སྟོན་པ་གནས་བརྟན་ཆེན་པོ་འཁོར་དང་བཅས་པ་མཆོད་ཅིང་གསོལ་བ་འདེབས་པའི་ཆོ་ག་སྙིང་པོར་དྲིལ་བ་འཕགས་པ་དགྱེས་པའི་ལམ་འཇུག
སྟོན་པ་གནས་བརྟན་ཆེན་པོ་འཁོར་དང་བཅས་པ་མཆོད་ཅིང་གསོལ་བ་འདེབས་པའི་ཆོ་ག་སྙིང་པོར་དྲིལ་བ་འཕགས་པ་དགྱེས་པའི་ལམ་འཇུག་ཅེས་བྱ་བ་བཞུགས་སོ། །
ན་མོ་གུ་རུ་ཤཱཀྱ་མུ་ན་ཡེ། །ཉི་མའི་གཉེན་གྱུར་སྟོན་མཆོག་ཐུགས་རྗེ་ཅན། །དེ་སྤྲུལ་ཆོས་སྐྱོང་གནས་བརྟན་ཚུལ་བཟུང་བ། །འཕགས་པའི་འཁོར་དང་བཅས་ལ་གུས་བཏུད་ན། །རྒྱལ་བསྟན་དར་རྒྱས་ཡུན་གནས་བྱིན་གྱིས་རློབས། །རང་རྒྱུད་བསླབ་པ་རྣམ་པར་དག །དེ་ཡིས་ཐུབ་བསྟན་ལང་ཚོ་རྒྱས། །དེས་ཀྱང་འཇིག་རྟེན་ཀུན་བདེར་བྱེད། །ཆོ་ག་འདི་ཡི་དགོས་པར་ཟུང་། །དེའང་མཆིམས་ཀྱི་ཕྱག་མཆོད་ལས། གང་གིས་གསོལ་བ་བཏབ་ན་སྤྱིར་སངས་རྒྱས་ཀྱི་བསྟན་པ་ལ་ཞུགས་པ་ཐམས་ཅད། བྱེ་བྲག་ཏུ་རབ་ཏུ་བྱུང་བ་སྡེ་ལྔ། ཁྱད་པར་དུ་དགེ་སློང་བྱང་ཆུབ་ཀྱི་སེམས་དང་ལྡན་པ་བཞི་ལ་སོགས་པ་དགེ་འདུན་ཏུ་ལོངས་བས་གསོལ་བ་བཏབ་ན་བསམ་པའི་དོན་འགྲུབ་པར་འགྱུར་རོ། །ཞེས་དང་། གང་གི་ཆེད་དུ་གསོལ་བ་བཏབ་ན། དགེ་བཤེས་སམ་སྟོན་པ་འགའ་ཞིག་འཁོར་མང་བར་འདོད་པ་དང་། གནས་གཞི་དང་
དགོན་པ་བཟའ་དཀོར་དང་ཡོན་བདག་མང་བ་དང་། ལོངས་སྤྱོད་ཆེ་བར་འདོད་པ་དང་། ཡུལ་ཕྱོགས་ཆོས་ལ་གནག་པའི་སར་ལས་ངན་གྱི་དབང་གིས་བསྡད་དགོས་པའམ་མཁན་སློབ་ལ་སོགས་པའི་བཀས་བསྡད་དགོས་པ་དེ་ལྟ་བུའི་ཡུལ་དུ་དགེ་འདུན་གྱི་བསྟན་པ་དར་བ་དང་། རང་གི་ཆོས་དང་ཆོས་བྱེད་པ་འཕེལ་བར་འདོད་པ་དང་། ཡུལ་ཐམས་ཅད་དུ་ཆོས་དང་ཆོས་བྱེད་འཕེལ་ཏེ་ས་ཕྱོགས་དཀར་བར་འདོད་པ་དང་། རང་སྡོད་པའི་ས་ཕྱོགས་དེར་རིམས་ནད་ལ་སོགས་པ་ཤི་བར་འདོད་པ་དང་། ཚུལ་ཁྲིམས་ཀྱི་ཞིག་རལ་གསོ་བར་འདོད་པ་དང་། ཚུལ་ཁྲིམས་རྣམ་པར་དག་པ་རྒྱུད་ལ་སྐྱེ་བར་འདོད་པ་དང་། ཏིང་ངེ་འཛིན་བཟང་པོ་རྒྱུད་ལ་སྐྱེ་བར་འདོད་པ་དང་། ཤེས་རབ་ཆེ་བ་དང་། བྱང་ཆུབ་ཀྱི་སེམས་འཕེལ་བ་དང་། དགེ་རྣམ་པར་དག་པ་དང་། ངག་བཙུན་པ་དང་། གཡུལ་ཞི་བ་དང་། ཕས་ཀྱི་རྒོལ་བ་དང་ཉེ་བར་འཚེ་བ་ཐམས་ཅད་ཞི་བར་
འདོད་པ་དང་། །བླ་མ་དང་མཁན་པོ་དང་སློབ་དཔོན་དང་། །རྒྱལ་པོ་དང་བཙུན་མོ་དང་སྲས་ཕོ་མོ་དང་། བློན་པོ་ལ་སོགས་པ་གཞན་ནམ་རང་གི་འཆི་བ་བསླུ་བ་དང་། རང་དང་གཞན་ལ་ནད་གང་གིས་ཀྱང་མི་སེལ་བ་བྱུང་ན། དེ་ལྟ་བུ་ལས་ཐར་བར་འདོད་པ་དང་། རང་ངམ་ཉེ་འཁོར་ལ་སོགས་པ་སྡང་བས་ཉེ་བར་འཚེ་བ་ལས་ཐར་བར་འདོད་པ་ལ་སོགས་པ་མདོར་ན་མི་མཐུན་པའི་ཕྱོགས་ཐམས་ཅད་ཞི་བར་འདོད་པ་དང་། སངས་རྒྱས་ཀྱི་བསྟན་པ་རྒྱས་པ་དང་། བྱེ་བྲག་ཏུ་སྡེ་སྣོད་ལ་འཆད་ཉན་རྒྱས་པར་བྱ་བ་དང་། དེའི་རྟེན་དགེ་འདུན་རྒྱས་པར་བྱ་བ་དང་། གཙུག་ལག་ཁང་བྱིན་གྱིས་བརླབ་པར་བྱ་བ་དང་། ཐུན་མོང་གི་ཆོས་སྤྱོད་བཅུའི་འཁོར་ལོ་རྒྱས་པར་བྱ་བ་དང་། ཁྱད་པར་དུ་ཚུལ་ཁྲིམས་རིན་པོ་ཆེ་བརྟན་ཅིང་རྒྱས་པར་བྱ་བ་ལ་སོགས་པའི་འདོད་པ་ཐམས་ཅད་འགྲུབ་པའི་སླད་དུ་གསོལ་བ་འདེབས་སོ། །ཞེས་དང་། འདོད་དོན་ཁྱད་པར་བ་ལ་གནས་བརྟན་རེ་རེ་བཞིན་གཙོར་བྱ་ཚུལ་རྒྱས་པར་གསུངས་པ་ལྟར་མཆོད་གསོལ་གྱི་ཆོ་ག་རྒྱས་བསྡུས་མང་དུ་འབྱུང་ཡང་། འདིར་ཁྱེར་བདེ་བའི་ལག་ལེན་སྙིང་པོར་དྲིལ་བ་ལ་བཤམ་བཀོད་དང་། ཆོ་ག་དངོས་གཉིས། དང་པོ་ནི། གཙུག་ལག་ཁང་ལ་སོགས་པའི་གནས་གཙང་མ་བྱི་དོར་བྱས་ཤིང་རྒྱན་གྱིས་སྤྲས་པའི་གུང་དུ་སྟོན་པ་གནས་བརྟན་ཆེན་པོ་རྣམས་ཀྱི་སྐུ་གཟུགས་སོགས་དཀོན་མཆོག་གི་རྟེན་བཀྲམ་པའི་མདུན་ཏུ། སྟེགས་གཙང་མ་བའི་རྣམ་ལྔས་བྱུག་པའི་སྟེང་དུ་མཎྜལ་པདྨ་འདབ་མ་བཅུ་དྲུག་པའི་དབུས་སུ་མེ་ཏོག་གི་ཚོམ་བུ་ཆེ་བ་གཅིག་དང་། མཐའ་བསྐོར་དུ་བཅུ་དྲུག་བཀོད་པའི་མདུན་ཏུ་
དཀོན་མཆོག་སྤྱི་གཏོར་ཅོག་ཟླུམ་རྒྱན་ལྡན། རྒྱལ་ཆེན་བཞི་ལ་དཀར་གཏོར། ཆུ་གཉིས་ཉེར་སྤྱོད་ཕྲེང་ཚར་དུ་བཤམ། ཁྲུས་ཆས་བུམ་པ་བཅུད་ལྡན་མེ་ལོང་སྐུ་ཕྱིན་བཟའ། མཎྜལ་འབུལ་བའི་ཆས་རྣམས་ཟུར་དུ་བཞག །འབྱོར་བརྩོན་གྱིས་ནུས་ན་སྔ་དྲོའི་ཆར་དུས་རུང་གི་སྨན་བཟའ་བཅའི་རིགས། ཕྱི་དྲོའི་ཆར་ཐུན་ཚོད་དུ་རུང་བ་བརྒྱད་སོགས་དང་། འབྲུ་མར་བུ་རམ་སོགས་ཞག་བདུན་པའི་སྨན་དང་། དུས་ངེས་མེད་དུ་འབུལ་རུང་བ་བཀྲ་ཤིས་རྫས་རྟགས་རྒྱལ་སྲིད་ན་བཟང་རོལ་མོའི་རིགས་སོགས་མཆོད་པའི་ཡོ་བྱད་ཅི་འབྱོར་བཀོད། །རིགས་དྲུག་གཞི་བདག་ཆ་གསུམ་གཏོར་མ་རྣམས་ཀྱང་སྟེགས་དམའ་བར་བཀོད་པ་ཡིན་ཀྱང་རྒྱུན་ཁྱེར་ལྟ་བུ་ཆོ་ག་བསྡུས་པའི་སྐབས་དེ་དག་མི་དགོས་སོ། །གཉིས་པ་ཆོ་ག་དངོས་ལ་གསུམ། སྦྱོར་བ་སྐྱབས་སེམས་བྱིན་རླབས། དངོས་གཞི་སྤྱན་འདྲེན་ཚོགས་བསགས། རྗེས་གཏོར་མཆོད་གཤེགས་གསོལ་སོགས་སོ། །དང་པོ་སྐྱབས་སེམས་ནི། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གི་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག། ལན་གསུམ། །སེམས་ཅན་ཐམས་ཅད་བདེ་བ་དང་སོགས་ལན་གསུམ་གྱིས་ཚད་མེད་བསྒོམ། །གནས་དང་ཡོ་བྱད་བྱིན་གྱིས་བརླབ་པ་ནི། །དཀོན་མཆོག་གསུམ་གྱི་བདེན་པ་དང་། །སངས་རྒྱས་
དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། །ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྔོན་བྱང་ཆུབ་ཀྱི་སྤྱད་པ་སྤྱོད་པའི་ཚེ་སངས་རྒྱས་ཀྱི་ཞིང་ཡོངས་སུ་སྦྱངས་པའི་བདེན་པ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེང་འདིར་དེ་བཞིན་གཤེགས་པ་སྲས་དང་བཅས་པ་དང་། འཕགས་པ་ཆོས་སྐྱོང་བ་ཐམས་ཅད་ལ་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདི་དག་བཅོམ་ལྡན་འདས་འོད་དཔག་ཏུ་མེད་པའི་ཞིང་གི་བཀོད་པའི་ཡོན་ཏན་ལྟ་བུ་དང་ལྡན་པར་གྱུར་ཏེ། ས་གཞི་རིན་པོ་ཆེ་སྣ་ཚོགས་ཀྱི་རང་བཞིན་ལག་མཐིལ་ལྟར་མཉམ་པ། ལྗོན་ཤིང་ཆུ་མཚོ་ལ་སོགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པའི་ཞིང་ཁམས་ཡོངས་སུ་དག་པའི་དབུས་བཀོད་པ་ཐམས་ཅད་ལས་འཕགས་པ་དེ་བཞིན་གཤེགས་པའི་བཀོད་པ་ལ་བརྟེན་པའི་ཕོ་བྲང་རིན་ཆེན་སྣ་བདུན་ལས་གྲུབ་པའི་ཁང་པ་བརྩེགས་པ། གྲུ་བཞི་སྒོ་བཞི་ཀ་བ་བཞི་ཟུག་ཅིང་མཉམ་པ། ཉམས་དགའ་མཛེས་ཤིང་ལྟ་ན་སྡུག་ལ་འོད་འབར་བ། ཐེམ་སྐས་བཞི་དང་ལྡན་པ། དཀྱིལ་
