འཕགས་མ་སྒྲོལ་མ་བཀྲ་ཤིས་དོན་གྲུབ་མའི་སྒྲུབ་ཐབས་བཀྲ་ཤིས་ཆར་འབེབས།
འཕགས་མ་སྒྲོལ་མ་བཀྲ་ཤིས་དོན་གྲུབ་མའི་སྒྲུབ་ཐབས་བཀྲ་ཤིས་ཆར་འབེབས་ཞེས་བྱ་བ་བཞུགས་སོ།། །།
ན་མོ་གུ་རུ་ཨཱརྱཱ་ཏཱ་རཱ་ཡཻ། མཆོག་དང་ཐུན་མོང་འདོད་དགུའི་གྲུ་ཆར་ནི། །ཐུགས་རྗེའི་སྤྲིན་ལས་རྩོལ་མེད་འཇོ་བ་ཡིས། །རྟག་ཏུ་ཕོངས་པ་ཀུན་གྱི་གདུང་སེལ་མ། །རྗེ་བཙུན་སྒྲོལ་མའི་ཞབས་པད་གཙུག་ཏུ་མཆོད། །རྨད་བྱུང་སློབ་དཔོན་འཕགས་མའི་སྲས། །ཟླ་བའི་ཞབས་ཀྱི་རིམ་པ་ལས། །སྐལ་བཟང་དཔྱིད་དུ་ལེགས་འོངས་པ། །ངོ་མཚར་སྒྲུབ་ཐབས་གསལ་བར་འཆད། །དེ་ལ་གྲུབ་པའི་སློབ་དཔོན་ཙནྡྲ་གོ་མཱིས་མཛད་པའི་སྒྲོལ་མའི་སྒྲུབ་ཐབས་བརྒྱ་རྩ་བརྒྱད་པ་ལས་འབྱུང་བ་བཀྲ་ཤིས་ཤིང་དོན་ཀུན་འགྲུབ་པར་བྱེད་པའི་སྒྲོལ་མ་རྣལ་འབྱོར་དུ་བྱེད་པར་འདོད་པའི་སྒྲུབ་པ་པོ་བླ་མ་ལས་རྗེས་སུ་གནང་བ་ཐོབ་ཅིང་བརྟུལ་ཞུགས་ལ་གནས་པས་དབེན་ཞིང་ཡིད་དུ་འོང་བའི་གནས་ཕུན་སུམ་ཚོགས་པའི་ཡོན་ཏན་དང་ལྡན་པར་མཎྜལ་གཏོར་མཆོད་སོགས་མཁོ་བའི་ཡོ་བྱད་ཚོགས་པར་བྱས་ལ། སངས་རྒྱས་ཆོས་ཚོགས་ལན་གསུམ་གྱིས་སྐྱབས་སུ་འགྲོ་ཞིང་སེམས་བསྐྱེད། རང་གི་སྙིང་གར་པད་ཟླ་ལ་གནས་པའི་མྃ་ཡིག་སེར་པོའི་འོད་ཟེར་གྱིས། འཕགས་མ་སྒྲོལ་མ་རྒྱལ་བ་སྲས་དང་བཅས་པ་མདུན་གྱི་ནམ་མཁར་སྤྱན་དྲངས། སླར་ཡང་སྙིང་གའི་ས་བོན་གྱི་འོད་ཟེར་ལས་སྤྲུལ་པའི་མཆོད་པའི་ལྷ་མོ་དཔག་ཏུ་མེད་པ་རྣམས་ཀྱིས་མཆོད་པར་གྱུར། ཨོཾ་བཛྲ་ཨརྒྷཾ་སྭཱ་ཧཱ། ཨོཾ་བཛྲ་པཱ་དྱཾ་སྭཱ་ཧཱ། ཨོཾ་བཛྲ་པུཥྤེ་ཨཱཿཧཱུྃ། ནས་ ཤབྡའི་བར་གྱིས་མཆོད། རྗེ་བཙུན་འཕགས་མ་སྒྲོལ་མ་དང་། །ཕྱོགས་
