སོ་ཐར་གྱི་བཤགས་སྡོམ་ཞི་གནས་གསོ་སྦྱོང་དང་འབྲེལ་པ་ཉེས་ལྟུང་དག་བྱེད་གངྒཱའི་ཆུ་རྒྱུན།
སོ་ཐར་གྱི་བཤགས་སྡོམ་ཞི་གནས་གསོ་སྦྱོང་དང་འབྲེལ་པ་ཉེས་ལྟུང་དག་བྱེད་གངྒཱའི་ཆུ་རྒྱུན་ཞེས་བྱ་བ་བཞུགས་སོ། །
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བ། ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། མཉམ་མེད་ཤཱཀྱའི་རྒྱལ་པོའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་གཏུགས་ཏེ་གུས་པས་ཕྱག་འཚལ་ལོ། །རྣམ་དག་སྐུ་མངའ་མཆོག་ཏུ་གཟུགས་བཟང་བ། །ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །གྲགས་པ་འཇིག་རྟེན་གསུམ་ན་ལྷང་ངེ་བ། །མགོན་པོ་ཤཱཀྱ་སེང་གེ་དགོངས་སུ་གསོལ། །ཕྱོགས་བཅུར་བཞུགས་པའི་
རྒྱལ་བ་མ་ལུས་དང་། །བྱང་ཆུབ་སེམས་དང་ཉན་རང་དགེ་འདུན་ཚོགས། །རྡུལ་གཅིག་སྟེང་ན་རྡུལ་སྙེད་བཞུགས་པ་ཡི། །འཕགས་པ་རྣམས་ཀྱང་བདག་ལ་དགོངས་སུ་གསོལ། །ཀུན་མཁྱེན་ཐར་པའི་ལམ་སྟོན་ཤཱཀྱའི་རྒྱལ། །སྟོན་དང་བསྟན་པ་གཉིས་གྱུར་ཆོས་འདུལ་བ། །སྐྱེས་བུ་ཟུང་བཞི་ཚོགས་མཆོག་དགེ་འདུན་གྱི། །རྗེས་སུ་སློབ་ནས་སོ་ཐར་རིས་བརྒྱད་པོའི། །སྤང་འཇུག་བསླབ་བྱ་རྒྱུད་ལ་འབྱོར་པ་དང་། །བཅས་འགལ་ཉེས་ལྟུང་བྱང་བར་བྱིན་གྱིས་རློབས། །ལྟུང་དང་འབྱུང་དང་དེ་ལྡང་ངེས་པར་འབྱུང་། །གང་ཟག་བཅས་དང་རབ་དབྱེར་རྣམ་ངེས་པའི། །ཆོས་འདུལ་མ་ཐོས་སྤང་
བླང་མ་ཤེས་དང་། །བསླབ་ལ་མ་གུས་ཤེས་ཀྱང་བག་མེད་དབང་། །ཉོན་མོངས་མང་བས་ཚུལ་བཞིན་བསྒྲུབ་མ་ནུས། །ལྟུང་བའི་སྒོ་བཞིར་ཞུགས་པ་མཐོལ་ལོ་བཤགས། །ཐོག་མར་ངེས་འབྱུང་བསམ་པས་མ་ཟིན་དང་། །བར་དུ་རྟོག་དཔྱོད་མ་ཞུགས་བསྲུང་སྡོམ་འཆལ། །ཐ་མ་ཚུལ་ཁྲིམས་བརྟུལ་ཞུགས་མཆོག་འཛིན་པས། །བསླབ་པ་དྲི་བཅས་གྱུར་པ་མཐོལ༴ །མི་མཐུན་སེམས་སྐྱེས་ཐོབ་བྱུང་སེམས་མ་སྐྱེས། །སྐྱེ་བའི་གེགས་རྣམས་ཤེས་བཞིན་དང་དུ་བླངས། །ལོག་ལྟ་ཆོས་སྤང་བསླབ་པ་སྤང་འདོད་སོགས། །སྡོམ་པ་བཏང་ཡང་དུས་མཚམས་ངོ་མ་ཤེས། །བླངས་ལ་མ་ཐོབ་ཉེས་རྣམས་མཐོལ་ལོ༴ །སྐྱབས་འགྲོའི་བསླབ་བྱ་དགག་དང་བསྒྲུབ་ཕྱོགས་དྲུག །ཆ་མཐུན་ལྔ་དང་བསྙེན་གནས་ཡན་ལག་བརྒྱད། །དགེ་བསྙེན་རྩ་བཞི་ཆང་ལྔ་དགེ་ཚུལ་གྱི། །ཕམ་འདྲ་བཤགས་བྱའི་ཉེས་བྱས་ཉམས་གསུམ་སོགས། །བསླབ་ཚིགས་སྔ་མར་འགལ་རྣམས་མཐོལ༴ །ཁ་སྐོང་ཆོས་དང་མི་ལྡན་ལས་གྲལ་ཞུགས། །མ་འདུས་འདུས་པ་ཕྱིར་ཟློག་མི་མཐུན་སྐྱེད། །བརྟན་མཁས་མ་ཚང་མཁན་པོའི་བྱ་བ་བྱས། །གནས་པ་སློབ་མར་ནད་གཡོག་འགྱོད་བསལ་དང་། །སྡིག་ལྟ་སྤོང་སོགས་བུ་ཡི་འདུ་ཤེས་ཀྱིས། །
