བླ་མ་རྩ་གསུམ་གཙོར་གྱུར་རིག་འཛིན་འཇའ་ཚོན་སྙིང་པོའི་གཏེར་བྱོན་ལྷ་ཚོགས་རྣམས་ཀྱི་བསངས་མཆོད་ཞིང་ཁམས་ཀུན་ཁྱབ།
བླ་མ་རྩ་གསུམ་གཙོར་གྱུར་རིག་འཛིན་འཇའ་ཚོན་སྙིང་པོའི་གཏེར་བྱོན་ལྷ་ཚོགས་རྣམས་ཀྱི་བསངས་མཆོད་ཞིང་ཁམས་ཀུན་ཁྱབ་ཅེས་བྱ་བ་བཞུགས་སོ། །
ན་མོ་གུ་རུ་དེ་བ་ཌཱ་ཀི་ནཱི་ཡེ། རྩ་གསུམ་ཀུན་འདུས་ལས་འཕྲོ་གླིང་། །དབྱེར་མེད་བླ་མ་ལ་བཏུད་ནས། །བསོད་ནམས་ཐབས་ཀྱི་ཁྱད་པ་ནི། །ཕལ་པའི་ཡིད་ལ་འབབ་དེ་འཆད། །གཙང་དག་མཆོད་རྫས་ཅི་འབྱོར་དང་། །གསེར་སྐྱེམས་བཟང་ཤིང་དུད་པ་སོགས། །ལེགས་སྦྱར་གཙང་མའི་ཆབ་ཀྱིས་བྲན། །སྐྱབས་སུ་འགྲོ་ཞིང་སེམས་བསྐྱེད་ལ། །རང་ཉིད་སྐད་ཅིག་གིས་དཀོན་མཆོག་སྤྱི་འདུས་པདྨ་འོད་འབར་གྱི་སྐུར་གྱུར། རཾ་ཡཾ་ཁཾ། མི་གཙང་བའི་དྲི་མ་ཐམས་ཅད་བསྲེགས་གཏོར་བཀྲུས། སྟོང་པའི་ངང་ལས། དྷི་ཡིག་ལས་སྐྱེས་བའི་བདུག་པའི་ལྷ་མོ་སྔོན་མོ་ཕྱག་ནས་གཙང་བྱེད་ཀྱི་སྤྲིན་ཕུང་འཕྲོ་བའི་ཀློང་དུ་ཨོཾ་ཨཱཿཧཱུྃ་ལས་བྱུང་བའི་མཆོད་རྫས་ཀུན་ཏུ་བཟང་པོའི་རྣམ་པར་འཕྲུལ་པ་ལས་བྱུང་བའི་རྒྱ་མཚོའི་སྤྲིན་མཐའ་ཀླས་པས་ཞིང་ཁམས་ཀུན་ཏུ་ཁྱབ་པར་གྱུར། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཱཾ་ཨཱདྱནྣུ་ཏྤནྣ་ཏྭཱ་ཏྲ་ཨོཾ་ཨཱཿཧཱུྃ་ཕཊ་སྭཱ་ཧཱ། ལན་གསུམ། ཨོཾ་བཛྲ་སྥ་ར་་ཁཾ། ཧྲཱིཿཔདྨ་རྣམ་པར་རོལ་པའི་ཞིང་། །བདེ་བ་ཅན་དང་པོ་ཏ་ལ། །རྔ་ཡབ་དཔལ་གྱི་རི་བོ་ནས། །སྐུ་གསུམ་སྐུ་ལྔ་མཚན་མཆོག་བརྒྱད། །རྗེ་འབངས་རིག་འཛིན་གྲུབ་པའི་ཚོགས། །དད་མོས་གདུང་བས་སྤྱན་འདྲེན་ན། །ཡེ་ཤེས་ཐུགས་རྗེས་བརྩེར་དགོངས་ལ། །འདིར་གཤེགས་བསངས་ཀྱི་མཆོད་པ་བཞེས། །བླ་མ་དྲག་པོ་སྒྲུབ་སྡེ་བརྒྱད། །དམ་པ་རིགས་བརྒྱ་ཡི་དམ་ལྷ། །སེང་གེའི་གདོང་ཅན་མཁའ་འགྲོའི་ཚོགས། །
