དུད་སོལ་མ་གཙོ་བོར་གྱུར་པའི་ལྷ་མོ་སྤྱི་ཡི་མཆོད་གསོལ་སྐྱེ་བ་ལྔ་བའི་སྒྲ་དབྱངས།
དུད་སོལ་མ་གཙོ་བོར་གྱུར་པའི་ལྷ་མོ་སྤྱི་ཡི་མཆོད་གསོལ་སྐྱེ་བ་ལྔ་བའི་སྒྲ་དབྱངས་ཞེས་བྱ་བ་བཞུགས་སོ། །
བརྟན་གཡོ་ཀུན་ཁྱབ་ཤེས་རབ་ཕ་རོལ་ཕྱིན། །སྣང་སྲིད་དབང་མཛད་མ་མོ་མཁའ་འགྲོའི་ཚུལ། །འཁོར་འདས་རོ་མཉམ་ངང་དུ་གུས་བཏུད་ནས། །བསྟན་སྲུང་མོ་རྒྱུད་རྒྱ་མཚོའི་མཆོད་གསོལ་བྲི། །དེ་ཡང་དཀྱིལ་འཁོར་ཆེན་པོར་ཞུགས་ཤིང་སྒོས་ཀྱི་རྗེས་སུ་གནང་བ་ཐོབ་སྟེ་གསང་སྔགས་ཀྱི་དམ་ཚིག་སྤྱི་དང་། ཁྱད་པར་མ་མོའི་དམ་ཚིག་ལ་ལེགས་པར་གནས་པའི་རྣལ་འབྱོར་པས། དུར་ཁྲོད་དང་ཤིང་གཅིག་ལ་སོགས་པའམ། གནས་ཁང་བཀོད་པས་བརྒྱན་པའི་དབུས་ཀྱི་གོང་དུ་བླ་མ་ཡི་དམ་མཁའ་འགྲོའི་རྟེན་དང་མཆོད་གཏོར་བཀྲམ། མདུན་དུ་གཞི་མ་མཐིང་ནག་གི་དབུས་སུ་འབྲུ་ནག་གི་ཚོམ་བུ་བཀོད་པའི་ཁར། བཤོས་ལྡེབ་ཟུར་གསུམ་ཁྲུ་གང་ངམ། མཐོ་གང་ལས་མི་ཆུང་བ་ཕྱག་མཚན་མེ་རིས་སྤྲས་པའི་འཁོར་དུ། བཤོས་ཕྲན་དེ་འདྲ་བརྒྱད། རྒྱས་པར་བྱེད་ན་དེའི་ཕྱི་རོལ་དུ་དཀར་དམར་
གཏོར་ཆུང་བརྒྱད། འབྲིང་དུ་ཉེར་ལྔ། ཐ་མ་བཅུ་གསུམ། ཐེབ་ཀྱུ་དང་བྱ་ནག་ལུག་ནག་དྲེལ་ནག་བོང་བུ་གཙོས་པའི་ཕྱི་ནང་གསང་རྟེན་མཆོད་སྐད་དགྱེས་རྫས་སྤར་དུ་བཏབ་པ་གྲངས་དེ་མཚུངས་སམ། ཐ་ནའང་ཚར་རེས་བསྐོར་བ་ཐོད་པའམ་ཟངས་ལྕགས་ཀྱི་སྣོད་དུ་བཞག །དར་གདུགས། སྟག་གཟིགས་རས་མོ། དར་ཚོན་སོགས་ཀྱིས་མཛེས་པར་བརྒྱན་ཏེ་མཉྫའི་སྟེང་དུ་བཀོད་པའི་གཡས་སུ་རྩ་བརྒྱད་སྟོང་སྦྱར་དང་ལྡན་པའི་སྨན་ཕུད་མ་ཉམས་པ། གཡོན་ཏུ་ཁྱད་པར་གྱི་རཀྟ་དང་སྦྱར་བའི་ཁྲག་རུལ་གྱི་སྣོད། མདུན་ནས་ཆུ་གཉིས་ཉེར་སྤྱོད་དྲག་མཆོད་གཡོན་དང་། ཞི་མཆོད་གཡས་ནས་མགོ་བཟུང་བའི་ཕྲེང་ཚར་ཆ་གཉིས་བཤམས། གཞན་ཡང་འོག་ནས་འབྱུང་བའི་མཆོད་རྫས་དང་། སྦྱར་སྤོས་སོགས་འདུ་བགྱིད། རང་མདུན་ཐོད་པའི་རྡེའུ་ཆུང་
གཡབ་དར། དམ་ཚིག་བདུད་རྩི་སོགས་རོལ་མོ་དང་ཉེར་མཁོའི་ཡོ་བྱད་བཀོད། དུང་སོལ་མའི་སྒེར་སྒྲུབ་ཀྱི་དབང་དུ་བྱས་ན་རང་ཉིད་དགྱེས་པ་རྡོ་རྗེའམ། གདན་བཞི་རྡོ་རྗེ་སེམས་དཔའི་རྣལ་འབྱོར་གང་རུང་སྔོན་དུ་འགྲོ་དགོས་པ་ཡིན་ཀྱང་། འདིར་སྣང་སྲིད་མོ་རྒྱུད་ཀྱི་དཀྱིལ་འཁོར་ཡིན་པས། བདག་བསྐྱེད་ཧེ་རུ་ཀ་འཁོར་ལོའི་མགོན་པོ་གང་རིགས་ཀྱི་རྣལ་འབྱོར་ལ་གནས་པས་མཆོད་རྫས་བྱིན་རླབས་ནི། ཨོཾ་བཛྲ་ཨ་མྲྀ་ཏ་སོགས་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་གནས་ཁང་ཐར་པ་ཆེན་པོའི་གཞལ་མེད་ཕུན་སུམ་ཚོགས་པར་ཨ་ལས་བྷཉྫ་འབར་བའི་སྣོད་བཟང་ཞིང་རྒྱ་ཆེ་བ་རྣམས་སུ་ཧཱུྃ་ཡིག་ལས་བྱུང་བའི་མཆོད་ཡོན་ཞབས་བསིལ་མེ་ཏོག་བདུག་སྤོས་མར་མེ་དྲི་ཆབ་ཞལ་ཟས་རོལ་མོ་ལ་སོགས་པ་མཆོད་པའི་དངོས་པོ་རྣམས་འདོད་ཡོན་གྱི་རྣམ་པ་མ་ཚང་བ་མེད་པ་འཕགས་པ་ཀུན་ཏུ་བཟང་པོའི་མཆོད་སྤྲིན་གྱི་ཕུང་པོ་ལྟ་བུའི་ནམ་མཁའི་མཐའ་ཀླས་པར་གྱུར། །ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་གྱིས་བྱིན་གྱིས་བརླབས། སྨན་ཕུད། རཾ་ཡཾ་ཁཾ་གིས་བསངས་སྦྱངས། སྟོང་པའི་ངང་ལས་ཨ་ལས་བྱུང་བའི་ཐོད་པའི་སྣོད་དུ་ཤ་ལྔ་བདུད་རྩི་ལྔ་ལ་ཨོཾ་ཧཱུྃ་ཏྲྃ་ཧྲཱིཿཨཱ༔མུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པ་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾཱ་སརྦ་པཉྩ་ཨ་མྲྀ་ཏ་ཨཱཿཧཱུྃ། ལན་གསུམ། བསངས་སྦྱངས། སྟོང་པའི་ངང་ལས་ཨ་ལས་བྱུང་བའི་
ཐོད་པའི་ནང་དུ་རཾ་ལས་ཉི་མའི་སྟེང་དུ་ར་ཡིག་ཞུ་བ་ལས་རཀྟའི་རྒྱ་མཚོ་རྦ་ཀློང་འཁྲུག་པ་ལ་ཁམས་གསུམ་གྱི་རཀྟ་ཐམས་ཅད་བསྡུས་ཤིང་ཐིམ་པར་གྱུར། ཨོཾ་མ་ཧཱ་རཀྟ་ཨཱཿཧཱུྃ། ལན་གསུམ། གཏོར་མ་བསངས་སྦྱངས། སྟོང་པའི་ངང་ལས་གཏོར་གཞོང་བྷྲཱུྃ་ལས་རིན་པོ་ཆེའི་མཆོད་སྡོང་འདབ་མ་སྟོང་ལྡན་གྱི་སྙིང་པོར་གཏོར་རྫས་ཨོཾ་ལས་འདོད་ཡོན་གྱི་ཕུང་པོ་ཟད་མི་ཤེས་པའི་ལོངས་སྤྱོད་ཀྱི་གཏེར་དུ་གྱུར། ཨོཾ་མ་ཧཱ་བ་ལིནྟ་ཨཱཿཧཱུྃ། ཞེས་ལན་གསུམ་མམ་བདུན་ལ་སོགས་པས་བྱིན་གྱིས་བརླབ་བོ། །དེ་ནས་མདུན་དུ་དམ་ཚིག་པའི་འཁོར་ལོ་བསྐྱེད་པ་ནི། །སྐད་ཅིག་གིས་སྟོང་ཁམས་སྲིད་པ་མ་མོའི་དཀྱིལ་འཁོར། དུར་ཁྲོད་ཆེན་པོའི་བཀོད་པ། ཁྲག་ཞག་གི་རྒྱ་མཚོ་འཁྲུགས་ཤིང་། མེ་དུད་འཇའ་ཟེར་འཁྱིལ་བ། ཐོག་སེར་གྱི་བུ་ཡུག་འཚུབས་པའི་ཀློང་དུ་བྷཉྫ་འབར་བའི་གཞལ་ཡས་ཁང་རྒྱ་ཁྱོན་ཚད་མེད་པ་དུར་ཁྲོད་ཀྱི་རྒྱན་དང་བཀོད་པ་བསམ་གྱིས་མི་ཁྱབ་ཅིང་འཇིགས་སུ་རུང་བས་བརྒྱན་པའི་དབུས་སུ་སྐད་ཅིག་གིས་ལྷ་མོ་དུད་པའི་སོལ་བ་མ་བཞུགས་པའི་སྙིང་གར། ཨོཾ་དཀར་པོ་ལ་གནས་པའི་ར་ཡིག་དམར་པོ། ར་ལས་མེ་འོད་འཕྲོ་བས། སྐུ་ལུས་སྐད་ཅིག་གིས་བསྲེགས། ཨོཾ་དེའི་སྟེང་དུ་བཾ་ཡོངས་སུ་གྱུར་པ་ལས་བུམ་པ་དཀར་པོ་བདུད་རྩིས་གང་བ། དེ་ལས་བདུད་རྩི་