སྙིང་ནས་ཕན་པ་མ་བཏགས་མཐོལ༴ །མཁན་སློབ་གསང་སྟོན་གནས་ཀློག་སློབ་དཔོན་ལྔར། །སྟོན་པའི་འདུ་ཤེས་མ་བཞག་ཚུལ་འཆལ་དང་། །མཉམ་འགྲོགས་སྤང་བླང་སློབ་པའི་གནས་མ་བསྟེན། །བསྙེན་པར་རྫོགས་ནས་བཅུ་དྲུག་ལོ་ལོན་ཀྱང་། །འདུལ་བའི་སྡེ་སྣོད་མི་ཤེས་བྱིས་པ་དང་། །ཚུལ་འཆལ་སྲེ་ད་ལྟ་བུར་གྱུར་བཞིན་ཏུ། །དགེ་འདུན་སྤྱི་ཡི་དཀོར་སྤྱོད་ནན་ཏུར་གྱི། །ཆད་ལས་དང་དུ་མ་བླངས་མཐོལ༴ །རྨ་ཡི་སྒོ་གསུམ་དག་ལ་མི་ཚངས་སྤྱོད། །ཡུལ་དུས་རིན་ཐང་ཚང་བ་མ་བྱིན་བླངས། །མི་རུ་ཆགས་དང་མི་སྲོག་བསམ་བཞིན་གཅོད། །མངོན་ཤེས་བཟང་བརྫུ་མི་ཆོས་བླ་མའི་རྫུན། །གཞི་བསམ་སྦྱོར་བ་མཐར་ཐུག་ཚང་བ་ཡིས། །འདི་བཞི་གང་རུང་གཅིག་སྤྱོད་འཆབ་བཅས་པས། །དགེ་སློང་སྡོམ་པ་རྩད་ནས་གཅོད་གྱུར་ཏེ། །ཆུ་ཤིང་རུལ་པ་ཇི་བཞིན་དགེ་འདུན་གྱི། །གྲལ་ལ་མི་དབང་བཞིན་ཏུ་ཕྱིན་པ་དང་། །ཡན་ལག་མ་ཚང་སྦོམ་པོ་ལྕི་ཡང་སོགས། །ཕས་ཕམ་ལྟུང་བས་གོས་པ་མཐོལ༴ །བསྒྲོད་མིན་གནས་སུ་ཁུ་བ་འབྱིན་པ་དང་། །ཆགས་པས་བུད་མེད་ལུས་ཀྱི་ཆ་ཤས་འཛིན། །འཁྲིག་ཚིག་རྗེན་སྨྲ་འཁྲིག་པའི་བསྙེན་བཀུར་བསྡགས། །ཕོ་མོ་
ཕན་ཚུན་སྨྱན་བྱས་འདུས་ཏེ་འཕྲད། །རང་དོན་ཚང་ལྷག་ཁང་པ་ཁང་ཆེན་བརྩིགས། །བརྗོད་གཞི་མེད་དང་སྙད་ཀ་བག་ཙམ་ལ། །བརྟེན་ནས་དགེ་སློང་སྐུར་བཏབ་དགེ་འདུན་དབྱེན། །དབྱེན་དེའི་རྗེས་ཕྱོགས་བསླབ་པ་དང་འགལ་བས། །ཁྱིམ་སུན་འབྱིན་ཚེ་སྐྲོང་བྱེད་ལ་བསྙོན་པ། །ལྟུང་བྱུང་བསྐུལ་ཚེ་བཀའ་བློ་མི་བདེ་རྣམས། །གང་སྤྱད་སྡོམ་པའི་ལྷག་ལས་མ་ལུས་ཀྱང་། །ངོ་ཚ་མེད་པས་སྦོ་མགུ་མ་སྤྱད་པ། །ལྷག་ལྟུང་བཅུ་གསུམ་ཕོག་པ་མཐོལ༴ །རང་གི་གོས་ལྷག་ཞག་བཅུ་འདས་པར་འཆང་། །ཆོས་གོས་དང་བྲལ་ཞག་གཅིག་ལོན་པ་དང་། །གོས་རྒྱུ་ཟླ་གཅིག་འཇོག་དང་དགེ་སློང་མར། །ཆོས་གོས་འཁྲུར་འཇུག་དེ་ལས་གོས་རྒྱུ་ལེན། །ཉེ་དུ་མིན་པའི་ཁྱིམ་པར་གོས་རྒྱུ་སློང་། །སྟེར་ན་སྟོད་གཡོག་སྨད་གཡོག་ལྷག་པོར་ལེན། །རང་ལ་སྟེར་བསམ་ཆོས་གོས་གནས་དཔགས་པ། །རིན་དང་ཁྲུ་ཚད་ཀྱིས་སློང་བརྟགས་དྲན་སློང་། །གོས་རིན་རིན་ཆེན་བསྐུར་བ་ལེན་རྣམས་དང་། །སྲིན་བལ་ནང་ཚང་ཅན་གྱི་མལ་སྟན་བྱེད། །དཀོན་སར་བལ་ནག་འབའ་ཞིག་བཏིང་དང་སྟན། །ཆ་གཉིས་ལྷག་བྱེད་ལོ་དྲུག་མ་སོང་བར། །སྟན་གསར་སྒྲུབ་དང་བདེ་གཤེགས་མཐོ་གང་བའི། །རྙིང་པས་མ་བླན་གདིང་བ་གསར་པ་
