རྗེ་བཙུན་འཕགས་པ་འཇམ་དཔལ་དབྱངས་དཀར་པོའི་སྒོམ་བཟླས་སྙིང་གི་མུན་སེལ།
རྗེ་བཙུན་འཕགས་པ་འཇམ་དཔལ་དབྱངས་དཀར་པོའི་སྒོམ་བཟླས་སྙིང་གི་མུན་སེལ་ཅེས་བྱ་བ་བཞུགས་སོ།། །།
རྒྱལ་ཀུན་ཡབ་གཅིག་འཇམ་དཔལ་དབྱངས། །དྲི་མེད་སྟོན་ཟླའི་མདངས་འཛིན་པ། །གང་གི་ཞབས་ཀྱི་ཆུ་སྐྱེས་ལ། །གུས་པས་འདུད་དོ་ཐུགས་རྗེས་སྐྱོངས། །འདིར་ཁ་ཆེ་པ་ཆེན་ཤཱཀྱ་ཤྲཱིའི་ཁྱད་འཕགས་ཐུགས་དམ་ལྷ་བཞིའི་ཡ་གྱལ་འཕགས་པ་འཇམ་དབྱངས་དཀར་པོའི་སྒོམ་བཟླས་ཉམས་སུ་ལེན་པར་འདོད་པས། ནངས་བར་ཤ་ཆང་སོགས་ལ་མ་སྦགས་པའི་སྔོན་རོལ་གཙང་སྦྲའི་ཀུན་སྤྱོད་ལ་གནས་ཏེ་ཉོན་མོངས་པའི་དྲི་མ་སངས་ཀྱིས་དག་པར་མོས་ལ་རླུང་རོ་བསལ་ཅིང་ལུས་གནད་བསྲང་། མ་གྱུར་རིགས་དྲུག་གི་འགྲོ་བ་རྣམས་མ་རིག་འཁྲུལ་རྟོག་གི་མུན་པ་བསལ་ནས་མཁྱེན་གཉིས་ཡེ་ཤེས་ཀྱི་སྣང་བ་སྤེལ་བའི་འདུན་བརྩོན་ཆེན་པོའི་དྲན་པ་མངོན་ཏུ་བཞག་སྟེ། ཐོག་མར་སྐྱབས་སུ་འགྲོ་བ་ནི། །སངས་རྒྱས་ཀུན་གྱི་ཡེ་ཤེས་སྐུ། །འཇམ་དཔལ་གཞོན་ནུར་གྱུར་པ་ལ། །དུས་འདི་ནས་བཟུང་བྱང་ཆུབ་བར། །མི་ཕྱེད་གུས་པས་སྐྱབས་སུ་མཆི། །སེམས་བསྐྱེད་པ་ནི། །ཇི་ལྟར་འཇམ་དཔལ་དཔའ་བོ་ཡིས། །ཐུགས་བསྐྱེད་བྱང་ཆུབ་སྤྱོད་མཛད་པ། །དེ་བཞིན་བདག་ཀྱང་གཞན་དོན་ཏུ། །སེམས་བསྐྱེད་བསླབ་ལ་བརྩོན་པར་བགྱི། །ཚོགས་གསག་པ་ནི། །རང་ཉིད་འཕགས་པའི་སྐུར་གསལ་བའི། །སྙིང་གའི་ཨ་དཀར་འོད་ཟེར་གྱིས། །འཇམ་དཔལ་རྒྱལ་བ་སྲས་དང་བཅས། །མདུན་མཁར་སྤྱན་དྲངས་དགྱེས་བཞུགས་གྱུར། །བཅོམ་ལྡན་རྒྱལ་བ་སྲས་བཅས་ལ། །སྒོ་གསུམ་གུས་པས་ཕྱག་འཚལ་ལོ། །དངོས་བཤམ་ཡིད་སྦྲུལ་མཆོད་པའི་སྤྲིན། །
