནས་བདུད་རྩི་བསྐྱིལ་ཞིང་བཟུང་བ་ནི། དཀྱིལ་འཁོར་ལྷ་ཚོགས་ཐམས་ཅད་བདེ་བ་ཆེན་པོས་རོལ་པའི་སྦྱོར་མཚམས་སུ་ཡེ་ཤེས་བདུད་རྩི་དཀར་དམར་གསལ་འཚེར་དངུལ་ཆུའི་ཐིགས་པ་བཞིན་ཏུ་གཡོ་ཞིང་འཛག་ལ་ཁད་དུ་འཁྱིལ་བར་གྱུར། ཅེས་མོས་ལ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀུནྡྷ་ལཱི་ཧཱུྃ་ཧྲཱིཿཋཱ༔ སྟོང་རྫོགས་པ་དང་བདུད་རྩིའི་སྲུང་མ་བཞི་བསྐུལ་བ་ནི། དར་སྣ་གཡབ། སྨན་ཕུད་འཐོར་ལ། ཧཱུྃ༔ བདག་ཅག་སྐལ་ལྡན་སྒྲུབ་པ་པོའི༔ གཞལ་ཡས་དུར་ཁྲོད་གནས་མཆོག་ཏུ༔ ལོངས་
སྤྱོད་དུར་ཁྲོད་རྫས་ལ་བསྟེན༔ སྡོང་བུ་དུར་ཁྲོད་རས་ལ་བལྟམས༔ ཚིལ་ཆེན་མར་ཁུ་རྒྱ་མཚོར་བསྐྱིལ༔ རྒྱལ་བའི་ལྷ་ཚོགས་ཐུགས་དམ་བསྐང་༔ དམ་ཅན་མ་གཡེལ་དམ་ལ་འདུས༔ བདུད་རྩིའི་སྲུང་མ་ཐུགས་དམ་ཅན༔ རྩི་ཡི་ལྷ་མོ་གྲུབ་པ་མོ༔ སྨན་གྱི་ལྷ་མོ་ནོར་གྱི་རྒྱུན༔ ཤིང་གི་ལྷ་མོ་འོད་འཆང་མ༔ ནགས་ཀྱི་ལྷ་མོ་རྨ་བྱའི་མགྲིན༔ རྩི་བཅུད་སྨན་གྱི་བཅུད་སྡུས་ལ༔ བདུད་རྩི་འདི་ལ་བྱིན་ཅིག་ཕོབ༔ དཀྱིལ་འཁོར་འདི་ལ་དབང་ཞིག་སྐུར༔ སྨན་གྱི་སྲུང་མ་དམ་ཚིག་ཅན༔ བདུད་རྩི་སྨན་གྱིས་གཡབ་འདོར་ནས༔ ཨ་མྲྀ་ཏ་ལ་དགོངས་ནས་ཀྱང་༔ དམ་ཚིག་དབང་གིས་གཤེགས་སུ་གསོལ༔ རྟགས་དང་མཚན་མ་བསྟན་པ་དང་༔ བདག་གིས་བཅོལ་པའི་ཕྲིན་ལས་མཛོད༔ ཅེས་དབྱངས་དང་བཅས་བརྗོད༔ དེ་ནས་བདུད་རྩི་དབབ་པ་ནི༔ དཀྱིལ་འཁོར་པ་རྣམས་ཀྱི་མཁའ་གསང་ལས་བྱང་སེམས་བདུད་རྩིའི་རྒྱུན་ཆར་ལྟར་བབས་ཤིང་། སྨན་སྲུང་རིག་འཛིན་རྣམས་ཀྱིས་ཀྱང་འཁོར་འདས་བརྟན་གཡོའི་དྭངས་བཅུད་ཐམས་ཅད་བསྡུས་ཏེ་ཁ་དོག་དྲི་རོ་ནུས་པ་དང་ལྡན་པའི་བདུད་རྩིའི་རྒྱ་མཚོ་ཆེན་པོར་གྱུར། ཅེས་མོས་ལ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་པྲ་བེ་ཤ་ཡ་ཕེ༚་ཕེ༚་ཧཱུྃ་ཧཱུྃ་ཧྲཱིཿཋཱ༔ སྟོང་རྫོགས་པ་དང་གསུར་ཆེན་གྱི་དུད་པ་བཏང་། མཆོག་ལག་གཡབ་མོ་བཤུག་
གླུ་བཅས། ཧཱུྃ༔ འདས་པའི་དུས་ན་སྔོན་བྱུང་བ༔ སངས་རྒྱས་ཀུན་གྱི་ཡེ་ཤེས་སྐུ༔ ཡེ་ཤེས་ཐུགས་ཀྱི་སྤྲུལ་པ་ལས༔ སྤྲུལ་པ་ཁྲོ་བོའི་ཚོགས་བྱུང་སྟེ༔ འཇིག་རྟེན་དྲེགས་པ་བསྒྲལ་བ་ལས༔ དུར་ཁྲོད་ཆེན་པོ་བརྒྱད་དུ་གྱུར༔ ཀེའུ་རཱི་དའ་ཙེའུ་རཱིཿ པྲ་མོ་ཧཱ་དང་བེ་ཏཱ་ལི༔ པུཀྐ་སཱི་དང་ཀསྨཱ་རི༔ སྨེ་ཤ་ནཱི་དང་ཙཎྜ་ལཱི༔ ཡོན་ཏན་དངོས་གྲུབ་ཆེན་པོ་སྟེ༔ བདུད་རྩི་སྨན་གྱི་བྱིན་ཅིག་ཕོབ༔ ཅེས་པས་མ་མོ་བརྒྱད་བསྐུལ། དེ་ནས་དབང་དུ་བྱ་བ་ནི། སྨན་གྱི་ཕོ་བྲང་ནང་རྟ་མགྲིན་ཡབ་ཡུམ་སྐད་ཅིག་གིས་གསལ་བ་མཉམ་སྦྱོར་བྱང་ཆུབ་སེམས་ཀྱི་རྒྱུན་སྨན་དང་འདྲེས་པ་གཟུངས་ཐག་རྡོ་རྗེའི་ཁང་གསེང་གི་ལམ་བརྒྱུད། བདག་ལ་ཐིམ་པར་གྱུར། ཅེས་བསྒོམས་ནས། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧ་ཡ་གྲཱི་ཝ་ཧྲཱི༔ ཧུ་ལུ་ཧུ་ལུ་ཧྲཱིཿ པདྨ་པདྨ་ཧྲཱི༔ བྷནྡྷ་བྷནྡྷ་ཧྲཱི༔ ཧཱུྃ་ཧྲཱིཿཋཱཿ སྟོང་རྫོགས་པ་དང་ལྷ་གནད་ལ་དབབ་པ་ནི། ཧཱུྃ༔ ང་ནི་དཔལ་ལྡན་རྡོ་རྗེ་འཆང་༔ །ཐུགས་ཀྱི་འཁོར་ལོ་རབ་སྒྱུར་ཞིང་༔ རྡོ་རྗེ་སེམས་དཔའ་འཁོར་དང་བཅས༔ ཐུགས་དམ་དབང་གིས་སྤྱན་འདྲེན་ན༔ དམ་ཚིག་ཚུལ་བཞིན་མི་གཤེགས་སམ༔ གྲུབ་པའི་མཆོག་རྣམས་མ་སྩལ་ན༔ སྐུ་གསུང་། ཐུགས་དང་འགལ་བར་གྱུར༔ ས་མ་ཡ་ལ་དགོངས་ནས་ཀྱང་༔ ཐུགས་ཀྱི་དངོས་གྲུབ་སྩལ་དུ་གསོལ༔ །
ཧཱུྃ༔ ང་ནི་དཔལ་ལྡན་འཁོར་ལོ་འཆང་༔ སྐུ་ཡི་འཁོར་ལོ་རབ་སྒྱུར་ཞིང་༔ རྣམ་པར་སྣང་མཛད་འཁོར་དང་བཅས༔ ཐུགས་དམ་དབང་གིས་སྤྱན་འདྲེན་ན༔ དམ་ཚིག་ཚུལ་བཞིན་མི་གཤེགས་སམ༔ གྲུབ་པའི་མཆོག་རྣམས་མ་སྩལ་ན༔ སྐུ་གསུང་ཐུགས་དང་འགལ་བར་གྱུར༔ ས་མ་ཡ་ལ་དགོངས་ནས་ཀྱང་༔ སྐུ་ཡི་དངོས་གྲུབ་སྩལ་དུ་གསོལ༔ ཧཱུྃ༔ ང་ནི་དཔལ་ལྡན་རིན་ཆེན་འཆང་༔ ཡོན་ཏན་འཁོར་ལོ་རབ་སྒྱུར་ཞིང་༔ རིན་ཆེན་འབྱུང་ལྡན་འཁོར་དང་བཅས༔ ཐུགས་དམ་དབང་གིས་སྤྱན་འདྲེན་ན༔ དམ་ཚིག་ཚུལ་བཞིན་མི་གཤེགས་སམ༔ གྲུབ་པའི་མཆོག་རྣམས་མ་སྩལ་ན ༔སྐུ་གསུང་ཐུགས་དང་འགལ་བར་གྱུར༔ ས་མ་ཡ་ལ་དགོངས་ནས་ཀྱང་༔ ཡོན་ཏན་དངོས་གྲུབ་སྩལ་དུ་གསོལ༔ ཧཱུྃ༔ ང་ནི་དཔལ་ལྡན་པདྨ་འཆང་༔ གསུང་གི་འཁོར་ལོ་རབ་སྒྱུར་ཞིང་༔ སྣང་བ་མཐའ་ཡས་འཁོར་དང་བཅས༔ ཐུགས་དམ་དབང་གིས་སྤྱན་འདྲེན་ན༔ དམ་ཚིག་ཚུལ་བཞིན་མི་གཤེགས་སམ༔ གྲུབ་པའི་མཆོག་རྣམས་མ་སྩལ་ན༔ སྐུ་གསུང་།ཐུགས་དང་འགལ་བར་གྱུར༔ ས་མ་ཡ་ལ་དགོངས་ནས་ཀྱང་༔ གསུང་གི་དངོས་གྲུབ་སྩལ་དུ་གསོལ༔ ཧཱུྃ༔ ང་ནི་དཔལ་ལྡན་རྒྱ་གྲམ་འཆང་༔ ལས་ཀྱི་འཁོར་ལོ་
