ཤིང་རྟ་ཆེན་པོ་གཉིས་ཀྱི་བཀའ་སྲོལ་དང་འབྲེལ་བའི་བྱང་སྡོམ་ཉེས་བཤགས་ནོར་བུ་ཀེ་ཏ་ཀའི་ཕྲེང་བ།
ཤིང་རྟ་ཆེན་པོ་གཉིས་ཀྱི་བཀའ་སྲོལ་དང་འབྲེལ་བའི་བྱང་སྡོམ་ཉེས་བཤགས་ནོར་བུ་ཀེ་ཏ་ཀའི་ཕྲེང་བ་ཞེས་བྱ་བ་བཞུགས་སོ། །
དུས་གསུམ་གཤེགས་པའི་སངས་རྒྱས་ཀུན། །ཆོས་དང་ཚོགས་ཀྱི་མཆོག་བཅས་ལ། །ཞིང་རྡུལ་ཀུན་གྱིས་གྲངས་སྙེད་ཀྱི། །ལུས་བཏུད་པ་ཡིས་བདག་ཕྱག་འཚལ། །བྱང་ཆུབ་སེམས་ཀྱི་གཞི་རྣམས་དང་། །མཆོད་རྟེན་རྣམས་ལ་བདག་ཕྱག་འཚལ། །མཁན་པོ་དེ་བཞིན་སློབ་དཔོན་དང་། །བརྟུལ་ཞུགས་མཆོག་ལ་ཕྱག་འཚལ་ལོ། །བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་འཇམ་དབྱངས་ལ་སོགས་པས། །རྒྱལ་བ་རྣམས་ལ་མཆོད་མཛད་པ། །དེ་བཞིན་
བདག་གིས་དེ་བཞིན་གཤེགས། །མགོན་པོ་སྲས་དང་བཅས་རྣམས་མཆོད། །ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་བསྟོད། །བསྟོད་དབྱངས་སྙན་སྤྲིན་དེ་དག་ལ། །ངེས་པར་ཀུན་ཏུ་འབྱུང་གྱུར་ཅིག །ཕྱོགས་རྣམས་ཀུན་ན་བཞུགས་པ་ཡི། །རྫོགས་སངས་རྒྱས་དང་བྱང་ཆུབ་སེམས། །ཐུགས་རྗེ་ཆེན་པོ་མངའ་རྣམས་ལ། །ཐལ་མོ་སྦྱར་ཏེ་གསོལ་བ་ནི། །ཐོག་མ་མེད་ལྡན་འཁོར་བ་ནས། །ཚེ་རབས་འདིའམ་གཞན་དག་ཏུ། །བདག་གིས་མ་འཚལ་སྡིག་བགྱིས་པའམ། །བགྱིད་དུ་སྩལ་བ་ཉིད་དང་ནི། །གཏི་མུག་འཁྲུལ་པས་བདག་ནོན་ཏེ། །རྗེས་སུ་ཡི་རངས་
གང་བགྱིས་པ། །ནོངས་པ་དེ་ནི་མཐོང་བགྱིས་ནས། །བསམ་པ་ཐག་པས་མགོན་ལ་བཤགས། །སྲིད་སྤང་ཞི་ལ་ཆགས་པའི་མཐའ་གཉིས་སུ། །མི་གནས་བླ་ན་མེད་པའི་མྱང་འདས་རྒྱུ། །ཐེག་མཆོག་ཆེན་པོ་བདུན་ལྡན་སྒོར་ཞུགས་ནས། །བྱང་ཆུབ་སྤྱོད་པ་མ་སྤྱད་མཐོལ་ལོ་བཤགས། །དགེ་བའི་བཤེས་སྤངས་རིགས་དང་དགེ་རྩ་བཅད། །ཐེག་ཆེན་སྡེ་སྣོད་མང་ཐོས་རྒྱང་བསྲིངས་ཏེ། །གྲོགས་རྒྱུ་དགེ་རྩ་ཐོས་པའི་སྟོབས་ལྔ་ཡིས། །སེམས་མཆོག་ནན་ཏན་མ་བསྐྱེད་མཐོལ་ལོ་བཤགས། །ཐོས་ལ་མི་དད་བསམ་གཡེལ་སྒོམ་པ་ལྷོད། །ལེ་ལོ་ཆེ་ཞིང་སེམས་ཅན་མ་དད་སྤྱོད། །སྙིང་རྗེ་ཆུང་ཞིང་བྱེད་སྤྱོད་ཕྱིན་ཅི་ལོག །དོན་གཉིས་ཉམས་པའི་རྒྱུ་བདུན་སྤྱོད་པ་བཤགས། །ཕན་ཡོན་ཉེས་དམིགས་རྙེད་དཀའ་མ་དྲན་དང་། །ཡན་ལག་བདུན་དང་རྒྱལ་བ་སྲས་བཅས་ལ། །གསོལ་འདེབས་སྨོན་ལམ་དུས་གསུམ་མ་བགྱིས་དང་། །ཆོས་དང་འགལ་བའི་བདུད་ལས་མ་སྤངས་པས། །འདི་ཕྱིར་ཉམས་པའི་རྒྱུར་གྱུར་མཐོལ་ལོ་བཤགས། །སེམས་ཅན་རང་དང་དམ་ཆོས་ནོར་ལས་གཅེས། །བཤེས་གཉེན་ཕ་མ་བྱང་སེམས་སྙིང་ལས་གཅེས། །སངས་རྒྱས་གོ་འཕང་འཚོ་བའི་ལོངས་སྤྱོད་ལས། །གཅེས་པར་མ་བལྟས་མཐུན་རྐྱེན་
སྤངས་པ་བཤགས། །སྤངས་རྟོགས་ཕྲིན་ལས་ཕུན་ཚོགས་ཐོབ་པའི་རྒྱུ། །རང་གཞན་སྨིན་བྱེད་ཉེས་སྤྱོད་སྡོམ་པ་དང་། །དགེ་བ་ཆོས་སྡུད་སེམས་ཅན་དོན་བྱེད་ཀྱི། །ཚུལ་ཁྲིམས་གསུམ་དང་འགལ་བ་མཐོལ་ལོ་བཤགས། ༈། ནམ་སྙིང་ཐབས་ལ་མཁས་སོགས་མདོ་སྡེའི་དོན། །འཇམ་དཔལ་གདམས་ངག་འཕགས་ཞབས་ཡབ་སྲས་ལས། །རིམ་འོངས་ཟབ་མོ་ལྟ་བརྒྱུད་བཞེད་གཞུང་གི། །བསླབ་པའི་གནས་དང་གང་འགལ་མཐོལ་ལོ་བཤགས། །གཞན་དོན་རྫོགས་བྱང་དོན་གཉེར་བློས་བཏང་ནས། །ཐེག་དམན་རང་དོན་ཉི་ཚེ་ཡིད་ལ་བྱེད། །ཕས་ཕམ་ལས་ལྕི་ཚུལ་ཁྲིམས་སྐྱོན་བྱེད་པ། །སྡོམ་པའི་རྩ་བ་སྨོན་སེམས་བཏང་བ་བཤགས། །བྱང་ཆུབ་སེམས་འདོར་སེར་སྣས་སྦྱིན་མི་བྱེད། །མི་བཟོད་ཁྲོ་བས་རྡེག་ཅིང་ཉོན་མོངས་དང་། །གནས་མཐུན་ཆོས་ལྟར་བཅོས་པ་བསྟན་ལ་སོགས། །འཇུག་པས་དགེ་ལ་མ་སྦྱོར་མཐོལ་ལོ་བཤགས། །སྐུ་གཟུགས་མཆོད་རྟེན་དམ་ཆོས་གླེགས་བམ་དང་། །ཆོས་སྨྲའི་ཆ་རྐྱེན་དགེ་འདུན་འདུ་བའི་རྫས། །དཀོན་མཆོག་དཀོར་ལ་རྐུ་འཕྲོག་ལོངས་སྤྱོད་པས། །རྩ་ལྟུང་དང་པོས་གོས་པ་མཐོལ་ལོ༴ །ཐེག་གསུམ་གང་ཡང་རུང་བའི་སྡེ་སྣོད་དང་། །ཚུལ་ཁྲིམས་ཏིང་འཛིན་།
སེམས་ཀྱི་བསླབ་པ་ལ། །རང་འདོད་བློ་ཡིས་ཕྱོགས་ཁྱེར་སྨད་ཅིང་སྤངས། །རྩ་ལྟུང་གཉིས་པས་གོས་པ་མཐོལ༴། རབ་བྱུང་རྟགས་ཙམ་འཛིན་པ་ཡན་ཆད་ལ། །སྡང་བས་གོས་འཕྲོག་རྡེག་ཅིང་བཙོན་ཏུ་བཅུག། ཁྱིམ་པར་དབབ་དང་བསད་དམ་གསོད་སེམས་འཆང་། །རྩ་ལྟུང་གསུམ་པས་གོས་པ་མཐོལ་ལོ་བཤགས། །དགེ་འདུན་དབྱེན་བྱེད་ཕ་མ་དགྲ་བཅོམ་གསོད། །དེ་བཞིན་གཤེགས་ལ་ངན་སེམས་ཁྲག་ཕྱུང་བ། །མཚམས་མེད་ལྔ་ལས་གང་རུང་གཅིག་སྤྱད་དེ། །རྩ་ལྟུང་བཞི་པས་གོས་པ༴ །ལས་འབྲས་ཁྱད་གསོད་ལོག་ལྟས་མི་དགེ་སྤྱོད། །དགེ་རྩ་ཆད་པའི་རྩ་ལྟུང་ལྔ་པས་གོས། །བྱང་སེམས་རྒྱལ་ལ་འབྱུང་ཉེའི་ལྟུང་བ་ལྔ། །བྱས་སམ་བྱེད་དུ་བཅུག་པ༴ །ཁྱིམ་ཉུང་གྲོང་དང་རིགས་བཞི་ཚང་བའི་ལྗོངས། །གྲོང་ཁྱེར་གྲོང་བརྡལ་ཡུལ་འཁོར་ཆེན་པོ་རྣམས། །སྡང་བས་འཇིགས་ལ་འཇོམས་སོགས་བློན་པོ་ལ། །འབྱུང་ཉེའི་རྩ་ལྟུང་ལྔ་པོས་གོས་པ་བཤགས། །དང་པོའི་ལས་ཅན་བློ་མ་སྦྱངས་པ་ལ། །མ་བརྟགས་སྟོང་ཉིད་བརྗོད་སྔས་ཉན་ཐོས་སྨོན། །སངས་རྒྱས་སྒྲུབ་ལ་ཞུགས་པའི་བློ་ཆེན་པོ། །དེ་ལས་ལྡོག་སྟེ་ཐེག་དམན་ལམ་དུ་བཀོད། །ཉན་ཐོས་རིགས་ཅན་སོ་ཐར་སློབ་པ་ལ། །སྨད་ནས་འདོར་
ཏེ་ཐེག་ཆེན་སློབ་ཏུ་བཅུག །ཉན་ཐོས་ཐེག་པས་ཆགས་སོགས་མི་སྤང་པས། །ཐར་ལམ་མེད་སྨྲ་གཞན་ལའང་འཛིན་ཏུ་འཇུག །ཕྲག་དོག་དབང་གིས་བྱང་སེམས་གཞན་གྱི་སྐྱོན། །ཡོད་མེད་ཀུན་གླེང་རང་གི་ཡོན་ཏན་ངོམས། །མ་རྟོགས་བཞིན་ཏུ་རྙེད་དང་བཀུར་སྟིའི་ཕྱིར། །རྟོགས་པར་ཁས་འཆེ་བདག་ཉིད་ལོག་པར་འཚོང་། །རྒྱལ་དང་དབྱེན་བྱས་དགེ་སྦྱོང་ཆད་འབེབས་ཤིང་། །ཆད་མཇལ་ལྐོག་བརྔན་དཀོན་མཆོག་དཀོར་ནོར་བླངས། །ཞི་གནས་ལ་སོགས་རྣལ་འབྱོར་འདོར་འཇུག་ཅིང་། །སྤོང་བའི་ལོངས་སྤྱོད་ཀློག་པའི་སྡེ་ལ་བྱིན། །དང་པོའི་ལས་ཅན་ཕལ་ལ་འབྱུང་ངེས་ཤིང་། །མི་ཟད་སེམས་ཅན་དམྱལ་བ་ཆེན་པོའི་རྒྱུ། །དགེ་རྩ་སྔོན་བསྐྱེད་ཐལ་བར་རླག་བྱེད་པ། །རྩ་ལྟུང་བརྒྱད་པོས་གོས་པ་མཐོལ༴། བདེ་སྡུག་ཡལ་བར་འདོར་བ་ཉི་ཤུ་བཞི། །བསྒྲུབ་པ་ཡལ་བར་འདོར་བ་བཅུ་དྲུག་བཅས། །གནས་སྐབས་སུའམ་གཏན་དུ་དོར་བ་ཡི། །ཡན་ལག་ཉེས་བྱས་བརྒྱད་ཅུས་གོས་པ་བཤགས། །མི་དགེ་བཅུ་དང་ཆོས་བརྒྱད་ལོག་འཚོ་ལྔ། །ལོག་རྟོག་བརྒྱད་དང་སྤྱོད་ཡུལ་མིན་པ་ལྔ། །སྡིག་གྲོགས་སྡིག་ལྟ་འཛིན་སོགས་བདུད་ཀྱི་ལས། །ལྟ་བས་གཟིངས་དང་དགེ་རྩ་འཛད་པའི་རྒྱུ། །བཞི་
