བཅོམ་ལྡན་འདས་གདུགས་དཀར་མོའི་བསྐྱེད་བཟླས་རྒྱུན་ཁྱེར་རྡོ་རྗེ་འབར་བ།
བཅོམ་ལྡན་འདས་གདུགས་དཀར་མོའི་བསྐྱེད་བཟླས་རྒྱུན་ཁྱེར་རྡོ་རྗེ་འབར་བ་ཞེས་བྱ་བ་བཞུགས་སོ།། །།
དེ་བཞིན་གཤེགས་པ་སྲས་བཅས་ཀྱིས། །ཕྱག་བྱས་དེ་ལ་གུས་བཏུད་དེ། །རིག་སྔགས་རྒྱལ་མོ་སྟོབས་པོ་ཆེ། །རྣལ་འབྱོར་བསྡུས་ཏེ་བྱ་བ་འཆད། །སངས་རྒྱས་ཆོས་ཚོགས་སོགས་གྱིས་སྐྱབས་སེམས་ལན་གསུམ་བྱ། རང་ཉིད་བཅོམ་ལྡན་འདས་མར་གསལ། །ཐུགས་ཀར་པད་ཟླར་ཨོཾ་དཀར་པོའི། །འོད་ཀྱིས་སངས་རྒྱས་བྱང་ཆུབ་སེམས། །སྤྱན་དྲངས་ནམ་མཁའ་གང་བར་གྱུར། །དཀོན་མཆོག་རིན་ཆེན་གསུམ་ལ་ཕྱག་འཚལ་ལོ། །རྫོགས་པའི་སངས་རྒྱས་བྱེ་བ་ཕྲག་བདུན་པོ། །ཉན་ཐོས་དགེ་འདུན་བཅས་ལ་ཕྱག་འཚལ་ལོ། །ཨུཏྤལ་བསུང་གི་ཏོག་དང་རྣམ་སྣང་མཛད། །ཀུན་བཟང་རིན་ཆེན་ཏོག་དང་ཤཱཀྱ་ཐུབ། །སཱ་ལའི་དབང་པོ་སྨན་བླ་མི་འཁྲུགས་པ། །འོད་དཔག་མེད་དང་དཔའ་བརྟན་སྡེར་ཕྱག་འཚལ། །དེ་བཞིན་རྡོ་རྗེ་ནོར་བུ་པདྨའི་གདུང་། །གླང་པོ་གཞོན་ནུ་ཀླུ་ཡི་གདུང་བདུན་ལ། །རབ་ཏུ་གུས་པ་ཆེན་པོས་ཕྱག་འཚལ་ལོ། །སྐྱེས་བུ་ཟུང་བཞི་ཡང་དག་སོང་དང་ཞུགས། །དྲང་སྲོང་རིག་སྔགས་འཆང་དང་ཚངས་དབང་པོ། །ལེགས་ལྡན་མཆེད་གསུམ་ལ་ཡང་གུས་པས་འདུད། །ཅེས་དང་། བཅོམ་ལྡན་འདས་མ་ཁྱོད་ལ་ཕྱག་འཚལ་ཞིང་། མཆོད་པ་རྣམ་པ་དུ་མས་རབ་མཆོད་དོ། །ཉེས་གསུམ་མཐར་བྱེད་ཁྱོད་ཀྱི་སྤྱན་སྔ་འདིར། །སྡིག་པ་མཐའ་དག་
བཤགས་ཤིང་བསྡམ་པར་བགྱི། །འགྲོ་བའི་དགེ་ལེགས་ཀུན་ལ་དགའ་བསྐྱེད་དེ། །སྲིད་ཞི་ཀུན་ཏུ་བཅོམ་ལྡན་འདས་མ་ཁྱོད། །རབ་བདེ་བླ་མེད་ཆོས་ཀྱི་འཁོར་ལོ་མཆོག །རྟག་པར་བསྐོར་བས་མཐའ་དག་ཚིམས་པར་གསོལ། །ནམ་ཡང་ཁྱོད་ཚུལ་ནུབ་མེད་བཀའ་དྲིན་དང་། །དགེ་འདུན་ཁྱོད་ཉིད་ཁོ་ནའི་རྒྱུར་གསོལ་ཞིང་། །དགེ་ལེགས་སྙིང་པོའི་དཔལ་འབྲས་ཁྱེད་དང་བདག །རྣམ་པ་ཀུན་ཏུ་མི་བྱེད་ཉིད་གྱུར་ཅིག །ཨོཾ་བཛྲ་མུཿ ཚོགས་ཞིང་རྣམས་གཤེགས་ལ་ཚད་མེད་བཞི་བསྒོམ། ཨོཾ་སྭ་བྷཱ་བ་སོགས་ཀྱིས་སྟོང་བར་སྦྱངས། སྟོང་པའི་ངང་ལས་རྡོ་རྗེའི་སྲུང་འཁོར་དབུས། །རིན་ཆེན་གཞལ་ཡས་མཚན་ཉིད་ཡོངས་སུ་རྫོགས། །ལྟེ་བར་སེང་ཁྲི་པད་ཟླའི་གདན་གྱི་སྟེང་། །ཨོཾ་ལས་འཁོར་ལོ་ཨོཾ་གྱིས་མཚན་པ་ལས། །འོད་འཕྲོས་འཕགས་མཆོད་དོན་བྱས་གདོན་བགེགས་རྣམས། །ཚར་བཅད་འདུས་ཏེ་ཡོངས་སུ་གྱུར་པ་ལས། །རང་ཉིད་གཞན་གྱིས་མི་ཐུབ་གཙུ་གཏོར་རྒྱལ། །གངས་རི་ལྟར་དཀར་དབུ་ཕྱག་ཞབས་སྟོང་ལྡན། །རྩ་ཞལ་གཉིས་བརྒྱ་ཞི་དང་སྙིང་རྗེ་དཀར། །གཡས་ཞལ་ཉིས་བརྒྱ་སྒེག་ཅིང་དཔའ་བ་སེར། །རྒྱབ་ཞལ་ཉིས་བརྒྱ་རྒོད་དང་དྲག་ཤུལ་དམར། །གཡོན་ཞལ་ཉིས་བརྒྱ་རྔམས་དང་སྣ་ཚོགས་ལྗང་། །སྟེང་ཞལ་ཉིས་བརྒྱ་མི་སྡུག་འཇིགས་རུང་སྔོ། །
ཞལ་རྣམས་བཞད་དང་ཁྲོ་སོགས་མ་ངེས་ཤིང་། །སྣ་ཚོགས་ཉམས་ལྡན་སྤྱན་མིག་གསུམ་གསུམ་མཚན། །ཕྱག་གཡས་དང་པོ་འཁོར་ལོ་སྐྱབས་སྦྱིན་རྒྱ། །འོག་མས་འཁོར་ལོ་རྡོ་རྗེ་རིན་པོ་ཆེ། །པདྨ་སྣ་ཚོགས་རྡོ་རྗེ་བརྒྱ་བརྒྱ་བསྣམས། །གཡོན་གྱི་དང་པོས་མདའ་དང་བཅས་པའི་གདུགས། །དཀར་པོ་རིན་ཆེན་ཏོག་གིས་སྤྲས་པ་འཛིན། །དེ་འོག་མདའ་གཞུ་ལྕགས་ཀྱུ་ཞགས་བ་དང་། །རལ་གྲི་འབར་བ་བརྒྱ་ཕྲག་རེ་རེ་འཆང་། །ཞབས་གཡས་ལྔ་བརྒྱ་བསྐུམས་པས་འཇིགས་པ་དང་། །གཡོན་པ་ལྔ་བརྒྱ་བརྐྱང་ཞིང་གདོན་ཀུན་མནན། །ལྷ་རྫས་གོས་དང་རིན་ཆེན་རྒྱན་ཆས་ཀླུབས། །ཟུར་བལྟས་བགྲང་དང་འཁྱུགས་སོགས་སྤྱན་བྱེ་བ། །བརྒྱ་སྟོང་མང་པོས་སྐུ་ཡི་ཆ་ཀུན་གཏམས། །སྤྱི་བོར་མེ་ལྕེ་འབར་བའི་མཚན་རྟགས་དང་། །སངས་རྒྱས་བྱེ་བ་ཕྲག་བདུན་ཅོད་པན་འཆང་། །འཕགས་མཆོད་སྡུག་བསྔལ་སྐྱོབ་ཅིང་མ་རུངས་པ། །ཟིལ་གྱིས་གནོན་པའི་འོད་ཟེར་འབྱམས་ཀླས་དབུས། །གདུག་པ་ཅན་རྣམས་ཚར་གཅོད་ཚུལ་དུ་བཞུགས། །རྡོ་རྗེ་ཡངས་བ་ཆེན་པོས་ས་གསུམ་གྱི། །དཀྱིལ་འཁོར་དབང་མཛད་སེམས་ཅན་ཐམས་ཅད་ཀུན། །འཇིགས་ལས་སྐྱོབ་པའི་བདག་ཉིད་ཆེན་མོར་གྱུར། །གནས་གསུམ་འབྲུ་གསུམ་ཐུགས་དབུས་ཟླ་སྟེང་ཨོཾ། །འོད་འཕྲོས་ཡེ་ཤེས་སེམས་དཔའ་སྤྱན་