བཅུ་དུས་གསུམ་བཞུགས་པ་ཡི། སོགས་ནས། འདྲེན་པའི་དཔལ་དུ་བདག་གྱུར་ཅིག །ཅེས་པའི་བར་གྱིས་བདུན་རྣམ་དག་བྱས་ལ་ཚེགས་ཞིང་མི་དམིགས་པར་བཞག །སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་སྤྱི་ལྟར་བསྒོམ། ཨོཾ་སྭ་བྷཱ་ཝ་བི་ཤུདྡྷཿསརྦ་དྷརྨཱ་ཱཾ་སྭ་བྷཱ་ཝ་བི་ཤུདྡྷོ་ཧཾ། ཆོས་ཐམས་ཅད་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་སྟེང་དུ། རང་སེམས་མྃ་ཡིག་སེར་པོ་ལས་འོད་ཟེར་འཕྲོས། སེམས་ཅན་ཐམས་ཅད་སྒྲོལ་མའི་གོ་འཕང་ལ་བཀོད། སངས་རྒྱས་ཐམས་ཅད་མཉེས་པར་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་བཀྲ་ཤིས་ཤིང་དོན་ཀུན་འགྲུབ་པར་བྱེད་པའི་སྒྲོལ་མ་སྐུ་མདོག་དང་རྩ་ཞལ་གསེར་གྱི་ཁ་དོག་ཅན། གཡས་ཞལ་དཀར་བ། རྒྱབ་ཞལ་སྔོ་བ། གཡོན་ཞལ་དམར་པོ་རྣམས་ཡིད་འོང་འཛུམ་པའི་མདངས་ཅན། ཕྱག་བརྒྱད་ཀྱི་གཡས་དང་པོས་ནོར་བུས་མཚན་པའི་རྒྱལ་མཚན་བསྣམས་པ། གཉིས་པ་ན་འཁོར་ལོ། །གསུམ་པ་ན་པདྨ་དམར་པོ་འདབ་མ་བརྒྱད་པ་ཡུ་བ་དང་བཅས་པ། བཞི་པ་ན་དུང་བསྣམས་པ། གཡོན་གྱི་དང་པོ་ན་བུམ་པ། གཉིས་པ་ན་དཔལ་གྱི་བེའུ། གསུམ་པ་ན་ཉ། བཞི་པ་ན་
གདུགས་བསྣམས་ཤིང་བཀྲ་ཤིས་པར་མཛད་པ། ལྷའི་གོས་སྣ་ཚོགས་པས་སྟོད་གཡོགས་དང་ཤམ་ཐབས་མཛེས་པ། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། ཕྱག་གདུབ། ཞབས་གདུབ། དཔུང་རྒྱན། དོ་ཤལ་སོགས་རྒྱན་ཐམས་ཅད་ཀྱིས་སྤྲས་པ། ཞབས་གཉིས་རོལ་པའི་སྟབས་ཀྱིས་བཞུགས་པའི་ཐུགས་ཀར་ཟླ་བ་ལ་མྃ་ཡིག་སེར་པོའོ། །ལག་པ་གཉིས་ཐལ་མོ་སྦྱར་ལ་མཛུབ་མོ་གཉིས་ཀྱིས་གུང་མོའི་སེན་མོ་བཀབ་ལ་སྲིན་ལག་ནང་དུ་བཅུག་སྟེ་མཐེ་བོང་མནན་པ་ཨུཏྤལ་ཁ་བྱེ་བའི་ཕྱག་རྒྱ་བཅས་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཐུགས་ཀའི་ས་བོན་ལས་འོད་ཟེར་འཕྲོས། བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས། བཛྲ་ས་མཱ་ཛཿ ཛཿཧཱུྃ་བཾ་ཧོཿ གཉིས་སུ་མེད་པར་གྱུར། ཨོཾ་ཨཱཿཧཱུྃ། སྤྱི་བོར་འཁོར་ལོ་དཀར་པོ་ཨོཾ་དཀར་པོས་མཚན་པ། མགྲིན་པར་པདྨ་དམར་པོ་ཨཱཿདམར་པོས་མཚན་པ། ཐུགས་ཀར་རྡོ་རྗེ་སྔོན་པོ་ཧཱུྃ་སྔོན་པོས་མཚན་པ་རྣམས་ཡོངས་སུ་གྱུར་པ་ལས། རྟག་པ། འོད་དཔག་མེད། མི་བསྐྱོད་པ་རྣམས་ཀྱིས་མཚན་པར་གྱུར། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས། དབང་གི་ལྷ་ཡེ་ཤེས་པ་བཛྲ་ས་མཱ་ཛཿདེ་བཞིན་གཤེགས་པ་ཁྱེད་རྣམས་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་
དབང་གི་ལྷ་རྣམས་ཀྱིས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་གསུངས་ཞིང་བུམ་པའི་བདུད་རྩིའི་རྒྱུན་གྱིས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་གྱེན་ཏུ་འཁྱིལ་པ་ལས་འོད་དཔག་མེད་སྤྲུལ་སྐུའི་ཆ་ལུགས་ཅན་གྱིས་དབུ་བརྒྱན་པར་གྱུར། ཨོཾ་ཨཱརྻ་ཏཱ་རཱ་མངྒ་ལ་སརྦ་ཨ་རྠ་སཱ་དྷ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་ཏུ་སྦྱར་ཏེ། པཱ་དྱཾ། པུཥྤེ་ཨཱཿཧཱུྃ་སོགས། ཤབྡའི་བར་གྱིས་མཆོད། ཞིང་ཁམས་ཐམས་ཅད་ཡོངས་སུ་དག་པ་ལ། །རིན་ཆེན་མེ་ཏོག་མང་པོ་བཅལ་དུ་བཀྲམ། །དུས་གསུམ་སངས་རྒྱས་ཐམས་ཅད་སྐྱེད་པའི་ཡུམ། །ཡུམ་གྱུར་སྒྲོལ་མ་ཁྱོད་ལ་ཕྱག་འཚལ་བསྟོད། །ཅེས་པས་བསྟོད། ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་མྃ་ཡིག་སེར་པོའི་མཐར། ཨོཾ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ཞེས་པའི་སྔགས་ཕྲེང་ཁ་དོག་སེར་པོ་གསེར་བཙོ་མ་ལྟ་བུས་བསྐོར་བ། དེ་ལས་ལྷ་སྐུ་དང་འོད་ཟེར་གྱི་ཚོགས་བསམ་གྱིས་མི་ཁྱབ་པ་འཕྲོས། མི་མཐུན་པའི་ཕྱོགས་ཐམས་ཅད་ལས་རྒྱལ་ཏེ། བཀྲ་ཤིས་པའི་དོན་ཐམས་ཅད་ཡོངས་སུ་བསྒྲུབས་ཅིང་དངོས་གྲུབ་མཐའ་དག་ཐོགས་མེད་དུ་འགྲུབ་པར་གྱུར། ཞེས་པའི་སྤྲོ་བསྡུ་ཡུན་རིང་དུ་བསྒོམ། དེས་སྐྱོན། ཐུགས་ཀའི་ས་བོན་གྱི་འོད་ཀྱིས་སྣོད་བཅུད་ཐམས་ཅད་ཞུ། རང་ལ་ཐིམ། རང་
