ཉམས་མགུར།
ན་མོ་གུ་རུ་བྷྱཿ །གངས་ཅན་བླ་མའི་སྐལ་པ་པདྨ་འབྱུང་། །ཁྱད་པར་ང་ཡི་སྐྱབས་གཅིག་མཚོ་སྐྱེས་རྗེ། །དབྱེར་མེད་དཔལ་ལྡན་བླ་མ་རིན་པོ་ཆེར། །སྙིང་ནས་གསོལ་བ་འདེབས་སོ་བྱིན་གྱིས་རློབས། །རྗེས་འཇུག་རྣལ་འབྱོར་ཕྱི་ཞིག་ནང་སྟོང་ངས། །མགོན་ཁྱོད་སྐྱབས་སུ་བསྙེན་པའི་བཀའ་དྲིན་ལས། །སྐད་སྙན་མེད་ཀྱང་གླུ་ཞིག་ལེན་སྙིང་འདོད། །སྦོབས་པ་དམན་ཀྱང་འཕྱོར་ཅིག་སྒྲོགས་སྙིང་འདོད། །རྣལ་འབྱོར་ང་ལ་ང་གཅིག་མི་ཟེར་ཏེ། །ཅོལ་ཆུང་ང་ནི་མཚན་ལྡན་བླ་མའི་བུ། །གཅིག་ཤེས་ཀུན་ལ་གྲོལ་བས་ནམ་མཁའ་འདྲ། །ཡང་དག་གཏུགས་ན་ཁབ་མིག་བཞིན་དུ་དོགས། །རིག་འཛིན་ང་ལང་ཅིག་མི་ཟེར་ཏེ། །སྔགས་འཆང་ང་ནི་ཨོ་རྒྱན་པདྨའི་རིགས། །ཡིན་རྟགས་ཤུགས་འབྱུང་བསྟན་དུས་གྲུབ་ཐོབ་འདྲ། །ཡང་དག་གཏུགས་ན་ནུས་མེད་ཐ་མལ་པ། །འཁྲུལ་ཞིག་ང་ལ་ང་ཅིག་མི་ཟེར་ཏེ། །ཅོལ་ཆུང་ང་ནི་སྒྲུབ་བརྒྱུད་བརྒྱད་སྲོལ་སྐྱོང་། །གང་ཡང་གཟའ་གཏད་མེད་པས་སྨྱོན་པ་འདྲ། །ཡང་དག་གཏུགས་ན་ཕ་ཝཾ་ལས་ཀྱང་ལྗིག །རྟོགས་ལྡན་ང་ལང་ཅིག་མི་ཟེར་ཏེ། །བླུན་སྒོ་མང་ནི་དྭགས་ཤངས་བཀའ་བརྒྱུད་པ། །བཟོ་མེད་གཉུག་མ་སྐྱོང་བས་གླེན་པ་འདྲ། །ཡང་དག་གཏུགས་ན་སྒོམ་པ་དབྱིངས་སུ་སྟོར། །བླ་མ་ང་ལ་ང་ཅིག་མི་ཟེར་ཏེ། །སེར་གཟུགས་ང་ནི་མཁས་གྲུབ་མང་པོའི་སྲས། །
མང་ཐོས་ལག་ལེན་བཏབ་པས་ཚོང་དཔོན་འདྲ། །ཡང་དག་གཏུགས་ན་བྱར་མེད་ནམ་མཁའི་ཀློང་། །དེ་རིང་ཁོག་ཏུ་མ་བསྐྱིལ་ཁ་ལ་གྱེར། ཁ་ལ་གྱེར་ཡང་གཏིང་ལ་ཅི་ཡང་མེད། །མེད་པའི་དབྱིངས་སུ་ཆོས་ཀུན་འུབ་ཀྱིས་རྫོགས། །འོད་གསལ་ཐིག་ལེ་ཆེན་པོར་ཕྱམ་བདལ་ལོ། །ཆོས་ཀུན་གདོད་ནས་མ་སྐྱེས་སྟོང་པ་ཉིད། །གར་ཡང་མི་འགག་ཅིར་ཡང་གནས་པ་མེད། །སྣང་ཙམ་མ་འགགས་རྟེན་ཅིང་འབྲེལ་འབྱུང་ཚུལ། །རྣལ་འབྱོར་ང་ཡི་ལྟ་བ་རང་སྟོང་ཡིན། །བརྗོད་དུ་མེད་ཀྱང་བརྗོད་པ་ཀུན་གྱི་གཞི། །འོད་གསལ་རང་བཞིན་འཁོར་འདས་ཀུན་ལ་ཁྱབ། །བརྟག་པས་མི་མཚོན་དཔྱད་པའི་བློས་མི་རེག །རྣལ་འབྱོར་ང་ཡི་སྒོམ་པ་གཞན་སྟོང་ཡིན། །རྟོག་པ་གློ་རྔེག་གང་དྲན་ཐད་ཀར་སྤྱོད། །འདོད་ཡོན་ལམ་ཁྱེར་རེ་དོགས་མཐའ་གཉིས་བཅད། །གཟུང་འཛིན་མདུད་པས་དབུ་མའི་དབྱིངས་སུ་གཞི་ལ། །རྣལ་འབྱོར་ང་ཡི་སྤྱོད་པ་ཞི་གཅོད་ཡིན། །མ་བཅོས་ཐ་མལ་ཤེས་པ་སྐད་ཅིག་མ། །རྟོགས་གྲོལ་དུས་མཉམ་གང་ཤར་ཆོས་ཀྱི་སྐུ། །ཡེངས་མེད་སྒོམ་མེད་རང་བབ་གཉུག་མའི་འགྲོས། །རྣལ་འབྱོར་ང་ཡི་ཉམས་ལེན་ཕྱག་ཆེན་ཡིན། །ཡེ་ནས་འཁྲུལ་མ་མྱོང་བས་གྲོལ་རྒྱུ་མེད། །སྟོང་གསལ་ཟུང་འཇུག་སྐུ་གསུམ་གཤིས་ལ་རྫོགས། །སེམས་ཀྱི་གོས་བྲལ་རིག་སྟོང་རྗེན་པའི་ངང་། །རྣལ་འབྱོར་ང་ཡི་སྙིང་ཐིག་རྫོགས་ཆེན་ཡིན། །
ཀ་དག་དབྱིངས་ཀྱི་རང་བཞིན་ཡངས་པ་ཆེ། །ཀློང་ཡངས་ནམ་མཁའ་གཞི་མེད་རྩ་བ་བྲལ། །ཕྱོགས་སུ་མ་ལྷུང་གར་ཡང་རྒྱ་མ་ཆད། །རྣལ་འབྱོར་ང་ནི་རང་སྣང་རིས་མེད་ངང་། །རང་བྱུང་རིག་པའི་རྒྱལ་པོ་བདལ་ས་ཆེ། །ཐིག་ལེ་བདལ་བས་མཐའ་དབུས་མེད་པར་ཁྱབ། །དགག་ཏུ་མེད་ཅིང་བསྒྲུབ་བྱར་ཙམ་མ་མཆིས། །རྣལ་འབྱོར་ང་ཡི་རིག་པ་རང་སར་གྲོལ། །གནས་ལུགས་གང་ཡང་དབྱིངས་ལས་གཡོས་པ་མེད། །སྣང་ལུགས་ཐམས་ཅད་རིག་པའི་རྩལ་དུ་ཤར། །ཡིན་ལུགས་ཤེས་ན་ཀུན་ཀྱང་དེ་བཞིན་ཉིད། །རྣལ་འབྱོར་རྟོགས་ཚོགས་དབྱིངས་ཀྱི་རྒྱན་དུ་རྫོགས། །འཁོར་འདས་སྣང་བ་མ་སྐྱེས་གཉུག་མའི་ངང་། །ཟང་ཐལ་རིག་པ་འགག་མེད་འོད་དུ་གསལ། །ཟུང་འཇུག་གང་ཡང་ཡིན་ལ་ཅིར་ཡང་མིན། །རྣལ་འབྱོར་གནས་ལུགས་ཅོག་བཞག་ཀློང་དུ་བདེ། །རང་རིག་ཡེ་ཤེས་ཀུན་ཁྱབ་འོད་དུ་གསལ། །ལེགས་པར་སྨིན་པས་རང་སྣང་ལྷ་སྐུར་ཤར། །