ལྷ་དབང་བཀྲ་ཤིས་ལ་གནང་བའི་ཞལ་གདམས།
ལྷ་དབང་བཀྲ་ཤིས་ལ་གནང་བའི་ཞལ་གདམས་བཞུགས་སོ། །
གུ་རུ་པདྨར་བདག་སྐྱབས་མཆི། །བཀའ་བརྒྱུད་བླ་མས་བྱིན་གྱིས་རློབས། །དད་ལྡན་བློ་སྣ་ཆོས་ལ་སྒྱུར། །མི་ལྡོག་ཐར་པའི་ལམ་ཟིན་ཤོག །གངས་ཅན་མགོན་པོ་ཨ་ཏི་ཤས། །མང་པོའི་ནང་དུ་ངག་ལ་བརྟག །གཅིག་པུར་འདུག་ན་སེམས་ལ་བརྟག །ཅེས་པ་མདོར་བསྡུས་གཉིས་སུ་གསུངས། །ཡིད་ནི་ཉེས་པའི་རྩ་བ་སྟེ། ཁ་ནི་ཉེས་པ་འབྱུང་བའི་སྒོ། །དེ་ཕྱིར་འདི་གཉིས་རྟག་ཏུ་བསྲུང་། །འཁོར་འདས་ཐམས་ཅད་རང་གི་སེམས། །གཞན་ནས་རྡུལ་ཙམ་བྱུང་བ་མེད། །བདེ་སྡུག་བཟང་ངན་མཆོག་དམན་སོགས། །ཐམས་ཅད་སེམས་ཀྱི་རྟོག་པ་ཡིན། །རང་སེམས་དག་ན་སངས་རྒྱས་ཏེ། །གང་དུ་སྡོད་ཀྱང་དག་པའི་ཞིང་། །ཇི་ལྟར་བྱས་ཀྱང་
ཆོས་ཉིད་དང་། །གང་སྣང་ཡེ་ཤེས་རོལ་པའི་རྒྱན། །རང་གི་སེམས་ཉིད་མ་དག་ན། །སངས་རྒྱས་ཡིན་ཀྱང་སྐྱོན་དུ་མཐོང་། །ཕ་མ་ལ་ཡང་ཁོང་ཁྲོ་སྐྱེ། །སྣང་བ་ཕལ་ཆེར་དགྲ་རུ་ལང་། །རེ་དོགས་ཆགས་སྡང་རྒྱུན་མི་ཆད། །མི་ལོ་མི་ཉན་མི་ཚེ་ཟད། །སུ་དང་འགྲོགས་ཀྱང་མི་མཐུན་ལ། །གང་དུ་བསྡད་ཀྱང་བདེ་བ་མེད། །ཇི་ཙམ་ཡོད་ཀྱང་ཆོག་མི་ཤེས། །རེ་རེ་འཛོམ་ཡང་རེ་རེ་དགོས། །ཚེ་འདིའི་སྣང་བས་གཡེང་གཡེང་ནས། །ཆོས་བྱ་སྙམ་ཡིད་ལ་དྲན་ན་ཡང་། །ད་བྱེད་ངང་དུ་མི་ཚེ་ཟད། །ངེས་འབྱུང་སོ་མ་སྐྱེ་བའི་སྐབས། །ཡོད་ཚད་ལིང་བོར་ཐུབ་ཐུབ་འདྲ། །འཁྲེབ་ནས་ཁབ་ལའང་སེར་སྣ་སྐྱེ། །མོས་གུས་གསར་པ་སྐྱེ་བའི་
ཚེ། །བླ་མ་དེ་ལས་གཞན་མི་དྲན། །ཡུན་རིང་སོང་ནས་ལོག་ལྟ་སྐྱེ། །དད་པ་གསར་པའི་སྐབས་སུ་ནི། །དགེ་སྦྱོར་གཅིག་ཐོག་གཉིས་པ་བསྣུན། །རྒས་ནས་ཐམས་ཅད་དབྱིངས་སུ་ཡལ། །མཐུན་གྲོགས་གསར་པ་རྙེད་པའི་དུས། །རང་ལས་དེ་ཡི་ལུས་སྲོག་གཅེས། །ཨ་གསར་ཡལ་ནས་དགྲ་རུ་ལྡང་། །དེ་དག་ཐམས་ཅད་རྩ་བ་ནི། །རང་སེམས་ཚེ་མ་ཟིན་པས་ལེན། །རང་སེམས་བཀོལ་དུ་བཏུབ་པ་ན། །དབེན་གནས་གཞན་ཏུ་ཚོལ་མི་དགོས། །རྣམ་རྟོག་མེད་ན་དབེན་པ་ཡིན། །བླ་མ་ཕྱི་རུ་ཚོལ་མི་དགོས། །སེམས་ཉིད་བླ་མ་སངས་རྒྱས་ཡིན། །དགེ་སྦྱོར་ཐོན་ལུས་དོགས་མི་དགོས། །ཡེངས་མེད་དགེ་སྦྱོར་སྙིང་པོ་ཡིན། །གཡེང་བ་ཆེད་དུ་སྤང་མི་དགོས། །དྲན་ཤེས་བརྟེན་ན་རང་གྲོལ་ཡིན། །ཉོན་མོངས་སྐྱེ་དོགས་སྐྲག་མི་དགོས། །རང་ངོ་ཟིན་ན་ཡེ་ཤེས་ཡིན། །རང་སེམས་སྐད་ཅིག་མ་འདི་ལས། །འཁོར་འདས་གཞན་དུ་མ་གྲུབ་པས། །རྟག་ཏུ་སེམས་ལ་བྱ་ར་འཚལ། །རང་སེམས་ནང་དུ་མ་ཐུལ་ན། །ཕྱི་རོལ་དགྲ་ལ་ཟད་པ་མེད། །ནང་དུ་ཁོང་ཁྲོ་ཐུལ་བ་ན། །ས་སྟེང་དགྲ་བོ་ཐམས་ཅད་ཞི། །སེམས་ལ་ཆོག་ཤེས་མ་སྐྱེ་ན། །འདོད་རྒུ་འཛོམ་ཡང་སྤྲང་པོ་འདྲ། །ཞེན་ལོག་ཆོག་ཤེས་ཅན་གྱི་མི། །ཟང་ཟིང་མེད་ཀྱང་རྟག་ཏུ་ཕྱུག །འཇིག་རྟེན་བྱ་བ་ལེགས་པ་དང་། །ཆོས་དང་དགེ་བ་སྒྲུབ་པའི་ཚེ། །
སེམས་ལ་དགའ་བ་སྐྱེ་བ་ཡི། །བག་ཆགས་དེ་ཡིས་མཐོ་རིས་སྐྱེ། །དེ་ཡང་མི་རྟག་འཁོར་བ་ཡིན། །དགའ་བའི་ངོ་བོར་བལྟས་པ་ན། །སྟོང་པར་མཐོང་དེ་ཐར་ལམ་རྒྱུ། །ཆོས་དང་འཇིག་རྟེན་བྱ་བ་རྣམས། །མ་ལེགས་སྡུག་བསྔལ་བྱུང་བ་དང་། །ཁོང་ཁྲོ་ཞེ་སྡང་འདོད་ཆགས་སོགས། །ཉོན་མོངས་རྟོག་པའི་རྗེས་འབྲང་ན། །ངན་སོང་གསུམ་དུ་སྐྱེ་བའི་རྒྱུ། །དེར་སྐྱེས་སྡུག་བསྔལ་བསམ་མི་ཁྱབ། །ཉོན་མོངས་སྡུག་བསྔལ་གང་སྐྱེས་ཀྱང་། །རང་ངོར་བལྟས་པས་སྟོང་པར་ཡལ། །དེ་ལས་ཡེ་ཤེས་ལོག་ན་མེད། །རང་སེམས་འདི་དང་མི་འབྲལ་བས། །རྟག་ཏུ་རང་སེམས་བསྲུང་བ་གཅེས། །སེམས་སྲུང་བ་ལ་ཆོས་ཀུན་འདུས། །སྲུང་ཚུལ་རྒྱལ་སྲས་ཞི་བ་ལྷས། །སེམས་སྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དག །ཐམས་ཅད་འབད་པས་སྲུངས་ཤིག་ཅེས། །བདག་ནི་དེ་ལྟར་ཐལ་མོ་སྦྱོར། །ཅེས་གསུངས་བཞིན་དུ་ཉམས་ལེན་གཅེས། །དེ་ཕྱིར་ཚོགས་དྲུག་ཡུལ་སྣང་ཀུན། །སེམས་ཉིད་གཅིག་པུའི་ཆོ་འཕྲུལ་ཏེ། །སྤང་བླང་བྱེད་ན་བྱེད་མཁན་འཁྲུལ། །རོ་སྙོམས་ལམ་ཁྱེར་མཆོག་ཡིན་ཀྱང་། །ལས་དང་པོ་ཡི་གང་ཟག་གི། །ལྟ་བ་མཐོ་ལ་སྤྱོད་པ་ཞིབ། །མི་ལུས་དལ་འབྱོར་རྙེད་དཀའ་ཞེས། །འཆི་བ་མི་རྟག་ཡང་ཡང་བསམ། །ལས་འབྲས་བསླུ་མེད་ངེས་ཤེས་བསྐྱེད། །