འཁོར་གྱི་ནང་གི་དབུས་སུ་རིན་པོ་ཆེའི་ཁྲི་པདྨ་དང་ཟླ་བའི་གདན། །མཐའ་བསྐོར་དུ་པདྨའི་གདན་བཅུ་དྲུག། ཤར་སྒོའི་ནང་དང་སྒོ་བཞིར་རིན་པོ་ཆེའི་གདན་ཏེ། སྟོན་པ་བཅོམ་ལྡན་འདས་ལ་སོགས་པ་འཕགས་པ་རྣམས་གདན་འཛོམ་པའི་བཞུགས་གནས་སོ་སོའི་སྨོན་ལམ་ཁྱད་པར་ཅན་དང་མངའ་ཐང་དང་མཚམས་པར་གྲུབ་པ་མཛེས་པ་ཤ་སྟག་འབྱུང་བར་གྱུར་ཅིག །ཕྱི་ནང་ཀུན་ཏུ་ཡང་ཆ་རིགས་མཚམས་པར་ལྷ་དང་མིའི་ཡོ་བྱད་དམ་པ། ཁ་དོག་དང་། དྲི་དང་། རོ་དང་། རེག་བྱ་དང་ལྡན་པ་ཡིད་དུ་འོང་བ། གྱ་ནོམ་པའི་ཞལ་ཟས། ན་བཟའ་དང་། རྒྱན་དང་། རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ། ཕུང་པོ་གསུམ་པའི་མདོ་དང་། བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་ཀླུབས་པ་དང་ལྡན་པར་གྱུར་ཅིག །འཕགས་པ་ཐམས་ཅད་ཀྱང་གདན་འཛོམ་ནས་དེ་བཞིན་དུ་བྱིན་གྱིས་བརླབས་ཤིང་བཞེས་ཏེ་ལོངས་སྤྱོད་པར་གྱུར་ཅིག །ཅེས་དང་། ཨོཾ་ན་མོ་བྷ་ག་བ་ཏེ། བཛྲ་སཱ་ར་པྲ་མརྡྷ་ནི། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་བཛྲེ་བཛྲེ་མ་ཧཱ་བཛྲེ། མ་ཧཱ་ཏེ་ཛོ་བཛྲེ། མ་ཧཱ་བི་དྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་་
བཛྲེ། སརྦ་ཀརྨ་ཨཱ་བ་ར་་བི་ཤོ་དྷ་ན་བཛྲེ་སྭཱ་ཧཱ། ཞེས་མཆོད་པའི་སྤྲིན་གྱི་གཟུངས་ལན་གསུམ་དང་། སླར་ཡང་། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་བཞིན་དུ་གྱུར་ཅིག །ཅེས་བདེན་པའི་སྟོབས་ལན་གསུམ་བརྗོད་པར་བྱའོ། །གཉིས་པ་ལ་གཉིས། ཚོགས་ཞིང་སྤྱན་འདྲེན་ཡན་ལག་དང་བཅས་པ། དེ་ལ་ཚོགས་བསགས་ཤིང་སྨོན་ལམ་གདབ་པའོ། །དང་པོ་ནི། དགེ་འདུན་རྣམས་འགྲེངས་པའམ་པུས་བཙུགས་ཐལ་མོ་སྦྱར་ལ་སྤོས་ཐོགས། མེ་ཏོག་བཀྲམ་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱའི་དབང་པོ་ལ་སོགས་པ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་འཕགས་པ་གནས་བརྟན་ཆེན་པོ་བཅུ་དྲུག་དགེ་བསྙེན་དྷརྨ་ཏཱ་ཉན་ཐོས་ཀྱི་དགེ་འདུན་དང་བཅས་པ་རྒྱལ་པོ་ཆེན་པོ་བཞི་འཁོར་དང་བཅས་པ་སོགས་དམ་པའི་ཆོས་སྐྱོང་བའི་ཞབས་འབྲིང་རྒྱ་མཚོས་ཡོངས་སུ་བསྐོར་བ་ཐམས་ཅད། བདག་སོགས་སེམས་ཅན་ཐམས་ཅད་ཀྱི་ཉེས་ལྟུང་གི་དྲི་མ་སྦྱང་ཞིང་བསོད་
ནམས་ཀྱི་ཚོགས་སྤེལ་བའི་སླད་དུ་སྤྱན་འདྲེན་ཞིང་མཆིས་ན་ཐུགས་རྗེ་ཆེན་པོས་བསྐུལ་ཏེ་དེང་དུས་ལ་བབ་ཀྱིས་དགོངས་པར་མཛད་དུ་གསོལ། །ཅེས་སྙན་གསན་དབབ། ལག་མཐིལ་ལྟར་མཉམ་རིན་ཆེན་རྒྱན་གྱིས་སྤྲས། །ལྗོན་ཤིང་ཆུ་མཚོས་བརྒྱན་པའི་ས་གཞིའི་དབུས། །རིན་ཆེན་ལས་གྲུབ་གྲུ་བཞི་སྒོ་བཞི་པ། །པདྨ་ཉི་ཟླས་བརྒྱན་པའི་གདན་སྟེང་དུ། །ཐུགས་རྗེས་རྩོད་པའི་དུས་ཀྱི་གདུལ་བྱ་རྣམས། །རྣམ་གྲོལ་ལམ་ལ་འགོད་མཛད་འགྲོ་བའི་མགོན། །ཐུབ་པ་མཆོག་དང་གནས་བརྟན་ཆེན་པོ་རྣམས། །འཁོར་དང་བཅས་པ་གནས་འདིར་གཤེགས་སུ་གསོལ། །ཕྱོགས་བཅུའི་རྒྱལ་བ་སྲས་བཅས་ཐམས་ཅད་དང་། །ཤེས་རབ་མེ་འབར་ཉོན་མོངས་མཚོ་སྐེམ་ཞིང་། །རྣམ་གྲོལ་བསོད་ནམས་ཞིང་དུ་བཀས་སྡོད་པའི། །ཕྱོགས་བཅུའི་ཉན་ཐོས་དགེ་འདུན་བཞུགས་སོ་འཚལ། །ཡོན་སྦྱོང་མཆོད་པའི་གནས་སུ་སྤྱན་འདྲེན་གྱིས། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །འགྲོ་བའི་མགོན་པོ་ཤཱཀྱ་སེང་གེ་ཡི། །སངས་རྒྱས་བསྟན་པ་གང་གི་ཕྱག་ཏུ་བཞུགས། །གསུང་རབ་རིན་ཆེན་སྒྲོམ་གྱི་ཁ་འབྱེད་པའི། །དགྲ་བཅོམ་གནས་བརྟན་ཆེན་པོ་བཞུགས་སོ་འཚལ། །དམ་ཆོས་
སྤེལ་བའི་སླད་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ཐུབ་པས་བཀའ་བསྒོས་བསྟན་པའི་རྒྱལ་མཚན་འཛིན། །ཡན་ལག་འབྱུང་དང་མ་ཕམ་ནགས་ན་གནས། །དུས་ལྡན་རྡོ་རྗེ་མོའི་བུ་བཟང་པོ་དང་། །གསེར་བེའུ་བྷ་ར་དྷྭ་ཛ་གསེར་ཆེན་མཆོག །འཕགས་པ་བ་ཀུ་ལ་དང་སྒྲ་གཅན་འཛིན། །ལམ་ཕྲན་བྷ་ར་དྷྭ་ཛ་བསོད་སྙོམས་ལེན། །ལམ་བརྟན་ཀླུའི་སྡེ་སྦེད་བྱེད་མི་ཕྱེད་པ། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །སྤངས་དང་ཡེ་ཤེས་ཕུན་ཚོགས་སངས་རྒྱས་ཀྱང་། །གདུལ་བྱའི་དབང་གིས་ཉན་ཐོས་ཚུལ་འཛིན་ཅིང་། །ཁྱད་པར་ཅན་གྱི་ཕྲིན་ལས་ཆོས་སྐྱོང་བའི། །གནས་བརྟན་བཅུ་དྲུག་འདིར་སྤྱོན་གདན་ལ་བཞུགས། །བདེ་གཤེགས་བཀའ་ལུང་གཙོར་མཛད་བསྟན་པ་སྲུང་། །རང་དོན་དོར་ནས་འཁོར་བའི་ནགས་ཚལ་དུ། །གཞན་དོན་ལྷུར་མཛད་གནས་བརྟན་བཅུ་དྲུག་པོ། །དམ་བཅས་ཐུགས་རྗེའི་དབང་གིས་གནས་འདིར་གཤེགས། །དགེ་བསྙེན་སྐྱབས་གསོལ་བདེན་པའི་ཚིག་ཉན་པ། །དཀོན་མཆོག་གསུམ་གྱི་ཞབས་འབྲིང་མཆིས་སོ་འཚལ། །བསོད་ནམས་རིན་ཆེན་གླིང་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །
ཞེས་སྤོས་བཏུལ། །རོལ་མོ་བཅས་སྤྱན་དྲངས་ལ། །བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །མཆོད་ཡོན་གྱི་ཆུ་བཟེད་ཞལ་དུ་སྤྲེངས་ལ། །རྒྱལ་བའི་སྐུ་གསུང་ཐུགས་ལ་ཉོན་མོངས་མི་མངའ་ཡང་། །སེམས་ཅན་ལུས་ངག་ཡིད་གསུམ་གདུང་བ་སེལ་སླད་དུ། །ཡན་ལག་བརྒྱད་ལྡན་ཆུ་གཙང་ཡིད་དུ་འོང་བ་འདི། །བཞེས་ཤིག་བཞེས་ཤིག་བདག་གི་མཆོད་ཡོན་འདི་དག་གོ། །ངང་པའི་མཆོག་ལྟར་སོར་མོ་དྲ་བས་འབྲེལ། །འཁོར་ལོའི་མཚན་ཅན་མཛེས་པའི་ཞབས་ཟུང་ལ། །དག་བྱེད་ཕུལ་བས་སྐྱེ་བོ་མ་ལུས་པ། །རྫུ་འཕྲུལ་རྐང་པ་མཆོག་དང་ལྡན་གྱུར་ཅིག །ཁྲུས་གསོལ་ནི་ཕྱག་ལེན་མཐོང་བརྒྱུད་ལྟར་བྱས་ལ། །ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་བྲེ་བྲེས་པ་དེར། །དྲིས་བྱུགས་པའི་ཚུལ་བྱས་ལ། །སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །
ཁྲུས་གསོལ་ཞིང་། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀུན་གྱིས་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །འདི་ན་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩལ་དུ་གསོལ། །དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་བཀང་བ་གླུ་དང་ནི། །རོལ་མོ་བཅས་པ་དུ་མས་སྐུ་ཁྲུས་གསོལ། །སྐུ་ཕྱི་ཞིང་། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །ངུར་སྨྲིག་འབུལ་ཞིང་། །སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུ་འགྱུར་བའི། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །དྲི་མེད་མཚན་ལ་སྒྲིབ་བསིལ་མི་མངའ་ཡང་། །དད་པས་ངུར་སྨྲིག་རྒྱལ་མཚན་ཕུལ་བ་ཡིས། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །སངས་རྒྱས་བརྟུལ་ཞུགས་མཆོག་ལ་སྤྱོད་པར་ཤོག །ཅེས་འབུལ་ལོ། །རང་བཞིན་གྱི་གནས་ནས་བཅོམ་ལྡན་འདས་ཐུབ་པའི་དབང་པོ་འཕགས་
པ་ཉན་ཐོས་ཆེན་པོའི་དགེ་འདུན་གྱི་འཁོར་དང་། རྒྱལ་པོ་ཆེན་པོ་སྡེ་བཞིའི་ཚོགས་དང་བཅས་པ་སོ་སོའི། །རྫུ་འཕྲུལ་གྱི་མཐུས་བྱོན་ནས་རང་རང་གི་གདན་ལ་བཞུགས་པར་གྱུར་པ་ནི། དབུས་སུ་བཅོམ་ལྡན་འདས་དེ་བཞིན་གཤེགས་པ་དཔལ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། ཕྱག་གཡས་ས་གནོན་དང་། གཡོན་མཉམ་བཞག་གི་ཕྱག་རྒྱ་མཛད་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། མཐའ་བསྐོར་གྱི་པདྨ་བཅུ་དྲུག་ལ་མདུན་ནས་གཡས་བསྐོར་དུ། ཡན་ལག་འབྱུང་སྤོས་ཕོར་དང་རྔ་ཡབ། མ་ཕམ་པ་མཉམ་བཞག །ནགས་ན་གནས་སྡིགས་མཛུབ་དང་རྔ་ཡབ། དུས་ལྡན་གསེར་གྱི་རྣ་ཀོར། །རྡོ་རྗེ་མོའི་བུ་སྡིགས་མཛུབ་དང་རྔ་ཡབ། །བཟང་པོ་ཆོས་འཆད་དང་མཉམ་བཞག །གསེར་བེའུ་རིན་པོ་ཆེའི་ཞགས་པ། བྷ་ར་དྷྭ་ཛ་གསེར་ཅན་མཉམ་བཞག །བ་ཀུ་ལ་ནེའུ་ལེ། སྒྲ་གཅན་ཟིན་རིན་པོ་ཆེའི་པྲོག་ཞུ། ལམ་ཕྲན་བརྟན་མཉམ་བཞག །བྷ་ར་དྷྭ་ཛ་བསོད་སྙོམས་ལེན་གླེགས་བམ་དང་ལྷུང་བཟེད། ལམ་བརྟན་ཆོས་འཆང་དང་གླེགས་བམ། ཀླུའི་སྡེ་བུམ་པ་དང་འཁར་
གསིལ། སྦེད་བྱེད་གླེགས་བམ། མི་ཕྱེད་པ་བྱང་ཆུབ་མཆོད་རྟེན་འཛིན་པ། དེ་ཐམས་ཅད་ཀྱང་གནས་བརྟན་དབང་པོ་དུལ་བའི་ཆ་ལུགས་ཅན། ཤང་སྒོའི་ནང་དགེ་བསྙེན་དྷརྨ་ཏཱ་ཐོར་ཅོག་ཅན་གླེགས་བམ་ཁུར་ཞིང་རྔ་ཡབ་དང་བུམ་པ་འཛིན་པ། སངས་རྒྱས་སྣང་བ་མཐའ་ཡས་ལ་གཟིགས་ཤིང་པུས་མོ་གཡས་པ་ལས་སྟག་སྤྲུལ་པ། ཤར་སྒོར་ཡུལ་འཁོར་སྲུང་དཀར་པོ་པི་ཝང་ལྷོར་འཕགས་སྐྱེས་པོ་སྔོན་པོ་རལ་གྲི། ནུབ་སྒོར་མིག་མི་བཟང་དམར་པོ་སྦྲུལ་ཞགས་དང་མཆོད་རྟེན། བྱང་སྒོར་རྣམ་ཐོས་སྲས་སེར་པོ་ཡིད་བཞིན་གྱི་རྒྱལ་མཚན་དང་ནེའུ་ལེ་འཛིན་པ། ཐམས་ཅད་ཀྱང་རང་རང་གི་འཁོར་བསམ་གྱིས་མི་ཁྱབ་པ་དང་བཅས་ཏེ་བཞུགས་པར་གྱུར། །ཅེས་གསལ་གདབ་ལ། །རིན་ཆེན་དུ་མ་ལས་གྲུབ་སེང་གེའི་ཁྲི། །ཡིད་འཕྲོག་སྣ་ཚོགས་གོས་ཀྱིས་བཀབ་པ་འདི། །སངས་རྒྱས་སྲས་དང་བཅས་ལ་ཕུལ་བ་ཡིས། །འགྲོ་ཀུན་རྡོ་རྗེའི་གདན་ལ་འཁོར་བར་ཤོག །ཅེས་བཞུགས་སུ་གསོལ་ལོ། །གཉིས་པ་ལ་གསུམ། སྤྱིར་ཡན་ལག་བདུན་པ་བྱ་བ། ཁྱད་པར་གསོལ་འདེབས་ཀྱི་བསྙེན་པ། རྗེས་འབྲེལ་དུ་སྨོན་ལམ་གདབ་པའོ། །དང་པོ་ལ་ཕྱག་འཚལ་བ་ནི། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་
མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །ཞེས་སྤྱིར་ཕྱག་བྱས་ནས། བྱེ་བྲག་ཏུ། །མཚུངས་མེད་ལྟ་བས་མི་ངོམས་པ། །གསེར་གྱི་མདོག་ཅན་མཛེས་པའི་སྐུ། །ཞལ་གཅིག་ཕྱག་གཉིས་སྐྱིལ་ཀྲུང་བཞུགས། །ས་གནོན་མཉམ་བཞག་མཛད་ཕྱག་འཚལ། །བསྟན་པ་རྒྱས་པར་བྱིན་གྱིས་རློབས། །ཞེས་པ་ཀུན་ལ་འགྲེའོ། །གངས་རི་ཆེན་པོ་ཏི་སེ་ན། །འཕགས་པ་གནས་བརྟན་ཡན་ལག་འབྱུང་། །དགྲ་བཅོམ་སྟོང་དང་སུམ་བརྒྱས་བསྐོར། །སྤོས་ཕོར་རྔ་གཡབ་འཛིན་ཕྱག་འཚལ། །བསྟན་པ་རྒྱས་པར༴ དྲང་སྲོང་རི་ཡི་ཤལ་ནགས་ན། །འཕགས་པ་གནས་བརྟན་མ་ཕམ་པ། །དགྲ་བཅོམ་བརྒྱ་ཕྲག་གཅིག་གིས་བསྐོར། །ཕྱག་གཉིས་མཉམ་བཞག་མཛད་ཕྱག་འཚལ། །བསྟན་པ༴ །ལོ་མ་བདུན་པའི་རི་ཕུག་ན། །འཕགས་པ་གནས་བརྟན་
ནགས་ན་གནས། །དགྲ་བཅོམ་སྟོང་དང་བཞི་བརྒྱས་བསྐོར། །སྡིགས་མཛུབ་རྔ་གཡབ་འཛིན་ཕྱག་འཚལ། །བསྟན་པ༴ །ཛམྦུ་གླིང་གི་ཟངས་གླིང་ན། །འཕགས་པ་གནས་བརྟན་དུས་ལྡན་ཏེ། །དགྲ་བཅོམ་སྟོང་དང་ཆིག་བརྒྱས་བསྐོར། །གསེར་གྱི་རྣ་ཀོར་འཛིན་ཕྱག་འཚལ། །བསྟན་པ༴། སིངྒ་ལ་ཡི་གླིང་ན་ནི། །གནས་བརྟན་རྡོ་རྗེ་མོ་ཡི་བུ། །དགྲ་བཅོམ་སྟོང་ཕྲག་གཅིག་གིས་བསྐོར། །སྡིགས་མཛུབ་རྔ་གཡབ་འཛིན་ཕྱག་འཚལ། །བསྟན་པ༴ །ཆུ་བོ་ཡ་མུ་ནའི་གླིང་ན། །འཕགས་པ་གནས་བརྟན་བཟང་པོ་ནི། །དགྲ་བཅོམ་སྟོང་དང་ཉིས་བརྒྱས་བསྐོར། །ཆོས་འཆད་མཉམ་བཞག་མཛད་ཕྱག་འཚལ། །བསྟན་པ༴ །གནས་མཆོག་དམ་པ་ཁ་ཆེ་ན། །འཕགས་པ་གནས་བརྟན་གསེར་བེའུ། །དགྲ་བཅོམ་ཆེན་པོ་ལྔ་བརྒྱས་བསྐོར། །རིན་ཆེན་ཞགས་པ་འཛིན་ཕྱག་འཚལ། །བསྟན་པ༴ །ནུབ་ཀྱི་བ་ལང་སྤྱོད་ན་ནི། །བྷ་ར་དྷྭ་ཛ་གསེར་ཆེན་མཆོག །དགྲ་བཅོམ་ཆེན་པོ་བདུན་བརྒྱས་བསྐོར། །ཕྱག་གཉིས་མཉམ་བཞག་མཛད་ཕྱག་འཚལ། །བསྟན་པ༴ །བྱང་གི་སྒྲ་མི་སྙན་ན་ནི། །འཕགས་པ་གནས་བརྟན་བ་ཀུ་ལ། །དགྲ་བཅོམ་ཆེན་པོ་དགུ་བརྒྱས་
བསྐོར། །ཕྱག་གཡོན་ནེའུ་ལེ་འཛིན་ཕྱག་འཚལ། །བསྟན་པ༴ །པྲི་ཡང་ཀུ་ཡི་གླིང་ན་ནི། །འཕགས་པ་གནས་བརྟན་སྒྲ་གཅན་འཛིན། །དགྲ་བཅོམ་སྟོང་དང་ཆིག་བརྒྱས་བསྐོར། །རིན་ཆེན་པྲོག་ཞུ་འཛིན་ཕྱག་འཚལ། །བསྟན་པ༴ །བྱ་རྒོད་ཕུང་པོའི་རི་བོ་ལ། །འཕགས་པ་གནས་བརྟན་ལམ་ཕྲན་བརྟན། །དགྲ་བཅོམ་སྟོང་དང་དྲུག་བརྒྱས་བསྐོར། །ཕྱག་གཉིས་མཉམ་བཞག་མཛད་ཕྱག་འཚལ། །བསྟན་པ༴ །ཤར་གྱི་ལུས་འཕགས་གླིང་ན་ནི། །བྷ་ར་དྷྭ་ཛ་བསོད་སྙོམས་ལེན། །དགྲ་བཅོམ་སྟོང་ཕྲག་གཅིག་གིས་བསྐོར། །གླེགས་བམ་ལྷུང་བཟེད་འཛིན་ཕྱག་འཚལ། །བསྟན་པ༴ །ལྷ་གནས་སུམ་ཅུ་རྩ་གསུམ་ན། །འཕགས་པ་གནས་བརྟན་ལམ་བརྟན་ནི། །དགྲ་བཅོམ་ཆེན་པོ་དགུ་བརྒྱས་བསྐོར། །གླེགས་བམ་ཆོས་འཆད་མཛད་ཕྱག་འཚལ། །བསྟན་པ༴ །རི་ཡི་རྒྱལ་པོ་ངོས་ཡངས་ལ། །འཕགས་པ་གནས་བརྟན་ཀླུ་ཡི་སྡེ། །དགྲ་བཅོམ་སྟོང་དང་ཉིས་བརྒྱས་བསྐོར། །བུམ་པ་འཁར་གསིལ་འཛིན་ཕྱག་འཚལ། །བསྟན་པ༴ །རི་ཡི་རྒྱལ་པོ་བྷི་ཧུ་ལ། །འཕགས་པ་གནས་བརྟན་སྦེད་བྱེད་ནི། །དགྲ་བཅོམ་སྟོང་དང་བཞི་བརྒྱས་བསྐོར། །ཕྱག་གཉིས་
