གསང་སྔགས་གསར་རྙིང་གི་རིང་ལུགས་དང་འབྲེལ་པ་རྡོ་རྗེ་ཐེག་པའི་དམ་ཚིག་གི་ཉེས་ལྟུང་བཤགས་པ་ཀུན་ཏུ་བཟང་པོའི་ཁྲུས་ཆུ།
གསང་སྔགས་གསར་རྙིང་གི་རིང་ལུགས་དང་འབྲེལ་པ་རྡོ་རྗེ་ཐེག་པའི་དམ་ཚིག་གི་ཉེས་ལྟུང་བཤགས་པ་ཀུན་ཏུ་བཟང་པོའི་ཁྲུས་ཆུ་ཞེས་བྱ་བ་བཞུགས་སོ། །
ཧོཿཆོས་དབྱིངས་ནམ་མཁའི་མཐའ་དང་མཉམ་པ་ཡི། །ལྷུན་གྲུབ་དབྱིངས་ཀྱི་དཀྱིལ་འཁོར་རབ་འབྱམས་དང་། །སེམས་དཔའ་རྡོ་རྗེ་སངས་རྒྱས་ཀུན་གྱི་དངོས། །རྩ་བརྒྱུད་བླ་མ་རྒྱལ་བ་སྲས་དང་བཅས། །དམ་ཚིག་རྗེས་གཅོད་དཔའ་བོ་རྣལ་འབྱོར་མ། །ཆོས་སྐྱོང་དཔལ་མགོན་དམ་ཅན་རྒྱ་མཚོའི་ཚོགས། །ཐུགས་དམ་དབང་གིས་མོས་པའི་གནས་འདིར་གཤེགས། །རྣལ་འབྱོར་ཉམས་པ་ཅན་ལ་ཐུགས་རྗེས་དགོངས། །རྡོ་རྗེའི་དམ་ཚིག་ཉམས་པ་མཐོལ་བཤགས་ན། །བཟོད་པར་བཞེས་ལ་ཚངས་པའི་དངོས་གྲུབ་སྩོལ། །བདག་དང་མཁའ་མཉམ་མར་གྱུར་འགྲོ་བ་ཀུན། །ཞིང་རྡུལ་
གྲངས་སྙེད་སྒོ་གསུམ་གུས་བཏུད་ནས། །ཕྱག་འཚལ་བྱང་ཆུབ་བར་དུ་སྐྱབས་སུ་མཆི། །ཕྱི་ནང་གསང་བའི་མཆོད་སྤྲིན་རྒྱ་མཚོས་མཆོད། །ཐོག་མེད་ནས་བསགས་སྡིག་སྒྲིབ་ཉེས་ལྟུང་ཚོགས། །བཅས་དང་རང་བཞིན་ཁ་ན་མ་ཐོ་བ། །ཁྱད་པར་རྡོ་རྗེ་ཐེག་པའི་འདུལ་བ་ལས། །འགལ་ཉམས་རལ་བར་གྱུར་པ་གང་མཆིས་པ། །གནོང་འགྱོད་དྲག་པོས་སྙིང་ནས་མཐོལ་ཞིང་བཤགས། །མཚན་ཉིད་ལྡན་པའི་རྡོ་རྗེ་སློབ་དཔོན་ལ། །མཉེས་པ་དགུ་ཡིས་ཚུལ་བཞིན་མ་བསྟེན་ཅིང་། །མཐུན་རྐྱེན་མ་བསྒྲུབ་དབང་གི་རྒྱུད་མ་སྨིན། །རས་ཆོད་དབང་གིས་གསང་བའི་ཐེག་པར་ཞུགས། །རྒྱུད་དོན་
མ་ཁྲོལ་མན་ངག་གནད་ལ་རྨོངས། །བསྲུང་མཚམས་མ་ཤེས་ཤེས་ཀྱང་ལེ་ལོས་གཡེང་། །ཐོག་མའི་རྟེན་འབྲེལ་ལོག་པ་མཐོལ་ལོ་བཤགས། །བསྲུང་བྱ་ཀུན་གྱི་གཞིར་གྱུར་འཇིག་རྟེན་པའི། །ཡང་དག་ལྟ་འཛིན་གསུམ་ལ་སྐྱབས་སུ་འགྲོ། །བྱང་ཆུབ་སེམས་བསྐྱེད་དཀྱིལ་འཁོར་དབང་བསྐུར་བ། །ཇི་བཞིན་ལག་ཏུ་མ་བླངས་མཐོལ་ལོ་བཤགས། །རྒྱུད་སྡེ་ཀུན་གྱི་གཞི་འམ་རྩ་བ་ནི། །བྱ་རྒྱུད་སྤྱི་ཡི་དམ་ཚིག་མཐའ་དག་དང་། །བྱེ་བྲག་སྤྱི་རྒྱུད་ནས་གསུངས་བཅུ་བཞི་པོ། །དཀོན་མཆོག་སྔགས་ལ་དད་དང་ཐེག་ཆེན་མོས། །ཞིང་མཆོག་ལ་གུས་མི་སྡང་དུས་མཚམས་མཆོད། །གཞན་གཞུང་མི་བཀུར་མགྲོན་མཆོད་བྱང་སེམས་བརྟན། །བསོད་ནམས་བཟླས་པ་དམ་ཚིག་གཞན་བསྲུང་བརྩོན། །དམ་མེད་སྔགས་རྒྱ་མི་སྦྱིན་རྒྱུད་སྦ་ཞིང་། །ཐོས་བསམ་སྒོམ་པས་མ་རྟོགས་མཐོལ་ལོ་བཤགས། །གཞན་ཡང་ལེགས་གྲུབ་ནས་བཤད་སུམ་ཅུ་པོ། །དཀོན་མཆོག་སྔགས་དང་ཐེག་པ་ཆེ་ལ་མོས། །ལྷ་ལ་དུས་མཚམས་མགྲོན་ལ་གློ་བུར་མཆོད། །བསོད་ནམས་ཚོགས་བསགས་བཟླས་བརྗོད་ཚུལ་བཞིན་བརྩོན། །སྤྱི་དང་བྱེ་བྲག་རིགས་ཀྱི་དམ་ཚིག་བརྟན། །རྒྱུད་སྲུང་རྟོགས་དང་སྒོ་གསུམ་ཉེ་བར་ཞི། །ཁྲུས་
