སྒྲོལ་མ་རྣལ་འབྱོར་མའི་རྒྱུན་ཁྱེར་དམ་ཚིག་ངེས་པའི་ཐིག་ལེ།
སྒྲོལ་མ་རྣལ་འབྱོར་མའི་རྒྱུན་ཁྱེར་དམ་ཚིག་ངེས་པའི་ཐིག་ལེ་ཞེས་བྱ་བ་བཞུགས་སོ།། །།
ན་མོ་གུ་རུ་ཏཱ་རཱ་ཡཻ། སངས་རྒྱས་ཕྲིན་ལས་ཀུན་འབྱུང་ཞིང་། །འདོད་ལྡན་རྣམས་ལ་བྱང་ཆུབ་སྟེར། །མཁའ་འགྲོ་མ་ཡི་རིགས་འདུས་པ། །དམ་ཚིག་སྒྲོལ་མ་ལ་བཏུད་ནས། །རྣལ་འབྱོར་དང་པོའི་དམ་ཚིག་གིས། །ཕྱག་རྒྱ་ཉེ་བར་སྒྲུབ་པའི་ཐབས། །ལྷ་དང་སྔགས་སུ་བྱིན་བརླབས་པ། །བསྡུས་ཏེ་བྱ་བའི་རིམ་པ་བཤད། །དེ་ཡང་སྔགས་བརྗོད་བདུན་ལས་ལས་དང་པོ་པ་ཡེ་ཤེས་མི་གསལ་བའི་གང་ཟག་སྤྲོས་པ་ལ་དགའ་ཞིང་སྤྲོས་བཅས་མི་འཁྱོང་པ་དག་གིས་ཡོངས་སུ་བརྟགས་པའི་རྣལ་འབྱོར་རྒྱུན་ཁྱེར་བྱ་བ་ལ་གསུམ་སྟེ་ཐོག་མར་ཚོགས་བསགས་པ་ནི། རང་ཉིད་སྐད་ཅིག་གིས་རྡོ་རྗེ་སྒྲོལ་མར་གསལ་བའི་སྙིང་གར་ཟླ་བ་ལ་གནས་པའི་ཏཱྃ་ཡིག་གི་འོད་ཀྱིས་ལུས་ཀྱི་ནང་གང་། སྡིག་སྒྲིབ་ཐམས་
ཅད་དག །ཨོཾ་པདྨ་ཙནྡྲ་ཨརྐ་བི་མ་ལེ་སྭཱ་ཧཱ། མདུན་གྱི་ནམ་མཁར་པདྨ་ཉི་ཟླའི་གདན་བརྩེགས་པར་གྱུར། རང་གི་སྙིང་གའི་འོད་ཀྱིས་སྒྲོལ་མ་འཁོར་བཅས་སྤྱན་དྲངས། བཛྲ་ས་མཱ་ཛཿཨོཾ་ཏཱ་རེ་ཏུཏྟཱ་རེ་ཏུ་རེ་ཧཱུྃ་ཕཊ་ས་པ་རི་བཱ་ར་ཨརྒྷཾ་པུཥྤཾ་སོགས་ནས། ཤབྡ་པྲ་ཏཱིཙྪ་ན་མཿ ཨོཾ་ལས་བྱུང་བའི་མེ་ཏོག་ཕུལ་བར་གྱུར། ཨོཾ་ན་མོ་བྷ་ག་བ་ཏེ་པུཥྤེ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་པུཥྤེ་པུཥྤེ་མ་ཧཱ་པུཥྤེ་སུ་པུཥྤེ་པུཥྤ་ཨུདྦྷ་བེ་པུཥྤ་ཀི་ར་ེ་སྭཱ་ཧཱ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །
འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །ལན་གསུམ། རྗེ་བཙུན་མ་འཕགས་མ་སྒྲོལ་མས་བདག་ལ་དངོས་གྲུབ་མ་ལུས་པ་སྩལ་ཞིང་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། རང་གི་སྤྱི་བོ་ནས་ཞུགས་ཏེ་ཐིམ། སེམས་ཅན་ཐམས་ཅད་སོགས་ཚད་མེད་བཞི་བསྒོམ། གཉིས་པ་དངོས་གཞི་ནི། སྙིང་གའི་འོད་ཀྱིས་སྣང་བ་ཐམས་ཅད་ཅད་དུ་ཞུ་ནས་བདག་ཉིད་ལ་ཐིམ། བདག་ཉིད་ཀྱང་ཐུགས་ཀའི་ཏཱྃ་ལ་ཐིམ། སྣང་བ་ཙམ་གྱི་རྣམ་ཤེས་ནི། །སེམས་ཙམ་དུ་ནི་རྣམ་པར་བརྟག །ནམ་མཁར་རྡོ་རྗེར་གནས་སེམས་འདི། །ཆོས་ཅན་མེད་ཅིང་ཆོས་ཉིད་མེད། །ས་བོན་དེ་ཉིད་ཀྱང་འོད་གསལ་གྱི་དབྱིངས་སུ་ཐིམ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྟོང་པའི་ངང་ལས། རང་སེམས་སྒྲོལ་མ་སྐྱབས་སྦྱིན་དང་ཨུཏྤལ་འཛིན་པའི་ཕྱག་གཉིས་པའི་རྣམ་པས་ནམ་མཁར་གནས། རང་སེམས་ཀྱི་སྣང་བ་ལས་བྱུང་བའི་འབྱུང་བཞི་རི་རབ་དང་བཅས་པའི་རྩེ་མོར་སྲུང་བའི་འཁོར་ལོའི་ནང་དངོས་གྲུབ་འབྱུང་བའི་དུར་ཁྲོད་བརྒྱད་ཀྱི་དབུས་སུ་རིན་པོ་ཆེའི་གཞལ་མེད་ཁང་མཚན་ཉིད་ཐམས་ཅད་རྫོགས་པའི་ལྟེ་བར་པད་ཟླའི་གདན་ལ་ཨོཾ་ལས་བྱུང་བའི་ཟླ་བ་ལ་
ཨཱ་ལིས་མཚན་པ་དང་། ཨཱཿལས་བྱུང་བའི་ཉི་མ་ཀཱ་ལིས་མཚན་པ་ལ་ནམ་མཁའི་ལྷ་མོ་ཐིམ། ཟླ་བའི་དབུས་སུ་ཏཱྃ་ལྗང་སྔོན། དེ་ལས་ཨུཏྤལ་སྔོན་པོར་གྱུར། དེ་ཐམས་ཅད་ལས་འོད་ཟེར་འཕྲོས། སངས་རྒྱས་ཐམས་ཅད་སྒྲོལ་མའི་རྣམ་པར་སྤྱན་དྲངས་ཏཱྃ་ལ་ཐིམ། ཐམས་ཅད་གཅིག་ཏུ་འདྲེས་པ་ཡོངས་སུ་གྱུར་པ་ལས། རང་ཉིད་རྗེ་བཙུན་བཅོམ་ལྡན་འདས་མ་ཆེན་མོ་དམ་ཚིག་སྒྲོལ་མ་རྣལ་འབྱོར་མ་ཞལ་གཅིག་ཕྱག་བརྒྱད་མ། སྐུ་མདོག་སྔོ་ཞིང་ཡིད་ཙམ་ལྗང་བ། པདྨ་རཱ་ག་ལྟ་བུའི་འོད་ཟེར་དམར་བ་འབར་བ། ཕྱག་གཡས་ཀྱི་དང་པོས་མཆོག་སྦྱིན། གཉིས་པ་ན་གྲི་གུག །གསུམ་པ་ན་ཅང་ཏེའུ། བཞི་པ་ན་མདའ། གཡོན་གྱི་དང་པོས་རབ་ཏུ་རྒྱས་པའི་ཨུཏྤལ་སྔོན་པོའི་སྡོང་བུ་ཐུགས་ཀར་འཛིན་པ། གཉིས་པ་ན་ཀ་པཱ་ལ་ཁྲག་གིས་གང་བ། གསུམ་པ་ན་མདུང་རྩེ་གསུམ། བཞི་པ་ན་མེ་ཏོག་གི་གཞུ་འཛིན་པ། མཆན་ཁུང་གཡོན་དུ་རྡོ་རྗེ་ཁ་ཊྭཱྃ་བསྒྲེངས་པ། སྟག་གི་པགས་པའི་ཤམ་ཐབས་དང་། རུས་པའི་ཕྱག་རྒྱས་སྐུ་ལ་བརྒྱན་ཅིང་། མི་མགོ་སྐམ་པོ་ལྔའི་དབུ་རྒྱན་དང་། །མགོ་རློན་གྱི་ཕྲེང་བ་དང་ཨུཏྤལ་