རབ་སྒྱུར་ཞིང་༔ ཀརྨ་དོན་ཡོད་འཁོར་དང་བཅས༔ ཐུགས་དམ་དབང་གིས་སྤྱན་འདྲེན་ན༔ དམ་ཚིག་ཚུལ་བཞིན་མི་གཤེགས་སམ༔ གྲུབ་པའི་མཆོག་རྣམས་མ་སྩལ་ན༔ སྐུ་གསུང་ཐུགས་དང་འགལ་བར་གྱུར༔ ས་མ་ཡ་ལ་དགོངས་ནས་ཀྱང་༔ ཕྲིན་ལས་དངོས་གྲུབ་སྩལ་དུ་གསོལ༔ ཧཱུྃ༔ ང་ནི་ཡེ་ཤེས་ཐམས་ཅད་འཆང་༔ དབྱིངས་ཀྱི་འཁོར་ལོ་རབ་སྒྱུར་ཞིང་༔ ཟླ་གམ་དམར་པོའི་དཀྱིལ་འཁོར་དུ༔ རཀྟའི་རྒྱ་མཚོ་འཁྲུགས་པའི་དཀྱིལ༔ གསང་བ་ཡུམ་གྱི་མཁང་ཀློང་ན༔ གདོད་ནས་དག་པའི་བདུད་རྩི་སྦྱོར༔ རྒྱལ་བའི་ཐུགས་དམ་གཉེན་བསྐང་ཕྱིར༔ དབང་ཆེན་དབྱིངས་ཀྱི་དངོས་གྲུབ་སྩོལ༔ ཞེས་པས་དངོས་གྲུབ་བསྡུའོ། །བདུད་རྩི་བསྐྱིལ་དབབ་དབང་དུ་བྱ་བ་རྣམས་སྒྲུབ་པ་གྲོལ་ཉིན་ཁོ་ནར་ཕྱེ་སྒྲུབ་ཆེ་བརྗོད་རྗེས་མཐར་ཆགས་སུ་བཏང་ནས་ཛབ་རྣམས་འདུས་ཚོགས་མང་སྐབས་སྤྱི་མགོ་ནས་སྟོང་འགྲོ་བ་བྱེད་སྣོལ་སྲོལ་བ་ལྟར་རམ། ཉིན་གཉིས་པའི་ཐུན་རྗེས་མ་ནས་བསྐྱིལ་བ། ཉིན་གསུམ་པའི་ཐུན་རྗེས་མ་ནས་དབབ་པ། གྲོལ་ནང་དབང་དུ་བྱ་བ་རྣམས་རིམ་བསྣན་བྱས་ནའང་ལེགས་སོ། །སྨན་རྐྱང་སྒྲུབ་ཡིན་ན་རྗེས་ཆོག་མཆོད་བསྟོད་རྗེས་ལས་བྱང་གཤམ་གྱི་དངོས་གྲུབ་ལེན་ཆོག་འདོན་ལ་ནང་མཆོད་བཀྱེ། ལྟས་བཟང་བྱུང་ནའང་དེ་མ་ཐག་དངོས་གྲུབ་ལེན་ཆོག་བྱ་བ་གནད་ཡིན་པས་དེ་ལྟར་བྱ། རྩ་སྒྲུབ་དང་སྦྲེལ་ན་གོང་དུ་སོང་བས་འདིར་མ་
བྱས་ཀྱང་ཆོག་གོ། །འདི་ཉིན་དགོངས་ཐུན་ལ་པདྨ་རྒྱལ་ཐེབས་དཔོན་སློབ་རྣམས་ཀྱིས་དབང་གི་སྦྱིན་སྲེག་བྱའོ། །སྤྱི་དོན་གསུམ་པ་རྗེས་ཀྱི་རིམ་པ་ལ་གསུམ། བདག་དོན་དངོས་གྲུབ་བླང་བ། གཞན་དོན་དབང་བསྐུར་བ། མཇུག་སྡུད་མཐའ་རྒྱས་ཀྱི་རིམ་པའོ། །དང་པོ་ལ་གཉིས། རྩ་བའི་སྒྲུབ་ཆེན་དང་། སྨན་སྒྲུབ་ཀྱི་དངོས་གྲུབ་བླང་བའོ། །དང་པོ་ནི། གཞུང་མཐུན་ལྟས་བཟང་གཏན་ལ་ཕེབས་པའི་ཚེ་དངོས་གྲུབ་ལེན་པའི་ཆོ་ག་ལ་འཇུག་དགོས་པ་ཡིན་ཀྱང་། དེང་སང་ཞག་དུས་གྲངས་བཅད་ཀྱི་སྒྲུབ་པ་བྱེད་པའི་སྐབས་འདིར་ཉིད་ཐ་མ་ལ་བྱ་བ་ཡིན་པས། དངོས་གྲུབ་ཀྱི་རྟེན་བཤམ་པ་ནི། དཀྱིལ་འཁོར་གྱི་མདུན་ཏུ་སྟེགས་བུ་ཁེབས་ལྡན་དཀར་པོའི་སྟེང་དུ་འབྲུ་དཀར་པོས་གཡུང་དྲུང་གཡས་འཁྱིལ་དུ་བྲིས་པའི་ཁར་རིན་པོ་ཆེའི་སྣོད་དུ་ཆང་དང་ཨ་མྲྀ་ཏ་དཀར་དམར་འབྲུ་བཅུད་སྦྱར་བའི་འབྲང་རྒྱས་རིན་ཆེན་འབར་བའི་དབྱིབས་ཅན་གྱི་ཕྱོགས་བཞིར་ལས་བཞིའི་འབྲང་རྒྱས་ཀྱིས་བསྐོར་བ་བཞག །དེ་སྟེང་མཉྫུ་ལ་ཐོད་པ་མཚན་ལྡན་ཆང་བཟང་པོས་བཀང་བ་བཞག །དངོས་གྲུབ་ཞུ་བའི་གསོལ་བྱང་ཡང་བཅུག །མཐར་དངོས་གྲུབ་ཀྱི་རྫས་ཟླ་དམ་དབང་གི་ཟས་ཧི་ལ་སོགས་ལ་བཅོས་པའི་ལ་དུའམ་ཁུར་བ། རྡོ་རྗེ་ཚེ་ཡི་ཟས་ཟན་ལ་བཅོས་པའི་འབྲང་རྒྱས་སོགས། བཀྲ་ཤིས་དག་པའི་ཟས་ཟླ་རྒྱས་འཇོག་པའོ། ཟླ་ཕྲུམ་ཐུད། གལ་ཕྱི་ཟུག་པ། རྒུན་འབྲུམ་བཅའ་སྒ་སོགས་ཤིང་ཏོག་གི་རིགས། མཱཾ་ས་ཤ། མ་དན་ཆང་སོགས་བཟའ་བཅའ་བཏུང་བའི་རིགས་གྱུར་མ་ཚང་བ་མེད་པས་བསྐོར། སྨན་སྒྲུབ་དང་སྦྲེལ་སྐབས་སྨན་དཀྱིལ་འོག་ནས་འབྱུང་བ་གཡོན་ངོས་སུ་བཀོད་