ལུད་དེ་ཨོཾ་བཀྲུས་པས་འོད་ཟེར་དཀར་པོ་རབ་ཏུ་འབར་བར་གྱུར། ཨོཾ་ཨཱཿམ་ཧཱ་ཀཱ་ལི། དེ་ཝཱི་ཀ་ལི། བི་ཀྲནྟ་ཙཎྜ་རཱུ་པི་ཱི་ཧཱུྃ་ཕཊ། དེ་ཉིད་སྐད་ཅིག་གིས་དཔལ་ལྡན་ལྷ་མོའི་སྐུར་གྱུར་པ་ནི། སྐུ་མདོག་ནག་མོ། ཀེང་རུས་ལྟར་སྐེམ་པའི་ལུས་ཅན། ཞལ་ཅིག་ཕྱག་བཞི་ཞབས་གཉིས་པ། གཡས་ཀྱི་དང་པོ་ན་རལ་གྲི། གཉིས་པ་ན་བྷཉྫ་དམར་ཆེན་གྱིས་བསྐྱིལ་བ། གཡོན་གྱི་དང་པོ་ན་ཤཀྟི། །གཉིས་པ་ན་ཏྲི་ཤུལ་དར་དཔྱངས་ཅན་འཛིན་པ། མི་རོ་རེངས་པ་ཁར་བཅུག་ནས་མཆེ་བ་གཙིགས་པ། །སྤྱན་གསུམ་དམར་བ། དབུ་སྐྲ་རལ་པ་དམར་སེར་གྱེན་བརྫེེས་ལན་བུ་གཡོན་ཏུ་འཁྱིལ་བ། །སྦྲུལ་དང་ཐོད་ཕྲེང་གིས་བརྒྱན་པ། སྙན་གཡས་ན་དྲིལ་བུའི་མགུལ་རྒྱན་ཅན་གྱིས་སྦྲུལ་དང་། གཡོན་སེང་གེས་བརྒྱན་པ། མེ་ཏོག་དང་དར་ནག་གི་ཅོད་པན། ལྷ་མ་ཡིན་གྱི་མགོ་བོས་ངོ་ཤལ་བྱས་པ། གླང་པོ་ཆེའི་ཀོ་བས་སྟོད་གཡོགས་ཤིང་། བ་གླང་གི་པགས་པ་རེ་ལྡེ་སེར་པོའི་ཤམ་བུ་ཅན་གྱིས་སྨད་དཀྲིས་པ་ལ། ཀླུའི་རྒྱལ་པོ་གཤིབས་པས་སྐེ་རགས་བྱས་པ། ལྕགས་སྒྲོག་གིས་བརྒྱན་པའི་ཞབས་གཉིས་བོང་བུ་གྭ་པའི་སྟེང་ན་བཙན་བསྐྱིལ་གྱིས་བཞུགས་པ། དུར་ཁྲོད་ཀྱི་དབུས་ན་སྒྲ་དྲག་པོ་སྒྲོག་པ་ལ། སྙིང་འཕྲོག་མ་གསུམ། རིགས་བཞིའི་མ་མོ། མ་མོ་བརྒྱད། །
ཕྲ་མན་བརྒྱད། སྒོ་མ་བཞི་སོགས། མ་མོ་མཁའ་འགྲོ་ཤ་ཟ་འབུམ་སྡེས་བསྐོར་བ། ཕྱི་རོལ་གྱི་ཕྱོགས་དང་མཚམས་རྣམས་སུ་སྔགས་སྲུང་རྡོ་རྗེ་རལ་གཅིག་མ་སོགས་ཡེ་ཤེས་ཀྱི་མ་མོ། དཔལ་ལྡན་ལྷ་མོ་འདོད་པ་ཁམས་ཀྱི་དབང་ཕྱུག་མ་སོགས་ལས་ཀྱི་མ་མོ། དུར་ཁྲོད་ཀྱི་འདྲེ་མོ་ངན་ནེ་མ་སོགས་འཇིག་རྟེན་གྱི་མ་མོ། གཞན་ཡང་སྤྲུལ་པའི་ལས་མཁན་ནག་མོ་འབུམ་སྡེ། དཀར་སེར་དམར་ལྗང་བྱེ་བ་འབུམ་ཕྲག །ཤ་ཟ་ནམ་གྲུ་སྲིན་མོ་གནོད་སྦྱིན་མོ་ལ་སོགས་པ་རི་རབ་དང་རྒྱ་མཚོའི་གཏིང་དང་བར་སྣང་གི་ཁམས་སུ་གནས་པའི་དམོད་པའི་མཚོན་ཆ་ཅན་གྲངས་མེད་པ་རྣམས་དང་། །བསྟན་སྐྱོང་ཡ་མ་སྣང་སྲིད་མོ་རྒྱུད་མཁའ་འགྲོའི་ཚོགས་བསམ་གྱིས་མི་ཁྱབ་པས་བསྐོར་བའི་ཐམས་ཅད་ཀྱི་གནས་གསུམ་འབྲུ་གསུམ་གྱིས་མཚན་པ། གཙོ་མོའི་ཐུགས་ཀར་ཐུགས་ཀྱི་ཡེ་ཤེས་མར་མེ་ལྟར་འབར་བ་སྒོ་ངའི་དབྱིབས་ཅན་སོར་བཞི་པ། དེའི་དབུས་སུ་ཧཱུྃ། མཐའ་སྐོར་དུ་ཨོཾ་ཧཱུྃ་ཤྲི་ཡཻ་དེ་ཝཱི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿཞེས་པས་བསྐོར་བར་གྱུར། །ཐུགས་ཀའི་ཧཱུྃ་ལས་ཧཱུྃ་གཅིག་ཆད་དེ་བྷ་གར་ཐིམ། བཛྲ་ལཱ་སྱེ་རཱ་ག་ཡཱ་མི། རང་གི་སྙིང་ག་ནས་འོད་ཟེར་འཕྲོས་པས། རང་བཞིན་གྱིས་གྲུབ་པའི་ལྷ་མོ་དཔལ་ནག་མོ་འབུམ་སྡེ་དང་བཅས་པ་བཛྲ་ས་མཱ་ཛཿ འབོད་རྫས་བརྟུལ་ཞིང་རོལ་མོ་
དབྱངས་དང་བཅས་ཏེ་སྤྱན་འདྲེན་པ་ནི། བྷྱོ། རི་རབ་ཆེན་པོའི་བྱང་ཤར་མཚམས། །གཡུ་མཚོ་མུ་ལེ་མཐིང་གི་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནས། །གྲུ་གསུམ་འབར་བའི་ཀློང་དཀྱིལ་ནས། །དཔལ་ལྡན་ལྷ་མོ་དུད་སོལ་མ། །ཞལ་གཅིག་ཕྱག་བཞི་བོང་བུ་བཅིབས། །འཁོར་ཡང་ནག་མོ་འབུམ་གྱིས་བསྐོར། །གནས་འདི་ཉིད་དུ་གཤེགས་སུ་གསོལ། །བྷྱོ། བདེ་ཆེན་ཀུན་བཟང་ཡུམ་གྱི་མཁའ། །རང་བྱུང་ཡེ་ཤེས་སྤྲོས་བྲལ་དབྱིངས། །དམིགས་མེད་ཆོས་སྐུའི་དཀྱིལ་འཁོར་ནས། །ཐུགས་རྗེས་སྤྲུལ་པའི་སྐུར་བཞེངས་མ། །མཁའ་འགྲོ་ཀུན་གྱི་གཙོ་མོ་ཆེ། །སྲིད་གསུམ་དབང་བསྒྱུར་རལ་གཅིག་མ། །གསང་སྔགས་བཀའ་སྲུང་སྒྲོལ་བའི་ཡུམ། །སྨུག་ནག་ཁྲོས་མ་གཤེགས་སུ་གསོལ། བྷྱོ། བྱང་ཤར་ཆོས་དབྱིངས་ཕོ་བྲང་ནས། །བསྟན་པ་སྲུང་ཕྱིར་སྐུ་སྤྲུལ་པ། །ཚུར་གཤེགས་ཚུར་གཤེགས་མ་ཚུར་གཤེགས། །དམ་ཚིག་དབང་གིས་མྱུར་དུ་བྱོན། བྷྱོ། ཕྲིན་ལས་ཀུན་གྱིས་བདག་མོ་སྟེ། །དཔལ་ལྡན་དམག་ཟོར་རེ་མ་ཏི། །ནག་མོ་འབུམ་སྡེའི་འཁོར་དང་བཅས། །འགྲོ་བ་འདུལ་ཕྱིར་གཤེགས་སུ་གསོལ། བྷྱོ། ཁྱོད་ཀྱི་སྤྱི་བོའི་གཙུག་རུམ་ནས། །ཉི་མ་ཟླ་བའི་འོད་ཟེར་འཕྲོ། །ནག་མོ་མི་བཟད་ཆོ་འཕྲུལ་ཅན། །
དུས་ལ་བབ་ཀྱི་ད་ཚུར་བྱོན། །ལྷ་མོ་རྡོ་རྗེ་དབང་སྒྲུབ་མ། །ཕྲིན་ལས་བཅོལ་བའི་དུས་ཀྱི་ཚེ། །ཉིན་གསུམ་ཁྲ་ལྟར་འཁྱུག་ཅིང་བྱོན། །མཚན་གསུམ་གློག་ལྟར་འཁྱུག་ཅིང་བྱོན། །བསྟན་པ་བསྲུང་བའི་དུས་ལ་བབ། ཧཱུྃ་བྷྱོ། འཇིགས་ཤིང་ཡ་ངའི་དུར་ཁྲོད་ནས། །བསྟན་སྲུང་མ་མོ་ལས་མཁན་མ། །ཤ་ཟ་དྷཱཀྟི་འཁོར་དང་བཅས། །རིག་འཛིན་པདྨའི་བཀའ་བཞིན་དུ། །ད་ལྟ་རྣལ་འབྱོར་བདག་སྒྲུབ་ཀྱིས། །དོ་ནུབ་གནས་མཆོག་འདི་ཉིད་དུ། །སྐད་ཅིག་ཉིད་ལ་གཤེགས་སུ་གསོལ། བྷྱོ། དུར་ཁྲོད་ལྷ་མོ་ཆེན་མོ་ཁྱོད། །དུར་ཁྲོད་གནས་ནས་སྐུ་བཞེངས་ཤིག །བརྩེ་བའི་ཐུགས་ཀྱིས་གནས་འདིར་བྱོན། །རྣལ་འབྱོར་གདུང་བས་གསོལ་བ་འདེབས། །བརྗོད་བྲལ་འགྱུར་མེད་ཀློང་ཡངས་ནས། །ཡེ་ཤེས་རང་སྣང་རོལ་པའི་ཡུམ། །དུར་ཁྲོད་ལྷ་མོ་སྐུ་བཞེངས་ཤིག །དུས་ལ་བབ་ཀྱི་ད་ཚུར་བྱོན། བྷྱོ། བཀྲ་ཤིས་ཚེ་ཡི་དབང་ཕྱུག་མ། །དྲག་པོས་གདུང་བས་ཁྱོད་འབོད་ན། །དེ་རིང་སྒྲུབ་པའི་གནས་མཆོག་འདིར། །ལྷབ་ལྷུབ་ན་བཟའི་རྒྱན་དང་བཅས། །སིལ་སྙན་རོལ་མོའི་སྒྲ་དང་བཅས། །ནམ་མཁའི་མཐོང་ནས་སྤྱན་འདྲེན་ན། །བརྟན་མའི་འཁོར་བཅས་གཤེགས་སུ་གསོལ། །ད་ལྟ་སྙིགས་མ་ལྔ་ཡི་དུས། །དམ་ཅན་གཤེགས་པར་མི་འོས་ཀྱང་། །
སྔོན་ཚེ་བྱང་ཆུབ་ཤིང་གི་དྲུང་། །ཐུབ་པ་ཆེན་པོའི་སྤྱན་སྔ་རུ། །ཅི་ལྟར་ཁས་བླངས་དམ་བཅས་ལྟར། །སངས་རྒྱས་བསྟན་པ་སྲུང་བ་དང་། །འགྲོ་ཀུན་བདེ་ལ་འགོད་པའི་ཕྱིར། །དཔལ་ལྡན་ལྷ་མོ་གཤེགས་སུ་གསོལ། །གསང་སྔགས་སྲུང་མ་དམ་ཚིག་ཅན། །འཁོར་བཅས་གཤེགས་ཤིང་བཞུགས་སུ་གསོལ། བྷྱོ། གཞན་ཡང་གཤིན་རྗེའི་ཕོ་བྲང་དང་། །ལྷ་ཁང་དུར་ཁྲོད་རི་སུལ་ནས། །ཆོས་སྐྱོང་སྲུང་མ་འཁོར་བཅས་རྣམས། །མཆོད་པ་འབུལ་བ་བཞེས་སླད་དུ། །ད་ལྟ་ཉིད་དུ་བྱོན་ནས་ཀྱང་། །གཉིས་མེད་བརྟན་པར་བཞུགས་སུ་གསོལ། ཨོཾ་ཤྲི་ཡཻ་དེ་ཝཱི་ཀཱ་ལི་ཀ་ལི་མ་ཧཱ་ཀཱ་ལི་ཧཱུྃ་བྷྱོཿ དྲྀ་ཤྱ་ཛཿཧཱུྃ་བཾ་ཧོཿ ས་མ་ཡ་སྟྭཾ། ས་མ་ཡ་ཧོཿཨོཾ་མ་ཧཱ་ཀཱ་ལི་ཏྲག་རཀྵ་ཏིང་ལཾ་ས་མ་ཡ་ཛཿཧཱུྃ་བཾ་ཧོཿཨེ་ཧྱེ་ཧི་ཛཿཨཱ་རལླི་ཧོཿམ་མོ་ནག་མོ་ཏི༚་ལཾ། མ་མོ་ནག་མོ་དུནྟིང་བྷྱོ་ཛཿཧཱུྃ་བཾ་ཧོཿནག་མོ་དུན་བྷྱོ། ལན་ཉེར་གཅིག་སོགས་བརྗོད། བྷྱོ། ཐོད་རུས་དམར་པོ་གཏམས་པའི་དཀྱིལ་འཁོར་ནས། །ལྷ་སྲིན་དགུ་བརྒྱ་བསྣོལ་བའི་གབ་རྩེ་ལ། །རྡོ་རྗེ་རལ་གཅིག་སྲིད་པ་ཀུན་གྱི་ཡུམ། །བརྗིད་ཅིང་འགྱིང་བའི་ཚུལ་གྱིས་བཞུགས་སུ་གསོལ། །བྱང་ཤར་ཕོ་བྲང་མཛེས་པ་ན། །ཉི་ཟླ་པདྨའི་གདན་སྟེང་དུ། །བཾ་ཆེན་ཞིང་མཆོག་བསྣོལ་བ་ལ། །ཅི་བདེ་བར་ནི་བཞུགས་སུ་གསོལ། རཀྨོ་
