འཇམ་དབྱངས་བླ་མེད་ལུགས་ཀྱི་བླ་མའི་རྣལ་འབྱོར།
འཇམ་དབྱངས་བླ་མེད་ལུགས་ཀྱི་བླ་མའི་རྣལ་འབྱོར་ཞེས་བྱ་བ་བཞུགས་སོ།། །།
ན་མོ་གུ་རུ་མཉྫུ་བཛྲཱ་ཡ། རྗེ་བཙུན་འཇམ་དབྱངས་རྒྱུད་ཀྱི་རྒྱལ་པོའི་ལུགས་ཀྱི་ཕྱི་སྒྲུབ་བླ་མའི་རྣལ་འབྱོར་ལྟར་བསྒོམ་བཟླས་བྱ་བར་འདོད་པས་ཐོག་མར་སྐྱབས་སེམས་ནི། བདག་སོགས་འགྲོ་ཀུན་བྱང་ཆུབ་བར། །རྗེ་བཙུན་བླ་མ་འཇམ་དཔལ་དབྱངས། །དཀོན་མཆོག་ཀུན་འདུས་བདག་ཉིད་ལ། །མི་ཕྱེད་གུས་པས་སྐྱབས་སུ་མཆི། །གཞན་དོན་སངས་རྒྱས་ཐོབ་བྱའི་ཕྱིར། །བླ་མ་འཇམ་དཔལ་དཔའ་བོ་ཡི། །རྣལ་འབྱོར་ཟབ་མོས་མཁྱེན་གཉིས་ཀྱི། །ཡེ་ཤེས་བསྒྲུབ་པར་སེམས་བསྐྱེད་དོ། །རྟེན་བསྐྱེད་པ་ནི། དབྱིངས་ཀྱི་ནམ་མཁར་ཡེ་ཤེས་འཇའ་ཚོན་འཁྲིགས། །རྣམ་དག་རོལ་པའི་མཆོད་སྤྲིན་རྒྱ་མཚོའི་དབུས། །ཆགས་བྲལ་པདྨ་ཐབས་ཤེས་ཉི་ཟླའི་སྟེང་། །ཟུང་འཇུག་དཔལ་ལྡན་བླ་མ་འཇམ་དཔལ་དབྱངས། །གསེར་གྱི་ལྷུན་པོར་མཚམས་སྤྲིན་འཁྱུད་པའི་མདངས། །ཞལ་གཅིག་ཕྱག་བཞི་དཀྱུས་རིང་འཛུམ་པའི་ཞལ། །མཐོན་མཐིང་ཟུར་ཕུད་ལྔ་ལྡན་ནོར་བུའི་ཏོག །རྩ་ཕྱག་རལ་གྲི་ཨུཏྤལ་གླེགས་བམ་བསྣམས། །འོག་མས་ཐབས་ཤེས་མདའ་གཞུ་གཡོན་ཏུ་འགེངས། །དར་དང་རིན་ཆེན་རྒྱན་སྤྲས་སྐྱིལ་ཀྲུང་བཞུགས། །པང་དུ་དབྱངས་ཅན་རེག་བྱ་རྡོ་རྗེ་མ། །སྔོ་ལྡང་ཞི་འཛུམ་མཛེས་ཤིང་སྒེག་པའི་ཉམས། །ཕྱག་གཉིས་པི་ཝྃ་ལྷ་ཡི་རེག་བྱ་བཅས། །ཡབ་ལ་འཁྱུད་ཅིང་ཞབས་གཉིས་རྐེད་ནས་འཁྲིལ། །
རྒྱན་ཆས་ཡབ་མཚུངས་འོད་ཀྱི་ཀློང་ན་བཞུགས། །བདེ་ཆེན་དགའ་བཞིའི་གཟི་མདངས་རབ་ཏུ་འབར། །འཁོར་ཚོགས་སྤྲུལ་པའི་སྤྲིན་ཕུང་བསམ་ཡས་འཕྲོ། །གནས་གསུམ་རྡོ་རྗེ་གསུམ་དུ་གདོད་ནས་གྲུབ། །ཐུགས་སྲོག་ཐབས་ཤེས་ཡིག་འབྲུའི་འོད་ཟེར་གྱིས། །རང་བཞིན་གནས་ནས་བཛྲ་ས་མཱ་ཛཿ། འཇམ་མགོན་བླ་མ་རྒྱལ་བ་སྲས་དང་བཅས། །དོན་གྱི་དབྱིངས་ལ་གཤེགས་བཞུགས་མི་མངའ་ཡང་། །མོས་པའི་ཡིད་ངོར་ཆུ་ཟླ་འཇའ་ཚོན་ལྟར། །ཐུགས་རྗེའི་རང་གཟུགས་ཅིར་ཡང་སྣང་བར་མཛོད། །ཆོས་དབྱིངས་རྒྱས་པར་གཏམས་པའི་ཞིང་དང་སྐུ། །དེ་སྙེད་བདག་སོགས་འགྲོ་བའི་ལུས་སྤྲུལ་ནས། །ཡན་ལག་འབུམ་ལྡན་བསྟོད་པའི་