ལ་དངོས་གྲུབ་ཀྱི་རྫས་རྣམས་གཉིས་ཀའི་མཐར་བསྐོར། རྫས་ལ་དར་དམར་མཐིང་གི་ཁབས་ཀྱིས་བཀའ་ལ་བཞག་གོ། །དེ་ནས་ཕྲིན་ལས་ཀྱི་གཞུང་བསྲང་ལུགས་སྔར་ལྟར་ལ་བཟླས་པའི་སྐབས་ཐུན་དཔོན་གཟུངས་ཐག་རྒྱལ་ཚབ་པར་འབུལ། མཐར་ཐུན་བ་རྣམས་དང་ཆབ་གཅིག་ཁ་སྐོང་དང་བསྙེན་བསྟོད་བྱས་ལ་གཟུངས་ཐག་ལས་རྡོར་གྱིས་བསྡུ་ཞིང་ཐུན་པ་རྣམས་ཀྱིས་རྩ་བསྙེན་ལ་དངོས་གྲུབ་བླང་སྔགས་བཏགས་ལ་རྒྱུན། འདི་ཉིན་གཏོར་སྤུངས་དང་ཆང་བརྟན་གསར་དུ་བཤམ་མི་དགོས། ཆོས་སྲུང་གཏོར་འབུལ་གྲུབ་པ་དང་། བགེགས་བསྐྲད་པ་ནི། འདུས་པ་རྣམས་ཞྭ་ཆོས་བཅས། ཧཱུྃ༔ དངོས་གྲུབ་སྒྲུབ་ལ་བར་གཅོད་བྱེད་པ་ཡི༔ བགེགས་དང་ལོག་འདྲེན་ལན་ཆགས་འབྱུང་པོའི་ཚོགས༔ ཆེ་མཆོག་དབང་ཆེན་རྡོ་རྗེ་ཐོད་ཕྲེང་གིས༔ བསྐྲད་གཟིར་མནན་ནས་རྡུལ་དུ་བརླག་པར་མཛོད༔ ཅེས་དང་དྲག་སྔགས་ཡུངས་ཐུན་གུ་གུལ་དུད་པས་བགེགས་བསྐྲད་ལས་བྱང་ནང་། ཧཱུྃ་ཧྲཱི༔ ཡེ་ཤེས་རོལ་པ་སོགས་བརྗོད་ལ་སྲུང་འཁོར་བསྒོམ། ཡེ་ཤེས་སྐུ་མཆོག་སོགས་བརྗོད་མེད་དོན་བཤགས་དང་ཡིག་བརྒྱ་བརྗོད་ལ་ནོངས་པ་བཤགས། དེ་ནས་ལས་རྡོར་གྱིས་སྤོས་དང་། དར་ཚོན་སྣ་ལྔའི་གཡབ་དང་རྒྱལ་ཚབ་པས་གཡབ་དར་དྲིལ་བུ་བཅས་ཐོགས་ནས་ཚོགས་པ་དང་དཀྱིལ་འཁོར་ལ་བསྐོར་ཞིང་བྱིན་འབེབས་གོང་ལྟར་བྱ། རྩ་གསུམ་ཐུགས་ཀྱི་ནོར་བུའི་དཀྱིལ་འཁོར་གྱི་ལྷ་རྣམས་ཡབ་ཡུམ་སྙོམས་པར་ཞུགས་པའི་སྦྱོར་
མཚམས་ནས་འོད་ཟེར་དམར་པོ་ཕྱོགས་བཅུར་འཕྲོས་འགྲོ་བའི་རྒྱུད་སྦྱངས། བདེ་བར་གཤེགས་པ་རྣམས་ལ་ཕོག་དགྱེས་པ་བསྐྱེད་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་དངོས་གྲུབ་ཚུར་འདུས་བདག་ལ་ཐིམ་གསལ་ཞིང་བརྟན་པར་བྱས། རྫས་རྣམས་ལ་ཐིམ་པས་འཆི་མེད་ཀྱི་བདུད་རྩི་དངོས་གྲུབ་ཀུན་གྱི་སྙིང་པོར་འཁྱིལ་བར་གྱུར་པར་བསམས་ལ། དངོས་གྲུབ་ཀྱི་རྫས་ཀྱི་ཁར་གཟུངས་ཐག་བཞག་པའི་སྣེ་རྡོར་སློབ་ཀྱིས་འཛིན་ལ་རྩ་བསྙེན་ཤམ་དུ། ཀཱ་ཡ་ཝཱ་ཀ་ཙིཏྟ་སིངྡྷི་ཕ་ལ་ཧཱུྃ༔ ཞེས་བཏགས་པ་བརྒྱ་སྟོང་ཅི་འགྲུབ་བཟླས། བཟླས་པ་གྲུབ་ནས་གཟུངས་ཐག་བསྡུས་ལ་ཁེབས་བསལ། དཀྱིལ་འཁོར་གྱི་ལྷ་ཚོགས་རྣམས་ཀྱི་གནས་གསུམ་ནས་དངོས་གྲུབ་འབྲུ་གསུམ་གྱི་ཚུལ་དུ་བར་མ་ཆད་པར་རང་གི་གནས་གསུམ་དུ་ཐིམ་པར་གྱུར་པར་མོས་ལ། ཧཱུྃ༔ རྩ་གསུམ་དཀྱིལ་འཁོར་ལྷ་ཚོགས་དགོངས་སུ་གསོལ༔ དང་པོར་བསྙེན་ཞིང་བར་དུ་མི་གཡེལ་བསྒྲུབས༔ ད་ལྟ་དོན་དམ་གཉིས་མེད་ངང་དུ་གཅིག༔ དེང་སང་སྐྱ་རེངས་དང་པོ་ཤར་ལ་ཉེ༔ རྡོ་རྗེ་འཛིན་པའི་ནམ་ཡང་ལངས་ལ་ཁད༔ བཟླས་བརྗོད་བསྙེན་པའི་ཞག་གྲངས་གྲངས་ཀྱང་ཐེམ༔ དངོས་གྲུབ་སྩོལ་བའི་དུས་ལ་དབབ་པས༔ སྐལ་ལྡན་བདག་ཅག་རྣམས་ལ་དངོས་གྲུབ་སྩོལ༔ ཨོཾ་ཨཱཿཧཱུྃ་སརྦ་སིངྡྷི་ཕ་ལ་ཧོ༔ ཞེས་དང་ཕྲིན་
ལས་རང་གཞུང་ལྟར། ཧཱུྃ་ཧྲཱིཿ བདེ་ཆེན་ཡངས་པ་ཆེན་པོའི་ཕོ་བྲང་ནསཿ སོགས་བརྗོད་ལ། རྡོ་རྗེ་རྒྱལ་ཚབ་པས་རྣམ་བུམ། རྒྱལ་ཐེབས་གཞན་རྣམས་ཀྱིས་ལས་བཞིའི་འབྲད་རྒྱས་སོགས་ཕྲེང་ཚར་དུ་ཁྱེར་ལ་རྡོ་རྗེ་རྒྱལ་པོ་ནས་བརྩམས་དངོས་གྲུབ་ཀྱི་རྫས་རྣམས་ཐམས་ཅད་ལ་བཀྱེ། ནང་དབང་བསྐུར་ན་སྐབས་འདིར་བུམ་པ་འགྲིམ་མི་དགོས་སོ། །གཉིས་པ་བདུད་རྩིའི་དངོས་གྲུབ་བླང་བ་ནི། བཤམ་ཚེག་སྐབས་དཀྱིལ་འཁོར་མདུན་ཏུ་སྟེགས་བུ་ལ་རས་བྲིས་ཀྱི་དཀྱིལ་འཁོར་སྒོ་རྫོགས་སྤྱི་འགྲེ་ལྟར་ལ་དབུས་སུ་ཟླ་གམ་གཅིག །ཕྱི་རིམ་གྲུ་བཞིའི་ཟུར་བཞི་ལ་ཟླ་གམ་རེ་རེ། ཐམས་ཅད་མདོག་དམར་པོ་བཅད་ཁ་ནུབ་ཏུ་བསྟན་པའི་རྒྱབ་ཏུ་བསྟན་པའི་རྒྱབ་ཏུ་རྡོ་རྗེའི་ཕྲེང་བས་བསྐོར་བ་བྲིས་པ་བཀྲམ་པའི་དབུས་སུ་ཐོད་ཆང་གསོལ་བྱང་དང་བཅས་པ་བཞག་ལ་དངོས་གྲུབ་ཀྱི་རྫས་རྣམས་ཀྱིས་མཐའ་བསྐོར། ཕྲིན་ལས་སྔ་ཉིན་ལྟར་སྨན་གྱི་མདུན་བསྐྱེད་བཟླས་པ། བསྐྱིལ་དབབ་དབང་དུ་བྱ་བའི་བར་དུ་སོང་ནས་ཆོས་སྲུང་གཏོར་འབུལ་སོགས་གོང་སྨོས་ལྟར་ལ། རྩ་སྒྲུབ་དང་སྤལ་སྐབས་དེའི་དངོས་གྲུབ་བླང་བ་ཡན་སོང་རྗེས། མདུན་གྱི་དཀྱིལ་འཁོར་གྱི་དབུས་སུ་བླ་མ་ཡི་དམ་མཁའ་འགྲོ་ལ་འཇིག་རྟེན་དང་འཇིག་རྟེན་ལས་འདས་པའི་ལྷ་དང་དྲང་སྲོང་རྩི་ཤིང་ནགས་ཚལ་སྨན་གྱི་སྲུང་མ་དང་བཅས་པས་བསྐོར་བ། བདག་གི་ཐུགས་ཀའི་འོད་ཟེར་གྱིས་བསྐུལ་བས་དེ་དག་ལས་འོད་ཟེར་དཔག་ཏུ་མེད་པ། འཕྲོས་རྩ་གསུམ་རྒྱལ་བ་རབ་འབྱམས་ཀྱི་བྱིན་རླབས་དངོས་གྲུབ། བརྟན་གཡོ་འཁོར་འདས་ཀྱི་
