རྡོར་སློབ་ཀརྨ་རིན་ཆེན་ལ་གནང་བ།
ཨོཾ་སྭ་སྟི་སིདྡྷཾ། །རྟག་བརྟན་འགྱུར་མེད་ཡོངས་གྲུབ་བདེ་གཤེགས་སྙིང་། །དྲི་བྲལ་ཚེ་དཔག་མེད་དངོས་པདྨ་འབྱུང་། །ཡིད་བཞིན་འཁོར་ལོ་རྣམ་པར་རྒྱལ་མ་ཡི། །བདེན་མཐུས་མཆོག་གི་སྤྲུལ་སྐུ་ཞབས་བརྟན་གསོལ། །སྒྲུབ་བརྒྱུད་བསྟན་པ་འཛིན་སྐྱོང་སྤེལ་བ་ཡི། །ཕྲིན་ལས་བྱེད་པོར་རྒྱལ་དབང་བཅུ་གཉིས་པས། །རྣམ་འཕྲུལ་གང་དེ་དབང་བཅུ་བརྙེས་པའི་མཐུས། །འཆི་མེད་ཚེ་དབང་རིག་འཛིན་སྐུར་བཞུགས་གསོལ། །ལང་གྲོ་ལོ་ཙཱ་སྨོན་ལམ་གྲུབ་པ་ཡི། །བདེན་པས་རྣམ་རོལ་ལུང་ཟིན་སྐྱེས་མཆོག་ཉིད། །བསྟན་འགྲོར་སྨན་པའི་བཞེད་དོན་མཐར་ཕྱིན་པར། །གེགས་དང་བར་ཆད་ནམ་ཡང་མི་འབྱུང་ཤོག །སྐུ་ཚེ་མཐར་ཕྱིན་ཕྲིན་ལས་ཀུན་ཁྱབ་པ། །རཏྣ་གླིང་དང་ཀློང་གསལ་སྙིང་པོ་ཡི། །རྟེན་འབྱུང་དགེ་བའི་ལས་འབྲོ་འདིར་སད་ནས། །དེ་མཚུངས་ཞབས་བརྟན་ཕྲིན་ལས་རབ་རྒྱས་གསོལ། །མོས་དགེ་རྣམ་པར་དཀར་བའི་རྒྱ་མཚོའི་བཅུད། །གང་གི་གསང་གསུམ་བསྐལ་བརྒྱར་འཚོ་གཞེས་པའི། །རེ་འབྲས་བདུད་རྩིའི་གོང་བུར་ལེགས་སྨིན་ཏེ། །ཕན་བདེའི་སྣང་བས་ས་གསུམ་ཀུན་ཁྱབ་ཤོག །ཅེས་པའང་བསླབ་པ་གསུམ་མཛོད་འཆང་རྡོར་སློབ་ཀརྨ་རིན་ཆེན་ནས་གསུང་བསྐུལ་ངོར་འདུ་གསུམ་པ་བློ་གྲོས་མཐའ་ཡས་ཀྱིས་གུས་པས་བྲིས་ཏེ་གསོལ་བ་བཏབ་པ་ཡ་ཐཱ་སིདྡྷིནྟ་བནྟུ། །