གཞན་དག་ཤི་བ་མཐོང་ཐོས་ཚེ། །རང་ལ་བརྡ་བསྟོན་ཤེས་པར་མཛོད། །དབྱར་དགུན་འགྱུར་བ་མཐོང་བའི་ཚེ། །ཐམས་ཅད་མི་རྟག་དྲན་པར་མཛོད། །སྦྲང་དང་སྦྲང་རྩི་མཐོང་བའི་ཚེ། །ནོར་རྫས་དགོས་མེད་ཤེས་པར་མཛོད། ཁང་ཞིག་གྲོང་སྟོང་མཐོང་བའི་ཚེ། །སྡོད་གནས་ཁང་ཁྱིམ་ཤེས་པར་མཛོད། །གཞན་དག་མཛའ་བ་བྲལ་མཐོང་ཚེ། །རང་གི་ཉེ་མཇའ་དྲན་པར་མཛོད། །གཞན་ལ་མི་འདོད་གློ་བུར་ཚེ། །རང་ལའང་འབྱུང་བ་དྲན་པར་མཛོད། །རང་གཞན་ཐམས་ཅད་རྨི་ལམ་ལྟར། །བདེན་པར་གྲུབ་པ་རྡུལ་ཙམ་མེད། །རང་སེམས་བཟོ་བཅོས་མ་བསླད་པར། །གཉུག་མའི་རང་ངོ་བསྐྱང་པའི་ཚེ། །ཕྱི་ནང་ཆོས་ཀུན་སྟོང་པ་ཉིད། །གསལ་སྟོང་ཟུང་འཇུག་མཁའ་ལྟར་རྟོགས། །དེ་ནི་དོན་དམ་བྱང་སེམས་ཡིན། །དེ་ལྟར་མ་ཤེས་འགྲོ་བ་རྣམས། །གཟུང་འཛིན་དབང་གིས་འཁོར་བར་འཁྱམས། །སྡུག་བསྔལ་མྱོང་ལ་ཚད་མེད་པའི། །སྙིང་རྗེ་བཅོས་མིན་ཤུགས་ལ་སྐྱེ། །དེ་ནི་ཀུན་རྫོབ་བྱང་སེམས་ཡིན། །སྙིང་རྗེ་འཛིན་མེད་སྟོང་པར་རྟོགས། །སྟོང་པའི་རང་རྩལ་སྙིང་རྗེ་ཤར། །ཟུང་འཇུག་མདོ་སྔགས་ཆོས་ཀྱི་སྙིང་། །ཉམས་ལེན་ཕུག་པོ་འདི་ལ་མཛོད། །དེ་དག་རྒྱུད་ལ་སྐྱེ་བའི་ཐབས། །ཚོགས་བསགས་ལག་ཏུ་གང་ཐེབས་བྱ། །དཀོན་མཆོག་གསུམ་ལ་གསོལ་བ་གདབ། །བླ་མའི་མོས་གུས་གནད་དུ་བསྣུན། །རང་གཞན་སྡིག་ལས་ལྡོག་པ་དང་། །
ཅི་ནུས་དགེ་བའི་ལས་ལ་བསྐུལ། །ཐེག་པ་ཆེན་པོའི་སེམས་བསྐྱེད་དང་། །རྣམ་དག་བསྔོ་བ་འབྲལ་མི་བྱ། །དགེ་བློ་ཡར་ཟླའི་དཔལ་ཡོན་ཅན། །དེ་བེནྡྲ་ཡི་གསལ་འདེབས་སུ། །དགེ་སྦྱོང་བློ་གྲོས་མཐའ་ཡས་ཞེས། །རྒན་པོ་འདུ་གསུམ་པ་ཡིས་བྲིས། །ཆེ་དང་ཆོས་སྒྲུབ་མཐར་ཕྱིན་ཅིང་། །དོན་གཉིས་ལྷུན་གྱིས་གྲུབ་པར་ཤོག །སརྦ་སིདྡྷི་རསྟུ་མངྒ་ལཾ།