བཅོམ་ལྡན་འདས་རིག་བྱེད་མའི་བསྐང་བ་དངོས་གྲུབ་འགུགས་པའི་ལྕགས་ཀྱུ།
བཅོམ་ལྡན་འདས་རིག་བྱེད་མའི་བསྐང་བ་དངོས་གྲུབ་འགུགས་པའི་ལྕགས་ཀྱུ་ཞེས་བྱ་བ་བཞུགས་སོ། ཧྲཱིཿ མཁའ་སྐྱོད་བདེ་ཆེན་དག་པའི་ཞིང་། །བོ་ཊ་ལ་དང་ཨོ་རྒྱན་ཡུལ། །ཀུ་རུ་ཀུལླེའི་བྲག་ཕུག་ནས། །བཅོམ་ལྡན་འདས་མ་རིག་བྱེད་མ། །གོ་རཱི་ལྷ་མོ་བཅུ་བཞི་དང་། །དབང་མཛད་ཌཱ་ཀི་འབུམ་དང་བཅས། །ཡིད་ལྟར་མྱུར་བའི་རྫུ་འཕྲུལ་གྱིས། །བསྐང་བའི་གནས་འདིར་གཤེགས་སུ་གསོལ། །དགྱེས་པའི་གདན་ལ་བརྟན་པར་བཞུགས། །ལུས་ངག་ཡིད་གསུམ་གུས་ཕྱག་འཚལ། །ཆུ་གཉིས་ཉེར་སྤྱོད་འདོད་ཡོན་ལྔ། །བཀྲ་ཤིས་རྫས་རྟགས་རྒྱལ་སྲིད་བདུན། །གླིང་བཞི་རི་རབ་ཉི་ཟླ་སོགས། །ཕྱི་ཡི་མཚོད་པས་ཐུགས་དམ་བསྐང་། །ཤ་ལྔ་བདུད་རྩི་ཡིག་འབྲུ་ལྔ། །སྦྱངས་རྟོགས་སྤར་བྱས་ར་ས་ཡ། །སྒྲུབ་པའི་དམ་ཚིག་རྫས་ཆེན་པོ། །ནང་གི་མཆོད་པས་ཐུགས། །ཕྱི་སྣོད་ནང་བཅུད་འབྱོར་ཚོགས་ཀུན། །གཙང་སྨེ་གཉིས་མཉམ་རྟོགས་པ་ཡིས། །རང་བྱུང་ཡེ་ཤེས་ཚོགས་སུ་བརླབས། །གསང་བའི་མཆོད་པས་ཐུགས༴ །འཕོ་མེད་དགའ་བཞིའི་སྦྱོར་བ་དང་། །དུག་གསུམ་དབྱིངས་སུ་བསྒྲལ་བ་དང་། །ལྷ་སྔགས་ཆོས་སྐུའི་འདུ་འཕྲོ་སྟེ། །དེ་ཁོ་ན་ཉིད་མཆོད་པས་བསྐང་། །མདོར་ན་འཇིག་རྟེན་རབ་འབྱམས་སུ། །བདག་པོས་བཟུང་དང་མ་བཟུང་བ། །ཁྱད་པར་
དབང་གི་མཐུན་རྫས་སོགས། །དངོས་སུ་འབྱོར་དང་ཡིད་ཀྱིས་སྤྲུལ། །འདོད་དགུའི་ཆར་སྤྲིན་ནམ་མཁའ་མཛོད། །མཁའ་དབྱིངས་ཁྱབ་པར་སྤེལ་བ་འདིས། །རྩ་བརྒྱུད་བླ་མའི་ཐུགས་དམ་བསྐང་། །ཡི་དམ་ལྷ་ཚོགས༴ །དཔའ་བོ་མཁའ་འགྲོའི༴ །ཆོས་སྐྱོང་སྲུང་མའི༴ ཁྱད་པར་བཅོམ་ལྡན་རིག་བྱེད་མ། །གཽ་རཱི་ལྷ་མོ་བཅུ་བཞི་དང་། །བཀའ་སྡོད་གནོད་སྦྱིན་མོ་ལ་སོགས། །འཁོར་དང་བཅས་པའི་ཐུགས་དམ་བསྐང་། །བདག་ཅག་མ་རིག་དབང་གྱུར་པས། །ལྟ་སྤྱོད་འཁྲུལ་ཞིང་གསང་དམ་གཡེལ། །རང་དོན་ལས་སྦྱོར་བརྩམས་པ་སོགས། །རྩ་བ་ཡན་ལག་དམ་ཚིག་ལ། །ཉམས་ཆགས་འགལ་འཁྲུལ་ཅི་མཆིས་པ། །གནོང་ངོ་འགྱོད་དོ་མཐོལ་ལོ་བཤགས། །དག་ཚངས་མཆོག་གི་དངོས་གྲུབ་སྩོལ། །སྣང་སྲིད་འཁོར་འདས་ཞིང་ཀུན་ན། །ཚེ་བསོད་དཔལ་འབྱོར་སྙན་གྲགས་སོགས། །བརྟན་དང་གཡོ་བའི་ཆོས་བཅུ་བཞིའི། །དྭངས་སྲོག་རྣལ་འབྱོར་ཟུངས་སུ་ཁུག །དུས་མ་ཡིན་པའི་འཆི་བ་སོལ། །ནད་མཚོན་མུ་གེའི་འཇིགས་ལས་སྐྱོབས། །མཁས་གྲུབ་དགེ་བའི་བཤེས་གཉེན་དང་། །རྒྱལ་བློན་སྐྱེས་པ་བུད་མེད་དང་། །འབྱུང་པོ་སྡེ་བརྒྱད་མ་ལུས་པའི། །བླ་ཡིད་སེམས་གསུམ་དབང་དུ་སྡུས། །མཁོ་དགུའི་ལོངས་སྤྱོད་སྤྲིན་ལྟར་
གཏིབས། །བསོད་ནམས་དབང་ཐང་མཚོ་ལྟར་རྒྱས། །གཞན་ཕན་ནམ་མཁའི་མཐའ་དང་མཉམ། །དོན་གཉིས་ལྷུན་གྲུབ་དངོས་གྲུབ་སྩོལ། །རླུང་སེམས་སྣང་བ་དབང་འདུས་ནས། །འབྲེལ་ཚད་དོན་དང་ལྡན་པར་མཛོད། །མདོར་ན་མཆོག་དམན་པར་མའི་འགྲོ། །སྣང་བ་དམ་པའི་ཆོས་ལ་སྒྱུར། །ལམ་སྣ་བདེ་ཆེན་ཞིང་དུ་དྲོངས། །ཇི་ལྟར་ཕྲིན་ལས་གསོལ་བའི་འབྲས། །མི་བསླུ་ད་ལྟ་ཉིད་དུ་སྩོལ། །ཅེས་པའང་བསྟན་པའི་དོན་ལ་མཁོ་གལ་གྱུར་ཏེ་ཁྲོ་ཆུ་ཤུ་བྷ་འབྲུག་དགུ་གླིང་དུ་སུ་ཁ་བཛྲས་ཆེད་དུ་སྤེལ་བ་དགེ་ལེགས་འཕེལ།། །།