དྲངས་ཐིམ། །བཛྲ་ས་མཱ་ཛཿ ཛཿཧཱུྃ་བཾ་ཧོཿ སླར་ཡང་འོད་འཕྲོས་དབང་ལྷ་སྤྱན་དྲངས་གྱུར། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། རིགས་ལྔས་བུམ་པའི་བདུད་རྩིས་དབང་བསྐུར་བས། །ལུས་གང་སྒྲིབ་དག་རྣམ་སྣང་དབུ་བརྒྱན་གྱུར། །ཨོཾ་སརྦ་ཏ་ཐཱ་ག་ཏ་ཨུཥྞཱི་ཥ་བཛྲ་ཨརྒྷཾ་ནས། ཤབྡ་པྲ་ཏིཙྪ་སྭཱ་ཧཱ། །སྐྱོབ་པ་ཤཱཀྱ་སེང་གེ་ཡི། །གཙུག་ཏོར་འོད་ཀྱི་འཕྲོ་འདུ་ལས། །འཁྲུངས་པའི་ལྷ་མོ་སྟོབས་ཆེན་མོ། །རིག་པའི་རྒྱལ་མོ་ཁྱོད་ཕྱག་འཚལ། །ཐུགས་སྲོག་མཐའ་བསྐོར་སྔགས་ཕྲེང་མུ་ཏིག་མདོག །འོད་འཕྲོས་འགྲོ་བའི་དོན་བྱས་ལས་བཞི་བསྒྲུབས། །སངས་རྒྱས་བྱང་སེམས་བྱིན་རླབས་ནུས་པ་བསྡུས། །རང་ཐིམ་མཐུ་སྟོབས་ཡེ་ཤེས་རྒྱས་པར་གྱུར། །ཏདྱ་ཐཱ། ཨོཾ་ཨ་ན་ལེ་ཨ་ན་ལེ། ཁས་མེ། ཁས་མེ། བཻར་བཻར། སཽ་མེ་སཽ་མེ། སརྦ་བུདྡྷ་ཨ་དྷིཥྛཱ་ན་ཨ་དྷིཥྛི་ཏེ་སརྦ་ཏ་ཐཱ་ག་ཏོཥྞཱི་ཥ་སི་ཏཱ་ཏ་པ་ཏྲེ་ཧཱུྃ་ཕཊ། ཧཱུྃ་མམ་ཧཱུྃ་ནི་སྭཱ་ཧཱ། ཞེས་བསྙེན་པའི་སྔགས་བཟླ་ཞིང་། བསྡུ་ན། ཨོཾ་སརྦ་ཏ་ཐཱ་ག་ཏོཥྞཱི་ཥ་ཧཱུྃ་ཕཊ། ཧཱུྃ་མ་མ་ཧཱུྃ་ནི་སྭཱ་ཧཱ། ཞེས་སྙིང་པོ་ཅི་འགྲུབ་བཟླའོ། །སྤྲོས་མེད་ཀྱི་བསྲུང་བ་བྱ་བར་འདོད་ན། ཕྱག་རྒྱ་བསྒོམས་ཤིང་རིག་སྔགས་བཟླས་པའི་བདེན་སྟོབས་ཀྱིས་བདག་དང་བསྲུང་བྱ་གདོན་དང་འཇིགས་པ་ཐམས་ཅད་ལས་བསྲུང་བར་མོས་ལ། བཅོམ་ལྡན་འདས་དེ་
བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་མོ་ཅན་རྡོ་རྗེ་གཙུག་ཏོར་ཕྱིར་ཟློག་པ་ཆེན་མོ། །ཕྱག་སྟོང་མངའ་བ་ཆེན་མོ། །དབུ་སྟོང་མངའ་བ་ཆེན་མོ། །སྤྱན་བྱེ་བ་བརྒྱ་སྟོང་མངའ་བ་ཆེན་མོ། །མི་ཕྱེད་འབར་བའི་མཚན་རྟགས་ཅན། རྡོ་རྗེ་ཡངས་པ་ཆེན་པོ་ས་གསུམ་གྱི་དཀྱིལ་འཁོར་ལ་མངའ་མཛད་པ་ཆེན་མོས་ཀུན་ནས་བདག་ཅག་འཁོར་དང་བཅས་པ་ལ་བསྲུང་དུ་གསོལ་ལོ། །འཇིགས་པ་དང་གདོན་ཐམས་ཅད་ལས་བདག་བདེ་ལེགས་སུ་གྱུར་ཅིག །རིམས་ལ་སོགས་པའི་ནད་ཐམས་ཅད་རབ་ཏུ་བསལ་དུ་གསོལ་ལོ། །རིག་པ་དང་ཕྱག་རྒྱའི་ཚོགས་ཐམས་ཅད་ཀྱིས་བདག་ལ་བསྲུང་དུ་གསོལ་ལོ། །ཏདྱ་ཐཱ། ཨོཾ་སརྦ་ཏ་ཐཱ་ག་ཏ་ཨོཾ་ཥྚྃ་བནྡྷ་བནྡྷ་མ་མ་རཀྵ་རཀྵ་སྭཱ་ཧཱ། །ཨོཾ་ཥྚྃ་བནྡྷ་བནྡྷ་བཛྲ་མ་མ་རཀྵ་རཀྵ་བཛྲ་པཱ་ི་ཧཱུྃ་ཕཊ་སྭཱ་ཧཱ། ཞེས་དང་། ནུས་ན། ཨོཾ་རྀ་ཥི་ག་་སོགས་ཀྱང་བཟླས་ལ། མཐར། སེམས་ཅན་གང་སུ་དག་བདག་ལ་གདུག་པ་དང་། དྲག་ཤུལ་དང་། སྡིག་པ་དང་། འཁྲུགས་པ་དང་། སྡང་བ་དང་། དེ་དག་གི་སེམས་དང་ལྡན་པ་རྣམས་བྱམས་པའི་སེམས་དང་ལྡན་པར་གྱུར་ནས་བདག་དང་སེམས་ཅན་ཐམས་ཅད་བསྲུང་དུ་གསོལ། ལོ་བརྒྱ་འཚོ་བར་གྱུར་ཅིག །སྟོན་བརྒྱ་མཐོང་བར་གྱུར་ཅིག །སྤྲོས་མེད་ཀྱི་ཟློག་པ་བྱ་འདོད་ན། སྐུ་ལས་མེ་མཚོན་ཁྲོ་བོའི་
ཚོགས་སྤྲོས་ཏེ། །མི་མཐུན་ཕྱོགས་ཀུན་གཟིར་ཟློག་བཅིང་བར་གྱུར། །བཅོམ་ལྡན་འདས་དེ་བཞིན་གཤེགས་པའི་གཙུག་ཏོར་ནས་བྱུང་བ་གདུགས་དཀར་མོ་ཅན་གཞན་གྱིས་མི་ཐུབ་པ་ཕྱིར་ཟློག་པ་ཆེན་མོའི་རིག་པ་དང་ཕྱག་རྒྱ་དང་སྔགས་ཀྱི་ཚོགས་ཀྱི་བདེན་པའི་སྟོབས་དང་གཟི་བརྗིད་ཀྱི་མཐུ་ཡིས་བདག་འཁོར་དང་བཅས་པ་ལ་སྡང་བ་དང་རྨི་ལམ་ངན་པ་དང་ལྟས་ངན་པ་དང་ནད་དང་དགྲ་དང་འཇིགས་པ་ཐམས་ཅད་ཕྱིར་ཟློག་པར་གྱུར་ཅིག །ལྷ་དང་། དྲང་སྲོང་དང་། རིག་སྔགས་འཆང་བ་དང་། གདོན་དང་། འབྱུང་པོ་དང་། མདོར་ན་འཇིག་རྟེན་དང་འཇིག་རྟེན་ལས་འདས་པ་གང་སུའང་རུང་གདུག་པའི་སེམས་ཀྱིས་བྱས་པའི་རིག་སྔགས་བཅད་དོ། །ཕུར་བུས་གདབ་བོ། །ཨོཾ་སརྦ་ཏ་ཐཱ་ག་ཏོཥྞཱི་ཥ་ཨ་ན་ལེ་ཨ་པ་ལོ་ཀི་ཏེ་ཙཱུརྞ་ཏེ་ཛོ་རཱ་སི་ཨོཾ་ཛྭ་ལ་ཛྭ་ལ། དྷ་ཀདྷ་ཀ །དྷ་ར་དྷ་ར། བི་དྷ་ར་བི་དྷ་ར། ཙྪིནྡ་ཙྪིནྡ བྷིནྡ་བྷིནྡ། ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཐུན་མཐར། སྣོད་བཅུད་འོད་ཞུ་རང་ཐིམ་བདག་ཉིད་ཀྱང་། །རིམ་འདུས་མི་དམིགས་ཆོས་ཀྱི་དབྱིངས་སུ་ཐིམ། །སླར་ཡང་གཟུགས་ཀྱི་སྐུར་གྱུར་གནས་གསུམ་དུ། །འབྲུ་གསུམ་ཡི་གེས་མཚན་པས་བསྲུང་བར་གྱུར། །འདི་བྱ་རྒྱུད་རང་ལུགས་ལྟར་ཉམས་སུ་ལེན་ན་བདག་བསྐྱེད་ཀྱི་ཡེ་ཤེས་པ་མཆོད་བསྟོད་ནོངས་པ་བཤགས་ནས་གཤེགས། དམ་ཚིག་པ་ཕྱག་གཉིས་
པའི་ང་རྒྱལ་གྱིས་སྤྱོད་ལམ་ལ་འཇུག་ཅིང་ཡི་གེ་གསུམ་གྱིས་བསྲུང་བ་བྱའོ། །གལ་ཏེ་གཏོར་མ་འབུལ་བར་འདོད་ན། དཀར་གསུམ་གཙང་མ་ལས་བྱས་པའི་གཏོར་མ་པདྨའི་སྙིང་པོ་ལྟ་བུ། སྭ་བྷཱ་བས་སྦྱངས། ཨོཾ་ཨཱཿཧཱུྃ། དང་། ཨོཾ་ཨ་ཀཱ་རོ་ལན་གསུམ་གྱིས་བྱིན་གྱིས་བརླབས་ལ། རང་གི་ཐུགས་ལས་འོད་ཟེར་འཕྲོས་པ་ཡིས། །བཅོམ་ལྡན་འདས་མ་གཙུག་ཏོར་གདུགས་དཀར་ཅན། །འཁོར་བཅས་མདུན་གྱི་ནམ་མཁར་སྤྱན་དྲངས་ཏེ། །གཏོར་མ་བདུད་རྩིའི་བཅུད་དྲངས་གསོལ་བར་གྱུར། །ཨོཾ་སརྦ་ཏ་ཐཱ་ག་ཏ་ཨུཥྞཱི་ཥ་སི་ཏཱ་ཏ་པ་ཏྲེ་ས་པ་རི་བཱ་ར་ན་མཿསརྦ་སོགས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་འབུལ། མཆོད་བསྟོད་གོང་ལྟར་དང་། བཅོམ་ལྡན་འཁོར་དང་བཅས་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་འདོད་པའི་ཕྲིན་ལས་བཅོལ་ཞིང་། ནོངས་པ་བཟོད་པར་གསོལ། ཨོཾ་བཛྲ་མུཿ ཞེས་གཤེགས་སུ་གསོལ་ལ་ཤིས་པ་བརྗོད་དོ། །སྲུང་ཟློག་ཀུན་ལས་མྱུར་ཞིང་སྟོབས་ཆེ་ལ། །ཕྱི་མ་བདེ་ཅན་ཞིང་དུ་འདྲེན་བྱེད་པ། །རིག་སྔགས་རྒྱལ་མོ་འདི་མཐུས་འདིར་འབད་ཀུན། །བདེན་གསུང་འབྲས་བུ་བསླུ་མེད་མངོན་གྱུར་ཅིག །ཅེས་པའང་སྒྲུབ་བརྩོན་རྣལ་འབྱོར་མཁྱེན་དཔྱོད་ལྡན་པ་ཀརྨ་མཐུ་སྟོབས་ནས་ཆེད་བསྐུལ་ངོར། ཀརྨ་ངག་དབང་ཡོན་ཏན་རྒྱ་མཚོས་དཔལ་སྤུངས་ཡང་ཁྲོད་རྡོ་རྗེ་ཐུགས་ཀྱི་མཁར་དུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།