དཔའ་འོག་ཡུལ་ལྷ་སྤྱི་བསྡུས་ཀྱི་བསང་མཆོད།
ཨོཾ་སྭ་སྟི། དཔའ་འོག་ཡུལ་ལྷ་སྤྱི་བསྡུས་ཀྱི་བསང་མཆོད་བྱ་བའི་ཚེ། དཀར་གཏོར་གསེར་སྐྱེམས། དམར་གཏོར་ཤ་ཆང་། ཕྱེ་མར་འོ་ཕུད་སོགས་ཇི་ལྟར་འབྱོར་བའི་མཆོད་རྫས་གཙང་མ་དང་། བསང་གི་མཆོད་པ་ལ་ཆབ་བྲན་ཏེ། རཾ་ཡཾ་ཁཾ། རྣམ་རྟོག་ཉེས་སྐྱོན་འབག་བཙོག་དྲི། །བསྲེགས་གཏོར་བཀླུས་ནས་སྟོང་པར་སྦྱངས། ཨོཾ་ཨཱཿཧཱུྃ། ལན་གསུམ། །སྟོང་ལས་ཡིད་མཐུན་སྣོད་མཆོག་ཏུ། །འབྲུ་གསུམ་ལས་བྱུང་བསང་མཆོད་དང་། །སྤྱན་གཟིགས་ས་དང་བར་སྣང་གང་། །མགྲོན་རྣམས་ཟག་མེད་བདེ་སྐྱེད་གྱུར། བཛྲ་སྥ་ར་་ཁཾ། ཀྱེ། པདྨཱ་ཀ་རས་བྱིན་བརླབས་ཤིང་། །དཔལ་ཆེན་ཧེ་རུ་ཀའི་གནས། །ཡན་ལག་ཚུལ་དུ་ཆགས་པ་ཡི། །དཔའ་བོ་དབང་ཆེན་བྲག་དཀར་དང་། །རག་ཆབ་བྲག་རྒྱ་ལ་སོགས་པར། །གཉུག་མར་གནས་པའི་མཐུ་སྟོབས་ཅན། །ལྷ་བཙན་བདུད་ཀྱི་དགེ་བསྙེན་སོགས། །ཡུལ་ལྷ་ཟོ་དོར་གཉེན་པོ་རྣམས། །མཆོད་པའི་གནས་འདིར་གཤེགས་སུ་གསོལ། །དགྱེས་པའི་གདན་ལ་བརྟན་པར་བཞུགས། །དཀར་མངར་འོ་ཞོའི་ཕུད་ཀྱིས་མཆོད། །རྒྱ་ཇ་གསེར་སྐྱེམས་བཏུང་བས་མཆོད། །དར་ཟབ་རིན་ཆེན་སྨན་སྣས་མཆོད། །རོ་བརྒྱ་ལྡན་པའི་བཟའ་བཅས་མཆོད། །ཕྱེ་མར་ཤེལ་ཚིག་འབྲུ་སྣས་མཆོད། །ཡིད་སྤྲུལ་དཀོར་
ནོར་དུ་མས་མཆོད། །བདུད་རྩི་ཅན་གྱི་བཟང་ཤིང་རྣམས། །གཙང་བྱེད་མེ་ལ་བསྲེགས་པ་ཡི། །དུད་སྤྲིན་བར་སྣང་གང་བ་འདིས། །དཔའ་བོ་རྡོ་རྗེ་དབང་ཆེན་བསང་། །རག་ཆབ་བཙན་རྒོད་ཆེན་པོ་བསང་། །བྲག་རྒྱ་སྔགས་འཆང་མཐུ་ཆེན་བསང་། །གཞན་ཡང་ཡུལ་ཕྱོགས་འདི་གནས་པའི། །ལྷ་ཀླུ་བཙན་བདུད་གཉན་དང་སྨན། །དཀར་པོའི་ཕྱོགས་སྐྱོང་དམ་ཚིག་ཅན། །འཁོར་དང་བཅས་པ་ཐམས་ཅད་བསང་། ཀྱེ། དཔལ་བྲག་ལྷ་ཡི་དགེ་བསྙེན་ཆེ། །མི་དཀར་རྟ་དཀར་དར་མདུང་ཕྱར། །སྙན་གྲགས་དུང་དཀར་གཡོན་ན་འབུད། །ལྷ་དམག་དཔུང་གི་རུ་སྣ་འདྲེན། །སྦས་པའི་གནས་དང་ཟབ་གཏེར་སྲུང་། །ཞི་བའི་ཕྲིན་ལས་སྒྲུབ་ལ་བསྟོད། །མུ་ན་མ་གཡས་ཀྱི་རུ་འདྲེན་པ། །བཙན་རྒོད་རག་ཆབ་གཉན་པོ་ནི། །མི་དམར་རྟ་དམར་གྲི་ཞགས་བསྣམས། །མི་དམར་སྔོན་རྒྱུག་རྟ་དམར་འབྲང་། །དམ་ལྡན་རྣལ་འབྱོར་སྐྱོད་ལ་བསྟོད། །བྲག་རྒྱ་སྔགས་པ་མཐུ་ལྡན་ཆས། །མ་ངེས་ཆིབས་ཤིང་རྔ་གཤང་ཐོགས། །མཆོད་ན་འགོ་ཞིང་བརྟེན་ན་འགྲོགས། །ཆོ་འཕྲུལ་སྣ་ཚོགས་སྟོན་ལ་བསྟོད། །ཡུལ་བདག་ས་བདག་མ་ལུས་པའི། །ཆེ་བའི་ཡོན་ཏན་ཅི་མཆིས་ལ། །བསྟོད་ཅིང་བསང་མཆོད་བརྔན་པའི་མཐུས། །དགྱེས་པའི་ཞལ་གྱི་འཛུམ་
ཕྱུངས་ལ། །བསྟན་དང་རྣལ་འབྱོར་སྐྱོང་བ་དང་། །ཡུལ་ཕྱོགས་འདི་རུ་བདེ་ལེགས་སྤེལ། །གཞི་བྱེས་ཀུན་ཏུ་སྡོང་གྲོགས་མཛོད། །ན་ཚ་གོད་ཁ་མ་བཏང་བར། །མི་ཕྱུགས་ཀུན་ལ་སྲུང་ཞིང་སྐྱོབས། །འགལ་རྐྱེན་བར་ཆད་ཕྱི་རུ་ཟློག །ཚེ་དཔལ་གཡང་བཅུད་ནང་དུ་བསྡུས། །མ་རིག་ནོངས་པ་བཟོད་བཞེས་ལ། །པདྨ་ཐོད་ཕྲེང་ལ་སོགས་པའི། །བཀའ་བསྒོས་ཐ་ཚིག་མ་བསྙེལ་བར། །འདོད་པའི་ཕྲིན་ལས་བསྒྲུབ་པར་མཛོད། །ཅེས་ཕྲིན་ལས་བཅོལ་ཞིང་། སརྦ་བྷཱུ་ཏ་ཡ་ཧི་གཙྪ། ཞེས་པས་གཤེགས། ཞེས་དཔའ་འོག་ཆོས་རྗེ་བླ་མ་ཀུན་དགའ་དཔལ་ལྡན་གྱིས་གསུང་བསྐུལ་མཛད་པ་ལྟར་པདྨ་གར་དབང་རྩལ་གྱིས་བྲིས་པ་དགེ་ལེགས་འཕེལ།། །། །།