གླེགས་བམ་འཛིན་ཕྱག་འཚལ། །བསྟན་པ༴ །རི་ཡི་རྒྱལ་པོ་གངས་ཅན་ལ། །འཕགས་པ་གནས་བརྟན་མི་ཕྱེད་པ། །དགྲ་བཅོམ་སྟོང་ཕྲག་གཅིག་གིས་བསྐོར། །བྱང་ཆེན་མཆོད་རྟེན་འཛིན་ཕྱག་འཚལ། །བསྟན་པ༴ །འཕགས་པའི་དགེ་བསྙེན་དྷརྨ་ཏཱ། །རལ་པའི་ཐོད་བཅིངས་གླེགས་བམ་ཁུར། །སྣང་བ་མཐའ་ཡས་མདུན་ན་བཞུགས། །རྔ་གཡབ་བུམ་པ་འཛིན་ཕྱག་འཚལ། །བསྟན་པ༴ །བརྩོན་པས་གོ་བགོས་མཐུ་སྟོབས་ཅན། །སངས་རྒྱས་བསྟན་པ་ལེགས་སྐྱོང་བའི། །ཤར་ལྷོ་ནུབ་བྱང་ཕྱོགས་བཞི་ཡི། །རྒྱལ་ཆེན་བཞི་ལ་ཕྱག་འཚལ་ལོ། །བསྟན་པ་རྒྱས་པར་བྱིན་གྱིས་རློབས། །ཕྱག་བྱར་འོས་པ་སོགས་ཤློ་ཀ་གཅིག་བརྗོད། མཆོད་པ་ནི། འཕགས་པའི་ཚོགས་དེ་དག་ཐམས་ཅད་ལ་མཆོད་ཡོན་དང་བྱུག་པ། མེ་ཏོག་དང་བདུག་སྤོས། མར་མེ་དང་ཞལ་ཟས། རོལ་མོ་དང་སིལ་སྙན། གདུགས་དང་བ་དན་ལ་སོགས་པ་དངོས་སུ་ཅི་འབྱོར་བ་འདི་དག་དང་། ཕྱོགས་བཅུ་ན་བདག་པོས་ཡོངས་སུ་མ་བཟུང་བའི་ལྷ་དང་མིའི་རྫས་དམ་པ་བདེ་བའི་ཡོ་བྱད་ཕུན་སུམ་ཚོགས་པ་ཐམས་ཅད་དང་། གཟུངས་དང་རིག་པའི་མཐུ་དང་མོས་པའི་སྟོབས་ཀྱིས་བསྐྱེད་པའི་མཆོད་པའི་སྤྲིན་ཕུང་པོ་གསུམ་པའི་མདོ་དང་
བཟང་པོ་སྤྱོད་པའི་སྨོན་ལམ་ལས་བྱུང་བ་རྒྱ་མཚོ་ཐམས་ཅད་ཀྱིས་ནམ་མཁའི་ཁམས་ཀྱི་མཐའ་ཀླས་པ་ཐམས་ཅད་རྒྱས་པར་བཀང་སྟེ་འབུལ་ལོ། །མཆོད་དོ། །བདག་གིར་བཞེས་པར་མཛད་དུ་གསོལ། །ཞེས་སྤྱིར་ཕུལ་ནས། བྱེ་བྲག་ཏུ། །མཛེས་པའི་མེ་ཏོག་འདི་ཕུལ་བས། །མི་མཛེས་སྐྱོན་ཀུན་དག་གྱུར་ཏེ། །མཚན་དང་དཔེ་བྱད་ཡོངས་རྫོགས་ནས། །བྱང་ཆུབ་ཡན་ལག་རྒྱས་གྱུར་ཅིག །དྲི་ཞིམ་བདུག་སྤོས་འདི་ཕུལ་བས། །འཆལ་བའི་དྲི་མ་དག་གྱུར་ཏེ། །ཟག་མེད་དྲི་དང་ལྡན་གྱུར་ནས། །ཡེ་ཤེས་ཕུང་པོ་ལྔ་ཐོབ་ཤོག། སྣང་གསལ་སྒྲོན་མེ་འདི་ཕུལ་བས། །ཤེས་བྱའི་སྒྲིབ་པ་ཀུན་བྱང་ནས། །ཡེ་ཤེས་སྣང་བའི་རང་བཞིན་གྱིས། །སྤྱན་ལྔ་ཡོངས་སུ་དག་གྱུར་ཅིག །མཆོག་ཏུ་ལེགས་སྦྱར་དྲི་ཕུལ་བས། །འཆལ་པའི་ཤེས་རབ་དག་གྱུར་ཏེ། །ཤེས་བྱ་མ་ལུས་མཁྱེན་པ་ཡི། །ཤེས་རབ་ཕུན་སུམ་ཚོགས་པར་ཤོག །ཞལ་ཟས་རོ་མཆོག་འདི་ཕུལ་བས། །འགྲོ་དྲུག་སྲིད་པ་དག་གྱུར་ཏེ། །བསམ་གཏན་ཏིང་འཛིན་ཟས་མཆོག་ལྡན། །གཉིས་སུ་མེད་པའི་དོན་རྟོགས་ཤོག །མཛེས་པའི་རོལ་མོ་འདི་ཕུལ་བས། །ཆོས་བརྒྱད་འཛིན་པ་དག་གྱུར་
ཏེ། །ཟབ་མོའི་གདམས་པ་ལ་བརྟེན་ནས། །དུ་མ་རོ་གཅིག་རྟོགས་པར་ཤོག །ཅེས་དང་མཆོད་པའི་སྤྲིན་གྱི་གཟུངས་སྔགས་བརྗོད་ལ་རོལ་མོའི་སྒྲ་བྱའོ། །དེ་ནས་མཎྜལ་སོ་བདུན་མ་དང་། གཞན་ཡང་ཚིགས་བཅད་རྒྱས་བསྡུས་ཇི་ལྟར་རིགས་པས་ཕུལ་ལ་གྲངས་གསོག་པར་སྤྲོ་ན་དང་ས་གཞི་སྤོས་བྱུགས་ལྟ་བུ་ཡང་བྱའོ། །དེ་ནས་བཤགས་པ་སོགས་ཡན་ལག་ལྷག་མ་རྣམས་ནི། བདག་ཅག་རྣམས་ཀྱིས་ཐོག་མ་མ་མཆིས་པ་ནས་འཁོར་བ་ནས་འཁོར་བའི་ཚེ་རབས་ཐམས་ཅད་དུ་སྡིག་པ་མི་དགེ་བའི་ལས་མདོར་ན་མི་བགྱི་བར་འོས་པའི་ལས་ནི་བགྱིས། བགྱི་བར་འོས་པའི་ལས་མ་བགྱིས་པ་ལ་སོགས་པ་དངོས་སྡིག་ཅི་མཆིས་པ་ཐམས་ཅད་ཡང་དག་པར་འཆགས་སོ། །དུས་གསུམ་གྱི་འཕགས་པ་དང་སོ་སོའི་སྐྱེ་བོའི་དགེ་བ་མཐའ་དག་གི་བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །ཕྱོགས་བཅུའི་རྒྱལ་བ་ཐམས་ཅད་ལ་ཆོས་ཀྱི་འཁོར་ལོ་བླ་ན་མེད་པར་བསྐོར་བར་བསྐུལ་ལོ། །འཇིག་རྟེན་གྱི་སྒྲོན་མ་གང་དག་མྱ་ངན་ལས་འདའ་བའི་ཚུལ་སྟོན་པར་བཞེད་པ་དེ་དག་ཐམས་ཅད་མྱ་ངན་ལས་མི་འདའ་བར་འཇིག་རྟེན་གྱི་དོན་མཛད་ཅིང་ཡུན་རིང་དུ་བཞུགས་པར་གསོལ་བར་འཚལ་ལོ། །སྟོན་པ་བཅོམ་ལྡན་འདས་ཤཱཀྱ་ཐུབ་པ་དང་། འཕགས་པ་
གནས་བརྟན་ཆེན་པོ་བཅུ་དྲུག་འཁོར་དང་བཅས་པ་སྤྱན་དྲངས་ཏེ་ཕྱག་འཚལ་བ་དང་། མཆོད་ཅིང་དེ་དག་གི་སྨོན་ལམ་བཏབ་པ་དང་། དེ་དག་གི་སྤྱན་སྔར་སྡིག་པ་བཤགས་པ་དང་། དགེ་བ་ལ་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་ཞིང་མྱ་ངན་ལས་མི་འདའ་བར་གསོལ་བ་བཏབ་པ་དང་། དེ་དག་གི་མཐུ་དཔལ་དང་བྱིན་བརླབས་ཀྱི་སྟོབས་ཀྱིས་བདག་ཅག་གི་ཐོག་མ་མ་མཆིས་པའི་འཁོར་བ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་གྱུར་ཅིག །ལུས་ལ་ནད་མེད་པ་དང་ཚེ་རིང་བར་གྱུར་ཅིག །འཇིག་རྟེན་དང་འཇིག་རྟེན་ལས་འདས་པའི་དཔལ་ཕུན་སུམ་ཚོགས་པ་ལ་མངའ་བརྙེས་པར་གྱུར་ཅིག །མཐར་ཚོགས་གཉིས་ཡོངས་སུ་རྫོགས་ནས་རྡོ་རྗེའི་སྐུ་ཆོས་ཀྱི་རྒྱལ་པོ་སངས་རྒྱས་བཅོམ་ལྡན་འདས་ཀྱི་གོ་འཕང་བརྙེས་པར་གྱུར་ཅིག །ཡུལ་ཁམས་ཐམས་ཅད་དུའང་མི་ནད་དང་ཕྱུགས་ནད་དང་ལོ་ཉེས་པ་དང་དགྲའི་གནོད་པ་ལ་སོགས་པ་བཀྲ་མི་ཤིས་པའི་བག་ཅི་ཡང་མི་འབྱུང་བར་གྱུར་ཅིག །ཆར་ཆུ་དུས་སུ་བབས་ཏེ་ལོ་ཕྱུགས་འཕེལ་ཞིང་རྒྱས་པ་དང་བདེ་སྐྱིད་ཀྱི་དཔལ་ཕུན་སུམ་ཚོགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཀྱང་བདེ་བ་
དང་ལྡན་སྡུག་བསྔལ་དང་བྲལ་ཏེ་ཚོགས་གཉིས་རྫོགས་ཏེ་སངས་རྒྱས་པར་གྱུར་ཅིག །ཁྱད་པར་དུ་ཡང་དམ་པའི་ཆོས་ཡུན་རིང་དུ་གནས་ཤིང་རྒྱས་པར་གྱུར་ཅིག །དགེ་འདུན་ཐམས་ཅད་ཀྱང་ཆོས་སྤྱོད་བཅུ་དང་འཁོར་ལོ་གཉིས་ལ་སོགས་པ་སྒོ་གསུམ་དགེ་བའི་བྱ་བ་ཁོ་ན་ལ་ཉིན་མཚན་ཐམས་ཅད་དུ་བརྩོན་པར་གྱུར་ཅིག །དགེ་འདུན་མཐུན་ཞིང་དགེ་འདུན་གྱི་དོན་ཐམས་ཅད་འགྲུབ་པར་གྱུར་ཅིག །འདུས་པ་རྒྱ་མཚོའི་ཚོགས་དབྱར་གྱི་ཆུ་བོ་བཞིན་དུ་འཕེལ་ཞིང་རྒྱས་པར་གྱུར་ཅིག །གཉིས་པ་ནི། ཕྱག་འཚལ་ལོ་ཞེས་པའི་དུས་སུ་མགོ་བོ་འདུད། མཆོད་དོ་ཞེས་པའི་དུས་སུ་མེ་ཏོག་འཐོར། །སྐྱབས་སུ་མཆིའོ་ཞེས་པའི་དུས་སུ་ཐལ་མོ་སྦྱར། བྱིན་གྱིས་བརླབ་ཏུ་གསོལ་ཞེས་པའི་དུས་སུ་སོ་སོའི་སྨོན་ལམ་ལས་འབྱུང་བའི་བདེ་ལེགས་ཐམས་ཅད་རང་གཞན་སེམས་ཅན་ཐམས་ཅད་ཀྱིས་ཐོབ་པར་ཤོག་སྙམ་པའི་འདུན་པ་བྱ་བ་སོགས་བསམ་སྦྱོར་ཟུང་དུ་འབྲེལ་བར་བྱས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཞབས་ལ་དུས་ཐམས་ཅད་དུ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། ༈ །སངས་རྒྱས་བཅོམ་ལྡན་འདས་ཀྱི་བསྟན་པ་དམ་པའི་ཆོས་སྐྱོང་ཞིང་ལྷ་མི་
ཀུན་གྱི་བསོད་ནམས་ཀྱི་དཔལ་གྱི་ཞིང་དུ་དེ་བཞིན་གཤེགས་པ་ཤཱཀྱ་ཐུབ་པས་བཀའ་བསྒོས་ཏེ་མྱ་ངན་ལས་མི་འདའ་བར་འཇིག་རྟེན་ན་མངོན་སུམ་དུ་གཟིགས་ཤིང་བཀའ་ལུང་གི་རྗེས་སུ་བསྒྲུབས་པ་འཕགས་པའི་ཚིག་ངེས་པས་ཞལ་གྱིས་བཞེས་པ། ཞེས་པ་ཐམས་ཅད་ཀྱི་མགོར་སྦྱར་ནས། པྲི་ཡང་ཀུའི་གླིང་ན་འཕགས་པའི་གནས་བརྟན་ཆེན་པོ་སྒྲ་གཅན་ཟིན་འཁོར་དགྲ་བཅོམ་པ་སྟོང་ཆིག་བརྒྱས་བསྐོར་བའི་ཞབས་ལ་དུས་ཐམས་ཅད་དུ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། །བྱ་རྒོད་ཕུང་པོའི་རི་ལ་འཕགས་པའི་གནས་བརྟན་ཆེན་པོ་ལམ་ཕྲན་བརྟན་འཁོར་དགྲ་བཅོམ་པ་སྟོང་དྲུག་བརྒྱས་བསྐོར་ཏེ་བཞུགས་པའི་ཞབས༴ སོགས་ཀུན་ལ་འགྲེའོ། །ཤར་གྱི་ལུས་འཕགས་གླིང་ན་འཕགས་པའི་གནས་བརྟན་ཆེན་པོ་བྷ་ར་དྷྭ་ཛ་བསོད་སྙོམས་ལེན་འཁོར་དགྲ་བཅོམ་པ་སྟོང་གིས་བསྐོར་ཏེ་བཞུགས་པའི་ཞབས་ལ༴ ལྷའི་གནས་སུམ་ཅུ་རྩ་གསུམ་ན་འཕགས་པའི་གནས་བརྟན་ཆེན་པོ་ལམ་བརྟན་འཁོར་དགྲ་བཅོམ་པ་དགུ་བརྒྱས་བསྐོར་ཏེ་བཞུགས་པའི་ཞབས་ལ༴ རིའི་རྒྱལ་པོ་ངོས་ཡངས་ལ་འཕགས་པའི་གནས་བརྟན་ཆེན་པོ་ཀླུའི་
སྡེ་འཁོར་དགྲ་བཅོམ་པ་སྟོང་ཉིས་བརྒྱས་བསྐོར་ཏེ་བཞུགས་པའི་ཞབས་ལ༴ རིའི་རྒྱལ་པོ་བྷི་ཧུ་ལ་འཕགས་པའི་གནས་བརྟན་ཆེན་པོ་སྦེད་བྱེད་འཁོར་དགྲ་བཅོམ་པ་སྟོང་བཞི་བརྒྱས་བསྐོར་ཏེ་བཞུགས་པའི་ཞབས་ལ༴། གངས་ཅན་རིའི་རྒྱལ་པོ་ལ་འཕགས་པའི་གནས་བརྟན་ཆེན་པོ་མི་ཕྱེད་པ་འཁོར་དགྲ་བཅོམ་པ་སྟོང་གིས་བསྐོར་ཏེ་བཞུགས་པའི་ཞབས་ལ༴ གངས་རི་ཆེན་པོ་ཏི་སེ་ན་འཕགས་པའི་གནས་བརྟན་ཆེན་པོ་ཡན་ལག་འབྱུང་འཁོར་དགྲ་བཅོམ་པ་སྟོང་སུམ་བརྒྱས་བསྐོར་ཏེ་བཞུགས་པའི་ཞབས་ལ༴ དྲང་སྲོང་རིའི་ངོགས་ཤེལ་ནགས་ན་འཕགས་པའི་གནས་བརྟན་ཆེན་པོ་མ་ཕམ་པ་འཁོར་དགྲ་བཅོམ་པ་བརྒྱས་བསྐོར་ཏེ་བཞུགས་པའི་ཞབས་ལ༴ རིའི་གནས་ཀྱི་ངོགས་ལོ་མ་བདུན་པ་ཞེས་བྱ་བའི་རི་ཕུག་ན་འཕགས་པའི་གནས་བརྟན་ཆེན་པོ་ནགས་ན་གནས་འཁོར་དགྲ་བཅོམ་པ་སྟོང་བཞི་བརྒྱས་བསྐོར་ཏེ་བཞུགས་པའི་ཞབས་ལ༴ ཟངས་གླིང་ན་འཕགས་པའི་གནས་བརྟན་ཆེན་པོ་དུས་ལྡན་འཁོར་དགྲ་བཅོམ་པ་སྟོང་ཆིག་བརྒྱས་བསྐོར་ཏེ་བཞུགས་པའི་ཞབས་ལ༴ སིང་ག་ལའི་གླིང་ན་འཕགས་པའི་གནས་བརྟན་ཆེན་པོ་རྡོ་རྗེ་མོའི་བུ་འཁོར་དགྲ་བཅོམ་པ་སྟོང་གིས་བསྐོར་ཏེ་བཞུགས་པའི་ཞབས་ལ༴ །ཆུ་བོ་ཡ་
མུ་ནའི་གླིང་ན་འཕགས་པའི་གནས་བརྟན་ཆེན་པོ་བཟང་པོ་འཁོར་དགྲ་བཅོམ་པ་སྟོང་ཉིས་བརྒྱས་བསྐོར་ཏེ་བཞུགས་པའི་ཞབས་ལ། ཁ་ཆེའི་ཡུལ་ན་འཕགས་པའི་གནས་བརྟན་ཆེན་པོ་གསེར་བེའུ་འཁོར་དགྲ་བཅོམ་པ་ལྔ་བརྒྱས་བསྐོར་ཏེ་བཞུགས་པའི་ཞབས་ལ། ནུབ་ཀྱི་བ་ལང་སྤྱོད་ན་འཕགས་པའི་གནས་བརྟན་ཆེན་པོ་བྷ་ར་དྷྭ་ཛ་གསེར་ཆེན་མཆོག་འཁོར་དགྲ་བཅོམ་པ་བདུན་བརྒྱས་བསྐོར་ཏེ་བཞུགས་པའི་ཞབས་ལ །བྱང་གི་སྒྲ་མི་སྙན་ན་འཕགས་པའི་གནས་བརྟན་ཆེན་པོ་བ་ཀུ་ལ་འཁོར་དགྲ་བཅོམ་པ་དགུ་བརྒྱས་བསྐོར་ཏེ་བཞུགས་པའི་ཞབས་ལ་དུས་ཐམས་ཅད་དུ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། །འཕགས་པའི་དགེ་བསྙེན་དྷརྨ་ཏཱ་ལ་དུས་ཐམས་ཅད་དུ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། །འདི་ནི་གསོལ་འདེབས་ཀྱི་བསྙེན་པ་ཞེས་ཉམས་ལེན་དངོས་གཞི་ཡིན་པས་བརྒྱ་སྟོང་ཁྲི་འབུམ་གང་ལྕོགས་དང་། ཐ་ནའང་བདུན་ནམ་གསུམ་ལ་སོགས་པ་ངེས་པར་བརྗོད་པ་གལ་ཆེའོ། །དེ་ནས་གཟུངས་སྔགས་བཟླ་བར་སྤྲོ་ན། །དཀོན་མཆོག་གསུམ་གྱི་བདེན་པ་དང་། དེ་བཞིན་གཤེགས་པ་སྲས་དང་བཅས་པ་ཐམས་ཅད་ཀྱི་མཐུ་དང་བྱིན་གྱིས་བརླབ་དང་།
ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་དང་། འཕགས་པ་སྐུ་གསུང་ཐུགས་ཀྱི་སྤྱོད་པ་མ་དག་པ་མི་མངའ་བ་རྣམས་ཀྱི་ཐུགས་ངེས་པའི་བདེན་པས། མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་སྟོན་པ་ཡང་དག་པར་རྫོགས་པའི་སངས་རྒྱས་འཁོར་འཕགས་པ་ཉན་ཐོས་ཀྱི་དགེ་འདུན་གྱི་ཚོགས་དང་བཅས་པ་ཐམས་ཅད་གདན་འཛོམ་པ་ཆེན་པོ་མཛད་དེ། མཆོད་པ་བཞེས་ཤིང་། གཟུངས་སྔགས་བཟླས་པ་ཚུལ་བཞིན་ཏུ་འགྲུབ་པར་བྱིན་གྱིས་རློབ་པར་མཛད་དེ། བདག་སོགས་འགྲོ་བ་མང་པོའི་དོན་དཔག་ཏུ་མེད་པ་མཛད་པར་གྱུར་ཅིག །དཀྱིལ་འཁོར་གྱི་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་འཕྲོས་པས་འཇིག་རྟེན་གྱི་ཁམས་ཐམས་ཅད་ཁྱབ། དེས་འཕགས་པ་ཐམས་ཅད་སེམས་ཅན་གྱི་དོན་ལ་བསྐུལ་ཞིང་། ངན་སོང་གི་གནས་ཐམས་ཅད་སྦྱངས་ཏེ། སེམས་ཅན་ཐམས་ཅད་མཐོ་རིས་དང་ཐར་པའི་གོ་འཕང་ལ་འཇུག་པར་གྱུར་ཅིག །འོད་ཟེར་དེས་བདག་ཅག་རྣམས་ལ་ཁྱབ་པས་འགྲོ་དོན་དཔག་མེད་སྒྲུབ་ནུས་པའི་མཐུ་ཐོབ་སྟེ་དེ་བཞིན་གཤེགས་པ་རྣམས་དང་སྐུ་གསུང་ཐུགས་མཚུངས་པར་གྱུར་ཅིག །བདག་ཅག་ལ་སོགས་པ་བསྒྲུབ་བྱའི་
ལུས་དང་འཁོར་དང་ཡོ་བྱད་ལ་ཁྱབ་སྟེ། ནད་དང་གནོད་པ་ཐམས་ཅད་ནི་བསལ། ལུས་སེམས་ཀྱི་སྐྱོན་ཐམས་ཅད་དང་ནི་བྲལ་ཏེ་ཆོས་ཀྱི་སྣོད་རུང་དུ་གྱུར་ཅིག །བདག་ཅག་རྣམས་ཀྱིས་འཕགས་པ་རྣམས་མངོན་སུམ་པ་ལྟ་བུར་དམིགས་ནས་གཟུངས་བཟླས་པས་དེ་བཞིན་གཤེགས་པ་སྲས་དང་བཅས་པ་རྣམས་ཀྱི་ཏིང་ངེ་འཛིན་གྱི་སྒོ་སྣ་ཚོགས་དང་ཚིག་འབྲུ་མཐའ་ཡས་པ་རྟོགས་ཤིང་རྣམ་པར་དག་པར་བྱིན་གྱིས་རློབས་པར་གྱུར་ཅིག །ཅེས་བདེན་ཚིག་གིས་བསྔོས་ནས། འཕགས་པ་རྣམས་ཀྱིས་གནང་ཞིང་ཕྲིན་ལས་མཛད་པར་ངེས་ཤེས་བསྐྱེད་དེ། ཇི་ལྟར་བསྔོས་པ་བཞིན་དུ་གྱུར་པར་དམིགས་ནས། ཨོཾ་ན་མོ་བྷ་ག་བ་ཏེ་ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་མུ་ནི་མུ་ནི་མ་ཧཱ་མུ་ན་ཡེ་སྭཱ་ཧཱ། །ཞེས་གཟུངས་རིང་ཉེར་གཅིག་གམ་བདུན་དང་གསུམ་ལ་སོགས་པས་སྣ་དྲངས་ནས་མུ་ནི་གང་འགྲུབ་དང་། མུ་ན་ཡེའི་མཐར། སརྦ་སངྒྷ་པ་རི་པཱུ་ར་ཀ་སྭཱ་ཧཱ། །ཞེས་དགེ་འདུན་འཕེལ་བའི་ཤམ་བུའང་སྤྲོ་ན་ཅི་རིགས་གདགས་ལ་བཟླ། གསུམ་པ་ལ་གཉིས། སྨོན་ལམ་དངོས་དང་། འཕྲོས་དོན་བཤད་པའོ། །དང་པོ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་དཔལ་རྒྱལ་བ་