ཡང་ཐུགས་ཀའི་ས་བོན་དང་ནཱ་ད་ཤིན་ཏུ་ཕྲ་བའི་བར་འདུས་ཏེ་དེ་ལ་སེམས་འཛིན། ནཱ་དའང་སྟོང་ཉིད་དུ་ཡལ་བའི་རྣམ་པར་མི་རྟོག་པའི་ངང་ལ་ཅི་གནས་མཉམ་པར་བཞག་པ་ལ་ཡང་ཡང་བསླབ། དེས་ཀྱང་སྐྱོ་ན་ངག་བཟླས་བྱ་བ་ནི། སྤྲོ་བསྡུས་དམིགས་པ་གོང་ལྟར་གསལ་བཏབ་ལ། ཡི་གེ་བཅུ་གཅིག་པ་ཅི་ནུས་སུ་བཟླའོ། །བསྙེན་པའི་ཚད་དང་ཕན་ཡོན་ནི་རྒྱ་གཞུང་ལས། འབུམ་ཕྲག་བཞིའམ་འོན་ཏེ་དྲུག །འབུམ་ཕྲག་བཅུ་ཡིས་ལས་ཀུན་འགྲུབ། །རྣལ་འབྱོར་པ་ནི་གང་ཞིག་གིས། །འདི་དོན་ཉམས་སུ་གང་ལེན་པ། །ཐོག་མ་ཐ་མ་མེད་ཞི་བའི། །སྒྲོལ་མ་ཡུམ་མཆོག་ཉིད་གྱུར་ནས། །དངོས་གྲུབ་གཉིས་སོགས་འཐོབ་འགྱུར་ཏེ། །ཡོན་ཏན་དཔག་མེད་འབྱུང་བར་གསུངས། །ཞེས་བཤད་དོ། །ཐུན་འཇོག་པ་ན། ཐུགས་ཀའི་ས་བོན་ལས་འོད་ཟེར་འཕྲོས། སྣོད་བཅུད་ཐམས་ཅད་འོད་དུ་ཞུ་ནས་རང་ལ་ཐིམ། རང་ཉིད་ཀྱང་རིམ་པར་འོད་དུ་ཞུ་སྟེ་ཐུགས་ཀའི་ས་བོན་ལ་ཐིམ། ས་བོན་མས་རིམ་གྱིས་ནཱ་དའི་བར་དུ་འདུས། དེའང་མི་དམིགས་པར་ཐིམ། དེ་ལས་ལྡང་བ་ན། སླར་རང་ཉིད་འཕགས་མ་སྒྲོལ་མའི་སྐུར་གྱུར་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་གྱུར། །དགེ་བ་འདི་ཡིས་མྱུར་དུ་བདག །འཕགས་མ་སྒྲོལ་མ་འགྲུབ་སོགས་དགེ་བསྔོ་བྱའོ། །ཐུན་མཐར་གཏོར་མ་འབུལ་བར་སྤྲོ་ན། བསངས་སྦྱང་། སྟོང་པའི་ངང་ལས། གཏོར་སྣོད་ཡངས་ཤིང་རྒྱ་ཆེ་བ་རིན་པོ་ཆེ་ལས་
གྲུབ་པའི་ནང་དུ་ཨོཾ་ཨཱཿཧཱུྃ་འོད་དུ་ཞུ་བ་ལས་གཏོར་མ་འདོད་དགུའི་རྒྱ་མཚོ་ཆེན་པོ་ཁ་དོག་དྲི་རོ་ནུས་མཐུ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧ་ཧོཿཧྲཱིཿལན་གསུམ། རང་གི་ཐུགས་ཀའི་ས་བོན་ལས་འོད་ཟེར་འཕྲོས་རང་བཞིན་གྱི་གནས་དང་། སྤྲུལ་པའི་བཞུགས་གནས་ལྷོ་ཕྱོགས་གྲུ་འཛིན་གྱི་རི་བོ་ནས་རྗེ་བཙུན་མ་སྒྲོལ་མ་རྒྱལ་བ་སྲས་དང་བཅས་པ་སྤྱན་དྲངས། བཛྲ་ས་མཱ་ཛཿཔདྨ་ཀ་མཱ་ལཱ་ཡ་སྟྭཾ། ལྷ་ཚོགས་རྣམས་ཀྱི་ལྗགས་རྡོ་རྗེའི་སྦུ་གུས་གཏོར་མའི་བཅུད་དྲངས་ཏེ་གསོལ་བར་གྱུར། ཡི་གེ་བཅུ་གཅིག་པ་ལ། ཨི་དཾ་བ་ལི༚་ཏ་ཁ་ཁ་ཁ་ཧི་ཁཱ་ཧི། བཏགས་པ་ལན