རཀྵ་མ་ཧི་ཀུ་ལ་པདྨ་ས་མ་ཡ་ཏིཥྛ་ལྷན། ཧཱུྃ་རྡོ་རྗེ་འཆང་གི་སྤྱན་སྔ་རུ། །ཇི་ལྟར་ཁས་བླང་དམ་བཅས་ལྟར། །བྱིན་གྱིས་བརླབས་པའི་གནས་འདིར་ནི། །དྲག་མོ་འཁོར་བཅས་བཞུགས་སུ་གསོལ། །ཅེས་བཞུགས་སུ་གསོལ་བས་དམ་ཡེ་གཉིས་མེད་དུ་གྱུར་པར་མོས། འཁོར་ནག་མོ་འབུམ་སྡེ་ཐམས་ཅད་ཀྱང་གཅེར་བུ་རལ་པ་ཅན་གཡས་མི་སྙིང་། །གཡོན་བནྡྷ་སྐྲ་ཅན་ཐོགས་པའོ། །ཐམས་ཅད་ཀྱི་ཐུགས་ཀར་ཏྲག་བྷྱོ་མ་ཡིག་གིས་མཚན་པའོ། །དམ་ཚིག་གི་རྒྱ་བསྟན་ལ། དུད་པའི་སོལ་བ་མ་འཁོར་དང་བཅས་པ་ཁྱེད་རྣམས་ཀྱི་སྐུ་མྱུར་དུ་སྟོན་ཅིག །སྐུ་མི་སྟེན་ན་ཡང་ཡིད་ལ་གང་འདོད་པ་དེ་གྲུབ་པར་གྱིས་ཤིག །ནང་མཆོད་གཏོར་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་སྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། ཨོཾཱ་ཧ་ན་ཧ་ན་བཛྲ་ས་མ་ཡ་མཱ་ཏི་ཀྲ་མ་ནཾ་ཧཱུྃ་ཕཊ། ཅེས་དམ་ལ་བཞག་ནས་ཕྱག་བྱ་བ་ནི། བྷྱོ། བསྐལ་པ་མང་པོར་རང་རྒྱུད་ཆེར་སྦྱངས་པས། །སྙིང་རྗེའི་སྟོབས་ཀྱིས་ཕན་པའི་གཟུགས་སྟོན་པ། །བདེ་གཤེགས་རྒྱལ་བའི་བསྟན་པ་བསྲུང་བ་དང་། །གདུག་པ་འདུལ་མཛད་ཁྱོད་ལ་ཕྱག་འཚལ་ལོ། །རྒྱལ་བའི་བཀའ་སྡོད་རིག་འཛིན་ཕོ་ཉ་མོ། །བསྟན་དགྲ་ཚར་གཅོད་གསང་སྔགས་སྲུང་མའི་
གཙོ། །བཀའ་སྡོད་ཕོ་ཉ་ཡང་སྤྲུལ་སྡེ་དཔུང་བཅས། །མ་མོ་འཁོར་དང་བཅས་ལ་ཕྱག་འཚལ་ལོ། མཆོད་པ་འབུལ་བ་ནི། ཧཱུྃ། ཐོད་ཆེན་བྷནྡྷ་འབར་བའི་སྣོད་མཆོག་དང་། །གྲུ་གསུམ་ཆུ་སྐྱེས་པདྨ་འདབ་བཞིའི་སྣོད། །ཁྲག་གི་མཆོད་ཡོན་མེ་ཏོག་སྣ་ཚོགས་ཕྲེང་། །དྲི་སྤོས་གསུར་ཆེན་སྒྲོན་མེ་སྣང་གསལ་འབར། །བདུད་རྩི་རྣམ་ལྔའི་དབུས་གནས་བཅུད་ཀྱི་མཆོག །རོ་བརྒྱའི་ཞལ་ཟས་ཐོད་རྔ་རྐང་། །གླིང་དུང་། རྔ་གཤང་གསང་བའི་རྔེའུ་ཆུང་ཏིང་ཏིང་འཁྲོལ། །གཟུགས་སོགས་འདོད་ཡོན་ལྔ་དང་ཉེར་སྤྱོད་ལྔ། །གསང་སྔགས་གསང་རྫས་ཤུ་ཀྲ་སི་ཧ་ལ། །རྩ་བརྒྱད་ལོ་མ་སྟོང་སྦྱར་ཨ་མྲྀ་ཏ། །རྒྱུ་རྐྱེན་རྨད་བྱུང་བསྒྲལ་དང་མཁའ་གསང་ཁྲག །འབྲུ་སྣ་ཁྲག་སྣ་བདུད་རྩི་རིན་ཆེན་བསྲེས། །རྩི་མངར་གྱིས་བྲན་དམར་གུར་དཀར་ཐིག་སྒྲོན། །དམ་རྫས་གཏོར་མ་ཕུན་སུམ་ཚོགས་པ་དང་། །མི་དབང་འབྲས་བུ་སྨིན་པའི་ཤ་དང་ནི། །ཤིང་ལོ་རླུང་ཁྱེར་ས་ལ་མ་ཕོག་པ། །མཚལ་གྱི་ཤིང་ཏོག་མ་མོ་མཉེས་རྫས་བཅས། །མཆོད་པའི་དངོས་པོ་རབ་འབྱམས་སྣ་ཚོགས་པས། །མ་གཅིག་དཔལ་ལྡན་ལྷ་མོ་དུད་སོལ་མ། །ཡེ་ཤེས་ལས་དང་འཇིག་རྟེན་ཚུལ་འཛིན་པའི། །སྣང་སྲིད་མ་མོ་མཁའ་འགྲོའི་དཀྱིལ་འཁོར་མཆོད། །རཀྨོ་དུནྟིང་མ་ཡ་ཧ་ཧི། ནག་མོ་དུན་ཏིང་མ་མ་ཡ་ཧ་ཧི། །
ཨརྒྷཾ་ནས་ཤབྡ་ཨ་མྲྀ་ཏ་རཀྟ་པཉྩ་ཀཱ་མ་གུ་ན་པྲ་ཏཱིཙྪ་སྭཱ་ཧཱ། ཨོཾ་སརྦ་སཾ་ཤོ་དྷ་ནི་ཧཱུྃ་ཕཊ། ཨོཾ་སྭ་བྷཱ་ཝ་སོགས་། གཏོར་མའི་ནང་དུ་ཧ་སེར་པོས་ཁ་དོག་ངན་པ་བཅོམ་ནས། མདོག་ཕུན་སུམ་ཚོགས་པ། ཧོཿདཀར་པོས་དྲི་ངན་པ་བཅོམ་ནས་དྲི་ཕུན་སུམ་ཚོགས་པ། ཧྲཱིཿ སྔོན་པོས་རོ་ངན་པ་བཅོམ་ནས་རོ་ཕུན་སུམ་ཚོགས་པའི་བདུད་རྩིའི་རྒྱ་མཚོར་གྱུར། ཨོཾ་ཧ་ཧོཿཧྲཱིཿ ལན་གསུམ་ཨོཾ་ཧཱུྃ་ཤྲི་ཡཻ་དེ་བཱི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ་ཛཿས་པ་རི་བཱ་ར་ཨོཾ་མ་ཧཱ་མཱཾ་ས་ཁཱ་ཧི། མ་ཧཱ་གོ་རོ་ཙ་ན༴ །མ་ཧཱ་བ་སུ་ཏ་ཨི་དཾ་བ་ལིང་གྲྀཧྞ་པཱ་ཡ་ཧཱུྃ་ཕཊ་སྭཱ་ཧཱ། ཨོཾ་རོ་རུ་ཨེ་ཀ་ཛཱ་ཊི་སྙིང་ཁ་རཀྨོ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཛཿཛཿ ས་པ་རི་བ་ར་ཨི་དམ་བ་ལི༚་ཏ་ཁ་ཁ་ཁཱ་ཧི་ཁཱ་ཧི། ཨེ་ཀ་ཙ་ཏི་ཏི་ལི་ཏི་ལི་རམ་པ་རམ་པ་ཁཱ་ཧི། ས་པ་རི༴ ཨོཾཱ་ཁྱི་ཁ་ལེ་ནག་མོ་ཧཱུྃ་ཕཊ། ས་པ་རི༴ ཨོཾ་ཏྲཀ་རཀྵ་མ་ཧི་དུན་བྷྱོ། །མ་ཧཱ་ཡཀྵ། ཏཱིཀྵྞ་ཀཱལི་དུན་བྷྱོ། །ཨི་དཾ་བ་ལི༚་པཱུ་ཛ་ཁཱ་ཧི། །མ་མོ་ནག་མོ་བེ་ཏཱ་ལི། །ཀུ་ལུ་ཀུ་ལུ། །ཧ་ཧ་ཧ། མ་ཧཱ་མཱཾ་ས་ཁ་རཾ་ཁཱ་ཧི། མ་ཧཱ་རཀྟ༴ མ་ཧཱ་ཙིཏྟ༴ མ་ཧཱ་བ་སུ་ཏ་ །མ་ཧཱ་མཉྫུ་མེ་ཙི་མ་ཧཱ་གོ་རོ་ཙ་ན༴ །མ་ཧཱ་ཨ་མྲྀ་ཏ། མ་ཧཱ་སུ་ར་ཏ་ཁ༴ །མ་ཧཱ་བ་ལི༚་ཏ༴ མ་ཧཱ་ཀི༚་ནི་རི་ཏི་ཁ་རཾ་ཁཱ་ཧི། བྷྱོ་རཀྨོ་བྷྱོ། རཀྨོ་བྷྱོ་བྷྱོ། རཀྨོ་ཐུན་བྷྱོ། ཁ་ལ་ནག་ཆེན་མོ། རཀྨོ་ཨ་བྱ་ཏ་བྱ་།ཐུན་བྷྱོ།ུ རུ་ལུ་
ཧཱུྃ་བྷྱོ། མ་ཧཱ་བ་ལི༚་ཏ་ཁ་ཁ་ཁཱ་ཧི་ཁཱ་ཧི། ཨོཾ་བ་ལི་ཏཾ་ཁ་རཾ་ཁཱ་ཧི། ཡོ་གི་ནི་ཁ་རཾ་ཁཱ༴ །ཌཱཀྐི་ནཱི་ཁ་རཾ༴ །སྟཾ་བ་བྷ་ག་ཏ་ཨ་ཀ་ས་ལ་ཧོཿ ཨོཾ་རུ་རུ་རོ་རུ་ཙ་པ་ལ་ཨ་ཤུག་མེ་མ་ཧཱུྃ་མ་བྷྱོ་ཛཿཛཿ ས་པ་རི༴ ཨོཾ་བཛྲ་རེ་མ་ཏི་མ་བྷྱོ་ཛཿ ས་པ་རི༴ བྷྱོཤ་ཟ་ཌཱ་ཀི་མ་མོ་ཙིཏྟ་ཧྲི༚་ཧྲི༚་ཛཿ ས་པ་རི༴ ཨོཾ་བྷྱོ་རཱུ་ཏྲ་ཀཱ་ལི་ཛཿ ས་པ་རི༴ ཨོཾ་མ་མ་ར་ལི་པྲ་མ་ཡ་ཀཱ་ལི་ཛཿ ས་པ་རི་བཱ་ར༴ ཨཱོཾ་ཨ་ཀ་ནི་ཙ་ལི་མི་ཐུ་ཕྲི་ལི་རེ་སྭཱ་ཧཱ། པཉྩ་ཌཱ་ཀི་ནཱི་ཨི་དཾ༴ ཨོཾ་བཛྲ་ཏྲིག་ན་ཏྲིག་ཛཿ ཏྲིག་སྨན་རུམ་ཙམ་ཙམ་ཛཿ ཨི་དཾ༴ ཨོཾ་བཛྲ་མ་ཧཱ་མ་ཏྲི་དུང་དུང་ཏྲི། ཨི་དམ༴ ཏ་དྱ་ཐཱ། ཨོཾ་ཚོམ་མེ་ལེ་དུ་ཀ་ཧཱུྃ་ཕཊ། ཨི་དཾ༴ ཨོཾ་ཨཱཿཧཱུྃ་བཛྲ་ཡཀྵཾ་དྷ་རི་ནིཿ ཨི་དཾ༴ ཨོཾ་མ་མ་ཧྲི༚་མ་མ་ཧྲི༚། ཨི་དཾ་བ་ལི༚་ཏ་ཁ་ཁ་ཁཱ་ཧི་ཁཱ་ཧི། དཔལ་ལྡན་ལྷ་མོ་དུད་པའི་སོལ་བ་མ། འཁོར་ཡེ་ཤེས་ལས་དང་འཇིག་རྟེན་སྲིད་པའི་མ་མོ་བྱེ་བ་འབུམ་སྡེའི་ཚོགས་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། །འཇིག་རྟེན་གྱི་རྒུད་པ་སོལ། སེམས་ཅན་གྱི་ཕན་བདེ་སྤེལ། །རྣལ་འབྱོར་པ་རྣམས་ཀྱི་སྟོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས། སྡང་བའི་དགྲ་ཐུལ།
