འཕགས་པ་ནམ་མཁའི་སྙིང་པོའི་བཟླས་ལུང་སྒྲུབ་ཐབས་ལྟུང་བ་བཤགས་པའི་ཆོ་ག་དང་བཅས་པ་འཕགས་པའི་ལམ་གྱི་ཤིང་རྟ།
འཕགས་པ་ནམ་མཁའི་སྙིང་པོའི་བཟླས་ལུང་སྒྲུབ་ཐབས་ལྟུང་བ་བཤགས་པའི་ཆོ་ག་དང་བཅས་པ་འཕགས་པའི་ལམ་གྱི་ཤིང་རྟ་ཞེས་བྱ་བ་བཞུགས་སོ།། །།
སེམས་དཔའ་ཉི་མའི་ཤིང་རྟའི་འགྲོས་ལྡན་པ། །རྒྱུ་སྐར་བྱེ་བའི་དབུས་ན་ཉི་མའི་དཔལ། །བརྒྱ་བྱིན་ཐོགས་དབུས་ནོར་བུའི་ཅོད་པན་གྱིས། །མཚོན་མཛད་ས་བཅུའི་དབང་ཕྱུག་དེ་ལ་འདུད། །སྲིད་པ་གསུམ་དུ་མཚན་ཙམ་ཡང་། །བརྒྱ་ལམ་ཐོབ་དཀའི་རིན་པོ་ཆེ། །ནམ་མཁའི་སྙིང་པོ་ལ་བརྟེན་ནས། །ལྟུང་བ་བཤགས་པའི་ཆོ་ག་བྲི། །དེ་ལ་ལྔ། དགོས་ཆེད་ཀྱིས་ཁོག་བཀྲོལ། ཉམས་ལེན་སྣོད་རུང་དུ་བསྒྲུབ། བསྙེན་པའི་ཆོག་བཤད། ལྟུང་བ་བཤགས་པ་བྱེ་བྲག་ཏུ་སྨོས། འཕྲོས་དོན་ཁྱད་པར་ཅན་བརྗོད་པའོ། །དང་པོ་ལ་གཉིས། ལུང་དང་ལོ་རྒྱུས་སོ། །དང་པོ་ནི། བོད་ཡུལ་འདིར་མུ་སྟེགས་བྱེད་དང་ཉན་ཐོས་ཀྱི་ཐེག་པ་ཁོ་ན་འཛིན་པ་ནི་ཡེ་མེད་དེ། ཐམས་ཅད་ཀྱང་ཐེག་པ་ཆེན་པོ་ལ་མོས་པས་སྤྱོད་ཅིང་དངོས་སམ་བརྒྱུད་ནས་བྱང་ཆུབ་ཏུ་སེམས་བསྐྱེད་པ་ཤ་སྟག་ཡིན་མོད། བྱང་ཆུབ་སྤྱོད་པ་དང་ལྟུང་བ་ལེགས་པར་འཆོས་པ་ནི་
ཆེས་དཀོན་ཅིང་། ཁ་ན་མ་ཐོ་བ་ཆེན་པོ་དང་ལྡན་པའི་རྩ་བའི་ལྟུང་བ་རྣམས་ལའང་བག་མེད་པར་སྤྱོད་པ་མང་ན་ལྟུང་བ་ཕྲ་ཞིབ་དང་རྟག་ཏུ་འགྲོགས་པ་ནི་ལྟ་ཅི་སྨོས། །འོན་ཀྱང་ལྟུང་བའི་རྣམ་གྲངས་ཙམ་ཡང་མི་ཤེས་པའི་དགེ་སྦྱོང་དུ་ཁས་འཆེ་བ་རང་ཉིད་ཀྱི་ཐར་པའི་ལམ་སྟོར་བ་མ་ཟད། དད་པ་ཅན་རྣམས་ཀྱི་ཡོན་ཆུད་གསོན་ཅིང་ཐར་པའི་གོ་འགེགས་པར་བྱེད་པ་ནི་ཆེས་མང་ངོ། །དེའང་དཔལ་མར་མེ་མཛད་ཀྱིས། །སེམས་ཅན་རྣམས་ལ་སྲོག་གཅེས་ཤིང་སྲོག་ལ་བརྟེན་པ་དེ་བཞིན་ཏུ། བྱང་ཆུབ་སེམས་དཔའ་ལའང་སྲོག་ལྟ་བུའི་བྱང་ཆུབ་ཀྱི་སེམས་གཅེས་ཤིང་དེ་ལ་བརྟེན་པའོ། །ཕ་མ་ལྟ་བུའི་ཆོས་ནི་སྟོང་པ་ཉིད་དང་སྙིང་རྗེ་ཡིན་ཏེ། དེས་མ་བསྐྱེད་པའི་བྱང་ཆུབ་སེམས་དཔའ་འབྱུང་བར་མི་འགྱུར་རོ། །ཞེས་པས་བྱང་ཆུབ་ཏུ་སེམས་མ་བསྐྱེད་ན་ཐེག་པ་ཆེན་པོ་བར་མི་ཆུད་ལ། སེམས་བསྐྱེད་པ་ཙམ་གྱིས་མི་ཆོག །བསླབ་བྱ་ལ་སློབ་ཅིང་
ལྟུང་བ་ཕྱིར་བཅོས་ལ་མཁས་པར་བྱ་དགོས་ཏེ། ས་བོན་བཏབ་པ་ཙམ་ཀྱིས་མི་ཆོག། སོ་ནམ་གྱི་བྱ་བ་ལ་བརྩོན་དགོས་པ་བཞིན་ནོ། །བྱང་སྡོམ་གྱི་ངོ་བོ་གཞན་དོན་ཏུ་རྫོགས་པའི་བྱང་ཆུབ་འདོད་པ་ལ། །བདག་རྐྱེན་དགེ་བའི་བཤེས་གཉེན་དང་། དམིགས་རྐྱེན་མདོ་སྡེ་སོགས་ལ་བརྟེན་ཏེ། དེའི་མཐུན་ཕྱོགས་སྒྲུབ་ཅིང་མི་མཐུན་ཕྱོགས་སྤོང་བར་མཚུངས་ཀྱང་། ཐོབ་ཚུལ་ལས་གསུམ་སྟེ། སོ་ཐར་དང་ཆོ་ག་ཐུན་མོང་བའི་བྱང་སྡོམ། ཆོ་ག་ཐུན་མོང་མ་ཡིན་པའི་བྱང་སྡོམ། དབང་བསྐུར་དང་ཆོ་ག་ཐུན་མོང་གི་བྱང་སྡོམ་མོ། །དང་པོ་ནི། སོ་ཐར་གྱི་སྡོམ་པ་ལ་བྱང་ཆུབ་སེམས་ཀྱིས་ཟིན་པའི་ཐེག་ཆེན་སོ་ཐར་དུ་གྲགས་པ། གཉིས་པ་དབུ་སེམས་ཀྱི་ཆོ་ག་གང་རུང་གིས་ཐོབ་པའི་སྨོན་འཇུག་གི་སྡོམ་པ། གསུམ་པ་དབང་བསྐུར་སྟ་གོན་དང་འཇུག་པའི་སྐབས་སུ་ཐོབ་པའི་བྱང་སྡོམ་དང་དངོས་གཞིའི་སྐབས་ཐོབ་པའི་སྔགས་སྡོམ་རྣམས་སོ། །དེ་དག་ལས་སྐབས་སུ་བབ་པ་བྱང་སྡོམ་ཐུན་མིན་གྱི་ཆོ་ག་ལ་དབུ་སེམས་ཀྱི་ལུགས་གཉིས་སུ་གྲགས་ཏེ། དང་པོ་ནི། འཇམ་དབྱངས་ནས་ཀླུ་སྒྲུབ་ཡབ་སྲས་ལ་བརྒྱུད་དེ་ཞི་བ་ལྷའི་ཕྱག་སྲོལ་ཇོ་བོ་པུཎྱ་ཤྲཱི་ལས་བྱུང་བ་ཀླུ་སྒྲུབ་ཀྱི་སེམས་བསྐྱེད་ཆོག་དང་ཛེ་ཏཱ་རའི་ཡི་དམ་བླང་བའི་ཆོ་ག་ཞི་བ་ལྷའི་བསླབ་སྤྱོད་སོགས་ཀྱི་དགོངས་པ་དང་། གཉིས་པ་ནི། བྱམས་པ་ནས་ཐོགས་མེད་སྐུ་མཆེད་ལ་
བརྒྱུད་དེ་ཙནྡྲ་གོ་མཱིའི་ཕྱག་སྲོལ་ཨ་ཏི་ཤ་ལས་བྱུང་བ་བྱང་ས་དང་སྡོམ་པ་ཉི་ཤུ་པ་སོགས་ཀྱི་དགོངས་པ་སྟེ། སྔ་མ་ནི་གཙོ་བོར་རྗེ་བཙུན་ས་སྐྱ་པ་རྣམས་ཀྱིས་ཕྱག་ལེན་ཏུ་མཛད་ཅིང་། ཕྱི་མ་ནི་གཙོ་བོར་བཀའ་གདམས་པ་དང་མཉམ་མེད་དྭགས་བརྒྱུད་པ་རྣམས་ཀྱིས་ཕྱག་ལེན་ཏུ་མཛད་ལ་གཉིས་ཀ་ལའང་གཉིས་ཀ་མངའོ། །དེ་དག་གི་བསླབ་བྱ་ཤིན་ཏུ་རྒྱ་ཆེའང་མདོར་བསྡུ་ན་གཉིས། དགག་པའི་བསླབ་བྱ་དང་བསྒྲུབ་པའི་བསླབ་བྱའོ། །དང་པོ་ལ་གཉིས། སྨོན་པ་དང་འཇུག་པའི་བསླབ་བྱའོ། །དང་པོ་ནི། མཉམ་མེད་དྭགས་པོས། སེམས་ཅན་གཅིག་ཀྱང་བློས་མི་སྤང་། །རྟག་ཏུ་སེམས་དེའི་ཕན་ཡོན་བསམ། །ཚོགས་གཉིས་གསག་ལ་བརྩོན་པར་བྱ། །ཡང་ཡང་བྱང་ཆུབ་སེམས་གཉིས་སྦྱང་། །ནག་པོའི་ཆོས་བཞི་སྤངས་ནས་ནི། །དཀར་པོའི་ཆོས་བཞི་བསྟེན་པར་བྱ། །ཞེས་པ་ལྟར་ཏེ། འདི་དག་འཆོར་ན་བྱང་སྡོམ་རྩད་ནས་གཏོང་སྟེ་རྨེང་འགྱེལ་ན་ཁང་པ་ལ་བརྟེན་ས་མི་འོང་བ་བཞིན་ནོ། །གཉིས་པ་ལ་གཉིས། དབུ་མ་ལུགས་དང་། སེམས་ཙམ་ལུགས་སོ། །དང་པོ་ལ་གསུམ། བྱང་སེམས་དབང་རྣོན་ལ་ནམ་སྙིང་མདོའི་དགོངས་དོན་བསླབ་བཏུས་སུ་ཚིགས་བཅད་ཀྱིས་བསྟན་བལྟར་རྩ་ལྟུང་བཅུ་བཞི་དང་། དབང་འབྲིང་ལ་ཐབས་ལ་མཁས་པའི་མདོ་དོན་རྩ་ལྟུང་བཞི་དང་། དབང་བརྟུལ་ལ་སྡུད་པ་སོགས་ནས་གསུངས་པ་ལྟར་བྱང་ཆུབ་ཀྱི་
སེམས་མི་སྤོང་བ་སྟེ། དེ་སྤོང་ན་སྨོན་སེམས་འདོར་བས་དབང་པོ་གསུམ་ཀ་ལའང་རྩ་ལྟུང་ཀུན་གྱི་ནང་ནས་ཆེས་ལྕི་བ་ཡིན་མོད། ད་ལྟ་ནི་བདག་འདྲའི་དགེ་སྦྱོང་གི་གཟུགས་བརྙན་ཕལ་མོ་ཆེ་འདི་ཉིད་སྤོང་བ་ལ་བརྩོན་པ་མང་སྟེ་སེམས་ཅན་གཅིག་ཅིག་བློས་བཏང་ནའང་དེར་འགྱུར་བར་བཤད་པའི་ཕྱིར། ཡན་ལག་གི་ཉེས་བྱས་བརྒྱད་ཅུ་ལ་སོགས་པ་མཐའ་ཡས་སོ། །གཉིས་པ་ལ་གཉིས། བྱང་སའི་དོན་སྡོམ་པ་ཉི་ཤུ་བ་ལས་ཚིགས་བཅད་དུ་གསུངས་པ་ལྟར་རྩ་ལྟུང་བཞི། ཡན་ལག་གི་ཉེས་བྱས་ཞེ་དྲུག་གོ། །གཉིས་པ་བསྒྲུབ་པའི་བསླབ་བྱའང་མདོར་བསྡུ་ན་ཕ་རོལ་ཕྱིན་དྲུག་གམ། ཚུལ་ཁྲིམས་རྣམ་པ་གསུམ་སྟེ། བསླབ་པ་བླང་ཕྱིན་ཆད་བསླབ་བྱ་འདི་དག་ངེས་པར་ཤེས་ཤིང་བསླབ་དགོས་ཏེ། གང་ལས་ཤེས་ཞེ་ན། སློབ་དཔོན་ཞི་བ་ལྷས། མདོ་སྡེ་རྣམས་ལས་བསླབ་པ་སྣང་། །དེ་བས་མདོ་སྡེ་བཀླག་པར་བྱ། །ནམ་མཁའི་སྙིང་པོའི་མདོ་སྡེ་ནི། །ཐོག་མ་ཉིད་དུ་བལྟ་བར་བྱ། །ཞེས་སོགས་གསུངས་པ་ལྟར་མདོ་སྡེ་སྤྱི་དང་ཁྱད་པར་སའི་སྙིང་པོ་འཁོར་ལོ་བཅུ་པ། ནམ་སྙིང་། ཐར་པ་ཆེན་པོའི་མདོ་ལ་སོགས་པ་དང་། ཚུལ་ཁྲིམས་ལེའུ། སྡོམ་པ་ཉི་ཤུ་པ། མདོ་བཏུས། བྱངས། བསླབ་བཏུས་ལ་སོགས་པའི་རྒྱ་གཞུང་། སྡོམ་གསུམ་སྟོན་པའི་བོད་གཞུང་རྣམས་ལ་ལེགས་པར་བརྟགས་ཏེ་ཕན་ཡོན་ཉེས་དམིགས་ཞར་
ལ་ཤེས་པས་དགོས་པའི་སྐབས་ཕྱེད་དེ་གླེན་འཐམ་ཇི་མི་སྙམ་དུ་མ་གྱུར་པ་བྱའོ། །བསླབ་བྱའི་སྡོམ་པ་ཉམས་ཤིང་ཕྱིར་བཅོས་མ་བྱས་པས་ཅི་འགྱུར་སྙམ་ན། སྟོན་པ་སངས་རྒྱས། ཡུལ་སེམས་ཅན། བྱེད་པོ་རང་ཉིད་བཅས་བསླུས་པས་དོན་གཉིས་ཉམས་ཤིང་ཀུན་གྱིས་སྨད་པའི་གནས་སུ་འགྱུར། ཚེ་འདིར་མི་ཤིས་པ་དུ་མ་འབྱུང་ཞིང་འཆི་ཁར་འགྱོད་པས་གདུང་། ཕྱི་མ་ངན་འགྲོ་མུ་མཐའ་མེད་པར་ལྟུང་ཞིང་ཐར་པར་དཀའ། ཁྱད་པར་རྩ་ལྟུང་གིས་ནི་སྔོན་གྱི་དགེ་རྩ་མཐའ་དག་འཛད་ཅིང་ངེས་པར་དམྱལ་བར་སྐྱེ་བ་དང་། སོ་ཐར་བསྲུང་མི་ནུས་ན་རེ་ཞིག་བསླབ་པ་འབུལ་བ་བསླབ་བྱར་གསུངས་མོད། བྱང་སྡོམ་འབུལ་ན་ནི་ཉེས་པ་ཆེས་ལྕི་བས་བྱང་སྡོམ་མ་བླངས་ན་དེར་ཟད། བླངས་ཕྱིན་ཆད་བསླབ་པ་ཅི་ནུས་སུ་བསྲུང་ཞིང་ཉམས་ན་ཕྱིར་བཅོས་བྱ་བ་ལས་ཐབས་གཞན་ཡོད་པ་མ་ཡིན་ནོ། །དེའང་ཉིན་མཚན་ཚ་དྲུག་ཏུ་བགོས་པའི་སོ་སོའི་ཐུན་དང་པོར་ལྟུང་བ་བྱུང་ན་ཐུན་དེ་ཀའི་མཇུག་ཏུ་གཉེན་པོས་སླེབ་ན་ཚུལ་ཁྲིམས་རྣམ་པར་དག་པར་འགྱུར་བས་བཤགས་ཚད་ལས་མ་འདས་ན་རྩ་ལྟུང་ཡང་ཡང་བྱུང་རུང་བཤགས་པས་སོར་ཆུད་པར་འགྱུར། བཤགས་ཚད་ལས་འདས་ན་བཤགས་པ་ཙམ་གྱིས་གསོ་བར་མི་ནུས་པས་ཕྱིར་བཅོས་སྔོན་ཏུ་འགྲོ་བའི་བསླབ་པ་བསྐྱར་དགོས་སོ། །བྱང་སྡོམ་ཚང་བ་ལྟ་ཅི་སྨོས། །
སྨོན་སེམས་ཙམ་བསྲུངས་ཀྱང་ཕན་ཡོན་བསམ་གྱིས་མི་ཁྱབ་སྟེ་ཉན་ཐོས་ཀྱི་སྡོམ་པ་རྣམ་དག་ཇི་སྲིད་འཚོའི་བར་དུ་བསྲུང་བའང་སེམས་བསྐྱེད་པ་གཅིག་གི་ཕན་ཡོན་གྱི་ཆར་མི་ཉེ་སྟེ། །དཔས་བྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་ནི་དེ་ལས་ལྷག་པར་འགྱུར། །གངྒཱའི་བྱེ་མའི་གྲངས་སྙེད་ཀྱི། །སངས་རྒྱས་ཞིང་རྣམས་མི་གང་གིས། །རིན་ཆེན་དག་གིས་ཀུན་བཀང་སྟེ། །འཇིག་རྟེན་མགོན་ལ་ཕུལ་བ་བས། །གང་གིས་ཐལ་མོ་སྦྱར་བགྱིས་ཏེ། །བྱང་ཆུབ་ཏུ་ནི་སེམས་བཏུད་ན། །མཆོད་པ་འདི་ནི་ཁྱད་པར་འཕགས། །དེ་ལ་མཐའ་ནི་མ་མཆིས་སོ། །ཞེས་དང་། སྤྱོད་འཇུག་ལས། བྱང་ཆུབ་སེམས་བསྐྱེད་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་སོགས་བཀའ་བསྟན་བཅོས་ལས་མཐའ་ཡས་པར་གསུངས་པས་བསླབ་པ་འདི་ལ་ནན་ཏན་ཏུ་བྱ་ཞིང་ལྟུང་བ་བྱུང་ན་ཕྱིར་བཅོས་པ་ལ་འབད་པར་བྱ་སྟེ། དེའང་ཆོ་ག་གསུམ་སོ་སོའི་རང་ལུགས་ལྟར་དགོས་མོད་ཀྱི་བྱང་ཆུབ་སེམས་དཔའི་རྒྱུད་ཀྱི་ལྟུང་བ་གཙོ་བོར་དེ་ཉིད་ཀྱི་ཐེག་པ་ལས་བཤད་པ་
ལྟར་བཅོས་དགོས་ཏེ། སྤྱོད་འཇུག་ལས། ཉིན་དང་མཚན་མོ་ལན་གསུམ་དུ། །ཕུང་པོ་གསུམ་པ་འདོན་བྱ་ཞིང་། །རྒྱལ་དང་བྱང་ཆུབ་སེམས་བརྟེན་ནས། །ལྟུང་བའི་ལྷག་མ་ངེས་ཞི་བྱ། །ཞེས་སྤྱི་དང་། ཁྱད་པར་མདོ་ལས། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་འདི་ནི་སྙིང་རྗེ་ཆེན་པོ་དང་ལྡན་པ། སེམས་ཅན་ལ་ཕན་པའི་ཕྱིར་ཞུགས་པ། སྡུག་བསྔལ་ཆེན་པོ་ལས་ཐར་བར་བྱེད་པ་སྟེ། སེམས་ཅན་གང་དག་ལྟུང་བའི་རྩ་བ་བྱུང་བ་ངན་སོང་དུ་འགྲོ་བ། དགེ་བའི་རྩ་བ་ཐམས་ཅད་སྤྲུག་པར་བྱེད་པ། འཇིག་པར་བྱེད་པའི་སེམས་ཅན་དེ་དག་ལ་རིགས་ཀྱི་བུ་འདི་ནི་སྨན་ཏུ་གྱུར་པའོ། །མ་རིག་པའི་མུན་པ་མུན་ནག་དང་། ལྟ་བ་ངན་པས་སྡུག་བསྔལ་བར་གྱུར་པ་རྣམས་ལ་ནི་འདི་ཉི་མ་དང་མཚུངས་པའོ། །རྩ་བའི་ལྟུང་བ་འཆགས་སུ་འཇུག་པའོ། །དེ་དག་གི་སྙིང་ལ་ཐེ་ཚོམ་ཡོད་པ་འདྲལ་བར་བྱེད་པའོ། །ཞེས་པ་ལ་སོགས་པ་རྒྱ་ཆེར་གསུངས་པ་ལྟར་འཕགས་པ་ནམ་མཁའི་སྙིང་པོ་ལ་གསོལ་བ་བཏབ་ཅིང་བཤགས་ན་དེས་སྔོན་གྱི་སྨོན་ལམ་གྱི་དབང་གིས་རྩ་བའི་ལྟུང་བ་ལ་སོགས་པ་སེལ་བར་མཛད་པར་གསུངས་པས་དེས་ན་འདི་ཉིད་ལ་ནན་ཏན་ཏུ་འབད་པར་ཅི་ནས་གདམས་སོ། །གཞུང་ལུགས་རྣམས་སུ་དབུ་མ་ལུགས་ཀྱི་ཕྱིར་བཅོས་ཁོ་ན་ལ་
བཤད་པ་ལྟར་ཡོད་ཀྱང་། ལུགས་དེའི་བསླབ་བྱ་གང་ལས་འབྱུང་བའི་ཁུངས་དང་འབྲེལ་བ་ཙམ་དུ་དགོངས་ཀྱི། དོན་ཏུ་དབུ་མ་ལུགས་ཀྱི་བསླབ་བྱའི་ཉེས་ལྟུང་ཁོ་ནར་མ་ཟད་སངས་རྒྱས་བྱང་སེམས་ཀྱི་སྤྱོད་ཡུལ་བསམ་གྱིས་མི་ཁྱབ་པ་དང་། ལྷག་པར་སྡིག་ལྟུང་མཐའ་དག་སེལ་བའི་མཛད་པ་མངའ་བ་མདོ་ལ་མཇལ་བས་ཤེས་ནུས་ཤིང་། ནག་པོ་པས། དབང་རབ་སྟོང་ཉིད་ཀྱིས་བཤགས། དབང་འབྲིང་རིག་སྔགས་སྤྱིའི་ལྷ་ནམ་མཁའི་སྙིང་པོ་ལ་བཤགས། དབང་པོ་ཐ་མ་གང་ཟག་ལའམ་སྟོབས་བཞི་ཚང་བས་བཤགས་པར་གསུངས་པའང་། འདི་ལ་དོན་གྱིས་ཚད་བ་ཡིན་ནོ། །གཉིས་པ་ནི། །དེ་སྐད་དུ་བཤད་ཀྱང་མདོ་སྡེ་རྣམས་ལ་ད་ལྟ་གདམས་ངག་མེད་པས་ལག་ལེན་བྱས་ཀྱང་འབྲས་བུ་མི་འབྱིན་ནོ་སྙམ་ན། སྤྱིར་རྒྱུད་དང་མ་འབྲེལ་བའི་མདོ་སྡེ་ཕལ་མོ་ཆེ་ལ་གསང་བ་མེད་པས་སྒྲ་ཇི་བཞིན་ཏུ་སྤྱོད་པས་ཆོག་པའང་ཡིན་ལ། དད་བརྩོན་གྱིས་ལྕོགས་ན་མཐར་ཐུག་འབྲས་བུ་ཆུད་མི་ཟབ་གཞིར་བཅས། མངོན་རྟགས་ཀྱང་ངེས་པར་འབྱུང་སྟེ་བརྒྱད་སྟོང་པ་དང་སྡུད་པ་ལ་ཁ་ཏོན་རྩེ་གཅིག་བྱས་པ་ཙམ་གྱིས་དེ་ཁོ་ན་ཉིད་ཀྱི་རྟོགས་པ་མཐར་ཐུག་སྐྱེས་ཤིང་། གདུང་རིང་བསྲེལ་དུ་གྱུར་པ་མང་དག་བྱུང་བ་དང་། ཀུན་མཁྱེན་བསྟན་པའི་ཉིན་བྱེད་ཀྱི་མཐར་པ་ཆེན་པོའི་མདོའི་དགོངས་དོན་བཞིན་དཀྱིལ་འཁོར་བཞེངས་ནས་ཞག་བདུན་
གཟིམས་སྤངས་ཏེ་ཆོག་མཛད་པས་སངས་རྒྱས་ཉན་ཐོས་དང་བཅས་པ་གདུག་ཚོད་གསོལ་བའི་གྲལ་དུ་དམ་ཆོས་ཀྱི་འགྲོ་བ་ངོ་མཚར་བ་མཛད་པའི་དག་སྣང་བྱུང་བ་དང་། སྨན་བླའི་མདོ་ཆོག་དང་གནས་བརྟན་ཆོ་གའི་བྱིན་རླབས་བྱུང་ཚུལ་རྒྱ་ཆེར་ལོ་རྒྱུས་རྣམས་སུ་གསལ་བ་མ་ཟད། འདི་ལ་ནི་གདམས་ངག་ཀྱང་ཡོད་དེ་རྒྱ་གར་ཤར་ཕྱོགས་ཀྱི་པཎྜི་ཏ་བཱུརྞ་བཛྲ་ལ་རྗེ་བཙུན་སྒྲོལ་བའི་མགོན་པོས་ནོད་དེ་བསྙེན་པ་དང་བཤགས་ཆོག་སྐྱ་རེངས་གསོལ་གདབ་མཛད་པས། ནུབ་བདུན་གྱི་ཐ་མར་དག་པའི་སྣང་བར། བོད་པའི་དགེ་སློང་སྐུ་ཤ་དཀར་བ་དར་ཡོལ་དུལ་ཉམས་ཅན། གོས་ཆེན་གྱི་སྣམ་སྦྱར་སྔོན་པོ་གསོལ་བ་ཞིག་གིས། ཁྱོད་རང་ད་བཤགས་པ་གྱིས་གསུངས། སྤྱི་བཤགས་བླ་མ་རྡོར་འཛིན་མ་ཞིག་མཛད་པས། དེ་ཙམ་གྱིས་མི་ཆོག་སྒོས་བཤགས་གྱིས་གསུངས། ལྟུང་བ་ཐུགས་ལ་མངའ་བ་ཁ་ཅིག་མིང་ནས་སྨོས་ཏེ་བཤགས་པ་ཕུལ་བས་ཞལ་འཛུམ་མཛད་དེ། དེ་དག་འདུག་སྟེ་སཱཙྪ་སྟོང་ཕྲག་གཅིག་ཐོབ་གསུངས་གནམ་སྒོ་ཞིག་ནས་ཡར་བཞུད་ཅེས་བཀའ་བསྩལ་ལ། དེ་ཙམ་དུ་མ་ཟད་ད་ལྟའི་སྐབས་སུའང་ཆོ་ག་འདི་དང་ཐར་པ་ཆེན་པོའི་མདོ་སོགས་ལ་རང་གཞན་ཉམས་སུ་ལེན་པ་ན་བྱིན་རླབས་ཀྱི་རྟགས་མཚན་གཞན་ཟབ་མོར་བརྫུ་བའི་འད་འུད་ཅན་ཀུན་ལས་ཆེ་བ་ཡིད་ཆེས་པ་འབྱུང་བ་ནི་ངེས་པའོ། །གཉིས་པ་སྣོད་རུང་དུ་བྱེད་པ་བཟླས་ལུང་འབོགས་པ་ནི། སྐུ་བརྙན་མཎྜལ་མཆོད་པ་སོགས་བཤམ་
