བཀའ་འཁོར་ལོ་བར་པའི་ཡང་བཅུད་ཤེས་རབ་སྙིང་པོའི་མདོ་ལ་བརྟེན་པའི་བདུད་ཟློག་བར་ཆད་ཀུན་སེལ།
བཀའ་འཁོར་ལོ་བར་པའི་ཡང་བཅུད་ཤེས་རབ་སྙིང་པོའི་མདོ་ལ་བརྟེན་པའི་བདུད་ཟློག་བར་ཆད་ཀུན་སེལ་ལག་ལེན། བལྟས་ཆོག་ཏུ་བཀོད་པ་རྣམ་ཐར་སྟོབས་བསྐྱེད་ཅེས་བྱ་བ་བཞུགས་སོ། །
སྤྲོས་པའི་མཐའ་བྲལ་སྨྲ་བསམ་བརྗོད་ལས་འདས། །རྒྱལ་བའི་ཡུམ་གྱུར་དེ་ལ་གུས་བཏུད་ནས། །གསུང་རབ་ཡང་བཅུད་ཤེས་རབ་སྙིང་པོ་ཡི། །བདུད་ཟློག་ལག་ལེན་བལྟས་པས་ཆོག་བྲི། །འཕག་ཡུལ་ནས་འགྱུར་བའི་གཏོ་དཀར་བཞི་ཞེས་གྲགས་པ་ཁུང་དང་ལྡན་ཅིང་བྱིན་བརླབས་ནུས་མཐུ་རྨད་དུ་བྱུང་བའི་ཡ་གྱལ་ཤེར་སྙིང་བདུད་ཟློག་འདི་ལ་སྤྱི་དོན་གཉིས། ལོ་རྒྱུས་དང་། གཞུང་གི་ཉམས་ལེན་ནོ། །དང་པོ་ནི། ཡང་དག་པར་རྫོགས་པའི་སངས་རྒྱས། སྤྱན་རས་གཟིགས། ཐུགས་རྗེ་ཆེན་པོ་བློ་གྲོས་རིན་ཆེན། གསེར་གླིང་པ། ཇོ་བོ་ཨ་ཏི་ཤཱ། དགེ་བཤེས་སྟོན་པ། པུ་ཏོ་བ་རིན་ཆེན་གསལ། རིང་མོ་འབྱུང་གནས་རྡོ་རྗེ། གྱི་ལྗང་དབུ་དཀར་བ། མཆིམས་ཆེན་ནམ་
མཁའ་གྲགས་པ། འཁོན་ཀུ་མཱ་ར་བུདྡྷ་ནས་རིམ་བཞིན་བརྒྱུད་པའི་ཟམ་མ་ཆད་པར་བྱུང་བའི་གདམ་ངག་སྟེ། །ཡིད་ཆེས་པའི་ལོ་རྒྱུས་ཀྱང་། གྱི་ལྗང་དབུ་དཀར་བས་འདི་ཉིད་ཡི་དམ་མཛད་ཅིང་ཡིད་ཆེས་པར་ཡོད་པ་ལས། ཡུལ་དེར་གྱི་ལྗང་ཀུ་ལོ་ཞེས་བྱ་བ་ཡོད་པས་དེས་གཤིན་རྗེ་དམར་ནག་མོན་པ་དམར་ནག་ལ་སོགས་པ་མངོན་དུ་རྒྱུག་གཏུབ་པར་མཁྱེན་པས་ཁོང་གིས་མི་མང་པོ་མཐུས་བསྒྲལ་བ་ལ། །ཉིན་གཅིག་གྱི་ལྗང་དབུ་དཀར་བས་ཀུ་ལོ་ལ་ཞལ་སྐྱེམས་དྲངས་གོས་བཀོན། བསླབ་བྱ་བྱས་ནས། །ཁྱོད་ཀྱིས་མཐུ་མྱུར་པོ་དགོངས་ཡང་ཕྱི་མ་རྣམ་སྨིན་ཤིན་ཏུ་ལྕི་བ་ཡོད་ཚུལ་སོགས་ཞུས་པས། །ཁོང་གི་མཚངས་ལ་ཕོག་ནས་ཁྲོས་ཏེ་ཁྱོད་ཞག་བདུན་བས་ཕན་ཆད་དུ་མི་བཞག་ཟེར་ནས་མནའ་བསྐྱལ་ཏེ་ཀུ་ལོ་ཁྲོས་ནས་སོང་བས། །དབུ་
དཀར་བས་འདི་ཉིད་ཀྱི་སྒྲུབ་པ་མཛད་པས། ཞག་བདུན་ནས་ཁོ་རང་གི་མཐུ་ཁོ་རང་ལ་ལྡོག་སྟེ་འཆིའོ། །དེས་ན་བྱད་ཟློག་ཀྱང་ཁྱད་པར་དུ་འཕགས་སོ། །ཡང་རྒྱ་ནག་ལ་ཅོ་ཞིག་ལ་རྒྱལ་པོས་གནོད་པ་ལ། རྩིས་མཁན་གྱི་རྩིས་བྱས་པས། བུ་ཆུང་གི་རོ་ལ་གཏོ་བྱས་ཏེ་ཇ་སིག་གཅིག་གི་ནང་དུ་བཅུག་ནས་དབུས་སུ་བསྐུར་ན་ཕན་ཟེར་དེ་ལྟར་བྱས་ནས་དབུས་སུ་བསྐུར། འཕན་ཡུལ་དུ་དབུས་པ་དགེ་སེར་གྱིས་ཉོས་པ་ལ། རྒྱལ་པོས་དགེ་སེར་ལ་གནོད་ནས་རྟ་དྲིལ་བོང་གསུམ་ཐམས་ཅད་མེད་པར་བྱས་སོ། །རྒྱལ་པོ་དངོས་སུ་མཐོང་རྒྱུ་ཡོད་པར་འདུག་པས། དག་སེར་གྱིས་རྒྱལ་པོ་ལ་དྲིས་ནས་ཁྱོད་སུ་ལ་འཇིགས་བྱས་པས། ང་གྱི་ལྗང་དབུ་དཀར་ལ་འཇིགས། དེ་བས་སུ་ལ་མི་འཇིགས་ཟེར། དགེ་སེར་གྱིས་རྒྱལ་པོ་ལ་སྨྲས་པ། གྱི་ལྗང་དབུ་དཀར་བ་ངས་བསད་པས་ཆོག །དབུ་དཀར་བ་འདུག་པ་ལ་ལམ་རྒྱུས་གྱིས་ཤིག་བྱས་ནས་ཁོ་བསླུས་པས། རྒྱལ་པོ་དེས་ཀྱང་ལམ་མཁན་བྱས་ནས་དབུ་དཀར་བའི་རྩ་རུ་ཕྱིན་ཏེ། དགེ་སེར་གྱི་སྔར་གྱི་ལོ་རྒྱུས་རྣམས་ཞུས་པས། རྒྱལ་པོ་བསྐྲད་པའི་མན་ངག་འདི་ཉིད་སྒྲུབ་ཐབས་བཅས་གནང་། དགེ་སེར་གྱིས་བདུད་ཟློག་བྱས་པས་དེ་ཕྱིན་ཆད་རྒྱལ་པོའི་གནོད་པ་ཞི་ཞིང་། བློ་ཆོས་སུ་བཀོལ་བཏུབ་པ་བྱུང་ངོ། །དེ་ནས་རྒྱལ་པོ་སྔར་བཞིན་རྒྱ་ནག་ཡུལ་དུ་ལོག་ནས་སྔར་གྱི་ཕ་ཅོའི་རྩར་སོང་བས། ཕ་ཅོས་རྒྱལ་པོ་ཁྱོད་ལོ་མང་པོའི་བར་གར་ཕྱིན་བྱས་པས་
དབུས་སུ་ཕྱིན་པས་དང་པོ་སྐྱིད་པོ་བྱུང་། ཕྱིས་སུ་སྡུག་པོ་རང་བྱུང་ཟེར། སུ་ལ་འཇིགས་ནས་འོད་དྲིས་པས། ང་གྱི་ལྗང་དབུ་དཀར་བ་དང་དགེ་སེར་ལ་འཇིགས་ནས་འོང་། ད་བར་དགེ་སེར་རྩ་རུ་བསྡད་ཟེར། ཕ་ཅོས་ཡང་དབུས་སུ་འགྲོ། ཁྱོད་ཀྱི་ལམ་མཁན་གྱིས། དགེ་སེར་གྱི་རྩ་རུ་ངེད་རང་གཉིས་འགྲོ་ལ་འདུག་བྱས་ཏེ། ཁོ་རང་གིས་ལམ་མཁན་བྱས་ནས་འོང་བས། དགེ་སེར་དང་ཕ་ཅོ་འཕྲད་དེ་སྔར་གྱི་ལོ་རྒྱུས་རྣམས་ཞུས་ཤིང་འབུལ་བ་བཟང་པོ་ཕུལ་ནས། རྒྱལ་པོ་བསྐྲད་པའི་ཐབས་ཀྱི་མན་ངག་ཞུས་འདི་ཉིད་གནང་ནས་སྒྲུབ་གསུང་པར། ཕ་ཅོས་བསྒྲུབ་པས་དེ་ཕྱིན་ཆད་རྒྱལ་པོའི་གནོད་པ་མ་ཁྱུང་ངོ་། །དེ་སོགས་ཐུན་མོང་གི་དངོས་གྲུབ་གང་འདོད་འབྱུང་ཞིང་། ཁྱད་པར་དུའང་མཆོག་གི་དངོས་གྲུབ་འགྲུབ་པར་ཐེ་ཚོམ་མེད་དོ། །གཉིས་པ་ཉམས་ལེན་དངོས་ལ་གསུམ་སྟེ། སྦྱོར་བ་དང་། དངོས་གཞི། རྗེས་སོ། །དང་པོ་སྦྱོར་བ་ནི། གཞི་དཀར་པོའི་སྟེང་དུ་མེ་ཏོག་སིལ་མ་བཀྲམ་ལ། དབུས་སུ་སྟེགས་བུ་མཐོ་བའི་སྟེང་དུ་གདན་བཟང་པོ་ལ་ཐུབ་པའི་སྐུ་བརྙན་བྲིས་འབུར་གང་རུང་རབ་གནས་མ་ཉམས་པར་ཞལ་རང་ལ་བསྟན་ནས་བཞུགས་སུ་གསོལ་བའི་མཐར་མཚམས་འཛིན་མེ་ཏོག་ནས་བཟུང་སྟེ་ཉེར་སྤྱོད་ལྔ་གཡས་བསྐོར་དུ་བཤམས། དེ་ལས་དམའ་བའི་སར་མདུན་ངོས་སུ་སྡེར་སྣོད་ལྟ་བུར་ཡོན་བདག་གི་འདྲ་གླུད་སྐྱེ་མཆེད་ཚང་ཞིང་
རྒྱན་གྱིས་བརྒྱན་པ་གོས་དྲི་ཅན་བཀོན་ལ་དར་ཟབ་གསེར་གཡུ་འབྲུ་སྣ་སོགས་གླུད་རྫས་ཚང་བས་བསྐོར་བ་ཁ་ཕར་གྱུ་སྟེ་བཞག །དེའི་ཕྱི་རོལ་ཏུ་ཤར་དུ་ཞལ་ཟས། ལྷོར་གཏོར་མ་མེ་ཏོག་གི་དབྱིབས་ཅན། ནུབ་ཏུ་དཀར་གཏོར། བྱང་དུ་དམར་གཏོར་རྣམས་ཐེབ་ཙེ་སོགས་སུ་བཤམས། དེ་དག་གི་ཕྱི་རོལ་དུ་ཕྱོགས་བཞིའི་གླུད་དང་འདོད་ཡོན་རྣམས་གྲུ་བཞིར་བཅད་དེ་བཞག་དགོས་པས། དེའང་ཤར་ངོས་གླུད་ཡོད་པའི་ཕྱི་རོལ་དུ་ཁལ་བདུན། དེའི་ཕྱིར་ཁྱི་བདུན། དེའི་ཕྱིར་ཆང་བུ་བདུན། དེའི་ཕྱིར་ཐེབ་སྐྱུ་བདུན། དེའི་ཕྱིར་ཤ་དུམ་བདུན། དེའི་ཕྱིར་ཟན་ཆད་བདུན། དེའི་ཕྱིར་ལྷའི་བུའི་བདུད་མི་རྟ་དཀར་པོ་གཡས་མ་ཏོག་དང་གཡོན་ཞགས་པ་བསྣམས་པ་བདུན་ཁ་ནང་བསྟན་དུ་བཀོད། དེ་འགྲེས་ཏེ། ལྷོ་དང་། ནུབ་དང་། བྱང་ངོས་ལའང་ནང་ནས་ཕྱི་རིམ་བཞིན་ཁལ། ཁྱི། ཆང་བུ། མཐེབ་སྐྱུ། ཤ་དུམ། ཟན་ཆང་རྣམས་བདུན་རེ་དང་། ལྷོར་ཉོན་མོངས་པའི་བདུད་མི་རྟ་སེར་པོ་གཡས་རལ་གྲི་དང་གཡོན་ཞགས་པ་བསྣམས་པ་བདུན། ནུབ་ཏུ་ཕུང་པོའི་བདུད་མི་རྟ་དམར་པོ་གཡས་མདུང་དར་དང་གཡོན་ཞགས་པ་བསྣམས་པ་བདུན། བྱང་དུ་འཆི་བདག་གི་བདུད་མི་རྟ་ནག་པོ་གཡས་ཁྲམ་ཤིང་དང་གཡོན་ཞགས་པ་བསྣམས་པ་བདུན་རེ་ཁ་ནང་བསྟན་དུ་བཞག །དེའི་གཡོན་ནམ་མདུན་ཕྱོགས་གང་བདེར་བདུད་ཟློག་གི་མར་