སོགས་ཐེག་ཆེན་མདོ་ལས་གསུངས་རྣམས་དང་། །དོན་མེད་རྒྱུག་མཆོང་བྲེ་མོའི་གཏམ་སྨྲ་ཞིང་། །ཆགས་སྡང་མནོ་སོགས་དགག་པའི་བསླབ་བྱ་ཉམས། །འཛུམ་དེས་ཞི་དལ་དྲང་པོར་མ་སྨྲས་སོགས། །བསྒྲུབ་པའི་བསླབ་བྱ་རྣམས་དང་འགལ་བ་བཤགས།། ༈ །།འཁོར་ལོ་ཕྱི་མ་གཉིས་ཀྱིས་བསྟན་པའི་དོན། །བྱམས་མགོན་གདམས་ངག་ཐོགས་མེད་སྐུ་མཆེད་ལས། །རིམ་འོངས་རྒྱ་ཆེན་སྤྱོད་རྒྱུད་བཞེད་གཞུང་གི། །བསླབ་པའི་གནས་དང་གང་འགལ་མཐོལ་ལོ་བཤགས། །རིན་ཆེན་གླིང་དུ་འགྲོ་འདོད་བསམ་པ་བཞིན། །སངས་རྒྱས་སྒྲུབ་ལ་མེད་ཐབས་མེད་པ་ཡི། །སྨོན་པའི་སེམས་ཀྱི་བསླབ་བྱ་སྡེ་ལྔ་པོ། །མ་བསླབ་པ་དང་འགལ་ཉམས་གྱུར་པ་བཤགས། །ཕན་བཏགས་ལན་དུ་གནོད་པ་ཆེར་བྱས་ཀྱང་། །ཡང་ལན་སྙིང་རྗེ་ཆེན་པོས་མི་།།།པར། །སེམས་ཅན་གཅིག་ལ་སྐད་ཅིག་གཅིག་ཙམ་དུ། །ཁྲོ་བས་བློ་ཡིས་བཏང་བ་མཐོལ་ལོ་བཤགས། །སྡོང་པོ་བཀོད་པར་ཉིས་བརྒྱ་སུམ་ཅུའི་དཔེས། །བསྟན་སོགས་སྨོན་སེམས་བསྐྱེད་པའི་ཕན་ཡོན་ནི། །དངོས་པོར་གྲུབ་ན་ནམ་མཁར་མི་ཤོང་བ། །རྟག་ཏུ་དྲན་ཏེ་གཅེས་སྤྲས་མ་བྱས་བཤགས། །ཐུན་ཚོད་རེར་ཡང་གཞན་ཕན་འབའ་ཞིག་བློས། །ཆོས་སྤྱོད་རྣམ་བཅུ་
བསྡུ་བའི་དངོས་པོ་བཞི། །ཕར་ཕྱིན་བཅུ་སོགས་བྱང་སེམས་སྟོབས་སྐྱེད་པའི། །ཚོགས་གཉིས་ཟུང་འཇུག་མ་བསགས་མཐོལ༴ །བྱམས་དང་སྙིང་རྗེ་རྒྱུ་ལ་མ་སྦྱངས་དང་། །ཉིན་མཚན་དུས་དྲུག་བྱང་སེམས་མ་བླངས་དང་། །བདེ་སྡུག་བཏང་ལེན་སྤྱོད་ལ་མ་སྦྱངས་སོགས། །བྱང་སེམས་འཕེལ་བའི་ཐབས་ལ་མ་བརྩོན་བཤགས། །མཆོད་འོས་བསླུ་ཞིང་གཞན་ལ་འགྱོད་པ་བསྐྱེད། །དགེ་སྦྱོང་སྐྱོན་བརྗོད་འགྲོ་ལ་གཡོ་སྒྱུས་སྤྱོད། །བྱས་པ་ཙམ་གྱིས་སྡོམ་པ་འཇིག་བྱེད་པ། །ནག་པོའི་ཆོས་བཞིས་གོས་པ་མཐོལ༴ །སྲོག་གི་ཕྱིར་ཡང་ཤེས་བཞིན་རྫུན་མི་སྨྲ། །སེམས་བསྐྱེད་པ་ལ་སྟོན་པའི་འདུ་ཤེས་བཞག །འགྲོ་ལ་གཡོ་མེད་ཀུན་ཀྱང་ཐེག་པ་ཆེར། །འགོད་འདོད་དཀར་པོའི་ཆོས་བཞི་མི་ལྡན་བཤགས། །རྙེད་དང་བཀུར་སྟིར་ལྷག་པར་ཆགས་པའི་བློས། །བདག་ལ་བསྟོད་ཅིང་གཞན་གྱི་ཡོན་ཏན་སྨོད། །སྡུག་བསྔལ་མགོན་མེད་པ་དང་སྣོད་གྱུར་ལ། །སེར་སྣས་ཟང་ཟིང་ནོར་དང་ཆོས་མི་སྟེར། །གཞན་གྱིས་བཤགས་ཀྱང་མི་བཟོད་ཁྲོ་བ་ཡིས། །ཞེ་འཁོན་མི་ལྡོག་རྡེག་ཅིང་འཚོག་པས་འཚེ། །གཏི་མུག་དབང་གིས་ཆོས་ལ་སྐུར་འདེབས་ཤིང་། །ཆོས་མ་ཡིན་པ་ཆོས་ལྟར་བཅོས་ཏེ་འཆད། །འཇུག་
པའི་བསླབ་བྱ་དང་འགལ་རྩ་ལྟུང་བཞི། །ཉོན་མོངས་ཆེ་འབྲིང་ཆུང་ངུས་སྤྱད་པ་ལས། །སྡོམ་པ་ཤོར་དང་ཉམས་འགལ་གྱུར་པ་ཡིས། །ས་ལམ་རིང་དུ་བྱས་པ་མཐོལ༴ །དཀོན་མཆོག་མི་མཆོད་འདོད་སེམས་རྗེས་སུ་ཞུགས། །རྒན་ལ་མ་གུས་དྲིས་ལ་ལན་མི་འདེབས། །མགྲོན་པོས་མ་སོང་གསེར་སོགས་སྦྱིན་མི་ལེན། །ཆོས་འདོད་མི་སྟེར་སྦྱིན་དང་འགལ་བ་བདུན། །ཚུལ་འཆལ་ཡལ་འདོར་དད་ཕྱིར་རང་མི་སློབ། །གཞན་དོན་མི་བྱེད་སྤང་བདུན་ཕན་ཡང་འཇོམ། །ལོག་འཚོ་དང་ལེན་འཕྱར་གཡེང་རྩེད་མོར་དགའ། །སྲིད་འབྱོར་ལ་ཆགས་གཞན་གྲགས་ངན་མི་སེལ། །རང་གཞན་ཉོན་མོངས་ཆེ་ལྡན་མཐོང་ན་ཡང་། །ཆོས་བཞིན་མི་སེལ་ཚུལ་ཁྲིམས་དང་འགལ་དགུ། །གཤེ་ཁྲོ་རྡེག་དང་མཚང་འདྲུར་དེ་ལན་ཟློག །གཞན་ཁྲོས་སེམས་གསོ་མ་བྱས་ཡལ་བར་དོར། །བཤགས་པ་མ་བླངས་ཁྲོ་བའི་སེམས་བྱུང་ན། །མ་སྤངས་དང་བླང་བཟོད་དད་འགལ་བ་བཞི། །ནོར་དང་སྙན་གྲགས་ཆེད་དུ་འཁོར་བསྡུས་ཤིང་། །གཉིད་དང་སྙོམས་ལས་ལེ་ལོ་སེལ་མི་བྱེད། །འདུ་འཛིའི་གཏམ་ཆགས་བརྩོན་འགྲུས་འགལ་ཟླ་གསུམ། །སེམས་གནས་ཐབས་བོར་སྒྲིབ་པ་ལྔ་མི་སྤོང་། །བདེ་གསལ་
རོར་ཆགས་བསམ་གཏན་དང་འགལ་གསུམ། །ཐེག་དམན་མི་སློབ་ཐེག་ཆེན་སྡེ་སྣོད་དོར། །སངས་རྒྱས་གཞུང་དོར་མུ་སྟེགས་བསྟན་བཅོས་བརྩོན། །ནང་རིག་ལས་ཀྱང་ཕྱི་གཞུང་ཆེད་ཆེར་བཟུང་། །ཐེག་ཆེན་སྐུར་འདེབས་བདག་བསྟོད་གཞན་ལ་སྨོད། །ཆོས་སྨྲའི་དྲུང་དུ་ཆོས་ཕྱིར་མི་འགྲོ་བར། །འཕྱ་ཞིང་ཁྱད་གསོད་ཤེས་རབ་དང་འགལ་བརྒྱད། །གཞན་གྱི་གྲོགས་དན་ནད་པའི་རིམ་གྲོ་དང་། །སྡུག་བསྔལ་བསལ་ཞིང་བག་མེད་ཚུལ་བཞིན་ཏུ། །འཆོས་པར་མི་བྱེད་གཞན་དོན་ལས་ཉམས་བཞི། །ཕན་བཏགས་ལན་ཏུ་དྲིན་བཟོ་མ་བྱས་དང་། །མྱ་ངན་མ་བསལ་སློང་ལ་འདོད་མ་བྱིན། །འཁོར་རྣམས་མ་བསྐྱངས་གཞན་སེམས་དང་མི་མཐུན། །གཞན་བསྔགས་མི་བརྗོད་ཕན་འདོགས་གཡེལ་བ་དྲུག །ཆོས་འགལ་ཆད་པ་འོས་ཀྱང་བཏང་སྙོམས་བཞག །ཆོས་ལྡན་གཏམ་དང་རྫུ་འཕྲུལ་གྱིས་མ་བསྡིགས། །ངན་པ་ཚར་མི་གཅོད་པའི་ཉེས་གཉིས་བཅས། །ཉེས་བྱས་བཞི་བཅུ་རྩ་དྲུག་སྤྱད་པ་བཤགས། །གཞན་ཡང་སོ་སོ་ཐར་པ་རིས་བརྒྱད་ཀྱི། །བཅས་ལྟུང་བླངས་འདས་ཀུན་རྩ་སྐྱབས་སྡོམ་དང་། །འགལ་སོགས་མ་གུས་སྙོམས་ལས་ལེ་ལོ་ཡིས། །ཉེས་