གནོད་པའི་བགེགས་ཆོམས། ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཐུན་རྐྱེན་སྨོན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་ཕྲིན་ལས་མཛོད་ཅིག །བསྟོད་པ་ནི། བྷྱོ། ཏིལ་མར་གྱིས་བཀུས་ལན་བུ་གཅིག་འཆང་རོ་ཉེའི་རྣ་ཆས་སྒེགས་ཅིང་ཆ་ལུགས་མ་ལུས་འཆང་། །རྒྱན་ཏུ་རྐང་སྒྲོག་ལྕགས་ལས་བྱས་པ་གཅིག་གིས་རང་གི་རྐང་པ་མཛེས་པར་བྱས་པ་སྟེ། །གཅེར་བུ་བོང་བུ་ཞོན་ནས་འགྲོ་བ་འདི་ན་རྒྱུ་བ་འདི་ནི་ལྷ་མོ་ཁྱོད་ཉིད་ཀྱིས། །བདག་ཉིད་མཛེས་པར་ཤེས་ཀྱིས་གཞན་ལྟས་ཁྱོད་ཀྱི་སྤྱོད་པ་མཚོ་ཆེན་དོན་དག་སུ་ཡིས་ཤེས། །འཁོར་བ་འཇིག་པའི་ཚེ་ན་མི་ལུས་དག་ལ་ཁྲག་དང་ཞག་འཛག་དུད་པ་འཐུལ་བ་ན། །ལྷ་མོ་མཆེ་བ་གཙིག་པ་ཁྱོད་ཀྱི་ཞལ་དུ་འགྲོ་ཀུན་སྐད་ཅིག་ཞུགས་པར་གྱུར། །ནག་མོ་མི་ཐོད་ཐོགས་པ་ཁྱོད་ནི་རྣལ་འབྱོར་གྲུབ་པའི་སྤྱོད་ཡུལ་ཅན་དེ་དུར་ཁྲོད་དགྱེས། །ཁྱོད་ནི་གཡོན་ཅན་མནན་ཅིང་ནད་དང་འཆི་བའི་འཇིགས་པ་སེལ་ཞིང་མི་ཟད་དྲིལ་ཡང་སྒྲོགས། །ཁྱོད་ནི་དཔའ་བོ་དག་གི་མགོ་བོའི་ཅོད་པན་ལེགས་སྤྲས་གཡུལ་དུ་མཚོན་གྱིས་བཅད་པ་ཡིས། །ཕྲེང་བ་ཐོགས་ཤིང་གར་བྱེད་ལག་པ་མཉེན་བརྐྱང་རྐུབ་
ཚེས་ཆེ་ལ་ཀླུ་དབང་གཤིབས་པ་ཡིས། །སྐ་རགས་འཆིང་ཞིང་ཤཀྟི་མདུང་དང་རལ་གྲི་ཐོགས་ལ་ཁྲག་དང་ཆང་གི་མྱོས་གྱུར་པ། །མིག་རྩ་དམར་པོ་གྱུར་ཅིང་མཚན་མོ་དུར་ཁྲོད་རྒྱུ་བ་འབྱུང་པོ་ཕལ་ཆེར་རྣམས་ཀྱིས་མཐོང་། །ཀོ་རློན་ཆེན་པོ་དྲལ་ཏེ་རྒྱངས་པའི་གོས་ཀྱིས་སྟོད་གཡོགས་སྨད་ནི་སེར་པོས་དཀྲིས། །མི་ཡི་རྒྱུ་མ་གསར་པའི་སྦུབས་ཀྱིས་ཞལ་གྱི་ཟླ་བ་བརྒྱན་ཅིང་དྲིལ་བུ་འགྲམ་པར་འཁྲོལ། ལུས་ནི་སྣུམ་གྱིས་གསར་དུ་བྱུགས་ཤིང་ཁྲག་དང་ཞག་མང་འཛག་པའི་ཐིག་ལེས་ཚོམ་བུ་བྲིས། །མི་ཡི་ཤ་ལ་སོ་ཡིས་ཆེམ་ཆེམ་གཅོད་བྱེད་ཐོད་པ་ཅན་གྱིས་བདག་ལ་སྐྱོང་གྱུར་ཅིག །དྲག་པོ་དྲག་མོ་མི་ཟད་མི་ཤ་ཁ་ན་ཐོགས་པ་སྔོན་ཆད་མ་བྱུང་ཁྱོད་མཐོང་ན། །མ་མོ་རྣམས་ཀྱང་སྐྲག་ཅིང་རྟབས་ལ་རྔམས་པ་འདོན་ཅིང་མིག་རྩ་རིག་རིག་ཁྱོད་ལ་བསྟོད། །ནག་མོ་བཟང་མོ་ལུས་མདོག་ནག་ཅིང་བཟོད་པར་དཀའ་བ་ཁྱོད་ལ་བརྒྱ་བྱིན་ལ་སོགས་ཀྱང་། །ཞབས་ལ་ཉིན་རེ་བཞིན་ཏུ་བསྟོད་པར་བྱེད་ཅིང་གཤིན་རྗེའི་རྒྱལ་པོ་ཉིད་ཀྱང་འདར་ཞིང་འདུད། །མི་རྣམས་དང་ནི་འགྲོ་བ་མ་ལུས་འཇུག་བརྟུལ་ནས་ནི་ཁྱོད་ཀྱི་རྣ་བ་ཡ་གཅིག་ལ། །བྲང་གིས་འགྲོ་བའི་གདེངས་ཀ་སྟོང་དང་ལྡན་པ་གཅིག་གིས་བརྒྱན་ནས་ཁྱོད་ལ་རྒྱན་ཏུ་བྱས། །ཡ་གཅིག་ལ་ནི་སེང་གེ་མཆུངས་མེད་ཐོགས་ཤིང་རྒྱ་མཚོས་མཐའ་བསྐོར་
ས་གཞི་མ་ལུས་གནོན། །སྟེང་ནས་རྒྱུ་བའི་ཉི་མ་འོད་ཟེར་སྟོང་ལྡན་དེ་ནི་ཁྱོད་ཀྱི་ལྟེ་བའི་ཕྱོགས་སུ་ཤར། བྷྱོ། རྒྱ་མཚོའི་ཀློང་ནས་མེ་འབར་ཁྱོད། །མཚོ་རྣམས་སྐེམས་པར་ནུས་མ་སྟེ། །བུད་མེད་ཐམས་ཅད་ཞི་མཛད་ཕྱིར། །ལྷ་ཆེན་སྐུ་ཡི་ཕྱེད་དུ་བཞུགས། །རྫོང་དང་བཀའ་བཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་མ། །མི་ནད་གང་ཡིན་ཁྱོད་མིང་ཤེས། །དེ་ལ་འཇིགས་པ་མེད་པར་གྱུར། །གཤིན་རྗེའི་ལྕམ་མོ་བདུད་ཀྱི་ཡུམ། །འདོད་པ་ཁམས་ཀྱི་དབང་ཕྱུག་མ། །ནད་དོ་ཅོག་གི་བདག་མོ་སྟེ། །སངས་རྒྱས་བསྟན་པ་སྲུང་བ་ཡི། །དཔལ་ལྡན་ལྷ་མོ་ཁྱོད་ལ་བསྟོད། ཞེས་སམ། བསྡུ་ན། བྷྱོ། དཔལ་ལྡན་ལྷ་མོ་མི་ཕམ་སྲིད་གསུམ་བདག །རང་དོན་སྒྲུབ་ཕྱིར་རྣམ་ཐར་ལ་གཞོལ་ཡང་། །སྙིང་རྗེའི་དབང་གིས་རྗེས་ལ་ཐོབ་པ་ཡི། །ཤེས་རབ་སྣ་ཚོགས་དག་གིས་འགྲོ་དོན་མཛད། །ལྷོ་ཕྱོགས་གཤིན་རྗེའི་ཕོ་བྲང་རྟག་ཏུ་གནས། ཁམས་གསུམ་སྐད་ཅིག་ཙམ་གྱིས་སྐོར་བར་བྱེད། །གཞན་ལ་དབང་བསྒྱུར་འདོད་ཁམས་ཕ་མཐར་ཕྱིན། །དབང་ཕྱུག་ཆེན་པོའི་སྐུ་ལ་དགྱེས་འཁྲིལ་མ། །ལྷ་དབང་བརྒྱ་བྱིན་ལྷ་མིན་དབང་པོ་དང་། །ཚངས་པའི་རྒྱལ་པོ་ས་འོག་དབང་པོ་དང་། །རྒྱལ་ཆེན་བཞི་ལ་སོགས་པས་ཕྱག་བྱས་མ། །
བདུད་དང་གཤིན་རྗེའི་རྒྱལ་པོ་འདར་ཞིང་འདུད། །མཚན་མོ་ནག་མོ་ཤིན་ཏུ་གཏུམ་པའི་གཟུགས། །མ་མོ་སྲིན་མོའི་ཚོགས་རྣམས་འདར་ཞིང་དངང་། །ཕྱོགས་བཅུའི་དུག་བསྡུས་ཉི་མ་ཐིམས་པར་མཛད། །ནད་རྣམས་སློང་བྱེད་ནད་བདག་དམ་ལ་འདུ། །བདུད་རྩིའི་བཅུས་བསྡུས་ཟླ་བ་ཐིམ་མཛད་མ། །ནད་ཡམས་གཅོད་མཛད་སྨན་མོ་དམ་ལ་འདུ། །གང་ཞིག་ཁྱོད་ལ་དད་ན་མ་བས་བྱམས། །ལྷ་མོ་ཁྱོད་ལ་བདག་གིས་རྟག་ཏུ་བསྟོད། །ཅེས་སམ། བྷྱོ། སྔོན་ཚེ་དཔག་བསམ་བྱང་ཆུབ་ཤིང་གི་དྲུང་། །རྒྱལ་བ་ཐུབ་པ་ཆེན་པོའི་སྤྱན་སྔ་རུ། །བསྟན་པ་གཉན་པོ་བསྲུང་བར་དམ་བཅས་པ། །ཁྲག་འཐུང་དུད་སོལ་སྐུ་ལ་ཕྱག་འཚལ་བསྟོད། །མ་བྷྱོ། ཀུན་ཏུ་བཟང་མོ་དབྱིངས་ཀྱི་མུ་ཁ་ལེ། །འགྲོ་བའི་དོན་དུ་རྡོ་རྗེ་སྲོག་སྒྲུབ་མ། །ཡེ་ཤེས་མ་ལྔ་ཡོངས་རྫོགས་སྐུ་རུ་ཤར། །ཐུགས་རྗེའི་རྫུ་འཕྲུལ་མྱུར་མགྱོགས་གློག་ལྟར་འཁྱུགས། །ཀེ་སིང་མཁའ་འགྲོ་དབང་ཕྱུག་མ་ཚོགས་དང་། །སྨན་མོ་རྗེ་མོ་བརྟན་མ་ཌཱ་ཀིའི་ཚོགས། །ཡོངས་ལ་དབང་བསྒྱུར་སྤྲུལ་པ་དེ་ལྟར་འགྱེད། །འཁོར་ཚོགས་སྤྲུལ་པར་བཅས་ལ་བདག་བསྟོད་དོ། །བྷྱོ། སྨུག་ནག་ཁྲོས་མ་རལ་གཅིག་མ། །ཞིང་དབྱུག་ཕྱར་ཞིང་དགྲ་སྙིང་ཟ། །འཇའ་སྤྲིན་གོས་གྱོན་མི་ལྤགས་འཕྱང་། །སྔགས་
སྲུང་ཆེན་མོ་ཁྱོད་ལ་བསྟོད། །དཔལ་ལྡན་ཤན་པ་མི་སྲུན་མ། །གཅེར་མོ་དོན་སྙིང་ཟ་ཞིང་རྒྱུག །དགྲ་བགེགས་མྱོས་བྱེད་རིམས་ནད་འབེབས། །ནམ་གྲུ་ནག་མོ་ཁྱོད་ལ་བསྟོད། བྷྱོ། མཁའ་ལ་དབང་སྒྱུར་ཡིད་བཞིན་སྤྲུལ་པའི་སྐུ། །ཡ་མཚན་རྨད་བྱུང་ལུས་ལ་ཏིལ་མར་བྱུགས། །དབང་ཕྱུག་ནག་མོ་གསང་བའི་རེ་མ་ཏི། །ནག་མོ་སྟོང་གི་གཙོ་ལ་ཕྱག་འཚལ་བསྟོད། བྷྱོ། དཔལ་ལྡན་གཟུགས་མ་འདོད་ཁམས་གཙོ་མོ་ཁྱོད། །དྲེའུ་རྟ་ཞོན་ནས་དཔག་ཚད་བརྒྱད་བརྒྱར་རྒྱུག །བེ་ཅོན་ཐོད་པ་དམ་པ་རང་རྟགས་འཛིན། །རེ་ལྡེ་ས་སྟོད་གཡོགས་སྦྲུལ་གྱི་ཤམ་བུ་ཅན། །ལྟེ་བར་ཉི་ཤར་གཙུག་ན་ཟླ་རྒྱས་མ། །ཁྲག་ནད་བདག་མོ་དབྱིངས་ཕྱུག་དཔལ་འབར་མ། །ལྷ་མོ་རེ་མ་ཏི་ལ་བསྟོད་པར་བགྱི། །རྣལ་འབྱོར་བཅོལ་བའི་ཕྲིན་ལས་གྲུབ་པར་མཛོད། བྷྱོ། ལྷ་ལ་དབང་སྒྱུར་ལྷ་མོ་དཔལ་འབར་མ། །དབང་ཕྱུག་སྲས་མོ་དཀར་མོ་དུང་སྐྱོང་མ། །སུམ་ཅུ་རྩ་གསུམ་གནས་ཀྱི་གཙོ་མོ་མཛད། །ལྷ་མོ་དཔལ་འབར་མ་ལ་བདག་བསྟོད་དོ། །བྷྱོ། ཀླུ་ལ་དབང་སྒྱུར་ཀླུ་མོ་དཔལ་འབར་མ། །གཙུག་ན་རིན་ཆེན་བུ་མོ་ཡིད་འོང་མ། །རོལ་པའི་མཚོ་བདུན་གནས་ཀྱི་གཙོ་མོ་མཛད། །ཀླུ་མོ་དཔལ་འབར་མ་ལ་བདག་བསྟོད་དོ། །
བྷྱོ། གནོད་སྦྱིན་དབང་མཛད་གནོད་སྦྱིན་དཔལ་འབར་མ། །གང་བ་བཟང་མོའི་བུ་མོ་ཤིང་གྲིབ་ཅན། །ནགས་ཚལ་དྲྭ་བ་ཅན་གྱི་གཙོ་མོ་མཛད། །གནོད་སྦྱིན་དཔལ་འབར་མ་ལ་བདག་བསྟོད་དོ། །བྷྱོ། བདུད་ལ་དབང་སྒྱུར་བདུད་མོ་དཔལ་འབར་མ། །རེ་ལྡེ་མགོ་ཉག་བུ་མོ་རེ་མ་ཏི། །བདུད་མཁར་རྩེ་དགུའི་གནས་ཀྱི་གཙོ་མོ་མཛད། །བདུད་མོ་དཔལ་འབར་མ་ལ་བདག་བསྟོད་དོ། །བྷྱོ། །སྨོན་ལམ་དབང་གིས་ལྷ་མོའི་ཚུལ་འཛིན་ཅིང་། །ཡེ་ཤེས་ཞི་བའི་ངང་ལས་མ་གཡོས་ཀྱང་། །རྣམ་འཕྲུལ་དུ་མས་འགྲོ་དོན་དཔག་མེད་མཛད། །གཅེར་བུ་ཡིད་འཕྲོག་མ་ལ་བདག་བསྟོད་དོ། །ཧཱུྃ། སྨན་བཙུན་དཔལ་མོ་འཛོམ་པ་སྐྱིད། །དང་པོ་སྲིད་པ་ཆགས་བྱེད་པའི། །ཨེ་ཀ་ཙ་ཏི་མཐུ་མོ་ཆེ། །མུ་སྟེགས་ལྷ་མོ་སྲོག་སྒྲུབ་མ། །བོད་སྐྱོང་ལྷན་ཅིག་སྐྱེས་མ་སྟེ། །དྲག་མོར་བཞེངས་ཚེ་སྤྱང་ཞོན་མ། །ལས་བྱེད་ཆེན་མོ་རེ་མ་ཏི། །ཤིན་ཏུ་ཁྲོས་ཚེ་རག་གདོང་མ། །སྲིད་གསུམ་ཤ་ཟ་ཁ་མོ་ཆེ། །ཆེ་ཞེ་ཆེན་མོ་ཁྱོད་ལ་བསྟོད། བྷྱོ། མ་མོ་ནག་མོ་མཐུ་རྩལ་ཅན། །མུ་སྟེགས་ལྷ་མོ་རྫུ་འཕྲུལ་བདག །ནོང་སྲང་གཅིག་གི་རྗེས་གཅོད་མ། །ནས་བྲེ་གང་གི་ཕྱིར་འབྲང་མ། །དཀོར་བདག་ངས་ནུས་མ་ལ་བསྟོད། ཧཱུྃ། ཆོས་དབྱིངས་སྐྱེ་བ་མེད་པ་ལས། །ཐུགས་
རྗེའི་གཟུགས་ཀྱིས་སྐུ་སྤྲུལ་པ། །འགྲོ་བའི་དོན་དུ་བྱོན་པ་ལ། །རྫུ་འཕྲུལ་སྣ་ཚོགས་སྟོན་མཛད་མ། །གཙོ་མོ་བཀྲ་ཤིས་ཚེ་རིང་མ། །མཁའ་འགྲོའི་དབང་ཕྱུག་ལྔ་ལ་བསྟོད། །ཆོས་དང་ཡེ་ཤེས་དམ་ཚིག་ལྷ། །དབང་གི་ལྷ་མོ་སྤྲུལ་པའི་སྐུ། །ཤ་ཟ་ལས་ཀྱི་མཁའ་འགྲོ་སྟེ། །ཕྲིན་ལས་སྣ་ཚོགས་དེ་ལ་འདུད། བྷྱོ། བཀའ་ཡི་ཚོགས་དང་བཅས་ཉིད་དུ། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་བྱོན་སྐྱོང་མ་རྣམས། །འདིར་སྦྱོན་དམ་བསྐང་མཆོད་བསྟོད་བཞེས། །རྒྱ་གར་ཡུལ་དུ་ཏིང་ཏིང་ཤག །གཡུང་དྲུང་བོན་གྱི་འཕྲུལ་ཏིང་ཞང་། །ཀོང་ཡུལ་མཐིལ་དུ་དེ་མོ་ཞེས། །གུ་རུའི་དྲུང་དུ་བོད་སྐྱོང་མ། །ཁྱོད་ལ་བསྟོད་ཅིང་མཆོད་པ་འབུལ། །བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་དུ། །མཆོག་ཏུ་དད་པས་བསྟོད་པར་བགྱི། །དེ་ནས་སྔགས་བཟླ་བ་ནི། ལྷ་མོའི་ཐུགས་ཀར་ཧཱུྃ་ཡིག་གི་ཟླ་ཚེས་ཟླ་བའི་དཀྱིལ་འཁོར་དུ་གྱུར་པའི་འོད་ཟེར་ཤངས་བུག་ནས་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་རླབས་བདུད་རྩིའི་བཅུད་དང་སྨན་ཐམས་ཅད་ཀྱི་ནུས་པ་བསྡུས་ནས། ལྷ་མོའི་སྤྱི་གཙུག་བཾ་ལས་བྱུང་བའི་བུམ་པ་དཀར་པོའི་ནང་དུ་ཞུགས། བུམ་པའི་ཁ་ནས་བདུད་རྩི་དཀར་པོ་འོ་མའི་རྒྱུན་ལྟ་བུ་ལྷུད་ལྷུད་བབ། །
ལྷ་མོའི་སྤྱི་བོ་དང་ཞལ་ནས་ཞུགས་པས་སྐུ་ལུས་ངང་ལྟེམ་མེ་གང་བས་མ་ཤོང་ལུད་པའི་ཚུལ་དུ་ཞལ་ནས་བདུད་རྩིའི་རྒྱུན་ཆུ་བོ་ལྟ་བུ་བབ། རང་དང་བསྲུང་བྱ་ནད་པའི་སྤྱི་བོ་ཚངས་བུག་དང་ཁ་ནས་ཞུགས་པས་ལུས་ཐམས་ཅད་ང་ལྟེ་མ་གྱིས་གང་། ནད་རླུང་མཁྲིས་བད་ཀན་རིམས་ནད་ཡམས་ནད་དམ་ཚིག་ཆགས་ཉམས་མ་མོ་འཁྲུགས་པའི་ཁ་རླངས་གདུག་རྩུབས་ཐམས་ཅད་བ་སྤུའི་ཁུང་བུ་ནས་རླངས་པ་སྔོན་དམར་གྱི་ཚུལ་དུ་བུད་ནས་ནམ་མཁའ་ལ་འཇའ་ཡལ་བ་ལྟར་རམ། མེ་ལོང་ལ་ཧ་བཏབ་པ་ཡལ་བ་ལྟར་བསམ། གཞན་ཡང་མགྲོན་ཐབས་ཀྱི་ལྷ་མོའི་ཐུགས་ཀར་པད་ཉིའམ། པད་ཟླས་སྲོག་ཡིག་གམ་མིང་ཡིག་དང་བ་ཐིག་ལེས་མཚན་པའི་མཐའ་བསྐོར་དུ་རང་རང་གི་སྲོག་སྔགས་རིགས་ཀྱི་ཁ་དོག་ཅན་གྱིས་བསྐོར་བ། བདག་བསྐྱེད་ཀྱི་ཐུགས་ཀའི་ས་བོན་ལས་བྱུང་བའི་འོད་ཟེར་ཕོག་པས། ཐུགས་ཀྱི་རྒྱུད་རབ་ཏུ་བསྐུལ་བས་ཅི་འདོད་པའི་བྲིན་ལས་རབ་འབྱམས་ཐོགས་མེད་དུ་བསྒྲུབ་པར་མོས་ལ་སྲོག་གསུམ་གྱི་དགོངས་པའི་ཀློང་དུ་ལོག་རྡུག་འབྱམས་གསུམ་གྱི་སྐྱོན་རང་སར་བཅིལ་ཏེ། །ཧེ་རུ་ཀའི་ཡིག་བརྒྱ་དང་གོང་གནོན་གྱི་བསྙེན་སྔགས་སྔོན་ཏུ་འགྲོ་བས་གཙོ་མོ་ལ། ཨོཾ་ཧཱུྃ་དེ་བཱི་སོགས་སོ་སོའི་བསྙེན་པའམ། མགྲོན་ཐབས་ལ་བསྡུ་ན། རོ་རུ་ཨེ་ཛཱ་ཊི་ཡང་སྙིང་བཅུ་བདུན་མ། བྷྱོ་བདུན་མ་ཙམ་བཟླས་པའི་མཐར། །ཨོཾ་ཤྲཱི་མ་ཧཱ་ཀ་ལི་ས་པ་རི་ཝཱ་ར་ཨརྒྷཾ་ནས་ཤབྡའི་བར་གྱིས་མཆོད་ཅིང་འདོད་པའི་དོན་ལ་གསོལ་བ་གདབ་བོ། །དེ་ནས་གསོལ་ཁ་བྱ་བ་ནི། གསེར་སྐྱེམས་གཏོར་འབུལ་སོགས་བཤམས། རྩ་བརྒྱུད་བླ་མ་སོགས་འགུགས་གཞུག་