གདོད་མའི་དབྱིངས་སུ་འཁྲུལ་པ་བཙན་ཐབས་སངས། །རྣལ་འབྱོར་གཅེར་མཐོང་ཀློང་དུ་གཏད་མེད་གྲོལ། །སུས་ཀྱང་མ་བཅིངས་ཅིས་ཀྱང་བཀྲོལ་བ་མེད། །སོར་བཞག་རྒྱལ་པོ་ཡེ་བབས་ལྷུན་འབྱམས་ངང་། །གཏད་མེད་ངང་དུ་བྱར་མེད་གཉིད་ལོག་པས། །རྣལ་འབྱོར་དྲན་པའི་བརྟོད་ཕུར་དབྱིངས་སུ་སྟོར། །འཇུར་བུའི་
མདུད་པ་རང་བབ་ངང་དུ་གྲོལ། །དྲན་པའི་དམིགས་གཏད་ཆོས་ཉིད་དབྱིངས་སུ་ཞིག །ཀློང་ཡངས་ཆེན་པོར་ཡེ་ཤེས་ཕྱམ་བདལ་བས། །རྣལ་འབྱོར་སེམས་ལ་རྩིས་གདབ་གང་ཡང་མེད། །ཡུལ་སྣང་འདོད་ཡོན་ལྔ་ཡི་དགའ་མ་ལ། །རང་གྲོལ་རིག་པའི་སྐྱེས་བུས་རྟག་ཏུ་འཁྱུད། །བླང་དོར་གཉིས་མེད་བདེ་བ་ཆེན་པོར་འབྱམས། །རྣལ་འབྱོར་ཐབས་ཀྱི་ལམ་ལས་རྣམ་པར་གྲོལ། །ལྟ་བས་མ་བསླད་སྒོམ་པའི་འཆིང་བ་བྲལ། །སྤྱོད་པས་མ་བཅོས་གནས་ལུགས་གདོད་མའི་གཤིས། །ནམ་མཁའི་ཀློང་དུ་རྟོག་པའི་སྤྲིན་རིས་ཡལ། །རྣལ་འབྱོར་གཉེར་ཁ་མེད་པས་ཅི་བྱས་བདེ། །གཞི་ལམ་འབྲས་བུའི་མཚན་འཛིན་རི་བོང་རྭ། །ཆོས་དང་ཆོས་ཅན་རྣམ་འབྱེད་མོ་གཤམ་བུ། །འཁྲུལ་གྲོལ་སྤང་གཉེན་ནམ་མཁའི་པདྨོ་བཞིན། །རྣལ་འབྱོར་ལྟ་བ་མེད་པའི་དབྱིངས་སུ་རྫོགས། །རིག་པའི་ཡེ་ཤེས་རྒྱར་ཆད་ཕྱོགས་ལྷུང་བྲལ། །བརྟན་གཡོ་འཁོར་འདས་ཀུན་ལ་མཁའ་ལྟར་ཁྱབ། །ལྷུན་འབྱམས་བདལ་ས་ཆོས་ཉིད་ཡངས་པ་ཆེ། །རྣལ་འབྱོར་སྒོམ་པ་ཕྱལ་པའི་དབྱིངས་སུ་རྫོགས། །དགག་སྒྲུབ་རྟོག་པ་ཀ་དག་ཆེན་པོའི་ངང་། །བྱ་རྩོལ་མཚན་མ་སྨྲ་བསམ་བརྗོད་བྲལ་ཀློང་། །འོད་གསལ་ཐིག་ལེ་ཉག་གཅིག་འུབ་ཆུབ་པས། །རྣལ་འབྱོར་སྤྱོད་པ་གཅིག་པུའི་དབྱིངས་སུ་རྫོགས། །འཁོར་བ་མ་སྤངས་ཅིར་སྣབ་རྒྱལ་བའི་ཞིང་། །མྱང་འདས་མ་བཙལ་ཐམས་ཅད་
