གནོད་སྦྱིན་ལྷ་མང་གི་འཁྲུལ་འཁོར་བཅའ་སྒྲུབ་ཀྱི་ལག་ལེན་རྣམ་གསལ་དུ་བཀོད་པ་རིན་ཆེན་རྫིང་བུ།
གནོད་སྦྱིན་ལྷ་མང་གི་འཁྲུལ་འཁོར་བཅའ་སྒྲུབ་ཀྱི་ལག་ལེན་རྣམ་གསལ་དུ་བཀོད་པ་རིན་ཆེན་རྫིང་བུ་ཞེས་བྱ་བ་བཞུགས་སོ། །
གནོད་སྦྱིན་ལྷ་མང་གི་འཁྲུལ་འཁོར་བཅང་སྒྲུབ་ཀྱི་ལག་ལེན་རྣམ་གསལ་དུ་བཀོད་པ་རིན་ཆེན་རྫིང་བུ་ཞེས་བྱ་བ། སྦྱིན་པའི་ཕར་ཕྱིན་གཟུགས་སྐུར་བཞེངས། །ལོངས་པའི་འཇིགས་སེལ་ནོར་བུའི་གཏེར། །བཅོམ་ལྡན་ཛམ་ལར་གུས་བཏུད་ནས། །འཁྲུལ་འཁོར་མན་ངག་གསལ་བཀོད་བྱ། །དེའང་འཇམ་དཔལ་དཔའ་བོ་གཅིག་གྲུབ་ཀྱི་རྒྱུད་དང་། དེའི་འགྲེལ་པ་འཕགས་པ་ཀླུ་སྒྲུབ་གྱིས་མཛད་པ་དགེ་བའི་འདོད་འཇོ་ལས་གསུངས་པའི་གནོད་སྦྱིན་ཡབ་ཡུམ་རྣམས་ཀྱི་འཁྲུལ་འཁོར་སྒྲུབ་པའི་ཚུལ་བཤད་པ་ལ་གསུམ། ལུགས་མང་སྤྱིར་བསྟན། ལག་ལེན་བྱེ་བྲག་ཏུ་བཤད། ཉེར་མཁོའི་རྗེས་གནང་དང་བསྙེན་ཐབས་བཀོད་པའོ། །དང་པོ་ནི། འཇམ་དཔལ་དཔའ་བོ་གཅིག་གྲུབ་ཀྱི་རྒྱུད་ལེའུ་གཉིས་པ་ནས་གནོད་སྦྱིན་ཕོ་དགུ་མོ་དགུ་མེ་སྔགས་དང་
འཁྲུལ་འཁོར་གྱི་བྱ་བ་དེའི་དགོས་པ་བཅས་བསྟན་པའི་དགོངས་དོན། འཕགས་པ་ཀླུ་སྒྲུབ་ཀྱིས་དགེ་བའི་འདོད་འཇོར་གསལ་བར་བཀྲལ་བ་ལྟར་བོད་ཀྱི་མཁས་པ་རྣམས་ཀྱིས་ཕྱག་ལེན་ཆེར་དར་བར་མཛད་ཀྱང་བཞེད་པ་མི་མཐུན་པ་མང་དུ་མཆིས་པ་ལས། བོད་གཞུང་སྔ་ཤོས་ས་སྐྱ་རྗེ་བཙུན་གྲགས་པ་རྒྱལ་མཚན་གྱིས་འཁོར་ལོ་པདྨ་འདབ་བརྒྱད་ཀྱི་ལྟེ་བར་གཙོ་བོ་ཡབ་ཡུམ་སྔགས་འགོ་རྒྱབ་བམ་ནུབ་བསྟན། འདབ་མ་བརྒྱད་ཀྱི་ཕོ་འཁོར་ལ་ཕྱོགས་བཞིར་ཤར་ནས་མ་ི་བྷ་དྲ་སོགས་བཞི། མཚམས་བཞིར་བྱང་ཤར་ནས་ཀི་ལི་མཱ་ལི་སོགས་བཞི། གཉིས་ཀའང་གཡོན་བསྐོར་དང་། མོ་འཁོར་ལ་ཕྱོགས་བཞིར་ཤར་ནས་ཙནྡྲ་ཀཱནྟྲེ་སོགས་བཞི། མཚམས་བཞིར་ཤར་ལྷོ་ནས་སུ་བྷ་དྲ་སོགས་བཞི། གཉིས་ཀ་གཡས་བསྐོར། སྔགས་
མགོ་ཐམས་ཅད་རྒྱབ་ཏུ་བསྟན། སྤེལ་ཚིག་རྒྱ་གཞུང་ནས་དཔེར་བརྗོད་བྱུང་བ། མ་མ་དྷ་ནི་དེ་ཧི་དེ་ཧི་ཞེས་པ་ཙམ་སྭཱ་ཧཱའི་གོང་དུ་བཅུབ། ལུགས་འདིར་མོ་འཁོར་གཙོ་བོར་བྱས་ཏེ་ཕོ་འཁོར་སྟེང་དང་མོ་འཁོར་མགོ་དབུ་རྒྱབ་བསྟན་དུ་འཇོག །འགྲེལ་པ་ལམ་བརྟེན་པའི་རྒྱུད་རྐྱང་ལུགས་ཡིན་ཀྱང་སྐྱོན་བྲལ་ཚད་མར་འཛིན་ཅིང་ངོར་ཆེན་སོགས་དེའི་རྗེས་འབྲང་མཛད། བུ་སྟོན་ཞབས་ཡིག་མགོ་ཕྱིར་བསྟན་སོགས་དེ་ལྟར་ལ་སྟེང་འཁོར་ལྷོ་བྱང་གོ་ལྡོག་མན་ངག་ཏུ་བཞེད་པའི་དགོངས་དོན་ཞྭ་ལུ་པ་རྣམས་མོ་འཁོར་སྟེང་དུ་མཛད། ཡང་བླ་མ་དམ་པས་འབྲི་ལུགས་སྤྱི་ཁྱབ་གྲགས་རྒྱལ་བཞེད་པ་ལྟར་ལ་པད་འདབ་ཀྱི་ལྷ་སྔགས་རྣམས་ཀྱི་དབུ་ནང་དུ་བསྟན། གཙོ་བོ་གཉིས་ཀྱི་དབུ་ཤར་དུ་བསྟན་པར་བཤེད། སྟག་ཚང་ལོ་ཙཱས་འགོད་ཚུལ་སྤྱིར་ཐོག་མར་སྨོས་པ་དེ་ལྟར་ལ་འཁོར་ལོ་གཉིས་ཀའང་ཕྱོགས་བཞིར་ཤར་དང་། མཚམས་བཞིར་ཤར་ལྷོ་ནས་མགོ་བརྩམས་ཏེ་གཡས་བསྐོར་ཁོ་ནས་འགོད་པར་འདོད་ཅིང་དབྱངས་གསལ་རྟེན་སྙིང་རྡོ་རྭ་མེ་རིའང་བསྣན། ལྔ་པ་ཆེན་པོས་འགོད་ཚུལ་རྗེ་བཙུན་གྲགས་པ་དང་དཔལ་ལྡན་བླ་མའི་ལུགས་གང་རུང་འཐད་པར་བཞེད་ཅིང་། རྒྱས་པར་ཡབ་དགུ་ཡུམ་དགུའི་སྐུ་གདུགས་ཀྱི་ཐུགས་ཀར་སོ་སོའི་སྔགས་བྲི། འབྲིང་པོ་སྐུ་གཟུགས་མེད་པའི་སྔགས་ཙམ་དང་། སྡུས་པ་ཛཾ་དགུ་པཾ་དགུ། རྒྱས་འབྲིང་གཉིས་ལ་རྡོ་རྭ་མེ་རིས་བསྐོར་བ། སྤེལ་ཚིག་སྔ་མ་དེའམ། ཆེ་གེ་མོའི་ནོར་དང་འབྲུ་དང་
དཔལ་འབྱོར་ཕུན་སུམ་ཚོགས་པ་ཐམས་ཅད་རྒྱས་པར་མཛད་དུ་གསོལ། །ལ་སོགས་པའི་སྤེལ་ཚིག་སྦྱར་ཚུལ་དང་། རྒྱུད་ལེའུ་གཉིས་པ་ལས། གནོད་སྦྱིན་ཕོ་མོའི་འཁོར་ལོས་བྲིས་ཏེ་ནོར་དང་འབྱོར་པ་སྒྲུབ་པའི་ཆེད་དུ་མོ་གཉིས་ཁ་སྦྱོར་རམ། ཕོ་མོ་ཁ་སྦྱར་བར་གསུངས་ཞེས་རྒྱུད་དོན་དྲང་ཐད་དུ་འགྲེལ་ནས་ཡབ་ཡུམ་སྦྲགས་པའི་འཁྲུལ་འཁོར་དང་། ཡུམ་རྐྱང་ཁ་སྦྱར་གྱི་འཁྲུལ་འཁོར་བསྟན་པའི་ཤུགས་ལས་ཡབ་རྐྱང་ཁ་སྦྱོར་ཡང་བསྟན་པར་བཞེད་དོ། །ཐམས་ཅད་མཁྱེན་པ་མི་བསྐྱོད་རྒྱལ་བ་ཡབ་སྲས་ཀྱིས་བཞེད་པ་ནི་ལུགས་རྙིང་པ་དང་མཐུན་ལ། ཁྱད་པར་གྱི་མན་ངག་ནི་དེ་ལས་ལྷག་པ་སྟེ་འོག་ཏུ་བསྟན་པར་བྱའོ། །གཉིས་པ་ནི། སྤྱིར་རྒྱུད་ལས། ཡབ་ཡུམ་གཉིས་མེད་ཀྱི་དངོས་གྲུབ་བླང་བའི་ཐབས་སུ་བསྙེན་པ་སྔོན་དུ་འགྲོ་བས་སྒྲུབ་པ་དང་། བསྙེན་པ་མེད་ཀྱང་འཁྲུལ་འཁོར་ཙམ་གྱིས་དངོས་གྲུབ་བླང་བའི་ཐབས་གཉིས་སུ་གསུངས་པ་དེང་སང་ཕལ་ཆེར་བྱ་སླ་འདོད་ཆེན་པ་མང་བས་ཕྱི་མ་ལག་ལེན་གཙོར་བྱས་ཀྱང་། སྔགས་པ་རྣམས་ལ་སྔ་མ་དང་སྐྱེ་བོ་ཆོས་ལྡན་སོགས་ཀྱི་ཁྱིམ་དུ་ཕྱི་མ་གཙོར་བཏོན་དགོས་པས་འཆད་པར་འགྱུར་བའི་རྗེས་གནང་ཐོབ་ཅིང་བསྙེན་པ་སོགས་སྔོན་དུ་ཐེམས་པའི་གང་ཟག་གིས་འཁྲུལ་འཁོར་སྒྲུབ་ཅིང་དངོས་གྲུབ་ཀྱི་ལས་ལ་སྦྱོར་དགོས་པ་ནི་ཐམས་ཅད་ལ་མཚུངས་སོ། །དེ་ལ་གཉིས། སྔར་གྲགས་ཀྱི་ཡུལ་དང་། ཁྱད་པར་ཀྱི་ཆན་ངག་བསྟན་པའོ། །དང་པོ་ནི། འཁྲུལ་འཁོར་འབཱི་བ་དང་
སྒྲུབ་པ་ཐམས་ཅད་སྐར་མ་རྒྱལ་ལ་བབས་པའི་ཆེ་བྱ་དགོས་པ་འགྲེལ་པར་བཤད། འཁྲུལ་འཁོར་བྱིན་གཞི་གསེར་དངུལ་རབ། འབྲིང་ཟངས་ཀྱི་བྱང་བུ་གཟོང་རིས་བྱས་ཏེ་ཚ་གསེར་བཏང་བ་དང་། མ་འབྱོར་པའམ་ཆ་གྲངས་རྒྱ་ཤོག་ལ་མཚལ་གྱིས་སྤར་བཏབ་ཀྱང་རུང་། བཀོད་ཚུལ་གོང་སྨས་རྗེ་བཙུན་གྲགས་པའི་བཞེད་པ་ལྟར་ལ། སྐྱེལ་ཚིག །དྷ་ན་ཤྲཱི་ཧི་ཤྲཱི་བྷཱུ་ཏི་པུཥྚི༚་ཀྲ་རུ། ཞེས་སྦྱར་བ་དང་། རྒྱབ་ཏུ་མུ་ཁྱུད་བཞིའི་ནང་མར་དབྱངས་གསལ། དེ་རྒྱབ་རྟེན་སྙིང་རྣམས་ཀྱང་ཡིག་མགོ་ཕྱིར་བསྟན་གཡས་བསྐོར་དུ་བཀོད། དེ་རྒྱབ་རྡོ་རྭ་དང་འོད་ཟེར་པ་ཏྲ་གཡས་སྐོར་དུ་བྲི། སྒྲུབ་ཚུལ་འོག་ནས་བཤར་བའི་ཡབ་ཡུམ་སྦུགས་པའི་འཁྲུལ་འཁོར་ལྟར་ལ། ཕོ་གཙོ་བོར་བྱ་བའི་ལུགས་ཡིན་པས་འཇོག་དུས་དབུ་ནུབ་བསྟན་མོ་འཁོར་སྟེང་དུ་འབྱུང་བར་བྱའོ། །གཉིས་པ་ལ་གཅིག །འཁོར་ལོ་བྲི་བ་དང་། སྒྲུབ་པའོ། །དང་པོ་ནི། རྒྱུད་ཀྱི་དངོས་བསྟན་ཇོ་བོ་ཆེན་པོའི་མན་ངག་དང་། སློབ་དཔོན་ཨ་བྷ་ཡའི་དགོངས་པ་ལྟར་རྗེ་བཙུན་སྒྲོལ་མགོན་ཞབས་ཀྱིས་ཕོ་རྐྱང་མོ་རྐྱང་ཕོ་མོ་སྦྲགས་པ་སྟེ་འཁོར་ལོ་གསུམ་བསྐྱེད་ཆོག་ལོ་པོའི་ཚུལ་བཅས་གསུངས་པའི་ལག་ལན་ནི། རྒྱུད་དོན་འཕགས་པ་ཀླུ་སྒྲུབ་ཀྱིས་བཀྲལ་བ་ཉིད་ཆེས་ཚད་མར་གྱུར་པས་དེའི་དོན་འཕེལ་ལོ་ཙཱ་བ་ཚེ་དབང་ཀུན་ཁྱབ་ཀྱིས་གསལ་བར་མཛད་པ་ལྟར་ན། བྲི་གཞི་གོང་སྨོས་རབ་འབྲིང་ངམ་དར་རས་ལ་གསེར་དངུལ་ཁུ་བས། མུ་ཁྱུད་དང་པོ་ལྟེ་བ་