རྒྱས་བསྡུས་གང་རིགས་བྱས་ལ། ཧོཿདགོངས་སུ་གསོལ་ལོ། །ཡེ་ཤེས་དབྱིངས་ཀྱི་དཀྱིལ་འཁོར་ནས་འཁོར་འདས་ཐམས་ཅད་ལ་ཁྱབ་ཅིང་འཆར་ལ་གཟིགས་པ། ཀུན་འབྱུང་མ་མོའི་དཀྱིལ་འཁོར་གྱི་གཙོ་མོ། དབྱིངས་ཕྱུག་ཆེན་མོ་མུ་ཁ་ལེ་ལ་གསོལ་ལོ། །རྟག་པའི་རྒྱལ་མོ་ཆེན་མོ་ལ་གསོལ་ལོ། །ཕྱི་ལྟར་རྗེ་བཙུན་འཕགས་མ་སྒྲོལ་མ་ལ་གསོལ་ལོ། །ནང་ལྟར་རྒྱལ་ཡུམ་རྡོ་རྗེ་རྣལ་འབྱོར་མ་ལ། །གསང་བ་ལྟར་ན་མཁའ་འགྲོ་གསང་བ་ཡེ་ཤེས་ལ༴ །ཚངས་པའི་སྲས་མོ་དབྱངས་ཅན་མ་ལ༴ །རིམས་ནད་ཀུན་སྐྱོབ་པ་རྞ་ཤ་བ་རི་ལ༴ །ཆོམ་རྐུན་བཟློག་མཛད་ལྷ་མོ་མ་རཱི་ཙྱཻ་ལ༴ །ཁྲག་འཐུང་གི་རྒྱལ་མོ་དུང་པའི་སོལ་བ་མ་ལ༴ །འཁོར་ཤན་པ་མ་གསུམ། རིགས་བཞིའི་མཁའ་འགྲོ། མ་མོ་བརྒྱད། ཕྲ་མན་མ་བརྒྱད། སྒོ་མ་བཞི། ནག་མོ་འབུམ་སྡེ་ལ༴ །རྒྱ་གར་ཡུལ་གྱི་ཙཎྜི་ཀཱ་ལ༴ །བལ་པོའི་ཡུལ་གྱི་རལ་གཅིག་མ་ལ༴ །བོད་ཡུལ་སྐྱོང་བའི་ལྷན་ཅིག་སྐྱེས་མ་ལ། །སྔགས་སྲུང་རྡོ་རྗེ་རལ་གཅིག་མ་ལ༴ །སྨུག་ནག་ཁྲོས་མ་རག་གདོང་མ་ལ༴ །དམར་སྨུག་དབང་གི་ཌཱ་ཀི་མ་ལ༴ །འབར་མ་མེ་ཡི་གདོང་ཅན་མ་ལ༴ །དགོངས་འདུས་རྗེས་འབྲང་འཛོམས་པ་སྐྱིད་ལ༴ སྙིང་ཐིག་བསྟན་སྲུང་སྲོག་སྒྲུབ་མ་ལ༴
བསྟན་དགྲའི་ཤ་ལ་ཟ་བའི་ཧོར་མོ་ཆེ་ལ༴ །འདོད་པ་ཁམས་ཀྱི་དབང་ཕྱུག་མ་ལ་མངའ་གསོལ་ལོ། །རང་བྱུང་སྲིད་པའི་རྒྱལ་མོ་ཆེན་མོ་ལ༴ །ཞི་མཛད་དཀར་མོ་འོད་ལྡན་མ་ལ༴ །དྲག་མོ་ཆེན་མོ་དམག་ཟོར་རྒྱལ་མོ་ལ༴ །བདུད་རྩི་སྨན་གྱི་རྒྱལ་མོ་ཆེན་མོ་ལ༴ །རྡོ་རྗེ་མཁའ་འགྲོ་གཤོག་རྒོངམ་ལ༴ །ཙིཏྟ་མཁའ་ཡི་གཤོག་གཅིག་མ་ལ༴ །ཚོགས་བདག་ཡུམ་མཆོག་དབང་མོ་ཆེ་ལ༴ །དཀར་མོ་ཆེན་མོ་དུང་སྐྱོང་རྒྱལ་མོ་ལ༴ །ཉི་ཟླ་སྟོང་གི་ཐོད་ཕྲེང་ཅན་མ་ལ༴ །གཏུམ་མོ་ཆེན་མོ་ཙ་མུནྜི་ལ། དབང་ཆེན་བཀའ་སྲུང་སྤྱང་ཞོན་དམར་ནག་ལ༴ །གཡུང་དྲུང་བོན་གྱི་དགྲ་བླ་མོ་ལ༴ །དཀར་སྔོ་དམར་ནག་དྲེལ་ཞོན་མ་ལ༴ །མ་མོ་རྡོ་རྗེ་གློག་མ་སྤྲིན་ལ༴ །རྡོ་རྗེ་གདན་སྐྱོང་ཁ་འབར་མ་ལ༴ །ལས་ཀྱི་མ་མོ་རེ་ཏི་མཆེད་བཞི་ལ༴ །གནོད་སྦྱིན་བུ་མོ་ཕག་གདོང་ཅན་ལ༴ །གཤིན་རྗེའི་གཏུམ་མོ་དུག་ཧྲུལ་མ་ལ༴ །གཟའི་ཆུང་མ་སྦལ་མགོ་མ་ལ༴ །མུ་སྟེགས་ཀྱི་ལྷ་མོ་རྐྱལ་འབུད་མ་ལ༴ །དུར་ཁྲོད་ཀྱི་བདག་མོ་ངས་ནུས་མ་ལ༴ །ལྷ་མོ་རྫོང་གི་དཀའ་ཟློག་མ་ལ༴ །དབྱིངས་ཕྱུག་ཆོས་ཀྱི་སྒྲོན་མ་མཆེད་ལྔ་ལ༴ །བཀྲ་ཤིས་ཚེའི་དབང་ཕྱུག་མ་མཆེད་ལྔ་ལ༴ །སྨན་བཙུན་རྡོ་རྗེ་གཡུ་སྒྲོན་མ་ལ༴ །བོད་སྐྱོང་བརྟན་མ་བཅུ་གཉིས་ལ༴
གསོལ་ལོ། ཆུ་སྲིན་གདོང་ཅན། བལ་མ་དྲེལ་སྣ། ཁྲི་སྨན་སི་ལི༴ སྙག་སྨན་སོར་ལྡེམ། མ་མོ་བདུན། སྲིང་མོ་བཞི། འབར་མ་དགུ། དུས་བཞིའི་ལྷ་མོ། དམག་གི་རྒྱལ་མོ། དབང་ཕྱུག་ཉེར་བརྒྱད། སྐྱོང་མ་བཅུ་གཉིས། ཡ་མ་བཅུ་གཉིས། ཡེ་ཤེས་དང་ལས་དང་འཇིག་རྟེན་ལས་གྲུབ་པའི་སྣང་སྲིད་མ་མོའི་ཚོགས་རྣམས་ལ་གསོལ་ལོ། །ངོ་བོ་དེ་བཞིན་གཤེགས་པ་རིགས་ལྔའི་ཡུམ་ལྔ། འབྱུང་བ་ལྔ་དང་། ཤ་ཁྲག་དྲོད་དབུགས་ཀུན་ཁྱབ་ཀུན་གྱི་བདག་མོ། དབྱིངས་རང་བྱུང་ཀུན་ཏུ་བཟང་མོར་ཡོངས་བཟླུམ་བ། །མིང་བརྒྱ་མཚན་སྟོང་། འཁོར་ཚོགས་སྨན་མོ་འབུམ་ཕྲག །མ་མོ་བྱེ་བ་ས་ཡ། སྤྲུལ་པ་དུང་ཕྱུར་གྲངས་མེད་འགྱེད་པ་ཁྱོད་རྣམས་ལ་གསོལ་ལོ། །དཔལ་ཁྲག་འཐུང་ཁྲོ་བོའི་དབང་པོ་དང་། །རྡོ་རྗེའི་སློབ་དཔོན་ཆེན་པོ་རྣམས་ཀྱི་བཀའ་དང་དམ་ལས་མ་འདའ། དམ་ཚིག་གི་རྡོ་རྗེ་ཟུང་། ཡེ་ཤེས་ཀྱི་བདུད་རྩིའི་བཅུད་སྟིམས་ལ་རྣལ་འབྱོར་པ་བདག་གིས་ཇི་ལྟར་བཅོལ་པའི་ཕྲིན་ལས་མཛོད། སངས་རྒྱས་ཀྱི་བསྟན་པ་སྲུངས། དཀོན་མཆོག་གི་ཆེ་བ་ཕྱུང་། སེམས་ཅན་གྱི་བདེ་སྐྱིད་སྤེལ། ཁྱད་པར་དུ་སྔགས་འཆང་རྣལ་འབྱོར་བ་བདག་ཅག་དཔོན་སློབ་འཁོར་དང་བཅས༴
པའི་ནད་གདོན་བར་ཆད། བྱད་ཕུར་རྦོད་གཏོང་། མོ་རྨིས་མཚན་ལྟས་ངན་པ། ཆགས་ཆེ་ཉམས་ང་། བདུད་དང་ལོག་འདྲེན་ཐམས་ཅད་ཞི་བར་མཛད་དུ་གསོལ། ཚེ་བསོད་དཔལ་འབྱོར་སྙན་གྲགས་དབང་ཐང་ཉམས་རྟོགས་ཡོན་ཏན་ཐམས་ཅད་ཟླ་བ་ཡར་གྱི་ངོ་ལྟར་རྒྱས་པར་མཛད་དུ་གསོལ། སྣང་སྲིད་འཁོར་འདས་རང་སེམས་སྣང་བ་དབང་དུ་འདུས་པར་མཛད་དུ་གསོལ། །ཆོས་བརྒྱད་དང་དུག་ལྔའི་རྣམ་རྟོག་བསྟན་འགྲོ་ལ་སྡང་བའི་དགྲ་བགེགས་ཚར་གཅོད་པར་མཛད་དུ་གསོལ། ནམ་ཞིག་བེམ་རིག་བྲལ་མ་ཐག་ཏུ་སྐྱེ་བ་གཞན་ཏུ་མི་གཏོང་བར་བདེ་ཆེན་དག་པའི་ཞིང་དུ་ལམ་སྣ་འདྲེན་པར་མཛད་དུ་གསོལ། སྐུ་ཡིས་ཞལ་སྟོན། གསུང་གིས་ལུང་སྟོན། ཐུགས་ཀྱིས་ཏིང་འཛིན་སྐྱེད། ཉིན་གྱི་གྲོགས་མཛོད། མཚན་གྱི་ཆུང་མ་མཛོད། འཁོར་ནོར་ལོངས་སྤྱོད་སྤེལ། རྣམ་རྒྱལ་གྱི་རྒྱལ་རྔ་རྡུངས། གཞི་བྱེས་ལམ་གསུམ་སྐྱོངས། ལུས་དང་གྲིབ་མ་བཞིན་འགྲོགས་ལ་ཅི་བསམ་པའི་དོན་ཐམས་ཅད་ཡིད་བཞིན་ཏུ་ལྷུན་གྱིས་འགྲུབ་པར་མཛད་དུ་གསོལ། བྷྱོ། དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་གཙིགས་བྱེད་ཡི་དྭགས་ཁ། །དམ་ཚིག་སྲུང་མ་ཁྲག་དགའ་མ། །ཀི་ལིའི་སྒྲ་སྒྲོགས་སྦྱོར་ཟིན་མ། །དུར་
