བ་ལམ་ཐུགས་ཀྱི་ནོར་བུ་ལས་ལས་བཞི་མཆོག་ལྔའི་སྦྱིན་སྲེག་གི་ལག་ལེན་འདུས་གསལ་དུ་བཀོད་པ་ནོར་བུ་སྣ་ཚོགས་མདོག་ཅན།
ཟབ་ལམ་ཐུགས་ཀྱི་ནོར་བུ་ལས། ལས་བཞི་མཆོག་ལྔའི་སྦྱིན་སྲེག་གི་ལག་ལེན་འདུས་གསལ་དུ་བཀོད་པ་ནོར་བུ་སྣ་ཚོགས་མདོག་ཅན་ཞེས་བྱ་བ་བཞུགས་སོ། །
ན་མོ་གུ་རུ་ཙིཏྟ་མ་་ཡེ། རང་བྱུང་དབྱིངས་ཀྱི་ཧོམ་ཞལ་དུ། །རིག་པའི་ཡེ་ཤེས་འབར་བའི་མེས། །འཁྲུལ་རྟོག་ཆང་ཚིང་ཀུན་བསྲེགས་ནས། །བདེ་ཆེན་འོད་དུ་གསལ་དེས་སྐྱོང་། །མདའ་ལ་མདེའུ་ཇི་བཞིན་ཏུ། །གསང་སྔགས་ནུས་པའི་རྣོ་དཔལ་ནི། །མེ་ཡིས་འབྱིན་པར་བསྔགས་དེའི་ཕྱིར། །ཕྲིན་ལས་ཀུན་ལ་གཅེས་འདིའོ། །རྡོ་རྗེ་ཐེག་པའི་རིམ་པ་དང་པོས་ལས་དང་དངོས་གྲུབ་བསྒྲུབ་པའི་ནུས་འབྱིན་གྱི་ཕྲིན་ལས་སྲེག་བླུགས་ཀྱི་ཆོ་ག་སྒྲུབ་པའི་རྣམ་བཞག་རྒྱ་ཆེར་གསུངས་པ་ལས། འདིར་གསང་བའི་བདག་མོ་དབྱིངས་ཕྱུག་ཡེ་ཤེས་མཚོ་རྒྱལ་གྱིས་བླ་མ་དགོངས་པ་འདུས་པའི་གཞུང་ལས་སྙིང་པོར་བསྡུས་ཏེ་བཀོད་པའི་སྦྱིན་སྲེག་གཏེར་གཞུང་ཉིད་ལས་སྔོན་འགྲོའི་ས་བཅད་བཅུ་གཅིག །དངོས་གཞི་བཅུ། རྗེས་ཀྱི་བྱ་བ་རྣམས་སུ་བསྟན་པ་ཉིད་ད་ལྟ་དཀྱུས་ཀྱི་ཕྱག་ལེན་དང་བསྟུན་ནས་ཁྱེར་བདེར་བཀོད་པ་ལ་དོན་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། སྔར་མ་སྦྱངས་པའི་ས་ཡིན་ན་སའི་ཆོ་ག་སྒྲུབ་ཁོག་ལྟར་རྒྱས་པའམ། བསྡུ་ན། རང་ཉིད་སྐད་ཅིག་གིས་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་གཟི་བརྗིད་བསྐལ་པའི་མེ་ལྟར་འབར་བར་བསམས་ལ། ཨོཾ་ཧྲཱིཿབཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ། ཅེས་བརྒྱའམ་ཉེར་གཅིག་སོགས་བཟླས་ལ། གང་དུ་བྱ་བའི་གཞི་དེར་དཀར་གཏོར་མཆོད་པ་བཅས་བཤམ། བསང་སྦྱང་། སྒྲུབ་ཁོག་ལྟར། ཐམས་ཅད་སྟོང་ཉིད་ནམ་མཁའི་མཛོད་སོགས་དང་། གཏོར་
གཞོང་རཏྣའི་མཐར། ཨོཾ་ཨཱ༔ཧཱུྃ་ཧོ༔ལན་གསུམ་རྒྱ་དང་བཅས་པས་བརླབ། བྷཱུ་མི་པ་ཏི་ས་པ་རི་ཝཱ་ར་བཛྲ་ས་མ་ཛཿ ཞེས་རྡོ་རྗེ་བསྡུ་རྒྱ་སྦྱར་བས་སྤྱན་དྲངས། ཨོཾ་བཛྲ་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱའི་བར་གྱིས་མཆོད། བྷཱུ་མི་པ་ཧི་ས་པ་རི་བཱ་ར་བྷྱཿནམཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྤ་ར་་ཨི་མཾ་ག་ག་ན་ཁཾ་སྭཱ་ཧཱ། ལན་གསུམ་གྱིས་གཏོར་མ་ཕུལ་ལ། ཚིགས་བཅད་སྒྲུབ་ཁོག་ལྟར་རམ། སྤྱི་འགྲོར། ས་བདག་ལྷ་ཀླུ་འཁོར་དང་བཅས། །གཏོར་མ་དམ་པ་འདི་བཞེས་ལ། །བདག་གིས་སྦྱིན་སྲེག་མ་ཐོན་བར། །ཁྱེད་ལ་གནས་འདི་བདག་གཡར་གྱིས། །ཅི་བདེ་བར་ནི་གཞན་ཏུ་སོང་། །ཞེས་ཕྲིན་ལས་བཅོལ། ལག་གཡས་རྡོ་རྗེ་དང་བཅས་ས་ལ་བཞག་སྟེ། རྩ་བསྙེན་བརྒྱ་རྩ་དང་། ཨོཾ་ཨཱཿཧཱུྃ་ཧ་ན་ཧ་ན་ཀྲོ་དྷ་ཧཱུྃ་ཕཊ། ལན་བདུན་ཙམ་བརྗོད་པ་ཀུན་རྫོབ་ཀྱི་སྦྱོང་བ་དང་། ཆོས་ཐམས་ཅད་སྟོང་པ་ཉིད་དུ་མོས་པ་དོན་དམ་གྱི་སྦྱོང་བ་སྟེ་ལས་གཞི་ཀའི་ཐུན་མོང་གི་སྦྱོར་བའོ། །གནས་ཁང་རྙིང་པ་ས་ཆོག་མི་དགོས་པའི་ཕྱོགས་སུའང་སྦྱོང་བ་གཉིས་པོ་ཙམ་ཕྱག་ལེན་ཏུ་མཛད་དོ། །འདི་ནི་ལས་ལྔ་ཀ་ལ་ཁྱད་པར་མེད་ཅིང་དྲག་པོ་ལ་མི་མཛད་པ་ཤས་ཆེའོ། །དེ་ནས་སྦྱིན་སྲེག་ཞི་རྒྱས་དབང་དྲག་བཞི། ཀུན་འདུས་དང་ལྔར་ཡོད་པ་ལས་ཐམས་ཅད་ལའང་སྒྲུབ་མཆོད་སོགས་དཀྱིལ་འཁོར་དང་མ་འབྲེལ་བའི་སྲེག་རྐྱང་གི་སྐབས་སུ་ཕུག་ལོགས་གང་བདེར་སྟེགས་པུའི་སྟེང་བདག་བསྐྱེད་མཆོད་གཏོར། གཡས་གཡོན་སྨན་
རཀ །མདུན་དུ་ཆུ་གཉིས་ཉེར་སྤྱོད། གཏེར་སྲུང་གཏོར་འབུལ། ཚོགས་མཆོད། ཆད་བརྟན་བགེགས་གཏོར་སོགས་འདུ་བྱ། དེ་ནས་ཐོག་མར་ཞི་བའི་སྦྱིན་སྲེག་ནི། ར་བ་བཞིའི་ཡར་ངོའི་ཚེས་གཅིག་ལ་སོགས་པའི་སྔ་དྲོའི་ཆར། བཀྲ་ཤིས་པའི་ས་ལ་ཐབ་སྟེགས་དཀར་པོ་ཟླུམ་པོ་རྒྱར་ཁྲུ་གང་། །དཔངས་སུ་ཁྲུ་ཕྱེད་པ། ཙནྡན་དཀར་པོ་ལ་སོགས་པས་བྱུགས་པའི་སྟེང་དུ། མཐོ་གང་ཚད་ཀྱིས་དབུས་ཟླུམ་པོར་བསྐོར་བ་ལ་པདྨ་དཀར་པོའི་ལྟེ་བར་རྡོ་རྗེ་རྃ་གྱིས་མཚན་པ། དེ་རྒྱབ་ཁ་ཁྱེར་སོར་བཞི་པའི་ཕྱོགས་བཞིར་རྡོ་རྗེ་ཕྱེད་པའི། དེ་རྒྱབ་ཁ་ཁྱེར་སོར་བཞི་པ་པདྨ་དཀར་པོའི་ཕྲེང་བས་བསྐོར་བའི་རྒྱབ་ཏུ་མུ་རན་སོར་བཞི་པ། གྲྭ་བཞིར་ཟླ་ཕྱེད་རྡོ་རྗེས་མཚན་པ། མེ་ཏོག་དཀར་པོ་བཀྲམ་པའི་ཁ་ཁྱེར་གྱི་ནང་དུ་བ་ལང་གི་ལྕི་བའམ། ཡམ་ཤིང་གི་རྒྱུ་དང་མཚུངས་པའི་བུད་ཤིང་ཟླུམ་པོ་ཁྲུ་གང་བརྩིགས་པའི་ནང་གི་ཤར་ངོས་སུ་མེ་ཚང་སྟེང་ནས། ཀུ་ཤ་རྩེ་མོ་ཤར་དུ་བསྟན་པས་བཀབ། ཐབ་སྟེགས་ནང་སྲེག་བྱེད་མེའི་ཙཀྲ་བཞག་པ་ལས་བཞི་ཀར་འགྲེ། རང་གི་གཡས་ངོས་སུ་རྫས་སྟེགས་དང་། གཡོན་ཏུ་མཆོད་སྟེགས་གཉིས་ཀ་དང་རས་དཀར་པོའི་ཁེབས་དང་ལྡན་པའི་མཆོད་སྟེགས་སུ་འོ་མ་འབྲས་ཆན་དངུལ་ཕྱེ་མེ་ཏོག་དཀར་པོ་རྣམས་དང་བསྲེས་པའི་མར་དཀར་གྱི་འདས་གཏོར་ཟླུམ་པོ། དེའི་མདུན་ཏུ་འཇིག་རྟེན་པའི་གཏོར་མ་དཀར་ཟླུམ་ཅུང་ཟད་ཆུང་བ་དང་། སྨན་སྣོད་ཐོད་པ། མདུན་ཏུ་ཆུ་གཉིས་ཉེར་སྤྱོད་ཕྲེང་ཚར་ཆ་གཉིས། རྫས་སྟེགས་སུ་མར་ཁུ། བ་ལུ་སོགས་འོ་མ་ཅན་གྱི་ཤིང་གི་རྩེ་མོའི་ཆ་ལས་བྱུང་བའི་ཡམ་ཤིང་སོར་བཞི་པ་དྲིས་བྱུགས་ཤིང་སྣེ་གཉིས་མར་དང་སྦྲང་རྩིས་བྱུགས་པ། ཏིལ་དཀར་པོ།
