ནམ་མཁའ་ལྟར་དྲི་མ་མེད་པའི་གསུང་གི་དབང་ཕྱུག་ཆེན་པོའི་བསྙེན་པའི་ཆོ་ག་བསྡུས་པ་ཟབ་མོའི་ཡེ་ཤེས་ལ་འཇུག་པ།
ནམ་མཁའ་ལྟར་དྲི་མ་མེད་པའི་གསུང་གི་དབང་ཕྱུག་ཆེན་པོའི་བསྙེན་པའི་ཆོ་ག་བསྡུས་པ་ཟབ་མོའི་ཡེ་ཤེས་ལ་འཇུག་པ་ཞེས་བྱ་བ་བཞུགས་སོ། །
ན་མོ་གུ་རུ་མཉྫུ་ཤྲཱི་ཡེ། །མཁའ་སྙིང་རིན་ཆེན་འབྱོར་པས་ཉམས་དགའི་ཞིང་། །དོན་སྒྲུབ་བདེ་བ་སྦྱིན་མཛད་ནམ་མཁའ་ལྟར། །དྲི་མེད་གསུང་གི་དབང་ཕྱུག་ཡེ་ཤེས་དང་། །སྨྲ་བའི་འདོད་འཇོར་མཛོད་ཅིག་བདག་གཞན་ལའོ། །གང་དང་ཉེ་བ་ཉིད་སྒྲུབ་པ། །ཀུན་མཁྱེན་གཉིས་པ་བུ་སྟོན་གྱི། །གསུང་རབ་འོ་མའི་རྒྱ་མཚོ་ལས། །སྐལ་བཟང་འཚོ་བའི་བཅུད་འདི་ཕྱུང་། །ནམ་མཁའ་ལྟར་དྲི་མ་མེད་པ་ཤིན་ཏུ་ཡོངས་སུ་དག་པ་ཆོས་ཀྱི་དབྱིངས་ཀྱི་ཡེ་ཤེས་སྙིང་པོའི་དཀྱིལ་འཁོར་ཆེན་པོར་དབང་བསྐུར་བ་དང་རྗེས་སུ་གནང་བ་ཐོབ་པའི་གང་ཟག་གིས་བསྙེན་པའི་ཆོ་ག་བསྡུས་ཏེ་བྱ་བར་འདོད་པས། ཡིད་དང་རྗེས་སུ་མཐུན་པའི་གནས་སུ་སྤོས་ཆུ་བཅས་པའི་བ་
བྱུང་གིས་བྱུག་ཅིང་མེ་ཏོག་སིལ་མ་དགྲམ། དྲི་ཞིམ་པོའི་སྤོས་ཀྱིས་བདུག་ལ། བྲིས་སྐུ་ལ་སོགས་བའི་རྟེན་བཀྲམ་པའི་མདུན་ཏུ་མཆོད་པ་ལྔ་སོགས་ཇི་ལྟར་འབྱོར་པ་བཤམས་ཏེ་ཆོ་ག་དངོས་ལ་འཇུག་པ་ལ་གསུམ། སྔོན་འགྲོ། དངོས་གཞི། རྗེས་ཀྱི་བྱ་བའོ། །དང་པོ་ལ་གཉིས། བསོད་ནམས་དང་ཡེ་ཤེས་ཀྱི་ཚོགས་བསགས་བའོ། །དང་པོ་ནི། རྣམ་འཇོམས་ལ་སོགས་པ་གཟུངས་སྔགས་བཟླས་པའི་ཆབ་ཀྱིས་ཕྱི་རོལ་དུ་ཁྲུས་བྱས་ནས་སྟན་བདེ་བ་ལ་འཁོད་དེ། བཅོམ་ལྡན་འདས་གསུང་གི་དབང་ཕྱུག་གི་དཀྱིལ་འཁོར་གྱི་ལྷ་ཚོགས་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་བཛྲ་པྲ་་མེ་ན་བཛྲ་བནྡྷ་ནཾ་ཀ་རོ་
མི། ཞེས་པས་ཕྱག་བྱ། རྡོ་རྗེ་ཐལ་མོ་ཁ་ཕྱེ་སྟེ་མཐེ་བོང་མཛུབ་མོའི་ལོགས་ལ་བརྟེན་པ་མཆོད་ཡོན་གྱི་ཕྱག་རྒྱ་དང་། ཨོཾ་ཧཱུྃ་ཧྲཱིཿབྷ་ག་ཝཱ་ན་ཛྙཱ་ན་མུ་རྟི་ཝཱ་གཱི་ཤྭ་ར་མ་ཧཱ་ཝ་ཙ་སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨཱ་དྷཱ་ཏུ་ཛྙཱ་ན་གྷ་ཨཱཿ ཞེས་པས་མཆོད་ཡོན་དབུལ། གཡས་པའི་ཁུ་ཚུར་གྱི་སོར་མོ་ཐམས་ཅད་བསྐུམས་ལ་མཛུབ་མོ་དང་མཐེ་བོང་གཉིས་སྐམ་པ་ལྟར་བྱས་ལ། མེ་ཏོག་བླངས་ཏེ་འབུལ་བའི་ཚེ་ན་སོར་མོ་དེ་རྣམས་མཐའ་མ་ནས་རིམ་གྱིས་འགྲོལ་བར་བྱེད་པའི་ཕྱག་རྒྱ་དང་། ཨོཾ་པྲ་ཝ་ར་སཏ་ཀཱ་ར་པྲ་ཏཱིཙྪ་སྭཱ་ཧཱ། ཞེས་པས་ཞབས་བསིལ་དབུལ། རྡོ་རྗེ་ཁུ་ཚུར་གཉིས་ཀྱིས