བཅོམ་ལྡན་འདས་འོད་དཔག་མེད་འཁོར་དང་བཅས་པ་མཆོད་ཅིང་གསོལ་བ་གདབ་པའི་ཆོ་ག་ཐར་པའི་ཤིང་རྟ།
བཅོམ་ལྡན་འདས་འོད་དཔག་མེད་འཁོར་དང་བཅས་པ་མཆོད་ཅིང་གསོལ་བ་གདབ་པའི་ཆོ་ག་ཐར་པའི་ཤིང་རྟ་ཞེས་བྱ་བ་བཞུགས་སོ།། །།
ན་མོ་གུ་རུ་ཨ་མི་ཏ་བྷཱ་ཡ། །བསོད་ནམས་བརྒྱ་ལས་གྲུབ་པ་རྒྱལ་བའི་མཚན། །རྒྱུ་སྐར་དབུས་ན་ཉི་མའི་མཆོད་སྡོང་བཞིན། །ཞིང་རྡུལ་སྙེད་ཀྱི་འདྲེན་པ་ཟིལ་གནོན་པ། །བདེ་ཆེན་ཞིང་གི་མགོན་པོ་ལ་ཕྱག་འཚལ། །ཐུགས་རྗེའི་མངའ་བདག་ཤཱཀྱའི་རྒྱལ་པོ་ཡིས། །གདུལ་བྱ་བྱང་ཆུབ་ལམ་དུ་འདྲེན་པའི་ཐབས། །ཇི་སྙེད་གསུངས་ལས་བྱ་སླ་དོན་ཆེ་བ། །དེ་ལྟར་སངས་རྒྱས་མངོན་སུམ་བཞུགས་པའི་མདོ། །བདེ་ཆེན་ཞིང་བཀོད་འོད་དཔག་མེད་པ་ཡི། །མདོ་སྡེ་སོགས་ལས་ཆེ་ཐང་བསྔགས་པ་གང་། །མཆོག་དམན་འཇུག་བདེ་ཞུགས་ནས་མི་ལྡོག་པའི། །ལམ་འདིར་བློ་དམན་བདག་ཀྱང་སྤྲོ་བས་འཇུག །འདིར་འཇུག་པར་འདོད་པའི་སྐལ་པ་དགེ་བ་ཅན་དག །ཐོག་མར་སློབ་དཔོན་ལས་ལུང་ནོད་པར་བྱ་སྟེ། །
དེའི་ཚུལ་ནི། མཎྜལ་སྐུ་བརྙན་མཆོད་པའི་ཡོ་བྱད་འདུ་བྱས་ཏེ། ཐོག་མར་སློབ་དཔོན་གྱིས་བསྒོམ་བཟླས་ཉམས་སུ་ལེན་པ་ནི། སེམས་བསྐྱེད་སྔོན་ཏུ་འགྲོ་བས། ཤཱུ་ནྱ་ཏཱ་ས་སྟོང་པར་སྦྱངས། རང་གི་སྙིང་གར་ཧྲཱིཿཡིག་དམར་པོ་ཡོངས་སུ་གྱུར་པ་ལས། རང་ཉིད་རྒྱལ་བ་འོད་དཔག་མེད་སྐུ་མདོག་དམར་པོ་ཕྱག་གཉིས་མཉམ་གཞག་གི་ཕྱག་རྒྱ་མཛད་པ། །ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པ། ན་བཟའ་ཆོས་གོས་རྣམ་གསུམ་གསོལ་བ། །ཚངས་པར་སྤྱོད་པའི་ཆ་ལུགས་ཅན། །མཚན་དང་དཔེ་བྱད་ཡོངས་སུ་རྫོགས་པའོ། །ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུྃ་བྃ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ།
།ཐུགས་ཀར་ཧྲཱིཿཡིག་གི་མཐར་སྔགས་ཕྲེང་དམིགས་ལ། ཨོཾ་ཨ་མྲྀ་ཏ་པྲ་བྷེ་ཨ་མྲྀ་ཏ་ཧཱུྃ། ཅི་ནུས་བཟླ། སློབ་མ་རྣམས་ཁྲུས་དང་ཕྱག་སྔོན་ཏུ་འགྲོ་བས་འཁོད་པ་ལ། ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་འོད་དཔག་ཏུ་མེད་པའི་གོ་འཕང་ལ་འགོད་པར་བྱ། དེའི་ཆེད་དུ་བསྒོམ་བཟླས་ཀྱི་ལུང་བླང་ཞིང་དོན་ཉམས་སུ་ལེན་པར་བགྱིའོ་སྙམ་པའི་ཐུགས་བསྐྱེད་དང་། ཆོས་གསན་པའི་ཀུན་ཏུ་སྤྱོད་པའང་གསལ་བཏབ་ནས། གང་གསན་པར་བྱ་བའི་ཆོས་ནི། དོན་དམ་དུ་སངས་རྒྱས་ཐམས་ཅད་མཉམ་པ་བཞི་དང་བཅུ་ལ་སོགས་པས་གསང་གསུམ་ཕྲིན་ལས་དང་བཅས་པ་མཉམ་ཞིང་མཚུངས་པ་ཁོ་ན་ཡིན་མོད་ཀྱང་། གདུལ་བྱའི་སྣང་ངོར་སྐུ་ཚེ་རིང་ཐུང་དང་མཛད་ཕྲིན་རྒྱ་ཆེ་ཆུང་ལྟར་སྣང་བ་ལས། དེ་བཞིན་གཤེགས་པ་འོད་དཔག་ཏུ་མེད་པ་འདི་ནི། སྔོན་འདས་པའི་བསྐལ་པ་དཔག་ཏུ་མེད་པའི་སྔ་རོལ་ཏུ་དགེ་སློང་ཆོས་ཀྱི་འབྱུང་གནས་ཞེས་བྱ་བར་གྱུར་བའི་ཚེ། བཅོམ་ལྡན་འདས་འཇིག་རྟེན་དབང་ཕྱུག་རྒྱལ་པོའི་སྤྱན་སྔར་བྱང་ཆུབ་མཆོག་ཏུ་ཐུགས་བསྐྱེད་དེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་སངས་རྒྱས་ཀྱི་ཞིང་གི་ཡོན་ཏན་གྱི་རྒྱན་བཀོད་པ་ཕུན་སུམ་ཚོགས་པ་གཅིག་ཏུ་བསྡུས་པ་ལས་ཀྱང་ཆེས་ལྷག་པ་སྔོན་ཕྱོགས་བཅུའི་འཇིག་རྟེན་གྱི་
ཁམས་ཐམས་ཅད་དུ་མ་བྱུང་བ་ཡོངས་སུ་བཟུང་ནས། ངོ་མཚར་རྨད་དུ་བྱུང་བའི་སྨོན་ལམ་གྱི་ཁྱད་པར་མཐའ་ཡས་པ་བཏབ་ཅིང་མི་འཇིགས་པའི་གོ་ཆ་ཆེན་པོ་བགོས་ཏེ་མཐའ་ཡས་པའི་བསྐལ་པ་རྣམས་སུ་སེམས་ཅན་ཐམས་ཅད་ཀྱི་དོན་ཏུ་བྱང་ཆུབ་སེམས་དཔའི་སྤྱད་པ་སྤྱོད་ཅིང་སྨོན་ལམ་ཆེན་པོ་ཡང་དག་པར་བསྒྲུབས་པས་དགེ་བའི་རྩ་བ་མཐར་ཕྱིན་ཏེ། འདི་ནས་ནུབ་ཕྱོགས་སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་ཕྲག་འབུམ་འདས་པ་ན། འཇིག་རྟེན་གྱི་ཁམས་བདེ་བ་ཅན་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པ་སངས་རྒྱས་ནས་སྐུ་ཚེའི་ཚད་བསྐལ་པ་དཔག་ཏུ་མེད་པར་བཞུགས། འོད་ཀྱི་སྣང་བས་སངས་རྒྱས་ཀྱི་ཞིང་མཐའ་ཡས་པ་ཁྱབ་པར་མཛད། དགེ་འདུན་འདུས་པའི་རྒྱ་མཚོ་གཏིང་མཐའ་མི་མངོན་པས་བསྐོར་ཞིང་། ད་ལྟར་འཚོ་ཞིང་གཞེས་ལ་ཆོས་ཀྱང་སྟོན་ཏེ། སེམས་ཅན་གང་དག་བཅོམ་ལྡན་འདས་འོད་དཔག་མེད་དེའི་མཚན་ཐོས་ནས་དད་པ་སྐད་ཅིག་ཙམ་སྐྱེས་པས་ཀྱང་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་ཅིང་བུད་མེད་ཀྱི་ལུས་ཀྱི་ཐ་མར་འགྱུར། དགེ་བའི་རྩ་བ་བསྐྱེད་ཅིང་བསམ་པ་ཐག་པ་ནས་ཞིང་དེར་སྐྱེ་བའི་ཕྱིར་ཡོངས་སུ་བསྔོས་ན་འཆི་འཕོས་མ་ཐག་འོད་དཔག་མེད་དགེ་སློང་གི་དགེ་འདུན་དང་བཅས་པ་མངོན་
སུམ་མཐོང་ནས་འཇིག་རྟེན་གྱི་ཁམས་བདེ་བ་ཅན་ཏུ་སྐྱེས་ཏེ་བྱང་ཆུབ་སྤྱོད་པ་དཔག་ཏུ་མེད་པ་སྤྱད་ནས་མྱུར་དུ་འཚང་རྒྱ་བར་འགྱུར་བ་སོགས་རྨད་དུ་བྱུང་བའི་རྣམ་པར་ཐར་བ་ལ། ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་མགྲིན་གཅིག་ཏུ་མཚན་དང་གྲགས་པ་སྒྲོགས་ཤིང་བསྔགས་པ་མཐའ་ཡས་པ་རྟག་ཏུ་གསུངས་པར་མཛད་པ་དེ་ལྟ་བུའི་ངོ་མཚར་བའི་སངས་རྒྱས་བཅོམ་ལྡན་འདས་དེ་ཉིད་ཀྱི་བཟླས་ལུང་སྒྲུབ་ཐབས་དང་བཅས་པ་འཕགས་ཡུལ་ལྷོ་ཕྱོགས་ར་ཁང་ཙགྨར་སྐུ་འཁྲུངས་པའི་པཎྜི་ཏ་ཤཱཀྱ་རཀྵི་ཏ་ལ་རྡོ་རྗེ་རྣལ་འབྱོར་མས་དངོས་སུ་བསྩལ། དེ་ནས་གྲུབ་པའི་སློབ་དཔོན་རིམ་པར་བརྒྱུད་དེ་པཎྜི་ཏ་གང་བའི་རྡོ་རྗེ་ལས་རྩོད་པའི་དུས་ཀྱི་རྡོ་རྗེ་འཆང་ཆེན་པོ་ཏཱ་ར་ནཱ་ཐས་གསན་ཏེ་རྒྱལ་ཚབ་རྒྱ་མཚོ་རྣམ་གཉིས་སོགས་ལས། རྩ་བའི་བླ་མ་འདི་ཞེས་བྱ་བའི་བར་གདམས་ངག་གི་བཀའ་མ་ཆད་པར་བྱོན་པ་དེ་ལྟ་བུས་བཟླས་ལུང་སྒྲུབ་པར་བྱེད་པ་ལ། སློབ་དཔོན་གྱིས་བསྒོམ་བཟླས་སྔོན་ཏུ་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་བསྒོམ་བཟླས་ཀྱི་ལུང་ཟབ་མོ་ཞུ་བའི་ཡོན་ཏུ་མཎྜལ་འབུལ་འཚལ། ཞེས་མཚམས་སྦྱར་ནས་མཎྜལ་འབུལ་དུ་གཞུག །དེ་ནས་ཐེག་པ་ཆེ་ཆུང་གི་ལམ་གྱི་སྒྲུབ་
ཐབས་ཐམས་ཅད་ཀྱི་སྔོན་ཏུ་འགྲོ་བ་སྐྱབས་སུ་འགྲོ་བ་དང་སེམས་བསྐྱེད་པ་འདིའི་རྗེས་ཟློས་མཛོད། སངས་རྒྱས་ཆོས་ཚོགས་སོགས་ལན་གསུམ། ཁྱད་པར་དུ་གསོལ་བ་འདེབས་པ་འདིའི་རྗེས་ཟློས། སློབ་དཔོན་གྱིས་བདག་ལ་རིག་སྔགས་དམ་པ་སྩལ་དུ་གསོལ། ལན་གསུམ། དེ་ནས་ཁྱེད་རང་རྣམས་གཞན་ཏུ་མ་ཡེངས་པར་ལྷའི་རྣལ་འབྱོར་འདི་བཞིན་ཏུ་བསྒོམ་འཚལ། ཞེས་བརྡ་སྦྱར་ལ། ཤཱུ་ནྱ་ཏཱས་སྟོང་པར་སྦྱང་། ཁྱེད་རང་རྣམས་ཀྱི་སྙིང་གར་ཧྲཱིཿཡིག་དམར་པོ་སོགས། ཞེས་པ་ནས། ཐུགས་ཀར་ཧཱུྃ་གིས་མཚན་པར་གྱུར། ཡན་མངོན་རྟོགས་ལྟར་བརྗོད། སློབ་དཔོན་ལྷར་གསལ་བའི་ཐུགས་ཀར་ཟླ་བ་ལ་སྔགས་ཀྱི་ཕྲེང་བ། མོས་གུས་མཛད་པས་སྔགས་ཕྲེང་གཉིས་པ་ཆད་དེ་ཞལ་ནས་ཐོན། ཁྱེད་རང་རྣམས་ལྷར་གསལ་བའི་ཞལ་དུ་ཞུགས། ཐུགས་ཀར་ཟླ་བའི་སྟེང་དུ་འཁོད་པར་མོས་ལ་སྔགས་འདིའི་རྗེས་ཟློས་མཛོད། ཅེས་སྔགས་ཀྱི་རྗེས་ཟློས་ལན་གསུམ་གྲུབ་མཐར། དེ་བཞིན་གཤེགས་པ་ཐམས་ཅད་ཀྱི་གསུང་གི་བྱིན་རླབས་དང་། ཁྱད་པར་བཅོམ་ལྡན་འདས་འོད་དཔག་ཏུ་མེད་པའི་གསུང་རིག་སྔགས་ཀྱི་ནུས་མཐུ་ཐམས་ཅད་རྡོ་རྗེའི་སློབ་མ་འདི་རྣམས་ཀྱི་ངག་ལ་ཐོགས་མེད་དུ་འཇུག་པར་གྱུར་ཅིག །ཅེས་བརྗོད། སྔགས་ཀྱི་རྗེས་ཟློས་སྐབས་ཕྲེང་བ་སྦྲེལ། མཐར་མགོལ་འཇོག་པར་མཛད།
དེས་བཅོམ་ལྡན་འདས་འོད་དཔག་མེད་ཀྱི་བསྒོམ་བཟླས་ལེགས་པར་ཕུལ་གྲུབ་པ་ཡིན་པས་གཏང་རག་ཏུ་མཎྜལ་དང་། དགེ་བསྔོ་བྱས་པས་གྲུབ་བོ། །འདི་ནི་རྒྱུད་སྡེ་གང་རུང་གི་དབང་བསྐུར་སྔོན་དུ་ཐོབ་པ་ལ་བྱ་ཡི། དབང་བསྐུར་མ་ཐོབ་པ་ལ་བཟླས་ལུང་མི་འབོག་པར་གསུངས་སོ། །ད་ནི་ཆོག་དངོས་བཤད་པར་བྱ་སྟེ། གང་བསོད་ནམས་ཀྱི་ཚོགས་ཆེན་པོ་མྱུར་དུ་རྫོགས་པར་འདོད་པ་དང་། གང་ཡེ་ཤེས་ཀྱི་ཚོགས་བདེ་བླག་ཏུ་འགྲུབ་པར་འདོད་པ་དང་། གང་ཞིག་སངས་རྒྱས་རྗེས་སུ་དྲན་པ་དང་མི་འབྲལ་བས་རྒྱལ་བའི་ཞལ་ལྟ་བ་ལ་རིངས་པ་དང་། གང་འཁོར་བ་དང་ངན་སོང་གི་སྡུག་བསྔལ་ལས་བདེ་བླགས་ཏུ་གྲོལ་ཞིང་རྒྱལ་བའི་སྲས་ཀྱི་སྤྱོད་པ་མཐའ་ཡས་པ་བསྒྲུབ་པར་འདོད་པའི་བློ་ལྡན་དག་ནི་ཚུལ་འདི་ལ་ཕྱི་བཤོལ་མེད་པར་རྟག་ཏུ་འཇུག་པར་རིགས་ཏེ། དང་བ་དང་འདོད་པ་དང་ཡིད་ཆེས་པའི་དད་པ་གསུམ་ནི་གནས་དུས་ཡོ་བྱད་རྒྱུ་རྐྱེན་གྱི་གཙོ་བོ་ཉིད་དོ། །དེ་བས་གང་མོས་པས་སྤྱོད་པའི་སྐབས་དེའམ། རྒྱལ་བའི་དུས་ཆེན་ལྟ་བུར་གནས་ཁང་གཙང་ཞིང་མཛེས་པར་བརྒྱན་པའི་དབུས་སུ། བསོད་ནམས་བརྒྱའི་མཚན་དང་ལྡན་པའི་རྒྱལ་བའི་སྐུ་བྲིས་འབུར་གང་ཡང་རུང་བ་མཆོད་པའི་རྟེན་ཏུ་བཞུགས་སུ་གསོལ་ཞིང་། མ་འབྱོར་ན་མོས་པས་ཀྱང་ཁྱབ་ལ། དམིགས་པའི་རྟེན་ཙམ་དུ་བྱེ་དོར་བྱས་པའི་མཎྜལ་དྲི་བཟང་གི་ཆག་ཆག་བཏབ་པ་ལ་རིན་པོ་ཆེའམ་འབྲུའི་ཚོམ་བུ་བཀོད་པས་ཀྱང་རུང་བ་ཉིད་དོ། །དེ་དག་གི་མདུན་ཏུ་མཆོད་པའི་མཎྜལ། ཁྲུས་ཀྱི་ཡོ་བྱད། མཆོད་ཡོན་ཞབས་བསིལ་སྔོན་ཏུ་འགྲོ་བའི། མེ་ཏོག་བདུག་སྤོས་མར་མེའི་ཕྲེང་བ། དྲི་བཟང་གི་ཡོན་ཆབ། ཞལ་ཟས་རོལ་མོའི་བྱེ་བྲག་རྣམས་