གཞི་ནག་པོ་རེ་ཕྱར་ལྟ་བུ་བཏིང་། འཛོམ་ན་རྐང་གསུམ་མམ་སྟེགས་ཆུང་ངུ་ཞིག་བཞག །གཞན་ཡང་ཆོས་སྲུང་གཏོར་འབུལ་བྱེད་ན་རང་ལུགས་རྒྱས་བསྡུས་གང་བྱེད་ཀྱི་གཏོར་མ་དང་། །རྗེས་ཆོག་སྐབས་མཆོད་ཁ་གསོ་རྒྱུའི་ཞལ་ཟས། བརྗོད་བདེ་བས་འབྲུ་དཀར་ནག །སྒོ་དབྱེའི་གསེར་སྐྱེམས་དང་དཀར་གཏོར། སྒྲུབ་པ་པོའི་རོལ་ཆ་སོགས་འཚོགས་པར་བྱའོ། །འདོན་མཁན་དགེ་སློང་བཞི་སྡེ་ཞིག་ཡོད་ན་མཆོག་ཡིན་ལ། མ་འཛོམ་ན་དགེ་སློང་གཅིག་གིས་ཀྱང་ཆོག་གོ། །གཉིས་པ་དངོས་གཞི་ལ་གསུམ། བདག་བསྐྱེད། མདུན་བསྐྱེད། བདུད་ཟློག་དངོས་སོ། །དང་པོ་ནི། ཁ་ཅིག་གིས་བདག་བསྐྱེད་ཡི་དམ་གང་མོས་ལ་བྱ་བར་བཤད་པ་དང་། ཐུབ་པ་རྡོ་རྗེ་གདན་ལ་བྱེད་པ་དང་། བདག་བསྐྱེད་གཏན་མ་བཤད་པ་སོགས་འདུག་ཀྱང་། གང་ལས་བྱུང་བའི་ཁུངས་དང་བརྒྱུད་པ་གོང་མའི་ཕྱག་ལེན་གྱི་འགྲེལ་ལས་བཀའ་གདམས་ལྷ་བཞིའི་ཐུབ་པའི་བདག་བསྐྱེད་ཉིད་ལེགས་པས་དེ་ལྟར་ན། ཐོག་མར་སྐྱབས་སེམས་ནི། །སངས་རྒྱས་ཆོས་དང་ཚོགས་ཀྱིས་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། །ཇི་སྙེད་སུ་དག་ཕྱོགས་
བཅུའི་འཇིག་རྟེན་ན། སོགས་ཡན་ལག་བདུན་པའི་ཚིགས་བཅད་ཚང་བར་བརྗོད། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག། སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཅེས་ཆད་མེད་བཞི་བསྒོམས་སྟོང་བའི་ངང་ལས་རང་གི་སྙིང་གར་ཨ་ལས་ཟླ་བའི་སྟེང་དུ་ཧཱུྃ་སེར་པོ། དེའི་འོད་ཀྱིས་ལུས་གང་། འོད་ཀྱི་ཕུང་པོར་གྱུར། དེ་ལས་རང་ཉིད་ཐུབ་པའི་དབང་པོའི་སྐུར་གྱུར་པ་ནི། སྐུ་མདོག་གསེར་གཙོམ་ལྟ་བུ་ཕྱག་གཉིས་གཡས་ས་གནོན་དང་། གཡོན་མཉམ་བཞག་མཛད་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ་རབ་ཏུ་བྱུང་བའི་ཆ་ལུགས་ཅན། མཚན་དང་དཔེ་བྱད་ཡོངས་སུ་རྫོགས་ཤིང་། ཆོས་གོས་རྣམ་གསུམ་གསོལ་བ། འོད་ཟེར་དཔག་ཏུ་མེད་པ་འཕྲོ་ཞིང་། ཐུགས་མཉམ་པར་བཞག་པའི་བདག་ཉིད་དུ་གྱུར། ཐུགས་ཀར་ཟླ་བ་ལ་གནས་པའི་ཧཱུྃ། དེ་ལས་འོད་འཕྲོས་ཐུབ་པ་ཡེ་ཤེས་སེམས་དཔའི་ལྷ་ཚོགས་བཛྲ་ས་མཱ་ཛཿཡིད་ཀྱིས་ཕྱག་མཆོད་བྱ། ཛཿཧཱུྃ་བྃ་ཧོཿ སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་
སྔོན་པོ། ཐུགས་ཀར་ཟླ་བའི་སྟེང་དུ་ས་བོན་གྱི་མཐར་སྔགས་ཀྱི་ཕྲེང་བས་བསྐོར་བར་བསྒོམས་ལ་ཨོཾ་མུ་ནི་མ་ཧཱ་མུ་ན་ཡེ་སྭཱ་ཧཱ། ཅི་ནུས་བཟླས་ལ་མཐར། རང་གི་ཡེ་ཤེས་པ་མདུན་ཏུ་བཞུགས་པར་གྱུར། ཨོཾ་བཛྲ་ཨརྒྷཾ་ནས། ཤབྟ་པྲ་ཏཱིཙྪ་ཨཱཿཧཱུྃ། ཞེས་པས་མཆོད། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཅེས་འདོད་དོན་གསོལ་བ་གདབ། །དགེ་བ་འདི་ཡིས་མྱུར་དུ་བདག །ཐུབ་པའི་དབང་པོ་སོགས་ཀྱིས་དགེ་བ་བསྔོ། ཨོཾ་མུཿཞེས་བརྗོད་ལ་གཤེགས་སོ། །རང་དམ་ཚིག་པའི་ང་རྒྱལ་གྱིས་གནས་སོ། །གཉིས་པ་མདུན་བསྐྱེད་ཐོག་མར་མཆོད་ལ་བྱིན་བརླབས་པ་ནི། ཨོཾ་ཨཱཿམྲྀ་ཏེ་ཧཱུྃ་ཕཊ་ཀྱིས་བསང་། ཨོཾ་སྭཱ་བྷཱ་བ་ཤུདྡྷཿསརྦ་དྷརྨཱ་སྭཱ་བྷཱ་བ་ཤུདྡྷོ་྅་ཧཾ་གིས་སྦྱང་། སྟོང་པའི་ངང་ལས་བྷྲཾུ་ལས་བྱུང་བའི་རིན་པོ་ཆེ་ལས་གྲུབ་པའི་སྣང་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་མཆོག །ཞལ་ཟས། རོལ་མོ་རྣམས་དྭངས་ཤིང་ཐོག་པ་མེད་པ་ནམ་མཁའི་མཐའ་ཀླས་པར་གྱུར། ཞེས་དང་། སོ་སོའི་ཕྱག་རྒྱ་དང་བཅས་པས། ཨོཾ་བཛྲ་ཨརྒྷཾ་སྭཱ་ཧཱ། ཐོག་
མཐའ་དེས་འགྲེ་སྟེ། པཱདྱཾ་ པུཥྤེ་ དྷུ་པེ་ ཨཱ་ལོ་ཀེ་ གནྡྷེ་ ནཻ་ཝི་དྱ་ ཤཔྟ་རྣམས་སྦྱར། ཨོཾ་བཛྲ་དྷརྨཱ་ར་ི་ཏ། པྲ་ར་ི་ཏ། སཾ་པྲ་ར་ི་ཏ། སརྦ་བུདྡྷ་ཀྵེ་ཏྲ་བྲ་ཙ་ལི་ནི། པྲཛྙཱ་པ་ར་མི་ཏ་ན་ད་སྭཱ་བྷཱ་ཝེ་ན། བཛྲ་དྷརྨཱ་ཧྲཱིཿད་ཡ། སནྟོཥ་ནི་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨ་ཁཾ་སྭཱ་ཧཱ། ཞེས་ལན་གསུམ་རོལ་མོ་དང་བཅས་པས་བྱིན་དབབ་བོ། །དེ་ནས་མདུན་བསྐྱེད་ཀྱི་རྟེན། ཨ་མྲྀ་ཏས་བསངས། སྭཱ་བྷཱ་ཝས་སྦྱངས། སྟོང་པའི་ངང་ལས། ཐར་པ་ཆེན་པོའི་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་པདྨ་དང་ཟླ་བའི་སྟེང་དུ་ཨོཾ་མུ་ནི་མུ་ནི་མ་ཧཱ་མུ་ན་ཡེ་སྭཱ་ཧཱ་ལས་བསྟན་པའི་བདག་པོ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་གཡས་ས་གནོན་གཡོན་མཉམ་བཞག་གི་ཕྱག་རྒྱ་ཅན། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དབུ་ལ་གཙུག་ཏོར་དང་ཞབས་ལ་འཁོར་ལོ་ལ་སོགས་པ་མཚན་བཟང་པོ་སུམ་ཅུ་རྩ་གཉིས་དཔེ་བྱད་བཟང་པོ་བརྒྱད་ཅུས་སྤྲས་པ། ན་བཟའ་ཆོས་གོས་རྣམ་པ་གསུམ་གསོལ་ཞིང་འོད་དང་འོད་ཟེར་དཔག་ཏུ་མེད་པ་འཕྲོ་བའི་འཁོར་དུ། གཡས་ཕྱོགས་ནས། འཕགས་པ་སྤྱན་རས་གཟིགས་དཀར་པོ་པདྨ་དང་དྲེལ་བུ་འཛིན་པ། འཇམ་དཔལ་དབྱངས་གུར་གུམ་གྱི་མདོག་ཅན་རལ་གྲི་དང་པུ་སི་འཛིན་པ། ཕྱག་ན་རྡོ་རྗེ་སྔོན་པོ་རྡོ་རྗེ་དང་དྲིལ་བུ་འཛིན་པ། ས་ལི་སྙིང་པོ་སེར་པོ་རལ་གྲི་དང་དྲིལ་བུ་འཛིན་པ། །
སྒྲིབ་པ་རྣམ་སེལ་དཀར་པོ་རིན་པོ་ཆེའི་སྙེ་མ་དང་དྲིལ་བུ་འཛིན་པ། བྱམས་པ་སེར་པོ་ཀླུ་ཤིང་དང་དྲིལ་བུ་འཛིན་པ། ཀུན་ཏུ་བཟང་པོ་སྔོན་པོ་རིན་པོ་ཆེ་དང་དྲིལ་བུ་འཛིན་པ། ནམ་མཁའི་སྙིང་པོ་སྔོན་པོ་རལ་གྲི་དང་དྲིལ་བུ་འཛིན་པ། ཐམས་ཅད་ཀྱང་རིན་པོ་ཆེའི་རྒྱན་དང་དར་གྱི་ན་བཟའ་ཅན། ཞབས་རྡོ་རྗེའི་སྐྱིལ་ཀྲུང་གིས་རང་རང་གི་གདན་ལ་བཞུགས་པ། གཡོན་ཕྱོགས་ནས་འཕགས་པ་ཤཱ་རིའི་བུ། མཽའུ་གལ་གྱི་བུ། འོད་སྲུང་། ཀུན་དགའ་བོ། ནོར་སྦྱིན་འཛིན། ཉེ་བར་འཁོར། མ་འགགས་པ། རབ་འབྱོར་ཏེ་ཐམས་ཅད་ཀྱང་ལྷུང་བཟེད་དང་མཁར་གསིལ་འཛིན་པ། ཆོས་གོས་རྣམ་གསུམ་བཀླུབས་ཤིང་པུས་མོ་གཡས་པའི་ལྷ་ང་གདན་ལ་བཙུག་པའི་ཚུལ་གྱིས་བཅོམ་ལྡན་འདས་ཀྱི་ཞལ་ལ་བལྟ་ཞིང་བཞུགས་པ་འཁོན་གཞོན་ནུ་སངས་རྒྱས་ཀྱི་གཞུང་དུ་སྟོན་པའི་གཡས་སུ་སྤྱན་རས་གཟིགས་དང་གཡོན་དུ་ཤཱ་རིའི་བུ་གཙོ་འཁོར་བཀོད་པ་འདི་ཤེས་རབ་སྙིང་པོའི་གླིང་གཞི་དང་མཐུན་པར་གོ། ༈ །གཙོ་འཁོར་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿཿཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་སྟོན་པ་ཤཱཀྱའི་རྒྱལ་པོ་ལ། འཁོར་ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་ཉན་རང་གི་ཚོགས་བསམ་གྱིས་མི་ཁྱབ་པས་བསྐོར་བ་ཨོཾ་བཛྲ་ས་མཱ་
ཛཿསྤོས་དང་བཅས་པའི་རྡོར་དྲིལ་འཛིན་པས། །མ་ལུས་སེམས་ཅན་ཀུན་གྱིས་མགོན་གྱུར་པའི། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེས་རྣམ་སྦྱངས་ཤིང་། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པའི། །ཁྱེད་བཞེད་འགྲོ་དོན་མཛད་དུས་འདིར་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་བརླབས་སྣ་ཚོགས་སྟོན་མཛད་ཅིང་། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་བདག་འཁོར་དང་བཅས་རྣམས་གཤེགས་སུ་གསོལ། ཨོཾ་ཛཿཧཱུྃ་བྃ་ཧོཿ བྷ་ག་ཝཱ་ན་ཨེ་ཧྱེ་ཧི་མ་ཧཱ་ཀཱ་རུ་ནི་ཀདྲྀ་ཤྱ་ཧོཿས་མ་ཡཱ་སྟྭཾཾ། །བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གིས་མཆོད་ཡོན་བཞེས་ནས་ཀྱང་། །ཐུགས་ལ་དགོངས་ཤིག་གནང་བར་མཛོད། །ཨོཾ་སརྦ་ཏ་ཐཱ་ག་ཏ་ག་ག་ན་ས་མ་ཡེ་ཧཱུྃ་སྭཱ་ཧཱ། ཨོཾ་བཛྲ་པུཥྤེ་ཨཱཿཧཱུྃ། དྷུ་པེ༴ཨཱ་ལོ་ཀེ༴གནྡྷེ༴ནཻ་ཝི་དྱའི་བར་འགྲེས་སྦྱར། ཛཿཧཱུྃ་བྃ་ཧོཿ དམ་ཚིག་པ་དང་གཉིས་སུ་མེད་པར་བཞུགས་