སྤྱོད་སྡོམ་པའི་ཚུལ་དང་གང་འགལ་བཤགས། །མི་མཐུན་ཕྱོགས་ཉམས་མི་རྟོག་ཡེ་ཤེས་ལྡན། །འདོད་དོན་རྫོགས་ཤིང་སེམས་ཅན་རབ་སྨིན་བྱེད། །ཁྱད་ཆོས་བཞི་ལྡན་ཕར་ཕྱིན་སོ་དྲུག་སོགས། །དགེ་ཆོས་མཐའ་དག་མ་བསྡུས་མཐོལ༴ །ཟང་ཟིང་དམ་ཆོས་མི་འཇིགས་མ་སྦྱིན་དང་། །སྡོམ་དང་ཆོས་སྡུད་དོན་བྱེད་ཚུལ་ཁྲིམས་ཉམས། །གནོད་དང་སྡུག་བསྔལ་ཟབ་མོའི་དོན་མི་བཟོད། །གོ་ཆ་དགེ་སྡུད་གཞན་ཕན་བརྩོན་འགྲུས་ལྷོད། །བདེར་གནས་སྒྲུབ་དང་གཞན་དོན་བསམ་གཏན་གཡེལ། །ཐོས་བསམ་སྒོམ་པའི་ཤེས་རབ་མ་གོམས་ཏེ། །ཡོན་ཏན་བཞི་དང་ལྡན་པའི་ཕ་རོལ་ཕྱིན། །དམ་པ་དྲུག་ལྡན་ཉམས་སུ་མ་བླངས་བཤགས། །དུས་གསུམ་གྱིས་བསྡུས་སེམས་ཅན་སྨིན་བྱེད་ཐབས། །ཀུན་འདུས་སྦྱིན་དང་སྙན་སྨྲ་དོན་སྤྱོད་དང་། །དོན་མཐུན་དངོས་པོ་བཞི་ཡིས་སེམས་ཅན་གྱི། །དོན་བྱེད་ཚུལ་ཁྲིམས་མ་བསྲུངས་མཐོལ་ལོ་བཤགས། །ལུས་དང་ལོངས་སྤྱོད་དགེ་བའི་དངོས་གསུམ་པོ། །བསྲུང་དང་དག་པ་གཏོང་དང་སྤེལ་བ་ཡི། །ས་མཚམས་བཞིན་ཏུ་མཐུན་ཕྱོགས་ཀུན་སློབ་ཅིང་། །མི་མཐུན་ཕྱོགས་སྤང་ཇི་བཞིན་མ་བྱས་བཤགས། །མདོར་ན་དྲན་དང་ཤེས་བཞིན་
བག་ཡོད་པས། །འདི་དང་གཏན་ཏུ་ཕན་པའི་རྒྱུར་འགྱུར་བའི། །རྒྱལ་སྲས་རྣམས་ཀྱི་བསླབ་བྱ་གང་ཡིན་པ། །མིག་དང་སྲོག་ལྟར་མ་བསྲུངས་མཐོལ་ལོ་བཤགས། །གང་གིས་རིགས་དང་མི་རིགས་མ་བརྟགས་པར། །རྩོམ་མམ་ལྡོག་གམ་བཏང་སྙོམས་འཇོག་ཀྱང་རུང་། །འོས་འདས་ལྟུང་དང་ལྟུང་མེད་གཟུགས་བརྙན་སོགས། །བྱང་སེམས་བསླབ་པའི་གནས་དང་གང་འགལ་བཤགས། །ཉེས་པ་དུ་མས་སྐྱོན་ཆགས་པའི། །སྡིག་ཅན་བདག་གི་སྡིག་པ་གང་། །ཤིན་ཏུ་མི་བཟད་བགྱིས་པ་དེ། །ཐམས་ཅད་འདྲེན་པ་རྣམས་ལ་བཤགས། །བདག་ནི་སྡིག་པ་མ་བྱང་བར། །སྔོན་དུ་འགུམ་པར་འགྱུར་དུ་མཆི། །ཇི་ལྟར་འདི་ལས་ངེས་ཐར་བར། །མྱུར་བའི་ཚུལ་གྱིས་བསྐྱབ་ཏུ་གསོལ། །སྤྲོ་ན་འདིར། །དེ་བས་རྒྱལ་བ་འགྲོ་བའི་མགོན། །སོགས་ཚང་བར་བརྗོད། །ལྟུང་ཉིད་བྱང