ཞི་མཛད་རྡོ་རྗེའི་གནས་ཀྱི་ཡང་མཛོད་དཔལ་དེའུ་ལ་དམིགས་གསལ་བསང་མཆོད།
ཨོཾ་སྭ་སྟི། ཞི་མཛད་རྡོ་རྗེའི་གནས་ཀྱི་ཡང་མཛོད་དཔལ་དེའུ་ལ་དམིགས་གསལ་བསང་མཆོད་བྱ་བའི་ཚེ། བསང་རྫས་རྣམས། རྃ་ཡྃ་ཁྃ་གིས་བསང་། མ་དག་པའི་དྲི་མ་བསྲེགས་གཏོར་བཀྲུས། ཨོཾ་ཨཱཿཧཱུྃ། གསུམ་བརྗོད། ཀྱེ། །ཞི་མཛད་རྡོ་རྗེ་རིགས་ཀྱི་གནས། །བཀྲ་ཤིས་ཉི་ཟླ་དཔལ་ཕུག་དང་། །གཡུ་ལུང་གངས་ར་གཉིས་པ་ཡི། །གནས་དང་གཏེར་གྱི་ཡང་མཛོད་ནི། །རྒྱས་པའི་ཕྱོགས་བཞུགས་དཔལ་དེའུ། །འདོད་འབྱུང་ནོར་བུའི་རྫོང་ཆེན་ལ། །བཞུགས་པའི་རྩ་གསུམ་ཆོས་སྐྱོང་དང་། །ཁྱད་པར་གནོད་སྦྱིན་གཏེར་ཆང་མཆོག །ཕོ་ཉ་བྲན་དང་མངགས་གཞུག་བཅས། །འཁོར་དང་བཅས་པ་ཐམས་ཅད་ལ། །བདུད་རྩི་ཅན་ཤིང་བསྲེགས་པ་ཡི། །དྲི་ཞིམ་བསང་གི་མཆོད་པ་འབུལ། །འབྲུ་སྣ་ཕྱེ་མར་ཇ་ཆང་ཕུད། །དངོས་འབྱོར་ཡིད་སྦྲུལ་དགྱེས་པའི་རྫས། །ནམ་མཁའ་གང་བས་གསོལ་ལོ་མཆོད། །མ་རིག་ནོངས་པའི་དྲི་མ་ཀུན། །བརྟེན་འབྲེལ་ནུས་པས་དག་གྱུར་ནས། །གཟི་མདངས་ཡར་ངོའི་ཟླ་བཞིན་རྒྱས། །དབུ་འཕང་ཉི་ཟླའི་དཔལ་ལྟར་མཐོ། །ཡུལ་ཁམས་དགེ་ལེགས་སྣང་བས་ཁྱབ། །ཁྱད་པར་གསོལ་ཞིང་མཆོད་པ་ལ། །འདོད་རྒུའི་དངོས་གྲུབ་འབད་མེད་སྩོལ། །རྟག་པར་དགེ་བའི་སྡོད་གྲོགས་མཛོད། །མངྒ་ལ་ཛ་ཡ་སིདྡྷནྟུ། ཞེས་པའང་དད་པའི་བློ་ཅན་ཀརྨ་བསྟན་
རྒྱས་ནས་བསྐུལ་ངོར་འཆི་མེད་བསྟན་གཉིས་གཡུ་དྲུང་གླིང་པ་རྩལ་གྱིས་བྲིས་པ་དགེ་ལེགས་འཕེལ། །དགེའོ། །དགེའོ། །དགེའོ།། །།