པར་མོས། མདོ་འདོན་པའི་དམིགས་པ་ནི། གཙོ་བོའི་ཐུགས་ཀར་པད་ཟླའི་སྟེང་དུ་ཡུམ་ཆེན་མོ་ལ་སྲས་ཕྱོགས་བཅུའི་སངས་རྒྱས་རྣམས་ཀྱིས་བསྐོར་བ། ཡུམ་ཆེན་མོའི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ་ཨཱཿདེའི་མཐར་ཤེས་རབ་ཀྱི་སྙིང་པོའི་མདོའི་ཡིག་འབྲུ་རྣམས་གསལ་བ་ལས་རང་སྒྲ་དང་བཅས་འོད་ཟེར་འཕྲོས་པས་རྒྱལ་བ་རྣམས་ལ་མཉེས་པའི་མཆོད་པ་འབུལ། བྱིན་རླབས་ནུས་མཐུ་ཐམས་ཅད་བསྡུས་ནས་རང་དང་བསྲུང་བྱ་རྣམས་ཀྱིས་གཙོར་བྱས་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་དག ། ནད་གདོན་བར་ཆད་ཐམས་ཅད་ཞི་ནས་སྟོང་ཉིད་བཅོ་བརྒྱད་ཀྱི་དོན་རྒྱུད་ལ་སྐྱེས་པར་གྱུར། ཅེས་པའི་སྤྲོ་བསྡུ་དང་། གཙོ་འཁོར་ཀུན་གྱིས་མགྲིན་གཅིག་ཏུ་གསུང་བར་མོས་ལ། འདི་སྐད་བདག་གིས་ཐོས་པའི་དུས་གཅིག་ན་བཅོམ་ལྡན་འདས་རྒྱལ་པོའི་ཁབ་སོགས་ནས། མངོན་པར་བསྟོད་དོའི་བར་ཅི་འགྲུབ་འདོན། དེ་ནས་མཆོད་པ་བྱིན་རླབས་གོང་བཞིན་བྱས་ལ། །རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པས་བཤམས་པ་འདི། །རྒྱལ་བ་སྲས་དང་བཅས་ལ་འབུལ། ཨོཾ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡེ་ཧཱུྃ། དེ་
བཞིན་དུ་ཚིགས་བཅད་དང་སྔགས་གོང་འོག་ཐམས་ཅད་འདྲ་བར་བྱས་ལ། མེ་ཏོག་ཇི་སྙེད་དང་། པུཥྤེ་བདུག་སྤོས་དང་། དྷུ་པེ་སྣང་གསལ་དང་། ཨཱ་ལོ་ཀེ། དྲི་ཆབ་དང་། གནྡྷེ། ཞལ་ཟས་དང་། ནཻ་ཝཱི་དྱ། རོལ་མོ་ཇི་སྙེད་ཡོད་པ་དང་། སོགས་ནས། ཨོཾ་སརྦ་ཏ་ཐཱ་ག་ཏ་ཤཔྟ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡེ་ཧཱུྃ། ཨོཾ་བཛྲ་དྷརྨཱ་ར་ི་ཏ་སོགས་བརྗོད། དཔྲལ་བར་ནམ་མཁའ་མཛོད་ཀྱི་ཕྱག་རྒྱའི་མཐར་སེ་གོལ་དང་། ཨོཾ་སརྦ་བི་ད་པཱུ་ར་པཱུ་ར་སུ་ར་སུ་ར་ཨཱ་ཝརྟ་ཡ་ཨ་ཝཱརྟ་ཡ་ཧོཿརྒྱས་པར་སྤྲོ་ན། །བདེ་བར་གཤེགས་པ་སོགས་རྒྱལ་སྲིད། ཁ་དོག་དབྱིབས་ལེགས་སོགས་ཀྱིས་འདོད་ཡོན་འབུལ། བསྡུ་ན། །མི་དབང་རིན་ཆེན་རྣམ་བདུན་འདི་དག་ནི། །སངས་རྒྱས་སྲས་དང་བཅས་པ་མ་ལུས་པ། །བཤམས་ཤིང་ཡིད་ཀྱིས་སྤྲུལ་ཏེ་འབུལ་བ་ཡིས། །འགྲོ་བ་མི་ཟད་གཏེར་ལ་སྤྱོད་པར་ཤོག །ཨོཾ་སསྟ་མ་ཧཱ་རཏྣ་པྲ་ཏཱིཙྪ་སྭཱ་ཧཱ། །ཕྱོགས་དུས་ཀུན་ནས་གཟུགས་སྒྲ་དྲི་རོ་དང་། །རེག་བྱའི་ཁྱད་པར་ཕུན་སུམ་ཚོགས་པ་རྣམས། །མོས་བློས་རྒྱལ་བ་སྲས་བཅས་ལ་འབུལ་ན། །བཞེས་ནས་བླ་མེད་གྲུབ་མཆོག་རྩལ་དུ་གསོལ། ཨོཾ་པཉྩ་ཀཱ་མ་གུ་་པྲ་ཏཱིཙྪ་སྭཱ་ཧཱ། ཞེས་པ་ཙམ་བརྗོད། བསྟོད་པའང་སྤྲོ་ན་སེམས་བརྩེ་མ་སོགས་བདེ་གཤེགས་སྤྱི་བསྟོད་ཁྱད་བྱ། བསྡུ་ན། །ཐབས་མཁས་ཐུགས་རྗེ་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱིས་དཔུང་འཇོམས་པའི། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོ་ཁྱེད་ལ་ཕྱག་འཚལ་ལོ། །གང་ཚེ་རྐང་
གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་གོམ་པ་བདུན་བོར་ནས། །ང་ནི་འཇིག་རྟེན་འདི་ན་མཆོག་ཅེས་གསུང་། །དེ་ཚེ་མཁས་པ་ཁྱོད་ལ་ཕྱག་འཚལ་ལོ། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཕྱོགས་བཅུའི་འགྲོ་ལ་མཁྱེན་བརྩེས་རབ་དགོངས་ནས། །ཕྱོགས་བཅུར་ཆོས་ཀྱི་འཁོར་ལོ་ལེགས་བསྐོར་ཏེ། །ཕྱོགས་བཅུའི་འགྲོ་བ་ཡོངས་སུ་སྐྱོབས་མཛད་པའི། །ཕྱོགས་བཅུའི་སངས་རྒྱས་རྣམས་ལ་ཕྱག་འཚལ་ལོ། །འཇམ་དབྱངས་ཕྱག་ན་རྡོ་རྗེ་སྤྱན་རས་གཟིགས། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་བྱམས་པ་ཀུན་ཏུ་བཟང་། །ཉེ་བའི་སྲས་ཆེན་བརྒྱད་ལ་ཕྱག་འཚལ་ལོ། །སྟོན་པའི་རྟགས་འཆང་ཉན་ཐོས་མཆོག །ལྷུང་བཟེད་མཁར་གསིལ་པུསྟི་འཛིན། །བསླབ་སྦྱང་ཡོན་ཏན་ཀུན་ལྡན་པའི། །ཉན་ཐོས་རྣམས་ལ་ཕྱག་འཚལ་ལོ། །བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱིས་གྲངས་སྙེད་ཀྱིས། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་བསྟོད་པར་བགྱི། ཅེས་པས་བསྟོད། །ཇི་སྙེད་སུ་དག་ཕྱོགས་བཅུའི་འཇིག་རྟེན་ན། སོགས་ནས། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། ཞེས་
པའི་བར་གྱིས་ཡ་ལག་བདུན་པ་འབུལ་ལོ། མདུན་བསྐྱེད་འདི་ལའང་འདྲ་མིན་འགའ་ཞིག་འཕེལ་འདུག་ཀྱང་འཁོན་གཞོན་ནུ་སངས་རྒྱས་ཀྱི་གཞུང་དུ་འདི་བཞིན་འབྱུང་བ་རྩ་བའི་ཡིག་ཆ་ཡིན་པར་མ་ཟད་ཤེར་སྙིང་གླེང་གཞི་དང་ཡང་མཐུན་པས་ཁུངས་ཆེ་ཞིང་། བདུད་ཟློག་ལས་ཚོགས་ལྟ་བུ་ཡིན་ཅིང་འདི་ཉིད་མདོ་སྒྲུབ་ཀྱི་དངོས་གཞི་ཤིན་ཏུ་གལ་ཆེ་བས་ཐོག་མར་བཟླས་སྒོམ་ནན་ཏན་དུ་བྱེད་པ་གལ་ཆེའོ། །ཆོས་སྲུང་གཏོར་འབུལ་སྤྲོ་ན་མདོར་བསྡུས་ཙམ་འདིར་སྦྱར་རོ། །གསུམ་པ་བདུད་ཟློག་གི་ཆོ་ག་ལས་བཅད་བཅུ་གཅིག་ཡོད་པའི་དང་པོ་བྱིན་གྱིས་བརླབས་པ་ནི། མདུན་གྱི་ཡས་གཟུགས་ལ་ཆབ་ཀྱིས་བྲན་ལ། །བདག་ཉིད་བཅོམ་ལྡན་ཤཱཀྱ་ཐུབ། ཕྱག་རྒྱའི་ཡི་གེ་ཨ་དཀར་ལས། །འོད་འཕྲོས་གཏོར་རྫས་དངོས་འཛིན་གྱི། །དྲི་མ་སྦྱངས་ནས་སྟོང་པར་གྱུར། ཐལ་མོ་ཁོང་སྟོད་སྦྱར་ལ། ཨོཾ་སྭཱ་བྷཱ་བཱ་ཤུདྡྷོ་སརྦ་དྷརྨ་སྭཱ་བྷཱ་བཱ་ཤུདྡྷོ྅ཧཾ། ལན་གསུམ་བཟླ་བཞིན་ཕྱག་རྒྱ་བཀྲོལ་ནས་སེ་གོལ་གཏོགས་པ་ཕྱི་མ་རྣམས་ལའང་འགྲེ། །ཆོས་ཉིད་རྣམ་དག་ཕྱག་རྒྱ་སྔགས། །ཏིང་འཛིན་བདེན་པས་གཏོར་རྫས་ཀྱི། །འབགས་བཙོག་ཉམས་གྲིབ་ཉེས་སྐྱོན་དང་། །མཚན་འཛིན་དྲི་མ་དག་གྱུར་ཅིག །བདག་ཉིད་བཅོམ་ལྡན་རྣམ་སྣང་མཛད། །ཕྱག་རྒྱའི་ཡི་གེ་ཁ་སྔོན་ལས། །འོད་འཕྲོས་གཏོར་རྫས་ཟད་མེད་མཛོད། །ནམ་མཁའི་ཁམས་ཀུན་ཁྱབ་