དང་གཙང་སྦྲ་སྒྲུབ་ཕྱོགས་བཅུ་གཉིས་དང་། །ལྷ་ལ་མི་སྡང་གཞན་གྱི་གཞུང་མི་མཆོད། །མ་གནང་མི་ལེན་གསང་སྔགས་རང་བཟོར་མིན། །གདོན་གྱི་ལས་མིན་ལས་སྒྲུབ་གཞན་མི་བསྒྱུར། །དམ་མེད་མི་སྦྱིན་ཕྱག་རྒྱ་སོགས་མི་འགོང་། །མ་བསྡམས་པ་མིན་མ་གནང་ཟས་མི་ཟ། །བྱམས་པ་མི་གཏོང་མ་ཟིན་སྨྲ་བ་མིན། །ཁྲོས་ནས་དྲག་ཤུལ་མི་སྤྱོད་བདག་མི་བརྙས། །གཞན་སུན་མི་འབྱིན་གནས་ངན་ལེན་རྣམས་སྤང་། །ལྟད་མོ་མི་ལྟ་གཤང་གཅི་ཆུར་མི་འདོར། །བཅོ་བརྒྱད་དགག་པའི་སྒོ་ནས་གསུམ་རྣམས་དང་། །སོ་སོའི་རིགས་ཀྱི་དམ་ཚིག་ཇི་སྙེད་པ། །རྒྱུད་འདིར་ཞུགས་པ་མ་ཟད་བླ་མེད་ཀྱི། །རྣལ་འབྱོར་པས་ཀྱང་བསྲུང་བྱ་ཡིན་པ་ལ། །སྤང་བླང་གོ་ལྡོག་གྱུར་པ་མཐོལ་ལོ་བཤགས། །སྤྱོད་རྒྱུད་མི་དགེ་བཅུ་དང་དམ་པའི་ཆོས། །བྱང་ཆུབ་སེམས་སྤོང་སེར་སྣས་འགྲོ་ལ་གནོད། །སྤང་བྱ་བཅུ་བཞི་རིགས་ཀྱི་དམ་ཚིག་སོགས། །བསྒྲུབ་བྱ་རྣམས་ལས་འགལ་བ་མཐོལ་ལོ༴ །རྣལ་འབྱོར་རྒྱུད་ཀྱི་དམ་ཚིག་བཤད་རྒྱུད་ལུགས། །རྣམ་སྣང་རིགས་ལ་དཀོན་མཆོག་གསུམ་པོ་བཀུར། །རྡོ་རྗེའི་རིགས་ལ་རྡོར་དྲིལ་སློབ་དཔོན་བཟུང་། །རིན་ཆེན་རིགས་ལ་སྦྱིན་པ་རྣམ་བཞི་སྦྱིན། །པདྨའི་རིགས་
ལ་ཕྱི་གསང་ཐེག་པ་བཟུང་། །ལས་ཀྱི་རིགས་ལ་མཆོད་པར་བརྩོན་པ་སྟེ། །བསྒྲུབ་ཕྱོགས་བཅུ་བཞི་མ་བསྟེན་མཐོལ་ལོ་བཤགས། །དཀོན་མཆོག་བྱང་ཆུབ་སེམས་དོར་ལྷ་སྔགས་རྒྱ། །བླ་མར་སྨད་ཅིང་ཉེར་སྤྱད་ཕྱག་མཚན་འགོང་། །བཟའ་བ་མི་སྤྱོད་གསང་བསྒྲག་བསླབ་པ་འདོར། །འཚེ་ཞིང་ཐེག་དམན་ལ་དགའ་གཞན་དོན་སྐྱོ། །ཕྱིན་དྲུག་སྤྱོད་དོར་བྱ་མིན་བྱ་བ་སྟེ། །དགག་ཕྱོགས་བཅུ་བཞི་བགྱིས་པ་མཐོལ་ལོ། །རྩ་རྒྱུད་ནས་གསུངས་ལྷ་ལྔའི་དམ་ཚིག་དང་། །དཔལ་མཆོག་དང་པོས་བསྟན་པའི་རྩ་ལྟུང་བཅུ། །རྩ་བ་བྱང་སེམས་ཕམ་པ་བཅུ་བཞི་དང་། །ཡན་ལག་ཚུལ་ཁྲིམས་གསུམ་སྟེ་རིགས་ལྔ་སྤྱི། །མདོར་བསྡུས་བསྒྲགས་ཏེ་བཟུང་བ་ལས་འགལ་ཞིང་། །ཕྱིར་བཅོས་ཚུལ་བཞིན་མ་བགྱིས་མཐོལ༴ །གསང་བ་བླ་མེད་སྒོར་ཞུགས་རྣལ་འབྱོར་པས། །ཐོག་མར་བླང་བྱ་རྡོ་རྗེའི་བརྟུལ་ཞུགས་ནི། །ཤ་ཆེན་གཤང་གཅི་ཁུ་ཁྲག་བདུད་རྩི་ལྔ། །སྲོག་གཅོད་བརྫུན་སྨྲ་འདོད་སྤྱོད་ནོར་ལ་ཆགས། །དངོས་སྦས་དགོངས་ཏེ་གསུངས་རྣམས་རྒྱུ་ཚོགས་ཙམ། །མ་བསྟེན་འདུས་པའི་རྒྱུད་དང་འགལ་བ་བཤགས། །བདེ་མཆོག་ནས་གསུངས་ཚངས་སྤྱོད་ཉི་ཤུ་གཉིས། །ཚེས་བཅུར་རིགས་ལྡན་མ་དང་ཕྱི་རོལ་མཆོད། །ལག་མཆོད་
རྡོ་རྗེ་བཞི་ཡི་ངེས་དོན་མཆོད། །ཕྱག་རྒྱ་བཞི་བརྟེན་དཔའ་བོ་དཔའ་མོ་མཆོད། །བརྡའ་དང་གཡོན་པའི་ཀུན་སྤྱོད་མ་བགྱིས་དང་། །རྨོངས་པས་བགྲོད་ཅིང་རང་གཞན་ཐ་དད་འཛིན། །གུས་པ་ལྷོད་ཅིང་ཕྱག་རྒྱ་མི་བརྟེན་འབྲལ། །སྤྱོད་པ་ཉམས་ཤིང་དམ་ཚིག་རྫས་ལ་ཁྲོ། །ཕོ་ཉ་གསུམ་གྱི་སྒྲུབ་པ་ལ་གནས་པའི། །རིག་མའི་བརྟུལ་ཞུགས་ཐུན་མོང་ཐུན་མིན་རྣམས། །མ་བསྟེན་ལོག་པར་བསྒྲུབ་པ་མཐོལ་ལོ་བཤགས། །དཀོན་མཆོག་མི་སྤང་དམ་ཚིག་རྣམས་ལ་སྤྱད། །རྡོ་རྗེ་དྲིལ་བུ་གླེགས་བམ་གཙུག་ཏུ་བཅངས། །སྦྱིན་སྲེག་དཀྱིལ་འཁོར་རབ་གནས་ལས་ལ་བརྩོན། །འབྱུང་པོར་གཏོར་མ་སྦྱིན་ཅིང་བཟླས་བསྒོམ་འབད། །སློབ་མར་ཆོས་བཤད་སེམས་ཅན་བྱམས་པས་བསྡུ། །རྒྱལ་ལ་ཚོགས་བསགས་ཛམ་ལར་ཆུ་སྦྱིན་བཏང་། །མཆོད་རྟེན་སཱཙྪ་དགེ་བའི་ལས་བྱ་ཞེས། །ལས་དང་པོ་ཡིས་བསྒྲུབ་བྱ་བཅུ་བཞི་པོ། །གུར་ལས་གསུངས་རྣམས་མ་བགྱིས་མཐོལ་ལོ་བཤགས། །རྒྱུན་གྱི་བྱ་བ་མཆོད་པའི་དེ་ཉིད་དང་། །སྦ་གསང་ཕོ་ཉ་སྔགས་བཟླས་ཞིང་ལ་གུས། །སྤྱོད་བརྟུལ་ཀློག་པ་ཐོས་བསམ་སྒོམ་བྱིན་རླབས། །མངོན་བརྗོད་བླ་མ་ནས་གསུངས་སྤྱོད་པ་དགུ། །ཚུལ་བཞིན་མ་རྟོགས་མ་