ཤཱཀྱ་ཐུབ་པ་ཐུགས་རྗེ་ཆེན་པོ་དང་ལྡན་པ་ཐུགས་བརྩེ་བ་ཆེན་པོས་དགོངས་སུ་གསོལ། ཁྱེད་ཀྱིས་བསྐལ་པ་དཔག་ཏུ་མེད་པའི་སྔོན་རོལ་དུ་མུན་པར་ཆུད་པའི་སེམས་ཅན་སྐྱོབ་པ་མ་མཆིས་པ། སྐྱབས་མ་མཆིས་པ། དཔུང་གཉེན་མ་མཆིས་པ། སྡུག་བསྔལ་གྱི་སྣོད་དུ་གྱུར་པའི་སེམས་ཅན་རྣམས་ལ་ཐུགས་བརྩེ་བས་དགོངས་ཏེ། དེ་བཞིན་གཤེགས་པ་རིན་པོ་ཆེའི་སྙིང་པོའི་དྲུང་དུ་སྨོན་ལམ་ཆེན་པོ་ལྔ་བརྒྱ་བཏབ་ཅིང་བྱང་ཆུབ་ཏུ་དམ་བཅའ་བར་མཛད་པ་དེའི་ཚེ་སྟོན་པ་འཁོར་དང་བཅས་པས་ཀྱང་སྙིང་རྗེ་ཆེན་པོ་དང་ལྡན་པ་ཁྱོད་ཀྱིས་སྨོན་ལམ་བཏབ་པ་ལེགས་སོ་ལགས་སོ། །ཞེས་སོགས་བསྔགས་པ་བརྗོད་ཅིང་ཁྱོད་ནི་མ་འོངས་པའི་དུས་ན་འཇིག་རྟེན་གྱི་ཁམས་མི་མཇེད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ལོ་བཞི་བཅུ་རྩ་ལྔས་སངས་རྒྱས་ཀྱི་མཛད་པ་དེ་ལྟ་བུ་མང་པོ་དག་བྱེད་པར་འགྱུར་རོ། །ཁྱོད་མྱ་ངན་ལས་འདས་ནས་ཀྱང་དམ་པའི་ཆོས་ལོ་སྟོང་དུ་གནས་པར་འགྱུར་རོ། །དམ་པའི་ཆོས་ནུབ་
ནས་ཀྱང་སྐུ་གདུང་རྣམས་ཀྱིས་སྨོན་ལམ་བཏབ་པ་དེ་ལྟར་འགྱུར་ཏེ་ཇི་སྐད་སྨོས་པ་བཞིན་ཏུ་ཡུན་རིང་པོར་སེམས་ཅན་རྣམས་འདུལ་བར་འགྱུར་རོ། །ཞེས་ལུང་བསྟན་པ་དེ་བཞིན་ཏུ་དེང་འདིར་ཡང་མཚན་ནས་བརྗོད་དེ་ཕྱག་འཚལ་ཞིང་མཆོད་པ་འབུལ་ན། བདག་ཅག་ལ་སོགས་པའི་སེམས་ཅན་ཐམས་ཅད་ཀྱང་སེམས་ཅན་རྣམས་ཀྱི་དགེ་བའི་རྩ་བ་སྨིན་པར་བགྱིད་པའི་སླད་དུ། དགའ་ལྡན་གྱི་གནས་ནས་བབས་ཏེ་འཁོར་ལོས་སྒྱུར་བའི་རྒྱལ་པོའི་རིགས་སུ་བཙུན་མོ་དམ་པའི་མངལ་ན་གནས་པ་ཉེ་བར་འཛིན་པ་ལ་སོགས་པ་མགོན་པོ་ཁྱོད་ཀྱིས་བཏབ་པའི་སྨོན་ལམ་ཆེན་པོ་ཐམས་ཅད་འགྲུབ་པར་གྱུར་ཅིག །ཅེས་པ་དང་། འཕགས་པ་སྒྲ་གཅན་འཛིན་ལ་སོགས་པ་གནས་བརྟན་ཆེན་པོ་བཅུ་དྲུག་པོ་རེ་རེ་ལ་དགྲ་བཅོམ་པ་དུ་མས་ཀུན་ནས་བསྐོར་ཏེ་འཚོ་ཞིང་གཞེས་པ་དགོངས་སུ་གསོལ། དུས་ངན་པའི་སེམས་ཅན་ལས་ཀྱི་སྒྲིབ་པ་སྣ་ཚོགས་ཀྱིས་བསྒྲིབས་པ། ནད་སྣ་ཚོགས་ཀྱིས་གཟིར་བ་མྱ་ངན་དང་སྡུག་བསྔལ་སྣ་ཚོགས་ཀྱིས་གཙེས་པ་ངན་སོང་ནས་ངན་འགྲོར་འོག་ནས་འོག་ཏུ་ལྟུང་བར་འགྱུར་བའི་སེམས་ཅན་རྣམས་ལ་ཐུགས་བརྩེ་བར་དགོངས་ཏེ། སྔོན་དེ་བཞིན་གཤེགས་པ་ཤཱཀྱ་ཐུབ་པའི་སྤྱན་སྔར་མྱ་
ངན་ལས་མི་འདའ་བར་འཇིག་རྟེན་ཏུ་མངོན་སུམ་བཞུགས་ཤིང་བཀའ་ལུང་གི་རྗེས་སུ་བསྒྲུབ་པར་འཕགས་པའི་ཚིག་བདེན་པས་ངེས་པར་ཞལ་གྱིས་བཞེས་པ་དམ་པའི་ཆོས་སྐྱོང་ཞིང་འགྲོ་བ་ཀུན་གྱི་བསོད་ནམས་ཀྱི་དཔལ་གྱི་ཞིང་དུ་གྱུར་པ་འཕགས་པའི་གནས་བརྟན་ཆེན་པོ་བཅུ་དྲུག་འཁོར་དང་བཅས་པའི་མཐུ་དང་བྱིན་གྱི་རླབས་ཀྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་གསུངས་པའི་དམ་པའི་ཆོས་མཐའ་དག་འཇིག་རྟེན་ཏུ་དར་ཞིང་རྒྱས་པར་གྱུར་ཅིག །གླེགས་བམ་ལ་བྲིས་ཏེ་འཆང་བ་དང་མཆོད་པ་དང་བཀུར་སྟི་བགྱིས་པ་དང་འཛིན་པ་དང་ཀློག་པ་དང་ཁ་ཏོན་བགྱིད་པ་དང་གཞན་དག་ལའང་རྒྱ་ཆེར་སྟོན་པར་གྱུར་ཅིག །ཉན་ཐོས་དང་ཐེག་པ་ཆེན་པོའི་གང་ཟག་ཐམས་ཅད་ཀྱང་རང་རང་གི་མཛད་པ་ཕྲིན་ལས་རྒྱས་པར་གྱུར་ཅིག །རྟག་ཏུ་སྡེ་སྣོད་དུ་མཉན་པ་དང་འཆད་པ་དང་རྩེ་གཅིག་ཏུ་མོས་པ་དང་འཇིག་རྟེན་ཐམས་ཅད་དུ་བཀྲ་ཤིས་པ་དང་གཟི་བྱིན་ཆགས་པ་དང་བདེ་བ་དང་ལེགས་པ་ཐམས་ཅད་འབྱུང་བ་དང་ཅི་བསམ་པའི་དོན་ཐམས་ཅད་འགྲུབ་པར་གྱུར་ཅིག །ངན་སོང་དང་ངན་འགྲོ་ལས་གྲོལ་ཏེ་རབ་ཏུ་དགའ་བ་རྒྱས་པར་འགྱུར་བ་དང་རིག་པའི་ཡེ་ཤེས་རྒྱས་པར་གྱུར་ཅིག །ནམ་མཁའ་རྣམ་
པར་དག་པ་ལྟར་དཀར་པོའི་ཡོན་ཏན་ཐམས་ཅད་རྒྱས་པར་གྱུར་ཅིག །རིག་པའི་གནས་ལྔ་ལ་མཁས་པར་གྱུར་ཅིག །བདག་དང་སེམས་ཅན་ཐམས་ཅད་བསླབ་པ་གསུམ་གྱིས་མཛེས་པར་གྱུར་ཅིག །ཁྱད་པར་དུའང་རང་རྒྱུད་ཀྱི་ཉོན་མོངས་པ་ཐམས་ཅད་ཞི་བར་གྱུར་ཅིག །ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་པ་སྣ་ཚོགས་དཔག་ཏུ་མེད་པས་མཆོད་པར་གྱུར་ཅིག །ལྷག་པར་ཡང་གནས་བརྟན་ཆེན་པོ་སོ་སོ་རང་རང་གི་བདེན་པའི་སྟོབས་ཀྱི་བྱིན་གྱིས་བརླབས་པ་རྣམས་དང་། སོ་སོའི་བྱིན་རླབས་ཀྱི་ཁྱད་པར་གྱིས་སྡིག་པ་དང་སྡུག་བསྔལ་ཞི་ཞིང་དགེ་བ་དང་བདེ་ལེགས་འཕེལ་བའི་ཕན་ཡོན་ཇི་སྐད་གསུངས་པ་ཐམས་ཅད་བདག་ཅག་ལ་སོགས་པ་སེམས་ཅན་ཐམས་ཅད་ཀྱིས་འཕྲལ་དུ་ཐོབ་པར་བྱིན་གྱིས་བརླབ་ཏུ་གསོལ། །ཞེས་དང་། རྒྱལ་པོ་ཆེན་པོ་ཡུལ་འཁོར་སྲུང་དང་འཕགས་སྐྱེས་པོ། སྤྱན་མི་བཟང་དང་རྣམ་ཐོས་སྲས་ལ་སོགས་པ་དམ་པའི་ཆོས་སྐྱོང་བ་ལྷའི་དགེ་བསྙེན་འཁོར་དང་བཅས་པ་དགོངས་སུ་གསོལ། །སྔོན་དེ་བཞིན་གཤེགས་པ་ཤཱཀྱ་ཐུབ་པའི་སྤྱན་སྔར་ལྷའི་ཚིག་བདེན་པས་ཛམ་བུའི་གླིང་སོགས་ཡུལ་རྣམས་དང་། གྲོང་དང་ལྷ་དང་མི་དང་
སྐྱེ་བོའི་ཚོགས་དང་། ཆོས་དང་ཆོས་སྨྲ་བ་དང་བཅས་པའི་སངས་རྒྱས་ཀྱི་བསྟན་པ་སྲུང་ཞིང་སྐྱོང་བར་ཞལ་གྱིས་བཞེས་པ་བཞིན་ཏུ་ཕན་ཡོན་ཇི་སྐད་གསུངས་པ་ཐམས་ཅད་བདག་ཅག་ལ་སོགས་པ་སེམས་ཅན་ཐམས་ཅད་ཀྱིས་འཕྲལ་དུ་ཐོབ་པར་བྱིན་གྱིས་བརླབ་ཏུ་གསོལ། །ཞེས་པའི་མཐར། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་དང་། འཕགས་པ་སྐུ་དང་གསུང་དང་ཐུགས་ཀྱི་སྤྱོད་པ་མ་དག་པ་མི་མངའ་བ་རྣམས་ཀྱི་ཐུགས་དམ་ངེས་པས་དེ་བཞིན་ཏུ་གྱུར་ཅིག །ཅེས་བརྗོད་ཅིང་མེ་ཏོག་འཐོར་རོ། །ཆོ་ག་དཀྱུས་མ་ལ་འདི་ནས་རྗེས་ཀྱི་གཏོར་འབུལ་ལ་འཇུག་གོ། །གཉིས་པ་ནི། སོ་སོའི་དམིགས་བསལ་གྱི་དགོས་པ་དང་བསྟུན་ནས་གསོལ་འདེབས་དང་དམིགས་པའི་ཁ་བསྒྱུར་མང་དུ་གསུངས་པ་ལས་གལ་ཆེ་བ་རང་གཞན་གྱི་སྡིག་པ་སྦྱོང་བའི་གསོལ་བ་གདབ་པར་འདོད་ན། གནས་བརྟན་ཆེན་པོ་དགྲ་བཅོམ་པ་དཔག་ཏུ་མེད་པའི་ཚོགས་དང་བཅས་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་དགྲ་བཅོམ་པའི་རྣམ་པར་བྱོན་ཏེ། ཕྱག་ན་རིན་པོ་ཆེའི་བུམ་པ་བདུད་རྩིའི་
ཆུས་གང་བ་བསྣམས་ནས་བདག་ལ་སོགས་པར་ཁྲུས་གསོལ་བར་གྱུར་པར་བསམ་ལ་གོང་དུ་སྨོས་པའི་གསོལ་འདེབས་ཀྱི་བསྙེན་པ་བྱ་ཞིང་། མཐར་གསོལ་བ་གདབ་པ་ནི། རྒྱལ་བ་གང་དག་ཡོན་ཏན་གྱིས་གྲུབ་པ་དཔག་ཏུ་མེད་པར་གྱུར་པ། ཉོན་མོངས་པའི་ཆུ་བོའི་འདམ་རྫབ་ལས་ཡང་དག་པར་བརྒལ་བ། གཏོང་བ་དང་ལྡན་ཞིང་ཚུལ་ཁྲིམས་རྣམ་པར་དག་པ་བཟོད་པ་ཆེན་པོའི་མཆོག་དང་ལྡན་པ། བརྩོན་འགྲུས་སྦྱངས་ཤིང་གཡོ་བ་མི་མངའ་བའི་བསམ་གཏན་ཆེན་པོ་དང་ལྡན་པ་མཁྱེན་རབ་རྣོ་བ་ཐོགས་པ་མེད་པ་དང་ལྡན་པ། འཇིག་རྟེན་ཐམས་ཅད་ལ་ཐུགས་བརྩེ་བ། དེ་ལ་མངོན་པར་བརྩོན་པ། བྱམས་པའི་ཐུགས་ཀྱི་བདག་ཉིད་ཅན་རྣམས་ལ་བདག་གི་ལུས་དང་ངག་དང་ཡིད་གསུམ་གུས་པས་ཕྱག་འཚལ་ལོ། །རྒྱལ་བ་དེ་དག་གི་བདག་སྡིག་པ་ཐམས་ཅད་ལས་རྣམ་པ་ཐམས་ཅད་དུ་བསྐྱབ་ཏུ་གསོལ། །སྡུག་བསྔལ་དུ་མས་གདུང་བའི་སེམས་ཅན་ཐམས་ཅད་ཀྱང་རབ་ཏུ་བརྩོན་པས་དྲང་དུ་གསོལ། །ཐུགས་རྗེ་ཆེན་པོ་དང་ལྡན་པས་བདག་ངན་འགྲོ་ལས་སྒྲོལ་ཞིང་བྱང་ཆུབ་ཆེན་པོ་ལ་མྱུར་དུ་བཞག་ཏུ་གསོལ། །བདག་སྲས་གཅིག་དང་འདྲ་བར་ཐུགས་བརྩེ་བས་དགོངས་སུ་གསོལ། །བདག་སློབ་མ་སྡུག་པ་དང་འདྲ་
པར་བསླབ་ཏུ་གསོལ། །ཐུགས་རྗེ་ཆེན་པོའི་ཆབ་ཀྱིས་བདག་བཀྲུ་བར་གསོལ། །ངོ་ཚ་མཁྱེན་པའི་ན་བཟའ་བདག་ལ་དགབ་ཏུ་གསོལ། །བྱང་ཆུབ་ཀྱི་ཡན་ལག་གི་མེ་ཏོག་རྣམས་ཀྱིས་བདག་ལ་གཏོར་དུ་གསོལ། །རྒྱལ་བ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། །སེང་གེའི་སྒྲ་ཆེན་པོས་བདག་ལ་ལུང་བསྟན་དུ་གསོལ། །བདག་རྒྱལ་བ་སྲས་དང་བཅས་པའི་དྲུང་དུ་གཞོན་ནུ་རབ་ཏུ་བྱུང་བ་དང་། །ལྐོག་མ་ཡིན་པའི་རབ་ཏུ་བྱུང་བ་དང་། །ཡང་དག་པའི་རབ་ཏུ་བྱུང་བ་དང་། དེ་ཁོ་ནའི་རབ་ཏུ་བྱུང་བས་རབ་ཏུ་འབྱུང་བར་གྱུར་ཅིག །དེ་ཡང་འཇིག་རྟེན་ལས་ཁྱད་པར་དུ་འཕགས་པའི་སྐྱོན་མེད་པ། །མ་འདྲེས་པ་རྙོག་པ་མེད་པ། །ལྷ་དང་མི་དག་མངོན་པར་དགའ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྔགས་པ། སེམས་ཅན་ལ་སྨན་པའི་སླད་དུ་བདག་རབ་ཏུ་འབྱུང་བར་གྱུར་ཅིག །བདག་གི་ཉོན་མོངས་ལས་རྣམས་ཀྱི། །དྲི་མ་དེ་བཞིན་གཤེགས་པས་སོལ། །སངས་རྒྱས་རྣམས་ཀྱིས་བདག་ལ་ནི། །ཐུགས་རྗེའི་ཆུ་ཡིས་བཀྲུ་བར་གསོལ། །ཞེས་གསོལ་བ་གདབ་བོ། །འཇིག་རྟེན་ཏུ་ཆོས་ཀྱི་འཆད་ཉན་དང་སངས་རྒྱས་ཀྱི་བསྟན་པ་དར་བར་གསོལ་བ་གདབ་པར་འདོད་པས། འཕགས་པའི་ཉན་ཐོས་དགྲ་
བཅོམ་པ་སྤྱི་དང་། བྱེ་བྲག་གནས་བརྟན་ཆེན་པོ་རྣམས་དང་། སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱང་དགྲ་བཅོམ་པའི་རྣམ་པར་མདུན་གྱི་ནམ་མཁའ་འམ་རང་གི་གནས་ཁང་དུ་བྱོན་ནས་ཕྱག་ན་སྡེ་སྣོད་ཀྱི་གླེགས་བམ་བསྣམས་ཤིང་། ཆོས་འཆད་ཀྱི་ཕྱག་རྒྱ་བཅས་པས་བཞུགས་པ་རྣམས་ཀྱིས་ཆོས་ཀྱི་སྒྲ་སྒྲོགས་པར་བསམ་ལ་གསོལ་འདེབས་ཀྱི་བསྙེན་པའི་མཐར། །འགྲོ་བའི་མུན་སེལ་བསྟན་པའི་སྒྲོན་མེ་འཛིན། །ཁྱེད་ཀྱིས་བདུད་རྩིའི་གྲོང་ཁྱེར་སྒོ་དབྱེར་གསོལ། །ཆོས་ཀྱི་རྔ་ཆེན་དམ་པ་བརྡུང་དུ་གསོལ། །ཆོས་ཀྱི་དུང་གི་མཆོག་ཀྱང་འབུད་དུ་གསོལ། །ཆོས་ཀྱི་སྒྲོན་མེ་མཆོག་ཀྱང་སྦར་དུ་གསོལ། །ཆོས་ཀྱི་ཆར་པ་དམ་པ་དབབ་ཏུ་གསོལ། །ཆོས་ཀྱི་རྒྱལ་མཚན་དམ་པ་སྒྲེང་དུ་གསོལ། །ཆོས་ཀྱི་འཁོར་ལོ་དམ་པ་བསྐོར་དུ་གསོལ། །ཉོན་མོངས་དགྲ་ཚོགས་རྣམས་ལས་རྒྱལ་བར་མཛོད། །སྲིད་པའི་མཚོ་ལས་སེམས་ཅན་རབ་ཏུ་སྒྲོལ། །ངན་སོང་གསུམ་གྱི་ལམ་རྣམས་དགག་ཏུ་གསོལ། །སྲོག་ཆགས་ཉོན་མོངས་མེས་གདུངས་ཞི་མཛད་པ། །ཡེ་ཤེས་རལ་གྲིས་ཉོན་མོངས་རྒྱ་དབྲལ་གསོལ། །ཆོས་ཀྱི་བདུད་རྩིས་སེམས་ཅན་ཚིམ་མཛད་གསོལ། །བྱང་ཆུབ་ཡོན་ཏན་རྒྱ་མཚོས་
ངོམས་མཛད་གསོལ། །སེམས་ཅན་སྡུག་བསྔལ་མཚོ་ལས་ཐར་མཛད་གསོལ། །བདེ་བ་ཀུན་གྱི་རྒྱ་མཚོ་ཐོབ་མཛད་གསོལ། །སྔོན་ཆད་སུས་ཀྱང་མ་བསྐོར་བའི། །ཆོས་ཀྱི་འཁོར་ལོ་བསྐོར་དུ་གསོལ། །ཞེས་གསོལ་བ་གདབ་བོ། །རང་གི་རྒྱུད་ལ་བསླབ་གསུམ་རྣམ་པར་དག་པར་སྐྱེ་བར་འདོད་ན། གནས་བརྟན་ཆེན་པོ་རྣམས་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་དགྲ་བཅོམ་པའི་རྣམ་པར་རང་གི་མདུན་ན་སྐྱིལ་ཀྲུང་དང་མཉམ་བཞག་ཏུ་བཞུགས་ཏེ་བདག་བྱིན་གྱིས་རློབ་པར་བསམ་ལ་གསོལ་འདེབས་ཀྱི་བསྙེན་པའི་མཐར། །སངས་རྒྱས་སྤྲུལ་པའི་དགྲ་བཅོམ་པ། །འཕགས་པའི་གནས་བརྟན་དགེ་སྦྱོང་ཆེ། །དཀོན་མཆོག་རིན་ཆེན་གསུམ་གྱི་དངོས། །ཉན་ཐོས་ཆེན་པོ་སྤྲུལ་པའི་སྐུ། །ཐུགས་རྗེའི་བདག་ཉིད་ཅན་རྣམས་དང་། །འཕགས་པའི་དགེ་སློང་དགྲ་བཅོམ་པ། །ཁྲི་དང་དྲུག་སྟོང་བཞི་བརྒྱ་རྣམས། །དགྲ་བཅོམ་ཟག་ཟད་ཉོན་མོངས་མེད། །བྱ་བ་བྱས་ཤིང་བྱེད་པ་བྱས། །སེམས་དང་ཤེས་རབ་རྣམ་པར་གྲོལ། །ཅང་ཤེས་རྟ་དང་གླང་ཆེན་བཞིན། །ཁུར་བོར་རང་དོན་རབ་ཏུ་ཐོབ། །སྲིད་པར་ཀུན་སྦྱོར་ཡོངས་ཟད་པ། །སེམས་ཀྱི་དབང་རྣམས་མཆོག་ཐོབ་པ། །མངོན་ཤེས་རྫུ་འཕྲུལ་ཡོན་ཏན་དང་། །ཡོན་ཏན་
རྒྱ་མཚོའི་ཕ་རོལ་བྱོན། །འཕགས་པའི་གནས་བརྟན་ཁྱོད་རྣམས་ནི། །སེམས་ཅན་རྣམས་ལ་ཐུགས་བརྩེ་བས། །མ་དུལ་བ་ནི་དུལ་བར་མཛད། །མ་དག་དག་པར་མཛད་པ་པོ། །མགོན་སྐྱབས་མེད་ལ་མགོན་སྐྱབས་མཛད། །མ་གྲོལ་གྲོལ་བར་མཛད་པ་པོ། །མ་ཞི་བ་རྣམས་ཞི་བར་མཛད། །སྨན་ཆེན་སྨན་པའི་རྒྱལ་པོ་ལྟར། །སེམས་ཅན་རྣམས་ཀྱི་གསོས་གྱུར་པ། །རིག་དང་ཞབས་སུ་ལྡན་པ་ཡི། །སྦྱིན་གནས་དུལ་ཞིང་དགེ་འདུན་ཆེ། །ཞུགས་པ་རྣམ་པ་བཞི་དང་ནི། །འབྲས་ལ་གནས་པ་རྣམ་བཞི་ལ། །བདག་ཅག་གུས་པས་ཕྱག་འཚལ་ལོ། །བྱིན་རླབས་ཆེན་པོ་མཛད་དུ་གསོལ། །དད་ལྡན་བསོད་ནམས་གང་འདོད་པ། །རྫས་ལས་བྱུང་བའི་བསོད་ནམས་ནི། །རྟག་ཏུ་བྱེད་པ་རྣམས་ཀྱི་ཞིང་། །གང་ལ་ཕུལ་ན་འབྲས་ཆེ་བ། །དེ་ལ་གུས་པས་ཕྱག་འཚལ་ལོ། །བདག་རྒྱུད་ཞི་དང་དུལ་བ་ཡི། །ཐུགས་རྗེ་ཐུགས་བརྩེ་མཛད་པར་གསོལ། །ཞེས་རང་གི་བླ་མ་དགེ་བའི་བཤེས་གཉེན་རྣམས་དང་། སངས་རྒྱས་དང་བྱང་ཆུབ་སེམས་དཔའ་རྣམས་དང་། འཕགས་པ་དགྲ་བཅོམ་པ་ཆེན་པོ་རྣམས་ལ་གསོལ་བ་བཏབ་པས་དེ་རྣམས་ཀྱི་ཐུགས་དགོངས་པ་གཅིག་པས་བྱིན་གྱིས་བརླབས་པར་བསམ་ན། རང་གི་བློ་སྣ་བཟང་པོ་གོང་ནས་གོང་དུ་
འཕེལ་བར་འགྱུར་རོ། །ཞེས་གསུངས་སོ། །ནོར་འདོད་ན་ཐམས་ཅད་ཀྱི་ཕྱག་ན་ནེའུ་ལེ་བསྣམས་པར་བསམ། ཉམས་མྱོང་འཕེལ་བར་འདོད་ན་ཐམས་ཅད་མཉམ་བཞག་ཏུ་བསམ། བཀྲ་ཤིས་པར་འདོད་ན་ཐམས་ཅད་གཟི་བྱིན་དང་ལྡན་པ་ཕྱག་ན་ཟས་བཟང་པོས་བཀང་བའི་ལྷུང་བཟེད་བསྣམས་པར་བསམ། གསོལ་འདེབས་ཐམས་ཅད་ལ་ཁ་ཙམ་ཚིག་ཙམ་མ་ཡིན་པར་སྙིང་ཁོང་རུས་པའི་གཏིང་ནས་གསོལ་བརྩེ་གཅིག་ཏུ་འདེབས་པ་གལ་ཆེ་ཞིང་། དགེ་སློང་སོགས་ཚུལ་ཁྲིམས་རྣམ་པར་དག་པ་མང་པོས་མགྲིན་གཅིག་ཏུ་གསོལ་བ་བཏབ་ན་བྱིན་རླབས་ལྷག་པར་མྱུར་རོ། །གསུམ་པ་རྗེས་ཀྱི་བྱ་བ་ལ་དང་པོ་གཏོར་མ་འབུལ་བ་ནི། གཏོར་མ་ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། བྷྲཱུྃ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་དང་། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་ནས་ ཁཾ་སྭཱ་ཧཱ། ཞེས་ལན་གསུམ་གྱི་བྱིན་གྱིས་བརླབས་ལ། །རྩ་བརྒྱུད་བླ་མ་མ་ལུས་དང་། །གང་དག་སངས་རྒྱས་རང་སངས་རྒྱས། །སངས་རྒྱས་རྣམས་ཀྱི་ཉན་ཐོས་དང་། །ཚངས་པ་དང་ནི་བརྒྱ་བྱིན་དང་། །འཇིག་རྟེན་སྐྱོང་བ་དབང་ཕྱུག་ཆེ། །གནོད་སྦྱིན་སྡེ་དཔོན་སྟོབས་ཆེན་དང་། །འཕྲོག་མ་བུ་དང་བཅས་རྣམས་དང་། །གང་དག་བར་
སྣང་སྤྱོད་པ་རྣམས། །མེ་ཏོག་ལ་སོགས་མཆོད་པ་རྣམས། །སེམས་ཅན་དོན་ཏུ་རྣམ་ཀུན་གྱིས། །རྟག་ཏུ་བརྩེ་བས་བཞེས་སུ་གསོལ། །ཞེས་དཀོན་མཆོག་དང་ཆོས་སྐྱོང་བའི་དགེ་བསྙེན་རྣམས་ལ་སྤྱིར་འབུལ། བྱེ་བྲག་ཏུ། ཨོཾ་དྷྲྀཥྚ་རཥྚཱ་ཡ། བཻ་རུ་ཌྷ་ཀཱ་ཡ། བི་རཱུ་པཀྵཱ་ཡ། བཻ་ཤྲ་བ་ཱ་ཡ་ཨི་དཾ་བ་ལི༚་ཁ་ཁ་ཁཱ་ཧི་ཁཱ་ཧི། གསུམ་གྱིས་ཕུལ་ནས། མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱིས་སྟོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་དང་། །བདེ་ལེགས་ཕུན་སུམ་ཚོགས་པ་དང་། །ཡིད་ལ་འདོད་པ་ཀུན་འགྲུབ་མཛོད། །ཞེས་པས་རྒྱལ་ཆེན་གཏོར་མ་གཙང་སར་ཕུལ་ལོ། །ཆོ་ག་རྒྱས་པའི་སྐབས་རིགས་དྲུག་གཞི་བདག་གཏོར་མ་དང་ཆ་
གསུམ་བཅས་སྤྱི་ལྟར་སྐབས་འདིར་སྦྱར་རོ། །མཆོད་བསྟོད་ནི། །ཇི་ལྟར་འཇམ་དབྱངས་ལ་སོགས་པས། །རྒྱལ་བ་རྣམས་ལ་མཆོད་མཛད་པ། །དེ་བཞིན་བདག་གིས་དེ་བཞིན་གཤེགས། །མགོན་པོ་སྲས་དང་བཅས་རྣམས་མཆོད། །ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་བསྟོད། །བསྟོད་དབྱངས་སྙན་སྤྲིན་དེ་དག་ལ། །ངེས་པར་ཀུན་ཏུ་འབྱུང་གྱུར་ཅིག །བཟོད་གསོལ་ནི། བདག་ཅག་དུས་ངན་པའི་སེམས་ཅན་སྤྱོད་པ་དམན་ཞིང་མ་དག་པས་མ་འཚལ་བ་དང་། ལུས་ངག་ཡིད་གསུམ་ཉོན་མོངས་པ་དང་འདྲེས་པ་དང་། མཆོད་པའི་དངོས་པོ་ཆུང་ཞིང་དམན་པ་དང་། གཙང་སྦྲས་མ་ཕྱེད་པ་དང་། མདོ་ལས་བྱུང་བའི་ཆོ་ག་བཞིན་ཏུ་མ་ལྕོགས་པ་ལ་སོགས་པ་འཁྲུལ་ཞིང་ནོངས་པ་ཐམས་ཅད་འཕགས་པ་ཐུགས་རྗེ་ཆེན་པོ་དང་ལྡན་པ་རྣམས་ལ་བཟོད་པར་གསོལ་ཞིང་མཆིས་ན། ཐུགས་བརྩེ་བར་དགོངས་ཏེ་བཟོད་པར་བཞེས་ཤིང་འཕྲལ་དང་ཡུན་ཏུ་བདག་ཅག་གི་སྒྲིབ་པར་མི་འགྱུར་བར་བྱིན་གྱིས་བརླབ་ཏུ་གསོལ། །གཤེགས་གསོལ་ནི། མགོན་པོ་ཐུགས་རྗེ་ཆེན་པོ་དང་ལྡན་པ་ཁྱེད་རྣམས་ཀྱིས་བདག་ཅག་དང་སེམས་ཅན་ཐམས་ཅད་ཀྱི་དོན་མཛད་ལགས་ཀྱི་སོ་སོའི་ཞིང་ཁམས་སུ་འཁོར་དང་བཅས་པ་གཤེགས་སུ་གསོལ་ལ། །
སླར་ཡང་སེམས་ཅན་དོན་ལ་ཐུགས་རྗེས་འབྱོན་པར་ཞུ། །ཞེས་སམ། རྟེན་ཡོད་ན་བརྟན་བཞུགས་སྤྱི་མཐུན་བྱས་ཀྱང་ཆོག །བསྔོ་བ་ནི། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ནས། །སྐྱེ་རྒ་འཆིའི་རྦ་རླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །སྨོན་ལམ་ནི། སངས་རྒྱས་སྤྲུལ་པ་དགྲ་བཅོམ་འཕགས་པའི་ཚོགས། །འགྲོ་བའི་དོན་ཏུ་བསྟན་པ་སྐྱོང་མཛད་པའི། །དཀོན་མཆོག་གསུམ་དངོས་གནས་བརྟན་བཅུ་དྲུག་གིས། །བསྟན་པ་ཡུན་རིང་གནས་པར་བྱིན་གྱིས་རློབས། །ཐུགས་རྗེའི་བདག་ཉིད་གནས་བརྟན་བཅུ་དྲུག་གི། འཁོར་ཚོགས་སྲིད་མཚོ་ལས་བརྒལ་ཉོན་མོངས་མེད། །ཁྲི་དང་དྲུག་སྟོང་བཞི་བརྒྱའི་ཚོགས་རྣམས་ཀྱིས། །བསྟན་པ་ཡུན་རིང་གནས་པར་བྱིན་གྱིས་རློབས། །བསོད་ནམས་རྒྱ་མཚོ་ཡོངས་སུ་རྫོགས་བྱེད་ཅིང་། །ཡེ་ཤེས་རྒྱ་མཚོ་རྣམ་པར་དག་གྱུར་ཏེ། །ཡོན་ཏན་རྒྱ་མཚོ་མ་ལུས་ཀུན་རྫོགས་ནས། །འཇིག་རྟེན་ཀུན་ལས་ཁྱད་པར་འཕགས་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་
སྟི་དང་། །བཅས་ཏེ་ཡུན་རིང་གནས་གྱུར་ཅིག །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །བདེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་ཤོག །དེ་ནས་བཀྲ་ཤིས་ནི། ཞལ་ནས་གསུངས་པའི་ཚིགས་སུ་བཅད་པས་ཐོག་དྲངས་ཏེ། །ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོ་མཆོག་གི་བཀྲ་ཤིས་ཤོག །དུས་གསུམ་རྒྱལ་བ་རྒྱལ་སྲས་ཐུགས་རྗེ་ཡིས། །ཉན་ཐོས་ཚུལ་བཟུང་སྲིད་པ་ཇི་སྲིད་བར། །བསྟན་པ་སྐྱོང་ཞིང་འགྲོ་བའི་དོན་མཛད་པ། །གནས་བརྟན་ཆེན་པོ་རྣམས་ཀྱི་བཀྲ་ཤིས་ཤོག །ཟབ་ཅིང་རྒྱ་ཆེན་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །རྒྱལ་ཆེན་བཞི་ཡི་བཀྲ་ཤིས་ཤོག །ཅེས་བརྗོད་ཅིང་རོལ་མོ་ལྡིར་ལ་དགེ་ལེགས་ཀྱི་མེ་ཏོག་ཆར་དུ་བསྙིལ་བར་བྱའོ། །ཐུགས་བསྐྱེད་སྟོབས་ཀྱིས་དམ་ཆོས་སྐྱོང་བཞིན་ཏུ། །ཞིང་འདིར་མངོན་བཞུགས་འཕགས་པའི་མཆོག་འདི་རྣམས། །ཐུབ་བསྟན་ལང་ཚོ་སྙིགས་མས་བཅོམ་པའི་དུས། །ལྷག་པར་མཆོད་ཅིང་ཐུགས་དམ་བསྐུལ་བྱ་ཡིན། །དེ་ཕྱིར་
གསར་རྙིང་ཡིག་ཆས་མི་ཕོངས་ཀྱང་། །སྐལ་མཉམ་འཇུག་བདེའི་ལྷག་བསམ་ས་བོན་འདིར། །བསགས་སྦྱོང་ལོ་འདབ་རྒྱ་ཆེར་འཁྲུངས་ནས་ཀྱང་། །ལུང་རྟོགས་འབྲས་བུས་ལྕི་བའི་འདོད་འཇོ་ཤོག །བྱིན་རླབས་དགོས་པ་ཕན་ཡོན་ཚད་མེད་པའི་ཆོ་ག་འདི་ཅུང་ཟད་རེ་ལག་ལེན་བྱེད་པ་བྱུང་ན་སྙམ་པའི་འདུན་པས་ཁྱེར་བདེ་གཙོ་བོར་བཟུང་སྟེ། དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་འཕགས་པ་རྣམས་ཀྱི་བྱིན་རླབས་ཀྱི་མཚན་མ་ཅུང་ཟད་ཐོབ་པའི་ཀུ་སཱ་ལི་ཀརྨ་ངག་དབང་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེས་རྒྱལ་གྱི་ཉ་བའི་དཀར་ཕྱོགས་ཀྱི་རྒྱལ་བ་གཉིས་པར་སྦྱར་བའི། ཡི་གེ་བ་ནི་སྡོམ་བརྩོན་སྡེ་སྣོད་འཛིན་པ་མཁན་ཆེན་བླ་མ་ཀརྨ་བཀྲ་ཤིས་འོད་ཟེར་རབ་ཏུ་རྒྱས་པའི་སྡེས་མཛད་པ་དགེ་ལེགས་འཕེལ། །