བཅུད་དྭངས་མ་ཐམས་ཅད་འོད་ཟེར་བདུད་རྩིའི་རྣམ་པར་ཚུར་བསྡུས། དངོས་གྲུབ་ཀྱི་རྫས་ལ་ཐིམ་པར་གྱུར། ཞེས་མོས་ལ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཨཱ་ཡུཿཕ་ལ་གུ་ཧྱ་སིངྡྷྡྷི་ཧཱུྃ་ཧྲཱིཿཋཱ༔ ཞེས་བཟླས་པ་སྤྱི་ནས་སྟོང་རྫོགས་པར་བཟླས་ལ། དཀྱིལ་འཁོར་གྱི་ལྷ་ཚོགས་རྣམས་ཀྱིས་མཆོག་དང་ཐུན་མོང་གི་དངོས་གྲུབ་ཆར་ལྟར་ཕབ་ནས་བདག་སྒྲུབ་པ་པོ་ལ་སྩལ་བར་གྱུར། ཧཱུྃ༔ རང་བྱུང་འཆི་མེད་བདུད་རྩིའི་དཀྱིལ་འཁོར་འདིར༔ བླ་མ་ཡི་དམ་མཁའ་འགྲོ་ཐུགས་དམ་ཅན༔ མང་སྒྲིབས་ཡེ་ཤེས་སྤྱན་གྱིས་གཟིགས་གྱུར་ཏེ༔ སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ༔ འཆི་མེད་བདུད་རྩི་སྨན་གྱི་དངོས་གྲུབ་སྩོལ༔ དུག་གསུམ་ནད་ཀྱིས་ཟིན་པའི་གཅོང་སྙིང་ལ༔ འཚོ་བྱེད་སྨན་གྱི་རྒྱལ་པོའི་རྩི་གཏོང་ཕྱིར༔ སྐྱེ་འཆི་མེད་པའི་དངོས་གྲུབ་ཆེན་པོ་སྟེ༔ བདུད་རྩིའི་རྫས་ལ་བརྟེན་ཏེ་ད་སྩོལ་ཞིག༔ བདུད་རྩི་བསྒྲུབས་པའི་ཞག་གྲངས་ད་ནི་ཚང་༔ བདུད་རྩི་བསྙེན་པའི་འཛབ་ཀྱང་ཚང་ལགས་ན༔ སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ༔ ཨོཾ་ཨཱཿཧཱུྃ༔ སརྦ་པཉྩ་ཨ་མྲྀ་ཏ་ཀ་ཡ་ཝཱ་ཀ་ཙིཏྟ་ཧཱུྃ་ཧྲཱིཿཋཱ༔ ཞེས་དངོས་གྲུབ་བསྐུལ་རྗེས་ཞི་རོལ་འོག་ཐོད་ཆང་སློབ་དཔོན་གྱི་མདུན་སྟེགས་སུ་བཞག་
སྨན་གྱི་ཕོ་བྲང་བླངས་ལ་ཐོད་ཆང་ཤུལ་གྱི་སྟེགས་བུར་བཀོད། སློབ་དཔོན་བཞེངས་ནས་སྨན་གྱི་ཕོ་བྲང་ལ་མེ་ཏོག་དོར་རོ། ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ རིག་པ་བྱང་ཆུབ་སེམས་ཀྱི་མེ་ཏོག་འདི༔ ཐབས་དང་ཤེས་རབ་དབྱིངས་སུ་བདག་འབུལ་གྱིས༔ སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ༔ ཨོཾ་བོ་དྷི་ཙིཏྟ་ཀཱ་ཡ་ཝཱ་ཀ་ཙིཏྟ་ས་མ་ཡ་སྟཾྭ༔ ཞེས་བརྗོད་ཅིང་སློབ་དཔོན་དང་འདུས་པ་རྣམས་ཀྱིས་ཀྱང་མེ་ཏོག་འཐོར་ལ་མཎྜལ་སྨན་ཀྱི་ཕོ་བྲང་བཅས་རྡོ་རྗེ་རྒྱལ་པོའི་སྤྱི་བོར་བླངས་ལ། བདག་ཉིད་རང་བཞིན་གྱི་དཀྱིལ་འཁོར་ལ་སྨན་ཡེ་ཤེས་པའི་དཀྱིལ་འཁོར་ཐིམ་པས་གཉིས་སུ་མེད་པར་གྱུར་པར་མོས། དེའི་མདུན་གཡས་གཡོན་གང་བདེར་སློབ་དཔོན་ཞལ་མདུན་བསྟན་གྱིས་ཁྲིའུར་བཞུགས་པ་ལ་མཆེད་ལྕམ་རྣམས་ཀྱིས་བསྐོར་ཏེ། བོ་དྷི་ཙིཏྟ་ཛབ་དབྱངས་ལན་གསུམ་དང་བཅས་སློབ་དཔོན་དང་དཀྱིལ་འཁོར་ལན་གསུམ་བསྐོར། མཎྜལ་ཚོམ་བུ་བདུན་མ་ཙམ་གྱི་མཐར། བདུད་རྩི་སྨན་གྱི་དབང་བསྐུར་ཟབ་མོ་ཞུ་བའི་ཡོན་ཏུ་ཞེས་བསྒྱུར་ལ་ཕུལ། སློབ་དཔོན་གཟུངས་མདང་བཅས་པས་སྨན་སྣོད་བཏེགས། བདག་ཉིད་རང་བཞིན་སོགས་གོང་ལྟར་དམིགས་ལ། ཨོཾ་ཨཱཿཧཱུྃ༔ རྩ་བརྒྱད་ཡན་ལག་སྟོང་དང་སྦྱར་བའི་སྨན༔ དུས་གསུམ་རྒྱལ་བ་རྣམས་ཀྱི་སྐུ་གསུང་ཐུགས༔ སྐུ་ལྔ་ཆོས་ལྔ་ཡེ་ཤེས་རྣམ་པ་ལྔ༔ དུག་ལྔ་མ་སྤངས་ཡེ་ཤེས་ལྷུན་གྱིས་རྫོགས༔ སྐུ་ལྔ་མ་
བསྒྲུབས་བདུད་རྩི་ཆེན་པོར་གྲུབ༔ སྐལ་ལྡན་སྒྲུབ་པ་པོ་ལ་དབང་བསྐུར་བས༔ སྐྱེ་འཆི་མེད་པ་བདུད་རྩིའི་དབང་ཐོབ་ཤོག༔ ཨོཾ་ཨཱ༔ཧཱུྃ་ཧྲཱིཿ གུ་རུ་དེ་ཝ་ཌཱ་ཀི་ནཱི་སརྦ་པཉྩ་ཨ་མྲྀ་ཏ་ཀཱ་ཡ་ཝཱ་ཀ་ཙིཏྟ་ཨ་བྷིཥིཉྩ་ཧཱུྃ་ཧྲཱི་ཋཱ༔ ཞེས་བརྗོད་ཅིང་ཐམས་ཅད་ལ་དབང་བསྐུར། ཚེ་རྫས་བཀྱེ། ཚེ་དང་སྐོང་དང་ཡིད་དུ་འོང་༔ ནད་དང་བྲལ་དང་ཅི་འདོད་པ༔ བགེགས་རྣམས་ཞི་བ་ལ་སོགས་པ༔ ཡོན་ཏན་རྩ་བརྒྱད་དེ་ཡིས་ཐོབ༔ ཅེས་གསུངས་པའི་ཡོན་ཏན་རྣམས་འཐོབ་པར་འགྱུར་བ་ལགས་པས་སྤྲོ་བ་སྐྱེད་མཛོད། ཅེས་བརྗོད་ལ་སྨན་སྣོད་སྟེགས་འུར་བཀོད་ལ་སློབ་དཔོན་རང་གྲལ་དུ་བཞུགས་ལ་བདུད་རྩི་བསྡུ་བ་ནི། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀུཎྜ་ལཱི་མ་ཧཱ་གྷུ་ཧྱ་མཉྫུ་ཤྲཱི་སིངྡྷི་སིངྡྷི་ཧཱུྃ་ཧྲཱིཿཋཱ༔ ཞེས་པའི་འཛབ་སྟོང་རྫོགས་པ་དང་གཟུངས་མ་ཆས་སུ་ཞུགས་པས་སྨན་སྣོད་བཏེགས་ལ། ཨེ་མ་ཧོཿ ངོ་མཚར་རྨད་དུ་བྱུང་བའི་ཆོས༔ ནམ་མཁའ་དང་ནི་མཉམ་པའི་ཆོས༔ རྣམ་པར་མི་རྟོག་རྟོག་ལས་འདས༔ ཀུན་རྫོབ་ཙམ་དུ་བསྟན་པ་མཚར༔ ཅེས་དབྱངས་སྙན་པོ་དང་བཅས་སློབ་དཔོན་ལ་ཕུལ། དེས་ཀྱང་དཀྱིལ་འཁོར་བ་རྣམས་ཀྱིས་བདུད་རྩི་བསྡུ་བ་པོ་འཇམ་དཔལ་རྣོན་པོ་ལ་གཏད་པ་དེས་ཀྱང་གནང་བ་བྱིན་པར་བསམས་ལ། དུས་གསུམ་སངས་རྒྱས་མཉེས་མཆོད་ནས༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཅེས་