བཏིང་། །བལ་ནག་རྙེད་ནས་དཔག་ཚད་གསུམ་མཐར་ཁྱེར། །དགེ་སློང་མ་ལ་བལ་འཁྲུ་རྨེལ་བཅུག་དང་། །གསེར་དངུལ་ལེན་དང་ཚོང་འབུན་མངོན་ཚན་ཅན། །ཆེད་དུ་ཚོང་བྱེད་ལྷུང་བཟེད་བྱིན་མ་བརླབས། །ཞག་བཅུ་འདས་འཆང་ལྷུང་བཟེད་ཟུང་འཆང་བ། །གླ་རྔན་མེད་པར་འཐགས་འཇུག་ཐགས་རྒྱ་སྐྱེད། །དགེ་སློང་གོས་བྱིན་སླར་ཕྲོགས་བརྟད་བྱུང་གོས། །སྦྱིན་དུས་བཤད་ལས་སྔ་བར་བདག་གིར་བྱས། །དགོན་པར་འཇིགས་བཅས་གོས་བྲལ་ཞག་བདུན་འདས། །རས་ཆེན་དགག་དབྱེ་ཟིན་ཀྱང་ཟླ་ཕྱེད་འདས། །དགེ་འདུན་བསྔོས་པའི་རྙེད་པ་བདག་ཏུ་བཟུང་། །སྨན་བཞི་དུས་ལས་འདས་པར་གསོག་འཇོག་སྟེ། །གང་ལ་ལྟུང་བྱུང་དངོས་པོ་དེ་སྤངས་པས། །མ་བཅོས་རྣམ་སྨིན་ངན་འགྲོར་ལྟུང་བྱེད་པའི། །སྤང་ལྟུང་སུམ་ཅུས་གོས་པ་མཐོལ༴ །ཤེས་བཞིན་རྫུན་སྨྲ་དགེ་སློང་སྐྱོན་ནས་བརྗོད། །ཕྲ་མས་འབྱེད་དང་སྐྱོ་སྔོགས་བཟླུམས་ཀྱང་དབྱེ། །བུད་མེད་ཆོས་སྟོན་བསྙེན་པར་མ་རྫོགས་དང་། །ལྷན་ཅིག་ཆོས་འདོན་གནས་ངན་ལེན་ལྟུང་བརྗོད། །མི་ཆོས་བླ་མ་བདེན་སྨྲ་བཤེས་ངོར་འཕྱ། །བསླབ་གཞི་ཁྱད་གསོད་ས་བོན་སྐྱེ་བ་གཅོད། །བདག་གི་ངོར་འཕྱ་བསྒོ་བ་རྣར་
གཟོན་ཏེ། །ལྟུང་བྱུང་གླེང་ལ་མ་ཐོས་ལན་གཞན་འདེབས། །ཁྲི་དང་གདིང་བ་མ་བསྡུས་བཏིང་སྟེ་སོང་། །དགེ་སློང་སྐྲོད་དང་ཐོ་འཚམས་ཕྱིས་གནོན་བྱས། །མལ་ཁྲིས་བུག་དབྱུང་སྲོག་ཆགས་ལྡན་པའི་ཆུ། །རྩྭར་འདེབས་གཙུག་ལག་ཕ་གུ་རིམ་གསུམ་ལྷག །ཤེས་བཞིན་འཇིག་རྐྱེན་སར་བརྩིགས་དགེ་སློང་མར། །མ་བརྐོས་ཆོས་སྟོན་བསྐོས་ཀྱང་ཉི་ནུབ་དང་། ཁ་ཟས་ཕྱིར་སྟོན་གོས་བཙེམས་ཆོས་གོས་སྦྱིན། །དོན་མཐུན་ལམ་འགྲོགས་གྲུར་ཞུགས་གྱེན་མཐུར་འགྲོ། །དབེན་པར་གཅིག་འདུག་པ་ངང་མཉམ་དུ་འགྲེང་། །རྫུན་གྱིས་སྦྱོར་བཅུག་དུས་རུང་ཁ་ཟས་ཟོས། །ཡང་ཡང་ཟས་ཟ་མུ་སྟེགས་འདུག་པའི་སར། །ཞག་གཅིག་ལྷག་བསྡད་ཟ་དང་ལྷུང་བཟེད་དོ། །ཟོས་ཤིང་ཟོས་རྗེས་བཟའ་དང་བཅའ་བ་ཟ། །སྤང་ཟས་ལྟུང་འབྱུང་ཆེད་དུ་རྫུན་གྱིས་སྟོབ། །གནང་མིན་མཚམས་ནང་ལོགས་སུ་འདུས་ནས་ཟ། །དུས་མིན་ཕྱེད་ཡོལ་ཟ་དང་གསོག་འཇོག་ཟ། །བྱིན་ལེན་མ་བྱས་སྨན་བཞི་ཁ་རུ་མེད། །བསོད་པ་ཞིམ་པའི་ཟས་སློང་སྲོག་ཆགས་བཅས། །ཆུར་སྤྱོད་ཉལ་པོ་བྱེད་པའི་ཁྱིམ་དུ་ཉལ། །ཉེར་འགྲེང་གཅེར་བུ་པ་ལ་ཁ་ཟས་བྱིན། །དམག་བལྟ་དམག་སར་ཞག་གཉིས་ལྷག་
པར་བསྡད། །དམག་གི་རུ་བཀོད་བྱེད་དང་དགེ་སློང་རྡེག །བརྡེག་རྩོམ་གནས་ངན་ལེན་གྱི་ལྟུང་བ་འཆབ། །དགེ་སློང་ཟས་གཅོད་དུས་མིན་མེ་ལ་རེག །དགེ་འདུན་ལས་ལ་འདུན་ཕུལ་ཕྱིར་ལྡོག་སྨྲ། །བསྙེན་མ་རྫོགས་དང་ནུབ་གཉིས་ལྷག་པར་ཉལ། །སྡིག་ལྟ་མི་བཏང་སྤངས་པའི་རྗེས་སུ་ཕྱོགས། །དགེ་ཚུལ་བསྙིལ་དང་ཟང་ཟིང་ཆོས་ལོངས་སྤྱོད། །རུང་བའི་ཚོན་མིན་ཁ་དོག་ཅན་གོས་གྱོན། །རིན་ཆེན་དམག་ཆས་རྒྱན་དང་རོལ་མོར་རེག །གནང་བའི་དུས་མིན་ཁྲུས་བྱེད་དུད་འགྲོ་གསོད། །དགེ་སློང་གཞན་ལ་འགྱོད་སྐྱེད་གག་ཚིལ་དགག །ཆུར་རྩེ་བུད་མེད་གནས་གཅིག་ཉལ་བ་དང་། །དགེ་སློང་དང་ངས་བྱེད་དེ་ཡི་ཡོ་བྱད་སྦེད། །སྔར་བྱིན་གདེང་མེད་སླར་སླངས་སྤྱོད་པ་དང་། །གཞི་མེད་སྐུར་བཏབ་གྲོགས་མེད་བུད་མེད་དང་། །རྐུན་པོ་དང་འགྲོགས་རྒྱང་གྲགས་གཅིག་ཏུ་ཕྱིན། །ཉི་ཤུ་མ་ལོན་པ་ལ་བསྙེན་རྫོགས་ཕོག །ས་བརྐོ་མགྲོན་སར་དུས་ལས་ལྷག་པར་ཟོས། །སློབ་པ་ཁྱད་གསོད་འཐབ་པའི་ཉན་རྣ་བྱེད། །ལས་གྲལ་མི་སྨྲ་འགྲོ་དང་མ་གུས་འགལ། །ཆང་འཐུང་དུས་མིན་ཕྱི་དྲོ་གྲོང་དུ་རྒྱུ། །ཟས་བཅས་སྔ་ཕྱི་ཁྱིམ་གསུམ་ཁྱིམ་བཞི་འདས། །རྒྱལ་པོ་བཙུན་མོར་རྩེ་བའི་
ཁབ་ཏུ་ཉལ། །མདོ་སོགས་འདོན་ལ་ད་གདོད་ཤེས་ཟེར་དང་། །རིན་ཆེན་ཁབ་རལ་ཁྲི་རྐང་ཆེ་མཐོ་བཟོས། །ཤིང་བལ་དགེ་འདུན་མལ་དུ་བརྡལ་ཏེ་བགོས། །གདིང་གཡན་རས་ཆེན་ཆོས་གོས་ཚད་ལྷག་འཆང་། །སྤྱད་ན་ངན་སོང་ལྟུང་བྱེད་འབའ་ཞིག་པ། །དགུ་བཅུ་ཐམ་པས་གོས་པ་མཐོལ༴ །དགེ་སློང་མ་ལས་གྲོང་དུ་ཟས་བླངས་ཟོས། །ཁྱིམ་དུ་ངོས་མགྲོན་ཟས་སྦྱིན་མ་ཟློག་དང་། །བསླབ་སྡོམ་བྱིན་ལས་རུང་བ་མིན་པ་བླངས། །ནགས་མ་མྱུལ་བར་དགོན་པར་བླངས་ཟོས་བཞི། །སོ་སོར་སྨྲེ་སྔགས་འགྱོད་བཅས་མཐོལ༴ །ཤམ་ཐབས་ཟླུམ་མིན་རྩིངས་འཇོལ་གླང་སྣ་འདྲ། །ལྟེ་བ་དང་འཕུར་མ་གདེངས་ཀ་ལྟ་བུ་བདུན། །སྣམ་སྦྱར་བླ་གོས་ཟླུམ་པོར་མ་བགོས་དང་། །ཧ་ཅང་རིང་ཐུང་སྟོད་གསུམ་གོས་ཀྱི་བཅུ། །ལུས་ངག་མ་བསྡམས་ཆོས་གོས་ལེགས་མ་བགོས། །ཅ་ཅོ་མིག་གཡེངས་གཉའ་ཤིང་གང་ཙམ་ལས། །རིང་ལྟ་མགོ་བཏུམས་གོས་བརྫེས་ཕྲག་ལ་གཟར། །ལག་པ་གཉའ་གོང་བསྣོལ་དང་ལྟག་པར་བསྣོལ། །མཆོད་རྒྱང་ཆང་པའི་བྲང་དང་རྟིང་བཙུགས་འགྲོ། །ལག་པ་དཀུར་བརྟེན་ལུས་བསྒྱུར་ལག་པ་གཡོབས། །མགོ་བསྒྱུར་ཕྲག་པ་སྤྲད་དང་ལག་པ་སྦྲེལ། །ཁྱིམ་འགྲོའི་སྤྱོད་ཡུལ་ཉི་ཤུར་འགལ་
བ་དང་། །སྟན་ལ་མ་བསྒས་མ་བརྟགས་འཕོངས་སྡེབ་འདུག །རྐང་བརྐྱངས་བསྣོལ་དང་བརླ་བསྣོལ་ལོང་བུ་བརྩེགས། །ཁྲི་འོག་རྐང་དགུག་རྐང་པ་ཕན་ཚུན་གདངས། །འདོམས་མཐོང་འདུག་ཚུལ་སྤང་བྱ་དགུ་པོ་དང་། །ལག་པས་འགྲམ་བརྟེན་སྟན་ཁུར་སོང་བ་དང་། །ལེགས་པར་མི་ལེན་ཁ་ད་ཆད་དུ་ལེན། །ཟན་དང་བྱ་ན་མཉམ་པར་མི་ལེན་དང་། །མཐར་ཆགས་མི་ལེན་ལྷུང་བཟེད་ཟུར་མིག་ལྟ། །བཟེད་སྔས་སྔར་བྱུང་སྦས་ནས་བཟེད་པ་དང་། །སྣོད་གཞན་སྟེང་བཟེད་ཟས་བླངས་སྐྱོན་བརྒྱད་དང་། །ལེགས་པར་མི་བཟའ་ཧ་ཅང་ཁམ་ཆེ་ཆུང་། །རན་མིན་ཟས་ལས་སྔོན་ཏུ་ཁ་གདངས་དང་། ཁ་ཟས་ཟ་བཞིན་ཚིག་སྨྲ་ཙུག་ཙུག་དང་། །ཅག་ཅག་ཧུ་ཧུ་ཕུ་ཕུ་ལྕེ་ཕྱུང་ཟ། །འབྲུ་ནས་གུད་ཕྱེ་ཟས་ལ་སྐྱོན་འཕྱ་དང་། ཁམ་གཅིག་མཁུར་སྤོ་རྐན་ཏོག་ཁམ་འཕྲོ་བཅད། །ལག་བལྡག་སྣོད་འབྱོག་ལག་སྤྲུག་སྐྱོམ་སྐྱོམ་བྱེད། །མཆོད་རྟེན་འདྲར་བྱེད་བཟའ་བའི་སྐྱོན་ཉེར་གཅིག །ལྷུང་བཟེད་འཕྱས་བཏགས་ལག་པ་ཟས་འབགས་པས། །ཆུ་སྣོད་ལ་རེག་འབགས་ཆུ་གཞན་ལ་གཏོར། །མ་དྲིས་ཁྱིམ་དུ་ཆུ་དོར་ཟས་ལྷག་བཞག །ས་རྗེན་གད་ཁ་རི་གཟར་བང་རིམ་བཞིར། །བཞག་འདྲིལ་གད་གཡང་དཀན་གཟར་
ལངས་བཞིན་འཁྲུ། །འབབ་ཆུའི་རྒྱུན་ལས་ཟློག་སྟེ་འཁྲུ་དང་གཅུ། །ལྷུང་བཟེད་སྨྱོད་ཉེས་ལ་བསྙེན་བཅུ་བཞི་དང་། །འགྲེངས་དང་ཉལ་ལ་ཆོས་བཤད་རང་ཉིད་དམའ། །མདུན་ལ་རྒྱབ་དང་ལམ་པོའི་འགྲམ་ནས་བཤད། །མགོ་གཡོགས་བརྗེས་གཟར་ལག་པ་གཉའ་ལྟག་བསྣོལ། །དོ་ཀེར་ཅན་དང་ཞྭ་གྱོན་ཅོད་པན་བཏགས། །ཕྲེང་བས་ལུས་བརྒྱན་མགོ་དཀྲིས་གླང་རྟ་ཞོན། །ཁྱོགས་དང་བཞོན་པའི་སྟེང་འདུག་མཆིལ་ལྷྭམ་གྱོན། །མཁར་བ་གདུགས་མཚོན་རལ་གྲི་དགྲ་ཆ་ཐོགས། །གོ་ཆ་གྱོན་ལ་ཆོས་བཤད་ཉེས་ཉེར་དྲུག །མི་ན་བཞིན་ཏུ་འགྲེང་སྟེ་བཤང་གཅི་དོར། །ཆུ་ནང་བཤང་གཅི་སྐྱུགས་པ་མཆིལ་སྣབས་འཕངས། །རྩྭ་སྔོན་བཤང་གཅི་དོར་བཅས་བསྒྲུབ་ཚུལ་གསུམ། །གནོད་མེད་ཤིང་ལ་མི་གང་ལྷག་པར་འཛེག །རྒྱུ་བ་གཅིག་སྟེ་གང་སྤྱད་ཉིས་བྱས་ཉིད། །བརྒྱ་དང་བཅུ་གསུམ་ལས་འདས་མཐོལ་ལོ་བཤགས། །སྤྱད་ན་ངན་འགྲོང་ལྟུང་བའི་སྡེ་ལྔ་པོས། །བྱང་གྲོལ་བར་ཆད་མི་འདོད་སྡིག་ལྟས་ཉམས། །ཕམ་པ་གང་རུང་བྱུང་བས་ཚུལ་ཁྲིམས་ཉམས། །བཅས་ལྟུང་སྤོང་བའི་ལུས་ངག་བྱ་བ་ཉམས། །ཚུལ་འཆོས་ཁ་གསག་གཞོག་སློང་རྙེད་འཚོལ་དང་། །ཐོབ་འཇལ་ལོག་འཚོ་ལྔར་སྤྱད་འཚོ་བ་ཉམས། །ཉམས་པ་
རྣམ་བཞིས་གོས་པ་མཐོལ༴ །གྲོང་དུ་འཇུག་ཚེ་བཙོན་རའི་འདུ་ཤེས་དང་། །གཙུག་ལག་ཁང་དུ་མདོ་སྡེ་བཞིན་སྤྱོད་དང་། །ཟས་ལ་ནད་ཀྱི་གཉེན་དང་འཇིག་རྟེན་གྱི། །མཐུན་འཇུག་བྱ་བར་འོན་ལོང་ལྐུག་པའི་ཚུལ། །ཉལ་ཚེ་ལུས་སེམས་མ་འཕྱར་ཐུམ་འཕྲད་ཀྱི། །འདུ་ཤེས་ལྔ་པོ་མི་ལྡན་མཐོལ། །ལུས་ན་འདུ་འཛི་སེམས་ནི་རྣམ་གཡེང་ལས། །བསྲིང་བ་གཉིས་ལྡན་འདོད་ཆུང་ཆོག་ཤེས་པས། །སྦྱངས་པའི་ཡོན་ཏན་བཅུ་གཉིས་ལ་གནས་ཤིང་། །སྤང་དང་ཀློག་པར་མ་བརྩོན་མཐོལ༴ །མཚམས་ནང་གསོ་སྦྱོང་མ་འདུས་འདུན་ཡོངས་དག །མ་བླངས་མ་ཕུལ་ལྟུང་བ་ཤེས་བཞིན་བཅབ། །སོ་ཐར་གུས་པས་མ་མཉན་ཐོས་སྒོམ་དང་། །སྲོག་ཆགས་གནོད་སྤོང་ཕྱིར་དུ་དབྱར་ཟླ་གསུམ། །གནས་མ་བཅས་སོགས་བསླབ་པ་ཡོངས་སྦྱོང་གི། །གཞི་གསུམ་དག་དང་གང་འགལ་མཐོལ༴ །ཕྱག་དར་ཁྲོད་དང་དུར་ཁྲོད་དོར་བའི་གོས། །ཆད་ལྡན་འཚོ་བའི་ཡོ་བྱད་བཅུ་གསུམ་པོ། །ཆོས་ཀྱི་རྒྱལ་མཚན་སྤངས་ནས་མི་རུང་བའི། །རྒྱུར་བྱས་ཚོན་ཆེན་བརྒྱད་ཀྱིས་བགོས་པ་ཡི། །ཁྱིམ་པའི་རྟགས་བླངས་དུས་རུང་ཐུན་ཚོད་རུང་། །ཞག་བདུན་འཚོ་བཅད་སྨན་བཞི་རང་དུས་ལས། །འདས་འཆར་བཟའ་བཏུང་རུང་