་གྱེན་ཏུ་མེ་ཏོག་འཐོར་བའི་ཚུལ་དང་། ཨོཾ་སརྦ་ཏ་ཐཱ་ག་ཏ་པུཥྤ་པུ་ཛ་མེ་གྷ་ས་མུ་དྲ་སྥ་ར་་ས་མ་ལེ་ཧཱུྃ་གིས་མེ་ཏོག་དང་། དེ་བཞིན་ཏུ་པཥྤེའི་གནས་སུ་གོ་བ་རྗེས་ལ་གནྡྷེ་དང་། རྡོ་རྗེ་ཐལ་མོ་བརྐྱངས་ནས་དྲི་བྱུག་པའི་ཚུལ་གྱིས་དྲི་དང་། དྷཱུ་པེ་དང་། རྡོ་རྗེ་ཁུ་ཚུར་ཐུར་དུ་ལྷུག་པའི་ཚུལ་གྱིས་བདུག་སྤོས་དང་། ཨ་ཀཱ་རོ་དང་རྡོ་རྗེ་བསྡམས་པ་ལས་རལ་གྲི་འདེབས་བའི་ཚུལ་དུ་བྱེད་པས་ལྷ་བཤོག་དང་། །ཨཱ་ལོ་ཀེ་དང་། རྡོ་རྗེ་ཁུ་ཚུར་གཉིས་ལས་མཐེ་བོང་གཤི་བག་ཏེ་བསྒྲེངས་བའི་ཕྱག་རྒྱས་མར་མེ་སྟེ་ཉེར་སྤྱོད་ལྔས་མཆོད། རྡོར་ཐལ་སྙིང་གར་བཀོད་དེ། ཨོཾ་སརྦ་པཱ་པཱ་ཏ་ཀཱ་ཡི་ཝཱ་ཙི་ཀ་མ་ན་སོད་བྷཱུ་ཏ་ན་རཱ་ག་དེྭ་ཥ་མོ་ཧ་མ་ད་མཱ་ན་དྷིཥྛེ་ཏིཥྛ་ན་ཡད་ཀྲི་ཏཾ་ཏན་ཏྲཻ་ཀཱ་ལི་ཀཱཾ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སརྦ་བཱ་པཾ་སྤོཊ་ཡཱ་མི་སྭཱ་ཧཱ། ཨོཾ་སརྦ་བཱ་པ་ན་པྲ་ཏི་དེ་ཤ་ཡ་མི་སྭཱ་ཧཱ། སྡིག་པ་ཐམས་ཅད་བཤགས་པར་བགྱིའོ། །ཨོཾ་སརྦ་ཏ་ཐཱ་ག་ཏཱ་ནཱཾ་
ཨཱདྶབྷཱ་ཝ་ནི་རྻཏ་ཡ་མི། སརྦ་ཏ་ཐཱ་ག་ཏཱཿཔྲ་ཏི་གྷྲྀཧྞནྟུ་མཱཾ་སྭཱ་ཧ། དེ་བཞིན་གཤེགས་པ་ཐམས་ཅད་ལ་བདག་ཉིད་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏཱ་པུཎྱ་ཛྙཱ་ན་སཾ་བྷ་རཱ་་ཨ་ནུ་མོ་ད་ཡཱ་མི་སྭཱ་ཧཱ། ཚོགས་གཉིས་ཀྱི་དགེ་བ་ཐམས་ཅད་ལ་རྗེས་སུ་ཡི་རང་བར་བགྱིའོ། །ཨོཾ་སརྦ་ཏ་ཐཱ་ག་ཏ་ས་མནྟ་བྷ་དྲ་མ་ཧཱ་བཛྲ་ས་མ་ཡི་མ་ཧཱ་བོ་དྷི་ཙིཏྟ་ཨུཏྤཱ་ད་ཡཱ་མི་སྭཱ་ཧཱ། བྱང་ཆུབ་ཀྱི་སེམས་བསྐྱེད་པར་བགྱིའོ། །ཨོཾ་བཛྲ་མུཿ རྡོ་རྗེ་བསྡུ་བའི་རྒྱ་ལ་ཕྱིར་བསྟན་ནས་སེ་གོལ་ལོ། །ཚོགས་རྟེན་གྱི་དཀྱིལ་འཁོར་རང་བཞིན་གྱི་གནས་སུ་གཤེགས་པར་གྱུར། གཉིས་པ་ནི། ཨོཾ་སརྦ་ཏ་ཐཱ་ག་ཏཤྴ་ན་སིཏ་ཏ་སརྦ་ས་ཏཱྭ་ནཱ་ན། སརྦ་སིདྡྷཱ་ཡ་སཾ་པ་དེ་སརྦ་ཏ་ཐཱ་ག་ཏནྩ་ཨ་དྷི་ཏིཥྛ་ནྟཾ་སྭ་བྷཱ་ཝ་ཤུདྡྷཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། ཕྱི་ནང་གི་ཆོས་ཐམས་ཅད་གཟད་མ་ནས་མ་སྐྱེས་ཤིང་རང་བཞིན་གྱིས་ཡོངས་སུ་དག་པ་ནམ་མཁའ་དང་མཉམ་པའོ། །གཉིས་པ་དངོས་གཞི་ལ་གཉིས་ལྷ་བསྒོམ་པ་དང་། སྔགས་བཟླ་བའོ། །དང་པོ་ནི། སེམས་ཉིད་ནམ་མཁའི་དབུས་ཀྱི་ངོས་སུ་ཆུད་པ་འོད་ཀྱི་དྲབ་ཆེན་པོ་དང་ལྡན་པའི་པདྨ་དང་ཟླ་བའི་དཀྱིལ་འཁོར་དུ་གྱུར་པའི་སྟེང་དུ། ཤེས་རབ་དང་ཐབས་ཀྱི་བདག་ཉིད་ཅན་གྱི་ཡི་གེ་མུཾ་ཁ་དོག་དམར་སྐྱ་དེ་བཞིན་གཤེགས་པ་དང་དཔག་ཏུ་མེད་པའི་འོད་ཟེར་འཕྲོ་བ་བསམ། དེས་དོན་གཉིས་