མ་མགོན་ཆོས་སྐྱོང་རྒྱ་མཚོ་དང་། །གཏེར་བདག་གཞི་བདག་ཡུལ་གྱི་ལྷ། །མཆོད་འོས་སྤྲུལ་འཁོར་བཅས་པ་རྣམས། །སྐད་ཅིག་གློག་འགྱུའི་རྫུ་འཕྲུལ་གྱིས། །འདིར་བྱོན་དགྱེས་པའི་གདན་ལ་བཞུགས། །གུས་པས་ཕྱག་འཚལ་ཉམས་ཆགས་བཤགས། །དངོས་འབྱོར་ཡིད་སྤྲུལ་དགྱེས་རྫས་དང་། །ཞི་བ་བསང་གི་མཆོད་པ་འབུལ། །མཆོག་དང་ཐུན་མོང་དངོས་གྲུབ་སྩོལ། །ཧྲཱིཿརིགས་མཆོག་མགོན་པོ་འོད་མི་འགྱུར། །སྣང་བ་མཐའ་ཡས་ཚེ་དཔག་མེད། །རིགས་ལྔ་རིགས་བཞི་ཕོ་ཉ་སོགས། །དངོས་གྲུབ་ཀུན་འདུས་ལྷ་ཚོགས་བསང་། །སྤྱན་རས་གཟིགས་དབང་འཇིག་རྟེན་མགོན། །ཡུམ་སྲས་བདེར་གཤེགས་ལྕམ་དྲལ་དང་། །ཐུབ་དྲུག་སངས་རྒྱས་སྒོ་སྲུང་སོགས། །ངན་སོང་རང་གྲོལ་ལྷ་ཚོགས་བསང་། །སྐུ་དང་ཞིང་ཁམས་སྤྲོ་བསྡུའི་གཞི། །རིགས་དང་དཀྱིལ་འཁོར་ཀུན་གྱི་བདག །འགྲོ་བའི་མགོན་གྱུར་བདེ་བ་ཆེ། །བླ་མེད་དཀོན་མཆོག་སྤྱི་འདུས་བསངས། །དབྱིངས་ཕྱུག་ཡེ་ཤེས་མཚོ་རྒྱལ་མ། །ཉང་བན་འཇའ་ཚོན་སྙིང་པོ་སོགས། །བརྒྱུད་པ་དྲུག་ལྡན་བྱིན་རླབས་གཏེར། །རིག་འཛིན་རྩ་བརྒྱུད་བླ་མ་བསངས། །སྙིང་རྗེས་ཞི་ལས་རབ་ཁྲོས་པ། །ཁྲོ་བོ་ཀུན་གྱི་རྗེ་བཙན་ཆེ། །འབར་བ་ཆེན་པོ་ཧེ་རུ་ཀ །ཆེ་མཆོག་དམར་ནག་མེ་ཕྲེང་བསངས། །འཁོར་འདས་དབང་སྒྱུར་
རྟ་མགྲིན་རྒྱལ། །རྒྱལ་བ་ཀུན་སྐྱོད་རྣལ་འབྱོར་མ། །ཁྱབ་བདག་གུ་རུ་ཡིད་བཞིན་ནོར། །རྩ་གསུམ་ཀུན་འདུས་ལྷ་ཚོགས་བསང་། །བདེར་གཤེགས་ཞི་བ་བཞི་བཅུ་གཉིས། །འབར་བ་ཁྲག་འཐུང་ལྔ་བཅུ་བརྒྱད། །དཔའ་བོ་མཁའ་འགྲོ་ཕུར་པའི་ལྷ། །ངེས་དོན་སྙིང་པོའི་དཀྱིལ་འཁོར་བསང་། །ཡེ་ཤེས་ཀློང་དགུའི་རོལ་པ་ལས། །ཚོམ་བུ་དགུ་ཡི་དཀྱིལ་འཁོར་ལྷ། །ཕྱོགས་མཚམས་དབུས་དང་དགུར་བཞུགས་པ། །བདུན་བརྒྱ་ཉེར་ལྔ་འཁོར་བཅས་བསང་། །འཇིགས་རུང་དཔའ་མོ་སེང་གེའི་ཞལ། །སྐུ་གསུང་ཐུགས་སྤྲུལ་མཁའ་འགྲོ་མ། །ཡེ་ཤེས་ལས་དང་འཇིག་རྟེན་ཚུལ། །རི་རབ་སོ་གཉིས་རྡུལ་མཉམ་བསངས། །མ་ནིང་ནག་པོ་དཔལ་འབར་མ། །སྐུ་གསུང་ཐུགས་ཡོན་ཕྲིན་ལས་མགོན། །གཙང་རིས་དཔལ་མགོན་བདུན་ཅུ་སོགས། །སྤྲུལ་འཁོར་གཡོག་དང་བཅས་པ་བསངས། །འཇིགས་བྱེད་ཆེན་པོ་སྒྲ་གཅན་འཛིན། །གཟའ་ཆེན་བརྒྱད་དང་གདོང་མོ་བཞི། །རྒྱུ་སྐར་ཉེར་བརྒྱད་ཕྱི་ནང་གསང་། །བཏགས་ཆགས་སྦས་པའི་སྡེ་བརྒྱད་བསང་། །གནམ་ས་ཕྱེད་ལ་དབང་སྒྱུར་ཞིང་། །གཏེར་ཁ་བྱེ་བའི་གཉེར་འཛིན་པ། །རྡོ་རྗེ་ལེགས་པ་མཆེད་ཟླ་དང་། །དགྱེས་སྡེ་བརྟན་མ་འཁོར་བཅས་བསང་། །ལྕམ་གཅིག་ཀོང་བཙུན་དེ་མོ་དང་། །དགེ་བསྙེན་མཐུ་སྟོབས་ཆེན་པོ་སོགས། །ཟབ་གཏེར་གཉེར་དུ་གཏད་པ་ཡི། །ཆོས་སྲུང་གཏེར་བདག་འཁོར་
བཅས་བསངས། །གནས་དང་གཞི་ཡི་བདག་པོ་སོགས། །དཀར་ཕྱོགས་སྐྱོང་མཛད་ལྷ་རྣམས་དང་། །ཁྱད་པར་ཡུལ་ཕྱོགས་འདིར་གནས་པའི། །ལྷ་ཀླུ་ས་བདག་འཁོར་བཅས་བསང་། །ཕྱི་སྣོད་པདྨ་འོད་ཀྱི་ཞིང་། །ནང་བཅུད་རྩ་གསུམ་འཁོར་ལོ་ཆེ། །སྣང་སྲིད་གཞིར་རྫོགས་ཕྱག་རྒྱའི་ལྷ། །ཡེ་ཤེས་རོལ་པའི་ཞལ་ཧོམ་དུ། །འཁོར་འདས་འདོད་ཡོན་བསྲེག་བྱའི་རྫས། །རང་བྱུང་བསང་གི་སྲེག་བླུགས་ནི། །དུས་བཞི་མཉམ་ཉིད་ཆེན་པོར་འབུལ། །ལས་དང་དངོས་གྲུབ་འགྲུབ་པར་མཛོད། །བདག་ཅག་མ་རིག་འཁྲུལ་དབང་གིས། །སྡོམ་པ་གསུམ་ལས་འགལ་ཞིང་ཉམས། །སྒོ་གསུམ་མི་དགེ་སྤྱོད་པའི་གྲིབ། །འདི་ཕྱིར་སྒྲིབ་པའི་བགེགས་གྱུར་རྣམས། །བདུད་རྩི་བསང་གི་རྟེན་འབྲེལ་ལ། །བརྟེན་ནས་ཞི་ཞིང་དག་པ་དང་། །ཚེ་བསོད་དཔལ་འབྱོར་ཡེ་ཤེས་སོགས། །ཡར་ངོའི་ཟླ་བཞིན་རྒྱས་པར་མཛོད། །སྣོད་བཅུད་རྒུད་པ་མ་ལུས་ཞི། །འཇིག་རྟེན་བདེ་ལེགས་དཔལ་གྱིས་འབྱོར། །འགྲོ་ཀུན་ཆོས་བཞིན་སྤྱོད་པ་དང་། །བསམ་དོན་འགྲུབ་པའི་དངོས་གྲུབ་སྩོལ། །འདི་ནས་ཉིང་མཚམས་སྦྱོར་མ་ཐག །རིག་འཛིན་མཁའ་འགྲོས་མདུན་ནས་སུས། །ཆོས་སྐྱོང་སྲུང་མས་རྒྱབ་ནས་སྐྱོར། །བླ་མ་སྐུ་གསུམ་ཞིང་དུ་དྲོངས། །དུད་པ་དབྱིངས་སུ་ཡལ་བ་ཡིས། །འཁྲུལ་རྟོག་ཀ་དག་གཞི་རུ་གྲོལ། །མེ་འོད་འཇའ་ཟེར་ཐིག་ལེ་བཀྲ། །སྣང་བཞིའི་
རིག་གདངས་ཟད་སར་འཁྱོལ། །དྲི་ཞིམ་ངད་པས་ཀུན་ཁྱབ་ལྟར། །གཞན་དོན་རྩོལ་མེད་ལྷུན་གྱིས་གྲུབ། །ཀུན་བཟང་རྣམ་རོལ་གཙང་བྱེད་སྤྲིན། །འཁོར་འདས་ཞིང་ཁམས་ཡོངས་ལ་ཁྱབ། །མ་བཙལ་ལྷུན་གྱིས་རྫོགས་པ་ཡི། །ཐིག་ལེ་གཅིག་ཏུ་དྭངས་པར་ཤོག །རང་གི་གནས་སུ་སླར་གཤེགས་ལ། །དུས་སུ་དགྱེས་པས་འབྱོན་པ་དང་། །བཀྲ་ཤིས་ཉི་ཟླ་སྲིད་གསུམ་དུ། །ཁྱབ་ཅིང་རྟག་པའི་དགེ་ལེགས་སྩོལ། །འདི་ཡང་སྔོན་ལས་འཕྲོ་བཟང་པོས། །ཆོས་འདིར་སྙིང་ནས་དད་ཐོབ་ཅིང་། །ཆོས་དང་ལྡན་པས་ས་སྐྱོང་བ། །ཁྲི་འདུ་བེ་ཧུའི་གསུང་བསྐུལ་ངོར། །པདྨའི་རྗེས་འཇུག་རིག་པ་འཛིན། །པདྨ་གར་གྱི་དབང་ཕྱུག་གིས། །དེ་བཱི་ཀོ་ཊི་དཔལ་གྱི་གྲོང་། །ས་སྤྱོད་དགའ་བའི་ཚལ་དུ་བྲིས། །དགེ་ལེགས་འཕེལ།། ༈ །།དཔལ་ཆེན་རྡོ་རྗེ་གཞོན་ནུ་སྲུང་མར་བཅས་པ་ལ་རྒྱུན་གྱི་བསངས་མཆོད་སྲེག་བླུགས་འབུལ་བའི་ཆོ་ག་བདེ་ཆེན་རོལ་པ་ཞེས་བྱ་བ་བཞུགས་སོ། །བླ་མ་དཔལ་ཆེན་ཆེ་བའི་མཆོག །སྙིང་གི་ཐིག་ལེར་བཀོད་ནས་འདིར། །ཕྱི་ཡི་སྲེག་བླུགས་བསང་མཆོད་དང་། །ཟུང་འབྲེལ་རྒྱུན་གྱི་རྣལ་འབྱོར་འཆད། །ལས་བཞི་ལྷུན་གྲུབ་བསང་ཁང་དུ། །ཞི་དང་རྒྱས་པའི་བུད་ཤིང་བཅེར། །ཕྱེ་མར་དཀར་མངར་འབྲུ་སྨན་དང་། །རྩ་བརྒྱད་སྟོང་སྦྱར་ལ་སོགས་པ། །ཕྱི་ནང་མཆོད་པ་ཅི་འབྱོར་བསྲེག །སྦྱོང་ཆས་བདུད་རྩིས་བྲན་བྱས་ཏེ། །རྒྱུན་བཤགས་ཡན་ལག་བརྒྱད་པ་བྱ། །བཛྲ་མ་ཧཱ་ཤྲཱི་ཧེ་རུ་ཀོ྅ཧཾ། རང་ཉིད་བཅོམ་ལྡན་འདས་དཔལ་ཆེན་རྡོ་རྗེ་གཞོན་ནུའི་སྐུར་གྱུར། རྃ་
ཡྃ་ཁྃ། མཆོད་རྫས་ཀྱི་མི་གཙང་བའི་དྲི་མ་ཐམས་ཅད་བསྲེགས་གཏོར་བཀྲུས་ནས་སྟོང་པར་གྱུར། །སྟོང་པའི་ངང་ལས། བསང་ཁང་ལས་བཞི་ལྷུན་གྲུབ་ཀྱི་ཐབ་ལུང་དུ། མེ་ལྕེ་དམ་ཚིག་དང་ཡེ་ཤེས་དབྱེར་མེད་པའི་ལྷའི་དཀྱིལ་འཁོར་རང་བྱུང་གསལ་རྫོགས་ཆེན་པོར་བཞུགས་པ་ལ་བསང་རྫས་རྣམས་ཡེ་ཤེས་ཀྱི་བདུད་རྩིར་ལྷུན་གྱིས་གྲུབ་པ་དང་། དུ་བ་བདུག་སྤོས་ཀྱི་ལྷ་མོ་སངས་རྒྱས་ཀྱི་ཞིང་ཐམས་ཅད་ཁྱབ་པའི་མཆོད་པའི་སྤྲིན་ཆེན་པོ་སྤྲོ་བར་གྱུར། ཨོཾ་ཨཱཿཧཱུྃ་བཛྲ་པཱུ་ཛ་མེ་གྷ་ས་མ་ཡེ་ཧཱུྃ། ལན་གསུམ། བྷྲཱུྃ་ཧཱུྃ། །རང་བྱུང་དུར་ཁྲོད་རོལ་པའི་ཐབ་ཁུང་དུ། །རང་སྣང་དཔལ་ཆེན་ཁྲག་འཐུང་འཁོར་ལོ་རྣམས། །གདོད་ནས་དམ་ཚིག་ཡེ་ཤེས་གཉིས་མེད་རྫོགས། །ཚོགས་དྲུག་ཡུལ་དུ་སྣང་བའི་དངོས་པོ་རྣམས། །བསང་དང་བསྲེག་བྱའི་རྫས་སུ་ལྷུན་གྱིས་གྲུབ། །སྐུ་དང་ཡེ་ཤེས་སྒྱུ་འཕྲུལ་དྲྭ་བའི་གར། །མ་འགགས་ཅིར་ཡང་སྟོན་པའི་ལྷ་ཚོགས་རྣམས། །ཕྱི་ལྟར་ཞི་བ་བསང་གི་མཆོད་པས་བསང་། །ནང་ལྟར་ཟག་མེད་བདུད་རྩིའི་བསྲེག་བླུགས་འབུལ། །གསང་བ་འོད་གསལ་ཐིག་ལེ་ཆེན་པོར་བསྐང་། །རིགས་ཀུན་ཁྱབ་བདག་དཔལ་ལྡན་རྡོ་རྗེ་སེམས། །པདྨ་ཐོད་ཕྲེང་བདེ་ཆེན་རྒྱལ་མོ་སོགས། །རིག་འཛིན་རྩ་བརྒྱུད་བླ་མའི་ཚོགས་རྣམས་ཀྱིས། །ཞི་བ་བསང་མཆོད་བདུད་རྩིའི་བསྲེག་བླུགས་བཞེས། །ནད་གདོན་སྡིག་སྒྲིབ་འཇིགས་བརྒྱད་