བསྒྲུབ་མཐོལ་ལོ་བཤགས། །རྩ་བཞི་ཆང་བཅས་བསྲུང་བྱ་རྣམ་པ་ལྔ། །རྒྱན་པོ་བཟའ་མིན་ངན་ཚིག་འབྱུང་པོ་དང་། །ཀླ་ཀློའི་ཆོས་སྟེ་བྱ་བ་མིན་པ་ལྔ། །དུད་འགྲོ་བྱིས་པ་སྐྱེས་པ་ཕོ་དང་མོ། །དཀོན་མཆོག་མཆོད་རྟེན་བསྣུན་པ་མིན་པ་ལྔ། །གྲོགས་པོ་རྗེ་དཔོན་སངས་རྒྱས་དགེ་འདུན་དང་། །ཡིད་བརྟོན་བླ་མར་འཁུ་བ་མིན་པ་ལྔ། །གཟུགས་སྒྲ་དྲི་རོ་རེག་བྱར་ཞེན་མིན་ལྔ། །རྡོ་རྗེ་སེམས་དཔའི་བརྟུལ་ཞུགས་ཉེར་ལྔ་པོ། །དང་པོའི་སངས་རྒྱས་རྒྱུད་ཀྱི་རྒྱལ་པོ་ལས། །གསུངས་རྣམས་ཇི་བཞིན་མ་བསྒྲུབ་མཐོལ་ལོ་བཤགས། །སྒོ་གསུམ་བག་ཆགས་དང་བཅས་རྡོ་རྗེ་བཞིར། །ཐབས་ཤེས་ཁྱད་པར་ཅན་གྱི་སྡོམ་པའི་ཁྲིམས། །མི་བསྐྱོད་ཕྱག་རྒྱ་གསུམ་བཟུང་བླ་མར་བསྟེན། །རིན་ཆེན་རིགས་ལ་སྦྱིན་པ་རྣམ་བཅུ་སྦྱིན། །འཁོར་ལོར་ཤ་ལྔ་བདུད་རྩི་ཆོས་མཐུན་བཟའ། །རལ་གྲིར་མཆོད་ཅིང་པདྨར་འཕོ་མེད་བསྲུང་། །རྡོར་སེམས་བྱང་ཆུབ་སེམས་ཏེ་དྲང་ངེས་ཚུལ། །རིམ་གཉིས་དོན་དང་ལྡན་པར་བསྡེབས་པ་ལས། །ཡེ་ཤེས་གོང་དུ་མ་སྦེལ་མཐོལ་ལོ་བཤགས། །ཁྱད་པར་རྡོ་རྗེའི་རིགས་ལ་སྲོག་གཅོད་ཅིང་། །རལ་གྲིར་བརྫུན་སྨྲ་རིན་ཆེན་གཞན་ནོར་ལན། །ཆུ་སྐྱེས་བུད་མེད་འཕྲོག་ཅིང་
འཁོར་ལོ་ལ། །ཤ་ཆང་ལོངས་སྤྱོད་གྲི་གུག་ཤེས་རབ་མར། །མི་སྨོད་གཏོང་བ་ཆེ་རྣམས་རྒྱུད་ཚོད་བཞིན། །དངོས་དང་བསམ་པས་སྒྲ་དོན་ཇི་བཞིན་དང་། །ཇི་བཞིན་མིན་ལ་མ་སྤྱད་མཐོལ་ལོ་བཤགས། །དམ་པའི་ཚིག་ལས་ནམ་ཡང་འདར་མེད་པ། །བསྲུང་ན་དངོས་གྲུབ་མ་བསྲུང་ངན་སོང་དུ། །ལྟུང་བའི་རྩ་བ་ཤིན་ཏུ་ལྕི་བའི་ཁྲིམས། །དབང་རྒྱུད་མན་ངག་ཡེ་ཤེས་དོན་སྟོན་པའི། །དཔལ་ལྡན་བླ་མར་བརྙས་ཤིང་ཐུགས་དཀྲུགས་དང་། །རྒྱལ་བའི་བཀའ་དང་བླ་མའི་གསུང་ལས་འདས། །ཉེ་རིང་རྡོ་རྗེའི་སྤུན་ལ་ཁྲོས་ཤིང་སྨད། །བྱམས་པའི་སེམས་བཏང་ཀུནྡ་བྱང་སེམས་སྤང་། །གྲུབ་པའི་མཐར་སྨོད་མ་སྨིན་གསང་བ་སྦྱིན། །ཕུང་པོར་བརྙས་ཤིང་དག་པའི་ཆོས་ལ་ཚོམ། །གཡོ་སྒྱུའི་དབང་གྱུར་གདུག་པ་ཅན་ལ་བྱམས། །མིང་སོགས་བྲལ་ལ་དེར་རྟོག་ཡིད་གཉིས་ཟ། །དད་ལྡན་དག་པའི་སེམས་ཅན་སུན་འབྱིན་ཅིང་། །ཁྱད་པར་དུས་སུ་བསྟེན་བྱའི་དམ་ཚིག་འདོར། །བུད་མེད་སྤྱིར་སྨོད་རྩ་ལྟུང་བཅུ་བཞི་པོ། །ཡུལ་བསམ་སྦྱོར་དུས་ཉེས་པ་ལན་གྲངས་ཏེ། །སྒོ་དྲུག་དབྱེ་བས་བརྒྱད་ཅུ་རྩ་བཞི་དང་། །དེ་ཡང་ལྕི་འབྲིང་ཡང་བའི་བྱེ་བྲག་གིས། །ཉིས་བརྒྱ་ང་གཉིས་རིག་པ་འཛིན་
པའི་ཁྲིམས། །ཕྲ་རགས་སྒོ་ནས་འགལ་བ་མཐོལ་ལོ་བཤགས། །དམ་མེད་མཚན་ཉིད་མི་ལྡན་རིག་མ་བསྟེན། །སྔགས་སྤྱོད་ལ་རྩོད་ཡུལ་མིན་བདུད་རྩི་ལེན། །དུས་ལ་མི་བཤད་དྲིས་ལན་བྲེ་མོས་གདབ། །ཉན་ཐོས་ནང་འདུག་མི་ཤེས་སྔགས་པར་རློམས། །དགོས་པ་མེད་པར་སོ་བྱང་བཅས་ལས་འདས། །བསྙེན་སོགས་མ་དག་དཀྱིལ་འཁོར་ལས་ལ་འཇུག །བརྡ་དང་ཕྱག་རྒྱ་ཡུལ་མིན་ལ་བསྟན་ཅིང་། །སྣོད་མིན་གསང་བསྒྲགས་ཡན་ལག་སྦོམ་པོ་ཡི། །ལྟུང་བ་རྣམས་ཀྱིས་གོས་པ་མཐོལ་ལོ༴ །ཕྲིན་ལས་སྒྲུབ་པ་ལ་བརྟེན་ལྟུང་བའི་ལས། །མེ་ཏོག་ཕོག་པའི་ལྷ་དོན་བསྐྱེད་རྫོགས་ཡོལ། །ཕྱི་རོལ་ལྷར་དགའ་བསྐྱེད་རིམ་དངོས་པོར་ཞེན། །མ་ཐོབ་གཞན་འཆད་འདིར་སྣང་ཟབ་ཆོས་སྟོན། །བསླབ་པ་འོག་མར་བརྙས་ཤིང་ཚུལ་འཆོས་བྱེད། །ནུས་མེད་ལས་སྦྱོར་དོན་མེད་གཡེར་བས་འདའ། །སྐྱབས་ནུས་མི་སྐྱོབ་འོག་མའི་སྤྱོད་ལ་དགའ། །ཟང་ཟིང་ལ་ཆགས་དམ་ཉམས་འདུལ་མི་བྱེད། །སྤྱོད་པ་དུས་སྐབས་མ་འབྲལ་མཐོལ་ལོ༴ །དམ་པ་མ་བསྟེན་སྣོད་ཀྱི་སྤང་བླང་འཆོལ། །རང་འདོད་ཕྱིར་དུ་སྲོག་ཆགས་གཞན་ལ་གནོད། །དཀོན་མཆོག་དཀོར་སྤྱད་གཞན་དོན་ཡལ་བར་དོར། །བསྔོ་བས་རྒྱས་མ་ཐེབས་