བྱས་ཚུར་འདུས་ཡོངས་སུ་གྱུར་པ་ལས། རང་ཉིད་རྗེ་བཙུན་འཇམ་དཔལ་ཟླ་བ་ཉ་བ་ལྟ་བུའི་སྐུ་དང་ལྡན་པ། པདྨ་དང་ཟླ་བའི་སྟེང་དུ་རྡོ་རྗེ་སྐྱིལ་མོ་ཀྲུང་གིས་བཞུགས་པ། ཕྱག་གཡས་གཉིས་ན་རལ་གྲི་དང་མདའ་བསྣམས་པ། གཡོན་གཉིས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་དང་གཞུ་བསྣམས་པ། སངས་རྒྱས་ལྔའི་ཅོད་པན་ཅན། བྱིས་པའི་རྒྱན་ཐམས་ཅད་ཀྱིས་བརྒྱན་པ། དེ་བཞིན་གཤེགས་པ་དང་། ཁྲོ་བོ་དང་། བྱང་ཆུབ་སེམས་དཔའ་དང་རིག་པའི་ལྷ་མོ་ཐམས་ཅད་དང་སྤྲོ་བ་དང་སྡུད་པའི་བདག་ཉིད་ཅན་ཏུ་གྱུར། རྡོ་རྗེ་བསྡམས་པ་ལས་གུང་མོ་གཉིས་བསྒྲེང་བའི་ཚིགས་གསུམ་པ་བཀུག་ལ་རལ་གྲི་ལྟ་བུར་བཞག །མཛུབ་མོ་གཉིས་བསྒྲེངས་ཏེ་བཀུག་ལ་མཐེ་བོང་གཤིབས་པའི་སྟེང་དུ་བཞག་པ་འཇམ་པའི་དབྱངས་ཀྱི་ཕྱག་རྒྱས་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོ་རྣམས་སུ་གཏུགས་ལ། ས་མ་ཡ་སཏྭ་ཨ་དྷི་ཏེཥྛ་སྭ་མཱཾ། ཞེས་བརྗོད་པས་རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་ལ། རྡོ་རྗེ་སེམས་མ་དང་། རིན་ཆེན་སེམས་མ་དང་། ཆོས་ཀྱི་སེམས་མ་དང་། ལས་ཀྱི་སེམས་མའི་སྐུ་སྦས་བའི་ཕྱག་རྒྱ་བཞིས་རིམ་པ་བཞིན་ཏུ་ཟླ་བའི་སྟེང་དུ་བཀོད་དེ་རྒྱས་བཏབ་བར་བསམས་ལ། ས་མ་ཡ་སཏྭ་ཉཧཾ། ཞེས་དམ་ཚིག་སེམས་དཔའི་ང་རྒྱལ་བྱའོ། །དེ་ནས། མདུན་ཏུ་ཡི་གེ་ཧྲཱིཿལས་པདྨ་དང་ཨ་ལས་ཟླ་བའི་སྟེང་དུ་མུྃ་ལས་རྗེ་བཙུན་འཇམ་དཔལ་ཟླ་བ་
ཉ་བ་ལྟ་བུའི་སྐུ་དང་ལྡན་པ་ནས། བདག་ཉིད་ཅན་ཏུ་གསལ། སྒོ་བ་བཞིའི་ལས་རྒྱ་དང་། བཛྲ་ཨངྐུ་ཤ་ཛཿབཛྲ་པཱ་ཤ་ཧཱུྃ། བཛྲ་སྥོ་ཊ་བཾ། བཛྲ་ཨཱ་ཝེ་ཤ་ཡ་ཨཱཿ ཞེས་པས་ཡེ་ཤེས་སེམས་དཔའ་དགུག །གཞུག །བཅིང་། དབང་དུ་བྱའོ། །དེ་ནས་མཆོད་པ་རྣམས། ཨོཾ་བཛྲ་ཡཀྵ་ཧཱུྃ། ཨོཾ་བཛྲ་ཤི་ཥ་རེ་རུཊ་མཊ། ཞེས་རྡོ་རྗེ་གནོད་སྦྱིན་དང་རྩེ་མོའི་སྔགས་བཟླས་པའི་སྤོས་ཆུས་བསངས། ཨོཾ་བཛྲ་ཛྭ་ལ་ཨཱ་ན་ལ་ཧ་ན་ད་ཧ་པ་ཙ་མ་ཐབྟཉྫ་ར་་ཧཱུྃ་ཕཊ། ཞེས་རྡོ་རྗེ་མི་ཡི་ཕྱག་རྒྱས་བསྲེག །སྭ་བྷཱ་བས་སྟོང་པར་སྦྱངས། སྟོང་པའི་ངང་ལས་ཨོཾ་ལས་བྱུང་བའི་མཆོད་པའི་སྣོད་དུ། ཨོཾ་ལས་མཆོད་བའི་ཡོ་བྱད་རྣམས་བཟང་ཞིང་རྒྱ་ཆེ་བ། ཡེ་ཤེས་ཀྱི་སྣང་བ་ལས་གྲུབ་པར་གྱུར། ཨོཾ་ཧཱུྃ་ཧྲཱིཿ སོགས། ཨོཾ་བྲ་ཝ་ར་སོགས། ཨོཾ་བཛྲ་པུཥྤེ་ཧཱུྃ། དེ་བཞིན་ཏུ། གནྡྷེ་དྷཱུ་པེ། ཨ་ཀཱ་རོ་སོགས། ཨཱ་ལོ་ཀེ་ཧཱུྃ་སྦྱར་བའི་སྔགས་དང་སོ་སོའི་ཕྱག་རྒྱས་བྱིན་གྱིས་བརླབ། བསོད་ནམས་ཚོགས་བསགས་ཀྱི་སྐབས་སུ་སྨོས་པའི་སྔགས་རྒྱས་ཕུལ་ནས། རྗེ་བཙུན་གྱི་དམ་རྒྱ་སྟེ་སྔར་བཤད་པའི་འཇམ་དབྱངས་ཀྱི་ཕྱག་རྒྱ་བཅིངས་ལ། ཨོཾ་ཧཱུྃ་ཧྲཱིཿབྷ་ག་ཝཱན་ཛྙཱ་ན་མཱུརྟི་ཝཱ་གཱི་ཤྭར་མ་ཧཱ་ཝཱ་ཙ་སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨཱ་དྷཱ་ཏུ་ཛྙཱ་ན་གྷ་ཨཱཿདྲྀ་ཤྱ། ཞེས་པས་ཡེ་ཤེས་པ་ལ་བལྟ། མངོན་སུམ་དུ་མཐོང་བ་གསལ་བ་དང་། ཕྱག་རྒྱ་དེ་ཉིད་དང་ཛཿཧཱུྃ་བཾ་ཧོཿ ཞེས་པས་རང་གི་ལུས་ལ་དགུག་གཞུག་བཅིང་
དབང་དུ་བྱ། ས་མ་ཡ་སྟཾྭ། ཞེས་བརྗོད་ནས་རྒྱབ་ཏུ་ཟླ་བའི་དཀྱིལ་འཁོར་བསྐྱེད། ས་མ་ཡ་སྟཾྭ་ཨ་ཧཾ། ཞེས་པས་དམ་ཚིག་པ་དང་ཡེ་ཤེས་པ་དབྱེར་མེད་པའི་བདག་ཉིད་དུ་བསྒོམས་ལ། རྗེ་བཙུན་གྱི་སྙིང་པོ་ལན་གསུམ་བཟླས་པས་དམ་ཚིག་པ་དང་ཡེ་ཤེས་པ་གཅིག་ཏུ་གྱུར་པས་རྣམ་པ་ཐམས་ཅད་ཀྱི་མཆོག་དང་ལྡན་པ། མཚན་བཟང་པོ་སུམ་ཅུ་རྩ་གཉིས། དཔེ་བྱད་བཟང་པོ་བརྒྱད་ཅུས་བརྒྱན་པར་གྱུར། དེ་བཞིན་གཤེགས་པ་ལ་སོགས་པའི་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གྱི་འཁོར་ལོ་སྤྲུལ་པར་བྱ་བའི་ཕྱིར། སངས་རྒྱས་ཐམས་ཅད་ཀྱིས་བདག་ཉིད་ལ་དབང་སྐུར་བར་གྱུར། རྡོ་རྗེ་བསྡམས་པ་ལས་མཐེ་བོང་གཡས་པས་གཡོན་མནན་པ་སེམས་དཔའི་སྐྱིལ་མོ་ཀྲུང་དུ་བྱས་ལ་མཛུབ་མོ་གཉིས་ལྕགས་ཀྱུའི་རྣམ་པས་རྩེ་མོ་ནང་དུ་བཀུག་ལ་གུང་མོ་གཉིས་མཉམ་པར་བསྒྲེང་བའི་ཚིགས་གསུམ་པ་བཀུག་ནས་དེའི་ཚིགས་དབུས་མའི་སྟེང་དུ་མཛུབ་མོ་གཉིས་ཀྱི་རྩེ་མོ་སྦྱར་བ་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གི་ཕྱག་རྒྱ་སྤྱི་གཙུག་ཏུ་བཞག་ལ། ཨོཾ་བྷཱུ་ཁཾ་ཨ་བྷི་ཥིཉྩ་མཱཾ་གྱིས་སྤྱི་གཙུག་ཏུ་རྣམ་སྣང་། དེ་ཉིད་དཔྲལ་བར་བཞག་ལ། བཛྲ་སཏྭ་ཨ་བྷི་ཥིཉྩ་མཱཾ་གྱིས་མི་བསྐྱོད་པ། རྣ་བ་གཡས་པའི་སྟེང་དུ་བཞག་ལ། བཛྲ་རཏྣ་ཨ་བྷི་ཥིཉྩ་མཱཾ་གྱིས་རིན་འབྱུང་། ལྟག་པར་བཞག་ལ། བཛྲ་དྷརྨཱ་ཨ་བྷི་ཥིཉྩ་མཾ་གྱིས་འོད་དཔག་མེད། རྣ་ལྟག་གཡོན་པར་བཞག་ལ། བཛྲ་ཀརྨ་ཨ་བྷི་ཥིཉྩ་མཾ་གྱིས་དོན་གྲུབ་སྟེ་སངས་རྒྱས་ལྔའི་དབུ་རྒྱན་དང་། དེ་ནས་