བའི་ཆུ་མ་བཏབ། །ལག་ཉར་བླངས་ཤིང་སྒོག་བཙོང་ལྟོར་ཟོས་ནས། །གཙུག་ལག་ཁང་དུ་ཕྱིན་སོགས་བདེར་གནས་པའི། །རྐྱེན་གྱི་གཞི་དང་གང་འགལ་མཐོལ༴ །གོས་སྨན་རང་སྔགས་བྱིན་གྱིས་མ་བརླབས་སོགས། །གསོལ་རྐྱང་གསོལ་བ་དང་གཉིས་དང་བཞི་ཡི། །ལས་ལ་མ་ཞུགས་ཡན་ལག་མ་ཚང་དང་། །ལྟུང་བ་ཕྱིར་བཅོས་མ་བྱས་བཏང་སྙོམས་ལུས། །རྩོད་བཞིའི་གཞི་བཏིང་ཆོས་མིན་ཕྱོགས་སུ་བལྟས། །ཆོ་ག་ཁྱད་འབྲེལ་ཉེས་པ་དག་བྱེད་ཀྱི། །གཞི་གཉིས་པོ་དང་གང་འགལ་མཐོལ༴ །གནས་མལ་ལ་སོགས་ཞུམ་དང་ཁེངས་པ་ཡི། །མཐའ་གཉིས་སྤངས་ནས་ལེགས་པར་མ་སྦྱོང་དང་། །ཁྲིམས་དག་ཐོས་སྒོམ་མ་ནུས་ལེ་ལོ་ཅན། །དཀོར་ལ་བུ་ལོན་ཚུལ་དུ་སྤྱོད་བྱས་དང་། །ཚུལ་འཆལ་ནམ་ཡང་དགེ་འདུན་གནས་དང་དཀོར། །ཏིལ་འབྲུ་ཙམ་ཡང་སྤྱད་པར་བཀག་བཞིན་ཏུ། །བག་མེད་ཅི་དགར་ལོངས་སྤྱད་མཐོལ༴ །ཚོང་ཁེ་ཞིང་ལས་ཤགས་དང་རྒྱན་པོ་འགྱེད། །འདུས་ལ་བལྟ་དང་འཁྲིག་པའི་གཏམ་གླེང་སོགས། །ཚངས་སྤྱོད་བར་ཆད་གནས་གྲོགས་སྤངས་ནས་ནི། །དྲན་དང་ཤེས་བཞིན་མ་བསྟེན་མཐོལ༴། འདུས་བྱས་ཐམས་ཅད་མི་རྟག་ཟག་བཅས་ནི། །སྡུག་བསྔལ་ཆོས་
རྣམས་སྟོང་ཞིང་བདག་མེད་པ། །མྱང་འདས་ཞི་བ་ལྟ་བ་བཀའ་རྟགས་ཀྱི། །ཕྱག་རྒྱ་བཞི་པོ་མ་འཛིན་མཐོལ༴ །ཛམ་ལྷར་ཆུ་སྦྱིན་འཕྲོག་མར་ཆང་བུ་དང་། །འབར་མ་འཇུར་གེགས་ཅན་ལ་གཏོར་མ་དང་། །ཆབ་སྦྱིན་མ་བསྩལ་སྤྱོད་པ་བཀའ་རྟགས་ཀྱི། །ཕྱག་རྒྱ་བཞི་དང་མི་ལྡན་མཐོལ༴ །ཁྲིམས་ནི་རྒྱུ་དང་མི་རྒྱུའི་ས་བཞིན་ཏུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་ཐོབ། །སྨྱིག་ཚལ་བྲེགས་པས་ཨ་མའི་ཚལ་ཉམས་བཞིན། །བསྐལ་པ་བྱེ་བ་གངྒཱའི་བྱེ་སྙེད་དུ། །དང་བའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེའི་ཕྲེང་བ་ཡིས། །སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། །གང་ཞིག་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་འགྱུར་བའི་ཚེ། །ཉིན་མཚན་ཏུ་ནི་བསླབ་པ་གཅིག་སྤྱོད་པའི། །བསོད་ནམས་འདི་ནི་དེ་བས་ཁྱད་པར་འཕགས། །རྒྱལ་བས་སངས་རྒྱས་ཆོས་དང་དགེ་འདུན་དང་། །གཏོང་དང་ཚུལ་ཁྲིམས་ལྷ་རྗེས་དྲན་པ་དྲུག །རབ་ཏུ་བཀའ་བསྩལ་