བར་གྱུར། ཐལ་མོ་སྦུབ་སྟོང་གི་སྦྱར་བའི་ཚིག་བར་པ་རྣམས་བཅག་པ་རིན་ཆེན་སྒྲོམ་བུའི་ཕྱག་རྒྱ་སྨིན་མཚམས་སུ་བསྐོར་ཞིང་། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་་ཨི་མཾ་ག་ག་ན་ཁཾ་སྭཱ་ཧཱ། །ནམ་མཁའ་མཛོད་ཀྱི་ཕྱག་རྒྱ་སྔགས། །ཏིང་འཛིན་བདེན་པས་གཏོར་རྫས་རྣམས། །བསྐལ་པའི་བར་དུ་ཟད་མི་ཤེས། །རྒྱ་ཆེ་ནམ་མཁའ་གང་གྱུར་ཅིག །བདག་ཉིད་བཅོམ་ལྡན་བདུད་རྩི་འཁྱིལ། །ཕྱག་རྒྱའི་ཡི་གེ་ཧྲཱིཿདམར་ལས། །འོད་འཕྲོས་གཏོར་རྫས་ཡེ་ཤེས་ཀྱི། །བདུད་རྩི་ཆེན་པོའི་རང་བཞིན་གྱུར། མཐེ་བོང་བསྣོལ། སོར་མོ་གཞན་རྣམས་གཤོག་པ་ལྟར་གདེངས་པ་ཁ་ཡི་ཐད་དུ་བཞག་ལ། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། །བདུད་རྩི་ཐབས་སྦྱོར་ཕྱག་རྒྱ་སྔགས། །ཏིང་འཛིན་བདེན་པས་གཏོར་རྫས་རྣམས། །བདུད་རྩི་ཡེ་ཤེས་ལྔ་ཡི་དངོས། །འཆི་སོས་དུག་ལྔའི་སྨན་གྱུར་ཅིག །བདག་ཉིད་བཅོམ་ལྡན་རིན་ཆེན་འབྱུང་། །ཕྱག་རྒྱའི་ཡི་གེ་ཏྲཱྃ་སེར་ལས། །འོད་འཕྲོས་གཏོར་རྫས་འདོད་ཡོན་ལྔ། །སོ་སོའི་མོས་པ་ཇི་བཞིན་གྱུར། ལག་གཉིས་མཛུབ་མོ་བསྒྲེངས་བའི་ཁུ་ཚུར་གཡོན་སྙིང་གར་བཞག་ལ། གཡས་བརྐྱངས་ཏེ་རྫས་ལ་གཏོད་པའི་ཚུལ་བྱས་ལ། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། །རྒྱལ་ཆེན་ཤུག་ལྡན་ཕྱག་
རྒྱ་སྔགས། །ཏིང་འཛིན་བདེན་པས་གཏོར་རྫས་རྣམས། །དབང་པོའི་སྤྱོད་ཡུལ་ཚིམ་བྱེད་པའི། །འདོད་ཡོན་སྣ་ཚོགས་ཆར་འབེབས་ཤོག །བདག་ཉིད་བཅོམ་ལྡན་དོན་ཡོད་གྲུབ། །ཕྱག་རྒྱའི་ཡི་གེ་ཧ་ལྡང་ལས། །འོད་འཕྲོས་མཆོག་དམན་སྐལ་བ་བཞིན། །འཐབ་རྩོད་མེད་པར་ཐོབ་པར་ཤོག །ལག་གཡས་རྡོ་རྗེ་ཁུ་ཚུར་སྙིང་གར་བཅངས། གཡོན་པ་མཆོག་སྦྱིན་གྱི་ཕྱག་རྒྱས་སྣོད་འདེགས་པའི་ཚུལ་བྱས་ལ། ཨོཾ་ཛྙཱ་ན་ཨ་བཱ་ལོ་ཀི་ཏེ་ས་མནྟ་སྥ་ར་་རསྨི་བྷ་བ་ས་མ་ཡ་མ་ཧཱ་མ་ི་དུ་རུ་དུ་རུ་ཧྲི་ད་ཡ་ཛྭ་ལ་ནི་ཧཱུྃ། །ཡེ་ཤེས་སྐར་མདའི་ཕྱག་རྒྱ་སྔགས། །ཏིང་། གོ་ལྡོག་པའང་སྣང་། འཛིན་བདེན་པས་མགྲོན་རྣམས་ཀུན། །ཕམ་རྒྱལ་འཁྲུགས་རྩོད་མེད་པར་ཐོབ། །དགྱེས་ཤིང་རེ་བ་གང་གྱུར་ཅིག །བདག་ཉིད་བཅོམ་ལྡན་རྡོ་རྗེ་འཛིན། །ཕྱག་རྒྱའི་ཡི་གེ་ཛཿདམར་ལས། །འོད་འཕྲོས་མགྲོན་རྣམས་དབང་དུ་འདུས། །ཕྲིན་ལས་གང་འདོད་སྒྲུབ་པར་གྱུར། ལག་གཉིས་སོར་མོ་ནང་དུ་བསྣོལ་བའི་ཁུ་ཚུར་ངོས་མཐེ་བོང་གཉིས་གཤིབས་ཏེ་བརྐྱང་བ་སྤྱི་བོར་བསྐོར་ཏེ། ན་མཿས་མནྟ་བུདྡྷ་ནཱཾ་གྲ་ཧེ་ཤྭ་རི་པྲ་བྷ་ཛྱོ་ཏི་ནི་མ་ཧཱ་ས་མ་ཡ་སྭཱ་ཧཱ། །དབྱུང་དར་འཁོར་ལོའི་ཕྱག་རྒྱ་སྔགས། །ཏིང་འཛིན་བདེན་པས་མགྲོན་རིགས་ཀུན། །བདག་གི་དབང་འདུས་གང་བཅོལ་ལས། །སྒྲུབ་པའི་སྡོང་གྲོགས་མཛད་གྱུར་ཅིག །མཐར། ན་མོ་
བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །ལན་ཆགས་མགྲོན་རྣམས་བརྔན་པ་དང་། །སེམས་ཅན་འདོད་པས་ཚིམ་པ་དང་། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །འཇིག་རྟེན་ཁམས་འདི་མ་ལུས་པ། །ཐོགས་པ་མེད་པ་འབྱུང་གྱུར་ཅིག །ཅེས་འདུན་པའི་སྟོབས་ཀྱིས་ཀྱང་བྱིན་གྱིས་བརླབས་བོ། །གཉིས་པ་བསྐྱེད་ཅིང་སྤྱན་འདྲེན་པ་ནི། །རང་ཉིད་ཐུབ་དབང་ཤཱཀྱའི་རྒྱལ་པོར་གསལ། །མདུན་བསྐྱེད་རྒྱལ་བ་སྲས་བཅས་མཐའ་བསྐོར་གྱི། །ཤར་དུ་ལྷ་བདུད་དཀར་པོ་མེ་ཏོག་གཡས། །ལྷོ་རུ་ཉོན་བདུད་སེར་པོ་རལ་གྲི་གཡས། །ནུབ་ཏུ་ཕུང་བདུད་དམར་པོ་མདུ་དངར་གཡས། །བྱང་དུ་འཆི་བདུད་ནག་པོ་ཁྲམ་ཤིང་གཡས། །ཀུན་ཀྱང་ལག་གཡོན་ཞགས་ཐོག་བདུན་བདུན་རེ། །རང་མདོག་རྟ་ལ་ཞོན་ནས་གུས་པས་འཁོད། ཁལ་དང་ཁྱི་སོགས་རང་རང་གྲངས་མཉམ་ལ། །སོ་སོས་ཅི་འདོད་ཡོན་ཏན་ཆར་དུ་འབེབས། །གནོད་བྱེད་བགེགས་རིགས་ཀུན་གྱིས་བསྐོར་བར་གསལ། །བདག་གི་ཐུགས་ཀའི་འོད་ཀྱིས་མདུན་བསྐྱེད་བསྐུལ། །དེ་ལས་ཁྲོ་ཆུང་དཔག་མེད་འཕྲོས་པ་ཡིས། །བགེགས་རིགས་ལན་ཆགས་མགྲོན་རྣམས་བཀུག་པར་གྱུར། །ཧཱུྃ་
འཇིགས་པའི་ཧཱུྃ་སྒྲ་ངེས་སྒྲོགས་ཤིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་ལོ། །དཀོན་མཆོག་བདེན་པའི་བྱིན་བརླབས་ཀྱིས། །བར་སྣང་ཁམས་ཀྱང་འགུགས་བྱེད་ན། །ལུས་ཅན་རྣམས་ལ་སྨོས་ཅི་དགོས། །སེམས་མེད་པ་ཡང་འགུགས་བྱེད་ན། །སེམས་དང་ལྡན་པ་སྨོས་ཅི་དགོས། །འདིར་ནི་གནོད་བྱེད་འགུག་ཏུ་གསོལ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བདེན་པ་དང་། སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། གསང་སྔགས་དང་རིག་སྔགས་དང་གཟུངས་སྔགས་རྣམས་ཀྱི་བདེན་པ་དང་བདེན་པ་ཆེན་པོའི་མཐུས། བདུད་བཞི་བདུད་ཀྱི་དམགས་ཚོགས་རྣམས་སྐད་ཅིག་གིས་གཟུགས་བརྙན་འདིར་མཆིས་པར་གྱུར་ཅིག །ཊ་ཀི་ཧཱུྃ་ཛཿ ཞེས་བདེན་སྟོབས་ལན་གསུམ་བརྗོད་ལ། ཀྱེ། །ལྷ་བུའི་བདུད་ནི་དཀར་པོ་སྟེ། །སེམས་ཅན་ཆོས་སྤངས་ལས་བྱེད་པ། །ཅི་ཡང་མེད་པའི་གནས་སུ་ནི། །ལྷ་བདུད་དཔུང་དང་སྤྲུལ་པ་བཅས། །གདན་བཤམས་རང་གཟུགས་དམ་པ་འདིར། །སྔགས་འཆང་བདག་གིས་སྤྱན་འདྲེན་ན། །ཐང་ཅིག་ཡུད་ཙམ་འདིར་གཤེགས་ལ། །རང་གཟུགས་འདི་ལ་
བཞུགས་སུ་གསོལ། ཛཿཧཱུྃ་བྃ་ཧོཿགཉིས་མེད་ཐིམ། ཀྱེ། །ཉོན་མོངས་བདུད་ནི་སེར་པོ་སྟེ། །སེམས་ཅན་ཉོན་མོངས་འཁོར་བར་འཁྱམས། །ཡོད་མིན་མེད་མིན་གནས་སུ་ནི། །ཉོན་མོངས་བདུད་ཀྱི་དམག་ཚོགས་རྣམས། །སེམས་ཅན་ཉོན་མོངས་བསལ་བའི་ཕྱིར། །སྔགས་འཆང་བདག་གིས་སྤྱན་འདྲེན་ན། །ཐད་ཅིག་ཡུད་ཙམ་འདིར་གཤེགས་ལ། །རང་གཟུགས་འདི་ལ་བཞུགས་སུ་གསོལ། །ཛཿཧཱུྃ་བྃ་ཧོཿགཉིས་མེད་ཐིམ། ཀྱེ། ཕུང་པོའི་བདུད་ནི་དམར་པོ་སྟེ། །སེམས་ཅན་འདུས་པ་བཞི་ལས་བྱུང་། །ལུས་དང་གྲིབ་ལྟར་ལྷན་ཅིག་སྐྱེས། །རྣམ་ཤེས་མཐའ་ཡས་གནས་ནས་ནི། །ཕུང་པོའི་བདུད་ཀྱི་དམག་ཚོགས་རྣམས། །སྔགས་འཆང་བདག་གིས་སྤྱན་འདྲེན་ན། །ཐང་ཅིག་ཡུད་ཙམ་འདིར་གཤེགས་ལ། །རང་གཟུགས་འདི་ལ་བཞུགས་སུ་གསོལ། །ཛཿཧཱུྃ་བྃ་ཧོཿགཉིས་མེད་ཐིམ། ཀྱེ། །འཆི་བདག་བདུད་ནི་ནག་པོ་སྟེ། །སེམས་ཅན་འཆི་བའི་ལས་བྱེད་པ། །ནམ་མཁའ་མཐའ་ཡས་གནས་ནས་ནི། །འཆི་བདག་ནག་པོའི་བདུད་ཀྱི་ཚོགས། །དཔུང་དང་གཡོག་འཁོར་བཅས་པ་རྣམས། །སྔགས་འཆང་བདག་གིས་སྤྱན་འདྲེན་ན། །ཐང་ཅིག་ཡུད་ཙམ་འདིར་གཤེགས་ལ། །རང་གཟུགས་འདི་ལ་བཞུགས་སུ་གསོལ། །ཛཿཧཱུྃ་བྃ་ཧོཿགཉིས་མེད་
ཐིམ། གསུམ་པ་བཞུགས་སུ་གསོལ་བ་ནི། །བདུད་བཞི་བདུད་ཀྱི་དམག་ཚོགས་རྣམས། །ཡོན་བདག་བདུད་བཞི་བསལ་བའི་ཕྱིར། །མཆོད་བསྟོད་བགྱིད་སླད་དེ་སྲིད་བཞུགས། །དེ་རིང་ཡོན་བདག་འདི་དག་གི། མཆོད་པ་དམ་པ་འདི་བཞེས་ལ། །བདུད་བཞི་གཡོས་པ་བསྒྱུར་དུ་གསོལ། བཞི་པ་བདུད་ཟློག་དངོས་ནི། སྤྱིར་གཞུང་གི་དགོང་པ་ལྟར་ན་དགེ་སློང་བཞི་སྡེ་འཚོགས་པའི་ཚེ། སློབ་དཔོན་གྱིས་འབྲུ་གསུམ་དང་སམྦ་རས་བསྔོས་པའི་ཚེ། དགེ་སློང་གཞན་གསུམ་གྱིས་ཤེར་སྙིང་དང་ཟློག་པ་ཚར་གསུམ་རེ་བཏོན་པས་དགུ་ཟློག་ཏུ་འགྲོ། མཐར་འདོད་གསོལ་སློབ་དཔོན་གྱི་བྱ་བ་ཡིན་ཀྱང་། ད་ལྟའི་ལག་ལེན་ལྟར་ན་སློབ་དཔོན་མང་ཉུང་དུ་ཡོད་ཀྱང་འདོན་བྱ་ཐམས་ཅད་མཉམ་དུ་བྱེད་པ་ཡིན་པས། ཐོག་མར་ཤར་གྱི་གྲལ་འགོ་ནས་བདུད་རྐྱ་མི་གཅིག །ཁལ། ཁྱི། ཆང་བུ། ཐེབས་ཀྱུ། ཤ་དུམ། ཟན་ཆང་བཅས་ཐེབ་ནང་དུ་བཤམ། འབྲུ་སྣ་བཏབ། ཆུ་གཙང་གིས་བྲན་ལ། ཨོཾ་ཨཱཿཧཱུྃ། ལན་གསུམ། གཏོར་གླུད་འདོད་པའི་ཡོན་ཏན་ལྔ་དང་ལྡན་པར་གྱུར། །དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ༴ །དེ་བཞིན་གཤེགས་པ་འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སམྦྷ་ར་སམྦྷ་
ར་ཧཱུྃ། སྔགས་ལན་བདུན་ནམ་གསུམ། འདི་སྐད་བདག་གིས་ཐོས་པ་དུས་ཅིག་ན། ཞེས་པ་ནས་བཟུང་སྟེ། མངོན་པར་བསྟོད་དོ། །ཞེས་པའི་བར་ཤེས་རབ་སྙིང་པོ་ཚར་གསུམ་དང་སྙིང་པོ་ཅི་རིགས་བཟླས་ལ། མཆོད་སྦྱིན་གྱི་གཏོར་མ་གཟུགས་སྒྲ་དྲི་རོ་རེག་བྱ་འདོད་པའི་ཡོན་ཏན་ལྔ་དང་ལྡན་པ་འདི་ཉིད་ལྷའི་བུའི་བདུད་ཀྱི་དམག་ཚོགས་རྣམ་ལ་འབུལ་ལོ། །རང་རང་སོ་སོའི་བསམ་པ་དང་མཐུན་པའི་ལོངས་སྤྱོད་ཟད་མི་ཤེས་པ་འབྱུང་བར་གྱུར་ཅིག །ཐམས་ཅད་མཉེས་ཤིང་ཚིམ་ནས་བདུད་བཞིའི་གནོད་པ་ཐམས་ཅད་བསྒྱུར་དུ་གསོལ། ཅེས་རོལ་མོ་དང་བཅས་ཏེ་ཐེང་ནང་དུ་བཤམས་པའི་གླུད་ཡས་རྣམས་མར་གཞི་ནག་པོའི་སྟེང་དུ་ཁ་ཕྱིར་བསྒྱུར་ཏེ་བཞག །ཐལ་མོ་སྦྱར་ཏེ། ན་མོ་བླ་མ་ལ་ཕྱག་འཚལ་ལོ། སངས་རྒྱས་ལ༴ ཆོས་ལ༴ དགེ་འདུན་ལ༴ ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །ཇི་ལྟར་སྔོན་ལྷའི་དབང་པོ་བརྒྱ་བྱིན་གྱིས་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཟབ་མོ་ཡིད་ལ་བསམ་ཞིང་ཚིག་ཁ་ཏོན་དུ་བྱས་པའི་མཐུ་དང་ནུས་པ་ལ་བརྟེན་ནས། བདུད་སྡིག་ཅན་ལ་སོགས་པ་ཕྱིར་ཟློག་པ་དེ་བཞིན་དུ། སོགས་ཐལ་རྡེབ་དཀྱུས་བཞིན་བྱ། །ཐབས་དང་སྐྱོབས་དང་དག་པ་དང་། །ཐེག་ཆེན་ངེས་པར་འབྱུང་བ་ལ། །སེམས་ཅན་རྣམས་ནི་རབ་བསླུ་བའི། །
བདུད་ཀྱི་ལས་རྣམས་ཟློག་ཏུ་གསོལ། ཞེས་སྦྱར། དེས་ཚར་གཅིག་སོང་། དེས་འགྲེས་ཏེ་ཤར་ཕྱོགས་ཀྱི་གླུད་ཡས་བདུན་མ་རྫོགས་ཀྱི་བར་དུ་རེ་རེ་བཤམས་ལ། བྱིན་བརླབས་ནས་ཟློག་པའི་བར་བཤད་མ་ཐག་པ་ལྟར་ཆ་ཚང་བ་རེ་རེ་བྱས། གླུད་ཡས་རྣམས་ཀྱང་ཕྱོགས་སོ་སོར་གྲལ་ཐབས་སུ་བསྒྲིག་གོ། །ཡང་དམིགས་བསལ་གྱི་ཟློག་པའི་ཁ་བསྒྱུར་ནི། ཡན་ཆད་འདྲ་ལ། བདག་གིས་ཀྱང་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མའི་དོན་ཟབ་མོ་ཡིད་ལ་བསམ་ཞིང་ཚིག་ཁ་ཏོན་དུ་བྱས་པའི་མཐུ་དང་ནུས་པ་ལ་བརྟེན་ནས། ནད་པ་ཡིན་ན་མིང་ནས་བརྗོད་ལ་མིང་འདི་ཞེས་བྱ་བའི། དང་པོ་ནད་ཀྱི་སྣ་འདྲེན་པ། བར་དུ་གདོན་གྱི་ཚང་བཅའ་བ། ཐ་མ་ནད་ལ་མི་ཕན་པར་བྱེད་པའི་གདོན་བགེགས་ཀྱི་རིགས་གང་ཡིན་པ་དེ་དག་ཐམས་ཅད་ཤེས་རབ་སྙིང་པོའི་བདུད་ཟློག་བགྱིས་པ་འདི་དང་། འཕགས་པ་དཀོན་མཆོག་གསུམ་གྱི་བཀའ་ཡི་བདེན་པས་ད་ལྟ་ཉིད་དུ་ཕྱིར་ཟློག་པར་གྱུར་ཅིག །ཞི་བར་གྱུར་ཅིག །རབ་ཏུ་ཞི་བར་གྱུར་ཅིག །ཅེས་དང་། །སེམས་ཅན་ནད་པ་ཇི་སྙེད་པ། །མྱུར་དུ་ནད་ལས་ཐར་བར་ཤོག །འགྲོ་བའི་ནད་རྣམས་མ་ལུས་པ། །རྟག་ཏུ་འབྱུང་བ་མེད་པར་ཤོག །ཅེས་བརྗོད། ཐན་ལྟས་ལ། །མཐུ་དང་ནུས་པ་ལ་བརྟེན་ནས། ཉིན་གྱི་ལྟས་ངན་པ། །མཚན་
གྱི་རྨི་ལམ་ངན་པ། ཁྱད་པར་དུ་ཐན་ལྟས་འདི། ཞེས་བྱ་བ། འཕགས་པ་དཀོན་མཆོག་གསུམ་གྱི་བཀའ་ཡི་བདེན་པས་ད་ལྟ་ཉིད་དུ་ཕྱིར་ཟློག་པར་གྱུར་ཅིག །ཞི་བར་གྱུར་ཅིག །རབ་ཏུ་ཞི་བར་གྱུར་ཅིག །ཅེས་དང་། སྨོན་ལམ། །དུས་མིན་འཆི་བར་གྱུར་པ་སྣ་ཚོག་དང་། །རྨི་ལམ་ངན་དང་མཚན་མ་ངན་པ་དང་། །འཇིགས་པ་བརྒྱད་སོགས་ཉེ་བར་འཚེ་བ་རྣམས། །མྱུར་དུ་ཞི་ཞིང་མེད་པར་མཛད་དུ་གསོལ། ཅེས་བརྗོད། བྱད་ཟློག་ནི། མཐུ་དང་ནུས་པ་བརྟེན་ནས། བྱད་ཁ་ཕུར་ཁ་ཐུན་ཟོར་མནན་གཏད་སྦྱོར་ངན་ཕུང་སེལ་སྡེབ་གཤོར་རླུང་འཁོར་ལ་སོགས་པ་ཕས་རྒོལ་བྱད་མའི་རིག་སྔགས་རྦོད་གཏོང་གི་སྦྱོར་བ་ཐམས་ཅད་འཕགས་པ་དཀོན་མཆོག་གསུམ་གྱི་བཀའ་ཡི་བདེན་པས་ད་ལྟ་ཉིད་དུ་ཕྱིར་ཟློག་པར་གྱུར་ཅིག །ཞི་བར་གྱུར་ཅིག །རབ་ཏུ་ཞི་བར་གྱུར་ཅིག །ཅེས་དང་། །རྫོགས་པའི་བྱང་ཆུབ་བསྒྲུབ་པ་ལ། །ཕྱི་དང་ནང་དུ་འཚེ་བ་ཡི། །བར་དུ་གཅོད་པ་ཐམས་ཅད་ཀུན། །ཉེ་བར་ཞི་བར་མཛད་དུ་གསོལ། །ཅེས་བརྗོད། བསྟན་དགྲ་སོགས་ལ་མཐུ་བྱེད་ན། ནུས་པ་ལ་བརྟེན་ནས། །བདག་ལ་སྡང་བའི་དགྲ་བོ་འདི། །དཀོན་མཆོག་གསུམ་གྱི་བཀའ་ཡི་བདེན་པས་ད་ལྟ་ཉིད་དུ་ཁུག་ཅིག །སྒྲོལ་ཅིག །ཤ་ཁྲག་སྣང་སྲིད་ལྷ་འདྲེས་ཟོ་
ཞིག །རྣམ་ཤེས་ཆོས་ཀྱི་དབྱིངས་སུ་དྲོངས་ཤིག །དཀོན་མཆོག་བདེན་པའི་དམོད་པ་ཡིས། །དགྲ་བགེགས་བྱད་མ་ཐམས་ཅད་ཀྱིས། །ལུས་ངག་ཐལ་བའི་རྡུལ་དུ་རློག །རྣམ་ཤེས་ཆོས་ཀྱི་དབྱིངས་སུ་སྤོར། ཅེས་བརྗོད་དོ། །དེ་དག་གིས་མཚོན་ཏེ། ནད་ཡམས། ལོ་ཉེས། དམག་འཁྲུགས། རྨི་ལམ་ངན་པ། གདོན་ཆེན། མི་ཁ། གྱོད་དང་གོད་ཁ་སོགས་གང་ལའང་ཟློག་པ་དང་སྨོན་ལམ་གྱི་ཁ་སྒྱུར་རེགས་པས་འཕྲུལ་ཤེས་པར་བྱའོ། །ཕྱོགས་གཞན་རྣམས་ལའང་དེས་འགྲེས་ཏེ། ལྷོར་ཉོན་མོང་པའི་བདུད། ནུབ་ཏུ་ཕུང་པོའི་བདུད། བྱང་དུ་འཆི་བདག་གི་བདུད་ཀྱི་དམག་ཚོགས་ཞེས་ཚིག་ཁ་བསྒྱུར་བ་ཙམ་ལས་གཞན་ཤར་དང་འདྲ་བར་ཕྱོགས་རེ་ནས་བདུན་རེ་མ་རྫོགས་པར་བཏུད། མདོ་འདོན་པའི་ཚེ། དབང་པོ་རབ་ཀྱིས་ཆོས་ཐམས་ཅད་ངོ་བོ་ཉིད་མེད་པ། སྤྲོས་པའི་མཐའ་ཐམས་ཅད་དང་བྲལ་བ་བརྗོད་དུ་མེད་པའི་རང་བཞིན་གྱི་ངོ་བོར་བསམ་ལ། དེའི་ངང་ནས་མ་གཡོས་བཞིན་དུ་མདོ་འདོན་པར་བྱའོ། །དབང་པོ་འབྲིང་གིས་བརྗོད་པ་དང་བྲལ་བའི་དོན་དེ་ཡང་སྔོན་དུ་དྲན་པར་བྱས་ལ། མདོ་ཟློག་པའི་བྱ་བ་ཐམས་ཅད་རྨི་ལམ་སྒྱུ་མ་ལྟ་བུའི་ངང་ནས་བྱའོ། །དབང་པོ་ཐ་མས་སྔོན་དུ་བརྗོད་བྲལ་དང་རྨི་ལམ་སྒྱུ་མ་དྲན་པར་བྱས་ལ། ཚིག་ཏུ་འདོན་པའི་སྒྲ་ལ་སེམས་གཏད་དེ་མ་ཡེངས་པར་བྱས་ལ། མཐོང་ཐོས་ལ་སོགས་པ་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་སྙམས་དུ་ཤེས་པར་བྱས་ལ་མདོ་འདོན་པར་གསུངས་སོ། །
ལྔ་པ་གཏོར་མ་བསྔོ་བ་ནི། ཤར་གྱི་ལྷ་བཤོས་ཆབ་ཀྱིས་བྲན་ལ། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས་ནས་སམྦྷ་རའི་སྔགས་ལན་བདུན་གྱིས་བསྔོ། དེ་བཞིན་གཤེགས་པ་བཞིའི་མཚན་བརྗོད་ཅིང་ཕྱག་འཚལ་བའི་མཐར། ཞལ་ཟས་རོ་བརྒྱ་ནུས་པ་སྟོང་དང་ལྡན་པ་འདི་ཉིད་ལྷའི་བུའི་བདུད་ཀྱི་དམག་ཚོགས་རྣམས་ལ་འབུལ་ལོ། །རང་རང་སོ་སོའི་བསམ་པ་དང་མཐུན་པའི་ལོངས་སྤྱོད་ཟད་མི་ཤེས་པ་འབྱུང་བར་གྱུར་ཅིག །ཐམས་ཅད་མཉེས་ཤིང་ཚིམས་ནས་བདུད་བཞི་གཡོས་བའི་གནོད་པ་ཐམས་ཅད་བསྒྱུར་དུ་གསོལ། ཞེས་བརྗོད་ཅིང་འོག་གཞིའི་ལྷའི་བུའི་བདུད་རྣམས་ཀྱི་མདུན་དུ་ཞལ་ཟས་ཕུལ་ནས། །ཐམས་ཅད་ནམ་མཁའི་མཛོད་བཞིན་དུ། །ལོངས་སྤྱོད་ཟད་པ་མེད་པ་དང་། །རྩོད་པ་མེད་ཅིང་འཚེ་མེད་པ། །རང་དབང་དུ་ནི་སྦྱོང་བར་ཤོག །བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །བདུད་བཞི་རྣམས་ལ་མཆོད་པ་དང་། །སེམས་ཅན་རྣམས་ལ་ཕན་གདགས་སླད། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །ཐོག་པ་མེད་པར་འབྱུང་གྱུར་ཅིག །ཅེས་བདེན་སྟོབས་ཀྱིས་བསྔོའོ། །དེ་བཞིན་དུ་ལྷོའི་གཏོར་མ་མེ་ཏོག་དབྱིབས་ཅན་བྲན་ལ་འབྲུ་གསུམ་གྱིས་བྱིན་བརླབས་དང་། །སམྦྷ་རའི་སྔགས་ལན་བདུན། མཚན་བཞི་བརྗོད་ལ། གཏོར་མ་མེ་ཏོག་དབྱིབས་
