བསངས་མཆོད་མི་གཙང་དྲི་སྦྱངས།
རཾ་ཡཾ་ཁཾ། བསངས་མཆོད་མི་གཙང་བའི་དྲི་མ་སྦྱངས། ཨོཾ་ཨཱཿཧཱུྃ། ཨོཾ་བཛྲ་སྥ་ར་་ཁཾ། །དཀོན་མཆོག་གསུམ་གྱི་བདེན་པ་དང་། །སྟོང་ཉིད་རྟེན་འབྲེལ་བསླུ་མེད་མཐུ། །བདག་གི་ལྷག་བསམ་དག་པ་ཡི། །བསངས་མཆོད་ཟག་མེད་ནམ་མཁའི་མཛོད། །མགྲོན་བཞིའི་དགྱེས་སྐོང་ཉིད་གྱུར་ཅིག །ཀྱེ། །ཕྱོགས་བཅུའི་ཞིང་ཁམས་རབ་འབྱམས་དང་། །སྣང་ཞིང་སྲིད་པའི་འཇིག་རྟེན་ན། །འཇིག་རྟེན་འདས་དང་མ་འདས་པའི། །མཆོད་འོས་མགྲོན་རིགས་མ་ལུས་དང་། །ལྷ་ཀླུ་ས་བདག་ཟོ་དོར་ཚོགས། །ཁྱད་པར་དབུ་ཆེ་བྲག་དཀར་ནི། །སྒོ་སྲུང་བཞི་པོ་འཁོར་དང་བཅས། །དེ་རིང་གཙང་མའི་གནས་འདི་རུ། །མཆོད་པའི་མགྲོན་ཏུ་སྤྱན་འདྲེན་ན། །དགྱེས་པའི་མདངས་དང་གཤེགས་སུ་གསོལ། །རང་མཐུན་མཛེས་པའི་གདན་ལ་བཞུགས། །ཁྱེད་རྣམས་དགྱེས་པའི་མཆོད་རྫས་ནི། །གཡུ་ཤུག་བ་ལུ་མཁན་དཀར་སོགས། །དྲི་ཞིམ་སྤོས་ཀྱི་ཤིང་བསྲེགས་པའི། །བསངས་དུད་ནམ་མཁའ་བར་སྣང་ཁྱབ། །བཀྲ་ཤིས་རྫས་རྟགས་རྒྱལ་སྲིད་སོགས། །འདོད་ཡོན་མཆོད་རྫས་དཔག་མེད་འཕྲོ། །དཀར་གསུམ་མངར་གསུམ་ཕྱེ་མར་བསུར། །གསེར་སྐྱེམས་གཡུ་སྔོན་དར་ཟབ་འབྲུ། །ཇ་ཆང་འོ་ཕུད་འབྲང་རྒྱས་བཤོས། །མདའ་དར་སྨྱུག་རྒོད་བལ་ཚོན་ལྔ། །ཤེལ་ཚིག་དོང་རྩེ་གོ་ཁྲབ་མཚོན། །འབྲས་དཀར་གཡག་
ལུག་ར་གསུམ་སོགས། །སོ་སོའི་ཐུགས་ལ་གང་བཞེད་པ། །མི་ཟད་ནམ་མཁའི་མཛོད་ཀྱི་སྤྲིན། །དངོས་བཤམས་ཡིད་ཀྱིས་སྤྲུལ་པ་ཡིས། །གསོལ་ལོ་མཆོད་དོ་མངའ་གསོལ་ལོ། །ཀྱེ། །སངས་རྒྱས་ཆོས་དང་དགེ་འདུན་གསུམ། །བླ་མ་ཡི་དམ་མཁའ་འགྲོ་མ། །ཆོས་སྐྱོང་ནོར་ལྷ་གཏེར་བདག་ལ། །ཞི་བ་བསངས་ཀྱི་མཆོད་པ་འབུལ། །སྒྲིབ་སྦྱོང་ཚོགས་གཉིས་རྫོགས་པ་ཡི། །བྱིན་རླབས་དངོས་གྲུབ་སྩལ་དུ་གསོལ། །དཔལ་མགོན་བདུན་ཅུ་རྩ་གཉིས་དང་། །འགོ་བའི་ལྷ་ལྔ་དགྲ་བླའི་ཚོགས། །ཤུགས་མགོན་ཅང་སེང་དྲང་མཁན་གཉན། །སྡེ་བརྒྱད་མགུར་ལྷ་བརྟན་མ་སོགས། །དཀར་ཕྱོགས་སྐྱོང་བ་ཐམས་ཅད་ལ། །ཞི་བ་བསངས་ཀྱི་མཆོད་པ་འབུལ། །ནད་མུག་འཁྲུགས་རྩོད་ཞི་བ་དང་། །སྣོད་བཅུད་བདེ་སྐྱིད་ལྡན་པར་མཛོད། །ཏི་སེ་ཐང་ལྷ་སྦོམ་ར་གཉན། །རྨ་རིགས་ཡང་འཁོར་གྲངས་མེད་བཅས། །དགེ་བསྙེན་ཉི་ཤུ་རྩ་གཅིག་སོགས། །ཆུ་བཞི་སྒང་དྲུག་གཞི་བདག་ལ། །ཞི་བ་བསངས་ཀྱི་མཆོད་པ་འབུལ། །ཚེ་བསོད་དབང་ཐང་ཀླུང་རྟ་སྤེལ། །བསམ་དོན་ཆོས་བཞིན་འགྲུབ་པར་མཛོད། །ཀྱེ། བསང་ངོ་ཕོ་ལྷ་དགྲ་ལྷ་བསངས། །བསང་ངོ་ཡུལ་ལྷ་གཞི་བདག་བསངས། །ཟིལ་ཁྲོམ་རྡོ་རྗེ་གཡུང་དྲུང་བསངས། །གཉན་ལྡང་རྡོ་རྗེ་བློ་གྲོས་བསངས། །རྡོ་རྒྱལ་མུ་ནམ་མཆེད་བརྒྱད་
བསངས། །ཁྱད་པར་གནས་དང་གཞི་ཡི་བདག །དབུ་ཆེ་བྲག་དཀར་གཉན་པོ་བསངས། །སྡོང་ར་གི་སར་སྤ་ར་དང་། །ཞི་བ་ཡང་འཁོར་བཅས་པ་བསངས། །སྨུག་སངས་རྩེ་རྒྱལ་ཞལ་ད་དང་། །རྡོ་རྗེ་རྫོང་དམར་ང་འདྲ་དང་། །དཔའ་རྒྱལ་ར་རྗེ་གཉན་པོ་བསངས། །གཞན་ཡང་ཁམས་རྒྱལ་བ་སྤུ་སོགས། །ཡུལ་ཕྱོགས་ཕུ་མདའ་ཉིན་སྲིབ་ཀྱི། །སྲ་བ་བྲག་དང་བརྟན་པས། །སྐྱེ་བ་ཤིང་དང་འབབ་པ་ཆུ། །ཁྱིམ་སྒོ་ལམ་སྲང་སྒོ་སྐས་ལ། །གནས་ཤིང་སྡོང་གྲོགས་མཛད་པ་ཡི། །ལྷ་ཀླུ་ས་བདག་ཟོ་དོར་བསངས། །འཁོར་དང་བཅས་པ་ཁྱེད་རྣམས་ཀྱིས། །དགྱེས་པའི་མཐུན་རྫས་འདི་བསྣམས་ལ། ཁ་འཛིན་སྡོང་གྲོགས་མེལ་ཚེ་དར། །བསྲུང་སྐྱོབ་ཞི་རྒྱས་སྦ་བ་སོགས། །རྡོ་རྗེ་འཛིན་པའི་དཀའ་བཞིན་མཛོད། །བདུད་རྩི་བསངས་ཀྱི་དུད་སྤྲིན་འདིས། །ལྷ་སྲུང་གཉེན་པོ་ཁྱེད་རྣམས་ལ། །རོ་བག་དམེ་ཡུག་ཐབ་དང་གཞོབ། །བྱད་གཏང་ངན་སྔགས་དམ་གྲིབ་སོགས། །འབག་བཙོག་མནོལ་བ་ཅི་མཆིས་ཀུན། །དེ་རིང་ཉིད་ནས་སངས་གྱུར་ཅིག །དབུ་འཕང་དགུང་བས་མཐོ་བར་ཤོག །འཇིག་རྟེན་ཀུན་དང་ཡུལ་ཕྱོགས་འདིར། །མི་ནད་ཕྱུགས་ནད་འཐབ་རྩོད་དང་། །བཙའ་སད་སེར་གསུམ་ཞི་བར་མཛོད། །དགྲ་རྐུན་གཅན་གཟན་འཚེ་བ་བཟློག །ཆར་ཆུ་དུས་འབབ་ལོ་ཕྱུགས་ལེགས། །བསྟན་པ་དར་བའི་སྡོང་གྲོགས་མཛོད། །ཁྱད་པར་བདག་
ཅག་འཁོར་བཅས་རྣམས། །བྱེས་སུ་འགྲོན་བསུ་སྐྱེལ་གྱིས། །གཞི་རུ་སྡོད་ན་རྒྱབ་བརྟེན་གྱིས། །ལེགས་ཁ་རྒྱལ་ཁ་དགུང་དུ་བསྟོད། །བསམ་པའི་བློ་ཁ་ཆོས་ལ་བསྒྱུར། །འདོད་དོན་ཡིད་བཞིན་འགྲུབ་པར་མཛོད། །མཆོད་བསྟོད་ནོངས་པ་བཟོད་བཞེས་ལ། །རང་རང་གནས་སུ་གཤེགས་ནས་ཀྱང་། །སླར་ཡང་དུས་སུ་འབྱོན་པར་མཛོད། །ཀི་བསོ་ཆའོ་ལྷ་རྒྱལ་ལོ། །ཅེས་ཡུལ་ལྷ་གཙོ་བོར་གྱུར་པའི་བསངས་བསྡུས་འདི་ཡང་རང་སློབ་ལྔ་རིག་སྨྲ་བ་ཀརྨ་འགྱུར་མེད་ཀྱིས་བསྐུལ་བར་བརྟན། ཡོན་ཏན་རྒྱ་མཚོས་དཔལ་སྤུངས་ཡང་ཁྲོད་དུ་བྲིས་པ་དགེ།། ༈ །།ཡུལ་བདག་ཧ་ཁྲའི་བསངས་མཆོད་དཔལ་འབྱོར་རབ་རྒྱས་ཞེས་བྱ་བ་བཞུགས་སོ། །ན་མོ་གུ་རུ་པདྨ་སཾ་བྷ་བཱ་ཡ། ཡུལ་བདག་གཉན་པོ་ཆེད་དུ་གསོལ་བའི་སྐབས་གཙང་མའི་སྣོད་དུ་དཔལ་བཤོས་ཟུར་གསུམ་ཕྲག་པ་ཅན། འཁོར་ཟུར་གསུམ་གསུམ་དང་ཐེབས་ཀྱུ་འདོད་ཡོན་སྣ་ཚོགས་ཀྱིས་བསྐོར་ཞིང་རྒྱན་གྱིས་བརྒྱན་པ་བཤམ། རྒྱུན་དང་ཁྱད་པར་གང་ཡིན་ཀྱང་ཕྱེ་མར། གསེར་སྐྱེམས་སོགས་མཆོད་པར་འོས་པ་འདུ་བྱས་ལ། རང་ཉིད་ལྷའི་ང་རྒྱལ་དང་ལྡན་པས། རཾ་ཡཾ་ཁཾ། མི་གཙང་དྲི་མ་བསྲེགས་གཏོར་བཀྲུས། །བྷྲཱུྃ་ལས་ཡིད་མཐུན་སྣོད་ཀྱི་ནང་། །ཁཾ་ལས་མཆོད་རྫས་བདུད་རྩིའི་མཚོ། །བསངས་མཆོད་བརྔན་གྱི་ཡོ་བྱད་རྣམས། །ནམ་མཁའ་བར་སྣང་ས་གཞི་གང་། །ཟག་པ་མེད་པའི་བདེ་སྐྱེད་གྱུར། །ཨོཾ་ཨཱཿཧཱུྃ། ལན་གསུམ། དབྱངས་རོལ་གྱི་བརྡས་མཚོན་ལ། ཀྱེ། ཡུལ་ནི་