དཱུརྦ། འབྲས། ཟས་མཆོག་སྟེ་ནས་འབྲས་ཀྱི་ཕྱེ་མ་ཞོ་དང་སྦྱར་བ་ལ་མངར་གསུམ་བཏབ་པ། ཀུ་ཤ །ནས། སོ་བ། སྲན་མ་རྣམས་དང་། ཞི་རྫས་ཕྱོགས་སྤུངས་བཅས་འདས་མ་འདས་གཉིས་རིམ་དང་། ཁྱད་པར་བསྙེན་སྒྲུབ་ཀྱི་ཁ་སྐོང་ལྟ་བུར་ཏིལ་མང་དུ་བཤམ་སྣོད་དང་རྫས་ཐམས་ཅད་དབྱིབས་ཟླུམ་བོ། ཁ་དོག་དཀར་པོ་འབའ་ཞིག་པ་བྱ། སློབ་དཔོན་དང་ཐབ་ཀྱི་བར་དུ་མེ་ཡོལ་གངས་རི་བྲིས་པའི་ནང་གི་ཆར། ལས་བུམ། རྡོར་དྲིལ་བར་དུ་དགང་བླུགས་ཁ་སྦྱར་བ་བཞག་སློབ་དཔོན་ཆས་རྒྱན་དཀར་པོ་ཐོགས་ནས་ཞི་བའི་བསམ་པས་རྡོ་རྗེ་སྐྱིལ་ཀྲུང་གིས་སྟན་དཀར་པོ་ལ་ཁ་ཤར་དུ་ཕྱོགས་ཏེ་འཁོད་ལ་ཐབ་དང་ཞལ་སྤྲོད་བྱ། གཞུང་དུ་ཁ་བ་ལྟ་ཕྱོགས་གསུངས་པ་ནི་དཀྱིལ་འཁོར་གྱི་ཤར་ཕྱོགས་སུ་ཞི་བའི་སྦྱིན་སྲེག་བྱ་བ་སོགས་ལ་དགོངས་པ་ཡིན་པས་སྒྲུབ་དཀྱིལ་སོགས་དང་འབྲེལ་ལ་གོ་ཡུལ་འགྲིགས་ན་ད་ལྟར་བྱའོ། །གཉིས་པ་དངོས་གཞི་ལ་གསུམ། ཐུན་མོང་དུ་བྱ་བའི་རིམ་པ། མེ་ལྷ་མཆོད་པ། དཀྱིལ་འཁོར་པ་མཆོད་པའོ། །དང་པོ་ནི། སྔོན་གཏོར་ནས་བརྩམས་བདག་བསྐྱེད་བཟླས་པ་བསྡུ་ལྡངས་སྔོན་འགྲོས་སྒྲུབ་མཆོད་སྐབས་སྙིང་པོ་རི་མཐར་ཕཊ་ཛཿབཏགས་པས་གཙོ་བོ་ལས་རང་ལས་ཀྱི་ལྷར་ཕྱེའོ། །ལས་བུམ། བཛྲ་ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་རིན་པོ་ཆེའི་བུམ་པ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ། པདྨའི་སྡོང་པོ་དང་ཉི་མ་ལ་གནས་པའི་ངོ་བོ་རྟ་མགྲིན་ལ་རྣམ་པ་ཁྲོ་བོ་བདུད་རྩི་འཁྱིལ་བ་ལྗང་གུ་ཕྱག་གཉིས་ཐལ་སྦྱར་གྱི་བར་དུ་བདུད་རྩིའི་བུམ་པ་
འཛིན་པ། ཁྲོ་བོའི་ཆས་ཐམས་ཅད་དང་ལྡན་པའོ། །སྤྱི་བོར་ཨོཾ། མགྲིན་པར་ཨཱཿཐུགས་ཀར་ཧཱུྃ༔ དེ་ལས་འོད་འཕྲོས་ཡེ་ཤེས་པ་བཛྲ་ས་མཱ་ཛཿ ཛཿཧཱུྃ་བྃ་ཧོཿ ཨོཾ་བཛྲ་ཨརྒྷཾ་ནས་ཤབྡ་ཨཱཿཧཱུྃ༔ རྒྱལ་བ་ཀུན་གྱི་ཡེ་ཤེས་སྐུ། །འཇིགས་བྱེད་འཇིགས་པའི་མཐུ་སྟོབས་ཅན། །ཁྲོ་བོའི་རྒྱལ་པོ་ཁྱོད་ལ་བསྟོད། །ལས་རྣམས་འགྲུབ་པར་མཛད་དུ་གསོལ། །ཐུགས་ཀར་ཉི་སྟེང་ཧཱུྃ་ལ་སྔགས་ཕྲེང་མ་རྒད་ཞུན་མ་ལྟ་བུ་འོད་ཟེར་དམར་པོ་འཕྲོ་བས་བསྐོར་བ་ལས་བདུད་རྩིའི་རྒྱུན་བབས། བུམ་པ་གང་བར་གྱུར། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། ཅེས་ཅི་ནུས་བཟླ། མཐར། བན་པོ་འོད་དུ་ཞུ་ནས་བུམ་ཆུའི་རྡུལ་ཕྲན་ཇི་སྙེད་པའི་ཁྲོ་བོར་གྱུར་པས་ཕྲིན་ལས་མཛད་པར་གྱུར། ཅེས་མོས། རྡོར་དྲིལ་བསང་ཆུ་དང་། ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་པད་ཟླའི་སྟེང་དུ་རྡོ་རྗེ་དང་དྲིལ་བུ་ཀུན་ཏུ་བཟང་པོ་བདེ་བར་གཤེགས་པ་རིགས་ལྔ་ཡབ་ཡུམ། རྡོ་རྗེ་སེམས་དཔའ་གསང་བའི་ཡུམ་བཞི། ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་རིགས་ཀྱི་དེ་བཞིན་གཤེགས་པ་རིགས་ལྔ་དང་བཅས་པ། དོན་དམ་ཡེ་ཤེས་ལྔའི་རང་བཞིན་རྟགས་ཀྱི་རྡོ་རྗེ་དང་། སེམས་ཅན་རྣམས་མ་རིག་པའི་གཉིད་ལས་བསླངས་ཤིང་ཨཱ་ལི་ཀཱ་ལིའི་ཆོས་དབྱངས་སྒྲོགས་པའི་དྲེལ་བུར་གྱུར། ཨོཾ་
མ་ཧཱ་བཛྲ་ཧཱུྃ༔ ཞེས་པས་རྡོ་རྗེ་གསོར། ཨོཾ་མ་ཧཱ་གཎྜེ་ཧོཿ ཞེས་པས་དྲིལ་བུ་དཀྲོལ། དགང་གཟར་བླུགས་བསང་ཆུ་དང་། ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་པད་ཟླའི་སྟེང་དུ་རིན་པོ་ཆེ་ལས་དགང་གཟར་བླུགས་མཚན་ཉིད་ཐམས་ཅད་དང་ལྡན་པར་གྱུར། བསྲེག་རྫས་རྣམས་བསང་ཆུ་གཡས་སྐོར་དུ་འཐོར་ཞིང་། ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་རིན་པོ་ཆེའི་སྣོད་དུ་བསྲེག་རྫས་རྣམས་ཡེ་ཤེས་ཀྱི་བདུད་རྩི་ཕུན་སུམ་ཚོགས་པའི་རང་བཞིན་དུ་གྱུར་པར་བསམས་ལ་རྡོར་དྲིལ་དང་བཅས་པས་དགང་བླུགས་འཛིན་པས་བསྲེག་རྫས་གཡས་སྐོར་གྱིས་རེག་པས། ཨོཾ་ཨཱ༔སྭཱ་ཧཱ༔ ཨོཾ་ཤྲཱི༚་སྭཱ་ཧཱ༔ ཨོཾ་སྭཱ་སྭཱ་ཧཱ༔ ཨོཾ་ཛྲི་སྭཱ་ཧཱ༔ ཨོཾ་ཀུ་རུ་ཀུ་རུ་སྭཱ་ཧཱ༔ ཨོཾ་ཨཱ༔ཧཱུྃ༔ ལན་གསུམ། མཆོད་རྫས་བསང་སྦྱང་། སྟོང་པའི་ངང་ལས་རིན་པོ་ཆེའི་སྣོད་དུ་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ། འདོད་ཡོན་ལྔ་སོགས་ཀུན་ཏུ་བཟང་པོའི་མཆོད་སྤྲིན་ནམ་མཁའི་ཁམས་ཐམས་ཅད་དུ་ཁྱབ་པར་འཆར་བར་གྱུར། ཨོཾ་བཛྲ་ཨརྒྷཾ། པཱ་དྱ་སོགས་ནས། ཤབྡ་ཨཱཿཧཱུྃ། ཞེས་དང་། ལས་བྱང་གི་བདུད་རྩི་དང་གཏོར་མ་བྱིན་རླབས་ཀྱི་སྔགས་ལན་གསུམ་རེ་བརྗོད། མེ་ཐབ་སྦྱོང་ཞིང་སྲུང་བ་ནི། བསང་ཆུ་གཡས་སྐོར་དུ་འཐོར་ཞིང་། ཨོཾ་སྭ་བྷཱ་བ་སོགས་བརྗོད། ཧཱུྃ་ཧྲཱིཿ
བསྐལ་པ་མེ་ལྟར་འབར་བའི་ཀློང་དཀྱིལ་ནས༔ མེ་ལྷ་དྲང་སྲོང་ཡི་དམ་མ་གཏོགས་པ༔ གནོད་བྱེད་བགེགས་ཀྱི་ཚོགས་རྣམས་ཕྱིར་དེངས་ཤིག༔ བཀའ་འདས་གནས་འདིར་འདུག་ན་རྡུལ་དུ་རློག་ཨོཾ་པདྨ་ཏ་ཀྲི་ཏ་ཧ་ཡ་གྲཱི་ཝ་གནོད་བྱེད་འབྱུང་པོ་མཱ་ར་ཡ་ཕཊ༔ ཐུན་གྱིས་བྲབ། རོལ་མོའི་སྒྲ་དང་གུ་གུལ་དུད་པས་བགེགས་བསྐྲད། ཧཱུྃ་ཧྲཱིཿ དུག་ལྔ་འཇོམས་པའི་ཡེ་ཤེས་མེ་འོད་ལྔ༔ ཡིག་འབྲུ་ཕྱག་མཚན་ཁྲོ་ཚོགས་བསམ་མི་ཁྱབ༔ སྲུང་འཁོར་རིམ་པ་ལྔ་ཡི་ཚུལ་དུ་བསྐོར། འབར་བ་ཡེ་ཤེས་མེ་ཡིས་མཚམས་ཆོད་ཅིག༔ ཨོཾ་ཨགྣི་ཛྭ་ལ་རྃ་ཧྲཱི་ནི་རྃ་ཧཱུྃ་ཧཱུྃ་ཧཱུྃ༔ ཞེས་མཚམས་བཅད། མ་སྦར་བ་ནི། བཀྲ་ཤིས་པའི་གནས་ནས་བྱུང་བའི་མེ་སྒྲོན་ཤིང་ལ་མེ་སྦར་བ་བསང་ཆུ་འཐོར། ཨ་མྲྀ་ཏས་བསང་། སྭ་བྷཱ་བས་སྦྱང་། ཡེ་ཤེས་མེ་ལྕེ་འོད་གསལ་བར་གྱུར། ཨོཾ་ཙཎྜ་ཛྭ་ལ་རྃ་ཧཱུྃ་ཕཊ༔ ཨོཾ་ཨགྣི་ཛྭ་ལ་རྃ༔ ལན་གསུམ་གྱིས་ཐབ་ལ་གཡས་སུ་བསྐོར་ཏེ་ཤར་ལྷོ་ངོས་ནས་སྦར་རོ། །གཉིས་པ་འཇིག་རྟེན་པའི་མེ་ལྷ་མཆོད་པ་ནི། ཧཱུྃ་ཧྲཱིཿ མེ་ཐབ་མི་དམིགས་སྟོང་པའི་ངང་ཉིད་ལས༔ ཨེ་ལས་བྱུང་བ་ཞི་བའི་ཐབ་ཁུང་ཟླུམ༔ དཀར་གསལ་མདངས་ལྡན་མེ་ལྕེ་ཟླུམ་པོར་འབར༔ དབུས་སུ་པདྨ་ཉི་ཟླའི་གདན་སྟེང་དུ༔ དམ་ཚིག་མེ་ལྷ་དྲང་སྲོང་ཆ་ལུགས་ཅན༔ ཞི་བ་དཀར་ལ་ཟླུམ་བཞི་ཚུལ་མཛེས༔ ཞལ་གཅིག་ཕྱག་བཞི་སྤྱན་
གསུམ་ར་སྐྱེས་ཆིབས༔ ཕྱག་གཡས་མེ་ཐབ་འོག་མ་གྷནྷྡེ་དང་། གཡོན་པ་བགྲང་ཕྲེང་འོག་མ་ལྕགས་ཀྱུ་འཛིན༔ ཤ་རྒྱས་གཟུགས་ཐུང་སྒེག་ཅིང་ལྟོ་བ་འཕྱངས༔ སྨ་ར་དམར་སེར་རལ་པ་ཅོད་པན་ཅན༔ དྲང་སྲོང་ཚོགས་ཀྱིས་བསྐོར་བའི་དབུས་ན་གསལ། རང་ཉིད་ཡི་དམ་ལྷ་ཡི་ཐུགས་ཀ་ནས༔ འོད་འཕྲོས་ཤར་ལྷོ་མེ་ལྷའི་ཡུལ་ནས་ནི༔ ཡེ་ཤེས་སེམས་དཔའ་དམ་ཚིག་ཇི་ལྟ་བ༔ དྲང་སྲོང་ཚོགས་ཀྱིས་བསྐོར་བ་སྤྱན་དྲངས་ཐིམ༔ བ་དན་གསུམ་པའི་ཕྱག་རྒྱ་བཅས་མེ་དར་དཀར་པོ་གཡབ༔ དྲིལ་བུ་གསིལ་ལ་སྤྱན་དྲང་བ་ནི༔ ཧཱུྃ་ཧྲཱིཿ དད་པ་དང་ནི་དམ་ཚིག་གིས༔ ཚུར་གཤེགས་ཚུལ་གཤེགས་འབྱུང་པོ་ཆེ༔ མེ་ལྷའི་རྒྱལ་པོ་དྲང་སྲོང་མཆོག །རང་བཞིན་གནས་ནས་སྐུ་བསྐྱོད་ལ༔ དམ་ཚིག་ཚུལ་བཞིན་གཤེགས་ནས་ཀྱང་༔ རང་བཞིན་དཀྱིལ་འཁོར་ཆེན་པོ་ཡི༔ གཟུགས་བརྙན་དཀྱིལ་འཁོར་ཆེན་པོ་འདིར༔ སྤྱན་འདྲེན་མཆོད་ཀྱིས་གཤེགས་སུ་གསོལ༔ ཨོཾ་ཨགྣི་དྷེ་ཝ་རྀ་ཥི་ཛ་ཛ༔ ཨེ་ཧྱེ་ཧི་ས་མ་ཡ་ཛཿཧཱུྃ་བྃ་ཧོ༔ ཀུ་ཤའི་ཆུན་པོ་གྲམ་ཐོགས་ལ། ཧཱུྃ་ཧྲཱིཿ གཟི་བརྗིད་འབར་བ་མེ་ཡི་ལྷ༔ ཡིད་ལ་འདོད་པ་ཀུན་སྒྲུབ་ཅིང་༔ ཐུགས་རྗེས་སེམས་ཅན་དོན་མཛད་པ། །འབར་བའི་གནས་འདིར་བཞུགས་སུ་གསོལ༔ ཨོཾ་ཨགྣི་དེ་ཝ་ཏཱ་ས་མ་ཡ་ཨཱ་བེ་ཤ་ཡ་
ཏིཥྛ་ལྷན། ཞེས་པས་དམ་ཡེ་གཉིས་མེད་དུ་ཀུ་ཤའི་གདན་ལ་བཞུགས་པར་མོས་ལ་ཐབ་ཏུ་འབུལ། དུང་ཞལ་སོ་སོ་ནས་མཆོད་ཡོན་སོགས་བཟེད་ཞལ་དུ་བྲིམ་ཞིང་། །ཨོཾ་ཨགྣི་དེ་ཝ་ཏ*ཎཱ་ས་པ་རི་*ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། ཐོག་མཐའ་འགྲེ་བས། པཱ་དྱཾ་ཞེས་སྦྱར་བས་ཞབས་བསིལ་ཕུལ། ཧཱུྃ་ཧྲཱི༔ ཚངས་པ་འཇིག་རྟེན་མགོན་གྱི་སྲས། །ཞི་ལ་སོགས་པའི་ལྷ་དཔལ་དེ། །ཇི་ལྟར་འདོད་པའི་དོན་གྲུབ་པ། །གཟི་བརྗིད་རྒྱལ་པོར་ཕྱག་འཚལ་ལོ། །ཨ་ཏི་པུ་ཧོཿ ཉེང་སྤྱོད་ལྔ་རིམ་པར་གསལ། ཧཱུྃ་ཧྲཱིཿ སྟོང་གསུམ་འདིའམ་གཞན་དག་ན། །མེ་ཏོག་བདུག་སྤོས་མར་མེ་དྲི༔ ཞལ་ཟས་རོལ་མོ་ཇི་སྙེད་ཀུན༔ ཡེ་ཤེས་མེ་ལྷའི་ཚོགས་ལ་འབུལ༔ ཕྲིན་ལས་བསྒྲུབ་ཕྱིར་བཞེས་སུ་གསོལ༔ ཨོཾ་ཨགྣི་དེ་བ་ཏཱ་བཛྲ་པུཥྤེ་སོགས་ནས། ཤབྡ་པྲ་ཏཱིཙྪ་སྭཱ་ཧཱ༔ དེ་བཞིན་ཏུ་འདོད་ཡོན་ལྔ་ཕུལ་ལ། གཟུགས་སྒྲ་དྲི་རོ་རེག་བྱ་ཆོསཿ འདོད་ཡོན་བླ་མེད་མཆོད་པ་འདི༔ ཡེ་ཤེས་མེ་ལྷའི༴ ཕྲིན་ལས་བསྒྲུབ་ཕྱིར༴ ཨོཾ་ཨགྣི་དེ་བ་ཏཱ་བཛྲ་རཱུ་པ་ཤབྡ་གྷནྡྷེ་ར་ས་སྤ་རྴེ་པཱུ་ཛཿཧོཿ བདུད་རྩི་དང་གཏོར་མ་ཕུལ་ལ། བདུད་རྩི་རྩ་བརྒྱད་སྟོང་སྦྱར་དང་༔ བཅུད་ལྡན་མཆོག་གི་གཏོར་མ་འདི༔ ཡེ་ཤེས་མེ༴ ཕྲིན་ལས༴ ཨོཾ་ཨགྣི་དེ་བ་ཏཱ་བཛྲ་ཨ་མྲྀ་ཏ་བ་ལི༚་ཏ་ཁ་རཾ་ཁཱ་ཧི༔ དེ་ནས་བསྲེག་རྫས་ཀྱི་ཐོག་མར་དགང་གླུགས་འབུལ་བ་ནི།
དགང་བླུགས་ཁ་ལ་ཧྲཱིཿཡིག་མཚན༔ མེ་ལྷ་ཅུང་ཟད་ཞལ་གདངས་པའི༔ ལྗགས་ལ་རྃ་ཡིག་གིས་མཚན་པ༔ བསྲེག་རྫས་བདུད་རྩི་བཞེས་པར་གྱུར༔ ཞི་བའི་ཁུ་ཚུར་ཁ་སྦྱོར་པུས་མོའི་ནང་ལས་ཕྱིར་མི་འདའ་བར་གཡས་སྐོར་བཅས། ཨོཾ་ཨགྣི་དེ་བ་ཡ། ཨཱ་དི་པྱ། པ་ཏི་བྷྱཿ ཨཱ་བེ་ཤ་ཡ༔ མ་ཧཱ་ཤྲི་ཡེ། ཧ་བྱ་ཀ་བྱ་བྷ་ཧ་ན་ཡ་སྭཱ་ཧཱཿ ཞེས་དགང་བླུགས་ཀྱིས་མར་ཁུ་ལན་བདུན་སོགས་དང་། སྔགས་ལྷན་ཅིག་བར་འབུལ། དེ་ནས་ཡམ་ཤིང་འབུལ་བ་ནི། ཧཱུྃ་ཧྲཱིཿ ཞི་བའི་ཡམ་ཤིང་བལ་དཀར་བྱང་ཆུབ་སེམས༔ བཅོམ་ལྡན་ཡེ་ཤེས་མེ་ལྷའི་ཚོགས་ལ་འབུལ༔ ཞི་བའི་ཕྲིན་ལས་བསྒྲུབ་ཕྱིར་བཞེས་སུ་གསོལ༔ ཨོཾ་ཨགྣི་དེ་བ་ཏ་ཤཱིནྟིང་ཀུ་རུ་ཡེ་སྭཱ་ཧཱ༔ ཞེས་པ་ལ་གྲངས་བཟུང་བའམ། སྤྱི་མཐུན་སྤྲོ་ན། འོད་ཀྱི་དཀྱིལ་འཁོར་ལ་དམིགས་ཏེ། ཨོཾ་ཨགྣི་དེ་ཝ་ཏཱ་བོ་དྷི་བྲྀཀྵཱ་ཡ་སྭཱ་ཧཱ༔ ཞེས་ཡམ་ཤིང་སྔགས་དང་། ལྷན་ཅིག་ལན་བདུན་སོགས་འབུལ་ཞིང་། དེའི་མཇུག་ཏུ་སྦལ་ཚིག་ནི། རྣལ་འབྱོར་པ་བདག་ཅག་གམ་སྦྱིན་བའི་བདག་པོའི་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟི་ཾ་ཀུ་རུ་སྭཱ་ཧཱ། དེ་ལྟ་བུའི་ཐོག་མཐའི་སྔགས་རིགས་འགྲེ་བས། མར་ཁུ་ཞལ་དུ། ཨོཾ་ཨགྣ་ཡེ་སྭཱ་ཧཱ༔ འབྱོར་བ་ཕུན་སུམ་ཚོགས་པ་ལ་བར་དུ་གཅོད༴ ཏིལ་ཕྱག་ཏུ། སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ༔ སྡིག་སྒྲ་བཞི་པ་ལ་