ཤིང་འཕོ་བ་ཡིས། །དེ་ཉིད་མ་མཁས་པ་རྣམས་མཐོལ་ལོ་བཤགས། །སྔགས་ལ་ཐེ་ཚོམ་ཐེག་གསུམ་རིམ་མ་བསྟན། །དེ་ཉིད་བཅུ་དང་མ་ལྡན་སློབ་དཔོན་བྱས། །བདུད་བརྟག་མི་མཁས་དམ་ཚིག་བརྟག་མི་བྱེད། །ཉེས་བྱས་ཆུང་ངུ་མི་བཤགས་ཁྱད་དུ་བསད། །ཕྲ་མོ་ཉེར་བརྒྱད་བོག་པ་མཐོལ་ལོ༴ །སྔགས་པ་སློང་མོས་རྒྱུ་ཞིང་རྣལ་འབྱོར་སྤངས། །རྒྱུན་ཏུ་གསང་སྔགས་མ་བཟླས་དམ་ཚིག་སོགས། །རྟག་ཏུ་བསྟེན་པར་མ་བགྱིས་མཐོལ་ལོ་བཤགས། །དབང་བཞིའི་མཉམ་བཞག་དམ་ཚིག་བསྐྱེད་རིམ་དང་། །རྩ་རླུང་དཀྱིལ་འཁོར་འཁོར་ལོ་རྦ་རླབས་གསུམ། །རྗེས་སྤྱོད་ངོ་བོ་ཉིད་གསུམ་རང་བྱུང་དང་། །སྒྲིབ་གཉིས་ཁྱད་པར་ཤེས་སྒྲིབ་མ་སྤངས་དང་། །མི་འབྲལ་རྡོ་རྗེ་དྲིལ་བུ་རླུང་ཞི་དྲག །དངོས་དང་ཡེ་རྒྱ་མ་བསྟེན་མཐོལ༴། འགྲོ་ཀུན་སྐུ་གསུང་ཐུགས་ཀྱི་རྡོ་རྗེ་ཡི། །རང་བཞིན་མ་ཤེས་ལུས་ལ་བརྙས་པ་དང་། །ངག་ལ་སུན་ཕྱུང་ཡིད་ལ་ཟུག་རྔུ་བསྐྱེད། །རྡོ་རྗེ་གསུམ་གྱི་དམ་འགལ་མཐོལ་ལོ༴ །འཕོ་མེད་བཅུ་དྲུག་རིམ་པ་བསྐྱེད་པ་དང་། །འདོད་པས་མི་བསྒྲོད་ཉ་མཐར་གཉིས་མེད་བྱེད། །ནག་པོའི་ཕྱོགས་ལ་མ་ཞུགས་མི་མོ་ཡི། །སྤྱོད་པ་ལེགས་སྲུང་ཚངས་སྤྱོད་རྡོ་རྗེའི་
ཞལ། །འདྲེན་པ་རྩ་ཡི་ཀུན་སྤྱོད་མཆོག་དངོས་རྒྱུ། །ཁྱད་པར་བརྒྱད་དང་མ་ལྡན་མཐོལ་ལོ་བཤགས། །མདོར་ན་བླ་མེད་དབང་བཞི་དང་འབྲེལ་བའི། །བསྲུང་བྱ་རྩ་བ་ཡན་ལག་ཕྲ་མོར་བཅས། །བསྒྲུབ་བྱ་བཟའ་དང་སྤྱད་དང་མི་འབྲལ་བ། །དྲོད་ཐོབ་བརྟུལ་ཞུགས་དྲུག་དང་འགལ་བ་སོགས། །གང་ཡང་མི་ཤེས་བག་མེད་ཉོན་མོངས་རགས། །མ་གུས་བརྗེད་ངས་དྲན་པ་མི་གསལ་བ། །ཉམས་པའི་རྒྱུ་དྲུག་ལ་བརྟེན་སྦྱོར་བ་བདུན། །ཚང་བའི་ཕམ་པ་མ་ཚང་སྦོམ་ལྟུང་སོགས། །ཉེས་བྱས་ཕྲ་རགས་གང་བགྱིས་མཐོལ་ལོ་བཤགས། ༈ནམ་མཁའི་མཐའ་མཉམ་དཀྱིལ་འཁོར་རབ་འབྱམས་དང་། །ཕྱོགས་བཅུར་བཞུགས་པའི་དཔའ་བོ་རྣལ་འབྱོར་མ། །དཔང་གྱུར་ཚད་མར་གྱུར་རྣམས་སྤྱན་ལམ་དུ། །བདག་ཅག་གསང་བའི་སྒོར་ཞུགས་རྣལ་འབྱོར་རྣམས། །སོ་སྐྱེའི་དབང་གྱུར་གཉེན་པོ་ཞེན་པ་ཡིས། །རྒྱུད་ལས་གསུངས་པའི་དམ་ཚིག་ཕྱི་ནང་གསང་། །དྲང་ངེས་མ་ཕྱེད་ཉམས་ཆགས་འགལ་གྱུར་པ། །གནོང་འགྱོད་གདུང་བ་དྲག་པོ་མཐོལ༴ །བདག་གིས་བགྱིས་དང་གཞན་ལ་བགྱིད་དུ་སྩལ། །རྗེས་སུ་ཡི་རང་སྡིག་པའི་ལས་གང་དག །རྣམ་སྨིན་མི་བཟད་སྐྱེད་པའི་རྒྱུར་གྱུར་པ། །
དེ་ཀུན་རབ་ཏུ་འགྱོད་པས་མཐོལ་ཞིང་བཤགས། །བླ་མ་ཡི་དམ་མཁའ་འགྲོ་འཁོར་དང་བཅས། །ཡེ་ཤེས་སྤྱན་ལ་སྒྲིབ་པ་མི་མངའ་བས། །བདག་ཡིད་སྙིང་ནས་གུས་ཤིང་གདུང་བ་ལ། །མཁྱེན་དགོངས་ཐུགས་རྗེས་བཟོད་ཅིང་ཚངས་པར་སྩོལ། །ཕྱིན་ཆད་སྲོག་གི་ཕྱིར་ཡང་ཉམས་པའི་ལས། །མི་བགྱིད་ཟབ་མོའི་ལམ་མཆོག་ཚུལ་བཞིན་བསྟེན། །དེ་ལྟར་བཤགས་པས་ཉམས་ཆག་སོར་ཆུད་དེ། །བདག་རྒྱུད་རྣམ་པར་དག་པར་བྱིན་གྱིས་རློབས། །བྱང་ཆུབ་སྒྲུབ་ལ་བར་ཆད་མི་འབྱུང་ཞིང་། །རིམ་གཉིས་ལམ་གྱི་མངོན་རྟོགས་མཐར་ཕྱིན་ནས། །ཚེ་འདི་ཉིད་ལ་ཁྱབ་བདག་རྡོ་རྗེ་འཆང་། །སྐུ་བཞི་ཡེ་ཤེས་ལྔ་ལྡན་མྱུར་ཐོབ་ཤོག །དེ་མ་ཐོབ་ཀྱི་སྐྱེ་བ་ཐམས་ཅད་དུ། །རིགས་བཟང་བློ་ལྡན་སྙིང་རྗེ་ཆེ་བ་དང་། །ང་རྒྱལ་མེད་ཅིང་བླ་མ་ལ་གུས་པས། །རྡོ་རྗེ་ཐེག་པའི་ལམ་བཟང་བདེར་བགྲོད་ཤོག །མགོ་བོར་བླ་མའི་ཅོད་པན་མི་འབྲལ་ཅིང་། །ལག་ཏུ་རྡོ་རྗེ་དྲིལ་བུ་ཡང་དག་འཆང་། །ངག་གིས་གསང་སྔགས་རྒྱལ་པོ་བཟླ་བ་དང་། །ཡིད་ཀྱིས་ཟུང་འཇུག་མངོན་པར་སྒོམ་པར་ཤོག །ཐུན་མོང་ཁྱད་པར་དབང་གིས་རྒྱུད་སྨིན་ཅིང་། །དམ་ཚིག་སྡོམ་དང་བརྟུལ་ཞུགས་ལམ་ཀུན་གྱི། །རྩ་བར་ཤེས་ནས་སྲོག་བཞིན་
བསྲུང་ནུས་ཤིང་། །རྨི་ལམ་དུ་ཡང་ཉམས་པ་མི་བྱེད་ཤོག །བླ་མེད་རྡོ་རྗེ་ཐེག་པའི་ལམ་བཟང་འདི། །སྣ་ཚོགས་ཐབས་ཀྱིས་ཕྱོགས་བཅུའི་ཞིང་དུ་སྤེལ། །ལུས་ཅན་མཐའ་དག་ལམ་མཆོག་འདི་ཉིད་ཀྱིས། །སངས་རྒྱས་ས་ལ་བདེ་བླག་འགོད་ནུས་ཤོག །བྱ་བྱེད་འཁོར་གསུམ་རང་བཞིན་མི་དམིགས་ཀྱང་། །འཛིན་རྟོག་ཟད་ཕྱིར་དག་ཚངས་ཕུལ་བའི་དགེས། །སྒྲིབ་གཉིས་ངོ་བོ་གདོད་ནས་རྣམ་དག་པའི། །གནས་ལུགས་མངོན་གྱུར་ཕྱག་རྒྱ་ཆེ་ཐོབ་ཤོག །བདག་གཞན་དུས་གསུམ་དགེ་བ་ཅི་སྤྱད་པས། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །བླ་མེད་རྡོ་རྗེ་ཐེག་པའི་སྣོད་གྱུར་ཏེ། །ཀུན་ཀྱང་རྡོ་རྗེ་འཛིན་པ་མྱུར་ཐོབ་ཤོག །སྐྱེ་བ་ཀུན་ཏུ་རིགས་བདག་མི་འཆོལ་ཞིང་། །བཅོམ་ལྡན་དྲག་པོའི་དཀྱིལ་འཁོར་འཛིན་བཞིན་ཏུ། །ཤེས་རབ་པདྨའི་བདུད་རྩི་འཐུང་བྱེད་ཅིང་། །བྱང་ཆུབ་སྙིང་པོར་སྲིད་པ་དག་བྱེད་ཤོག །ཅེས་པ་འདི་ནི་སྔར་བྱས་པའི་གསང་སྔགས་གསར་རྙིང་གི་དམ་ཚིག་ཉེས་བཤགས་ཀུན་བཟང་ཁྲུས་ཆུ་ལས་གསར་མ་ཁོ་ན་ཁོལ་ཕྱུང་དུ་ཀློག་པའི་སྐབས་ཀྱི་མཇུག་མཐུད་དུ། བླ་མ་རྡོ་རྗེ་འཆང་གི་བཀའ་བཞིན་བློ་གྲོས་མཐའ་ཡས་ཀྱིས་སྤེལ་བ་དགེ་ལེགས་འཕེལ།། ༈ །།གདོད་མའི་མགོན་པོའི་ཆོས་ཉིད་རང་བྱུང་སྒྲས། །
ནང་པ་ཐབས་ཀྱི་ཐེག་པ་ཐུན་མོང་དུ། །འདའ་དཀའ་རྡོ་རྗེའི་ཐ་ཚིག་གཉན་པོ་ནི། །ཐུན་མོང་སྤྱི་ཡི་དམ་ཚིག་སོ་བྱང་དང་། །ཕྱི་རྒྱུད་སྡེ་གསུམ་སྡོམ་པའི་བསྲུང་མཚམས་ལས། །འགལ་ཞིང་ཉམས་པར་གྱུར་པ་མཐོལ་ལོ་བཤགས། །ཁྱད་པར་རྩ་བ་སྐུ་གསུང་ཐུགས་གསུམ་ལས། །སྤྱི་ཡི་བླ་མ་བསྟན་པའི་སྒྲོན་མེ་ལ། །རྗེ་དཔོན་བཞིན་ཏུ་མ་བཀུར་ཡལ་བར་དོར། །བསྟན་སྒོར་བཅུག་པའི་འདྲེན་པའི་བླ་མ་ནི། །ཕ་ཁུ་བཞིན་ཏུ་བཀུར་སྟིས་མཉེས་མ་བྱས། །རྒྱུད་ལུང་དོན་བཤད་ཤེས་རབ་རྒྱུད་སྤེལ་ལ། །རང་གི་ལུས་བཞིན་གཅེས་པར་མ་བཙས་ཤིང་། །དབང་བཞིའི་ཆུ་བོ་རྫོགས་མཛད་བླ་མ་ནི། །མིག་དང་སྙིང་ལྟར་མ་གཅེས་ཐུགས་དང་འགལ། །རང་རིག་དོན་སྟོན་མན་ངག་སློབ་དཔོན་ནི། །སྲོག་གི་དྭངས་མར་མ་བལྟས་ནོངས་པ་ཤོར། །ཉམས་ཆགས་སྐོང་མཛད་འཁོར་བའི་གནས་འདྲིན་ལ། །མ་ལྟར་གཅེས་བས་མཉེས་པ་མ་བསྒྲུབ་ཤིང་། །སློབ་དཔོན་དྲུག་གི་བཀའ་བཞིན་མ་བགྱིས་སོགས། །བླ་མའི་དམ་ལས་འགལ་རྣམས་མཐོལ་ལོ་བཤགས། །སེམས་ཅན་སངས་རྒྱས་རྒྱུར་གནས་སྤྱི་ཡི་མཆེད། །སངས་རྒྱས་བསྟན་པའི་སྒོར་ཞུགས་རིང་བའི་མཆེད། །གསང་སྔགས་ལྟ་སྤྱོད་མཐུན་པ་ཉེ་བའི་
