ཡེ་ཤེས་མགོན་པོ་ཏྲཀ་ཤད་ཀྱི་བསྐང་གསོལ་ལས་བཞི་མྱུར་འགྲུབ།
ཡེ་ཤེས་མགོན་པོ་ཏྲཀ་ཤད་ཀྱི་བསྐང་གསོལ་ལས་བཞི་མྱུར་འགྲུབ་བཞུགས་སོ། ཧཱུྃ། སྤྱན་རས་གཟིགས་མགོན་ཐུགས་ཀྱི་ཕྲིན་ལས་ལས། །རྣམ་འཕྲུལ་ཞི་བས་འདུལ་བར་མི་སྤྱོད་ཅིང་། །དྲག་པོའི་སྟོབས་ཀྱིས་གདུག་པ་ཚར་གཅོད་པ། །འཇིགས་པའི་གཟུགས་ཅན་ཁྱོད་ནི་འདིར་བྱོན་ཅིག །ལྷ་ཆེན་ཐུགས་ཀྱི་ཕོ་ཉ་མཐུ་བོ་ཆེ། །ཁྱོད་ཀྱི་རྣམ་འཕྲུལ་ཕྱོགས་བཅུ་མ་ལུས་ཁྱབ། །ཡབ་ཅིག་རྟག་ཏུ་འདོད་རྒྱལ་ཁང་བཟང་ན། །ཕལ་ཆེར་ཨུ་ཙ་ལ་ཡི་དུར་ཁྲོད་ན། །རེས་འགའ་བསིལ་བའི་ཚལ་ན་སྲིན་པོའི་གཟུགས། །ད་ལྟ་ཙ་རི་རོང་གི་ཕོ་བྲང་ན། །ཁྱོད་ཀྱི་བརྟེན་ས་རྩུབ་མོའི་བྲག་ཕུག་ན། །རྣལ་འབྱོར་དམ་ཚིག་ལྡན་པའི་རྗེས་འབྲང་ཞིང་། །གང་གིས་བཅོལ་པའི་ལས་རྣམས་སྒྲུབ་མཛད་པ། །དྲག་པོའི་དབང་ཕྱུག་གཟི་ལྡན་འདིར་བྱོན་ཅིག །ཡུམ་གཅིག་བདུད་མོ་རེ་ཏི་འདིར་བྱོན་ཅིག །བཀའ་ཉན་སྒྲོལ་བྱེད་མ་མོ་འདིར་བྱོན་ཅིག །འཁོར་གྱི་ཕོ་ཉ་ལས་མཁན་འདིར་བྱོན་ཅིག །སྤྲུལ་པ་ཡང་སྤྲུལ་ཚོགས་རྣམས་འདིར་བྱོན་ཅིག །ཧཱུྃ། ལྷ་མིན་དམག་ཚོགས་གཡུལ་ཟློག་ཅིང་། །ལྷ་དམག་དཀར་པོའི་དབུགས་འབྱིན་པའི། །ལྷ་ཆེན་དཔལ་འབར་འཁོར་དང་བཅས། །བསྐང་ངོ་བསྐལ་པ་ཐུགས་དམ་བསྐང་། །སྲོག་བདུད་མ་ཧཱ་ཀཱ་ལ་ནི། །རྔམ་པའི་ཞལ་ལ་གཏུམ་པའི་སྐུ། །གསོད་དང་
གཅོད་པའི་ལས་ལ་དགྱེས། །ཡེ་ཤེས་མགོན་པོའི་ཐུགས་དམ་བསྐང་། །མིང་པོ་རྡོ་རྗེའི་ལས་བྱེད་མ། །དམ་ལ་གནས་ཤིང་བསྟན་པ་སྲུང་། ཁམས་གསུམ་ཁྲག་འཐུང་རེ་མ་ཏཱི། །མ་གཅིག་ལྷ་མོའི་ཐུགས་དམ་བསྐང་། །ཤེལ་གཡུ་དངུལ་དང་དུང་གི་མིག །མཆོང་དང་ཟངས་ཀྱི་མིག་ཅན་མ། །བདུད་ཀྱི་བུ་མོ་ཆེན་མོ་དྲུག །སྤྲུལ་འཁོར་བཅས་པའི་ཐུགས་དམ་བསྐང་། །སྲོག་བདུད་ནག་པོ་ཆེན་པོ་ཡི། །བཀའ་ཉན་མོན་མོ་ཆེན་མོ་བདུན། །བདུད་ཀྱི་ཤན་པ་ཆེན་པོ་བདུན། །བྱང་ཕྱོགས་གནོད་སྦྱིན་ཆེན་པོ་བརྒྱད། །ལྷོ་ཕྱོགས་གཤིན་རྗེ་ཆེན་པོ་བརྒྱད། །སྤྲུལ་པ་ཡང་སྤྲུལ་ཕོ་ཉ་དང་། །ཕྱོགས་བཞིའི་རུ་འདྲེན་དམག་གི་ཚོགས། །བདུད་པོ་ཉི་ཁྲི་ཆིག་སྟོང་དང་། །ལྷ་དམག་དཀར་པོ་འབུམ་སྡེའི་ཚོགས། །གཞན་ཡང་ལྷ་སྲིན་སྡེ་བརྒྱད་སོགས། །དཔལ་མགོན་འཁོར་དང་བཅས་རྣམས་ཀྱི། །ཐུགས་དམ་བསྐང་ངོ་ཕྲིན་ལས་མཛོད། །ཕྱི་ནང་གསང་བའི་བརྟེན་རྫས་དང་། །མཆོད་བསྐང་བསྒྲུབ་ཅིང་དགྱེས་པའི་རྫས། །བདུད་རྩི་ཛ་གད་སྨན་རཀ་ཕུད། །ཤ་ཁྲག་དམར་གྱི་གཏོར་མ་སོགས། །ཐུགས་ལ་བཞེད་དགུའི་མཆོད་པའི་སྤྲིན། །དངོས་འབྱོར་ཡིད་སྤྲུལ་དཔག་མེད་ཀྱིས། །ཐུགས་དམ་གཉན་པོ་བསྐང་ནས་ཀྱང་། །གཡར་དམ་ཉམས་ཆགས་སོར་སྩོལ་ཞིག །བདག་ཅག་མ་རིག་དབང་གྱུར་པས། །རྩ་
བ་ཡན་ལག་དམ་ཚིག་ལ། །ཆགས་ཉམས་འགལ་འཁྲུལ་གང་མཆིས་པ། །བཟོད་པར་གསོལ་ལོ་ཚངས་པར་སྩོལ། །བདག་ཅག་ཡོན་མཆོད་འཁོར་བཅས་ཀྱི། །ནད་གདོན་གནོད་པ་ཞི་བ་དང་། །ཚེ་བསོད་དཔལ་འབྱོར་འཕེལ་བ་དང་། །སྣང་སྲིད་དབང་དུ་སྡུད་པ་དང་། །མི་མཐུན་ཕྱོགས་རྣམས་གཞོམ་པ་ཡི། །ཕྲིན་ལས་རྣམ་བཞི་ཁྱོད་ཀྱིས་མཛོད། །ཁྱད་པར་སངས་རྒྱས་བསྟན་པའི་བཅུད། །ངེས་དོན་སྙིང་པོའི་རིང་ལུགས་སྐྱོངས། །གསང་བདག་རྡོ་རྗེ་འཛིན་པ་སོགས། །རྒྱལ་བའི་བཀའ་དང་དམ་ཚིག་བཞིན། །བྱང་ཆུབ་སྒྲུབ་པའི་བར་ཆད་སོལ། །ཕྱི་ནང་གསང་བའི་འགལ་རྐྱེན་ཟློག །བསྟན་དང་འགྲོ་ལ་གནོད་པ་ཡི། །སྡང་བའི་དགྲ་དང་གནོད་པའི་བགེགས། །ཐལ་བའི་རྡུལ་བཞིན་བརླག་པར་གྱིས། །མདོར་ན་མཆོག་ཐུན་དངོས་གྲུབ་སོགས། །བསམ་དོན་ཡིད་བཞིན་འགྲུབ་པར་མཛོད། །ཅེས་པ་འདི་ནི་ངེས་དོན་སྙིང་པོའི་རིང་ལུགས་ཀྱི་བསྟན་པའི་རྩ་ལག་དཔལ་ལྡན་ཛམ་ཐང་གི་མགོན་ཁང་དུ་ཉེ་བར་མཁོ་བའི་ཕྱིར། ལྷ་འདི་ཉིད་ཀྱི་རྣལ་འབྱོར་པ་ངག་དབང་ཆོས་འཕགས་ཀྱི་བཞེད་དོན་ལྟར། གསང་བདག་སྒྲོལ་བའི་མགོན་པོའི་བཀའ་སྲོལ་འཛིན་པ་ཀརྨ་ངག་དབང་ཡོན་ཏན་རྒྱ་མཚོས་གནས་དེ་ཉིད་དུ་བྲིས་པ་དགེ་ལེགས་འཕེལ། །སརྦ་མངྒ་ལཾ།། །། །།