བར་དུ། དཱུར་ཝ་དབུལ། ཨོཾ་བཛྲ་ཨཱ་ཡུ་ཥེ་སྭཱ་ཧཱཿ ཚེ་ཕུན་སུམ་ཚོགས་པ་ལ་བར་དུ༴ འབྲས་ཕྱག་ཏུ། བཛྲ་པུཥྚཱ་ཡ་སྭཱ་ཧཱ། དཔལ་འབྱོར་ཕུན་སུམ་ཚོགས་པ་ལ་བར་དུ༴ ཟབ་མཆོག་ཞལ་དུ། ཨོཾ་སརྦ་སམྤ་དེ་སྭཱ་ཧཱ༔ལོངས་སྤྱོད་ཕུན་སུམ་ཚོགས་པ་ལ་བར་དུ༴ ཀུ་ཤ་གདན་དུ། ཨ་པྲ་ཏི་ཧ་ཏ་བཛྲ་ཡེ་སྭཱ་ཧཱཿ མི་མཐུན་པའི་ཕྱོགས་ཐམས་ཅད་སྲུང་བ་ལ་བར་དུ༴ སོ་བ་ཕྱག་ཏུ། བཛྲ་བི་ཛ་ཡེ་སྭཱ་ཧཱ༔ ནོར་དང་འབྲུ་ཕུན་སུམ་ཚོགས་པ་ལ་བར་དུ༴ སྲན་མ་ཕྱག་ཏུ། མ་ཧཱ་བ་ལ་ཡེ་སྭཱ་ཧཱ༔ བསོད་ནམས་ཀྱི་སྟོབས་བསྐྱེད་པ་ལ་བར་དུ༴ དེ་ལྟར་བསྲེག་རྫས་རྣམས་ལས་མར་ཁུ་དགང་བླུགས་ཀྱིས་ཕུལ། གཞན་རྣམས་མཐེབ་སྲིན་སྦྱར་བས་ཕུལ། རྫས་སྤུངས་ཡོད་ན་མེ་ལྷའི་སྔགས་ཀྱིས་གང་འོས་ཕུལ་ལ། ཧཱུྃ་ཧྲཱིཿ གཟི་བརྗིད་འབར་བ་མེ་ཡི་ལྷ༔ དྲང་སྲོང་ཆེན་པོའི་ལྷ་ཚོགས་རྣམས༔ ཐུགས་རྗེས་སེམས་ཅན་དོན་མཛད་པའི༔ སྦྱིན་སྲེག་མཆོད་པ་བཞེས་སུ་གསོལ༔ ཧཱུྃ་ཧྲཱིཿ ཡེ་ཤེས་ཀློང་ཡང་འཁྱིལ་བའི་ཧོམ་ཁུང་དུ༔ དམ་རྫས་བདུད་རྩི་འབར་བའི་སྦྱིན་སྲེག་འདི༔ མེ་ལྷ་དྲང་སྲོང་ཁྱེད་ལ་མཆོད་པ་འབུལ༔ ཞི་བའི་ཕྲིན་ལས་མྱུར་དུ་འགྲུབ་པར་མཛོད༔ བཛྲ་པུཥྤེ་སོགས་ཀྱིས་མཆོད། བསྟོད་པ་ནི། ཧཱུྃ་ཧྲཱིཿ མེ་ལྷའི་རྒྱལ་པོ་དྲང་སྲོང་མཆོག༔ བདུད་བཞི་
འཇོམས་མཛད་ཕྱག་བཞི་པཿ ལས་ཀུན་སྒྲུབ་མཛད་འོད་པོ་ཆེ༔ སྔོན་ཚེ་དུས་ན་ལྷ་ཡི་མཆེདཿ ད་ལྟ་རྣལ་འབྱོར་སྒྲུབ་པའི་མཆེད༔ ལས་ཀུན་མཛད་ལ་ཕྱག་འཚལ་བསྟོད༔ ཕྲིན་བཅོལ་དང་འདོད་གསོལ་ནི། ཧཱུྃ་ཧྲཱིཿ དྲང་སྲོང་མེ་ལྷ་གཟི་བརྗིད་འབར་བའི་འོད༔ ཡབ་ཡུམ་སྲས་དང་སྤྲུལ་པ་འཁོར་དང་བཅསཿ དམ་རྫས་མེ་ཡི་མཆོད་པ་འདི་ཕུལ་བས༔ ཞི་བའི་ཕྲིན་ལས་འགྲུབ་པར་མཛད་དུ་གསོལ༔ ཧོ༔ དྲང་སྲོང་ཆེན་པོ་ཁྱེད་ལ་ཕྲིན་ལས་སུ་བཅོལ་བ་ནི༔ བདག་ཅག་ཡོན་མཆོད་ཐམས་ཅད་ལ་ནད་གདོན་གནོད་པ༔ རྐྱེན་ཕྱི་ནང་གི་བར་ཆད་ཐམས་ཅད་ཞི་བར་མཛད་དུ་གསོལ༔ ཤཱནྟིང་ཀུ་རུ་ཡེ་སྭཱ་ཧཱ༔ ཁྱད་པར་དུའང་སྔོན་གྱི་ཞལ་བཞེས་བཞིན་དུ་མེ་འབར་བ་དང་གཉིས་སུ་མེད་པར་བཞུགས་ནས༔ སྦྱིན་སྲེག་གི་ཞལ་ཟས་རྣམ་པར་དག་ཅིང་གཙང་བར་བྱིན་གྱིས་བརླབ་པ་དང་༔ཆུད་མི་ཟ་བར་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་བསྟབ་པར་མཛད་དུ་གསོལ༔ དགང་བླུགས་ཀྱི་མར་ཁུ་ལན་གསུམ་འབུལ་བ་དང་ལྷན་ཅིག་ཏུ། ཨོཾ་ཨགྣ་ཡེ་སྭཱ་ཧཱ༔ མེ་ལྷ་འཁོར་དང་བཅས་པ་རྣམས༔ ཐབ་ཀྱི་ཁ་ཁྱེར་ལ་གནས་པའི༔ ལྷ་ཡི་ཕྱག་ཚང་མཛད་པར་གྱུར། ཅེས་དམིགས་སོ། །གསུམ་པ་དཀྱིལ་འཁོར་
པའི་ལྷ་རྣམས་མཆོད་པ་ནི། མེ་ཐབ་ལ་བུད་ཤིང་ཅུང་ཟད་བསྣན། བསང་ཆུ་འཐོར། ཨོཾ་ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་མེ་འབར་བའི་དབུས་སུ་དམ་ཚིག་པའི་དཀྱིལ་འཁོར་རྟེན་དང་བརྟེན་པར་བཅས་པ་བསྐྱེད་པ་ནི་ལས་བྱང་ལྟར། ཨོཾ༔ ཆོས་ཀུན་གཟོད་ནས་ཡོངས་བྱང་ཀ་དག་ཀློང་༔ཞེས་སོགས་ལྷ་བསྐྱེད་ནས་སྤྱན་འདྲེན་བཞུགས་གསོལ་བར་བརྗོད། སྒྲུབ་དཀྱིལ་དང་འབྲེལ་བའི་སྐབས། སྤྱན་འདྲེན་སྐབས་སློབ་དཔོན་ནམ་ལས་ཀྱི་རྡོ་རྗེ་དཀྱིལ་འཁོར་དྲུང་དུ་སོང་ལ། སྙིང་པོའི་སྔགས་མཐར། བཛྲ་ས་མཱ་ཛཿབཏགས་པས་མཎྜལ་ཚོམ་བུར་དཀྱིལ་འཁོར་པ་གཤེགས་པར་མོས་ལ་སྤོས་དང་རོལ་མོར་བཅས་པས་སྤྱན་དྲངས་ཏེ། ལས་ཀྱི་རྡོ་རྗེས་ཟབ་ཀྱི་ནམ་མཁར་བཏེགས་ལ། ཨོཾ་ཨཱཿཧཱུྃ་ཧྲཱིཿགུ་རུ་དེ་བདྷཱ་ཀི་ནཱི་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་ཏུ། པཱ་དྱཾ་སྦྱར་བས་ཆུ་གཉིས་ཕུལ་ལ་ལས་བྱང་གི་བཞུགས་གསོལ་བརྗོད། མེ་ཏོག་ཐབ་ཏུ་དོར་ལ། ཛ་ཧཱུྃ་བྃ་ཧོཿ དམ་ཚིག་པ་དང་ཡེ་ཤེས་ཀྱི་དཀྱིལ་འཁོར་དབྱེར་མེད་དུ་གྱུར་པར་མོས། སྲེག་རྐྱང་ལ་བཞུགས་གསོལ་འཕྲོས་སུ་ཆུ་གཉིས་གོང་ལྟར་ཕུལ། ཨེ་མ་ཧོཿ ཆོས་སྐུ་ནམ་མཁའ་སོགས་ཀྱིས་ཕྱག་འཚལ། ཉེར་སྦྱོང་འདོད་ཡོན་གྱི་མཆོད་པ་རྣམས་ལས་བྱང་ལྟར་སོང་ནས། དགང་བླུགས་བཟུང་ལ། དགང་བླུགས་ཁ་ལ་ཧྲཱིཿཡིས་མཚན། །དཀྱིལ་འཁོར་ལྷ་ཚོགས་ལྗགས་ལ་ཡང་། །ཧྲཱིཿཡིག་དག་གིས་མཚན་པ་ལས། །བསྲེག་རྫས་བདུད་རྩི་
བཞེས་པར་གྱུར། སྙིང་པོའི་སྔགས་ཀྱི་མཇུག་ཏུ། ན་མཿས་མནྟ་བུདྡྷཱ་ནཱཾ། ཨགྣ་ཡེ་སྭཱ་ཧཱ༔ ཞེས་བཏགས་པས་མར་ཁུ་ལན་བདུན་ནམ་ཉེར་གཅིག་འབུལ། དེ་ནས་གོང་དུ་འཇིག་རྟེན་པའི་སྐབས་ལྟར་བསྲེག་རྫས་རྣམས་རིམ་པར་འབུལ་བའི་ཐོག་མར་ཡམ་ཤིང་ལ། བཅོམ་ལྡན་ཡེ་ཤེས་མེ་ལྷ་ཞེས་པ་ལ། བཅོམ་ལྡན་དཀྱིལ་འཁོར་ལྷ་ཡི་ཚོགས་ལ་འབུལ༔ཅེས་བསྒྱུར། དེ་ནས་བཟུང་སྲན་མའི་བར་གོང་ལྟར་ལ། ཨོཾ་ཨགྣི་དེ་བ་ཏཱ་ཞེས་མེ་ལྷའི་སྔགས་མདོར་ནས་རྩ་སྔགས་ཀྱི་གཤམ་དུ་རྫས་སྔགས་སོ་སོ་ཉེར་གཅིག་ཡན། བརྒྱ་སྟོང་སོགས་ཇི་ཙམ་འོས་པའི་མཐར་སྤེལ་ཚིག་སྦྱར་བས་བསྲེག་རྫས་རྣམས་འབུལ་ཞིང་། ཡེ་ཤེས་ཀྱི་བདུད་རྩི་དཀར་པོའི་ངོ་བོར་དྭངས་པ་ཕུལ་བས་གསོལ་བར་མོས། དམིགས་བསལ་ཁ་སྐོང་དང་། སྡིག་པ་ཞི་བའི་ལས་ཆེད་དུ་བྱེད་ན་སྙིང་པོ་རྫས་སྔགས་འདོད་གསོལ་སྦྲེལ་བས་ཏེ་ལ་ལ་གྲངས་བཟུང་ཚུལ་ཀྱང་གོང་གིས་འགྲེའོ། །གཞན་ཡང་ནད་ཞི་བ་ལ་གྲོ། གདོན་ཞིབ་ལ་ཡུངས་ཀར་སོགས་བྲངས་གསོག་འདོད་ནའང་སྤྱི་དང་མཚུངས་སོ། །དེའི་མཇུག་ཏུ་ལས་བྱང་ལྟར། སྨན་མཆོད་དང་གཏོར་མ་འབུལ། ཚོགས་ཕུད་ཀྱི་ཆ་ཤས་ཡེ་ནང་དུ། གྷ་་ཙཀྲ་པཱུ་ཛ་ཧོཿ ཞེས་པས་འབུལ། བསྟོད་པས་བསྟོད་ནས། བདག་མདུན་གྱི་ལྷ་ཚོགས་ཐམས་ཅད་སྐུ་མདོག་ཐུགས་སྲོག་སྔགས་ཕྲེང་དང་བཅས་པ་སྟོན་ཀའི་ཟླ་འོད་ལྟར་དཀར་བ་ལས། འོད་ཟེར་དང་བདུད་རྩི་དཀར་པོ་འཕྲོས་པས་ནད་གདོན་སྡིག་སྒྲིབ་ཉེས་པ་ཐམས་ཅད་དག་ཅིང་པས་ལ་བར་མོས་ལ་རྩ་སྔགས་མཇུག་