དེ་དག་སོ་སོ་ཡི། །ཡོན་ཏན་ཚོགས་ཀྱི་རྗེས་སུ་དྲན་པར་བགྱིད།། ༈ །།བཟོད་པ་དཀའ་ཐུབ་དམ་པ་བཟོད་པ་ནི། །མྱ་ངན་འདས་པ་མཆོག་ཅེས་སངས་རྒྱས་གསུངས། །རབ་ཏུ་བྱུང་བས་གཞན་ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ། །མིག་ལྡན་འགྲོ་བ་ཡོད་པ་ཡིས། །ཉམ་ང་བ་དག་ཇི་བཞིན་ཏུ། །མཁས་པས་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ་སྤང་། །སྐུར་པ་མི་གདབ་གནོད་མི་བྱ། །སོ་སོ་ཐར་པའང་བསྡམ་པར་བྱ། །ཟས་ཀྱི་ཚོད་ཀྱང་རིག་པར་བྱ། །བས་མཐའི་ནགས་སུ་གནས་པར་བྱ། །ལྷག་པའི་སེམས་ལ་ཡང་དག་སྦྱོར། །འདི་ནི་སངས་རྒྱས་བསྟན་པ་ཡིན། །ཇི་ལྟར་བུང་བ་མེ་ཏོག་ལས། ཁ་དོག་དྲི་ལ་མི་གནོད་པར། །ཁུ་བ་གཞིབས་ནས་འཕུར་བ་ལྟར། །དེ་བཞིན་ཐུབ་པ་གྲོང་དུ་རྒྱུ། །བདག་གི་རིགས་དང་མི་རིགས་ལ། །བརྟག་པར་བྱ་སྟེ་གཞན་རྣམས་ཀྱི། །མི་མཐུན་པ་དང་གཞན་དག་གི། །བྱས་དང་མ་བྱས་རྣམས་ལ་མིན། །ལྷག་པའི་སེམས་ལ་བག་བྱ་ཞིང་། །ཐུབ་པའི་ཐུབ་གཞི་རྣམས་ལ་བསླབ། །ཉེར་ཞི་རྟག་ཏུ་དྲན་ལྡན་པའི། །སྐྱོབ་པ་མྱ་ངན་མེད་པ་ཡིན། །སྦྱིན་པས་བསོད་ནམས་རབ་ཏུ་འཕེལ། །ལེགས་བསྡམས་དགྲ་སོགས་མི་འབྱུང་
ངོ་། །དགེ་དང་ལྡན་པས་སྡིག་པ་སྤོང་། །ཉོན་མོངས་ཟད་པས་མྱ་ངན་འདས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱོད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་ན། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་ན། །ཐམས་ཅད་དུ་ནི་སྡོམ་པ་ལེགས། །ཐམས་ཅད་སྲུང་བའི་དགེ་སློང་དག །སྡུག་བསྔལ་ཀུན་ལས་རབ་ཏུ་གྲོལ། །ངག་རྣམས་བསྲུང་ཞིང་ཡིད་ཀྱང་རབ་བསྡམ་སྟེ། །ལུས་ཀྱིས་མི་དགེ་བ་དག་མི་བྱེད་ཅིང་། །ལས་ལམ་གསུམ་པོ་འདི་ལ་རབ་སྦྱངས་ནས། །དྲང་སྲོང་གསུངས་པའི་ལམ་ནི་ཐོབ་པར་ཤོག །བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །བདག་དང་སེམས་ཅན་ཀུན་གྱི་སྡིག་པའི་ལས། །ཉེས་པར་གྱུར་གང་མཐོལ་ཞིང་བཤགས་པར་བགྱི། །སླན་ཆད་ནམ་ཡང་བགྱིད་པར་མ་གྱུར་ཅིག །ལས་ཀྱི་སྒྲིབ་པའང་གཏན་ཏུ་ཟད་བྱེད་ཤོག །ཁྲིམས་ཀྱིས་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །
རློམས་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང་། །ཚུལ་ཁྲིམས་སྤྱོད་པ་དྲི་མེད་ཡོངས་དག་པར། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕ་མ་བྱས་ཏེ། །སྐྱེ་རྒ་ན་འཆིའི་རྦ་རླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །ཅེས་སངས་རྒྱས་རབ་བདུན་གྱི་གསོ་སྦྱོང་གི་ཚིགས་སུ་བཅད་པ་དང་། སོ་ཐར་སྡོམ་པའི་ཉེས་ལྟུང་མཐོལ་བཤགས་ཞར་བྱུང་བསླབ་བྱའི་གནད་རྟོགས་པར་འགྱུར་བ་འདི་བཞིན། བསྟན་འགྲོའི་དཔུང་གཉེན་ཟླ་བཟང་མཆོག་སྤྲུལ་རིན་པོ་ཆེས་བཀའ་བསྩལ་ལྟར། འདུ་གསུམ་པ་ཀརྨ་ངག་དབང་ཡོན་ཏན་རྒྱ་མཚོས་དཔལ་སྤུངས་ཡང་དབེན་ཏུ་བྲིས་པ་བསྟན་དང་འགྲོ་ལ་ཡུན་རིང་སྨན་པར་གྱུར་ཅིག །སརྦ་མཎྜ་ལཾ།། ༈ །།གཎྜཱིའི་མདོ་ལས། ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་གཎྜཱིིའི་གཟུགས་ཀྱིས་བཞུགས་སོ། །ཞེས་དང་། རྒྱལ་པོ་གང་ཚེ་ཡུལ་འཁོར་དུ། །གཎྜཱི་དེ་ནི་གྲགས་འགྱུར་བ། །དེར་ནི་དཔལ་དང་གྲགས་པ་དང་། །འདོད་པ་དང་ནི་ལོ་ལེགས་འགྱུར། །ཞེས་སོགས་དང་། དུས་བཞི་དག་ཏུ་ཐོས་པ་
ནི། །དེ་རྣམས་བྱང་ཆུབ་ཐོབ་པར་འགྱུར། །གང་ཞིག་སྙིང་ནས་ཡི་རང་བ། །དེ་ནི་གྲོལ་འགྱུར་ཐེ་ཚོམ་མེད། །ཅེས་སོགས་ཕན་ཡོན་དང་། །རྒྱུ་ཆད་དང་བརྡུང་ལུགས་ཚུལ་མ་ཡིན་པས་ཡུལ་འཁོར་ལ་འཚེ་བ་དང་། དགེ་འདུན་མི་མཐུན་པ་དང་། མ་བསྡམས་པར་འགྱུར་བའི་ཉེས་དམིགས་སོགས་གསུངས་སོ། །ས་གའི་ལྷས། མི་སློབ་པ་ནི་བདག་པོར་སྤྱོད། །ཅེས་བསོད་ནམས་ཀྱི་ཞིང་མཆོག་ཏུ་གྱུར་པ་དང་། སློབ་པ་བྱིན་པ་སྤྱོད་པ་སྟེ། །ཞེས་ཡོན་སྦྱོང་ནུས་པས་ལོངས་སྤྱད་རུང་བ་དང་། བསམ་གཏན་ཀློག་དང་ལྡན་པ་ནི། །རྗེས་གནང་སྤྱོད་པས་ཉེས་པ་མེད། །ཅེས་སོ་སྐྱེ་ཡིན་ཀྱང་ཁྲིམས་དག་སྤང་ཀློག་ལ་བརྩོན་པ་ལ་ནི་སྟོན་པས་རྗེས་སུ་གནང་བས་ཉེས་པ་མེད་ལ། ལྷག་མ་ལེ་ལོས་བཅོམ་པ་ཡིན། བདག་ཉིད་ལ་ནི་བུ་ལོན་སྤྱོད། །ཅེས་ཁྲིམས་དག་ཀྱང་རྒྱུད་ལེ་ལོས་ཁྱེར་བས་ཐོས་སྒོམ་མི་ནུས་པ་དག་གིས་དབུལ་པོའི་བུ་ལོན་ལྟར་སྐྱེ་བ་ཕྱི་མར་འཇལ་དགོས་ལ། ཁྲིམས་འཆལ་རྣམས་ལ་ནམ་དུ་ཡང་། །གཙུག་ལག་ཁང་སོགས་ཉེར་སྤྱོད་པ་ཀག། ཅེས་ཁྲིམས་འཆལ་གྱིས་ནི་དད་གཤིན་དཀོར་རྫས་ཁབ་ཙམ་ཡང་མི་དབང་ཞིང་སྤྱད་ན་ངན་སོང་གི་སྡུག་བསྔལ་ཆེན་པོ་མྱོང་སྟེ། སངས་རྒྱས་མཛོད་ཀྱི་
མདོ་ལས། ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་བསྐལ་པ་བརྒྱ་སྟོང་ཁྲི་འབུམ་གྱི་བར་དུ་རང་གི་ཤ་བཅད་གཏུབས་ཏེ་སྦྱིན་བདག་ལ་འཇལ་ལོ། །ཕྱུགས་སུ་སྐྱེས་ན་ཡང་ཁུར་ལྕི་བ་ཁྱེར་བ་འོང་ངོ། །སྐྲ་ཉག་མ་འབུམ་དུ་བགོས་པའི་ཆ་ཙམ་ཡང་བཞུ་བར་མི་ནུས་ན་གོས་དང་ཟས་དང་མལ་ཆ་དང་སྨན་ལ་སོགས་པ་ལྟ་ཅི་སྨོས། ཞེས་དང་། ཤཱ་རིའི་བུ་རོས་གང་བའི་ས་དེ་ན་ངའི་ཆོ་ག་བཞིན་ཏུ་སྤྱོད་པ་ནི་ཕོད་ཀྱི་ཚུལ་ཁྲིམས་ཞིག་པའི་དགེ་སློང་དང་ལྷན་ཅིག་ཏུ་འདུག་པ་ནི་མི་ཕོད་དོ། །དེ་ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་གི་ལག་གིས་བླང་བའི་རྫས་སོ་ཅོག་ཚུལ་ཁྲིམས་འཛིན་པའི་དགེ་སློང་གི་ངན་དུག་པར་འགྱུར་རོ། །ཞེས་གསུངས། །