ཤར་ཕྱོགས་མདོ་ཁམས་སྒང་། །སྨན་གྱི་ཤོད་ལ་དབང་སྒྱུར་བ། །མུ་ནམ་སྲིད་པའི་ལྷ་གཉན་ཆེའི། །རུ་འདྲེན་དགེ་བསྙེན་ཧ་ཁྲ་ནི། །འཁོར་བཅས་བསངས་མཆོད་མགྲོན་ལ་བྱོན། །དགྱེས་པའི་གདན་ལ་བཞུགས་སུ་གསོལ། །ཡུལ་སྐྱོང་ཟོ་དོར་གཉན་པོ་ནི། །མི་སྨུག་སྟག་གི་ན་བཟའ་ཅན། །དབུ་ལ་སྟག་ཆེན་ཅོག་ཞུ་གསོལ། །གཡས་པས་གཏེར་བུམ་དགོས་འདོད་སྩལ། །ཐུགས་དམ་བགྲང་ཕྲེང་གཡོན་ན་བསྣམས། །རི་བཀྲའི་གདན་ལ་འགྱིང་ཞིང་བརྗིད། །བསྐུལ་ནས་ལས་ལ་ཆས་ཙམ་ན། །སྔགས་ཀྱི་མེ་འོད་ཡ་ལ་ལ། །ཐུགས་དམ་དཔལ་གྱི་ཕུར་བུ་འདྲིལ། །གནམ་ལྕགས་ཚྭ་ཚྭ་ཐུ་ལུ་ལུ། །མྱུར་མགྱོགས་སྟོབས་ལྡན་བཞོན་པ་ཅན། །ལས་བྱེད་སྤྲུལ་པའི་ཕོ་ཉ་ནི། །མདུན་ནས་ཤ་ཟན་མི་རྒོད་རྒྱུག །གཡས་ནས་ཐུགས་ལྡན་དྲེལ་མཆུ་རྔམས། །གཡོན་ནས་སྟོབས་ལྡན་ཕག་མཆུ་འགྱེད། །གཞན་ཡང་སྦྲུུལ་འཁོར་བགྲང་ལས་འདས། །ཁྱེད་རྣམས་མཆོད་ཅིང་བརྔན་པའི་རྫས། །བསང་ཆེན་དུད་སྤྲིན་ནམ་མཁའ་གང་། །འདོད་ཡོན་རྣམ་ལྔ་ཆར་དུ་འབེབས། །ཇ་ཆང་འོ་ཞོའི་རྒྱ་མཚོ་བསྐྱིལ། །ཕྱེ་མར་སྨན་འབྲུ་དར་ཟབ་དང་། །རིན་ཆེན་དཀོར་ཆ་དཀར་མངར་ཟས། །བྱ་གཅན་རི་དྭགས་གཡུང་དྭགས་སོགས། །མཁོ་དགུའི་འབྱོར་པ་མ་ཚང་མེད། །དངོས་བཤམས་ཡིད་ཀྱིས་སྤྲུལ་པས་བརྔན། །བཟང་
ཤིང་སྣ་ཚོགས་དུད་པས་བསང་། །གསོལ་ལོ་མཆོད་དོ་དབུ་འཕང་བསྟོད། །དགྱེས་རབ་ཕུལ་དུ་ཕྱིན་ནས་ཀྱང་། །ཤྲཱི་སི༚ཧ་པདྨ་འབྱུང་། །གསང་བ་ངང་རིང་ལ་སོགས་པ། །གྲུབ་པ་རིག་འཛིན་ཚོགས་རྣམས་ཀྱིས། །བཀའ་བསྒོས་ཐ་ཚིག་དྲན་མཛོད་ལ། །འཇིག་རྟེན་བདེ་བའི་ཕྲིན་ལས་སྒྲུབས། །ཁྱད་པར་ཡུལ་གྱི་དགེ་ལེགས་སྤེལ། །བདག་ཅག་འཁོར་དང་བཅས་པ་རྣམས། །གཞི་རུ་སྡོད་ན་བུ་བཞིན་སྐྱོངས། །བྱེས་སུ་བགྲོད་ན་འབྲལ་མེད་འགྲོགས། །འགལ་རྐྱེན་སོལ་ལ་མཐུན་རྐྱེན་སྒྲུབས། །མི་ལན་ཚ་ཕྱུགས་ལ་གོད། །ཞིང་ལ་ལོ་དགྲ་མ་བཏང་ཞིག །ཁ་འཛིན་རྒྱབ་བརྟེན་སྡོང་གྲོགས་མཛོད། །འདོད་པ་ཡིད་བཞིན་བསྒྲུབ་ཏུ་གསོལ། །དབུ་འཕང་གཉན་པོ་དགུང་དུ་བསྟོད། །བཀྲ་ཤིས་དཔལ་འབྱོར་རབ་རྒྱས་ཤོག །མཐར། སརྦ་གཙྪ་མུ། ཞེས་རང་གནས་སུ་གཤེགས་སུ་གསོལ་ལོ། །ཞེས་པ་འདིའང་དགེ་ལེགས་ཀྱི་བློ་གྲོས་གསལ་བ་རྟ་མགྲིན་དབང་རྒྱང་ནས་ཆེད་དུ་བསྐུལ་ངོར་པདྨ་གར་གྱི་དབང་ཕྱུག་རྩལ་གྱིས་ལྷ་གཉན་ཉིད་ཀྱི་མདུན་ཞོལ་དུ་བགྱིས་པ་ཤེུགྷཾ།། ༈ །།ཨོཾ་སྭ་སྟི་སིདྡྷཾ། ཡུལ་བདག་གི་སར་གཉན་པོའི་བསངས་མཆོད་བྱེད་ན། སྣོད་གཙང་མར་དཀར་བཤོས་གྲུ་བཞི་ལ་བཤས་ཕྲན་ཟླུམ་པོ་བཞིས་བསྐོར་བརྒྱན་གྱིས་བརྒྱན་ཅིང་འདོད་ཡོན་སྣ་ཚོགས་ཀྱིས་སྤྲས་པ་དང་། ཕྱེ་མར་གསེར་སྐྱེམས་བསངས་དུད་སོགས་མཆོད་རྫས་འདུ་བྱས། རཾ་ཡཾ་ཁཾ། མི་གཙང་བའི་དྲི་མ་ཐམས་ཅད་སྦྱངས། ཨོཾ་ཨཱཿཧཱུྃ། གསུམ། དགྱེས་
མཆོད་པ་སངས་ཀྱི་ཡོ་བྱད་ཟད་མི་ཤེས་པས་དང་ནམ་མཁའ་བར་སྣང་གང་བར་གྱུར། བཛྲ་སྥ་ར་་ཁཾ། ཀྱི། རྣམ་རྒྱལ་རབ་བརྟན་ཆོས་ཀྱི་རྫོང་། །ལྷ་ཚོགས་འདུས་མདོ་གྲུབ་པའི་གནས། །སྐྱོང་མཛད་རྡོ་རྗེ་མཐུ་ལྡན་རྩལ། །ཁྱད་པར་འཕགས་པའི་ལྷ་གཉན་ཆེ། །གིས་ར་གཉན་པོ་ཞེས་བྱ་བས། །མི་སྔོན་ཟླ་བའི་འཛུམ་མདངས་ཅན། །གཡུ་ཡི་གོ་ཁྲབ་སི་ལི་ལི། །དར་འཕྲུ་རྒོད་འཕྲུ་སྤུངས་སེ་སྤུང་། །འཁོར་གསུམ་རྣོ་ལྡན་སྐེད་ལ་བསྐོར། །ཕྱག་གཡས་དར་མདུད་ནམ་མཁར་བསྒྲེང་། །བསྟན་པའི་དབུ་འཕང་དགུང་དུ་བསྟོད། །གཡོན་པས་འདོད་འབྱུང་ནོར་བུ་བསྣམས། །སྒྲུབ་ལ་དངོས་གྲུབ་སྣ་ཚོགས་སྟེར། །རྟ་སྔོན་ཆུ་རིས་ལྡན་པ་ཆིབས། །བཙུན་མོ་སྲས་དང་ལྷ་ཀླུ་ཡི། །དགེ་བསྙེན་མང་པོའི་འཁོར་གྱིས་བསྐོར། །རིན་ཆེན་རྒྱན་ཆ་འོད་དུ་འཚེར། །དར་མདུད་རུ་མཚོན་ཚུབས་སེ་ཚུབ། །ཀུ་བསོ་ཆ་སྒྲ་དི་རི་རི། །གཞན་གྱིས་མི་ཐུབ་དཔུང་དང་བཅས། །འདིར་གཤེགས་དགྱེས་པའི་གདན་ལ་བཞུགས། །བཟང་ཤིང་དུད་སྤྲིན་ནམ་མཁའ་གང་། །འབྲུ་སྣ་ཕྱེ་མར་རི་ལྟར་སྤུངས། །ང་ཆང་འོ་སྐྱེམས་མཚོ་ལྟར་བསྐྱིལ། །རིན་ཆེན་དཀོར་ཆ་གྲམ་བུར་བརྡལ། །དར་ཟབ་ཤིང་རྩི་འཇའ་ལྟར་བཀྲ། །ཤེལ་ཚིག་ཁྲི་དཀར་སྟོང་ནག་སོགས། །ཏིང་ངེ་འཛིན་གྱིས་བྱིན་བརླབས་པས། །འདོད་པའི་ཡོན་ཏན་
རྣམ་པ་ལྔ། །གཟུགས་འགྲོས་ཡིད་འོང་ས་གཞི་ཁྱབ། །དགྱེས་རྫས་གཙང་ཞིང་མ་ཚང་མེད། །ཅི་འདོད་མཁོ་རྒུ་འབྱུང་བ་ཡིས། །གསོལ་ལོ་མཆོད་དོ་མངའ་གསོལ་ལོ། །ཉམས་གྲིབ་ཕོག་པ་བསངས་ཀྱིས་བསངས། །མཁོན་ལྕུགས་ཞུགས་པ་བཤགས་པས་བསྡུམ། །མཆོག་གསུམ་རྩ་གསུམ་བདེན་པའི་མཐུས། །དབུ་འཕང་བཙན་ཞིང་འབྱོར་པ་ཕྱུག །འཁོར་མང་སྟོབས་དང་ལྡན་གྱུར་ཏེ། །གཟི་བརྗིད་མངའ་ཐང་ཕུན་ཚོགས་ཤོག །བསྟེན་མཆོད་སྒྲུབ་ལ་དགྱེས་དགོངས་ཏེ། །གཞི་ལ་འདུག་ན་འཚོ་རྫི་མཛོད། །བྱེས་སུ་འགྲོ་ན་སྡོད་གྲོགས་མཛོད། །དགྲ་རྐུན་གཅན་གཟན་འཚེ་བ་སོགས། །མི་མཐུན་གནོད་པའི་རྐྱེན་རྣམས་ཟློག །འདོད་དོན་བསམ་པ་ཡིད་བཞིན་སྒྲུབས། ཁ་འཛིན་རྒྱབ་བརྟེན་སྲུང་སྐྱོབས་སོགས། །ཅི་བཅོལ་ལས་རྣམས་མཛད་དུ་གསོལ། །ཅེས་ཕུད་མཆོད་ནམ་མཁར་འབུལ་ཞིང་ཟས་སྣ་བསང་ཁང་དུ་བསྲེག །བཛྲ་མུཿས་རང་གནས་སུ་གཤེགས་པར་བྱའོ། །ཞེས་པའང་ཡོན་ཏན་རྒྱ་མཚོ་གར་གྱི་དབང་ཕྱུག་གིས་བྲིས་པ་དགེ་ཞིང་བཀྲ་ཤིས།། ༈ །།ཨོཾ་སྭ་སྟི་ཛ་ཡནྟུ། རྨ་ཐམ་གཉན་པོའི་བསངས་མཆོད་བྱ་བར་འདོད་པས་བསངས་ཀྱི་རྫས་དང་གསེར་སྐྱེམས་རྣམས། རཾ་ཡཾ་ཁཾ། གིས་བསངས། ཨོཾ་ཨཱཿཧཱུྃ་ལན་གསུམ་གྱིས་བྱིན་བརླབ། བསངས་རྫས་མཆོད་པའི་སྤྲིན་བུང་ཟད་མི་ཤེས་པས་ནམ་མཁའི་ཁྱོན་གང་བ་མགྲོན་རྣམས་དགྱེས་པ་སྐྱེད་