རྡོ་རྗེ་ཐལ་མོ་བཅིངས་ནས་མཛུབ་མོ་གཉིས་ཀྱིས་ཕན་ཚུན་མདུད་བ་བཅིངས་ལ། མཐེ་བོང་གཉིས་གཤིབས་ཤིང་སྲིན་ལག་གཉིས་ཀྱང་གཤིབས་ཏེ་རྩེ་མོར་བྱས་ནས་ཡོངས་སུ་བསྐོར་བ་བཟློག་སྟེ་གཙུག་ཏོར་གྱི་ཕྱོགས་ནས་བརྩམས་ཏེ་ཕྱོགས་བཞིར་ཕྲེང་བ་འཆིང་བའི་ཚུལ་དུ་བྱས་ལ་དཔྲལ་བའི་སྟེང་དུ་བཟུང་སྟེ། ཧཱུྃ་ཨ་བྷི་ཥིཉྩ་ཞེས་བརྗོད་དེ་རྡོ་རྗེ་ཕྲེང་བའི་དབང་དང་། དེ་ནས་རྡོ་རྗེ་ཐལ་མོའི་ཁ་ཐུར་དུ་བསྟན་ཏེ་མཛུབ་མོ་གཉིས་བཀུག་ནས་མཐེ་བོང་ལ་རྩེ་སྦྱར་བར་བྱས་ནས་དེ་ཉིད་སྙིང་ག་ནས་བཏེག་སྟེ་དཔྲལ་བའི་སྟེང་དུ་བཞག་ལ། བཛྲ་རཏྣ་ཨ་བྷི་ཥིཉྩ་མཱཾ་ཞེས་པས་རིན་པོ་ཆེའི་ཕྲེང་བ་དང་། རྡོ་རྗེ་བསྡམས་པ་ལས་མཐེ་བོང་གཉིས་གཤིབས་ཏེ་བསྒྲེང་། མཛུབ་མོ་གཉིས་ཀྱི་ཚིགས་བར་མ་བཅག་སྟེ་མཐེ་བོང་དང་རྩེ་སྤྲད། སྲིན་ལག་དང་མཐེའུ་ཆུང་མཉམ་སྟེ་བརྐྱངས་ལ་བདན་ལྟར་བྱས་པ་དཔྲལ་བའི་སྟེང་དུ་བཞག་ལ། ཨོཾ་ཨ་ཨ་བྷི་ཥིཉྩ་མཱཾ་ཞེས་པས་སྣ་ཚོགས་རྡོ་རྗེའི་ཕྲེང་བ་དང་། ཨོཾ་པདྨ་མཱ་ལེ་ཨ་བྷི་ཥིཉྩ་ལོ་ཀེ་ཤྭ་ར་ས་ར་ཧྲཱིཿཞེས་པས་པདྨའི་ཕྲེང་བའི་དབང་བསྐུར་བ་བླང་། དེ་ནས་དར་དཀར་པོ་ཞིང་དུ་ཁྲུ་གང་དཀྱུས་སུ་ཁྲུ་ཉི་ཤུ་པས་གནས་དགུར་མདུད་པ་བཅིང་བར་བསྒོམ་ཞིང་། ཨོཾ་ཊུཾ་ཞེས་བརྗོད་དེ་སྙིང་གར་མདུད་པ་བཅིང་བའི་ཚུལ་དང་། དེ་བཞིན་ཏུ་མགྲིན་པ་དང་། ལྟག་པ་དང་། སྙིང་ག་དང་། ནུ་མའི་བར་དང་། ཡང་སྙིང་ག་དང་། མགྲིན་པ་དང་། རྒྱབ་དང་། དགྲལ་བའི་སྟེང་དུ་མདུད་པ་བྱ་བའི་ཚུལ་གྱིས་ཡོངས་སུ་བསྐོར་ལ། རྣ་ལྟག་གཉིས་སུ་དར་དཔྱངས་བཅིང་བའི་ཚུལ་བྱ་སྟེ། རྣ་བ་གཉིས་ཀྱི་སྟེང་དུ་བཅུག་ལ་གྱེན་དུ་སོར་བཞི་ཙམ་ཕྱུང་ནས། ཁྱུང་གཤོག་ལྟར་
བྱས་ཏེ་སྒེག་པ་དང་བཅས་པས། གཡས་མཐེ་བོང་དང་། གཡོན་མཛུབ་མོ་ནས་རིམ་པ་བཞིན་བཀྲོལ་ལ། མཐར་མཉམ་པའི་ཐལ་མོའི་རྟིང་པ་བརྡབས་ནས་བཛྲ་ཏུཥྱ་ཧོཿཞེས་པས་མཉེས་པར་བྱ་ཞིང་། ལྷག་མ་ལུས་ཚད་དང་མཉམ་པར་བརྐྱང་བ་དར་དཔྱངས་ཀྱི་དབང་བླང་བར་བྱའོ། །དེ་ནས་རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་དང་མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་པ་བཀན་ཏེ་ཁར་བཞག་པ་རྡོ་རྗེ་འཁོར་ལོའི་ཕྱག་རྒྱ་ཕྱོགས་ཐམས་ཅད་དུ་བསྐོར་ལ། ཨོཾ་བཛྲ་ཙཀྲ་ཧཱུྃ། ཞེས་པ་ལན་བདུན་བཟླས་པས་དཀྱིལ་འཁོར་གྱི་འཁོར་ལོ་མ་ལུས་པ་སྤྲུལ་ཏེ་བརྟེན་དང་བརྟེན་པར་བཅས་པ་མངོན་སུམ་བཞིན་ཏུ་ཡང་དག་པར་བལྟས་ལ། ཆུ་གཉིས་སྔོན་ཏུ་འགྲོ་བའི་ཉེར་སྤྱོད་ལྔ་དང་། སྒེག་སོགས་བརྒྱད་ཀྱིས་མཆོད་པ་བྱ་སྟེ། དེ་ལ་རང་སྒེག་མོར་བསྒོམས་ནས་ཐུགས་ཀར་ཟླ་བ་ལ་སྣ་ཚོགས་རྡོ་རྗེའི་ལྟེ་བ་ལ་ས་བོན་ཧོ་བསམ་སྟེ། དེ་ལ་རང་འདྲའི་སྒེག་མོ་སྤྲོས