གཞི་ལ་རྫོགས། །རྩེ་མོ་བྱུང་རྒྱལ་གྲོལ་སར་ངང་གིས་སྙེགས། །རྣལ་འབྱོར་འབྲས་བུ་ལྷུན་གྲུབ་དབྱིངས་སུ་རྫོགས། །དང་པོ་འདུ་བྱེད་རྟོག་པས་ལྷ་སྐུ་བཅོས། །བར་དུ་རང་གསལ་མ་འགགས་ལྷག་གེར་ཤར། །ཐ་མ་ཅིར་སྣང་རང་བྱུང་ལྷ་རུ་ཤེས། །རྣལ་འབྱོར་སྤྲོས་བཅས་བསྐྱེད་པའི་རིམ་པ་ཡིན། །དང་པོ་གོ་བའི་སྟོང་ཉིད་བློ་ཕུག་གཏད། །བར་དུ་བྱིན་རླབས་ལས་འཕྲོས་རང་ཞལ་མཐོང་། །ཐ་མ་དབྱིངས་ལས་རིག་པའི་ཡེ་ཤེས་སད། །རྣལ་འབྱོར་སྤྲོས་མེད་རྫོགས་པའི་རིམ་པ་ཡིན། །སྣང་བའི་ངོ་བོ་གཤིས་ལུགས་བབས་ཀྱིས་སྟོང་། །སྟོང་པའི་རང་མདངས་མ་འགགས་ཅིར་ཡང་སྣང་། །རྒྱས་གདབ་མི་དགོས་གདོད་ནས་ལྷུན་གྱིས་གྲུབ། །རྣལ་འབྱོར་བསྐྱེད་རྫོགས་ཟུང་འཇུག་ཉམས་ལེན་ཡིན། །སོ་ཐར་སྤྱོད་དུས་མངོན་ལྐོག་ཁྱད་པར་ཆེ། །བྱང་སེམས་བསླབ་དུས་རང་ཉིད་ཉམས་ཀྱིས་དོགས། །སྔགས་དུས་ཕྱི་ནང་དཀྱིལ་འཁོར་གསུམ་དང་བྲལ། །རྣལ་འབྱོར་སྡོམ་གསུམ་ལྡན་པའི་རྣམ་ཐར་ཡིན། །རང་དོན་ཞེ་ལ་བཞག་ནས་ཆོས་གཟུགས་བྱས། །གཞན་དོན་མི་འགྲུབ་བཞིན་དུ་དཀོར་ནག་ཟོས། །ནམ་ཕུག་སྙིང་པོ་མེད་ཀྱང་བྱ་བྱེད་མང་། །རྣལ་འབྱོར་རང་མགོ་རང་གཡོགས་གྱ་མ་དོ། །བསླབ་ཤེས་མང་ཡང་མཁས་པའི་ལག་རྗེས་ཆུང་། །མཚམས་སྒྲུབ་བྱས་
ཀྱང་གྲུབ་པའི་རྩལ་མ་རྫོགས། །འཆད་ཉན་མང་ཡང་བརྒྱུད་འཛིན་སློབ་མ་དཀོན། །རྣལ་འབྱོར་ཅི་བྱས་ཅང་མེད་ཡུག་ས་རྐྱང་། །རྟོགས་པའི་གདིང་གིས་རྐྱེན་ངན་སྟོབས་མི་ཆོམས། །རིག་པའི་རྩལ་གྱིས་བརྟུལ་ཞུགས་སྤྱོད་མི་ནུས། །དགོངས་པའི་སྟོབས་ཀྱིས་འཁྲུལ་སྣང་ཟིལ་མི་ནོན། །རྣལ་འབྱོར་རྒྱལ་པོ་ལྟ་བ་ཁ་ཁྱེར་ལགས། །མཁས་པའི་ཁོག་པ་ཐ་སྙད་ཚྭ་ཆུས་སྦོས། །གྲུབ་པའི་སྤྱོད་པ་ཁྱི་ཕག་རྗེས་སུ་འབྲང་། །བཙུན་པ་ཚུལ་ཁྲིམས་མཆོག་འཛིན་ལམ་དུ་ཁྱེར། །སྙིགས་དུས་བདག་འདྲའི་ངང་ཚུལ་བཤད་ཅི་འཚལ། །བཤད་ལུགས་བལྟས་ན་སུ་ཡང་སངས་རྒྱས་དངོས། །བྱེད་ལུགས་བལྟས་ན་ཐམས་ཅད་སེམས་ཅན་ཉིད། །ང་དང་ང་འདྲ་རྣམས་ལ་ཅི་ཞིག་སྨོས། །བརྗོད་མེད་དབྱིངས་སུ་གྲོལ་བའི་བཀྲ་ཤིས་ཤོག །མིང་མ་ཡིན་དོན་གྱི་ཀུན་སྤོང་བ །དད་དམ་ལྡན་འཇམ་དབྱངས་དགེ་ལེགས་གང་། །འཕྲལ་འཁོར་བ་སྤངས་ནས་ཆོས་སྒོར་ཞུགས། །ཚིག་ཐ་སྙད་མ་སྦྱངས་སྒྲུབ་ལ་བརྩོན། །སེམས་བླུན་སྒོམ་མ་བྱས་སྒྲོ་འདོགས་བཅད། །རྒྱུ་བསགས་སྦྱངས་རིམ་པ་མཐའ་རུ་ཕྱིན། །རྐྱེན་བླ་མ་ཡི་དམ་བྱིན་རླབས་ཀྱིས། །དོན་རྟོགས་པའི་རང་ཞལ་མཇལ་བ་ཡི། །མགྲོན་དགའ་སྟོན་ཟང་ཟིང་མི་འདུག་ཀྱང་། །ཐུགས་བཞེད་བཞིན་པདྨ་གར་དབང་པས། །གནས་བདེ་གཤེགས་འདུས་པའི་རྫོང་ཤོང་དུ། །
ཚིག་ངས་མེད་དོ་ཧས་རང་མཚངས་ཕུད། །གླུ་འབྲེལ་མེད་རང་བྱུང་སྨྲས་པ་ཡིས། །དེང་ཕྱིན་ཆད་རྟོགས་པའི་ཡེ་ཤེས་ནི། །དཔལ་ཡར་ངོའི་ཟླ་བཞིན་གོང་དུ་འཕེལ། །གཞི་ཐོག་ཏུ་དགོངས་པའི་རྩལ་རྫོགས་ཤོག །མངྒ་ལཾ།། ༈ །།གཞི་མེད་ཀློང་གྲོལ་བླ་མ་ཀུན་ཏུ་བཟང་། །རང་རིག་ངོ་བོར་འབྲལ་མེད་གསོལ་བ་འདེབས། །བདག་དང་རིགས་དྲུག་འཁོར་བའི་སེམས་ཅན་རྣམས། །གཞི་མེད་ཀློང་དུ་གྲོལ་བར་བྱིན་གྱིས་རློབས། །འཁོར་འདས་ལམ་གསུམ་ཀུན་ཏུ་བརྟགས་པའི་ཆོས། །སྟོང་པའི་དབྱིངས་ལས་གསལ་བའི་རིག་རྩལ་དུ། །ཤར་ཡང་མཁའ་ལ་འབྱུང་བཞིའི་འདུ་འགོད་ལྟར། །གདོད་མ་ཉིད་ནས་གཞི་མེད་ཀློང་གྲོལ་ལོ། །ཕུང་པོ་ལྔས་བསྡུས་འཁོར་བའི་ཆོས་རྣམས་དང་། །སྐུ་དང་ཞིང་ཁམས་མྱང་འདས་འཛིན་པ་ཡང་། །རྟོག་འཁྲུལ་སྔགས་ཀྱིས་བསླད་པའི་གཉིས་སྣང་སྟེ། །སྒྱུ་མ་ལྟ་བུར་གཞི་མེད་ཀློང་གྲོལ་ལོ། །ཡེ་གཞིའི་གཤིས་ལ་ཅིར་ཡང་གྲུབ་པ་མེད། །བདག་ཏུ་རྟོག་ལས་རང་མདངས་གཞན་ཏུ་སྣང་། །སྣང་ཡང་བདེན་པར་མ་གྲུབ་དྲི་ཟ་ཡི། །གྲོང་ཁྱེར་ལྟ་བུར་གཞི་མེད་ཀློང་གྲོལ་ལོ། །དབྱིངས་ལས་རིག་རྩལ་གཡོས་པའི་སྐད་ཅིག་མར། །གཉིས་འཛིན་སེམས་ཀྱི་རྟེན་འབྲེལ་ལུ་གུ་བརྒྱུད། །འབྱུང་ལྡོག་སྤེལ་མ་འདི་ཡང་འཇའ་ཚོན་ནི། །ཆུ་ཟླ་ལྟ་བུར་གཞི་མེད་ཀློང་གྲོལ་
