སྤར་བྱང་།
ཨོཾ་སྭ་སྟི། །མཐའ་ཡས་ཞིང་ཁམས་པདྨོའི་སྐྱེད་ཚལ་དུ། །ངོ་མཚར་ཨུ་དུམྦ་རའི་དཔལ་ཡོན་ཅན། །བཻ་ཌཱུརྻ་སྣང་ཞིང་གི་མགོན་པོ་སོགས། །བདེ་གཤེགས་མཆེད་བདུན་སྲས་བཅས་ལན་ཅིག་ཏུ། ༡ །མཆོད་པའི་བསོད་ནམས་ནམ་མཁའི་མཐའ་དང་མཉམ། །མཚན་ཙམ་ཐོས་ཀྱང་ངན་འགྲོའི་སྐྱེ་སྒོ་གཅོད། །སྙིགས་མའི་དུས་འདིར་བྱིན་རླབས་ལྷག་མྱུར་བས། །སྟོན་པ་ཐུགས་རྗེ་ཅན་དེས་ཆེད་དུ་བསྟན། ༢ །དེ་དོན་གཟིགས་པའི་ཆོས་སྤྱན་རྡུལ་བྲལ་བ། །ཆོས་རྗེ་ཞྭ་ལུ་པ་དང་མཁན་ཆེན་མཆོག །འདྲེན་མཆོག་ཟུང་གིས་མཛད་པའི་ཆོ་ག་དང་། །གཞན་དོན་ཟུར་འདེབས་བཅས་པའི་ཆོས་སྦྱིན་ནི། ༣ །རིས་མེད་ཀུན་དགའི་དགའ་སྟོན་སྦྱིན་པའི་སླད། །འཚོ་མཛད་བཀྲ་ཤིས་ཐུགས་བསྐྱེད་མཆོག་བཟང་པོས། །ལྷུན་གྲུབ་སྟེང་དུ་སྤར་ཡིག་ནོར་བུའི་མཛོད། །དད་དང་འབྱོར་པ་རྒྱ་མཚོའི་བཅུང་དུ་བསྐྲུན། ༤ །དགེ་བས་འདིར་འབྲེལ་སྐྱེ་དགུ་མ་ལུས་པ། །དག་པའི་ཞིང་དུ་རྐང་གཉིས་གཙོ་རྣམས་ཀྱི། །ཐུགས་རྗེའི་ཕྱག་གིས་བདེ་བླག་ཉིད་དྲངས་ནས། །བྱང་ཆུབ་སྤྱོད་པའི་ཕ་རོལ་ཕྱིན་གྱུར་ཅིག །ཅེས་པའང་མ་ཕྱི་ཞུ་དག་དང་ཆབ་གཅིག་ཀརྨ་ངག་དབང་ཡོན་ཏན་རྒྱ་མཚོའམ། བློ་གྲོས་མཐའ་ཡས་པའི་སྡེས་སྨྲས་པ་སརྦ་དཱ་མངྒ་ལཾ་བྷ་བནྟུ།། ༈ །།ཨོཾ་སྭ་སྟི་
སྤྱན་རས་གཟིགས་དངོས་རྒྱལ་དབང་ཀརྨ་པ། །རིམ་བྱོན་གཙོར་གྱུར་བཀའ་བརྒྱུད་གསེར་གྱི་ཕྲེང་། །མཆོད་ཅིང་གསོལ་བ་འདེབས་པའི་ཆོ་ག་ནི། །དྲི་མེད་འདོད་འཇོ་རིན་ཆེན་བྱེ་པའི་དབྱིག །ཐམས་ཅད་མཁྱེན་པ་རྒྱལ་མཆོག་བཅུ་བཞི་པའི། །གསུང་རབ་ནོར་བུའི་གླིང་ནས་བྱོན་པ་འདི། །དགེ་སློང་ཀརྨ་ཕྲིན་ལས་དད་གུས་དང་། །ལྷག་པའི་བསམ་པས་སྤར་གྱི་ཡོན་སྦྱར་ཏེ། །ཡི་གེའི་ཕྱི་མོར་བསྒྲུབས་པའི་དགེ་བ་ཡིས། །རྒྱལ་དབང་ཀརྨ་པ་དང་འབྲུག་ཆེན་རྗེ། །ཏཱ་ཡི་སི་ཏུ་དཔལ་ལྡན་དཔའ་བོ་སོགས། །ཡབ་སྲས་སློབ་མར་བཅས་པའི་ཞབས་བརྟན་ཅིང་། །སྒྲུབ་བརྒྱུད་བསྟན་པ་དར་རྒྱས་ཡུན་དུ་གནས། །འཇིག་རྟེན་ཁམས་ཀུན་བདེ་ལེགས་སྣང་བས་ཁྱབ། །བདག་སོགས་རིང་མིན་བཀའ་བརྒྱུད་རིན་ཆེན་གྱི། །རྣམ་ཐར་རྒྱ་མཚོའི་དཔལ་ལ་དབང་འབྱོར་ནས། །དོན་གཉིས་ལྷུན་གྲུབ་ཐམས་ཅད་གཟིགས་གྱུར་ཅིག །ཅེས་པའང་དགེ་རྒན་གང་དེའི་ཐུགས་བཞེད་ལྟར་ཀརྨ་ངག་དབང་ཡོན་ཏན་རྒྱ་མཚོས་ཞུ་དག་དང་ཆབ་ཅིག་བྲིས་པ་དགེ་ལེགས་འཕེལ།། །།