ཏུ། ནད་གདོན་སྡིག་སྒྲིབ་བར་དུ་གཅོད་པ་ཐམས་ཅད་ཤཱནྟིང་ཀུ་རུ་སྭཱ་ཧཱ། བཏགས་པ་ཅི་མང་བཟླ། མཐར་རྩ་སྔགས་ཀྱི་མཇུག་ཏུ། ཨགྣ་ཡེ་སྭཱ་ཧཱ། བཏགས་པ་དང་མར་ཁུ་ལན་བདུན་སོགས་ཕུལ་ཞིང་སྔགས་ཙམ་གྱིས་མཆོད། ཧཱུྃ་ཧྲཱིཿ ཐུགས་རྗེ་རོལ་པ་སོགས་ཤློ་ཀ་གཅིག་གིས་བསྟོད། །འདོད་གསོལ་ནི། ཧོཿ དཀྱིལ་འཁོར་གྱི་ལྷ་ཚོགས་རྣམས་ལ་ཕྲིན་ལས་སུ་གསོལ་བ་ནི། ཞེས་འཇིག་རྟེན་པའི་སྐབས་ལྟར་དུ་གསོལ། མ་འབྱོར་པ་དང་སོགས་ཤློ་ཀ་གཉིས་ཀྱིས་བཟོད་པར་གསོལ། དུང་ཞལ་མཆོད་ཡོན་སྔགས་དང་བཅས་པས་ཕུལ་ཞིང་དྲིལ་བསིལ་དང་བཅས་ཡིག་བརྒྱ་ལན་གསུམ་བཟླས། ཨོཾ་ཁྱེད་ཀྱིས་སེམས་ཅན་སོགས་ནས། བཛྲ་མུཿ ཞེས་རྡོ་རྗེ་བསྡུ་བའི་ཕྱག་རྒྱ་དང་ལྷན་ཅིག་སེ་གོལ་གྱི་སྒྲས་ཡེ་ཤེས་པ་གཤེགས། ཚོམ་བུ་སྤྱན་དྲངས་པའི་སྐབས་མེ་ཏོག་ཐབ་ཀྱི་དབུས་ནས་ལེན་པའི་ཚུལ་བྱས་ལ། སྔགས་དང་བཅས་མཆོད་ཡོན་སྦྲེང་བཞིན། སྔར་སྤྱན་དྲངས་པའི་སྐབས་བཞིན་དཀྱིལ་འཁོར་ཁང་པར་ཁྱེར་ལ། སྙིང་པོའི་སྔགས་མཇུག་ཏུ། ས་མ་ཡ་སྟཾྭ་ཞེས་སྦྱར་ལ་ཚོམ་བུའི་ལྷ་རྣམས་དཀྱིལ་འཁོར་དུ་ཐིམ་པར་མོས། མེ་ཐབ་ཀྱི་དམ་ཚིག་པ་རྣམས་རང་ལ་ཐིམ་པར་གྱུར། ཅེས་མོས། །གསུམ་པ་རྗེས་ཀྱི་བྱ་བ་ནི། བསང་ཆུ་འཐོར་ཞིང་། བཛྲ་ཨ་མྲྀ་ཏ་སོགས་ཀྱིས་བསང་། མེ་ལྷ་འཁོར་དང་བཅས་པ་རྣམས། །ཐབ་ཀྱི་ཁ་ཁྱེར་ནས་བསྐྱོད་དེ། །མེ་ཐབ་དབུས་སུ་གནས་པར་གྱུར། ཅེས་མོས་ལ། ཨོཾ་
ཨགྣ་ཡེ་སྭཱ་ཧཱ༔ ཞེས་མར་ཁུ་ལན་བདུན་སོགས་འབུལ། ཡམ་ཤིང་སོགས་བསྲེག་རྫས་ལྷག་མ་ཅི་མཆིས། སྤེལ་ཚིག་མེད་པའི་སྔགས་ཀྱིས་ཚར་གསུམ་འབུལ། ལས་བྱང་གི་ཚོགས་ལྷག་ཀྱང་ཕུལ། མེ་ལྷའི་གཏོར་མ་དགང་གཟར་གྱི་ཁར་བཞག་པ་བསང་ཆུ་འཐོར། བསང་སྦྱང་། ཨོཾ་ཨཱ་ཧཱུྃ། ལན་གསུམ། བདུད་རྩི་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ས་བླུག་གཟར་གྱིས་བཏེག །མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མཆོད་སྦྱིན་གཏོར་མ་འདི་བཞེས་ལ། ཞེས་སོགས་ནས། ཡིད་ལ་འདོད་པ་ཀུན་འགྲུབ་མཛོད། གཏོར་མ་མེ་ནང་དུ་བཞུ། མ་འབྱོར་པ་དང་སོགས་ཀྱི་མཐར་མཆོད་ཡོན་སྔགས་དང་བཅས་པས་དབུལ། དྲིིལ་བུ་གསིལ་ཞིང་ཡིག་བརྒྱ་བརྗོད། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབ་ཀྱི་གཤེགས། །ཇི་བཞིན་དུ་ནི་སླར་བྱོན་ལ། །བདག་གི་ཕྲིན་ལས་ཐམས་ཅད་སྒྲུབས། །ཞེས་སྙན་མནན་ཏེ། བཛྲ་མུཿ རྡོ་རྗེ་བསྡུ་རྒྱ་དང་། སེ་གོལ་གྱིས་ཡེ་ཤེས་མེ་ལྷ་ཤར་ལྷོར་གཤེགས། དམ་ཚིག་པ་རང་ལ་བསྡུ། བདག་བསྐྱེད་ཕྲིན་ལས་ཀྱི་གཤམ་གཏེར་སྲུང་གཏོར་ཆོག །ཆད་མདོ། བརྟན་སྐྱོང་བཟོད་གསོལ། གཤེགས་བསྡུ། ཤེས་བརྗོད་སོགས་ལས་བྱང་ལྟར་བྱ་ཞིང་། སྦྱིན་སྲེག་གི་མེ་རོ་འོ་མ་དང་དྲི་ཆས་སྦྱངས་ལ་ཆུ་ཀླུང་ཆེན་པོར་དོར་བའམ་རི་བོའི་རྩེར་བསྐྱལ་ལོ། །འོག་
གི་ལས་གསུམ་པོ་ལ་སོ་སོའི་ཁྱད་པར་ཅུང་ཟད་རེའི་བསྒྱུར་ཁ་མ་གཏོགས། ཡོ་བྱད་བཤམ་བཀོད། འདོན་བྱའི་ཁོག་འདི་ཁ་ནས་འཕྲུལ་ཤེས་པར་བྱའོ། །གཉིས་པ་རྒྱས་པའི་སྦྱིན་སྲེག་ནི། ར་བ་བཞིའི་ཚེས་བཅོ་ལྔ་དང་ཉི་དྲོས་ཀྱི་དུས་སུ། །ཐབ་ཁུང་སེར་པོ་གྲུ་བཞི་རྒྱར་ཁྲུ་དོ་སོར་བཞི་པ། དཔངས་སུ་ཁྲུ་གང་བ། དབུས་སུ་རིན་པོ་ཆེ་འབར་བར་གྱིས་མཚན་པ། ཁ་ཁྱེར་ཕྱོགས་བཞིར་ནོར་བུ་འབར་བ། ཟུར་བཞིར་ནོར་བུ་འབར་བ་རེ་རེས་མཚན་པ། འབྲས་བུ་ཅན་གྱི་ཤིང་གིས་གྲུ་བཞིར་བརྩིག །ཀུ་ཤ་རྩེ་མོ་ལྷོར་བསྟན་པས་བཀབ། གཏོར་མའི་རྒྱུ་གསེར་བྱེ་མེ་ཏོག་སེར་པོ་གྲོ་དང་རྒུན་འབྲུའི་ཕྱེ་ལྡོང་རོས་ཞོ་རྣམས་མར་དང་བསྲེས་པས་དབྱིབས་གྲུ་བཞི་པད་འདབ་ཅན། ཡམ་ཤིང་ཙནྡན་དཀར་པོ་དང་སྟག་པའམ་འབྲས་བུ་ཆགས་བའི་ཤིང་གི་བར་གྱི་ཆ་ལས་བྱུང་བ་སོར་བཅུ་གཉིས་པ་དྲི་དང་མངར་གསུམ་མར་ཁུས་སྦགས་པ། བསྲེག་རྫས་ཞི་བ་དང་མཐུན་པ་ལ་ཁྱད་པར་གསེར་དང་དར་གོས་སེར་པོ་ཨ་མྲྀ་ཏ་ལ་སོགས་པའི་རྫས་སྤུངས། ཁ་སྐོང་བྱེད་ན། འབྲུ་སྨན་རིན་པོ་ཆེ་སྣ་ཚོགས་ཁ་ཟས་བཟང་པོ། ཁྱད་པར་དུ་ཚེ་སྤེལ་བ་ལ་དཱུརྦ་ལྟ་བུ་གང་གཙོར་བྱེད་པའི་རྫས་མང་དུ་བསགས། སྣོད་དང་རྫས་དང་སྟེགས་ཐམས་ཅད་དབྱིབས་གྲུ་བཞི། ཁ་དོག་སེར་པོ། སློབ་དཔོན་ཆས་རྒྱན་སེར་པོ་དགའ་བའི་སེམས་དང་བཟང་པོའི་སྟབས་ཀྱིས་སྟན་སེར་པོ་ལ་ཁ་བྱང་དུ་ཕྱོགས་ཏེ་འཁོད་ནས་ལས་རིམ་ལ་འཇུག །མེ་རྒྱལ་རིགས་ཀྱི་ཁྱིམ་དང་གཙུབས་ཤིང་ལས་བྱུང་བས་སྦར། བསྲེག་རྫས་བདུད་རྩི་སེར་བར་མོས། ཕྲིན་ལས་གོང་དང་མཚུངས་པ་ལས། ཐབ་བསྐྱེད་སྐབས། ཧཱུྃ་ཧྲཱིཿ མེ་ཐབ་སྟོང་པའི་ངང་