ལོ། །སྐྱེ་བཞི་ལམ་རྒྱུད་ལྔས་བསྡུས་འཁོར་བ་པ། །དོན་གྱི་དབྱིངས་ལ་གསལ་འགྲིབ་མེད་བཞིན་ཏུ། །བདག་འཛིན་ནད་ཀྱིས་བསྒྲིབས་པས་ལོག་པར་མཐོང་། །མིག་གཡོར་ལྟ་བུར་གཞི་མེད་ཀློང་གྲོལ་ལོ། །བདག་དང་བདག་གིར་འཛིན་པའི་གཟུགས་ཕུང་རྣམས། །ཐོག་མེད་བག་ཆགས་རིང་དུ་གོམས་པའི་མཐུ། །དོན་ཏུ་མེད་པ་གསལ་བ་མེ་ལོང་གི། །གཟུགས་བརྙན་ལྟ་བུར་གཞི་མེད་ཀློང་གྲོལ་ལོ། །སྒྲ་སྐད་སྙན་དང་མི་སྙན་འཛིན་པ་ཡི། །བླང་དོར་འདིས་ཀྱང་ཅོལ་ཅུང་བྱིས་པ་སླུ། །གཅིག་ལ་གཅིག་བརྟེན་རང་བཞིན་མེད་པའི་ངག །བྲག་ཆ་ལྟ་བུར་གཞི་མེད་ཀློང་གྲོལ་ལོ། །ཝལ་པོ་རྗེས་མེད་རྣམ་རྟོག་ཆུ་གཉེར་ལ། །ཟད་དུ་མེད་པས་བརྩི་བགྲང་བྱེད་པ་འཁྲུལ། །དགོན་པའི་རི་དྭགས་སྨིག་རྒྱུའི་མཚངས་རིག་ལྟར། །རང་མཚངས་རྟོགས་ན་གཞི་མེད་ཀློང་གྲོལ་ལོ། །དགའ་བས་སེམས་དང་སྡུག་བསྔལ་ཡིད་གདུང་བ། །བར་མ་བཏང་སྙོམས་གྱུར་པའི་ཚོར་བ་ཀུན། །ཡོད་པ་ལྟར་སྣང་མི་བརྟན་འཕོ་ཞིང་འགྱུར། །ཟིལ་པ་ལྟ་བུར་གཞི་མེད་ཀློང་གྲོལ་ལོ། །མཚན་མེད་དབྱིངས་ཀྱི་རྒྱ་མཚོ་གཏིང་ཟབ་ལས། །མཚན་འཛིན་བློ་ཡི་ཆུ་བུར་རྐྱེན་གྱིས་བརྡོལ། །འདུ་ཤེས་ཡངས་དོགས་སྡུག་བསྔལ་ཉེར་ལེན་ཀྱང་། །རང་སར་བཞག་ན་གཞི་མེད་ཀློང་གྲོལ་ལོ། །ཆོས་ཉིད་འདུས་མ་བྱས་པའི་ནམ་མཁའ་ལས། །གཟུང་འཛིན་དབང་གིས་