་ནས་བྱང་ཆུབ་སེམས་ལ་དགའ་བའི་མཆོད་པས་མཆོད་པར་བསམ་ཞིང་། གར་སྔོན་དུ་འགྲོ་བས་སྒེས་མོའི་ལས་རྒྱ་བཅིངས་ལ། ཨོཾ་བཛྲ་སུ་སཾ་གྲ་ཧད། ཅེས་གླུར་བླང་ཞིང་གར་དགུ་གཡོན་པའི་ཆར་བསྡུ་ཞིང་། སྒེག་མོ་རྣམས་ཐུགས་ཀའི་ས་བོན་ལ་བསྡུའོ། །དེ་བཞིན་ཏུ་གདན་རྣམས་ལའང་རིགས་འགྲོས་ཤེས་པར་བྱས་ལ། ཨོཾ་བཛྲ་རཏྣ་མ་ནུཏ་རཾ་ལས་ཕྲེང་བ་མ། ཨོཾ་བཛྲ་དྷརྨ་ག་ཡཱ་ནི་ལས་གླུ་མ། ཨོཾ་བཛྲ་ཀརྨ་ཀ་རོྷ་ཝ་ལས་གར་མ། ཡང་གླུ་དེ་བཞིས་རིམ་པར་བདུག་སྤོས་མེ་ཏོག་མར་མེ་དྲི་ཆབ་སྟེ་ཕྱིའི་ལྷ་མོ་རྣམས་ཀྱིའང་སོ་སོའི་ཕྱག་རྒྱ་དང་བཅས་པས་མཆོད་རྫས་རྣམས་དངོས་སུ་ཡོད་ན་ལག་པས་བླངས་ལ་
དབུལ། མེད་ན་བསྒོམས་པའི་ལྷ་མོས་མཆོད་དོ། །གཉིས་པ་སྔགས་བཟླ་བ་ལ་གཉིས། མཚན་ཡང་དག་པར་བརྗོད་པ་ཀླག་པ་དང་། སྙིང་པོ་བཟླ་བའོ། །དང་པོ་ནི། བདག་དང་མདུན་གྱི་དཀྱིལ་འཁོར་གྱི་གཙོ་བོའི་ཐུགས་ཀར་མཚན་བརྗོད་ཀྱི་ཡི་གེ་རྣམས། མུ་ཏིག་གི་ཕྲེང་བ་བཞིན་ཏུ་བཀོད་དེ་བཟླས་པས། དེ་དག་ལས་འོད་ཟེར་འཕྲོས་དོན་གཉིས་བྱས་ཚུར་འདུས་ནས་བདག་ཉིད་ལ་ཐིམ་པར་གྱུར། ཞེས་བསྒོམ་ཞིང་ཐུན་བཞིའི་རིམ་པས་མཚན་བརྗོད་གདོན་ཏེ། ཇི་སྲིད་དཀྱིལ་འཁོར་མངོན་སུམ་དུ་མཐོང་བའམ། མཚན་མ་བྱུང་བའམ། དཀྱིལ་འཁོར་བྲི་བའི་ཕྱིར་རྨི་ལམ་དུ་གནང་བ་ཐོབ་ཀྱི་བར་དུ་བཟླ། དེའང་ཤེས་ན་མཚན་ཡང་དག་པར་བརྗོད་པ་ཉིད་ལེགས་སྦྱར་གྱི་སྐད་དུ་བཀླག་ཅིང་། མི་ཤེས་ན། དེ་ནས་དཔལ་ལྡན་རྡོ་རྗེ་འཆང་། །ཞེས་པ་ནས། རྫོགས་པའི་སངས་རྒྱས་ཀུན་གྱིས་བཤད། །ཅེས་པའི་བར་བོད་སྐད་དུ་དག་པར་བཀླག་གོ། །གཉིས་པ་ནི། རྗེ་བཙུན་གྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ། འཁོར་ལོ་རྩིབས་དྲུག་པའི་ལྟེ་བ་ལ། ཨོཾ་མུ་ཨོཾ། ཤར་གྱི་རྩིབས་ལ་ཨོཾ་བཛྲ་ཏཱིཀྵ་ཱ་ཡ་ན་མཿ དེ་ནས་བསྐོར་ཕྱོགས་ཀྱི་རིམ་པས་རྩིབས་གཉིས་པ་ལ་ཨོཾ་དུཿཁ་ཙྪེ་དཱ་ཡ་ན་མཿ གསུམ་པ་ལ་ཨོཾ་པྲཛྙཱ་ཛྙཱ་ན་མཱུརྟ་ཡེ་ན་མཿ བཞི་པ་ལ་ཨོཾ་ཛྙཱ་ན་ཀཱ་ཡཿན་མཿ ལྔ་པ་ལ་ཨོཾ་ཝཱ་གཱི་ཤྭ་རཱ་ཡ་ན་མཿ དྲུག་པ་ལ་ཨོཾ་ཨ་ར་པ་ཙ་ནཱ་ཡ་ན་མཿ