བརྗོད་ལ་བླངས་ཏེ་མདུན་སྟེགས་སུ་བཀོད། ལས་རྡོར་རྣམས་ཀྱིས་དངོས་གྲུབ་ཀྱི་རྫས་བཀྱེ་བ་ལག་ཏུ་ཐོགས་ལ་ཤིས་བརྗོད་ཅི་རིགས་བ་ཞིང་་མེ་ཏོག་འཐོར་ཞིང་རོལ་མོ་ལྡིར། དེ་ནས་རྒྱ་བཀྲོལ་ལ་སྤྲོ་ན་རིན་པོ་ཆེའི་གཞོང་པ་གཡའ་མེད་པར་བྱོས་ལ་བལྟས་བརྟག །འཕེལ་ས་འཕེལ་བརྟག་པའང་སྐབས་འདིར་བྱ་བར་གསུངས་ཀྱང་ལག་ལེན་དཀྱུས་ལ་སྐབས་འདིར་མི་འགྲུབ། བདུད་རྩིའི་ཕུར་མ་ཉུང་ཟད་ཅིག་སྡང་གྱི་ཐོད་ཆང་དུ་བཏབ་ལ་ལས་བྱང་ལྟར་སྨན་མཆོད་བྱིན་རླབས་བྱ། ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་ཐམས་ཅད་དཀྱིལ་འཁོར་འཁོར་ལོའི་ལྷ་ཚོགས་ཀྱི་རྣམ་པར་མདུན་གྱི་ནམ་མཁར་སད་པར་མོས་ལ། ལས་བྱང་གི་སྨན་མཆོད་དང་། །མཚན་དོན། ཁཱ་ཧི་སྦྱར་བས་མཆོད་ལ། དངོས་གྲུབ་བླང་བ་ན། ལྕེ་ཡི་རྡོ་རྗེའི་དམ་ཚིག་གིས། །རྡོ་རྗེ་ཅན་གྱི་ཧཱུྃ་བསྒོམས་ཏེ། །བདུད་རྩི་ལྔ་དང་སྦྱར་བའི་སྨན། །མཐེབ་སྲིན་ཐབས་ཤེས་ཕྱག་རྒྱ་ཡིས། མྱངས་ན་རྡོ་རྗེའི་ཐུགས་ཐོབ་འགྱུར། །ཞེས་དང་། ཀཱ་ཡ་ཝཱ་ཀ་ཙིཏྟ་སརྦ་སིངྡྷི་ཧཱུྃ། ཞེས་བརྗོད་ལ། ཉེ་སྙིང་ལས། རྣ་བ་སྙིང་ག་ལྕེ་སྟེང་དང་། །ཡན་ལག་ཀུན་ལ་ཐིག་ལེ་བྱ། །ཞེས་གསུངས་པ་ལྟར་གཡོན་པའི་མཐེབ་སྲིན་གྱིས་ཐིག་ལེ་བྱ་ཞིང་མྱང་། སྐབས་འདིར་རིན་ཆེན་རྒྱལ་ཚབ་དཔོན་སློབ་ནས་རྒྱས་པའི་སྦྱིན་སྲེག་བྱ་ཞིང་ཚོམ་བུ་དང་སྨན་ཕུད་སོགས་མེ་ཐབ་ཏུ་འབུལ་ལ། ཚེ་བསོད་དཔལ་འབྱོར་ཉམས་རྟོགས་ཡོན་ཏན་རྒྱས་པའི་འདོད་གསོལ་བྱ། སྨན་སྒྲུབ་དུ་མ་གཅིག་དང་། རྗེས་སུ་སྒྲུབ་གཏོར་དུ་མ་གཅིག །སྔར་དངོས་གྲུབ་
ཀྱི་རྫས་ཟུར་དུ་བཞག་ཡོད་པ་དེ་བཅས་གཞི་ཁྲིའི་འོག་གི་གཏེར་བུམ་དུ་བཅུག་དགོས་སོ། །དེ་ནས་ལས་བྱང་གི་ཚོགས་བྱིན་རླབས་ནས་བརྩམས་ཚོགས་མཆོད་འབུལ། ཞལ་བསྟབས་སྐབས་སུ་ཧུ་ལེའི་ལིང་ག་མེར་བསྲེགས་ནས་ཐལ་བ་ཆོས་སྐྱོང་གཏོར་མར་བལྟ་བ། ཚོགས་ལ་རོལ། ལྷག་མ་བསྡུས་ལ་སྔར་བཙོན་འཛིན་བྱས་པའི་ལྷག་མ་དང་ལྷན་ཅིག་ལྷག་ཆོག་བྱས་པའི་མཐར་འབེབས་རིང་རྐང་གླིང་བཤུགས་པའི་སྒྲས་མཚོན་པར་གིང་བ་གཉིས་དོན་ལ་རྒྱུག་མདུར་གར་སྟབས་ཀྱིས་ཁྱེར་ཏེ་སྒྲུབ་ཁང་ཕྱི་རོལ་ལྷོ་ནུབ་གོམ་པ་བདུན་ཅུའི་མཚམས་སུ་བསྐྱལ། བསྐུལ་དང་གཏོར་འབུལ་བྱས་ལ་ཆད་མདོའི་མཐར་བཀའ་སྲུང་གཏོར་མ་དང་ཆད་མདོ་རྒྱུན་བཞག་རྣམས་བླངས་ལ་མེ་སྒྲོན་བཅས་འབུལ། བརྟན་མའང་རྒྱུན་བཞག་འབུལ་ཞིང་རྟ་བྲོ་བརྡུང་། དཀྱིལ་འཁོར་གཏོང་རག་ལས་བྱང་ལྟར་མཆོད་པ་བྱིན་བརླབ། མཆོད་བསྟོད་རྒྱས་པ་བྱའོ། །གཉིས་པ་གཞན་དོན་དབང་བསྐུར་བ་ནི། བླ་མའི་དོན་དབང་སྙིང་པོ་བསྡུས་པ་ཙམ་དང་། སྨན་སྒྲུབ་སྐབས་སྨན་དབང་ཡང་སྦྲེལ་ཏེ་སྒྲུབ་ཁང་དུ་འཛུད་པར་འོས་པའི་མཆེད་ནང་མ་རྣམས་ལ་བསྐུར་རོ། །གསུམ་པ་མཇུག་མཐའ་རྒྱས་ཀྱི་རིམ་པ་ལ་ལྔ་ལས། དང་པོ་གཏེར་སྦེད་ནོངས་བཤགས་བསྡུ་རིམ་དང་བཅས་པ་ནི། སྔར་གཞི་སྙིང་དུ་བཅུག་པའི་བུམ་པར་རིལ་བུ་རྟེན་གཏོར་སོགས་སྒྲུབ་རྫས་དང་དངོས་གྲུབ་ཀྱི་ཕུད་བཞུགས་རྒྱལ་ཚབ་པས་ཕྱག་གཡོན་ཏུ་ཐོགས། གཡས་པས་མེ་ཏོག་གཏོར། མཆེད་ལྕམ་རྣམས་མགྲིན་གཅིག་ཏུ། ཧཱུྃ༔ འབྱུང་བ་ལྔ་ནི་སངས་རྒྱས་དངོས༔ ས་ཡི་ལྷ་མོའི་