དང་། བཀྲ་ཤིས་རྫས་རྟགས་རིན་ཆེན་སྣ་བདུན་སོགས་འབྱོར་བས་དཔག་པ་རྣམས་ཀྱིས་ཡོ་བྱད་རེ་རེ་ལའང་བརྒྱའམ་སྟོང་ཕྲག་སོགས་ཇི་ལྟར་ནུས་པ་མ་བསྲིས་པ་བཤམ་ཞིང་། བླ་བྲེ་དང་བ་དན་ལ་སོགས་པ་མཆོད་པའི་ཡོ་བྱད་སྣ་ཚོགས་པས་གནས་ཁང་བརྒྱན་པ་སོགས་བཀོད་པའི་བྱེ་བྲག་ཚར་དུ་དངར་བ་བྱ། གལ་ཏེ་འབྱོར་པ་དམན་ལ་མོས་པ་དང་ལྡན་པ་དག་གིས་ནི་ཇི་ལྟར་འབྱོར་བའི་མེ་ཏོག་གིས་མཚོན། ལྷག་མ་དམིགས་པས་ཁྱད་པར་བྱ་ཡི་མཐའ་གཅིག་ཏུ་ངེས་བཟུང་མེད་དོ། །སྟ་གོན་དུ་བྱ་བ་དེ་ཙམ་གྱིས་གྲུབ་ནས། ཆོ་གའི་ལས་རིམ་ལ་འཇུག་པ་ན་ཁྲུས་དང་གཙང་སྦྲ་བྱ། ཤེས་རབ་སྟོང་པ་ཉིད་དང་། ཐབས་སྙིང་རྗེ་ཆེན་པོས་ཀུན་ལ་ཁྱབ་པར་བལྟས་ཏེ། གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞིར་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་དང་། །གང་ཞིག་རྟེན་ནས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པ་སྟེ། །གང་གིས་སྟོང་ཉིད་ཤེས་དེ་བག་ཡོད་ཡིན། །ཞེས་པ་དག་དོན་དྲན་བཞིན་ཏུ་བརྗོད་པས་སྟོང་པ་ཉིད་ཀྱི་ཏིང་ངེ་འཛིན་ཅི་ནུས་སུ་བསྒོམ། དེ་ལས་ལངས་ནས་སེམས་ཅན་ཐམས་ཅད་ཀྱི་དོན་དུ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །
སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཅེས་ཚད་མེད་པ་བཞི་སྒོམ་ཞིང་། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པ་འདི་དག་གིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པ་ལན་གསུམ་གྱིས་བྱང་ཆུབ་ཀྱི་སེམས་ཡིད་ལ་བྱེད། བདེན་པ་དང་མོས་པ་ཙམ་གྱི་སྟོབས་ལ་བརྟེན་ནས་དེ་བཞིན་གཤེགས་པ་མཆོད་པའི་གནས་དང་ཡོ་བྱད་བྱིན་གྱིས་བརླབ་པ་ནི། དཀོན་མཆོག་གསུམ་གྱི་བདེན་པ་དང་། བྱིན་རླབས་དང་། ཚོགས་གཉིས་ཡོངས་སུ་རྫོགས་པའི་མཐུ་དང་། ཆོས་ཀྱི་དབྱིངས་ཀྱི་རང་བཞིན་གྱི་ཡོན་ཏན་དང་། བྱང་ཆུབ་སེམས་དཔའ་རྣམས་ཀྱི་ཞིང་དག་པའི་སྦྱོར་བ་ལ་སོགས་པ་སངས་རྒྱས་ཀྱི་ཞིང་ཡོངས་སུ་སྦྱངས་པའི་མཐུ་དང་། བདག་ཅག་རྣམས་ཀྱི་མོས་པའི་མཐུ་ལས་གནས་འདིར་ས་གཞི་རིན་པོ་ཆེ་སྣ་བདུན་པའི་རང་བཞིན་ལག་མཐིལ་ལྟར་མཉམ་པ་ཐ་གྲུ་ཆེ་ཞིང་ཡངས་པ། རེག་ན་འཇམ་ཞིང་བདེ་བ། ལྷའི་མེ་ཏོག་དྲི་ཞིམ་པོས་གཅལ་དུ་བཀྲམ་པ་ཡན་ལག་བརྒྱད་དང་ལྡན་པའི་ཆུའི་མཚོ་དང་རྫིང་བུ་དང་ལྟེང་ཀ་རིན་པོ་ཆེའི་ཕྱེ་མ་གྲམ་བུར་བདལ་ཞིང་ནོར་
བུའི་ཕ་གུས་མཐའ་བརྩིགས་པ། ཨུཏྤལ་དང་ཀུ་མུ་ཏ་དང་པདྨ་དུ་མས་མཛེས་པ་དང་། ཆུ་བྱ་སྐད་སྙན་པར་སྒྲོགས་པ་མང་པོས་གང་བ་རྣམས་དང་། རིན་པོ་ཆེའི་ཤིང་ལྗོན་པ་སྣ་ཚོགས་རྣམ་པར་རྒྱས་པ་ལ་སོགས་པ་སངས་རྒྱས་ཀྱི་ཞིང་ཐམས་ཅད་ཀྱི་རྒྱན་དང་། བཀོད་པ་ཡོན་ཏན་ཕུན་སུམ་ཚོགས་པ་ཐམས་ཅད་དང་ལྡན་པར་གྱུར་ཅིག །ལན་གསུམ་མམ་གཅིག །དེའི་དབུས་སུ་གཞལ་མེད་ཁང་ཆེན་པོ་རིན་པོ་ཆེ་སྣ་བདུན་མཆོག་ཏུ་འབར་བ་བཀོད་པ། འཇིག་རྟེན་གྱི་ཁམས་དཔག་ཏུ་མེད་པ་རྒྱས་པར་འགེངས་པའི་འོད་ཟེར་ཆེན་པོ་རབ་ཏུ་འབྱུང་བ། གནས་ཐ་དད་པ་ཤིན་ཏུ་རྣམ་པར་ཕྱེ་བ་མཐའ་ཡས་པ་རྣམ་པར་གནས་པ། རྒྱ་ཡོངས་སུ་མ་ཆད་པ། ཁམས་གསུམ་ལས་ཡང་དག་པར་འདས་པའི་སྤྱོད་ཡུལ་འཇིག་རྟེན་ལས་ཡང་དག་པར་འདས་པ་དེའི་བླ་མའི་དགེ་བའི་རྩ་བ་ལས་བྱུང་བ། ཤིན་ཏུ་རྣམ་པར་དག་ཅིང་དབང་སྒྱུར་བའི་རྣམ་པར་རིག་པའི་མཚན་ཉིད། དེ་བཞིན་གཤེགས་པའི་གནས། བྱང་ཆུབ་སེམས་དཔའི་དགེ་འདུན་དང་ལྡན་པ། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་མཐའ་ཡས་པ་རྣམ་པར་རྒྱུ་བ། ཆོས་ཀྱི་རོའི་དགའ་བ་དང་བདེ་བ་ཆེན་པོས་བརྟན་པ། སེམས་ཅན་
ཐམས་ཅད་ཀྱི་དོན་ཐམས་ཅད་ཡང་དག་པར་ཐོབ་པར་བྱེད་པས་ཉེ་བར་གནས་པ། ཉོན་མོངས་པའི་གནོད་པའི་དྲི་མ་ཐམས་ཅད་དང་བྲལ་བ། བདུད་ཐམས་ཅད་ཡོངས་སུ་སྤངས་པ། ཐམས་ཅད་ཀྱི་བཀོད་པ་ལས་ལྷག་པའི་དེ་བཞིན་གཤེགས་པའི་བཀོད་པའི་གནས། དྲན་པ་བློ་གྲོས་དང་རྟོགས་པ་ཆེན་པོས་ངེས་པར་འབྱུང་བ། ཞི་གནས་དང་ལྷག་མཐོང་གི་བཞོན་པ་ཡིན་པ། །རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་ཉིད་དང་། །སྨོན་པ་མེད་པ་ནས་འཇུག་པ། རིན་པོ་ཆེ་པདྨའི་རྒྱལ་པོ་ཡོན་ཏན་མཐའ་ཡས་པས་བརྒྱན་པའི་བཀོད་པ་ལ་བརྟེན་པའི་གཞལ་མེད་ཁང་ཆེན་པོར་གྱུར། དེའི་དབུས་སུ་ལྷ་དང་ཀླུ་དང་མི་ལ་སོགས་པའི་རིན་པོ་ཆེ་སྣ་ཚོགས་པའི་ཁྲིའི་སྟེང་དུ་ལྷ་མིའི་གོས་རིན་ཐང་མེད་པ་བཏིང་བའི་སྟེང་དུ། གཙང་ཞིང་དྲི་མ་མེད་པའི་པདྨའི་གདན་སྣ་ཚོགས་པ་བཤམས་པ་སོ་སོར་གསལ་བར་གྱུར། ཁྲི་དེ་དག་གི་སྟེང་དུ་རིན་པོ་ཆེ་སྣ་ཚོགས་དང་ལྷ་དང་མིའི་གོས་སྣ་ཚོགས་ལས་གྲུབ་པའི་གདུགས་དང་བླ་རེས་དང་འཕན་དང་ལྡ་ལྡི་དང་ལྷའི་མེ་ཏོག་མ་ན་དཱ་ར་བ་ལ་སོགས་པ་རྣམས་ཀྱི་ཆར་དང་། བླ་རེས་དང་གདུགས་དང་འཕན་དང་། ལྡ་ལྡི་ལ་སོགས་པ་མཛེས་པར་བྲེས་ཤིང་། ལོགས་རྣམས་ཀྱང་རིན་པོ་ཆེ་དང་། དར་དང་མེ་ཏོག་ལ་སོགས་པའི་དྲ་བ་
དང་དྲ་ཕྱེད་དང་འཕན་དང་ལྡ་ལྡི་ལ་སོགས་པས་མཛེས་པ་དང་། ས་གཞི་ལྷ་དང་མིའི་མེ་ཏོག་སིལ་མ་བཀྲམ་ཞིང་། མཆོད་ཡོན་མེ་ཏོག་བདུག་སྤོས་མར་མེ་དྲི་ཆབ་ཞལ་ཟས་རོལ་མོ་ལ་སོགས་པ་ཕུང་པོ་གསུམ་པའི་མདོ་དང་བཟང་པོ་སྤྱོད་པའི་སྨོན་ལམ་ལས་འབྱུང་བ་ལྟ་བུའི་མཆོད་པའི་སྤྲིན་གྱི་རྒྱ་མཚོ་ཕུལ་དུ་བྱུང་ཞིང་སྣ་ཚོགས་པ་བསམ་གྱིས་མི་ཁྱབ་པ་ནམ་མཁའི་ཁམས་ཀྱི་མཐའ་ཀླས་པར་རྒྱས་པར་གང་ཞིང་ཟད་མི་ཤེས་པ་དང་ལྡན་པར་གྱུར། དེ་དག་ཐུན་མོང་དུ་བྱིན་གྱིས་བརླབ་པ་ནི། དཀོན་མཆོག་གསུམ་གྱི་བདེན་པ་དང་། བྱིན་རླབས་དང་། ཚོགས་གཉིས་ཡོངས་སུ་རྫོགས་པའི་མཐུ་དང་། ཆོས་ཀྱི་དབྱིངས་ཀྱི་རང་བཞིན་གྱི་ཡོན་ཏན་དང་། བྱང་ཆུབ་སེམས་དཔའ་རྣམས་ཀྱི་ཞིང་དག་པའི་སྦྱོར་བ་ལ་སོགས་པ་སངས་རྒྱས་ཀྱི་ཞིང་ཡོངས་སུ་སྦྱངས་པའི་མཐུ་དང་། བདག་ཅག་རྣམས་ཀྱི་མོས་པའི་མཐུ་ལས་དེ་དེ་བཞིན་ཏུ་གྱུར་ཅིག །ལན་གསུམ་མམ་བསྡུ་ན་ཚར་གཅིག་བཟླ། སྙན་གསན་དབབ་ཅིང་སྤྱན་འདྲེན་པ་ནི་དད་པ་ཆེན་པོས་པུས་བཙུག་ཐལ་མོ་སྦྱར་ཏེ་མེ་ཏོག་བཀྲམ། སྤོས་ཐོགས་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། །རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བ། ཁ་ལོ་སྒྱུར་བ། བླ་
ན་མེད་པ་ལྷ་དང་མི་རྣམས་ཀྱི་སྟོན་པ་བཅོམ་ལྡན་འདས་འོད་དཔག་ཏུ་མེད་པ། སྐུ་ཚེ་དཔག་ཏུ་མེད་པ། འོད་ཀྱི་སྣང་བ་མཐའ་ཡས་པ། བྱང་ཆུབ་སེམས་དཔའ་དང་ཉན་ཐོས་ཀྱི་དགེ་འདུན་རྒྱ་མཚོ་ལྟ་བུའི་འཁོར་གྱིས་བསྐོར་བ། ཕྱོགས་བཅུའི་རྒྱལ་བ་སྲས་དང་བཅས་ཤིང་དམ་པའི་ཆོས་སྐྱོང་བའི་ཞབས་འབྲིང་གི་ཚོགས་ཀྱིས་ཡོངས་སུ་བསྐོར་བ་ཐམས་ཅད། བདག་སོགས་སེམས་ཅན་ཐམས་ཅད་ཀྱི་ཉེས་ལྟུང་གི་དྲི་མ་སྦྱང་ཞིང་བསོད་ནམས་ཀྱི་ཚོགས་སྤེལ་བའི་སླད་དུ་སྤྱན་འདྲེན་ཞིང་མཆིས་ན་ཐུགས་རྗེ་ཆེན་པོས་བསྐུལ་ཏེ་དེང་དུས་ལ་བབ་ཀྱིས་དགོངས་པར་མཛད་དུ་གསོལ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེ་རྣམ་སྦྱངས་ཤིང་། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པའི། །ཁྱེད་བཞེད་འགྲོ་དོན་མཛད་དུས་འདི་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང་། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་བདག་འཁོར་དང་བཅས་ཏེ་གཤེགས་