ཅན་རོ་བརྒྱ་ནུས་པ་སྟོང་དང་ལྡན་པ་འདི་ཉིད་ཉོན་མོངས་པའི་བདུད་ཀྱི་དམག་ཚོགས་རྣམས་ལ་འབུལ་ལོ། །རང་རང་སོ་སོའི་ནས། བདེན་སྟོབས་བརྗོད་པ་ཡན་གོང་ལྟར་བྱས་ལ་གཏོར་མ་ཏོན་བདུད་ཀྱི་མདུན་ཏུ་ཕུལ། ནུབ་ཀྱི་དཀར་གཏོར་བྲན་ལ་བྱིན་བརླབས་སོགས་གོང་ལྟར་བྱ། དཀར་གཏོར་རོ་བརྒྱ་ནུས་པ་སྟོང་དང་ལྡན་པ་འདི་ཉིད་ཕུང་པོའི་བདུད་ཀྱི་དམག་ཚོགས་རྣམས་ལ་འབུལ་ལོ། །རང་རང་སོ་སོའི་སོགས། གོང་ལྟར་ལ་གཏོར་མ་ཕུང་པོའི་བདུད་རྣམས་ཀྱི་མདུན་དུ་ཕུལ། བྱང་གི་དམར་གཏོར་བྲན་ལ་བྱིན་བརླབས་སོགས་དང་། དམར་གཏོར་རོ་བརྒྱ་ནུས་པ་སྟོང་དང་ལྡན་པ་འདི་ཉིད་འཆི་བདག་གི་བདུད་ཀྱི་དམག་ཚོགས་རྣམས་ལ་འབུལ་ལོ། །རང་རང་སོ་སོའི་སོགས་གོང་ལྟར་ལ་གཏོར་མ་འཆི་བདུད་མདུན་དུ་འབུལ་ལོ། དྲུག་པ་གླུད་བསྔོ་ནི། ངར་མིའི་སྟེང་དུ་ནད་པ་སོགས་ཁྲུས་བྱས་པའི་ཆུ་བླུག་ལ་ཆབ་ཀྱིས་བྲན། ཨོཾ་ཨཱཿཧཱུྃ། གིས་བྱིན་གྱིས་བརླབས་ལ། སམྦྷ་རའི་སྔགས་བདུན་དང་། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །བཞིའི་མཚན་བརྗོད་མཐར། ཧཱུྃ། དར་མི་ཕོ་མོ་མཛེས་པ་འདི། །དེ་རིང་ཡོན་གྱི་བདག་པོའི་གླུད། །རྒྱུ་ནི་རིན་ཆེན་ལྔ་ལས་གྲུབ། །དར་ཚོན་རྣམས་ཀྱི་ཆས་ཀྱིས་བརྒྱན། །རྒྱན་ཆ་དེ་ནི་ལྷུབས་སེ་ལྷུབ་ཁ་རུ་དེ་ནི་གཡུ་ཡང་བཅུག །ལག་ཏུ་དེ་ནི་གསེར་བསྐུར་རོ། །བདུད་བཞི་རྣམས་ཀྱི་ཕྱག་ཏུ་ཕུལ། །ལ་འཕྲད་དེ་ནི་ལ་རུ་ཟློག །ལུང་འཕྲད་དེ་ནི་ལུང་དུ་ཟློག །སྨྲ་མཁས་དེ་ནི་ས་ལ་ལ། །འགྲོ་མཁས་
དེ་ནི་ལྡེམས་སེ་ལྡེམ། །མགོ་ལ་ཐོད་བཅིང་བཀྲག་རེ་ཆེ། །ལུས་བཟང་དེ་ནི་རྒྱན་གྱིས་བརྒྱན། །མིང་བཟང་དེ་ནི་སྟོབས་ཆེ་ལ། །བཟུང་བའི་ཡུལ་ནི་མ་མཆིས་སོ། །ཡོན་གྱི་བདག་པོ་བསླུ་བའི་ཕྱིར། །དེ་རིང་བདག་གིས་འདི་བཏང་བས། །གླུད་བདག་ཆེན་པོས་གླུད་བཞེས་ཤིག །རྣམ་ཤེས་ཚོགས་བརྒྱད་འབྱུང་བ་ལྔ། །རྟེན་ཅིང་འབྲེལ་བར་འབྱུང་བའི་གླུད། ཁམས་དང་སྐྱེ་མཆེད་རྣམས་ཀྱི་གླུད། །དབང་པོ་ཚོགས་དྲུག་རྣམས་ཀྱི་གླུད། །འབྲུ་མཆོག་ངར་གྱི་མི་བོ་ཆེ། །རིན་ཆེན་སྣ་ལྔའི་ན་བཟའ་ཅན། །འཁོར་བའི་གཡུལ་ཟློག་དར་མདུད་གཡས། །གཡོན་ན་ཐར་དགུ་ལམས་སེ་ལམ། །རྐང་པ་གཡས་པ་ཐབས་ཆེན་ལྕགས། །རྐང་པ་གཡོན་པ་ཤེས་རབས་ཟངས། །དེ་འདྲའི་འབྲུ་མཆོག་མི་བོ་ཆེ། །བདུད་བཞིའི་དམག་ཚོགས་འཁོར་བཅས་ལ། །ཡོན་བདག་འདི་ཡི་གླུད་དུ་འབུལ། །མི་བས་གླུད་ཀྱིས་བཟང་བས་ན། །བདུད་བཞིའི་དམག་ཚོགས་ཐམས་ཅད་ཀྱིས། །གླུད་བཟང་མཛེས་པ་འདི་ཁྱེར་ལ། །ད་ནི་རང་རང་གནས་སུ་སོང་། །དཀོན་མཆོག་གསུམ་གྱི་བཀའ་མ་བཅག །ལྷ་དབང་བརྒྱ་བྱིན་གྱིས་བསྐུལ་བས། །བཅོམ་ལྡན་ཤཱཀྱ་ཐུབ་པ་ཡིས། །བདུད་བཞི་བཀུག་ནས་ཡས་གླུད་བྱིན། །བཀའ་བསྒོས་དམ་བཞག་མཛད་པ་ཡི། །དམ་ཚིག་དེ་ཉིད་དྲན་གྱིས་ལ། །འཁོར་འདིར་གནོད་པ་མ་བྱེད་ཅིག །བདུད་རྣམས་རང་རང་གནས་སུ་སོང་། །བདུད་ཁ་གླུད་ཀྱིས་
ཆོད་པར་གྱིས། །བདུད་བཞི་གཡོས་པ་ཞི་གྱུར་ཅིགཐམས་ཅད་ནམ་མཁའ་མཛོད་བཞིན་དུ། སོགས་ནས། །བདག་གི་བསམ་པའི་སྟོབས་དང་ནི། སོགས་ཀྱིས་བསྔོས་ལ་ངར་མི་བདུད་བཞིའི་དབུས་སུ་སྟེགས་བུའི་སྟེང་དུ་ཁ་ཕྱིར་བསྒྱུར་ལ་བཞག །སྐབས་འདིར་ནད་པ་ཡོད་ན་ནད་སྤོ་བའི་ཕྱག་ལེན་ཡོད་པར་བཤད་དོ། །བདུན་པ་བཀའ་བསྒོ་བ་ནི། ཧཱུྃ། །ང་ནི་བཅོམ་ལྡན་ཤཱཀྱ་ཐུབ། །ང་ནི་དཔལ་ཆེན་གསང་བའི་བདག །ང་ནི་སྔགས་འཆང་སྒྲུབ་པ་པོ། །ང་ནི་བདུད་བགེགས་གཉེན་པོ་སྟེ། །བདུད་ཆེན་དང་ནི་ལྷ་དང་ཀླུ། །འབྱུང་པོ་ཡི་དྭགས་ཤ་ཟ་དང་། །ནད་བདག་མ་མོ་ལ་སོགས་པ། །ང་ཡི་བཀའ་ལས་མ་འདའ་ཞིག །ངར་གླུད་གཏོར་མ་འདི་བཞེས་ལ། །བདག་དང་རྒྱུ་སྦྱོར་ཡོན་བདག་གི། །ནད་གདོན་བར་ཆད་ཞི་བར་མཛོད། །བཟུང་པ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །བཅོལ་བའི་ཕྲིན་ལས་མ་བསྒྲུབས་ན། །སྔོན་གྱི་བདེ་གཤེགས་ཆད་པ་ཡིས། །སེམས་ཅན་དམྱལ་བ་རྣམས་སུ་ཡང་། །ཡང་ནས་ཡང་དུ་སྐྱེ་འགྱུར་ཞིང་། །ཤིན་ཏུ་ཡ་ངའི་སྡུག་བསྔལ་མྱོང་། །དེ་བས་གནོད་པ་མ་བྱེད་པར། །བདུད་བཞི་རང་རང་གནས་སུ་ཆོས། །བདེན་ཅིང་བསླུ་མེད་སངས་རྒྱས་བཀའ། །དེ་བཞིན་སྒྲུབས་དང་བདེ་བ་ཐོབ། །བདག་དང་རྒྱུ་སྦྱོར་ཡོན་བདག་རྣམས། །བདུད་ཆེན་བཞི་ལས་ཐར་བ་དང་། །བར་ཆད་ནད་གདོན་མྱུར་ཞི་ནས། །བསམ་པའི་དོན་
རྣམས་འགྲུབ་པར་མཛོད། བརྒྱད་པ་བརྗོད་འདེབས་དང་གཤེགས་གསོལ་ནི། འབྲུ་སྣ་ཚོགས་བཏབ་ལ། ཀྱེ། བདུད་ཀྱི་དམག་ཚོགས་ཁྱོད་རྣམས་ཀྱིས། །ཇི་ལྟར་བསྒོས་བཞིན་བྱས་ནས་ནི། །སྐྱེ་མཆེད་མུ་བཞིའི་གནས་སུ་དེངས། །ལྷ་བུའི་བདུད་ནི་དཀར་པོ་ཁྱོད། །ཅི་ཡང་མེད་པའི་གནས་སུ་དེངས། །ཉོན་མོངས་བདུད་ནི་སེར་པོ་ཁྱོད། །རྣམ་ཤེས་མཐའ་ཡས་གནས་སུ་དེངས། །ཕུང་པོའི་བདུད་ནི་དམར་པོ་ཁྱོད། །ཡོད་མིན་མེད་མིན་གནས་སུ་དེངས། །འཆི་བདག་བདུད་ནི་ནག་པོའི་ཚོགས། །ནམ་མཁའ་མཐའ་ཡས་གནས་སུ་དེངས། །ཤེས་སྒྲིབས་ཉོན་མོངས་ལས་བྱུང་བའི། །ལྷ་ཡི་བདུད་དང་ཉོན་མོངས་བདུད། །ཕུང་པོའི་བདུད་དང་འཆི་བདག་བདུད། །བདུད་བཞིའི་བདུད་ཀྱི་དམག་ཚོགས་རྣམས། །མཆོད་སྦྱིན་གཏོར་མ་འདི་བཞེས་ལ། །རྒྱུ་སྦྱོར་ཡོན་བདག་འདི་དག་ལ། །བཟུང་བ་ཐོང་ལ་མནན་པ་ཁྱོག །བདུད་ཆེན་མི་ལ་མ་འབེབས་ཤིག །སྐྱེ་མཆེད་མུ་བཞིའི་གནས་སུ་དེངས། །རང་རང་མཛེས་པའི་ཕོ་བྲང་དུ། །བདེ་བའི་སེམས་དང་ལྡན་པར་མཛོད། །འཁོར་འདིར་གནོད་པ་མ་བྱེད་ཅིག །རང་རང་གནས་སུ་བདེ་བར་གཤེགས། །ས་མ་པྲ་བཱེ་ཤ་ཡ་ཕཊ། ཅེས་བརྗོད་ལ། བདུད་བཞི་འཁོར་བཅས་བྱམས་པ་དང་མགུ་བའི་སེམས་ཀྱིས་རང་གནས་སུ་སོང་བར་བསམས་ལ། ཕུལ་ཕྱོགས་སུ་ཕྱིར་ཅུང་ཟད་ཁྱེར་དུ་བཅོལ་ནས་ཁ་ཕྱིར་བསྟན་ལ་བཞག །ཕུལ་ཕྱོགས་ནི་ནད་པའི་དོན་དུ་བྱེད་ན་དུར་ཆེན་ཐོག་ཏུ་ཕུལ། དེ་བཞིན་སྤར་ཁའི་
