རྫོང་ཤོད་བསངས།
ཧཱུྃ། དཔལ་ཆེན་ཐུགས་སྤྲུལ་བསྟན་སྲུང་ཀུན་གྱི་གཙོ། །ཡེ་ཤེས་མགོན་པོ་ཁྲག་འཐུང་ཕྱག་བཞི་པ། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །སྤྲུལ་པ་དཔལ་ལྡན་མགོན་པོ་རིགས་ཆེན་ལྔ། །གསང་བའི་དགྱེས་སྦྱོར་མ་གཅིག་ཙཎྜའི་ཀ །སྔགས་ཀྱི་སྲུང་མ་འབར་མ་མེ་ཡི་གདོང་། །སྤྲུལ་དང་ཡང་སྤྲུལ་སྣང་སྲིད་མ་མོའི་ཚོགས། །ལས་མཛད་ནག་པོ་ཆེན་པོ་བྱ་རོག་གདོང་། །བཀའ་ཉན་དྲེགས་པ་ལྷ་སྲིན་སྡེ་བརྒྱད་དང་། །ཕོ་ཉ་བྲན་གཡོག་བསམ་མི་ཁྱབ་པ་སོགས། །བདེ་གཤེགས་རྣམ་དགུའི་དཀྱིལ་འཁོར་བཞུགས་པའི་རྫོང་། །དཔའ་བོ་མཁའ་འགྲོ་འདུ་བའི་ཤོད་ཆེན་པོའི། །གནས་གཏེར་སྐྱོང་མཛད་དམ་ཅན་རྒྱ་མཚོའི་ཚོགས། །འདིར་གཤེགས་སྨན་ཕུད་རཀྟ་བ་ལི༚ང་ཏ། །དངོས་འབྱོར་ཡིད་སྤྲུལ་ཕྱི་ནང་གསང་བས་མཆོད། །སྔོན་གྱི་ཐུགས་དམ་གཉན་པོ་དེང་བསྐུལ་ན། །སྒྲུབ་པའི་གནས་སྲུང་འགལ་བྱེད་ཆོམ་ལ་ཕོབ། །སྒྲུབ་མཆོག་རྣལ་འབྱོར་རྣམས་ལ་བྱིན་གྱིས་རློབས། །སྒྲུབ་ལ་བར་གཅོད་ནད་གདོན་དབྱིངས་སུ་སོལ། །སྒྲུབ་པའི་མཐུན་རྐྱེན་ཉམས་རྟོགས་གོང་དུ་སྤེལ། །གསང་ཆེན་སྙིང་པོའི་བསྟན་པ་རྒྱས་པ་དང་། །རྣམ་བཞིའི་ཕྲིན་ལས་ཅི་བཅོལ་སྒྲུབ་པར་མཛོད། །
ཅེས་མདོ་ཁམས་གནས་ཆེན་ཉེར་ལྔ་ལས་ཡོན་ཏན་གནས་ལྔ་གཅིག་ཏུ་འདུས་པའི་གནས་མཆོག་ཆེན་པོར་རིམ་གཉིས་སྒྲུབ་པའི་སྐབས་འཆི་མེད་བསྟན་གཉིས་གཡུ་དྲུང་གླིང་པས་བྲིས་པ་དགེ་ལེགས་འཕེལ། །ཧཱུྃ། །སྔོན་ཚེ་དཔལ་ཆེན་པདྨ་ཐོད་ཕྲེང་གི། །སྤྱན་སྔར་ཁས་བླངས་དམ་བཅའ་ཐ་ཚིག་ཅན། །གནོད་སྦྱིན་ཚུལ་འཆང་དགེ་བསྙེན་མཐུ་སྟོབས་བདག །བདུད་ནག་ཆེན་པོ་རྔམས་པའི་སྒྲ་སྐད་སྒྲོགས། །ཚངས་པ་ལྷ་ཡི་བཙན་རྒོད་མཐུ་བོ་ཆེ། །ཀླུ་བདུད་དགེ་བསྙེན་སྐུ་གཅིག་མཚན་བརྒྱད་སྤྲུལ། །གིང་བཙན་འབར་བ་སྤུན་བདུན་ལས་ལ་རྔམས། །ཆོས་རྒྱལ་ལི་བྱིན་ཧར་ལེགས་བློན་འཁོར་བཅས། །དྲི་ཟིའི་རྒྱལ་པོ་རྡོ་རྗེ་འབར་བ་རྩལ། །རྡོ་རྗེ་ལེགས་པ་གནམ་ས་ཕྱེད་ཀྱི་བདག །སྨན་བཙུན་ལྕམ་མོ་མཆེད་གསུམ་ལ་སོགས་ཏེ། །རྫོང་ཤོད་བདེ་གཤེགས་འདུས་པའི་ཕོ་བྲང་ཆེའི། །གནས་དང་གཏེར་སྲུང་གཉན་པོ་མ་ལུས་པ། །འདིར་གཤེགས་འདོད་ཡོན་ལྔ་ལྡན་གཏོར་མའི་བཅུད། །སྨན་རཀ་ཕུད་ཀྱི་མཆོད་པ་དགྱེས་བཞེས་ལ། །རྣལ་འབྱོར་བདག་ཅག་འཁོར་དང་བཅས་པ་ཡི། །བར་ཆད་ཀུན་སོལ་མཐུན་རྐྱེན་ལེགས་ཚོགས་སྤེལ། བསང་མཆོད་དང་། ཁ་བསྒྱུར། གསེར་སྐྱེམས།
ཡིད་ལ་བསམ་ཞིང་ཇི་ལྟར་བཅོལ་པའི་ལས། །ཐོགས་མེད་མྱུར་དུ་བསྒྲུབ་པར་མཛད་དུ་གསོལ། ཞེས་མདོ་ཁམས་གནས་ཆེན་ཉེར་ལྔ་ལས་ཡོན་ཏན་གནས་ལྔ་གཅིག་ཏུ་འདུས་པའི་གནས་མཆོག་ཆེན་པོར་རིམ་གཉིས་སྒྲུབ་པའི་སྐབས་འཆི་མེད་བསྟན་གཉིས་གཡུ་དྲུང་གླིང་པས་ཁྱེར་བདེར་བྲིས་པ་དགེ་ལེགས་འཕེལ།། །། །། །།