སུ་གསོལ། །བདེ་བ་ཅན་གྱི་ཞིང་ཁམས་ནས་སྔོན་གྱི་ཐུགས་དམ་ལས་བརྩམས་ཏེ། དེ་བཞིན་གཤེགས་པའི་རྫུ་འཕྲུལ་ཆེན་པོས་ནམ་མཁའི་ལམ་ལས་མངོན་པར་གཤེགས་ཏེ་གཞལ་མེད་ཁང་གི་དབུས་བྱང་ཆུབ་ཀྱི་ཤིང་རྣམ་པར་རྒྱས་པའི་དྲུང་དུ་སེངྒེའི་ཁྲི་ཆེན་པོ་ལ་དེ་བཞིན་གཤེགས་པ་འོད་དཔག་མེད། འཁོར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཉན་ཐོས་ཀྱི་དགེ་འདུན་དམ་པའི་ཆོས་སྐྱོང་བརྒྱ་མཚོ་དང་བཅས་མངོན་སུམ་དུ་བཞུགས་ཤིང་། ཐུགས་རྗེ་ཆེན་པོས་དགོངས་པར་གྱུར། བཞུགས་སུ་གསོལ་བ་ནི། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །ཞེས་དང་། །རིན་ཆེན་དུ་མ་ལས་གྲུབ་སེང་གེའི་ཁྲི། །ཡིད་འཕྲོག་སྣ་ཚོགས་གོས་ཀྱིས་བཀབ་པ་འདི། །སངས་རྒྱས་སྲས་དང་བཅས་ལ་ཕུལ་བ་ཡིས། །འགྲོ་ཀུན་རྡོ་རྗེའི་གདན་ལ་འཁོད་པར་ཤོག །སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །མཆོད་ཡོན་གྱི་ཆུ་བཟང་ཞལ་དུ་སྒྲེངས་ལ། །རྒྱལ་བའི་སྐུ་གསུང་ཐུགས་ལ་ཉོན་མོངས་མི་མངའ་ཡང་། །སེམས་ཅན་ལུས་
ངག་ཡིད་གསུམ་གདུང་བ་སེལ་སླད་དུ། །ཡན་ལག་བརྒྱད་ལྡན་ཆུ་གཙང་ཡིད་དུ་འོང་བ་འདི། །བཞེས་ཤིག་བཞེས་ཤིག་བདག་གི་མཆོད་ཡོན་འདི་དག་གོ། །བཏུང་བ་ཕུལ་བའི་བསོད་ནམས་ཀྱིས། །ཉོན་མོངས་བགྲེས། སྐོམ་ཞི་བ་དང་། །སྦྱིན་སོགས་ཡོན་ཏན་ལྡན་པ་ཡི། །སྐོམ་དང་མེད་པར་སྐྱེ་བར་ཤོག །ཆུ་དཱུརྦའི་ཆུན་པོས་བླངས་ཏེ་ཆོལ་ཟངས་སུ་ཞབས་བཀྲུ་བའི་ཚུལ་བྱ་ཞིང་། ངང་པའི་མཆོག་ལྟར་སོར་མོ་དྲ་བས་འབྲེལ། །འཁོར་ལོའི་མཚན་ཅན་མཛེས་པའི་ཞབས་ཟུང་ལ། །དག་བྱེད་ཕུལ་བས་སྐྱེ་བོ་མ་ལུས་པ། །རྫུ་འཕྲུལ་རྐང་པ་མཆོག་དང་ལྡན་གྱུར་ཅིག། ཁྲུས་གསོལ་ནི། ཕྱག་ལེན་མཐོང་བརྒྱུད་ལྟར་བྱས་ལ། ཁྲུས་ཁང་བསྐྱེད་པ་ནི། ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱིས་གཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་པ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །དྲི་དང་བཅས་པའི་བདག་ཆལ་དཱུརྦས་བྱུག་ཅིང་། སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོམ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ཁྲུས་གསོལ་ནི། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀུན་གྱིས་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་
གསོལ། །འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩལ་དུ་གསོལ། །དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །སྐྱ་ཕྱི་ཞིང་། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །གོས་ཟུང་ངུར་སྨྲིག་འབུལ་ཞིང་། །དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དེ་དང་དེ་དག་གིས། །འཕགས་པ་ཀུན་ཏུ་བཟང་དང་འཇམ་དབྱངས་དང་། །འཇིག་རྟེན་དབང་ཕྱུག་སོགས་ལའང་བརྒྱན་པར་བགྱི། །སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུར་འགྱུར་བའི། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །ཅེས་སྤྱན་འདྲེན་ཡན་ལག་བཅས་སོང་ནས། ཚོགས་བསགས་པའི་ཐོག་མར་ཕྱག་འཚལ་བ་ནི། འགྲེངས་ཏེ་གནས་ལྔར་འདུད་པའི་ཕྱག་བཅས། ན་མོ་མཉྫུ་ཤྲི་ཡེ། ན་མོ་ཨུཏྟ་མ་ཤྲི་ཡེ། ན་མཿསུ་ཤྲི་ཡེ་སྭཱ་ཧཱ། ཞེས་པའི་སྔགས་
ལན་གསུམ་སྔོན་ཏུ་འགྲོ་བས། །བླ་མ་མཉམ་མེད་སངས་རྒྱས་རིན་པོ་ཆེ། །དུས་གསུམ་བདེ་གཤེགས་སྲས་བཅས་ཐམས་ཅད་ཀྱི། །སྐུ་གསུང་ཐུགས་ཀྱི་རང་བཞིན་བྱིན་བརླབས་པ། །བཀའ་དྲིན་ཆེན་པོའི་ཞབས་ལ་ཕྱག་འཚལ་ལོ། །ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པར། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །བཅོམ་ལྡན་དེ་བཞིན་གཤེགས་པ་དགྲ་བཅོམ་པ། །ཡང་དག་རྫོགས་པའི་སངས་རྒྱས་བླ་ན་མེད། །ཚེ་དང་ཡེ་ཤེས་དཔག་མེད་རྣམ་ངེས་པ། །གཟི་བརྗིད་རྒྱལ་
པོའི་ཞབས་ལ་ཕྱག་འཚལ་ལོ། །འཇིག་རྟེན་འདྲེན་པའི་གཙོ་བོ་ཚེ་དཔག་མེད། །དུས་མིན་འཆི་བ་མ་ལུས་འཇོམས་མཛད་ཅིང་། །མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས། །མགོན་པོ་ཚེ་དཔག་མེད་ལ་ཕྱག་འཚལ་ལོ། །ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོའི་ཞབས་ལ་ཕྱག་འཚལ་ལོ། །མི་འཁྲུགས་པ་དང་ལྷུན་པོའི་རྒྱལ་མཚན་དང་། །ལྷུན་པོ་ལྷུན་པོ་ཆེན་པོ་ལྷུན་ཆེན་སྣང་། །འཇམ་སྒྲ་འཇམ་པའི་དབྱངས་སོགས་ཤར་ཕྱོགས་ཀྱི། །སངས་རྒྱས་དཔག་ཏུ་མེད་ལ་ཕྱག་འཚལ་ལོ། །ཉི་ཟླ་སྒྲོན་མ་གྲགས་པ་གྲགས་པའི་འོད། །འོད་འཕྲོ་ཕུང་པོ་ལྷུན་པོའི་སྒྲོན་མ་དང་། །བརྩོན་འགྲུས་མཐའ་ཡས་ལ་སོགས་ལྷོ་ཕྱོགས་ཀྱི། །སངས་རྒྱས་དཔག་ཏུ་མེད་ལ་ཕྱག་འཚལ་ལོ། །ཚེ་དཔག་མེད་དང་ཕུང་པོ་དཔག་མེད་དང་། །རྒྱལ་མཚན་དཔག་མེད་འོད་ཆེན་འོད་ཟེར་སྣང་། །རིན་ཏོག་འོད་ཟེར་དག་སོགས་ནུབ་ཕྱོགས་ཀྱི། །སངས་རྒྱས་དཔག་ཏུ་མེད་ལ་ཕྱག་འཚལ་ལོ། །འོད་འཕྲོའི་ཕུང་པོ་ཆེན་པོ་སྒྲོལ་བའི་དབྱངས། །རབ་ཏུ་ཐུལ་དཀའ་ཉི་འབྱུང་དྲྭ་ཅན་འོད། །འོད་ཀྱི་འབྱུང་གནས་ལ་
སོགས་བྱང་ཕྱོགས་ཀྱི། །སངས་རྒྱས་དཔག་ཏུ་མེད་ལ་ཕྱག་འཚལ་ལོ། །བདེ་གཤེགས་སེང་གེ་དང་ནི་གྲགས་པའི་མཚན། །གྲགས་འོད་ཆོས་དང་ཆོས་འཛིན་ཅེས་བྱ་དང་། །ཆོས་ཀྱི་རྒྱལ་མཚན་ལ་སོགས་འོག་ཕྱོགས་ཀྱི། །སངས་རྒྱས་དཔག་ཏུ་མེད་ལ་ཕྱག་འཚལ་ལོ། །ཚངས་དབྱངས་སྐར་རྒྱལ་སྤོས་མཆོག་སོས་ཀྱི་འོད། །སྤོས་ཕུང་མེ་ཏོག་ཤིན་ཏུ་རྒྱས་པའི་རིགས། །སཱ་ལའི་དབང་རྒྱལ་རིན་ཆེན་ཨུཏྤལ་འདབ། །མཐོང་བ་དོན་ཡོད་རི་རབ་ལྟ་བུ་སོགས། །སྟེང་ཕྱོགས་སངས་རྒྱས་རྣམས་ལ་ཕྱག་འཚལ་ལོ། །མ་རིག་མུན་སེལ་སྒྲོན་མའི་མཆག །སྡུག་བསྔལ་ནད་སེལ་སྨན་གྱི་ཕུལ། །དམ་ཆོས་དཀོན་མཆོག་ཐམས་ཅད་ལ། །ཕྱག་འཚལ་མཆོད་ཅིང་སྐྱབས་སུ་མཆི། །འཇམ་དབྱངས་ཕྱག་ན་རྡོ་རྗེ་སྤྱན་རས་གཟིགས། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་བྱམས་པ་ཀུན་ཏུ་བཟང་། །ཉེ་བའི་སྲས་ཆེན་བརྒྱད་ལ་ཕྱག་འཚལ་ལོ། །བསོད་ནམས་ཞིང་རབ་མཆོག་གྱུར་པ། །ལྷ་དང་མི་ཡི་མཆོད་པའི་གནས། །རྒྱལ་སྲས་རང་རྒྱལ་དགྲ་བཅོམ་པ། །ཚོགས་མཆོག་དགེ་འདུན་ལ་ཕྱག་འཚལ། །ཕྱོགས་བཅུར་བཞུགས་པའི་རྒྱལ་བ་མ་ལུས་དང་། །བྱང་ཆུབ་སེམས་དང་རྒྱལ་སྲས་མ་ལུས་ཚོགས། །
རྡུལ་གཅིག་སྟེང་ན་རྡུལ་སྙེད་བཞུགས་པ་ཡི། །བླ་མེད་འཕགས་པའི་ཚོགས་ལ་ཕྱག་འཚལ་ལོ། །རྫོགས་སངས་གང་དུ་བལྟམས་པ་དང་། །གང་དུ་བྱང་ཆུབ་ལ་རེག་དང་། །ཞི་བའི་འཁོར་ལོ་བསྐོར་བ་དང་། །ཟག་མེད་མྱ་ངན་འདས་པ་དང་། །བདེ་གཤེགས་གང་དུ་བཞུགས་པ་དང་། །འཆག་པ་དང་ནི་བཞེངས་པ་དང་། །སེང་གེ་ལྟ་བུར་གཟིམས་པ་ཡི། །གནས་དེ་ལ་ཡང་ཕྱག་འཚལ་ལོ། །སྟེང་དང་འོག་དང་བར་དག་དང་། །ཕྱོགས་དང་ཕྱོགས་མཚམས་རྣམས་སུ་ཡང་། །སྐུར་བཅས་སྐུ་ནི་མེད་པ་ཡི། །མཆོད་རྟེན་རྣམས་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །དེ་ནས་མཆོད་པ་ལ་སོགས་པའི་ཡན་ལག་ལྷག་མ་རྣམས་ཀྱི་ཐོག་མར་མཎྜལ་རྒྱས་པར་ཕུལ་ལ་ཡོངས་སུ་བསྔོ་བའི་འཁོར་ལོའི་མདོ་ལས་བྱུང་བ་འདི་དོན་དྲན་བཞིན་བཀླག་པར་བྱ་སྟེ། བཅོམ་ལྡན་འདས་འོད་དཔག་ཏུ་མེད་པ་ལ་སོགས་པ། ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་དང་། ས་བཅུ་ལ་རབ་ཏུ་གནས་པའི་བྱང་ཆུབ་སེམས་དཔའ་ཆེན་པོ་རྣམས་དང་། རྡོ་རྗེ་འཛིན་པ་རྣམས་བདག་ལ་དགོངས་སུ་གསོལ། །