བཅོས་ཡིན་ན་བཞི་གཤེད་བདུན་ཟུར་དགྲ་ཐོག་གང་གནོད་ཕྱོགས་སུ་ཕུལ། བདེ་རིམ་ཡིན་ན་ལམ་མདོའམ་ཡས་ལམ་གང་བདེར་ཕུལ། མཐུ་ཟློག་བྱེད་ན་བྱད་མའི་ཕྱོགས་སུ་ཕུལ། མཐུ་བྱེད་ན་དགྲ་ཐོག་ཏུ། རྒྱལ་པོས་གནོད་ན་ལྷ་ཁང་ངམ་མཆོད་རྟེན་རྩར། འདྲེ་མོས་གནོད་ན་གྲོང་མདོའམ་ལུང་སུམ་མདོར། ཆར་འབོད་པའམ་ཀླུས་གནོད་ན་མཚོའམ་ཆུ་མིག་ཏུ་ཕུལ། ཡུལ་ལྷས་གནོད་ན་དེ་ཕྱོགས་སུ། མདོར་ན་གང་དང་གང་གནོད་དེར་བསྐྱལ་བར་གསུངས་སོ། །དགུ་པ་གསེར་སྐྱེམས་ནི། དཀར་གཏོར་གསེར་སྐྱེམས་འབྲུ་སྣ་བླུགས་པ་བཤམས་ལ་ཆབ་ཀྱིས་བྲན་ཏེ། ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་གྱིས་བྱིན་གྱིས་བརླབས། ཨ་ཀཱ་རོ་ལན་གསུམ་གྱིས་བསྔོས་ལ། ཧཱུྃ། །བཅོམ་ལྡན་ཤཱཀྱའི་རྒྱལ་པོ་དང་། །དཀོན་མཆོག་གསུམ་གྱི་བཀའ་བྱུང་གིས། །སྔགས་འཆང་བདག་གི་ངག་ལ་ཉོན། །སྟེང་འོག་ཕྱོགས་བཅུར་གནས་པ་ཡི། །སྣང་སྲིད་ལྷ་སྲིན་སྡེ་བརྒྱད་སོགས། །གཞི་བདག་ཡུལ་གྲོང་གཉུག་མར་བཅས། །ས་བདག་ཀླུ་གཉན་འཁོར་འབངས་བཅས། །འདོད་ཡོན་མཆོད་སྦྱིན་གཏོར་མ་དང་། །རིན་ཆེན་གསེར་སྐྱེམས་འདི་བཞེས་ལ། །ཕྲག་དོག་ཀོ་ལོང་མ་བསྡོམ་པར། །སྒོ་བ་རྣམས་ཀྱིས་སྒོ་ཕྱེས་ཤིག །འཕྲང་བ་རྣམས་ཀྱིས་འཕྲང་སོལ་ཅིག །ཁྱེད་རྣམས་གཡས་དང་གཡོན་དུ་བཟུང་། །དེ་རིང་གཏོར་ལམ་གཉན་པོ་ཕྱེས། །དེ་རིང་ཡས་ཀྱི་ལམ་ཕྱེས་ཤིག །རྣལ་འབྱོར་བདག་གི་མཐུ་དཔུང་མཛོད། །གཏོར་ལམ་ཕྱེས་
ལ་དམག་སྣ་དྲོངས། །རུ་ང་ཕྲག་དོག་མ་མཛད་ཅིག །བདག་གི་དཔུང་དང་གྲོགས་མཛོད་ཅིག །དམིགས་པའི་དགྲ་བགེགས་བྱད་མ་ཟློག །བཅོལ་བའི་ཕྲིན་ལས་གྲུབ་བར་མཛོད། །ཅེས་གསེར་སྐྱེམས་མཆོད་ཅིང་དཀར་གཏོར་མདོས་ཕུལ་ཕྱོགས་སུ་བསྐྱལ་ལོ། །བཅུ་པ་ཟློག་བསྒྱུར་ནི། ཡས་གླུད་རྣམས་ཁྱེར་མིའི་ལག་ཏུ་བཟུང་བཅོལ་ནས། བདུད་དང་མ་མོ་རྣམས་ཀྱི་གདུག་པ་ཟློག་བསྒྱུར་བྱ་བ་ནི། གདུག་པ་སྟོན་པ་འཁོར་གྱི་ཐུགས་རྗེས་ཟློག་པར་བསམས་ལ། བྷྱོ། མ་ཅིག་ཡམས་བདག་འཁོར་དང་བཅས། །ཁྱོད་ཀྱི་ལག་པ་གཡས་པ་ན། །བདུད་ཀྱི་ཁྲམ་བམ་རེ་རེ་ཡོད། །བདག་ཅག་ཡོན་མཆོད་འཁོར་བཅས་རྣམས། །གལ་སྟེ་ཁྲམ་ལ་བཏབ་སྲིད་ན། །ཁྲམ་ཁ་ཕྱིས་ཤིག་མ་ཅིག་མ། །ཁྱོད་ཀྱི་ལག་པ་གཡས་པ་ན། །བཙན་གྱི་ཤཱ་རྡེལ་དཀར་ནག་བཀྲམ། །བདག་དང་རྒྱུ་སྦྱོར་ཡོན་བདག་རྣམས། །གལ་ཏེ་རྩིས་ལ་བཅུག་པ་ན། །ཤྭ་རྡིའུ་དཀར་ནག་ད་ཕྱིས་ཤིག །ཁྱོད་ཀྱི་མཆན་ཁུང་གཡས་པ་ན། །གཤིན་རྗེའི་ཁྲམ་ཤིང་དམར་པོ་ཡོད། །བདག་དང་རྒྱུ་སྦྱོར་ཡོན་བདག་རྣམས། །གལ་ཏེ་ཁྲམ་ལ་བཏབ་པ་ན། །བྱང་དམར་དཀྱུས་ནས་ད་ཕྱུང་ཞིག །ཁྱོད་ཀྱི་མཆན་ཁུང་གཡོན་པ་ན། །ནད་ཀྱི་རྐྱལ་བ་ནག་པོ་ལ། །སྦྲུལ་ནག་ལྔ་བརྒྱའི་ཁ་ཆིངས་ཅན། །སྤྲུལ་པ་མང་པོ་དེ་ནས་འགྱེད། །སྤྲུལ་པའི་དམག་དཔུང་ད་ཕྱུང་ཞིག །ཡོན་
བདག་བསླུ་ཕྱིར་བདུད་ཟློག་འབུལ། །འབུལ་བ་བདག་གིས་མ་ནོར་ལ། །ལེན་པ་ཁྱོད་ཀྱིས་མ་ནོར་ཞིག །བཞེས་ཤིག་ཀུན་གྱི་དགྱེས་པར་རོལ། །བདག་དང་རྒྱུ་སྦྱོར་ཡོན་བདག་ལ། །བན་བོན་བྱད་ཁ་ད་ཟློག་ཅིག ། ཀླུ་གཉན་གཏད་ཁྲམ་ད་ཟློག་ཅིག །དགྲ་ཇག་ཆོམས་རྐུ་ནད་ཟློག་ཅིག །མི་ཁ་ངན་པ་ད་ཟློག་ཅིག །ནོར་ཕྱུགས་གོད་ཁ་ད་ཟློག་ཅིག །མི་ཡི་ཤི་འཕྲོ་ད་ཆོད་ཅིག །ཡམ་ནད་རིམ་ནད་ད་ཟློག་ཅིག །མ་ཉེས་ཁ་ཡོག་ད་ཟློག་ཅིག །མི་མཐུན་གནོད་པའི་ཚོགས་རྣམས་ཀུན། །ཤེས་རབ་སྙིང་པོའི་ཡས་ཟློག་འདིས། །ད་ལྟ་ཉིད་དུ་ཟློག་བསྒྱུར་ཅིག །ཤེས་རབ་ཟློག་བཅས་བྱིན་རླབས་ཀྱིས། །ས་ཆུ་མེ་རླུང་སྐག་ངན་ཟློག །ངར་གླུད་ཡས་སོགས་གཟུགས་འགྲོས་ཀྱིས། །ལྟས་ངན་རང་སར་ཞི་བར་མཛོད། །ནད་ཡམས་གོད་ཁ་ཟློག་ཏུ་གསོལ། །དེ་བཞིན་གང་ལ་གང་འཚེ་བ། །དཀོན་མཆོག་གསུམ་གྱི་ཐུགས་རྗེ་དང་། །ཤེས་རབ་སྙིང་པོའི་བྱིན་རླབས་དང་། །སྔགས་འཆང་བདག་གི་ནུས་མཐུ་ཡིས། །བདུད་བཞིའི་གནོད་པ་མ་ལུས་ཀུན། །སོ་སོ་རང་རང་གནས་སུ་ཟློག །ས་མ་ཡ། པྲ་བཱེ་ཤ་ཡ་ཕཊ། །དྲག་ཏུ་བརྗོད་ཅིང་རོལ་མོ་བྱས་ལ་ཕྱི་རོལ་དུ་སྐྱེལ་བཅོལ། དེའི་ཚེ་རྒྱས་པར་ཤེས་རབ་སྙིང་པོ་ཚར་གསུམ་དང་དགུ་ཟློག་བྱ། བསྡུ་ན་མདོ་ཚར་གཅིག་དང་། ཟློག་པ་ལན་གསུམ་བྱ། ཤིན་ཏུ་བསྡུ་ན་ག་ཏེ་ལན་གསུམ་བརྗོད་པའི་མཐར་ཟློག་པ་རེ་བྱ་བ་དེ་འདྲ་ལན་གསུམ།
སྤྱི་དང་བྱེ་བྲག་དམིགས་བསལ་གང་ཡིན་པའི་བདེན་སྟོབས་བརྗོད་མཐར་ཐལ་མོ་རྡེབ་བཅས་ཀྱི་ཚིགས་སུ་བཅད་པ་རྣམས་ཀྱང་སྔར་བཞིན་བྱ། དེའི་ཆ་རང་གི་ལག་གཉིས་ཉི་ཟླར་གསལ་བ་དང་། སངས་རྒྱས་དང་ཉན་ཐོས་རྣམས་ཀྱིས་ཆོས་གོས། བྱང་སེམས་རྣམས་ཀྱིས་ཐལ་མོ་བརྡབ། ཆོས་སྐྱོང་སྤྲུལ་པའི་དམག་དཔུང་དང་བཅས་པས་མཚོན་ཆའི་ཆར་ཕབས་པས་གནོད་བྱེད་ལ་དམིགས་པ་རྡུལ་དུ་རླག་པར་བསམ། མཐུ་བྱེད་པའམ། གལ་ཆེ་དུས་རི་ལ་ཕུལ་བ་ལ་རང་འགྲོ་ན། གོང་གི་མ་མོའི་ཟློག་པའི་མགོ་ནས་ཕྱིར་ཁྱེར་ལ་དེར་ཕྱིན་པ་དང་། གསེར་སྐྱེམས་གཏོར་ལ་མ་མོའི་ཟློག་པ་མན་ཆད་དང་། ཤེས་རབ་སྙིང་པོའི་ཟློག་པ་ལན་གསུམ་གྱི་བར་འདི་དེར་འདོན་ལ་འབུལ་ལོ། །གང་ལྟར་ཡང་ཟློག་པ་གྲུབ་འཕྲལ་རང་དང་བསྲུང་བྱ་མི་ནོར་འཁོར་བཅས་བཅོམ་ལྡན་འདས་ཀྱི་ཕྱག་གཡས་ས་གནོན་གྱི་འོག་ཏུ་ཚུད་པར་བསམས་ལ། ག་ཏེ་བཟླ་བའམ། ཅུང་ཟད་སྤྲོ་ན། །སྟོང་པའི་ངང་ལས་བྷྲཱུྃ་ཡིག་སེར་པོ་ནི། །ཡོངས་གྱུར་གསེར་གྱི་འཁོར་ལོ་རྩིབས་སྟོང་པ། །ཡངས་ཤིང་རྒྱ་ཆེ་ཕྱི་རོལ་གནམ་ས་ཁྱབ། །དེ་རྒྱབ་བདག་མདུན་ཐུགས་ལས་འོད་འཕྲོས་པས། །ཤེར་ཕྱིན་གླེགས་བམ་རལ་གྲི་རྡོ་རྗེ་ཡི། །གུར་ཁང་རིམ་གསུམ་ཡེ་ཤེས་མེ་དཔུང་འབར། །བསྐལ་པའི་རླུང་ཡང་ཐར་བ་མེད་པའི་ནང་། །བསྲུང་བྱ་ཐམས་ཅད་ཐུབ་པའི་སྐུ་རུ་གྱུར། །རྩིབས་ནང་སངས་རྒྱས་སྟོང་དང་གུར་ཁང་གི། །བར་རྣམས་སངས་རྒྱས་བྱེ་བ་དཔག་མེད་བཞུགས། །དེ་དག་ཀུན་དང་མདུན་བསྐྱེད་འཁོར་བཅས་ཀྱིས། །
སྐྱབས་སྦྱིན་ཕྱག་རྒྱས་བདག་འཁོར་སྲུང་བར་གྱུར། ཅེས་བསྒོམ་ལ། ཏདྱ་ཐཱ། ཨོཾ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་བདག་དང་བསྲུང་བྱ་ཐམས་ཅད་སྲུངས་ཤིག་རཀྵ་ཀུ་རུ་སྭཱ་ཧཱ། ཞེས་ཅི་ནུས་བཟླས་སོ་མཐར་གཟུང་འཛིན་གྱི་ཆོས་ཐམས་ཅད་མི་དམིགས་པར་སྟོང་ཉིད་ཀྱི་ལྟ་བའི་ཀློང་དུ་ཅི་གནས་སུ་བཞག་གོ། བཅུ་གཅིག་པ་ཤིས་བརྗོད་བྱ་བ་ནི། ནད་པ་གལ་ཆེན་ཡོད་ན་གོས་དཀར་པོ་གྱོན་ལ་སྟན་དཀར་པོའི་སྟེང་དུ་ཁ་ཤར་དུ་བལྟས་ལ་འདུག། རྒྱལ་བ་སྲས་དང་བཅས་པ་རྣམས་ཀྱིས་མེ་ཏོག་འཐོར་ཞིང་ཤིས་བརྗོད་མཛད་པར་མོས་ལ། རོལ་མོ་བསྒྲག་ཅིང་འབྲུ་འཐོར་ལ། ཧཱུྃ། །དབུས་ཀྱི་ཕྱོགས་ནས་བཀྲ་ཤིས་པ། །རྣམ་པར་སྣང་མཛད་བཀྲ་ཤིས་ལགས། །སྐུ་ལུས་བཟང་པོའི་བཀྲ་ཤིས་གང་ཡིན་པ། །ཛ་ཡེ་དེ་རིང་སྦྱིན་བདག་འདི་ལ་སྩོལ། །བཀྲ་ཤིས་དེས་ཀྱང་ཁྱོད་ལ་བདེ་ལེགས་ཤོག། ཧཱུྃ། །ཤར་གྱི་ཕྱོགས་ནས་བཀྲ་ཤིས་པ། །རྡོ་རྗེ་སེམས་དཔའི་བཀྲ་ཤིས་ལགས། །མི་འགྱུར་བརྟན་པའི་བཀྲ་ཤིས་གང་ཡིན་པ། །ཛ་ཡེ་དེ་རིང་སྦྱིན་བདག་འདི་ལ་སྩོལ། །བཀྲ་ཤིས་དེས་ཀྱང་ཁྱོད་ལ་བདེ་ལེགས་ཤོག །ཧཱུྃ། །ལྷོ་ཡི་ཕྱོགས་ནས་བཀྲ་ཤིས་པ། །རིན་ཆེན་འབྱུང་ལྡན་བཀྲ་ཤིས༴ །འདོད་དགུ་འབྱུང་བའི་བཀྲ་ཤིས༴ །ཛ་ཡེ་དེ་རིང་༴ །བཀྲ་ཤིས་དེས་ཀྱང་ཁྱོད་ལ༴ ཧཱུྃ། །ནུབ་ཀྱི་ཕྱོགས་ནས་བཀྲ་ཤིས་པ། །སྣང་བ་མཐའ་ཡས་
