རྒྱུན་ཁྱེར་ལུས་སྦྱིན་འཁྲུལ་རྟོག་གཅོད་པའི་རལ་གྲི།
རྒྱུན་ཁྱེར་ལུས་སྦྱིན་འཁྲུལ་རྟོག་གཅོད་པའི་རལ་གྲི་ཞེས་བྱ་བ་བཞུགས་སོ། །ན་མོ། སྟོང་གསལ་འགག་པ་མེད་པའི་རང་རིག་ལ། །རྒྱལ་བའི་སྐུ་གསུམ་གདོད་ནས་ལྷུན་གྲུབ་པས། །སངས་རྒྱས་གཞན་ཏུ་མི་བཙལ་རང་བྱུང་གི། གནས་ལུགས་ལྟ་བ་མཇལ་བས་སྐྱབས་སུ་མཆི། །དོན་དམ་བདེན་པ་མ་རྟོགས་སྙིང་རྗེའི་ཞིང་། །ཀུན་རྫོབ་ལུ་གུ་རྒྱུད་དུ་འཁྲུལ་པ་ཡི། །ཕ་མ་འགྲོ་དྲུག་སྣང་སྲིད་ལྷ་འདྲེ་རྣམས། །བདག་གིས་བྱང་ཆུབ་མཆོག་ལ་འགོད་པར་བྱ། །ཕཊ་ཕཊ། གཟུངས་འཛིན་སྤྲོས་དང་བྲལ་བའི་ནམ་མཁའ་ལ། །དྭངས་མའི་རང་འོད་འཇའ་ཟེར་ཐིག་ལེའི་སྦུབས། །ཕྱི་ནང་གཞན་གསུམ་ཚུལ་དུ་སྣང་བའི་མགྲོན། །དམ་ཡེ་དབྱེར་མེད་རང་བབས་ཆེན་པོར་གསལ། །ཕཊ་ཕཊ། །མ་རིག་ཀུན་གཞིའི་རྒྱ་མཚོ་ཆེན་པོ་ལས། །སེམས་བྱུང་ཆོ་འཕྲུལ་རྦ་རླབས་ཕྱིར་གཡོས་པའི། །སྣང་སྲིད་ལྷ་འདྲེ་ཕོ་མོ་མ་ནིང་རིགས། །དུག་གསུམ་དགའ་སྟོན་རོལ་ཕྱིར་འདིར་འདུས་ཤིག །ཕཊ། །རྣམ་པར་རྟོག་པའི་རང་གཟུགས་ཕྱི་རོལ་དུ། །ཤར་བ་ཙམ་ནས་བདེན་པར་མ་གྲུབ་པས། །གཉུག་མའི་ཞལ་ཕྱག་རྫོགས་པའི་ཧེ་རུ་ཀའི། །རྟོགས་པའི་ཟིལ་གྱིས་འཁོར་འདས་མནན་པར་བྱ། །ཕཊྲ། །རང་གི་ལུས་ནང་ཨ་བ་དྷཱུ་ཏི་ནི། །མཚན་ཉིད་བཞི་ལྡན་
དབུས་སུ་རླུང་སེམས་ཀྱི། །ངོ་བོ་ཐིག་ལེ་དཀར་དམར་མདངས་ལྡན་དེ། །རྟེན་མེད་ཆོས་དབྱིངས་གཉུག་མའི་ནམ་མཁར་འཕོ། ཕཊ་ཕཊ་ཕཊ། སྐྱེ་མེད་ངང་ལས་འགག་མེད་སྒྱུ་མའི་སྐུ། །རྡོ་རྗེ་མཁའ་འགྲོ་གྲི་ཐོད་འཛིན་པ་སྤྲོས། །རྣམ་ཐར་སྒོ་གསུམ་ཐོད་པའི་སྒྱེད་པུའི་སྟེང་། །བདེ་སྟོང་དབྱེར་མེད་པདྨ་བྷཉྫ་བཙུགས། །བདག་མེད་རྟོགས་པའི་ཡེ་ཤེས་གྲི་གུག་གིས། །གཟུགས་འཛིན་བེམ་པོ་ཏིལ་འབྲུ་ཙམ་དུ་གཏུབས། །སྦྱངས་རྟོགས་སྦར་བའི་བདུད་རྩིའི་རྒྱ་མཚོ་ནི། །འཁོར་འདས་ཡངས་ལ་ཁྱབ་པའི་མཆོད་སྤྲིན་གྱུར། །ཨོཾ་ཨཱཿཧཱུྃ་ཧ་ཧོཿཧྲཱིཿ ལན་གསུམ། ཁྱབ་བདག་འཁོར་ལོའི་མགོན་པོ་རྡོ་རྗེ་འཆང་། །རྒྱ་བོད་གྲུབ་ཐོབ་རྩ་བརྒྱུད་བླ་མ་ལ། །འབུལ་ལོ་སྒྲིབ་གཉིས་བག་ཆགས་ཀུན་བྱང་ནས། །གཉུག་མའི་རང་ཞལ་མཐོང་བར་བྱིན་གྱིས་རློབས། ཕཊ་ཕཊ། །བྱ་སྤྱོད་རྣལ་འབྱོར་རྣལ་འབྱོར་བླ་མེད་ཀྱི། །ཡི་དམ་རྒྱལ་བ་ཞི་ཁྲོའི་དཀྱིལ་འཁོར་ལ། །འབུལ་ལོ་དམ་ཚིག་ཉམས་ཆགས་ཀུན་བྱང་ནས། །དངོས་གྲུབ་རྣམ་གཉིས་ཐོབ་པར་བྱིན་གྱིས་རློབས། ཕཊ་ཕཊ། ཕྱོགས་དུས་རྒྱལ་བ་རྒྱལ་བའི་མྱུ་གུ་དང་། །ཉན་ཐོས་རང་རྒྱལ་འཕགས་པའི་ཚོགས་རྣམས་ལ། །འབུལ་ལོ་བསོད་ནམས་ཡེ་ཤེས་ཚོགས་རྫོགས་ནས། །འབྲེལ་ཆད་དོན་དང་ལྡན་པར་བྱིན་
གྱིས་རློབས། །ཕཊ་ཕཊ། །གནས་དང་ཡུལ་དང་དུར་ཁྲོད་རྟག་ཉུལ་བའི། །དཔའ་བོ་མཁའ་འགྲོ་ཤུགས་འགྲོར་བཅས་པ་ལ། །འབུལ་ལོ་རླུང་སེམས་སྣང་བ་དབང་དུ་འདུས། །བདེ་སྟོང་ཡེ་ཤེས་འཕེལ་བར་བྱིན་གྱིས་རློབས། །ཕཊ་ཕཊ། །ཡེ་ཤེས་ལས་དང་འཇིག་རྟེན་སར་བཞུགས་པའི། །རྒྱུད་གསུམ་དམ་ཅན་དྲེགས་བྱེད་འཁོར་བཅས་ལ། །འབུལ་ལོ་ས་ལམ་བར་ཆད་ཞི་བ་དང་། །ཉག་གཅིག་རྩད་ནས་ཆོད་པར་བྱིན་གྱིས་རློབས། །ཕཊ་ཕཊ། དཔལ་མགོན་བདུན་ཅུ་སྡེ་བརྒྱད་དྲགས་པའི་ཚོགས། །སྟོང་གསུམ་ཛམ་གླིང་ཡུལ་རིས་གཞི་གནས་བདག །སོ་སོའི་ཐུགས་ལ་གང་བཞེད་དགྱེས་རྒུར་འབུལ། །འགལ་རྐྱེན་ཀུན་སོལ་དགེ་བའི་སྡོང་གྲོགས་མཛོད། །ཕཊ་ཕཊ། ཐོག་མེད་དུས་ནས་དྲིན་གྱིས་རབ་བསྐྱངས་པའི། །སྐྱེ་བཞི་རྒྱུད་ལྔའི་འགྲོ་བ་ཀུན་ལ་བསྔོ། །ཟག་མེད་མཆོག་གི་བདེ་བས་རྒྱུད་ཚིམས་ནས། །སྒྲིབ་པ་ཀུན་བྱང་མྱུར་དུ་འཚང་རྒྱ་ཤོག །ཕཊ་ཕཊ། ཞེ་སྡང་རང་གཟུགས་ཕ་གདོན་རྒྱལ་པོ་དང་། །འདོད་ཆགས་རང་གཟུགས་མོ་གདོན་བསེན་མོ་དང་། །གཏི་མུག་རང་གཟུགས་མ་ནིང་ཀླུ་གདོན་སོགས། །གདོན་བགེགས་གློ་བུར་ཡེ་འདྲོག་བདག་པོ་དང་། །མཁའ་ལ་རྒྱུ་བའི་ཡི་དྭགས་གདུག་པ་