ཞི་བར་མཛོད། །རྡོ་རྗེ་གཞོན་ནུ་འཁོར་ལོ་རྒྱས་འདེབས་ཡུམ། །དབྱིངས་ལས་ཡེ་ཤེས་འབར་བའི་སྐུར་བཞེངས་པ། །ཡང་གསང་བླ་མེད་དཀྱིལ་འཁོར་རྩ་བའི་ལྷས། །ཞི་བ་བསངས་མཆོད་བདུད་རྩིའི་བསྲེག་བླུགས་བཞེས། །ཚེ་བསོད་དཔལ་དང་འབྱོར་དྲུག་རྒྱས་པར་མཛོད། །སྟེང་འོག་ཕྱོགས་མཚམས་ཁྲོ་བཅུ་ཡབ་དང་ཡུམ། །སྤྲུལ་པ་ཁྲ་ཐབས་རང་རྟགས་མཆེ་གཤོག་ཅན། །ཕྱོགས་བཅུ་བདུད་འདུལ་ཁྲོ་བོའི་དཀྱིལ་འཁོར་རྣམས། །ཞི་བ་བསང་མཆོད༴། མོས་པ་རྣམས་བཞིས་དབང་དུ་སྡུད་པར་མཛོད། །སྐུ་གསུང་ཐུགས་ལས་སྤྲུལ་པའི་སྲས་མཆོག་དང་། །རིགས་ལྔ་རིགས་བཞི་ཕྲིན་ལས་རིགས་གཅིག་སོགས། །ཕུར་ས་རྫས་ཀྱི་དཀྱིལ་འཁོར་ལྷ་རྣམས་ཀྱིས། །ཞི་བ་བསང་མཆོད༴ །དགྲ་བགེགས་བྱད་མ་ལོག་འདྲེན་ཚར་གཅོད་མཛོད། །ཕྱག་བརྙན་ཆེན་མོ་བཞི་དང་བསེ་ལྕགས་ཤེལ། །ཏ་ཀི་ནག་པོ་དབང་ཕྱུག་ཉེར་བརྒྱད་སོགས། །སྲིད་པ་རྡོ་རྗེ་ཕུར་བུའི་ལྷ་ཚོགས་ཀྱིས། །ཞི་བ་བསང་མཆོད༴ །ལས་བཞི་ལྷུན་གྱིས་གྲུབ་པར་མཛད་དུ་གསོལ། །ཁྱི་གདོད་རྡོ་རྗེ་སྲིན་པོ་ཤྭ་ན་བཞི། །བདག་ཉིད་ས་བདག་ཕོ་བདུད་གིང་ཆེན་ཚོགས། །ཚ་བའི་མ་མོ་བཅུ་གཉིས་བྲན་གཡོག་བཅས། །ཞི་བ་བསང་༴ །བྱང་ཆུབ་སྒྲུབ་པའི་འགལ་རྐྱེན་བར་ཆད་སོལ། །དཔལ་གྱི་ཕོ་ཉ་ཁྱི་བརྒྱད་སྦྱང་མོ་བརྒྱད། །གནམ་ས་བར་གྱི་སྟོབས་