གཉིས་པ་པདྨ་འདབ་བརྒྱད། གསུམ་པ་རྡོ་རྗེ། བཞི་པ་མེ་དང་བཅས་པའི་ལྟེ་བར། ཨོཾ་སྭཱ་ཧཱ། ཞེས་འགོད་པ་ནི་ཡབ་ཡུམ་གཉིས་ཀར་མཚུངས། འདི་དབུ་ཤར་བསྟན་དུ་བཤད་པ་དོན་ལ་འགལ་བ་མེད་ཀྱང་རྣམ་པ་མི་བདེ་བས་སྔ་མ་རྣམས་ཀྱིས་དགག་སྒྲུབ་མང་བའི་ཕྱིར་ནུབ་བསྟན་བྱས་ན་རུང་། ཡུམ་འཁོར་ལ་ཤར་ནས་གཡོན་བསྐོར་དུ། ཨོཾཔྃསུྃདྷཱྃརི༚ི༚སྭཱྃཧཱྃ། ཞེས་ཡིག་མགོ་ནང་བསྟན་དང་། ཡབ་འཁོར་ལ་ཤར་ནས་གཡས་བསྐོར་དུ། ཛམྲ། བྷྃལྃཛལེནྲྃདྲྃསྭཱྃཧཱྃ། ཞེས་མགོ་ཕྱིར་བསྟན་ཏུ་བཀོད། ཐམས་ཅད་ལའང་ལྟེ་བ་བཞིན་ཏུ། ཨོཾ་དང་སྭཱ་ཧཱ་སྦྱང་ཞིང་ཟླ་ཚེས་ཐིག་ལེ་ནཱ་ད་དང་བཅས་པ་བྱ་བ་ནི་ཡབ་ཡུམ་སྦྲགས་པའི་འཁྲུལ་འཁོར་ཡིན་ལ། ཡུམ་རྐྱང་ཁ་སྦྱོར་ལ་སྟེང་འཁོར་གོང་སྨོས་དང་འོག་འཁོར་ཡིག་མགོ་ཕྱིར་བསྟན་གཡས་བསྐོར། ཡབ་རྐྱང་ཁ་སྦྱོར་ལ་འོག་འཁོར་གོང་སྨོས་དང་སྟེང་འཁོར་ཡིག་མགོ་ནང་བསྟན་དུ་བྱས་པས་འགྲུབ་བོ། །འདིར་ཡུམ་རྐྱང་ཁ་སྦྱོར་རྒྱུད་ནས་དངོས་སུ་གསུངས་པ་ལའང་དགོས་པ་མེད་པར་སྔོན་གྱི་མཁས་པ་ཁ་ཅིག་གིས་བཤད་པ་དེ་དག་མན་ངག་དང་བྲལ་བའི་རྟོག་གེ་རྣལ་པར་འཁྱམས་པ་སྟེ་རྗེས་སུ་འབྲང་བར་མི་བྱ་བར་ལྔ་པ་ཆེན་པོས་གསུངས་པ་དང་། ལུགས་འདི་ནི་གཤིན་རྗེ་གཤེད་སོགས་འཁྲུལ་འཁོར་སྤྱིའི་ལུགས་ཡིན་པར་མ་ཟད་རྒྱུད་འགྲལ་མན་ངག་བརྒྱུད་པ་དང་བཅས་པ་ཞལ་མཐུན་པ་
གཙིགས་སུ་བཟུང་བར་འོས་སོ། །འདིར་རྡོ་རྭ་མེ་རི་འབྲི་བའང་གསང་བ་སྤྱིའི་ལུགས་ཡིན་པ་དང་དགེ་བའི་འདོད་འཇོར་མེའི་དཀྱིལ་འཁོར་བསྒོམ་པར་གསུངས་པའི་རིགས་པས་ངོས་པར་གྲུབ་བོ། །གཉིས་པ་ནི། སྤྱིར་རྗེ་བཙུན་གྲགས་པའི་རྗེས་འབྲང་བྱེད་ན་རབ་གནས་དཔལ་འབྱོར་རྒྱ་མཚོ་ལས་བཤད་པ་བཞིན་བསྒྲུབ་དགོས་པ་ཡིན་ཅིང་། དེའང་སྒྲུབ་ཐབས་བརྒྱ་རྩའི་ཛི་ལའི་སྒྲུབ་ཐབས་རྒྱས་པ་ལས། དཔལ་ལྡན་མགོན་པོ་ཛཾ་བྷ་ལ། །ནོར་རྒྱུན་མ་ལ་འཁྱུད་པ་དང་། །ཞེས་འབྱུང་བ་དང་རྒྱུད་ལས་མོ་འཁོར་གསུངས་པའི་དོན་དང་འབྱོར་པ་ཡིན་ལ། སྐབས་འདིར་རྗེ་བཙུན་སྒྲོལ་མགོན་ཞིབས་ཀྱིས་ལྟ་མང་རྗེས་གནང་གི་སྐབས་སུ། འགའ་ཞིག་འདི་དང་གནོད་སྦྱིན་འཁོར་ལོའི་ལག་ལེན་གཉིས་ཀར་ས་སྐྱ་པ་དང་། བཀའ་གདམས་པ་རྣམས་ལག་ལེན་ཏུ་བྱེད་མཉམ་ཡིན་ཡང་། ཇོ་བོ་རྗེ་ནས་ལ་རྒྱུད་པ་ནི་མ་ཡིན་གྱི། བ་རི་ལོ་ཙཱ་བའི་མན་ངག་ས་སྐྱ་པའི་ལག་ལེན་དེ་བཀའ་གདམས་པས་བརྐུས་ནས། ཇོ་བོ་རྗེ་ལ་ཁ་དཕང་བའོ། །ཞེས་ཟེར་བ་ནི། ས་སྐྱ་པའི་ཕོ་རུས་ལ་བསམ་པའི་བབ་ཆོལ་ཏེ། འདི་ཉིད་ཀྱི་རྒྱུད་བསྒྱུར་བ་བོའི་པཎྜི་ཏ་ཡང་ཇོ་བོ་རྗེ་ཁོ་ན་ལས་གཞན་མེད་པའི་ཕྱིར། ཇོ་བོ་རྗེས་འབྲང་དང་བཅས་པའི་ལག་ལེན་དུ་འབྱུང་བ་ནི། ཆོས་བདག་པོའི་ཚུལ་ཡིན་ལ། དེ་ལས་བརྒྱུད་ནས་རྗེ་བཙུན་ས་སྐྱ་པ་རྣམས་ལས་འོངས་བ་སྟེ། བརྗོད་པ་སྔ་མ་དེ་གཡེམ་མ་མུ་ཅོར་གྱིས་རྒྱལ་ལོ། །ཞེས་པ་དང་
མཚུངས་སོ། །ཞེས་གསུངས་པའི་ཇོ་བོའི་ལུགས་རྙིང་པར་ཡབ་གཙོ་བོ་མཛད་པ་ལྟར་རྗེ་མི་བསྐྱོད་ཞབས་སོགས་ཀྱང་དེ་བཞིན་ཏུ་བཞེད་པ་ནི་ཡབ་ཡུམ་གོ་རིམ་མི་འཁྲུགས་ཤིང་སྔགས་སྤྱི་སྐད་དང་འབྲེལ་བའི་ལེགས་བཤད་དུ་རྒྱལ་དབང་ལྔ་པས་ཀྱང་བསྔགས་པར་མཛད་དོ། །དེས་ན་ལུགས་དེ་ལྟར་ཉམས་སུ་བླང་བ་ལ་གསུམ། སྔོན་འགྲོ། དངོས་བཞི། རྗེས་ཀྱི་བྱ་བའོ། །དང་པོ་འཁོར་ལོ་རབ་ཏུ་གནས་པ་ནི། འོག་ནས་འབྱུང་བའི་བདག་བསྐྱེད་བཟླས་པ་བཅས་སྔོན་དུ་འགྲོ་བས། བྲིས་པའི་འཁོར་ལོ་རྣམས་ལ་སྦྱང་བ་བྱ་ཞིང་གུ་གུལ་གྱིས་འདུག །རྣམ་འཇོམས་ཀྱི་གསུངས་སོགས་ཀྱི་བྱིན་གྱིས་བརླབས་པའི་བུམ་པས་ཁྲུས་གསོལ། སྟེགས་བཟང་པོར་འབུ་དཀར་གཅལ་དུ་བཀྲམ་པ་ལ་བཀོད་དེ། ཨོཾ་སྭ་བྷཱ་བ་སོགས་ཀྱིས། འཁོར་ལོ་མི་དམིགས་ཏེ་སྟོང་པར་གྱུར། སྟོང་པའི་ངང་ལས་རྨ་བྱས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཟླ་བའི་སྟེང་དུ་ཧྲཱིཿལས་པདྨ་ཧྲཱིཿས་མཚན་པ་ཡོངས་སུ་གྱུར་པ་ལས་འོད་དཔག་མེད་སྐུ་མདོག་དམར་པོ་ཕྱག་གཉིས་མཉམ་གཞག་གི་ཕྱག་རྒྱ་ཅན་དར་དང་རིན་པོ་ཆེས་བརྒྱན་པ། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་སེམས་དཔའ་བཛྲ་སཱ་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿས་གཉིས་སུ་
མེད་པར་བསྟིམ། སླར་ཡང་ཐུགས་ཀ་ནས་འོད་ཟེར་འཕྲོས། དབང་གི་ལྷ་རིགས་ལྔ་འཁོར་བཅས་བཛྲ་ས་མཱ་ཛཿསྤྱན་དྲངས། ཨརྒྷཾ་ནས། ཤབྡའི་བར་གྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། དེ་རྣམས་ཀྱིས། ཇི་ལྟར་བལྟམས་པ་སོགས་ཀྱིས། དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་རང་འདྲའི་རིགས་བདག་གིས་དབུར་བརྒྱན་པར་བསམ། ཨོཾ་བཛྲ་ཨརྒྷཾ་ནས། ཤབྡའི་བར་གྱིས་མཆོད། །འདོད་ཆགས་རྡོ་རྗེ་ཆོས་ཀྱི་སྐུ། །ཀུན་རྟོག་ཡེ་ཤེས་ངོ་བོ་ཉིད། །ཏིང་འཛིན་ཆེན་པོའི་ཕྱག་རྒྱ་ཅན། །ཕྱག་འཚལ་སྣང་བ་མཐའ་ཡས་ལ། ཞེས་བསྟོད། འོད་དཔག་མེད་ཞུ་བ་ལས་བྱུང་བའི་འཁོར་ལོར་བསམས་ལ། འཁོར་ལོའི་སྔགས་རྣམས་ཅི་ནུས་དང་རྟེན་སྙིང་བརྒྱ་ལ་སོགས་མང་དུ་བཟླ་ཞིང་མེ་ཏོག་འཐོར་ཞིང་ཤིས་པ་བརྗོད། དེ་ནས་བྲི་གཞི་རིན་པོ་ཆེའི་བྱང་བུ་ཡིན་ན་དྲི་བཟང་རིན་ཆེན་ཕྱེ་མ་དང་། ཕོ་འཁོར་ལ་ཐབས་ཀྱི་རྫས་མར། མོ་འཁོར་ལ་ཤེས་རབ་ཀྱི་རྫས་སྦྲང་དང་ཀ་ར་རྣམས་སྦྱར་བས་འཁོར་ལོ་གཉིས་ཀའི་ལྷ་གནས་རྣམས་སུ་ཐིག་ལེ་བྱ། ཤོག་གུ་ཡིན་ན། དྲི་བཟང་སོགས་ལྟེ་བ་དང་མར་སྦྲང་གྱིས་མཐའ་ནས་ཅུང་ཟད་བསྐུས་ཏེ། ཡབ་ཡུམ་རྐྱང་པ་དང་
སྤྲགས་མ་སོ་སོར་ཁ་སྦྱར་ཏེ་དར་སེར་པོའི་ན་བཟས་ཀླུབས། སྐུད་སེབ་གྱིས་རྒྱ་གྲམ་དུ་ནུབ་པར་བཅིང་། གསུམ་ཀའང་དབུས་ཀྱི་ཡིག་མཇུག་མདུན། རྐྱང་པ་གཉིས་སྟེང་འཁོར་འོག་འཁོར་མ་ནོར་བ་དེང་ལ་བ་ཡུམ་སྦྲགས་མ་ལ་མོ་སྟེང་ཕོ་འོག་ཏུ་བྱས་པའི་མཚན་མ་སྐུད་ལྷག་སྟེང་ངོས་སུ་མདུད་པ་བྱའོ། །གཉིས་པ་ནི། སྟེགས་བུ་གྲུ་བཞི་དང་སེར་པོས་བཀབ་པའི་ཁར་རིན་པོ་ཆེའི་སྣོད་གཙང་མ་དཀར་མངའ་འབྲུ་སོགས་ཀྱིས་བཀང་བའི་དབུས་སུ་གོང་གི་ཡབ་ཡུམ་སྦྲགས་པའི་འཁྲུལ་འཁོར་དབུས། ཡབ་རྐྱང་གཡས། ཡུམ་རྐྱང་གཡོན་ཏུ་བཞག །སྟེང་དུ་དར་སེར་པོའི་གུར་ཕུག །མདུན་ཏུ་གཏོར་ཟླུམ་དཀར་དམར་ཁ་ཟས་ཀྱིས་སྤུངས་པ་དང་ཆུ་གཉིས་ཉེར་སྤྱོད་བཤམ། སྒྲུབ་པ་པོ་ཁ་བྱང་དུ་ཕྱོགས་ཏེ་དཀྱིལ་འཁོར་དར་ཞལ་སྤྲོད་དུ་འཁོད་ལ། སངས་རྒྱས་ཆོས་དང་ཚོགས་ཀྱི་མཆོག་སོགས་སྐྱབས་སེམས་ལན་གསུམ་སྔོན་དུ་འགྲོ་བས། རང་གི་ཐུགས་ཀ་ནས་འོད་ཟེར་འཕྲོས་པས་མདུན་གྱི་ནམ་མཁའི་གནས་སུ་ཕྱོགས་བཅུ་དུས་གསུམ་གྱི་སངས་རྒྱས་སྲས་དང་བཅས་པ་ཐམས་ཅད་བཛྲ་ས་མཱ་ཛཿས་སྤྱན་དྲང་། ཨོཾ་བཛྲ་ཨརྒྷཾ། པཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱཱ། ཤབྡ་པྲ་ཏཱིཙྪ་སྭཱ་ཧཱ། ཞེས་པས་མཆོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་
བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ཀུན་བསྒྲུབ་བྱའི་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་ཏུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པའི་རྒྱུན་བཤགས་བྱ། ཛཿཧཱུྃ་བྃ་ཧོཿས་ཚོགས་ཞིང་རྣམས་རང་ལ་བསྟིམ། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། བདག་བསྐྱེད་གང་ཡང་རུང་བས་ཆོག་ཀྱང་འདིར་འབྲེལ་ཆགས་པའི་དབང་གིས་ཕྱག་རྡོར་ཞི་བ་བྱེད་ན། ཨོཾ་སྭ་བྷཱ་ཝ་ས་སྟོང་པར་སྦྱང་། སྟོང་པའི་ངང་ལས་ཧཱུྃ་ལས་བྱུང་བའི་སྲུང་འཁོར་གྱི་དབུས་སུ་ཉི་མ་ལ་གནས་པའི་ཧཱུྃ་སྔོན་པོ། དེ་ལས་འོད་འཕྲོས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས། རང་ཉིད་གསང་བའི་བདག་པོ་ཕྱག་ན་རྡོ་རྗེ་སྐུ་མདོག་སྔོན་པོ་ནམ་མཁའི་མདངས་ཅན། ཞི་ཞིང་འཛུམ་ལ་འགྱིད་བག་དང་ལྡན་པ། རིན་པོ་ཆེའི་བྲོག་ཞུ་གསོལ་པ། མི་བསྐྱོད་པ་གཙོ་བོར་གྱུར་པའི་རིགས་ལྔས་དབུར་བརྒྱན་པ། ཕྱག་
གཡས་པས་ཐུགས་ཀར་འབར་བའི་རྡོ་རྗེ་གསོར་བའི་ཚུལ་གྱིས་འཛིན་ཅིང་གཡོན་གདན་ལ་བརྟེན་པ། ན་བཟའ་མཆོག་དང་རྒྱན་ཐམས་ཅད་ཀྱིས་བརྒྱན་པ། རབ་ཏུ་བཞད་ཅིང་རོལ་པའི་སྟབས་ཀྱིས་བཞུགས་པ། ཟླ་བའི་འོད་ཀྱི་རྒྱ་བ་ཡོལ་ཅན་ནོ། །དེའི་དྲུང་དུ་བདུད་རྩི་འཁྱིལ་པ་སྔོ་སངས་ཁྲོ་བོའི་ཆ་བྱད་རྫོགས་ཤིང་དགྲ་སྟྭ་འཛིན་པའོ། །རང་གི་སྙིང་གའི་འོད་ཟེར་གྱིས་ཡེ་ཤེས་པ་སྤྱན་དྲངས་བཛྲ་ས་མཱ་ཛཿ ཛཿཧཱུྃ་བྃ་ཧོཿ དམ་ཚིག་པ་དང་གཉིས་སུ་མེད་པར་གྱུར། སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀར་ཟླ་བ་ལ་སྔགས་ཀྱི་ཕྲེང་བ་གསལ་བར་གྱུར། ན་མོ་བཛྲ་པཱ་་ཡེ། མ་ཧཱ་བཛྲ་པྲ་ཏིཥྛི་ཏཱ་ཡ། སརྦ་ཏ་ཐཱ་ག་ཏ་ཤ་རཱི་རཾ་ཨནྟ་རྒ་ཏཱ་ཡ། བཛྲ་ཤ་རཱི་རཾ། མ་ཀུ་རུ་བཛྲ་ཨ་དྷིཥྛ་ན་སྭཱ་ཧཱ། ཞེས་བཟླས་པ་ཅི་འགྲུབ་བྱ། གནས་ཡོ་བྱིན་རླབས་ནི། ཨ་མྲྀ་ཏས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་གནས་ཁང་བྷྲཱུྃ་ལས་ཐར་པ་ཆེན་པོའི་གཞལ་ཡས་ཁང་པའི་དབུས་སུ། ཨ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ལས་མཆོད་རྫས་རྣམས་དྭངས་ཤིང་ཐོགས་པ་མེད་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་རོལ་མོ་ལྟ་བུ་བསམ་གྱིས་མི་ཁྱབ་པས་ནམ་མཁའི་ཁམས་གང་བར་བསམ་ཞིང་།
ཨོཾ་བཛྲ་ཨརྒྷཾ་ཨཱཿཧཱུྃ། ནས་ཤབྡའི་བར་དང་། ཨོཾ་བཛྲ་སྥ་ར་་ཁྃ། དེ་ནས་མདུན་བསྐྱེད་ལ་ལྔ། དམ་ཚིག་པ་བསྐྱེད་པ། ཡེ་ཤེས་པ་བསྟིམ་པ། མཆོད་བསྟོད། བཟླས་པ། ཐུན་མཚམས་ཀྱི་བྱ་བའོ། །དང་པོ་ནི། བསང་སྦྱང་། སྟོང་པའི་ངང་ལས་ཧཱུྃ་ཡིག་ལས་བྱུང་བའི་སྲུང་འཁོར་གྱི་དབུས་སུ། པྃ་ལས་གསེར་གྱི་པདྨ་འདབ་མ་བརྒྱད་པ། དེའི་ལྟེ་བར་ཟླ་བ་ལ་ཛི་ཡིག་གསེར་གྱི་མདོག་ཅན་ལས་སྐྱེས་པའི་བཅོམ་ལྡན་འདས་ཛམྦྷ་ལ་གསེར་གྱི་མདོག་ལྟ་བུ་ཐུང་ཞིང་ལྟོ་བ་འཕྱང་བ་རྒྱན་ཐམས་ཅད་ཀྱིས་བརྒྱན་པ། གཡོན་པ་དང་གཡས་པའི་ཕྱག་དག་གིས་ན་ཀུ་ལེ་དང་བཱི་ཛ་པཱུ་ར་ཀ་བསྣམས་པ། ཨུཏྤ་ལའི་ཕྲེང་བས་དོ་ཤལ་མཛད་པ། དེའི་པང་དུ་པྃ་ལས་སྐྱེས་པའི་ནོར་རྒྱུན་མ་སོར་མོས་འཁྱུད་པ། འདབ་མ་བརྒྱད་ལ་ཟླ་བ་ལ་གནས་པའི་ཤར་དུ་ཛྃམ་ལས་ནོར་བུ་བཟང་པོ་ལ་ཨོཾ་ལས་སྐྱེས་བའི་ཟླ་ཤེལ་མས་འཁྱུད་པ། ལྷོ་རུ་ལྃ་ལས་གང་བ་བཟང་པོ་ལ་སུྃ་མྲ་ལས་སྐྱེས་པའི་སྦྱིན་མས་འཁྱུད་པ། ནུབ་ཏུ་ལེནྲྃ་ཡིག་ལས་ནོར་སྦྱིན་ལ་རི༚་ལས་བྱུང་བའི་སྦྱིན་བཟང་མས་འཁྱུད་པ། བྱང་དུ་སྭཱྃ་ལས་རྣམ་ཐོས་སྲས་ལ་སྭཱ་ལས་སྐྱེས་པའི་འཕགས་མས་འཁྱུད་པ། ཤར་ལྷོར་བྷྃ་ལས་སྐྱེས་པའི་རོལ་པའི་ཕྲེང་ཅན་དང་། པྃ་ལས་སྐྱེས་པའི་རབ་བཟང་
མ་བརྩེ་བ། ལྷོ་ནུབ་ཏུ་ཛྃ་ལས་མ་ནེ་འཁྱིལ་པ་ལ་དྷྃ་ལས་སྐྱེས་པའི་སྦས་མས་འཁྱུད་པ། ནུབ་བྱང་དུ་དྲྃ་ལས་ཞལ་གྱི་དབང་པོ་ལ་ི༚་ལས་སྐྱེས་པའི་ལྷའི་ཕུད་མེད་ཀྱིས་འཁྱུད་པ། བྱང་ཤར་དུ་ཧཱ་ལས་སྐྱེས་པའི་སྤྱོད་པའི་དབང་པོ་ལ་ཧཱ་ལས་སྐྱེས་པའི་མཆོ་ལྡན་མས་འཁྱུད་པ། ཡབ་ཡུམ་དེ་རྣམས་སྐུ་མདོག་གསེང་བཙོ་མ་ལྟར་རབ་ཏུ་འབར་བ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཡབ་རྣམས་གསུས་པ་འཕྱང་ཞིང་རོལ་པའི་སྟབས་ཀྱིས་ནོར་བུ་འབར་བ་སྐྱུགས་པའི་གཏེར་གྱི་གདན་ལ་བཞུགས་པ། གཡས་མཆོག་སྦྱིན་གྱི་མཐིལ་ན་བཱི་ཛ་པཱུ་ར་ཀ་དང་གཡོན་པས་གཏེར་གྱི་ནེའུ་ལེ་འཛིན་པ། ཡུམ་རྣམས་གཡས་མཆོག་སྦྱིན་གྱི་མཐིལ་ན་པི་ཛ་པཱུ་ར་ཀ་དང་གཡོན་འབྲས་གྱི་སྙེ་མ་བསྣམས་པ། བུད་མེད་སྒྱུ་མའི་ང་རྒྱལ་གྱིས་འགྱིང་བ། དེ་དག་གི་གཡས་ཕྱོགས་སུ་པྃ་ལས་གསེར་གྱི་འདབ་མ་བརྒྱད་པ་དེའི་ལྟེ་བར་ཟླ་བ་ལ་ཛཾ་ཡིག་གསེར་གྱི་མདོག་ཅན་ལས་སྐྱེས་པའི་ཛཾ་ལྷ་ལ་གསེར་གྱི་མདོག་ལྟ་བུ་ཐུང་ཞིང་ལྟོ་བ་འཕྱར་བརྒྱན་ཐམས་ཅད་ཀྱིས་བརྒྱན་པ། གཡོན་པ་དང་གཡས་པའི་ཕྱག་དག་གིས་ན་ཀུ་ལ་དང་བཱི་ཛ་པཱུ་ར་ཀ་བསྣམས་པ། ཨུཏྤ་ལའི་ཕྲེང་བས་དོ་ཤལ་མཛད་པ། འདབ་
མ་བརྒྱད་ལ་ཟླ་བ་ལ་གནས་པའི་ཤར་དུ་ཛྃམ་ལས་ནོར་བུ་བཟང་པོ། ལྷོར་ལྃ་ལས་གང་བ་བཟང་པོ། ནུབ་ཏུ་ལེནྃ་ལས་ནོར་སྦྱིན། བྱང་དུ་སྭཱྃ་ལས་རྣམ་ཐོས་སྲས། ཤར་ལྷོར་བྷྃ་ལས་རོལ་པའི་ཕྲེང་ཅན། ལྷོ་ནུབ་ཏུ་ཛྃ་ལས་མ་ནེ་འཁྱིལ་པ། ནུབ་བྱང་དུ་དྲྃ་ལས་ཞལ་གྱི་དབང་པོ། བྱང་ཤར་དུ་ཧཱཾ་ལས་སྤྱོད་པའི་དབང་པོ་རྣམས་སྐུ་མདོག་གསེར་བཙོ་མ་ལྟར་འབར་བ་དང་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། གསུས་པ་འཕྱང་ཞིང་རོལ་པའི་སྟབས་ཀྱིས་གཏེར་གྱི་གདན་ལ་བཞུགས་པ། ཕྱག་གཡས་མཆོག་སྦྱིན་གྱི་མཐིལ་ན་བཱི་ཛ་པཱུ་ར་ཀ་དང་། གཡོན་པས་གཏེར་གྱི་ནེའུ་ལེ་འཛིན་པ། གཡོན་ཕྱོགས་སུ་པཾ་ལས་གསེར་གྱི་པདྨ་འདབ་མ་བརྒྱད་པ་དེའི་ལྟེ་བར་ཟླ་བ་ལ་པྃ་ཡིག་གསེར་གྱི་མདོག་ཅན་ལས་སྐྱེས་པའི་ནོར་རྒྱུན་མ་གསེར་གྱི་མདོག་ཅན། འདབ་མ་བརྒྱད་ལ་ཤར་དུ་ཨྃ་ལས་ཟླ་ཤེལ་མ། ལྷོ་རུ་སུྃ་ལས་སྦྱིན་མ། ནུབ་ཏུ་རི༚་ལས་སྦྱིན་བཟང་མ། བྱང་དུ་སྭཱྃ་ལས་འཕགས་མ། ཤར་ལྷོར་བྷཾ་ལས་རབ་བཟང་མ། ལྷོ་ནུབ་ཏུ་དྷཱཾ་ལས་སྦས་མ། ནུབ་བྱང་དུ་ི༚་ལས་ལྷའི་བུད་མེད། བྱང་ཤར་དུ་ཧཱྃ་ལས་མཆོ་ལྡན་མ་རྣམས་སྐུ་མདོག་གསེར་བཙོ་མ་ལྟར་རབ་ཏུ་འབར་བ། དར་དང་རིན་པོ་ཆེའི་རྒྱན་ཐམས་
