རང་དང་གཞན་བསྐུལ་གྱིས་ངོར་བྲིས་པའི་ཡིག་བསྐུར་ཚིགས་སུ་བཅད་པའི་ཕྲེང་བ་མཚོ་བྱུང་མགྲིན་པའི་རོལ་རྩེད།
རང་དང་གཞན་བསྐུལ་གྱིས་ངོར་བྲིས་པའི་ཡིག་བསྐུར་ཚིགས་སུ་བཅད་པའི་ཕྲེང་བ་མཚོ་བྱུང་མགྲིན་པའི་རོལ་རྩེད་ཞེས་བྱ་བ་བཞུགས་སོ།། །།
བསོད་ནམས་བྱེ་བའི་གཟི་བརྗིད་ལ་འཁྱུད་པའི། །ཡིད་ཅན་མུན་པ་ཞི་བའི་སྣང་བ་ཅན།། །།
ཉི་མའི་བླ་བྲེ་དང་མཚུངས་མཆོག་གསུམ་གྱི། །ཐུགས་རྗེའི་སྣང་བ་འགྲིབ་པ་མེད་པས་སྲུངས།། །
འཇིག་རྟེན་བྱེད་པོའི་གཙུག་ན་ཆགས་པའི་རྡུལ། །རྩིབས་སྟོང་རེ་ཁཱས་མཚན་པ་ལས་འོངས་པ། །དག་པའི་ནོར་བུ་ཆུ་ཤེལ་འཕོས་པ་བཞིན། །རེ་བ་ཡིད་བཞིན་འཇོ་བའི་དབྱིག་གི་དྲུང་། །མོས་པའི་སྙིང་ཆུས་བྲན་པའི་སོར་མོ་ཡིས། །པདྨོ་སོས་ཀའི་གཞི་ལ་འབུས་འདྲ་བས། །དཔྲལ་བར་བརྒྱན་ཏེ་ཞུ་མཆིད་བུང་བའི་གླུ། །དད་པའི་སྟོབས་ལས་ཤུགས་འབྱུང་དབྱངས་སུ་ལེན། །སྲིད་ལས་འདས་ཀྱང་སྲིད་པ་ཐམས་ཅད་པ། །ཞི་བ་ཉིད་ཀྱང་ཞི་དང་མི་འཛའ་བར། །མཐའ་ཡས་རྣམ་གྲོལ་ཆོས་ཀྱི་རྒྱལ་པོ་ནི། །ས་ལ་ཁ་ལོ་སྒྱུར་བའི་དབང་ཕྱུག་བཞིན། །ཐར་པའི་སྒྲས་བཏགས་ཤིན་ཏུ་ཟབ་ཞིའི་དབྱིངས། །གྲུབ་པ་རྣམས་ཀྱིས་ནོར་བཞིན་སྤྱོད་པའི་ཡུལ། །རང་དབང་ཆུབ་ནས་གཞན་ལ་འདོམས་པའི་ལུང་། །སྲས་ཀྱི་དབུས་བཞུགས་རྒྱལ་རྣམས་འགྲོས་ཏེ་བྱིན། །མཚན་ཙམ་གྱིས་ཀྱང་སྟོབས་བཅུ་མངའ་རྣམས་ཀྱི། །མཛད་པ་ཀུན་སྒྲུབ་དཔལ་ལྡན་འཇིག་རྟེན་མགོན། །གངས་ལྗོངས་གདུལ་བྱ་འདོར་བ་མ་བཟོད་པས། །ཐུབ་པའི་རྒྱལ་མཚན་བསྣམས་ཏེ་བྱོན་པ་རྨད། །ཐུབ་ཀུན་སྤངས་རྟོགས་གཅིག་ཏུ་བསྡུས་པ་ཡི། །ཉིན་བྱེད་མཁྱེན་བརྩེའི་ཟེར་ལ་མཚར་དུ་ཅི། །གངས་ཅན་གདུལ་དཀའི་འབྱུང་བྱས་རྣམ་ཐར་གྱི། །ཆ་ཤས་མཐོང་བའི་མིག་གི་སྐལ་ལྡན་མཚར། །ཐ་དད་ཀླུང་དུ་འབབས་པའི་ཆུ་བྱེ་བ། །ཆུ་གཏེར་ཆེན་
པོའི་མཇིངས་ལས་སྡུད་ཅིང་སྤྲོ། །སྲིད་འདིར་རྒྱལ་བའི་ཕྲིན་ལས་གང་འཇུག་པ། །དེ་དག་རྒྱལ་དབང་ཕྱག་ན་པདྨོའི་འཕྲུལ། །ཡེ་ཤེས་ཡུལ་ལ་འཇུག་པའི་ཕྲིན་ལས་ནི། །གདུལ་བྱའི་ཁམས་དང་མཐུན་པའི་རོལ་མོ་བརྒྱ། །དུས་གསུམ་གཤེགས་པའི་འཕྲུལ་ཀུན་བསྒྲགས་པ་ལས། །སྐུ་དང་ཞིང་ཁམས་གཞན་ལ་གུས་པ་ལྷོད། །ཐུགས་རྗེ་པདྨ་དཀར་པོའི་གྲིབ་བསིལ་ལ། །སྐྱབས་སུ་འཆའ་བའི་སྲིན་བུ་དབྱར་བཞིན་ཏུ། །སྣང་བའི་ཡུལ་ལ་ཅི་བདེར་སྤྱད་པ་ཙམ། །རྣལ་འབྱོར་སྒྲོ་བཏགས་རི་ཡི་སྐྱིབས་སུ་བདོག །མཚམས་ཞུས། །ཇི་ལྟར་ས་ཡི་སྟེང་ན་ཉི་མ་དར། །མཚུངས་པའི་སྣང་བྱེད་དབང་པོ་གཞན་ཡོད་མིན། །ལུས་ཅན་ཀུན་ལ་འཇིག་རྟེན་དབང་ཕྱུག་གི། དཔེ་ཟླར་འོས་པའི་འདྲེན་པ་གཞན་མ་དམིགས། །དེས་ན་མི་ཤིགས་རྡོ་རྗེའི་སྐྱིལ་མོ་ཀྲུང་། །ལོ་བརྒྱའི་བར་དུ་ལྷོད་བར་མི་མཛད་པར། །ཞིང་འདིའི་གདུལ་བྱའི་མགོན་ཏུ་འཚོ་གཞེས་ཏེ། །ཟབ་ཅིང་རྒྱ་ཆེའི་ཆོས་འཁོར་བསྐོར་དུ་གསོལ། །འགྲོ་ཁམས་ཇི་སྙེད་སྒྲོལ་བའི་དམ་བཅའི་གོ། །རང་གིས་བགོས་པ་གང་དེ་མི་འདོར་བར། །སྙིང་རྗེའི་སྤྱན་རས་འགྲོ་ཁམས་བྱང་ཆུབ་ལ། །འཇུག་གི་བར་དུ་གཟིགས་པས་བསྲུང་བར་མཛོད། །དད་དང་ལྷག་བསམ་ལྟར་དཀར་པད་སྣལ་དང་། །ཆོས་མཚུངས་ལྷ་ཡི་རེག་བྱས་
གསོལ་འདེབས་ཀྱི། །རྟེན་ཏུ་མཚོན་ཏེ་བཀའ་འབངས་མུ་ཏོ་བས། །སྙོམ་ལས་མལ་ནས་གུས་ཕྱག་དང་བཅས་ཕུལ། །ཞེས་རྒྱལ་དབང་ཀརྨ་པའི་མདུན་ཕུལ་བའོ། །དགེ་ལེགས་འཕེལ།། །།།ཐུགས་རྗེ་ཟླ་བའི་འཛུམ་དཀར་ཡིད་འོང་བ། །རྣམ་འདྲེན་རྒྱུ་སྐར་བྱེ་བས་མི་བཟོད་པས། །འགྲོ་ཚོགས་སྙིང་གི་ཀུ་མུད་ཁ་འབྱེད་པའི། །འཇིག་རྟེན་དབང་པོས་ཤིས་པའི་སྣང་བ་སྩོལ། །ཚངས་སོགས་ཅོད་པན་ནོར་བུའི་ཕུད་བུ་ཡིས། །བྱི་དོར་བྱས་པའི་ཞབས་ཀྱི་ཆུ་སྐྱེས་ཟུང་། །དགེ་མཚན་བྱེ་བའི་རྡུལ་ཕྲེང་སྐྱུགས་པ་ཡིས། །ས་གསུམ་དག་བྱེད་གྱུར་པ་ག་ལ་བར། གུས་པས་ཞུ་གསོལ། །ངོ་མཚར་རླབས་ཕྲེང་ཕྱུར་བའི་རྣམ་ཐར་མཚོ། །བྱང་ཆུབ་སྤྱོད་པའི་ནོར་བུ་གང་བ་ལས། །ཆ་ཤས་གཏམ་གྱིས་ངལ་གསོས་དང་བའི་ཡིད། །མགྲོན་པ་རྣམས་ལ་རིན་ཆེན་གླིང་བཞིན་གྱུར། །དེ་ཡི་གྲགས་པ་ཀུ་ནའི་ཕོན་པོ་ནི། །
ཕྱོགས་ཀྱི་བུ་མོའི་རྣ་བར་བྱིན་ཙམ་ནས། །སྙིང་ལ་སྦྲང་རྩི་བཞིན་ཏུ་དཔལ་ཐོབ་སྟེ། །ཞུ་མཆིད་བུང་བའི་གླིང་བུ་སྒྱུར་ལ་བྲེལ། །འདྲེན་པའི་ཆུ་ཆར་ཁུར་བའི་རྒྱ་མཚོའི་སྤྲིན། །སྤྲོས་བྲལ་མཁའ་ལས་སྤྲོས་པ་བཞིན་འགོད་དེ། །གང་འདུལ་སྤྲུལ་པ་བྱེ་བའི་གར་མཁན་མས། །གདུལ་བྱའི་ཡིད་དབང་འགུགས་པའི་རོལ་རྩེད་མཛད། །སྤང་རྟོགས་རྒྱས་པའི་སྨན་གྱི་ནགས་ཚལ་དུ། །རྣམ་ཐར་ག་པུར་དྲི་གསུང་འབབ་པའི་གཞི། །གང་སྐུ་དཔག་བསམ་རྐང་འཐུང་གསར་པ་ཉིད། །འཁྲུངས་པ་ཙམ་ནས་སྲིད་གསུམ་འདོད་འཇོ་དང་། །འགྲོ་ཕན་ཁོ་ནར་དགྱེས་པས་སྲིད་པ་ལས། །འདས་ཀྱང་སྲིད་པ་བཞིན་ཏུ་རྣམ་རོལ་ཏེ། །ཆོས་ཀྱི་བཀའ་རྟགས་འཆང་བའི་ཆོས་ཀྱི་རྒྱལ། །སྐྱེས་པ་རབ་ཀྱི་ཕྲེང་བར་ལྷུན་གྱིས་གྲུབ། །དུས་ལ་སྒྲིབ་པ་མེད་པའི་ཡེ་ཤེས་ཀྱི། །མཐོང་བ་འཇུག་པས་ལོག་ཤེས་རྙོགས་པའི་བློ། །གཙང་བྱེད་སྒྱུ་འཕྲུལ་སྣང་བརྙན་ཀེ་ཏ་ཀ །སྨོན་ལམ་རྗེས་སུ་འབྲང་དེར་སུ་མི་གུས། །རྒྱལ་དང་འཕགས་པས་སྤངས་རྣམས་བདེ་བླག་ཏུ། །ཟུང་འཇུག་ས་ལ་བཅིངས་པ་བཀྲོལ་བའི་མཐུ། །སྲིད་པའི་ཁོངས་ན་དོ་ཟླ་གཞན་མེད་པས། །མཚན་གྱི་ཡི་གེ་དབྱར་རྔའི་རྗེས་སུ་སོང་། །ཡིད་ཀྱི་བུང་བ་རིག་པའི་གླུ་ལེན་ཅིང་། །འཕུར་འདོད་ལག་འབྲེལ་བའི་ཟ་ཟི་ཅན། །འདི་ན་ཚོགས་ཀྱི་
པདྨོའི་ཉེ་གམ་དུ། །རིམ་གཉིས་སྦྲང་རྩིའི་ཟེགས་མ་གསོག་བཞིན་མཆིས། །མཚམས་ཞུས། མཁྱེན་རབ་ནམ་མཁའི་དགའ་མ་ལ་འཁྱུད་པ། །བརྩེ་ཆེན་ཟླ་བ་གཞོན་ནུའི་རོལ་སྒེག་ཅན། །ནུས་པའི་ཀུན་ཕན་འཆི་བདག་མུན་པ་ལས། །རབ་རྒྱལ་གདུལ་བྱའི་དཔྱིད་དུ་འཚོ་གཞེས་གསོལ། །སྒྱུ་འཕྲུལ་རོལ་མོར་འཆར་བའི་གསང་བ་གསུམ། །མི་ཤིགས་རིགས་སྔགས་རྡོ་རྗེའི་རྒྱས་ཐེབས་ནས། །རྟག་པ་དམ་པའི་མཁའ་ལས་ཆོས་ཀྱི་ཆར། །ཐེག་གསུམ་ཡུལ་དང་འཚམས་པར་དབབ་ཏུ་གསོལ། །བཀྲ་ཤིས་གང་ཞིག་ས་གསུམ་མཛེས་བྱེད་གསེར་གྱི་འོད། །ཁུབ་པར་བཀྱེ་བ་ཐུབ་པ་ཉི་མ་ལས་འོངས་པ། །ཆོས་དང་ཚོགས་ཏེ་རིན་ཆེན་གསུམ་གྱི་ཤིས་པས་འདིར། །བདེ་ལེགས་པདྨོའི་ནགས་ཀླུང་དར་ལ་བབ་གྱུར་ཅིག །མགོན་པོ་གང་གི་ཐུགས་རྗེ་བསྐུལ་བའི་སླད། །གསོལ་འདེབས་རྟེན་མཚོན་དང་བཅས་སྒྲུབ་བརྒྱུད་ཀྱི། །དགེ་སྦྱོང་རྟགས་འཛིན་ཀུན་གྱི་ཐ་ཤལ་བས། །དཔལ་སྤུངས་དབེན་རིའི་སྐྱིབས་ནས་ཕྱག་བཅས་ཕུལ། །འབྲུག་པ་ཐམས་ཅད་མཁྱེན་པར་ཕུལ་བའོ།། ༈ །།རྒྱལ་དབང་བཅོ་ལྔ་པ་ལ་ཕུལ་བ། འཇིག་རྟེན་གསུམ་གྱི་རྣམ་པར་འདྲེན་པ་ལྷར་བཅས་འགྲོ་བ་ཡོངས་ཀྱི་སྐྱབས་མགོན་རྒྱལ་དབང་ཐུགས་རྗེའི་གཏེར་ཆེན་རིན་པོ་ཆེའི་ཞབས་པད་རྡོ་རྗེའི་ཁྲི་དྲུང་དུ། གུས་པ་ཆེན་
པོས་ཞུ་གསོལ། སྲིད་དང་ཞི་བའི་མཐའ་གཉིས་ལ་མི་གནས་པའི་གནས་པ་ཆེན་པོས་གདོད་གནས་རྟག་པ་དམ་པའི་དབྱིངས་ལས་མ་གཡོས་བཞིན་ཏུ་སྲིད་པ་ཇི་སྲིད་དེ་སྲིད་དུ་དམིགས་མེད་སྙིང་རྗེའི་རོལ་པས་གང་འདུལ་རྣམ་པར་འཕྲུལ་པ་མོས་པའི་རྗེས་སུ་འགྲོ་བ་ལས། །དེ་ཡང་བདག་སོགས་གདུལ་བྱའི་བསོད་ནམས་ཀྱི་དགུང་དུ་ཚེས་པའི་གྲོལ་བ་བཞི་ལྡན་མཚན་དཔེའི་དཀྱིལ་འཁོར་རྙོགས་པ་དང་བྲལ་ཞིང་ཕྲིན་ལས་བདུད་རྩིའི་འོད་ཕྲེང་ཀུན་ཏུ་ཁྱབ་པ་ནས་རྗེས་བརྩེས་མ་དོར་བའི་གསུང་གླེགས་རིན་པོ་ཆེ་གཉིས་པའི་གནང་སྐྱེས་ཀྱིས་ལྕི་བ་སྤྱི་བོར་རྩོལ་གྲུབ་དད་གུས་མོས་སྤྲོ་བཀའ་དྲིན་ལྷག་པར་འཕེལ་སྐྱབས་འོག་པ་རྒན་བུའང་བགྲང་བྱ་རིམ་མཐོའི་ཁུར་གྱིས་ནོན་པའི་བབ་ལས་གསར་འཚེ་མེད་པར་སྔར་མཁོ་ལྟར་བདོག་ལགས། མཚམས་སུ་ཞུ་གསོལ། ཇི་ལྟར་འདོད་འབྱུང་དབང་གི་རྒྱལ་པོ་ལ་གསོལ་བ་བཏབ་པ་བཞིན་དད་ལྡན་གདུལ་བྱ་རིས་སུ་མ་ཆད་པའི་རེ་སྐོང་ཡིད་བཞིན་དུ་སྩལ་དང་སྩོལ་བཞིན་པ་རྣམས་བཀའ་དྲིན་ཆེ། གདན་ས་བར་པར་ཟབ་བདུན་ཐུགས་ཀྱི་ཕུར་གཅིག་གི་སྒྲུབ་ཆེན་དབུ་འཛུག་དང་རྒྱུན་བཞག་གནང་བཞེད་དེ་བཞིན་སྙིགས་དུས་དམ་སྲི་བགེགས་རིགས་ཀྱི་གཉེན་པོར་འདི་ལས་ལྷག་པའི་ལྷ་མཆོག་མ་མཆིས་ཕྱིར་བསྟན་པ་སྤྱི་དང་བྱེ་བྲག་གི་སྨན་ཡོན་ཏུ་འགྱུར་བར་ངེས་པས་གུས་པ་ནས་
ཀྱང་དེ་ལྟར་འགྱུར་བའི་སྨོན་འདུན་ཅི་ནས་ཞུ་བ་ལགས། གཏེར་གསར་ཕུར་པ་དེ་སྤྲོས་བཅས་ཆེ་བ་ཙམ་ལས་དགོས་དོན་བསྙེན་སྒྲུབ་ལས་སྦྱོར་སོགས་ཀྱི་གནད་གསང་གལ་ཆེན་བྲིན་བྲིས་མཛད་རྒྱུ་མ་བྱུང་སྟབས་སྔ་གཞུང་རིགས་ཤེས་དགོས་འདུག་པ་དང་། གར་དགོན་དུའང་རིམ་པར་བསྙེན་སོང་རྡོར་སློབ་ཚད་ལྡན་འཇོག་རྒྱུ་ངེས་པར་གལ་ཆེ་བ་ལས་བྱས་ལ་མ་བསགས་པར་འགྱུར་ཉེན་སྣང་། སྐྱབས་མགོན་ཉིད་སྐྱེས་ཐོབ་ཀྱི་མཁྱེན་རབ་སད་པས་སྦྱང་རྩོལ་རིགས་བརྡ་སྟོན་ཙམ་ལས་ཆེར་དགོས་མ་འདྲའང་། རྗེ་གོང་མ་རྣམས་ཀྱང་མཁས་པའི་སློབ་དཔོན་བསྟེན་ནས་སྦྱང་བརྩོན་གྱི་ཚུལ་གནང་བའི་རྣམ་ཐར་གྱི་རྗེས་སྐྱོང་གྲུབ་པ་ནི་ངོ་མཚར་ཤིན་ཏུ་ཆེ། དེའང་རིག་གནས། མདོ་ཕྱོགས་བཀའ་བོད་སོགས་རེ་རེ་བཞིན་མཐར་ཕྱིན་གྱི་མཛད་རྒྱུན། འཁྱོར་དཀའ་ཡང་ཐམས་ཅད་ཀྱི་ཕྱོགས་མགོ་གཟིགས་པ་ཙམ་བྱུང་ན་གལ་ཆེ། གཙོ་བོར་བཀའ་རྙིང་གཉིས་སྒྲུབ་བརྒྱུད་དང་། ས་དགེ་གཉིས་བཤད་རྒྱུད་ཀྱི་བཀའ་བབས་སུ་སྣང་བས་སོ་སོའི་ལུགས་སྲོལ་དེ་སྐྱོང་དགོས་པ་གཞིར་བཅས་ཀྱང་། དེང་སང་རྙིང་ཕྱོགས་སོགས་ཕལ་ཆེར་དགེ་ཕྱོགས་ཀྱི་ལྟ་གྲུབ་དང་བཤད་སྲོལ་ལད་མོ་ཅི་འཁྱོལ་བྱེད། རང་ལུགས་ཀྱི་གཞུང་བཟང་པོ་གལ་ཆུང་ངུ་བཞག །གོང་མ་རྣམས་ཀྱི་ལྟ་གྲུབ་མི་སྐྱོང་བ་ཞིག་སྣང་བ་ནི་རང་བསྟན་བཤིགས་པའི་སྔ་ལྟས་སུ་
སྣང་། དགེ་ཕྱོགས་དེའང་ངོ་མཚར་ཆེ་རུང་དེ་སྔ་ཕན་གོ་ཆོད་པའི་རང་ལུགས་བོར་ནས་གཞན་ལུགས་ལ་འཇུག་དགོས་པ་དེ་རང་རང་ནས་རང་ལུགས་གནད་གསང་ཇི་བཞིན་མ་ཤེས་པའི་ཁྲེལ་མཚང་ལས་ཡ་མཚན་མི་སྣང་། དེས་ན་རང་ཚང་རང་ལུགས་ལའང་ཐམས་ཅད་མཁྱེན་པ་རང་བྱུང་ཞབས་ཀྱི་གཞུང་དང་བཞེད་སྲོལ་ལ་གཞིར་བྱེད་པའི་ནང་བརྟགས་རྒྱུད་གསུམ་འདི་ལ་འཆད་ཉན་གོ་ཆོད་པ་རེ་བྱུང་ན་སྲོག་རྩ་ལྟ་བུ་ཡིན་འདུག །ཕྲན་བུས་ཤེས་བྱ་ཀུན་ཁྱབ་ཏུ་མིང་བཞག་པ་འདིའང་དེ་དག་གི་ཡན་ལག་ལྟ་བུར་དམིགས་ནས་ཆེད་དུ་བྱས་པ་ལགས། གསན་སྦྱོང་གཞན་དོན་གང་གི་སྐབས་སུའང་ད་ལྟའི་རིག་པ་སྐད་ཅིག་མ་གཉུག་མ་ཕྱག་རྒྱ་ཆེན་པོ་ཆོས་སྐུ་རང་ཤར་འདི་ཉིད་རང་ངོ་ཤེས་ཙམ་པའི་བཟོ་མེད་ངང་དུ་ཡེངས་མེད་དུ་སྐྱོང་བའི་ཐུགས་དགོངས་མཉམ་པར་བཞག་པ་ལས་མ་གཡོས་པ་ཞིག་གནང་ན་གནས་སྐབས་བར་དུ་གཅོད་པ་ཅིས་ཀྱང་བརྫི་བར་མི་ནུས་ཤིང་མཐར་ཐུག་ཐོས་སྒོམ་ཆབ་གཅིག་ཏུ་འགྲོ་བས། རྗེ་བརྒྱད་པས་ཁོང་ཐོས་བསམ་གྱི་སྟེང་ནས་གྲུབ་པ་ཐོབ་པ་ཡིན་ཅེས་ཞལ་ངོམས་གནང་བ་ལྟར་འབྱུང་བ་མ་གཏོགས་ནང་ནས་མྱོང་རྟོགས་ཅུང་ཟད་མ་ཤར་བའི་ཁ་ཕྱིར་བལྟས་ཀྱི་ཐོས་བསམ་ཁོ་ནས་གནས་ལུགས་ཀྱི་ཕྱོགས་སུའང་མི་ཕྱིན་འདུག་པ་སོགས། སྐྱབས་མགོན་ཉིད་ཐམས་ཅད་མཁྱེན་པར་གདོད་ །
ནས་གྲུབ་པ་ལ་ཐ་མལ་རྨོངས་པས་ཉི་མ་ལ་མེ་ཁྱེར་གྱི་སྒྲོན་འདེགས་ཞུ་བའི་ཡུལ་ག་ལ་ཡིན་ཀྱང་ཤིན་ཏུ་དམན་པ་བདག་ལྟ་བུ་ལའང་ཡེ་ཤེས་ཀྱི་གཟིགས་པ་ཐུན་མིན་བཙའ་བའི་དོན་གྱིས་བན་རྒན་མང་དུ་ཐོས་ཤིང་ཆོས་རྒྱུས་ཆེ། མདོ་རྒྱུད་རིག་གནས་དང་བཅས་པ་ལ་མྱོང་བ་ཅུང་ཟད་རེ་ཡོད་པའི་རྒྱུས་ཤེས་དང་ཉམས་ཞུས་ལྟ་བུར་གསོལ་བ་ཡེ་ཤེས་དབྱིངས་སུ་གཅགས་པ་མཁྱེན་མཁྱེན་ཞུ། ཕྲན་ཅག་གིས་མཎྜལ་ཚུལ་དུ་ཕུལ་བའི་གསར་རྙིང་བཀའ་གཏེར་གྱི་ཆོས་སྐོར་རྣམས་འཛིན་སྐྱོང་སྤེལ་བའི་ཞལ་བཞེས་གནད་གྲུབ་པ་བཀའ་དྲིན་བསམ་གྱིས་མི་ཁྱབ་པ་ཆེ་བས་ཚུར་མཐོང་གདུལ་བྱ་རྗེས་སུ་འཛིན་པའི་སླད་དུ་གཙོ་བོ་གལ་ཆེན་རིགས་ལ་བསྙེན་སྒྲུབ་དང་བསྐྱེད་རྫོགས་ཀྱི་ཉམས་བཞེས་ཁྱུགས་ཙམ་རེ་གནང་བ་དང་། དེ་ཡང་དཀོར་སྡུད་ཀྱི་ལག་ཆ་ཕྲན་ཚེགས་མ་གཏོགས་སྙིང་ནས་ཟབ་ཆོས་དོན་གཉེར་ཤིན་ཏུ་དཀོན་ཀྱང་དད་མོས་ཅན་རིས་མེད་ལ་སྨིན་གྲོལ་གདམས་པས་རྗེས་སུ་འཛིན་ཅིང་ཆོས་རྒྱུན་ཆད་མེད་དུ་འཕེལ་བའི་ཐུགས་བསྐྱེད་མི་འདོར་བ་ཅི་ནས་གསོལ་བ་འདེབས་པ་ལགས། སླད་ཀྱི་ཆར་ཡང་གྲོལ་བ་བཞི་ལྡན་གྱི་རྡོ་རྗེའི་གསང་གསུམ་འདི་ཉིད་ཁོ་ནས་ནམ་ཡང་གཞོམ་གཞིག་འཕོ་འགྱུར་མཚན་མའི་ཆོས་ཀྱིས་མ་གོས་པར་པདྨ་ཚེ་དཔག་ཏུ་མེད་པའི་རང་བཞིན་ཏུ་རྟག་ཅིང་བརྟན་ལ། རླབས་ཆེན་ཕྲིན་ལས་ཀྱི་