སྒྲ་དབྱངས་བཅས། །མི་ཕྱེད་གུས་པའི་ཡིད་ཀྱིས་ཕྱག་འཚལ་ལོ། །གཞན་དོན་བྱང་ཆུབ་སེམས་གཉིས་རབ་ཏུ་བཟུང་། །འཇམ་དཔལ་དཔའ་བོའི་རྣམ་ཐར་རྗེས་སུ་སློབ། །བཟང་པོ་སྤྱོད་པའི་སྨོན་ལམ་ལས་བྱུང་བའི། །མཆོད་པའི་སྤྲིན་ཆེན་བསམ་མི་ཁྱབ་པ་འབུལ། །བྱ་བྱེད་རང་བཞིན་མཁའ་ལྟར་རྣམ་དག་ཀྱང་། །གཟུང་འཛིན་དབང་གྱུར་ཀུན་འབྱུང་འཆིང་བས་བཅིངས། །གདོད་ནས་རང་གྲོལ་ངང་དུ་བཤགས་བགྱི་ན། །གཉིས་སུ་མེད་པའི་ཚངས་པ་སྩལ་དུ་གསོལ། །འཇམ་མགོན་ཡབ་ཡུམ་ཐབས་ཤེས་ཟུང་དུ་
འཇུག །འཁོར་འདས་ཆོས་རྣམས་ཁྱེད་ཀྱི་རང་བཞིན་ཏེ། །བདག་ཀྱང་དེ་བཞིན་ཉིད་དུ་དབྱིངས་གཅིག་པར། །སྡོམ་པའི་ཕུལ་ལ་མཆོག་ཏུ་ཡི་རང་ངོ། །བརྗོད་དུ་མེད་ཀྱང་བརྗོད་པ་ཀུན་གྱི་གཞི། །དོན་དམ་ཆོས་ཀྱི་འཁོར་ལོ་རྟག་ཏུ་གནས། །གདུལ་བྱའི་སྣང་ངོར་འཕེལ་འགྲིབས་མི་སྟོན་པར། །དུས་གསུམ་རྒྱུན་ཆད་མེད་པར་བསྐོར་བར་བསྐུལ། །གདོད་ནས་སྐྱེ་འགག་གནས་གསུམ་མཚན་མ་བྲལ། །མི་གནས་གནས་པ་ཆེན་པོ་རྡོ་རྗེའི་སྐུ། །རྟག་བརྟན་ཡོངས་གྲུབ་གཡུང་དྲུང་ནམ་མཁའི་དབྱིངས། །གཞན་དབང་ཀུན་བརྟགས་སྤྲིན་གྱིས་མི་སྒྲིབ་གསོལ། །ཆོས་ཁམས་གཤིས་ཀྱིས་བསྡུས་པའི་རྣམ་པར་དཀར། །སྲིད་དང་ཞི་བ་མཆིས་ཀུན་ཕྱམ་གཅིག་ཏུ། །བླ་མ་འཇམ་མགོན་ཡབ་ཡུམ་གོ་འཕང་དུ། །དམིགས་པ་མེད་པའི་ཚུལ་གྱིས་ཡོངས་སུ་བསྔོ། །དཔལ་ལྡན་བླ་མ་རིགས་རྣམས་ཀུན་གྱི་བདག །རྒྱལ་ཀུན་ཡེ་ཤེས་སེམས་དཔའ་འཇམ་པའི་དབྱངས། །སྒྲ་དབྱངས་ལྷ་མོ་རྒྱལ་ཀུན་སྐྱེད་པའི་ཡུམ། །རྣམ་གསུམ་དབྱེར་མེད་ངང་དུ་གསོལ་བ་འདེབས། །སངས་རྒྱས་ཀུན་གྱི་གསང་གསུམ་ཕྲིན་ལས་བཅས། །གཅིག་བསྡུས་འཇམ་མགོན་བླ་མ་ཡབ་ཡུམ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །མཁྱེན་གཉིས་ཡེ་ཤེས་རྒྱས་པར་མཛད་དུ་གསོལ། །
ཅེས་གསོལ་བ་ལན་མང་དུ་བཏབ་བས་ཐབས་ཤེས་ཟུང་འཇུག་གི་རང་བཞིན་དབྱངས་གསལ་སྙིང་པོའི་སྔགས་ཕྲེང་བྱུང་། སྣ་བུག་གཡས་གཡོན་དང་སྨིན་མཚམས་ནས་ཞུགས། སྙིང་དབུས་སུ་ཐིམ་པས་སྒྲིབ་གཉིས་དྲི་མ་སངས་གྱིས་དག །མཁྱེན་གཉིས་སྣང་བ་རབ་ཏུ་རྒྱས་པར་བསམས་ལ། ཨོཾ་ཧྲཱིཿདྷཱིཿམ་མེ་དཱྭི་པྃ་མཉྫུ་ཤྲཱི་མུཾ་ཧྲཱིཿཔྲཛྙཱ་བྷ་ནི་ཧྲཱིཿདྷཱིཿསྭཱ་ཧཱ། ཞེས་ཅི་ནུས་བཟླ། མཐར། ཨེ་མ་ཧོཿ གཞོན་ནུ་མཛེས་པའི་དཔའ་བོ་གེ་སར་ལས། །ལོགས་བྱུང་སྒྲིབ་གཉིས་སྐྱོན་བྲལ་གུར་གུམ་མདངས། །ཞལ་གཅིག་ཕྱག་བཞི་རལ་གྲི་གླེགས་བམ་དང་། །ཐབས་ཤེས་མདའ་གཞུ་འགེངས་པས་བདུད་དཔུང་འཇོམས། །རེག་བྱ་རྡོ་རྗེ་དབྱངས་ཅན་མ་རྒད་མདོག །བི་ཝཾ་དར་དཔྱངས་འཛིན་པས་བདེ་ཆེན་སྐུལ། །ཟུང་འཇུག་རང་བཞིན་རྗེ་བཙུན་བླ་མ་ཉིད། །ཐུགས་རྗེའི་དབང་གིས་འགྲོ་དོན་འདོད་རྒུར་སྒྱུར། །ཁྱེད་ལ་མཆོད་བསྟོད་སྐྱབས་གསོལ་བྱིན་རླབས་ཀྱིས། །སྒྲིབ་གཉིས་ཀུན་སངས་མཁྱེན་གཉིས་ཡེ་ཤེས་རྒྱས། །ཉིད་ཀྱི་རྣམ་པར་ཐར་དང་དབྱེར་མེད་མཛོད། །ཅེས་དང་། མཆོག་སྦྱིན་རྡོ་རྗེ་མཆོག་ཁྱོད་འདུད། །སོགས་འདུད་ཉི་ཤུས་བསྟོད། གང་ཚེ་བལྟ་བར་འདོད་པ་སོགས། ཕྱོགས་བཅུ་ནམ་མཁའི་སོགས། བདག་ཀྱང་འཇམ་དབྱངས་སོགས། བརྩེ་ལྡན་ཁྱོད་ཀྱི་སོགས་ཤློ་ཀ་རེ་རེ་བརྗོད། གནས་གསུམ་རྡོ་རྗེ་གསུམ་གྱི་ས་བོན་ལས། །སྐུ་དང་སྔགས་ཕྲེང་ཕྱག་མཚན་བདུད་རྩིའི་རྒྱུན། །དཔག་
མེད་འཕྲོས་ནས་རང་གི་གནས་གསུམ་ཐིམ། །སྒོ་གསུམ་སྒྲིབ་དག་དབང་ཐོབ་རྒྱུད་སྨིན་གྱུར། །སྦྱོར་མཚམས་བྱང་སེམས་རྒྱུན་བབས་ལུས་ཀུན་གང་། །བདེ་བས་ཐབས་བྱས་དོན་གྱི་འོད་གསལ་མཐོང་། །ཡབ་ཡུམ་འོད་ཞུ་རང་ལ་ཐིམ་པ་ཡིས། །ཐུགས་ཡིད་དབྱེར་མེད་གནས་ལུགས་ཕྱག་རྒྱ་ཆེ། །བློ་བྲལ་གཉུག་མ་ཁྱབ་གདལ་ཆེན་པོའོ། །དགེ་བ་འདི་དང་དུས་གསུམ་དགེ་ཅི་མཆིས། །བླ་མ་འཇམ་དཔལ་ཡབ་ཡུམ་རྣམ་པར་ཐར། །བདག་སོགས་མཁའ་ཁྱབ་འགྲོ་བས་མྱུར་འགྲུབ་སྟེ། ཁམས་གསུམ་འཁོར་བ་དོང་ནས་སྤྲུགས་ཕྱིར་བསྔོ། །འཇམ་མགོན་བླ་མའི་མཁྱེན་བརྩེའི་འོད་རྣོན་གྱིས། །བདག་གཞན་འགྲོ་བའི་སྙིང་གི་མུན་ཁང་བརྟོལ། །ཆགས་ཐོགས་མེད་པའི་ཡེ་ཤེས་སྣང་ཆེན་གྱིས། །སྲིད་ཞི་ཀུན་ཏུ་ཁྱབ་པའི་བཀྲ་ཤིས་ཤོག །ཅེས་པའང་དམ་པའི་རིགས་ཅན་དགེ་བའི་བློ་མངའ་ཀརྨ་མདོ་སྔགས་བསྟན་འཛིན་ནས་བསྐུལ་ངོར་ཤཱཀྱའི་དགེ་སྤྱོད་བློ་གྲོས་མཐའ་ཡས་ཀྱིས་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་བགྱིས་པ་དགེ་ལེགས་འཕེལ།། །།སརྦ་མངྒ་ལཾ།། །