དེའི་ཕྱིའི་མུ་ཁྱུད་ལ་དབྱངས་ཡིག་བཅུ་གཉིས། དེའི་ཕྱིའི་མུ་ཁྱུད་ལ་གསལ་བྱེད་སོ་བཞི་ཐམས་ཅད་ཀྱང་ཟླ་བའི་མདོག་ལྟ་བུའི་འོད་ཀྱིས་རང་གི་ལུས་ཐམས་ཅད་སྣང་བར་བྱེད་པ། སྔགས་ཀྱི་ཡི་གེའི་ཚོགས་རྣམས་ལས་འོད་ཟེར་སྣ་ལྔ་བྱུང་ནས་རང་གི་ལུས་སྣང་བར་བྱས་ནས་ཕྱི་རོལ་དུ་འཕྲོས་པས་མཐའ་ཡས་པའི་ནམ་མཁའི་ཁོངས་ན་གནས་པའི་རྒྱུ་བ་དང་མི་རྒྱུ་བའི་དངོས་པོ་མ་ལུས་པ་རྣམས་རབ་ཏུ་སྣང་བར་བྱས་པར་བལྟས་ལ། ཤེས་བྱའི་དཀྱིལ་འཁོར་མ་ལུས་པ་མེ་ལོང་ལྟ་བུར་ཤིན་ཏུ་འོད་གསལ་བར་བསྒོམས་ལ། །སྔགས་དེ་རྣམས་དང་། གཙོ་བོར། ཨོཾ་ཧཱུྃ་ཧྲཱིཿསོགས་འཇམ་དཔལ་གྱི་སྙིང་པོ་བཟླས་ཤིང་རྣམ་པ་ཐམས་ཅད་ཀྱི་མཆོག་དང་ལྡན་པས་སྤྲོ་བ་དང་བསྡུ་བའི་བདག་ཉིད་ཅན། སྐད་ཅིག་མའི་ཡེ་ཤེས་ལས་བྱུང་བའི་རྗེ་བཙུན་འཇམ་དཔལ་དུ་བདག་ཉིད་བསམས་ལ་དངོས་པོ་ཐམས་ཅད་ཀྱི་ངོ་བོར་ཉིད་སེམས་ཙམ་གྱི་སྤྲུལ་པ་ཁོང་དུ་ཆུད་བས་སེམས་ཀྱི་སྤྲུལ་པའི་དཀྱིལ་འཁོར་གྱི་འཁོར་ལོ་ཡང་དག་པར་བལྟས་ལ་ཐུན་བཞིའི་རྣལ་འབྱོར་གྱིས་སྔགས་བཟླའོ། །བཟླས་པའི་གྲངས་ནི་གཙོ་བོར་མཚན་བརྗོད་ལ་འཛིན་པར་བཞེད་ཀྱང་། མི་འགྲུབ་ན་མཚན་བརྗོད་བརྒྱའམ་སྟོང་ནས། ཁྲི་དང་འབུམ་གྱི་བར་གང་འགྲུབ་བློ་ནུས་དང་སྦྱར་ཞིང་། བསྙེན་པའི་ཆད་དངོས་སྙིང་པོ་ལ་བཟུང་སྟེ་འབུམ་ཕྲག་བཞི་བཟླའོ། །གསུམ་པ་རྗེས་ནི། ཐུན་བཞི་སོ་སོའི་མཐར། །ཆུ་གཉིས་སྔོན་ཏུ་འགྲོ་བའི་ཉེར་སྤྱོད་ལྔ་དང་། སྒེག་སོགས་བརྒྱད་གོང་དུ་བསྟན་པ་ཉིད་ཀྱིས་མཆོད། མཆོག་སྦྱིན་རྡོ་རྗེ་མཆོག་ཁྱོད་འདུད། །
ཡང་དག་མཐར་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །སངས་རྒྱས་རོལ་ལ་ཕྱག་འཚལ་འདུད། །སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་ལ་ཕྱག་འཚལ་འདུད། །སངས་རྒྱས་གསུང་ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །མེད་པ་ལས་བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་འདུད། །ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །ཅེས་འདུད་ཉི་ཤུས་བསྟོད། སྔར་གྱི་རྗེ་བཙུན་གྱི་དམ་རྒྱ་དགྲོལ་ཞིང་སྙིང་པོའི་གཤམ་དུ་མུཿཞེས་པ་བཏགས་ནས་བརྗོད་པས་ཕྱག་རྒྱ་ཐམས་ཅད་བཀྲོལ་བར་བསམ་མོ། །དེ་ནས་རྡོ་རྗེ་བསྡམས་པ་ལས་མཐེ་བོང་གཉིས་གཤིབས་པའི་སྟེང་དུ་མཛུབ་མོ་གཉིས་རྩེ་མོ་བཀུག་ནས་རྩེ་སྤྲད་པའི་ཕྱག་རྒྱ་རང་གི་སྙིང་ག་ནས་དཔྲལ་བར་བཞག་ལ། ཨོཾ་བཛྲ་རཏྣ་ཨ་བྷི་ཥིཉྩ་མཱཾ་གྱིས་ཕྱག་རྒྱ་ཐམས་ཅད་ལ་དབང་བསྐུར། ཕྱག་རྒྱ་དེ་ཉིད་གཉིས་སུ་བྱས་ལ། མཛུབ་མོ་གཉིས་ཀྱིས་གོ་ཆ་འཆིངས་བའི་ཚུལ་དུ་བྱ་ཞིང་། ཨོཾ་བཛྲ་མུ་ཏྲཾ་མེ་ཏྲི་ཌྷི་ཀུ་རུ་