ལས་ཨེ་ཡིག་ལས༔ རྒྱས་པའི་ཐབ་ཁུང་སེར་པོ་གྲུ་བཞི་པ༔ རིན་ཆེན་འབར་བ་མེ་ལྕེ་སེར་པོ་འབར༔ དབུས་སུ་པདྨ་ཉི་ཟླའི་གདན་སྟེང་དུ༔ དམ་ཚིག་མེ་ལྷ་སེར་པོ་གཟི་བརྗིད་ལྡན༔ ཞལ་གཅིག་ཕྱག་བཞི་སོགས་ལ་འཇུག །མཆོད་པའི་སྐབས། སྨན་དང་གཏོར་མའི་རྗེས་སུ་ཚོགས་ཕུལ་ལ། འདོད་ཡོན་མཆོག་གི་ལོངས་སྤྱོད་ནི༔ ཚོགས་མཆོད་བདུད་རྩིའི་རྒྱ་མཚོ་འདི༔ ཡེ་ཤེས་མེ་ལྷའི་ཚོགས་ལ་འབུལ༔ ཕྲིན་ལས་བསྒྲུབ་ཕྱིར་བཞེས་སུ་གསོལ༔ ཨོཾ་ཨགྣི་དེ་ཝ་ཏཱ་ག་་ཙཀྲ་པཱུ་ཛ་ཁཱཿཧི༔ ཞེས་སྦྱར། ཡམ་ཤིང་ལ། ཧཱུྃ་ཧྲཱིཿ རྒྱས་པའི་ཡམ་ཤིང་རྒྱ་ཤུ་སེར་པོ་སོགས༔ བཅོམ་ལྡན་ཡེ་ཤེས་མེ་ལྷའི་ཚོགས་ལ་འབུལ༔ རྒྱས་པའི་ཕྲིན་ལས་བསྒྲུབ་ཕྱིར་བཞེས་སུ་གསོལ༔ ཨོཾ་ཨགྣི་དེ་བ་ཏཱ་པུཥྚི་ཾཀུ་རུ་ཡེ་ཨོཾ༔ ཞེས་སྦྱར། བསྲེག་རྫས་དང་འདོད་གསོལ་སྐབས། །གཟི་བརྗིད་ཕུན་སུམ་ཚོགས་པ་ཐམས་ཅད་པུཥྚི་ཾཀུ་རུ་ཨོཾ༔ ཞེས་པས་འགྲེས་སྦྱར། ཏིལ་ལ། སྡིག་སྒྲིབ་མེད་པ་ཕུན་སུམ་ཚོགས་པ་ཞེས་སྦྱར། ཕྲིན་བཅོལ་སྐབས་སུ། ཞི་བ་ཞེས་པ་རྣམས། རྒྱས་པ་ཞེས་བསྒྱུར། འདོད་གསོལ་ལ། ཧོཿ དྲང་སྲོང་ཆེན་པོ་ཁྱེད་ལ་ཕྲིན་ལས་སུ་བཅོལ་བ་ནི༔ བདག་ཅག་ཡོན་མཆོད་ཐམས་ཅད་ཀྱི། ཚེ་དང་ལོངས་སྤྱོད་བུ་ནོར་མངའ་ཐང་སྟོབས་དང་སྙན་གྲགས་
ལ་སོགས་པ་དཀར་པོ་དགེ་བའི་བྱ་བ་ཐམས་ཅད་གོང་ནས་གོང་དུ་འཕེལ་བར་མཛད་དུ་གསོལ། པུཥྚི་ཾཀུ་རུ་ཡེ་སྭཱ་ཧཱ༔ ཞེས་སྦྱར། དཀྱིལ་འཁོར་པ་མཆོད་པའང་སྔར་དང་འདྲ་བ་ལ། བསྟོད་པའི་རྗེས་སུ། བདག་མདུན་གྱི་ལྷ་ཚོགས་ཐམས་ཅད་སྐུ་མདོག་ཐུགས་སྲོག་སྔགས་ཕྲེང་དང་བཅས་པ་གསེར་བཙོམ་ལྟར་སེར་བ་ལས། འོད་ཟེར་དང་བདུད་རྩི་སེར་པོ་འཕྲོས་པས་ཚེ་བསོད་དཔལ་འབྱོར་ཡེ་ཤེས་ཡོན་ཏན་འཕེལ་ཞིང་རྒྱས་པར་མོས་ལ། སྙིང་པོའི་གཤམ་དུ། ཚེ་བསོད་དཔལ་འབྱོར་ཡེ་ཤེས་ཡོན་ཏན་ཐམས་ཅད་པུཥྚི་ཾཀུ་རུ་ཨོཾ། ཞེས་བཏགས་པ་བཟླ། རྗེས་མེ་རང་ཞི་དང་ཐལ་སོལ་ཆུ་བོར་སྐྱིལ་བའང་བང་མཛོད་དུ་སྦའོ། །གསུམ་པ་དབང་གི་སྦྱིན་སྲེག་ནི། དུས་འབྲིང་པོ་བཞིའི་ཉི་ཤུལ་དང་ཉིན་མཚན་གྱི་གུང་གི་ཆར། ཐབ་ཁུང་ཟླ་གམ་དམར་པོ་རྒྱར་ཁྲུ་ཕྱེད་པ། དཔངས་སུ་དེའི་ཕྱེད་ཆ། དབུས་སུ་པདྨའི་ལྟེ་བར་ལྕགས་ཀྱུ་རྃ་གྱིས་མཚན་པ། ཁ་ཁྱེར་ཕྱོགས་བཞིར་པདྨ། ཟུར་བཞིར་ལྕགས་ཀྱུ་རེ་རེས་མཚན་པ། ཙནྡན་དམར་པོ་དང་མཛོ་མོ་ཤིང་སོགས་དམར་ལ་སྐྱུར་བའི་ཤིང་ཟླ་གམ་དུ་བརྩིག །ཀུ་ཤ་རྩེ་མོ་ནུབ་ཏུ་བསྟན་པས་བཀབ། གཏོར་མའི་རྒྱུ་ཟངས་ཕྱེ་པད་རཀ་བུ་རམ་འབྲས་དམར་རམ་བུའི་ཕྱེ་རྣམས་མང་ལ་བསྲེས་བསང་དབྱིབས་ཟླ་གམ་པད་འདབ་ལྔ་པ། གཡས་གཡོན་ཏུ་སྨན་རཀ །མར་ཁུའང་འཛོམ་ན་ཏིལ་མར་གྱི་ཁུ་བ་དང་། ཡམ་ཤིང་ཙནྡན་དམར་པོ་སོགས་དམར་ལ་རོ་སྐྱུར་བའི་ཤིང་གི་སྡོང་པོའི་ཆ་ལས་བྱུང་བ་སོར་བརྒྱད་པ་བུ་རམ་དང་ཏིལ་མར་གྱིས་བྱུགས་པ། བསྲེག་རྫས་གོང་
དང་མཚུངས་པ་ལ་ཟངས་ཕྱེ་བྱེ་རུ་དར་དམར་ལ་སོགས་པའི་རྫས་སྤུངས། ཁྱད་པར་གྱི་རྫས་འབུལ་དགོས་པའི་ཚེ་མེ་ཏོག་དམར་པོ། མངར་གསུམ་ཆང་གི་གླུ་མ། མྱོས་བྱེད་འབྲས་བུ། ཟླ་མཚན་གཙོས་རཀྟའི་རིགས་ལ་སོགས་པ་བདུད་རྩི་ལྔས་སྦགས་ཏེ་བཞག །སྣོད་དང་རྫས་དང་སྟེགས་ཐམས་ཅད་དབྱིབས་ཟླ་གམ། ཁ་དོག་དམར་པོ། སློབ་དཔོན་ཆས་རྒྱན་དམར་པོ་ཆགས་པའི་བསམ་པས་པད་སྐྱིལ་གྱིས་ནུབ་ཏུ་ཕྱོགས་པས་འཁོད་མེ་རོལ་མོ་མཁན་ནམ་སྨད་འཚོང་མའི་ཁྱིམ་ནས་བྱུང་བས་སྦར། བསྲེག་རྫས་བདུད་རྩི་དམར་པོར་མོས། ཕྲིན་ལས་ཞི་རྒྱས་དང་འདྲ་བ་ལ། ཐབ་བསྐྱེད་སྐབས། ཧཱུྃ་ཧྲཱིཿ མེ་ཐབ་སྟོང་པའི་ངང་ལས་ཨེ་ཡིག་ལས༔ དབང་གི་ཐབ་ཁུང་དམར་པོ་ཟླ་གམ་དབྱིབས༔ འགུགས་བྱེད་ལྕགས་ཀྱུའི་མེ་ལྕེ་དམར་པོ་འབར༔ དབུས་སུ་པདྨ་ཉི་ཟླའི་གདན་སྟེང་དུ༔ དམ་ཚིག་མེ་ལྷ་དམར་པོ་ཆགས་པའི་མདངས༔ ཞལ་གཅིག་ཕྱག་བཞི་སོགས་ལ་འཇུག །མཆོད་པའི་སྐབས་ཉེར་སྤྱོད། འདོད་ཡོན་ལྔའི་རྗེས་སུ། བདུད་རྩི་རྩ་བརྒྱད་སྟོང་སྦྱར་དང་ཿ རཀྟ་དམར་མཆོད་ཨརྒྷཾ་དང་༔ བཅུད་ལྡན་མཆོག་གི་གཏོར་མ་རྣམས༔ ཡེ་ཤེས་མེ་ལྷའི་ཚོགས་ལ་འབུལ༔ ཕྲིན་ལས་བསྒྲུབ་ཕྱིར་བཞེས་སུ་གསོལ༔ བཛྲ་ཨ་མྲྀ་ཏ་རཀྟ་བ་ལི༚་ཏ་ཁ་རཾ་ཁཱ་ཧིཿ ཞེས་དང་། རྒྱས་པ་ལྟར་ཚོགས་ཕུལ། ཡམ་ཤིང་ལ། ཧཱུྃ་ཧྲཱིཿ
དབང་གི་ཡམ་ཤིང་མཛོ་མོ་ཙནྡན་དམར༔ བཅོམ་ལྡན་ཡེ་ཤེས་མེ་ལྷའི་ཚོགས་ལ་འབུལ༔ དབང་གི་ཕྲིན་ལས་བསྒྲུབ་ཕྱིང་བཞེས་སུ་གསོལ༔ ཨོཾ་ཨགྣི་དེ་བ་ཏཱ་བ་ཤང་ཀུ་རུ་ཡེ་ཧོཿ ཞེས་སྦྱར། བསྲེག་རྫས་འདོད་གསོལ་སྐབས། གཟི་བརྗིད་ཕུན་སུམ་ཚོགས་པ་ཐམས་ཅད་པ་ཤང་ཀུ་རུ་ཧོཿ ཞེས་པས་འགྲེས་སྦྱར། ཕྲིན་བཅོལ་སྐབས་སོགས། ཞི་བ་ཞེས་པ་གར་ཡོད། དབང་གི་ཞེས་བསྒྱུར། འདོད་གསོལ་ལ། ཧོཿ དྲང་སྲོང་ཆེན་པོ་ཁྱེད་ལ་ཕྲིན་ལས་སུ་བཅོལ་བ་ནི༔ བདག་ཅག་ཡོན་མཆོད་ཐམས་ཅད་ལ། དུས་གསུམ་རྒྱལ་བ་ཐམས་ཅད་ཀྱི་ཐུགས་རྗེའི་བྱིན་རླབས་དང་གཞན་ཡང་ཁམས་གསུམ་དབང་དུ་འདུས་པ༔ སྲིད་གསུམ་ཟིལ་གྱིས་མནན་པ༔ ལྷ་འདྲེ་མི་གསུམ་ཐམས་ཅད་དབང་དུ་བསྡུ་བ་མཛད་དུ་གསོལ༔ བ་ཤཾ་ཀུ་རུ་ཡེ་སྭཱ་ཧཱ༔ ཞེ་སྦྱར། དཀྱིལ་འཁོར་པ་ལ་མཆོད་པའང་གོང་དང་འདྲ་བ་ལས། བསྟོད་པའི་རྗེས་སུ། བདག་མདུན་གྱི་ལྷ་ཚོགས་ཐམས་ཅད་སྐུ་མདོག་ཐུག་སྲོག་སྔགས་ཕྲེང་དང་བཅས་པ་པདྨ་རཱ་ག་ལྟར་དམར་བ་ལས། འོད་ཟེར་དང་བདུད་རྩི་དམར་པོ་འཕྲོས་པས་འཁོར་འདས་སྣོད་བཅུད་སྣང་བ་ཐམས་ཅད་དབང་དུ་འདུས་པར་མོས་ལ། སྙིང་པོའི་གཤམ་དུ། འཁོར་འདས་སྣོད་བཅུད་རླུང་སེམས་སྣང་བ་ཐམས་ཅད་བ་ཤང་ཀུ་རུ་ཧོཿ ཞེས་བཏགས་པ་བཟླ། རྗེས་མེ་