ལུས་དང་ལོངས་སྤྱོད་བཅས་པ་འབུལ། །ཉོན་མོངས་དབང་གྱུར་སྡིག་བསགས་པ། །སྙིང་ནས་འགྱོད་པས་མཐོལ་ཞིང་བཤགས། །འཁོར་འདས་ཀུན་གྱི་དགེ་ཚོགས་ལ། །དགའ་བས་རྗེས་སུ་ཡི་རང་ངོ་། །སྲིད་པའི་འཁྲུལ་འཁོར་གཞོམ་སླད་དུ། །ཆོས་འཁོར་རྟག་ཏུ་བསྐོར་བར་བསྐུལ། །འགྲོ་ཀུན་སངས་རྒྱས་མ་ཐོབ་བར། །མྱ་ངན་མི་འདའ་བཞུགས་པར་གསོལ། །བསོད་ནམས་ཅི་མཆིས་འཇམ་མགོན་གྱི། །གོ་འཕང་མྱུར་དུ་ཐོབ་ཕྱིར་བསྔོ། །ཚོགས་རྟེན་རང་བཞིན་གནས་གཤེགས་གྱུར། །འགྲོ་ཀུན་བདེ་བ་རྒྱུར་བཅས་ལྡན། །སྡུག་བསྔལ་དེ་ཡི་རྒྱུ་དང་བྲལ། །འཕྲལ་ཡུན་བདེ་དང་མི་འབྲལ་ཅིང་། །ཐམས་ཅད་མཉམ་ཉིད་ངང་གནས་ཤོག །དངོས་གཞི་ལྷ་བསྐྱེད་པ་ནི། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཆོས་ཀུན་གདོད་ནས་སྤྲོས་བྲལ་སྟོང་ཉིད་དང་། །ས་ཕྱོགས་དག་པའི་ཞིང་བཀོད་ཕུན་ཚོགས་དབུས། །བྃ་ལས་འོ་མའི་རྒྱ་མཚོ་དཀར་ལ་དྭངས། །ཡིད་འཕྲོག་ཆུ་བྱ་སྣ་ཚོགས་སྐད་སྙན་སྒྲོག །མཐར་སྐོར་ནེའུ་གསེང་མེ་ཏོག་དཀར་དམར་ཚལ། །ལྷ་དང་དྲང་སྲོང་རིག་འཛིན་གཞོན་ནུས་གང་། །གླང་ཆེན་ཐལ་དཀར་ཅང་ཤེས་ཁྱུ་ཚོགས་རྒྱུ། །དེ་དབུས་པྃ་ལས་པདྨའི་སྡོང་པོ་ནི། །གསེར་གྱི་ཡལ་འདབ་མེ་ཏོག་འབྲས་བུའི་དུད། །རྩེ་མོར་པད་དཀར་
གེ་སར་དམར་སེར་བཞད། །ཨ་ལས་ཟླ་བའི་དཀྱིལ་འཁོར་ཉ་རྒྱས་སྟེང་། །རང་སེམས་ཨ་དཀར་ལས་འཕྲོས་འོད་ཟེར་གྱིས། །འཕགས་པ་ཀུན་མཆོད་འགྲོ་བའི་སྒྲིབ་གཉིས་བསལ། །ཚུར་འདུས་ས་བོན་ལ་ཐིམ་སྐད་ཅིག་གིས། །འཇམ་དཔལ་གཞོན་ནུ་སྟོན་ཀའི་ཟླ་བའི་མདོག །ཞི་འཛུམ་ཡིད་འོང་ཟུར་ཕུད་ལྔ་དང་ལྡན། །ཕྱག་གཡས་མཆོག་སྦྱིན་པུས་མོའི་སྟེང་དུ་བརྐྱང་། །གཡོན་པས་ཐུགས་ཀར་མཐེབ་སྲིན་སྦྱར་བ་ཡིས། །ཤེས་རབ་ཕར་ཕྱིན་གླེགས་བམ་གྱིས་མཚན་པའི། །རབ་རྒྱས་ཨུཏྤལ་སྔོན་པོའི་སྡོང་བུ་བསྣམས། །ལྷ་རྫས་དར་གྱི་སྟོད་གཡོགས་སྨད་གཡོགས་ཀླུབས། །དབུ་རྒྱན་སྙན་ཆ་མགུལ་ཆུ་དོ་ཤལ་དང་། །དཔུང་རྒྱན་ཕྱག་ཞབས་གདུ་བུ་སྐ་རགས་རྣམས། །རིན་ཆེན་ནོར་བུའི་ཆས་ཀྱིས་རབ་ཏུ་སྒེག །ཡེ་ཤེས་འོད་ཟེར་དཔག་མེད་འཕྲོ་བའི་དབུས། །ཞབས་གཉིས་རྡོ་རྗེ་སྐྱིལ་ཀྲུང་གཡོ་མེད་བཞུགས། །སྣང་ཞིང་སྟོང་ལ་སྟོང་བཞིན་སྣང་བའི་སྐུ། །རྒྱལ་ཀུན་ཡེ་ཤེས་ཕུང་པོ་གཅིག་གི་དངོས། །གདོད་ནས་དམ་ཡེ་གཉིས་སུ་མེད་པར་གསལ། །བཟླས་པའི་རྣལ་འབྱོར་ནི། །ཐུགས་ཀའི་དབུས་སུ་པད་དཀར་ཟེའུ་འབྲུ་ལ། །འཁོར་ལོ་དཀར་པོ་རྩིབས་དྲུག་རྩེ་མོ་རྣོ། །ལྟེ་བར་ཟླ་དཀྱིལ་ཨ་དཀར་འོད་ཟེར་འབར། །རྩིབས་ལ་སྙིང་པོ་འབྲུ་དྲུག་གཡས་
བསྐོར་འཁོད། །ཅེས་ལྷ་སྣང་དང་ཛབྲ་དཀྱིལ་འོད་དཀར་པོ་འབར་བ་ལ་ཡུན་རིང་དུ་སེམས་རྩེ་གཅིག་བཟུང་། གསལ་སྣང་ཐོན་ནས། བཟླས་པའི་རྐྱེན་གྱིས་འཁོར་ལོ་གཡས་ཕྱོགས་དང་། །ཡིག་འབྲུ་གཡོན་ཕྱོགས་དྲག་ཏུ་འཁོར་བ་ཡི། །འོད་ཀྱིས་ལུས་གང་སྡིག་ལྟུང་ཉེས་ཚོགས་བཅོམ། །བློ་གྲོས་སྟོབས་ལྡན་མྱུར་འཛིན་གཟུངས་ཐོབ་ཅིང་། །མཁྱེན་གཉིས་ཡེ་ཤེས་སྣང་བ་རབ་གསལ་གྱུར། །ཅེས་བསྒོམས་ལ། ཨོཾ་ཝཱཀྱེ་དཾ་ན་མཿཞེས་བཟླ། སྤྱན་རས་གཟིགས་ཀྱི་སྙིང་པོ་ཐམས་ཅད་ཀྱི་གཙོ་བོ་ཡིག་དྲུག་ཡིན་པ་བཞིན་ཏུ། འཇམ་དབྱངས་ཀྱི་གཟུངས་དང་སྙིང་པོ་ཐམས་ཅད་ཀྱི་མཆོག་ཏུ་གྱུར་པ་འདི་ཉིད་ཡིན་པས་བཟླས་པའི་ཕན་ཡོན་དཔག་ཏུ་མེད་པ་འཇམ་དཔལ་རྩ་བའི་རྒྱུད་སོགས་ལས་གསུངས་པས་གུས་པ་དང་ཡིད་ཆེས་རྩེ་གཅིག་ཏུ་བྱ། ཐུན་མཐར། རང་གི་གྲེ་བའི་ཕུགས་དང་མདུན་གྱི་མཁར། །ཨ་ཡིག་དཀར་པོ་ཟླ་རྒྱས་ལྟ་བུར་གསལ། །ནམ་མཁའི་ཨ་ལས་འོད་ཟེར་དཔག་མེད་འཕྲོས། །འཕགས་དང་སོ་སྐྱེའི་ཤེས་རབ་མ་ལུས་བསྡུས། །ཨ་ལ་ཐིམ་སྟེ་དེ་ཉིད་གྲེ་ཕུགས་ཞུགས། །ཨ་ལས་ཨ་འཕྲོས་ལུས་ཀྱི་ནང་ཀུན་ཁེངས། །བློ་གྲོས་རབ་རྒྱས་སྤོབས་པའི་གཏེར་མཛོད་གྲོལ། །མི་བརྗེད་གཟུངས་ཀྱི་སྣང་བ་ཐོབ་པར་གྱུར། །ཅེས་མོས་ལ་ཨ་བརྒྱ་རྩ་སོགས་བརྗོད། རྗེས་ཐུན་མཐར། རང་བཞིན་གྱིས་གྲུབ་པའི་ལྷ་མོ་རྣམས་ཀྱིས་རང་ཉིད་ལ་
མཆོད་ཅིང་བསྟོད་པར་མོས་ལ། །འཇིག་རྟེན་ཁམས་ནི་དཔག་མེད་ན། །མཆོད་རྫས་ཇི་སྙེད་ཡོད་པ་དང་། །བདག་གིས་གུས་པས་བཤམ་པ་འདིས། །འཇམ་དཔལ་གཞོན་ནུར་གྱུར་པ་མཆོད། །ཨོཾ་ཨཱརྻ་མཉྫུ་ཤྲཱི་ཡེ་ཨརྒྷཾ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་བི་དྱ་ཤབྡ་པྲ་ཏཱིཙྪ་སྭཱ་ཧཱ། མཎྜལ་སྤྲོ་ན་རྒྱས་པས་མཆོད། བསྡུ་ན། ཛམ་བུའི་གླིང་དང་གླིང་གཞན་རྣམས། །རིན་ཆེན་སྣ་བདུན་གྱིས་བཀང་སྟེ། །སྟོང་གསུམ་ལ་སོགས་མ་ལུས་པ། །ཞུམ་པ་མེད་པར་བྱས་ཏེ་འབུལ། །ཅེས་མཆོད། བསྟོད་པ་གྲུབ་ན་མཚན་བརྗོད། གང་བློ་མ། ཙནྡྲ་གོ་མིས་མཛད་པ་སོགས་གང་ཤེས་བརྗོད། བསྡུ་ན། རི་བོང་འཛིན་པ་ལྟར་དཀར་གླེགས་བམ་ཨུཏྤལ་ཕྱག་མཚན་ཅིང་། །རབ་མཛེས་ཤིན་ཏུ་ཞི་བའི་གཞོན་ནུ་ཟུར་ཕུད་ལྔ་པ་ཅན། །དགའ་བ་རྒྱ་ཆེན་ཐར་མཆོག་སྤྱན་ནི་པདྨའི་འདབ་ལྟར་ཡང་། །བློ་གྲོས་ངན་པ་སྲེག་མཁས་འཇམ་པའི་དབྱངས་ལ་རབ་ཏུ་འདུད། ཅེས་པ་ཙམ་གྱིས་བསྟོད། འདོད་དོན་གསོལ་བ་ཡིག་རྙིང་ལྟར་ན། །ངོ་བོ་མ་ནོར་ཆོས་ཉིད་རབ་མཁྱེན་ཅིང་། །རྣམ་པ་མ་ལུས་འཇའ་ཚོན་ལྷང་ངེར་གཟིགས། །ཐུགས་རྗེ་ཆེ་དང་ཐབས་ཚུལ་དཔག་མེད་ཀྱིས། །སྲིད་མཚོ་མཐའ་ཡས་སྐྱོབ་ལ་ཕྱག་འཚལ་ལོ། །འཇམ་དབྱངས་མགོན་ཁྱོད་གུས་པས་རྗེས་དྲན་ཅིང་། །སྒོམ་བཟླས་ལེགས་མཆོད་མངོན་པར་བསྟོད་པའི་མཐུས། །
བློ་ངན་མ་རིག་འཐིབ་པོའི་ཚོགས་རྣམས་ཀུན། །སྤྲིན་མེད་ཉི་ཤར་ཇི་བཞིན་དྭངས་བར་མཛོད། །རྗེ་བཙུན་འཇམ་དཔལ་དབྱངས་ཀྱིས་བདག་སོགས་སེམས་ཅན་ཐམས་ཅད་ཀྱི་མ་རིག་པའི་མུན་པ་བསལ་ནས། ཤེས་བྱ་ཐམས་ཅད་བདེ་བླག་ཏུ་རྟོགས་པའི་མཁྱེན་གཉིས་ཡེ་ཤེས་ཀྱི་སྣང་བ་མྱུར་དུ་སྩལ་བར་མཛད་དུ་གསོལ། ཅེས་པ་ཙམ་མམ། །རྟག་ཏུ་རྗེ་བཙུན་མཁྱེན་པའི་གཏེར། །ཡིད་ལ་བྱེད་ཅིང་རྗེས་སུ་སློབ། །སྒོམ་བཟླས་མཆོད་ཅིང་བསྟོད་པའི་མཐུས། །སྐྱེ་ནས་སྐྱེ་བར་རྗེས་བཟུང་སྟེ། །མི་འབྲལ་དགེ་བའི་བཤེས་གཉེན་མཛད། །གདམས་པའི་བདུད་རྩི་རྩོམ་པ་དང་། །བྱང་ཆུབ་སྤྱོད་ལ་རབ་ཞུགས་ཤིང་། །གེགས་མེད་ཕ་རོལ་ཕྱིན་མཛད་གསོལ། །ཆོས་རབ་རྣམ་འབྱེད་ཤེས་རབ་ཐོབ། །ཆོས་དོན་སོ་སོ་ཡང་དག་རིག །ཆོས་ཀྱི་རྒྱུན་གྱི་ཏིང་འཛིན་བརྙེས། །ཆོས་སྒོ་ཀུན་ལ་མི་འཇིགས་པའི། །གཟུངས་དང་སྤོབས་པའི་གཏེར་མཛོད་གྲོལ། །ཆོས་ཉིད་དོན་དམ་ཇི་བཞིན་རྟོགས། །ཆོས་ཅན་ཇི་སྙེད་མཁྱེན་པ་ལ། །འཇམ་དཔལ་དཔའ་བོ་ཉིད་མཚུངས་མཛོད། །གང་ཚེ་བལྟ་བར་འདོད་པའམ། །ཅུང་ཟད་དྲི་བར་འདོད་ན་ཡང་། །མགོན་པོ་འཇམ་དབྱངས་ཁྱེད་ཉིད་ནི། །གེགས་མེད་པར་ཡང་མཐོང་བར་ཤོག །ཅེས་
བརྗོད། བརྩེ་ལྡན་ཁྱོད་ཀྱི་མཁྱེན་རབ་འོད་ཟེར་གྱིས། །སོགས་ཀྱང་བརྗོད། བསྡུ་རིམ་ནི། །སྣོད་བཅུད་ལྷ་སྣང་རང་བཞིན་དབྱིངས། །གནས་ལུགས་སྤྲོས་བྲལ་ངང་དུ་ཐིམ། །སླར་ཡང་རང་བྱུང་གཉུག་མའི་སྐུ། །མི་ཕྱེད་རྡོ་རྗེ་གསུམ་དངོས་གྱུར། །བསྔོ་སྨོན་ནི། །འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །འཇམ་དབྱངས་ཤེས་རབ་ཐོབ་པར་ཤོག །ཅེས་སོགས་བརྗོད། རྟག་ཏུ་དྲན་པ་དང་ཤེས་བཞིན་མ་བྲལ་བས་འཕགས་པ་འཇམ་དཔལ་དབྱངས་ཀྱི་ཆེ་བའི་ཡོན་ཏན་དང་ངོ་མཚར་བའི་རྣམ་པར་ཐར་པ་ལ་དད་པ་གསུམ་གྱིས་ཀུན་ནས་བསླངས་པས་ཚོགས་བསགས་ཤིང་རྗེས་སུ་སློབ་པའི་བསམ་སྦྱོར་དང་མ་བྲལ་བར་བྱའོ།། ༈ །།འཕགས་མཆོག་དགྱེས་པའི་འཛུམ་ཟེར་གྱིས། །རྨོངས་ཆེན་སྙིང་གི་རྒྱ་བྲལ་ཏེ། །མཁྱེན་གཉིས་པད་མོ་རྒྱས་པ་ཡིས། །སྐྱེ་དགུའི་བུང་བ་རྟག་འཚོ་ཤོག །ཅེས་པའང་ཉེ་བར་གནས་ཤིང་དད་དང་བློ་གྲོས་ཀྱི་སྣང་བ་གསལ་བ་གསང་སྔགས་བསྟན་འཛིན་ནས་ལྷ་རྫས་དྲི་མེད་བཅས་ཆེད་དུ་བསྐུལ་ངོར། ཤེས་བྱའི་ཚུལ་ཅུང་ཟད་རིག་པ་བློ་གྲོས་མཐའ་ཡས་པའི་སྡེས་ཆོ་འཕྲུལ་ཟླ་བའི་དཀར་ཕྱོགས་ཀྱི་གྲལ་ཚེས་བཟང་པོར་རྫོང་ཤོད་བདེ་གཤེགས་འདུས་པའི་ཕོ་བྲང་གི་བྱེ་བྲག་རྡོ་རྗེ་འོད་གསལ་ཐུགས་ཀྱི་རྫོང་དུ་སྦྱར་བ་དགེ་ལེགས་འཕེལ།། །།སརྦ་ཐཱ་མངྒ་ལཾ།། །།