ཁ་ཕྱེས་ཤིག༔ སྐུ་གསུང་ཐུགས་ཡོན་ཕྲིན་ལས་བཞི༔ སྒྲུབ་པ་ལས་ཀྱི་གཏེར་སྦེད་དོ༔ སྙིང་པོ་རིན་ཆེན་དར་ཟབ་འབྲུ༔ སྨན་སྣ་དམ་རྫས་གཏོར་མ་ཡི༔ ཡིད་བཞིན་གཏེར་མཆོག་འདི་སྦས་པས༔ འདིར་འདུས་རྣལ་འབྱོར་བདག་ཅག་རྣམས༔ བླ་མེད་བྱང་ཆུབ་མ་ཐོབ་བར༔ སྐྱེ་རྒ་ན་འཆིའི་དུས་བྱུང་ཚེ༔ གཏེར་མཆོག་འདི་ཡི་བྱིན་རླབས་ཀྱིས༔ བདེ་ཐོབ་ལོངས་སྤྱོད་ལྡན་པར་ཤོག༔ ནད་དང་མུ་གེ་མཚོན་ལ་སོགས༔ འཇིགས་པ་བརྒྱད་ལས་ཐར་བ་དང་༔ སྐུ་ལྔ་ལྷུན་གྱིས་གྲུབ་པ་ཡི༔ ཡེ་ཤེས་ལྔ་དང་ལྡན་པར་ཤོག༔ ཕྱག་རྒྱ་ལྔ་ཡི་རྒྱས་གདབ་བོ༔ ཡོན་ཏན་མཐའ་རྒྱས་བཀྲ་ཤིས་ཤོག༔ བཛྲ་རཏྣ་པདྨ་ཀརྨ་སིངྡྷྡྷི་བྷྲཱུྃ༔ བརྗོད་ལ་སྒྲུབ་ཁང་གི་ཕྱོགས་གང་བདེར་སྦ། སྒོ་ལ་རིགས་ལྔའི་ཕྱག་མཚན་གྱིས་རྒྱས་གདག བཀྲ་ཤིས་གང་ཤེས་བརྗོད། ལས་བྱང་གི་བཟོད་གསོལ་དང་ཡིག་བརྒྱ་ལན་གསུམ་བརྗོད་ལ་ནོངས་པ་བཤགས། །རས་བྲིས་ལ་ཡེ་ཤེས་པ་བརྟན་བཞུགས་རྒྱུན་སྲོལ་ལྟར་བྱ། གལ་ཏེ་རྡུལ་ཚོན་ཡིན་ན་ཡེ་ཤེས་པ་གཤེགས། ཨོཾ་ཨཱཿཧཱུྃ༔ སྤྲུལ་པའི་དམ་ཚིགས་རྣམ་པ་རང་གི་སྙིང་གར་ཐིམ་པར་གྱུར། བདག་བསྐྱེད་ལས་བྱང་གི་ཉེར་བསྡུ་བྱས་ལ་སྐད་ཅིག་གཉུག་མའི་ལྷར་ལྡངས་ཏེ། རང་ལུས་འབྱུང་ལྔ་སྐྱེ་མཆེད་སོགས༔ ཡེ་ནས་རང་བྱུང་དཀྱིལ་འཁོར་ལྷ༔ དབྱེར་མེད་ལྟ་སྤྱོད་ཟུང་འབྲེལ་ནས༔ ཀུན་ཀྱང་འདྲེན་པའི་
སྤྱོད་ལམ་ཤོག༔ ཅེས་དང་། ལས་བྱང་གི་བསྔོ་སྨོན་ཤིས་བརྗོད་བཅས་བྱ། གཉིས་པ་མཚམས་བཀྲོལ་བ་ནི། སྔར་ཐོ་འཛུགས་སྐབས་ལྟར་རྒྱལ་ཐོ་བཞི། སྒོ་བྱང་ཕྱི་ནང་གི་མཆོད་གཏོར་བཅས་འདུ་བྱ། སེར་སྦྲེང་བཅས་ཐོ་རྩར་ཕྱིན་ལ་བྱིན་རླབས་སྔར་བཞིན་བྱ། རྒྱལ་ཆེན་སོ་སོའི་རང་སྔགས་ལ་གཏོར་སྔགས་བཏགས་པ་ལན་གསུམ་གྱིས་གཏོར་མ་འབུལ། ཨོཾ་བཛྲ་ཨརྒྷཾ་སོགས་ཀྱིས་མཆོད། ཕྲིན་ལས་བཅོལ་བ་ནི། ཧཱུྃ༔ རྒྱལ་བའི་སྤྱན་སྔར་ཁས་བླངས་བསྟན་པ་སྲུང་༔ ཤར་ཕྱོགས་རྒྱལ་པོ་ཆེན་པོ་ཡུལ་འཁོར་སྲུང་༔ ཟབ་ཅིང་རྒྱ་ཆེ་གཟིགས་པའི་སྤྱན་ཡངས་པོ༔ འཇིག་རྟེན་སྐྱོང་བ་གཏང་རག་མཆོད་སྦྱིན་བཞེས༔ རང་རང་གནས་སུ་གཤེགས་པར་མཛད་དུ་གསོལ༔ བཛྲ་མུཿ ཞེས་གཤེགས་སུ་གསོལ་ལ་ཐོ་བྱང་བསྡུ། ཕྱོགས་གཞན་གསུམ་ལ་དེས་འགྲེས་ཏེ་སོ་སོའི་སྔགས་བརྗེ་བ་དང་། ཕྲིན་བཅོལ་ཚིག་རྐང་གཉིས་པ་ལ། ལྷོ་ཕྱོགས་རྒྱལ་པོ་ཆེན་པོ་འཕགས་སྐྱེས་པོ༔ཞེས་དང་། ནུབ་ཕྱོགས་རྒྱལ་པོ་ཆེན་པོ་སྤྱན་མི་བཟང་༔ ཞེས་དང་། བྱང་ཕྱོགས་རྒྱལ་པོ་ཆེན་པོ་རྣམ་ཐོས་སྲས༔ ཞེས་བསྒྱུར། སྒོ་བྱང་ཕྱི་ནང་ལའང་སྔར་ལྟར་བྱིན་རླབས་དང་སོ་སོར་རང་སྔགས་ཀྱིས་གཏོར་མ་འབུལ། ཨརྒྷཾ་སོགས་ཀྱིས་མཆོད། མཆོད་སྦྱིན་གཏོར་མ་འདི་བཞེས་ལ༔ རྣལ་འབྱོར་བདག་ཅག་འཁོར་བཅས་ལ༔ ནད་མེད་ཚེ་དང་སོགས་ཀྱིས་ཕྲིན་ལས་བཅོལ་ནས། བཛྲ་མུཿས་
གཤེགས། གསུམ་པ་དཀྱིལ་འཁོར་བསྡུ་བ་ནི། རྒྱལ་ཚབ་པ་དཀྱིལ་འཁོར་ཟུར་དུ་འཁོད་ལ། ཨོཾ་བཛྲ་ཀཱི་ལ་ཡ་ཨུཏྐིུ་ལ་ཡ་སརྦ་ཀཱི་ལ་ཡ་བཛྲ་དྷ་ར་ཨཱ་ཛྙཱ་པ་ཡ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ༔ ཞེས་ལག་གཉིས་སྐམ་པའི་རྒྱ་དང་བཅས་དང་པོར་གདབ་རིམ་ལས་ལྡོག་ཕྱོགས་སུ་ཕྱུང་སྟེ། ཨོཾ་རུ་རུ་སྤུ་རུ་ཛྭ་ལ་ཧིཥྛ་སིངྡྷི་ལོ་ཙ་ནི་སརྦ་ཨརྠ་སཱ་དྷ་ནི་སྭཱ་ཧཱ། ཞེས་ཕུར་རྩེའོ་མས་བཀྲུ། ཨོཾ་ཨ་ཀཱ་རོ་སོགས་བརྗོད་ཅིང་ཞི་རོལ་འོག་དཀྱིལ་འཁོར་ཕྱག་ལེན་ལྟར་བསྡུ། བཞི་པ་བཟོད་གསོལ་གཏང་རག་འབུལ་བ་ནི། ཐོག་མར་སྤྱི་བཤགས་ཡེ་ཤེས་སྐུ་མཆོག་དང་། རྗེ་བཙུན་བླ་མ་རྣམས་ཀྱི་སྤྱན་སྔ་རུ། སོགས་དང་ཡིག་བརྒྱ་ཚར་གསུམ་བརྗོད། དེ་ནས་སློབ་དཔོན་དཀྱིལ་འཁོར་ཤུལ་དུ་ཁྲིའུ་ལ་བཞུགས་ནས་སྐུ་ཡོན་དང་སྐྱེམས་འབུལ་བ་གསུངས་པ་ལྟར་རམ། མི་འགྲུབ་ན་རང་མལ་དུ་བཞུགས་པ་ལ་འདུས་པ་ཐམས་ཅད་ཀྱིས་ཕྱག་གསུམ་ཕུལ། པུས་མོ་བཙུགས་ཏེ་མཎྜལ་ཚོམ་བུ་བདུན་མའི་གཤམ་དུ། ཚོམ་བུ་ཚོགས་སྒྲུབ་ཆེན་མོ་ལེགས་པར་གྲུབ་པའི་བཀའ་དྲིན་གཏང་རག་གི་ཡོན་ཏུ་འབུལ་བར་བགྱིའོ། །ཞེས་སྦྱར་ལ། ཧོཿ བླ་མེད་གསང་བ་མཆོག་གི་དཀྱིལ་འཁོར་དུ༔ བླ་མ་ཡི་དམ་མཁའ་འགྲོར་བཅས་པ་ཡི༔ སྐུ་གསུང་ཐུགས་ཡོན་ཕྲིན་ལས་འཐོབ་བྱའི་ཕྱིར༔ སྒྲུབ་པ་ཟབ་མོ་གནང་བ་བཀའ་དྲིན་ཆེ༔ དཀྱིལ་འཁོར་ཕྱག་རྒྱ་བརྡ་དང་གསང་བའི་རྫས༔ སྨིན་གྲོལ་ལམ་བཀོད་སྐུ་གསུམ་རང་བརྙེས་པའི༔