སྣང་བས་ས་གསུམ་ཀུན་ཏུ་ཁྱབ་པར་བརྡལ་བ་ནས། སྐྱབས་འོག་པ་ལྟོས་པར་བཅས་པའང་བརྩེ་ཆེན་ཡེ་ཤེས་ཀྱི་གཟིགས་པས་ནམ་ཡང་མི་འདོར་བ་ཐུགས་རྗེའི་སྐྱབས་རོལ་དུ་བཙའ་བ་དང་ཕེབ་པར་འོས་པའི་བདུད་རྩིའི་ཀླུང་རྒྱུན་ཁོར་ཡུག་ཏུ་སྩོལ་གྲུབ་པའི་གསོལ་བ་ལན་བརྒྱར་འདེབས་པ་ལགས། ཞུ་གསོལ་འདེབས་མཚོན་བཀྲ་ཤིས་པའི་ལྷ་རྫས་བཅས་དཔལ་སྤུངས་ཡང་ཁྲོད་སྒྲུབ་སྡེ་ནས་རྒན་བུ་གུ་འི་མིང་གིས་གུས་ཕྱག་བཅས་ཕུལ་བའི་ཞུ་ཡིག། ༈ །།ཞེ་ཆེན་དབོན་སྤྲུལ་རིན་པོ་ཆེར་གསུང་ལན་སྔར་ཞིག་ཕུལ་བ། ཙནྡོ་ཡ་བཀྟྲཾ་མུ་ཁཱ་ནཱཾ་པྲ་སྟཱ་རེ། །སྭ་བྷཱ་བ་རཏྣ་ཀཱ་མྲྀཏྱཾ། ཀཱིརྟྟི་ལུནྡ་སྱ་ར་སྨཱིནཱ། ཨཱ་ནནྤཱདྨ་ཀ་ལོ་ཀེཥུ། སྱཱངྐཱ་ཤ་ཙནྡྲ་ཡོ་རྨཱུ་ལེ། །རང་བཞིན་རིན་ཆེན་བདུད་རྩི་དང་། །གྲགས་པ་ཀུནྡའི་འོད་ལྡན་པ། །ཀུན་དགའི་བདག་ཉིད་འཇིག་རྟེན་ན། །གསལ་བྱེད་ནམ་མཁའི་ཐིག་ལེའི་དྲུང་། ༡ །ལྷན་སྐྱེས་ཆ་བ་ནགས་ཀྱི་ག་པུར་གྱིས། །ཉེར་འཚོ་འབྱུང་བ་དག་གི་ལྷན་སྐྱེས་ཏེ། །ཁྱོད་གསུང་བདུད་རྩིར་བཅས་པས་དུས་ཐུང་ངུར། །བདག་བློ་རྫོགས་པར་གསོས་པའི་དྲིན་དྲན་ནས། ༢ །མང་དུ་སྤྲོས་པའི་གོ་སྐབས་མ་མཆིས་ལ། །ཉུང་ངུར་
བརྗོད་ཀྱང་དགོས་པ་མ་རྫོགས་པ། །འཕེལ་དང་འབྲི་བ་མེད་པར་རྟ་གདོང་གི། རྣམ་གཡེངས་མེ་ལྕེས་བློ་གྲོས་ཆུ་གཏེར་བསུབས། ༣ །དོག་པ་ཙནྡན་ཆབ་ཀྱིས་ལུས་གཤེར་བའི། །བསིལ་བའི་ཡིད་ཅན་དེ་ལ་མངོན་ཕྱོགས་ནས། །བྲལ་བས་ཉེན་ཀྱང་བརྟན་པ་མ་བྲལ་བ། །ལེགས་བཤད་སྦྲང་རྩིས་མྱོས་པའི་ཚོགས་པས་བསམ། ༤ །རྟག་ཏུ་གང་བའི་ཟླ་བ་འཇིག་རྟེན་འདིར། །བདུད་རྩིའི་ཟེར་བརྒྱས་ལྷར་བཅས་དགར་མཛད་པ། །ལྷུན་པོའི་རྣ་རྒྱན་ཅན་གྱི་ཁོར་ཡུག་ན། །གཟུགས་བརྙན་ཙམ་ཡང་དེང་སང་གང་དུ་འཆར། ༥ །རིགས་ཀྱི་སྲེག་ཟར་འབར་བའི་གོ་སྐལ་ལ། །སྲིད་ཞིའི་དཔལ་ཀུན་ཟོས་ཀྱང་མ་ཚིམས་ཏེ། །མ་འདུས་ཆུ་གཏེར་འཐུང་བས་རིན་ཆེན་མཛོད། །ངོམས་པའི་གནས་སྐབས་དེ་ནི་སུ་ཡིས་མཐོང་། ༦ །ལྗོངས་སུ་རྒྱས་པའི་ཙནྡན་རྐང་འཐུང་དང་། །རྫིང་བུར་གསོས་པའི་དཀར་མིན་ཨུཏྤལ། །བློ་གྲོས་ཡོངས་རྫོགས་མཁས་པའི་སྐྱེ་བོ་རྣམས། །དྲི་ཙམ་གྱིས་ཀྱང་འཇིག་རྟེན་དགའ་བསྐྱེད་བྱེད། ༧ །འདི་ན་གཟུགས་དང་ལང་ཚོ་ཁྲིམས་དང་ནི། །འབྱོར་པས་འབྱོར་པ་དག་ནི་མང་མོད་ཀྱི། །ཕ་རོལ་དུ་ཡང་བསོད་ནམས་ཚོང་ཟོང་གིས། །བློ་གྲོས་ནོར་བཙལ་བདེ་བར་གནས་པ་སུ། ༨ །ཡང་སྲིད་དམ་པའི་སྤྱོད་ཚུལ་ཁོ་ན་ཡིས། །བརྒྱུད་མར་རྒྱས་པས་སྐྱེ་དགུ་སྲུང་མཛད་
པ། །སྲིད་འདིར་དྲི་མས་མ་ནོངས་དགའ་སྟོན་ལ། །བདེ་བར་བཙའ་བ་དེ་དག་སྐལ་བཟང་ཡིན། ༩ །བྲང་འགྲོའི་གཙོ་བོ་གཙུག་གི་རིན་ཆེན་གྱིས། །ས་སྟེང་དབུལ་བ་མཐར་བྱེད་གཞན་ཡིན་ཏེ། །མ་བསླང་ལས་ཀྱིས་རྙེད་པའི་རིན་ཆེན་གྱིས། །བློ་གྲོས་ནོར་གྱི་ཁེངས་པ་དུད་པར་དྲན། ༡༠ །རྒྱུ་དང་འབྲས་བུ་འགོག་པའི་རྣམ་བརྟག་མེད། །མ་བྱས་བདག་ལ་སྨིན་པ་འགའ་མེད་ཀྱང་། །བདའ་ཕྱིར་པད་རྩ་ཕྱུང་ནས་བླུན་པོས་ཟ། །འབད་པས་ཕན་པར་བྱས་པ་སྲིད་འདིར་མེད། ༡༡ །མཁས་པའི་སྤོ་ལ་གྲུབ་པའི་གཟི་འབར་བ། །གདེངས་ཅན་རི་དབང་ལ་བསྟེན་གཉིས་སྐྱེས་ཀྱིས། །གྲགས་པའི་རྔ་ཡབ་ཐ་གྲུར་སྟེགས་པ་ཡི། །ཞེ་སའི་དག་བྱེད་ཟེག་མ་འཐོར་བ་བཞིན། ༡༢ །སྲེད་པས་ཐུབ་ཆོད་ས་ཡི་རྡུལ་བཟུང་སྟེ། །དགོན་པར་ཡུན་རིང་འཁྱམས་ནས་འཕྱན་པ་ལ། །གདུང་བ་འགོག་སླད་སྤྲིན་གྱི་གྲིབ་མ་དང་། །འདྲེན་བྱེད་ཉི་མའི་བརྟུལ་ཞུགས་ལྷན་ཅིག་བཟུང་། ༡༣ །རྡོ་རྗེའི་སྔགས་ཀྱིས་མཚན་མའི་བརྟན་པ་བཅིལ། །དག་པའི་ངག་ལས་ངག་གི་ཆུ་གཏེར་འཇོ། །ཡིད་ཀྱི་སྦྲང་ཆང་བརྩེ་ལྡན་པདྨོས་འཐུད། །དཔལ་འདིས་ཆེ་བ་བྱིན་པར་མ་གྱུར་གྲང་། ༡༤ །ཕྱག་གི་སྙིམས་པའི་པདྨོ་ནས། །གཙང་བྱེད་རྡུལ་གྱིས་བུང་བ་མོ། །མངོན་འདོད་བྱེད་ལ་ཆས་པ་བཞིན། །
རེ་ཞིག་དུས་ཀྱི་རྒྱས་བཏབ་གྱུར། །ཨེ་མ་གཏམ་གྱི་སྦྲང་རྩི་ཡི། །གཟུགས་བརྙན་མཐར་གྱིས་མྱོང་ལ་ལྟོས། །འདི་ཡི་སྤྲིན་སྒྲ་མ་བླང་བར། །རྗེས་དཔག་མདངས་ཐ་སྔར་ཉིད་རྒོད། ༡༥ །ཡ་མཚན་ཉིད་དོ་ཉི་མས་ཁ། །མཚར་སྡུག་ཕྱེས་པའི་ཨུཏྤལ་དང་། །མཁས་པས་བློ་ལྡན་བློ་ཕྱེས་པས། །ལུང་གི་དགའ་སྟོན་ཕན་ཚུན་ཆགས། ༡༦ །དུས་ཀྱི་དང་པོར་འདི་ནི་རིག །མུན་པའི་རུམ་ན་འོད་སྟོང་པ། །འབད་པས་སྤྲོས་ཀྱང་མ་ཤར་ཞེས། །བྱེད་པོ་མི་སྣང་མཁའ་སྟེགས་ཉུལ། ༡༧ །འཁོར་བའི་ཆོས་ཀྱི་རི་བྲག་ཏུ། །ཞི་བསིལ་སྨན་ལྗོངས་མ་བདལ་བར། །འབད་ཀྱང་ཉེས་པའི་ཚང་ཚིང་ལ། །འདའ་བར་མ་ནུས་དགེ་སློང་ངམ། ༡༨ །དགེ་སྦྱོང་སྡེ་སྣོད་གསུམ་པའི་གཟུགས། །འདི་ན་བྲིས་པའི་མར་མེ་བདག །ཁྱད་པར་འགའ་ཡང་མ་བྱས་པར། །མཐའ་གཉིས་བསྙོན་འདོར་ཚུལ་གྱིས་ཞུགས། ༡༩ །ནོར་གྱི་འབྱོར་པ་འབྱོར་ལྡན་མིན། །གང་ལ་གསུང་རབ་ལས་བྱུང་དབྱིག །འབྱོར་ལྡན་དེ་ནི་དབུལ་པོའང་རུང་། །གནས་སྐབས་ཀུན་ཏུ་འབྱོར་ལྡན་ཡིན། ༢༠ །དེ་སླད་ཕན་བདེའི་དབྱིག་ལྡན་བྱང་ཆུབ་ཀྱི། །ཆུ་ཀླུང་གདེངས་ཀ་རབ་འབར་ལྷག་མ་ཅན། །རྡོ་རྗེའི་བཅུད་ལེན་ནམ་མཁའི་སྲོག་པ་རྩར། །མི་ཤིགས་ཕྱག་རྒྱས་དམ་དུ་སྡོམས་ཤིག་ཀྱེ། ༢༡ །གང་འདིར་བརྣལ་དུ་གནས་པ་དང་། །
ཕ་རོལ་བདེ་བ་ཚོལ་བ་མེད། །ཆོས་བཞིན་སྤྱོད་པ་དེང་ཚེ་སུ། །དེ་འདྲས་བློ་ལྡན་སྨོད་ཅིང་གཤེ། ༢༢ །འཇིགས་ལ་འཇིགས་པ་དམན་པ་སྟེ། །མཁས་རྣམས་དེ་ལ་རྟོག་མི་བྱེད། །བཀྲུས་ཀྱང་དྲི་ལྡན་ཙནྡན་གྱི། །རང་བཞིན་གཞན་ཏུ་ཇི་ལྟར་བསྒྱུར། ༢༣ །རེ་བས་འདར་ལྡན་སེམས་ཀྱི་ནི། །རི་དབང་རྣམ་པར་མི་འགྱུར་བ། །དེ་སྲིད་སྙིང་རྗེའི་ཉི་ཟླ་ཡི། །རྣ་ཆ་ཅི་དགར་བྱིན་ཅེས་སྨྲེང་། ༢༤ །བདག་ལ་རྣམ་འགྱུར་བྱིས་པའི་མཚན་ཉིད་ཏེ། །ཁྱོད་ནི་མ་མྱོས་གཟུ་བོ་གཞན་སེལ་ཡིན། །དེ་བས་ནོངས་ན་ཚངས་མཛོད་དྲྭ་མ་ཡིས། །མ་བཏང་དངོས་ལྡེམ་གཉིས་ཀས་བདག་སྐྱོང་མཛོད། ༢༥ །མཐོ་སར་མ་ཕྱིན་བུབ་ཁར་མ་བཏང་ཞིང་། །བར་མ་ཡིས་ཀྱང་ཀུན་དགའི་མཐུ་དམན་པར། །རང་གི་ཕེར་ཤ་རང་གིས་བསྙད་བརྩོན་དེས། །བྱང་ཆུབ་དགའ་བ་རྒྱས་པའི་ཚལ་ནས་ཕུལ། ༢༦ །ཨ་མུ་ནཱ་ཀཱ་བྱཱ་སཾ་ཏྲྀ་པྟ་བྲྀདྡྷི་རསྟུ་ཨི་ཏི་བྷིཀྵུ་ཀརྨ་ཝཱ་གཱི་ཤཱ་ར་གུ་་སཱ་ག་རེ་། ས་མརྤི་ཏཾ།། ༈ །།ཏེར་སྟོན་མཆོག་གླིང་མདུན་ཕུལ་བའི་ཆབ་ཤོག། ༈ །།བསྟན་འགྲོའི་བདེ་སྐྱིད་པད་ཚལ་བཞད་པ་ཡི། །བཀའ་གཏེར་བསྟན་པའི་ཉི་མ་འདྲེན་པ་ལ། །རྩོད་པའི་མཐར་ཡང་ཤིང་རྟ་མཆོག་གྱུར་པ། །སྐྱེ་དགུའི་སྐྱབས་གཅིག་གང་གི་ཞབས་སྟེགས་སུ། །
ཡོན་ཏན་འོད་སྣང་མུ་མཐའ་མེད་པ་ལ། །ཉིན་རེ་བཞིན་ཏུ་དད་ཅིང་མོས་པ་ཡི། །འདབ་སྟོང་རྣམ་པར་བཞད་ལས་ཞུ་བའི་ཕྲིན། །ཚིག་དོན་རབ་ལྡན་སྦྲང་རྩིའི་ཟེགས་མ་འབུལ། །གཞི་ལ་འཁྲུལ་པ་བཅོམ་པ་དང་པོའི་མགོན། །རིགས་ཀྱི་ཁམས་ལ་ཐུགས་རྗེའི་རྩལ་གཡོས་པས། །མཁའ་ཁྱབ་རྣམ་པར་སྣང་བའི་སྤྲིན་བཀོད་དེ། །སྡུད་དང་སྤྲོ་སོགས་དུས་གསུམ་ཟད་མི་ཤེས། །ཀུན་གསལ་གཉིས་སྐྱེས་བགྲོད་པས་མཐའ་མི་དཔོགས། །འཕགས་རྣམས་རྣམ་ཐར་བྱིས་བློའི་དཔྱད་པས་མིན། །ཕྱོགས་རེའི་ཚུལ་ཡང་གཏིང་དཔག་དཀའ་བས་ན། །འགལ་འདུའི་ཕྲེང་བས་དམན་ལ་འཇིགས་པ་སྟེར། །ས་བཅུའི་དབང་ཕྱུག་འཕྲུལ་ཆེན་ཚད་མེད་དེ། །སྒྲིབ་པ་ཅན་ངོར་བརྗོད་པའི་ཐ་སྙད་ཙམ། །ཚུལ་དེ་དེང་སང་ཀུན་ལ་སྟོན་པས་ན། །མཆིང་བུའི་དབུས་སུ་ནོར་བུའི་རྒྱལ་པོ་བཞིན། །གཅིག་དང་དུ་མར་སྣ་ཚོགས་རྣམ་འཕྲུལ་ཅིང་། །གང་འདུལ་དེར་སྟོན་མཛད་པའི་རོལ་མོ་ཡིས། །གངས་ཅན་གདུལ་བྱ་ཤིན་ཏུ་གདུལ་དཀའ་རྣམས། །སྐྱེས་པ་རབས་ཀྱིས་མི་བསྙེལ་རྗེས་སུ་ཟུང་། །རྩོད་པའི་མཐར་ཐུག་མུན་གླིང་སྟུག་པོ་འདིར། །རྒྱལ་བ་ཟླ་བ་ཀུན་ཀྱང་བཏང་སྙོམ་ཚེ། །ཐུགས་རྗེའི་འོད་སྟོང་འབར་བས་གཞན་ཕན་མཁར། །གཅིག་པུར་རྒྱུ་ཡང་སྐྱོ་མེད་གོ་ཆ་འཁྲེགས། །འཚོ་
མཛད་སྲས་དང་བཅས་པས་མ་ཚོམས་པ། །ཉོན་མོངས་རྨ་སྲོལ་སྡུག་བསྔལ་ཟུག་རྔུ་ཅན། །ལེགས་པར་གསོ་བའི་ཐབས་མཁས་སྙན་པའི་རྔ། །ཕྱོགས་བཅུའི་རྒྱལ་རྣམས་དཔལ་གྱི་མགྲིན་པས་བརྡུངས། །ཕྲིན་ལས་འཁོར་ལོས་སྒྱུར་བའི་རྒྱལ་ཐབས་པར། །པདྨཱ་ཀ་རས་ཟོལ་གྱིས་བསྒྲགས་མོད་ཀྱང་། །དེ་ཡི་རྣམ་ཐར་མངོན་སུམ་སྟོན་པའི་ཞབས། །གྲུབ་པ་རིག་འཛིན་བྱེ་བའི་གཙུག་གིས་བསྟེན། །ཡ་མཚན་སྒྱུ་འཕྲུལ་དྲྭ་བའི་ངོ་མཚར་ལ། །བདེ་ཆེན་གར་མཁན་དཔལ་ལྡན་པདྨ་སྐྱེས། །དགྱེས་པའི་འཛུམ་ཞལ་དཀར་པོས་ས་གསུམ་གྱི། །བརྟན་གཡོ་ཀུན་ཀྱང་དགེ་ལེགས་གཟི་བྱིན་བསྐྱེད། །ཨོ་རྒྱན་སངས་རྒྱས་གཉིས་པའི་བཀའ་ལུང་གསེར་སྦྱངས་རྩིབས་སྟོང་རྣམ་པར་བཀྲ་བས་མདུན་བདར་ཉིང་། །འཕགས་ནོར་རིན་ཆེན་འབྱོར་པའི་དཔུང་བཅས་ཡངས་པའི་ས་ལ་ཆོས་ཀྱི་འཁོར་ལོས་སྒྱུར་བ་ན། །རྩོད་ལྡན་གྲང་ངད་རིམ་གྱིས་ལྷགས་པས་མཐར་བྱེད་སྙིགས་དུས་དགུན་གྱི་ནུས་སྟོབས་ཉམས་པ་དང་། །བདེ་ལེགས་རྫོགས་ལྡན་དཔྱིད་ཀྱི་ལང་ཚོ་གསར་དུ་བཞད་པས་བསྟན་དང་སྐྱེ་དགུའི་མགོན་ཏུ་གྲུབ། །བྱིས་པའི་སྣང་ངོར་ཕྱོགས་རེའི་ཡ་མཚན་གྱི། །མཛད་པའི་ཟློས་གར་སྒྱུར་ལ་མཚར་དུ་ཅི། །གང་གི་ཡེ་ཤེས་ཡངས་པའི་གར་མཛད་ན། །
སངས་རྒྱས་ཞིང་ཀུན་ཆོ་འཕྲུལ་ཆེན་པོས་གཡོ། །སྐྱེས་ཐོབ་རྣམ་དཔྱོད་རླབས་ཀྱི་སོར་མོ་ཡིས། །བྲིས་པའི་རེ་ཁཱ་ནམ་ཡང་མི་ཟུབ་པས། །ངལ་བརྒྱས་འབད་ལ་ཆ་ཙམ་མི་འཆར་བའི། །ལུང་རྟོགས་ཀུན་གསལ་ཆོས་ཀྱི་སྤྱན་དེ་མཚར། །སྐལ་བཟང་ཉིད་དོ་མཁན་སློབ་ཆོས་གསུམ་གྱི། །སྣང་བས་བསྲུངས་པའི་གངས་ཅན་འབངས་རྣམས་ཏེ། །པདྨའི་རྒྱལ་ཚབ་མཆོག་གི་གྲུབ་པ་ཡི། །གདུལ་བྱའི་སྣོད་གྱུར་དུས་འདིའི་འགྲོ་རྣམས་ཀྱང་། །ལྷོ་རླུང་མ་ལ་ཡ་ནས་འོངས་པའི་ངད། །དུས་ཀྱིས་བསྐུལ་བའི་ཁུ་བྱུག་མགྲིན་པའི་གླུ། །འཁྲུལ་མེད་དམ་པའི་སྐྱེས་བུའི་མཛད་པ་རྣམས། །ཆ་ཙམ་ཚོར་བས་སྔོན་མེད་དགའ་བ་སྐྱེད། །འདི་ན་དམ་པའི་ཕྱག་གིས་རབ་བཟུང་ཡང་། །ཆགས་སྡང་རྨོངས་པའི་འདམ་ལས་མ་བརྒལ་བར། །དམར་སེར་ཁ་དོག་འཆང་བའི་ངུར་པ་ཡང་། །སྙན་སྙན་སྒྲ་འབྱིན་རྩིས་གདབ་བྲལ་བར་མཆིས། །སྲིད་པའི་བདེ་འབྱོར་ལས་ཀྱིས་མ་འབྲེལ་བས། །ངེས་འབྱུང་མ་དགོས་ཀུན་སྤངས་གདོད་ནས་གྲུབ། །དེ་ཉིད་མཐར་ཕྱིན་གྱུར་ན་དགའ་བ་ཡང་། །བསམ་གཏན་དངོས་གཞི་གྲུབ་པའི་ཡིད་བདེ་བཞིན། །ན་ཚོད་སྟོབས་ཀྱིས་དབང་པོའི་རིམ་གུད་ཀྱང་། །སྲོག་གི་ཀ་བ་རྩ་གསུམ་ཐུགས་རྗེས་བརྟན། །ཐོས་བསམ་སྒོམ་པའི་གཟུགས་བརྙན་རང་བཞིན་
ཏུ། །ཡལ་བའི་མཐའ་མ་ཡིད་བྱེད་སྤངས་ཏེ་བདོག །མཚམས་ཀྱི་ཞུ་འབྲས། །དགོས་འདོད་ཀུན་འབྱུང་གཏེར་གྱི་བུམ་པ་བཟང་། །ཕོངས་པ་ཀུན་སེལ་དྲི་མེད་བཻ་ཌཱུརྻ། །སྙིགས་མའི་མུན་སེལ་ཉི་ཟླའི་དཀྱིལ་འཁོར་བཞིན། །དེང་སང་སྐྱེ་དགུའི་མགོན་ཏུ་སྐྱེས་མཆོག་ཁྱོད། །ཁོ་ན་སྨོན་ལམ་མཐུ་དང་ལྡན་གཟིགས་ནས། །གངས་ཅན་མགོན་པོ་མཚོ་སྐྱེས་རྒྱལ་བ་ཡིས། །འགྲོ་འདུལ་བཀའ་ཡི་རྟགས་དང་ངེས་པའི་ལུང་། །རིག་འཛིན་རིགས་ཀྱི་ཚོགས་རྗེར་མངའ་གསོལ་ཏེ། །བུ་གཅིག་བཞིན་ཏུ་ཐུགས་རྗེས་བསྐྱེད་བསྲིངས་པའི། །བདེན་པའི་སྟོབས་དང་བདག་གཞན་ལེགས་བྱས་མཐུས། །བགྲང་བྱ་བརྒྱ་ཕྲག་སྙེད་དུ་རྡོ་རྗེའི་སྐུ། །འདི་ཉིད་ཁོ་ནས་གདུལ་བྱ་ཀུན་འདུལ་ཞིང་། །ཟབ་རྒྱས་ཆོས་ཀྱི་རྔ་ཆེན་རྟག་ཏུ་བརྡུང་། །ཆོས་ཀྱི་དུང་འབུད་ཆོས་ཀྱི་རྒྱལ་མཚན་སྒྲེང་། །སྡིག་ཏོའི་ཕྱོགས་གྱུར་མིང་ཡང་མི་གནས་ཤིང་། །བསྟན་འགྲོའི་བདེ་སྐྱིད་མངའ་ཐང་དགུང་ལ་རེག །དེ་སྲིད་བདག་ཀྱང་བརྩེ་ཆེན་ཡེ་ཤེས་ཀྱི། །གཟིགས་པས་ནམ་ཡང་མི་འདོར་ཐུན་མོངས་དང་། །ཁྱད་པར་ཐུན་མིན་ཟབ་གསང་བདུད་རྩིའི་ཀླུང་། །ཐེ་ཚོམ་སྐྱོན་སྤངས་མོས་གུས་ཚུགས་བརྟན་པའི། །སྙིང་གི་བུམ་པ་བཟང་པོར་ལེགས་སྩལ་ནས། །འཕྲལ་ཡུན་ལེགས་པའི་བཅུད་ཀྱིས་རྒྱས་པ་དང་། །
རྡོ་རྗེའི་གསང་གསུམ་དངོས་སུ་བསྙེན་པ་ཡི། །སྐལ་བཟང་ལོངས་སུ་སྤྱད་པར་རྩེ་གཅིག་ཏུ། །གསོལ་བ་འདེབས་རྟེན་ལྷ་གོས་སྟོན་ཟླའི་མདངས། །བཟང་ཇའི་བམ་པོ་བཀྲ་ཤིས་གྲངས་ལྡན་བཅས། །དེ་བཱི་ཀོ་ཊིའི་ཆར་བརྟེན་སྒྲུབ་པའི་གནས། །ཙཱ་འདྲ་རིན་ཆེན་བྲག་ནས་ཕྱག་བཅས་ཕུལ།། ༈ །།གང་གི་མཁྱེན་དཔྱོད་དོ་ར་ན། །དགེ་ལེགས་སྐྱེད་ཚལ་ཅི་ཡང་འཁྲུངས། །ལེགས་བཤད་ཟིལ་དངར་འཛགས་པ་ལ། །ངལ་མེད་ལྗོན་པའི་དབང་པོའི་དྲུང་། །ཚིགས་སུ་བཅད་པའི་ཕྲེང་མཛེས་ནི། །དོན་བཟང་ནོར་བུའི་སྒེག་པ་ཅན། །ཡིད་གཅུགས་སྐྱེས་སུ་བསྲིངས་པ་ལས། །དགའ་བ་དུས་ཀྱི་དང་པོ་བཞིན། །ཐོས་བསམ་གསེར་གྱི་དྲྭ་བས་གཡོགས། །ངེས་འབྱུང་ཁྲིམས་ཀྱི་ཤ་ཚུགས་བརླིང་། །སྲི་ཞུའི་ཁུར་ཆེན་རིང་བཏེགས་ནས། །དེང་སང་དབེན་པའི་དགའ་ཚལ་ན། །བསམ་གཏན་པད་རྩའི་བཅུད་མྱང་ཞིང་། །ཐར་པའི་གྲོང་དུ་སྙེགས་བརྩོན་པ། །དམ་པ་རྣམས་ཀྱི་རྣམ་ཐར་ཏེ། །བདག་གིར་མཛད་ལ་རྗེས་ཡི་རང་། །འདི་ན་རྣམ་དཀར་ལྟར་སྣང་གིས། །བྲེལ་བའི་དགེ་སྦྱོང་ཤིན་ཏེ་མ། །ཁྱད་པར་མངོན་དུ་མ་བྱས་ཀྱང་། །དེ་རྒྱུར་འབད་བཞིན་འཚོ་བར་མཆིས། །གསུང་མཆིད་ཇི་ལྟར་འབྱོར་པ་བཞིན། །དེང་སང་སྙིགས་
