རྗེ་བཙུན་སྨྲ་བའི་སེང་གེའི་སྒོམ་བཟླས་བློ་གྲོས་ཁ་འབྱེད།
རྗེ་བཙུན་སྨྲ་བའི་སེང་གེའི་སྒོམ་བཟླས་བློ་གྲོས་ཁ་འབྱེད་ཅེས་བྱ་བ་བཞུགས་སོ།། ༈ །།ཨོཾ་སྭ་སྟི། །མཐའ་ཡས་མཁྱེན་པའི་ཡེ་ཤེས་ཀྱིས། །མུན་པ་ཀུན་འཇོམས་དེར་བཏུད་ནས། །རྒྱུན་ཏུ་སྒོམ་ཞིང་བཟླས་པ་ཡི། །རྣལ་འབྱོར་རིམ་པ་མདོར་བསྡུས་འཆད། །དེ་ལ་ནངས་མོའི་ཆར་སྟན་བདེ་བར་ལུས་དྲང་པོར་བསྲང་། སེམས་དྭངས་ཤིང་དྲན་པ་མངོན་དུ་བཞག་ནས་འདི་ལྟར་ཉམས་སུ་བླང་བར་བགྱི་སྟེ། ཐོག་མར་སྐྱབས་འགྲོ་ནི། །འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །སེམས་བསྐྱེད་པ་ནི། །ཤེས་རབ་སྙིང་བརྩེ་དང་བཅས་པས། །བརྩོན་པས་སེམས་ཅན་དོན་ཏུ་བདག །སངས་རྒྱས་མདུན་ཏུ་གནས་བཅས་ཏེ། །རྫོགས་པའི་བྱང་ཆུབ་ཐོབ་པར་བགྱི། །ཡན་ལག་བཞི་ལྡན་གྱི་བསྐྱེད་པའི་རྣལ་འབྱོར་སྒོམ་པ་ནི། །ཨོཾ་སྭ་བྷཱ་བ་ཤུདྡྷཱཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། །གཟུང་འཛིན་གཉིས་སྣང་རྟོག་པའི་ཚོགས། །སྟོང་ཉིད་ཡེ་ཤེས་རྡོ་རྗེར་སྦྱངས། །པྃ་ལས་པདྨ་ཨ་ཟླ་དཀྱིལ། །སིང་ལས་སེང་གེ་སྔོན་པོའི་གདོང་། །གྱེན་བསྟན་རལ་པ་དམར་སེར་ནི། །ཐུར་དུ་གྲོལ་བ་བསྣོལ་བའི་སྟེང་། །པད་ཉི་ལ་གནས་རང་གི་སེམས། །དྷཱིཿཡིག་གུར་གུམ་གསར་པའི་མདངས། །ཡོངས་གྱུར་རྗེ་བཙུན་འཇམ་དཔལ་དབྱངས། །དམར་སེར་འཆར་
ཀའི་ཉི་གཞོན་མདོག །བཅུ་དྲུག་ལོན་པའི་ལང་ཚོ་ཅན། །ཞི་འཛུམ་སྒེག་པའི་ཆ་ལུགས་འཆང་། །དབུ་སྐྲ་ཟུར་ཕུད་ལྔ་ལྡན་གྱི། །རྩེ་མོར་ཡིད་བཞིན་ནོར་བུས་མཚན། །ཕྱག་གཡས་ཤེས་རབ་རལ་གྲི་གདེངས། །གཡོན་པས་གླེགས་བམ་གྱིས་མཚན་པའི། །ཨུཏྤལ་ཡུ་བ་ཐུགས་ཀར་འཛིན། །དར་དང་རིན་ཆེན་རྒྱན་གྱིས་བརྒྱན། །ཞབས་ཟུང་རྒྱལ་པོ་རོལ་པའི་སྟབས། །འོད་ཟེར་དམར་པོའི་ཀློང་དུ་བཞུགས། །དེ་མདུན་པྃ་དང་ཨ་ཡིག་ལས། །པད་ཟླར་ཧྲཱིཿཡིག་ནམ་མཁའི་མདོག །ཡོངས་གྱུར་འཕགས་མ་དབྱངས་ཅན་མ། །སྔོ་སངས་ལྷ་མོའི་ཆ་ལུགས་རྫོགས། །རྒྱན་དང་ཕྱག་མཚན་ཡབ་དང་མཚུངས། །བཞེངས་ཐབས་འོད་ཀྱི་གུར་ཁྱིམ་དབུས། །བུད་མེད་སྒྱུ་མའི་ང་རྒྱལ་འགྱིངས། །འཇམ་དཔལ་ཐུགས་ཀར་འཁོར་ལོ་དམར། །རྩིབས་བཞི་ལྷ་མོའི་ཐུགས་ཀ་རུ། །པདྨ་འདབ་བརྒྱད་ལྟེ་བ་རུ། །རལ་གྲི་ཆང་ཟུང་དྷཱིཿཧྲཱིཿས་མཚན། །རང་སྔགས་སོ་སོས་བསྐོར་བ་ལས། །འོད་འཕྲོས་རང་འདྲའི་ཡེ་ཤེས་པ། །སྤྱན་དྲངས་མདུན་མཁར་བཞུགས་པར་གྱུར། །བཛྲ་ས་མཱ་ཛཿཨོཾ་བཛྲ་ཨརྒྷཾ་སྭཱ་ཧཱ། དེ་བཞིན་ཏུ། པཱ་དྱཾ༴ཨོཾ་བཛྲ་པུཥྤེ་ཨཱཿཧཱུྃ། དེ་བཞིན་ཏུ། དྷཱུ་པེན་ཨཱ་ལོ་ཀེ༴ གནྡྷེ༴ ནཻ་བི་དྱ༴ ཤབྡའི་བར་གྱིས་མཆོད། ཛཿཧཱུྃ་བྃ་ཧོཿ
དམ་ཚིག་ཡེ་ཤེས་གཉིས་མེད་གྱུར། །སླར་ཡང་ཐུགས་སྲོག་འོད་ཟེར་གྱིས། །དབང་གི་ལྷ་རྣམས་སྤྱན་དྲངས་གྱུར། ཨརྒྷཾ་སོགས་ཀྱིས་མཆོད། སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། །གསོལ་བ་བཏབ་པས་ལྷ་རྣམས་ཀྱིས། །བཛྲཱི་བྷ་བ་ཨ་བྷི་ཥིཉྩ་ཧཱུྃ། །ཞེས་གསུང་དབང་བསྐུར་དྲི་མ་དག །ཆུ་ལྷག་སྤྱི་བོར་བརྟན་པ་ལས། །མི་བསྐྱོད་པ་ཡིས་དབུ་བརྒྱན་གྱུར། །བཟླས་པའི་རྣལ་འབྱོར་ནི། །སྲས་དང་བཅས་པའི་རྒྱལ་བ་ནི། །སྤྲིན་ཕུང་འཁྲིགས་འདྲས་བསྐོར་བ་ཡི། །ཡབ་ཡུམ་ཐུགས་ཀའི་ས་བོན་ལས། །འོད་འཕྲོས་ཕྱི་སྣོད་གཞལ་ཡས་ཁང་། །ནང་བཅུད་འཕགས་པ་ཡབ་ཡུམ་གྱུར། །རང་ཐུགས་དྷཱིཿལས་འོད་ཟེར་འཕྲོས། །སྣ་བུག་གཡས་ཐོན་དབྱངས་ཅན་མའི། །ཤངས་སྒོ་གཡོན་ཞུགས་ཐུགས་ཀའི་ཧྲཱིཿར། །ཐིམ་ལས་སླར་ཡང་འོད་ཟེར་བྱུང་། །ཤངས་བུག་གཡས་ནས་བདག་གི་གཡོན། །བརྒྱུད་དེ་སྲོག་གི་ཐིག་ལེར་ཐིམ། །བར་མ་ཆད་པར་འཁོར་བ་ལས། །འོད་ཟེར་བུང་བ་དཔག་མེད་འཕྲོས། །འཇིག་རྟེན་འདས་དང་མ་འདས་པའི། །མཁྱེན་དཔྱོད་བློ་གྲོས་དྭངས་བཅུད་བསྡུས། །རང་ཐིམ་མཁྱེན་གཉིས་ཡོངས་རྫོགས་གྱུར། །ཅེས་པའི་དམིགས་པ་རྩེ་གཅིག་ཏུ་བསྒོམས་ལ། ཨོཾ་ཧྲཱིཿདྷཱིཿམ་མེ་དཱིྭ་པ་སྭ་ར་སྭ་སྟི་མཉྫུ་ཤྲཱི་མུཾ་ཧྲཱིཿཔྲཛྙཱ་ཝརྡྷ་ནི་ཧྲཱིཿདྷཱིཿ
སྭཱ་ཧཱ། ཞེས་དངོས་གྲུབ་སྤྲེང་བ་ཉེར་གཅིག་པ་ཡུམ་སྔགས་ཀྱིས་བརྒྱན་པ་ཉིད་ཅི་ནུས་སུ་བཟླས་ལ། ཐུན་བསྡུ་བ་ནི། །རང་གི་ཐུགས་ཀའི་འོད་ཟེར་གྱིས། །སྣོད་བཅུད་དག་པའི་འཁོར་ལོ་བསྡུས། །ཡུམ་ལ་ཐིམ་ཞིང་དེ་ཡང་ཡབ། །ཡབ་ཉིད་འཁོར་ལོ་ས་བོན་དང་། །ནཱ་དར་རིམ་འདུས་སྟོང་ཉིད་དང་། །སླར་ཡང་ཟུང་འཇུག་སྒྱུ་མའི་སྐུས། །འཁོར་བ་ཇི་སྲིད་འགྲོ་དོན་བྱ། །ཞེས་འོད་གསལ་དུ་བསྡུ་ཞིང་ཐུན་མཚམས་ཀྱི་ལྷ་སྐུར་ལངས་ལ་ང་རྒྱལ་བཟུང་། །འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེ་ཡིས་སྐྱེ་བོ་ཐམས་ཅད་ཀྱིས། །འཇམ་དབྱངས་ཤེས་རབ་ཐོབ་པར་ཤོག །ཅེས་སོགས་ཐེག་པ་ཆེན་པོའི་ཚུལ་གྱི་བསྔོ་སྨོན་གྱིས་དགེ་རྩ་ཡོངས་སུ་སྤེལ་བར་བྱའོ། །ཐར་འདོད་རྣམས་ལ་བློ་གྲོས་དགོས། །དེ་སྐྱེད་ཐེག་ཆེན་རྩ་བའི་ལྷ། །སྒྲུབ་ཐབས་བཤད་ལས་དགེ་ཐོབ་པ། །དེ་ཡིས་མ་རིག་དཔུང་བཅོམ་ཤོག །ཅེས་པ་འདི་ནི་མཁྱེན་དཔྱོད་ཀྱི་ནོར་ལྡན་བསྟན་པ་ཕུན་ཚོགས་ནས་ཆེད་བསྐུལ་མཛད་པའི་དོར། ཀརྨ་ངག་དབང་ཡོན་ཏན་རྒྱ་མཚོས་དཔལ་སྤུངས་ཡང་ཁྲོད་དུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།