དམར་པོའི་དོ་ཤལ་འཕྱང་བ། དྲག་མོ་ཆེན་མོ། སྤྱན་གསུམ་དང་ལྡན་ཞིང་། མཆེ་བ་ཅུང་ཟད་གཙིགས་པ། ལོ་བཅུ་དྲུག་ལོན་པ་ལྟར་ལང་ཚོ་ལ་བབ་ཅིང་། དབུ་སྐྲ་ནག་པོ་ཕྱེད་བཅིངས་ཤིང་ཕྱེད་གྲོལ་བ། ཞབས་གཡོན་བསྐུམ་གཡས་བརྐྱང་བའི་སྐྱིལ་ཀྲུང་ཕྱེད་པའི་རོལ་སྟབས་ཀྱིས་བཞུགས་ཤིང་། ཕྱི་རོལ་དུ་མེ་དཔུང་འབར་བའི་ཕྲེང་བ་འཁྲུགས་པའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། གནས་རྣམས་སུ་ཟླ་བའི་གནད་ལ་མིག་ཏུ་ཨོཾ་ཏཱ་རེ་སྭཱ་ཧཱ་དཀར་པོ། རྣ་བར་ཨོཾ་ཏུཏྟཱ་རི་སྭཱ་ཧཱ་སྔོན་པོ། ལྕེ་ལ་ཨོཾ་ཏུ་སྭཱ་ཧཱ་དམར་པོ། སྙིང་གར་ཨོཾ་རེ་སྭཱ་ཧཱ་སྔོན་པོ། སྤྱི་བོར་ཨོཾ་ཏཱ་རེ་ི་སྭཱ་ཧཱ་ལྗང་གུ། མིག་ཏུ་ཀྵི༚་དཀར་པོ། རྣ་བར་ཛྲི༚་ནག་པོ། སྣར་ཁཾ་སེར་པོ། ལྕེར་གཾ་དམར་པོ། དཔྲལ་བར་སྐཾ་ལྗང་གུ། ལྟེ་བར་བཾ་སྔོན་པོ། སྙིང་གའི་དབུས་སུ་དཔལ་དོན་ཡོད་གྲུབ་པ་རྡོ་རྗེ་རྟའི་རྒྱལ་པོ་རབ་ཏུ་ཁྲོས་པ། དེའི་ཐུགས་ཀར་ཟླ་བ་ཨུཏྤལ་ཏཱྃ་ཡིག་ལྗང་སྔོན་གྱིས་མཚན་པ་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས། བཛྲ་ས་མཱ་ཛཿ ཕཻཾ། ཛཿཧཱུྃ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། ཨོཾ་ཡོ་ག་ཤུདྡྷཿསརྦ་དྷརྨཱ་ཡོ་ག་
ཤུདྡྷོ྅ཧཾ། སླར་ཡང་སྙིང་གའི་འོད་ཀྱིས་དབང་ལྷ་དཀྱིལ་འཁོར་གྱི་འཁོར་ལོ་སྤྱན་དྲངས། སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། ཞེས་གསོལ་བ་བཏབ་པས་ཡུམ་ལྔས་བུམ་པ་ལ་སོགས་པའི་དབང་བསྐུར་བར་གྱུར། ཨོཾ་ལཱཾ་མཱཾ་པཱཾ་ཏཱཾ་ཧཱུྃ་ཧཱུྃ་བཛྲ་ཨ་བྷི་ཥིཉྩ་ཧཱུྃ། ཨོཾ་བྷྲཱུྃ་ཨཱྃ་ཛྲི༚་ཁཾ་ཧཱུྃ་ཧཱུྃ་རཏྣ་མུ་ཀུ་ཊ་ཨ་བྷི་ཥིཉྩ་ཧཱུྃ། ཨོཾ་ཧཱུྃ་ཁཾ་ཧཱུྃ། བཛྲ་ཨ་བྷི་ཥིཉྩ་ཧཱུྃ། ཨོཾ་ཧཱུྃ་ཧཱུྃ་ཧཱུྃ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཧཱུྃ། བུམ་དབང་ཨོཾ་ཛཿཧཱུྃ་བཾ་ཧོཿབཛྲ་སཏྭ་སྟྭཾ་བཛྲ་ཅོད་པན་ན་མཱ་ཨ་བྷི་ཥིཉྩ་ཧཱུྃ། ཨོཾ་སརྦ་ཏ་ཐཱ་ག་ཏ་སིདྡྷ་ རྡོ་རྗེ་ བཛྲ་ས་མ་ཡ་ཏིཥྛ་ཨེ་ཥ་སྟྭྃ་དྷ་ར་ཡཱ་མཾ། དྲིལ་བུ་ བཛྲ་སཏྭ་ཧི་ཧི་ཧི་ཧི་ཧཱུྃ། ཨོཾ་བཛྲ་ཨུ་ད་ཀ་མིང་དབང་ཨ་བྷི་ཥིཉྩ་ཧཱུྃ། སུ་ར་ཏ་སྟྭཾ་ཨ་ཧཾ། གཙོ་མོ་དང་དོན་གྲུབ་ རྡོ་རྗེའི་བརྟུལ་ཞུགས་ ཡབ་ཡུམ་སྙོམས་པར་ཞུགས་པའི་བྱང་ཆུབ་སེམས་ཁར་བྱིན་པར་གྱུར། བདག་པོའི་དབང་ཨོཾ་ཨཱཿཧཱུྃ། བདག་ཉིད་ཡབ་དང་ལྷ་མོ་རྣམས་དམ་ཚིག་སྒྲོལ་མར་གྱུར་པ་དཀྱིལ་འཁོར་གྱི་གཙོ་བོས་གཏད་པ་ལ་སྙོམས་པར་ཞུགས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཤེར་དབང་ཨརྒྷཾ་ནས་ཤབྡའི་བར་གྱིས་མཆོད། མཚན་ཉི་ཤུ་རྩ་བརྒྱད་པའམ། མཚན་ངེས་པར་གྲགས་པས་བསྟོད་དེ། དེ་ནས་བཅོམ་
ལྡན་འདས་མ་ཆེན་མོ། དེ་བཞིན་གཤེགས་པ་ཐམས་ཅད་ཀྱི་བཙུན་མོའི་མཆོག་དམ་ཚིག་སྒྲོལ་མ་ཞེས་བྱ་བ། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་ཐམས་ཅད་ཀྱི་བདག་པོ། རྒྱུ་བ་དང་། མི་རྒྱུ་བའི་བྱེད་པ་པོ། བརྟན་པ་དང་། གཡོ་བའི་རང་བཞིན། གསང་བ་ལས་ཆེས་ཤིན་ཏུ་གསང་བ། གསང་བ་ཆེན་པོའི་དབང་ཕྱུག་མས་བདག་ཉིད་ཀྱི་རྡོ་རྗེའི་མིང་འདི་རྣམས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །བཅོམ་ལྡན་འདས་མ་སྒྲོལ་མ། རྡོ་རྗེ་མ། དམ་ཚིག་སྒྲོལ་མ། རྡོ་རྗེ་རྣལ་འབྱོར་མ་ཆེན་མོ། །ཡེ་ཤེས་ལྔས་བརྒྱན་པ་མ། སངས་རྒྱས་ཐམས་ཅད་ཀྱིས་དབང་བསྐུར་མ། ཡེ་ཤེས་དཀྱིལ་འཁོར། ཟླ་བའི་བདེ་མ། ངོ་མཚར་བདེ་མ། སྐུ་དང་གསུང་དང་ཐུགས་ཀྱི་འདོད་མ། ཕུང་པོའི་བདག་མོ། །སྐྱེ་མཆེད་ཀྱི་བདག་མོར་གྱུར་པ། འབྱུང་བ་རྣམས་རབ་ཏུ་ཐོབ་པ། ཡུལ་དང་བྲལ་བའི་རང་བཞིན། རྒྱུད་ཀུན་གྱི་དབང་ཕྱུག་མ། ཡེ་ཤེས་རྣམ་པ་ལྔས་བྱང་ཆུབ་པ། རྡུལ་དང་བྲལ་བ། དྲི་མ་མེད་པ། གསང་སྔགས་ཆེན་པོ། ཤིན་ཏུ་ཕྲ་བ། མཚན་དང་དཔེ་བྱད་རྣམས་ཀྱིས་སྤྲས་པ། དག་