བདག་མིང་འདི་ཞེས་བགྱི་བ་ཡང་དག་པའི་ལམ་ལ་བདེ་བར་གནས་པ་མ་ཐོབ་པས་དེང་བྱང་ཆུབ་ཏུ་སེམས་བསྐྱེད་དེ། །བདག་གི་ལུས་དང་སེམས་འདི་དུས་ཐམས་ཅད་དང་། རྣམ་པ་ཐམས་ཅད་དུ་དུས་གསུམ་གྱི་དེ་བཞིན་གཤེགས་པ་དང་། བྱང་ཆུབ་སེམས་དཔའ་ཐམས་ཅད་ལ་བདག་གིས་ལུས་འབུལ་གྱིས། །མཐུ་ཆེན་པོ་མངའ་བའི་དེ་བཞིན་གཤེགས་པ་རྣམས་དང་། ས་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔའ་ཐམས་ཅད་ཀྱིས་བདག་བཞེས་སུ་གསོལ། བདག་གི་བསོད་ནམས་དང་ཡེ་ཤེས་ཀྱི་ཚོགས་ཆེན་པོ་དང་། བརྩོན་འགྲུས་བརྩམས་པ་དང་། སེམས་ཀྱི་རྒྱ་བསྐྱེད་པ་དང་། རབ་ཏུ་ཞི་ཞིང་དུལ་བ་དང་། དབང་དང་། མངོན་པར་ཤེས་པ་དང་། ཕ་རོལ་ཏུ་ཕྱིན་པ་ལ་སོགས་པ་མྱུར་དུ་ཡོངས་སུ་རྫོགས་པར་གྱུར་ཅིག །ཡང་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་རྣམས་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་འཁོར་བ་ན་འཁོར་ཞིང་བཅིང་བ་ཆེན་པོས་བཅིངས་པར་གྱུར་པ། བཙོན་ར་ན་གནས་པ་ཡང་དག་པའི་ལམ་དང་བྲལ་བ། ཉོན་མོངས་པའི་དགྲའི་དབང་དུ་གྱུར་པ། མགོན་མེད་པ། སྐྱབས་མེད་པ། མིག་མེད་པ། རྟེན་མེད་པ། གཙོ་བོ་མེད་པ། འདྲེན་པ་མེད་པར་གྱུར་པ།
ལམ་གོལ་བར་སོང་པ། འཁོར་བ་ལ་གཞོལ་བ། མྱ་ངན་ལས་འདས་པ་ཆེན་པོ་ལ་རྒྱབ་ཀྱིས་ཕྱོགས་པ། ངན་འགྲོ་ལ་ཕྱོགས་པ། ལམ་ངན་པ་ལ་བསྟེན་པ། ལམ་ངན་པར་ལྷུང་བར་གྱུར་པ། རྟག་ཏུ་བཤེས་གཉེན་ངན་པས་ཟིན་ཅིང་དགེ་བའི་བཤེས་གཉེན་དང་བྲལ་བ། ཡང་དག་པ་དང་ཡང་དག་པ་མ་ཡིན་པ་དང་། ཕན་པར་འགྱུར་བ་དང་། ཕན་པ་མེད་པ་དང་། དོན་ཡོད་པ་དང་དོན་མེད་པ་ལ་རྨོངས་པར་གྱུར་པ། དགེ་བའི་ཆོས་དང་བྲལ་ཞིང་མི་དགེ་བ་ཆེན་པོ་བསྒྲུབས་པ། སངས་རྒྱས་དང་བྱང་ཆུབ་སེམས་དཔའ་དང་འཕགས་པ་རྣམས་ལ་རྟག་ཏུ་རྒྱབ་ཀྱིས་ཕྱོགས་པ། སྐྱེ་རྒ་ན་འཆིའི་སྡུག་བསྔལ་གྱིས་གཟིར་ཅིང་མི་བདེ་བ་ཆེན་པོ་བསྒྲུབས་པ། འཇིགས་པ་མེད་པ། བག་ཚ་བ་མེད་པ། སེམས་རྟག་ཏུ་ཡེངས་པར་གྱུར་པ། སྦྱིན་པ་དང་། ཚུལ་ཁྲིམས་དང་། ཞི་ཞིང་དབེན་པ་དང་། བསྒྲུབས་པ་དང་། བག་ཡོད་པ་དང་བྲལ་བར་གྱུར་པ། གཟུངས་དང་། ཏིང་ངེ་འཛིན་གྱི་སྒོ་དང་། ས་བཅུའི་ཆོས་ཀྱི་བཟོད་པ་ལ་བདེ་བར་གནས་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་དང་མཉམ་པ་ཉིད་ལས་རིང་དུ་གྱུར་པ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཚད་མེད་པ་བཞི་མི་སྒྲུབ་པ་དང་།
བྱང་ཆུབ་སེམས་དཔའི་ལྷག་པའི་ཚུལ་ཁྲིམས་དང་མི་ལྡན་པར་གྱུར་བ་དང་། ཆགས་པ་མེད་པ་དང་། ཐོགས་པ་མེད་པའི་ཡེ་ཤེས་ཆེན་པོ་ལས་རིང་དུ་གྱུར་པ་དང་། མྱ་ངན་ལས་འདས་པའི་རྒྱུ་དགེ་བའི་ཆོས་སྒྲུབ་པ་ལ་བདེ་བར་གནས་པ་མ་ཐོབ་པ་དང་། རྫུ་འཕྲུལ་དང་། སྟོབས་དང་། མི་འཇིགས་པ་དང་བྲལ་བར་འགྱུར་བ་དང་། ཡང་དག་པའི་དྲན་པ་ལ་མི་གནས་པ་དང་། བསྙེལ་བ་མི་མངའ་བའི་ཆོས་ཉིད་ལ་སྤྱོད་ཅིང་གཞོལ་བར་འཇུག་པ་མི་འགྲུབ་པ་དང་། བསོད་ནམས་བྱེད་པ་ལ་གཡེལ་ཞིང་ལྟ་བ་སྙོམས་པ་དང་ཐེ་ཚོམ་གྱི་སྒྲིབ་པས་བྱང་ཆུབ་ཀྱི་ཡན་ལག་བདུན་མངོན་པར་མི་རྟོགས་པ་དང་། དེ་བཞིན་དུ་འཕགས་པའི་ལམ་ཡན་ལག་བརྒྱད་མི་སྒྲུབ་པ་དང་། ཉོན་མོངས་པ་བརྒྱ་སྟོང་ཆེན་མེད་པས་ཟིལ་གྱིས་ནོན་ཅིང་སྡུག་བསྔལ་རྣམ་པ་མང་པོས་སྡུག་བསྔལ་ཞིང་ཡོངས་སུ་མནར་ཏེ། རྟག་ཏུ་གདུང་བ་བསམ་པ་ཞན་པས་ཁྲོ་ཞིང་རྟག་ཏུ་གཡེངས་པ། ཉོན་མོངས་པ་བརྒྱ་སྟོང་ལ་རྒྱུན་དུ་གཞོལ་བར་གྱུར་པ་དེ་བཞིན་གཤེགས་པ་དང་། བྱང་ཆུབ་སེམས་དཔའི་ཐུགས་རྗེ་ཆེན་པོ་ལ་གནས་པ་རྣམས་ཀྱིས་བདག་གི་སྐྱབ་མཛད་པར་གསོལ། བདག་གི་རྟེན་མཛད་པར་གསོལ། །བདག་གི་འདྲེན་པ་མཛད་པར་གསོལ། བདག་མྱུར་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་
ཀྱི་ལམ་དང་། བྱང་ཆུབ་སེམས་དཔའ་ཆེན་པོའི་ལམ་དང་། བྱང་ཆུབ་སེམས་དཔའ་ཆེན་པོའི་ཚོགས་སོགས་པ་ཡོངས་སུ་རྫོགས་པར་གྱུར་ཅིག །བདག་མྱུར་དུ་དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། དེ་བཞིན་གཤེགས་པའི་ཆོས་སྤོབས་པ་ཐོགས་པ་མེད་པ་དང་། ཏིང་ངེ་འཛིན་དང་། གཟུངས་དང་། རྣམ་པར་གྲོལ་བའི་ཡོན་ཏན་དང་། རྫུ་འཕྲུལ་དང་། མངོན་པར་ཤེས་པ་དང་། ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཅིག །བདག་བསོད་ནམས་ཕུན་སུམ་ཚོགས་པ་དང་ལྡན་པར་གྱུར་ཅིག །མཆོད་པའི་སྤྲིན་འབྱུང་བའི་གཟུངས་སྔགས་ནི། ཨོཾ་ན་མོ་བྷ་ག་ཝ་ཏེ་བཛྲ་སཱ་ར་པྲ་མརྡྷ་ནི། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾཾ་བུདྡྷཱ་ཡ། ཏདྱ་ཐཱ། ཨོཾ་བཛྲེ་བཛྲེ་མ་ཧཱ་བཛྲེ། མ་ཧཱ་ཏེ་ཛོ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་་བཛྲེ། སརྦ་ཀརྨ་ཨཱ་ར་་བིཤོ་དྷ་ན་བཛྲེ་སྭཱ་ཧཱ། ལན་གསུམ། སངས་རྒྱས་བཅོམ་ལྡན་འདས་མཐུ་ཆེན་པོ་མངའ་བ་ཐམས་ཅད་དང་། བྱང་ཆུབ་སེམས་དཔའི་ཚོགས་ཐམས་ཅད་བདག་ལ་དགོངས་སུ་གསོལ། དེང་བདག་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་པ་དང་།
རིམ་གྲོ་ཆེན་པོ་བགྱིས་ཏེ་ལུས་འབུལ་ལོ། །ཕྱོགས་བཅུའི་འཇིག་རྟེན་གྱི་ཁམས་ན་ཇི་སྙེད་རྒྱན་དང་། ཡོ་བྱད་བཟང་པོ་ཐམས་ཅད་རིན་པོ་ཆེའི་གཞལ་མེད་ཁང་རྣམ་པ་སྣ་ཚོགས་པ་དང་། རིན་པོ་ཆེའི་རྒྱན་ཐམས་ཅད་དང་། རིན་པོ་ཆེའི་ཤིང་དང་། རིན་པོ་ཆེའི་རི་དང་། རིན་པོ་ཆེའི་བ་དན་དང་། རིན་པོ་ཆེའི་དཀྱིལ་འཁོར་དང་། རིན་པོ་ཆེའི་དབྱིག་རྣམ་པར་བཀྲ་བ་དང་། རིན་པོ་ཆེའི་གདུགས་དང་། རིན་པོ་ཆེའི་རྒྱལ་མཚན་དང་། རིན་པོ་ཆེའི་དོ་ཤལ་གྱི་རྒྱན་དང་། མུ་ཏིག་གི་དྲྭ་བ་དང་། རིན་པོ་ཆེའི་སྣོད་དང་། རིན་པོ་ཆེའི་ཕུང་པོ་དང་། རིན་པོ་ཆེ་འོད་འཕྲོ་བ་དང་། རིན་པོ་ཆེའི་གླིང་དག་ན་ནོར་བུ་རིན་པོ་ཆེ་ཆེན་པོ་རྣམ་པར་དག་པའི་མར་མེའི་སྡོང་བུ་དང་། རིན་པོ་ཆེའི་དྲིལ་བུའི་སྒྲ་འཁྲོལ་བ་ལ་ནོར་བུ་རིན་པོ་ཆེ་འོད་འཕྲོ་བ་གསེར་བཙོ་མའི་སྤར་ཁབ་ཅན་གྱི་དོམ་དོམ་ཕོ་ལོང་དཔྱངས་པས་ཡོངས་སུ་ཁེབས་པ། གསེར་གཙོ་མའི་མེ་ཏོག་འཛམ་བུའི་གསེར་གྱི་ཟེ་བ་ཅན། གསེར་གྱི་ཤིང་ལྗོན་པས་དཀྲིས་པ། གསེར་གྱི་ཕོ་བྲང་སྣ་ཚོགས་རིན་པོ་ཆེའི་སྤྲིན་ཆགས་པ། རིན་པོ་ཆེའི་ཐིགས་པ་ཆར་དུ་འབབ་པ། རིན་པོ་ཆེ་རྣམ་པ་མང་པོའི་མཛོད་ཀྱི་ཕོ་བྲང་། ལྷ་རྫས་ཀྱི་ནོར་བུས་རྩིག་ངོས་སྤྲས་པ། རིན་པོ་ཆེའི་ཤིང་ཐམས་ཅད་རིག་འཛིན་ཆེན་པོའི་སྐྱེད་མོས་ཚལ་གྱི་རབ་ཡིད་དུ་
འོང་བ། རིན་པོ་ཆེའི་ཕོ་བྲང་དང་། གནས་དང་། ཤིང་དང་། ནགས་ཚལ་ལ་སོགས་པ་ཐམས་ཅད་ཀྱང་ཡིད་དུ་འོང་བ་དེ་ལྟ་བུ་བདག་པོ་མེད་པ་འཛིན་པ་མེད་པ་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཡོངས་སུ་བསྔོ་ཞིང་དབུལ་ལོ། །འཛམ་བུའི་གླིང་ན་སྨན་བཟང་པོ་རིང་དུ་འཚོ་བར་བྱེད་པ་ལ་སོགས་པའི་རྣམ་པ་ཇི་སྙེད་ཡོད་པ་དང་། ནོར་བུ་རིན་པོ་ཆེས་སེམས་ཅན་ཐམས་ཅད་ཀྱི་རེ་བ་ཡོངས་སུ་སྐོང་བ་དང་། མ་གཡོས་པར་རང་བཞིན་གྱིས་བདའ་བའི་ཞལ་ཟས་བཟང་པོ་དང་། སྤོས་ཀྱི་ཤིང་ལྗོན་པ་རྣམ་པ་སྣ་ཚོགས་པ་དང་། ཙནྡན་གྱི་ཤིང་དང་། ཨ་ག་རུ་དང་། ཙནྡན་དམར་པོ་དང་། ལོ་མཆེ་ཞིང་མེ་ཏོག་རྟག་པར་བསུང་གིས་གཟི་བར་བྱེད་པའི་ཤིང་རྣམ་པ་སྣ་ཚོགས་པ་དང་། ཡིད་དུ་འོང་བའི་ལྷ་རྫས་ཀྱི་སྤོས་མ་བཟུང་བ་ཡོངས་སུ་མ་བཟུང་བ་དང་། དཔག་བསམ་གྱི་ཤིང་རྣམ་པ་སྣ་ཚོགས་པ་དང་། རྒྱ་མཚོ་ཆེན་པོའི་ནང་ནས་འབྱུང་བ་ནོར་བུ་རིན་པོ་ཆེ་རྣམ་པ་སྣ་ཚོགས་ཡིད་བཞིན་གྱི་ནོར་བུ་རིན་པོ་ཆེ་ལ་སོགས་པ་དང་། རི་རབ་ལྷུན་པོ་དང་། རི་ཏི་སེ་དང་། སྤོས་ཀྱི་རི་དང་། རིམ་ལ་ཡ་དང་། རི་བཏང་བཟུང་དང་། རི་མ་ཧ་ལ་དང་། རྡོ་རྗེའི་རི་ལ་སོགས་ཏེ་རི་ཆེན་པོ་རྣམ་པ་དེ་དག་གི་རིན་པོ་ཆེའི་ཟོམ་སྣ་
ཚོགས་དང་། རིན་པོ་ཆེའི་སྟེགས་དང་། རྡོ་བ་རིན་པོ་ཆེ་དང་། རིན་པོ་ཆེའི་ཕུག་དང་། རིན་པོ་ཆེའི་ཕོ་བྲང་དང་། རིན་པོ་ཆེའི་རྒྱན་དང་། རིན་པོ་ཆེའི་ཞོགས་མ་དང་། རིན་པོ་ཆེའི་ལམ་སྲང་མང་པོ་དང་། ནོར་བུ་རིན་པོ་ཆེའི་ཀ་བ་མང་པོ་དང་། རིན་པོ་ཆེའི་སྒྲོན་མེའི་འཁོར་ལོ་མང་པོ་དང་། བཻཌཱུརྻ་ལ་སོགས་ཏེ། ནོར་བུའི་རིགས་རྣམ་པ་མང་པོ་དང་། ཇི་ཙམ་དུ་གནམ་གྱི་སྟེང་ན་བདག་པོ་མེད་པའི་ལྷའི་ཕོ་བྲང་དང་ལྷའི་ནོར་རྣམ་པ་མང་པོ་ཡིད་དུ་འོང་ཞིང་བལྟ་བར་འོས་པ་དང་། ལྷའི་རོལ་མོ་ཡོ་བྱད་རྣམ་པ་མང་པོ་རླུང་གི་ངད་ཀྱིས་བསྐྱོད་པ་ཙམ་གྱི་སྒྲ་སྙན་པ་འབྱིན་པ་དང་། ནམ་མཁའ་ལ་གནས་པའི་ཕོ་བྲང་ནས་རོལ་མོའི་སྒྲ་སྙན་པ་འབྱིན་པ་དང་། ལྷའི་རོལ་མོ་རྣམ་པ་མང་པོ་མ་བསྐྱོད་པར་སྒྲ་སྙན་པར་འབྱིན་པ་དང་། ལྷའི་བྱ་སྣ་ཚོགས་ནམ་མཁའི་ཕོ་བྲང་ནས་སྙན་པའི་སྒྲ་སྣ་ཚོགས་འབྱིན་པ་དང་། རིན་པོ་ཆེའི་སྤྲིན་སྣ་ཚོགས་ལས་སྒྲ་སྙན་པ་ཆེན་པོ་འབྱུང་བ་དང་། ལྷའི་ནོར་བུ་རིན་པོ་ཆེ་དབྱངས་སྙན་པའི་སྒྲ་སྒྲོགས་པ་དང་། གཞན་ཡང་ལྷའི་དྲིའི་ཤིང་དང་། མེ་ཏོག་གི་ཤིང་མང་པོ་དང་། ཕྲེང་བའི་ཤིང་དང་། བྱུག་པ་མང་པོ་དང་། བདུག་པའི་སྤོས་ཀྱི་ཤིང་དང་། སྒྲོན་མའི་ཤིང་དང་། རྒྱལ་མཚན་གྱི་ཤིང་དང་། བ་དན་གྱི་ཤིང་
