བླ་མའི་ཐུགས་སྒྲུབ་བར་ཆད་ཀུན་སེལ་ལས། སྨེ་བ་བརྩེགས་བའི་སྒྲུབ་ཐབས་ཁྱེར་བདེ།
བླ་མའི་ཐུགས་སྒྲུབ་བར་ཆད་ཀུན་སེལ་ལས། སྨེ་བ་བརྩེགས་བའི་སྒྲུབ་ཐབས་ཁྱེར་བདེ་བཞུགས་སོ། །
ན་མོ་གུ་རུ་ཨུ་ཙུཥྨ་ཀྲོ་དྷཱ་ཡ། ཉམས་གྲིབ་མི་གཙང་བསེལ་བ་ལ་མཆོག་ཏུ་ཟབ་པ་ཁྲོ་ཆེན་སྨེ་བ་བརྩེགས་པའི་བསྒོམ་བཟླས་བགྱིད་པ་ལ། ཐོག་མར་སྐྱབས་སེམས་ནི། ན་མོཿ བདག་དང་མཁའ་མཉམ་སེམས་ཅན་མ་ལུས་ཀུན༔ སྐྱབས་ཀྱི་མཆོག་གྱུར་རྣམས་ལ་སྐྱབས་སུ་མཆི༔ སྨོན་དང་འཇུག་པའི་བྱང་ཆུབ་སེམས་བསྐྱེད་ནས༔ སྨེ་བ་བརྩེགས་པའི་གོ་འཕང་བསྒྲུབ་པར་བགྱི༔ ཚོགས་བསགས་ནི། ཕྱོགས་བཅུའི་སྐྱབས་ཡུལ་རྣམས་ལ་ཕྱག་འཚལ་ལོ༔ ཀུན་བཟང་མཆོད་སྤྲིན་ནམ་མཁའ་གང་བས་མཆོད༔ སྡོམ་པ་གསུམ་གྱི་འགལ་འཁྲུལ་ཉམས་ཆགས་བཤགས༔ འཕགས་སྐྱེའི་དགེ་སྤྱོད་ཀུན་ལ་རྗེས་ཡི་རང་༔ འགྲོ་ཕན་ཇི་ལྟར་འཚམས་པའི་ཆོས་འཁོར་སྐོར༔ འགྲོ་བའི་དོན་ཕྱིར་མྱ་ངན་མི་འདའ་བཞུགས༔ དགེ་ཀུན་བྱང་ཆུབ་སྙིང་པོ་ཐོབ་ཕྱིར་བསྔོ༔ ལྷ་བསྐྱེད་པ་ནི། ཨོཾ་སརྦ་དྷརྨཿསྭ་བྷཱ་བ་ཤུངྡོྷ྅ཧཾཿ འཁོར་འདས་ཆོས་ཀུན་ཀ་དག་ངང་༔ རིག་པའི་ཡེ་ཤེས་ཧཱུྃ་སྔོན་པོ༔ འགག་མེད་མཁའ་ལ་འཇའ་ལྟར་ཤར༔ ཟུང་འཇུག་ཐུགས་རྗེའི་ཆོ་འཕྲུལ་ལས༔ རྡོ་རྗེ་གསུམ་གྱི་ཡི་གེར་གྱུར༔ ཨོཾ་ལས་རྣམ་པར་སྣང་མཛད་ཀྱི༔ རང་བཞིན་གཞལ་མེད་ཁང་ཆེན་དབུས༔ ཨཱཿལས་སྣང་བ་མཐའ་ཡས་པའི༔ ཡེ་ཤེས་རིག་རྩལ་པད་ཉིའི་སྟེང་༔ ཧཱུྃ་
ཡིག་ཡོངས་གྱུར་སྐད་ཅིག་གིས༔ མི་བསྐྱོད་ཁྲོ་རྒྱལ་སྨེ་བ་བརྩེགས༔ མཐིང་ནག་ཞལ་གཅིག་ཕྱག་གཉིས་པ༔ དྲག་ཤུལ་ཁྲོས་པའི་གཟི་བྱིན་འབར༔ ཞལ་གདངས་ལྗགས་འདྲིལ་མཆི་བ་གཙིགས༔ སྤྱན་གསུམ་འཇིགས་པའི་ལྟ་སྟངས་ཅན༔ རྡོ་རྗེའི་ཐོད་རིམ་གཉིས་བརྩེགས་བཅིངས༔ དྲག་པོའི་སྡིགས་མཛུབ་ཐུགས་ཀར་བསྣོལ༔ རིན་ཆེན་སྦྲུལ་དང་དུར་ཁྲོད་ཆས༔ རྡོ་རྗེའི་ཕྲེང་བའི་དོ་ཤལ་འཕྱང་༔ ཡེ་ཤེས་མེ་ཕུང་ཆེར་འཁྲུགས་ཀློང་༔ ཞབས་གཉིས་བརྐྱང་བསྐུམ་དོར་སྟབས་འགྱིང་༔ གནས་གསུམ་རྡོ་རྗེའི་འབྲུ་གསུམ་མཚན༔ དེ་ལས་འཕྲོས་པའི་འོད་ཟེར་གྱིས༔ རང་འདྲའི་ཡེ་ཤེས་སྤྱན་དྲངས་གྱུར༔ ཧཱུྃ༔ མགོན་པོ་ཀུན་གཤེགས་ཁྲོ་བོའི་རྒྱལ༔ སྨེ་བ་བརྩེགས་པ་དབྱིངས་ནས་བཞེངས༔ མི་གཙང་ཉམས་གྲིབ་སྦྱོང་བའི་ཕྱིར༔ གནས་འདི་ཉིད་དུ་གཤེགས་སུ་གསོལ༔ ཨོཾ་བཛྲ་ཀྲོ་དྷ་ཨུ་ཙུཥྨ་ས་པ་རི་བཱ་ར་ཨེ་ཧྱེ་ཧིཿ ཧཱུྃ༔ མཆོད་པའི་ཕྱག་རྒྱ་ཆེན་པོ་ནི༔ སེམས་ཀྱི་ཡིད་བཞིན་སྤྲིན་ཚོགས་ལས༔ ཉེར་སྤྱོད་འདོད་ཡོན་བསམ་མི་ཁྱབ༔ བདེ་བ་ཆེན་པོའི་རྒྱན་ཏུ་རོལ༔ ཨོཾ་བཛྲ་ཨརྒྷཾ་པཱ་དྱཾ་པུཥྤེ་དྷཱུ་པེ་ཨ་ལོ་ཀེ་གནྡྷེ་ནཻ་བི་དྱ་ཤབྡ་པྲ་ཏཱིཙྪ་སྭཱ་ཧཱ༔
ཧཱུྃ༔ གཏུམ་ཆེན་དུས་མཐའི་མེ་ལྟར་འབར༔ ཁྲོ་བོའི་རྒྱལ་པོ་འཆོལ་བ་ཆེ༔ སངས་རྒྱས་ཀུན་གྱི་བྱིན་རླབས་བདག༔ ཉམས་གྲིབ་འཇོམས་ལ་ཕྱག་འཚལ་བསྟོད༔ བསྙེན་པའི་དམིགས་བཟླས་ནི། ཐུགས་ཀར་ཉི་སྟེང་ཧཱུྃ་མཐིང་ནག༔ མཐའ་བསྐོར་སྔགས་ཕྲེང་སྒྲ་བཅས་འཁོར༔ འོད་ཟེར་མེ་ཡི་ཚྭ་ཚྭ་འཕྲོས༔ གྲིབ་དང་མི་གཙང་ཀུན་བསྲེགས་གྱུར༔ ཨོཾ་ཨུ་ཙུཥྨ་ཀྲོ་དྷ་ཧཱུྃ་ཧཱུྃ་ཕཊ༔ སྒྲུབ་པའི་དམིགས་བཟླས་ནི། སླར་ཡང་འོད་འཕྲོས་འཕགས་པ་མཆོད༔ སེམས་ཅན་སྒྲིབ་སྦྱངས་རྩ་གསུམ་ལྷའི༔ བྱིན་རླབས་བསྡུས་ཏེ་རང་ལ་ཐིམ༔ ནུས་པ་མཆོག་ཏུ་བསྐྱེད་པར་གྱུར༔ ཨོཾ་བྷཱུར་ཀུར་མ་ཧཱ་པྲཱ་མ་ཱ་ཡེ་བྷཱུ་རྩི་བྷཱུ་རྐི་པི་མ་ལེ་ཨུ་ཙུཥྨ་ཀྲོ་དྷཱ་ཧཱུྃ་ཕཊ༔ ལས་སྦྱོར་ནི་སྒྲུབ་སྔགས་ཤམ་དུ་འདི་བཏགས་ལ་བཟླ། སརྦ་མ་ལ་ཏོར་ཡ་ཏོར་ཡ་སྭཱ་ཧཱ༔ འདིའི་བསྙེན་ཚད་ནི་བསྙེན་སྔགས་འབྲུ་དགུ་འབུམ་ཕྲག་གསུམ། སྒྲུབ་སྔགས་འབུམ་ཕྲག་གཅིག །ལས་སྦྱོར་ཁྲི་ཕྲག་གཅིག་གོ། །དེའང་བསྙེན་སྔགས་ཀྱི་སུམ་ཆ་གཅིག་སྒྲུབ་སྔགས། དེའི་བཅུ་ཆ་ལས་སྦྱོར་སྦྲེལ་མ་བཟླ་དགོས་པས་རྒྱུན་གྱི་རྣལ་འབྱོར་ལྟ་བུའི་ཚེ། བསྙེན་སྔགས་བརྒྱ་ཕྲག་གསུམ་བྱེད་ན། སྒྲུབ་སྔགས་བརྒྱ་ཕྲག་གཅིག །དེ་དང་ལས་སྦྱོར་སྦྲེལ་མཚར་བཅུ་བཟླ་དགོས་པས་མཚོན་ནོ། །ཐུན་མཐར། ཧཱུྃ༔ ཡེ་ཤེས་ལྷ་ཚོགས་སྤྱན་འདྲེན་གཤེགས༔
ཕྱི་ནང་གསང་བའི་མཆོད་པ་འབུལ༔ སྐུ་གསུང་ཐུགས་ཡོན་ཕྲིན་ལས་བསྟོད༔ བག་མེད་ཉམས་ཆགས་འགལ་འཁྲུལ་བཤགས༔ མ་ཧཱ་པཉྩ་ཨ་མྲྀ་ཏ་རཀྟ་བ་ལི༚་ཏ་ཁཱ་ཧིཿ ཞེས་སྟོང་ཚིགས་མཆོད་བསྟོད་བྱ། ཧཱུྃ་ཧཱུྃ་ཧཱུྃ༔ སྣོད་བཅུད་འོད་གསལ་ཀ་དག་གི་དབྱིངས་སུ་བསྡུ༔ ཕཊ་ཕཊ་ཕཊ༔ སྐད་ཅིག་གི་སྨེ་བ་བརྩེགས་པའི་སྐུར་ལྡངས་ཤིང་སྣང་གྲགས་རྟོག་ཚོགས་ལྷ་སྔགས་ཆོས་ཉིད་ཀྱི་འཁོར་ལོར་བལྟའོ། །རྫོགས་རིམ་བསྒོམ་པར་འདོད་ན་སྐབས་འདིའམ། ནམ་བདེར་ཡང་རུང་སྟེ། རང་ཐ་མལ་པའི་སྙིང་གར་ཧཱུྃ་ཡིག་མཐིང་ནག་འོད་ཟེར་མར་མེ་ལྟ་བུར་འབར་བ་ལ་སེམས་གཏད། དེ་ལ་གསལ་སྣང་སྐྱེས་པ་ན། ཧཱུྃ་ལས་མེ་འབར། ལུས་ཀྱི་ནང་གང་། ཐ་མ་པའི་ཤ་ཁྲག་གྲིབ་དང་མི་གཙང་བའི་དྲི་མ། དེར་འཛིན་གྱི་རྣམ་རྟོག་བཅས་རྩ་སྦུར་མེ་ལྕེས་རེག་པ་བཞིན་ལྷག་མ་མ་ལུས་པར་ཐུལ་གྱིས་བསྲེགས། རིམ་གྱིས་མཆེད་ཅིང་འབར། གདན་གོས་གནས་ཁང་ཕྱི་རོལ་གྱི་ཡུལ་ཁམས་སྟོང་གསུམ་གྱི་འཇིག་རྟེན་ཚུན་ཆད་བསྲེགས་ནས་ཡེ་ཤེས་ཀྱི་མེ་ཕུང་གཅིག་ཏུ་གྱུར་ཏེ་རང་ལུས་འབར་བའི་མེ་དང་འདྲེས། མེ་ལྕེའི་སྒྲ་གདངས་འབྲུག་སྒྲ་དྲག་པོ་སྒྲོག་པ་ལྟ་བུའི་ཧཱུྃ་གི་སྒྲ་ནམ་མཁའ་གང་བར་སྒྲོག་པས་ཉམས་གྲིབ་མི་གཙང་བ་མཐའ་དག་མིང་ཡང་མེད་པར་བསམ། མཐར་སྟོང་གསུམ་གང་བའི་མེ་ཐམས་ཅད་རིམ་པར་ཧཱུྃ་གི་བར་དུ་འདུས། དེའང་