བྱེད་དག་བྱེད་ཆེན་མོ། །ལས་ཐམས་ཅད་གྲུབ་པར་བྱེད་པ། འདོད་པ་ཐམས་ཅད་རབ་ཏུ་སྦྱིན་མ། ཡི་གེ་བཅུའི་སྒྲ་སྒྲོགས་པ། སྒྲ་སྒྲོགས་དགྱེས་མ། གདུང་མ། མྱུར་བ་མ། རྣམ་པར་ཤེས་པ་ཡོངས་སུ་དག་པ། སྲ་ཞིང་བདེ་བ་ཡེ་ཤེས་སྙིང་པོ། བདེ་བ་ཆེན་མོའོ། །དེ་སྐད་ཀྱང་བཀའ་སྩལ་ཏོ། །ཨོཾ་སརྦ་ཏ་ཐཱ་ག་ཏ་སྟུ་ཏཱི་ར་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་གི་མཐར། ཡི་གེ་བཅུ་པས་གཡས་བསྐོར་དུ་བསྐོར་བ། དེ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། རྗེ་བཙུན་མ་འཕགས་མ་སྒྲོལ་མའི་གོ་འཕང་ལ་བཀོད། སླར་འདུས་ཏེ་སྙིང་གའི་ས་བོན་སྔགས་ཕྲེང་དང་བཅས་པ་ལ་ཐིམ་པར་བསམ་ཞིང་། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་རྩ་བའི་ཡིག་བཅུ་ཅི་ནུས་བཟླ། ཨོཾ་ཏཱ་རེ་ཏུ་རེ་ཏུཏྟཱ་རེ་ཧཱུྃ་ཕཊ། སྐུའི་བཟླས་པའོ། །ཨོཾ་ཏཱ་རེ་སྭཱ་ཧཱ། གསུང་གི་བཟླས་པའོ། །ཨོཾ་ཨཱཿཏཱྃ་ཧཱུྃ། ཐུགས་ཀྱི་བཟླས་པའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྻ་ཨ་ཝ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚ། པྲ་དུཥྚཾ། མ་མ་ཀྲྀ་ཏེ་ཛཾ་བྷ་ཡ།
སྟ་མ་བྷ་ཡ། མོ་ཧ་ཡ། བནྡྷ་ཡ། ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། སརྦ་དུཥྚཾ་སྟཾ་བྷ་ནི་ཏཱ་རེ་སྭཱ་ཧཱ། ལས་ཀྱི་སྔགས་ཏེ་ཅུང་ཟད་རེ་བཟླའོ། །གསུམ་པ་རྗེས་ཀྱི་བྱ་བ་ལས་རྗེས་སུ་བཟུང་བ་ནི། རང་གི་སྙིང་ག་ནས་སྒྲོལ་མ་ཕྱག་གཉིས་མ། མི་འཇིགས་པ་སྦྱིན་པའི་ཕྱག་རྒྱ་དང་ཨུཏྤལ་ཐོགས་པ་བརྒྱད་སྤྲོས་ཏེ། སེམས་ཅན་རྣམས་ཀྱི་འཇིགས་པ་ཆེན་པོ་བརྒྱད་དང་བཅུ་དྲུག་བསྐྱབས་པར་བསམས་ལ། ཨོཾ་ཨོཾ་སྭཱ་ཧཱ། ཨོཾ་ཏཱ་སྭཱ་ཧཱ། ཨོཾ་རེ་སྭཱ་ཧཱ། ཨོཾ་ཏུ་ཏ་སྭཱ་ཧཱ། ཨོཾ་ཏཱ་སྭཱ་ཧཱ། ཨོཾ་རེ་སྭཱ་ཧཱ། ཨོཾ་ཏུ་སྭཱ་ཧཱ། ཨོཾ་རེ་སྭཱ་ཧཱ། ཞེས་བཟླ། ཚར་བཅད་པ་ནི། ཧཱུྃ་ཞེས་བརྗོད་པས་ཐུགས་རྗེ་ཆེན་པོས་ཁྲོས་ཏེ་ཐུགས་ཀ་ནས་ཕོ་ཉ་ཕྱག་བརྙན་མོ་བཅུ་གཉིས་སྤྲོས་ཤིང་། དེ་ལས་ཀྱང་སྤྲུལ་པའི་ཁྲོ་བོ་ཁྲོ་མོ་མཐའ་ཡས་པ་སྤྲོས་ཏེ་བདུད་བཞི་ལ་སོགས་པ་བྱང་ཆུབ་བསྒྲུབ་པ་ལ་བར་དུ་གཅོད་པའི་མ་རུངས་གདུག་པ་ཅན་ཐམས་ཅད་ལ་ཕུར་བུས་བཏབ་ཅིང་ཚར་གཅོད་པར་གྱུར། ཨོཾ་ཏཱ་རེ་ཏུཏྟཱ་རེ་ཏུ་རེ་བཛྲ་ཀཱི་ལི་ཀཱི་ལ་ཡ་སརྦ་དུཥྚཾ་བནྡྷ་ཧཱུྃ་ཕཊ། ཞེས་བཟླ། འདི་གཉིས་རྒྱུན་གྱི་རྣལ་འབྱོར་ལ་མ་བྱས་ཀྱང་ཆོག །དེ་ནས། ཨརྒྷཾ་སོགས་ཀྱིས་མཆོད། ལྷ་དང་ལྷ་མིན་ཅོད་པན་གྱིས། །སོགས་ཀྱིས་བསྟོད། བཛྲ་ས་མ་ཡ་ཧཱུྃ། རྟེན་གྱི་དཀྱིལ་འཁོར་རང་གི་ལུས་ལ་ཐིམ། རང་ཉིད་
ཀྱང་ཐུགས་ཀའི་ཏཱྃ་ལ་ཐིམ། དེ་ཡང་ཆ་ལྔའི་རིམ་པས་ནཱ་ད་ལ་བསྡུས། དེ་ཡང་སྟོང་པ་ཉིད་དུ་ཐིམ་པར་གྱུར། ཨཱཿཞེས་རང་བཞིན་མེད་པའི་གཟུངས་ཀྱི་སྒོ་ལ་ཅི་རིགས་གནས་ཤིང་ལྡང་བ་ན། སླར་བདག་ཉིད་བཅོམ་ལྡན་འདས་མའི་སྐུར་གྱུར། དགེ་བ་བསྔོ། གཏོར་འབུལ་དང་། རྣལ་འབྱོར་ཕྱི་མ་གསུམ་གྱི་སྙིང་པོ་བསྒོམ་པར་འདོད་ན་གཞན་དུ་ཤེས་པར་བྱ། ཡང་ན་རྒྱུན་གྱི་རྣལ་འབྱོར་ལ་རྩ་བའི་ལྷ་དཔའ་མོ་གཅིག་པ་ཞལ་གཅིག་ཕྱག་གཉིས་པའི་བསྒོམ་བཟླས་བྱས་ཀྱང་ལེགས་ཤིང་འབྲེལ་ཆགས་པའོ། །དྲན་པས་འཇིགས་པ་མ་ལུས་འཇོམས། །བསྒོམ་པས་སྙིང་ལ་བདེ་ཆེན་སྟེར། །སྒྲོལ་མའི་རྣལ་འབྱོར་འདི་བྱས་པས། །བདག་དང་འགྲོ་ཀུན་རྗེས་འཛིན་ཤོག །ཅེས་པའང་ཀུན་མཁྱེན་མཉྫུ་ཤྲཱི་དང་། རང་སློབ་ཨི་ཤྭ་ར་སོགས་ཀྱིས་སྔ་ཕྱིར་བསྐུལ་མ་མཛད་ལྟར། ཡོན་ཏན་རྒྱ་མཚོས་དཔལ་སྤུངས་རི་ཁྲོད་དུ་འགྲུབ་སྦྱོར་དང་ལྡན་པའི་ཚེས་བཟང་པོའི་སྔ་དྲོའི་ཐུན་མཚམས་སུ་ལྷ་དང་བླ་མས་གནང་བའི་མཚན་མ་དགེ་བ་དང་བཅས་སྦྱར་བ་དགེ་ལེགས་འཕེལ།། །།སརྦ་མངྒ་ལཾ། །