དང་། རིན་པོ་ཆེའི་ཤིང་ལ་སོགས་པ་དེ་དག་ཐམས་ཅད་མ་བཟུང་བ་ཡོངས་སུ་མ་བཟུང་བ་དེ་དག་ཐམས་ཅད་ཀུན་ཀྱང་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་དབུལ་ལོ། །ཇི་ཙམ་དུ་དེ་བཞིན་གཤེགས་པ་ཐམས་ཅད་ཀྱི་སྤྱན་གྱིས་གཟིགས་པའི་སངས་རྒྱས་ཀྱི་ཞིང་དག་ན་མཆོད་པའི་སྤྲིན་ཆེན་པོ་མེ་ཏོག་གི་སྤྲིན་དང་། སྤོས་ཀྱི་སྤྲིན་དང་། ཕྲེང་བའི་སྤྲིན་དང་། བདུག་སྤོས་ཀྱི་སྤྲིན་དང་། བྱུག་སྤོས་ཀྱི་སྤྲིན་དང་། རིན་པོ་ཆེའི་གདུགས་ཀྱི་སྤྲིན་དང་། རིན་པོ་ཆེའི་རྒྱལ་མཚན་གྱི་སྤྲིན་དང་། རིན་པོ་ཆེའི་བ་དན་གྱི་སྤྲིན་དང་། །རིན་པོ་ཆེའི་གོས་ཀྱི་སྤྲིན་དང་། །རིན་པོ་ཆེའི་རྣམ་པའི་སྤྲིན་དང་། །རིན་པོ་ཆེའི་ཕུང་པོའི་སྤྲིན་ལ་སོགས་ཏེ། རིན་པོ་ཆེ་ཆེན་པོའི་སྤྲིན་རྣམ་པ་དེ་དག་དང་། གཞན་ཡང་སྤོས་ཀྱི་འབྲུ་མར་གྱིས་མར་མེའི་སྣོད་ཆེན་པོ་བཀང་བ་སྟོང་གི་འཇིག་རྟེན་གྱི་ཆད་དང་མཉམ་པ། མར་མེའི་སྙིང་པོ་རི་རབ་ཀྱི་ཚད་ཙམ་པ། སྒྲོན་མར་བྱས་ཏེ་སངས་རྒྱས་བཅོམ་ལྡན་འདས་དེ་དག་ཐམས་ཅད་དང་། བྱང་ཆུབ་སེམས་དཔའ་ཆེན་པོ་རྣམས་ལ་མཆོད་ཅིང་དབུལ་ལོ། །དེ་བཞིན་ཏུ་མཆོད་པ་རྣམ་པ་སྣ་ཚོགས་ཀྱིས་མཆོད་པའི་བསོད་ནམས་དམ་པ་ཇི་ཙམ་པ་དེ་དག་ཐམས་ཅད་བླ་ན་མེད་པའི་བྱང་ཆུབ་ཏུ་ཡོངས་སུ་བསྔོའོ། །གང་འདས་པའི་
སངས་རྒྱས་བཅོམ་ལྡན་འདས་རྣམས་ཀྱིས་དགེ་བ་མང་པོ་བརྩམས་ཏེ། དམིགས་སུ་མེད་པའི་ཚུལ་གྱིས་བྱང་ཆུབ་ཏུ་ཡོངས་སུ་བསྔོས་པ་དེ་བཞིན་ཏུ་བདག་གིས་ཀྱང་བསོད་ནམས་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །སངས་རྒྱས་བཅོམ་ལྡན་འདས་བྱང་ཆུབ་ཀྱི་སྙིང་པོར་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་ཆེན་པོ་ནི་བསྐོར། བདུད་ཀྱི་སྡེ་རྣམས་ནི་ཕམ་པར་བྱས་ནས་མྱ་ངན་ལས་འདའ་བར་གཤེགས་པར་དགོངས་པ་ལ་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་བསྐལ་པ་ཆེན་པོ་གཅིག་ཚང་བར་བཞུགས་པར་གསོལ་ལོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། སེམས་ཅན་ཐམས་ཅད་ཀྱིས་བསོད་ནམས་ཅི་བསྒྲུབས་པ་དེ་དག་ཐམས་ཅད་ལ་རྗེས་སུ་ཡི་རང་ངོ་། །དུས་གསུམ་གྱི་དེ་བཞིན་གཤེགས་པ་དང་། བྱང་ཆུབ་སེམས་དཔའ་ཐམས་ཅད་ཀྱིས་སྡིག་པ་དང་མི་དགེ་བའི་ལས་ཀྱི་སྒྲིབ་པ་ཐམས་ཅད་བཤགས་པ་དེ་བཞིན་ཏུ་བདག་གིས་ཀྱང་ཡོངས་སུ་བཤགས་ཤིང་ཡོངས་སུ་སྦྱོང་ངོ་། །ཞེས་བརྗོད་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མངོན་སུམ་དུ་དམིགས་པའི་སྤྱན་སྔར་གསང་སྔགས་འདི་ལན་བརྒྱ་རྩ་བརྒྱད་བཟླས་སོ། །ཨོཾ་སམྦྷ་ར་སམྦྷ་ར། བྷི་མ་ན་ས་ར། མ་
ཧཱ་ཛཱ་བཱ་ཧཱུྃ། དེ་ནས། །མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པའི་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པ་མཆོག་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་དག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །
འཁོར་ལོ་བླ་ན་མེད་པ་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །ཞེས་དང་། དེ་བཞིན་གཤེགས་པ་འོད་དཔག་ཏུ་མེད་པ་ལ་སོགས་པ། ཕྱོགས་བཅུའི་སངས་རྒྱས་སྲས་དང་བཅས་པ་སྤྱན་དྲངས་ཏེ་ཕྱག་འཚལ་བ་དང་། མཆོད་ཅིང་སྡིག་པ་བཤགས་པ་དང་། དགེ་བ་ལ་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་ཞིང་མྱ་ངན་ལས་མི་འདའ་བར་གསོལ་བ་བཏབ་པ་དང་། དེ་དག་གི་མཐུ་དཔལ་དང་བྱིན་གྱི་རླབས་ཀྱི་སྟོབས་ཀྱིས་བདག་ཅག་གི་ཐོག་མ་མ་མཆིས་པའི་འཁོར་བ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་གྱུར་ཅིག །ལུས་ལ་ནད་མེད་པ་དང་ཚེ་རིང་བར་གྱུར་ཅིག །འཇིག་རྟེན་དང་འཇིག་རྟེན་ལས་འདས་པའི་དཔལ་ཕུན་སུམ་ཚོགས་པ་ལ་མངའ་བརྙེས་པར་གྱུར་ཅིག །མཐར་ཚོགས་གཉིས་ཡོངས་སུ་རྫོགས་ནས་རྡོ་རྗེའི་སྐུ་ཆོས་ཀྱི་རྒྱལ་པོ་སངས་
རྒྱས་བཅོམ་ལྡན་འདས་ཀྱི་གོ་འཕང་བརྙེས་པར་གྱུར་ཅིག །ཡུལ་ཁམས་ཐམས་ཅད་དུའང་མི་ནད་དང་ཕྱུགས་ནད་དང་ལོ་ཉེས་པ་དང་དགྲའི་གནོད་པ་ལ་སོགས་པ་བཀྲ་མི་ཤིས་པའི་བག་ཅི་ཡང་མི་འབྱུང་བར་གྱུར་ཅིག །ཆར་ཆུ་དུས་སུ་བབས་ཏེ་ལོ་ཕྱུགས་འཕེལ་ཞིང་རྒྱས་པ་དང་། བདེ་སྐྱིད་ཀྱི་དཔལ་ཕུན་སུམ་ཚོགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཀྱང་བདེ་བ་དང་ལྡན་སྡུག་བསྔལ་དང་བྲལ་ཏེ་ཚོགས་གཉིས་རྫོགས་ནས་སངས་རྒྱས་པར་གྱུར་ཅིག །ཁྱད་པར་དུ་བདག་དང་ཕ་མ་སྦྱིན་པའི་བདག་པོས་གཙོར་བྱས་བཟང་ངན་གྱི་འབྲེལ་བས་བསྡུས་པའི་སེམས་ཅན་ཐམས་ཅད་ཚེ་འདི་འཕོས་མ་ཐག་པར་སྲིད་པ་གཞན་ཏུ་ཉིང་མཚམས་མི་སྦྱོར་བར་སངས་རྒྱས་ཀྱི་ཞིང་བདེ་བ་ཅན་ཏུ་བརྫུས་ཏེ་སྐྱེས་ནས་རྫོགས་པའི་སངས་རྒྱས་འོད་དཔག་ཏུ་མེད་པ་ལ་དམ་པའི་ཆོས་མཉན་ཅིང་བྱང་ཆུབ་ཀྱི་སྤྱོད་པ་ཡོངས་སུ་རྫོགས་པར་གྱུར་ཅིག །དེ་ནས་སྤྲོ་ཞིང་ནུས་ན་ཤིང་རྟ་ཆེན་པོ་ལུགས་གཉིས་དང་འབྲེལ་བའི་བྱང་ཆུབ་ཏུ་སེམས་བསྐྱེད་པ་རྒྱས་པར་བླང་། མདོར་བསྡུ་ན། བྱང་ཆུབ་སྙིང་པོར་མཆིས་ཀྱི་བར། །སོགས་ལན་གསུམ། ཇི་ལྟར་སྔོན་གྱི་བདེ་གཤེགས་ཀྱིས། །སོགས་ལན་གསུམ་གྱིས་སྐྱབས་གསུམ་སྔོན་ཏུ་འགྲོ་བའི་སྨོན་འཇུག་གི་སེམས་བཟང་ལ། དེང་དུས་བདག་ཚེ་སོགས་མཇུག་གི་ཆོ་གའང་
བརྗོད་དོ། །སླར་ཁྱད་པར་དུ་མཆོད་ཅིང་སྨོན་ལམ་གདབ་པ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བདུན་ནམ་ཉེར་གཅིག་བརྒྱ་རྩ་སྐབས་བསྡུ་ན་བརྗོད་ཅིང་། ནུས་ན་ཕྱག་འཚལ་བའི་གཟུངས་སྔོན་ཏུ་འགྲོ་བས་དངོས་སུ་ཕྱག་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །གསུམ་རེའམ་བདུན་བརྗོད། །འཕགས་པའི་ཚོགས་དེ་དག་ཐམས་ཅད་ལ་མཆོད་ཡོན་དང་བྱུག་པ། མེ་ཏོག་དང་བདུག་སྤོས། མར་མེ་དང་ཞལ་ཟས། རོལ་མོ་དང་སིལ་སྙན། གདུགས་དང་བ་དན་ལ་སོགས་པ་དངོས་སུ་ཅི་འབྱོར་པ་འདི་དག་དང་ཕྱོགས་བཅུ་ན་བདག་པོས་ཡོངས་སུ་མ་བཟུང་བའི་ལྷ་དང་མིའི་རྫས་དམ་པ་བདེ་བའི་ཡོ་བྱད་ཕུན་སུམ་ཚོགས་པ་ཐམས་ཅད་དང་གཟུངས་དང་རིག་པའི་མཐུ་དང་མོས་པའི་སྟོབས་ཀྱིས་བསྐྱེད་པའི་མཆོད་པའི་སྤྲིན་བཟང་པོ་སྤྱོད་པའི་སྨོན་ལམ་ལས་བྱུང་བ་རྒྱ་མཚོ་ཐམས་ཅད་ཀྱིས་ནམ་མཁའི་ཁམས་ཀྱི་མཐའ་ཀླས་པ་ཐམས་ཅད་རྒྱས་པར་
བཀང་སྟེ། འབུལ་ལོ་མཆོད་དོ། །ཆེ་གེ་ཞེས་བྱ་བ་དང་། བདག་ཅག་གིས་ཐོག་མ་མ་མཆིས་པ་ནས་འཁོར་བ་ན་འཁོར་བའི་ཚེ་རབས་ཐམས་ཅད་དུ་སྡིག་པ་མི་དགེ་བའི་ལས་མདོར་ན་མི་བགྱི་བར་རིགས་པའི་ལས་ནི་བགྱིས་བགྱི་བར་འོས་པའི་ལས་མ་བགྱིས་པ་ལ་སོགས་པ་དངོས་སྡིག་ཅི་མཆིས་པ་ཐམས་ཅད་ཡང་དག་པར་འཆགས་སོ། །དུས་གསུམ་གྱི་འཕགས་པ་དང་སྐྱེ་བོའི་དགེ་བ་མཐའ་དག་གི་བསོད་ནམས་ཐམས་ཅད་ལ་རྗེས་སུ་ཡི་རང་ངོ། །ཕྱོགས་བཅུའི་རྒྱལ་བ་ཐམས་ཅད་ལ་ཆོས་ཀྱི་འཁོར་ལོ་བླ་ན་མེད་པ་བསྐོར་བར་བསྐུལ་ལོ། །འཇིག་རྟེན་གྱི་སྒྲོན་མེ་གང་དག་མྱ་ངན་ལས་འདའ་བའི་ཚུལ་སྟོན་པར་བཞེད་པ་དེ་དག་ཐམས་ཅད་ལ་མྱ་ངན་ལས་མི་འདའ་བར་འཇིག་རྟེན་གྱི་དོན་མཛད་ཅིང་ཡུན་རིང་དུ་བཞུགས་པར་གསོལ་བར་འཚལ་ལོ། །དེང་རྒྱལ་བ་སྲས་དང་བཅས་པའི་ཚོགས་གདན་འཛོམ་པའི་སྤྱན་སྔར་དེ་བཞིན་གཤེགས་པ་འོད་དཔག་མེད་སྲས་དང་བཅས་པའི་མཚན་ནས་བརྗོད་ཅིང་ཕྱག་འཚལ་ཏེ་མཆོད་པ་ལ་སོགས་པའི་མཐུས། །དེ་བཞིན་གཤེགས་པ་འོད་དཔག་མེད་སྲས་དང་བཅས་པའི་སྔོན་གྱི་སྨོན་ལམ་དང་བྱང་ཆུབ་ཀྱི་སྤྱོད་པ་ཁྱད་པར་ཅན་དང་མཐུན་པར་བདག་ཅག་ལ་སོགས་པ་སེམས་ཅན་གང་དག་དེང་ནས་བྱང་ཆུབ་ཀྱི་
སྙིང་པོ་ལ་མཆིས་ཀྱི་བར་དུ། ལན་འགའ་ཡང་འདོད་པ་དང་། གནོད་སེམས་དང་། རྣམ་པར་འཚེ་བའི་རྣམ་རྟོག་དང་། འདོད་པའི་ཡོན་ཏན་གྱི་རྟོག་པ་དང་འདུ་ཤེས་མི་སྐྱེ་བར་གྱུར་ཅིག །དེས་ཤིང་འགྲོགས་ན་བདེ་བ་དང་འདོད་པ་ཆུང་ཞིང་ཆོག་ཤེས་པ་དང་། གཡོ་དང་སྒྱུ་མེད་པ་དང་། དང་ཚུལ་བཟང་ཞིང་སྙན་པར་སྨྲ་བར་དཀར་པོའི་ཆོས་ཡོངས་སུ་ཚོལ་བ་ལ་རྟག་ཏུ་བརྩོན་པར་གྱུར་ཅིག །དཀོན་མཆོག་གསུམ་དང་དགེ་བའི་བཤེས་གཉེན་ལ་གུས་པ་དང་བཅས་ཤིང་། བྱང་ཆུབ་སེམས་དཔའི་སྤྱོད་པ་ལ་རྟག་ཏུ་གོ་ཆ་བགོས་ཏེ་སེམས་ཅན་ཐམས་ཅད་དགེ་བའི་ཆོས་ཡང་དག་པར་འཛིན་ཏུ་འཇུག་པ་དང་། རྣམ་པར་ཐར་པའི་གནས་ལ་གནས་པར་གྱུར་ཅིག །ང་རྒྱལ་མེད་ཅིང་ངག་ལེགས་པར་བསྲུང་སྟེ་རང་གཞན་ལ་གནོད་པར་འགྱུར་བ་སྤང་། ཕན་པར་འགྱུར་བ་བསྒྲུབ་ཅིང་ཤེས་བཞིན་དང་མི་འབྲལ་བར་གྱུར་ཅིག །བདག་ཉིད་ཀྱང་ཕ་རོལ་ཏུ་ཕྱིན་པ་དྲུག་ལ་སྤྱོད་ཅིང་གཞན་དག་ཀྱང་དེ་ཉིད་ཡང་དག་པར་འཛིན་ཏུ་འཇུག་པར་གྱུར་ཅིག །གང་དང་གང་དུ་སྐྱེས་པ་དེ་དང་དེར་གཏེར་བྱེ་བ་ཁྲག་ཁྲིག་བརྒྱ་སྟོང་དུ་མས་ལས་འབྱུང་བ་དང་། སེམས་ཅན་བྱེ་བ་ཁྲག་ཁྲིག་བརྒྱ་སྟོང་གྲངས་མེད་དཔག་ཏུ་མེད་པ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལ་འགོད་པ་དང་། སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་ལ་མཆོད་པའི་བྱེ་བྲག་མཐའ་ཡས་པས་མཆོད་ཅིང་རིམ་གྲོར་བྱ་བ་དང་། ཆོས་ཀྱི་འཁོར་ལོ་རབ་ཏུ་བསྐོར་བར་བསྐུལ་ཞིང་མྱ་ངན་ལས་མི་འདའ་བར་གསོལ་བ་འདེབས་པར་གྱུར་ཅིག །སྐྱེ་བ་ཐམས་ཅད་དུ་ཁ་ནས་ཙནྡན་གྱི་དྲི་དང་། བ་སྤུའི་ཁུང་བུ་ནས་ཨུཏྤ་ལེའི་བསུང་འབྱུང་ཞིང་། མཚན་དང་དཔེ་བྱད་བཟང་པོས་ལུས་ལེགས་པར་བརྒྱན་ཅིང་། རྒྱན་དང་གོས་དང་ཟས་སྐོམ་དང་གླུ་དབྱངས་ལ་སོགས་པར་ཡོངས་སུ་སྤྱད་པ་ཇི་འདོད་པ་ཐམས་ཅད་བ་སྤུའི་ཁུང་བུ་དང་ལག་པའི་མཐིལ་ནས་འཇིག་རྟེན་ལས་ཁྱད་པར་འཕགས་པ་ཁོ་ན་འབྱུང་བར་གྱུར་ཅིག །བདག་ཅག་ལ་སོགས་པའི་སེམས་ཅན་ཐམས་ཅད་དགེ་བའི་རྩ་བ་ཡོངས་སུ་རྫོགས་ཤིང་། རྒྱལ་བ་རྣམས་ལ་ལྷག་པར་བྱ་བ་བྱས་ཏེ། སངས་རྒྱས་ཀྱི་བྱིན་གྱི་རླབས་ཀྱིས་མྱུར་དུ་མངོན་པར་རྫོགས་པར་འཚང་རྒྱ་བར་གྱུར་ཅིག གང་དུ་འཚང་རྒྱ་བའི་སངས་རྒྱས་ཀྱི་ཞིང་དེ་ན་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དྭགས་ཀྱི་ཡུལ་དང་། ལྷ་མ་ཡིན་གྱི་གནས་རིས་དང་དེར་ལྷུང་པའི་མིང་ཙམ་ཡང་མེད་པར་གྱུར་ཅིག །སངས་རྒྱས་ཀྱི་ཞིང་དེར་སྐྱེས་པའི་སེམས་ཅན་
ཐམས་ཅད་གསེར་གྱི་མདོག་ཏུ་གཅིག་ཅིང་ལྷ་དང་མིའི་ཡོན་ཏན་ཐ་དད་མེད་པར་སེམས་ཀྱི་སྐད་ཅིག་ཐང་ཅིག་ལ། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་དུ་འདའ་བའི་རྫུ་འཕྲུལ་གྱི་དབང་དམ་པ་ཐོབ་པ་དང་། ཚེ་རབས་དཔག་ཏུ་མེད་པའི་སྐྱེ་བ་དྲན་པ་དང་། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་མཐོང་བའི་ལྷའི་མིག་དང་། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་དུ་གཅིག་ཅར་ཆོས་ཉན་པའི་ལྷའི་རྣ་བ་དང་། སེམས་ཅན་དེ་སྙེད་ཀྱི་སྤྱོད་པ་ཡོངས་སུ་འཚལ་བའི་མངོན་ཤེས་དང་ལྡན་པར་གྱུར་ཅིག །རང་གི་ལུས་ལ་ཡོངས་སུ་འཛིན་པའི་འདུ་ཤེས་མི་འབྱུང་ཞིང་། ཡོངས་སུ་མྱ་ངན་ལས་འདས་པ་ཆེན་པོའི་བར་ཡང་དག་པ་ཉིད་ལ་ངེས་པར་གྱུར་ཅིག །སངས་རྒྱས་ཀྱི་ཞིང་དེ་ན་ཉན་ཐོས་འདུས་པ་ཚད་མ་མཆིས་པ་དང་། སེམས་ཅན་རྣམས་ལ་མི་དགེ་བའི་མིང་ཡང་མི་གྲགས་ཤིང་། བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་ཤ་སྟག་ཏུ་གྱུར་ནས། སྨོན་ལམ་གྱི་དབང་མ་གཏོགས་པར་ཚེའི་ཚད་ལ་ཚད་མེད་ཅིང་སྐྱེ་བ་གཅིག་གིས་ཐོགས་པ་དང་། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པར་གྱུར་ཅིག །བདག་གི་ལུས་ལས་ཕྱོགས་བཅུའི་སངས་རྒྱས་ཀྱི་ཞིང་ཚད་མེད་པ་ཁྱབ་
པའི་འོད་འབྱུང་ཞིང་འོད་ཐམས་ཅད་ཀྱི་ཕ་རོལ་ཏུ་ཕྱིན་པ་དང་། འོད་དེས་ཁྱབ་པའི་སེམས་ཅན་ཐམས་ཅད་ལྷ་དང་མི་ལས་འདས་པའི་བདེ་བ་དང་ལྡན་པ་དང་། སྐུ་ཚེའི་ཚད་བསྐལ་པ་གྲངས་མེད་དཔག་ཏུ་མེད་པར་འཚོ་ཞིང་གཞེས་ཏེ། སངས་རྒྱས་ཀྱི་ཞིང་མཐའ་ཡས་པ་དག་གི་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མ་མཆིས་པ་རྣམས་ཀྱིས་བསྔགས་པ་མཛད་པར་གྱུར་ཅིག །སེམས་ཅན་གང་དག་འཇིག་རྟེན་གྱི་ཁམས་གཞན་དག་ཏུ་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། བདག་གིས་མིང་ཐོས་ཏེ་སེམས་རབ་ཏུ་དང་བར་གྱུར་ལ་བདག་རྗེས་སུ་དྲན་པ་དེ་དག་གལ་ཏེ་འགུམ་པའི་དུས་ཉེ་བར་གནས་པའི་ཚེ། བདག་དགེ་སློང་གི་དགེ་འདུན་གྱིས་ཡོངས་སུ་བསྐོར་ཅིང་མདུན་ཏུ་བདར་བའི་མདུན་ཏུ་གཡེང་བ་མ་མཆིས་པའི་སེམས་ཀྱིས་གནས་ཏེ་བདག་གི་ཞིང་དུ་འདྲེན་པར་གྱུར་ཅིག །སངས་རྒྱས་ཀྱི་ཞིང་གྲངས་མེད་དཔག་ཏུ་མེད་པ་དག་ན་སེམས་ཅན་གང་དག་གིས་བདག་གི་མིང་ཐོས་ནས་སངས་རྒྱས་ཀྱི་ཞིང་དེར་སྐྱེ་བར་བགྱི་པའི་སླད་དུ་སེམས་གཏོང་ཞིང་དགེ་བའི་རྩ་བ་རྣམས་ཀྱང་ཡོངས་སུ་བསྔོ་བར་བགྱིད་ན། མཚམས་མེད་པ་ལྔ་དང་། དམ་པའི་ཆོས་སྤོང་བ་རྣམས་མ་གཏོག་
པ། ཐ་ན་སེམས་བསྐྱེད་པའི་འགྱུར་བ་བཅུས་སངས་རྒྱས་ཀྱི་ཞིང་དེར་སྐྱེ་བ་འཛིན་པར་གྱུར་ཅིག །སངས་རྒྱས་ཀྱི་ཞིང་དེར་སྐྱེས་པའི་སེམས་ཅན་དེ་དག་སྔ་དྲོ་རེ་བཞིན་སངས་རྒྱས་ཀྱི་ཞིང་གཞན་ཏུ་སངས་རྒྱས་དཔག་ཏུ་མེད་པ་མཆོད་ཅིང་བསྙེན་བཀུར་བ་དང་། རིན་པོ་ཆེ་དང་རྒྱན་དང་རོལ་མོ་གླུ་དབྱངས་ལ་སོགས་པ་སེམས་བསྐྱེད་མ་ཐག་ཏུ་འབྱུང་བ་དང་། ཐམས་ཅད་མཁྱེན་པ་ཉིད་དང་ལྡན་པའི་ཆོས་ཀྱི་བཀའ་མཆིད་གླེང་པ་དང་། སེམས་བསྐྱེད་མ་ཐག་ཏུ་ཞིང་གཞན་ན་བཞུགས་པའི་བཅོམ་ལྡན་འདས་རྣམས་ཀྱིས་མཆོད་པ་བཞེས་ཤིང་ཐུགས་བརྩེ་བས་དགོངས་པར་གྱུར་ཅིག །སེམས་ཅན་དེ་དག་སྲེད་མེད་ཀྱི་བུ་དང་རྡོ་རྗེ་ལྟར་མཁྲེགས་པའི་ལུས་དང་མཐུ་ཐོབ་པ་དང་། ལུང་ནོད་ཅིང་ཁ་ཏོན་བགྱི་བ་ཐམས་ཅད་སོ་སོ་ཡང་དག་པར་རིག་པ་ཐོབ་པ་དང་། སེམས་ཅན་དེ་དག་སྐྱེས་མ་ཐག་ཏུ་ཤེས་རབ་དང་སྤོབས་པ་མཐའ་ཡས་པ་ཐོབ་པ་དང་། བདེ་བ་ཚད་མེད་པ་ཐོབ་པ་དང་། སེམས་བསྐྱེད་མ་ཐག་ཏུ་ཆོས་གོས་རིན་པོ་ཆེ་དེ་བཞིན་གཤེགས་པས་གནང་བ་བགོ་བར་འཚལ་བ་དང་། སེམས་བསྐྱེད་མ་ཐག་ཏུ་ཇི་ལྟར་འདོད་པའི་ཆོས་ཐོབ་པར་གྱུར་ཅིག །སངས་རྒྱས་ཀྱི་ཞིང་དེའི་གཟི་བརྗིད་ཁ་དོག་འབྱོར་བའི་ཁྱད་པར་མཐའ་ཡས་པ་དང་། ཞིང་
དེའི་བྱང་ཆུབ་སེམས་དཔའ་དགེ་རྩ་ཆུང་བ་དེས་ཀྱང་བྱང་ཆུབ་ཀྱི་ཤིང་དཔག་ཚད་སྟོང་ཕྲག་དྲུག་བརྒྱ་ཙམ་དུ་མཐོ་བར་འཚལ་བ་དང་། སངས་རྒྱས་ཀྱི་ཞིང་ཚད་མ་མཆིས་པ་ཞིང་དེར་སྣང་བའི་འོད་གསལ་བ་དང་། ལྷ་དང་མི་ལས་འདས་པའི་བདུག་སྤོས་དང་མེ་ཏོག་གི་ཆར་འབབ་ཅིང་རོལ་མོའི་སྒྲ་དབྱངས་ཡིད་དུ་འོང་བའི་སྤྲིན་རྟག་ཏུ་འབྱུང་བ་དང་། དེར་སྐྱེས་པ་རྣམས་ཀྱིས་སངས་རྒྱས་ཀྱི་ཞིང་གི་རྒྱན་བཀོད་པ་ཇི་ལྟར་འདོད་པ་དེ་དག་རིན་པོ་ཆེའི་ཤིང་སྣ་ཚོགས་ལས་འཕྱང་སྟེ་འབྱུང་བར་གྱུར་ཅིག །ཀུན་ཏུ་སངས་རྒྱས་ཀྱི་ཞིང་གྲངས་མེད་ཅིང་བསམ་གྱིས་མི་ཁྱབ་པ་རྣམས་སུ་སེམས་ཅན་རྣམས་ཀྱིས་བདག་གི་མིང་ཐོས་པར་གྱུར་ཅིག །ཐོས་པ་ཙམ་གྱིས་བྱང་ཆུབ་སྙིང་པོའི་མཐའ་ཡི་བར་དུ་གཟུངས་ཐོབ་ཅིང་མ་ཉམས་པའི་ཚངས་པར་སྤྱོད་པ་ལ་གནས་པ་དང་། དབང་པོ་མ་ཚང་བར་མི་འགྱུར་བ་དང་། རིགས་བཟང་པོའི་རིགས་སུ་སྐྱེ་བ་ཐོབ་ཅིང་བྱང་ཆུབ་སེམས་དཔའི་སྤྱོད་པ་ལ་དགའ་བ་དང་། མཆོག་ཏུ་དགའ་བའི་དགེ་བའི་རྩ་བ་དང་འཕྲད་པར་གྱུར་ཅིག །བུད་མེད་གང་དག་བདག་གི་མིང་ཐོས་པ་ཙམ་གྱིས་བུད་མེད་ཀྱི་ལུས་སྤངས་ཏེ་བྱང་ཆུབ་ཀྱི་སྙིང་པོའི་བར་དུ་སྐྱེས་པའི་དབང་པོ་ཐོབ་པར་གྱུར་ཅིག །བདག་གི་མིང་