ཅད་ཀྱིས་རབ་ཏུ་བརྒྱན་པ། རོལ་པད་སྟབས་ཀྱིས་ནོར་བུ་འབར་བ་སྐྱུགས་པའི་གཏེར་གྱི་གདན་ལ་བཞུགས་པ། གཡས་ཀྱི་མཆོག་སྦྱིན་གྱི་མཐིལ་ན་བཱི་ཛ་པཱུ་ར་ཀ་དང་། གཡོན་ཐུགས་ཀར་འབྲས་ཀྱི་སྙེ་མ་བསྣམས་པ་བུད་མེད་སྒྱུ་མའི་ང་རྒྱལ་གྱིས་འགྱིད་བ། འདི་ནི་འཁྲུལ་འཁོར་གསུམ་པོ་དཀྱུས་གཅིག་ཏུ་སྒྲུབ་པ་སྟབས་བདེ་བ་དང་། རྗེས་གནང་ལའང་འདི་ལྟར་བསྐྱེད་དགོས་པས་བཀོད་པ་ཡིན་གྱི། སོ་སོར་བསྒྲུབ་པར་སྤྲོན་ཐོག་མར་ཡབ་ཡུམ་སྦྲགས་མ་དང་། དེ་ནས་སྲུང་འཁོར་གྱི་དབུས་སུ་ཞེས་པའི་འཕྲོས། ཡབ་རྐྱང་དང་ཡུམ་རྐྱང་སོ་སོར་སྦྱར་བ་དང་མཆོད་བསྟོད་སོགས་ལའང་རྣམ་དབྱེ་ཕྱེད་པར་བྱའོ། །ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་དང་རང་རང་གི་ས་བོན་གྱིས་མཚན་པའོ། །གཉིས་པ་ནི། བདག་མདུན་གྱི་ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་གནས་ནས་འཕགས་པ་ཛཾ་བྷ་ལ་ཡབ་ཡུམ་ལ་གནོད་སྦྱིན་ནོར་ལྷའི་ཚོགས་ཀྱིས་བསྐོར་བ་སྤྱན་དྲངས། བཛྲ་ས་མཱ་ཛཿ ཞེས་སྤྱན་དྲངས། ཨོཾ་བཛྲ་ཨརྒྷ་པྲ་ཏཱིཙྪ་སྭཱ་ཧཱ། པ་དྱཾ་སོགས། ཨོཾ་བཛྲ་པུཥྤེ་ཨཱཿཧཱུྃ་སོགས་ཀྱིས་མཆོད། ཛཿཧཱུྃ་བྃ་ཧོཿ མདུན་བསྐྱེད་ལ་གཉིས་སུ་མེད་པར་ཐིམ། སླར་ཡང་རང་གི་སྙིང་གའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་
ལྔ་འཁོར་བཅས་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས་ལ། ཨོཾ་སརྦ་ཏ་ཐཱ་ག་ཏ་པཉྩ་གུ་ལ་ས་པ་རི་ཝཱ་ར་སྦྱང་བའི། ཨརྒྷཾ་སོགས་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་འདི་རྣམས་ལ་མངོན་པར་དབང་བསྐུར་དུ་གསོལ། །ཞེས་གསོལ་བ་བཏབ་པས། ཇི་ལྟར་བལྟམས་པ་སོགས་ནས། ཤྲཱི་ཡེ་ཧཱུྃ་ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དང་། ཆུའི་ལྷག་མ་ཡར་ལུད་པ་ལས་ཐམས་ཅད་ལ་རིན་ཆེན་འབྱུང་ལྡན་གྱིས་དབུར་བརྒྱན། གསུམ་པ་ནི། ཐལ་མོ་སྦྱར་ཏེ། འཇིག་རྟེན་ཁམས་འདིའམ་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །ནོར་ལྷ་འཁོར་དང་བཅས་ལ་འབུལ། །བཞེས་ནས་དཔལ་འབྱོར་རྒྱས་པར་མཛོད། །ཨོཾ་བ་སུ་དེ་བ་མཎྜལ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡ་ཨཱཿཧཱུྃ། ཞེས་དང་། དེ་བཞིན་ཏུ། ཞབས་བསིལ་དང་། མེ་ཏོག་སོགས་ནས། རོལ་མོའི་བར་འདོན་པ་བསྒྱུར་ལ་དབུལ་ཞིང་། དྷརྨ་ར་ི་ཏ་སོགས་བརྗོད། སྤྲོ་ན། རྩིབས་སྟོང་ལྡན་པའི་གསེར་གྱི་འཁོར་ལོ་སོགས། །རྒྱ་ཆེན་བསོད་ནམས་དཔལ་ལས་ལེགས་གྲུབ་པ། །མི་ཡི་དབང་པོའི་རིན་ཆེན་སྣ་བདུན་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་རྩོལ། །སྔགས་
མགོ་སྔར་ལྟར་ལ། སཔྟ་རཏྣ་པཱུ་ཛི་ཏེ་ཧཱུྃ། གཡུལ་ལས་རྒྱལ་བར་བྱེད་པའི་རལ་གྲི་སོགས། །བསོད་ནམས་དུ་མའི་མཐུ་ཡིས་ལེགས་བསྐྱེད་པའི། །ས་བདག་ཉེ་བའི་རིན་ཆེན་སྣ་བདུན་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། སྔགས་མཐར། སཔྟ་ཨུ་པ་རཏྣ་པཱུ་ཛི་ཏེ་ཧཱུྃ། ཡིད་འོང་གཟུགས་དང་རྣ་བར་སྙན་སྒྲ་སོགས། །བསོད་ནམས་དུ་མའི་མཐུ་ཡིས་ལེགས་བསྐྱེད་པའི། །མཐོ་རིས་འགྲོ་བའི་འདོད་ཡོན་རྣམ་ལྔ་འབུལ། །བཞེས་ནས་དཔལ་འབྱོར་རྒྱས་པའི། སྔགས་མཐར། པཉྩ་ཀཱ་མ་གུ་་པཱུ་ཛི་ཏེ་ཧཱུྃ། ཐུབ་པས་བྱིན་བརླབས་མེ་ལོང་སོགས་དང་ནི། །སྐུ་ཡི་ཆ་ཤས་དབྱིབས་མཚོན་དཔལ་བེའུ་སོགས། །བཀྲ་ཤིས་སྒྲུབ་པའི་རྫས་དང་རྟགས་བརྒྱད་འབུལ། །བཞེས་ནས་དཔལ་འབྱོར༴ སྔགས་མཐར། མངྒ་ལ་ཨཥྚ་དྲ་བྱ་ཙིཧྞ་པཱུ་ཛི་ཏེ་ཧཱུྃ། །ཞེས་པའི་སྔགས་རྣམས་ལ་ནམ་མཁའ་མཛོད་ཀྱི་ཕྱག་རྒྱ་བྱ་ཞིང་མཆོད། རྡོ་རྗེ་དྲིལ་བུ་འཛིན་པས། གང་སྔོན་སྦྱིན་པ་རྒྱ་མཚོའི་དགེ་བསགས་པ། །ཚེ་དང་ནོར་དང་མཐུ་ཡི་དཔལ་བརྙེས་ནས། །སྒྲུབ་པ་པོ་ལ་དབྱིག་གི་ཆར་འབེབས་པའི། །ནོར་སྦྱིན་ཡབ་ཡུམ་འཁོར་དང་བཅས་ལ་བསྟོད། །འགྲོ་ལ་དམིགས་མེད་ཐུགས་རྗེ་ཡིས། །ཐབས་མཁས་རང་བཞིན་སྐུ་སྤྲུལ་པ། །
གནོད་སྦྱིན་ཕོ་མོའི་ཚོགས་རྣམས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཅེས་སྤྱིར་བསྟོད། བྱེ་བྲག་ཏུ། སྤྲོ་ན་ཛཾ་བྷ་ལའི་མཚན་བརྒྱ་རྩ་བརྒྱད་པ་དང་། ཛཾ་ལྷའི་བསྟོད་པ་ནི། ལྷ་དང་ལྷ་མིན་དྲི་ཟ་མིའམ་ཅི་རྣམས་ཀྱི། །ཅོད་པན་འོད་ཀྱིས་ཞབས་ཀྱི་འཁྲི་ཤིང་གསལ་མཛད་པ། །བྱང་ཆུབ་མཆོག་ཏུ་ངེས་མཛད་གནོད་སྦྱིན་དབང་ཕྱུག་ལ། །སེམས་ཅན་རྣམས་ལ་སྨན་པའི་བསམ་པས་བདག་གིས་གསོལ། །གང་ཞིག་བརྩེ་བའི་བདག་ཉིད་བྱང་ཆུབ་སྦྱིན་མཛོད་ཁྱོད། །སྙིང་རྗེའི་རྩེ་བ་སེམས་ཅན་དོན་ཏུ་རབ་ཏུ་གྲགས། །མགོན་ཁྱོད་སེམས་ཅན་རྣམས་ལ་བརྩེ་བ་མི་མཛད་ན། །ཁྱོད་ཀྱིས་སངས་རྒྱས་དྲན་པར་གང་གིས་གྱུར་ཏེ་འཚལ། །ཤིན་ཏུ་མི་བཟད་དབུལ་བའི་སྡུག་བསྔལ་ནང་དུ་ནི། །འགྲོ་རྣམས་ལྷུང་བ་ཁྱོད་ཀྱིས་མཐོང་བར་མ་གྱུར་ཏམ། །རིན་ཆེན་གཏེར་ཆེན་རྣམས་ཀྱི་མཚན་ནས་བཟུང་ནས་ཀྱང་། །ཁྱོད་ཀྱི་ཆུ་བོ་ཡང་ནི་རྫིང་གིས་བཅིང་པར་མཛོད། །ཤིན་ཏུ་དབུལ་བའི་བྱིན་ཟ་མི་བཟད་དྲག་པོ་ཡིས། །འགྲོ་བ་གང་ཞིག་ཉིན་དང་མཚན་དུ་སྲེག་པར་བྱེད། །བརྩེ་བ་ཉིད་ཀྱིས་སེར་སྣ་རྣམ་པར་སྤོངས་མཛོད་ལ། །རིན་ཆེན་བདུད་རྩིའི་ཆར་གྱི་ཆར་རྒྱུན་དྲག་ཏུ་ཕོབ། །ཁྱོད་ནི་དགོད་པས་བརྒྱ་བྱིན་གྱི་ནི་རྒྱལ་སྲིད་དང་། །སྤྱན་ཟུར་ཙམ་
གྱིས་ཁྱབ་མཇུག་གི་ནི་དཔལ་མོ་དང་། །མཉེས་པས་དབང་ཕྱུག་གི་ནི་གངས་རིའི་གནས་ཀྱང་ཐོབ། །མགོན་པོ་སྡུག་ཕོངས་མགྲོན་བུ་ཙམ་ཡང་མི་སྟེར་རམ། །འགྲོ་བའི་དབང་ཕྱུག་རྣམས་ལ་དཔག་མེད་བདེ་བ་རྣམས། །རྟག་ཏུ་ཁྱོད་སྟེར་སྡུག་བསྔལ་ཅན་ལ་དེ་ལྟར་མིན། །ཁྱོད་ཀྱིས་སྔོན་མ་མཐོང་བའི་སྙིང་རྗེའི་ཡུལ་གྱུར་པའི། །དབུལ་བའི་སྡུག་བསྔལ་ཅན་ལ་ཇི་ལྟར་ཁྱོད་འཇིགས་སམ། །ནོར་གྱིས་ནོར་སློང་གུས་ལྡན་རྣམས་ལ་ཁྱོད་འགེངས་ཀྱི། །ཡི་དྭགས་སྐལ་མེད་སྡིག་བྱས་རྣམས་ལ་ཁྱོད་མིན་ཞིང་། །ནོར་གཏོང་ནོར་གྱི་ནོར་ལྡན་ཕལ་ནི་འཛིན་གྱུར་ཏེ། །མགོན་པོ་སློང་བའི་ཚོགས་ནི་ངེས་པར་སྤོང་བྱེད་དམ། །གལ་ཏེ་ཁྱོད་ཀྱིས་ནོར་གཏོང་རྣམས་ལ་ཁྱོད་ཀྱིས་སྟེང་། །སྐྱེ་བོ་ཚོགས་ངན་རྣམས་ལ་ཇི་ལྟར་ཁྱོད་འཇིགས་སམ། །རབ་ཏུ་འབད་པས་ངེས་པར་སྨྲ་བ་དེ་ཡིས་མཆོག །གནོད་སྦྱིན་རྒྱལ་པོ་བདག་གིས་གསོལ་བ་གསན་ཏུ་གསོལ། །རབ་ཏུ་འབད་བྱས་དེ་འདྲའི་ནོར་དང་ལྡན་གྱུར་ན། །ཇི་ལྟར་དབུལ་བའི་སྒྲ་ནི་ཐོས་པར་མ་གྱུར་ཅིག །དབུལ་པོའི་མེ་ནི་རབ་ཏུ་འབར་བས་འགྲོ་བ་རྣམས། །སྲེག་པར་ངས་མཐོང་ཡིད་ཀྱིས་ངོ་མཚར་ཉིད་དུ་གྱུར། །གང་ཞིག་བདག་གིས་སྨྲས་པའི་ཚིག་རྩུབ་ཚིག་རྣམས་ནི། །ཆུ་ཡི་དབང་
