རྫོང་ཆེན་ཁམས་ཕུག་འོད་གསལ་གྲུབ་པའི་རྩེ་མོའི་དཀར་ཆག་གཏེར་བྱོན་ཟུར་འདེབས་དད་པའི་མེ་ལོང་།
རྫོང་ཆེན་ཁམས་ཕུག་འོད་གསལ་གྲུབ་པའི་རྩེ་མོའི་དཀར་ཆག་གཏེར་བྱོན་ཟུར་འདེབས་དད་པའི་མེ་ལོང་ཞེས་བྱ་བ་བཞུགས་སོ། །རྩ་གསུམ་ཀུན་འདུས་སྣང་སྲིད་ཟིལ་གནོན་མཆོག །དབྱེར་མེད་རིག་འཛིན་རྩལ་འཆང་རྗེ་ལ་འདུད། །ཨོ་རྒྱན་ལུང་ཟིན་གདོད་ནས་ཡོངས་གྲགས་པའི། །སྦས་ཡུལ་ཆར་གཏོགས་ཨ་ཏ་རོང་འདི་ཡི། །གནས་གཏེར་ཐོག་མར་ཞལ་འབྱེད་གནས་དུས་ཀྱི། །རྟེན་འབྱུང་འགྲིགས་ཤིང་ལས་ཅན་གང་ཟག་འཛོམ། །དོན་འདི་བར་ཆད་མེད་པ་མཐར་ཕྱིན་ན། །མཐའ་དམག་དར་ཞི་རྒྱལ་ཁམས་སྐོར་གཅིག་བདེ། །འབྲེལ་ཐོགས་འགྲོ་ལ་ཐར་པའི་ས་བོན་ཐེབ། །དེ་ཕྱིར་པད་འབྱུང་ཞལ་ཚབ་ཆོས་ཀྱི་རྗེ། །མངའ་བདག་ཡབ་སྲས་རྣམ་རོལ་རྣམ་གཉིས་ལ། །ལས་ཅན་དག་གིས་གསོལ་བ་བཏབ་པ་བཞིན། །གནས་ཞལ་ཕྱེས་ཤིང་ཟབ་གཏེར་དག་ཀྱང་བཞེས། །ད་རུང་རྟེན་འབྲེལ་ལེགས་ཚོགས་འགྲིགས་པ་ན། །ངོ་མཚར་མང་པོ་རིམ་གྱིས་འབྱུང་བར་འགྱུར། །ད་ལྟའི་རྟེན་འབྲེལ་འདིས་ཀྱང་ཡུལ་ཕྱོགས་འདིར། །ཆོས་མིན་སྤྱོད་པའི་སྤྲིན་གྱིས་མར་བཀབ་ན། །ལོ་སྐོར་གཅིག་ཏུ་བདེ་སྐྱིད་ཉི་མ་འཆར། །ཁྱད་པར་རྩ་བ་ཡོན་ཏན་སྐུ་ཡི་གནས། །གཉན་ལྡང་ཛཱ་ལན་དྷ་རའི་ཡལ་འདབ་དང་། །མེ་ཏོག་འབྲས་བུ་ཕྱོགས་མཚམས་གྱེས་པ་ལ། །ཤར་ཕྱོགས་རྡོ་རྗེ་རིགས་ཀྱིས་འདུལ་ཞིང་འདིར། །གཡས་སུ་
རྫོང་ཆེན་ཐུགས་རྗེ་ཆེན་པོ་དང་། །གཡོན་དུ་ཁམས་ཕུག་བླ་མའི་གཞལ་མེད་ཁང་། །དབུས་སུ་མི་འགྱུར་འོད་གསལ་གྲུབ་པའི་རྩེ། །མཁའ་འགྲོ་སྒྱུ་འཕྲུལ་དྲ་བའི་ཕོ་བྲང་ཆེ། །མདུན་དབུས་དུད་སོལ་རེ་ཏི་རོལ་པའི་ཞིང་། །བར་མཚམས་ནོར་ལྷ་ཆོས་སུང་བསྟི་གནས་བཅས། །ཕྱི་རུ་སྐུ་གསུང་ཐུགས་དང་ཕྱག་ཞབས་རྗེས། །ངོ་མཚར་བཀའ་རྟགས་དངོས་དང་སྦས་པའི་ཚུལ། །ནང་དུ་ཆོས་ནོར་དམ་རྫས་ལ་སོགས་པ། །ཟབ་མོའི་གཏེར་ཁ་དུ་མའི་མཛོད་དང་ལྡན། །གསང་བ་ཐར་པ་ཆེན་པོའི་གཞལ་མེད་ཁང་། །རྩ་གསུམ་དཀྱིལ་འཁོར་ཚོམ་བུའི་ཚུལ་དུ་བཞུགས། །ནོར་གྱི་ལྷ་མོས་ཐུན་མོང་དངོས་གྲུབ་སྟེར། །རེ་མ་ཏི་ཡིས་མཆོད་ལ་སྡོང་གྲོགས་མཛད། །གནས་ལ་འཚེ་བའི་འགལ་བྱེད་ཆོམ་ལ་འབེབས། །ཤར་དུ་གནས་སྲུང་དགེ་བསྙེན་རྟེན་གྱི་མཁར། །ལྷོ་རུ་གསེར་དེའུ་སེར་མོ་དོན་གྲུབ་གནས། །ནུབ་ཏུ་གསང་ཕུག་རྡོ་རྗེའི་རྔ་སྒྲ་ཅན། །བྱང་དུ་གཏེར་འཆང་རོལ་པའི་དཔལ་དེའུ། །ས་གནད་མི་འགྱུར་འཇོར་བཞིས་རབ་ཏུ་བརྒྱན། །སྔོན་ཚེ་ཨོ་རྒྱན་སྤྲུལ་པའི་རྗེ་འབངས་བཅས། །ཟླ་བ་གཅིག་བཞུགས་བྱིན་རླབས་གཏེར་ཆེན་སྦས། །བར་དུ་གྲུབ་ཐོབ་ཐང་སྟོང་རྒྱལ་པོ་སོགས། །དམ་པ་དུ་མས་བསྒྲུབས་
ཤིང་དངོས་གྲུབ་བརྙེས། །ཕྱིས་དུས་སྐྱེས་ཆེན་སྤྱི་དང་ཁྱད་པར་དུ། །པདྨ་འོད་གསལ་མདོ་སྔགས་གླིང་པ་ཡིས། །གནས་སྲུང་གཏེར་བདག་རྡོ་རྗེའི་ཟིལ་འོག་བཅུག །བསྟན་འགྲོར་ཕན་བདེ་སྤེལ་བའི་བཀའ་ནན་བསྒྲགས། །མཁའ་འགྲོའི་བརྡ་རིས་མདོ་བྱང་གཏེར་རྒྱ་བཀྲོལ། །དུས་བསྐལ་དབང་པོར་འཚམས་པར་གཏན་ཕབ་ནས། །ཁོ་བོ་ཅག་ལ་བཀའ་ཡིས་རྗེས་གནང་ཚེ། །སྔོན་སྨོན་འབྲེལ་ཟབ་དད་འབྱོར་ལྡན་པ་ཡི། །སྦྱིན་བདག་རྟེན་འབྲེལ་བཟང་པོས་མཚམས་སྦྱར་ཏེ། །མཐུན་རྐྱེན་གང་དགོས་གུས་པས་བསྒྲུབས་པ་ལ། །བརྟེན་ནས་གནས་འདིར་ཕྱིན་ཅིང་གསོལ་བ་བཏབ། །ཕྱི་ནང་གསང་བའི་ཚོགས་དང་མ་མཆོད་ནི། །སྟོང་ཕྲག་ལྷག་པས་རྩ་གསུམ་དགྱེས་པ་བསྐྱེད། །གཏེར་སྲུང་གནས་བདག་སྨན་རག་གཏོར་མས་བསྐངས། །