ཐོས་ནས་ཕྱག་འཚལ་བ་དེ་དག་བྱང་ཆུབ་སེམས་དཔའི་སྤྱད་པ་སྤྱོད་ཅིང་ལྷ་དང་བཅས་པའི་འཇིག་རྟེན་གྱིས་བསྟི་སྟང་བྱེད་པར་གྱུར་ཅིག །བདག་གི་མིང་ཐོས་མ་ཐག་ཏུ་ཤིན་ཏུ་རྣམ་པར་བྱེ་བ་དང་ཀུན་གྱི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་ཐོབ་ཅིང་། ཐོབ་མ་ཐག་ཏུ་ཕྱོགས་བཅུའི་དེ་བཞིན་གཤེགས་པ་དཔག་ཏུ་མེད་པ་མཐོང་ཞིང་བསྟི་སྟང་བགྱི་བ་དང་། ཏིང་ངེ་འཛིན་དེ་བྱང་ཆུབ་སྙིང་པོའི་བར་དུ་ཆུད་མི་འཛའ་བར་གྱུར་ཅིག །སེམས་ཅན་གང་དག་བདག་གི་མིང་ཐོས་པ་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དང་། བཟོད་པ་མཆོག་ཐོབ་སྟེ་སངས་རྒྱས་ཀྱི་ཆོས་རྣམས་ལས་ཕྱིར་མི་ལྡོག་པར་གྱུར་ཅིག །མདོར་ན་དེ་བཞིན་གཤེགས་པ་འོད་དཔག་མེད་དང་། འཕགས་པ་སྤྱན་རས་གཟིགས་དང་མཐུ་ཆེན་ཐོབ་པ་ལ་སོགས་པ་སངས་རྒྱས་སྲས་དང་བཅས་པ་རྣམས་ཀྱིས་བྱང་ཆུབ་མཆོག་ཏུ་ཐུགས་བསྐྱེད་ཅིང་སྨོན་ལམ་ཆེན་པོ་ཇི་ལྟར་མཛད་པ་དེ་དག་མ་ལུས་ཤིང་ལུས་པ་མེད་པ་བདག་སོགས་སེམས་ཅན་ཐམས་ཅད་ཀྱིས་འགྲུབ་པར་གྱུར་ཅིག །འདི་ནས་ཤི་འཕོས་ནས་ཀྱང་དེ་བཞིན་གཤེགས་པ་འོད་དཔག་མེད་ཀྱི་སངས་རྒྱས་ཀྱི་ཞིང་བདེ་བ་ཅན་ཏུ་པདྨའི་སྙིང་པོ་སེང་གེའི་ཁྲི་ལ་བརྫུས་ཏེ་སྐྱེ་ཞིང་། །
སྐྱེས་མ་ཐག་ཏུ་གཟུངས་དང་ཏིང་ངེ་འཛིན་ལ་སོགས་པ་ཡོན་ཏན་གྱི་ཚོགས་ཐམས་ཅད་མངོན་ཏུ་གྱུར་ཏེ་སྟོན་པ་བླ་ན་མེད་པ་འོད་དཔག་ཏུ་མེད་པ་ལ་སོགས་པ་ཕྱོགས་བཅུའི་སངས་རྒྱས་ཐམས་ཅད་ལས་བཀའ་ལུང་ཡང་དག་པར་ནོད། ཐུགས་མཉེས་པར་བྱེད་ཅིང་སྐད་ཅིག་སྐད་ཅིག་ལ་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་པར་འཇུག་པར་གྱུར་ཅིག །ཅེས་དང་། འདས་པའི་སངས་རྒྱས་རྣམས་དང་ཕྱོགས་བཅུ་ཡི། །ཞེས་སོགས་བཟང་པོ་སྤྱོད་པའི་སྨོན་ལམ་སྙིང་ཐག་པ་ནས་བཏབ་བོ། །དེ་ནས་དེ་བཞིན་གཤེགས་པ་བྱང་ཆུབ་ཀྱི་ཤིང་དང་འཁོར་གྱི་ཚོགས་དང་བཅས་པ་ཡིད་ལ་བྱེད་ཅིང་ཡུན་རིང་དུ་མཉམ་པར་བཞག །མཐར་དེ་ལས་འོད་ཟེར་གྱི་ཚོགས་མཐའ་ཡས་པ་བྱུང་། བདག་གཞན་སེམས་ཅན་ཐམས་ཅད་ལ་ཕོག །སྒྲིབ་གཉིས་བག་ཆགས་དང་བཅས་པ་སྦྱང་། ཏིང་ངེ་འཛིན་གྱི་སྒོ་དུ་མ་སྐྱེས། བདེ་བ་ཅན་ཏུ་སྐྱེ་ཞིང་སངས་རྒྱས་འོད་དཔག་མེད་མཇལ་བའི་སྐལ་པ་ཅན་ཏུ་བྱས་པར་མོས་ལ། དེ་བཞིན་གཤེགས་པ་འོད་དཔག་མེད་ལ་ཕྱག་འཚལ་ལོ། །ཏདྱ་ཐཱ། པདྨེ་པདྨ་ནི། པདྨ་ལོ་ཙ་ནི། པདྨ་སཾ་བྷ་བེ་སྭཱ་ཧཱ། ཞེས་དང་། ན་མོ་རཏྣ་ཏྲ་ཡཱ་ཡ། ན་མོ་བྷ་ག་བ་ཏེ། ཨ་མི་ཏ་བྷ་ཡ། ཡོངས་སུ་བསྔོ་བའི་རྒྱལ་པོ་ལས་འབྱུང་། ཏ་ཐཱ་ག་ཏཱ་ཡ། ཨརྷ་ཏེ་ས་མྱཀྶམྦུ་དྡྷཱ་ཡ། ཏདྱ་ཐཱ། ཡོངས་སུ་བསྔོ་བ་དང་། སྣང་བ་མཐའ་ཡས་རྗེས་སུ་དྲན་པ་སོགས་གཟུངས་མདོ་འགའ་ཞིག་ལས་ཕལ་ཆེར་
མཐུན་པར་འབྱུང་། ཨོཾ་ཨ་མི་ཏེ། ཨ་མི་ཏོདྡྷ་ཝེ། ཨ་མི་ཏ་སཾ་བྷ་ཝེ། ཨ་མི་ཏ་བི་ཀྲཱནྟེ། ཨ་མི་ཏ་གཱ་མི་ནཱི། ག་ག་ན་ཀཱི་རྟི་ཀ་རེ་སརྦ་ཀླེ་ཤ་ཀྵ་ཡཾ་ཀ་རི་སྭཱ་ཧཱ། བརྒྱའམ་ཉེར་གཅིག་བཟླ། རྗེས་ཀྱི་བྱ་བར་ཕྱག་མཆོད་རྒྱས་པར་འབུལ་ཞིང་ཡན་ལག་ལྷག་མ་དང་བཅས་པའི་ཞར་བྱུང་བདེ་བ་ཅན་ཏུ་སྨོན་ལམ་གདབ་པ་ནི། ཕྱོགས་བཅུ་མཐའ་ཡས་པ་ན་ཤེས་བྱའི་དོན་མ་ལུས་པར་ཁྱབ་པའི་བློ་མངའ་བ་ཕྱོགས་བཅུའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་རྒྱ་མཚོ་སྙེད་ལ་ཕྱག་འཚལ་ལོ། །སེམས་ཀྱི་རྙོགས་མ་ཡིད་གཉིས་བསལ་ནས་དང་པོར་ནི། །ཤཱཀྱའི་རྒྱལ་པོ་ཐུབ་ལ་སྤྱི་བོས་ཕྱག་འཚལ་ལོ། །བདེ་བ་ཅན་ན་བཞུགས་པའི་རྒྱལ་བ་འོད་དཔག་མེད། །བླ་མ་ལ་ཡང་དགའ་དང་གུས་པས་གདུང་བར་བགྱི། །གང་ཞིག་ཕྱོགས་ཀུན་དག་ནད་ལྟར་བྱུང་བ་ཡི། །འགྲོ་ལ་བྱམས་པའི་སངས་རྒྱས་ངེས་པར་བཞུགས་རྣམས་དང་། །འདས་དང་ཕྱིས་འབྱུང་བ་ཡི་རྒྱལ་བ་ཐམས་ཅད་ལ། །བདག་ནི་དགའ་བའི་ཡིད་ཀྱིས་ཡང་དག་མཆོད་པར་བགྱི། །ཞེས་དང་། མཆོད་པའི་སྤྲིན་གྱི་གཟུངས་བརྗོད་ཅིང་རོལ་མོ་དབུལ། ཐལ་མོ་སྦྱར་བ་དང་བཅས་ཏེ། ཡོན་ཏན་རྒྱ་མཚོ་དཔག་མེད་པ། །སངས་རྒྱས་དམ་ཆོས་འཕགས་པ་ཡི། །དགེ་འདུན་དུས་གསུམ་བཞུགས་པ་རྣམས། །མ་ལུས་པ་ལ་སྐྱབས་སུ་མཆི། །མི་དགེ་ཐམས་
ཅད་བཤགས་པར་བགྱི། །འགྲོ་བའི་དགེ་ལ་རྗེས་ཡི་རང་། །ཆོས་ཀྱི་འཁོར་ལོ་རབ་བསྐོར་བར། །རྫོགས་སངས་རྒྱས་ལ་བསྐུལ་མ་འཚལ། །ཀུན་མཁྱེན་སྤྱན་གྱིས་གཟིགས་པ་ཡི། །བདག་དགེ་ཆུང་དུ་གང་མཆིས་པ། །དེས་ནི་གཏན་དུ་བྲལ་བ་དག །ཐམས་ཅད་ཉེ་བར་ཞི་གྱུར་ཅིག །རྣམ་པ་ཀུན་མཆོག་ལྡན་པ་ཡི། །སྟོང་པ་ཤེས་པའི་ཏིང་ངེ་འཛིན། །བྱང་ཆུབ་བར་གྱི་ཚེ་རབས་སུ། །རྟག་ཏུ་བདེ་དང་ལྡན་པར་ཤོག །རྣམ་པར་མི་རྟོག་ལྷུན་གྱིས་གྲུབ། །རྟག་ཏུ་མཉམ་པར་བཞག་གྱུར་ཅིང་། །ཟླ་ཉི་ནོར་བུ་རོལ་མོ་ལྟར། །སེམས་ཅན་དོན་ལ་འཇུག་པར་ཤོག །ཇི་ལྟར་རྒྱལ་བ་མཁས་པ་རྣམས། །ཤེས་རབ་ཕ་རོལ་ཕྱིན་ཐབས་བསྔོ། །དེ་ལྟར་བདག་གིས་དཀར་པོ་རྣམས། །བྱང་ཆུབ་ཏུ་ནི་བསྔོ་བར་བགྱི། །དཀོན་མཆོག་གསུམ་ལ་དམིགས་པ་ཡི། །བདག་གི་ལུས་ངག་ཡིད་དགེ་དང་། །སྦྱིན་པ་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ལས་བྱུང་གང་། །དེ་དག་ཀུན་གྱིས་བདག་ཉིད་ནི། །ཚངས་པར་སྤྱོད་པ་ལྡན་པ་དང་། །འཇིག་རྟེན་མགོན་གྱི་བསྟན་པ་ལ། །རབ་བྱུང་མངོན་དགའ་དབང་ལྡན་ཞིང་། །སངས་རྒྱས་ཀུན་གྱིས་གསུང་རབ་ཀྱིས། །གཞུང་དོན་ཚིག་ལ་མཁས་གྱུར་ནས། །དམ་ཆོས་
ཡོངས་སུ་འཛིན་པ་དང་། །ལུས་དང་སྲོག་ལ་དགའ་མེད་ཤོག །བདག་ནི་འགུམ་པའི་དུས་བགྱིད་ཚེ། །ཕྱིན་ཅི་མ་ལོག་ཡིད་ཀྱིས་སུ། །སངས་རྒྱས་ཚེ་དཔག་མེད་མཐོང་ནས། །འདི་ནས་བདེ་བ་ཅན་དུ་མཆི། །བདུད་ཀྱི་སྤྱོད་ཡུལ་མངོན་གྱུར་ཚེ། །དྲང་སྲོང་ཆེན་པོ་ཚེ་དཔག་མེད། །རྟག་ཏུ་སྟོན་པ་མཛད་གྱུར་ཅིང་། །ས་བཅུ་ཐོབ་ནས་དེ་དག་གི། །རྣམ་པར་དག་པའི་རིམ་པ་ཡིས། །བྱང་ཆུབ་དམ་པ་ཐོབ་པར་ཤོག །སངས་རྒྱས་ཀུན་ཏུ་བཟང་པོ་ཉིད་ཐོབ་ནས། །བག་ཆགས་བཅས་པ་ཉེས་བསགས་རྩ་ནས་བཏོན། །ཡེ་ཤེས་སྒྲིབ་མེད་སྙིང་རྗེར་ལྡན་ནས་སུ། །འགྲོ་བ་རྣམས་ལ་སྨན་དང་བདེ་བར་བགྱི། །ཞེས་ཡོངས་སུ་བསྔོ་བའི་རྒྱལ་པོའི་མདོ་ལས་བྱུང་བ་ཙམ་མམ། སྤྲོ་ན། མངྒ་ལཾ་སྭ་སྟི་བྷ་བནྟུ། །ཤེས་བྱ་ཐམས་ཅད་མངོན་སུམ་གཟིགས་པ་པོ། །མཆོག་གི་ཡོན་ཏན་མ་ལུས་མཐར་ཕྱིན་པའི། །བླ་མེད་བརྙེས་པ་དེ་དང་དམ་པའི་ཆོས། །བྱང་ཆུབ་སེམས་དཔའི་ཚོགས་ལ་གུས་ཕྱག་འཚལ། །མཐའ་ཡས་ནམ་མཁའི་མཐའ་ཀླས་ཞིང་རྒྱ་མཚོ། །མཐའ་དག་སྐུ་ཡི་སྤྲུལ་པས་སྣང་བར་མཛད། །མཐའ་ཡས་འོད་མངའ་ཐུབ་ཆེན་ཚེ་དཔག་མེད། །མཐའ་མེད་འཁོར་བའི་འགྲོ་བ་ཀུན་ལ་ཁྱབ། །ཀུན་མཁྱེན་རྒྱལ་བ་རྣམས་ཀྱི་ཐུགས་རྗེའི་འོད། །ཀུན་
ནས་རབ་རྫོགས་ཡེ་ཤེས་འོད་འཕྲོ་བའི། །ཐུན་རྟོག་སྲིད་པའི་མུན་སྟུག་སྣ་ཚོགས་པ། །ཀུན་སེལ་རྣམ་འདྲེན་གཙོ་ལ་ཕྱག་འཚལ་ལོ། །འོད་ཕྲེང་གསལ་བས་ཞིང་ཀུན་ཁྱབ་མཛད་དེ། །ཡེ་ཤེས་སྤྱན་གྱིས་ཅུང་ཟད་གཟིགས་པས་ཀྱང་། །བདུད་སྡེའི་དཔུང་ཚོགས་མ་ལུས་ཞི་མཛད་པ། །དཔག་མེད་སྐུ་ཡི་འོད་ལ་ཕྱག་འཚལ་ལོ། །སྲིད་དང་ཞི་བ་རབ་སྤངས་རྣམ་གྲོལ་སྐུ། །ངོ་བོ་ཉིད་ཀྱི་དབྱིངས་ལས་མ་གཡོས་ཀྱང་། །གང་གད་འདུལ་བ་དེ་ལ་དེར་སྟོན་པའི། །མཚན་དང་དཔེ་བྱད་ཀྱིས་འབར་ཕྱག་འཚལ་ལོ། །ཆོས་ཀུན་རྣམ་འབྱེད་ཡན་ལག་དྲུག་ཅུ་ཡི། །གསུང་གཅིག་གིས་ཀྱང་ཕྱོགས་དུས་ཐམས་ཅད་དུ། །སེམས་ཅན་དབང་པོའི་རིམ་པ་ཇི་བཞིན་འཇུག །དཔག་མེད་གསུང་གི་འོད་ལ་ཕྱག་འཚལ་ལོ། །སྨྲ་བསམ་བརྗོད་པའི་ཡུལ་ལས་རབ་འདས་ཀྱང་། །འབད་མེད་ལྷུན་གྱིས་གྲུབ་པའི་ཡང་དག་ཚིག །གསུང་གི་གསང་བ་བསམ་གྱིས་མི་ཁྱབ་པའི། །ལེགས་པའི་ལམ་མཆོག་སྟོན་ལ་ཕྱག་འཚལ་ལོ། །རང་བཞིན་འོད་གསལ་མཁའ་ལྟར་མི་དམིགས་ཀྱང་། །རྣམ་པ་ཀུན་ལྡན་ཡེ་ཤེས་རོལ་པ་ཡིས། །ཤེས་བྱ་ཇི་སྙེད་མཁྱེན་པའི་དཀྱིལ་འཁོར་རྒྱས། །དཔག་མེད་ཐུགས་ཀྱི་འོད་ལ་ཕྱག་འཚལ་ལོ། །
ཆོས་ཀུན་ངོ་བོ་ཉིད་ཀྱིས་ཉེར་ཞི་ཞིང་། །མ་འགགས་སྣང་བ་རབ་ཏུ་བཀྲ་བ་གང་། །ཁྱོད་ཀྱི་གཟིགས་པའང་རྣམ་དག་ཞི་བ་དང་། །དེ་བཞིན་ཀུན་ཏུ་གཟིགས་ལ་ཕྱག་འཚལ་ལོ། །གང་ཞིག་འགྲོ་བའི་ཡིད་བཞིན་ཉེར་འཚོའི་གནས། །སྐུ་གསུང་ཐུགས་དང་ཡེ་ཤེས་དཔག་མེད་སྟོབས། །ཐུགས་རྗེའི་ཕྲིན་ལས་དཔག་ཏུ་མེད་པ་ཡི། །འོད་དཔག་མེད་ལ་རྟག་པར་ཕྱག་འཚལ་ལོ། །དངོས་དང་ཡིད་ཀྱི་སྤྲུལ་པའི་ལུས་ལོངས་སྤྱོད། །ཡོངས་སུ་མ་བཟུང་ནམ་མཁའི་མཐར་ཐུག་པ། །བློ་ཡིས་བླངས་ཏེ་བདེ་བར་གཤེགས་རྣམས་མཆོད། །དམན་ལ་བརྩེར་དགོངས་བདག་གི་འདི་དག་བཞེས། །བདག་དང་སེམས་ཅན་ཀུན་གྱི་སྡིག་པའི་ལས། །ཉེས་པར་གྱུར་གང་མཐོལ་ཞིང་བཤགས་པར་བགྱི། །སླན་ཆད་ནམ་ཡང་བགྱིད་པར་མ་གྱུར་ཅིག །ལས་ཀྱི་སྒྲིབ་པའང་གཏན་དུ་ཟད་བྱེད་ཤོག །རྒྱལ་དང་རྒྱལ་སྲས་ཉན་ཐོས་རང་རྒྱལ་དང་། །འགྲོ་བ་ཀུན་གྱི་དགེ་ལ་རྗེས་ཡི་རང་། །གང་ཡང་ཕྱོགས་བཅུའི་བདེ་གཤེགས་ཐམས་ཅད་ལ། །ཐེག་མཆོག་ཆོས་ཀྱི་འཁོར་ལོ་བསྐོར་བར་བསྐུལ། །བསྐལ་པ་རྒྱ་མཚོ་དཔག་ཏུ་མེད་པར་ཡང་། །མྱ་ངན་མི་འདའ་བཞུགས་པར་གསོལ་བ་འདེབས། །དུས་གསུམ་བསགས་པའི་དགེ་