མཆེད། །སློབ་དཔོན་ལྷ་དང་དཀྱིལ་འཁོར་གཅིག་གིས་བསྡུས། །འདྲེས་པའི་མཆེད་བཞི་ཡི་དམ་རང་བཞིན་ཏུ། །མ་ཤེས་ཐུགས་འགལ་བགྱིས་པ་མཐོལ་ལོ༴ །ལུས་ཀྱིས་རྡེག་འཚོགས་དཀོར་དང་སྐུ་ཆས་སྤྱོད། །ངག་གིས་རྫུན་དང་ངག་འཁྱལ་ཚིག་རྩུབ་ཤོར། །ཡིད་ཀྱིས་མ་དད་ལོག་ལྟ་ཆགས་སྡང་དང་། །སྒོ་གསུམ་སྤྱོད་པས་བླ་མ་མཆེད་ལྕམ་གྱི། །ཐུགས་དང་འགལ་བས་སྐུ་ཡི་དམ་ཚིག་ཉམས། །ཚེ་འདིར་ཚེ་ཐུང་ནད་མང་མཛེ་ཡིས་ཟིན། །ཕྱི་མར་ན་རག་སྡུག་བསྔལ་མྱོང་འགྱུར་བ། །གང་མཆིས་ཐམས་ཅད་འགྱོད་པས་མཐོལ༴ །སྣོད་བཅུད་ལྷ་ཡི་འཁོར་ལོར་བསྒོམ་མ་ནུས། །སྒྲ་གྲགས་རྩ་རླུང་སྔགས་སུ་མ་ཤེས་ཤིང་། །ཐིག་ལེ་བདེ་ཆེན་རང་རིག་འོད་གསལ་དུ། །མ་རྟོགས་སྒོམ་སྒྲུབ་དམ་དུ་བཅས་ལས་ཉམས། །ཚོགས་གཏོར་ཕྱག་རྒྱ་རྡོ་རྗེའི་གླུ་གར་སོགས། །དུས་དང་དུས་ལས་འདས་པ་མཐོལ་ལོ་བཤགས། །རྩ་བ་རྒྱུ་དང་བསྐྱེད་པ་རྐྱེན་གྱི་སྔགས། །བཟླ་བ་ལས་རྣམས་མ་ཕྱེད་སྔགས་སལ་ཞུགས། །ཆོས་ཀྱི་ཕྱག་རྒྱ་སྙིང་པོ་མ་གསལ་ཞིང་། །དམ་ཚིག་ཕྱག་རྒྱ་མཚན་མ་ནོར་བ་དང་། །ལས་ཀྱི་ཕྱག་རྒྱ་འཆིང་གྲོལ་བྱེད་ལས་གཡེལ། །རང་ཉིད་ལྷ་སྐུ་ཕྱག་རྒྱ་ཆེར་མ་བསྒོམས། །སྔགས་དང་ཕྱག་རྒྱ་
རབ་ཀྱི་ཆུ་བོའི་རྒྱུན། །འབྲིང་གི་ཟླ་རེར་ཐ་མས་ལོ་ཟླ་ཡི། །དུས་ལས་འདས་པས་གསུང་གི་དམ་ཚིག་ཉམས། །ཚེ་འདིར་འདོད་པའི་དོན་རྣམས་མི་འགྲུབ་ཅིང་། །ཕྱི་མར་མནར་མེད་གནས་སུ་ལྟུང་འགྱུར་བ། །གང་བགྱིས་ཐམས་ཅད་འགྱོད་པས་མཐོལ་ལོ་བཤགས། །རྡོ་རྗེ་སློབ་དཔོན་གསང་མཚན་འཆོལ་བར་བསྒྲགས། །ལྟ་བ་ཟབ་མོ་སྤྱོད་པ་བརླངས་པོ་དང་། །ཡི་དམ་ལྷ་ཡི་མཚན་དང་གྲུབ་པའི་རྟགས། །སྤྱི་གསང་བཞི་པོ་སྣོད་མ་ཡིན་ལ་བཤད། །སྒྲུབ་པའི་གནས་དང་མཚན་ལྡན་ཕྱག་རྒྱའི་གྲོགས། །གསང་བའི་རྫས་མཆོག་སྒྲུབ་དུས་བར་གསང་བཞི། །བློ་ཆུང་དམ་ཉམས་རྣམས་ལ་ལྷུག་པར་བཤད། །སློབ་དཔོན་མཆེད་ལྕམ་རང་གི་སྒྲུབ་པའི་རྫས། །ལྟ་སྤྱོད་ཟབ་མོ་གསང་བར་འོས་པ་དང་། །བླ་མ་མཆེད་ཀྱིས་གསང་བར་གཉེར་གཏད་པ། །ཐེག་དམན་སོགས་ལ་ཟུར་ཙམ་བཤད་པ་དང་། །རྟག་ཆད་མཚན་འཛིན་བདག་ཏུ་ལྟ་བ་ཡིས། །ལྷག་པའི་བདེན་པ་དབྱེར་མེད་སྤྱོད་ཡུལ་དང་། །བྲལ་བའི་གནས་ལུགས་མ་རྟོགས་དོན་དམ་བསྒྲུབས། །དེ་ཉིད་སྤང་ཐོབ་མེད་པར་མངོན་གྱུར་པའི། །འབྲས་བུ་ལ་དམིགས་སྨོན་དང་རང་གནས་ཀྱི། །ཡེ་ཤེས་རྗེས་མཐུན་སྒོ་གསུམ་སྤྱོད་ཡུལ་བཅས། །ཁྱེར་
སོ་གསུམ་གྱིས་འཇུག་སེམས་བསྒྲུབས་མ་ནུས། །རང་ཉིད་གཅེས་འཛིན་སྙིང་རྗེས་འགྲོ་བའི་དོན། །མ་བགྱིས་ཀུན་རྫོབ་བྱང་སེམས་སྤང་རྣམས་ཀྱིས། །ཐུགས་ཀྱི་དམ་ཚིག་ཚེ་འདིར་སྨྱོ་འབོགས་ཐེབས། །ཕྱི་མར་རྡོ་རྗེའི་དམྱལ་བར་ལྟུང་འགྱུར་བ། །གང་བགྱིས་ཐམས་ཅད་འགྱོད་པས་མཐོལ་ལོ་བཤགས། །ཡན་ལག་དམ་ཚིག་ཉི་ཤུ་རྩ་ལྔ་ལས། །ཤེས་བྱ་ལྟ་བ་བསྒྲུབ་བྱ་སྒོམ་པ་སྟེ། །སྤྱོད་པའི་དམ་ཚིག་གཙོ་བོར་གྱུར་པ་ཡི། །སྤྱད་དང་མི་སྤང་དང་དུ་བླང་བ་གསུམ། །མཉམ་གཞག་ངེས་དོན་རྗེས་ཐོབ་དུས་ཚོད་དང་། །འབྲེལ་པས་སྒྲ་བཞིན་མ་སྤྱད་མཐོལ༴། ཕུང་པོ་ཡབ་ལྔ་འབྱུང་བ་ཡུམ་ཆེན་ལྔ། །དབང་ཤེས་སེམས་དཔའ་ཡུལ་རྣམས་སེམས་མ་སྟེ། །དབྱིབས་དང་ཁ་དོག་རིགས་ལྔ་ཡེ་ཤེས་ལྔར། །མ་རྟོགས་དབང་གིས་ཐ་མལ་རང་གར་བཟུང་། །ཤེས་བྱ་ལྔ་པོ་མ་ཤེས་མཐོལ་ལོ༔ །རྟོག་ཚོགས་ལྔ་ཚན་སྐུ་དང་ཡེ་ཤེས་སུ། །རྡོ་རྗེ་རིན་ཆེན་པདྨ་ལས་དེ་བཞིན། །ངོ་བོ་རོ་གཅིག་རྣམ་པ་མ་འདྲེས་པས། །བསྒྲུབ་བྱ་ལྔ་པོ་མ་བསྒྲུབ་མཐོལ་ལོ༴ །སྦྱོར་བར་འཛེམ་དང་སྲེད་ཕས་འཇོལ་ཉོག་སྤྱད། །བསྒྲལ་འོས་བོར་ནས་མི་འོས་རང་དོན་བསྒྲལ། །མཆོད་སྦྱིན་དོན་མིན་འདོད་པས་མ་བྱིན་བླངས། །གསང་བ་བསྲུང་ཕྱིར་བརྫུན་