ཁྲོད་རོ་ཡི་ཚོགས་དབུས་སུ། །ཚོགས་དང་ཕོ་ཉར་བཅས་པ་རུ། །གཅིགས་བྱེད་གཏུམ་མོ་དུད་སོལ་མ། །གསོལ་ཞིག་བཞེས་ཤིག་དམ་ཚིག་ལྷ། །གནས་སུ་གནས་པར་མཛད་དུ་གསོལ། །བདག་གི་སེམས་ལ་ཅི་འདོད་པ། །དེ་ནི་ཁྱོད་ཀྱིས་བསྒྲུབ་པར་མཛོད། །བདག་གི་ལས་ནི་ཅི་བྱེད་ཀྱང་། །དེ་ལ་ཁྱོད་ཀྱིས་གྲོགས་མཛོད་ཅིག། ལྷ་མོ་ནག་མོ་མཐུ་མོ་ཆེ། །འཕགས་མ་ཁྱོད་ལ་བདག་བསྟོད་དོ། །བསྟན་ལ་གནོད་པའི་གདུག་པ་ཀུན། །མྱུར་དུ་སྒྲོལ་བའི་ཕྲིན་ལས་མཛོད། །ཉིན་དང་མཚན་དུ་བྱ་ར་མཛོད། །བཅོལ་བའི་ཕྲིན་ལས་འགྲུབ་པར་མཛོད། །ཅེས་དང་། བྷྱོ། བྱང་ཤར་ཐོད་པ་འཕྲུལ་གྱི་གཞལ་ཡས་ནས། །ལྷ་མོ་ནག་མོ་མཐུ་དང་རྫུ་འཕྲུལ་ཅན། །དབང་ཕྱུག་སྲིད་པ་གསུམ་གྱི་བདག་མོ་སྟེ། །ཁྱོད་ནི་ཁམས་གསུམ་ཀུན་གྱིས་མཆོད་ཅིང་བཀུར། །ཚངས་པའི་རྒྱལ་པོས་རྨ་བྱའི་རྒྱལ་མཚན་ཕུལ། །ཁྱབ་འཇུག་ཆེན་པོས་ཉི་ཟླ་རྒྱན་དུ་ཕུལ། །རྣམ་ཐོས་སྲས་ཀྱིས་སེང་གེའི་རྣ་རྒྱན་ཕུལ། །ནམ་མཁའི་ལྷ་བྲན་གསེར་གྱི་དྲིལ་བུ་ཕུལ། །ཀླུ་ཡི་རྒྱལ་པོས་སྤྲུལ་གྱི་གདེངས་ཀ་ཕུལ། །ལྷ་དབང་བརྒྱ་བྱིན་གླང་ཆེན་ཀོ་རློན་ཕུལ། །མ་མོ་རྣམས་ཀྱིས་རེ་ལྡེའི་ཤམ་བུ་ཕུལ། །
ཤ་ཟ་རྣམས་ཀྱིས་ཁྲག་གི་ཐིག་ལེ་ཕུལ། །མཁའ་འགྲོ་རྣམས་ཀྱིས་རུས་པའི་རྒྱན་ཆ་ཕུལ། །གཤིན་རྗེའི་རྒྱལ་པོས་ཐོད་པའི་ཕྲེང་བ་ཕུལ། །སྲིན་པོ་རྣམས་ཀྱིས་ལྕགས་སྒྲོགས་སྔོན་པོ་ཕུལ། །འཁོར་ལོས་སྒྱུར་རྒྱལ་ལྷ་མིའི་རྒྱལ་སྲིད་ཕུལ། །རྣལ་འབྱོར་བདག་གིས་རྒྱན་པའི་གཏོར་མ་འབུལ། །དེ་ལྟར་རྒྱན་གྱི་རྣམ་པ་དུ་མ་ཡིས། །དཔལ་ལྡན་ལྷ་མོ་ཁྱོད་ལ་བསྟོད་འབུལ་ན། །རྣལ་འབྱོར་བདག་ཅག་འཁོར་དང་བཅས་པ་ཡི། །ཚེ་དང་བསོད་ནམས་ལ་སོགས་རྒྱས་པ་དང་། །མཆོག་དང་ཐུན་མོང་དངོས་གྲུབ་མ་ལུས་རྩོལ། །བདག་ལ་རྟག་ཏུ་སྡང་བའི་སེམས་ལྡན་པ། །དམ་ཉམས་དགྲ་བོའི་སྲོག་རྩ་མྱུར་དུ་ཆོད། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་རོལ་མོ་དང་བཅས་ཏེ་གཏོར་མ་གསེར་སྐྱེམས་ནམ་མཁར་འབུལ་ལོ། དེ་ནས་བསྐང་བཤགས་བྱ་བ་ནི། བདག་བསྐྱེད་ཡི་དམ་གྱི་རང་གཞུང་ལྟར་ཚོགས་བྱིན་རླབས་ནས་བསྒྲལ་བསྟབ་ཡན་ཚང་བར་བྱ། ཚོགས་མེད་ནི་གཏོར་མ་གསོ་བྲན་བྱས་ལ། བསངས་སྦྱངས། སྟོང་པའི་ངང་ལས་བྷྲཱུྃ་ལས་གནས་ཁང་དུར་ཁྲོད་དྲག་པོའི་ཞིང་ཁམས་བསམ་གྱིས་མི་ཁྱབ་པར་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་བརྟེན་རྫས་ལ་སོགས་པ་ཐམས་ཅད་སྲིད་ཞིའི་འདོད་ཡོན་གྱི་རྣམ་པ་མཁོ་དགུ་ཚང་བ། བཟང་དགུས་འབྱོར་
པ། མཛེས་དགུས་བརྒྱན་པ། ངོ་བོ་ཡེ་ཤེས་སྒྱུ་མའི་རང་བཞིན་བདེ་བའི་རྣམ་པ་ཐམས་ཅད་པར་འཆང་བས་ནམ་མཁའི་ཁམས་གང་བར་གྱུར། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁ་ཨུངྒ་ཏེ་སྥ་ར་་ཨི་མཾ་ག་ག་ན་ཁཾ་སྭཱ་ཧཱ། བཛྲ་སྥ་ར་་ཁཾ། ཞེས་པས་བྱིན་གྱིས་བརླབས་ཅིང་ཟད་མི་ཤེས་པར་སྤེལ། དབྱངས་རོལ་སྦྱར་སྤོས་དང་བཅས་ཏེ་འདི་སྐད་དོ། །བྷྱོ། །དགའ་བ་ཚལ་གྱི་དུར་ཁྲོད་ནས། །འདས་དང་མ་འོངས་ད་ལྟར་གྱི། །བསྟན་པ་སྲུང་བར་མངའ་གསོལ་བའི། །ཆོས་སྐྱོང་སྲུང་མ་དུད་སོལ་མ། །འཁོར་བཅས་ཐུགས་དམ་གཉན་པོ་ནི། །རིག་འཛིན་རྣལ་འབྱོར་བདག་གིས་བསྐང་། །དམ་ཅན་སྲུང་མ་འདིར་བྱོན་ཅིག །རྣལ་འབྱོར་དགྲ་བླ་འདིར་བྱོན་ཅིག །བསྒྲུབ་པའི་དམ་རྫས་ཡིན་པའི་ཕྱིར། །རྟག་གཏོར་ཆེན་པོས་ཐུགས་དམ་བསྐང་། །མ་དང་མི་འབྲལ་འགྲོགས་པའི་ཕྱིར། །རྒྱུན་གྱི་གཏོར་མས་ཐུགས་དམ་བསྐང་། །དམ་ཚིག་གཉན་པོ་གསོ་བའི་ཕྱིར། །བདུད་རྩི་སྨན་གྱི་ཐུགས་དམ་བསྐང་། །བརྟེན་པའི་དམ་རྫས་ཡིན་པའི་ཕྱིར། །དགྲ་བགེགས་ཤ་དང་ནལ་བུའི་ཤ །མཱཾ་སའི་བྱེ་བྲག་དཔག་མེད་ཀྱིས། །བསྐང་ངོ་ཁྱོད་ཀྱི་ཐུགས་དམ་བསྐང་། །དགྱེས་པའི་དམ་རྫས་ཡིན་པའི་ཕྱིར། །ར་ནག་ཁྲག་དང་བྱ་
ནག་ཁྲག །དགྲ་བགེགས་ཤ་ཁྲག་ལ་སོགས་པའི། །རཀྟའི་རྒྱ་མཚོས་ཐུགས་དམ་བསྐང་། །དགྲ་བགེགས་གསུར་ལ་སྣོམ་པའི་ཕྱིར། །ཚིལ་ཆེན་དུད་པས་ཐུགས་དམ་བསྐང་། །ཆུ་དང་ཐང་སྐྱེས་མ་ཏོག་དང་། །ཙནྡན་ཨ་ག་རུ་ཡི་སྤོས། །དྲི་བཟང་སྦྱར་བའི་ཡོན་ཆབ་ཀྱིས། །བསྐང་ངོ་ཁྱོད་ཀྱི་ཐུགས་དམ་བསྐང་། །གྲོ་ནས་འབྲས་ཀྱི་བཤོས་གཙང་དང་། །འབྲུ་རྩི་ཞུན་ཆེན་སྣང་གསལ་སོགས། །ཕྱི་ཡི་མཆོད་པ་རྣམ་ལྔ་ཡིས། །བསྐང་ངོ་ཁྱོད་ཀྱི་ཐུགས་དམ་བསྐང་། །གཟུགས་སྡུག་སྒྲ་སྙན་དྲི་ཞིམ་དང་། །རོ་མངར་རེག་བྱ་འཇམ་པ་ཡི། །འདོད་པའི་ཡོན་ཏན་རྣམ་ལྔ་ཡིས། །བསྐང་ངོ་ཁྱོད་ཀྱི༴ །མི་རྟ་གླང་སོགས་ཤ་ལྔ་དང་། །བྱང་སེམས་རཀྟ་གཞུང་བ་དང་། །བདུད་རྩི་ལྔ་ལ་སོགས་པ་ཡི། །གསང་བའི་མཆོད་པས་ཐུགས་དམ་བསྐང་། །བཟའ་བའི་དམ་ཚིག་གསོ་བའི་ཕྱིར། །བཤོས་གཙང་མར་གྱིས་བརྒྱན་པ་དང་། །ཤ་ཆང་ཁུར་བ་སྒོག་བཙོང་སྤོད། །སྤོད་ཀྱི་མཆོད་པས་ཐུགས་དམ་བསྐང་། །ཕྱི་ཡི་བརྟེན་རྫས་ཡིན་པའི་ཕྱིར། །བོང་བུ་གྭ་དམར་ལུག་ནག་དང་། །དར་ནག་བྷནྡྷ་མ་རལ་གྱིས། །བསྐང་ངོ་ཁྱོད་ཀྱི་ཐུགས་དམ་བསྐང་། །ནང་གི་བརྟེན་རྫས་ཡིན་པའི་ཕྱིར། །རྨ་བྱ་ནོར་བུའི་རྒྱལ་མཚན་དང་། །ནལ་