པོས་བརྩེ་ཕྱིར་འདི་རྣམས་བཟོད་པར་མཛོད། །གང་ཞིག་བསྟོད་པ་འདི་ཡིས་ནི། །རྟག་ཏུ་འབད་པས་ཛཾ་ལར་བསྟོད། །དེས་ནི་དབུལ་པོར་མི་འགྱུར་ཞིང་། །ཤིན་ཏུ་མི་གཡོའི་དཔལ་ཐོབ་ཤོག །མི་དབང་ཉི་མ་རྣམ་གནོན་གྱིས་མཛད་པའོ། །ནོར་རྒྱུན་མའི་བསྟོད་པ་ནི། །ཀྱེ་མ་བུམ་པ་རིན་ཆེན་གཏེར་ལྡན་སྟེང་། །དེ་སྟེང་སྐྱོན་བྲལ་ཉི་མའི་དཀྱིལ་འཁོར་ལ། །གདོད་ནས་དག་པས་སྐུ་མདོག་གསེར་ལྟ་བུ། །མ་བཅོས་རང་བཞིན་བྱིས་པའི་གཟུགས་འདྲ་བ། །སྙན་མགུར་ཕྱག་ཞབས་རིན་ཆེན་ཕྲེང་བས་བརྒྱན། །ཟླ་རྒྱས་ལྟར་མཛེས་འཕགས་མའི་སྐུ་ལ་འདུད། །བརྩེ་ལྡན་སྦྱིན་པ་གྲུབ་པའི་ཚུལ་མངའ་བ། །པདྨའི་ཞལ་མངའ་འགག་མེད་སེང་གེའི་སྒྲས། །འགྲོ་བའི་སྡུག་བསྔལ་མ་ལུས་སེལ་བྱེད་མ། །དཔལ་ལྡན་ལྷ་མོ་ཁྱོད་འདྲའི་གསུང་ལ་འདུད། །ཚོགས་གཉིས་མཐར་ཕྱིན་ས་བཅུ་རིམ་བསྒྲོད་ནས། །ཐུགས་རྗེའི་དབང་གིས་སེམས་ཅན་རེ་འདོད་བསྐང་། །སྤྲོས་པའི་མཐའ་བྲལ་བདེ་བ་ཆེན་པོའི་ངང་། །ཡང་དག་དོན་རྟོགས་ལྷ་མོའི་ཐུགས་ལ་འདུད། །ཕྱག་གཡས་མཆོག་སྦྱིན་པཱི་ཛ་ཕ་ལ་ཡིས། །འཇིགས་པ་བརྒྱད་སྐྱོངས་འགྲོ་རྣམས་དབང་དུ་སྡུས། །དབུལ་པ་སེལ་ཞིང་ལོག་འདྲེན་འཇོམས་མཛད་པ། །གཡོན་པ་ཐུགས་ཀར་རིན་ཆེན་སྙེ་མ་འཛིན། །དགོས་འདོད་རེ་སྐོང་དཔག་བསམ་ཤིང་
ལྟ་བུ། །ཡིད་བཞིན་ནོར་འདྲ་ཁྱོད་ལ་ཕྱག་འཚལ་འདུད། །བདག་གིས་ཁྱོད་ལ་རྟག་ཏུ་མཆོད་བྱེད་ཅིང་། །གུས་དང་བཅས་པའི་སེམས་ཀྱིས་རང་བསྟོད་ན། །གདོང་ལ་མཆི་མས་རབ་ཏུ་གོས་གྱུར་ཀྱང་། །དབུལ་བའི་སྡུག་བསྔལ་སྐད་ཅིག་མ་འདོར་ན། །སྔོན་གྱི་ཐུགས་རྗེའི་སྨོན་ལམ་གང་དུ་ཐལ། །ལས་ཀྱི་འཕྲོ་མིན་སྦྱིན་ཤུགས་ཟད་པ་ཡིས། །ཕུན་སུམ་ཚོགས་པའི་སྐལ་པ་མེད་གྱུར་ཀྱང་། །ཚེ་འདིར་ཕོངས་པས་ལོག་འཚོ་སྤོང་ཙམ་གྱི། །ཐུགས་རྗེའི་ཐིགས་པ་འགའ་ཙམ་ཅིས་མི་སྦྱིན། །དུས་འདི་ནས་བཟུང་ཚེ་རབས་ཐམས་ཅད་དུ། །འཕགས་མ་ནོར་རྒྱུན་མ་ལ་མཆོད་བྱེད་ཅིང་། །ཐེག་ཆེན་གསང་སྔགས་ཆོས་ལ་སྤྱོད་པ་དང་། །བླ་མ་རྡོ་རྗེ་འཛིན་པའི་བཀའ་ཉན་ཅིང་། །དབྱེར་མེད་ཕྱག་རྒྱ་ཆེན་པོའི་དོན་རྟོགས་ཤོག །རྟ་དང་གླང་པོ་རིན་ཆེན་གོས་རྣམས་དང་། །ཁྲུས་ཀྱི་རྫིང་བུ་རིན་ཆེན་བང་མཛོད་དང་། །འདོད་འཇོ་བ་དང་མ་རྨོས་འཁྲུངས་རྣམས་ལ། །རྟག་ཏུ་ཆོས་དང་ལྡན་པའི་ལོངས་སྤྱོད་ཤོག །པཎྜི་ཏ་ཛ་མཱ་རི་པས་མཛད་པའོ། །དེ་དག་མི་ནུས་པའམ། བསྡུས་པའི་སྐབས་སུ། །ནོར་གྱི་དབང་ཕྱུག་རིན་ཆེན་གཏེར་མངའ་ཞིང་། །གནོད་སྦྱིན་ནོར་འཆང་མང་པོ་ཀུན་གྱི་རྗེ། །བྱང་ཕྱོགས་སྐྱོང་བའི་མགོན་པོ་ཛཾ་བྷ་ལ། །དངོས་གྲུབ་མཆོག་
སྩོལ་མཛད་ལ་ཕྱག་འཚལ་བསྟོད། །ཅེས་པས་ཡབ་རྐྱང་དང་། དཔལ་མོ་དབྱིག་གི་ཆར་འབེབས་ནོར་རྒྱུན་མ། །ཚེ་དང་བསོད་ནམས་དཔལ་འབྱོར་རྒྱས་མཛད་ཅིང་། །འགྲོ་ལ་ཕུན་ཚོགས་མ་ལུས་རྩོལ་མཛད་མ། །ལྷ་མོ་ནོར་རྒྱུན་མ་ལ་ཕྱག་འཚལ་བསྟོད། །ཅེས་ཡུམ་རྐྱང་ལ་བསྟོད། བཞི་པ་ནི། འཁོར་ལོའི་སྐུད་སྣེལ་བཏགས་པའི་གཟུངས་ཐག་ནས་བཟུང་སྟེ། རང་གི་ཐུགས་ཀ་ནས་སྔགས་ཕྲེང་སེར་པོ་གཟུངས་ཐག་ལ་བརྟེན་ཏེ་སློང་། འཁོར་ལོའི་ལྷ་ཡི་ཐུགས་ཀར་ཕོག་པས་རྒྱུད་བསྐུལ། ཐུགས་ཀ་ནས་འོད་ཟེར་སེར་པོ་འཕྲོས་པ་སྦྱིན་བདག་གིས་གཙོར་བྱས་སེམས་ཅན་ཐམས་ཅད་ལ་ཕོག །ཚེ་དང་བསོད་ནམས་འཁོར་དང་ལོངས་སྤྱོད་རྒྱས་པར་བྱས། སླར་ཡང་འོད་ཟེར་འཕྲོས་པས་སངས་རྒྱས་ཐམས་ཅད་ཀྱི་ཐུགས་ཀ་ནས་འདོད་དགུ་འབྱུང་བའི་བདུད་རྩི་དཔག་ཏུ་མེད་པ་སྤྱན་དྲངས། །འཁོར་ལོ་ཡོན་བདག་དང་བཅས་པ་ལ་ཐིམ་པར་གྱུར། ཅེས་པས་དམིགས་པ་རྩེ་གཅིག་པས། ཨོཾ་ཛཾ་བྷ་ལ་ཛ་ལེནྡྲ་ཡ་སྭཱ་ཧཱ། ཞེས་ཅི་ནུས་དང་། ཨོཾ་མ་ི་བྷ་དྲཱ་ཡ་སྭཱ་ཧཱ། ཨོཾ་པཱུརྞ་བྷ་དྲཱ་ཡ་སྭཱ་ཧཱ། ཨོཾ་བྷན་དཱ་ཡ་སྭཱ་ཧཱ། ཨོཾ་བཻ་ཤྲ་མ་ཱ་ཡ་སྭཱ་ཧཱ། ཨོཾ་ཀི་ལི་མཱ་ལི་ནེ་སྭཱ་ཧཱ། ཨོཾ་ཙི་པི་ཀུཎྜ་ལི་ནེ་སྭཱ་ཧཱ། ཨོཾ་མུ་ཁེནྡྲཱ་ཡེ་སྭཱ་ཧཱ། ཨོཾ་ཙ་རྱེནྡྲཱ་ཡ་སྭཱ་ཧཱ། །ཞེས་པ་རྣམས་གཙོ་བོའི་བཅུ་ཆ་རེ་བཟླ། ཨོཾ་བ་སུ་དྷཱ་རི་ཎྱཻ་སྭཱ་ཧཱ།
ཞེས་ཅི་ནུས་དང་། ཨོཾ་ཙནྡྲཱ་ཀཱེནྟ་ཡཻ་སྭཱ་ཧཱ། ཨོཾ་དཏྟ་ཡཻ་སྭཱ་ཧཱ། ཨོཾ་སུ་དཏྟཱ་ཡཻ་སྭཱ་ཧཱ། ཨོཾ་ཨརྻ་ཡཻ་སྭཱ་ཧཱ། ཨོཾ་སུ་བྷ་དྲཱ་ཡེ་སྭཱ་ཧཱ། ཨོཾ་གུ་པྟཱ་ཡཻ་སྭཱ་ཧཱ། ཨོཾ་དེ་ཝྱཻ་སྭཱ་ཧཱ། ཨོཾ་ས་ར་སྭ་ཏྱཻ་སྭཱ་ཧཱ། །ཞེས་པ་རྣམས་གཙོ་བོའི་བཅུ་ཆ་རེ་བཟླས་པའི་མཐར་ཆུ་སྦྱིན་ནི། ཟངས་གཞོང་མདུན་ཏུ་བཞག །ཆུ་གཙང་སྟ་གོན་བྱས་ལ། རྒྱས་པར་སྤྲོ་ན། གདན་པདྨ་བསྐྱེད་པ་ནས་དབང་བསྐུར་རྒྱས་གདབ་ཡན་གོང་ལྟར་ལ། བསྡུ་ན། ཟངས་གཞོང་ཡངས་ཤིང་རྒྱ་ཆེ་བའི་ནང་དུ་གསེར་གྱི་པདྨ་དང་གཏེར་གྱི་བུམ་པའི་གདན་དགུ་ཚོམ་གྱི་སྟེང་དུ་གནོད་སྦྱིན་ཕོ་དགུ་མོ་དགུ་ཐམས་ཅད་ཀྱང་གསེར་གྱི་མདོག་ཅན་དར་དང་རིན་པོ་ཆེས་བརྒྱན་པ། །ཡབ་རྣམས་གཡས་མཆོག་སྦྱིན་གྱི་མཐིལ་ན་བཱི་ཛ་པཱུ་ར་ཀ་དང་། གཡོན་པས་གཏེར་གྱི་ནེའུ་ལེ་འཛིན་པ། ཡུམ་རྣམས་གཡས་མཆོག་སྦྱིན་གྱི་མཐིལ་ན་བཱི་ཛ་པཱུ་ར་ཀ་དང་། གཡོན་འབྲས་ཀྱི་སྙེ་མ་བསྣམས་པ། གནས་གསུམ་འབྲུ་གསུམ་གྱིས་མཚན་པ་ལས་འོད་ཟེར་འཕྲོས། རང་འདྲའི་ཡེ་ཤེས་པ་བཛྲ་སཱ་མ་ཛཿ ཛཿཧཱུྃ་བྃ་ཧོཿ སླར་ཡང་དབང་གི་ལྷ་སྤྱན་དྲངས་ཏེ། དབང་བསྐུར། སྐུ་གང་། དྲི་མ་དག །སྤྱི་བོར་རིན་ཆེན་འབྱུང་ལྡན་གྱི་རྒྱས་བཏབ་པར་གྱུར། རང་གི་ལག་མཐིལ་ཟླ་བའི་སྟེང་། །བུྃ་ཨྃ་ཛྲི༚་ཁྃ་ཧཱུྃ་ཡིག་ལས། །བྱུང་བའི་
དེ་བཞིན་གཤེགས་པ་ལྔ། །ཞུ་བའི་བདུད་རྩི་ཕུལ་བར་བསམ། ཨོཾ་ཛླུཾ་སྭཱ་ཧཱ། །ཞེས་དང་། གོང་གི་སྔགས་རྣམས་ཀྱིས་ཆུ་དབུལ། ཨརྒྷཾ་སོགས་ཀྱིས་མཆོད། གང་སྔོན་སྦྱིན་པ་སོགས་ཀྱི་མཐར། སེར་སྣའི་ལས་ཀྱི་མེ་ཡིས་གདུང་བ་རྣམས། །སྐྱེ་དང་སྐྱེ་བར་ཁྱོད་ལ་གསོལ་འདེབས་ཀྱིས། །རིན་ཆེན་གཏེར་གྱི་བདུད་རྩིའི་ཆར་རྒྱུན་གྱིས། །སེམས་ཅན་དབུལ་བའི་སྡུག་བསྔལ་ཞི་བར་མཛོད། །ཛཾ་སིདྡྷི་ཕ་ལ་ཨ་ལ་ལ་ཧོཿཆུ་ཐིགས་མྱང་ཞིང་གཏོར། ཡེ་ཤེས་པ་རྟེན་ལ་གཤེགས། དམ་ཚིག་པ་རང་ལ་ཐིམ་པར་གྱུར། །དེ་ནས་གཏོར་མ་བསད་སྦྱར། ཨོཾ་ཨཱཿཧཱུྃ། གསུམ། བདུད་རྩིའི་རྒྱ་མཚོ་ཆེན་པོར་གྱུར། །ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས་ལ་གཙོ་འཁོར་རྣམས་ཀྱི་སྔགས་ལ་ཨ་ཀ་རོ་བཏགས་པ་འདུན་བདུན་གྱིས་ཕུལ་མཐར། ཨོཾ་ན་མོ་བྷ་ག་ཝ་ཏེ་ཛཾ་བྷ་ལ་ཛ་ལེནྡྲཱ་ཡ་མ་ཧཱ་ཡཀྵ་སེ་ན་པ་ཏཱ་ཡེ། ཨི་མཾ་བ་ལི༚་པྲ་ཏཱིཙྪ་ས་མ་ཡ་མ་ནུ་སྨ་ར་ཧཱུྃ་བཛྲ་ཛ་ཕཊ་སྭཱ་ཧཱ། མ་མ་ཧི་ར་ཎྱ་སུ་བརྞྞ་མ་ི་མུཀྟ་རཏྣ་ཧེ་མ་ནི་དྷཱིནཱཾ། དེ་ཧི་མཱཾ། ཛི་གྷཱནྟུ། པི་བནྟུ། ཁཱ་དནྟུ། མ་མ་ཤཱིནྟཾ། པུཥྚི༚་ཀུ་རུ་བཛྲ་དྷ་རི་ཀ་བ་ལི༚་པྲ་ཏཱིཙྪ་ས་མ་ཡ་མ་ནུ་སྨ་ར་ཛཾ་ཛཾ་ཛཾ་ཧཱུྃ་ཛུཾ་ཛི་ཛ་ཕཊ་སྭཱ་ཧཱ། ཞེས་བརྗོད། དེ་ནས་མཆོད་པ་ཁ་གསོ་བྱིན་བརླབས་ལ། ཚིགས་བཅད་དང་བཅས་པའམ་སྔགས་ཙམ་གྱིས་མཆོད། བསྟོད་པ་མདོར་བསྡུས་བྱ། འདོད་