མ་ཤིན་དུ་བདོ། །རྒྱལ་བསྟན་རྟགས་ཙམ་འཛིན་ལ་ཉེ། །མི་ཁ་ལྔ་པོས་བདེ་སྐྱིད་བཅོམ། །ཐོས་བསམ་སྒོམ་པ་ལིང་གིས་བོར། །བསྟན་རྩ་བསླབ་གསུམ་རྨངས་ནས་ཞིག །བླ་མས་སྡེ་དཔོན་ལད་མོ་བྱེད། །དགེ་འདུན་ཁྱིམ་གྱི་འདུ་འཛི་སྒྲུབ། །སྐྱེ་བོས་ཁྲེལ་དང་ངོ་ཚ་ཤོར། །བསམ་སྤྱོད་ལོ་རེ་བཞིན་ཏུ་འགྱུར། །ཀུན་ཀྱང་མི་དགེའི་ཡོ་ལངས་ལ། །སྤྱོད་འདི་དུས་ངན་མཐར་ཐུག་པ། །རིགས་པས་གྲུབ་པའི་ལུང་བསྟན་ཏེ། །ལྐོག་གྱུར་ཡིག་ཆུང་ཚོལ་མ་དགོས། །སྔོན་གྱི་གཏེར་ལུང་མང་མཐོང་ཞིང་། །རྡོ་རྗེའི་གསུང་ལ་འཁྲུལ་མེད་ཀྱང་། །གཏེར་ལུང་ཕལ་ཆེར་དགོངས་པ་ཅན། །གནས་དུས་རྟེན་འབྲེལ་དབང་གིས་བསྒྱུར། །བཟང་ངན་ལྡོག་གམ་རྒྱུ་དང་རྐྱེན། །ཅུང་ཟད་ཙམ་ལ་བརྟེན་པ་མང་། །ཕལ་ཆེན་མཐུན་པ་དུས་ངན་ཀྱི། །ལ་ཚེགས་བཅུ་གཅིག་གསུངས་པ་ལས། །ད་ལྟ་དུས་ཁུགས་དགུ་བར་སླེབ། །འདི་ལ་སྐྱེས་བུ་དམ་པ་རྣམས། །ད་ཁྱོད་རིས་སུ་མི་བཅད་པར། །བསྟན་འགྲོ་སྤྱི་ལ་སྨན་པ་ཡི། །ཐུགས་བསྐྱེད་གོ་ཆ་བགོ་བ་དང་། །དམ་སྐང་དོང་སྤྲུགས་ཐབས་ཀྱི་མཆོག །ཁོ་ན་གནད་དུ་ཟབ་པ་ལགས། །དེས་ན་རྒྱལ་དང་འཕགས་པའི་ལུང་། །བསླུ་མེད་གཟོད་ནས་གྲགས་དེ་གཙོ། །དེ་ཡང་བཞེད་སྲོལ་ཐ་
དད་ཀྱང་། །ཡོངས་གྲགས་ལུང་གི་བསྟན་པའི་མཇུག །རིགས་ལྡན་ད་རུང་གཉིས་སམ་གསུམ། །འབྱོན་པར་བཞེད་པས་དེ་ལྟར་ན། །བསྟན་པ་ཚུལ་ལྡན་འབྱུང་དཀའ་ཡང་། །གཟུགས་བརྙན་རྒྱུན་འདི་རེ་ཞིག་ཙམ། །འཇིག་རྟེན་ཁམས་སུ་བཞུགས་སམ་སྙམ། །ཁྱད་པར་སྙིགས་དུས་སྐྱོབས་པའི་མགོན། །ཨོ་རྒྱན་གུ་རུའི་ཕྲིན་ལས་ནི། །དེང་སང་དུས་ཀྱང་ཉི་ཟླ་ལྟར། །མངོན་སུམ་བདལ་བ་འདི་ལྟར་ན། །ད་དུང་ངལ་གསོ་འབྱུང་ལ་རེ། །ཁྲིམས་གནས་མང་ཐོས་ནགས་ཀྱི་ནང་། །ལང་ཚོ་ཡོལ་བས་གནས་པ་ནི། །འདི་དང་གཏན་ཏུ་བདེ་བར་གསུངས། །འོན་ཀྱང་དེང་སང་དགེ་སྦྱོང་ནི། །ཕལ་ཆེར་ཆོས་བརྒྱད་ལོག་འཚོས་བསླུས། །དལ་འབྱོར་ནོར་བུ་རྣམ་གཡེང་གི། འདམ་དུ་ཆུད་ཟོས་གྱུར་པ་མང་། །ཤེས་ཀྱང་ལག་ཏུ་མ་བླངས་ན། །དགོས་དུས་ཅུང་ཟད་སྟོངས་མི་འགྱུར། །ཚུལ་བཞིན་ཉམས་སུ་བླངས་བ་ན། །ཡིག་དྲུག་ཁོ་ནས་སངས་རྒྱས་འཐོབ། །དེང་སང་ཚེ་ཐུང་ཤེར་བརྩོན་དམན། །སྤྲོས་པའི་ལོངས་སྐབས་མི་སྣང་བས། །སྤྲོས་མེད་གནས་ལུགས་ཕྱག་ཆེན་སྒོམས། །བཟླས་པ་ཡི་གེ་དྲུག་མར་དྲིལ། །རྟག་ཏུ་ཀུན་རྫོབ་བྱང་སེམས་སྦྱོངས། །དང་པོ་རང་སེམས་ངོ་བོར་བལྟ། །བསྒོམ་དུ་མེད་དེ་རྩིས་གདབ་བྲལ། །ཡེངས་སུ་མེད་དེ་དྲན་རིག་གསལ། །ཤེས་པ་ཕྱི་
མས་སླད་མི་གཞུག །འགྱུ་བ་རང་གྲོལ་གཉེན་པོ་མེད། །ཡིན་པ་དེ་ཡི་མ་ཚིམས་པར། །མིན་ལ་མཆོག་ཏུ་འཛིན་པས་གོལ། །མ་བཅོས་ཐ་མལ་ཤེས་པ་བསྐྱང་། །བོགས་འདོན་བླ་མའི་མོས་གུས་བསྒོམ། །གཉིས་པ་བཟླས་བསྒོམ་བྱ་བླ་ཞིང་། །ཕན་ཡོན་བྱིན་ཆེ་དངོས་གྲུབ་མྱུར། །འོན་ཀྱང་བསྐྱེད་རྫོགས་ཏིང་འཛིན་དང་། །མ་འབྲེལ་ནེ་ཙོའི་ཁ་ཏོན་འདྲ། །བསྐྱེད་རིམ་སྒོ་མཁན་རང་གི་སེམས། །སྣང་དུས་ཉིད་ནས་ངོ་བོས་སྟོང་། །སྟོང་པའི་རང་རྩལ་ལྷ་ཡི་སྐུ། །རང་ཤར་གསལ་ལ་འཛིན་མེད་ངང་། །བཟླས་པས་ལས་ཀྱི་སྒྲིབ་པ་འདག། གསུམ་པ་སངས་རྒྱས་བསྒྲུབ་ཕྱིན་ཆད། །མེད་ཐབས་མེད་པའི་བྱང་ཆུབ་རྒྱུ། །ཕྱོགས་རིས་མེད་པའི་སྙིང་རྗེ་ཡིས། །བྱས་ཚད་མཁའ་མཉམ་སེམས་ཅན་དོན། །རྫོགས་པའི་སངས་རྒྱས་བསྒྲུབ་པའི་བློ། །རྨི་ལམ་དུ་ཡང་འབྲལ་མི་བྱེད། །བོགས་འདོན་བཏང་ལེན་དམིགས་པ་སྐྱོང་། །བསྔོ་བས་སྤེལ་ཞིང་སྨོན་ལམ་ཀྱང་། །ཚད་མེད་བཟང་པོ་སྤྱོད་ལ་སློབ། །དེ་གསུམ་ནང་དུ་མདོ་སྔགས་ཀྱི། །དོན་རྩ་འདུས་ཤིང་ཉམས་ལེན་བདེ། །འདི་ཙམ་དྲན་ཤེས་བརྟན་ཕྱིན་ཆད། །ནམ་དགོས་དུས་སུ་སླེབ་པའི་ཆོས། །མཐོ་མཐོ་ཟབ་ཟབ་མང་ན་ཡང་། །ལེགས་སྙམ་ངང་ནས་མི་ཚེ་འཛད། །གང་བློར་
ཤེས་བྱར་ཀུན་ཆུབ་པས། །འདི་ཙམ་གདམས་རིན་མི་ཆོག་ཀྱང་། །ཇི་སྐད་གསུངས་པའི་མཆིད་ལན་ཏུ། །ཕུལ་ནས་ཆོས་ལྡན་འཚོ་བ་ཡིས། །ལོ་བརྒྱ་ཏུ་ཡང་འཚོ་བཞིན་པར། །གཉུག་མའི་གཏན་སྲིད་ཟིན་པ་དང་། །དེ་སྲིད་མཉེས་གཤིམ་མཆིད་འོས་པ། །ཡང་ཡང་སྤྲོ་ལ་གཅིག་ཏུ་འདུན། །ཟ་ཟིང་སྒྲ་འབྱིན་བུང་བ་མོ། །སྙན་གྱི་ཨུཏྤལ་རྒྱས་པའི་དབུས། །དེངས་པའི་རྟེན་གྱི་འདབ་ཟུང་བཅས། །དེ་བཱ་ཀོ་ཊིའི་ཚལ་ནས་སོང་། །ཤུ་བྷ་ས་མརྤི་ཏཾ། །མཁས་དབང་སྒྲུབ་པ་པོ་ཞིག་གི་མཆིད་ལན་ཏེ་མིང་མ་ཤེས།། །།།བླ་མ་པདྨ་ཉིན་བྱེད་ཞལ་སྔ་ནས་ལྕང་སྐྱ་སྤྲུལ་སྐུར་གནང་བའི་གསུང་ཚལ་ལོ། །ཆེ་དགུའི་གཙུག་གི་ནོར་བུའི་གདེང་ཀ་ལ། །ཕྱག་རྒྱས་འདེབས་པ་ཞབས་ཀྱི་པདྨའི་རྡུལ། །འཕོས་པ་ཁོ་ནས་སྲིད་དང་ཞི་བའི་དཔལ། །སྟེར་མཛད་འགྲོ་བའི་བླ་མ་ག་ལ་བར། །ཤེར་བརྩོན་ལང་ཚོ་དར་ལ་བབ་མིན་ཀྱང་། །ལྷག་བསམ་
དཀར་པོའི་གཟི་མདངས་མ་ཉམས་པའི། །སྒྲུབ་བརྒྱུད་རིགས་ཀྱི་དགེ་སྦྱོང་སྙོམས་ལས་པས། །དད་གསུམ་ཐལ་མོས་མཚོན་ཏེ་མཆིད་འདི་གསོལ། །ཚངས་སོགས་ཆེ་རྣམས་བསྙེན་པའི་གསེར་གྱི་ཁྲིར། །རིན་ཆེན་མྱུ་གུ་གསར་པའི་འདབ་ལྡན་ལ། །རིན་ཐང་མེད་པའི་བསྔགས་པ་བརྒྱས་སྤྲས་པས། །ཐ་ཤལ་ཚིག་གི་འཆིང་བུས་མཛེས་མིན་ཀྱང་། །སྔོན་ཏུ་ཐམས་ཅད་གཟིགས་པའི་ཡེ་ཤེས་ཀྱི། །མེ་ལོང་ངོགས་སུ་བརྩེ་བས་ཁ་དྲངས་ཏེ། །རིག་པའི་གཟི་འབར་ཆོས་ཀྱི་སྣང་བ་གང་། །བཀའ་དྲིན་ཆེན་པོས་བཟུང་བ་ཡིན་ཅེས་ཐོས། །དེ་ཕྱིར་ཤིན་ཏུ་གུས་པའི་རྒྱུན་དེ་ནི། །ད་དུང་ལྷོད་པ་མིན་ཀྱང་ཡུལ་དུས་ཀྱིས། །བསྐལ་པས་ཞལ་གྱི་དཀྱིལ་འཁོར་བལྟ་བ་དང་། །གསུང་གི་གླིང་བུ་ཐོས་པའི་སྐབས་མ་ཕྱེད། །དེང་དུས་སྒྲོ་སྐུར་ཡུལ་ལས་རབ་འདས་པའི། །ཆོས་ཀྱི་དེ་ཉིད་ཆགས་ཐོགས་མེད་གཟིགས་པས། །བསྟན་པའི་བདག་པོ་ཆེན་པོའི་རྒྱལ་ཐབས་པར། །འཚོ་ཞིང་གཞས་པའི་རྣམ་ཐར་དབྱར་གྱི་རྔ། །ཐོས་པའི་མོད་ལ་སྤྲིན་སྒྲས་སྒེག་པ་བཞིན། །དགའ་བས་བྲེལ་ཏེ་རྨོངས་ཚིག་བཅད་པའི་ཕྲེང་། །རྒྱལ་བའི་སྲས་རྣམས་མཁའ་དང་ལག་མཐིལ་ཡང་། །མཉམ་པོར་གཟིགས་སླད་སྤྱི་བརྟོལ་བསྐྱེད་དེ་ཕུལ། །འདི་ན་རང་ལུགས་རྒྱ་མཚོར་གནས་བཅས་ཀྱང་། །རིས་
མེད་བསྟན་ལ་གུས་པའི་གཤོག་དཀར་བསྐྱོད། །ཆོས་བཞིན་སྨྲ་བས་རིག་མཐུན་སྤྲོ་བསྲིང་བ། །སྟོན་གྱི་དབྱངས་སྙན་དག་ལ་ཅོ་འདྲིར་མཆིས། །མཚམས་སུ་ཞུ་འབུལ། གང་གི་རང་བཞིན་འཆར་བ་ཙམ་ཉིད་ནས། །མུན་པའི་བརྟན་པ་འཕྲོག་ཅིང་འཇིག་རྟེན་ལ། །སྣང་བ་རབ་སྟེར་ཉི་མའི་དཔལ་མངའ་བ། །ཁྱོད་ཞབས་བསྐལ་པ་རྒྱ་མཚོར་བརྟན་པ་ནས། །རིང་ན་གནས་ཀྱང་ཐུགས་རྗེའི་སྤྱན་རས་ཀྱིས། །གཟིགས་པ་མི་ལྷོད་ལེགས་པར་གསུངས་པའི་སྐྱེས། །མཐོང་ན་དགའ་བ་པདྨ་ལྟ་བུ་ཡིས། །རེ་བའི་ཤིང་རྟ་ཡང་ཡང་འགེངས་པ་ཞུ། །ཞེས་ཞུ་འདེགས་རྟེན་ལྷ་རྫས་རབ་དཀར། །འགུ་ལོག་གི་ལང་སྤྲུལ་སྐུ་ཐུགས་རྡོར་ལ་ཕུལ་བའི་ཆབ་ཤོག། ༈ །།བརྟག་པར་དཀའ་བའི་བློ་གྲོས་དང་། །ཏིང་འཛིན་རྒྱ་མཚོ་ཟབ་མོ་ནི། །རྙོག་པའི་དྲི་མས་མ་བསླད་པ། །རྣམ་དཔྱོད་རླབས་ཕྲེང་གཡོ་བ་དེར། །གུས་པས་ཞུ་གསོལ། །འབྲེལ་བའི་སྙིང་པོ་ཆོས་ཀྱི་འདབ། །འཛུམ་ལྡན་ཚིག་གི་མེ་ཏོག་ནི། །ཤིན་ཏུ་གུས་པའི་སྙིམས་
པ་ཡིས། །དགྱེས་བསྐྱེད་དོགས་པའི་བསྟི་སྟང་དབུལ། །དཔལ་གྱི་དུམ་བུས་མ་ལ་ཡའི། །རྐང་འཐུང་ཀུན་ལ་དཔལ་སྟེར་བྱེད། །དམ་པའི་ཡོན་ཏན་དྲིས་བགོས་པས། །སྐྱེ་བོ་ཕལ་ཆེར་དམ་པར་མཚོན། །སྙེམས་པ་མེད་པར་ཀུན་དགའི་རོ། །སྣང་དང་ལྷན་ཅིག་འཇིག་རྟེན་ན། །ཕན་མཛད་ཟླ་བ་རིན་ཆེན་དང་། །དམ་པའི་སྐྱེས་བུའི་ངེས་པ་ཡིན། །མཁྱེན་སྟོབས་རྐང་པ་བརྒྱད་ལྡན་ཞིང་། །རིག་སྔགས་གྲུབ་པའི་ཤུགས་འཆང་བར། །གྲགས་ལྡན་མཁའ་ལ་བསྐྱོད་པ་ན། །ཟོལ་གྱིས་ཁེངས་པའི་རི་དྭགས་འདར། །བདག་ཉིད་ཆེ་རྣམས་ལུས་དང་སེམས། །སྐྱོན་མེད་དགེ་བའི་རང་བཞིན་ཕྱིར། །རང་གཞན་ཕན་པ་ཁོ་ནའི་གཏེར། །ཆོས་ཀྱི་སྲིད་ལ་མངའ་མཛད་པས། །རྩྭ་རྩེས་གཞལ་བའི་རྒྱ་མཚོ་ལྟེར། །ཚིག་གིས་ཡོན་ཏན་མི་དཔོག་པས། །མཆོག་གི་བདག་ཉིད་ཆེན་པོ་ཞེས། །ཕྱག་འོས་ཉིད་ཀྱིས་དེ་ཉིད་མཚོན། །དེས་ན་གྲགས་སོགས་སྣང་ཤས་ཀྱི། །ཕྱིར་མིན་དམ་པ་ལ་དགའ་བ། །པདྨར་ཕྱོགས་པའི་བུད་བ་བཞིན། །ཞུ་ཚིག་དར་དིར་བསྒྲགས་པ་ལགས། །འདི་ན་དབེན་གསུམ་གདུང་བར་ཡང་། །འདོད་ལས་ཕྱིར་ཕྱོགས་ཀློག་པའི་གྲྭར། །མི་མཁས་བཞིན་ཏུ་སྨྲ་བའི་ཁུར། །ནད་ཀྱི་ལྕིད་དུང་ལྷན་ཅིག་མཆིས། །མཚམས་ཞུས། །གང་
ཁྱོད་ཐུན་མོང་ཐུན་མིན་གྱི། །རིག་དང་མདོ་སྔགས་བྱང་ཆུབ་པས། །ཆར་ལ་དབང་བའི་གདེངས་ཅན་བཞིན། །རྒྱལ་བསྟན་འཚོ་བའི་ནུས་པ་རྫོགས། །དེ་ཕྱིར་མཆོག་བསྟན་བཟང་པོའི་གོས། །རྩོད་འཆད་རྩོམ་པའི་ཡུ་བས་བཏེགས། །ལྷག་པར་སྔ་འགྱུར་ནོར་བུའི་ཏོག །འཇིག་རྟེན་མཛེས་པའི་རྒྱན་ཏུ་ངོམས། །གཞན་ཕན་སྙིང་སྟོབས་བག་བརྐྱང་བས། །རྟག་ཅིང་ཁྱབ་པའི་ཕྲིན་ལས་བརྡལ། །འགྱུར་མེད་སྐུ་ཚེའི་འདུ་བྱེད་ཀྱང་། །མཁའ་དང་རྡོ་རྗེའི་སྙིང་པོར་གྱུར། །མཁས་པའི་ཉི་མ་ནུབ་ནས་རིང་ཞིག་ན། །དོགས་པས་དབེན་པའི་བརྒལ་བརྟགས་ཀུ་ཅོ་ཅན། །མུན་པར་བཙུད་པའི་སྣང་བ་གསར་པ་ཞིག །རྣམ་དཔྱོད་མཁའ་ཡི་རུམ་ནས་སྤྲོ་བར་འོས། །འདིར་ཡང་རྣམ་ཀུན་བརྩེ་ཆེན་དགྱེས་པ་ཡིས། །མི་འདོར་དགེ་མཚན་ཟེག་མ་སྤྲོ་བ་དང་། །དངོས་སུ་མཇལ་བའི་དགའ་སྟོན་དཔྱིད་ཀྱི་དཔལ། །ལྷག་བསམ་དུས་ཀྱི་དང་པོས་དྲངས་པར་སྨོན། །ལྷ་རྫས་ཞུ་ཆུང་གཟིགས་པའི་རྟེན། །ཕྲ་ཡང་པད་རྩ་ལྟར་དཀར་བ། །སྲིད་ཞིའི་དཔལ་སྤུངས་ཆོས་ཀྱི་སྡེར། །འདུ་ཤེས་གསུམ་གྱིས་བསྟི་དེས་ཕུལ།། །།༈རྗེ་བླ་མ་པདྨ་ཉིན་བྱེད་ཞལ་སྔ་ནས་འབྲུག་པ་རྒྱལ་དབང་ཆོས་རྗེར་གནང་བའི་གསུང་ཚབ་བྲིས་པ། །སྡེབ་སྦྱོར་མཉམ་པའི་བྲྀཏྟ་ལས་ཡི་གེ་བརྒྱད་པ་རྗེས་བསྔགས་ཀྱི་བྱེ་བྲག་བྷ་བྷ་ག་ག་
སྟེ་ཙི་ཏྲ་པ་དཱ་ཞེས་བྱ་བའི་པྲ་སྟཱ་རས་མཛེས་པའོ། །ཚོགས་གཉིས་ཕྱོགས་ཀྱི་འཕེལ་བ་རྫོགས། །སྣ་ཚོགས་ཡོན་ཏན་འོད་སྣང་ཅན། །ཆོས་ཀྱི་བདུད་རྩིས་སིམས་བྱེད་པ། །ཐུབ་དབང་ཟླ་བས་ཁྱེད་ལ་སྲུངས། །ཤིན་ཏུ་གཙང་ཞིང་རྣམ་དཔྱོད་རིན་ཆེན་གྱི། །མཐའ་བྲལ་མཁྱེན་བརྩེའི་ངོགས་སུ་མཁས་རྣམས་ཀྱིས། །བསྔགས་པའི་མེ་ཏོག་དོགས་པས་རབ་ལྕི་བ། །གཞུང་ལུགས་ཆུ་བཞིའི་བདག་པོ་ག་ལ་བར། །དོན་བཟང་ལང་ཚོས་སྒེག་པའི་ཉམས་དེ་དང་། །ཚིག་གི་འགྱུར་བག་མེ་ན་ཀཱ་ཡི་གླུ། །དུས་ཀྱིས་བསྐུལ་བའི་གཏམ་གྱི་མདོངས་གསོལ་དུ། །གྲགས་པ་རྣམ་གསལ་དགེ་སྦྱོང་རྒན་པོས་ལེན། །གྲུབ་རིགས་གདེངས་ཀ་དག་ལས་ཆས་གྱུར་པ། །མང་ཐོས་རིན་ཐང་མེད་པའི་རིན་ཆེན་སྒྲོམ། །གཅིག་ཏུ་གནས་བཅས་མཁས་པའི་འདུ་ས་སྟེ། །གཞན་ཏུ་མཆིས་ན་དེ་ཡི་དབུལ་བ་འཕྲོགས། །སྐྱེས་ཐོབ་སྤྲིན་གྱི་རུམ་ནས་གཞུང་མང་གི། །མཁྱེན་པའི་རྔ་སྒྲ་དྲག་ཏུ་དགོད་པ་དང་། །
དབུ་མའི་རྣོ་ལྡན་ཁྱུ་མཆོག་རླབས་པོ་ཆེའི། །གཏན་ཚིག་གློག་གི་ཐག་པས་དྲངས་པའི་ལྕེ། །ཆོས་ཀྱི་འདུན་སར་འཕངས་པའི་ཟིལ་དང་བརྗིད། །མ་བཟོད་ཀ་ན་ཀ་ཡི་ཅོད་པན་གྱིས། །ཀུན་ནས་དུད་པ་ཡེ་ཤེས་མེ་ལོང་ནི། །དོན་བརྒྱུད་མཛེས་པའི་རྒྱན་ཏུ་ངོམས་པ་བཞིན། །བདེ་འབྱུང་གཙུག་གི་ནོར་བུས་མི་ཟུམ་ཞིང་། །རྡུལ་གྱི་ཟེག་མ་སྐྱུག་མིན་རི་བོའི་ཁོངས། །གྲགས་པའི་པདྨོ་རབ་རྒྱས་དགའ་ཚལ་ན། །ས་དང་མཐོ་རིས་གྲུབ་པ་དག་ཀྱང་རྩིས། །ལུང་གི་དུས་ན་གཙོ་ཆེར་བཤད་པ་དང་། །མཁོན་ལ་རྒྱུ་འབྲས་སྐུད་པས་ཚེམ་པ་སྒྲུབ། །རྒྱལ་བའི་མྱུ་གུའི་ཐབས་སུ་རྐང་བཀོད་པ། །དེ་ལྟའི་བསོད་ནམས་བསགས་པ་ཕལ་གྱིས་མིན། །གཞན་དོན་མེད་པར་རྟོགས་པའི་བཅུད་མྱོང་ནས། །བྱང་ཆུབ་གོ་སྐབས་ཕྱེད་པར་དཀའ་བ་ཉིད། །འདོད་ཅན་ནགས་སུ་ཉལ་བའི་རླུང་ཟ་དང་། །སྨྲ་བ་ལྡན་མིན་ཙམ་ལས་ཁྱད་པར་གང་། །རྣམ་པར་མ་ཞི་ཕྲ་རྒྱས་གཟིངས་པ་ཡི། །མི་མཐུན་བརྟུལ་ཞུགས་རབ་བརྟན་མཁོན་པའི་རྩེ། །གདུལ་དཀའ་འདུལ་བ་རྒྱལ་བའི་སྲས་དག་གི། །ཐབས་མཁས་ལྷུར་ལེན་མཛད་པ་དེ་རྨད་བྱུང་། །སྔོན་ཆད་སྤྲིན་སྒྲས་མཚན་པ་རྒྱལ་བ་ཡི། །བྱིན་རླབས་སྲད་བུས་ལྷན་ཅིག་སྦྲེལ་བའི་སྙིང་། །ཆོས་མཐུན་མཛའ་ལྕུག་རེ་ཁཱས་བཏབ་པར་ཡང་། །ད་ཀོ་
གཏམ་གྱི་སྙན་པས་སད་པར་གྱུར། །ཇི་ལྟར་མཐོང་ངམ་ཐོས་པ་ཁོ་ནས་ཀྱང་། །སྤྲོ་བས་སིམས་པ་རྨ་བྱས་འབྲུག་སྒྲ་དང་། །ངང་པས་སྟོན་གྱི་བཞིན་ཏུ་དཔལ་འཛིན་པ། །མཚན་བཟང་དོ་ཤལ་དཔྱངས་པའི་རྒན་བུས་མཆིད། །བདག་ཀྱང་བློ་གྲོས་གོམས་སྟབས་ཁྱར་ཁྱོར་གྱིས། །བསྟན་པའི་ཁུར་ཆེན་འདེགས་ལ་སྤྲོ་མིན་གྱི། །ལྷག་བསམ་དར་བས་རྒྱལ་བཀའ་འགྱུར་རོ་ཅོག །བཀླག་ལུང་སྤེལ་སོགས་བསྟན་འགྲོའི་དོན་བསྒྲུབ་མོད། །རིག་པའི་སྐྱེས་བུས་བཟོད་ཀྱང་ལུས་ཀྱི་རྟ། །འདི་ལ་བདག་ནི་བརྣག་པའི་ཡུལ་མིན་ཞེས། །དུབ་པ་བཞིན་ཏུ་དབེན་གསུམ་མལ་ས་ན། །གཉུག་མའི་འགོག་བཟླས་ཟོལ་གྱིས་ཡིབས་པར་བརྩམས། །མཚམས་ཞུས། །ཁོར་ཡུག་བར་དུ་ཉི་ཟླའི་སྣང་བ་ཡིས། །མ་གཏམས་བྱ་བ་དག་ལ་ཇི་ལྟར་འཇུག །དམ་པའི་དཔལ་གྱིས་མ་བཟུང་གལ་ཏེ་ན། །འཇིག་རྟེན་ལས་ཀྱི་རྒྱ་ལས་འདའ་ནུས་སམ། །རྐང་འཐུང་ཕལ་པའི་ཁྲོད་ན་ས་མཆོག་དང་། །ས་ལས་གསེར་ཡང་རྙེད་པ་ཙམ་ཡིན་གྱི། །དེང་སང་སྐྱེ་བོའི་ཁྲོད་ན་བློ་གྲོས་ཀྱི། །ནོར་གྱིས་འབྱོར་པ་དེ་བས་ཆེས་ཆེར་དཀོན། །སྙེངས་པ་མེད་པའི་རྣམ་དཔྱོད་ལྡན་ན་ཡང་། །རང་རྒྱུད་དུལ་བས་ཤིན་ཏུ་མ་བསྡམས་པ། །དུག་ཅན་རྐང་པ་སྦས་པས་བཟུང་བའི་ནོར། །རེ་བ་འཚལ་ཡང་སུ་ཞིག་ལེན་