བ་ཅི་ཡོད་པ། །གཞན་ཕན་དོན་ཕྱིར་བྱང་ཆུབ་ཆེན་པོར་བསྔོ། །ཇི་སྲིད་བྱང་ཆུབ་སྙིང་པོ་མ་ཐོབ་བར། །སྐྱེ་བ་འདི་དང་མ་འོངས་ཐམས་ཅད་དུ། །བླ་མ་དམ་པས་རྗེས་སུ་འཛིན་གྱུར་ཅིག །བྱང་ཆུབ་སེམས་ནི་ནམ་དུའང་ཉམས་མ་གྱུར། །རིགས་གཟུགས་ལོངས་སྤྱོད་ཕུན་སུམ་ཚོགས་པ་ཡི། །དལ་འབྱོར་མཆོག་ཐོབ་ཆོས་ལྡན་གྲོགས་དང་བཅས། །སངས་རྒྱས་བསྟན་ལ་རིམ་བཞིན་སློབ་པ་དང་། །འདུན་དང་བརྩོན་འགྲུས་བག་ཡོད་ལྡན་གྱུར་ཅིག །ངན་སོང་གསུམ་སོགས་མི་བཟད་འཁོར་བ་ཡིས། །མི་ཁོམ་འཇིག་རྟེན་རྣམས་སུ་སྐྱེ་འགྱུར་ལས། །གང་དེ་ཚེ་འདི་ཉིད་ལ་རབ་སྨིན་ནས། །ལན་གྲངས་གཞན་དུ་མྱོང་བར་མ་གྱུར་ཅིག །སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་ཐབས་མཁས་རྨད་བྱུང་དང་། །སྨོན་ལམ་སྟོབས་དང་ཡེ་ཤེས་རྒྱ་མཚོ་ཡི། །སྤྱོད་པ་ཐམས་ཅད་ཡོངས་སུ་རྫོགས་གྱུར་ཅིག །ལུས་དང་དེ་བཞིན་སྲོག་ལའང་ལྟོས་མེད་པར། །སེམས་ལས་རུང་ཞིང་དབེན་པར་རང་རྒྱུད་དུལ། །ལུང་དང་མངོན་པར་རྟོགས་པའི་ཆོས་ཀྱིས་འབྱོར། །བརྩེ་ལྡན་རྟག་ཏུ་ཤེས་བཞིན་ལྡན་གྱུར་ཅིག །འཁོར་བའི་དེ་བཞིན་ཉིད་གང་མྱ་ངན་འདས། །ཀུན་རྟོག་དེ་བཞིན་ཉིད་གང་ཡེ་
ཤེས་ཏེ། །གཅིག་དང་དུ་མའི་བདག་ཉིད་ལས་འདས་པའི། །ཆོས་ཉིད་རྟོགས་པའི་བློ་གྲོས་ལྡན་གྱུར་ཅིག །གང་ཡང་རྟེན་འབྱུང་ཟབ་མོའི་ཚུལ་གནས་པ། །ངེས་དོན་མཐར་ཐུག་སྤྲོས་བྲལ་ཆོས་ཀྱི་སྐུ། །སྟོབས་སོགས་ཡོན་ཏན་ཡེ་ཤེས་ཕྲིན་ལས་སོགས། །བདེ་གཤེགས་ཆོས་ལ་ཐོགས་མེད་འཇུག་གྱུར་ཅིག །གང་དུ་འགྲོ་བློ་མངོན་པར་དགའ་གྱུར་པའི། །ཡིད་ལུས་སྤྱོད་པ་རྣམ་པར་དག་པ་དང་། །དབྱངས་སྙན་ངག་གིས་ཆོས་ཚུལ་རྒྱ་མཚོ་སྟོན། །རྒྱལ་སྲས་རྣམས་ཀྱི་སྤྱོད་དང་མཚུངས་པར་ཤོག །ཇི་སྲིད་དེ་ལྟའི་ཡོན་ཏན་མ་ཐོབ་བར། །མི་མཐུན་ཕྱོགས་ལས་རྣམ་པར་རྒྱལ་བ་ཡི། །འཆི་མེད་ཚེ་དང་དཔལ་འབྱོར་རྒྱས་པ་དང་། །བསམ་པའི་དོན་ཀུན་ཡིད་བཞིན་འགྲུབ་གྱུར་ཅིག །ཚེ་འདིའི་སྣང་བ་ནུབ་པར་ཉེ་བ་ན། །བདེ་གཤེགས་སྲས་དང་བཅས་པས་བྱིན་རླབས་ཏེ། །འོད་གསལ་ལྷན་ཅིག་སྐྱེས་པའི་དོན་རྟོགས་ནས། །ལྷ་དང་ལྷ་མོ་དཔག་ཏུ་མེད་པ་ཡིས། །སྣ་ཚོགས་མཆོད་པས་བདག་གི་སྡུན་བསུ་ཞིང་། །རང་སྣང་དྲི་མེད་ཆོས་ཀྱི་དབྱིངས་རང་བཞིན། །རྣམ་དག་བདེ་བ་ཅན་གྱི་ཞིང་ཁམས་དེར། །བདེ་ཆེན་སེམས་ཀྱིས་བདེ་བླག་བགྲོད་གྱུར་ཅིག །ཞིང་དེར་དམར་སེར་འོད་ཀྱི་ཕུང་པོའི་དབུས། །རབ་མང་རིན་ཆེན་པདྨའི་
ཟེའུ་འབྲུལ། །དགེ་སློང་བྱེ་བ་འབུམ་དང་ཐབས་ཅིག་པའི། །ཆོས་རྗེ་འོད་དཔག་མེད་པ་མཐོང་གྱུར་ཅིག །རྒྱལ་སྲས་ཚོགས་ཀྱིས་ཡོངས་བསྐོར་བཅོམ་ལྡན་འདས། །ཐུན་མཚམས་འཆར་ཀའི་ཉིན་བྱེད་ལྟར་དམར་བ། །འོད་འབར་བལྟ་བས་མི་ངོམས་དེ་མཐོང་ནས། །བྱང་ཆུབ་ཆེན་པོའི་ལུང་བསྟན་ཐོབ་གྱུར་ཅིག །དགེ་ཚོགས་ལེགས་བྱས་རྣམ་པར་དཀར་བའི་འབྲས། །ངོ་མཚར་ཡོངས་རྫོགས་དཔལ་དང་ལྡན་པའི་ལུས། །དཔག་མེད་སྤྲུལ་ནས་བཅོམ་ལྡན་འདས་དེ་ལ། །བསྟོད་དབྱངས་རྒྱ་མཚོས་ཤིས་པ་བརྗོད་གྱུར་ཅིག །བྱམས་ཆེན་འཇམ་པའི་དབྱངས་དང་ཀུན་ཏུ་བཟང་། །སྤྱན་རས་གཟིགས་དབང་མཐུ་ཆེན་ཐོབ་ལ་སོགས། །རྒྱལ་སྲས་རྣམས་དང་རྟག་ཏུ་མི་འབྲལ་ཞིང་། །རྣམ་ཐར་ཚུལ་ལ་མཉམ་པར་འཇུག་གྱུར་ཅིག །རྣམ་ཐར་རྒྱ་མཚོ་སྒྱུ་མ་ལྟར་སྦྱོང་བས། །ཐེག་མཆོག་རྒྱ་མཚོའི་ཐབས་རྣམས་ཀུན་བཟུང་སྟེ། །ཡེ་ཤེས་རྒྱ་མཚོའི་རྟོགས་པ་རབ་ཐོབ་ནས། །སྲིད་པའི་མཚོ་ལས་འགྲོ་ཀུན་སྒྲོལ་གྱུར་ཅིག །ཞིང་ཁམས་རྒྱ་མཚོ་རྟག་ཏུ་སྦྱོང་བ་དང་། །ཚོགས་གཉིས་རྒྱ་མཚོ་དག་ནི་སྤེལ་བར་བྱེད། །སེམས་ཅན་རྒྱ་མཚོ་རབ་ཏུ་སྨིན་བྱས་ཏེ། །སྨོན་ལམ་རྒྱ་མཚོ་རྣམས་ནི་འགྲུབ་གྱུར་ཅིག །ཇི་ལྟར་སྔོན་གྱི་བདེ་བར་གཤེགས་རྣམས་ཀྱིས། །
ཐུགས་བསྐྱེད་སྨོན་ལམ་མཛད་སྟོབས་ཅི་འདྲ་བ། །དེ་ལྟར་བདག་གིས་སེམས་ཅན་མ་ལུས་ཚོགས། །མྱུར་དུ་སངས་རྒྱས་ས་ལ་འགོད་པར་ཤོག། །།ཅེས་འོད་དཔག་ཏུ་མེད་པ་ལ་བསྟོད་པ་ཡན་ལག་བདུན་པ་སྨོན་ལམ་དང་བཅས་པ་ནི། ཀརྨ་པ་དེ་བཞིན་གཤེགས་པས་མདོ་སྨད་སའི་ཆ་རྨ་ཆུ་འགྲམ་དུ་སྦྱང་བའོ།། །།ཅེས་དང་གཞན་ཡང་ཀུན་མཁྱེན་དོལ་པོ་བས་མཛད་པའི་བདེ་སྨོན་སོགས་བྱིན་རླབས་དང་ལྡན་པ་རྣམས་ཀྱང་བརྗོད་དོ། །དེ་ནས་བཟོད་པར་གསོལ་བ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ལ་སོགས་པ་ཕྱོགས་བཅུའི་རྒྱལ་བ་སྲས་དང་བཅས་པ་གདན་འཛོམ་པའི་སྤྱན་སྔར་བདག་ཅག་ལ་སོགས་པ་འགྲོ་བ་མང་པོའི་དོན་མཛད་པར་གསོལ་བའི་སྐབས་འདིར། བདག་ཅག་དུས་ངན་པའི་སེམས་ཅན་སྤྱོད་པ་དམན་ཞིང་མ་དག་པས་མ་འཚལ་བ་དང་བག་མ་མཆིས་པའི་དབང་གིས་ལུས་ངག་ཡིད་གསུམ་གྱི་སྤྱོད་པ་ཉོན་མོངས་པ་དང་འདྲེས་པ་དང་མཆོད་པའི་དངོས་པོ་ཆུང་ཞིང་ངན་པ་དང་གཙང་སྦྲ་མ་ཕྱེད་པ་དང་མདོ་ལས་བྱུང་བའི་ཆོ་ག་བཞིན་ཏུ་མ་ལྕོགས་པ་ལ་སོགས་པ་འཁྲུལ་ཞིང་ནོངས་པ་ཐམས་ཅད་འཕགས་པ་ཐུགས་རྗེ་ཆེན་པོ་དང་ལྡན་པ་རྣམས་ལ་བཟོད་པར་གསོལ་ཞིང་མཆིས་ན་ཐུགས་བརྩེ་བར་དགོངས་ཏེ་བཟོད་པར་བཞེས་ཤིང་འཕྲལ་དང་ཡུན་ཏུ་བདག་ཅག་གི་སྒྲིབ་པར་མི་འགྱུར་བར་བྱིན་གྱིས་
རླབས་པར་ཅི་གནང་། །དེ་ནས་གཤེགས་སུ་གསོལ་བ་ནི། །ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་ཐུགས་རྗེས་བྱོན་པར་མཛོད། །མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་བདག་ཅག་སེམས་ཅན་ཐམས་ཅད་ཀྱི་དོན་མཛད་པ་ལགས་ཀྱིས་སོ་སོའི་ཞིང་ཁམས་སུ་རྫུ་འཕྲུལ་གྱིས་འཁོར་དང་བཅས་པ་གཤེགས་སུ་གསོལ། སླར་ཡང་སེམས་ཅན་དོན་ལ་ཐུགས་རྗེས་འབྱོན་པར་ཞུ། དེ་ནས་མེ་ཏོག་འཐོར་ལ་བཀྲ་ཤིས་ཀྱི་ཚིགས་སུ་བཅད་པ་བརྗོད། དགེ་བའི་རྩ་བ་བྱང་ཆུབ་ཏུ་བསྔོ་བས་རྒྱས་གདབ་པར་བྱའོ། །འདིའི་ཁུངས་ནི་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལས་བྱུང་བའི་འཕགས་པ་འོད་དཔག་མེད་ཀྱི་བཀོད་པའི་མདོ་དང་། མདོ་མང་ལས་བྱུང་བའི་ད་ལྟར་གྱི་སངས་རྒྱས་མངོན་སུམ་བཞུགས་པའི་མདོ་དང་འཕགས་པ་བདེ་བ་ཅན་གྱི་བཀོད་པའི་མདོ་སོགས་ཡིན་ཅིང་། མདོ་ཆོག་སྤྱིའི་ཕྱག་ལེན་གྱིས་བརྒྱན་ཏེ་ཕན་ཡོན་གྱི་ཁྱད་པར་དུ་ཡོངས་སུ་བསྔོ་བའི་འཁོར་ལོའི་མདོ་དང་བཟང་སྤྱོད་གཟུངས་ཕྲན་བྱིན་རླབས་ཅན་རྣམས་དཀྱུས་སུ་བཅུག་པ་ཡིན་པས་གྱི་ཚོམ་མེད་པའི་དད་གུས་རྩེ་གཅིག་པས་འདི་བཞིན་ཉམས་སུ་བླངས་པའི་ཕན་ཡོན་བསམ་གྱིས་མི་ཁྱབ་པ་ནི་གོང་དུ་སྨོས་པའི་མདོ་སྡེ་དེ་དག་ལས་རྟོགས་པར་བྱའོ། །གང་ཞིག་དམ་པའི་ཆོས་ཚུལ་འདི་སྤྱོད་པ། །ཚེ་རབས་དུ་མའི་དགེ་རྩ་སྨིན་པ་སྟེ། །འདི་ལ་ཐེ་ཚོམ་མེད་པར་གང་འཇུག་པ། །དེ་ཡིས་རྒྱལ་བ་འོད་དཔག་མེད་མགོན་མཐོང་། །དེའི་
འཇིག་རྟེན་བདེ་བ་ཅན་དུ་འགྲོ། །སོང་ནས་བྱང་ཆུབ་སྤྱོད་ལ་མྱུར་ཞུགས་ཏེ། །ནམ་མཁའ་དང་མཉམ་འགྲོ་བ་སྒྲོལ་འགྱུར་བ། །འདི་ནི་དེ་བཞིན་གཤེགས་པའི་ངེས་པས་སོ། །དེ་ཐོབ་དགེ་བས་ཚེ་འོད་དཔག་མེད་ཀྱི། །རྣམ་པར་ཐར་པ་བདག་གིས་ཡོངས་བཟུང་སྟེ། །སྲིད་པའི་རྒྱ་མཚོར་བྱིང་བའི་ལུས་ཅན་ཀུན། །མ་ལུས་བདེ་ཆེན་ཞིང་དུ་འདྲེན་གྱུར་ཅིག །ཅེས་པ་འདིའང་མཐའ་ཡས་པའི་འགྲོ་བ་སྒྲོལ་བ་ལ་སྐྱོ་དུབ་མེད་པའི་གོ་ཆ་བཞེས་པ་གསུང་རྡོ་རྗེ་འཇམ་པའི་དབྱངས་བླ་མའི་བཀའ་ལུང་ཨུ་དུམྦ་རའི་ཕྲེང་བ་ཐོད་དུ་བཅིངས་ཏེ། རང་གཞན་ལ་ཕན་འདོད་ཀྱི་བློ་གྲོས་མཐའ་ཡས་པའི་གོ་ཆ་འཆང་བ། བྱམས་མགོན་ཏཱའི་སི་ཏུའི་བཀའ་འབངས་ཀརྨ་ངག་དབང་ཡོན་ཏན་རྒྱ་མཚོས་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་བྲིས་པ་གཞན་ཕན་དཔག་ཏུ་མེད་པ་འབྱུང་བར་གྱུར་ཅིག། །།དགེ་ལེགས་འཕེལ། །སརྦ་མངྒ་ལཾ།