ལ། སློབ་དཔོན་གྱིས་བསྒོམ་བཟླས་ཚར་གཅིག་ཉམས་སུ་བླངས། སློབ་མ་རྣམས་ཕྱག་བཅས་མདུན་ཏུ་འཁོར་པ་ལ་འདི་སྐད་ཅེས། ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ། དེའི་ཆེད་དུ་བསྒོམ་བཟླས་ཀྱི་ལུང་ཟབ་མོ་བླང་བར་བགྱིའོ་སྙམ་དུ་སེམས་བསྐྱེད་ཅིང་། ཆོས་གསན་པའི་ཀུན་སྤྱོད་རྣམ་པར་དག་པ་དང་ལྡན་པས་གསེན་པར་ཞུ། དེ་ཡང་ལུས་ཅན་རྣམས་ཀྱིས་དོན་ཏུ་གཉེར་བྱ་མཐར་ཐུག་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཁོ་ན་ཡིན་ལ། དེ་སྒྲུབ་པར་བྱེད་པའི་ཐབས་འཆད་པ་ནི་ནང་པ་སངས་རྒྱས་པ་དང་། དེ་ལས་ཀྱང་ཐེག་པ་ཆེན་པོ་པ་ཁོ་ནའི་ཁྱད་ཆོས་ཡིན་ཅིང་། དེ་ལའང་དོན་སྤྱི་སྟོན་པ་བྱང་ཆུབ་སེམས་དཔའི་སྡེ་སྣོད་ལས་ཁྱད་པར་དུ་འཕགས་པ་གསང་སྔགས་རྡོ་རྗེ་ཐེག་པ་འདི་ཉིད་ལ་བརྟེན་ནས་དུས་གསུམ་གྱི་དེ་བཞིན་གཤེགས་པ་མཐའ་དག་མི་གནས་པའི་མྱང་འདས་ཆེན་པོར་གཤེགས་ཤིང་གཤེགས་པར་འགྱུར་བ་སྟེ། དེ་ལའང་འབྲས་དུས་ཀྱི་སྐུ་དང་ཡེ་ཤེས་ཀྱི་རྣམ་པ་ལམ་དུ་བྱེད་པའི་ཐབས་རིམ་པ་གཉིས་ནི་ལམ་འདིའི་ཉམས་སུ་བླང་བྱའི་རྩ་བ་ཡིན་ཅིང་དེའི་གཞིའམ་རྩ་བ་རྒྱུད་སྨིན་པར་བྱེད་པ་ལ་ཐུག་པས་དེ་ཉིད་སྔོན་ཏུ་འགྲོ་དགོས། དེ་ལའང་དབང་། བྱིན་རླབས། རིག་གཏད། བཟླས་ལུང་སྟེ་རྣམ་པ་བཞིའི་བྱེ་བྲག་ཅན་ཏུ་བཞུགས་པ་ལས། ད་ལམ་སྐབས་སུ་བབ་པ་
ནི། འཕགས་ཡུལ་ལྷོ་ཕྱོགས་ར་ཁང་ཙསྨར་སྐུ་འཁྲུངས་པ་མཁས་ཤིང་གྲུབ་པ་བརྙེས་པའི་སློབ་དཔོན་ཤཱཀྱ་རཀྵི་ཏ་ལ་རྡོ་རྗེ་རྣལ་འབྱོར་མས་དངོས་སུ་གནང་བའི་སྒྲུབ་ཐབས་བརྒྱ་དང་བརྒྱད་ཡོད་པ་ལས། སློབ་དཔོན་པཱུརྞ་བཛྲ་ལས་རྗེ་བཙུན་སྒྲོལ་བའི་མགོན་པོས་སྒྲུབ་ཐབས་ཉེར་བཞི་གསན་པའི་ནང་ཚན་འཕགས་པ་ནམ་མཁའི་སྙིང་པོའི་བཟླས་ལུང་སྒྲུབ་པ་སྟེ། ཆོས་འདི་གང་ལས་བརྒྱུད་པའི་རིམ་པ་ནི། རྡོ་རྗེ་རྣལ་འབྱོར་མ། གྲུབ་ཆེན་ཤཱཀྱ་རཀྵི་ཏ། བུདྡྷ་སྭཱ་མཱི། སུ་ཛཱ་ཏ། སཱདྷུ་ཛྙཱ་ན། སཾ་པྲ་ཀཱི་རྟི། བྲམ་ཟེའི་སློབ་དཔོན་བེ་དཱ་བནྡྷུ། བཱི་ར་མི་ཏྲ། པཱུརྞ་བཛྲ། ཐམས་ཅད་མཁྱེན་པ་ཏཱ་ར་ནཱ་ཐ། རྒྱལ་ཚབ་རིན་ཆེན་རྒྱ་མཚོ། ཡེ་ཤེས་རྒྱ་མཚོ། དེ་ལས་ཀུན་བཟང་དབང་པོས་གསན་ཅིང་། ཡང་ན། རྒྱལ་ཚབ་ཡེ་རྒྱམ་ནས། བློ་གྲོས་རྣམ་རྒྱལ། ངག་དབང་ཕྲིན་ལས། ཀུན་བཟང་དབང་པོ། ཚེ་དབང་ནོར་བུ། བཀའ་བརྒྱུད་ཕྲིན་ལས་ཤིང་རྟ། ཀུན་མཁྱེན་ཆོས་ཀྱི་འབྱུང་གནས། བསྟན་འཛིན་ཆོས་ཀྱི་ཉི་མ། བཀའ་བརྒྱུད་ཕྲིན་ལས་རྣམ་རྒྱལ། རྡོ་རྗེ་འཆང་དངོས་པདྨ་ཉིན་བྱེད་དབང་པོའི་ཞལ་སྔ་ནས་བཀའ་དྲིན་ཆེན་པོས་བསྩལ་བ་ལགས། དེ་འདས་བཅུའི་དབང་ཕྱུག་འདི་ནི་དོན་ཏུ་དེ་བཞིན་གཤེགས་པའི་འགྲོས་ཀྱིས་ཆོས་ཐམས་ཅད་ལ་ཡང་ནས་ཡང་དུ་དབང་བསྒྱུར་བར་མཛད་ཀྱང་། རྣམ་པ་རྒྱལ་
ཚབ་ཆེན་པོའི་ས་ལ་བཞུགས་པའི་རྒྱལ་སྲས་ཐུ་བོའི་ཚུལ་དུ་སྟོན་པ། རྫོགས་པའི་སངས་རྒྱས་རྣམས་ཀྱི་བློན་པོ། བྱང་ཆུབ་སེམས་དཔའ་རྣམས་ཀྱི་ཤིང་རྟ། ཆོས་ཀྱི་གྲོང་ཁྱེར་ཆེན་པོའི་སྒོ་སྲུང་། མོས་ཤིང་མཚན་བཟུང་བ་ཙམ་གྱིས་སྲིད་པའི་ཆུ་བོ་བཞི་ལ་སོགས་འཇིགས་དང་སྡུག་བསྔལ་ཉམ་ངའི་གནས་མཐའ་དག་ལས་སྐྱོབ་པ། ཁྱད་པར་སྨོན་ལམ་གྱི་དབང་གིས་དུས་སྙིགས་མ་དང་ཡུལ་མཐའ་འཁོབ་ཏུ་སྐྱེས་པའི་སེམས་ཅན་རྨུ་རྒོད་ལྟུང་པའི་རྩ་བ་ཆེན་པོ་དང་ལྡན་པ་རྣམས་ཀྱི་ངན་འགྲོའི་སྒོ་གཅོད་པ་ལ་འདི་དང་མཚུངས་པ་གང་ཡང་མ་མཆིས་པ། རི་མོར་བྲིས་པའི་སྐུ་གཟུགས་ལ་མཆོད་པ་ཙམ་གྱིས་ཀྱང་འཆི་ཀར་ཞལ་སྟོན་ཅིང་། མཐོ་རིས་དང་ཐར་པ་ལ་འགོད་པར་མཛད་པ་སོགས་རྣམ་ཐར་ཆོས་ཀྱི་དབྱིངས་དང་མཉམ་ཞིང་ཐུགས་རྗེ་ཚད་མ་མཆིས་པ་སྟེ། དེ་ལྟ་བུའི་བསྒོམ་བཟླས་ཀྱི་ལུང་སྦྱིན་པ་ལ་ཐོག་མར་མཎྜལ་འབུལ་འཚལ། ཞེས་མཚམས་སྦྱར་ནས་མཎྜལ་འབུལ་དུ་གཞུག །དེ་ནས་ཐེག་པ་ཆེ་ཆུང་གི་ལམ་གྱི་སྒྲུབ་ཐབས་ཐམས་ཅད་ཀྱི་སྔོན་ཏུ་འགྲོ་བ་སྐྱབས་སུ་འགྲོ་བ་དང་སེམས་བསྐྱེད་པ་འདིའི་རྗེས་ཟློས་མཛོད། །སངས་རྒྱས་ཆོས་ཚོགས་སོགས་ལན་གསུམ། ཁྱད་པར་དུ་གསོལ་བ་འདེབས་པ་འདིའི་རྗེས་ཟློས། སློབ་དཔོན་གྱིས་བདག་ལ་རིག་སྔགས་དམ་པ་བསྩལ་དུ་གསོལ། །ལན་གསུམ། དེ་ནས་ཁྱེད་རང་རྣམས་གཞན་ཏུ་མ་ཡེངས་པར་ལྷའི་རྣལ་འབྱོར་འདི་བཞིན་ཏུ་
བསྒོམ་འཚལ། ཞེས་བརྡ་སྦྱར་ལ། ཤཱུ་ནྱ་ཏཱས་སྟོང་པར་སྦྱང་། ཁྱེད་རང་གི་སྙིང་གར་ཁཾ༴ ཞེས་པ་ནས། ཐུགས་ཀར་ཧཱུྃ་གིས་མཚན་པར་གྱུར། ཡན་མངོན་རྟོགས་ལྟར་བརྗོད། སློབ་དཔོན་ལྷར་གསལ་བའི་ཐུགས་ཀར་ཟླ་བ་ལ་སྔགས་ཀྱི་ཕྲེང་བ། མོས་གུས་མཛད་པས་སྔགས་ཕྲེང་གཉིས་པ་ཆད་དེ་ཞལ་ནས་ཐོན། ཁྱེད་རང་རྣམས་ལྷར་གསལ་བའི་ཞལ་དུ་ཞུགས། ཐུགས་ཀར་ཟླ་བའི་སྟེང་དུ་འཁོད་པར་མོས་ལ་སྔགས་འདིའི་རྗེས་ཟློས་མཛོད། །ཅེས་སྔགས་ཀྱི་རྗེས་ཟློས་ལན་གསུམ་གྲུབ་མཐར། དེ་བཞིན་གཤེགས་པ་ཐམས་ཅད་ཀྱི་གསུང་གི་བྱིན་རླབས་དང་། ཁྱད་པར་འཕགས་པ་ནམ་མཁའི་སྙིང་པོའི་གསུང་རིག་སྔགས་ཀྱི་ནུས་མཐུ་ཐམས་ཅད་རྡོ་རྗེའི་སློབ་མ་འདི་རྣམས་ཀྱི་ངག་ལ་ཐོགས་མེད་དུ་འཇུག་པར་གྱུར་ཅིག །འདིར་སློབ་དཔོན་དང་ཕྲེང་བ་སྤྲེལ་བ་དང་མཐར་ཕྲེང་བ་སློབ་མའི་མགོར་འཇོག་པའང་ཕྱག་ལེན་ཏུ་འདུག །དེས་འཕགས་པ་ནམ་མཁའི་སྙིང་པོའི་བསྒོམ་བཟླས་ཀྱི་ལུང་ལགས་པར་ཕུལ་གྲུབ་པ་ཡིན་པས་གཏོང་རག་ཏུ་མཎྜལ་དང་། དགེ་བསྔོ་བྱས་པས་འགྲུབ་བོ། །འདི་ནི་རྒྱུད་ལྡེ་གང་རུང་གི་དབང་བསྐུར་སྔོན་ཏུ་ཐོབ་པ་ལ་བྱ་ཡི། །དབང་བསྐུར་མ་ཐོབ་པ་ལ་བཟླས་ལུང་མི་འབོག་གོ། གསུམ་པ་ལ་གཉིས། ཐུན་དང་ཐུན་མཚམས་ཀྱི་བྱ་བའོ། །དང་པོ་ལ་གཉིས། སྦྱོར་བ་དང་། དངོས་གཞིའོ། །དང་པོ་ནི། འཕགས་པའི་བྲིས་སྐུ་རབ་གནས་དང་ལྡན་པ་བཀྲམ་པའི་མདུན་ཏུ་སྟེགས་གཙང་མར་མཎྜལ་ལ་ཚོམ་བུ་གཅིག་བཀོད། ཆུ་གཉིས་ཉེར་སྤྱོད། མཆོན་པའི་མཎྜལ་སོགས་
མཆོད་པའི་ཡོ་བྱད་ཅི་འབྱོར་བཤམ། དུས་བཟང་པོ་ལ་བབ་པའི་ཚེ་ནས་ལངས་ནས་ཁྲུས་དང་གཙང་སྤྲ་བྱས་ཏེ། འགྲུབ་ན་དོན་ཞགས་ནས་འབྱུང་བའི་ཐེག་ཆེན་གསོ་སྦྱོང་བླང་སྟེ། ཕྱི་དྲོའི་ཁ་ཟས་སྤང་བ་སོགས་སྡོམ་པ་ལ་གནས་པར་བྱ། མ་འགྲུབ་ནའང་ཟས་དཀར་གསུམ་མངར་གསུམ་ལ་བརྟེན་ཅིང་སྤྱོད་ལམ་བག་ཡོད་པ་ངེས་པར་དགོས་སོ། །གཉིས་པ་ནི། ཐོག་མར་སྐྱབས་འགྲོ་སེམས་བསྐྱེད་རྒྱས་པའམ། སངས་རྒྱས་ཆོས་ཚོགས་ལན་གསུམ། སེམས་ཅན་ཐམས་ཅད་སོགས་ཚད་མེད་བཞི་བསྒོམ། ཤཱུ་ནྱ་ཏཱས་སྟོད་པར་སྦྱང་། རང་གི་སྙིང་གར་ཁཾ་ཡིག་ཡོངས་སུ་གྱུར་པ་ལས། རང་ཉིད་ནམ་མཁའི་སྙིང་པོ་སྐུ་མདོག་སྔོན་པོ་ན་བཟའ་སྔོན་པོ་ཅན། ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱ་མཛད་པའི་གཡོད་པས་པདྨའི་རྩ་བ་འཛིན་པ་སྙན་གྱི་ཐད་ཀར་ཁ་བྱེ་བའི་སྟེང་ན་རལ་གྲི་སྔོ་སངས་ཅན་ནམ་མཁའི་རང་བཞིན་གྱི་ཁང་བཟང་འོད་ཟེར་སྔོན་པོ་འབར་བའི་དབུས་ན། ཁྲོ་བོ་དབྱུག་སྔོན་སོགས་འཁོར་རིག་འཛིན་མཚོན་ཆ་ཐོགས་པ་མང་པོ་དང་། རང་གི་སྤྲུལ་པ་ཁ་དོག་སྣ་ཚོགས་ཅན་མང་པོས་བསྐོར་བ། སྤྱན་གྱི་འོད་ཀྱིས་ནམ་མཁའ་ཐམས་ཅད་འོད་དང་དྲི་ཞིམ་པོས་ཁྱབ་པར་མཛད་པ། དར་དང་རིན་པོ་ཆེའི་རྒྱན་གྱིས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་ཤིང་རྒྱལ་པ་རིགས་ལྔའི་དབུ་རྒྱན་ཅན་ནོ། །ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུྃ་བྃ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་གྱུར། ཐུགས་ཀར་ཟླ་བ་ལ་སྔགས་ཕྲེང་བཀོད་དེ། ཨོཾ་སྭ་སྟི་ཀ་
མ་ལཱཀྵི། བི་པུ་ལ། སཾ་བྷ་བ་དྷརྨཱ་དྷཱ་ཏུ། གོ་ཙ་རེ་སྭཱ་ཧཱ། ཞེས་ཅི་ནུས་བཟླ། ཐུན་གྲོལ་བ་ན། ལྷ་སྐུ་སྟོང་པར་སྐུང་ལ་མཉམ་པར་བཞག །འཇམ་དཔལ་དཔའ་བོ་སོགས་གྱིས་དགེ་བ་བསྔོའོ།། །།གཉིས་པ་ཐུན་མཚམས་སུ་སྐུ་གཟུགས་ལ་མཆོད་བསྟོད་སྨོན་ལམ་འདེབས་ཤིང་། འདི་ཉིད་ཀྱི་མཚན་བརྒྱ་དང་། ཕལ་པོ་ཆེ་དང་། གསེར་འོད་དམ་པ་ལ་སགས་པའི་ཐེག་ཆེན་གྱི་མདོ་སྡེ་བཀླག་པར་བཤད་པས། ལག་ལེན་ཏུ། སྔར་བཤམས་པའི་བྲིས་སྐུ་སོགས་ལ་རྟེན་བྱས་ཏེ། ཐམས་ཅད་དུ་ནི་ས་གཞི་དག། སོགས་དང་། མ་ལུས་སེམས་མགོན། བཅོམ་ལྡན་འདིར་ནི། ཇི་ལྟར་བལྟམས་པ། སྲབ་འཇམ་ཡངས་པ། བདག་དང་འགྲོ་ལ་སོགས་ཤློ་ཀ་རེ་རེ། དེ་ནས་འགྲུབ་ན་སྤང་སྐོང་ཕྱག་བརྒྱ་བ་ལྟ་བུའི་ཕྱག་མཆོད་གཉིས་སྔོན་ཏུ་འགྲོ་བས། གསེར་འོད་དམ་པ་ནས་འབྱུང་བའི་ཡན་ལག་ལྷག་མ་རྣམ་ལ་དང་། ཡོངས་སུ་བསྔོ་བའི་འཁོར་ལོའི་མདོ་སོགས་སྔ་ཐུན་གཤམ་ལྟ་བུར་ཉིན་རེར་རེས་མོས་སུ་བཀླག་ཅིང་། མི་ནུས་པའམ། ཐུན་གཞན་མ་རྣམས་ལ། ཇི་སྙེད་སུ་དག་ནས། བྱང་ཆུབ་ཕྱིར་བསྔོའོ། །ཞེས་པའི་པར་གྱིས་ཡན་ལག་བདུན་པ་སྤྱིར་ཕུལ། བྱེ་བྲག་ཏུ་མཎྜལ་རྒྱས་པ། སྤྱོད་འཇུག་ལས་བྱུང་རིན་ཆེན་སེམས་དེ་སོགས་ནས། ངེས་པར་ཀུན་ཏུ་འབྱུང་གྱུར་ཅིག །བར་གྱིས་མཆོད་ལ། ཕྱག་སྔོན་ཏུ་འགྲོ་བའི་མཚན་བརྒྱ་རྩ་བརྒྱད་བས་བསྟོད་དེ། འཕགས་པ་ནམ་མཁའི་སྙིང་པོ་ཞལ་རས་རྒྱ་ཆེ་ཞིང་སྤྱན་གྱི་འོད་འཕྲོ་བས་ནམ་མཁའི་དཀྱིལ་དྲི་ཞིམ་པར་མཛད་པ་ལ་ཕྱག་འཚལ་ལོ། །
ནམ་མཁའི་སྤྱོད་ཡུལ་ཅན་སའི་དཀྱིལ་འཁོར་ཐམས་ཅད་སྣང་བར་མཛད་པ་ལ་ཕྱག་འཚལ་ལོ། །ཨོཾ་སྭསྟི་ཀ་མ་ལཱཀྵི་པི་པུ་ལ་སམྦྷ་བ། དྷརྨ་དྷཱ་ཏུ་གོ་ཙ་ར་སྭཱ་ཧཱ། གཟུངས་འདི་བརྗོད་མ་ཐག་ཏུ་ངན་སོང་དང་ངན་འགྲོ་ཐམས་ཅད་ནི་རབ་ཏུ་ཞི་བར་གྱུར། ས་ཡང་གཡོས་པར་གྱུར། རྔ་བོ་ཆེ་དག་གི་སྒྲ་ཡང་གྲགས་པར་གྱུར། སངས་རྒྱས་ཐམས་ཅད་ཀྱིས་ཀྱང་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བཀའ་སྩལ་བ ཀྱེ་འཁོར་གྱི་དཀྱིལ་འཁོར་ན་འཁོད་པའི་སེམས་ཅན་རྣམས་ནམ་མཁའི་སྙིང་པོའི་སྙིང་པོ་དཀྱིལ་འཁོར་མངོན་སུམ་པ་རྣམས་ཀྱི་སྭཱ་ཧཱའི་མཆོག་གི་གཟུངས་འབྱུང་བ་ཤིན་ཏུ་དཀའ་བ། བསོད་ནམས་ཆེན་པོ། སྡིག་པ་དང་ཉོན་མོངས་པ་ཐམས་ཅད་སྲེག་པ། བྱང་ཆུབ་སེམས་དཔའ་རྣམས་ཀྱི་མ། རིན་པོ་ཆེའི་ཕུང་པོར་གྱུར་པ་འདི་ཉོན་ཅིག་དང་འདི་ཐོས་པས་དྲི་མ་མེད་པར་འགྱུར་ཞིང་ལེགས་པར་ཁྲུས་བྱས་པར་འགྱུར་ལ། ཤིན་ཏུ་རྣམ་པར་དག་པར་འགྱུར་རོ། །པདྨ་ལྟ་བུར་འགྱུར་ཏེ་འཁོར་བའི་འདམ་གྱིས་མི་གོས་སོ། །ཉི་མ་ལྟ་བུར་འགྱུར་ཏེ། སེམས་ཅན་ཐམས་ཅད་སྣང་བར་བྱེད་དོ། །ཟླ་བ་ལྟ་བུར་འགྱུར་ཏེ། སེམས་ཅན་ཐམས་ཅད་རབ་ཏུ་སིམ་པར་བྱེད་དོ། །ནམ་མཁའ་ལྟ་བུར་འགྱུར་ཏེ། ངན་སོང་གི་སྡུག་བསྔལ་ཐམས་ཅད་ཀྱིས་མི་གོས་སོ། །ས་གཞི་ལྟ་བུར་འགྱུར་ཏེ། མཐོ་དམན་
མེད་དོ། །ལྷུན་པོ་ལྟ་བུར་འགྱུར་ཏེ། སེམས་ཅན་ཐམས་ཅད་ཀྱིས་བསྐྱོད་པར་མི་ནུས་སོ། །ཐར་པ་ལྟ་བུར་འགྱུར་ཏེ། བདེ་བ་དང་སྡུག་བསྔལ་གྱིས་མི་གོས་སོ། །དེ་ལ་སོགས་པ་ཡོན་ཏན་སྟོང་ཕྲག་བགྲང་བ་ཚད་མེད་གྲངས་མེད་པ་དག་ཐོབ་བར་འགྱུར་ཏེ། ཉན་པ་དང་། འཆང་བ་དང་། ཀློག་པ་དང་། བརྗོད་པ་དང་། སྟོན་པ་ཙམ་དང་། བཟླས་བརྗོད་བྱས་པ་ཙམ་གྱིས་གང་ཅི་ཡང་རུང་སྟེ། དེའི་འདོད་པ་དང་། སྨོན་པ་དང་། རེ་བ་དེ་དག་འགྲུབ་པར་འགྱུར་རོ། །བཟླས་བརྗོད་བྱས་པ་ཙམ་གྱིས་ཀྱང་ཆར་ཆེས་པ་དང་། ཆར་མི་འབབ་པ་དང་། སྡང་བས་དཀྲུགས་པ་དང་མི་ནད་དང་། རྨི་ལམ་ངན་པ་དང་། གནོད་པ་འབྱུང་བ་དང་། འཇིགས་པའི་དུས་དང་། འཆི་བ་དང་། ཆོམ་རྐུན་དང་། དགོན་པ་དང་། གཡུལ་འགྱེད་པ་དང་། གཅན་གཟན་དང་། མུ་གེའི་སྡུག་བསྔལ་རྣམས་ལས་ཡོངས་སུ་ཐར་བར་བྱེད་ལ། བདེ་བ་དང་། འབྱོར་པ་དང་། ཅི་འདོད་པ་དང་། ཅི་དགའ་བ་ཐམས་ཅད་ཀྱང་འགྲུབ་པར་འགྱུར་རོ། །དེ་ནས་འཁོར་དེ་དག་ཐམས་ཅད་ཀྱིས་ཧ་ཧ་ཞེས་ཅ་ཅོ་དང་ག་ཞ་བཏོན་ཏེ། སྒྲ་རིང་ཞེས་བྱས་ནས་གོས་དང་། རྒྱན་སྣ་ཚོགས་བསྐྱོད་དེ། སྙིང་ནས་ཕྱག་འཚལ་ནས་བྱང་ཆུབ་སེམས་དཔའ་ཐམས་ཅད་ལ་དབང་བྱེད་པ་འཕགས་པ་ནམ་མཁའི་སྙིང་པོའི་
མཚན་བརྒྱ་རྩ་བརྒྱད་པའི་བསྔགས་པ་རྒྱ་མཚོའི་བསྟོད་པ་ཡང་དག་པར་བརྗོད་པ། ནམ་མཁའི་སྙིང་པོ་སྲིད་གསུམ་སེམས་ཅན་མཆོག །འབྱོར་ལྡན་བློ་གྲོས་རིན་ཆེན་རྒྱ་མཚོ་མངའ། །སེམས་ཅན་དག་པ་བླ་མེད་རིན་ཆེན་མཆོག །ཐར་པའི་ས་བོན་འཁོར་བའི་སྡུག་བསྔལ་སེལ། །ཀུན་མཁྱེན་ཚུལ་མཁྱེན་ལེགས་དང་ལེགས་མིན་མཁྱེན། །ཐར་མཁྱེན་ཆོས་མཁྱེན་བདེ་དང་མི་བདེ་མཁྱེན། །ལམ་མཁྱེན་གཅེས་མཁྱེན་དགེ་དང་མི་དགེ་མཁྱེན། །དུས་མཁྱེན་དགེ་མཁྱེན་སྟོབས་དང་སྟོབས་མིན་མཁྱེན། །འགྲོ་མཆོག་ཆོས་མཆོག་སེམས་ཅན་ཡོན་ཏན་མཆོག །ལམ་མཆོག་སྔགས་མཆོག་ཚུལ་དང་ཚུལ་མིན་མཆོག །རྒྱན་མཆོག་ཆོས་མཆོག་འཛིན་དང་འཛིན་མིན་མཁྱེན། །དག་མཆོག་རྟོགས་མཆོག་མཆོག་དང་མཆོག་མིན་མཆོག །ཞི་རབ་སྙིང་རྗེའི་རབ་སྟེ་འཁོར་གྱི་རབ། །འོད་རབ་ཐར་པའི་རབ་སྟེ་རྟེན་གྱི་རབ། །རྒྱ་རབ་སྔགས་ཀྱི་རབ་སྟེ་ཐུགས་བརྩེའི་རབ། །མཉམ་རབ་སེམས་ཅན་རབ་སྟེ་གསུམ་རིག་རབ། །ལེགས་སྒྲོན་མཆོག་སྒྲོན་སྟོབས་དང་སྟོབས་མིན་སྒྲོན། །ཐར་སྒྲོན་རིགས་སྒྲོན་རྒྱལ་དང་རྒྱལ་མིན་སྒྲོན། །དགེ་སྒྲོན་གཟི་སྒྲོན་ནོར་བུའི་འོད་ཀྱི་སྒྲོན། །རྒྱུ་སྐར་ཟླ་བའི་རྒྱན་ལས་ཤར་བའི་སྒྲོན། །མཆོག་འོད་ཡོན་ཏན་ཀུན་གྱི་འོད་ཟེར་འོད། །ལེགས་འོད་ཐར་པའི་ཕོ་བྲང་
རྟེན་གྱི་འོད། །འོད་ཆེན་གཏི་མུག་རབ་ཏུ་འབྱེད་པའི་འོད། །རྡོ་རྗེའི་འོད་འབར་བདེ་བའི་འོད་འཆར་བ། །རྡོ་རྗེའི་དབང་པོ་འདྲེན་དབང་སེམས་ཅན་དབང་། །རིན་ཆེན་འོད་ཀྱི་དཀྱིལ་འཁོར་རྒྱན་དབང་པོ། །རྒྱལ་དབང་རྒྱལ་བའི་སྟོབས་རྒྱུན་ཚད་མེད་དབང་། །དཔའ་བོ་རིག་སྔགས་འཆང་དབང་སྲིད་གསུམ་དབང་། །རྡོ་རྗེ་བཟང་པོ་རྡོ་འོད་རྡོ་རྗེ་འབར། །རྡོ་རྗེ་སེམས་དཔའ་རྡོ་རྗེ་འབར་བས་བརྒྱན། །རྡོ་རྗེ་འོད་ཅན་རྡོ་འཛིན་རྡོ་རྗེ་གྲགས། །རྡོ་རྗེ་རྒྱ་ཆེན་རྡོ་རྗེ་རབ་མཆོག་དབང་། །ན་བཟའ་སྔོ་ཞིང་སྐུ་ཡི་ཆ་ལུགས་སྔོ། །སྐུ་མདོག་སྔོ་ཞིང་སྔོ་བའི་འོད་ཀྱིས་བརྒྱན། །རལ་གྲི་རྣོ་འཇེབས་སྔོ་ཞིང་བརྟན་པ་བསྣམས། །མཁའ་སྔོ་གཞལ་མེད་ཁང་འབར་ནང་ན་བཞུགས། །ལྷ་ཞལ་དྲི་མེད་ཤིན་ཏུ་མི་བཟད་འབར། །རབ་ཏུ་གྲགས་ལ་འོད་ཟེར་འཕྲོ་ཞིང་འགྱུ། །སྡིག་སེལ་རྡུལ་ལྟར་འཁྲུག་བྱེད་ཕྲེང་མཆོག་ཅན། །གློག་གི་སྟོབས་ཀྱི་སྣང་བས་སྒེག་ལ་བརྟན། །རལ་གྲི་མཚོན་ཐོགས་དབང་ལྡན་མཐུ་སྟོབས་མཚོན། །རྡོ་རྗེའི་མཚོན་ཐོགས་མདའ་དང་མདུད་ཐུང་འཇིགས། །འཁོར་ལོའི་མཚོན་ཐོགས་བཅིབས་པ་རི་དང་འཁྲུལ། །གསལ་ཤིང་མཚོན་ཐོགས་བགེགས་ཀྱི་སྟོབས་འཇོམས་བ། །བདེ་འབྱུང་འཇིག་རྟེན་གསུམ་བདག་རྡོ་རྗེ་དབྱུག །སྐུ་རྣམས་ཐམས་ཅད་ཉི་མའི་འོད་ཀྱིས་བརྒྱན། །གྲགས་པའི་རིགས་སུ་བྱུང་བས་རྒྱལ་པོ་མཛད། །མུ་
ཏིག་ཕྲེང་བས་སྒེག་ཅིང་མཛེས་པར་བགྱིས། །སྐུ་མཛེས་བརྙེས་ཤིང་ཕུན་སུམ་ཚོགས་པ་བརྙེས། །རབ་འབྱམས་མཆོག་བརྙེས་ས་ལ་འཇུག་པ་བརྙེས། །མཐུ་སྟོབས་ལྷག་མ་བརྙེས་ཤིང་གྲུབ་བརྙེས་ལ། །རིག་པ་གསུམ་གྱི་སྟོབས་བརྙེས་གྲུབ་བརྙེས་ལ། །བདེ་འདྲེན་ཞི་བ་འདྲེན་ཞིང་འོད་འདྲེན་ལ། །ཆ་ལུགས་གསལ་མཆོག་དར་བ་ཆེན་པོ་འདྲེན། །བྱམས་འདྲེན་ཉི་མ་འདྲེན་ཞིང་སྐྱེ་དགུ་འདྲེན། །ལོག་འདྲེན་སྙིང་གི་སྟོབས་འདྲེན་སྙིང་རྗེ་ཅན། །དྲི་མེད་ཆ་ལུགས་གསལ་བ་ཆ་ལུགས་འབར། །རྣམ་གྲགས་སྒེག་པས་གྲགས་པའི་བ་དན་ཅན། །འགྲོ་བའི་སྐབས་འབྱེད་འཇུག་དང་ལྡོག་པ་མཁྱེན། །ལོངས་སྤྱོད་གསལ་བར་སྟོན་པའི་སེམས་ཀྱིས་འཇུག །སྐུ་དམར་སྐུ་མཐོན་སྐུ་མཛེས་སྐུ་བཟང་བ། །སྐུ་སེར་སྐུ་དཀར་དར་བ་ཆེན་པོའི་སྐུ། །སྐུ་རོལ་རྡོ་རྗེའི་སྐུ་མངའ་སྤྱན་ལེགས་སྐུ། །རིགས་སྐུ་རིག་སྔགས་འཆང་བ་རིན་ཆེན་བསྣམས། །གཙུག་གི་ནོར་བུ་གཙུག་ཅན་ཅོད་པན་མཆོག །ཅོད་པན་ཅན་ཏེ་ཆོས་འཛིན་རྡོ་རྗེ་མཆོག །དཔལ་འཛིན་རིན་ཆེན་དམ་པ་འཆང་བའི་མཆོག །སྔགས་གཞི་ཕྱག་རྒྱ་འཆང་བ་ཕུན་སུམ་ཚོགས། །རབ་མཛེས་མཁའ་ལ་གཤེགས་ཤིང་རབ་ཏུ་རྒྱུ། །སྲིད་གསུམ་ཉི་མ་གཅིག་པུ་འོད་སྟོང་མངའ། །རི་རྩེར་འཆར་བ་བདལ་ལགས་བཀྲ་ཤིས་པ། །ཡོན་ཏན་མཐུ་སྟོབས་ཁྱད་པར་རྣམ་
པར་གྲགས། །ནོར་བུ་ཆེན་པོ་ནོར་སྡུག་ནོར་བུའི་འོད། །ཉི་མའི་ནོར་བུ་ཚུལ་སྤྱོད་ནོར་བུ་འབར། །ཡིད་བཞིན་ནོར་བུ་འགྲོ་ཀུན་མགོན་གཅིག་པུ། །ནམ་མཁའི་དཀྱིལ་ན་ནོར་བུ་གཅིག་སྣང་བ། །སེམས་ཅན་རྣམ་དག་ཡངས་ཤིང་རྣམ་པར་གྲགས། །སྲིད་གསུམ་སྲུང་མ་གཅིག་པུ་རྒྱལ་སྲས་མཆོག །ཞི་བ་རབ་ཏུ་ཞི་བ་སྐྱབས་འོས་རྟག །སྐྱེ་དགུའི་བདག་པོ་པད་བྱུང་པདྨ་སྐྱེས། ཀུན་ནས་འོད་བཟང་ལེགས་བཤད་ཆོས་མངའ་བ། །དར་བ་ལེགས་བཤད་རབ་དུལ་ལེགས་བཤད་ཕྱག །བློ་བཟང་འོད་བཟང་བདེ་ལྡན་སྐྱེ་གནས་བཟང་། །མཁས་རབ་ཞི་རབ་མཆོག་གི་ཆོས་དང་ལྡན། །ཞི་མཛད་རྒྱལ་འབྱུང་བདེ་བ་འབྱུང་བའི་གནས། །འོད་ཀྱི་འབྱུང་གནས་བདེ་མཛད་དབང་དུ་མཛད། །ལེགས་འབྱུང་ཤེས་རབ་འབྱུང་གནས་སྟོབས་སྐྱེད་པ། །སྙིང་རྗེའི་འབྱུང་གནས་བློ་བཟང་རྣམ་གྲགས་མཛད། །རྣམ་གྲོལ་ངེས་གྲོལ་ཤིན་ཏུ་གྲོལ་བའི་བློ། །བློ་ཡངས་རྣམ་པར་བཀྲམ་ཞིང་རྣམ་པར་གྲགས། །ཀུན་ཏུ་ལོངས་སྤྱོད་སྒོ་སྟེ་བློ་ཡི་མདོག །བློ་གྲོས་བརྟན་པ་དཀོན་མཆོག་གསུམ་ལས་བསྒྲུབས། །སངས་རྒྱས་པདྨ་འདབ་རྒྱས་འདྲ་བའི་ཞལ། །དག་ཅིང་སྤྱན་ཡངས་ཆ་ལུགས་ཡིད་དུ་འཐད། །སྙིང་པོ་གསལ་བའི་སྙིང་པོ་བརྟེན་ཞེ་འདུལ། །ངོ་བོ་ཉིད་ཀྱི་རྒྱུན་བརྙེས་རབ་གསལ་བ། །སྤྱན་ཟུར་མདའནི་རབ་
ཏུ་གཏད་ལེགས་པ། །འཇིགས་མེད་ཞལ་རས་སྟོན་གྱི་ཟླ་བ་འདྲ། །མདུང་ཐུང་བརྒྱ་ཡི་མཚོན་མཆོག་མཚོན་ཆ་རྫོགས། །དྲག་པོ་འཇིགས་པ་སྡིག་སེལ་གསུམ་ལས་སྐྱེས། །རབ་དུལ་མཁས་པ་འགྲོགས་དགའ་འདྲིས་པར་སླ། །རབ་ཏུ་གྲགས་པ་གཉེན་རབ་གསེར་མདོག་ཅན། །ལྷ་ཆེན་བདེ་བྱེད་གསལ་ཤིང་ཕྱག་ན་བསྣམས། །སྤྱན་གསུམ་རིག་པ་གསུམ་ལྡན་མེ་གསུམ་སེལ། །འདོད་བཟང་མེ་ཏོག་མཚོན་ཐོགས་མེ་ཏོག་མདའ། །ན་བཟའ་བཟང་མནབས་གཡས་འཕེན་ཚབས་ཆེར་འཕེན། །ལེགས་བྲིས་སྣ་ཚོགས་མཚོན་ཆ་སྣ་ཚོགས་མངའ། །ན་བཟའ་སྣ་ཚོགས་སྣ་ཚོགས་རྒྱན་གྱི་དཔལ། །ཞལ་རས་ཟླ་བ་འོད་ཟེར་རྒྱས་པ་འདྲ། །ཞལ་མདངས་བསྟན་པས་འཇིག་རྟེན་ཀུན་འབྱོར་མཛད། །བཞད་པ་ཉི་མའི་འོད་ཟེར་རབ་འཇེབས་མདའ། །ཞལ་མདངས་རྒྱ་མཚོ་གསལ་མཛད་ལམ་མེ་བ། །དབང་ཆེན་རྡོ་རྗེའི་ཐོག་ལགས་འཇིགས་པའི་སྒྲ། །རྡོ་རྗེ་དྲག་པོ་ནོར་བུ་གཡོ་བ་འཛིན། །སྒྲ་སྙན་སྣང་བར་མཛད་པའི་མཐུ་དང་ལྡན། །བློ་གྲོས་ཆེན་པོ་བློ་གྲོས་རྣོ་བའི་མཆོག །རྒྱན་འཛིན་དཔལ་འཛིན་རིན་ཆེན་ཞལ་དང་ལྡན། །རྒྱུ་དང་མི་རྒྱུ་འགྲོ་བ་ཀུན་གྱི་གནས། །དེ་བཞིན་གཤེགས་པ་མགོན་སྲས་ཕྲེང་བ་བཟང་། །སྟོབས་ཆེན་འཇིག་རྟེན་བློ་གྲོས་ངོ་བོ་ཉིད། །སྐྱེ་དགུའི་བདག་པོ་བཀའ་ལུང་མཉམ་ཞིང་བརྟགས། །མི་ཡི་མངའ་བདག་
མཐོ་རིས་སྐྱེད་པའི་རྒྱུ། །སྒྱུ་འདྲེ་འདོད་པའི་མདའ་དང་རྡོ་རྗེ་ཅན། །མཐུ་སྟོབས་མངའ་ཞིང་སྤྱན་བཟང་སྡུག་པར་ལྡན། །སྟོན་པ་བཟང་པོ་སྟོང་ཉིད་ལམ་གྱི་སྟེགས། །གཅེས་གསུམ་འཕེལ་བའི་རྒྱུ་ལ་འཇུག་པ་མཛད། །བརྟན་པོ་རྒྱུ་ལ་རབ་ཏུ་ངེས་གྱུར་པ། །དཀྱིལ་འཁོར་དམ་པ་ཀུན་གྱི་སློབ་དཔོན་ལགས། །གཅིག་པུ་སྐྱེ་དགུའི་དཀྱིལ་འཁོར་ཆོ་ག་མཁྱེན། །རྣམ་པར་སྣང་མཛད་ཞིང་གི་གནས་ནས་སྐྱེས། །དབང་བསྐུར་བརྙེས་ཤིང་བཅུར་ལེགས་པ་གནས། །གནས་ཆེན་སོན་པ་མཆོག་གནས་གཅིག་པུ་ལགས། །སྐྱེ་དགུ་རྣམས་ཀྱི་ཉོན་མོངས་སེལ་བ་དང་། །སྡིག་འཇོམས་མཚན་བརྒྱ་རྩ་བརྒྱད་འདི་ཐོས་ནས། །བདེ་གཤེགས་སྲས་མཆོག་སུ་ཞིག་འདོན་བྱེད་པ། །འཇིག་རྟེན་ཟླ་བ་གཅིག་ཤར་བཞིན་ཏུ་སྣང་། །ནམ་མཁའི་སྙིང་པོ་སེམས་ཅན་གཅིག་པུ་ཡི། །མདུན་འདུག་ནངས་པར་བསྟོད་པ་འདི་བརྗོད་གང་། །དེ་ནི་སྲིད་གསུམ་སེམས་ཅན་མཆོག་འགྱུར་ཞིང་། །དྲི་མའི་གནས་ཀུན་དག་ལས་ཐར་བར་འགྱུར། །གཡུལ་དང་འཐབ་རྩོད་ཤིན་ཏུ་མི་བཟད་དང་། །མུ་གེའི་གནོད་པ་མི་ནད་བྱུང་བ་ན། །མཁས་པ་སུ་ཞིག་སྔར་ལངས་དད་བསྐྱེད་ནས། །ནམ་མཁའི་སྙིང་པོ་ལ་ནི་བསྟོད་བྱེད་པ། །དེ་ནི་འཇིགས་པའི་འབྱུང་གནས་ཐམས་ཅད་དང་། །སྡུག་བསྔལ་འབྱུང་འདྲེན་སྡིག་པ་
རྣམས་ལས་གྲོལ། །དེས་ནི་ཞི་མཆོག་མཆོག་བདེ་ཀུན་གནས་དང་། །བདེ་བ་རྒྱ་ཆེན་ངེས་པར་ཐོབ་པར་འགྱུར། །བདེ་འཐོབ་ལོངས་སྤྱོད་འཕེལ་བར་བྱ་བའམ། རྒྱལ་སྲིད་འཐོབ་དང་བྱད་གཟུགས་ནོར་འཐོབ་དང་། །རིགས་འཐོབ་ཡོན་ཏན་ཀུན་གྱི་གཞི་བསྒྲུབ་ཕྱིར། །བཏོན་ན་འགྲུབ་འགྱུར་འདི་ལ་ཐེ་ཚོམ་མེད། །དེ་ཕྱིར་ཇི་སྟེ་རྟག་ཏུ་འདོད་བདེ་ཀུན། །འདོད་ན་འགྲོ་བ་ཀུན་ལ་གཅིག་དཔའ་བ། །ནམ་མཁའི་སྙིང་པོ་སྲིད་གསུམ་མགོན་པོ་ལ། །རྟག་ཏུ་བསྟེན་ཅིང་སྔགས་ཀྱང་བསྟེན་པར་བགྱི། །ཞེས་པའི་མཐར་བཟང་སྤྱོད། བྱམས་སྨོན། སྤྱོད་འཇུག་སྨོན་ལམ་སོགས་རྒྱས་བསྡུས་གང་ཡང་རུང་བ་རེས་མོས་སུ་བྱ། །བཟོད་གསོལ། བརྟན་བཞུགས་སམ་གཤགས་གསོལ་དག་ཀྱང་མདོ་ཆོག་ལས་འབྱུང་བ་ལྟར་མདོར་བསྡུས་ཙམ་བྱ་ཞིང་བཀྲ་ཤིས་ཤློ་ཀ་གསུམ་རེ་ཙམ་བརྗོད་དོ། །ཀློག་པ་ལ་སྤྲོ་ན་ཐུན་མཚམས་སུ་མདོ་སྡེ་ཅི་ནུས་ཀྱང་བཀླག་གོ། །པཎྜི་ཏ་གང་བའི་རྡོ་རྗེའི་ཞལ་ནས། དེང་སང་རྨི་ལམ་ཞལ་ལྟའི་ཆོ་ག་བྱེད་པ་ལ་བསྙེན་པ་སྔོན་ཏུ་འགྲོ་དགོས་ཞེས་གསུངས་པས་འདི་ལྟ་བུའི་ཚུལ་གྱིས་བསྙེན་པ་འབུམ་ཕྲག་མ་མཐར་བྱས་པ་ངེས་པར་འགྲུབ་དགོས་སོ། །བཞི་པ་ལ་གཉིས། ཐུན་བཞིའི་རིམ་བས་བཤགས་པ་དང་། རྨི་ལམ་དུ་བཤགས་པའོ། །དང་པོ་ནི། མདོ་ལས། གལ་ཏེ་སེམས་ཅན་དེ་དག་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་ཐོས་ནས་མཐོང་བར་འདོད་ཅིང་ངན་སོང་དུ་ལྟུང་བས་འཇིགས་ཏེ། ལྟུང་བའི་རྩ་བ་བཤགས་པར་འདོད་ན། གལ་ཏེ་
དེ་དག་བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་འཚལ་ཞིང་དེའི་མིང་ནས་བརྗོད་ན། རིགས་ཀྱི་བུ་དེ་དག་གི་སྐལ་པ་ཇི་ལྟ་བ་བཞིན་ཏུ། སེམས་ཅན་དེའི་མདུན་ཏུ་ཐ་མལ་པའི་ཚུལ་དུ་འདུག་པའམ། བྲམ་ཟེའི་གཟུགས་ནས། བུ་མོའི་གཟུགས་ཀྱི་བར་གྱིས་བྱང་ཆུབ་སེམས་དཔའ་ལས་ཐོག་མ་པ་དེའི་མདུན་ཏུ་འདུག་སྟེ། ལྟུང་བའི་རྩ་བ་དེ་ཇི་ལྟར་བྱུང་བ་བཤགས་སུ་འཇུག་གོ། །དེའི་ཐབས་མཁས་པ་ཟབ་མོ་དང་། བླ་ན་མེད་པའི་ཐེག་པ་ཆེན་པོ་ལ་སྤྱོད་པ་ཡང་སྟོན། ས་དང་ས་དག་ཏུ་ཡང་ཏིང་ངེ་འཛིན་དང་། །གཟུངས་དང་། བཟོད་པ་ལ་གཞོག་པར་བྱེད་དེ། རིམ་གྱིས་ལམ་ཡན་ལག་བརྒྱད་པའི་བར་གྱིས་གཞོག་པར་བྱེད་དོ། །ཞེས་གསུངས་པའི་དོན་ཉམས་སུ་ལེན་པ་ན། དཀོན་མཆོག་སྤྲིན་ལ་སོགས་པ་མདོ་སྡེའི་དོན་འཕགས་པ་ཐོགས་མེད་ཀྱི་ཞལ་ནས། བྱང་ཆུབ་སེམས་དཔའ་མྱུར་དུ་མངོན་པར་རྫོགས་པར་འཚང་རྒྱ་བར་འདོད་པས་ཉིན་ལན་གསུམ་མཚན་ལན་གསུམ་དུ་ཕྱག་འཚལ་བ་དང་། མཆོད་པ་དང་། སྡིག་པ་སོ་སོར་བཤགས་པ་དང་། རྗེས་སུ་ཡི་རང་བ་དང་། བསྐུལ་བ་དང་། གསོལ་བ་གདབ་པ་དང་། ཡོངས་སུ་འགྲོ་བ་རྣམས་ཀྱང་བྱའོ། །ཞེས་གསུངས་པ་འདི་ལྟ་བུ་ལ་བརྟེན་ནས་ལྟུང་བ་བཤགས་ཤིང་། བྱང་ཆུབ་ཀྱི་སེམས་བསྐྱེད་དགོས་པས། བསྙེན་པ་སྔོན་ཏུ་སོང་ནས། སྐུ་གཟུགས་མཆོད་པ་མཎྜལ་སོགས་བསྙེན་པའི་སྐབས་ལྟར་བཤམ། ཨ་ག་རུ་དང་རྒྱ་སྤོས་སོགས་སྦྱར་བའི་སྤོས་མང་པོ་དང་ཁྲུས་ཆབ་སོགས་འདུ་བྱས། གོས་གཙང་མ་གོ། །ནམ་ལངས་པ་དང་། ཨོཾ་པྲ་ཀྲྀ་ཏ་པ་རི་ཤུདྡྷཿསརྦ་དྷརྨཱཿཔྲ་ཀྲྀ་ཏ་པ་རི་ཤུདྡྷོ྅་ཧཾ། ཞེས་པས་ཁྲུས་ཆབ་བྱིན་གྱིས་བརླབས་ལ་ཡན་ལག་ལྔ་ཁྲུས་བྱ། སྐྱབས་
འགྲོ་སེམས་བསྐྱེད། ས་གཞི་བྱིན་བརླབ། སྤྱན་འདྲེན་བཞུགས་གསོལ། ཁྲུས་གསོལ་སྐུ་ཕྱི་ན་བཟའ་འབུལ་བ་ཡན་ཆད་མདོ་ལུགས་ཆོས་སྤྱོད་ནང་ལྟར་ཐུན་དང་པོ་ལ་རྒྱས་པ་དང་། གཞན་ལ་ཇི་ལྟར་འོས་པ་བྱ། ཚིགས་སུ་བཅད་པ་གཅིག་པ་དང་བཞི་པ་ལྟ་བུས་དཀོན་མཆོག་སྤྱི་ལ་ཕྱག་འཚལ་བ་སྔོན་ཏུ་འགྲོ་བས། འཕགས་པ་ནམ་མཁའི་སྙིང་པོ་ཞལ་རས་རྒྱ་ཆེ་ཞིང་སོགས་མཚན་བརྒྱའི་དབུ་ནས་འབྱུང་བའི་ཕྱག་འཚལ་དེའི་གཤམ་དུ། འཕགས་པས་བདག་ལ་ཞལ་བསྟན་ཏེ་སྡིག་པ་དག་པར་མཛད་དུ་གསོལ། །ཞེས་བཏགས་པས་ཕྱག་བརྒྱ་རྩ་རེ་འཚལ། མགྱོགས་ཁྱད་འདོད་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཐུགས་རྗེ་ཆེན་པོ་དང་ལྡན་པ་འཕགས་པ་ནམ་མཁའི་སྙིང་པོ་ལ་ཕྱག་འཚལ་ལོ། །ཞེས་པའི་གཤམ་དུ་གསོལ་གདབ་བཏགས་ཀྱང་རུང་། སྤོས་བཏུལ། མེ་ཏོག་ལ་སོགས་པས་མཆོད། མཆོད་བའི་སྤྲིན་གྱི་གཟུངས་ལན་གསུམ་དང་། རིན་ཆེན་སེམས་དེ་སོགས་ཀྱིས་མཆོད། མཎྜལ་རྒྱས་པར་འབུལ། ལྟུང་བཤགས་ཚང་གསུམ། གསེར་འོད་ལས་འབྱུང་བའི། སངས་རྒྱས་རྐང་གཉིས། སྲིད་འགྲོར་ཉམ་ངར་སོགས། སྤྱོད་འཇུག་ལས་བྱུང་བ། གཙོ་བོ་རྒྱལ་བ། ཇོ་བོ་རྗེའི་བཤགས་ཆོག་ཏུ་བྱུང་བ། བླ་མ་རྡོར་འཛིན་སོགས་ལན་གསུམ་མཐར་རྗེས་སུ་ཡི་རང་ནས་བསྔོ་བའི་བར་གྱི་ཡན་ལག་ཆོས་སྤྱོད་ལྟར་བྱ། ནམ་སྙིང་གི་མཚན་བརྒྱ་ཚར་གཅིག་མཐར་གཟུངས་སྔགས་འདི་ཇི་ཙམ་ནུས་པ་བཟླའོ། །ཏདྱ་ཐཱ། སུ་མྲྀ་ཤ་སུ་མྲྀ་ཤ །ཀཱ་རུ་ི་ཀ །ཙ་ར་ཙ་ར། བི་ཙ་ར། སཾ་ཙ་ར།
ཀཱ་རུ་ི་ཀ །མུ་ར་མུ་ར། བེ་ག་དྷ་རི་མ་ཙ་མ། བྷུ་ཛ་པཱ་ད་ཀཱ་རུ་ི་ཀཱ། ཙིནྡྷ་མ་ི་པཱུ་ར་ཡ་ཀཱ་རུ་ི་ཀ །སརྦ་ཤ་མེ་སཱ་པཱ་ཡ་ཨཱཛྙཱ་དྷ་རི། སྷུ་གུང་སྷུ་གུང་། རུ་ཏི་བི་བེ་ཀ་གུང་། དྲྀཥྚི་བི་བེ་ཀ་གུང་། པཱུ་ར་ཡ་ཀྔ་རུ་ི་ཀ །པཱུ་ར་ཡནྟུ་མ་མ་ཨཱ་ཤ་ཡ་སརྦ་པནྠཱ་ཙ་ཨ་ཤོ་ཀ་ག་ཏི་སྭཱ་ཧཱ། གཟུངས་བཟླ་བ་ལ་སོགས་པའི་ཚེ་སྤོས་བཏུལ་བ་མ་ཆད་པར་བྱ། །མཐར་གོང་དུ་སྨོས་པའི་ཕྱག་ལན་གསུམ་དང་། དགོངས་ཤིག་དགོངས་ཤིག་ཐུགས་རྗེ་ཆེན་པོ་དང་ལྡན་པ། གྲགས་པ་ཆེན་པོ་ནམ་མཁའི་སྙིང་པོ་འགྲོ་བའི་དོན་བཞེད་པ་ཐུགས་རྗེ་ཆེན་པོ་དང་ལྡན་པ་བདག་ལ་གཟིགས་ཤིག །བདག་ཅག་ལ་སོགས་པའི་སེམས་ཅན་ལྟུང་བའི་རྩ་བ་བྱུང་བ། ངན་སོང་དུ་འགྲོ་བ། དགེ་བའི་རྩ་བ་ཐམས་ཅད་སྤྲུགས་པར་བྱེད་པ། འཇིག་པར་བྱེད་པའི་སེམས་ཅན་མ་རིག་པའི་མུན་ནག་དང་། ལྟ་བ་ངན་པས་སྡུག་བསྔལ་བར་གྱུར་པ་རྣམས་ཀྱི་ལྟུང་བའི་རྩ་བ་ཡོངས་སུ་དག་ནས་སྙིང་གི་ཐེ་ཚོམ་དྲལ་བར་མཛད་དུ་གསོལ། བདག་ཅག་ལ་སོགས་པ་སྙིང་གི་སྣོད་ཆག་པར་གྱུར་པ། །ལྟུང་བའི་དངོས་པོར་གྱུར་པ། ཕས་ཕམ་པའི་སེམས་ཅན་དགེ་བའི་ཆོས་ཐམས་ཅད་ཞིག་བར་གྱུར་བ། ངན་སོང་དུ་འགྲོ་བ། མགོན་མེད་པ། རྟེན་མེད་པ། མཁས་པ་ཐམས་ཅད་ཀྱིས་སྤངས་
པ་རྣམས་ཀྱི་སྡིག་པའི་དྲི་མ་འཁྲུད་ནས་འགྲོ་བ་ངན་པའི་ལམ་ལས་བཟློག་པར་མཛད་དུ་གསོལ། །རྨི་ལམ་ནའང་རུང་། སད་པའི་ཚེའང་རུང་སྟེ་སྐལ་པ་དང་མཚམས་པའི་སྐུ་གཟུགས་ཀྱི་སྣང་བ་བསྟན་ནས་བདག་ཅག་གི་ལྟུང་བ་འཆགས་སུ་འཇུག་ཅིང་དག་ཚངས་ཀྱི་བཀའ་དྲིན་བསྩལ་དུ་གསོལ། །ཐབས་མཁས་པས་མངོན་སུམ་དུ་ལམ་དྲང་བའི་ཐབས་ཀྱིས་སྟོན་ཏེ། ཐབས་དེས་ལྟ་བ་ངན་པར་བྱེད་པ། སྨོན་ལམ་ངན་པའི་བསམ་པ་དང་། སྐྱབས་ངན་པ་དང་། ངན་པར་འཇུག་པའི་སེམས་ལས་མྱུར་དུ་ཐར་བར་མཛད་དུ་གསོལ། ཅི་ནས་ཀྱང་བདག་གི་ལུས་དང་ངག་དང་ཡིད་ཀྱི་སྦྱོར་བ་དྲང་པོར་འགྱུར་བ་དང་། སྨོན་ལམ་དྲང་པོ་དང་དགེ་བའི་བཤེས་གཉེན་དྲང་པོ་བསྟེན་པར་འགྱུར་བ་དང་། མྱུར་དུ་དྲི་ངན་པ་དང་། ཉོན་མོངས་པ་དང་། སྡིག་པའི་ལྟ་བ་ལས་ཡོངས་སུ་ཐར་བར་མཛད་དུ་གསོལ། །བདག་ཅག་གི་ངན་སོང་དུ་འགྲོ་བའི་ལམ་ཐམས་ཅད་སྨོན་ལམ་གྱི་དབང་དང་། ལེགས་པར་སྤྱད་པའི་ལས་ཀྱིས་མྱུར་དུ་བྱད་བར་མཛད་དུ་གསོལ། །མྱུར་དུ་བདག་ཅག་གི་སེམས་ལ་དབང་ཐོབ་པ་དང་། ཐབས་ལ་མཁས་པ་ཟབ་མོ་དང་། བླ་ན་མེད་པའི་ཐེག་པ་ཆེན་པོ་ལ་སྤྱོད་ཅིང་ཕྱིར་མི་ལྡོག་པ་དང་། ས་དང་། ས་དག་ཏུ་ཡང་ཏིང་ངེ་འཛིན་དང་། གཟུངས་དང་། བཟོད་པ་དང་། ཕ་རོལ་ཏུ་ཕྱིན་པ་དྲུག་ལ་རྡོ་རྗེ་བཞིན་ཏུ་མཐུ་ཆེ་
ཞིང་། བརྟུལ་བ་བརྟན་པོས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་མཛད་དུ་གསོལ། །ཅེས་གསོལ་བ་དྲག་ཏུ་གདབ། བཟོད་གསོལ། །བརྟན་བཞུགས་སམ་གཤེགས་གསོལ། །བསྔོ་སྨོན་གང་འོས་ཆོས་སྤྱོད་ལྟར་བྱ། །དེ་ལྟ་བུའི་ཚུལ་གྱིས་ཐུན་བཞི་དང་། ཁྱད་པར་ཐོར་ཐུན་ལ་རྩེ་གཅིག་ཏུ་བྱ། ཐུན་མཚམས་གང་རིགས་སུ་བསྙེན་པའི་སྐབས་ལྟར་བསྒོམ་བཟླས་ཁྱུག་ཙམ་རེའང་མ་ཆག་བར་གྲུབ་ན་ལེགས་སོ། །གཉིས་པ་ནི། མདོ་ལས། གལ་ཏེ་དེ་བདག་ལ་མངོན་སུམ་དུ་སྟོན་པར་མི་བྱེད་ན། གང་དེ་ལ་གསོལ་བར་བྱེད་པའི་བྱང་ཆུབ་སེམས་དཔའ་ལས་ཐོག་མ་པ་ཉེས་པ་དང་བཅས་པས་ཐོ་རངས་ཀྱི་ཐུན་ལ་ལངས་ཏེ། ཁ་ཤར་ཕྱོགས་སུ་བསྟན་ཏེ་འདུག་ལ། ལྷའི་བུ་སྐྱ་རེངས་ལ་གསོལ་བ་གདབ་པར་བྱ། ཞེས་དང་། བསླབ་བཏུས་ལས། རྨི་ལམ་འཕགས་པ་ནམ་སྙིང་གི། །མདུན་ཏུ་འདུག་སྟེ་བཤགས་པར་བྱ། །ཞེས་པས་ཐོར་ཐུན་གྱི་གཤམ་དུ། སྔ་ན་སྐྱ་རེངས་དང་པོ་དང་། ཕྱིན་སྐྱ་རེངས་ཐ་མ་ཤར་བའི་ཚེ་ཁང་སྟེང་ལ་སོགས་པ་བླ་གབ་མེད་པའི་སར་ཕྱིན་ལ་སྤོས་བཏུལ། ཕྱག་འཚལ་གསོལ་གདབ་ཀྱི་ཤམ་ཅན་ཕྱོགས་བཅུ་ལ་ལན་བཅུ་བྱ། མཐར་ཁ་ཤར་དུ་ཕྱོགས། པུས་བཙུགས་ཐལ་མོ་སྦྱར་ཏེ། སྐྱ་རེངས་སྐྱ་རེངས་ཐུགས་རྗེ་ཆེན་པོ་ཅན། སྐལ་པ་ཆེན་པོ་ཅན་ཁྱོད་ཛམྦུའི་གླིང་དུ་ཤར་མ་ཐག་ཏུ། བདག་ལ་ཐུགས་རྗེས་དགབ་པར་མཛོད་ཅིག །བྱང་ཆུབ་སེམས་དཔའ་ནམ་མཁའི་སྙིང་པོ་ཐུགས་རྗེ་ཆེན་པོ་ཅན་ལ་བདག་གི་ཚིག་གིས་སྦྲོན་ཏེ། །
བདག་གི་རྨི་ལམ་དུ་ཡང་དེ་སྟོན་པར་འགྱུར་ཞིང་། གང་གི་ཐབས་དེས་ལྟུང་བ་བཤགས་པར་འགྱུར་བ་དང་། འཕགས་པའི་ཐེག་པ་ཆེན་པོ་ལ་ཐབས་དང་ཡེ་ཤེས་ཀྱི་མིག་ཆེན་པོ་ཐོབ་པར་མཛོད་ཅིག །ཅེས་བརྗོད་ལ་མལ་དུ་འོངས་ནས་གཟུངས་སྔགས་བརྗོད་བཞིན་གཉིད་དུ་ལོག་པ་སར་བཞག་གཅིག་གམ་གསུམ། འབྲིད་བདུན། ཐ་མ་བསྐྱར་བལྡབས་ལན་གསུམ་གྱིས་སྐལ་བ་དང་འཚམས་པར། སྐུ་དངོས་སམ། བླ་མའམ། ཕ་མ་ལ་སོགས་པའི་གཟུགས་སྟོན་པ་ལ་བཤགས་བ་བྱེད་དུ་བསྩལ་ཞིང་། དག་བྱེད་ཀྱི་ཐབས་སྟོན་པ་དེ་ལ་ཐེ་ཚོམ་མི་བྱ་བར་ལག་ཏུ་ལེན་པར་བྱའོ། །ལྔ་པ་ལ་ལྔ་ལས། དང་པོ་སྐུ་གཟུགས་མཆོད་པ་ནི། ངེས་པར་བྲིས་སྐྱུའམ་ལུག་སྐུ་བྱས་ལ། གཟུངས་སྔགས་མ་གཏོགས་པ་བཤགས་པ་ཆོ་ག་ལྟར་རམ། ཉིན་བཞིན་དད་མོས་རྩེ་གཅིག་པས་ཕྱག་མཆོད་མ་ཆད་པར་ཕུལ་ན། མེ་ཆུ་མཚོན་དུག་སོགས་དུས་མ་ཡིན་པར་འཆི་བའི་འཇིགས་པ་མི་འབྱུང་། ཚེ་ཟད་པ་མ་གཏོགས་ནད་གདོན་གྱི་འཚེ་བ་མི་འབྱུང་། ཇི་སྲིད་འཚོ་བའི་བར་དུ་ལྟུང་བའི་རྩ་བ་མི་འབྱུང་། བཀྲེས་སྐོམ་དང་རྒྱལ་པོའི་ཆད་པ་ལ་སོགས་པའང་མི་འབྱུང་ཞིང་། འཆི་བའི་དུས་ལ་བབ་སྟེ་ནང་དབུགས་གནས་པའི་སྐབས་སུ་རང་གི་མོས་པ་གང་ལ་ཆེ་བའི་གཟུགས་སུ་སྤྲུལ་ནས་ཆོས་སྟོན་ཏེ་སངས་རྒྱས་བཞུགས་པའི་ཞིང་དུ་ལམ་སྣ་འདྲེན་པར་གསུངས་སོ། །གཉིས་པ་ཏིང་ངེ་འཛིན་ཁྱད་པར་ཅན་སྐྱེ་བར་འདོད་པས། །ཆོ་ག་སྔར་
ལྟར་ལ། གཟུངས་སྔགས་བཟླ་པ་ལ་བབ་པའི་ཚེ། དགོངས་ཤིག་དགོངས་ཤིག་ནམ་མཁའི་སྙིང་པོ་ཐུགས་རྗེ་ཆེན་པོ་བརྙེས་པ་བདག་ལ་དར་པ་དང་། ཏིང་ངེ་འཛིན་གྱི་རྣལ་འབྱོར་སྩོལ་ཅིག །ལན་གསུམ་མམ་བདུན། ཏདྱ་ཐཱ། ཨུ་མུ་ར་་ཁེ། པཀྵ།།།ནཱི་ལེ། ས་མུ་དྲ་ཨ་བ་ཏ་རེ་ན་ན་ཡ་ན་ཡ། མ་ཧཱ་ཀཱ་རུ་ི་ཀ །ཨ་ནུ་པ་ཛམྦྷ་སྨྲྀ་ཏི། ཨ་གྲ་ཛམྦྷ་སྨྲྀ་ཏི། བཛྲ་ཛམྦྷ་སྨྲྀ་ཏི། ཀོ་ཥ་སྨྲྀ་ཏི། ཨ་ནུ་པ་མ་སྨྲྀ་ཏི། བུདྡྷ་ཀོ་ཊི་སྨྲྀ་ཏི་སྭཱ་ཧཱ། ཞེས་བཟླ། གསུམ་པ་ཆོས་ལ་གཟུངས་ཐོབ་པར་འདོད་ན། གཟུངས་སྔགས་ཁ་བསྒྱུར། དགོངས་ཤིག་དགོངས་ཤིག །མཁས་པ་ཆེན་པོ་སེམས་ཅན་ཐམས་ཅད་ཀྱི་ནང་ན་བསམ་གྱིས་མི་ཁྱབ་པ། རིགས་ཀྱི་བུ་ནམ་མཁའི་སྙིང་པོ་གང་ཟག་གི་མཆོག །དྲན་པ་དང་། །ཏིང་ངེ་འཛིན་གྱི་རྣལ་འབྱོར་བདག་ལ་སྩོལ་ཅིག །གསུམ་མམ་བདུན། །ཏདྱ་ཐཱ། ཨི་ནཱ་ལ་ཛ། བི་ཥ་ན་དུ་ཥ་ཛ། བི་ཡ་བ་ན་ཛ། བི་བཀྵིས་མེ། པཱ་ཤལ་ཛཱ་སི། སྠཱ་ན་ཤ་ར་བེ། ཤཱསྟྲ་ཀརྞྞེ། ཧུ་མ་ཧུ་མ། མ་ཧཱ་ཀཱ་རུ་ི་ཀ་སྭཱ་ཧཱ། བཞི་པ་ནད་དང་དབུལ་ཕོངས་ཆད་པ་འཇིགས་པ་བརྒྱད་ལ་སོགས་པ་ཞི་བ་པ་འདོད་ན། ཆོ་ག་སྔར་ལྟར་ལ། མཚན་བརྒྱ་དང་གཟུངས་ཅི་ནུས་སུ་བཀླག་པའི་མཐར། དགོངས་ཤིག་དགོངས་ཤིག་ཐུགས་རྗེ་ཆེན་པོ་དང་ལྡན་པ། གྲགས་པ་
ཆེན་པོ་ནམ་མཁའི་སྙིང་པོ་འགྲོ་བའི་དོན་བཞེད་པ་ཐུགས་རྗེ་ཆེན་པོ་དང་ལྡན་པ་བདག་ལ་གཟིགས་ཤིག །བདག་འདི་ལྟ་བུ་ལས་རབ་ཏུ་ཐར་པ་མཛོད་ཅིག །སྐལ་པ་མཛོད་ཅིག །མཐུ་ཆེན་པོ་བདག་ནི་སྡུག་བསྔལ་གྱིས་ཉམ་ཐག་གོ། །ཤིན་ཏུ་འབུལ་ལོ། །བདག་ནི་ཁྱོད་ལ་གནས་ནས། ཞི་བ་དང་བདེ་བ་འདི་དང་ཚེ་རབས་གཞན་ཏུ་འཐོབ་པར་འགྱུར་བར་མཛོད་ཅིག །ཅེས་ལན་བདུན་ལ་སོགས་པ་བརྗོད་དོ། །ལྔ་པ་ཆོས་ཀྱི་གདན་ས། འཇིག་རྟེན་གྱི་རྒྱལ་སྲིད་དང་། ཕྱུག་པོ་ལ་སོགས་པ་གནས་ཆེན་པོ་འཐོབ་པར་འདོད་པས། ཆོ་ག་དང་མཚན་བརྒྱ་གཟུངས་བཅས་ཀྱི་མཐར། ནམ་མཁའི་སྙིང་པོ་ཐུགས་རྗེ་ཆེན་པོ་དང་ལྡན་པ་བདག་ལ་སྐལ་བ་སྩོལ་ཅིག །བསམ་པ་དང་། །སེམས་པ་ཐམས་ཅད་དང་། བསམ་པ་ཡིད་བཞིན་རབ་ཏུ་རྫོགས་པར་མཛོད་ཅིག །གང་སེམས་ཤིང་གང་གསོལ་བ་ཐུགས་རྗེ་ཆེན་པོ་དང་ལྡན་པ་ཁྱོད་ཀྱིས་མཛོད་ཅིག །ཅེས་གསོལ་པ་ལན་མང་དུ་གདབ་བོ། །དེ་དག་ཀྱང་ཁྲུས་དང་གཙང་སྦྲ་བྱས། དད་མོས་ཀྱི་ཤུགས་ཆེན་པོས་གསོལ་བ་རྩེ་གཅིག་ཏུ་གདབ། མཆོད་པའི་བྱེ་བྲག་ཅི་འབྱོར་པས་མཆོད། དུས་བཞི་དང་ཁྱད་པར་ཐོ་རངས་ཀྱི་ཐུན་ལ་ནན་ཏན་ཏུ་འབད་པ་བསྔགས་སོ། །ཀྭ་ཡེ། ལས་ངན་གྱི་འབྲས་བུས་འཕངས་བའི་སྙིགས་མའི་ལུས་སྡུག་བསྔལ་བརྒྱ་ཡིས་
བརྒྱན་པའི་བྱིས་པ་བསོད་ནམས་ཆུང་བ་དག་གིས་ནོར་བུ་བོར་ནས་མཆིང་བུ་ཚོལ་བ་ལྟོས། །དེ་འདྲ་བ་ལ་འདོད་པའི་དོན་ཡིད་ལ་འབབ་པ་དག་གང་གི་ཕྱིར་འཇོ། དབང་ཆེན་པོ་ཐོབ་པའི་རྒྱལ་བའི་སྲས་པོ་དུས་ཐུང་ངུས་ཞལ་ལྟ་བའི་སྒྲུབ་ཐབས་དེ་བཞིན་གཤེགས་པས་གསུངས་པ་འདི་ལ་ཡིད་ཆེས་པའི་སྐལ་པ་དང་ལྡན་པ་ནི་སུ་ཞིག་ཡོད། །ལག་ཏུ་ལེན་ནུས་པའི་བསོད་ནམས་ཆེན་པོ་དང་ལྡན་པའང་ནམ་གྱི་དུས་སུ་འབྱུང་བར་འགྱུར་ཞིག་གུ། འདི་ལྟར་འདྲི་བ་བརྙེད་པའང་སངས་རྒྱས་ཀྱི་མཐུ་སྟེ་བྱང་ཆུབ་སེམས་ཀྱི་ནུས་པས་བསོད་ནམས་ཀྱི་བློ་གྲོས་ཐང་འགའ་འབྱུང་རིགས་པས་སོ། །ཚུལ་འདི་ལ་རྣམ་བཞག་རྒྱས་པ་དག་ཀྱང་སྤྲོ་བར་རིགས་མོད། རྗེ་བླ་མ་ཀུན་མཁྱེན་ཆེན་པོས་ཀྱང་འདུས་ལ་གསལ་བར་གྱིས་ཤིག་པའི་བཀའ་བསྩལ་པ་དང་། རྗེ་བཙུན་ཀུན་དགའ་སྙིང་པོས། སྨྲ་མང་ཡི་གེ་གདམས་པས་དབེན། །རྙེད་པའི་ལྕགས་ཀྱུ་ཡ་མཚན་རྨད། །གཞན་ཏུ་མི་དབང་ཚིག་གཅིག་གིས། །གྲོང་ཁྱེར་ཡུལ་འཁོར་བཅས་མངའ་བདག །ཅེས་གསུངས་པ་བཞིན་དགོས་ཆེད་སོགས་འབུད་ཙམ་ལས་མ་སྨོས་བཟད་དོ། །ཡང་སྨྲས་པ། མཐུ་ཆེན་སྲས་པོ་ཡིད་བཞིན་ནོར། །བསྟེན་ལས་འདོད་པ་ཀུན་འཇོ་ཡང་། །ཉེས་པ་གཙང་བྱེད་ཀེ་ཏ་ཀ །ནམ་མཁའི་སྙིང་པོ་མཚུངས་གཞན་མེད། །དཔའ་
རྣམས་ཐུགས་རྗེ་ཉམ་ང་བའི། །ཡུལ་ལ་འཇུག་པ་ཆོས་ཉིད་ཕྱིར། །བདག་འང་ལྟུང་ལྡན་གང་ཟག་གིས། །བསྒྲུབ་བྱའི་སྙིང་པོ་འདི་ཡིན་ནོ། །དེང་སང་ཆོས་ལྟར་བཅོས་པས་གང་། །ཆོས་མིན་སྣ་ཚོགས་འབད་ནས་འཆད། །དམ་ཆོས་རྩྭ་ལྟར་དོར་ནས་སུ། །ལྟར་སྣང་ཆོས་ལ་ཡི་དམ་འཆའ། །སངས་རྒྱས་བྱང་སེམས་ཡལ་བར་འདོར། །གདུག་པའི་འབྱུང་པོ་སྐྱབས་སུ་བསྟེན། །མི་དགེའི་འབྲས་བུ་བདེ་བར་རེ། །རྩ་ལྟུང་སྤྱོད་ཅིང་འདྲེན་པར་རློམས། །ཀྱེ་མ་སྙིགས་མའི་དུས་ངན་འདིར། །མཁས་པའི་ལེགས་བཤད་ཐན་ཏུ་ལྟ། །བླུན་པོའི་རང་བཟོ་སྲོག་ལྟར་བཙའ། །བསྟན་པའི་ཉི་མ་ནུབ་རིར་ཕྱོགས། །དེས་ན་ཉམ་ཆུང་བདག་འདྲའི་ཚིག །སུ་ལ་ཕན་པར་འགྱུར་དཀའ་ཡར། །དམ་ཆོས་ཡིན་ངེས་འདི་དག་ལ། །མོས་འདུན་བཟོད་དུ་མེད་པས་བྲིས། །ཁམས་དང་དབང་པོ་སྣ་ཚོགས་ཤིང་། །གཟུར་གནས་ཆོས་ཀྱི་སྤྱན་ལྡན་ཀྱང་། །འབྱུང་འགྱུར་སྲིད་མཐའ་མ་བཀག་པས། །དྲན་གསོ་ཙམ་དུའང་འགྱུར་རམ་སྙམ། །སངས་རྒྱས་སྲས་བཅས་བྱིན་རླབས་དང་། །བདག་གི་ལྷག་བསམ་རྣམ་དག་མཐུས། །ལྟུང་ལྡན་གང་ཟག་ཇི་སྙེད་པ། །འདི་ལ་བརྟེན་ནས་ལྗང་ནུས་ཤོག །དེ་ལས་ཐར་པའི་ལམ་པོ་ཆེ། །གྲོང་ཁྱེར་ཆེན་པོའི་ལམ་སྲོལ་བཞིན། །ཤིན་ཏུ་འདས་པར་གྱུར་ནས་ཀྱང་། །འབྲེལ་ཚད་དོན་དང་ལྡན་
གྱུར་ཅིག །བསྟན་པའི་རྒྱ་མཚོ་མི་འགྲིབ་འཕེལ་ཞིང་བརྟན། །དེ་སྲིད་ཆོས་འདིའི་ཆུ་ཀླུང་ཞིང་ཀུན་ཏུ། །ཆད་མེད་འབབས་པས་སྡིག་ལྟུང་དྲི་ཀུན་བཀྲུས། །ཐུབ་པའི་བསྟན་ལ་སྲི་ཞུའི་མཆོག་གྱུར་ཤོག །ཅེས་པའི་ཚུལ་འདིའང་རང་ཉིད་ཀྱིས་འདི་ལྟར་ཉམས་ལེན་བགྱིས་པའི་སྐབས་སུ་ཕྱིན་ཆད་བསྙེལ་གསོ་དང་། སྐལ་མཉམ་རེ་རེ་ཙམ་ལའང་ཕན་ཏུ་རེ་བས་འབྲི་བར་འདོད་པའི་ཚེ། ཀུན་གཟིགས་ཐུགས་རྗེའི་མངའ་བདག་མཉྫུ་གྷོ་ཥའི་ཞལ་སྔ་ནས་ཅིས་ཀྱང་བགྱི་བར་འོས་སོ་ཞེས་པའི་བཀའ་བསྩལ་གཙུག་ཏུ་མཆོད་དེ། བྱམས་མགོན་ཏཱའི་སི་ཏུའི་བཀའ་འབངས་ཐ་ཤལ་པ་རྨོངས་བརྟུལ་བློ་གྲོས་མཐའ་ཡས་ཀྱིས་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་བྲིས་པ་བསྟན་འགྲོར་ཕན་བདེའི་སྣང་བ་འདྲེན་པའི་ཤིང་རྟ་མཆོག་ཏུ་གྱུར་ཅིག །དགེ་ལེགས་འཕེལ།། ༈ །།བདེ་བར་གཤེགས་པའི་ལམ་ཞུགས་སྲས་རྣམས་ཀྱི། །ལྟུང་བའི་དྲི་མ་འཁྲུད་བྱེད་དཔེ་མེད་པ། །རྒྱལ་སྲས་དཔའ་པོ་ནམ་མཁའི་སྙིང་པོ་ཡི། །ཆོ་ག་སྐལ་ལྡན་ཤིང་རྟའི་ཕྱི་མོ་འདི། །ངེས་དོན་དང་ནི་དོན་བཟང་སྒྲུབ་མཆེད་ཀྱིས། །རྐྱེན་སྦྱར་དཔལ་སྤུངས་ཆོས་གྲྭར་བསྒྲུབས་པའི་དགེའི། །ཁ་ལོས་དྲངས་པའི་ཤིང་རྟ་ལ་ཞུགས་ནས། །འགྲོ་བའི་དེད་དཔོན་དམ་པ་ཉིད་གྱུར་ཅིག །