ཅན། །གནས་གདོན་ལུས་གདོན་འཆི་བདག་བདུད་རྣམས་ལ། །ཤ་ཁྲག་མཆོད་སྦྱིན་ཟད་པ་མེད་པ་བསྔོ། །དགའ་མགུ་ཡི་རངས་བྱང་ཆུབ་སེམས་ལྡན་ཤོག །ཕཊ་ཕཊ། །ཁྱད་པར་ཐོག་མེད་དུས་ནས་ད་ལྟའི་བར། །ཚེ་སྲོག་ལོངས་སྤྱོད་ཁ་རྗེ་དབང་ཐང་གི། བུ་ལོན་ལན་ཆགས་ཤ་མཁོན་ལྡན་རྣམས་ལ། །བསྔོའོ་གནོད་འཚེའི་འབྲེལ་ཐག་ཆོད་པར་ཤོག །ཕཊ་ཕཊ། །གློ་བུར་ལྷགས་པའི་ཁས་ཉན་དབང་ཆུང་བ། །ཡིད་ལུས་འབྱུང་པོ་ཕྲ་མོའི་རིགས་རྣམས་ལ། །ལྷག་མ་ཟག་མེད་བདུད་རྩི་འདི་བསྔོས་པས། །ཐར་པ་མཆོག་གི་གོ་འཕང་ཐོབ་གྱུར་ཅིག །ཕཊ་ཕཊ། །འཁོར་འདས་ཆོས་ཀུན་སྒྱུ་མ་ལྟ་བུ་ལ། །འཁོར་གསུམ་བདེན་པར་མ་གྲུབ་གདོད་ནས་སྟོང་། །སྣང་སྲིད་བྱང་ཆུབ་སེམས་ཀྱི་རོལ་པ་ལ། །གཟུང་འཛིན་མཚན་མར་མ་གྲུབ་དེ་བཞིན་ཉིད། །ཀུན་བརྟག་འགྱུ་བ་དངོས་མེད་ཆོ་འཕྲུལ་ལ། །ལྷ་འདྲེ་གཉིས་སུ་མ་གྲུབ་མཉམ་པ་ཉིད། །གང་ཤར་མ་བཅོས་རང་བྱུང་རིག་པའི་རྒྱན། །ཅི་སྣང་ཆོས་སྐུ་གཉུག་མའི་ཡོ་ལངས་ཏེ། །སྙེམས་ཐག་གཞི་ཐོག་ཆོད་པ་དོན་དམ་གྱི། །གཅོད་ཡུལ་ཕྱག་རྒྱ་ཆེན་པོ་འགྲུབ་གྱུར་ཅིག །ཅེས་གནས་ལུགས་རང་བབ་ཀྱི་ལྟ་བ་སྐྱང་ཞིང་བསྔོ་སྨོན་ཅི་བདེར་བྱའོ། །ཞེས་པ་འདིའང་། ངེས་དོན་བསྟན་པའི་གསལ་
བྱེད་གཙང་པ་མཆོག་སྤྲུལ་རིན་པོ་ཆེ་ཀརྨ་ཀུན་བཟང་བདེ་ཆེན་གཞན་ཕན་གྱི་ཐུགས་བཞེད་ལྟར། འཁྲུལ་རྟོག་གཅོད་པའི་རྣལ་འབྱོར་གྱི་དབང་ཕྱུག་ཁྱི་ཐུལ་ཅན་གྱི་སྐྱེ་བར་གྲགས་པ། ཆོས་རྗེ་ཀུན་མཁྱེན་ཡབ་སྲས་ཀྱི་རྗེས་སློབ་ཀརྨ་ངག་དབང་ཡོན་ཏན་རྒྱ་མཚོས་ཤུགས་མདའ་ཐང་གི་ཆོས་སྒར་དུ་སྤེལ་བ་དགེ་ལེགས་འཕེལ།། །།
ཤོག་སྟོང་།