པའི་རང་བཞིན་ཏུ་གྱུར། ཀྱེ། སྲིད་པ་རྒྱུད་ཀྱི་དཔལ་བོན་ཆེ། །དཀར་ཕྱོགས་སྐྱོང་བའི་ཐ་ཚིག་ཅན། །རྨ་ཐམ་གཉན་པོ་འཁོར་དང་བཅས། །འདིར་གཤེགས་བསངས་དང་མཆོད་པ་བཞེས། །སྨན་ཤོད་སྦས་པའི་ཡུལ་གྱི་དབུས། །དབྱིབས་ལེགས་ལྷུན་ཆགས་ས་འཛིན་གྱི། །བ་གམ་རང་བྱུང་ཕོ་བྲང་ན། །མི་སྨུག་འཕྲུལ་གྱི་གཤེན་པོའི་ཆས། །བགྲང་ཕྲེང་འཛིན་ཅིང་ཐུགས་དམ་ཟློ། །རྔ་གཤང་བསྣམས་ནས་གཙང་རིགས་སྐུལ། །མགུར་ལྷ་གཉན་གྱི་སྐུ་སྲུང་མཛད། །ལས་ལ་ཆས་ཚེ་སྔགས་པའི་གཟུགས། །གཡག་ནག་ཞོལ་ཅན་ཆིབས་སུ་ཆིབས། །གཡས་པས་དཔལ་གྱི་མདུང་མོ་སྒྲེང་། །གཡོན་པས་བདུད་ཞགས་དམ་ཉམས་འཆིངས། །ལན་རེ་བཙན་བདུད་ཁྲོས་པའི་གཟུགས། །བཙན་ཁྲོམ་མང་པོའི་ཁ་ལོ་སྒྱུར། །སྣ་ཚོགས་སྤྲུལ་པའི་ཆོ་འཕྲུལ་སྟོན། །འཁོར་གཡོག་སྡེ་དཔུང་བཅས་པ་རྣམས། །བསང་ངོ་མཆོད་དོ་མངའ་གསོལ་ལོ། །བཟང་ཤིང་སྣ་ཚོགས་དུད་པས་བསངས། །རིན་ཆེན་སྨན་འབྲུ་དང་སྣས་བརྔན། །གཟུགས་འགྲོས་དཀོར་ཆ་སྣ་ཚོགས་འབུལ། །ཇ་ཆང་འོ་ཞོའི་སྐྱེམས་ཀྱིས་མཆོད། །ཕྱེ་མར་ཟས་སྣའི་ཕུད་ལ་རོལ། །ཐུགས་ལ་བཞེད་དགུའི་མཆོད་སྤྲིན་གྱིས། །གཉན་པོ་འཁོར་བཅས་གསོལ་ལོ་མཆོད། །དགྱེས་པའི་ཞལ་གྱི་འཛུམ་སྟོན་ལ། །བྱམས་པའི་ཐུགས་ཀྱིས་
དགྱེས་པར་དགོངས། །མཆོད་ན་ཁ་འཛིན་རྒྱབ་རྟེན་མཛོད། །བརྔན་ན་ཡིད་ལ་གང་འདོད་སྒྲུབས། །བསྟེན་ན་མགོན་སྐྱབས་སྡོང་གྲོགས་གྱིས། །གཞི་གྱེས་ཀུན་ཏུ་བཀྲ་ཤིས་ཤིང་། །ཕྱོགས་ལས་རྣམ་པར་རྒྱལ་བ་དང་། །ཕས་རྒོལ་མི་མཐུན་ཞི་བ་སོགས། །མདོར་ན་ཡིད་ལ་གང་འདོད་པ། །མྱུར་དུ་འགྲུབ་པའི་སྡོང་གྲོགས་མཛོད། །མཆོད་བསྟོད་བྱས་པས་ངོ་མ་ཆུང་། །མ་ཤེས་ལས་ལ་ཕྲག་མ་དོག །རྟག་ཏུ་བྱམས་པས་རྗེས་དགོངས་ལ། །བསམ་པ་སྒྲུབས་ལ་རེ་བ་སྐོངས། །བཅོལ་པའི་ཕྲིན་ལས་འགྲུབ་པར་མཛོད། །ཅེས་པ་འདིའང་དགོས་པའི་དབང་གིས་ཤར་མར་བྲིས་པ་སྟེ་གུ་ས་སོ།། །།