རང་ཞིའམ་ཆང་གིས་གཞི་ལ། ཐལ་སོལ་རི་རྩེའམ་ཆུ་ཆེན་ཏུ་བསྐྱལ་ལོ། །བཞི་པ་དྲག་པོའི་སྦྱིན་སྲེག་ནི། དུས་ཐ་ཆུང་བཞིའི་མར་ངོ་དང་གནམ་སྟོང་གི་ཉིན་ཕྱེད་དང་མཚན་ཕྱེད་ན། ཐབ་ཁུང་གྲུ་གསུམ་ནག་པོ་རྒྱར་སོར་མོ་ཉི་ཤུ། དབངས་སུ་དེའི་ཕྱེད་ཆ། དབུས་སུ་རལ་གྲི་རྃ་གྱིས་མཚན་པ། ཁ་ཁྱེར་ཕྱོགས་བཞིར་རལ་གྲི་རེ། ཟུར་བཞིར་རལ་བྲི་རེ་རེས་མཚན་པ། དུག་ཤིང་སྐྱེར་པ་ཚེར་ནག་ལ་སོགས་པ་ཚ་ཞིང་རྩུབ་པའི་ཤིང་གིས་གྲུ་གསུམ་དུ་བརྩིག །ཀུ་ཤ་རྩེ་མོ་བྱང་དུ་བསྟན་པས་བཀག །གཏོར་མའི་རྒྱུ་ལྕགས་ཕྱེ་དུག་སྣ་རྡོ་ཕྱེར་ཁྱིའི་ཁྲག་ཤ་ཆེན་སྲན་ཆེན་རྣམས་མར་ནག་ལ་བསྲེས་པས་གྲུ་གསུམ་ཐེབས་ཀྱུ་ཟུར་གསུམ་གསུམ་ལྡན། གཡས་གཡོན་ཏུ་སྨན་རཀ །མདུན་ཏུ་ཁྲག་གི་མཆོད་ཡོན་སོགས་དྲག་མཆོད། ཚིལ་ཞུན་དང་མར་ནག་བསྲེས་པའི་མར་ཁུ། སྐྱེར་ཚེར་སོགས་དུག་དང་ཚེར་མ་ཅན་གྱི་རྩ་བའི་ཆ་ལས་བྱུང་བའི་ཡམ་ཤིང་རྩ་ང་གཟུགས་སོར་བཅུ་གཉིས་པ་དུག་ཁྲག་ཚིལ་ཆེན་གྱིས་སྔགས་པ། དཱུརྦ་ཀུ་ཤ་རྣམས་ཀྱང་དུམ་བུར་གཏུབས། ཁྱད་པར་གྱི་རྫས། ཡུངས་ཀར་ནག །གུ་གུལ། གཏོར་ཆུང་། ལིངྒ། དུག་ཁྲག །ཀེ་ཚེ་ཤང་ཚེ། ལན་ཚྭ། དམིགས་བྱའི་རྗེས་དང་རྟེན་གྱིས་སོགས་ཁྲག་ཆེན་གྱིས་སྦོལ། མཆོད་རྫས་སློབ་དཔོན་གྱི་གཡས་དང་བསྲེག་རྫས་གཡོན་ཏེ་སྔ་མ་ལས་གོ་ཟློག །དགང་བླུགས་ཀྱང་དེ་བཞིན་བྱ་བ་ཁ་ཅིག་བཞེད། སྣོད་དང་རྫས་དང་སྟེགས་ཐམས་ཅད་དབྱིབས་གྲུ་གསུམ། ཁ་དོག་ནག་པོ། སློབ་དཔོན་ཞྭ་ནག་ཕོད་ཀ་རུས་རྒྱན་ཞེ་སྡང་གི་ངར་དང་ལྡན་པས་རུས་སྦལ་
གྱི་འདུག་སྟངས་ཀྱིས་ལྷོར་ལྟ་བས་འཁོད། རོ་བསྲེགས་པའི་མེའམ་གདོལ་པ་དང་ཤན་བའི་ཁྱིམ་ནས་བྱུང་བའི་མེས་སྦར་བ་རྣམས་ཁྱད་པར་རོ། །ཐོལ་མར་བདག་བསྐྱེད་ཀྱི་ཕྲིན་ལས་བཏང་པའི་ཚོགས་ཐ་མའི་སྐབས་ལིང་ཆུང་རྣམས་ལ་དམིགས་ཏེ་འགུགས་ལན་ན་ཏན་དང་བསྒྲལ་ལས་སྐབས་དུམ་བུར་གཏུབས། ཞལ་བསྟབ་མི་བྱའོ། །བྱིན་རླབས་སྐབས། མཆོད་བསྲེག་རྫས་རྣམས་ལ་ལས་བུམ་གྱི་ཆུས་གཡོན་སྐོར་དུ་འཐོར་ཞིང་། ཨ་མྲྀ་ཏས་བསང་། སྭཱ་བྷཱ་བས་སྦྱང་། སྟོང་པའི་ངང་ལས་ཨ་བྱུང་བའི་དམར་གྱི་དུང་ཆེན་སྟོང་གསུམ་མཉམ་པའི་ནང་དུ་ནྀ་དང་ཏྲི་ལས་དགྲ་བགེགས་ཀྱི་ཤ་ཁྲག་ཕུང་ཁམས་སྐྱེ་མཆེད་ལས་བྱུང་བའི་མཆོད་རྫས་དང་བསྲེག་རྫས་རྣམས་ངོ་བོ་ཡེ་ཤེས་ཀྱི་བདུད་རྩི་རྣམ་པ་སོ་སོའི་མཚན་ཉིད་ཡོངས་སུ་རྫོགས་པས་ནམ་མཁའི་ཁམས་གང་བར་གྱུར། ཨོཾ་བཛྲ་ཨརྒྷཾ་ནས། ཤབྟ་ཨཱཿཧཱུྃ་གི་བར་དང་། དྲག་སྒྲུབ་སྔགས་མཐར། ཤྀ་ཏྲི་མཱ་ར་ཡ་ཛཿཛཿ ལན་གསུམ་བརྗོད་པས་བསྲེག་རྫས་བྱིན་བརླབ། དེས་མཚོན་ཏེ་གཡས་སྐོར་དགོས་པ་ཐམས་ཅད་གཡོན་སྐོར་བྱ། ཐབ་བསྐྱེད་སྐབས། ཧཱུྃ་ཧྲཱིཿ མེ་ཐབ་སྟོང་པའི་ངང་ལས་ཨེ་ཡིག་ལས༔ དྲག་པོའི་ཐབ་ཁུང་ལྗང་ནག་གྲུ་གསུམ་པ༔ རལ་གྲི་མཚོན་ཆ་ལྗང་ནག་མེ་འོད་འབར༔ དབུས་སུ་པདྨ་ཉི་མའི་གདན་སྟེང་དུ༔ དམ་ཚིག་མེ་ལྷ་ལྗང་ནག་ཁྲོས་པའི་སྐུ༔ ཞལ་གཅིག་
ཕྱག་བཞི་སོགས་ལ་འཇུག །མཆོད་པ་ཆུ་གཉིས་ཉེར་སྤྱོད། སྨན་རག་གཏོར་གསུམ་དབང་ལྟར་དང་། ཁྱད་པར་དུ། གསུར་ཆེན་ཤ་དང་ཚིལ་ཆེན་དྲི༔ སྐྱེས་པའི་རྒྱུད་ལས་བྱུང་བ་འདི༔ ཡེ་ཤེས་མེ་ལྷའི་ཚོགས་ལ་འབུལ༔ ཕྲིན་ལས་བསྒྲུབ་ཕྱིར་བཞེས་སུ་གསོལ༔ ཤ་ཏྲུཾྃ་ཨ་མུ་ཀ་མཱ་ར་ཡ་ཧཱུྃ་ཕཊ༔ ཧཱུྃ་ཧྲཱི༔ ང་བདག་གཟུང་འཛིན་དགྲ་བགེགས་ཤ་ཁྲག་རུས༔ ཀླད་པ་རྐང་མར་ཚིལ་བུ་ནང་ཁྲོལ་རྣམས༔ ཕུང་པོ་ལྷག་མེད་མེ་ལྷའི་ཞལ་དུ་སྟེབ༔ མ་རུངས་གདུག་པ་འདུལ་ཕྱིར་བཞེས་སུ་གསོལ༔ ཞེས་མཆོད། དགང་བླུགས་ཁྲོ་བོའི་ཁུ་ཚུར་གྱིས་པུས་མོའི་ཕྱི་ནས་ནང་དུ་མི་འདའ་བར་བྱས། དགང་བླུགས་ཁ་ལ་ཧཱུྃ་ཡིག་མཚན༔ ཅེས་བསྒྱུར་བ་དང་། ཡམ་ཤིང་ལ། ཧཱུྃ་ཧྲཱིཿ དྲག་པོའི་ཡམ་ཤིང་ཚེར་མ་དུག་ཤིང་རྣམས༔ བཅོམ་ལྡན་ཡེ་ཤེས་མེ་ལྷའི་ཚོགས་ལ་འབུལ༔ དྲག་པོའི་ཕྲིན་ལས་བསྒྲུབ་ཕྱིར་བཞེས་སུ་གསོལ༔ ཨོཾ་ཨགྣི་དེ་བ་ཏཱ་མཱ་ར་ཡ་ཕཊ༔ ཅེས་སྦྱར། བསྲེག་རྫས་སྤེལ་ཚིག །རྣལ་འབྱོར་པ་བདག་ཅག་གམ་སྦྱིན་པའི་བདག་པོའི་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་མཱ་ར་ཡ་ཕཊ༔ ཅེས་པས་ཐམས་ཅད་ལ་འགྲེ། ཕྲིན་བཅོལ་སྐབས་སོགས། ཞི་བ་ཞེས་པ་རྣམས།
དྲག་པོ་ཞེས་བསྒྱུར། བསྲེག་རྫས་རྣམས་ངོ་བོ་དགྲ་བགེགས་ཀྱི་ཤ་ཁྲག་ལ་རྣམ་པ་བདུད་རྩི་ནག་པོ་རོ་ལྡན་ཏུ་མོས། །བསྲེག་རྫས་རྣམས་རྫོགས་པའི་མཐར་ལིངྒ་སོགས་དྲག་རྫས་རྣམས་ལ་དམིགས་ཏེ། བདེན་སྟོབས་བརྗོད་ཅིང་འགུགས་གཞུག་བྱས་ལ། ཧཱུྃ་ཧྲཱི༔ ཆེ་བའི་ཆེ་མཆོག་མེ་ལྷ་ནི༔ ཁམས་གསུམ་བསྲེག་ཕྱིར་ཞལ་ཧོམ་བགྲད༔ སྲིད་གསུམ་གཟིགས་ཕྱིར་སྤྱན་གསུམ་ཧྲིག༔ སྟོང་གསུམ་འདུལ་ཕྱིར་མེ་དཔུང་འབར༔ འུར་འུར་ཆེམ་ཆེམ་སྲེག་པའི་སྐུ༔ ལས་ངན་སྡིག་སྒྲིབ་ཞལ་དུ་བསྲེག༔ བསམ་སྦྱོར་ངན་པ་ཞལ་དུ་བསྲེག༔ རྦད་འདྲེ་རྦོད་གཏོང་ཞལ་དུ་བསྲེག༔ བསྟན་པའི་རུ་ཏྲ་ཞལ་དུ་བསྲེག༔ རྐྱེན་ངན་བར་ཆད་ཞལ་དུ་བསྲེག༔ ཧཱུྃ་ཧྲཱི༔ ལྕགས་ཕྱེ་ཟངས་ཕྱེ་རྡོ་ཕྱེ་སོགས༔ ཁྲག་དང་བསྲེས་ཏེ་འབུལ་ལགས་ན༔ མུནྟ་ར་ཡི་ཆན་དང་སྦྱར༔ བསྲེག་པས་རུ་ཏྲ་ཕུང་བར་མཛོད༔ ཅེས་དང་། ཨོཾ་ཨགྣི་ཀྲོ་དྷ་ཡ་དགྲ་བགེགས་ཆོམ་ཤ་ཏྲུཾ་མཱ་ར་ཡ་ཛྭ་ལ་རཾ་ཧཱུྃ་ཕཊ༔ ཅེས་དྲག་རྫས་རྣམས་ཆར་གྲངས་ཅི་འགྲུབ་འབུལ། འདོད་གསོལ་སྐབས། ཧོཿ དྲང་སྲོང་ཆེན་པོ་ཁྱེད་ལ་ཕྲིན་ལས་སུ་བཅོལ་བ་ནི༔ བདག་ཅག་ཡོན་མཆོད་ཐམས་ཅད་ལ་གནོད་ཅིང་འཚེ་བའི་དགྲ་བགེགས་མ་རུངས་གདུག་པ་ཅན་ཐམས་ཅད་མྱུར་དུ་ཚར་གཅོད་པར་མཛད་དུ་