པར་ནུས། །མཁས་ཀྱང་མ་དྲེགས་གྲགས་ཀྱང་མ་བསྙེམས་པ། །ཡོངས་རྫོགས་བསྟན་པ་གསལ་བའི་མཁའ་ལྡིང་གི། །མཆོད་སྡོང་གང་ཁྱོད་རིང་དུ་འཚོ་གཞེས་པ། །ཁོ་ནས་སྲིད་ན་དོན་ཆེན་འགྱུར་བའི་ཕྱིར། །ཏིང་འཛིན་གཏན་པས་བཅད་པ་སྲོག་རྩོལ་གྱི། །སྒོ་གླེགས་འཕོ་བྲལ་དྭངས་པའི་ཏི་ལ་ཀ །ནཱ་དར་སྙོམས་འཇུག་མི་ཤིགས་བདེ་བ་ལས། །ཕྱིར་མི་ལྡོག་པའི་སྒྲ་དབྱངས་ལེན་པར་འཚལ། །ལྟར་སྣང་མཛའ་བས་ཡུན་རིང་བཅིངས་པ་ཡང་། །རྣམ་འགྱུར་རེ་རེས་ཐལ་བ་ལྟར་བགྱིད་མོད། །འུ་ཅག་འདའ་ཀ་ཆོས་ཀྱི་འབྲེལ་པའི་མཆེད། །རྣམ་ཀུན་ཟབ་གསལ་ཐུགས་སུ་གཅག་པ་ནས། །ཀུན་དགའི་རོ་ལྡན་དོན་གྱི་འཛུམ་རླབས་ཅན། །གཟུར་གནས་ཡིད་དབང་འགུགས་པའི་བཀའ་མཆིད་ཀྱི། །པདྨོའི་སྦྲང་ཆར་རྟག་ཏུ་འབེབས་པ་ཡིས། །རེ་བའི་ཤིང་རྟ་ཡང་ཡང་འགེང་བར་མཛོད། །ཅེས་ཞུ་འདེགས་སྤྱན་ཟུར་གཡོ་བའི་རྟེན་མཚོན་ལྷ་རེག་མདངས་ལྡན། །སྙོན་པའི་སྐུ་བརྙན། ལིང་ཆེན་ཡུག །བཟང་གོས་ཡུག །དྭཱི་པེ་ནྲ་གྱི་ལྤགས་ཤུན་བཅས་དཔལ་སྤུངས་ཡང་དབེན་ནས་ཁྲུམས་ཟླའི་དཀར་ཕྱོགས་ཀྱི་ཚེས་བཟང་པོར་ཕུལ།། ༈ །།ཨ་མཆོག་དགེ་བཤེས་ཆེན་པོར་རྗེ་པདྨའི་གསུང་ཚག་ཏུ་བྲིས་པའོ། །སྡེབ་སྦྱོར་ཁ་སྒོའི་བྱེ་བྲག་ལས་ལན་པ་ཞེས་བྱ་བའི་བྲསྟཱ་
རས་མཛེས་པའོ། །སྲིད་དང་ཞི་བ་གཅིག་པའི་ངག །མཐའ་གཉིས་རྣམ་གྲོལ་མཚན་རྟོག་གིས། །མི་ཕྱེད་ཆགས་དང་བྲལ་བའི་འོད། །སྤྲོ་མཛད་ཉི་མའི་གཉེན་དེས་སྐྱོངས། །ལུང་གི་སྣང་བས་བྲན་པའི་འགོག་པ་དང་། །ཤེས་བྱ་ལམ་གྱི་པདྨོའི་རྒྱ་གྲོལ་བས། །ཐེག་ཆེན་བསྟན་པའི་དཔྱིད་དཔལ་དར་བྱེད་པ། །བཤེས་གཉེན་སྨྲ་བའི་ཉི་མ་གང་དེའི་དྲུང་། །མཁས་ཚུལ་གསུམ་གྱིས་རྒྱལ་བསྟན་རིམ་གྲོ་ཡི། །སྙིང་སྟོབས་ཁུར་ཆེན་ཐོགས་པའི་མདུན་ས་ནས། །མཐོང་ན་དགའ་བ་པདྨ་ལྟ་བུའི་ངག །མང་ཐོས་རྣ་བའི་རྒྱན་ཏུ་བྱིན་ལ་སྤྲོ། །དེ་ན་ཆོས་རབ་རྣམ་པར་འབྱེད་པའི་བློ། །སྐྱེ་བ་རྣམ་དཀར་ཟོང་གིས་བསྒྲུབས་བྱས་པ། །སྙེངས་བྲལ་རྣམ་དཔྱོད་དཔལ་གྱིས་སྒེག་འཆང་བས། །བསྟན་འཛིན་འདུས་པའི་བླ་ན་ཅིས་མི་མཛེས། །ཇི་ལྟར་མྱོས་པའི་གླང་པོ་མི་འཇིགས་པར། །ས་ལས་རྣམ་རྒྱལ་བྱ་བ་བཟོད་ལགས་གྲང་། །རིག་པའི་ཆང་གིས་
མྱོས་ཀྱང་དྲེགས་པ་ཡིས། །མ་བསླད་ཅད་ཤེས་དེ་ནི་སུ་ཡིས་བསྐྲུན། །སྙིགས་དུས་དབུལ་པོའི་ཁྲོད་ན་ཟང་ཟིང་གི། །འབྱོར་པ་རྒྱས་པ་ད་དུང་ཡོད་མོད་ཀྱི། །ཐོས་དང་དད་སོགས་འཕགས་ནོར་གྱིས་གཏམས་པ། །སྲིད་ན་འགྲོ་བའི་མཆོད་སྡོང་གཅིག་ཏུ་བས། །སྤངས་དང་རྟོགས་པའི་རི་ཡི་ལྡེང་ཀ་ནས། །ལེགས་བཤད་ཁྱད་ཆོས་འབར་བའི་གཞུང་ལུགས་ཀྱི། །མཁྱེན་རབ་ཉི་ཟླའི་རྔ་ཡབ་གང་འཛིན་པ། །བློ་གཏེར་དབྱིག་གི་སྙིང་ལས་གཞན་ཏུ་མེད། །ཆོས་ཀྱི་དགའ་ཚལ་རྒྱས་པའི་དོ་ར་ན། །མང་ཐོས་གཞོན་ཤ་ཆགས་པའི་ལང་ཚོ་དང་། །སྡེབ་ལེགས་ཚིག་གི་སྦྱར་བའི་ཟུར་མིག་གིས། །གཟུང་གནས་དཀའ་ཐུབ་ཅན་གྱི་ཡིད་དབང་དྲངས། །ལྷག་བསམ་ངད་ཀྱིས་རབ་བགོས་སྐྱེས་སྦྱངས་ཅན། །དམ་པའི་དྲི་ཡིས་འཇིག་རྟེན་དགའ་བསྐྱེད་པ། །མ་ལ་ཡ་ནས་འོང་བའི་རླུང་དག་དང་། །རྫིང་གི་ཨུཏྤལ་གསར་པའི་ཚུལ་ལས་རྟོགས། །དེ་ལྟ་མོད་ཀྱི་རྒྱུ་ལམ་འབྲས་བུ་ཡིས། །ལེགས་པར་འབྱོར་བ་དཔལ་དང་གྲགས་པའི་མཐའ། །མ་རྙེད་སྔོ་སངས་ནམ་མཁའི་བུ་མོ་ཡིས། །སྣང་བྱེད་སྒྲོན་མ་བཏེགས་ནས་ཚོལ་མིན་ནམ། །འཁོར་ལོ་གཉིས་ཀྱི་གཤོག་དཀར་ཟུང་བསྐྱོད་པའི། །རིག་གྲོལ་སྤོབས་པ་མཆོག་ལྡན་ངང་པའི་ཁྱུ། །ཀུན་ནས་སྡུད་པ་ཆོས་འཁོར་པདྨའི་མཚོ། །སྐྱེད་དུ་བསྲིང་བ་
ནོར་བུའི་གདེངས་ལྡན་བདག །དུས་ཀྱི་མོག་པོར་གྱུར་པ་རིན་ཆེན་བསྟན། །ཤིན་ཏུ་སྤེལ་བའི་རྣམ་དཔྱོད་མི་ལྡན་ཀྱང་། །ལྷག་བསམ་ཁོ་ནས་སྙིང་པོའི་ཆོས་ཚུལ་དང་། །འགྲོ་ཕན་དམ་བཅའི་གོ་ཆ་ཐོགས་ཏེ་མཆིས། །མཚམས་ཞུས། །གང་ལ་མང་ཐོས་བསླབ་ལ་བརྩོན་པ་ཡོད། །དེ་ན་དྲི་མེད་རྒྱལ་བའི་བསྟན་པ་གནས། །དེ་ཡིས་འཕྲལ་དང་ཡུན་གྱི་མཐར་ཐུག་པའི། །དགེ་ཆོས་ཡིད་བཞིན་འཇོ་བའི་དཔྱིད་གྱུར་པས། །ཁྱོད་སྐུ་རིང་དུ་འཚོ་བའི་རྟེན་འབྲེལ་གྱི། །ཐབས་ཚུལ་ནམ་ཡང་ལྷོད་པ་མི་མཛད་པར། །གནས་སྐབས་རིགས་དང་མཚམས་པའི་ཆོས་ཀྱི་ཆར། །ཐེག་མཆོག་དབུ་མའི་རྒྱ་མཚོར་འདྲེས་པར་ཕོབ། །གྲགས་དང་རྙེད་པས་མ་ཡིན་བྱང་ཆུབ་སྤྱད། །སྙིང་ནས་སྤྱོད་ལ་བདག་ཀྱང་རབ་དད་པས། །ཆོས་མཐུན་འགྲུབ་པའི་བདེན་ཚིག་མེ་ཏོག་གིས། །ཁྱོད་ཐུགས་གསེར་གྱི་ཡོལ་གོ་འགེངས་འཚལ་ལོ། །ཞེས་པའི་ཡི་གེ་གཟིགས་རྟེན་ལྷ་གོས་པུཎྜ་རཱི་ཀའི་མདངས་ལྡན་བཅས་ཁྲུམས་ཟླའི་དཀར་ཕྱོགས་ཀྱི་ཚེས་བཟང་པོར་དཔལ་སྤུངས་ཡང་དབེན་ནས་ཕུལ་བ་དགེ། །འཕེལ་ཚེ་བླ་མ་བསོད་ནམས་རྣམ་རྒྱལ་ལ་རང་ལོ་ཉེར་དྲུག་པར་ཕུལ་བ།། ༈ །།སྡེབ་སྦྱོར་ཡ་ཁ་སྒོའི་བྲསྟཱ་རའོ། །།།
མི་ཤིགས་དྭངས་མ་ཡོངས་གྲུབ་སྐུ། །དུས་སྦྱོར་རྣམ་གྲོལ་རྡོ་རྗེའི་གསུང་། །བདེ་ཆེན་ཐུགས་ལྔ་ཚེ་དང་འོད། །མཐའ་ཡས་པདྨཱ་ཀ་རས་སྐྱོངས། །མཁྱེན་པས་ཤེས་བྱ་ཀུན་གཟིགས་ཤིང་། །བརྩེ་བས་གདུལ་བྱ་རྗེས་སུ་འཛིན། །ནུས་པས་རྣམ་གྲོལ་ལམ་སྟོན་པ། །འགྲོ་བའི་འདྲེན་པ་མཆོག་དེའི་དྲུང་། །ཞུ་མཆིད། །འདི་ན་མཆིས་པའི་ལང་ཚོ་གཞོན་ནུ་བདག །སྔ་འགྱུར་བསྟན་པ་ནམ་མཁའི་ནོར་བུ་ལ། །ཡིད་ཀྱི་པདྨ་དབང་མེད་གྲོལ་གྱུར་པས། །དེ་ཡི་བསྟན་འཛིན་ཁྱོད་ལ་བདག་དད་ཕྱིར། །མ་བརྡུངས་པར་ཡང་སྙན་ཚིག་ཕངས་པར་འགྲོ། །དབྱངས་ཅན་རྒྱུད་མངས་དག་ལས་བརྐུས་འདྲ་བས། །ཁྱོད་ཐུགས་མཁའ་ལྟར་དག་པའི་མེ་ན་ཀཱ། །དགྱེས་བསྐྱེད་ལྷ་ཡི་གླུ་མཁན་གཉིས་པར་དོགས། །གང་ཁྱོད་རིག་པའི་རྩལ་ཆེན་རྫོགས་ནས་ནི། །འབོ་ཆེན་གྲུབ་མཐའ་གདོད་ནས་སྙོགས་བཞིན་ཏུ། །སྙིང་རྗེའི་དཔལ་ནི་ཟད་པ་མ་
མཆིས་པས། །རྣམ་རོལ་མི་ཟད་རྒྱན་གྱི་འཁོར་ལོར་སྟོན། །ཁྱད་པར་གྲོལ་བ་བཞི་ཡིས་སྲིད་པའི་ཁམས། །གདོད་མའི་ས་ལ་སྐད་ཅིག་དེངས་བྱེད་པ། །གསང་ཆེན་རྫོགས་པ་ཆེན་པོའི་རིང་ལུགས་ལ། །ཡང་སྲིད་ཀུན་ཏུ་མཛད་པ་བགྱིས་ལགས་གྲང་། །དུས་འདིར་ནུས་ལྡན་རྡོ་རྗེའི་ཟབ་གསང་གི། བསྟན་ལ་སྟོན་པར་གྲུབ་པའི་རྒྱལ་ཐབས་ཀྱི། །དབང་བསྐུར་པདྨའི་མཐུ་ཡིས་གང་སྩལ་བ། །དེ་ནི་སྨོན་ལམ་སྟོབས་ཀྱིས་བརྙེས་རྟོགས་ནས། །རིང་ན་གནས་ཀྱང་གཏམ་གྱི་བདུད་རྩི་ཡིས། །ཐོས་པའི་རྣ་བར་རིན་ཐང་མེད་བྱས་པ། །བདག་ཅག་རང་གི་མལ་ན་མཆིས་བཞིན་ཏུ། །མཛའ་བའི་མཆིད་ཚིག་རིང་མོའི་གནས་སུ་རྒྱུ། །དེང་སང་གྲགས་པ་ཙམ་ལ་མཆོག་འཛིན་ནས། །ཆོས་བརྒྱད་འདམ་དུ་རང་བཞིན་བྱིང་བ་དང་། ཁ་ཅིག་ཐོས་པའི་མིག་དང་མི་ལྡན་པས། །ཕྱོགས་ལྷུང་མུན་པའི་སྦུབས་སུ་ཆུད་པར་མཐོང་། །བདག་ནི་སྟོན་པའི་བསྟན་ལ་ཡིད་གུས་ཤིང་། །དེ་ཡི་ཡང་སྙིང་ཐེག་དགུའི་རྩེ་རྒྱལ་གྱི། །གསང་བའི་མཛོད་འཛིན་འཕུར་འགྲོའི་སློབ་དཔོན་ལ། །རྒྱུ་མཚན་ཤེས་པས་མི་ལྡོག་དད་པ་མངའ། །གང་གི་ཕྲིན་ལས་འཆང་བའི་རིག་པ་འཛིན། །ཡོངས་ཀྱི་འཁོར་ལོས་སྒྱུར་བ་སྟག་ཤམ་པ། །སྣང་བ་རྣམས་ལས་ཉིན་མོའི་དཔལ་ཇི་བཞིན། །རྣམ་ཐར་དུ་མས་ཁྱད་
པར་བྱས་པ་ཤེས། །དེ་ཡི་བསྟན་འཛིན་ཕལ་ཆེར་མི་སྣང་ཞིང་། །ཡོད་པ་དག་ཀྱང་གྱི་ནའི་ངང་ཚུལ་གྱིས། །སྙིང་སྟོབས་གོ་ཆ་སྦྲང་མའི་རྗེས་སོང་བས། །ཟབ་གསང་བསྟན་པའི་མཁོས་ཀ་ཆུང་ངུར་གྱུར། །མཆོག་ཁྱོད་རྒྱུ་སྐར་རྣམས་ལས་ཟླ་བ་ལྟར། །བསྟན་འཛིན་རྣམས་ལས་བསྟན་པའི་རིམ་གྲོ་ཡིས། །ཆོ་ག་ནུས་པ་ཡོན་ཏན་བཻ་ཌཱུརྻའི། །ནོར་འཆང་ཀླུ་དབང་གཉིས་པ་ཡིན་ཞེས་ཐོས། །དེ་ཕྱིར་དད་དང་སྐལ་པའི་ཞིང་ས་རུ། །རེ་བའི་ས་བོན་ཐེབས་པར་བཏབ་ལགས་ན། །གདམས་ངག་ཆར་གྱི་རྒྱུན་གྱིས་ཇི་ལྟར་སྨིན། །ཁྱེད་ཀྱི་ཐུགས་རྗེའི་འཇུག་པས་རྟོགས་པར་འོས། །ཇི་སྲིད་ཉི་མའི་སྙིང་པོ་རབ་འབར་བ། །དེ་སྲིད་ཟླ་བའི་འོད་ཀྱང་བག་ལ་ཞ། །གང་ཚེ་མུན་པའི་ཁྲོད་དུ་སྐར་ཆེན་གྱི། །སྣང་བས་ཀྱང་ནི་མིག་ལ་དཔལ་སྟེར་བྱེད། །རྒྱལ་བསྟན་མཁས་དང་གྲུབ་པས་བཟུང་བ་ན། །བདག་ལྟའི་སོ་སྐྱེ་ཆུ་ཤིང་སྡོང་པོ་ལྟར། །སྨྲ་མཁས་སེང་གེའི་སྒྲ་ཆེན་ཡོལ་བ་ན། །རྨོངས་པའི་ནོར་སྲུང་གངས་རིའི་འདབ་འདིར་འཁྲས། །འོན་ཀྱང་ལྷག་བསམ་ཤུགས་ཀྱིས་མ་དག་པའི། །སྤྱོད་ལམ་དག་ཀྱང་བྱང་ཆུབ་ལམ་ཁྱེར་ནས། །དྭགས་རྙིང་ཟུང་དུ་འབྲེལ་བའི་བསྟན་མཆོག་ལ། །བགྱི་བ་ཕྲ་མོའི་ཁུར་ཡང་ཐོགས་ནས་མཆིས། །མཚམས་ཞུས། །གང་ན་ལུང་གི་འོད་མཆིས་པ། །དེ་ན་རྟོགས་པའི་དཀྱིལ་
འཁོར་རྒྱས། །དེ་ཡིས་ཐར་དང་བདེ་བ་ཡི། །པད་ཚལ་ཅི་ཡང་བཞད་པར་འགྱུར། །ཤིང་ནི་ས་ལ་བསྟེན་པ་ལྟར། །ལུང་རྟོགས་དམ་པའི་ཆོས་དེ་ཡང་། །གང་ཟག་རྒྱུད་ལ་གནས་པའི་ཕྱིར། །བསྟན་འཛིན་སྒྲ་ཡིས་ལེགས་པར་བདོ། །འབྱོར་བའི་དཔལ་གྱིས་འབྱོར་པ་དང་། །སྙན་གྲགས་ཤིན་ཏུ་འཕྱུར་ན་ཡང་། །བདག་རྒྱུད་ཆོས་དང་མི་མཐུན་པའི། །གཟུགས་བརྙན་དེ་ཀས་ཅི་ཞིག་བྱ། །སོ་ཐར་སྡོམ་པ་ལེགས་བསྡམས་ཤིང་། །བྱང་ཆུབ་སེམས་ཀྱི་རྒྱུད་བརླན་ཏེ། །ཟབ་གསང་ཉམས་རྟོགས་ཀྱིས་བརྒྱན་པ། །དེ་ནི་བསྟན་ལ་སྟོན་བར་མཚུངས། །རང་གི་དོན་གྱི་འཁྲིས་མེད་ཀྱང་། །ཐབས་མཁས་བྱ་བ་སྣ་ཚོགས་ཀྱིས། །བསྟན་དང་འགྲོ་ཕན་སྒྲུབ་བྱེད་པ། །སྐྱེས་བུ་དམ་པའི་མཚན་ཉིད་དེ། །གང་ཁྱོད་དེ་ལྟའི་ངང་ཚུལ་ལས། །མི་འདའ་སྐྱེས་བུའི་ཁྱུ་མཆོག་གི། །བརྟུལ་ཞུགས་ལྡན་པ་ཡིན་ཐོས་ཕྱིར། །སྲིད་ཞིའི་མགོན་ཏུ་གྲུབ་ལགས་པས། །ཤིན་ཏུ་མི་འགྱུར་ཆུ་སྐྱེས་ན། །རྡོ་རྗེ་བདེ་བའི་ཞབས་བཀོད་དེ། །ཨེ་ཝྃ་གཉིས་སུ་མི་ཕྱེད་པ། །གསང་བ་དགྱེས་པར་འཚོ་གཞེས་ཤིང་། །བསྟན་ལས་ཟབ་པའི་མཐར་ཐུག་པ། །ཕྱིར་མི་ལྡོག་པའི་དབུ་མ་དང་། །ནང་རྒྱུད་ཐབས་ཀྱི་ཐེག་གསུམ་གྱི། །ཆོས་ཀྱི་འཁོར་ལོ་བསྐོར་བར་འཚལ། །
བདག་ཅག་ཆོས་ཀྱི་འཛའ་གཅུག་གིས། །ལགས་པར་བཅིངས་པའི་ཐུགས་བརྩེའི་ངག །གཟུར་གནས་ཚངས་པའི་རལ་ཀླུང་དུ། །གངྒཱའི་རྒྱུན་བཞིན་འཁོར་བར་མཛོད། །སྟོང་དང་སྙིང་རྗེ་མི་ཕྱེད་པའི། །སྲུང་བའི་ཕྱག་རྒྱས་བཏབ་འཚལ་ཞིང་། །དེ་སྲིད་ཀུན་ཏུ་དགེ་བ་ཡི། །སྨོན་ལམ་བདག་གིས་ཀྱང་ནི་གསོལ། །དམ་པ་རྣམས་ནི་ཟང་ཟིང་ནོར་ལས་ཀྱང་། །དད་པའི་ནོར་ལ་དགྱེས་ཕྱིར་ཚད་མ་ཡི། །སྐྱེས་ཆེན་ཁྱོད་ལ་སྙན་ཚིག་སྐྱེས་བཟང་འདི། །བདག་བློ་ཡོངས་སུ་སད་པའི་མཛོད་ལས་སོང་། །ཞེས་པའི་ཞུ་ཡིག་གཟིགས་རྟེན་མཚོན་བྱེད་ཙམ་དུ་བཀྲ་ཤིས་པའི་ལྷའི་རེག་བྱ་སོགས། བཅས་དཔལ་སྤུངས་ཀྱི་གདན་ས་མཁས་གྲུབ་རྒྱ་མཚོའི་བསྟི་གནས་གང་ནས་ཕྲན་བཙུན་གཟུགས་ཀརྨ་ངག་དབང་ཡོན་ཏན་རྒྱ་མཚོ་ཞེས་བགྱི་བའི་སྙོམ་ལས་པ་ནས་གུས་པས་ཕུལ། །།།བློ་གསལ་བཛྲ་པྲ་ཏིཥྛ་ལ་སྤྲིངས་པ་སྙན་པའི་ཨུཏྤལ་ཞེས་བྱ་བ། །ཤིན་ཏུ་
ཕྲ་བའི་ཡེ་ཤེས་ཀྱིས། །སྣང་གསུམ་མཉམ་པ་ཉིད་གཟིགས་ནས། །ཆོས་ཀུན་དབྱིངས་སུ་བྱང་ཆུབ་པ། །ཤཱཀྱའི་སྲས་ཀྱིས་ཁྱོད་ལ་སྲུངས། ༡ །ཚོགས་གཉིས་རླན་ལ་ཆགས་པའི་ཨུཏྤལ། །རིག་པའི་སྦྲང་རྩིའི་ཁུར་གྱིས་ལྕི་བའི་ཕྱིར། །ཚིག་གི་ཟེར་གྱིས་བློ་ལྡན་བྷྲ་མ་ར། །དགའ་བསྐྱེད་ལྔ་རིག་སྨྲ་བ་གང་དེའི་དྲུང་། ༢ །རིག་ལ་གོམས་པའི་གནས་ཅན་གྱིས། །མཐོང་ན་ཚིམས་པ་སྐྱེད་པའི་ཚིག །པདྨ་ལྟ་བུ་ལག་པ་ཡི། །པདྨོ་ཉིད་དུ་སོན་པར་གྱུར། ༣ །དེ་ཚེ་ཡིད་ཀྱི་རབ་དགའ་དང་། །ཡོན་ཏན་དཔལ་ལ་རྗེས་དྲན་དང་། །བསྔགས་འདོད་ངག་གིས་སྒེག་པ་སྟེ། །གསུམ་པོ་འདི་ནི་མཉམ་དུ་བྱུང་། ༤ །བདག་ནི་ཤཱཀྱའི་རྗེས་སློབ་སྟེ། །ཟང་ཟིང་སྐྱེས་ཀྱིས་བདག་དགའ་མིན། །ཁྱོད་ཐུགས་ཆོས་ཀྱི་རྗེས་སོང་བས། །དོན་མཐུན་ཉིད་ཕྱིར་བདག་རབ་མགུ། ༥ །ལང་ཚོ་དང་ནི་ཡོ་བྱད་ཀྱི། །འབྱོར་བའི་གཏམ་གྱིས་མི་མཛེས་པ། །གཟུ་བོར་གནས་པའི་མདུན་ས་ན། །ཁྱོད་ཀྱི་སྙན་པའི་གཏམ་འདི་མཛེས། ༦། རྡོ་ཐལ་ཁང་པ་དཀར་བ་ལ། །བདུད་རྩིའི་འོད་ཀྱིས་ཆེས་དཀར་བཞིན། །ཁྱོད་ཀྱི་རྒྱུ་ཚོགས་གྲུབ་པའི་བློ། །དགེ་བའི་བཤེས་དེས་སད་པར་བྱས། ༧ །ཡུན་རིང་ངལ་ལ་མ་ལྟོས་པར། །འབད་པ་ཆུང་ངུས་གཞུང་བརྒྱ་རྟོགས། །གང་ཞིག་མི་ཡིས་
བགྲོད་དཀའ་བ། །དེ་ལ་གཉིས་སྐྱེས་ཡུད་ཙམ་མོ། ༨ །རྗེས་དཔག་ཡི་གེས་རབ་མྱོང་བ། །ཡོན་ཏན་དྲི་ཡིས་དགའ་བསྐྱེད་པ། །མ་ལ་ཡ་ནས་འོང་བ་ཡི། །རླུང་གི་ངད་ཀྱིས་མཚོན་མ་ཡིན། ༩ །བིཥྞུ་ཞུ་བའི་ཧཾ་ཡིག་གིས། །རྣམ་དཔྱོད་ལྟོ་བ་ཡོངས་ཁེངས་པས། །དངོས་སྨྲའི་ན་ཚོད་གཞོན་ནུ་ཡང་། །སྙིང་པོའི་གཏམ་གྱིས་རྒན་པོར་བྱས། ༡༠ །སྣ་ཚོགས་རྟེན་ཅིང་འབྲེལ་འབྱུང་ཆོས། །དམན་ལ་ཇི་ལྟར་འཇིགས་བྱེད་པ། །རང་བཞིན་ཤེས་པའི་མཁས་པ་ལ། །དགའ་བསྐྱེད་དེ་འདྲ་གཞན་ན་མེད། ༡༡ །རིན་ཆེན་མཛེས་པའི་གླིང་དང་ནི། །ནགས་ན་གནས་པ་པདྨའི་རྫིང་། །དམ་པའི་རྗེས་སུ་སྐྱེས་པ་ཡི། །ཡིད་ལ་མི་དགའ་ཡོད་པ་མིན། ༡༢ །སྲིད་ན་ཚངས་པའི་དཔལ་ཐོབ་ཀྱང་། །སྒྱུ་མ་དེ་ཡིན་རྨི་ལམའང་དེ། །འོན་ཀྱང་ཁེ་གྲགས་ངན་ངོན་ལ། །བླུན་པོ་རྩི་ལྟར་ཞེན་པར་མཐོང་། ༡༣ །ཁྱོད་ཀྱིས་རྩར་ཡང་མི་སེམས་པར། །ཟབ་མོའི་གནས་ལ་བློ་ཕྱོགས་ན། །དེ་ཡིས་ཤཱཀྱའི་དབང་པོ་ཡིས། །བསྟན་ལ་བྱ་བ་བྱས་པར་འགྱུར། ༡༤ །སྐྱབས་གནས་རྣམས་ཀྱི་ཐུགས་རྗེའི་གྲིབ་མས་ངལ་འཚོ་རྨོངས་པ་བདག །ཆོས་བཞིན་སྤྱོད་པར་དཀའ་རུང་ཆོས་མ་ཡིན་ཀྱང་བློས་བཏང་སྟེ། །གཞན་ཕན་ཟོལ་གྱིས་རང་ཉིད་གཡེང་བའི་ཁུར་གྱིས་དུབ་པར་ཡང་། །ཤེས་
བྱ་མི་རྫུན་ཤེས་པ་རྫུ་རྟོགས་གནས་ལུགས་མལ་ན་བདེ། ༡༥ །མཚམས་ཞུས། སླད་ཀྱི་ཆར་ཡང་། གཤིས་ལ་སྐྱེ་དང་འགག་མེད་པས། །དེ་ལ་མཚན་མས་གོས་པ་མིན། །མཚན་མ་ཙམ་ཡང་དུས་གསུམ་དུ། །སོང་དང་འོང་མིན་བགམ་པའང་མེད། ༡༦ །རྒྱུན་གྱིས་གཉེན་པོ་མ་མཆིས་པར། །རྟག་པའི་བདུད་རྩི་རབ་འཐུང་བས། །ཇི་སྲིད་མོས་པ་མ་བརྟུལ་བ། །དེ་སྲིད་རིང་འཚོའི་སྟོབས་སྐྱེད་ཅིག ༡༧ །གཞན་ཡང་འདི་སྐད་དུ་བྱ་སྟེ། །ཡོན་ཏན་རྒྱ་མཚོའི་མཇིང་འདྲ་བའི། །དགེ་བའི་བཤེས་གཉེན་ཟེ་ཆེན་པ། །ཁྱོད་ཀྱི་དཔལ་དུ་ཐོབ་ལགས་ན། །སྙིང་པོའི་ནོར་བུ་ལོན་པར་མཛོད། ༡༨ །གང་གིས་ཐོས་ལ་མ་གོམས་པ། །དེ་ཡིས་སྒོམ་པ་ག་ལ་ཤེས། །དད་པའི་རྩ་བའང་མི་བརྟན་ན། །གནས་ལུགས་འབྲས་བུ་འབྱིན་མི་སྲིད། ༡༤ །ཐོས་བརྩོན་དད་དང་ཤེས་རབ་སྟེ། །འཕགས་པའི་ནོར་གྱིས་ཕྱུག་པ་ཁྱོད། །རང་སེམས་ནོར་བུ་སྦྱངས་བྱས་ནས། །གཞན་གྱི་དབུལ་བ་སེལ་བར་མཛོད། ༢༠ །མཐའ་དྲུག་ཚུལ་བཞིའི་རྒྱས་བཏབ་པ། །གསུང་རབ་མཛོད་ཀྱི་ཁ་ཕྱེ་ནས། །སྙིང་པོའི་ཆོས་ཀྱི་རིན་ཆེན་ཏོག །བཤད་སྒྲུབ་གོས་ཀྱིས་བཀླུབས་པར་རིགས། ༢༡ །བདག་ཅག་ཤིན་ཏུ་ཉེ་བའི་མཆེད། །ཕན་ཚུན་ཆོས་ཀྱི་
བརྩེ་སེམས་ཀྱིས། །འདི་ནས་སློབ་པ་མིན་པའི་བར། །བཟང་པོ་སྤྱོད་པས་འགྲོགས་པར་སྨོན། ༢༢ །བདག་ནི་དམ་པའི་ངང་ཚུལ་མི་ལྡན་པས། །ལེགས་བཤད་གཏམ་གྱི་འབྱུང་ཁུངས་མ་ལགས་ཀྱང་། །ཁྱོད་།ཐུགས་དགའ་བསྐྱེད་སྙན་ཚིག་ངང་པ་མོ། །དཔལ་སྤུངས་མཁས་པའི་རྒྱ་མཚོ་ཆེ་ནས་སོང་། ༢༣ །ཞེས་པའི་ཡི་གེ་རྟེན་དང་བཅས་ས་ཟླའི་ཡར་ངོའི་གྲལ་ཚེས་བཟང་པོར་ཐུབ་བསྟན་ཆོས་འཁོར་གླིང་ནས་ཆོས་སྨྲ་བའི་བཙུན་གཟུགས་ཀརྨ་ངག་དབང་ཡོན་ཏན་རྒྱ་མཚོས་བྲིས་ཏེ་ཕུལ།། ༈ །།མཁས་བཙུན་བཟང་གསུམ་གྱི་བདག་ཉིད་ཆེན་པོ་དགེ་བའི་བཤེས་གཉེན་ཨ་མཆོག་སྤྲུལ་པའི་སྐུ་ལ་ཕུལ་བའི་ཆབ་ཤོག །ཤྲཱི་ཤྲཱི་ཤྲཱི། ཨཱཡུཤྩིིརཾཛཱིབཏུ། དྷརྨཱཱཾརཱཛྱཱནྲསྥོྷནྟུ། ཡསྨིནྲམཧཱབྷོདྷཛནཔདཱནཱཾབཱདཱིནཱམྲྀཥབྷེ། སཱུརྻཙནྡྲཡོརཡནཾརཧཽཤུདྡྷསྱབལེནཤྩྱོཧཾནིརུདྡྷེནཡཱབདྭཱཙྱམདྷིསཏྻུརྦཙསཱཾསུདྷཱཡཧྲྀདཡྻ་ཧརྵེ། ཉི་ཟླའི་རྒྱུ་བ་སྒྲ་གཅན་ཏུ་ཐིམ་པའི་སྟོབས་ཀྱིས་འཕོ་བ་འགག་པས་བརྗོད་པ་ཇི་སྙེད་པ་ལ་དབང་བསྒྱུར་བའི་ཚིག་གི་བདུད་རྩིས་སྙིང་ག་རངས་པ་བོད་ཆེན་པོའི་ལྗོངས་ཀྱི་སྨྲ་བ་རྣམས་ཀྱི་ཁྱུ་མཆོག་ལ། གུ་སམུདྲཀིཉྩིཙྪུཏདརིདྲཱདྲྀཧིབྷིཿ སནཡཿ ཡཱབདྡྷབེཥུསཽཁཱསྟི། ཏེ྅བྷབཱམཧིསདྡྷརྨཱཏྲ། ཡབཏྦྷབྷཡཱཤྩདུཿཁསྟེ། སརྦེ྅ཀུརྦནྟནནྱཱཡིཿ
ཅུང་ཟད་ཐོས་པའི་ད་རི་པྲཱ་ཡོན་ཏན་རྒྱ་མཚོས་གུས་པས་ཞུ་བ། །སྲིད་ན་བདེ་བ་ཇི་ཡོད་པ། །དེ་ཀུན་དམ་པའི་ཆོས་ལས་བྱུང་། །འཇིགས་དང་སྡུག་བསྔལ་ཇི་སྙེད་པ། །དེ་ཀུན་ཚུལ་མིན་སྤྱོད་ལས་སོ། ཡེཥྭཱགམཱབྫསཾཕུལླ། ཏེཥུབུདྡྷམདྷུདྡྷེནུཿ ཨབཱིཏིབྷྲམརེབཾ། ཛནཏབཤབསྟུལྱཾཿ རཱཛྱཤསྟྲབིདྷིབྷྱཾཱདྷྲྀ། གཱགམཱར།།།ཥི་གང་ན་ལུང་གི་པད་ཚལ་རྒྱས། །དེ་ན་རྟོགས་པའི་སྦྲང་རྩི་འབོ། །བུང་བས་བཞིན་ཏུ་མི་འཐུང་བ། །སྐྱེ་བོ་དེ་ནི་ཕྱུགས་དང་མཚུངས། །རྒྱལ་སྲིད་ཁྲིམས་ཀྱི་ཆོ་གས་ཏེ། །ལུང་ནི་འཆད་དང་རྩོམ་ཧྱེ། ཏེ྅པིབྷཱུམིཔཏིརྦུ།།།ནུགཏཾཛནྟུཤིཀྵཱཡཱཿ བཧུཤྲུཏཱ་ནི་ཙཔྲཛྙ། བཱིརྻཱེབིནྡཱཡཙྪེཏྶྱཏ། ཤིཀྵཱཡཻབྲྀཏཡུཔཱབྷྱཱ། པས་འཛིན། །དེ་ཡང་ས་བདག་བློ་གྲོས་དང་། །གང་ཟག་བསླབ་པའི་རྗེས་སུ་ཞུགས། །མང་དུ་ཐོས་དང་ཤེས་རབ་དང་། །བརྩོན་པས་མ་བཟུང་གལ་ཏེ་ན། །བསླབ་ལ་གུས་པའི་མཆོད་སྡོང་དག་མསྷྱསྱཔཱུརྞ།།།གརྦྷེ། སུདྷོཏཏཔསཻནྡྲིཡ། པརོ྅ཀྵཱཧིཔརོ྅ཀྵཱཱཾ། ཏིབིཏྟཥུདྡྷམཏྱབྷིཿ ཤྲུཏཱནསྟཱིཏྱནཙྪཱམྲྀཀྲ། ནིརྨྨཱདནཀ
ཡོད་ཀྱང་སྙིང་པོས་ལྕི་བ་མིན། །ཤིན་ཏུ་སྦྱངས་པའི་དཀའ་ཐུབ་ཀྱིས། །མངོན་ལྐོག་དང་ནི་ཤིན་ལྐོག་གི། དཔྱད་གསུམ་དག་པ་བློ་ཡི་ཆུས། །རྙོག་པ་མ་བགྲུང་མེད་ཅེས་ཐོས། །བྱི་དོར་བྱས་པའི་བཻཌཱུརྻ།།། །ཡཏྣཾཀྲྀཏྭཱཛནུཾཔཱལུ། གུ་སཾ་པཱུ།།།ཏཱབིདྭ། དྡྷིརནྱཱཡཏུསཱ།།།ཉྫྫ། ཡཐཱཔགཏཡོཤྩེཏཾ། དཀྵཱིབཱཡུནཱཏུཤྱྚིིཿབཻ་ཌཱུརྻ། །འབད་ནས་འཁྲུངས་པ་ས་ལུ་སྟེ། །ཡོན་ཏན་ཡོངས་རྫོགས་མཁས་རྣམས་ཀྱིས། །གཞན་ལ་ཕན་པ་ལྷན་སྐྱེས་ཉིད། །ཇི་ལྟར་བྲལ་བ་རྣམས་ཀྱི་ཡིད། །ལྷོ་ཡི་རླུང་གིས་དགའ་ ཧཐཱགཐཱབྷིརནྭ་རྞཱ པྱ།།།ཏེབཾབུདྷཤྩཀྲེ། རཱུབྷེདམནདྲཱཀྵཱི། ཧྨཡཱུརམཏྟགྷོཥེ། སྱཱཏྶདཱཾཔྲཀྲྀཏཤྲུཏཱ། བསྐྱེད་པ། །དེ་ལྟར་གཏམ་གྱིས་དོན་མཐུན་ཡང་། །བསླང་བ་བཞིན་ཏུ་སད་པར་བྱས། །གཟུགས་ཀྱི་བྱེ་བྲག་མ་མཐོང་ཡང་། །རྨ་བྱ་སྒྲ་ཡིས་མྱོས་ལགས་ན། །དམ་པའི་རང་བཞིན་ཐོས་པ་ཡི། དཀབྷྲྀཤཱཡཏེསྣེཧཿ མཱུཌྷཱབྷྱཱཾདྲབཾཾགོཔྟ། །བྷཱུཏིབྷིཿསུཏགོཔྟཱརཿ བིདྭཱཀྵིཀྵཱབྷྱཡཱབརེ། ཤྴཱསནསྭམནོགོབྟཱ།
མཛའ་བ་མཆོག་ཏུ་ཅིས་མི་འགྱུར། །རྨོངས་པ་དག་ནི་ནོར་སྲུང་སྟེ། །འབྱོར་ལྡན་རྣམས་ཀྱིས་ཁྱེའུ་སྲུང་། །མཁས་རྣམས་བསླབ་ལ་རབ་གུས་པས། །བསྟན་དང་རང་སེམས་པྲཱཀཱརེཤཱསནཱཤྴཾབྷྭ། ནཏིཀྲམམ་ནཱིཥིབྷྱཾཱ། པྲྀཥཱཱཾབྷགནདྭཡྻཽ། བོདྷིཙཱཡ་སཾསྟབྱཿ ཏསྨཱཡཏྲལཔཾསཱནྟ་སྲུང་བར་བྱེད། །བདེ་འབྱུང་བསྟན་པའི་ར་བ་ན། །གཟུར་གནས་རྣམས་ནི་འདའ་མིན་པས། །སྲིད་ཀྱི་གྲས་ཁ་གཅིག་པ་དག །བྱང་ཆུབ་སྤྱོད་ལ་མཛའ་བར་ཟད། །དེ་ཕྱིར་འདི་ནི་སྙན་པའི་མཆིད། པྲཐམོཏཱལིཀཱཡཻརྤྲྀཏྲ། པཤྩིམཱབྷེདྷདྷརྨཱཱཾ། མུ་དྲེབྱཀྲྀཥྚྚི་ཀུ།།།ཏྲ། ཡཐཱལོཀེཥུནཱགཱནཱཾབྷོགོྀགྲིཧྱསྟམྦཀམཉྫརིཕལཱཿཔྲསྥུརཻཉྫནྻཱུ། །དང་པོར་ཐུགས་ལ་གཅག་ཕྱིར་ཏེ། །སླད་ནས་ཆོས་ཀྱིས་མི་ཕྱེད་པའི། །ཕྱག་རྒྱས་ཀུན་ཏུ་བཏབ་པར་མཛོད། །ཇི་ལྟར་འཇིག་རྟེན་ན་ཀླུ་དག་གི་ལུས་ཀྱིས་བཟུང་བས་ལྗོང་པ་དང་། སྙེ་མ་དང་། འབྲས་ ནབརིབུཥྚ ཏཐཱམཧེཤབཱིབུདྡྷབྷགབཱནྲཔྲསཱདེརྡྷརྨབྲྀཥྚིསཾབེཤེཿ སཾབཐཱཾབྷཱུཏིཔུཥྐལཽཙ། །
བུ་རབ་ཏུ་རྒྱས་པས་སྲོག་ཆགས་ཡོངས་སུ་འཚོ་བ་དེ་བཞིན་ཏུ། །དབང་དང་ལྡན་པའི་སངས་རྒྱས་བཅོམ་ལྡན་འདས་རྣམས་ཀྱི་བཀའ་དྲིན་ཆེན་པོས་ཆོས་ཀྱི་ཆར་པ་ཕབ་པས། ཡང་དག་པའི་ལམ་གྱི་ཀལྱཱཾམིཏྲབཧིཤྲུཏཻཿ ཤིཀྵཱཡཻཀྲྀཏཻཿ ཨཱམིཥཱབྷིསནྟུཥྚཻརྦཧེཥུསནྡིཤྲིཏཱནཱཾཤཀྟིཏཱཡཱཾཤྲཡཧོ། བ།།།མཱནཏུ འབྱོར་པ་རྒྱས་པ་དག་ཀྱང་། དགེ་བའི་བཤེས་གཉེན་མང་དུ་ཐོས་པ། བསླབ་པ་ལ་གོམས་ཤིང་ཟང་ཟིང་གིས་ཆོག་ཤེས་པས་ནགས་སུ་གནས་པ་དག་གི་མཐུ་ཁོ་ན་ལ་བསྟེན་པ་ལགས་ཀྱི། ད་ལྟ་ནི་སྦྱིན་པ་དང་དཱནཤཱིལཱནཀྲྀཏཛནྟུབིརྨརཱིཙིབདཱཀཱིརྞ།།།མབྷབནྲ། ཀིཉྩིདྡྷཱིབནཱིཙནཱིཔེཥྭཊཱཌྱཱཡཿ སཱརྛབདབེགཻཿ ཚུལ་ཁྲིམས་ལ་མ་གོམས་པའི་སྐྱེ་བོ་རྣམས་ཀྱིས་སྨིག་རྒྱུ་ལྟར་ཟང་ཟིང་གྱུར་པས། ཅུང་ཟད་བློ་དང་ལྡན་པ་དག་ཀྱང་དགོན་དུང་ན་འཁྱམས་པའི་མགྲོན་པོ་ལྟར་ཤུགས་མེད་པར། ཧེསཁཱཡཽ ཨདྷརྨེམཽཏུཧོ། ཨཤཱསྟཱཤཱསནེམཽཏུཧོཨི།།།རྡིཥྚཱནྱཔི། བཤབཿཔརིདེབཱནཱཾཔྲཏིཤྲུཏྲཱབདནིསྲརཀཱརྻཻཿམེ་རོཿཔ་རི
ཀྱེ་གྲོག་དག །འདི་ནི་ཆོས་མ་ཡིན། འདི་ནི་སྟོན་པའི་བསྟན་པ་མ་ཡིན་ཞེས་སྨྲེང་བ་ན་ཡང་། ཕྱུགས་སྨྲེང་བའི་བྲག་ཆ་ལྟར་འབྲས་བུ་འབྱིན་པར་མི་ནུས་པས། རི་ཡི་ཁོངས་ན་སམནྟཀེསནྡྷརྨཱཧསྐརེབཀཱཤཾཀྲྀཏྲསོབ།།།མུཀུཊདྷརསྱདྭིཏཱིཡཛིནསྱ ཤྲབནཱནཱཾཨཉྫསཱཤྲུཏདྷྲྀཏཿ པརམཏུཏྭམིཏིསྟུཏཱིརྠབཱནཽ། དམ་པའི་ཆོས་ཉི་མ་ལྟར་སྣང་བར་མཛད་པ་གསེར་མདོག་ཅོད་པན་འཆང་བའི་རྒྱལ་བ་གཉིས་པའི་ཉན་ཐོས་རྣམས་ཀྱི་ནང་ནས། །ཐོས་པ་འཛིན་པའི་མཆོག་ནི་ཁྱོད་ཁོ་ནའོ། །ཞེས་བསྔགས་པ་དོན་དང་ནིཤྩཡཻཿ ཨཱཏྨཀཱནཱིཤཱསྟཱཤཱཀྱམུནིནཱསུབྷཱཥིཏབིནཡདྷརྨཱདིགམྦྷཱིརཤྩ། བིཔུལཱནིསྥུཊཾཀྲྀཏྭཱ། ཨཱཙིཧྞདྷརིསྱཱདྷྭསྨིནཔིཤཱསནཀྲྀཏ་ཡུག ལྡན་པར་ངེས་པས་རང་ཅག་གི་སྟོན་པ་ཤཱཀྱ་ཐུབ་པས་ལེགས་པར་གསུངས་པའི་ཆོས་འདུལ་བ་སོགས་ཟབ་པ་དང་རྒྱ་ཆེ་རྣམས་རྒྱས་པར་མཛད་ནས། རྟགས་ཙམ་འཛིན་པའི་དུས་འདིར་ཡང་བསྟན་ པྲཏྱཀྵམཱཀརྵཡཀདེཧྱཔི་བ།།།ཀཱནཱམསཾབཏྶརེ། པྲཽཥྟཔདམསེསིཏཱཔཀྵེདཤཏིཐཽཤུབྷཾ། ལེཁཱབྷྱཿདྲྀཥྚིཤྲཡཾཔཊམསྟི། ཤུ་བྷཾ། པའི་རྫོགས་ལྡན་
མངོན་སུམ་དུ་འདྲེན་པ་ཅི་གནང་། ཀུསཱལིཀརྨཝཱགཱིཤྭརེདཏྟུཾ། ཤུབྷཾ།། ༈ །།ཨ་མཆོག་དགེ་བཤེས་གསུང་ལན། །མི་མཉམ་མཉམ་པ་མེད་པའི་བྱང་ཆུབ་སེམས། །འཇིག་རྟེན་གསུམ་ན་གྲགས་པའི་བ་དན་ཅན། །དགེ་བའི་རྒྱ་མཚོ་དུས་ཀྱིས་མི་འཛད་པ། །གཏེར་ཆེན་དེ་ཡིས་སྐྱེ་དགུ་སྲུང་གྱུར་ཅིག །བློ་གསལ་མཁས་པའི་རྨ་བྱ་གར་བགྱིད་པ། །ལུང་རྟོགས་སྤྲིན་གྱི་རོལ་མོ་བརྡུངས་པའི་དཔལ། །བསླབ་དང་གྲོལ་བའི་གདེངས་ཀ་ལ་ཆགས་པས། །ཕན་བདེའི་ཆུ་བོའི་འཇུག་ངོགས་གྱུར་པ་དེར། །ཕྱག་བཅས་ཞུ་གསོལ། །མཁས་པའི་དཔལ་ཏེ་ཆོས་ཀྱི་དེ་ཉིད་གཟིགས། །བཙུན་པའི་མཐར་ཐུག་ལས་ལ་ངེས་པར་འཁྲུངས། །བཟང་པོ་བླ་ན་མེད་པ་རང་རྒྱུད་ཀྱི། །ཉོན་མོངས་ཕྲུ་མ་བསྙིལ་བ་དགེ་བའི་བཤེས། །མང་ཐོས་ནོར་བུའི་ཁྲི་ལ་རིན་ཆེན་གྱི། །རྐང་གདུབ་སྦྱིན་སོགས་རྫོགས་པའི་ཞབས་བཀོད་པས། །གྲགས་ལྡན་གཙུག་གིས་ཤིན་ཏུ་བཏུད་གྱུར་པ། །ཆོས་ཀྱི་རྒྱལ་པོའི་རྒྱལ་ཐབས་འཛིན་པ་དང་། །སྐལ་ལྡན་ཡི་གར་འབྱོར་པ་ཆོས་ཀྱི་སྨན། །ལྟ་བའི་ཟུག་རྔུ་བཅིལ་ལ་ངེས་དོན་གྱི། །ལམ་མཚུངས་ཤེས་བྱའི་ཁོང་ན་གཞན་མེད་པ། །ཐེག་མཆོག་བསྟན་པའི་སྟོན་པར་བཞུགས་པ་ནས། །ཐོས་པའི་ལམ་དུ་དང་པོར་འོང་བ་ཡི། །དཔྱིད་ཀྱི་ཕོ་ཉས་ཆར་ཡང་མི་མཚོན་པ། །ཚིག་གི་གླིང་བུ་དོན་གྱི་འགྱུར་ཁུག་ཅན། །བསམ་གཏན་
དགའ་བསྲངས་ས་ཡི་དཔལ་དུ་ཐོབ། །འདུ་ཤེས་གསུམ་དཀྲིས་ཟག་པའི་ཕུང་པོ་ཡིས། །ཉོན་མོངས་ལོངས་སུ་སྤྱོད་པ་གཟུགས་བརྙན་གྱི། །མར་མེ་བདག་ཀྱང་དགོན་པའི་རྩྭ་བཞིན་ཏུ། །འབྱུང་འཁྲུགས་ལས་ཀྱི་བསེར་བུས་གཙུབ་པར་མཆིས། མཚམས་ཞུ། ཇི་ཕེབས་རྣམས་རང་ཉིད་སྐྱེས་བུ་དམ་པར་མཚོན་ཞིང་། གཞན་ལ་དགེ་བའི་བཤེས་ཀྱི་བྱ་བ་མཛད་པའི་བདུད་རྩིའི་རླབས་ཕྲེང་མྱོང་བར་འོས་པ་ལགས་མོད། །སྤྱིར་དུས་ཀྱི་དབང་གིས་རྣམ་དཀར་གྱི་བྱ་བ་ཆེ་ཕྲ་གང་ལའང་འགལ་རྐྱེན་མང་ཞིང་མཐུན་རྐྱེན་ཉུང་ཤས་སུ་གྱུར་པ་དང་། ལྷག་པར་ཕྲན་བུ་ནི་བླུན་ཞིང་མ་སྦྱངས་པའི་ངང་ཚུལ་ཅན། རིག་པའི་ཆ་ཤས་ཕྲ་མོ་ཙམ་ལ་མོས་པ་ཁོ་ན་ལྷུར་བགྱིད་པའང་སྙིགས་དུས་ཀྱི་མཁས་དང་གྲུབ་པར་གྲགས་པའི་གཟུགས་བརྙན་སྤྱི་འགྲེ་དེ་ཙམ་ལས་གནའ་བོའི་དུས་ལྟར་གནད་དུ་ཕིག་པའི་རྣམ་དཔྱོད་ཀྱི་སྟངས་ཞན་པས་ལེགས་བཤད་གསར་དུ་སྤྲོ་བ་སོགས་རྔོ་མི་ཐོགས་པ་མ་ཟད། ཚོགས་ཤིང་དུས་ལ་བབ་པའི་ལས་ཀྱི་འབྲས་བུས་རིང་པོར་འཚོ་བའི་མཚན་མ་དང་ཡང་བྲལ་ཞིང་ཉེས་གསུམ་འཁྲུགས་པས་རྒྱུན་གཙོར་ནད་བུ་ཅན་ཏུ་ལགས་པས་དོན་དམ་གྱི་གནས་ལ་ངེས་པ་ཅུང་ཟད་རྙེད་དུ་རེ་བ་ལས་ཟང་ཟིང་རྣམ་གཡེངས་སྣང་ཤས་ཕྲ་རགས་རྩྭ་ལྟར་འདོར་བ་ལ་ཡི་དམ་དུ་
བཅས་མོད་ཀྱི། དལ་རྟེན་འདི་ཉིད་རྐྱེན་ལས་རྒྱལ་ཏེ་རེ་ཞིག་འཚོ་བ་དགེ་བ་སྐྱབས་གསུམ་ཐུགས་རྗེས་བྱུང་སྲིད་ཚེ་དམ་པའི་བཀའ་གཅོག་ཏུ་མི་རུང་བས་རང་གི་ནུས་པས་གང་ལྕོག་བསྒྲུབ་འདུན་རྟེན་འབྲེལ་ཞུ་བ་ལགས་ཤིང་། པྲ་དང་ཧྲ་ལྟ་བུའི་ར་ཡིག་བརྩེགས་པའི་སྔོན་མ་སྐབས་འགར་མི་ལྕི་བའི་སྒྲོས་རྒྱ་འགྲེལ་ཆེན་པོ་རྣམས་སུ་བཞུགས་འདུག་པ། རྒྱ་གཞུང་རྣམས་ལ་དེ་འདྲ་བྱུང་ཚེ་ཡོན་ཏན་ལས་སྐྱོན་མིན་པའི་མཆོག་གི་སྦྱོར་བའི་རྗེས་འབྲངས་ཀྱི་རྣམ་གྲངས་ཡིན་པར་རྟོགས་པའི་ལུང་ཁུངས་སྦྱོར་རྒྱུ་ཙམ་ལས། ད་ལྟའི་སྒྲ་གཞུང་རྣམས་སུ་དེ་ལྟའི་ཆོ་གའི་ཁུངས་མེད་པས་དེ་འདྲའི་སྔ་མ་སྤྱིར་བཏང་ལྕི་བའི་གྲངས་ལས་ཡང་བར་བརྩི་སྲོལ་མེད་འདུག་ལགས། ཆོས་ཀྱི་སྡོང་པོ་མཆོག་གི་གསེར་ཞལ་ཡང་རིང་མིན་མཇལ་འདུན་ཅི་ནས་ཞུ་སྤྲོ། སླད་ཀྱི་དུས་ན་འཁོར་མཚོ་སྒྲོལ་བ་ཡི། །སྙིང་སྟོབས་དཔག་པར་དཀའ་བའི་གཞན་དབང་བཅས། །དབུ་མའི་རིག་པས་རྡོ་རྗེའི་སྲོག་གྲུབ་སྟེ། །དཀོན་མཆོག་དགྱེས་པའི་གཉེན་ཏུ་ཡུན་བརྟན་གསོལ། །གང་གི་མཁྱེན་རྟོགས་ནུས་པའི་རྩལ་ངོམས་ནས། །བསྟན་དང་འགྲོ་བའི་སྲོག་ཟུང་བག་བརྐྱང་བ། །ཆབ་ཀྱིས་བྲན་བ་པདྨའི་དགའ་ཚལ་བཞིན། །ལུས་ཅན་ཀུན་དགའི་རྫོགས་ལྡན་སྤེལ་བར་མཛོད། །འདིར་ཡང་བྱང་ཆུབ་བར་དུ་ཆོས་མཐུན་གྱི། །མཛའ་
བ་མི་ལྷོད་ཡེ་ཤེས་གཟིགས་པའི་སྤྱན། །དཀྱུས་རིང་རོལ་པས་ཡུན་ཏུ་བཙའ་བ་ཡི། །ཐུགས་རྗེའི་འཇུག་པ་ཅི་ཡང་སྩོལ་ཅིག་གུ །ཞེས་ཞུ་ཡིག་གཟིགས་རྟེན་ལྷ་རྫས་བཅས་དཔལ་སྤུངས་ཀྱི་གདན་ས་ནས་ཕྲན་སྤྲུལ་མིང་ཡོན་ཏན་རྒྱ་མཚོས་གུས་པས་ཕུལ།། ༈ །།ཞི་བའི་གཟིགས་པས་འཁོར་བ་པ། །ལྟ་བ་ངན་པའི་འཇིགས་ལས་སྲུང་། །རྣམ་དག་ཕུང་པོ་གསུམ་མཐར་ཕྱིན། །དོན་ཀུན་གྲུབ་པས་དགེ་ལེགས་སྩོལ། །ཚོགས་གཉིས་ཆུ་གཏེར་ཆེ་ལས་ལེགས་འཁྲུངས་ཤིང་། །བདེན་གཉིས་དམ་ཆོས་འོད་ཀྱི་དྲ་བ་འགྱེད། །སྐུ་གཉིས་ཆ་ཤས་རྫོགས་ལ་ཕྱོགས་པ་ཡི། །དོན་གཉིས་པད་ཚལ་བཞད་དེའི་ཞབས་དྲུང་དུ། །ལུགས་གཉིས་འབྱོར་པ་པད་རྩ་ལྟར་ཕྲ་ཡང་། །ལུང་རྟོགས་བསྟན་པ་སྙིང་ལ་རབ་བཞག་སྟེ། །དགེ་
སྦྱོང་གསོབ་ཏུ་ཞུགས་པའི་རྒྱལ་ཁམས་པས། །དད་གསུམ་ལས་སྐྱེས་ཞུ་བའི་མཆིད་འདི་ཕུལ། །ཚེ་རབས་དུ་མར་རྒྱལ་དང་རྒྱལ་སྲས་ལ། །མཉེས་པ་བསྒྲུབས་པས་སྐུ་ཚེ་འདི་ཉིད་དུ། །བསླབ་གསུམ་རྣམ་དག་ཕུང་པོ་མཐར་སོན་ཅིང་། །ཐོས་སོགས་འཕགས་ནོར་ཤིན་ཏུ་ཕྱུག་ཅེས་ཐོས། །རྒྱལ་བས་ལུང་བསྟན་འཕགས་པ་ཡབ་སྲས་ཀྱི། །བཞེད་གཞུང་རྒྱལ་བ་གཉིས་པས་གང་བཀྲལ་ང་། །དབུ་མའི་ལྟ་ལ་ལུང་རིག་དཔྱད་པ་ཡང་། །ཁྱོད་འདྲ་རྫོགས་པའི་དོ་ཟླས་དབེན་པ་སྙམ། །གཟུགས་སོགས་དེ་བཞིན་ཉིད་ལ་རབ་ཞུགས་པས། །ཆོས་ཀུན་རོ་མཉམ་གཟིགས་པའི་ཆོས་ཀྱི་སྤྱན། །འཇམ་དཔལ་དཔའ་བོའི་མཁྱེན་པར་ཅོ་འདྲི་བས། །བསྟན་པ་ཐམས་ཅད་འགལ་མེད་གཟིགས་པ་དང་། །ལྷག་པར་དམ་པའི་ཆོས་དང་སེམས་ཅན་དོན། །ཕྲ་མོའི་ཕྱིར་ཡང་སྲོག་ལུས་འདོར་ཕོད་པའི། །རྒྱལ་སྲས་མཛད་པ་དཔག་པར་དཀའ་བ་དེ། །བདེ་བླག་ཉིད་དུ་ཁུར་དུ་བསྣམས་པར་གྲགས། །རིག་པའི་གནས་དང་ཟབ་རྒྱས་ཆོས་ཚུལ་གྱིས། །སྐལ་བཟང་ཡིད་དགའ་སྟེར་བའི་སྐྱེད་ཚལ་ནས། །ཆ་ཤས་ཡིས་ཀྱང་རང་བཞིན་མཚོན་པ་ཡི། །གསུང་གི་མེ་ཏོག་སྤྱི་བོའི་རྒྱན་ཏུ་ལྷུང་། །དེ་ཚེ་ལྷོ་ཡི་རླུང་གིས་སྐྱེ་བོ་དང་། །པདྨའི་དྲི་ཡིས་བུང་བ་དགའ་སྐྱེད་ལྟར། །དམ་པའི་དྲི་ཡིས་བདག་ཡིད་
རྐང་དྲུག་པ། །སྔར་མེད་དགའ་བའི་ཅ་ཅོས་བྲེལ་བར་བྱས། །ཁོ་བོ་དམ་པའི་ངང་ཚུལ་མི་ལྡན་ཞིང་། །རིག་གནས་གཞུང་ལུགས་ཀུན་ལ་བག་ཆགས་ཙམ། །བཞག་ཀྱང་རིག་པ་གླེགས་བམ་ནང་གནས་པས། །མཁས་པའི་མདུན་སར་སྤོབས་པའི་གཟེངས་དམན་ཀྱང་། །རྒྱལ་བའི་བསྟན་ལ་དཔྱད་བཟོད་ཤེས་རབ་ཀྱི། །ཆ་ཤས་ཐོབ་པས་རིས་བྲལ་བསྟན་པ་དང་། །བསྟན་འཛིན་ཀུན་ལ་ཤིན་ཏུ་གུས་པ་ཡིས། །ཐོས་བསམ་སྒྲུབ་ལ་ཅི་ནུས་བརྩོན་པ་ལགས། མཚམས་ཞུས། །འགྲོ་འདིའི་བདེ་སྐྱིད་རྒྱལ་བའི་བསྟན་ལ་རགས། །དེ་ནི་གང་ཟག་རྒྱུད་ལ་གནས་པས་ན། །ལུང་རྟོགས་ནོར་བུའི་ཕུང་པོ་ཁྱོད་ཀྱི་སྐུ། །ཉེ་ཞོའི་དྲི་མས་ནམ་ཡང་མ་གོས་པར། །ཐུབ་བསྟན་ཁང་བཟང་མཛེས་པའི་རྒྱན་གཅིག་པུར། །བཤད་སྒྲུབ་རྒྱལ་མཚན་རྩེ་མོར་རྟག་བཀོད་དེ། །གདུལ་བྱའི་ཁམས་དང་དབང་པོར་འཚམས་པའི་ཆོས། །འདོད་རྒུའི་སྦྲང་ཆར་ཟད་མི་ཤེས་པ་ཕོབ། །དུས་ཀྱིས་བསླད་པས་བཤེས་གཉེན་ཚད་ལྡན་དཀོན། །བསྟན་འཛིན་དག་ཀྱང་གཞན་གྱིས་བཀུར་བ་ཉུང་། །རྙེད་པས་གཡེངས་རྣམས་བསྟན་ལ་སེམས་ཁྲལ་ཆུང་། །ལྟར་སྣང་གྲུབ་མཐས་ཆོས་སྤངས་འཁྲུགས་ལོང་བསྐྱེད། །མང་དུ་གསན་ལ་མང་དུ་གསོལ་བས་ཅི། །གཟུགས་
བརྙན་ཆོས་ཀྱང་ནུབ་རིར་ཕྱོགས་པ་ལ། །སྙིང་སྟོབས་ཆེན་པོས་ལྷག་པར་གོ་བགོས་ཏེ། །རིས་མེད་རྒྱལ་བསྟན་ཡུན་རིང་སྐྱོང་བར་འཚལ། །རིས་སུ་མ་ལྷུང་ཆོས་ཀྱི་སྤྱན་ལྡན་པ། །གང་ན་མཆིས་ཀྱང་བདག་གི་མགོན་ཡིན་པས། །ཁྱོད་ཀྱིས་འདི་དང་གཏན་ཏུ་མགོན་མཛོད་ལ། །གསུང་གསང་བདུད་རྩིའི་དགའ་སྟོན་ལྷུག་པར་སྩོལ། །ཞེས་པའི་ཞུ་ཡིག་གཟིགས་མཚོན་ལྷ་རེག་བཅས་དཔལ་སྤུངས་རི་ཁྲོད་ནས་འདུ་གསུམ་པ་ཀོང་སྤྲུལ་མིང་གིས་གུས་ཕུལ། ཧོར་དགོན་སར་ཆོས་རྗེ་ལ་ཕུལ་བའོ།། ༈ །།ནང་ཆེན་རྒྱལ་སྲས་སྤྲུལ་སྐུ་དལ་བདེ་ལ་ཕུལ་བ། །ཤེས་བྱའི་ཕ་མཐའ་ནམ་མཁའ་ཡངས་པའི་རྒྱ། །མཁྱེན་གཉིས་ཉི་ཟླ་འབར་བའི་འོད་སྟོང་གིས། །སྣང་བའི་གོ་སྐབས་གཅིག་ཏུ་སྔོན་བྱད་པ། །རྒྱལ་སྲས་བསྟན་འགྲོའི་མགོན་པོ་ག་ལ་བར། །བློ་གྲོས་འདབ་མ་ཕྱོགས་སུ་རྒྱས་མིན་ཀྱང་། །ལྷག་བསམ་རྩེ་བ་དཀར་བའི་ཀུ་མུ་དའི། །དད་པའི་མགོ་ལྕོག་ཕྱོགས་དེར་ལྡེམ་ནས་ཀྱང་། །སྦྲང་རྩི་ལྟ་བུར་སྙན་པའི་ངག་འདི་འབུལ། །གང་ཁྱོད་གདོད་ནས་གཉིས་ཆོས་མ་ལུས་པར། །མི་ཕྱེད་ཕྱག་རྒྱས་བཏབ་པའི་རིགས་ཀུན་གྱི། །འཁོར་ལོས་སྒྱུར་བ་མཆོག་གི་རྒྱལ་ཐབས་པར། །སྤྱི་རླུགས་དབང་བསྐུར་ངོ་བོ་ཉིད་ཀྱིས་བྱིན། །དེ་ལྟ་ན་ཡང་ཤིང་དང་གཏེར་
བུམ་དང་། །ནོར་ལས་འདོད་པ་འབད་མེད་འཇོ་བ་བཞིན། །སྨོན་ལམ་དང་ནི་སྙིང་རྗེའི་གཞན་དབང་ལས། །ད་དུང་རྒྱལ་སྲས་གཞོན་ནུའི་རྣམ་ཐར་བཟུང་། །ཚོགས་གསུམ་གསེར་གྱི་བྱེ་མ་འདྲེན་པ་ཡི། །ཐོས་བརྩོན་ཤེས་རབ་དག་པ་གངྒཱའི་ཆུས། །འགྲོ་ཁམས་ཉེས་པ་དྲུག་ཁྲི་སྐད་ཅིག་ལ། །བཀྲུ་བའི་ཆོ་ག་མེས་པོས་བྱིན་ལགས་གྲང་། །དགེ་ཆོས་མ་ལུས་སྡུད་པའི་ངང་ཚུལ་ནི། །བྱང་ཆུབ་སེམས་དཔའི་གསང་བ་ཟབ་མོ་སྟེ། །ཆུ་བཞི་སྡུད་པ་རིན་ཆེན་མཛོད་དེ་ཡང་། །འགྱུར་མེད་རྟ་གདོང་ཞུགས་ཀྱིས་ཇི་ལྟར་བསུབ། །དབྱངས་གཅིག་ལ་ཡང་ཉམས་འགྱུར་འབུམ་ཕྲག་གི། སྒེག་པ་འཆང་བ་དག་གི་འཕང་འགྲོ་ནི། །མ་བསྐུལ་བར་ཡང་ཙངས་སྲས་རང་ཉིད་ཀྱིས། །མགྲིན་པའི་བ་གམ་དག་ནས་ལེགས་པར་བརྡུང་། །སྐྱེས་ཐོབ་མཐོ་རིས་དགའ་ཚལ་ཡངས་པ་ན། །རྣམ་དཔྱོད་མེ་ཏོག་ཕྲ་མོའི་འཛུམ་རླབས་ཀྱིས། །བཅུ་ཕྲག་རིག་པར་རློམས་པའི་ཆུ་སྐྱེས་གཞན། །རང་དབང་མེད་པར་བེམ་པོའི་བརྟུལ་ཞུགས་འཆང་། །གང་གི་ལུང་དང་རིག་པའི་ཐོག་འཕེན་པ། །དེ་ཡི་གཏན་ཚིག་ཤུགས་ནི་དབང་པོས་ཀྱང་། །བཟློག་པར་དཀའ་བའི་སྤོབ་པ་མི་བསྙེངས་པས། །ཆོས་གྲགས་ཞི་བའི་དབྱིངས་སུ་མནལ་གྱི་དོགས། །དོན་ཀུན་གྲུབ་
པ་རྒྱལ་པོའི་ཁབ་དག་ཏུ། །སྣང་ནས་ཤཀྱའི་དབང་པོ་རྒྱལ་བ་ལྟར། །མི་མཆོག་ཁྱོད་ཀྱི་མཚན་དཔེའི་སྐུ་སྣང་ནས། །ཕྱོགས་ལས་རྣམ་པར་རྒྱལ་བའི་གྲགས་པ་གསལ། །རྒྱལ་རིགས་དགོན་པར་གཤེགས་པ་རཱ་ཧུ་ལ། །རྒྱལ་བས་བསབ་ལ་གུས་པའི་མཆོག་བསྔགས་ལྟར། །རྒྱལ་སྲས་གཞོན་ནུ་ངུར་སྨྲིག་བླ་གོས་ཅན། །རྒྱལ་བའི་ཡབ་གྱུར་མིག་འཕྲུལ་སྟོན་མིན་ནམ། །རིས་མེད་བསྟན་པའི་ཁང་བཟང་ལ་ཆགས་ཀྱང་། །དོན་བརྒྱུད་སྤྲིན་སྒྲས་འབོད་པའི་རྒྱལ་མཚན་ནི། །སྲིད་རྩེའི་བླ་ན་བཏེགས་པའི་སྙིང་སྟོབས་ཀྱིས། །ནོར་བུའི་ཡུ་བ་མདོ་ཁམས་ལྗོངས་སུ་བརླིངས། །ཉི་མའི་སྣང་བས་བདའ་བའི་དཔལ་གྱི་གོས། །བུང་བ་དག་ལ་གཅིག་ཏུ་གཤིམ་པ་མིན། །གང་གི་བཀའ་དྲིན་གྱིས་ཁྱབ་དགེ་བཅུ་ཡི། །སྣང་བས་སྐྱེ་དགུ་མི་བདེ་མེད་པར་སྲུང་། །དབུལ་པོ་དག་ལ་ཆོག་ཤེས་སྐྱེ་སྲིད་ཀྱི། །ནོར་བུའི་འདོད་པའི་དཔལ་ནི་ཟད་མི་ཤེས། །ངག་གི་རྒྱན་ནི་ཐུང་ངུས་གཏུགས་པར་ཡང་། །གང་གི་ཡོན་ཏན་ལུས་མཆོག་ཟད་མི་ཤེས། །རྨོངས་བདག་ཟ་ཉལ་འཆག་པའི་འདུ་ཤེས་ཀྱི། །ཤ་ཚུགས་ལྡན་ཡང་བྱང་ཆུབ་སྤྱོད་པའི་ཁུར། །མི་ཐེག་དམ་པ་རྣམས་ཀྱི་གྲལ་མཐའ་ན། །འབད་ཀྱང་གནས་པ་ནོར་སྲུང་ཚུལ་དུ་བདོག །མཚམས་ཞུས། །གང་གི་བསྐལ་བ་རྒྱ་མཚོར་རྒྱལ་རྣམས་ཀྱི། །
མདུན་སར་གཡར་དམ་མཛད་པ་གདུལ་དཀའ་བའི། །འགྲོ་རྣམས་སྒྲོལ་བའི་སྙིང་སྟོབས་དེ་ལགས་ན། །དེ་ནི་རྒྱུ་ཡི་སྟོབས་ལས་བརྙེས་པའི་ཕྱིར། །ཞི་བའི་སྒྲ་ཡིས་སྲིད་པའི་གཉིད་སློང་ཞིང་། །སྲིད་པ་ཡིས་ཀྱང་ཞི་བ་ཕྱོགས་གཅིག་པའི། །ནགས་ལས་བསྐུལ་བ་ཚད་མའི་སྐྱེས་མཆོག་ཁྱོད། །ད་དུང་སྲིད་པའི་གྲོང་ཁྱེར་ཉམ་ང་འདིར། །ཇི་ལྟར་པདྨའི་མཚོ་ལ་ངང་པ་མོ། །དགའ་བས་འཇུག་པ་དེ་ལྟར་སྙིང་བརྩེའི་རླབས། །འཐུང་བས་རྒྱས་པའི་བཞིན་གྱི་འཛུམ་ཕྱུང་ནས། །མ་འདྲིས་སྐྱེ་དགུ་མགྲོན་ཏུ་བསུ་བ་དང་། །ཤིན་ཏུ་ཟབ་པ་ཕྱིར་མི་ལྡོག་པའི་གཏམ། །ཉི་མའི་དཔལ་ལྟར་བྱེ་བ་ཆོས་ཀྱི་ཁྲིར། །རྒྱ་མཚོའི་རྡུལ་གྱི་བསྐལ་པ་ཇི་སྙེད་པ། །དེ་སྙེད་རྡོ་རྗེའི་སྐྱིལ་ཀྲུང་མི་གཡོ་བར། །རིགས་མཐུན་ཕྱིར་ན་མཐོ་བའི་སར་གནས་ཀྱང་། །དམའ་བ་ལ་ཆགས་ཉི་དང་པདྨོ་བཞིན། །དམན་པར་གནས་པ་ལ་ཡང་ཐུགས་བརྩེ་ཡིས། །པདྨ་རྒྱས་པའི་སྤྱན་གྱིས་བཙའ་བར་གསོལ། །ཞུ་ཡིག་གཟིགས་རྟེན་ལྷ་ཡི་རེག་བྱ་ཡི། །གོས་ཀྱིས་བཀླུབས་པའི་སྙན་ཚིག་མེ་ན་ཀཱ། །ལྷ་དབང་བཞིན་ཏུ་བརྗིད་པའི་མདུན་ས་ན། །གུས་པའི་ཉམས་འགྱུར་བརྒྱ་ཕྲག་བཅས་ཏེ་ཐེག །ཞེས་སྨྲོན་ཟླའི་དཀར་ཕྱོགས་ཀྱི་གྲལ་ཚེས་བཟང་པོ་ལ་ཤར་དཔལ་སྤུངས་དགོན་གྱི་ཆོས་
གྲྭ་ཆེན་པོ་ནས་ད་རི་དྲཱ་ཡོན་ཏན་རྒྱ་མཚོ་ནས་ཕུལ།། ༈ །།སྦྱངས་ཡོན་བློ་གྲོས་ཟླ་ཚེས་གསར་པ་ནི། །སྐྱེས་ཐོབ་ཤེས་རབ་ཟབ་མོའི་ཆ་གང་བས། །ཕན་བདེའི་ཆུ་གཏེར་ངེས་པར་སྤེལ་ནུས་པའི། །མཆོག་སྤྲུལ་ཤར་གྱི་ཐིག་ལེ་ག་ལ་བར། །ཁྱོད་ཀྱི་སྔོན་གོམས་ཡོན་ཏན་ཚུལ། །རིང་ནས་ཐོས་པའི་སིམས་བྱེད་ཀྱིས། །དགའ་བའི་འདབ་བརྒྱ་རབ་གྲོལ་བའི། །ཀུ་མུད་གཞོན་ནུས་འདི་སྐད་མཆིད། །དེང་དུས་ཁྱོད་སྐུ་མཚན་དཔེའི་ལང་ཚོ་ནི། །ཉི་མ་འབུམ་གྱི་དཀྱིལ་འཁོར་ལས་བྱུང་ཞིང་། །མཛེས་སྡུག་བླ་གོས་གསར་པས་སྤྲས་པ་ཡང་། །མཚམས་སྤྲིན་དྭངས་པའི་དབུས་ནས་བླངས་བཞིན་གྱི། །གེགས་མེད་ངོ་མཚར་དུ་མ་ཡི། །རྩེ་དགའ་རྣལ་བར་དགོད་བཞིན་པར། །རགས་པ་ལས་འདས་ཕྲ་བའི་གཞུང་། །ངེས་དོན་བསྟན་སྲོལ་འཛིན་པ་དང་། །ཐུགས་ཀྱང་བསྟན་འགྲོའི་བསྒྲུབ་བྱ་ལ། །ལྷག་བསམ་པདྨའི་སྐུད་པ་ལས། །ཆེས་དཀར་ཡོན་ཏན་ཕྲིན་ལས་ཀྱི། །འཇུག་པའང་གཞན་དྲིང་མི་འཇོག་རྨད། །འདི་ན་རྒྱ་ཆེན་སྤྱོད་འདོད་ལྷག་བསམ་སྙིང་། །ཤེར་བརྩོན་དྲུང་དུའི་གཉིད་དུ་ཡུར་མོད་ཀྱི། །འདུ་ཤེས་གསུམ་གྱི་མལ་ན་ཉལ་མིན་བར། །སྒྱུ་མའི་ཟོ་བདོག་ཉིད་ཀྱང་བདེ་བར་མཆིས། །མཚམས་ཞུས། །སྙིགས་
མའི་དུས་འདིར་བསྟན་འགྲོར་སྨན་པའི་བློ། །འཛིན་གྱུར་ཉི་སྐར་ལྟར་དཀོན་དེ་ལས་ཀྱང་། །སྙིང་པོའི་ཟབ་གཏམ་སྨྲ་བ་དཀོན་པའི་ཕྱིར། །གང་ཁྱོད་མ་ཧཱ་བྷོ་ཊའི་དཔལ་དུ་བྱས། །དེ་ལྟ་ན་ཡང་རྡོ་ཐལ་གཞལ་མེད་ཁང་། །དགུང་ཟླའི་འོད་ཀྱི་ཐིགས་པས་བྲན་དེ་འགྲོགས། །དཀར་བའི་དགེ་མཚན་སླར་ཡང་ཟླ་མེད་ལྟར། །ལྷག་བསམ་རེག་བྱས་བྱི་དོར་ཅུང་ཟད་བགྱིད། །སྤྱིར་དུ་རྒྱལ་བསྟན་ཐ་དག་ཐར་པའི་ལམ། །ཁོ་ནར་འཆད་པ་མཐུན་མོང་ཀཾ་ཚང་གི། །ལྟ་བ་ཀུན་མཁྱེན་དོལ་པོའི་བཞེད་སྲོལ་དུ། །ཆུ་བོ་གཅིག་འདྲེས་གྱུར་པས་ཁྱད་པར་མཐུན། །སྙིང་པོའི་བསྟན་ཀུན་ངེས་པའི་དོན། །མཐར་ཐུག་ལགས་མོད་དྭགས་བརྒྱུད་དལ། །དོལ་པོ་ཡབ་སྲས་བཞེད་པའི་སྲོལ། །ལྷག་པར་ཟབ་པ་མཁྱེན་བཞིན་ཕྱིར། །ཟབ་བསྟན་འདི་དག་གི་ནི་རྒྱུ་མཆན་དག །མཁྱེན་ནས་འཛིན་སྐྱོང་སྤེལ་བས་བསྟན་འགྲོའི་དོན། །རླབས་ཆེན་སྒྲུབས་མཛོད་དེ་ཡི་སྔ་ལོགས་སུ། །བསྟན་པའི་གཞི་མ་སོ་ཐར་ཡིན་པས་ན། །དེ་ལ་བསླབ་དགོས་དེ་ཡང་གང་ཟག་ལ། །བརྟེན་ནས་སྡོམ་པ་སྐྱེ་ཕྱིར་བརྒྱུད་པ་ཡང་། །དག་གཙང་ཤཱཀྱ་ཤྲཱི་ནས་ད་ལྟའི་བར། །བསླད་མེད་མཁས་དང་གྲུབ་པ་རིམ་བྱོན་ལས། །བླངས་མཛོད་དེ་ཡང་རྒྱལ་དབང་ཀརྨ་པ། །ཡབ་སྲས་
ཁོ་ན་ད་ལྟ་བཙུན་པའི་ཕྱིར། །གང་རུང་མགུལ་བར་མཛེས་པའི་གསེར་རྒྱན་གྱིས། །སྤ་བས་བསླབ་གསུམ་གཉིས་འཐུང་འགྲན་མེད་འགྱུར། །གཞན་ཡང་འཆད་རྩོད་རྩོམ་པ་ཡི། །འདུལ་མངོན་མདོ་སྡེ་གསང་སྔགས་ཀྱི། །བསྟན་པ་གསལ་མཛོད་དེ་ཡི་རྒྱུ། །ཐོས་པ་ཕྱོགས་མེད་སྦྱང་བ་གཅེས། །སླད་མར་དགེ་ལེགས་སྐུ་མཚོ་གསེར་གྱི་རྡུལ། །འགྲོ་འདིའི་བསོད་ནམས་ཞུན་ཆུས་ལེགས་བསྡོམས་པས། །ངེས་དོན་བསྟན་པའི་རྡོ་རྗེའི་ཁང་བཟང་རུ། །མཆོད་སྡོང་ཉིད་དུ་བསྐལ་བརྒྱར་བསྟན་པ་ནས། །འདིར་ཡང་འཕྲོས་པར་འོས་པ་ཡི། །གསུང་ཚོགས་འདབ་མ་བརྒྱ་པའི་སྤྲིན། །མི་འཆད་ཛ་ཧྣུའི་བུ་མོ་བཞིན། །མཛའ་གཅུགས་ཕྱག་གིས་འཐོར་བར་གྱིས། །ཞེས་ཞུ་འདེགས་ལྷ་རྫས་རབ་དཀར་བཅས་དབོ་ཟླའི་ཡར་ཚེས་དགེ་བར་དཔལ་སྤུངས་ཐུབ་བསྟན་ཆོས་འཁོར་གླིང་ནས་སྤྲུལ་མིང་པ་ཀརྨ་ཐེག་མཆོག་ངེས་དོན་བསྟན་འཕེལ་གྱིས་ཕུལ། །སྙིང་པོའི་རིང་ལུགས་རྒྱ་མཚོར་གནས་བཅས་ཀྱང་། །ཤེར་བརྩོན་རྣམ་དཔྱོད་ཡངས་པའི་གཤོག་རླབས་ཀྱིས། །རིས་བྲལ་གཞུང་བརྒྱའི་མཁའ་མཐར་སྤྱོད་པ་ལ། །ངལ་མེད་མཁས་དབང་ངང་པའི་རྒྱལ་པོའི་དྲུང་། །དགའ་
བའི་བདུད་རྩིས་མྱོས་པའི་སྙིང་ཞིག་ནི། །བློ་གྲོས་ཤ་ཚུགས་བརྟས་པར་མ་གྱུར་ཀྱང་། །ཅུང་ཟད་སྦྱངས་པའི་ལང་ཚོ་བདོ་བ་ཡི། །མཁས་ཁྱོད་སིམ་པ་བསྐྱེད་ཕྱིར་འདི་སྐད་མཆིད། །རིང་ནས་ལེགས་བྱས་འོ་མཚོ་བསྲུབས་པ་ལས། །རྒྱལ་བསྟན་པད་ཚལ་ཕྱེ་བའི་མཁས་བཙུན་གྱི། །འོད་ཕྲེང་བརྒྱ་ཕྲག་འབར་བའི་ཉི་མ་ཞིག །སྐྱེ་དགུའི་བསོད་ནམས་མཁའ་ལ་དེང་འདིར་འཆར། །འཁྲིད་པ་མེད་པར་ལོག་པའི་ལམ་འཕྱན་ཞིང་། །མ་བཀུག་པར་ཡང་སྡུག་བསྔལ་དུ་མ་བདོ། །མ་བྲིས་ཉེས་བརྒྱའི་གཟུགས་བརྙན་འཆར་པ་ཡི། །སྙིགས་ལྔའི་སྣང་ཚུལ་མི་བཟད་བདོ་དུས་འདིར། །སྐྱེས་ཐོབ་ཀླུ་ཡི་དབང་པོས་ལེགས་བྱིན་ཞིང་། །མཁས་བཙུན་བཟང་པོའི་ཁ་དོག་འགྱུར་མེད་ཀྱིས། །བརླངས་སྤྱོད་རྙོགས་མ་བསྒྲུང་ནུས་མཁས་དབང་གི། ཀེ་ཏ་ཀ་ཞིག་མདོ་སྨད་ལྗོངས་སུ་བྱུང་། །བསླང་བར་བྱས་སོ་སུམ་རྩེན་རྔ་ཡི་སྒྲས། །ལེ་ལོའི་གཉིད་ལས་མིག་མི་འཛུམ་རྣམས་ཏེ། །ཟུབ་ཏུ་ཉེ་བ་ངེས་དོན་བསྟན་པ་ཡི། །མེ་རོ་མདོ་ཁམས་སྨད་དུ་ཁྱོད་ཀྱིས་སོ། །ཟབ་པར་ངེས་པ་ཕྱིར་མི་ལྡོག་པའི་གཏམ། །སེང་གེའི་སྒྲས་བསྒྲགས་རྟག་བརྟན་སྙིང་པོའི་ཚུལ། །འཆད་རྩོད་རྩོམ་ལ་བློ་གྲོས་ཐོགས་མེད་ཀྱི། །མཁས་ཁྱོད་ངོ་མཚར་ཀུན་
ལས་ངོ་མཚར་གྱུར། །འདི་ན་ཀུན་ངས་འཆིང་ལྡན་འདུ་གསུམ་པའང་། །ཉེ་ཚེའི་སྒྱུ་ལུས་བདེ་ཞིང་བསྟན་དང་འགྲོར། །ལྷག་བསམ་ལྡན་གྱི་འཇུག་པའི་སྟོབས་ཕྲ་བས། །མེ་ཏོག་རྣམས་ཀྱང་ཁྲེལ་ནས་དགོད་དམ་སྙམ། །མཚམས་ཞུས། །སླད་དུ་བསྐལ་བརྒྱར་མི་ཤིགས་རྡོ་རྗེ་བཞིན། །འཚོ་ཞིང་གཞེས་ནས་མཐར་ཐུག་ངེས་དོན་གྱི། །བསྟན་དང་འགྲོ་ལ་སྨན་པའི་ཁུར་ཆེན་པོ། །ངལ་མེད་དམ་བཅའ་བཅས་ཏེ་ཐོགས་པར་རིགས། །དེ་སྲིད་འཕྲོས་འོས་བརྩེ་བས་མི་བསྐྱུད་པ། །སྙིང་ནས་མོལ་ཞེས་ཞུ་མཆིད་བྱ་མ་ཏ། །ལྷ་རྫས་ཕྱག་རྟེན་བཅས་ཏེ་དཔལ་སྤུངས་ནས། །དབོ་ཟླའི་ཚེས་ལ་སྤྲུལ་མིང་གྱི་ན་པས། ཕུལ།། ༈ །།རྣམ་ཐར་བཞིར་འཇུག་གདོང་པ་དང་། །ངེས་དོན་ལྟ་བའི་རལ་ཀླུངས་འཐུག། བསླབ་གསུམ་ངང་པའི་བཞོན་པས་མཛེས། །འདྲེན་མཆོག་གསེར་མངལ་ཅན་དེའི་དྲུང་། །དེ་དེར་དགའ་བའི་ཡུལ་འཁོར་འཛིན། །བློ་གྲོས་ལུས་རྩལ་མ་རྫོགས་ཀྱང་། །སྙན་ཚིག་མགྲིན་པའི་རྫ་རྔ་ནི། །ཅི་དགར་ཉིད་དུ་བརྡུངས་ལ་སྤྲོ། །ཁྱོད་སྐུ་ལྷུན་པོའི་རྗེས་འགྲོ་ངུར་སྨྲིག་མཚམས་སྤྲིན་གསར་པས་བླ་ན་མཛེས། །ཁྱོད་གསུང་ཕངས་འགྲོའི་མཐུན་ཕྱོགས་དབྱངས་ཀྱི་ཡན་ལག་ཀུན་རྫོགས་ངེས་དོན་སྟོན། །
ཁྱོད་ཐུགས་ཀུན་གསལ་རྗེས་འགྲོ་སྟོང་དང་སྙིང་རྗེའི་བདུད་རྩིའི་རྣམ་པར་བརླན། །ཁྱོད་ཚུལ་དམ་པར་གྱུར་པས་ཉེས་པའི་དྲི་མ་གཞར་ཡང་འཛིན་མི་སྲིད། །བདེ་ཆེན་ཆུ་ཡིས་བྲན་གྱུར་པའི། །ཞི་བ་རྟག་བརྟན་དགོངས་པའི་མཐིལ། །མཐའ་བྲལ་མཐའ་ལ་འཁུ་བའི་སྙིང་། །རྣམ་པ་ལྷ་སྔགས་འཁོར་ལོས་བཅིངས། །རང་གིས་རྟོགས་པའི་དབྱིངས་ཉིད་དུ། །འགྲོ་མང་འཁྲིད་སླད་སེང་གེའི་སྒྲས། །ཀུན་ཏུ་འདོམས་ལ་དགའ་བ་ཡང་། །བསྙེངས་བྲལ་དམ་པའི་ཚུལ་དེ་རྨད། །འདི་ན་བསྟན་འགྲོར་སྨོན་འདུན་བློ། །འཆང་བདག་གནས་སྐབས་འབྱུང་འདུས་ལ། །འཚེ་མེད་གཏན་ཏུ་བདེ་བའི་སླད། །ཐོས་བསམ་སྒོམ་ལ་བརྩོན་ཁུལ་འདོག །མཚམས་ཞུས། །སླད་མར་སྐུ་མཚོ་བསྐལ་བརྒྱའི་བར། །འཚོ་གཞེས་སྙིང་པོའི་བསྟན་སྤེལ་བཞིན། །འདིར་ཡང་ཐུགས་གཤིས་འཕྲོས་འོས་ཚིག། ཆད་མེད་གངྒཱའི་བགྲོད་པར་འགྲན། །ཞེས་པའི་ཞུ་རིས་ལྷ་རྫས་ཀྱི། །རྟེན་བཅས་དབོ་ཟླའི་ཡར་ཚེས་སུ། །ངེས་དོན་ཆོས་གྲྭ་དཔལ་སྤུངས་ནས། །སྤྲུལ་མིང་འདུ་གསུམ་པ་ཡིས་ཕུལ། ཡིག་བསྐུར་གསུམ་པོ་འདི་ཀུན་གཟིགས་དབོན་རྒན་མཆོག་སྤྲུལ་རིན་པོ་ཆེའི་གསུང་ཚབ་ཏུ་ཡོན་ཏན་རྒྱ་མཚོས་རང་ལོ་ཉེར་གཅིག་པར་བྲིས་པ་སྟེ་དགོས་གལ་ཆུང་བའི་བྲལ་ལོ།། ༈ །།
མཚུར་གྲྭ་སྦྱིན་པ་མཐར་ཕྱིན་མཆིད་ལན། །མཁྱེན་པའི་དཀྱིལ་འཁོར་རབ་རྫོགས་ཤིང་། །རྣམ་དཔྱོད་རི་དྭགས་རྟགས་ཀྱིས་སྤ། །ཡིད་ཀྱིས་གདུང་བ་སེལ་བྱེད་པའི། །བློ་ལྡན་ཟླ་བ་གཞོན་ནུའི་དྲུང་། །མཉན་འོས་པདྨ་ལྟ་བུའི་ངག །ལག་པའི་རྩེ་མོར་ཕྱིན་པ་ལས། །དགའ་བ་ཇི་ལྟར་འཕེལ་གྱུར་པ། །དབྱར་གྱི་དཔལ་མོས་མཚོན་ནུས་མིན། །རྣམ་དཀར་ལས་ཀྱི་འབྲས་བུ་ནི། །མཐོ་རིས་འབྱོར་པས་མི་བསྐྲུན་པ། །ཆོས་བློ་སད་པའི་དལ་རྟེན་གྱིས། །ཁྱོད་ཀྱི་སྐྱེ་བ་དོན་ཡོད་བྱས། །འོན་ཀྱང་ཆོས་བཞིན་མི་སྤྱོད་ན། །མཐོ་རིས་ཐོབ་ཀྱང་དོན་མེད་ལ། །བློ་དང་ལྡན་ཡང་བེམ་པོ་ཉིད། །ནོར་གྱིས་འབྱོར་ཡང་དབུལ་པོ་ལགས། །གང་ལ་དད་པ་མེད་པའི་མིས། །རྒྱལ་ལ་ཡིད་ཆེས་མི་སྐྱེ་ཞིང་། །ལས་འབྲས་དག་ཀྱང་ཆུད་གསན་པས། །རང་རྒྱུད་ཐལ་བ་བཞིན་ཏུ་བརླག །ཐར་པའི་དཔལ་ལ་མི་སེམས་ན། །མངོན་མཐོའང་ཡུད་ཙམ་བདེ་བ་སྟེ། །དེ་དག་དགུན་གྱི་མེ་ཏོག་བཞིན། །འཁོར་བའི་སད་ཀྱིས་བཅོམ་པར་འགྱུར། །བདག་ལ་ཆགས་པ་དམན་པ་སྟེ། །གཞན་ཕན་བགྱི་བ་དམ་པ་ལགས། །ད་ལྟ་དེ་འདྲའི་ནུས་མེད་པས། །བློ་གྲོས་རིམ་གྱིས་བསྒྲུབ་པར་བྱ། །དེ་ལ་ཐོས་པའི་རྨང་བཏིང་ཞིང་། །
ཕྲ་ཞིབ་གོ་བས་གནད་ལ་དཔྱད། །ཞི་ལྷག་ཟུང་འབྲེལ་ཏིང་འཛིན་ལའང་། །མཉམ་པར་བཞག་ཅིང་གོམས་བྱས་པས། །དེ་ནས་དེ་ཡི་སྤོབས་པ་ཡང་། །རྒྱལ་སྲས་གཞོན་ནུའི་རྗེས་འགྲོ་བས། །ཁྱེད་སྔོན་དེ་ལྟའི་བློ་སྐྱེས་པ། །ཐེག་ཆེན་རིགས་ཀྱི་ནུས་པ་སྟེ། །ད་དུང་དུ་ཡང་གཞན་རྐྱེན་གྱིས། །རང་བློ་རྣམ་པར་མི་འགྱུར་བར། །ཇི་སྐད་བཤད་ལ་ནན་ཏན་ཏུ། །མཛོད་དང་བདག་ཡིད་ཚིམས་པར་འགྱུར། །ཐབས་མཁས་གོ་ཆ་མི་ལྡན་པ། །བདག་ནི་སྣང་ཤས་འདིས་སྐྱོ་ནས། །བས་མཐའི་ཚལ་ན་བསྙེགས་བརྩམས་ཏེ། །སྲིད་འབྱོར་ཀུན་སྤོང་ཚུལ་དུ་གནས། །སླད་དུ་འཚོ་ཁམས་ཡུན་བརྟན་ཞིང་། །བདག་གིས་ཆོས་བཞིན་སྨྲ་བ་ཡིས། །དངོས་དང་བརྒྱུད་ནས་གང་བསྒོ་བ། །དེ་ལ་འབད་པས་གཡར་དམ་མཛོད། །དཔལ་ལྡན་འཇིག་རྟེན་དབང་ཕྱུག་གིས། །རྗེས་སུ་བཟུང་བའི་དམ་པ་ཁྱོད། །ཆོས་བཞིན་སྤྱོད་པས་བདེར་འཚོ་བའི། །ཤིས་པ་དག་ཀྱང་བརྗོད་པར་བགྱི། །ཞེས་འདེགས་རྟེན་བཅས་དཔལ་སྤུངས་ཀྱི་གདན་ས་ནས་ཕྲན་ཆུང་ཆོས་སྨྲ་བ་ཡོན་ཏན་རྒྱ་མཚོས་སྣྲོན་ཟླའི་ཚེས་དགེ་བར་ཕུལ།། ༈ །།ལྷུན་པོ་ནོར་བུའི་འོད་ཀྱིས་གོ་སྐབས་དང་། །དཀའ་ཐུབ་གྲུབ་པ་གྲུབ་པའི་བསྙེམས་པས་ཀྱང་། །རིག་གྲོལ་
སྤོབས་པའི་ཆ་ལ་མི་འགོང་བས། །གྲགས་པ་མཁའ་ཡི་ལམ་དུ་བྲིས་པ་དེར། །བཀའ་མཆིད་གྱི་མེ་ཏོག་ཐལ་མོའི་མཛེས་རྒྱན་ཏུ་ཕེབས་པས་ཡིད་ཀྱི་བུང་བ་དད་སྤྲོས་གཡོས་ཏེ་ཞུ་མཆིད་དར་དིར་དུ་སྒྲོགས་པ། །མཁྱེན་རྟོགས་གཟི་བྱིན་བཟོད་པར་དཀའ་བ་ཡང་། །མཁས་མ་འབྱེ་བས་དམིགས་བུ་ཁོ་ནར་བསྙེན། །དེས་ན་སྐྱེ་དགུ་གསོ་བའི་དབྱར་གྱི་མ། །བསྔགས་པ་ཚིག་གི་ལམ་ནས་འདས་པས་དཔག། གངས་ཀྱི་སེང་གེ་གཉིས་པས་དབེན་པ་ནི། །སྐལ་པ་ཅན་ལ་སྦྱིན་སྐྱེས་སྒྲ་བཞིན་ཏུ། །མཁས་པའི་མིག་སྟོང་གྲུབ་པའི་རྡོ་རྗེ་དང་། །གྲོལ་གསུམ་བདུད་རྩིའི་ཟས་ཀྱི་སྐབས་དབྱེ་བས། །སྐྱེད་ཚལ་ཆུ་སྐྱེས་མཛེས་པའི་ཕྲེང་བ་ལས། །ཨུཏྤལ་རྣ་རྒྱན་བསྟེར་བ་མཛངས་པའི་ལུགས། །དམ་པའི་ཁྲོད་ན་རིག་ལ་དགའ་བའི་ཡིད། །ཚིག་གིས་གསོ་བས་དམ་པའི་དེ་ཉིད་མཚོན། །སྦྲང་རྩིའི་དགའ་སྟོན་སྐལ་གས་ཉུང་བ་བདག །ཉི་ཟླའི་བགྲོད་པར་མཛའ་བས་འཁྱུད་ན་ཡང་། །རྩྭ་ཡི་མར་མེའི་རྣམ་དཔྱོད་ཉམ་ཆུང་བས། །དོན་གཉིས་རེ་བ་སྒྲ་རྩེས་བོས་པའི་མགྲོན། །མ་བགོས་འགྲམ་པའི་ཚོན་གྱི་ཐིག་ལེ་ནི། །ཡོན་ཏན་རྒྱ་མཚོའི་ཟེག་མ་འཕོས་པ་ན། །ལང་ཚོ་གསར་པའི་རོ་ཡིས་སྒེག་པ་ཡང་། །སྒྲ་མེད་ཞི་བའི་ངོགས་སུ་འཁྱིལ་པས་བསྲིངས། །དེ་ལྟ་ན་ཡང་དུས་
རིང་སྐོམ་བའི་སྨན། །འཐུང་ནས་སྐྱུགས་པའི་དག་བྱེད་ཚད་མ་ཞིག །འགྲོ་ཕན་སྙིང་དུ་ཞུགས་པས་དྲང་སྲོང་གི། བརྟུལ་ཞུགས་འཕྲུལ་འཁོར་སྤྱོད་ལ་བརྣག་པར་མཆིས། །མཚམས་ཞུས། །ས་འདི་གདེངས་ཅན་དབང་པོའི་ལུས་ཀྱིས་བཟུང་། །རྒྱལ་བསྟན་ལུང་དང་རྟོགས་པའི་ས་ལ་བརྟེན། །སློབ་པའི་ཆོས་རྣམས་གོང་དུ་བྱར་མེད་པ། །ཁྱོད་ཀྱིས་བསྟན་འགྲོའི་དཔལ་ཡོན་རིང་དུ་མཛོད། །རང་བཞིན་གཙང་གྱུར་འོད་གསལ་རྡོ་རྗེ་ཐེག །མུར་འདུག་རིག་པས་རྙོགས་པ་འོག་མིན་གྱི། །དེང་སང་དེ་ན་ནོར་བུ་ཆུ་དྭངས་ཀྱི། །ཡན་ལག་རྫོགས་པས་མྱུར་དུ་མི་བགྲུང་ངམ། །ལྷག་བསམ་རིན་ཐང་མེད་པར་མཚོན་པའི་གོས། །སྟོན་གྱི་དབྱངས་སྙན་ཆས་ལ་འོས་པས་ཏེ། །ཆུ་གཏེར་ངོགས་སུ་སྙེགས་སོ་བགོ་སྐལ་དུ། །རིགས་པའི་རིན་ཆེན་རྡུལ་ཡང་སྤྲོ་འཚལ་ལོ། །ཞེས་དཔལ་སྤུངས་ཀྱི་གདན་ས་ཆེན་པོ་ནས་དབོན་འཆི་མེད་སྤྲུལ་མིང་པས་གུས་ཕུལ། །མཁས་གྲུབ་དཀོན་མཆོག་ཐུབ་བསྟན་རྒྱ་མཚོའི་དྲུང་དུ་ཕུལ་བའི་ཆབ་ཤོག་སྤྲུལ་མཆོག་གང་དེའི་བཞེད་ལྟར་ཡོན་ཏན་རྒྱ་མཚོས་བྲིས།། ༈ །།སྨན་གྱི་ནགས་ཚལ་མུན་པས་མཛེས་སྟེར་ཞིང་། །སྙིང་སྟོབས་ཆེན་པོའི་ཡིད་ཀྱི་སྙིགས་མ་ཡི། །དྲི་མས་རབ་བཀྲུས་ཤེས་བྱ་ནམ་མཁའི་
རྫིང་། །མཚོན་སླད་འཆར་ཀས་འོང་བ་གང་དེའི་དྲུང་། །དགེ་བ་ལ་འཛེགས་གོང་ན་མེད་པའི་བློ། །བློ་ལྡན་ཚངས་པའི་བུ་དང་འདྲིས་གྱུར་པས། །མ་བརྡུངས་པར་ཡང་སྙན་ཚིག་འགྲམ་པའི་རྔ། །གཞན་གསོས་བཅུད་ཀྱིས་རྒྱས་པའི་མགྲིན་ལས་སོང་། །ཐོས་དང་བརྩོན་འགྲུས་དྲི་མེད་སྦྱིན་པའི་ཆུ། །དམ་པའི་མཛོད་ན་སློང་བ་སྡུད་པའི་གནས། །རེ་བས་ཡོངས་བཀོད་ཕོངས་པའི་རབ་རིབ་ནི། །གྲགས་པ་ཁོ་ནའི་སྣང་བས་བཅོམ་པ་བཞིན། །བདེན་པ་སེམས་ཀྱིས་བྲིས་པའི་རི་མོ་ནི། །སྲིད་ལ་དུག་དང་མཚུངས་པའི་འཇིགས་པ་ཉིད། །རང་བཞིན་ཤེས་པས་བཅུད་དུ་ལྡོག་གྱུར་ཏེ། །ཐར་བའི་སྲོག་རྩ་དཀའ་ཐུབ་ནགས་སུ་བཟུང་། །ཆུ་སྐྱེས་གསར་པའི་བཞིན་རས་རིག་པ་དང་། །བུང་བའི་ལན་བུ་རབ་འཛིན་སྦྲང་རྩི་ཡང་། །གོམས་པའི་མཐུ་ལས་རྣམ་དཔྱོད་ཉིད་གྱུར་པ། །བློ་ལྡན་དགའ་བསྐྱེད་བློ་གྲོས་ལང་ཚོ་ཅན། །དག་པའི་མེ་ཤེལ་ལས་ནི་རིགས་རྙེད་དེ། །རྨི་ལམ་དུ་ཡང་དྲི་མའི་ཚང་ཚིང་ཟ། །ཐུན་མོང་ལྷག་པར་ལྷན་ཅིག་སྤྱོད་མཚུངས་ཀྱང་། །རྒྱུ་ཡི་སྟོབས་ལས་རབ་གསལ་རིག་པས་འཕགས། །ཇི་ལྟར་ཟླ་བ་སེང་གེའི་གྲོང་བཞིན་ཏུ། །མ་སྤྲུལ་ནམ་མཁའི་ཁང་པ་ལས་སྐྱེས་པ། །འཇིག་རྟེན་ཀུན་ཏུ་བརྟགས་པའི་གྱི་ན་ཡང་། །ཡོངས་གྲུབ་མིག་ཏུ་
རྣམ་འགྱུར་བྲལ་བར་གཟིགས། །གཞུང་ལུགས་ཉམས་པའི་བསྟན་བཅོས་ཚིག་གི་ཆུ། །མ་འཐུངས་བདུད་རྩིའི་ཟས་ལ་བདུད་རྩི་ཅན། །མཐའ་དང་ཚུལ་གྱི་གནད་དུ་ཞུགས་པ་ལས། །འདུ་འགོད་དུ་མ་ཆུ་བྲལ་སྤྲིན་ཏུ་བྱས། །ཡིད་ཀྱི་ཕུག་ན་རང་བཞིན་ཉལ་བ་ཡི། །མུན་ལ་མེའམ་གྲོང་ཁྱེར་ཆེན་པོའི་ལམ། །ཞུགས་བརྩམས་ལྷས་སྐྱོང་རིགས་ཀྱི་གཞོན་ནུ་ཡང་། །ལེགས་བྱས་གྲིབ་མའི་འབབས་སྟེགས་ཡངས་པར་མཆིས། །མཚམས་ཞུས། །ཡོན་ཏན་ཕྱོགས་ཀྱི་འཕེལ་བས་ཆོས་རྒྱས་ཤིང་། །དེས་ཀྱང་སྙིང་སྟོབས་རྡུལ་གྱི་མུན་པ་བཅོམ། །འདུན་བས་འགྲོ་བའི་གཡར་དམ་ཁུར་བཞེས་པ། །ཟླ་བ་བཞིན་ཏུ་སྐྱེ་དགུའི་ཡི་གར་འོངས། །རྣམ་ཐར་གསུམ་ལ་རིག་དང་རྐང་བཀོད་པ། །དེ་ཡིས་རེ་བའི་འབྲས་བུ་ལྕི་སླད་དུ། །ཡུན་འཚོ་དཔག་བསམ་ཡལ་གའི་ལག་པ་ཡིས། །སྐལ་བཟང་མགྲོན་ཏུ་ཡུན་རིང་འབད་པར་གསོལ། །དམ་པའི་མཛད་པས་སྒྲོན་མེར་བྱེད་པའི་སྒྲ། །བདུད་ཡིད་ཟུག་རྔུ་སྦྱིན་པའི་དག་གསལ་དང་། །གཉེན་ལ་གནས་སོ་བསླབ་དང་མཛའ་བ་ལ། །མངོན་སུམ་ཉིད་ན་བགོ་བཤའང་སྦྱིན་པར་གསོལ། །ཀུན་གཟིགས་དཀྱུས་རིང་སྤྱན་གྱི་འབབ་སྟེགས་སུ། །སྟོན་ཀའི་ཆུས་བཀྲུས་གོས་ལ་ཚོན་བཀོད་ལྟར། །སྣ་ཚོགས་
མདོག་ཏུ་སྣང་ངའི་གཟུགས་བརྒྱ་པ། །ཚིག་གི་རོ་ཡང་དངར་བས་རྒྱས་ཏེ་སོང་། །མཁས་གྲུབ་འཇམ་དབྱངས་མཁྱེན་བརྩེའི་མདུན་ཕུལ་བའི་ཆབ་ཤོག་སྡེ་དགེ་ལྷ་སྲས་རིན་པོ་ཆེའི་བཞེད་ལྟར་བྲིས།། ༈ །།གང་ལ་ཡོངས་འདྲིས་སྔོན་ཆད་མེད་པའི་སེམས། །རྟོག་པས་མི་རྒྱུ་རྒྱུ་མེད་འཕེལ་དང་ལྡན། །འཇིག་རྟེན་གསུམ་གྱི་སྣང་བྱེད་རིན་ཆེན་དེས། །ཁྱོད་ལ་རྟག་ཏུ་དགེ་ལེགས་སྦྱིན་གྱུར་ཅིག །རྣམ་དཀར་པིར་གྱིས་བྲིས་པའི་རི་མོ་ནི། །བྱེད་པོས་མ་བྱས་ཟླ་བའི་མཛེས་པ་ཅན། །མི་དམན་གནས་ཀྱི་ཡན་ལག་བཅུས་ཕྱེས་པའི། །ཀུན་དའི་ཕྲེང་བས་མཛེས་པ་ག་ལ་བར། །དཔྱོད་པའི་རྗེས་འབྲེལ་ངག་དང་ལུས་ལས་ཀྱང་། །ཉམས་ཀྱིས་སྒེག་པའི་པདྨའི་ཞགས་པ་ཡིས། །དྲངས་ལས་སྲེད་པ་གཞན་པ་མེ་ཏོག་ནི། །རྙིང་པ་བཞིན་ཏུ་བླང་དང་དོར་བར་བྱས། །ཆོ་ག་བརྒྱ་ཕྲག་བརྟེན་ཀྱང་རིག་པ་ཡི། །དོན་མཐུན་ཚོགས་ཀྱི་གྲུ་ལ་མ་ཞེན་པར། །རིན་ཐང་མེད་པའི་རྣམ་དཔྱོད་མི་རྙེད་ན། །རིང་ནས་འགྲོགས་པའི་དཔལ་གྱིས་ལྕི་བར་ཤེས། ཁམས་དང་རྟེན་ཅིང་འབྲེལ་ལ་མི་མོངས་པས། །རྣམ་གྲོལ་དགའ་བ་རྣམས་ཀྱི་ལུས་མཛེས་པ། །སྐལ་པས་ཡིན་གྱི་ཙནྡན་དོགས་པས་མིན། །དེ་སླད་ཐར་པའི་ཐང་ལ་རྒྱུ་བ་ཡོད། །གང་གི་ལྕེ་ཡི་གཡོ་བ་སྟོང་ཕྲག་
ལས། །སྙིང་གི་པདྨོ་ཕྱེ་བའི་ཐིག་ཕྲེང་ཅན། །གཞོན་ནུའི་ནང་དུ་རིགས་པར་སྨྲ་བ་ཡི། །འོད་ལྡན་ལྕེ་དེ་གཉིས་པས་དབེན་ནམ་ཅི། །ཟོལ་མེད་ཀུན་དགའི་ས་གཞིར་ཉིན་མོའི་དཔལ། །ཁེངས་པ་སྤྲིན་གྱི་དུམ་བུ་ཡལ་བ་ལས། །ངེས་འབྱེད་གཟུགས་སུ་ལྷགས་པ་དཔྱིད་ཀྱི་གླུ། །སྙིང་ལ་འབབ་པས་བུང་བ་གཞོན་ནུར་འཁྲུལ། །འདོད་པ་དངུལ་ཆུའི་ཐིགས་པ་ཁུ་ཚུར་གྱིས། །བསྡམས་དང་སྙན་གྲགས་ལྷན་ཅིག་གུད་མིན་པར། །ཐོས་དང་གོམས་ལས་ཅི་བདེར་ངལ་གསོས་པས། །དད་སོགས་བདག་པོས་ཕོག་པའི་བང་མཛོད་བཞིན། །འདི་ན་རྨོངས་པའི་འཕྲང་དང་མེ་དཱི་ནཱི། །མེ་ལ་ཚེ་ལ་བརྩོན་ཛམ་བུའི་བསྟེན་པ་ན། །ཡི་གེའི་སྒྲས་མཚོན་སཱ་ལའི་རིགས་ཀྱི་ཤིང་། །རྩ་བརྟན་ལོ་མའི་ཕྲེང་བས་དུད་བཞིན་མཆིས། །མཚམས་འབྲས། །ཆོས་ལྔ་ལས་ནི་བྱང་ཆུབ་འཕེལ་བ་ཡང་། །ཡོན་ཏན་བདུན་བརྟེན་དེ་ཡང་འཚོ་བ་ཉིད། །གཙོ་ཕྱིར་རྒྱགས་དང་ཞུམ་པ་བཟོད་པ་ཡི། །རྣམ་གྲངས་དེ་ལས་དེ་ནི་དོན་ལྡན་འགྱུར། །རང་བཞིན་གྱིས་ཟབ་སྒྱུ་མའི་འཕྲུལ་འཁོར་ཅན། །དུག་ཅན་བདེ་བླག་འགོངས་པར་སུ་ཞིག་ནུས། །ཐོག་མར་འཇུག་པའི་ཁུངས་དེ་སོར་རྟོགས་ཀྱིས། །ཡོངས་སུ་བརྟོལ་བ་དམ་པ་རྣམས་ཀྱི་ལུགས། །བསོད་ནམས་བདེ་བར་བརྒྱུད་པའི་
སྤྱད་པ་ཉིད། །རྐུན་པོས་མི་འཕྲོག་ཆུད་མི་ཟ་བའི་ནོར། །རྣ་བ་ལས་འཕྱང་འགྲམ་བ་མཛེས་པའི་རྒྱན། །ད་དུང་བཀྲེན་པའི་ཉེར་འཚོ་བསྟེན་འཚལ་ལོ། །ཞེན་པས་འཆིང་དང་བེམ་པོའི་རྣམ་འགྱུར་ཅན། །ཐོས་མང་དག་ལ་གསེར་གྱི་སྐྱེས་ཀྱིས་ཅི། །རྣ་བའི་བཅུད་དུ་འོས་ཤིང་འཐད་བའི་ཚིག །སྤོབས་པའི་ཁ་སྒོའི་ཟེག་མ་འཚལ་ལས་སོ། །ཞེས་ངུར་ཆེན་མཁས་པའི་དབང་པོ་རིག་འཛིན་རྡོ་རྗེའི་མདུན་ཕུལ་བའི་ཚབ་ཤོག་ལྷ་སྲས་རིན་པོ་ཆེའི་བཞེད་ལྟར་བྲིས།། ༈ །།སྡེ་དགེ་ལྷ་སྲས་རིན་པོ་ཆེའི་གསུང་ལན། དགེ་ལེགས་ཡོན་ཏན་དུ་མའི་འབྱུང་གནས་ཏེ། །འཇིག་རྟེན་གསུམ་སྲུང་སྙན་པའི་བ་དན་ཅན། །མཆོག་གསུམ་བྱིན་རླབས་གདུགས་དཀར་གྲིབ་བསིལ་གྱིས། །མི་དབང་གང་དེ་ཡུན་རིང་སྐྱོང་གྱུར་ཅིག །མང་བཀུར་གཉིས་པའི་རིགས་སུ་ལྷས་བཀོས་ཤིང་། །བསོད་ནམས་ར་བ་མཁའ་ལྟར་རྒྱ་ཆེ་བ། །ཆོས་ཀྱིས་དག་པོའི་བློ་གྲོས་གསེར་བཟང་གི། །རྩིབས་སྟོང་རྣམ་པར་བཀྲ་བའི་མདུན་ས་རུ། །གུས་པས་ཞུ་གསོལ། །གང་ཞིག་འོ་མའི་མཚོ་ལས་བདུད་རྩི་བཞིན། །མཁས་རྣམས་མངོན་འདོད་རྣམ་དཔྱོད་གཡས་འཁྱིལ་དུ། །ཕྱོགས་ཀྱི་བུ་མོའི་རྣ་བར་བསྒྲག་པ་ལས། །གྲགས་པ་རབ་གསལ་དགེ་དབང་གཉིས་པ་བཞིན། །རིན་ཆེན་རིགས་ལས་འདོད་འབྱུང་
བཻ་རྡུརྻ། །བྱི་དོར་བྱས་པས་དགོས་འདོད་དཔལ་སྟེར་བྱེད། །ས་གཞི་སྐྱོང་བ་གནས་ཅན་ལ་གོམས་ན། །སྐྱེ་དགུའི་ཉེར་འཚོ་འགྱུར་བ་དངོས་པོའི་གཤིས། །སྡེ་བཞི་རྒྱ་མཚོ་ཆེ་ལ་གནས་བཅས་ཤིང་། །དགེ་བཅུའི་གསེར་མིག་འཁྱིལ་བའི་ལྟོང་དཀར་ཉ། །གཙུག་ལག་གཉིས་ཀྱི་གཤོག་ཟུང་བསྐྱོད་པ་ལས། །ཚོགས་རབ་ཆུ་བདག་ཕུལ་དུ་བྱུང་བར་རྟོགས། །ཐུན་མོང་ཐུན་མིན་རིག་པའི་ཀླུང་བརྒྱ་ཕྲག །ལྷག་མེད་ཐུགས་ཀྱི་དཔལ་བེའུར་འཁྱིལ་པས་ན། །བོང་བ་གསེར་དུ་གཟིགས་པའི་ཚངས་སྲས་གླུ། །བསྩལ་བའི་གུས་སྤྲོ་རབ་དགའི་དཔལ་ལ་འགྲན། །ཀུན་རྨོངས་སྙིང་ལ་ཞུགས་པའི་ད་རི་དྲྭ། །མཁས་གྲུབ་དམ་པའི་རྗེས་སུ་མ་སྙོགས་པས། །བས་མཐའི་ནགས་སུ་འཕྱི་སྒོམ་བརྟུལ་ཞུགས་ཀྱིས། །འདུ་ཤེས་གསུམ་གྱི་སྒྲུབ་ལ་བརྩོན་བཞིན་མཆིས། །མཚམས་ཞུས། །མཐོ་རིས་མཛེས་མའི་ལག་པས་ལེགས་བརྟན་པ། །སྐུ་ཚེའི་རྒྱལ་མཚན་ནུབ་པ་མེད་པ་དང་། །གྲགས་པའི་རྔ་ཡབ་ཕྱོགས་མཐར་བསྐྱོད་པ་ཡིས། །ས་ལས་རྣམ་པར་རྒྱལ་བ་ཉིད་དུ་གསོལ། །ཕན་བདེའི་བུམ་བཟང་བདུད་རྩིའི་ཆར་འབེབས་པ། །ས་ཡི་བདག་པོ་ཆོས་བཞིན་འཚོ་བ་ན། །སྐྱེ་བོ་ཐམས་ཅད་འཚོ་བ་ཉིད་འགྱུར་བས། །བཞེད་དགུ་འགྲུབ་པར་
གསོལ་བ་སྨོས་ཅི་དགོས། །དོན་བཟང་སྦྲང་རྩིའི་དོགས་པས་དཔྱངས་པ་ཡི། །སྙན་ཚིག་པདྨ་གསར་པའི་ཆུན་པོ་ནི། །མཉེས་གཤིམས་གཟིགས་པས་ནམ་ཡང་མི་བསྐྱུད་པར། །མགུལ་དང་རྣ་བའི་རྒྱན་ཏུ་བསྩོལ་བར་ཞུ། །ཞེས་ཞུ་འདེགས་སྤྱན་ཟུར་གཡོ་བའི་རྟེན་མཚོན་བཅས་ད་རི་དྲཱ་བཾ་སྟེང་སྤྲུལ་མིང་ནས་གུས་པས་ཕུལ་བའི་ཞུ་ཡིག། ༈ །།སྡེ་དྲུང་ཕྲིན་ལས་རྒྱ་མཚོར་གསུང་ལན། །རིང་ནས་རིགས་ཀྱི་ཁམས་བཟང་པོ། །བསགས་སྦྱང་རླན་གྱིས་བསྐྱེད་བསྲིངས་པས། །མཁས་ཚུལ་གསུམ་གྱི་འདོད་འཇོའི་ཤིང་། །ཆེ་དགུའི་དཔལ་དུ་འཁྲུངས་དེ་རྒྱལ། །འདི་ན་ནགས་ཀྱི་བུང་བ་ནི། །པདྨོར་རང་བཞིན་ཆགས་པས་ན། །ཚིག་གི་སྦྲང་རྩིའི་བཅུད་སྩལ་བས། །མ་བསྐུལ་མགྲིན་རྔ་དར་དིར་བརྡུང་། །མཆེ་བ་དྲུག་ལྡན་གསེར་གྱི་དྲྭ་བ་ཅན། །གཉིས་འཐུང་དེས་ནི་མི་བདག་དཔལ་བྱེད་ཅིང་། །གང་གི་གྲགས་པ་རབ་གསལ་ག་པུར་རྡུལ། །ས་སྐྱོང་དར་བའི་ཆ་ཤས་རྫོགས་ལས་བཀྱེ། །དེ་ཡི་དགེ་མཚན་ཀུ་མུད་ཁ་བྱེ་ཞིང་། །དེས་ཀྱང་ཁོར་ཡུག་མཛེས་པའི་རྒྱན་བྱེད་པས། །དུས་ཀྱིས་མ་གུད་དག་བྱེད་གསར་བའི་རྒྱུན། །ལེགས་བྱས་དཀའ་ཐུབ་ཅན་གྱིས་སྐྱུགས་མིན་ནམ། །འདུ་ཤེས་གསུམ་ལ་ཆོས་སུ་རློམས་པ་ཡི། །རྨོངས་པ་རི་
ཡི་སུ་ལ་ན་ཡིབས་པ་ཡང་། །གླིང་བུ་ཐོས་པའི་རི་དྭགས་བཞིན་ཏུ་དེར། །སྤྲོ་བས་དྲངས་ཏེ་གསང་པོར་གསོལ་གྱིས་དགོངས། །དེང་སང་བསྟན་པའི་མཐའ་ལ་ཐུག །བསླབ་པ་གསུམ་ལ་རྒྱལ་བསྟན་ཏུ། །མི་རྩི་མདོ་རྒྱུད་འགལ་བའི་ལས། །གང་དྲན་སྤྱོད་ལ་བསྟན་པར་བཏགས། །སྔོན་བྱོན་མཁས་དང་གྲུབ་པ་ཡི། །བསགས་སྦྱངས་རྣམ་ཐར་ཐོས་ཙམ་ཡང་། །མ་མྱོང་སོ་སྐྱེ་ཟ་ཐང་ཅན། །བསྟན་དང་འགྲོ་བའི་མགོན་པོར་བརྫུ། །བླ་མ་གྲུབ་ཐོབ་སློབ་མ་ཡང་། །དབང་རབ་སྣོད་བཅུད་འཛོམ་རྣམས་ཀྱང་། །དཀའ་སྤྱད་བརྩོན་འགྲུས་ཇི་ཙམ་མཛད། །རང་བྱུང་ཉིད་ན་སངས་རྒྱས་ཡིན། །འདོད་ན་ཕྱི་རྟགས་ནང་རྟགས་དགོས། །སྟབས་ལེགས་ཙམ་གྱི་མངོན་ཤེས་དང་། །མིག་འཕྲུལ་ཕྲ་མོས་ག་ལ་ཆོག །ཆོས་ནས་བཤད་པའི་ཡོན་ཏན་དགོས། །བསོད་ནམས་དམན་པའི་གདུལ་བྱ་ལ། །ལོག་པར་སྟོན་པའི་འདུལ་བྱེད་ཀྱིས། །རྒྱལ་བསྟན་འཇིག་འགྱུར་ཀྲྀ་ཀཱི་ཡི། །རྨི་ལམ་དེང་སང་ཐོག་ཏུ་བབ། །རིགས་དང་མི་རིགས་གོ་ལྡོག་པ། །འགྲོ་བློ་བདུད་ཀྱིས་བསྒྱུར་བ་ཡང་། །ཕལ་ཆེར་སྙིགས་མའི་རང་མཚངས་ཉིད། །མདོ་དང་འདུལ་བའི་ལུང་དུ་གསལ། །ཆོས་དང་གང་ཟག་ཚད་འཛིན་པ། །ཐམས་ཅད་མཁྱེན་པའི་ཡུལ་ཡིན་ཀྱང་། །ལྟ་སྤྱོད་
ཚད་ལ་འཇལ་བའི་སྲང་། །རྒྱལ་བའི་བཀའ་ལས་ལྕི་ཡང་ཤེས། །ཆོས་རྒྱུན་ཏིང་འཛིན་ཐོབ་པ་ན། །ཆོས་གཏེར་འབད་པ་མེད་འབྱུང་ཞིང་། །སྦྱོར་ལམ་ཆོས་མཆོག་འབྲས་གདས་པས། །དགོས་དགུའི་གཏེར་ལ་སྤྱོད་པར་གསུངས། །ས་ལམ་མ་བགྲོད་ལམ་རྟགས་ནི། །སྨོན་ལམ་སྟོབས་ཀྱིས་བྱུང་ཞེས་དང་། །རིག་འཛིན་རྣམ་བཞིའི་གོ་བ་ཡང་། །མ་ཆགས་རིག་པ་འཛིན་པ་ནི། །སྔོན་དུས་སུ་ཡང་མང་ཞིག་བྱུང་། །སྐལ་མཉམ་སྐྱེ་བོ་འགའ་ཡང་བསླུས། །འོན་ཀྱང་རང་གི་ལས་ཀྱི་མཐའ། །རིང་མིན་ཁོ་ནར་མངོན་ཏུ་གྱུར། །བདེ་དགྱེས་གསང་གདན་དུས་འཁོར་སོགས། །མདོ་རྒྱུད་སེམས་གསུམ་སྙིང་ཐིག་བཞི། །བཀའ་དགོངས་རིམ་གཉིས་ཐང་མར་བརྡལ། །དེང་སང་ཆོས་ཀྱི་མུ་གེ་མེད། །བཀའ་བསྟན་གླེགས་བམ་ཐལ་བས་གཡོགས། །ཁྲིད་ཆེན་པོད་རྣམས་དད་རྟེན་ཙམ། །བཤད་སྒྲུབ་ཉིན་སྐར་རྗེས་འགྲོ་ན། །གསར་ཆོས་བྱུང་ཡང་ངོ་མཚར་ཆུང་། །འོན་ཀྱང་དུས་བབ་ཡིན་ནོ་ལོ། །དུས་ཀྱི་རྒུད་པ་གསོར་ཡོད་ན། །རན་པ་ལས་ཀྱང་ཕྱིས་པ་ཙམ། །འགལ་འདུ་ཅན་ལ་སུ་ཡིད་ཆེས། །མཁས་རྣམས་འབད་པ་བརྒྱས་བཙལ་ཞིང་། །གྲུབ་རྣམས་མཆོག་ཐོབ་པ་ཡི་བསྟན། །རྡུལ་ཁྲོད་མི་གཙང་བཞིན་ཏུ་དོར། །སྤྱོད་ངན་ནོམ་པར་ངོམས་པའི་དུས། །དོན་ཆེན་བཏང་
སྙོམས་བོར་བ་ལ། །དགོས་པ་ཅན་ཞེས་བླུན་པོས་སྨྲ། །དྭ་ཕྲུག་གླེས་ལ་བོར་བའི་མ། །མོ་སྒོ་མཚར་ཡང་འཕྱོན་མ་ཡིན། །མདོར་ན་བཀའ་དང་བསྟན་བཅོས་དང་། །མི་མཐུན་གྱི་ནའི་གཙུག་ལག་གིས། །རང་དང་གཞན་རྒྱུད་སྲེག་པ་ལ། །ཅལ་སྒྲོག་ཙམ་གྱིས་མཚར་ཅི་ཡོད། །བདག་རྒྱུད་ཤིན་ཏུ་མ་དག་པས། །རང་སྣང་འཁྲུལ་ལ་འཕྱར་མེད་ཀྱང་། །དམ་པས་གསང་པོར་བསྩལ་བའི་ལན། །གང་དྲན་འཛེམ་མེད་ཚུལ་དུ་འབུལ། །སྐུ་ཚེ་རིང་དུ་མི་གཡོ་ཞིང་། །ཆོས་ལྡན་ཕྲིན་ལས་རླབས་འཆེལ་བས། །གདུང་སེལ་རིན་ཆེན་འབྱུང་བའི་གནས། །སྐྱེ་དགུའི་དཔལ་དུ་འབར་གྱུར་ཅིག །ཞུ་འདེགས་མཚོན་བཅས་དབེན་རི་ནས་འདུ་གསུམ་རྨོངས་བརྟུལ་ད་རི་དྲྭས་ཕུལ་བའི་ཞུ་ཡིག། ༈ །།སྡེབ་སྦྱོར་རྐང་བཞི་མཉམ་པའི་བྲྀཏྟ་ལས་ཡི་གེ་བརྒྱད་པ་ལ་ཁ་སྒོའི་པྲསྟཱ་རས་མཛེས་པའོ། །ལ།།།གུམིཿཔཱུརྟཾ། ཀལྟཱཀོཊིནཱདཱིད། ཐིརཏྣཱདྷི་ཥྛི་ཏཱ་པྡྷིབྷིཿ ཛཱིབནྟུ་བྱནྟ་པཱུརྦེཥུ། །ཕུན་ཚོགས་ཡོན་ཏན་ནོར་བུའི་གཏམས། །དགེ་ལེགས་ཆུ་ཀླུང་བྱེ་བ་འགྱེད། །མཆོག་གསུམ་རྒྱ་མཚོའི་བྱིན་རླབས་ཀྱིས། །ཐོག་མཐའ་མེད་པར་འཚོ་མཛད་ཤོག །ཚོགས་རབ་རིན་ཆེན་ཆུ་གཏེར་འཁྱིལ་བའི་བཅུད། །བསོད་ནམས་གསེར་གྱི་པདྨོ་འཛུམ་པ་ཡིས། །ལེགས་བྱས་
སྐྱེ་དགུ་མགྲོན་ཏུ་འགུགས་པ་པོ། །ས་ཡི་ཚངས་པ་མཆད་ཟུང་ག་ལ་བར། །ཐུགས་བརྩེས་བསྐུལ་བའི་བཀའ་མཆིད་དྲི་ཟའི་གླུ། །ཐོས་འཛིན་བཅུད་དུ་འཕོས་པའི་མོད་ཉིད་ནས། །དགེ་སྦྱོང་རྒན་པོའི་སྙིང་གི་པདྨོའི་འདབ། །མྱོངས་གྲོལ་སྦྲང་རྩི་ལྟ་བུའི་མཆིད་འདི་གསོལ། །དུས་རིང་ཐོག་མཐའ་མེད་པ་འཁོར་བའི་མཚོར། །ཕ་རྒྱས་རླབས་ཀྱིས་འགྲོ་རྣམས་གཡེང་པ་ལས། །རིགས་ཁམས་སད་པ་འགའ་ཞིག་བརྒྱ་ལམ་ན། །དཀར་པོའི་ལས་འཕྲོ་སད་པ་ཆོས་ཉིད་མཐུ། །རྙེད་པ་དཀའ་ཞིང་རྙེད་ན་དོན་ཆེ་བ། །ལྷ་དང་ཡིད་བཞིན་ནོར་ལས་ཆེས་ལྷག་པ། །འཛམ་གླིང་ཁམས་དྲུག་ལྡན་པ་དལ་འབྱོར་རྟེན། །སྟེས་དབང་ཙམ་མིན་ཚོགས་ཆེན་སྔོན་སོང་མཐུ། །དེ་ལས་ས་ཆེན་དབང་སྒྱུར་མི་ཡི་ལྷ། །སྐྱེས་རབས་དུ་མར་ལེགས་བྱས་མུ་མེད་པའི། །འབྲས་བུས་རྒྱུ་དཔག་བསྔགས་འོས་དམ་པའི་ཚུལ། །ཙནྡན་དྲི་བཞིན་འགྲོགས་པ་དངོས་པོའི་གཤིས། །རིང་ན་གནས་ཀྱང་ཉི་དང་པདྨོ་བཞིན། །མཉེས་གཤིམས་གཟིགས་པས་འཁྱུད་པའི་རེ་ཁཱ་ལ། །དབང་མདོག་ཕྱག་རྒྱས་ལེགས་བཏབ་བྱ་མ་ཏས། །སྙན་པའི་ངག་དང་ལྷན་ཅིག་བསྲིངས་བའི་མོད། །དཔྱིད་ཀྱི་དབྱངས་སྙན་རྣ་བར་སིམས་པ་ཡི། །སྐྱེས་བུའི་སྙིང་གི་དགའ་བ་ཇི་ལྟ་བར། །སྤྲོ་དགས་མྱོས་པའི་དགེ་སྦྱོང་རྒན་བུ་ཡང་།
དོན་གཉིས་འཁོར་ལོ་གཉིས་དང་འགྲོགས་བཞིན་མཆིས། །མཚམས་ཞུས། གང་གིས་རྒྱལ་སྲིད་ཆོས་བཞིན་སྐྱོང་བ་དང་། །སྔོན་རབས་དམ་པའི་སྲོལ་ལས་མི་འདའ་བའི། །ས་སྐྱོང་དེ་ནི་གོ་འཕང་མཆོག་ཉིད་ལས། །ནམ་ཡང་མི་གཡོ་རྒྱལ་ཁམས་བདེ་བར་འགྱུར། །རྒྱལ་བསྟན་རིས་སུ་བཅད་ནས་ཁ་འཛིན་པ། །མཐའ་འཁོབ་རྒྱལ་ཕྲན་བླུན་པོའི་མཚན་ཉིད་དེ། །ཡུལ་དབུས་སྐྱོང་བའི་ཆོས་རྒྱལ་མཁས་པ་རྣམས། །བསྟན་འགྲོ་ཀུན་ལ་བུ་གཅིག་མ་བཞིན་བརྩེ། །བསོད་ནམས་ལྡན་པ་ཡ་རབས་རྗེས་སུ་འབྲང་། །དེ་ཡིས་འདི་དང་གཏན་ཏུ་བདེ་ལེགས་འབྱུང་། །དམན་པ་རྣམས་ཀྱིས་དམན་པའི་སྤྱོད་ངན་བསླབ། །དེ་ཡིས་འཕྲལ་ཡུན་ཀུན་ཏུ་ཕུང་ཁྲོལ་སྐྱེད། །གང་ཉིད་ཆོས་སྐྱོང་རྒྱལ་རིགས་མི་འགྱུར་བའི། །མངོན་རྟགས་སྔར་སྲོལ་ཇི་བཞིན་བསྟན་པ་དང་། །དེ་འཛིན་སྐྱོང་བའི་བཀའ་མཆིད་ཟླ་བའི་ཟེར། །མཐོང་བས་སྤྲོ་བའི་ཆུ་གཏེར་ཅི་ཡང་འཕེལ། །རྒྱལ་པོས་སྨྲ་བ་ཚིག་གཅིག་ཡོངས་སུ་གྲགས། །དམ་པས་ཞལ་བཞེས་འགྱུར་བ་མི་སྲིད་པས། །ཆོས་འབྱུང་ཞབས་ལ་པདྨ་ནོར་བུས་དང་། །བདག་ལ་ཡབ་རྗེས་བཀའ་དམ་མི་བསླུ་མཛོད། །ཤུ་བྷཾ་ཆོས་འཁོར་གཟིགས་པ་མི་གཡེལ་ཞིང་། །གྲ་སར་སྡོད་མཁན་ཆད་མེད་བཏང་བ་སོགས། །མཛད་ན་སྐུ་ཚེ་ཆབ་སྲིད་ཡར་ཟླ་ལྟར། །རྒྱས་པའི་སྐྱབས་འཇུག་སྨོན་ལམ་
རྒྱུན་ཏུ་སྤེལ། །གཞན་དབང་གྱུར་རྣམས་རྟག་ཏུ་སྡུག་བསྔལ་རྒྱུ། །ཁྱད་པར་རྒྱལ་པོ་འཁོར་ངན་དབང་གྱུར་ན། །རང་སྲོག་ཉེན་པ་མངོན་སུམ་དཔེ་གཟིགས་ལ། །ཕྱོགས་ཞེན་བློན་འབངས་དབང་དུ་མི་བཏད་འཚལ། །བགྲང་བྱ་བརྒྱར་འཚོ་མངའ་ཐང་གོང་དུ་འཕེལ། །ཕྲིན་ལས་རྟག་ཅིང་ཁྱབ་པའི་དགེ་མཚན་དང་། །ལྷན་ཅིག་འདིར་ཡང་ཐུགས་བརྩེས་འཁྱུད་པ་ཡིས། །མི་འདོར་ཕེབས་འོས་གངྒཱའི་རྒྱུན་བཞིན་སྩོལ། །ཞེས་པའི་ཞུ་ཡིག་གཟིགས་མཚོན་བཀྲ་ཤིས་པའི་ལྷ་རེག །ཁྱད་པར་འཕགས་པའི་དམ་རྫས་ལེ་ཚན། །མགུལ་སྲུང་ཐུང་བཅས་མདོ་སྨད་སྡེ་བཞི་དགེ་བ་བཅུ་ལྡན་གྱི་རྒྱལ་ཁབ་ཆེན་པོ་ནས་བླ་མ་སངས་རྒྱས་ཀྱིས་ལུང་བསྟན་པའི་མིང་ཡོངས་སུ་གྲགས་པ་བློ་གྲོས་མཐའ་ཡས་པའི་སྡེས་ཕུལ།། །།