ཚིག་སྨྲ་མ་ནུས། །ཉེས་པར་སྤྱོད་ལ་ཚིག་རྩུབ་ཀྱིས་མ་ཟློག །སྤྱད་བྱ་ལྔ་དང་འགལ་བ་མཐོལ༴ །འདོད་ཆགས་ཞེ་སྡང་གཏི་མུག་ང་རྒྱལ་དང་། །ཕྲག་དོག་རང་གར་སྤྱད་པས་འཁོར་བར་འཁྱམས། །ཐབས་ཀྱིས་ཟིན་ན་རྣམ་པར་གྲོལ་བའི་ལམ། །མི་སྤངས་ལྔ་པོ་སྤངས་པ་མཐོལ་ལོ་བཤགས། །དྲི་ཆེན་དྲི་ཆུ་མཱཾ་ས་རཀྟ་དང་། །བྱང་ཆུབ་སེམས་རྣམས་ཆོས་ཉིད་རང་བཞིན་དང་། །ངོ་བོ་མཐུ་བྱིན་སྟོབས་ཀྱིས་སྒྲུབ་པའི་རྫས། །ཁྱད་པར་ཅན་ཏུ་མ་རྟོགས་གཙང་སྨེར་བཟུང་། །དང་དུ་བླང་ལྔ་མ་བསྟེན་མཐོལ་ལོ༴ །སྒྲུབ་པ་གཙོར་གྱུར་ལྷག་པའི་དམ་ཚིག་ནི། །སློབ་དཔོན་ལ་འཁུ་བཀའ་ལ་རས་ཆོད་བགྱིས། །བརྙས་པའི་སེམས་ཀྱིས་གཙུག་ཏུ་མ་བཀུར་ཅིང་། །གསང་བའི་ཡུམ་བསླད་རྣལ་འབྱོར་དཀྱིལ་འཁོར་དཀྲུགས། །དང་ལྡན་བསྒོམ་བཟླས་ཏིང་འཛིན་ཚོགས་བཅག་ཅིང་། །དཀོན་མཆོག་སྐུ་གླུད་དཀོར་དང་དད་ཟས་ཟོས། །རང་གཞན་མཚམས་བཀྲལ་མཚན་ཉིད་མི་ལྡན་པའི། །རིག་མ་ཐོད་ངན་ལ་སོགས་དམ་རྫས་བསྟེན། །བསྟན་པའི་དགྲ་དང་སྐྱེ་བོའི་སྔགས་ཟློག་བྱས། །མཁས་པའི་ཡོན་ཏན་ལ་སྨོད་བག་མེད་མྱོས། །སྣོད་མིན་གསང་བསྒྲགས་གཞན་གྱི་ལྷག་མ་སྤྱད། །སྣོད་མ་བརྟགས་
པར་དབང་དང་གདམས་ངག་བྱིན། །མཚན་ལྡན་གཟུངས་མ་སྣོད་ལྡན་སློབ་མ་ཕུང་། །དོན་དམ་བདེ་སྟོང་རྟགས་ཀྱི་ཡབ་ཡུམ་འབྲལ། །མཆེད་ཀྱི་ཡུམ་སྤྱད་ནང་འཁྲུགས་གསང་བ་བསྒྲགས། །བྱིང་རྒོད་དབང་བཏང་བླ་མའི་གདན་སར་རློམས། །བཟླས་པ་ཆོ་ག་མི་ཚིག་བར་དུ་བཅད། །དབང་རྟགས་རྒྱ་ལས་འདའ་ཞིང་བརྡ་རྣམས་བརྗེད། །ཉམས་པ་སྐོང་ཞིང་ཉམས་དང་ཚོགས་འདྲེས་ཤིང་། །ཟབ་མོར་ལོག་པར་བལྟས་སོགས་མཐོལ་ལོ༔ །ཐེག་པ་འོག་མའི་བསླབ་གཞི་མཐའ་དག་ལས། །ཆེ་བ་བདུན་སོགས་ཡོན་ཏན་ཁྱད་འཕགས་པ། །རྩ་བ་ལྔ་དང་ཡན་ལག་བཅུ་ཕྲག་ལ། །ཐབས་ཤེས་དབྱེ་བས་སུམ་བརྒྱ་དྲུག་ཅུ་དང་། །དེ་ལས་འགྲོ་བའི་རྟོག་ཚོགས་ཇི་སྙེད་པ། །དེ་སྙེད་གཉེན་པོར་ས་མ་ཡ་འབུམ་སྡེར། །གཟུ་ལུམ་རས་ཆོད་ཚོད་ཡོད་དབང་གྱུར་པས། །བསྟེན་གོམས་ཕྱོགས་ཙམ་མ་བགྱིས་མཐོལ་ལོ༴ །གལ་མདོ་ངེས་པའི་དམ་ཚིག་བཞི་དང་ནི། །ཐུན་མོང་ཉེར་བརྒྱད་ལྷག་པའི་དམ་ཚིག་བཞི། །བརྟུལ་ཞུགས་ཉེར་གསུམ་སྒྲུབ་པའི་ཉི་ཤུ་པོ། །སྤྱོད་ལམ་རྒྱུན་བཞི་བདུད་ལྔ་སྤོང་བ་དང་། །དགྲ་གཞི་གཞོམ་ཞིང་ལྟ་བའི་དམ་ཚིག་སྟེ། །ཨ་ནུ་སྤྱི་ཡི་དམ་ཚིག་རྣམ་གྲངས་དགུ། །མདོར་བསྡུས་བསྲུང་
མཚམས་མེད་པ་ཆོས་ཉིད་དང་། །ཡོད་པ་སྙིང་རྗེའི་དམ་ཚིག་གཉིས་པོ་ལས། །འགལ་ཉམས་ལྟུང་བར་གྱུར་ཀུན་མཐོལ། །སྐུ་གསུང་ཐུགས་ལ་ཕྱི་ནང་གསང་བ་དགུས། །དབྱེ་བས་ཉེར་བདུན་ཨ་ཏི་སྤྱིའི་དམ་ཚིག། མེད་པ་ཕྱལ་པ་ལྷུན་གྲུབ་གཅིག་པུ་སྟེ། །ཁྱད་པར་ཆེན་པོའི་དམ་ཚིག་ཚུལ་བཞིན་ཏུ། །ཉམས་སུ་མ་ལོན་ཉེས་ཀུན་མཐོལ་ལོ༔ །རྡོ་རྗེའི་ཡལ་གམ་ཐ་ཚིག་གཉན་པོ་རྣམས། །བླངས་འདས་ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས་པ་དང་། །ཉམས་པ་དང་འགྲོགས་ཟླ་ཡིས་ཉམས་པ་དང་། །གཞན་གྱི་ངོ་དགར་ཞར་བྱུང་ཉམས་པ་ཡིས། །བཀའ་ཆད་ཚེ་འདིར་མི་འདོད་སྣ་ཚོགས་འབྱུང་། །གློ་བུར་འཇིགས་པས་བསད་ནས་མནར་མེད་པའི། །དམྱལ་བར་ནམ་མཁའ་ཇི་སྲིད་དེ་སྲིད་དུ། །མི་བཟད་སྡུག་བསྔལ་མྱོང་བའི་རྒྱུ་བསགས་པ། །ཐམས་ཅད་གནོང་འགྱོད་དྲག་པོས་མཐོལ་ལོ༴ །ཆོས་ཀུན་གདོད་ནས་རྣམ་དག་ནམ་མཁའ་བཞིན། །ལྷུན་གྲུབ་འོད་གསལ་རིས་མེད་ཁྱབ་བརྡལ་ལ། །འཁྲུལ་རྟོག་བཅོས་མས་ཕྱོགས་དང་རིས་སུ་བཅད། །གནས་ལུགས་མ་རྟོགས་ཚིག་གི་ལྟ་བར་ཞེན། །བབ་ཅོལ་འཇོལ་ཉོག་སྤྱོད་པས་རང་རྒྱུད་བསྲེགས། །ཐར་ལམ་བྱང་ཆུབ་
ཆེན་པོའི་མྱུ་གུ་བསྐམས། །ཚེ་རབས་ཀུན་ཏུ་སྡུག་བསྔལ་རྒྱུར་གྱུར་རྣམས། །སྙིང་ནས་འགྱོད་པ་དྲག་པོས་མཐོལ༴ །མདོར་ན་གསང་སྔགས་གཉན་པོའི་སྒོར་ཞུགས་ནས། །གསང་བའི་དམ་ཚིག་ཚུལ་བཞིན་མནོས་པ་ལས། །མ་རིག་ལེ་ལོ་ཉོན་མོངས་དབང་གྱུར་ཏེ། །བླ་མའི་བཀའ་ལས་འདས་ཤིང་སྲི་ཞུ་ཆུང་། །མཆེད་ལྕམ་ཐུགས་སུན་དབྱུང་ཞིང་ལོག་ལྟ་ཤོར། །ཡི་དམ་ལྷ་ཡི་བསྙེན་སྒྲུབ་ཏིང་འཛིན་གཡེལ། །མཁའ་འགྲོའི་གསང་བ་བསྒྲགས་ཤིང་ཚོགས་གཏོར་ཆག །དམ་ཅན་བསྟེན་མཆོད་མ་བགྱིས་ལས་སྦྱོར་ལོག །ཉམས་དང་ཚོགས་འདྲེས་ཉམས་པ་བསྐང་བ་སོགས། །ཚོར་དང་མ་ཚོར་ལུས་ངག་ཡིད་གསུམ་གྱིས། །རྩ་བ་ཡན་ལག་དམ་ལས་འགལ་བ་རྣམས། །གནོང་འགྱོད་དྲག་པོས་མཐོལ་ཞིང་བཤགས་བགྱིད་ན། །བྱང་དག་ཚངས་པ་མཆོག་གི་དངོས་གྲུབ་སྩོལ། །བསྲུང་བྱ་སྲུང་བྱེད་སྲུང་བའི་སེམས་གསུམ་པོ། །གདོད་ནས་མི་དམིགས་ཆོས་དབྱིངས་དེ་བཞིན་ཉིད། །ཉམས་དང་ཉམས་པའི་འབྲས་བུ་གཟོད་མ་ནས། །མ་བྱུང་མ་སྐྱེས་ཀུན་བཟང་དགོངས་པའི་ཀློང་། །ཡེ་སྲུང་ཆེན་པོ་རང་རིག་འོད་གསལ་དང་། །ཉམས་ཆགས་རྟོག་སྒྲིབ་མ་སྤངས་རང་སར་དག །དངོས་གྲུབ་རྣམ་གཉིས་ཚེ་
འདིར་འགྲུབ་པར་ཤོག །བདག་གིས་འགྱོད་ཚངས་དྲི་མེད་བགྱིས་པའི་མཐུས། །ཕྱོགས་བཅུའི་ཞིང་ན་གསང་སྔགས་སྒོར་ཞུགས་པའི། །རྣལ་འབྱོར་ཀུན་གྱི་ཉམས་ཆགས་སོར་ཆུད་དེ། །རྡོ་རྗེའི་ས་ལམ་དཀའ་བ་མེད་པར་བགྲོད། །རང་བཞིན་དོན་གཉིས་ལྷུན་གྱིས་གྲུབ་པར་ཤོག །མཐོང་བའི་ཆོས་ལ་བཀྲ་ཤིས་དཔལ་འབྱོར་རྒྱས། །རྩ་གསུམ་དམ་ཅན་དགྱེས་པས་བུ་བཞིན་དགོངས། །བསམ་པའི་དོན་ཀུན་ཆོས་བཞིན་འབད་མེད་འགྲུབ། །རྒྱལ་ཁམས་ཀུན་ཏུ་བདེ་སྐྱིད་ཆོས་འཕེལ་ཤོག །རྒྱལ་བའི་བསྟན་པ་དར་ཞིང་རྒྱས་པ་དང་། །བསྟན་འཛིན་རྣམས་ཀྱི་བཞེད་པའི་དོན་ཀུན་འགྲུབ། །མ་ལུས་སྐྱེ་དགུའི་འགལ་རྐྱེན་ཀུན་ཞི་ཞིང་། །ཕུན་ཚོགས་མཐའ་དག་ཡིད་བཞིན་འབྱོར་གྱུར་ཅིག །ཅེས་པ་གསང་སྔགས་གསར་རྙིང་གི་རྒྱུད་ལུང་ཐ་དད་ཀྱི་དགོངས་དོན་རྡོ་རྗེ་ཐེག་པའི་དམ་ཚིག་ཉེས་ལྟུང་བཤགས་པའི་ཚིགས་བཅད་བསྡམས་སུ་བསྡུས་པ་འདི་ནི། ཁྱབ་བདག་ཀུན་མཁྱེན་རྡོ་རྗེ་གཟི་བརྗིད་རྩལ་གྱིས་རིང་མོ་ནས་རྗེས་གནང་དམིགས་སུ་སྩལ་པ་དང་། ཉེ་ཆར་རིགས་ལྡན་རྣལ་འབྱོར་མ་རག་ཤུལ་སྐྱིད་ལུ་ནས་རིན་ཆེན་གཉིས་པའི་མེ་ཏོག་དང་བཅས་ཆེད་དུ་བསྐུལ་ངོར། དུས་ཞབས་ཀྱི་རྣལ་འབྱོར་ཙམ་པོ་བ་པདྨ་གར་གྱི་དབང་ཕྱུག་ཕྲིན་ལས་འགྲོ་འདུལ་རྩལ་གྱིས་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་སྦྱར་བ་དགེ་ལེགས་འཕེལ།། །།