སྐུ་དྲིན་ཆེན་པོས་བཟུང་བ་བཀའ་དྲིན་ཆེ༔ སངས་རྒྱས་ཐམས་ཅད་སེམས་ལས་མི་འདའ་ཕྱིར༔ འདའ་ཀ་དམ་ཚིག་བསྟན་པ་བཀའ་དྲིན་ཆེ༔ གསང་སྔགས་དཀྱིལ་འཁོར་འདི་རུ་དམ་བཅས་པའི༔ སྐྱེ་བ་ཀུན་ཏུ་མི་འབྲལ་འགྲོགས་པར་སྨོན༔ ཡང་དག་ལམ་སྟོན་འགྲོ་བའི་དུཿཁ་སྐྱོབ༔ འཇིག་རྟེན་འདི་ན་བཀའ་དྲིན་འགྲན་ཟླ་མེད༔ བཀའ་དྲིན་བཟང་ཡང་བསྙེན་བཀུར་རྔོ་མ་ཐོགས༔ སྡོམ་གསུམ་བསྲུང་བྱ་དམ་ཚིག་གང་ཉམས་ཀྱང་༔ ཉེས་ལྟུང་སྒྲིབ་པར་མི་འགྱུར་དག་བྱའི་ཕྱིར༔ མཐོལ་བཤགས་བཟོད་པར་གསོལ་ཞིང་ཚངས་པར་མཛོད༔ ཅེས་ཞབས་སྤྱི་བོར་བླངས་ཞིང་གུས་པས་བཟུང་ངོ་། །ལྔ་པ་མར་མེ་སྨོན་ལམ་སོགས་ཀྱིས་མཐའ་རྒྱས་བྱ་བ་ནི། འདུས་པ་ཐམས་ཅད་ཀྱིས་ཞྭ་ཆོས་གསོལ། ལག་གཡས་སུ་མར་མེ་རེ་དང་གཡོན་ཏུ་སྤོས་ཀྱི་རེང་བུ་རེ་ཐོགས། དར་དཀར་རམ་ཕྲེང་བ་ལུ་གུ་སྦྲེལ། རྒྱལ་ཚབ་པས་གྲལ་གཤམ་དུ་བཞེངས་ཏེ་གཏོང་ཐུན་སྔོན་ཏུ་འགྲོ་བའི་དབྱངས་སྙན་པོར་ལེན་ཚུལ་གྱིས། ཧཱུྃ༔ རྩ་གསུམ་ཐུགས་ཀྱི་ནོར་བུའི་དཀྱིལ་འཁོར་དུ༔ རྡོ་རྗེ་སློབ་དཔོན་ཉིད་ཀྱིས་དབུ་བཟུང་ནས༔ རྒྱལ་བའི་གདུང་གསོབ་མཆེད་དང་ལྕམ་དྲལ་རྣམས༔ ནམ་ཞིག་བྱང་ཆུབ་ལམ་དུ་ཞུགས་པའི་ཚེ༔ འཁོར་བའི་གཡང་ས་ཆེན་པོར་མི་ལྟུང་ཞིང་༔ མ་རིག་མུན་པའི་དབང་དུ་མི་
བཏང་ལ༔ གཅོང་རོང་ཟབ་མོའི་ནང་དུ་མི་སྐྱེ་དང་༔ དམྱལ་བའི་ཟངས་ཁར་ནང་དུ་མི་ལྟུང་ཞིང་༔ གཅན་གཟན་གདུག་པའི་སྒྲ་སྐད་མི་གྲགས་ལ༔ མཚོན་ཆེན་གདུག་པའི་དཔལ་གྱིས་མི་ཕོག་ཤོག༔ དགེ་བའི་བཤེས་གཉེན་བཀའ་དྲིན་ཆེ་བ་དང་༔ དམ་ཚིག་གཅིག་པའི་རྡོ་རྗེ་མཆེད་ལྕམ་རྣམས༔ དབང་གིས་འབྲེལ་བའི་མཚན་ལྡན་གཟུངས་མ་གསུམ༔ ཚེ་རབས་འདི་དང་ཚེ་རབས་ཐམས་ཅད་དུང་༔ མི་འབྲལ་འགྲོགས་པའི་ཏིང་འཛིན་རྩེ་གཅིག་གིས༔ ས་བཅུ་རིམ་གྱིས་སངས་རྒྱས་བགྲོད་པར་ཤོག༔ ནམ་ཞིག་ཚེ་འཕོས་ལུས་བརྗེས་བྱུང་བའི་ཚེ༔ མ་རིག་དབང་གིས་འཁོར་བ་ལྷུང་སྲིད་ན༔ སྣང་གསལ་མར་མེས་ཚ་གྲང་སྡུག་བསྔལ་སེལ༔ ཕྲག་དོག་དབང་གིས་ལྷ་མིན་ཡུལ་འཁྱམས་ན༔ སྣང་གསལ་མར་མེས་གདུག་པའི་མཚོན་ཁ་བསྙོལ༔ འདོད་ཆགས་དབང་གིས་ཀླ་ཀློའི་མིར་སྐྱེས་ན༔ སྣང་གསལ་མར་མེས་ཤེས་རབ་གསུམ་དང་སྦྱོར༔ ང་རྒྱལ་དབང་གིས་ཚེ་རིང་ལྷར་གྱུར་ན༔ སྣང་གསལ་མར་མེས་ལྟུང་བའི་སྡུག་བསྔལ་ཆོམས༔ གཏི་མུག་དབང་གིས་བྱོལ་སོང་གནས་འགྲིམ་ན༔ སྣང་གསལ་མར་མེས་ཤེས་རིག་སྒྲོན་མེ་ཐོང་༔ སེར་སྣའི་དབང་གིས་ཡི་དྭགས་གནས་འགྲིམ་ན༔ སྣང་གསལ་མར་མེས་བཀྲེས་སྐོམ་
གདུང་བ་སོལ༔ རྒྱུ་རྐྱེན་འདི་ཡིས་ས་བཅུ་ཡོངས་བགྲོད་ཚེ༔ ཤེས་བྱའི་སྒྲིབ་བྱང་ཕྱིར་མི་ལྡོག་པར་ཤོག༔ སྣང་བའི་གོ་འབྱེད་ཞུན་མར་མདངས་ལྡན་འདི༔ བདེ་གཤེགས་ཡོངས་ལ་ཕུལ་བའི་མཐུ་བྱིན་གྱིས༔ ས་བཅུ་འདས་ཏེ་ས་རྣམས་ཡོངས་ནོན་ཤོག༔ ཀུན་ཏུ་འོད་དང་མ་ཆགས་པདྨ་ཅན༔ འཁོར་ལོ་ཚོགས་ཆེན་སྟུག་པོ་བཀོད་པའི་ས༔ དེ་བ་ཀོ་ཤ་ཀུན་བཟང་བླ་མེད་ས༔ རྡོ་རྗེ་སེམས་མིང་ལྕང་ལོ་ཅན་གྱི་ས༔ བླ་མའི་ས་དང་སྲིད་གསུམ་ངང་རྫོགས་ས༔ རྩོལ་བྲལ་ཐིག་ལེའི་ས་རུ་ལྷུན་གྲུབ་ནས༔ གཟུགས་སྐུ་གཉིས་ཀྱིས་འགྲོ་དོན་ཡོངས་རྫོགས་ཤོག༔ ཅེས་བརྗོད་ཅིང་ཞི་རོལ་ལྡིར་ལ་ལས་རྡོར་གྱིས་མར་མེ་བསྡུ། དེ་ནས་བཀྲ་ཤིས་བརྗོད་པ་ནི། དྲིལ་བསིལ་དབྱངས་དང་མེ་ཏོག་འཐོར་བ་བཅས་ཞལ་ནས་གསུངས་པའི་ཤིས་ཚིག་གང་རུང་སྔོན་ཏུ་འགྲོ་བས། ཧཱུྃ༔ བྱིན་རླབས་ཀུན་གྱི་འབྱུང་གནས་རིན་པོ་ཆེ༔ གུ་རུ་ཡིད་བཞིན་ནོར་བུའི་བཀྲ་ཤིས་ཤོག༔ མཆོག་དང་ཐུན་མོང་དངོས་གྲུབ་ཆར་ལྟར་འབེབས༔ །དབང་དྲག་ཞི་ཁྲོའི་ལྷ་ཚོགས་བཀྲ་ཤིས་ཤོག༔ ཕྲིན་ལས་རྣམ་བཞིའི་ལས་ཀུན་ཐོགས་མེད་སྟེར༔ མཁའ་འགྲོ་དམ་ཅན་སྲུང་མའི་བཀྲ་ཤིས་ཤོག༔ སྟོན་པའི་ཞལ་སྐྱིན་མཆོག་གི་སྤྲུལ་པའི་སྐུ༔ རྡོ་རྗེ་སློབ་དཔོན་ཉིད་ཀྱི་བཀྲ་ཤིས་ཤོག༔ ཐུགས་རྗེའི་གདུང་
