གདན་ས་ཆེན་པོ་ཐུབ་བསྟན་ཆོས་འཁོར་གླིང་གི་བླ་བྲང་དབེན་པ་ཟླ་མཛེས་སུ་བཞུགས་པའི་དཔེ་དེབ་རིན་པོ་ཆེ་འཕྲུལ་གྱི་ལྡེའུ་མིག
གདན་ས་ཆེན་པོ་ཐུབ་བསྟན་ཆོས་འཁོར་གླིང་གི་བླ་བྲང་དབེན་པ་ཟླ་མཛེས་སུ་བཞུགས་པའི་དཔེ་དེབ་རིན་པོ་ཆེ་འཕྲུལ་གྱི་ལྡེའུ་མིག་ཅེས་བྱ་བ་བཞུགས་སོ།།
མཐའ་ཡས་ཤེས་བྱའི་རྗེས་འགྲོ་མིང་ཚིག་གི། སྤྲོས་བཅས་རྟོག་པའི་འཕོ་བ་འགག་གྱུར་པས། །བརྗོད་མེད་དེ་ཁོ་ན་ཉིད་རྡོ་རྗེའི་གསུང་། །འགྲོ་ཀུན་ངག་གི་ལམ་དུ་རྫོགས་གྱུར་ཅིག །སྣ་ཚོགས་མཚན་མས་དབེན་པའི་གནས་ལུགས་ནི། །རྟོགས་པའི་ཆོས་ཏེ་ཡེ་ཤེས་སྤྱོད་ཡུལ་ཅན། །འོད་ལས་ཉི་བཞིན་རྒྱུ་འབྲས་རྗེས་དཔག་
ཕྱིར། །ལུང་གི་སྨན་མཆོག་འབད་པས་བསྒྲུབ་བྱ་ཉིད། །ཟླ་བ་ཟླ་ཤེལ་ཙནྡན་ཆུ་ཡིས་ཀྱང་། །མི་མཚོན་ཞི་བསིལ་རེག་བྱ་བརྒྱས་ལྷག་པ། །ཆོས་མཆོག་བདུད་རྩིའི་གོང་དུ་བདེ་སྟེར་བའི། །བདུད་རྩི་གཉིས་པ་འཇིག་རྟེན་གསུམ་ན་མེད། །སུ་ཞིག་སྐད་ཅིག་དད་པའི་ཡོལ་གོ་རུ། །གླེགས་བམ་བེམ་པོས་སྟེར་བའི་རྣམ་གྲོལ་གྱི། །རིན་ཆེན་དེ་ནི་ཚངས་སོགས་ཆེ་དགུས་ཀྱང་། །སྦྱིན་པའི་ར་བ་སྐྲ་རྩེ་སྟོང་ལས་ཕྲ། །སྒྲིབ་པ་བཀྲུ་ལ་དག་བྱེད་མཆོག་གྱུར་ཅིང་། །ཚོགས་གཉིས་རབ་སྤེལ་རྫོགས་ལྡན་བསོད་ནམས་སྤྲིན། །གནས་ལུགས་ལྟ་བའི་དམིགས་བུ་ཚད་མ་སྟེ། །ཆོས་ཀྱི་རྣམ་ཐར་སུ་ཡིས་བརྗོད་པར་ནུས། །དེ་ལྟ་བུའི་དམ་ཆོས་རིན་པོ་ཆེ་ལེགས་པར་གསུང་ཞིང་
མཐོང་ན་དོན་ཡོད་པ། ཐོག་མཐའ་བར་དུ་དགེ་ཞིང་བཟང་ལ་མ་འདྲེས་པ་རྣམ་པར་བྱང་བའི་ཆོས་ཅན། ཁམས་གསུམ་གྱི་ཉོན་མོངས་པའི་རྒྱུ་བ་མཐའ་དག་བཅད་པའི་སྨན་མཆོག །གཉན་པོའི་ཕྱོགས་ཀྱིས་མི་མཐུན་པའི་མཐུ་བཅོམ་པ་ལ་འདི་དང་མཚུངས་པ་གང་ཡང་མེད་པ། བདེན་པ་གཉིས་ཀྱི་མཚན་ཉིད་ཅན་ཞི་བསིལ་ཆགས་དང་བྲལ་བ། སངས་རྒྱས་འཇིག་རྟེན་ཏུ་བྱོན་པའི་རྗེས་བཞག །སྟོན་པའི་བསྟན་པ་ཚད་མར་གྱུར་པའི་བཀའ་དང་བསྟན་བཅོས་རྒྱ་མཚོའི་མཇིངས་ལས་བསོད་ནམས་ཀྱི་བགོ་སྐལ་དུ་སྣང་བའི་གླེགས་བམ་རིན་པོ་ཆེའི་ཕྲེང་བ། རིན་ཐང་མེད་པའི་ནོར་བུའི་དོ་ཤལ་ལྟར་ཚར་དུ་དངར་བ་ཇི་སྙེད་ཅིག་བཞུགས་པའི་ཐོག་མར་འགྱུར་ཁྱད་ཀྱི་དབང་གིས་སྔགས་རྙིང་མ་ནས་བརྩམས་རིམ་པར་བཞུགས་པ་ལ། རང་རང་གི་སྡེ་ཚན་སྤྱི་སྟོན་བྱེད་གདོང་དར་དུ་ལེགས་སྦྱར་གྱི་སྐད་དང་། དེའི་ནང་གསེས་རིམ་པ་མི་འཆུག་པའི་ཀ་ཐེམས། ཚན་གྲངས་བྱེ་བྲག་པ་ཇི་ལྟ་བའི་ཐོ་ཡིག་ཞིབ་མོ་རྣམ་འབྱེད་བཅས། གཟེར་བཏབ་པའི་རིན་པོ་ཆེའི་སྒྲོམ་བུ་ལ་འཕྲུལ་གྱི་ཀུཉྩི་ཀ་དང་ཆོས་མཚུངས་པའི་དེབས་ཡིག་ནི་འདི་ལྟར་རོ།། ༈ །།འདིར་སྨྲས་པ། སྲས་བཅས་རྒྱལ་བའི་ཐུགས་ཀྱི་དབྱིག །གནས་ཡུལ་མཁའ་འགྲོས་བསྲུང་བྱའི་ནོར། །མཁས་རྣམས་འབད་བ་
བརྒྱས་བཙལ་བ། །དེ་དག་ཆོས་ཀྱི་མཛོད་འདིར་བཞུགས། །རིན་ཆེན་འབྱུང་བའི་རྒྱ་མཚོ་སྟེ། །དགོས་རྒུའི་གཏེར་འབྱུང་བུམ་པ་བཟང་། །མདོ་སྔགས་ཆོས་ཀྱི་སྒྲོམ་ཆེན་པོ། །ཨོ་རྒྱན་གསང་མཛོད་གཉིས་པ་བཞིན། །དམ་ཆོས་རྒྱལ་བ་ཀུན་གྱི་ཡུམ། །རྒྱལ་ལ་མི་བཀུར་ཆོས་ལ་བཀུར། །དེ་ཡི་འབྲས་བུ་བྱེ་སྙེད་ཀྱི། །རྡོ་རྗེའི་ལྗགས་ཀྱིས་བརྗོད་དཀའ་གསུངས། །དེ་ལྟར་བདེན་གསུང་རྔ་བོ་ཆེས། །ཡིད་ཆེས་བྱས་པའི་མཁས་རྣམས་དང་། །ལྷན་ཅིག་དཀར་ཕྱོགས་སྐྱོང་རྣམས་ཀྱི། །ཅོད་པན་ནོར་བུའི་འབབ་སྟེགས་ཉིད། །རང་བསྟན་དྲི་མེད་སྐྱོང་བཞིན་ཏུ། །རྒྱལ་བསྟན་ཀུན་ལ་གུས་པ་དང་། །མ་དག་ཆོས་ཀྱི་རྒྱུན་འགོག་པ། །སྐྱེས་བུ་དམ་པའི་མཚན་ཉིད་ཡིན། །གང་ཞིག་ཚེས་ལ་རིས་བྱེད་པ། །དེ་ལ་ཆོས་ཀྱི་མིག་དགོས་པས། །སོ་སྐྱེས་བརྟགས་པའི་འགལ་འདུ་ལ། །རྒྱལ་བས་ཀིམ་པའི་འབྲས་འདྲར་གསུངས། །གྱེས་པ་ཀུན་ཀྱང་རྣམ་བྲོས་ལ། །གཅིག་ཕྱིར་རྒྱལ་བའི་སྤྱོད་ཡུལ་ཉིད། །དེ་བས་འདིར་ནི་རིས་མེད་ཀྱི། །ཆོས་རྣམས་མཆོད་པའི་ཞིང་དུ་བཞག །ཚུལ་དང་མི་མཐུན་རང་བཟོའི་རྟེན། །དད་སོགས་སྲི་ཞུའི་ཁུར་ལས་ཀྱང་། །ལུང་རྟོགས་ཆོས་ཀྱི་ཕུང་པོ་འདིར། །སྤྲོ་ན་མཆོད་པའི་སྤྲིན་སྤྲོས་ཤིག །དེ་ཡི་བསོད་ནམས་གཞལ་མེད་དེ། །
ཆུད་ཟོས་གནོད་པ་སྲུང་བ་སོགས། །ཞབས་ཏོག་བྱས་པའི་འབྲས་བུ་ཡང་། །མཚན་བཅས་དགེ་རྩ་ཀུན་ལས་ལྷག །དཀོན་མཆོག་ལ་དམིགས་དད་སེམས་ཀྱིས། །ཐལ་མོ་ཡ་གཅིག་བསླང་བའམ། །མེ་ཏོག་གཅིག་ཙམ་ཕུལ་བའི་འབྲས། །བྱང་ཆུབ་བར་དུ་འཛད་མི་འགྱུར། །རྒྱལ་དང་གང་ཟག་མཆོག་གི་གསུང་། །རིན་ཆེན་ལས་ཀྱང་རིན་ཆེ་བ། །དེ་ལ་ཤིན་ཏུ་མི་བསྙེན་པ། །དེ་དག་ངེས་པར་དུད་འགྲོ་ཉིད། །ཞིང་པ་རྣམས་ཀྱིས་ལོ་ཏོག་དང་། །དོན་མཐུན་གྱིས་ནི་ནོར་བཞིན་ཏུ། །ངལ་བརྒྱས་བཀུར་བའི་ཕུ་དུད་ཀྱིས། །རྒྱལ་རྣམས་འཛུམ་ཞལ་གཡོ་བར་བྱོས། །དེ་ལས་ཐོབ་པའི་དགེ་ལེགས་ཀྱི། །ཆུ་གཏེར་ལས་འཁྲུངས་བསམ་འཕོས་ནོར། །མཆོག་དངོས་གྲུ་ཆར་འཇོ་བ་ཡིས། །འཇིག་རྟེན་གསུམ་པོ་མཛེས་བྱེད་ཤོག །རྒྱལ་བསྟན་ཉིན་བྱེད་གསལ་བ་དང་། །བསྟན་འཛིན་པད་ཚལ་རྒྱས་ཤིང་བརྟན། །ལུང་རྟོགས་སྦྲང་རྩིས་སྐྱེ་དགུ་ཡི། །སྲོག་འཚོ་ལྷན་ཅིག་ཉིད་དུ་ཤོག །རྫོགས་པའི་སངས་རྒྱས་པདྨའི་མཚན། །ཡབ་སྲས་བརྒྱུད་བཅས་ཞབས་བརྟན་ཅིང་། །ངེས་དོན་ཀརྨ་ཀཾ་ཚང་གི། བསྟན་པ་ཡུན་རིང་འབར་གྱུར་ཅིག །བདག་སོགས་འབྲེལ་བར་བཅས་ཀུན་ཀྱང་། །ཆོས་ཀྱི་དེ་ཉིད་མྱུར་རྟོགས་ཤིང་། །མི་གནས་ཡེ་ཤེས་ཆེ་བརྙེས་ཏེ། །གསུང་གི་
དབང་ཕྱུག་ཉིད་གྱུར་ཅིག །ཅེས་པའང་། སྐྱབས་མཆོག་འཁོར་ལོའི་མགོན་པོ་སྐུ་མཆེད་ཀྱི་བཀའ་བཞིན་གླེགས་བམ་བཞུགས་ཚུལ་དང་དཔེ་དེ་བས་གསར་བསྒྲིགས་སྐབས་འདུ་གསུམ་པ་ཀརྨ་ངག་དབང་ཡོན་ཏན་རྒྱ་མཚོས་སྨྲས་པ་དགེ་ལེགས་འཕེལ། སརྦ་དཱ་ཀ་ལྱཱ་ཾ་བྷ་བནྟུ། །