འདུ་བྱེད་སྤྲིན་ཚོགས་འཁྲིགས། །གཅིག་ལས་མང་འཕེལ་ལས་ཉོན་ཆར་པ་བབས། །རྩབ་ཆོད་ན་གཞི་མེད་ཀློང་གྲོལ་ལོ། །ཆགས་སྡང་རྨོངས་སོགས་གློ་བུར་ཉོན་མོངས་སེམས། །རྗེས་སུ་འབྲང་དང་སྤང་སྒྱུར་ཐབས་ཀྱང་འཁྲུལ། །སྐད་ཅིག་རྐྱེན་བྱུང་གློག་གི་གར་མཁན་འདྲ། །རང་ངོ་ཤེས་ན་གཞི་མེད་ཀློང་གྲོལ་ལོ། །གང་ནས་མ་འཕོས་ཅིར་ཡང་མི་དམིགས་ཀྱང་། །རྟོག་འཁྲུལ་དབང་གིས་བདེ་སྡུག་སྣ་ཚོགས་སྤྱོད། །ལས་དང་ལས་ཀྱི་འབྲས་བར་བཅས་པ་ཡང་། །རྨི་ལམ་ལྟ་བུར་གཞི་མེད་ཀློང་གྲོལ་ལོ། །རྟོག་པས་བྲིས་པའི་བཟང་ངན་རི་མོ་ཀུན། །བདེན་པར་བཟུང་ན་ཐོག་མཐའ་མེད་པར་འཁོར། །རྩ་བ་ཆོད་ན་མཁན་པོ་མི་རྙེད་པས། །གཉིས་སྣང་ཐམས་ཅད་གཞི་མེད་ཀློང་གྲོལ་ལོ། །རྣམ་རྟོག་ཇི་ལྟར་ཤང་ཡང་འཁྲུལ་པའི་སེམས། །དེ་ལ་བལྟས་པས་ཆོས་ཉིད་དོན་མི་མཐོང་། །གཤིས་ལུགས་ངང་དུ་ཙམ་གྱིས་བཞག་པ་ན། །རང་རིག་རྒྱལ་པོ་གཞི་མེད་ཀློང་གྲོལ་ལོ། །འོད་གསལ་གཤིས་ཀྱི་གནས་ལུགས་འགྱུར་བ་མེད། །ཡེ་ཤེས་ཡངས་པའི་སྤྱོད་ཡུལ་བསམ་མི་ཁྱབ། །ལྟར་མེད་སྒོམ་མེད་བྱ་རྩོལ་ལས་འདས་པའི། །ཅོག་བཞག་ཆེན་པོར་གཞི་མེད་ཀློང་གྲོལ་ལོ། །རང་གྲོལ་ཉིད་མ་བསྐྱར་གྲོལ་མ་དགོས་པས། །ལྷུག་པར་གནས་པས་རང་རིག་གཞི་ལ་རྫོགས། །མ་བཙལ་ལྷུན་གྲུབ་འབྲས་བུ་
རང་ལས་རྙེད། །གདོད་མའི་དབྱིངས་སུ་གཞི་མེད་ཀློང་གྲོལ་ལོ། །གནས་མཆོག་བདེ་གཤེགས་འདུས་པའི་རྫོང་ཤོད་དུ། །ལུགས་གཉིས་བྱ་བཞག་གཞི་མེད་ཀློང་གྲོལ་བ། །བློ་གྲོས་མཐའ་ཡས་སེམས་ལ་ཤར་ནས་སྨྲས། ཁམས་གསུམ་འཁོར་བ་གཞི་མེད་ཀློང་གྲོལ་ཤོག། ༈ །།རྩེ་མོ་བྱུང་རྒྱལ་འདི་རྫོགས་ཆེན་གྱི་ལྟ་བ། །ལྟ་བའི་རྩེ་མོ་ནི་ཆོས་ཉིད་ལ་ཐུག་པས། །བློས་བྱས་ལྟ་བ་ཡིས་ཆ་ཙམ་ཡང་མི་ཕྱིན། །ཀ་དག་བྱུང་རྒྱལ་གྱིས་འཁོར་འདས་ཀུན་ཟང་ཐལ། །ཀློང་ཡངས་ཕྱམ་བདལ་གྱི་གཤིས་ལུགས་འདི་བདེའོ། །རྩེ་མོ་བྱུང་རྒྱལ་འདི་རྫོགས་ཆེན་གྱི་སྒོམ་པ། །སྒོམ་པའི་རྩེ་མོ་ནི་དབྱིངས་རིག་ལ་ཐུག་པས། །ཡིད་དཔྱོད་སྒོམ་པ་ཡིས་ཆ་ཙམ་ཡང་མི་ཕྱིན། །ལྷུན་གྲུབ་བྱུང་རྒྱལ་གྱིས་ཅིར་སྣང་ཀུན་འོད་གསལ། །རང་སྣང་རིས་མེད་ཀྱི་ལྟད་མོ་འདི་མཚར་རོ། །རྩེ་མོ་བྱུང་རྒྱལ་འདི་རྫོགས་ཆེན་གྱི་སྤྱོད་པ། །སྤྱོད་པའི་རྩེ་མོ་ནི་རང་བབ་ལ་ཐུག་པས། །མཚན་འཛིན་སྤྱོད་པ་ཡིས་ཆ་ཙམ་ཡང་མི་ཕྱིན། །མ་བཅོས་བྱུང་རྒྱལ་གྱིས་བླང་དོར་ཀུན་མཉམ་ཉིད། །རང་ཤར་རང་གྲོལ་གྱི་བློ་བདེ་འདི་སྐྱིད་དོ། །རྩེ་མོ་བྱུང་རྒྱལ་འདི་རྫོགས་ཆེན་གྱི་འབྲས་བུ། །འབྲས་བུའི་རྩེ་མོ་ནི་ཡེ་གཞི་ལ་ཐུག་པས། །འཆི་གྲོལ་རྩོལ་སྒྲུབ་ཀྱིས་ཆ་ཙམ་ཡང་མི་ཕྱིན། །བཙལ་མེད་བྱུང་རྒྱལ་གྱིས་འཁོར་འདས་ཀུན་
དབྱེར་མེད། །ཡེ་ཤེས་རང་གསལ་གྱི་དགོངས་པ་འདི་མཐོའོ། །རྩེ་མོ་བྱུང་རྒྱལ་འདི་རྫོགས་ཆེན་གྱི་རྣལ་འབྱོར། །རྣལ་འབྱོར་རྩེ་མོ་ནི་བློ་བྲལ་ལ་ཐུག་པས། །ཡིན་སྙོམ་སྒོམ་ཆེན་གྱིས་ཆ་ཙམ་ཡང་མི་ཕྱིན། །རྩིས་མེད་བྱུང་རྒྱལ་གྱིས་སྣང་སེམས་ཀུན་ལ་ཟླ། །གུ་ཡངས་རྒྱ་ཡན་གྱི་ཉམས་ལེན་འདི་ཟབ་བོ། །རྫོགས་པ་ཆེན་པོ་ནི་ལྟ་སྒོམ་གྱི་ཡང་རྩེ། །རྣལ་འབྱོར་ང་རང་ནི་ཐ་མལ་གྱི་གྲལ་མཐའ། །སྐྱིད་སྡུག་མེད་ངང་ལ་མི་ཚེ་འཁྱམས་པས། །རྩ་རྩེ་གོ་ལོག་ཏུ་འབྱུང་ཉེན་འདུག་གོ། །རྫོགས་པ་ཆེན་པོ་ལ་ཐམས་ཅད་རྫོགས་ཀྱང་། །ཡིད་དཔྱོད་ལ་སྒོམ་ཅན་རྫོགས་དུས་མི་འདུག །ད་ནི་བློས་བྱས་ཀྱི་ཁུར་པོ་བོར་ལ། །བྱར་མེད་ཀློང་ཡངས་ཀྱི་མལ་དུ་ཉོལ་ཅིག །རེ་མེད་དོགས་མེད་ཀྱི་སྡོད་ཚུགས་ཟིན་ན། །རྩ་རྩེ་གཉིས་པོ་ཡང་གཞི་མེད་རྩ་བྲལ། །གང་སྣང་ཆོས་ཉིད་ཀྱི་ཡོ་ལངས་ཆེན་པོར། །མཉམ་རྫོགས་ཕྱལ་པ་ཡི་གྲུབ་མཐར་སྙེག་གོ། །བན་རྒན་སྨྱོ་ཚབ་ཅན་པདྨ་གར་དབང་། །ཐོལ་བྱུང་ཉམས་ཤར་གྱི་སྲིན་བུའི་སུག་རྗེས། །རྟོག་པའི་ཆུ་གཉེར་ལ་ཟད་མཐའ་མེད་ཀྱང་། །ཟེགས་མ་ཕྲ་མོ་འདི་འཐོར་ནས་ཐལ་ལོ།། །།སརྦ་མངྒ་ལཾ།། །།