འཚོ་བ་བཀའ་དྲིན་བླ་ན་མེད༔ རྡོ་རྗེ་རྒྱལ་ཚབ་མཆོག་གི་བཀྲ་ཤིས་ཤོག༔ ལུ་གུ་རྒྱུད་དུ་མི་འབྲལ་འགྲོགས་པ་ཡི༔ མཆེད་དང་ལྕམ་དྲལ་རྣམས་ཀྱི་བཀྲ་ཤིས་ཤོག༔ རྒྱུད་ལུང་མན་ངག་སྨིན་གྲོལ་ཟབ་ལམ་བཀོད༔ དམ་ཆོས་དབང་ལུང་ཡོངས་རྫོགས་བཀྲ་ཤིས་ཤོག༔ གཞི་ལམ་འབྲས་བུའི་རྣམ་བཞག་མ་ལུས་རྫོགས༔ ཐེག་མཆོག་རྫོགས་པ་ཆེན་པོའི་བཀྲ་ཤིས་ཤོག༔ དུས་གསུམ་བསྟན་སྲུང་བཀའ་འདས་གདུག་པ་སྒྲོལ༔ བཀའ་སྡོད་ཕོ་ཉ་རྣམས་ཀྱི་བཀྲ་ཤིས་ཤོག༔ སྣོད་བཅུད་སྐྱེ་འགྲོ་སེམས་ཅན་ཐམས་ཅད་ཀུན༔ བདེ་ཞིང་དམ་ཆོས་སྤྱོད་པའི་བཀྲ་ཤིས་ཤོག༔ ཅེས་མེ་ཏོག་ཆར་ཆེར་དབབ་ཅིང་རོལ་མོའི་སྒྲ་སྙན་ལ་རྒྱུན་རིང་བསྒྲག་གོ། །དེ་ནས་རང་ལུས་བསྲུང་བ་ནི། ཐམས་ཅད་ཀྱིས་རང་ལུས་ཡི་དམ་ལྷར་གསལ་བ་མེ་ཕུང་གི་དཀྱིལ་ན་ཡོད་པའི་ང་རྒྱལ་བྱས་ལ། ཨོཾ་བཛྲ་རཀྵ་ཧཱུྃ༔ བཛྲ་ཀ་བ་ཙ་ཧཱུྃ༔ བཛྲ་བཛྲ་ཧཱུྃ༔ ཞེས་རྡོ་རྗེའི་གོ་ཆ་ཞུ་ལུགས་སུ་གོན་བར་བསྒོམ། ངོ་བོ་སྟོང་ཞིང་བདག་མེད་ཅིང་༔ ཅིས་ཀྱང་མི་འགྱུར་མི་ཤིགས་པའི༔ སྟོང་པའི་གོ་ཆ་བླ་ན་མེདཿ སངས་རྒྱས་ཀྱིས་ཀྱང་མི་གཟིགས་ན༔ གནོད་བྱེད་བགེགས་ཀྱིས་ག་ལ་ཚུགས༔ ཧཱུྃ་ཧཱུྃ་ཨ་ཨཱཿ ཞེས་བརྗོད་ལ་སྤྱོད་ལམ་རྣམ་བཞི་ཡི་དམ་གྱི་ང་རྒྱལ་དང་མ་བྲལ་བར་བྱའོ། །དེ་ནས་བསྔོ་བ་སྨོན་ལམ་བྱ་བ་ནི། མ་ལུས་ཕྱོགས་བཅུར་བཞུགས་པའི་སྐྱབས་གནས་
དགོངས༔ བདག་གིས་རྩ་གསུམ་རྒྱལ་བའི་དཀྱིལ་འཁོར་དུ༔ ཚོགས་གཉིས་ཟུང་འཇུག་དགེ་ཚོགས་བགྱིས་འདི་དག༔ སྲིད་ཞིར་མི་གནས་བྱང་ཆེན་ས་ཐོབ་ཤོག༔ ནམ་མཁའི་མཐའ་ཁྱབ་ཕ་མ་སེམས་ཅན་རྣམས༔ སྒྲིབ་བྲལ་ཚོགས་རྫོགས་སྐུ་གཉིས་མྱུར་ཐོབ་ཤོག༔ གསང་སྔགས་བསྟན་པ་དར་ཞིང་རྒྱས་པ་དང་༔ བསྟན་པ་འཛིན་ཀུན་ཕྲིན་ལས་དར་རྒྱས་ཤོག༔ རྒྱལ་བའི་བསྟན་པ་ཡུན་དུ་གནས་པ་དང་༔ འཁོར་བའི་རྒྱ་མཚོ་མ་ལུས་སྐེམས་པར་ཤོག༔ ཡུལ་ཕྱོགས་ས་ཕྱོགས་འདིར་ཡང་བཀྲ་ཤིས་ཤིང་༔ མི་ནད་ཕྱུགས་ནད་མ་ལུས་རྒྱུན་ཆད་ཤོག༔ ཆར་ཆུ་དུས་འབབས་ལོ་ཕྱུགས་རྟག་ཏུ་ལེགས༔ མཚོན་དང་མུ་གེའི་བསྐལ་ངན་ཞི་བར་ཤོག༔ བསྒྲུབ་པའི་གནས་འདིར་བཀྲ་ཤིས་བྱིན་ཆགས་ཤིང་༔ ཕྱི་རབས་རིག་འཛིན་གདུང་འཚོབ་ཐམས་ཅད་ཀྱང་༔ རྒྱལ་བ་གོང་མའི་ཤུལ་ལམ་ཟིན་པ་དང་༔ མཆོག་ཐུན་དངོས་གྲུབ་མྱུར་དུ་ཐོབ་པར་ཤོག༔ ཅེས་འདུན་པ་རྩེ་གཅིག་ཏུ་གདབ་བོ། །དེ་ནས་གཞུང་ལས་གནས་བསྲུང་བ་ནི། ཞག་གསུམ་གྱི་བར་དུ་མཆོད་གཏོར་ཕྲིན་ལས་རང་གཞུང་ཚར་རེ་བྱ། ཐག་རིང་དུ་མི་འགྲོ། སྒྲུབ་ཁང་དུ་དམེ་ལུག་མཛེ་སྦྲང་མི་བཏང་ངོ་༔ དེ་ནས་སྒྲུབ་པའི་ཡོ་བྱད་ལྷག་མ་རྣམས་ཆ་གསུམ་དུ་བགོས་ཏེ༔ ཆ་གཅིག་རྡོ་རྗེ་སློབ་དཔོན་ལ་ཕུལ༔ ཆ་གཅིག་རྒྱལ་ཐེབས་ལ་ཕུལ༔ ཆ་གཅིག་ཚར་སྟོན་བྱ་སྟེ༔ དགེ་སློང་བཞི་སྡེ༔ རིག་གནས་བཞི་སྡེ༔ རྒྱལ་བློན་འབངས་སྤྲང་པོ་བཞི་སྡེ༔ བྱིས་པའི་སྟོན་མོ་སོགས་བྱའོ༔ ཞེས་
དང་། དེ་ནས་མཆེད་དང་ལྕམ་དྲལ་ཐམས་ཅད་དམ་ཚིག་གི་ཆོས་དང་གསུང་བགྲོས་བསླབ་བྱ་ཞིབ་ཐེགས་སུ་བྱའོ༔ ཞེས་གསུངས་པ་རྣམས་རེ་རེ་ལའང་གནད་དོན་དགོས་པ་ཆེ་བར་རེ་ཡོད་པས་ནུས། ཇི་ལྟར་ལྕོགས་པ་བྱས་པས་འབྲལ་ཡུན་ཀུན་ཏུ་ཕན་བདེའི་དཔལ་ལ་སྤྱོད་པར་འགྱུར་རོ། །གསང་ཆེན་སྔགས་ཀྱི་སྟོན་པ་ཨོ་རྒྱན་རྗེའི། །སྒྲུབ་ཐབས་ཐུགས་ཀྱི་ཐིག་ལེ་མཐར་ཐུག་པ། །ཚུལ་བཞིན་སྒྲུབ་པ་ལྟ་ཅི་དད་མོས་བློས། །འབྲེལ་བ་ཙམ་ཡང་ཐར་ལམ་བཙན་ཐབས་བགྲོད། །ཚོགས་སྒྲུབ་རྫོགས་ལྡན་སྤྲིན་གྱི་བླ་བྲེ་ལས། །གྲུབ་གཉིས་ནོར་བུའི་ཆར་རྒྱུན་འཛད་མེད་དུ། །འབབས་ནས་འདི་དང་གཏན་གྱི་དབུལ་ཕོངས་སེལ། །ཕྱམ་གཅིག་ཀུན་བཟང་རྒྱལ་སྲིད་ཆེར་སྤྱོད་ཤོག །ཅེས་པ་འདིའང་སྦས་པའི་ཡུལ་ལྗོངས་སྦུ་བོ་ནས་གསང་ཆེན་བསྟན་པའི་མངའ་བདག་ཀ་ནི་སྡེ་བ་མཆོད་ཡོན་ལྷན་རྒྱས་ནས་གསུང་བསྐུལ་ནན་ཏན་མཛད་ངོར། རྒྱལ་དབང་པདྨ་སཾ་བྷའི་སྔགས་རིག་འཛིན་པ་འཆི་མེད་བསྟན་གཉིས་གཡུང་དྲུང་གླིང་པས་རང་གཞུང་རྩ་བར་བཟུང་། ཁུངས་ལྡན་གྱི་ཕྱག་ལེན་སྤྱིའི་འགྲོས་དང་མཐུན་པར་དེ་བཱི་ཀོ་ཊི་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ།།