་ཆུབ་སེམས་རང་བཞིན། །ལས་མེད་རྣམ་པར་སྨིན་པ་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །སེམས་ཅན་ཀུན་གྱི་ངན་སོང་གི། །སྡུག་བསྔལ་ངལ་གསོའི་དགེ་བ་དང་། །སྡུག་བསྔལ་ཅན་དག་བདེར་གནས་ལ། །དགའ་བས་རྗེས་སུ་ཡི་རང་ངོ་། །བྱང་ཆུབ་རྒྱུར་གྱུར་དགེ་བསགས་པ། །དེ་ལ་རྗེས་སུ་ཡི་རང་ངོ་། །ལུས་ཅན་འཁོར་
བའི་སྡུག་བསྔལ་ལས། །ངེས་པར་ཐར་ལ་ཡི་རང་ངོ་། །སྐྱོབ་པ་རྣམས་ཀྱི་བྱང་ཆུབ་དང་། །རྒྱལ་སྲས་ས་ལའང་ཡི་རང་ངོ་། །སེམས་ཅན་ཐམས་ཅད་བདེ་མཛད་པའི། །ཐུགས་བསྐྱེད་དགེ་བ་རྒྱ་མཚོ་དང་། །སེམས་ཅན་ཕན་པར་མཛད་པ་ལ། །དགའ་བས་རྗེས་སུ་ཡི་རང་ངོ། །ཕྱོགས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ཅི། །སེམས་ཅན་སྡུག་བསྔལ་མུན་འཐོམས་ལ། །ཆོས་ཀྱི་སྒྲོན་མེ་སྦར་དུ་གསོལ། །རྒྱལ་བ་མྱ་ངན་འདའ་བཞེད་ལ། །ཐལ་མོ་སྦྱར་ཏེ་གསོལ་བ་ནི། །འགྲོ་འདི་ལྡོངས་པར་མི་འགོད་ཅིང་། །བསྐལ་པ་གྲངས་མེད་བཞུགས་པར་གསོལ། །རྒྱལ་དང་རྒྱལ་བའི་ཆོས་ལ་དད་བྱེད་ཅིང་། །བྱང་ཆུབ་བླ་མེད་ལ་ཡང་དད་པར་བགྱིད། །རྒྱལ་སྲས་རྣམས་ཀྱི་སྤྱོད་ལ་རབ་དད་པས། །བླ་མེད་བྱང་ཆུབ་སེམས་མཆོག་རྟག་ཏུ་བཟུང་། །འདུས་བྱས་གཡོ་བ་སྡུག་བསྔལ་མཐའ་ལ་རྟོག །སྟོན་པའི་ཆེ་བ་ཆོས་དང་བྱང་སེམས་ཀྱི། །ཕན་ཡོན་དྲན་པ་ལྔ་པོ་རྟག་ཏུ་བསྟེན། །བརྩོན་འགྲུས་རྟར་ཞོན་ཤེས་བཞིན་མིག་གིས་བལྟ། །ངེས་འབྱུང་ལྕག་བསྐུལ་ཐར་པའི་གྲོང་ཁྱེར་ལ། །བསམ་སྟེ་མི་དགེ་ཀུན་སྤང་དགེ་ཆོས་བསླུབ། །དལ་འབྱོར་འདི་ནི་རྙེད་པར་ཤིན་ཏུ་དཀའ། །
སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབ་ན། །ཕྱིས་འདི་ཡང་དག་འབྱོར་པར་ག་ལ་འགྱུར། །དགེ་བ་གཞན་ཀུན་ཆུ་ཤིང་བཞིན་ཏུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །གང་ལ་སེམས་ཀྱི་དམ་པ་རིན་ཆེན་དེ། །སྐྱེས་པ་དེ་ཡི་སྐུ་ལ་ཕྱག་འཚལ་ཞིང་། །གང་ལ་གནོད་པ་བྱས་ཀྱང་བདེར་འབྲེལ་བ། །བདེ་བའི་འབྱུང་གནས་དེ་ལ་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །སོགས་ལན་གསུམ། །མགོན་པོ་རྣམས་ཀྱི་སྤྱན་སྔ་རུ། །རྫོགས་པའི་བྱང་ཆུབ་སེམས་བསྐྱེད་ཅིང་། །འགྲོ་བ་ཐམས་ཅད་མགྲོན་དུ་གཉེར། །དེ་དག་འཁོར་བ་ལས་བསྒྲལ་ཏོ། །གནོད་སེམས་ཁྲོ་བའི་སེམས་ཉིད་དང་། །སེར་སྣ་དང་ནི་ཕྲག་དོག་ཉིད། །དེང་ནས་བཟུང་སྟེ་བྱང་ཆུབ་མཆོག །ཐོབ་ཀྱི་བང་དུ་མི་བྱའོ། །ཚངས་པར་སྤྱོད་པ་སྤྱད་བྱ་ཞིང་། །སྡིག་དང་འདོད་པ་
སྤང་བར་བྱ། །ཚུལ་ཁྲིམས་སྡོམ་པ་ལ་དགའ་བས། །སངས་རྒྱས་རྗེས་སུ་བསླབ་པར་བྱ། །བདག་ཉིད་མྱུར་བའི་ཚུལ་གྱིས་ནི། །བྱང་ཆུབ་ཐོབ་པར་མི་སྤྲོ་ཞིང་། །སེམས་ཅན་གཅིག་གི་ཕྱིར་ཡང་ནི། །ཕྱི་མའི་མུ་མཐར་གནས་པར་བགྱི། །ཚད་མེད་བསམ་གྱིས་མི་ཁྱབ་པའི། །ཞིང་དག་རྣམ་པར་སྦྱང་བར་བྱ། །མིང་ནས་བཟུང་བར་བྱས་པ་དང་། །ཕྱོགས་བཅུ་དག་ཏུ་རྣམ་པར་གནས། །བདག་གི་ལུས་དང་ངག་གི་ལས། །ཐམས་ཅད་དུ་ནི་དག་པར་བྱ། །ཡིད་ཀྱི་ལས་ཀྱང་དག་བྱ་སྟེ། །མི་དགེའི་ལས་རྣམས་མི་བྱའོ། །བདག་གིས་བྱང་ཆུབ་སྤྱོད་པ་ལ། །འཇུག་པ་རྣམ་པར་བརྩམས་པ་ཡི། །དགེ་བ་གང་དེས་འགྲོ་བ་ཀུན། །བྱང་ཆུབ་སྤྱོད་ལ་འཇུག་པར་ཤོག །ཕྱོགས་བཅུ་ནམ་མཁའི་མཐར་ཐུག་པ། །སོགས་དང་། འགྲོ་བའི་སྡུག་བསྔལ་སྨན་གཅིག་པུ། །སོགས་ཤློ་ཀ་རེ་རེ། །དཔེ་མེད་པ་ཡི་སེམས་སྐྱེས་ནས། །སྐད་ཅིག་རེར་ཡང་བསྐལ་མང་གི། ཚོགས་བཟླུམ་མཐའ་ལ་མི་གནས་པའི། །རྣམ་ཐར་ཆོས་ཀྱི་དབྱིངས་ཁྱབ་ཤོག །གང་ཡང་དུས་གསུམ་གཤེགས་པའི་རྒྱལ་བ་ཡི། །སོགས་ཤློ་ཀ་གཅིག། འཇམ་དཔལ་དཔལ་བོ་སོགས། ཇི་ལྟར་སྔོན་གྱི་སོགས། །སངས་རྒྱས་སྐུ་གསུམ་
བརྙེས་པའི་བྱིན་རླབས་དང་། །ཆོས་ཉིད་མི་འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུན་པའི་བྱིན་རླབས་ཀྱིས། །ཇི་བཏབ་བསྔོ་བ་སྨོན་ལམ་འགྲུབ་པར་ཤོག །ཅེས་པ་འདིའང་གྲུབ་བརྙེས་དཀོན་མཆོག་བསྟན་འཛིན་མཆོག་གི་སྤྲུལ་པའི་སྐུ་ཆེན་པོ་ཀརྨ་བསྟན་འཛིན་དགེ་ལེགས་ཉི་མའི་ཞལ་སྔ་ནས་བཀའ་སྩལ་ཕེབ་པ་ལྷུར་བླངས་ཏེ། བྱམས་མགོན་གཉིས་པའི་འབངས་ཐ་བློ་གྲོས་མཐའ་ཡས་ཀྱིས་དཔལ་སྤུངས་ཡང་ཁྲོད་དུ་བྲིས་པ་འབྲེལ་པ་ཐོགས་ཚད་སྤྱན་རས་གཟིགས་དབང་དང་མཉམ་པར་གྱུར་ཅིག །དགེ་ལེགས་འཕེལ།། །།