སྡེ་བརྒྱད་འབྱུང་པོ་གསེར་སྐྱེམས་བསངས་ཀྱིས་བརྔན། །རྟེན་དང་བརྟེན་པར་རྩ་གསུམ་དཀྱིལ་འཁོར་ཆེ། །གདོད་ནས་གྲུབ་པ་ཡིན་ལ་ཡིན་བཞིན་ཏུ། །རང་སྣང་རིས་མེད་དགོངས་པས་བྱིན་གྱིས་བརླབས། །ཕྱི་ནང་གསང་བའི་རྟེན་འབྲེལ་ལེགས་ཚོགས་འགྲིགས། །གནས་མཆོག་འདི་རུ་རྩེ་གཅིག་བསྒྲུབ་པ་ན། །བར་ཆད་མེད་པ་མཆོག་གི་དངོས་གྲུབ་འགྲུབ། །
ཚོགས་འཁོར་ཚད་ལྡན་གཅིག་གིས་མཁའ་སྤྱོད་སྙེགས། །མཆོད་པ་ཕུལ་ན་བསོད་ནམས་ཚོགས་ཆེན་རྫོགས། །དར་ཅོག་ཀླུང་རྟ་བཙུག་ན་དབང་ཐང་རྒྱས། །ཕྱག་བསྐོར་བཟླས་བརྗོད་སྒོ་གསུམ་སྡིག་སྒྲིབ་སྦྱོང་། །བསང་གཏོར་གསེར་སྐྱེམས་ཕུལ་ན་གང་འདོད་འགྲུབ། །གསོལ་བ་རྩེ་གཅིག་བཏབ་ན་འདོད་རྒུ་འབྱུང་། །མཐའ་བསྐོར་གསུམ་གྱིས་རྩ་གསུམ་བསྙེན་སྒྲུབ་ཐེམ། །གནས་ཀྱི་རྩ་བ་གསུམ་ལ་བསྐོར་བ་ཡི། །ཉི་ཤུ་རྩ་ལྔས་བཟླས་པ་དུང་ཕྱུར་འགྱུར། །རྫོང་དང་ཁམས་ཕུག་འོད་གསལ་རྩེ་མོ་གསུམ། །སོ་སོར་ཕྱེ་ན་བརྒྱ་ཕྲག་རེ་རེའི་ཚད། །མདོར་ན་ཆེ་ཆུང་འབྲེལ་ཚད་དོན་དང་ལྡན། །ཤིང་གཅོད་བྲག་བཤིགས་བྱ་དང་རི་དྭགས་རྔོན། །མི་དགེ་བྱས་ན་བཀའ་ཆད་འཕྲལ་དུ་འབྱུང་། །བསྐོར་ལམ་གཏོད་སོགས་ཞབས་ཏོག་བྱེད་པ་ཀུན། །འཕྲལ་ཡུན་བདེ་ལེགས་ཡར་ངོའི་ཟླ་ལྟར་འཕེལ། །དེ་དག་ཉམས་སྣང་མངོན་ཤེས་འོལ་ཚོད་མིན། །ཨོ་རྒྱན་རྡོ་རྗེའི་བཀའ་ལུང་གོ་བདེའི་སླད། །བླ་མའི་བཀའ་ལྟར་རྒྱས་པར་བཀྲོལ་འདི་ཡང་། །འཆི་མེད་བསྟན་གཉིས་གཡུང་དྲུང་གླིང་པ་ཞེས། །སྔགས་བཙུན་འཆོལ་བར་ལུང་གིས་ཟིན་པ་དེས། །གྲུབ་པའི་གནས་མཆོག་རྫོང་ཆེན་ཕུག་ནས་
བྲིས། །དུས་ཀྱི་རྒུད་པའི་མུན་པ་ཀུན་ཞི་ནས། །ཕན་བདེ་ཉི་ཟླའི་སྣང་བ་རྒྱས་པར་ཤོག །དགེ་ལེགས་འཕེལ།། །།