ཆེན་ལས་བྱེད་སོགས། །རྡོ་རྗེ་ཕུར་པའི་བཀའ་སྲུང་ཐམས་ཅད་ཀྱིས། །ཞི་བ་བསང་༴ །རྡོ་རྗེ་ཐེག་པའི་བསྟན་དང་བསྟན་འཛིན་སྐྱོང་། །བྲན་བདུད་ནག་པོ་དཀར་མོ་ཉི་ཟླའི་ཕྲེང་། །གནམ་སྐས་ཀླུ་བདུད་ལྷ་བྲག་དགེ་བསྙེན་དང་། །རྩེ་ཆེན་བྲག་པ་ཙན་ལྡང་ལྷ་སྤུ་གྲི་མཆེད། །དྲེགས་པ་སྡེ་ལྔ་ལ་སོགས་ཆོས་སྲུང་རྣམས། །ཞི་བ་བསང་༴ །བཤད་སྒྲུབ་བསྟན་པ་རྒྱས་པའི་ཕྲིན་ལས་སྒྲུབས། །དད་པ་དམ་ཚིག་མཉམ་ཉིད་ལྟ་བ་ཡིས། །བརྒྱུད་གསུམ་རིག་འཛིན་བླ་མ་བསང་ཞིང་མཆོད། །བསྐྱེད་རྫོགས་རྫོགས་པ་ཆེན་པོའི་སྒོམ་པ་ཡིས། །དཔལ་ཆེན་ཡེ་ཤེས་ཁྲོ་བོ་བསང་ཞིང་མཆོད། །ཞི་རྒྱས་དབང་དང་མངོན་སྤྱོད་བརྟུལ་ཞུགས་ཀྱིས། །སྲིད་པ་རྡོ་རྗེའི་དཀྱིལ་འཁོར་བསང་ཞིང་མཆོད། །དམར་ནག་མེ་ལྕེ་རབ་ཏུ་འབར་བ་ཡིས། །འཁྲུལ་རྟོག་གཉིས་འཛིན་དགྲ་བགེགས་ཐལ་བར་བརླག །དཀར་གསལ་འོད་ཟེར་ཕྲེང་བ་འཁྲིགས་པ་ཡིས། །མ་རིག་མུན་འཐུམས་སྡིག་སྒྲིབ་ཉེས་ལྟུང་བསལ། །དྲི་ཞིམ་ངད་བཟང་ཞིང་ཁམས་ཀུན་ཁྱབ་པས། །རླུང་སེམས་ཡུལ་སྣང་ཐམས་ཅད་དབང་དུ་འདུས། །དུ་བའི་ལྷོ་སྤྲིན་འདོད་རྒུའི་ཆར་འབེབས་པས། །དགེ་ལེགས་ཡོན་ཏན་དབྱར་གྱི་མཚོ་ལྟར་རྒྱས། །འཁོར་འདས་ཀུན་ཁྱབ་ཟག་མེད་མཆོད་སྤྲིན་གྱིས། །སྣང་སྲིད་གཞིར་བཞེངས་དཔལ་ཆེན་མེ་ཡི་ལྷ། །འཁོར་བཅས་དགྱེས་ཚིམས་གཡར་
དམ་སོར་ཆུད་དེ། །ཐལ་འབྱིན་རྣམ་བཞིའི་དགོངས་པ་མཐར་ཕྱིན་པའི། །ལས་དང་དངོས་གྲུབ་ཐོགས་པ་མེད་པར་སྩོལ། །འཁོར་གསུམ་སྤྲོས་པ་བཟང་མོའི་ཀློང་དུ་ཐིམ། །དབྱིངས་ཡེ་ཟུང་འཇུག་གདོང་མའི་ཧེ་རུ་ཀ །འབར་བ་ཆེན་པོས་སྲིད་གསུམ་སྣང་བྱེད་ཤོག །ཅེས་འདི་ཤེས་བྱ་ཀུན་ཆུབ་སྒྲུབ་བརྩོན་པ། །ཀརྨ་མཐུ་སྟོབས་རྣམ་པར་རྒྱལ་བ་ཡིས། །བསྐུལ་ངོར་དུས་མཐའི་རྣལ་འབྱོར་སྙོམས་ལས་སྤྱོད། །བདེ་བའི་རྡོ་རྗེས་གནས་མཆོག་ཙཱ་འདྲའི་མགུལ། །དཔལ་ཆེན་ཕོ་བྲང་ཉིད་དུ་སྦྱར་བའོ།། །དགེ་ལེགས་འཕེལ།། །།