གསོལ་ཅུང་ཟད་སྤྲོ་ན། མཆོད་སྦྱིན་བརྒྱ་པ་མེ་ལྷ་གདོང་བཞི་དང་། །སེང་གེ་འཕྲོག་བྱེད་ཉིན་མོར་བྱེད་རྣམས་ཀྱིས། །ཞབས་གཉིས་ལ་བཏུད་བཅོམ་ལྡན་སྡུག་བསྔལ་བ། །བདག་ལ་པད་ལྟར་ཡངས་པའི་སྤྱན་རས་གཟིགས། །བཅོམ་ལྡན་ཆབ་འཁྱོར་གང་གིས་མཉེས་གྱུར་ན། །ཐུགས་རྗེ་མངའ་བ་གཞན་གང་ལགས་པར་གསུངས། །དེ་ཕྱིར་མཆོད་པ་བཤམས་ལ་མི་རྩི་ཞིང་། །ཁྱོད་དང་འདྲ་བ་སྲིད་འདིར་རྙེད་པར་དཀའ། །བརྩེ་བས་འབད་པའི་སྒོ་ནས་བཙལ་བཙལ་ནས། །ཕོངས་པར་གྱུར་པ་བདག་ལ་བདེ་མཛད་ན། །ཁོ་བོ་མཆི་མ་དག་གིས་གདོང་སྤགས་པ། །སྤྱན་སྔར་མཆིས་ཀྱང་ཅི་སྟེ་གཟིགས་མ་ལགས། །ཨེ་མ་ཧོ་རབ་ཏུ་རྒྱས་པའི་ཐུགས་རྗེ་ཡི། །གཞུ་མོ་མངའ་བ་ཁྱོད་ལྟར་བཞུགས་གྱུར་ཀྱང་། །སྐྱེ་ཚོགས་ཟློག་དཀའ་སྡུག་བསྔལ་ཆོམ་རྐུན་གྱི། །སྡེ་ཡིས་རྣམ་པར་འཇོམས་པ་ཇི་ལྟར་ལགས། །སེམས་ཅན་སྨིན་སླད་ནོར་བུ་རིན་པོ་ཆེ། །རྣམ་པ་སྣ་ཚོགས་དགུང་ཆར་འབེབས་གྲགས་ན། །ཁོ་བོ་ཁྱོད་ཉིད་གཅིག་པུའི་མཐང་ཐུག་པ། །ཅི་སྟེ་ཐིགས་པ་ཡང་ནི་འབེབས་མ་ལགས། །ཁྱོད་བཞུགས་བཞིན་དུ་མེ་ཡིས་འབར་བ་ལྟར། །ཁོ་བོ་ཕོངས་པས་ཤིན་ཏུ་ཆེར་བསྲེགས་ན། །ཁྱོད་ཀྱི་ལྟ་ཞིག་ཐུགས་རྗེ་འཇོ་བའི་བ། །ས་གསུམ་ཁུར་དུ་ཁུར་བ་
གང་དུ་ཐལ། །བུམ་པ་དཔག་བསམ་ཤིང་དང་ཡིད་བཞིན་གྱི། །ནོར་བུ་སེམས་པ་དང་ལྡན་མ་ལགས་པ། །དེ་དག་གིས་ཀྱང་སེམས་ཅན་ཕན་བགྱིད་ན། །ཐུགས་རྗེས་བདག་ཅན་བཅོམ་ལྡན་སྨོས་ཅི་འཚལ། །གང་ཞིག་རྨུགས་འཛིན་ཆུ་ཡི་དབང་པོ་ཞེས། །སྐད་ཅིག་ཀྱང་ནི་ཁྱོད་ཀྱི་མཚན་སྨོས་པ། །པདྨའི་འབྱུང་གནས་ཀྱིས་ནི་པད་ཚལ་བཞིན། །དེ་ཡིས་ཕུན་སུམ་ཚོགས་པ་རྒྱས་པར་འགྱུར། །དེ་ལྟར་བཅོམ་ལྡན་སྲིད་འཇོམས་ཁྱོད་སྤྱན་སྔར། །ཆོ་ངེས་བཏབ་པའི་བསོད་ནམས་འབྱམས་ཀླས་པ། །གང་ཡིན་དེ་ཡིས་སྐྱེ་བོ་ཁྱོད་བཞིན་དུ། །མངོན་པར་མཐོ་བའི་འབྲས་བུ་འཕྱིན་པར་ཤོག །ཅེས་པ་སློབ་དཔོན་ཆེན་པོ་བཙུན་པ་ཟླ་བས་མཛད་པའོ། །མི་ནུས་ན། ནོར་ལྷ་འཁོར་དང་བཅས་པས་སྦྱིན་པའི་བདག་པོས་གཙོར་བྱས་སེམས་ཅན་ཐམས་ཅད་ཀྱི་ཟས་ནོར་ལོངས་སྤྱོད་ཐམས་ཅད་རྒྱས་པར་མཛད་དུ་གསོལ། ཞེས་འདོད་དོན་གསོལ། མེ་ཏོག་གཏོང་། ཡིག་བརྒྱ་ལན་གསུམ། མ་འབྱོར་བ་དང་སོགས་ཀྱིས་བཟོད་པར་གསོལ། དེ་ནས་མེ་ཏོག་སེར་པོ་ཐོགས་ལ། བཅོམ་ལྡན་འདས་ནོར་གྱི་དབང་ཕྱུག་འཁོར་དང་བཅས་པ་ཁྱོད་རྣམས་རྟེན་འདི་རྣམས་ལ་བརྟན་པར་བཞུགས་སུ་གསོལ། བརྟན་པར་བཞུགས་ནས་རྟེན་འདི་གང་དུ་བཞུགས་པའི་ཡུལ་ཕྱོགས་དང་གནས་ཁང་ཐམས་ཅད་དུ་ལོ་ཕྱུགས་ལེགས་
ཤང་འབྲུ་བཅུད་དང་བ་དང་། སྲིད་ཞིའི་དཔལ་འབྱོར་ཕུན་སུམ་ཚོགས་པ་ཐམས་ཅད་རྒྱ་མཚོ་ཆེན་པོ་ལ་ཆུ་བོའི་རྒྱུན་བཞིན་དུ་འདུ་བར་མཛད་དུ་གསོལ། ལན་གསུམ། ལྷ་རྣམས་འོད་དུ་ཞུ་ནས་བྲིས་པའི་འཁྲུལ་འཁོར་གྱི་ཡི་གེ་དངོས་གྲུབ་ཐམས་ཅད་ཀྱི་འབྱུང་གནས་སུ་གྱུར། སུ་པྲ་ཏིཥྛ་དང་། ཡེ་དྷརྨ་མང་དུ་བརྗོད་ཅིང་མེ་ཏོག་འཐོར། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་ཞེས་གནས་གསུམ་བསྲུང་། དགེ་བ་འདི་ཡིས་མྱུར་དུ་བདག །ནོར་གྱི་དབང་ཕྱུག་འགྲུབ་གྱུར་ནས། སོགས་དང་། ཐམས་ཅད་ནམ་མཁའི་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པ། །རང་དབང་དུ་ནི་སྤྱོད་པར་ཤོག །ལྷ་ཡང་དུས་སུ་ཆར་འབེབས་ཤིང་། །ལོ་ཏོག་ཕུན་སུམ་ཚོགས་པར་ཤོག །རྒྱལ་པོ་ཆོས་བཞིན་བྱེད་པ་དང་། །འཇིག་རྟེན་དག་ཀྱང་དར་བར་ཤོག །འབད་དང་རྩོལ་བས་མི་གོས་པ། །ཡིད་བཞིན་ནོར་བུ་དཔག་བསམ་བཞིན། །སེམས་ཅན་རེ་བ་སྐོང་མཛད་པ། །བསམ་པ་འགྲུབ་པའི་བཀྲ་ཤིས་ཤོག །ཅེས་སོགས་བསྔོ་སྨོན་ཤིས་བརྗོད་ཁྱད་པར་བ་དང་། གཞན་ཡང་། ཆེ་བའི་ཆེ་མཆོག་སྟོན་མཆོག་སོགས་མདོ་རྒྱུད་ནས་འབྱུང་བའི་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད།
དེ་ལྟ་བུ་ཐུན་དུ་བཅད་ནས་རང་དམ་སྦྱིན་བདག་སོགས་ལ་རྨིས་ལྟས་དགེ་བ་ལྟ་བུའི་རྟགས་མ་བྱུང་གི་བར་རམ་ཞག་བདུན་སོགས་སུ་བསྒྲུབ་བོ། །འགྲུབ་ཏུ་རུང་ན་སྔགས་རྒྱུན་ཀྱང་བྱ་སྟེ་གོང་མ་རྣམས་ཀྱི་དེ་ལྟར་མཛད་པའི་ཚུལ་ལོ་རྒྱུས་རྣམས་སུ་གསལ་ལོ། །གསུམ་པ་ནི། སྒྲུབ་པ་ཟིན་པའི་འཁྲུལ་འཁོར་རྒྱུད་ཀྱི་དགོངས་པ་ལྟར་ན་བང་མཛོད་ཀྱི་ཕུག་ལྟ་བུར་ཟ་མ་ཏོག་ཆེན་པོའི་ནང་དུ་བཞག །ཞུན་མར་སྤྲང་རྩི་ཀ་ར་རྣམས་ཀྱིས་ནུབ་པར་བྱས་ལ་ཉིན་རེ་བཞིན་དྲི་བཟང་གི་ཆུ། སྤོས་མ་ཏོག་སོགས་མཆོད་པར་བྱ་སྟེ། དེའང་དཔེར་ན། ཨོཾ་ཛཾ་བྷ་ལ་ཛ་ལེནྡྲ་གནྡྷཾ་པ་ཏཱིཙྪ་ན་མཿཞེས་སོགས་ལྟ་བུའོ། །ཡང་ན་འཁྲུལ་འཁོར་དེ་ཉི་མ་རེ་རེར་ཟངས་གཞོང་ལྟ་བུར་སྤྱན་དྲངས་ནས་གུར་གུམ་གྱི་ཆུ་ཡི་ཆུ་སྦྱིན་འབུལ་བར་བྱས་ན། ཐུབ་པ་ཆེན་པོ་བརྒྱད་ཀྱང་སྟེར་ན་དངོས་གྲུབ་གཞན་ལྟ་ཅི་སྨོས་གསུངས་པ་དང་། མཐོ་རིས་ཡོན་ཏན་བདུན་གྱི་དཔལ་རྣམས་བདེ་བླག་ཏུ་འགྲུབ་པ་སོགས་རྒྱུད་དང་འགྲེལ་པ་ལས་གསུངས་སོ། །ད་ལྟ་ཕྱག་ལེན་གཙོ་བོར་རྟེན་ལ་གཞུག་པའི་དབང་དུ་བྱས་ན། རྒྱུད་སྡེ་རྣམས་ལས་བཅོམ་ལྡན་འདས་ཀྱི་སྐུའི་རྣམ་འགྱུར་དུ་གསུངས་པས་དྲེགས་པ་རང་རྒྱུད་པའི་འོག་སེང་ཁྲི་ལྟ་བུར་བཞུགས་མི་རུང་ཞིང་། པད་གདན་དུ་གདོང་ཆེན་རྣམས་སུ་ཆོས་སྐྱོང་གི་རྟེན་དད་མདུན་རྒྱབ་ཏུ་བཞག །དེའང་སྒྲུབ་པའི་སྐབས་ལྟར་ཡབ་ཡུམ་སྦྲགས་མ་དབུས། ཡུབ་རྐྱང་གཡས། ཡུམ་
རྐྱང་གཡོན། ལྟེ་བའི་དགུ་རྒྱབ་ངོས་བསྟན་ཏེ་རྟེན་ཆེན་པོ་ལ་ཞུན་མར་གྱི་སྣོད་དུ་བཞག །ཆེ་ཆུང་གང་ལའང་དེ་དང་ལ་ཆམས་པའི་དཀོར་ཆ་ཅི་འབྱོར་པ་དང་བཅས་ཏེ་བཞུགས་སུ་གསོལ་ལོ། ༈ལྔ་པ་ལ་གཉིས། རྗེས་གནང་དང་། བསྙེན་པ་བྱ་ཐབས་སོ། །དང་པོ་ནི། འཁོར་ལོ་ཡོད་ནི་ཤིན་ཏུ་ལེགས་པས་སྒྲུབ་པའི་སྐབས་ལྟར་དང་། མེད་ན་མཎྜལ་སུམ་བསྒྲིགས་སྟེང་ཚོམ་བུ་གཙོ་འཁོར་དགུ་རེ་བཀོད། མཆོད་གཏོར་བཤམ། གོང་སྨོས་ལྟར་སྐྱབས་སེམས་ནས་བརྩམས། བདག་མདུན་བཟླས་པ་ཆུ་སྦྱིན་གཏོར་འབུལ་ཡན་གྲུབ་ནས། སློབ་མ་ལ་ཆབ་བཏང་། མེ་ཏོག་བཀྱེ་བསྡུ་དང་སེམས་བསྐྱེད་གསལ་གདག །དེ་ལ་འདིར་སངས་རྒྱས་སྣང་བ་མཐའ་ཡས་ཀྱི་རྣམ་འཕྲུལ་དཔལ་ལྡན་ཨ་ཏི་ཤ་དང་ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བས་བསྒྱུར་བའང་མ་དཔལ་དཔའ་བོ་གཅིག་ཏུ་གྲུབ་པའི་རྒྱུད། བོད་སྔ་མ་རྣམས་ཀྱིས་བྱ་རྒྱུད་གཤེགས་རིགས་སུ་བཞེད་པ་དེ་ཉིད་ཀྱི་ལེའུ་གཉིས་པ་ནས་གསུངས་པའི་རྨུགས་འཛིན་ལྷ་མང་གི་མན་ངག་རྣམས་གྲུབ་པའི་དབང་ཕྱུག་ཛེ་ཏ་རིས་ཇོ་བོ་རྗེ་ཉིད་ལ་གནང་། དེས་ཀྱང་ནག་ཚོ་ལོ་ཙཱ་བ་ལ་གནང་ནས་རིམ་པར་བརྒྱུད་པའི་རྗེས་སུ་གནང་བ་བསྒྲུབ་པ་ལ་སོགས་ཀྱིས་མཚམས་སྦྱར་ནས་མཎྜལ་འབུལ་དུ་གཞུག །ཐལ་མོ་མེ་ཏོག་དང་བཅས་གསོལ་བ་འདེབས་པ་འདིའི་རྗེས་ཟློས་གསུངས་ཤིག །དུས་གསུམ་སངས་རྒྱས་