དུ་གསོལ༔ མཱ་ར་ཡ་ཕཊ༔ དེ་ནས་དཀྱིལ་འཁོར་ལ་མཆོད་པ་གོང་མ་རྣམས་ལྟར་ལ། བཞུགས་གསོལ་རྗེས། ལྷ་ཚོགས་ཐམས་ཅད་སྐུ་མདོག་ཆར་སྤྲིན་ལྟར་གནག་ཅིང་བཟོད་པར་དཀའ་བའི་གཟི་བརྗིད་འོད་ཟེར་བསྐལ་མེ་ལྟར་འབར་བ་དྲག་པོའི་བསྲེག་བྱ་ཟ་བའི་ལས་ལ་རྔམས་པར་གྱུར། ཅེས་དམིགས། བསྲེག་རྫས་རྫོགས་ནས་དྲག་རྫས་སྐབས། འགུགས་གཞུག་དང་། ཧཱུྃ་ཧྲཱིཿ ཆེ་བའི་ཆེ་མཆོག་དྲག་པོའི་ལྷ༔ ཞེས་བསྒྱུར་བའི་འབུལ་ཚིག་མེ་ལྷའི་སྐབས་ལྟར་བྱ། སྔགས། ཨོཾ་བཛྲ་ཀྲོ་དྷ་སརྦ་ཤ་ཏྲུྃ་རཱུ་པ་ཙིཏྟ་ཨགྣི་ཛྭ་ལ་རཾ་ཁཱ་ཧི༔ ཞེས་པས་གྲངས་གང་འོས་ཕུལ། བསྟོད་པའི་རྗེས་སུ། བདག་མདུན་གྱི་ལྷ་ཚོགས་ཐམས་ཅད་སྐུ་མདོག་ཐུགས་སྲོག་སྔགས་ཕྲེང་དང་བཅས་པ་ཆར་སྤྲིན་ལྟར་གནག་ཅིང་འོད་ཟེར་མཐིང་གས་བསྐོར་བའི་འོད་ཟེར་མེའི་ཚྭ་ཚྭ་ཁྲོ་ཆུང་མཚོན་ཆའི་ཆར་སོགས་གྲངས་མེད་འཕྲོས་པས་གནོད་བྱེད་དགྲ་བགེགས་ཐམས་ཅད་ཚར་བཅད་པར་མོས་ལ། རྩ་སྔགས་ཀྱི་ཤམ་དུ། གནོད་བྱེད་དགྲ་བགེགས་འབྱུང་པོ་ཐམས་ཅད་མཱ་ར་ཡ་ཕཊ། ཅེས་བརྟགས་ནས་ཅི་མང་བཟླ། རྗེས་མེ་དུག་ཁྲག་གི་ས་གཞི་ལ། ཐལ་སལ་ཐོད་ངན་ཏུ་བླུགས་ལ་མཆོད་རྟེན་གྱི་འོག་གམ་ལམ་རྒྱ་གྲམ་དུ་སྦས་ལ་གཟིར་མནན་གྱི་རྟ་བྲོ་བརྡུང་ངོ་། །ལྔ་པ་ལས་བཞི་སྐྱི་དྲིལ་ལ། དུས་ཉ་སྟོང་བརྒྱད་ཀྱི་ཉིན་མཚན་ཇི་ལྟར་རིགས་པར།
ཐབ་ཁུང་ཚད་དབྱིབས་རྒྱས་པ་ལྟར་ལ། དབུས་སུ་རྩ་བ་གསུམ་གྱི་དཀྱིལ་འཁོར་དེའི་རྒྱབ་ཏུ་རིམ་པ་བཞིན་ཟླ་གམ་དམར་པོ། ཟླུམ་པོ་དཀར་པོ། གྲུ་བཞི་སེར་པོ། གྲུ་གསུམ་ནག་པོ་ཕྱི་རོལ་དུ་རྡོར་མེ་རིས་བསྐོར་བ། ལས་བཞི་ཀའི་བུད་ཤིང་ཐབ་ཀྱི་དབྱིབས་དང་མཐུན་པར་བརྩིགས་པའི་སྟེང་དུ་ཀུ་ཤའི་རྩེ་མོ་ཕྱོགས་བཞི་ཀར་བསྟན་པའང་བཀབ། བསྲེག་རྫས་ལས་བཞི་ཚང་པ་ཤར་སོགས་ཕྱོགས་སོ་སོར་བཀོད། གཏོར་མའང་ལས་བཞི་ཀ་སྣོད་གཅིག་ཏུ་སྦོམ། འདུག་སྟངས་སོགས་དང་ཕྲིན་ལས་ཞི་བ་གཞིར་བཞག །མཆོད་སྲེག་རྫས་བྱིན་རླབས་ཞི་དྲག་སོ་སོར་བྱ། ཐབ་བསྐྱེད་སྐབས། ཧཱུྃ་ཧྲཱིཿ མེ་ཐབ་མི་དམིགས་སྟོང་པའི་ངང་ཉིད་ལས༔ ཨེ་ལས་བྱུང་བའི་ལས་བཞིའི་ཐབ་ཁུང་ནི༔ སྣ་ཚོགས་དབྱིབས་ལྡན་མེ་ལྕེ་འོད་ལྔ་འབར༔ དབུས་སུ་པདྨ་ཉི་ཟླའི་གདན་སྟེངས་སུ༔ དམ་ཚིག་མེ་ལྷ་དྲང་སྲོང་ཆ་ལུགས་ཅན༔ ཀུན་འདུས་སྐུ་མདོག་སྣ་ཚོགས་གཟི་བརྗིད་ཅན༔ ཞལ་གཅིག་ཕྱག་བཞི་ཕྱིན་ཆད་སྔར་དང་མཚུངས། མཆོད་རྫས་རྣམས་ལས་བཞི་ཀ་བསྡོམས་ནས་ཕུལ། ཡམ་ཤིང་རྣམས། ཧཱུྃ་ཧྲཱིཿ ཞི་བའི་ཡམ་ཤིང་བལ་དཀར་བྱང་ཆུབ་སེམས༔ རྒྱས་པའི་ཡམ་ཤིང་རྒྱ་ཤུག་སེར་པོ་སོགས༔ དབང་གི་ཡམ་ཤིང་མཛོ་མོ་ཙནྡན་དམར༔ དྲག་པོའི་ཡམ་ཤིང་ཚེར་མ་དུག་ཤིང་རྣམས༔ བཅོམ་ལྡན་ཡེ་ཤེས་མེ་ལྷའི་ཚོགས་ལ་འབུལ༔ ཕྲིན་ལས་རྣམ་བཞི་བསྒྲུབ་ཕྱིར་བཞེས་སུ་གསོལ༔
ཨོཾ་ཨགྣི་དེ་ཝ་ཏཱ་ཤཱནྟིང་། པུཥྚིཾ། པ་ཤཾ། མཱ་ར་ཡ་ཕཊ༔ ཅེས་བསྲེག་རྫས་དང་འདོད་གསོལ་རྣམས་ལས་བཞི་སོ་སོར་ཚང་པར་སྦྱར། ཁྱད་པར་གྱི་རྫས་སོ་སོ་རྣམས་ནི་སྐབས་འདིར་མི་དགོས། ཞི་བའི་ཕྲིན་ལས། ཞེས་པར། ཕྲིན་ལས་རྣམ་བཞི་ཞེས་དང་། ལས་བཞི་ཞེས་བསྒྱུར། འདོད་གསོལ་ལ། ཕྲིན་ལས་བཞི་ཀ་སྦྱར། དཀྱིལ་འཁོར་བ་མཆོད་པའི་སྐབས་སུའང་དེས་རིགས་འགྲེ། སྔགས་ཤམ་དམིགས་པ་བཅས་ལས་བཞི་ཀ་སྦྱར། རྗེས་མེ་ཞི་རྒྱས་གཙོར་བྱས་ཀྱང་ཆོག །ཚོ་བཞིར་བགོས་ལ་ལས་སོ་སོ་ལྟར་བྱ་བ་གང་བདེར་བྱའོ། །འདི་དག་གི་སྐབས་སུ་མེ་བྲ་བརྟག་པ་ནི། རྩ་བའི་གཞུང་ལས། ཞི་བ་ལ་མེ་དཀར་ཞིང་འཇམ་ལ་ཟླུམ་པོར་འཁྱིལ་བ། རྒྱས་པ་ལ་གྲུ་བཞི་གསེར་བཙོ་མའི་འོད་ལྟ་བུ༔ དབང་ལ་དམར་པོ་ཞགས་པ་དང་ལྕགས་ཀྱུ་ལྟ་བུ༔ དྲག་པོ་ལ་ཐུགས་ཆོམ་དང་དུམ་བུ་ཆད་པ་བཟང་ངོ་། །ལས་སྣ་ཚོགས་ནི་མེ་བདག་སྣ་ཚོགས་པ་འབར་ཞིང་རྩེ་མོ་རྣོ་བ་བཟང་ངོ་། །དེ་ལས་བཟློག་པ་ནི་བར་ཆད་ཀྱི་པྲ་རྟགས་སོ༔ ཞེས་གསུངས་ཏེ་ངན་པའི་ལྟས་བྱུང་ན་ལས་སྔགས་བརྗོད་ཅིང་ལས་བུམ་གྱི་ཆུས་བསང་གཏོར་བྱ། །གཞན་ཡང་། སྲུང་མདུད་ཡི་དམ་གྱི་རྩ་སྔགས་ཞབས་སུ་ཕྲིན་ལས་བཞིའི་ཁ་བསྒྱུར་བཟླས་པ་སྐྱེས་པ་བུད་མེད་ཀྱི་དཔུང་པ་གཡས་གཡོན་དུ་བཅིང་། ཞེས་གསུངས་པ་ལྟར་དགོངས་འདུས་ལས་ཀྱང་འབྱུང་སྟེ་ཟབ་ཅིང་བྱིན་རླབས་ཆེ་བར་བསྔགས་པས་ལག་ལེན་ཏུ་བྱའོ། །ཕྱི་ཡི་སྲེག་བླུགས་ལས་བཞི་ཐོགས་མེད་འགྲུབ། །ནང་གིང་བར་བཞུས་ཕུང་ཁམས་དྭངས་མར་སྨིན། །གསང་
བའི་ཏོམ་གྱིས་འཁྲུལ་རྟོག་འོད་གསལ་དུ། །སྦྱངས་འབྲས་མི་འགྱུར་རྡོ་རྗེའི་བདེ་ཐོབ་ཤོག །ཅེས་པ་འདིའང་སྦས་ཡུལ་སྤུ་པོའི་ལྗོངས་ཀྱིས་སྐྱོང་གསང་ཆེན་བསྟན་པའི་རྩ་ལག་ཀ་ནི་སྡེ་པ་དང་བྱང་གླིང་གྲུབ་པའི་དབང་ཕྱུག་གི་སྤྲུལ་པའི་སྐུ་རིན་པོ་ཆེ་སོགས་མཆོད་ཡོན་ཟུང་གིས་ཆེད་དུ་བསྐུལ་ངོར། སྔགས་རིག་འཛིན་པ་པདྨ་གར་དབང་བློ་གྲོས་མཐའ་ཡས་པའི་སྡེས་ཤྲཱི་དེ་བཱི་ཀོ་ཊི་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ།། །། །།