བུའི་རྒྱལ་མཚན་བྷནྡྷ་ཡིས། །བསྐང་ངོ་ཁྱོད་ཀྱི་ཐུགས་དམ་བསྐང་། །གསང་བའི་བརྟེན་རྫས་ཡིན་པའི་ཕྱིར། །ཨ་མྲྀ་ཏ་དང་མྱོས་བྱེད་བཅུད། །གྲི་སྙིང་དགྲ་བགེགས་ནལ་བུའི་སྙིང་། །ཙིཏྟ་སྙིང་གིས་ཐུགས་དམ་བསྐང་། །སྐུ་ཡི་བརྟེན་རྫས་ཡིན་པའི་ཕྱིར། །བླུགས་སྐུ་འདགས་སྐུ་བྲིས་སྐུ་དང་། །དར་སྐུ་སྐུ་འབགས་ལ་སོགས་ཀྱིས། །བསྐང་ངོ་ཁྱོད་ཀྱི་ཐུགས་དམ་བསྐང་། །གསུང་གི་བརྟེན་རྫས་ཡིན་པའི་ཕྱིར། །རྔ་དང་ཟོམ་རྔ་རྔ་ཆེན་དང་། །འཁར་རྔ་དུང་དང་ཆ་ལང་དང་། །གདུང་བའི་དབྱངས་ཀྱིས་ཐུགས་དམ་བསྐང་། །དམ་ཚིག་གཉན་པོ་བསྐང་བའི་ཕྱིར། །དམ་ཚིག་དྲིལ་བུས་ཐུགས་དམ་བསྐང་། །ཕྲིན་ལས་གཉན་པོ་བསྐུལ་བའི་ཕྱིར། །ཅང་ཏེལ་སྒྲ་ཡིས་ཐུགས་དམ་བསྐང་། །འཇིག་རྟེན་དབང་དུ་སྡུད་པའི་ཕྱིར། །གསང་བའི་རྔེའུ་ཆུང་ཐུགས་དམ་བསྐང་། །ཐུགས་དམ་གནད་ནས་བསྐུལ་བའི་ཕྱིར། །ཕྱག་རྒྱ་སྔགས་དང་ཏིང་འཛིན་དང་། །སྙིང་པོ་འཛབ་ཀྱི་བཟླས་པ་ཡིས། །བསྐང་ངོ་བསྐལ་པར་ཐུགས་དམ་བསྐང་། །སྙིང་འཕྲོག་མ་གསུམ་ཐུགས་དམ་བསྐང་། །མཁའ་འགྲོ་བཞི་ཡི་ཐུགས་དམ་བསྐང་། །གདོང་ཅན་བརྒྱད་ཀྱི་ཐུགས་དམ་བསྐང་། །སྒོ་མ་བཞི་ཡི་ཐུགས་དམ་བསྐང་། །ནག་མོ་འབུམ་གྱི་ཐུགས་
དམ་བསྐང་། བྷྱོ། གཞན་ཡང་ཐུགས་དམ་བསྐང་བ་ནི། །རྟེན་སྐོང་སྒྲུབ་པའི་རྫས་རྣམས་དང་། །ཤ་ཁྲག་དམར་གྱི་གཏོར་མ་ཡིས། །ཡེ་ཤེས་ལས་དང་འཇིག་རྟེན་གྱི། །མ་མོ་མཁའ་འགྲོའི་ཐུགས་དམ་བསྐང་། །རྟག་རྒྱལ་མ་ལྔའི་ཐུགས་དམ་བསྐང་། །སྨུག་ནག་ཁྲོས་མའི་ཐུགས་དམ་བསྐང་། །འབར་མ་མེ་གདོང་ཐུགས་དམ་བསྐང་། །རྗེ་མོ་བཅུ་བཞིའི་ཐུགས་དམ་བསྐང་། །སྨན་མོ་ང་བརྒྱད༴ །ལོ་མ་གྱོན་མའི་ཐུགས་དམ་བསྐང་། །འོད་ཟེར་ཅན་མའི༴ །ཤན་པ་སྲོག་སྒྲུབ༴ །རང་བྱུང་རྒྱལ་མོའི༴ །དཀར་མོ་འོད་ལྡན༴ །འདོད་ཁམས་དབང་ཕྱུག་ཐུགས་དམ་བསྐང་། །སྲིད་པའི་རྒྱལ་མོའི་ཐུགས་དམ༴ །རྡོ་རྗེ་གཤོག་རྒོད༴ །དུང་སྐྱོང་རྒྱལ་མོའི༴ །ཉི་ཟླ་ཐོད་ཕྲེང་༴ །དབང་མ་ཆེ་ཡི༴ །ཙཎྜི་ཀཱ་ཡི༴ །རེ་མ་ཏི་ཡི༴ །སྤྱང་ཞོན་དམར་ནག༴ །མ་བདུན་སྲིང་བཞིའི༴ །འབར་མ་དགུ་ཡི༴ །དུས་བཞིའི་ལྷ་མོའི༴ །དམག་གི་རྒྱལ་མོའི༴ །དབང་ཕྱུག་ཉེར་བརྒྱད༴ །ངན་ནེ་མ་ཡི༴ །ཕག་གདོང་མཆེད་ལྔའི༴ །ཨ་ཕྱི་མཆེད་ལྔའི༴ །ཚེ་རིང་མཆེད་ལྔའི༴ །བརྟན་མ་བཅུ་གཉིས༴ །གཞན་ཡང་སྤྲུལ་པའི་ཕོ་ཉ་ནི། །དཀར་མོ་དམར་མོ་སེར་མོ་དང་། །ལྗང་ནག་ལ་སོགས་འབུམ་སྡེའི་ཚོགས། །བསྐང་ངོ་ཁྱོད་ཀྱི་ཐུགས་དམ་
བསྐང་། །ཡང་སྤྲུལ་བྱེ་བའི་ཐུགས་དམ་བསྐང་། །མཉེས་པའི་རྟེན་དང་མ་ཉམས་ཕུད། །ཚོགས་དང་གཏོར་མ་རྒྱ་ཆེན་འདིས། །འདོད་ཁམས་མ་མོ་ཀུན་གྱི་གཙོ། །འཁོར་བཅས་ཐུགས་དམ་བསྐང་གྱུར་ཅིག །དེ་ལྟར་ལྷ་མོ་འཁོར་བཅས་ཀྱི། །ཐུགས་དམ་བསྐང་བའི་བྱིན་རླབས་ཀྱིས། །རིག་འཛིན་རྣལ་འབྱོར་བདག་ཅག་ལ། །མཁའ་འགྲོའི་ཉམས་ཆགས་བྱུང་བ་བསྐང་། །འཇིག་རྟེན་མཁའ་འགྲོའི་གནོད་པ་བཟློག །མ་མོའི་དལ་ཡམས་བྱུང་བ་ཟློག །གཤིན་རྗེའི་ཁྲམས་ལ་བཏབ་པ་ཟློག །བདུད་ཀྱི་ཞགས་པ་ནག་པོ་ཆོད། །བནྡྷེའི་བྱད་ཁ་སླར་ལ་སྒྱུར། །སྡེ་བརྒྱད་གནོད་པ་ཐམས་ཅད་ཟློག །གཞན་གྱི་རྦད་འདྲེ་ཕུར་ཁ་སྒྱུར། །རྨིས་ལྟས་མཚན་ལྟས་ངན་པ་སྒྱུར། །ལོ་ཀག་ཟླ་ཀག་ཞག་ཀག་སྒྱུར། །སྡང་བའི་དགྲ་དང་གནོད་པའི་བགེགས། །བདུད་དང་བར་དུ་གཅོད་པའི་ཚོགས། །ཐམས་ཅད་ཐལ་བ་རྡུལ་དུ་རློག །བདག་ཅག་རྣལ་འབྱོར་དམ་ཅན་གྱི། །དམ་ཚིག་ཉམས་པ་བསྐང་གྱུར་ཅིག །མཆོག་དང་ཐུན་མོང་ལ་སོགས་པའི། །དངོས་གྲུབ་མ་ལུས་སྩལ་དུ་གསོལ། །ཚེ་དང་དབང་ཕྱུག་སྤེལ་དུ་གསོལ། །དཔལ་དང་གྲགས་པ་བསྒྲུབ་ཏུ་གསོལ། །འཁོར་དང་བསྟན་པ་བསྲུང་དུ་གསོལ། །ལེགས་དང་སྤྲོད་ལ་ཉེས་དང་བསྣོལ། །མཐུ་
སྟོབས་བསྐྱེད་ལ་དཔུང་གཉེན་མཛོད། །ལུས་དང་གྲིབ་མ་བཞིན་དུ་འགྲོགས། །ཉིན་དང་མཚན་མོ་བྱ་ར་མཛོད། །བསམ་པ་སྒྲུབས་ལ་རེ་བ་སྐོངས། །གཞན་ཡང་ཡིད་ལ་གང་འདོད་པ། །དེ་ནི་ཁྱོད་ཀྱིས་འགྲུབ་པར་མཛོད། །ཅེས་དང་། བྱང་ཤར་ཆོས་དབྱིངས་མདང་ལྷ་མོའི་འཁྲུགས་སྐོང་ལ་སོགས་རྒྱས་བསྡུས་སྐབས་བསྟུན་བཏང་ནས། བཤགས་པ་ནི་སྤྲོ་ན། ཧཱུྃ་བྷྱོ། འགྲོ་བའི་དོན་དུ་སྐུ་མཆོག་འཇིགས་པ་ལ། །ཞེས་སོགས་ཚང་བར་བཏོན་ཞིང་། བསྡུ་ན། ཨོཾ་ཡེ་ཤེས་ལྷ་དང་ལྷ་མོ་མི་ཕམ་བདག །དང་པོ་བསྒྲུབ་དང་བསྒྲུབ་དུ་བྱས་ནས་ནི། །མཐུན་པའི་དམ་རྫས་གཞུང་བཞིན་མ་འཚོགས་པས། །དཔལ་ལྡན་ལྷ་མོའི་ཐུགས་དང་འགལ་གྱུར་ཏེ། །བཀའ་ཡི་ཆད་པའི་གནས་སུ་གྱུར་ནས་སུ། །དམ་ཉམས་ཁྲིམས་རལ་ཞིག་ཏུ་གྱུར་ལགས་ན། །ཡེ་ཤེས་ཐུགས་རྗེ་ཅན་ལ་བཟོད་པར་གསོལ། །ཐུགས་དང་འགལ་བར་གྱུར་པ་བཟོད་པར་གསོལ། །དམ་ཚིག་ཉམས་པ་ཐམས་ཅད་བསྐང་གྱུར་ཅིག །ཨཱ་ས་མ་ཡ། ཨཱཿས་མ་ཡ། ཧཱུྃ་ས་མ་ཡ། ཨོཾ་ཧཱུྃ་ཤྲི་ཡཻ་སོགས། ཨོཾ་བཛྲ་སཏྭ་སོགས་མན་ངག་གི་ཡིག་བརྒྱ་ལན་གྲངས་སྐབས་སྦྱར་བཟླས་ཏ་ཕྲིན་ལས་བཅོལ་བ་ནི། སངས་རྒྱས་བསྟན་སྲུངས་དཀོན་མཆོག་དབུ་འཕང་བསྟོད། ནས་མཐུ་དང་ལྡན་པར་ཤོག །ལན་ཚང་བར་བརྗོད། དེ་ནས་གཏོར་མ་འབུལ་བ་ནི། ཉིན་རྫོགས་ཡིན་
ན་གོང་དུ་བཤམས་པའི་གཏོར་ཆེན་ཉིད་ཕུལ་བས་འཐུས་ཤིང་། དེ་ཉིད་རྟག་གཏོར་དུ་བྱས་པའི་ཚེ་རྒྱུན་གྱི་མཆོད་གཏོར་ཟུར་དུ་བཤམས་ལ་ཤ་ཁྲག་བདུད་རྩིས་བྲན། འགུགས་གཞུག་དང་། ཨོཾ་ཧ་ཧོཿཧྲཱིཿས་བྱིན་རླབས་འབུལ་བསྟབས་ཀྱི་སྔགས་བསྡུས་པ་ཙམ་མམ། དམིགས་པས་བསྟབས་ལ། བྷྱོ། དཔལ་ལྡན་ལྷ་མོ་འདོད་ཁམས་དབང་ཕྱུག་མ། །འདིར་གཤེགས་བརྒྱན་པའི་གཏོར་མ་འདི་བཞེས་ཤིག །ཤ་ཁྲག་དམར་གྱི་གཏོར་མ་འདི་བཞེས་ཤིག །འཛམ་བུ་བིྭཱ་པའིི་ཞལ་ཟས་འདི་བཞེས་ཤིག །སྨན་རག་ཕུད་ཀྱི་མཆོད་གཏོར་འདི་བཞེས་ཤིག །སྔ་བཅོལ་ལས་ཀྱི་གཏང་རག་གཉན་པོ་བཞེས། །ད་བཅོལ་ལས་ཀྱི་ཞུ་དོན་གཉན་པོ་འབུལ། །འཁོར་རྣམས་སྲུང་ཞིང་རྐྱེན་རