མཆོག་གཟིགས་བླ་མ་དམ་པ་གཡུང་དྲུང་ཕུན་ཚོགས་ཀྱི་གདུང་རྟེན་དཀར་ཆག་ལྷའི་སྒྲ་སྙན།
མཆོག་གཟིགས་བླ་མ་དམ་པ་གཡུང་དྲུང་ཕུན་ཚོགས་ཀྱི་གདུང་རྟེན་དཀར་ཆག་ལྷའི་སྒྲ་སྙན་ཞེས་བྱ་བ་བཞུགས་སོ། །
ཤེས་བྱ་ཇི་སྙེད་ནམ་མཁའི་མུ་ཁྱུད་དུ། །དོན་དམ་ཇི་བཞིན་གཟིགས་པའི་འོད་སྟོང་སྤྲོ། །
གདུལ་དཀའི་མ་རིག་མུན་པ་སེལ་བའི་གཉེན། །རྣམ་པ་ཀུན་མཁྱེན་སྟོན་པ་མཆོག་ལ་འདུད། །
དམུ་གཤེན་རྒྱལ་བའི་རྗེས་སྐྱེས་སེམས་དཔའ་ཆེ། །འགྲོ་དྲུག་ཆུ་བོ་བཞི་ལས་སྒྲོལ་བའི་གྲུ། །འཕྲུལ་ངག་བདེན་པས་ཐར་པའི་ལམ་སྟོན་པ། །ཡིད་བཞིན་ནོར་བུའི་ཕྲེང་བ་མཚུངས་དེར་བསྔགས། །དོན་དམ་བདེན་མཐོང་མྱང་འདས་མཐར་སོན་ཀྱང་། །རྒྱུན་གནས་ཐུགས་རྗེས་རྒྱ་མཚོར་དེད་དཔོན་བཞིན། །སྲིད་པའི་ལམ་འཇུག་སྲིད་པ་དཀྲིད་དྲང་བ། །ཞར་བོད་མཁས་དང་གྲུབ་པའི་ཚོགས་ཀུན་རྒྱལ། །བསླབ་གསུམ་གསེར་གྱི་ལྷུན་པོ་བགྱིད་ཆགས་ཤིང་། །གསང་སེམས་མངོན་རྟོགས་ཉི་ཟླའི་རྣ་རྒྱན་གྱིས། །གཡུང་དྲུང་བོན་བསྟན་ཆུ་སྐྱེས་ཚལ་འབྱེད་པ། །ཕུན་ཚོགས་འབྱུང་གནས་བླ་མར་ཕྱག་བགྱིའོ། །མི་ཕྱེད་ཤིན་ཏུ་རྟོགས་དཀའ་གཡུང་དྲུང་གི། རེ་ཁཱས་མཚོན་བྱས་སྙིགས་དུས་གྲུབ་པའི་ཕུལ། །སྲིད་ཞིའི་ཕུན་ཚོགས་མཐའ་དག་སྐད་ཅིག་ལ། །འབད་མེད་སྩོལ་དེ་གང་གི་རྣམ་པར་ཐར། །གཡུང་དྲུང་བསྟན་པའི་སྒོར་ཞུགས་རྒྱུ་སྐར་དབུས། །མཁྱེན་རྟོགས་ཕུན་ཚོགས་བདུད་རྩིའི་ཐིག་ལེ་གང་། །མི་གནས་ཞི་བར་གཟིམས་པའི་བོན་གྱི་སྐུའི། །རྟེན་མཆོག་བྱུང་བ་མདོ་ཙམ་བསྙད་པར་བྱ། །དེའང་ཚངས་རྒྱུད་གི་འཇིག་རྟེན་ཁྲག་ཁྲིག་གཅིག་གིས་གཏམས་པའི་སྟོང་གསུམ་འཇིག་རྟེན་མཉམ་ཆགས་མཉམ་འཇིག་མཐའ་དག་འདུལ་བའི་སྟོན་པ་ནི། ཡེ་ཉིད་ཀྱི་སྟོན་པ་བོན་གྱི་སྐུ་བདེ་བ་ཆེན་པོ་བདག་ཏུ་མེད་པའི་
ཀུན་ཏུ་བཟང་པོའི་ངང་ལས། ཐུགས་རྗེའི་སྟོན་པ་ལྷུན་གྲུབ་གནས་ཀྱི་འོག་མིན་དུ་བདག་ཏུ་ཡོད་པའི་ཀུན་བཟང་ལོངས་སྐུ་གཤེན་ལྷ་འོད་དཀར་དུ་ཤར། དེ་ཉིད་ཀྱི་ཐུགས་རྗེའི་རྩལ་ལས་འདུལ་བྱེད་དང་། སྲིད་པའི་རྒྱལ་པོ་སངས་པོ་འབུམ་ཁྲི་ཡབ་ཡུམ་གྱིས་གདུལ་བྱའི་ཡུལ་སྤྲོས་པས་ཐུགས་རྗེ་དང་ཡུལ་འཛོམས་ཏེ་སྤྲུལ་པའི་སྐུ་བྱེ་བ་ཕྲག་བརྒྱར་སྣང་། དེའང་ཕྱི་ལྟར་ན་སྟོན་པ་གཤེན་རབ་མི་བོ། ནང་ལྟར་ན་གསང་བ་འདུས་པ། གསང་བ་ལྟར་ན་ཁྲི་བཞིན་མ་ཏིང་ཞེས་བྱ་བ་དེ་ཉིད་གདུལ་བྱའི་སྣང་ངོར་བསྐལ་པ་གྲངས་མེད་གསུམ་དུ་ཚོགས་བསགས་ཤིང་སྒྲིབ་པ་སྦྱངས་ནས་དབྱིངས་ཀྱི་ངང་དུ་མངོན་པར་སངས་རྒྱས་ཀྱང་། རྒྱུན་གནས་ཐུགས་རྗེ་རྣམ་བཞིའི་རྩལ་གཡོས་ཏེ། དགའ་ལྡན་ལྷའི་གནས་ནས་འཛམ་གླིང་མིའི་སྟོན་པ་ལ་གཤེགས། གནས་རིས་ཆེན་པོ་བཞི་ནས་ཡས་མར་དུ་བྱོན། གཟུགས་མེད་གཟུགས་ཁམས་འདོད་ལྷ་རིགས་དྲུག་གི་གནས་སུ་བོན་གྱི་འཁོར་ལོ་བསྐོར། སུམ་ཅུ་རྩ་གསུམ་གྱི་གནས་སུ་དཔལ་ལྷ་ལས་བབས་པའི་མཆོད་རྟེན་ཐོག་མར་བཞེངས། གཟིགས་ཚད་ལྔ་དང་དགོངས་ཚད་ལྔ་ཐུགས་ལ་བཀྲམ་ནས་ཞིང་ཁམས་འོལ་མོ་ལུང་རིང་དུ་སྤྲུལ་པའི་སྐུར་བྱོན། མཛད་པ་ཆེན་པོ་བཅུ་གཉིས་དང་ཕྲ་མོ་དྲུག་ཅུ་ལ་སོགས་པ་མི་ལོ་སུམ་སྟོང་གཅིག་བརྒྱའི་བར་དུ་
བསྟན། འདོད་ཆགས་ཀྱི་གཉེན་པོར་འཕན་ཡུལ་འདུལ་བའི་བོན་སྒོ། ཞེ་སྡང་གི་གཉེན་པོ་ཆབ་དཀར་སྔགས་ཀྱི་བོན་སྒོ། གཏི་མུག་གི་གཉེན་པོར་དཔོན་གསས་ལུང་གི་བོན་སྒོ། དུག་གསུམ་ཆ་མཉམ་གྱི་གཉེན་པོར་གཙང་མཐོ་ཐོག་སྤྱི་རྒྱུག་མཛོད་ཀྱི་བོན་སྒོ། དེ་རེ་རེ་ལའང་ཉི་ཁྲི་ཆིག་སྟོང་རེ་སྟེ་བོན་སྒོ་བརྒྱད་ཁྲི་བཞི་སྟོང་གསུངས། འགྲོ་བ་རྣམས་ལ་ཐར་པའི་ལམ་བསྩལ། ཁྱད་པར་དུ། མདོ་དྲི་མ་མེད་པ་ལས། བསྟན་པ་རྗེས་བཞག་རྣམ་པ་གསུམ་ཡིན་ཏེ། །སྐུ་གདུང་སྐུ་གཟུགས་གསུང་རབ་གླེགས་བམ་གསུམ། །ཐོག་མར་སྐུ་གདུང་བསྟན་པའི་རྗེས་བཞག་བྱུང་། །ཞེས་གསུངས་པ་ལྟར་ལྷ་ཀླུ་མིའི་གནས་སུ་བསྟན་པ་རྣམ་གསུམ་རྗེས་སུ་བཞག་པའི་སླད་དུ་རིག་པའི་གནས་ལྔའི་ཐོག་མ་བཟོ་རིག་པ་ནི་བཟོ་རྒྱལ་གར་མ་ལི་ཤོ་ལ་གསུངས། དེ་ལ་གཏུགས་ཤིང་ཤེས་རབ་ཀྱི་རྩལ་སྦྱངས་པའི་མཁས་པ་ཆེན་པོ་དྲུག་བྱུང་། འཇིག་རྟེན་ཐམས་ཅད་ཡོན་ཏན་གྱི་རྒྱན། བསྟན་པ་ཆགས་པའི་ཞིང་དུ་མཛད། དེ་ལྟར་སྟོན་པ་ཉིད་འཇིག་རྟེན་ཏུ་བཞུགས་པའི་སྐབས་སུ་བདེ་གཤེགས་མཆོད་རྟེན་བརྒྱད་ལ་སོགས་པ་དཔག་ཏུ་མེད་པ་བྱུང་ཞིང་། སྟོན་པ་མྱ་ངན་ལས་འདས་ནས་གདུང་འཚོབ་ཆེན་པོ་མུ་ཆོ་ལྡེམ་དྲུག་གིས་བཀའི་འཁོར་ལོ་གཉིས་པ་བསྐོར། འཛམ་གླིང་མཛེས་པའི་རྒྱན་དྲུག་ལ་
སོགས་པས་བཀའི་བསྡུ་བ་མཛད་པ་ནས་བཟུང་། ད་ལྟའི་བར་དུ། ཕོ་བྲང་གཞལ་ཡས་བདེ་གཤེགས་སྐུ་ཡི་རྒྱུད། །འཛབ་བསྙེན་ཚ་ཚ་བདེ་གཤེགས་གསུང་གི་རྒྱུད། །རྣམ་དག་མཆོད་རྟེན་བདེ་གཤེགས་ཐུགས་ཀྱི་རྒྱུད། །ཅེས་པ་ལྟར་སྐུ་གདུང་རྣམ་པ་གསུམ་གྱིས་འཇིག་རྟེན་གྱི་ཁམས་བཀངས་ཤིང་སྐྱེ་དགུའི་བསོད་ནམས་ཀྱི་ཞིང་དུ་གྱུར། བོད་ཀྱི་ཡུལ་འདིར་ཡང་བདུད་རྗེ་ཁྱབ་པའི་དམག་གིས་གཤེན་གྱི་རྟ་བདུན་བརྐུས་པའི་རྗེས་གཅོད་ཟོལ་གྱིས་རྣམ་མཁྱེན་སྟོན་པ་དངོས་སུ་ཕེབ་ནས་སྐུ་གསུང་ཐུགས་ཀྱི་རྟེན་སྤྲུལ། གྲུབ་མཐས་བློ་མ་བསྒྱུར་བའི་བོད་ཀྱི་སྐྱེ་བོ་དྲང་བའི་ཐབས་སུ་རྒྱུའི་བོན་སྒོ་ཕྱོགས་ཙམ་བསྟན། མ་འོངས་པ་ན་བསྟན་པ་ཆགས་ཤིང་རྒྱལ་གཤིན་གྱི་བརྒྱུད་པ་འབྱུང་བའི་གནས་སུ་བྱིན་གྱིས་བརླབས་པ་ལྟར། ལྷ་གཉའ་ཁྲི་བཙན་པོའི་སྐབས་ནས་བཟུང་། སྟོད་ཀྱི་བླ་མ་ཆེ་དྲུག་ལ་སོགས་པ་བྱོན་ཏེ་བོན་སྔ་དར་གྱི་དབུ་ཚུགས། རྒྱལ་པོ་བྱ་ཁྲིའམ་མུ་ནེ་བཙན་པོའི་སྐུ་རིང་ནས་ཁྲི་སྲོང་གི་བར་དུ་བར་གྱི་གདུང་བརྒྱུད་བཅུ་གསུམ་ལ་སོགས་པ་བྱོན་ཏེ་བོན་བར་དར་གྱི་སྐབས་བྱུང་། དེ་ནས་བསྟན་པ་རིན་པོ་ཆེ་གཏེར་དུ་གཤེགས་པའི་དུས་ཀྱི་ཚེ་མཁས་པ་མི་བཞི། མཐུ་ཆེན་མི་དགུ་ལ་སོགས་པས་འཇིག་རྟེན་བདེ་ལེགས་སྒྲུབ་པའི་བོན་ཅུང་ཟད་མ་
གཏོགས་སྒོ་བཞི་མཛོད་ལྔའི་དངོས་གཞི་རྣམས་གཏེར་དུ་གཏམས་ནས་དུས་རིང་ཞིག་འདས་པ་ན། སྨོན་ལམ་གྱི་དབང་གིས་སྤྲུལ་སྐུ་གཤེན་གྱེར་རྨ་དབྱིལ་གྱིས་ཐོག་དྲངས། ཕྱིས་བྱོན་རིག་འཛིན་སྤྲུལ་སྐུ་རྣམ་བཞིས་གཞུག་སྐྱོང་བའི་གྱེར་གཤེན་སེམས་དཔའ་མང་པོས་གཏེར་སྒོ་བྱེ་སྙེད་འབྱེད་པར་མཛད་པ་ལས་གྲགས་ཆེ་བ་དབུས་གཏེར་བྱང་གཏེར་ལྷོ་གཏེར་གསུམ་སྟེ། དེ་དག་བརྒྱུད་འཛིན་བྲུ་ཞུ་སྤ་རྨེའུ། རྒྱལ་གཤེན་ཆེན་པོ་རིག་འཛིན་ཞིག་པོ་རྣམ་དྲུག་གི་གདུང་འཛིན་ལ་སོགས་པའི་གཤེན་པོ་རྣམས་ཀྱིས་ཡོངས་སུ་སྤེལ་བས་བོན་ཕྱི་དར་གྱི་བསྟན་པ་ཕྱི་ཕྱིར་རྒྱས་པར་འགྱུར་བ་ལུང་དང་ཁ་བྱང་རྣམས་ལས་གསུངས། དེ་ལྟ་བུའི་བརྒྱུད་འཛིན་གཤེན་པོ་ཉི་ཟླ་ལྟར་ཡོངས་སུ་གྲགས་པ་དང་། སྦས་པའི་ཚུལ་ཅན་ཀུ་སཱ་ལིའི་བརྟུལ་ཞུགས་འཆང་བས་བསྟན་པ་སྐྱོང་ཞིང་འབྲེལ་ཚད་དོན་ལྡན་ཏུ་མཛད་པ་མ་ངེས་སྐར་ལྟར་བཀྲ་བ་ལས། འདིར་མདོ་ཁམས་ཆུ་བཞི་སྒང་དྲུག་གི་ནང་ཚན་འབྲི་ཟླའི་ཆུ་ཀླུང་ཆེན་པོའི་བར་དུ་ཆུད་པ་ཟལ་མོ་སྒང་། ཆོས་བཞིན་སྤྱོད་པའི་ས་སྐྱོང་སྡེ་དགེའི་མངའ་རིས། སྤྲུལ་སྐུ་གཤེན་གསས་ལྷ་རྗེ། འགྲོ་མགོན་ཤར་བ་རྣལ་འབྱོར། ཁྲོམ་ཞིག་ཁྲོ་བོ་རྒྱལ་མཚན་སོགས་གྲུབ་པའི་སྐྱེས་བུ་མང་པོ་སྐུ་འཁྲུངས་ཤིང་སྒྲུབ་པའི་གནས་དང་ཉེ་བ། ནུ་གཤེན་
སྨན་རིའི་མཁན་རབས། རིག་འཛིན་ཀུན་གྲོལ་གྲགས་པ་སོགས་སྐྱེས་ཆེན་མང་པོའི་ཞབས་ཀྱིས་བཅགས་ཤིང་། ཁྱད་པར་མདོ་ཁམས་སྤྱིའི་བླ་མཆོད། ཞྭ་དཀར་མོ་ཅན་གྱི་བདག་པོ། ཁྱུང་པོ་བླ་མ་རང་གྲོལ་བློ་གྲོས་གྲགས་པ་རྒྱལ་མཚན་ནས་བརྩམས། དབོན་བརྒྱུད་མཁས་ཤིང་གྲུབ་པ་བརྙེས་པ་ཟམ་མ་ཆད་པར་བྱོན་པའི་ཡུལ་ལྗོངས་དང་འདབས་ཆགས་པ། ཞིང་སྐྱེས་ཀྱི་དཔའ་བོ་རྣལ་འབྱོར་མ་རྒྱུན་མི་ཆད་པར་བྱོན་པའི་གནས་བཟང་པོར་འགྲོ་བའི་འདྲེན་པ། གྲུབ་པའི་དབང་ཕྱུག །བསྟན་པའི་སྒྲོན་མེ། ཡོངས་སུ་གྲགས་པའི་མཚན་ཐར་བདེ་རྟོགས་ལྡན་གཡུང་དྲུང་ཕུན་ཚོགས་ཞེས་བྱ་བའི་སྐྱེས་བུ་ཆེན་པོ་དེ་ཉིད་བྱོན་པ་ཡིན་ནོ། །དེའང་སྐུ་ན་ཕྲ་མོའི་དུས་ནས་འཇིག་རྟེན་ཁྱིམ་པའི་གནས་ལ་ངན་སྐྱུགས་དང་མི་གཙང་བའི་ཕུང་པོ་ལྟར་གཟིགས། ལྷ་མའི་བདེ་འབྱོར་མཐའ་དག་ལ་སྐྱུགས་ནད་ཅན་གྱིས་ཟས་མཐོང་བ་ལྟར་ཞེན་པ་གཏིང་ནས་ལོག་སྲིད་ལས་ངེས་པར་འབྱུང་བའི་བློའི་ཤུགས་དྲག་པོས་གཞན་སུས་ཀྱང་མ་བསྐུལ་བར་རྟག་ཏུ་དགེ་བའི་བྱ་བ་ཁོ་ན་ལ་བརྩོན། གནས་ལུགས་ཇི་བཞིན་གཟིགས་པའི་རྟོགས་ལྡན་ཆེན་པོ་ཡེ་ཤེས་བསྟན་འཛིན་ལ་སོགས་པ་བཤེས་གཉེན་མཚན་ཉིད་དང་ལྡན་པ་མང་པོ་བསྟེན་ཏེ་ཕྱི་ནང་གསང་བའི་བོན་རྣམས་སྒྲོ་འདོགས་
ཆོད་པར་མཛད། ར་བླ་འདུལ་བ་ཚུལ་ཁྲིམས་དང་། ཁྱུང་པོ་ཚུལ་ཁྲིམས་མཆོག་ལེགས་སོགས་གྲུབ་པའི་སྐྱེས་བུ་དུ་མས་བསྟི་བའི་དབེན་གནས་ཐར་བདེ་མི་གཡོ་བསམ་གཏན་གླིང་དུ་སྒྲུབ་པའི་རྒྱལ་མཚན་སྐུ་ཚེ་རིལ་པོར་བཙུགས། སྐུ་མདུན་ཐམས་ཅད་མཁྱེན་པ་བསོད་ནམས་ཡེ་ཤེས་ཀྱིས་ཤིང་རྟའི་ལམ་སྲོལ་གསར་དུ་ཕྱེས་པའི་སྐྱེས་བུ་གསུམ་གྱི་ལམ་རིམ་དང་། དགོངས་མཛད་རི་ཁྲོད་ཆེན་པོའི་བཀའ་སྲོལ་ཨ་ཁྲིད་སོགས་ལ་གཞི་བཟུང་། བླ་ཆེན་དྲན་པའི་ཡང་སྲིད་རིག་འཛིན་ཆེན་པོ་ཀུན་གྲོལ་གྲགས་པའི་ཟབ་གཏེར་མཁའ་འགྲོའི་ཁ་རླངས་མ་ཡལ་ཞིང་བྱིན་རླབས་ཀྱི་གཟི་བྱིན་མ་ཉམས་པ་མཁའ་འགྲོ་གསང་མཛོད་ཆེན་མོ་དང་། གསས་མཁར་སུམ་བརྒྱ་དྲུག་ཅུའི་མན་ངག་སྙིང་ཏིག་ཏུ་དྲིལ་བ་དམར་མོ་མཛུབ་ཁྲིད་ལ་བཙལ་དུ་བཏོན་ཏེ། ཆུ་བོ་རྒྱུན་གྱི་རྣལ་འབྱོར་ལ་བརྩོན་པས་ལས་ཀྱི་རླུང་ཐམས་ཅད་ཡེ་ཤེས་ཀྱི་རྩ་ཨ་བ་དྷཱུ་ཏིར་དག །འོད་གསལ་ནམ་མཁའ་ལྟ་བུ་མངོན་ཏུ་གྱུར། འཁོར་འདས་ཐམས་ཅད་དག་པའི་སྣང་བ་དཀྱིལ་འཁོར་རབ་འབྱམས་སུ་གཟིགས། བར་སྐབས་འགའ་ཞིག་ཏུ་ཐུགས་དམ་གྱི་རྟོགས་པ་ལ་བོགས་དབྱུང་ཞིང་གདུལ་བྱའི་སྐྱེ་བོ་མང་པོ་ཐར་པའི་ལམ་ལ་དཀྲི་བའི་སླད་དུ། རོང་བཞི་ཤོད་ཆེན་བཅོ་བརྒྱད་གཙོས་རིག་འཛིན་གོང་མའི་འདུག་གནས་ཕལ་མོ་
ཆེར་ཕེབ་ནས་བསགས་སྦྱངས་དང་ཐུགས་དམ་གྱི་རིམ་པ་རྒྱ་ཆེར་གནང་། ཁྱད་པར་གཙང་སྟོད་ཕྱུག་མོ་དཔལ་རིང་བཀྲ་ཤིས་སྨན་རིའི་གདན་སར་སྙིགས་དུས་ཀྱི་རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན་གྱི་སེང་གེའི་ཁྲི་ལ་བཞུགས་པ་སྐུ་མདུན་མཁས་གྲུབ་བསོད་ནམས་བློ་གྲོས་ལས་གཙང་མའི་ཁྲིམས་ཉིས་བརྒྱ་ལྔ་བཅུ་རྫོགས་པར་གསན་ནས་སྐུ་ཚེ་ཇི་སྲིད་དུ་ཤ་ཆང་ལྗགས་ཐོག་ཏུ་མི་འཇོག་ཅིང་ཚུལ་གོས་རྒྱུན་ཏུ་བཞེས་པ་སོགས་དྲང་སྲོང་གི་སྤྱོད་ལམ་ཤིན་ཏུ་གཙང་བར་མཛད། སྙིང་པོ་རྣམ་གསུམ་གཙོར་གྱུར་གསར་རྙིང་བོན་སྡེ་མང་པོའི་ལྷག་པའི་ལྷ་ཡི་གསུང་བཟླས་ཀྱང་དཔག་མེད་མཛད་ཅིང་། གཞན་ཕན་ཐུགས་བསྐྱེད་ཆེན་པོས་ཆེད་དུ་བསྒྲུབས་པའི་དམ་རྫས་མྱང་གྲོལ་འགྱེད་ཅིང་སྨིན་གྲོལ་བོན་སྦྱིན་ལོ་བསྟར་དུ་བསྩལ་བས་རིས་མེད་ཀྱི་འགྲོ་བ་བསམ་གྱིས་མི་ཁྱབ་པ་རྣམ་པར་གྲོལ་བའི་ལམ་ལ་བཀོད། བྱ་བཏང་གི་ཚུལ་ལ་དཔག་པའི་སྐུ་གསུང་ཐུགས་རྟེན་ཀྱང་རྒྱ་ཆེར་བཞེངས་ནས་དད་རྫས་བྱུང་ངོ་ཅོག་ཚོགས་གཉིས་རླབས་པོ་ཆེར་སྤེལ། སྐལ་ལྡན་གྱི་སློམ་མ་སྤྱི་ལ་ལམ་རིམ་ལ་སོགས་པ་དང་། ཐུན་མོང་མ་ཡིན་པ་རྣམས་ལ་མཁའ་འགྲོ་གསང་བའི་མཛོད་སོགས་བོན་གྱི་འཁོར་ལོ་བསྐོར་བས་དད་བརྩོན་ལྡན་པ་མང་པོ་གྲུབ་པའི་ས་ལ་བཀོད་ཅིང་། འབྲེལ་ཚད་
ཀུན་ལ་ཐར་པའི་ས་བོན་ཁྱད་པར་ཅན་བསྐྲུན། མདོར་ན་དམ་པ་འདི་ཉིད། སྤྱོད་པ་བླ་མེད་ཕྱིན་བཅུའི་ཕ་རོལ་སོན། །ལྟ་བ་སྟོང་ཉིད་བཅོ་བརྒྱད་ཉམས་སུ་ལོངས། །ལམ་བྱང་ཆུབ་ཀྱི་ཡན་ལག་བཅུ་གཉིས་བགྲོད། གཡུང་དྲུང་གི་ས་བཅུ་མཐར་ཕྱིན་ནས། འབྲས་བུའི་རྟགས་བཅུ་གཅིག་དང་ལྡན་པའི་གདོད་མའི་མགོན་པོའི་རྒྱལ་སར་གཤེགས་པར་འགྱུར་བ་ཅན་ཏུ་གདོན་མི་ཟ་ཞིང་། དེ་ལྟར་ཡང་ལམ་རིམ་བགྲོད་ཀྱི་སོ་སྐྱེ་ཕལ་པ་ཙམ་མ་ཡིན་པ་བསམ་བཞིན་སྐྱེ་བ་བཞེས་པའི་སར་གནས་ཀྱི་སེམས་དཔའ་ཆེན་པོར་ངེས་ཏེ། བློ་ལྡན་སྙན་བརྒྱུད་ལས། ཁྱད་པར་ང་དང་སྟོང་རྒྱུད་བྱིན་བརླབས་པ། །མདོ་ཁམས་སྟོད་སྨད་ཀུན་ནས་གྲངས་མང་འབྱུང་། །ལ་ལ་སྒོམ་ཆེན་ཆས་ཞུགས་རི་ཁྲོད་འགྲིམས། །འདུལ་ཁྲིམས་འཛིན་ཅིང་འཆད་རྩོད་རྩོམ་གསུམ་སྤེལ། །བསྙེན་སྒྲུབ་བྱེད་ཅིང་གསང་སྔགས་གཞུང་བཞིན་སྤྱོད། །གནས་ལུགས་རྟོགས་ཤིང་གཞན་རྒྱུད་ཉོན་མོངས་འདུལ། །དགོན་གནས་འདེབས་ཤིང་གསས་མཁར་རྟེན་གསུམ་བཞེངས། །མཐུ་རྩལ་ལྡན་ཞིང་བསྟན་པའི་དགྲ་བགེགས་སྒྲོལ། །ཐབས་ལ་མཁས་ཤིང་སེམས་ཅན་མ་ལུས་འདྲེན། །ཐུགས་རྗེ་ཆེ་ཞིང་གདུལ་བྱ་ཐར་པར་བཀོད། །ཅེས་ལུང་བསྟན་པའི་ཡོན་ཏན་རྣམས་ནི་བདག་ཉིད་ཆེན་པོ་འདི་ལ་ཚང་བ་ཡིན་ནོ། །དེ་ལྟར་དོན་
གཉིས་ཀྱི་མཛད་པ་མཐར་ཕྱིན་ཏེ་མི་གནས་པའི་མྱང་འདས་ཆེན་པོར་སྐྱེས་བུ་རང་ཁྱིམ་དུ་བགྲོད་པ་ལྟར་གཤེགས་པའི་ཚེ། སྐུ་གདུང་རིན་པོ་ཆེ་ཞུགས་ལ་འབུལ་བ་དང་། ནང་རྟེན་བཞེངས་པ་སོགས་དགོངས་རྫོགས་ཀྱི་བྱ་བ་སྒྲུབ་ཅིང་བསྟན་པ་འཛིན་པ་པོ་ནི། རྗེ་ཉིད་ཀྱི་རིགས་དབོན་ཞལ་སློབ་ཀྱི་ཐུ་བོ། བསླབ་པ་གསུམ་གྱི་བདག་ཉིད། བོན་ཕྱི་ནང་གསང་བའི་མཛོད་ལ་མཁས་ཤིང་དངོས་གྲུབ་ཀྱིས་བརྒྱན་པ་ཤེས་རབ་དབང་ཕྱུག་སྐུ་མཆེད་ནས་དད་བརྩོན་ཆེན་པོས་གཡར་དམ་དུ་བཞེས་པ་སྟེ། དེའང་མཆོད་རྟེན་ལ་སྤྱིར་དབྱེ་ན། བོན་ཉིད་སྐུའི་མཆོད་རྟེན། དབྱིངས་ཀྱི་མཆོད་རྟེན་ལ་གསུམ། སྤྲུལ་པའི་མཆོད་རྟེན་ལ་བཞི། རང་བཞིན་ལྷུན་གྱིས་གྲུབ་པའི་མཆོད་རྟེན་ལ་བརྒྱད། སྲིད་པའི་ཁ་གནོན་རི་རབ་ལྡེག་གནོན་གྱི་མཆོད་རྟེན་ལ་བཞི། འདུས་བྱས་གཟུགས་བརྙན་གྱི་མཆོད་རྟེན་ལ་བརྒྱད། དུག་ལྔ་འདུལ་བའི་མཆོད་རྟེན་ལ་ཉེར་ལྔ། འགྲོ་བ་འདུལ་བའི་མཆོད་རྟེན་ལ་ལྔ། སྐུ་གདུང་རིང་བསྲེལ་གྱི་མཆོད་རྟེན་ལ་གྲངས་མེད་ཅིང་། ཏིང་ངེ་འཛིན་གྱི་མཆོད་རྟེན་མཐའ་ཡས་པ་རྣམས་སུ་ཡོད་པ་ལས། འདིར་ཕྱག་རྒྱུན་ལྟར་གཟུགས་བརྙན་མཆོད་རྟེན་གྱི་ནང་གསེས་གཡུང་དྲུང་བཀོད་ལེགས་མཆོད་རྟེན་ཐོག་སོ་གཅིག་གི་ཚད་ཅན། ཞིང་དང་བསམ་པ་དངོས་པོ་
གསུམ་སྡིག་དང་མ་འདྲེས་པའི་རྒྱུ་གཙང་ཞིང་དག་ལ། བཀོད་པ་ཚར་དུ་དངར་བ། ཆགས་ཚད་དབྱིབས་སོགས་མཆོད་རྟེན་གྱི་རྒྱུད་དང་། རྒྱལ་བུ་རྒྱལ་ས་ལ་འཁྲུང་པའི་མདོའི་དགོངས་དོན་མ་འཁྲུལ་བར་བཞེངས་པར་འདི་ཉིད་ཀྱི་ནང་གཞུག་གི་གཙོ་བོ་རིང་བསྲེལ་སྡེ་ལྔར་གྲགས་པའི། ཐོག་མར་བོན་གྱི་རིང་བསྲེལ་ནི། བོན་ཕྱི་ནང་གསང་བའི་གཟུངས་སྡེ་རྣམས་ཀུན་གཟིགས་ནམ་མཁའ་ཡེ་ཤེས་ནས་གཅིག་ཏུ་བསྡུས་པའི་གཟུངས་སྡེ་རིན་ཆེན་སྤུངས་པ་ནས་འབྱུང་བ་རྒྱས་འབྲིང་བསྡུས་གསུམ་ཆ་ཚང་མཐིང་ཤོག་ལ་གསེར་དངུལ་གྱིས་བྲིས་པ་ཆ་གཅིག །རྒྱ་ཤོག་ལ་མཚལ་དང་བྱིན་རྟེན་སྨན་སྣ་རིན་པོ་ཆེ་བསྲེས་ནས་སྤར་དུ་བཏབ་པ་ཆ་བརྒྱད་དེ་རྒྱས་འབྲིང་བསྡུས་པ་ཁྱོན་བསྡམས་ཆ་ཉེར་བདུན། ཁ་འཐོར་གྲས། ཡིག་བརྒྱ་དང་། རྒྱལ་བ་རྒྱ་མཚོའི་གཟུངས་ཆེན་ཚར་ལྔ་བརྒྱ་རེ། མ་ཏྲི་བདེ་གཤེགས་སྟོང་འཛབ། རིགས་དྲུག་རང་སྦྱང་། སྙིང་པོ་སྤྱི་འདུས་ཤོག་བྱང་རྣམས་སྟོང་ཕྲག་རེ། ཀློང་རྒྱས་བོན་སྤྱོད་བཅས། ཡང་མཆོད་གཞུང་། ཁྲོ་བོ་ཡོངས་རྫོགས། རྣམ་རྒྱལ་གཟུངས་སྒྲུབ། སྐྱེ་སྒོ་གཅོད་མདོ། ཚེ་མདོ་གཟུངས། གདུགས་དཀར་མདོ་གཟུངས་བཅས་ཆ་རེ། དེ་དག་མདོ་རྒྱུད་ཐེག་པའི་གོ་རིམ་མ་འཁྲུལ་ཞིང་སོ་སོའི་ན་བཟའ་དང་བཅས་ཏེ་བཞུགས་པའོ། །གཉིས་པ་ཡུངས་
འབྲུ་ལྟ་བུའི་རིང་བསྲེལ་ནི། ཏོག་གི་ནང་དུ། ཁྱུང་པོ་རང་གྲོལ་བློ་གྲོས་རྒྱལ་མཚན་གྱི་གདུང་ལས་བྱོན་པའི་ཤ་རཱི་རཾ་བོད་སྲན་སྦོས་པ་ལས་ཀྱང་ཆེ་བ་གཅིག །སྐུ་མདུན་བསོད་ནམས་བློ་གྲོས་གདུང་ལས་བྱོན་པའི་ཤ་རཱི་རཾ་སྲན་མ་ཙམ་གཅིག་བཅས། གསུམ་པ་བོན་གྱི་སྐུའི་རིང་བསྲེལ་ནི། རྗེ་དེ་ཉིད་ཀྱི་གདུང་ཐལ་དང་རྟེན་འདམ་ལས་གྲུབ་པའི་བདེ་གཤེགས་གཙོ་བཞི། སྟོན་པ་ཀུན་བཟང་རྒྱལ་བ་འདུས་པ། ཁྲོ་བོ་གཙོ་མཆོག་མཁའ་འགྱིང་། བཅུ་གཅིག་ཞལ། སྟག་ལ་མེ་འབར། དྲན་པ་ཡབ་སྲས་རྣམ་གསུམ་བཅས་ཀྱི་སྐུ་བརྙན་སྟོང་ཕྲག་རེ་དང་། ཟངས་ལས་གྲུབ་པའི་སྐུ་གདུང་ཆ་བརྒྱད་མཛུབ་རེ་ཡོད་པ། དེ་རྣམས་སོ་སོ་ལའང་སྐུ་གསུང་ཐུགས་དང་རྟེན་འབྲེལ་སྙིང་པོའི་ནང་གཞུག་དང་ལྡན་པ་བཞུགས་སོ། །བཞི་པ་སྐུ་གདུང་གི་རིང་བསྲེལ་ནི། བུམ་པའི་ནང་སྟོད་ཀྱི་ཤར་དུ། བྲུ་ནམ་མཁའ་གཡུང་དྲུང་གི་ཚེམས་ལ་ཤ་རཱི་རཾ་ཡུངས་དཀར་ཙམ་གཉིས་ཀྱིས་མཚན་པ། བྱང་དུ་ཁྱུང་པོའི་སྟག་ལའི་ཐུགས་ལ་ཡི་གེ་མ་སྨུག་ནག་བྱོན་པ། ནུབ་ཏུ་དོ་ཤང་བླ་མའི་དབུ་ཐོད་རིང་བསྲེལ་གསེར་མདོག་གིས་མཚན་པ། བྱང་དུ་ཁྱུང་ཟ་ཆོག་སྒྲོན་དབུ་ཐོད་ལ་ཡི་གེ་ཨ་རང་བྱོན་ཡོད་པ། གཞན་ཡང་རིས་མེད་ཀྱི་མཁས་གྲུབ་སྐྱེས་ཆེན་མང་པོའི་གདུང་རུས།
ཤངས་མཚལ་ལ་སོགས་པ་བཞུགས་སོ། །ལྔ་པ་སྐུ་བལ་གྱི་རིང་བསྲེལ་ནི། མཉམ་མེད་ཤེས་རབ་རྒྱལ་མཚན། སྐུ་མདུན་གཡུང་དྲུང་དབང་རྒྱལ། སྐུ་མདུན་བསོད་ནམས་བློ་གྲོས། མཁན་ཆེན་ཉི་མ་བསྟན་འཛིན་སོགས་བཀྲ་ཤིས་སྨན་རིའི་གདན་སར་འཁོད་པ་རྣམས་དང་། བྲུ་ནམ་མཁའ་གཡུང་དྲུང་། བྲུ་ཤ་སངས་རྒྱས་བསྟན་འཛིན། གཤེན་རྒྱལ་བ་ཚུལ་ཁྲིམས། གཤེན་ཁྲི་ཆེན། སྤ་གཡུང་དྲུང་ནམ་བཟང་། ཞུ་གཡུང་དྲུང་དབང་རྒྱལ། ཞུ་སྒར་ཆེན་སྐུ་ཞབས། ཞུ་ཉི་མ་གྲགས་པ། རྨེའུ་བསོད་ནམས་དབང་དྲག །རྨེའུ་གཡུང་དྲུང་བསྟན་འཛིན། ཁྱུང་པོ་བློ་གྲོས་རྒྱལ་མཚན། སྨོན་རྒྱལ་དམ་པ་རང་གྲོལ། དགེ་བཤེས་གཡུང་དྲུང་བསྟན་འཛིན། གཏེར་ཆེན་སངས་རྒྱས་གླིང་པ། མཁའ་འགྲོ་བདེ་ཆེན་དཔལ་འདྲེན། སྐྱེ་བདུན་མི་ཕམ་མགོན་པོ། རིག་འཛིན་ཀུན་གྲོལ་གྲགས་པ། གསང་ཡུམ་པདྨ་ལས་རབ། ཡང་སྲིད་གཡུང་དྲུང་བསྟན་འཛིན་གྲགས་པ། མཚུངས་མེད་རིན་ཆེན་གཙུག་ཕུད། མཆོག་སྤྲུལ་ཞལ་བཞུགས། རྒྱལ་སྲས་རྒྱལ་བ་དབང་དྲག །རྒྱལ་སྲས་པདྨ་རྒྱལ་པོའི་སྤྲུལ་སྐུ། ཁྱུང་པོ་ཉི་གྲགས། ཟླ་གྲགས། ཡང་སྟོན་ཁྲི་བཙུག་བསྟན་པའི་རྒྱལ་མཚན། ཡང་སྟོན་གཙུག་ཕུད་རྒྱལ་མཚན། སྣང་བ་མདོག་ཅན་སྤྲུལ་
སྐུ། སྣང་ཞིག་ཟླ་བ་རྒྱལ་མཚན། ཁྱུང་པོ་སྤྲུལ་སྐུ། རྟོགས་ལྡན་ཡེ་ཤེས་བསྟན་འཛིན་རྣམས་ཀྱི་དབུ་ལོ། དབུ་ཞྭ། ན་བཟའ། ཕྱག་ཕྲེང་། ཕྱག་རྗེས་ལ་སོགས་པ་དང་། སྟོད་ཁྱུང་ལུང་དངུལ་མཁར་དང་དབུས་གཙང་མན་ནས། བར་ཁྱུང་པོ་སྨོན་རྒྱལ། སྨད་རྒྱལ་རོང་ཨ་མདོ་ཡན་གྱི་བྱིན་རླབས། རྟེན་འདུས། སྔགས་ནས། རྟེན་ཁྲུས་སོགས་ཁུངས་དག་ཕོན་མང་རྣམས་དང་།། ༈ །།ཆོས་ལུགས་ཀྱི་དམ་རྫས་ལོ་ཆེན་བཻ་རོའི་རྒྱ་དཔེ། བྲམ་ཟེ་སྐྱེ་བདུན་གྱི་སྐུ་ཤ་རིལ་བུ། ཀརྨ་པའི་དམ་རྫས་རིལ་ནག་ཆེན་མོ། ས་ངོར་གྱི་བདུད་རྩི་རིལ་བུ། ས་སྐྱོང་སྡེ་དགེའི་རྟེན་སྒམ་དུ་གང་བཞུགས་ཀྱི་བྱིན་རླབས་དམ་རྫས་རིགས་དང་གཞན་ནས་བྱུང་བ་སོགས། མདོར་ན་སྔགས་རྙིང་མ། ཀར་འབྲུག །ས་དགེ་ལ་སོགས་པའི་དམ་རྫས་ཁུང་ལྡན་ཕོན་མང་རྣམས། གང་ཟག་སྔ་ཕྱི་བྱོན་ལུགས་ཀྱི་གོ་རིམ་སོགས་དང་མཐུན་པར་བཞུགས་པའོ། །མཆོད་རྟེན་ལ་སྲོག་ཤིང་གཙོ་ཆེ་བ་མདོ་རྒྱུད་རྣམས་ནས་གསུངས་པ་ལྟར་བཟང་ཤིང་ཤར་རྟགས་རྩ་རྩེ་མ་འཁྲུལ་བའི་སྲོག་ཤིང་ལ་སྙིང་པོ་གསེར་གྱིས་བྲིས་པ། གནས་སོ་སོར་བུམ་རྫས་ཉེར་ལྔ། སེང་ཁྲིར་གནོད་སྦྱིན་འཁོར་ལོ་གསེར་དངུལ་གྱིས་བྲིས་པ་གཅིག །སྤར་མ་ཆ་བརྒྱད་སོགས་མདོར་ན་གཟུངས་འབུལ་གྱི་ཕྱག་ལེན་ཀུན་
གྲོལ་གྲགས་པས་མཛད་པ་གཡའ་བྲལ་ཤེལ་གྱི་མེ་ལོང་ལྟར་ཚང་ཞིང་མ་འཁྲུལ་བར་བཞུགས་སུ་གསོལ་ཞིང་། ས་འཛིན་ཏུ་གངས་རི་མཚོ་གསུམ། ཟ་ཧོར་ལ་དྭགས། རྒྱ་གར་བལ་ཡུལ། གུ་གེ་ཁྱུད་ལུང་། སྤ་གྲོ་གཙང་དབུས། ཀོང་ཡུལ་ཁྱུང་པོ། མདོ་ཁམས་སྟོད་སྨད། རྒྱལ་རོང་ཨ་མདོ། རྒྱ་ནག་སོགས་གནས་ཆེན་གནས་ཕྲན་མང་པོའི་ས་ཆུ་རྡོ་ཤིང་རྩྭ་དང་མེ་ཏོག །གནོད་སྦྱིན་བང་མཛོད་དུ་ཚོང་འདུས་སྟོད་སྨད་ཀྱི་ས་དང་འབྲུ་ནོར་སོགས་གཡང་རྫས་སྣ་ཚོགས། ས་འཛིན་འོག་ཏུ་དུག་གསུམ་གྱི་མནན་པ། མཆོད་རྟེན་སྟོད་སྨད་ཀུན་ཏུ་སྨེ་བཙོགས་ཀྱིས་མ་གོས་པའི་དར་ཟབ་རས་ལིང་། གཤའ་ར་གན། ཞ་ཉེ་སོགས་མ་ཡིན་པའི་རིན་པོ་ཆེ་སྣ་ཚོགས། དུག་དང་མཐུར་ལྟས་མ་ཡིན་པའི་མེ་ཏོག་སྣ་ཚོགས། བྲ་སྲན་འབྲུ་ནག་མ་ཡིན་པའི་འབྲུ་རིགས་སྣ་ཚོགས། དུག་དང་བཤལ་སྐྱུགས་མ་ཡིན་པའི་སྨན་སྣ་ཚོགས་ཐུམ་དང་ཁྲོལ་བུར་བྱས་པས་བཀངས་ཤིང་། བཟང་ཞིང་དྲི་བཟང་གི་ཕུར་མས་བར་མཚམས་ཐམས་ཅད་བཅེར་ཞིང་མཚམས་དར་སོ་སོས་བཀག་པ་སོགས་གཞུང་ནས་བཤད་ཚོད་ཚད་ལྡན་འདུ་བགྱིས་ཤིང་། རབ་ཏུ་གནས་པའི་ཆོ་གས་ཡེ་ཤེས་སེམས་དཔའ་བརྟན་པར་བཞུགས་པའི་བྱིན་རླབས་ཀྱི་གཟི་བརྗིད་འབར་ཞིང་། སྐྱེ་དགུའི་བསོད་ནམས་ཀྱི་ཞིང་
ཕུལ་དུ་གྱུར་པ་འདི་བསྒྲུབས་པ་ཡིན་ནོ། །དེ་ལྟར་བསྒྲུབས་པའི་ཕན་ཡོན་ཀྱང་མདོ་ལས། བདེ་གཤེགས་སྐུ་གདུང་རིང་བསྲེལ་བཞེངས་བྱེད་པ། །བསྐལ་པར་བསགས་པའི་བག་ཆགས་སྒྲིབ་པ་འདག །མཚམས་མེད་ལས་གྱུར་སྡིག་དང་སྒྲིབ་པ་བྱང་། །བསོད་ནམས་ཡེ་ཤེས་ཚོགས་ཆེན་མྱུར་དུ་རྫོགས། །འབྲས་བུ་སྐུ་གསུམ་སངས་རྒྱས་འཐོབ་པར་འགྱུར། །ཅེས་དང་། །སྟོན་པ་སངས་རྒྱས་བདེ་བར་གཤེགས་པ་རྣམས། །ཕྲ་རབ་རྡུལ་དང་གྲངས་འཛིན་རྡུལ་ཕྲན་མཁྱེན། །གངྒཱའི་ཀླུང་གི་བྱེ་མ་སྙེད་ཙམ་མངོན། །སྐུ་གདུང་ཡོན་ཏན་གྲངས་ཀྱིས་བརྗོད་མི་ནུས། །ཞེས་དང་བདེ་གཤེགས་མཆོད་རྟེན་བཞེངས་སུ་གསོལ་བ་ཡིས། །ངན་སོང་གསུམ་ལས་གཏན་ཏུ་ཐར་བར་འགྱུར་རོ། །གང་ཞིག་མཆོད་རྟེན་སྐུ་ཡི་བསྐོས་མཁན་བྱེད་པ་ནི། །སྒམ་པོ་ཕྱ་ཡི་ལུས་སུ་སྐྱེ་བར་འགྱུར་རོ། །ཞེས་དང་། གང་གིས་མཆོད་རྟེན་སྐུ་ལ་འཇིམ་པ་གཅིག་བོར་བ། །ཇི་སྙེད་རྡུལ་གྱི་གྲངས་ནི་དེ་སྙེད་དུ། །བསོད་ནམས་རྒྱུན་ཀྱང་དེ་བཞིན་ཟད་མི་ཤེས། །ཞེས་སོགས་ནས། གང་ཞིག་མཆོད་རྟེན་སྐུ་ལ་མར་མེ་འབུལ་བ་ནི། །ཡེ་ཤེས་གསལ་བའི་སྒྲོན་མེ་འདེགས་པར་འགྱུར། །གང་ཞིག་མཆོད་རྟེན་སྐུ་ལ་ཕྱག་བསྐོར་འབུལ་བ་ནི། །རྩ་གསུམ་གནས་སུ་བོན་
འཁོར་བསྐོར་བར་འགྱུར། །མཆོད་པའི་རྟེན་ལ་བཀུར་སྟི་སུས་བགྱིས་ཀྱང་། །ཚེ་འདིར་ཅི་བསམ་ཡིད་བཞིན་འགྲུབ་པ་དང་། །འགལ་རྐྱེན་བར་ཆད་མ་ལུས་ཞི་ནས་ཀྱང་། །ཕྱི་མ་བླ་མེད་འབྲས་བུ་འཐོབ་པར་འགྱུར་རོ། །ཞེས་པ་ལ་སོགས་པ་རྒྱ་ཆེར་གསུངས་པ་རྒྱས་པར་མདོ་བྲི་མ་མེད་པའི་གཟི་བརྗིད་སོགས་བལྟ་བས་དང་བ་དང་། འདོད་པ་དང་། ཡིད་ཆེས་པའི་དད་པ་དང་ལྡན་པས་བསོད་ནམས་ཀྱི་ཚོགས་རླབས་པོ་ཆེ་སྒོ་ཐམས་ཅད་ནས་གསག་པར་བྱའོ། །སླར་སྨྲས་པ། འདི་དང་གཏན་གྱི་དབུལ་བའི་འཇིགས་འཕྲོག་ཅིང་། །ཡིད་ལ་འདོད་རྒུའི་དངོས་པོ་འཇོ་བ་ལ། །བུམ་བཟང་དཔག་བསམ་ཤིང་གིས་མི་བསྐྲུན་པ། །ལྷ་མིའི་མཆོད་སྡོང་བོན་སྐུའི་རྟེན་འདི་རྨད། །འདི་བགྱིས་དགེ་བས་རྣམ་འདྲེན་བླ་མ་མཆོག །དགོངས་པའི་ལྷག་མ་བོན་ཉིད་དབྱིངས་སུ་རྫོགས། །གང་འདུལ་སྤྲུལ་པའི་རོལ་རྩེད་མཐའ་ཡས་པས། ཁམས་གསུམ་འཁོར་བ་དོང་ནས་སྤྲུགས་པར་ཤོག །དྲི་མེད་གཤེན་བསྟན་ཉིན་བྱེད་མི་འགྲིབས་གསལ། །སྐྱེ་དགུའི་བདེ་སྐྱིད་པད་ཚལ་ཕྱོགས་བརྒྱར་བཞད། །རྣམ་དཀར་དཔྱིད་ཀྱི་དཔལ་མོ་དར་བབ་པའི། །བཀྲ་ཤིས་སྣང་བས་འཇིག་རྟེན་མཛེས་གྱུར་ཅིག །ཅེས་པའང་སྐྱེས་མཆོག་རྣམ་པར་འདྲེན་པ་པྲཛྙེ་ཤྭ་རའི་གསུང་
བསྐུལ་རྗེས་སུ་བསྒྲུབ་སླད། ཁྱུང་དཀར་གྱི་རིགས་ལས་གན་ཇག་ཐང་ཏའི་སྨོན་ལམ་འཛིན་པ་རིག་འཛིན་བློ་གྲོས་མཐའ་ཡས་སམ། ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོས་དཔལ་སྤུངས་ཡང་དབེན་ཀུན་བཟང་བདེ་ཆེན་འོད་གསལ་གླིང་དུ་བྲིས་པ་སརྦ་ཐཱ་ཀ་ལྱཱ་ཾ་བྷ་བ་ཏུ། །