་བདུན་དང་། ཨ་ཀཱ་རོ་ལན་གསུམ་གྱིས་བཙོ་འཁོར་སོ་སོར་འབུལ། མཆོད་བསྟོད་མདོར་བསྡུས་དང་། བཅོམ་ལྡན་སྒྲོལ་མ་འཁོར་བཅས་ཀྱིས། །མཆོད་སྦྱིན་གཏོར་མ་འདི་སྣོམས་ལ། །སོགས་ཀྱིས་ཕྲིན་ལས་ཞུ། རྒྱལ་བ་འབྲོམ་རིན་པོ་ཆེས་མཛད་པར་གྲགས་པ། འཕགས་མ་སྒྲོལ་མ་དབང་ཕྱུག་མ། །ནས། མ་གཅིག་ཁྱེད་དང་མཇལ་བར་ཤོག །བར་གྱིས་བསྟོད་ཅིང་འདོད་པའི་དོན་ལ་གསོལ་བ་རྩེ་གཅིག་གདབ། ཡི་གེ་བརྒྱ་པ། མ་འབྱོར་པ་སོགས་ཀྱིས་ནོངས་པ་བཤགས། རྟེན་ཡོད་ན་བརྟན་གཞུག་བྱ། མེད་ན་བཛྲ་མུཿས་གཤེགས་ལ་བཀྲ་ཤིས་བརྗོད། ཐུན་མཚམས་ཀྱི་བྱ་བ་སོགས་ཆོ་གའི་རིམ་པ་རྒྱས་པ་ལ་དགའ་ན་སྒྲོལ་མའི་སྒྲུབས་ཐབས་རིགས་མཐུན་གཞན་ལྟར་བྱ་བར་གསུངས།
འདི་ཉིད་ཀྱི་རྗེས་སུ་གནང་བ་སྦྱིན་པར་འདོད་པས། བདག་བསྐྱེད་ལས་ཁ་སྦོས་ཏེ་མདུན་བུམ་སྒྲུབ་པ་དང་། རྗེས་གནང་དངོས་ཀྱི་བྱ་བ་རྣམས་ནི་སྒྲོལ་དཀར་གྱི་ཡི་གེ་ཟླ་བ་འདོད་འཇོ་ཉིད་ཁ་སྦོས་པས་ཚང་ལ་མ་འཁྲུལ་བ་འགྲུབ་པ་ཡིན་ནོ། །ཉེས་ཚོགས་སྨིག་རྒྱུའི་ཕྲེང་བ་བཅོམ་པ་དང་། །དགེ་ལེགས་མཐོང་ན་དགའ་སྟེར་སྐྱེད་མོས་ཚལ། །གྲུབ་གཉིས་གསེར་གྱི་སྙེ་མས་དུད་བྱེད་པ། །འཕགས་མ་རྫོགས་ལྡན་སྤྲིན་གྱི་བླ་བྲེའི་སྤུན། །སྒྲུབ་ཐབས་རྩ་བའི་གཞུང་གིས་རྗེས་འབྲངས་པ། །འདི་བྱས་དགེ་བས་དཔལ་ལྡན་བླ་མའི་ཞབས། །རྟག་བརྟན་མཛད་པའི་ཕྲིན་ལས་མཁའ་མཐར་ཁྱབ། །བསམ་དོན་ལྷུན་གྱིས་གྲུབ་པའི་དཔལ་གྱུར་ཅིག། ཅེས་པ་འདིའང་དམིགས་པ་མེད་པའི་ཐུགས་རྗེ་དང་ལྡན་པ། རྗེ་བླ་མ་ཐམས་ཅད་མཁྱེན་གཟིགས་འཇམ་དཔལ་དབྱངས་ཀྱི་བཀའ་ལུང་གསེར་གྱི་མེ་ཏོག་གཙུག་ཏུ་བཅིངས་ནས། ཀུ་སཱ་ལི་བློ་གྲོས་མཐའ་ཡས་ཀྱིས་རྒྱལ་བ་ལྷ་ལས་བབ་པའི་དུས། དཀར་ཕྱོགས་འགྲུབ་པའི་སྦྱོར་བ་དང་ལྡན་པའི་ཆོས་བཟང་པོར་རྗེ་བཙུན་ཨེ་ཝྃ་པའི་རིང་ལུགས་དྲི་མ་མེད་པ་འཛིན་པའི་ཆོས་གྲྭ་ཆེན་པོར་སྦྱར་བ་དགེ་ལེགས་འཕེལ།། །།སརྦ་མངྒ་ལཾ།། །།