ཐམས་ཅད་དང་། །ལྷག་པའི་ལྷ་ཡི་ངོ་བོ་ཉིད། །དཔལ་ལྡན་བླ་མའི་བཀའ་དྲིན་གྱིས། །བདག་ལ་རྗེས་གནང་སྩལ་དུ་གསོལ། །ལན་གསུམ། རྒྱུད་དག་པར་བྱ་བའི་ཕྱིར། མདུན་བསྐྱེད་ཀྱི་ལྷ་དང་སངས་རྒྱས་བྱང་སེམས་རྣམས་ཀྱི་དྲུང་དུ་རྒྱུན་བཤགས་དང་སྐྱབས་གསུམ་སྔོན་དུ་འགྲོ་བའི་བྱང་ཆུབ་ཀྱི་སེམས་བཟུང་བ་ལ་སོགས་པར་བགྱིད་སྙམ་པའི་བསམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། སོགས་ལན་གསུམ། དེ་ནས་ཁྱེད་རང་བླ་མས་དཔལ་གསང་བའི་བདག་པོ་འདི་བཞིན་དུ་གསལ་ཐོབ་ཅིག །ཨོཾ་སྭ་བྷཱ་ཝ་སོགས་ནས། ཟླ་བའི་འོད་ཀྱི་རྒྱབ་ཡོལ་ཅན་ཏུ་ལམ་གྱིས་གྱུར་པའི་གསལ་སྣང་ལ་གནས་པ་དང་། མདུན་བསྐྱེད་ཀྱི་དཀྱིལ་འཁོར་ཡང་འདི་བཞིན་དུ་གསལ་འདེབས་པར་ཞུ། ཨོཾ་སྭ་བྷཱ་བ་སོགས་ནས་ཡབ་ཡུམ་སྦྲགས་པ། ཡབ་རྐྱང་། ཡུམ་རྐྱང་། གནས་གསུམ་བྱིན་རླབས། ས་བོན་གྱིས་མཚན་པའོ། །བར་བརྗོད། ཟངས་གཞོང་སོགས་ཉེར་བསྡོགས་ཆུ་སྦྱིན་བྱ་ཞིང་སློབ་མ་རྣམས་ལ་འབུལ་དུ་གཞུག །མཐར་གཏོར་མ་དང་མཆོད་བསྟོད་ཀྱང་བྱ། དེ་ནས་རྗེས་གནང་དངོས་ལ་ལུང་གསུམ་ལས། །དང་པོ་རྗེས་སུ་བཟླས་པའི་ལུང་བླང་བའི་ཕྱིར། མདུན་བསྐྱེད་གཙོ་འཁོར་རྣམས་ཀྱི་ཐུགས་ཀ་ནས་སྔགས་ཀྱི་ཕྲེང་བ་བྱུང་། ཞལ་ནས་ཐོན། ཁྱེད་
རང་རྣམས་ཀྱི་ཞལ་དུ་ཞུགས། ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་འཁོད། དེའི་དུས་སུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཁྱེན་བརྩེ་ནུས་མཐུ་ཐམས་ཅད་འོད་ཟེར་གྱི་རྣམ་པར་སྔགས་ཕྲེང་དང་ལྷན་ཅིག་ཞལ་དུ་ཞུགས། སྙིང་ཁའི་སྔགས་ཕྲེང་ལ་ཐིམ་པའི་མོས་པ་མཛོད་ལ། སྔགས་འདིའི་རྗེས་ཟློས་ལན་གསུམ་གསུངས་ཤིག །སྙིང་པོ་རྣམས་ལན་གསུམ་རྗེས་ཟློས་བྱར་གཞུག །དང་པོས་བྱིན་གྱིས་བརླབས། གཉིས་པས་དབྱེར་མེད་དུ་འདྲེས། གསུམ་པས་བརྟན་པར་བྱས་པའི་མོས་པ་མཛོད། གཉིས་པ་བྱིན་གྱིས་བརླབས་པའི་ལུང་ནི། སློབ་དཔོན་ལ་མེ་ཏོག་འཐོར་བཞིན་དུ་འདིའི་རྗེས་ཟློས་མཛོད་ཅིག །བཅོམ་ལྡན་བདག་གིས་གཟུང་ལགས་ཀྱི། །བདག་ལ་འགོ་བར་མཛད་དུ་གསོལ། །ཅེས་ལན་གསུམ། དེ་ལྟར་ཕུལ་བའི་མེ་ཏོག་དེ་ཉིད་སླར་ཡང་བྱིན་གྱིས་བརླབས་ཏེ། ཁྱེད་རང་གི་སྤྱི་བོོར་ཕུལ་བར་མོས་པ་མཛོད་ཅིག །སློབ་དཔོན་གྱིས་མེ་ཏོག་གཏོར་ཞིང་། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །བརྟུལ་ཞུགས་བརྟེན་པར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །རིག་པ་འཛིན་པ་འདི་རྣམས་ལ་བཅོམ་ལྡན་འདས་འཕགས་པ་ཛཾ་བྷ་ལ་ཡབ་དགུ་ཡུམ་
དགུའི་སྐུ་གསུང་ཐུགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིག །གསུམ་པ་དམ་བཅའ་བའི་ལུང་གི་ཕྱིར། བཅོམ་ལྡན་འདས་འཕགས་པ་ཛཾ་བྷ་ལ་ཡབ་ཡུམ་ཇི་སྲིད་བྱང་ཆུབ་མ་ཐོབ་ཀྱི་བར་གྱི་ཡི་དམ་དུ་བཟུང་ངོ་། །བདག་ཐུགས་ཀྱིས་མ་བཏང་ཞིག་སྙམ་པའི་བསམ་པས་འདིའི་རྗེས་ཟློས་གསུངས་ཤིག །སློབ་དཔོན་དགོངས་སུ་གསོལ། བདག་རིག་པ་འཛིན་པ་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། བཅོམ་ལྡན་འདས་འཕགས་པ་ཛཾམྦྷ་ལ་ཡབ་ཡུམ་འཁོར་དང་བཅས་པ་ཡི་དམ་གྱི་ལྷར་བཟུང་ནས་འདིའི་གསང་སྔགས་ཉི་མ་རེ་རེ་བཞིན་འདི་ཙམ་རེ་འདོན་པར་དམ་བཅའ་ལགས་སོ། །ཞེས་ལན་གསུམ་བརྗོད། དེས་བཟླས་པའི་ལུང་བཅས་རྗེས་གནང་ལེགས་པར་གྲུབ་པ་ཡིན་པས་སོགས་ཀྱིས་མཚམས་སྦྱར་ནས། གཙོ་བོས་ཇི་ལྟར་སོགས། གཏོང་རག་མཎྜལ། ལུས་འབུལ། དགེ་བསྔོ་སྤྱི་ལྟར་བྱ། སླར་མཆོད་ཁག་སོས་ཏེ་མཆོད་པ་བྱིན་བརླབས། མཆོད་བསྟོད་མན་ཆད་རྗེས་རིམ་སྒྲུབ་ཐབས་ལྟར་ལ་འཁོར་ལོ་སོགས་རྟེན་ཡོད་ན་བརྟན་བཞུགས་དང་མེད་ན་གཤེགས་གསོལ་བྱའོ། །གཉིས་པ་བསྙེན་པ་ནི། འཁྲུལ་འཁོར་གྱི་ལས་སྒྲུབ་པ་སྔོན་དུ་བསྙེན་པ་མ་སོང་ཀ་མེད་པས་དེའི་ཚུལ་དགེ་བའི་འདོད་འཇོར་གསུངས་པའི་ཏིང་ངེ་འཛིན་ཁོ་ནའི་འཁྲུལ་འཁོར་སྒྲུབ་པ་
ཉིད་ཉམས་སུ་ལེན་པར་བྱ་སྟེ། སྐྱབས་སེམས་ཚོགས་བསགས་ཀྱི་བར་གོང་སྨོས་སྒྲུབ་ཐབས་ལྟར་བྱ། དེ་ནས་གནོད་སྦྱིན་མོ་དགུའི་འཁྲུལ་འཁོར་གྱི་བསྙེན་པ་ནི། སྟོང་པའི་ངང་ལས་སྲུང་བའི་འཁོར་ལོའི་དབུས་སུ། རང་ཉིད་སྐད་ཅིག་གིས་ཛཾ་བྷ་ལ་གསེར་གྱི་མདོག་ལྟ་བུ་ཐུང་ཞིང་ལྟོ་བ་འཕྱང་བརྒྱན་ཐམས་ཅད་ཀྱིས་བརྒྱན་པ། གཡོན་པ་དང་གཡས་པའི་ཕྱག་དག་གིས་ན་ཀུ་ལེ་དང་བཱཾ་ཛ་པཱུ་ར་ཀ་བསྣམས་པ། ཨུཏྤ་ལའི་ཕྲེང་བས་དོ་ཤལ་མཛད་པ། གསུས་པ་འཕྱར་ཞིང་རོལ་པའི་སྟབས་ཀྱིས་གཏེར་དང་གསེར་གྱི་པདྨའི་གདན་ལ་བཞུགས་པའི་ཐུགས་ཀར་རཾ་ལས་མེའི་དཀྱིལ་འཁོར་ཟུར་གསུམ་ཉི་མའི་མདོག་ཅན་གྱི་སྟེང་དུ་པདྨ་དཀར་པོ་འདབ་མ་བརྒྱད་པའི་ལྟེ་བར་ཛླུྃ། ཤར་ལ་སོགས་པའི་འདབ་མ་ལ། ཨོཾ་བ་སུ་དྷཱ་རི་ི་སྭཱ་ཧཱའི་ཡི་གེ་རེ་རེ་བཞིན་གཡས་བསྐོར་དུ་གནས་པ་གསེར་བཙོ་མའི་ཁ་དོག་ཅན། ནོར་རྒྱུན་མ་ཟླ་ཤེལ་མ་སོགས་ལྷ་མོ་བརྒྱད་ཀྱི་ངོ་བོར་གྱུར། ཡེ་ཤེས་ཀྱི་འཁོར་ལོ་སྤྱན་དྲངས་བཛྲ་ས་མཱ་ཛཿ ཛ་ཧཱུྃ་བྃ་ཧོཿ གཉིས་སུ་མེད་པར་གྱུར། ཡི་གེ་རྣམས་ལས་འོད་ཟེར་གསེར་གྱི་ཁ་དོག་ཅན་འཕྲོས། རང་གཞན་དབུལ་ཕོངས་ཐམས་ཅད་ཞི་ནས་མངོན་པར་མཐོ་བའི་དཔལ་ལ་བཀོད་པར་བསམས་ལ། ཨོཾ་བ་
སུ་དྷཱ་རི་ཎྱེ་སྭཱ་ཧཱ། སོགས་གནོད་སྦྱིན་མོ་དགུའི་སྔགས་རྣམས་བཟླ། དེའང་སྤྱི་ཙམ་དུ་གཙོ་བོ་ལ་འབྲུ་གསུམ། འཁོར་རྣམས་ལ་དེའི་བཅུ་ཆ་ཙམ་བཟླ་བ་ནི་ཕྱི་མ་ལའང་ཤེས་པར་བྱ། ཐུན་མཐར། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་ནོར་གྱི་དངོས་གྲུབ་སྩལ་དུ་གསོལ། ཞེས་འདོད་དོན་གསོལ། རང་གི་ཐུགས་ཀ་ནས་འོད་ཟེར་འཕྲོས། སྣོད་བཅུད་ཐམས་ཅད་སྲུང་བའི་འཁོར་ལོ་ལ་ཐིམ། དེ་རང་ཉིད་ལ་ཐིམ། དེ་ཐུགས་ཀའི་འཁོར་ལོ་ལ་ཐིམ། དེའང་ཐུགས་སྲོག་གཙོ་བོ་ལ་ཐིམ། དེ་གྱེན་རྫོགས་སུ་ཡལ། དེ་སྤྲོས་པ་དང་བྲལ་བའི་སྟོང་པ་ཉིད་ཀྱི་དབྱིངས་སོ། །ཞེས་མཉམ་པར་བཞག །སླར་ཡང་སྐད་ཅིག་གིས་ལྷར་གསལ་བའི་གནས་གསུམ་འབྲུ་གསུམ་གྱིས་མཚན་པར་གྱུར། །ཅེས་མོས་ལ་དགེ་བ་སྔོ་ཤིས་བརྗོད་བྱ། ད་ནས་གནོད་སྦྱིན་ཕོ་དགུའི་འཁྲུལ་འཁོར་གྱི་བསྙེན་པ་ནི། གོང་འོག་སྔ་མ་ལྟར་ལ། ཐུགས་ཀར་རཾ་ལས་མེའི་དཀྱིལ་འཁོར་ཟུང་གསུམ་ཉི་མའི་མདོག་ཅན་གྱི་དབུས་སུ་པདྨ་དཀར་པོ་འདབ་མ་བརྒྱད་པའི་ལྟེ་བར་ཛླུཾ། ཤར་ལ་སོགས་པའི་འདབ་མ་ལ། ཛམྲྃ། བྷྃ། ལྃ། ཛྃ། ལེནྲྃ། དྲྃ། སྭཱྃ། ཧཱྃའི། ཡི་གེ་རྣམས་རེ་རེ་བཞིན་གཡས་བསྐོར་དུ་གནས་པ། གསེར་བཙོ་མའི་ཁ་དོག་ཅན། ཛཾ་བྷ་ལ་དང་། ནོར་བུ་བཟང་པོ་སོགས་ཀྱི་ངོ་བོར་