ཞབས་ཀྱུ་ནས་ནཱ་དའི་བར་དང་ནཱ་དའང་དམིགས་མེད་དུ་ཐིམ་པར་མོས་ལ། གདོད་ནས་བསྒྲིབ་བྱ་སྒྲིབ་བྱེད་མ་གྲུབ་པའི་གཉུག་མའི་རང་ངོ་ལ་ཅི་གནས་སུ་མཉམ་པར་བཞག །དེ་ལས་ལྡངས་པ་ན། སྐད་ཅིག་གིས་ཁྲོ་བོའི་རྒྱལ་པོ་སྣང་སྟོང་སྒྱུ་མ་ལྟ་བུའི་སྐུ་མེ་ཕུང་གི་དབུས་ན་བཞུགས་པར་མོས། བསྐྱེད་རྫོགས་གཉིས་ཀའི་མཇུག་ཏུ། ནམ་མཁའ་མེད་པར་གྱུར་ན་ཡང་༔ སྔགས་ཀྱི་དངོས་གྲུབ་མེད་མི་འགྱུར༔ ལྷ་དང་དྲང་སྲོང་གིས་བཤད་པའི༔ རིག་སྔགས་བསླུ་བར་མི་འགྱུར་ན༔ འདོད་ཆགས་བྲལ་བས་བྱས་པ་ཡི༔ གསང་སྔགས་སྦྱོར་བས་བསླུ་བ་ནི། །མ་བྱུང་འབྱུང་བར་མི་འགྱུར་རོ༔ ༔སྔགས་དང་རྟེན་འབྲེལ་མི་བསླུ་ཞིང་༔ ཏིང་འཛིན་ནུས་པ་བསམ་མི་ཁྱབ༔ དཀོན་མཆོག་གསུམ་དང་རྩ་གསུམ་གྱི༔ བདེན་པ་ཆེན་པོའི་མཐུ་སྟོབས་ཀྱིས༔ ཉམས་གྲིབ་མི་གཙང་ཕྱོགས་ཀུན་ལས༔ དེང་ནས་རྟག་ཏུ་རྒྱལ་གྱུར་ཅིག༔ ཛ་ཡ་ཛ་ཡ་སུ་ཛ་ཡ༔ ཞེས་པའི་བདེན་སྟོབས་ཀྱིས་ཤིས་པ་བརྗོད༔ དགེ་བ་འདི་ཡིས་མྱུར་དུ་བདག༔ ཁྲོ་བོའི་རྒྱལ་པོ་འགྲུབ་གྱུར་ནས༔ སོགས་བསྔོ་སྨོན་བྱའོ། །སྙིགས་དུས་གྲིབ་དང་མི་གཙང་རྒོད། །ཁྱད་པར་དམ་གྲིབ་དགྲ་རུ་ལྡངས། །སོ་སོའི་གཉེན་པོ་མང་བསྟན་ཀྱང་། །ལྷ་སྔགས་འདི་ཉིད་འགྲན་ཟླ་བྲལ། །བཀའ་གཏེར་གདམས་ངག་ཟབ་
དགུ་ཡི། །བཅུད་འདུས་མཁའ་འགྲོའི་ཁ་རླངས་ཅན། །འདི་ཡིས་ཆོས་ལྡན་སྐྱེ་དགུ་རྣམས། །སྤྲིན་བྲལ་ཟླ་ལྟར་མཛེས་བྱེད་ཤོག །ཅེས་པའང་ས་དབང་ཆོས་ཀྱི་རྒྱལ་པོའི་ནང་བློན་ཀུན་དགའི་ཕན་བདེ་སྤེལ་ཞིང་དགེ་ལེགས་ཀྱི་ཡོན་ཏན་དུ་མས་མངོན་པར་བརྒྱན་པ་གང་གི་རྒྱུན་གྱི་ཉམས་བཞེས་ཆེད་དུ། པདྨ་གར་དབང་ཕྲིན་ལས་འགྲོ་འདུལ་རྩལ་གྱིས་ཙཱ་འདྲ་རིན་ཆེན་བྲག་གི་བསམ་གཏན་སྤྱིལ་བུར་བྲིས་པ་དགེ་ལེགས་འཕེལ།། །།