བཀྲ་ཤིས༴ །དབང་སྡུད་སྙན་གྲགས་བཀྲ་ཤིས་གང་ཡིན་པ། །ཛ་ཡེ་དེ་རིང་༴ །བཀྲ་ཤིས་དེས་ཀྱང་ཁྱོད་ལ༴ ཧཱུྃ། །བྱང་གི་ཕྱགས་ནས་བཀྲ་ཤིས་པ། །དོན་ཡོད་གྲུབ་པའི་བཀྲ་ཤིས༴ །ཕྲིན་ལས་ལྷུན་གྱིས་གྲུབ་པའི་བཀྲ་ཤིས་དེ། །ཛ་ཡེ་དེ་རིང་༴ བཀྲ་ཤིས་དེས་ཀྱང་ཁྱོད་ལ༴ ཧཱུྃ། འོག་གི་ཕྱོགས་ནས་བཀྲ་ཤིས་པ། །ས་ཡི་ལྷ་མོ་བརྟན་མའི་བཀྲ་ཤིས་ལགས། །ཚེ་འཛིན་འབྲུ་སྣའི་བཀྲ་ཤིས་གང་ཡིན་པ། །ཛ་ཡེ་དེ་རིང་སྦྱིན་བདག་འདི་ལ་སྩོལ། །བཀྲ་ཤིས་དེས་ཀྱང་ཁྱོད་ལ་བདེ་ལེགས་ཤོག །ཉིན་ཡང་བཀྲ་ཤིས་འབྱུང་བ་ཡ་ལ་ལ། །མཚན་ཡང་བཀྲ་ཤིས་འབྱུང་བ་ཀྱི་ལི་ལི། །བཀྲ་ཤིས་དུས་གསུམ་འབྱུང་བ་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཞེས་པ་དང་། གཞན་ཡང་བཀྲ་ཤིས་ཀྱི་ཚིག་བཅད་རྒྱས་བསྡུས་ཅི་རིགས་པ་བརྗོད་དོ། །རྩ་བའི་གསུམ་པ་རྗེས་ཀྱི་ཆོ་ག་ནི། །མདུན་གྱི་མཆོད་པ་རྣམས་ཁ་གསོས། །གོང་ལྟར་བྱིན་གྱིས་བརླབས། སྤྲོ་ན་ཚིགས་བཅད་བརྗོད། བསྡུ་ན། ཨོཾ་སརྦ་ཏ་ཐཱ་ག་ཏ་ཨརྒྷ་མ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡེ་ཧཱུྃ། དེ་བཞིན་དུ་སྔགས་གོང་འོག་ཐམས་ཅད་འདྲ་བར་བྱས་ལ། པཱ་དྱཾ་ནས། ཤཔྟའི་བར་གྱིས་མཆོད། ཐབས་མཁས་ཐུགས་རྗེ་ཤཱཀྱའི་རིགས་སུ་འཁྲུངས། སོགས་ཤློ་ཀ་དང་། །བསྟོད་པར་འོས་པ་སོགས་ཤློ་ཀས་བསྟོད་ལ། བཅོམ་ལྡན་འདས་
བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཅེས་གསོལ་བ་བཏབ། ཡིག་བརྒྱ་ལན་གསུམ། ཐལ་མོ་སྦྱར་ལ། །མ་འབྱོར་པ་དང་ཉམས་པ་དང་གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིས་སྩལ་བ། །དེ་ཀུན་མགོན་པོས་བཟོད་པར་གསོལ། །གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་གྱུར་པ། །གང་ཕྱིར་ལུས་ཅན་སྐྱབས་ཡིན་ཕྱིར། །དེ་ཀུན་མགོན་ཁྱོད་བཟོད་པར་མཛོད། །ཅེས་བཟོད་པར་གསོལ། མདུན་བསྐྱེད་ཀྱི་འཁོར་རྣམས་འོད་དུ་ཞུ་ནས་གཙོ་བོ་ལ་ཐིམ་པར་གྱུར། རྟེན་མེད་ན་གཤེགས་གསོལ་བྱ། སྐབས་འདིར་ཐུབ་སྐུ་བཞུགས་པའི་དབང་དུ་བྱས་ཏེ། ཕྱོགས་བཅུ་ན་བཞུགས་པའི་སོགས་སམ། །འདིར་ནི་གཟུགས་དང་ལྷན་ཅིག་ཏུ། །འགྲོ་བའི་དོན་ཏུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཅེས་དང་། སུ་པྲ་ཏིཥྛའི་སྔགས་བརྗོད་ལ་བརྟན་བཞུགས་བྱ། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། །ཐུགས་ཀར་ཧཱུྃ་སྔོན་པོས་མཚན་པར་གྱུར། །དགེ་བ་འདི་ཡིས་མྱུར་དུ་བདག །རྫོགས་པའི་སངས་རྒྱས་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་
ལ་འགོང་པར་ཤོག །དེ་བཞིན་གཤེགས་པ་ཁྱེད་སྐུ་ཅི་འདྲ་དང་། སོགས་ཀྱིས་བསྔོ་སྨོན་བྱ། དེ་ནས་དྲིལ་གསིལ་འཐོར་ནས་བཅས། །སྟོན་མཆོག་དམ་པ་ལྷ་མིའི་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཞི་བ་ཆགས་བྲལ་ལྷ་མིའི། །ཆོས་ལ་ཕྱག་འཚལ༴ །སེམས་ཅན༴ །དེ་དག་ཐམས་ཅད་དེང་འདིར། །ཚོགས་ཀྱི་དམ་པ་ལྷ་མིའི༴ །དགེ་འདུན་ཕྱག་འཚལ་དེང་༴ །སེམས་ཅན་གང་དག་འགྲོ༴། དེ་དག་ཐམས་ཅད་དེང་འདིར་བདེ་ལེགས་ཤོག །ཞེས་སོགས་མཆོག་གསུམ་བཀྲ་ཤིས་ཤློ་ཀ་གསུམ་སོགས་སྔོན་དུ་འགྲོ་བས་ཤིས་བརྗོད་གང་རུང་དང་། མཐར། །ཉིན་མོ་བདེ་ལེགས་མཚན་བདེ་ལེགས། སོགས་ཤློ་ཀ་གཅིག །རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་ཐམས་ཅད་ཉི་མ་དང་ཟླ་བ་གཟའ་སྒྲ་གཅན་གྱི་ཁ་ནས་ཐར་བ་བཞིན་དུ་འགལ་རྐྱེན་སྤང་བྱ་མི་མཐུན་པའི་ཕྱོགས་ཐམས་ཅད་ལས་རྒྱལ་ནས་ཤིན་ཏུ་བཀྲ་ཤིས་པར་གྱུར་ཅིག །ཅེས་བརྗོད་ལ་རོལ་མོ་རྒྱ་ཆེར་བྱའོ། །དེ་ལྟར་བྱས་པའི་ཕན་ཡོན་ནི་བསམ་གྱིས་མི་ཁྱབ་ཅིང་བརྗོད་དུ་མི་ལངས་པར་འབྱུང་བར་གསུངས་ལ། ཁྱད་པར་དུ་བན་བོན་གྱི་རྦོད་གཏོང་བྱད་ཁས་གནོད་པ། གཏད་ལ་བཅུག་པ། ན་ཚ་རྒོད་པའི་འཕྲོ་གཅོད་པ། ཡུལ་དུ་ནད་ཡམས་རིམས་ནད་དར་བ།
ཕྱུགས་ནད་གོད་ཁ་མང་བ། ཁྱིམ་དུ་རྒྱལ་པོ་ལ་སོགས་པའི་གདོན་ཞུགས་བ་རྣམས་དང་། སྐར་མ་ངན་པར་ཤི་བ། མ་ཉེས་པའི་ཁ་ཡོག་འོང་བ། མི་ཁ་ཆེ་བ། སྲིའུ་མ་སོས་པ། ནོར་ལ་དཀར་འགོང་འོང་བ། ཐན་དང་རྨི་ལམ་ལྟས་ངན་པ། ལོ་དང་སྤར་ཁ་རྩུབ་པ། མཐུ་ལྟས་བྱུང་བ་སོགས་ལ་འདིའི་ཟློག་པ་བྱས་པས་དེ་མ་ཐག་ཏུ་ཟློག་པར་འགྱུར་རོ། །ཚེ་ཚད་མཐར་ཕྱིན་པ་མ་གཏོག་བར་ཆད་ཀྱིས་ཟིན་པ་ལ་གནོད་ཚབ་ཆེ་ཆུང་དང་བསྟུན་པའི་ལན་གཅིག །གསུམ། ལྔ། བདུན། དགུ་སོགས་བསྐྱལ་ན་ངེས་པར་སེལ་བ་ཐེ་ཚོམ་མེད་དོ་ཞེས་གོང་མ་རྣམས་ཀྱིས་མགྲིན་གཅིག་ཏུ་བསྔགས་སོ། །དེ་ལྟར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡུམ་རྒྱས་འབྲིང་བསྡུས་པ་རྣམས་ལ་ཕན་ཡོན་བསྔགས་པ་ཇི་སྙེད་གསུངས་པ་ཐམས་ཅད་ཚུལ་འདི་ལའང་འབྱུང་བར་རིགས་པས་གཏོ་ཟློག་ཐམས་ཅད་ལས་ཁྱད་པར་འཕགས་པ་ལུང་དང་རིགས་པ་དང་མྱོང་བས་གྲུབ་པ་ཡིན་ནོ། །དེ་ལྟར་རྒྱ་གར་མཁས་གྲུབ་རྣམས་ཀྱི་ཐུགས་བཅུད། དཔལ་ལྡན་ཨ་ཏི་ཤའི་ཡི་དམ། དགེ་བཤེས་པུ་ཏོ་བ་རིན་ཆེན་གསལ། རིང་མོ་འབྱུང་གནས་རྡོ་རྗེ། གྱི་ལྗང་དབུ་དཀར་བ་སོགས་ཀྱི་ཕྱག་ལེན་འཁྲུལ་མེད་འདི་ལ་སྔ་ཕྱིར་བྱོན་པའི་ཡིག་ཆ་འདྲ་མིན་མང་དུ་མཆིས་པ་ལས། རྩ་བའི་གཞུང་དང་འབྲེལ་ངེས་པའི་ཡིག་ཆ་རྣམས་ཀྱི་བཅུད་བླངས་ནས་དག་གཙང་བཀླག་ཆོག་ཏུ་བཀོད་པའོ། །དོན་དམ་དབང་དུ་བགེགས་པས་སངས་རྒྱས་ཀྱང་། །མེད་ཅེས་དཔལ་གྱི་མགུལ་ནས་ལེགས་པར་གསུངས། །ཀུན་རྫོབ་འཁྲུལ་
ངོར་རྒྱུ་འབྲས་མི་བསླུ་བས། རྟེན་ཅིང་འབྲེལ་འབྱུང་ཚུལ་འདིར་ཡིད་ཆེས་འཚལ། །ཤེར་ཕྱིན་མདོ་ལས་དངོས་སུ་བསྟན་པའི་དོན། །འཕྲལ་ཡུན་བར་ཆད་ཟློག་ལ་ཆེས་ཟབ་པ། །འདི་བཀོད་དགེ་བས་བདུད་བགེགས་ནག་པོའི་ཕྱོགས། །ཞི་ཞིང་ཕན་བདེའི་ཡར་ངོ་རབ་རྒྱས་ཤོག །འདི་ཉིད་ཀུན་ལ་ཉེར་མཁོར་གྱུར་ཀྱང་ཕྱོགས་འདིར་ཡིག་ཆ་གསལ་བ་མ་མཆིས་ཤིང་མི་བསྐྱོད་ཞབས་ཀྱིས་མཛད་པར་གྲགས་པ་དེའང་རྗེ་དེ་ཉིད་ཀྱི་གསུང་ཡིན་ངེས་མི་སྣང་བ་མ་ཟད་མགོ་གཞུག་མ་ཚང་བས་རང་གཞན་ཀུན་ལ་ཕན་འདོད་ལྷག་པའི་བསམ་པས་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེས་དཔལ་སྤུངས་ཡང་ཁྲོད་ཀྱི་སྒྲུབ་གནས་སུ་བྲིས་པ་དགེ་ལེགས་འཕེལ།། །།