གྱུར། ཡེ་ཤེས་ཀྱི་འཁོར་ལོ་སྤྱན་དྲངས། བཛྲ་ས་མཱ་ཛཿཛཿཧཱུྃ་བྃ་ཧོཿགཉིས་སུ་མེད་པར་གྱུར། ཡི་གེ་རྣམས་ལས་འོད་ཟེར་གསེར་གྱི་ཁ་དོག་ཅན་འཕྲོས། རང་གཞན་གྱི་དབུལ་ཕོངས་ཐམས་ཅད་ཞི་ནས་མངོན་པར་མཐོ་བའི་དཔལ་ལ་བཀོད་པར་བསམས་ལ། ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། སོགས་བཟླས་པ་བྱའོ། །འདི་ཉིད་ཚུལ་བཞིན་འགྲུབ་ན་ཕྱི་ལེ་འཁྲུལ་འཁོར་སོགས་ལ་ལྟོས་པ་མེད་པར་ལས་དང་དངོས་གྲུབ་བདེ་བླག་ཏུ་འགྲུབ་པ་ཡིན་ནོ། །རབ་གནས་དཔལ་འབྱོར་རྒྱ་མཚོར་བཤད་པའི་བདག་བསྐྱེད་གནོད་སྦྱིན་ཕོ་དགུ་མོ་དགུ་ལ་བརྟེན་པ་དེའང་གསང་བ་སྤྱིའི་ཆོ་ག་ཡིན་པས་དཀྱུས་མཐུན་འབྱུང་མོད། འདི་ཉིད་འཕགས་ཞབས་ཀྱིས་རྒྱུད་ཀྱི་དགོངས་པ་ཚུལ་བཞིན་ཏུ་བཀྲལ་བའི་དོན་ཡིན་པས་ཁྱད་པར་དུ་འཕགས་པའོ། །སྔོན་དཔེ་བྲིས་བཤུས་ཁོ་ན་མིན། །སྔར་མེད་རང་བཟོ་སྦྱར་བའང་མིན། །ཚད་མའི་གཞུང་ལས་རྙེད་པ་ཡི། །ལེགས་བཤད་གཟུར་གནས་མཁས་རྣམས་མགུ། །སྐྱེ་དགུའི་ཕོངས་པ་དགུན་གྱི་དུས། །འདི་དགེ་དྲོད་ཀྱིས་བསྤོས་པ་ལས། །ཕུན་ཚོགས་སོས་ཀའི་སྐྱེད་ཚལ་བཞིན། །ཕྱོགས་རིས་བྲལ་བར་རྒྱས་བྱེད་ཤོག །ཅེས་པའང་རྒྱུད་ངང་འགྲེལ་པའི་དགོངས་པ་མ་འཁྲུལ་པའི་མན་ངག་ཚད་མ་གསལ་བར་བྱེད་པའི་རྒྱན་དུ། གཟུར་གནས་དཔྱོད་ལྡན་བྱུང་ན་ལག་ལེན་ལ་ཕན་དུ་རེ་བའི་ལྷག་པའི་བསམ་པས་ཀུན་ནས་བསླངས་ཏེ། ཀརྨ་ངས་
དབང་ཡོན་ཏན་རྒྱ་མཚོའམ་བློ་གྲོས་མཐའ་ཡས་ཞེས་པའི་ཀུ་སཱ་ལིས་དཔལ་ཀུན་སྤུངས་པའི་ཡང་ཁོད་དགའ་བའི་ཚལ་དུ་བགྱིས་པ་དགེ་ལེགས་འཕེལ།། ༈ །།དཔལ་ཚོགས་ཀྱི་བདག་པོའི་འཁོར་ལོ་བྲི་སྒྲུབ་རབ་གནས་དང་བཅས་པ་བཞུགས། ཨོཾ་སྭ་སྟི། ཚོགས་བདག་འཁོར་ལོ་ནི། དར་དམར་ལ་གསེར་རས། རྒྱ་ཤོག་ལ་རྒྱ་མཚལ་གྱིས། མུ་ཁྱུད་ལྔ་པ་རྩིབས་བརྒྱད་དང་བཅས་པའི་ལྟེ་བར་ཧཱུྃ་ཧྲཱིཿབྷཱུྃ་མཐར། གུ་ག་་པ་ཏ་ཡེ་དཱ་ན་ལ་ཏི་ས་ཡ་རི་ཝཱ་ར་པུཥྚི༚་ཀུ་རུ་ཨོཾ་གྱི་མཇུག་ཏུ་རྒྱས་པའི་སྤེལ་ཚིག་འདོང་གསོལ་སྦྱར། གཉིས་པ་ལ། ཨོཾ་བཛྲ་ཨེ་དུ་ཤ་མ་ཛ་ཏ་ག་ཏ་པེ་ཏ་ཨཱ་ཀརྵ་ཡ་དཱ་ན་པ་སུ་ཨཱ་ཡུཿཔུཎྱཻ་པུཥྚི༚་ཀུ་རུ་སྭཱ་ཧཱ། ག་ག་ག་ག་ག་རྣམས་ཀྱི་མཐར་སྤེལ་ཚིག་གསུམ་པར་རྩིབས་བརྒྱད་ལ་ག་བཞི་པ་ལ་རྟེན་འབྲེལ་སྙིང་པོ། ལྔ་པ་བཀྲ་ཤིས་རྟགས་བརྒྱད་བྲི། དེ་རྗེས་དང་རས་གཙང་མ་བཏིང་པའི་གཞིའི་སྟེང་དུ་རིན་པོ་ཆེའི་སྣོད་འབྲས་བུས་བཀང་བའི་དར་དུ་འཁོར་ལོ་བཞག་སློབ་དཔོན་ལྷའི་ང་རྒྱལ་ལ་གནས་པས་སྦྱང་བ་གསུམ་སྔོན་དུ་འགྲོ་བས་བགེགས་བསླད། གུ་གུལ་གྱིས་བདུག །མཎྜལ་ཟླ་གམ་དམར་པོ་པདྨ་འདབ་བརྒྱད་སྟེང་འབྲུ་སྣོད་དང་བཅས་ཏེ་བཞག །མཐར་མཆོད་གཏོར་གྱིས་བསྐོར་འབྱུང་འདུལ་ལྟ་བུའི་བདག་བསྐྱེད་སྔོན་དུ་འགྲོ་བས། མཆོད་པ་བསང་སྦྱང་། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་གྱུར་པའི། མཆོད་
ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དངས་ཤིང་ཐོགས་པ་མེད་པ་ནམ་མཁའ་དང་མཉམ་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ། ཞེས་པ་ནས། ཤབྡ་ཨཱཿཧཱུྃ། འཁོར་ལོ་སང་སྦྱང་། སྟོང་པ་ཉིད་དུ་གྱུར། སྟོང་པའི་ངང་ལས་བཻ་ཌཱུརྻའི་བྲག་རི་བརྩེགས་པའི་སྟེང་དུ་སྣ་ཚོགས་པདྨ་དང་། ཉི་མའི་གདན་ལ་བྱི་བ་སྔོན་པོ་མགོ་གཡས་སུ་བསྟན་པའི་སྟེང་དུ་གཿཡོངས་སུ་གྱུར་པ་ལས་ཚོགས་ཀྱི་བདག་པོ་སྐུ་མདོག་དམར་པོ་གླང་པོ་ཆེའི་གདོང་པ་ཅན། རལ་པའི་ཐོར་ཅོག་ལ་རིན་པོ་ཆེ་དང་མེ་ཏོག་གིས་བརྒྱ་པ། ཕྱག་གཡས་པ་རྣམས་ན། དགྲ་སྟེ། མདའ་ཆེན། ལྕགས་ཀྱུ། རྡོ་རྗེ། རལ་གྲི། འཕང་མདུང་རྣམས་དང་། གཡོན་པ་རྣམས་ན། གཏུན་ཤིང་། གཞུ། ཁ་ཊྭྃ་ག་ཁྲག་གིས་གང་བའི་ཐོད་པ། ཤ་ཆེན་གྱིས་གང་བའི་ཐོད་པ། ཕུབ་དང་བདན་བརྟེན་ནས་འཛིན་པ། དར་གྱི་ཤམ་ཐབས་དང་རིན་པོ་ཆེའི་ཕྲེང་བ་ཅན། ཞབས་གཡས་བསྐུམས་ཤིང་། གཡོན་བརྐྱང་བས་བཞུགས་པ། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་གྱུར། ཐུགས་ཀའི་ཧཱུྃ་ལས་འོད་ཟེར་འཕྲོས། རང་བཞིན་གྱི་གནས་ནས་ཐུགས་རྗེ་ཆེན་པོའི་རྣམ་
འཕྲུལ་ཚོགས་ཀྱི་བདག་པོ་འཁོར་དང་བཅས་པ་སྤྱན་དྲངས། ཧཱུྃ། རང་བཞིན་དག་པ་བྱང་ཤར་ཕྱོགས་མཚམས་ནས། །ཐུགས་རྗེ་ཆེན་པོ་ཚོགས་བདག་སྐུར་སྤྲུལ་པ། །མཆོད་ཅིང་བསྒྲུབ་པའི་གནས་འདིར་སྤྱན་འདྲེན་ན། །ཐོགས་པ་མེད་པར་མྱུར་དུ་གཤེགས་སུ་གསོལ། །བཛྲ་ས་མ་ཡ་ཛ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས། དབང་གི་ལྷ་རྣམས་སྤྱན་དྲངས། དབང་ལྷས་དབང་བསྐུར། འོད་དཔག་མེད་ཀྱིས་དབུར་བརྒྱན་པར་གྱུར། ཨོཾ་ག་་པ་ཏི་ཨརྒྷཾ་པྲ་ཏཱིཙྪ་ཧཱུྃ་སྭཱ་ཧཱ། ཞེས་སོགས་ཀྱིས་མཆོད། སྤྱན་རས་གཟིགས་དབང་ཐུགས་རྗེའི་བདག་ཉིད་ཁྱོད། །འགྲོ་རྣམས་དབུལ་ཕོངས་སེལ་མཛད་ནོར་ལྷར་སྤྲུལ། །དགོས་འདོད་སྩོལ་ཕྱིར་གསེར་གྱི་ཁྲི་ལ་བཞུགས། །ནོར་གྱི་འགྱུར་གནས་ཁྱོད་ལ་བདག་བསྟོད་དོ། །ཚོགས་བདག་གི་ཐུགས་ཀར་ཉི་མིའི་གདན་ལ་གཿཡིག་གི་མཐར་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས། འཇིག་རྟེན་ཁམས་ཀྱི་དཔལ་འབྱོར་བཀྲག་མདངས་གཟི་བརྗིད་ཐམས་ཅད་འོད་ཟེར་གྱི་རྣམ་པར་སྤྱན་དྲངས། སྦྱིན་བདག་དང་བདག་སོགས་སེམས་ཅན་ཐམས་ཅད་ལ་ཐིམ་པས་དཔལ་འབྱོར་བཀྲག་མདངས་གཟི་བརྗིད་ཕུན་སུམ་ཚོགས་པར་གྱུར། ཨོཾ་ཨཱཿག་་ཧཱུྃ་སྭཱ་ཧཱ། ཞེས་དང་། ཨོཾ་གུ་ག་་པ་ཏ་ཡ་དཱ་
ན་པ་ཏི་ས་པ་རི་ཝཱ་ར་པུཥྟི༚་ཀུ་རུ་ཨོཾ། ཨོཾ་བཛྲ་ཨ་དུ་ཤ་མ་ཛ་ཏ་ག་ཏ་པེ་ཏ་ཨཱ་ཀརྵ་ཡ་དཱ་ན་བ་སུ་ཨཱ་ཡུཿ པུཎྱཻ་པུཥྚི༚་ཀུ་རུ་སྭཱ་ཧཱ། ག་ག་ག་ག་ག །ཞེས་ཅིང་གྲུབ་བཟླ། ཡི་གེ་བརྒྱ་བ་བརྗོད། གཏོར་མ་བསད་སྦྱང་། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་ལྷ་རྫས་ལས་གྲུབ་པའི་གཏོར་མ་དྭངས་ཤིང་ཐོགས་པ་མེད་པ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས། ལྗགས་འོད་ཟེར་གྱི་སྤུ་གུས་གཏོར་མའི་བཅུད་དྲངས་ཏེ་གསོལ་བར་གྱུར། ཨོཾ་ག་་པ་ཏི་ཨི་དཾ་བ་ལིངྷ་ཁ་ཁ་ཁཱ་ཧི་ཁཱ་ཧི། གསུམ་གྱིས་དབུ་ལ། གོང་བཞིན་མཆོད་བསྟོད་བྱ། ཚོགས་ཀྱི་བདག་པོ་སྒྲུབ་གཞི་འདི་ལ་བརྟན་པར་བཞུགས་ནས་རྟེན་ལ་མཆོད་པ་དང་། སྦྱིན་བདག་དང་བདག་སོགས་སེམས་ཅན་ཐམས་ཅད་ལ་དཔལ་འབྱོར་ཕུན་སུམ་ཚོགས་པ་རྒྱུན་མི་ཆད་དུ་འབྱུང་བར་མཛད་དུ་གསོལ། ཞེས་འདོད་དོན་ལ་གསོལ་བ་གདབ། ཚོགས་ཀྱི་བདག་པོ་འོད་དུ་ཞུ་ནས་བྲིས་པའི་འཁོར་ལོའི་རྣམ་པར་གྱུར། །ཅེས་འོད་ཞུ་དང་། བརྟེན་བཞུགས་བྱས་ལ་ཡེ་དྷར་བརྗོད་ཅིང་མེ་ཏོག་འཐོར་རོ། །ཤིས་བརྗོད་གང་འོས་བྱ། འདི་ནི་དཀྱུས་མཐུན་ཙམ་ཡིན་ལ་ཁྱད་པར་གྱི་ལག་ལེན་ནི། དམར་པོ་སྐོར་གསུམ་གྱི་གཞུང་སོགས་ལས་ཤེས་པར་བྱ་དགོས་སོ། །ཞེས་པའང་ཉེར་མཁོའི་ཕྱིར་དུ་གུ་ས་མཁས་པའི་ཡིག་ཆ་ལན་བཏུས་པ་དགེའོ། །
ཤོག་སྟོང་།