བ་ར་ཀ་བ་ཙེ་ན་པཾ། ཞེས་བརྗོད་པས་གོ་བགོ། །མཉམ་པའི་ཐལ་མོའི་རྟིང་བ་བརྡབ་ཅིང་། ཨོཾ་བཛྲ་ཏུ་ཥྱ་ཧོཿཞེས་མཉེས་པར་བྱ། ཡིག་བརྒྱ་ལན་བདུན་གྱིས་ལྷག་ཆད་ཁ་བསྐང་སྟེ། བདག་གིས་ཆོ་ག་མ་ཚང་བ་གང་དག་བགྱིས་པ་དེ་དག་བཟོད་པར་མཛད་དུ་གསོལ་ལོ། །ཞེས་ནངས་པ་བཟོད་པར་གསོལ། དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ཏེ། དགེ་བའི་རྩ་བ་འདི་དག་གིས་བདག་དང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་དང་བྲལ་བར་གྱུར་ཅིག །འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་དང་ཡང་དག་པར་ལྡན་པའི་བདེ་བ་ཉིད་དང་ཡིད་བདེ་བ་ཉིད་ཀྱི་མིའི་མཆོག་སངས་རྒྱས་སུ་ཚེ་འདི་ཉིད་ལ་གྱུར་ཅིག །བདག་གིས་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་སྒྲོལ། །ཞེས་དགེ་རྩ་མངོན་པར་འདོད་པའི་དངོས་གྲུབ་ཀྱི་ཕྱིར་དུ་བསྔོ། །སེམས་མ་རྡོ་རྗེ་མའི་ཕྱག་རྒྱ་གྱེན་ཏུ་བཀྲོལ་ནས། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །སྙིང་པོ་ལ་མུཿབཏགས་ལ་ཡེ་ཤེས་པ།
གཤེགས། ཨོཾ་བཛྲ་ས་མཱ་ཛཿ ཛཿཧཱུྃ་བཾ་ཧོཿ ཞེས་རྡོ་རྗེ་བསྡུ་བའི་སྔགས་རྒྱས་སྤྲུལ་པ་རང་གི་ལུས་ལ་བསྡུ། གོ་ཆ་གོན་པའི་ཚུལ་དང་། ཨོཾ་བཛྲ་རཀྵ་ཧཾ། མཆེ་བའི་རྒྱ་དང་། ཨོཾ་བཛྲ་ཡཀྵ་ཧཱུྃ་ཁུ་ཚུར་བསྡུས་པ་དང་། ཨོཾ་བཛྲ་སིནྡྷི་བཾ། ཞེས་པ་རྣམས་ཀྱིས་བདག་ཉིད་བསྲུང་སྟེ་ཐུན་མཚམས་སུའང་མདོ་བཀླག་པ་དང་། སཱཙྪ་གདབ་པ་དང་། མཆོད་རྟེན་ལ་བསྐོར་བ་སོགས་དགེ་བའི་བྱ་བ་ལ་འཇུག་པར་བྱའོ། །རྒྱུད་ཐམས་ཅད་ཀྱི་རྩེ་མོར་གྱུར་པ་མཚན་ཡང་དག་པའི་བརྗོད་པའི་སྒྲུབ་ཐབས་ཆེན་པོ་རྣལ་འབྱོར་ལུགས་སུ་བཀྲལ་བའི་བསྙེན་པ་བསྡུས་པ་འདི་ཙམ་ཞིག་ཉམས་སུ་ལོན་པར་གྱུར་ནའང་མི་ལུས་ཐོབ་ཅིང་སྔགས་ཀྱི་སྒོར་ཞུགས་པ་ཉིད་དེས་བར་དོན་ཡོད་པ་བྱས་པ་ཉིད་དོ། །རྒྱུ་རྒྱལ་ཉམས་ལེན་འཇམ་དཔལ་གྲགས་པའི་ལུགས། །བུ་སྟོན་ཆེན་པོའི་གསུང་ལས་ཕྱུངས་གང་འདིས། །འགྲོ་ཚོགས་མ་རིག་རྨོངས་པའི་མཛོད་བརྟོལ་ནས། །ཡེ་ཤེས་རིན་ཆེན་གླིང་དུ་སྤྱོད་བྱེད་ཤོག །ཅེས་པའང་རྒྱལ་བ་ཀུན། ཡེ་ཤེས་ཀྱི་སྐུ་གཅིག་བུ་མཁྱེན་པའི་གཏེར་ཆེན་བརྩེ་བ་ཆེན་པོའི་ཞལ་སྔ་ནས། རྒྱུད་འདིའི་སྨོན་གྲོལ་རྒྱ་ཆེན་པོའི་བཀའ་དྲིན་དང་རྗེས་སུ་འབྲེལ་བར་གསུང་གི་གནང་བ་བསྩལ་བ་དང་། རང་གཞན་ལ་ཕན་པའི་སེམས་ཀྱིས་འདུ་གསུམ་པ་ཀརྨ་ངག་དབང་ཡོན་ཏན་རྒྱ་མཚོས་གདན་ས་ཆེན་པོ་དཔལ་སྤུངས་ཀྱི་བླ་བྲང་གཉིས་པ་དབེན་ར་ཟླ་མཛེས་སུ་སྤེལ་བ་དགེ་ལེགས་འཕེལ།། །།སརྦ་མངྒ་ལཾ།། །།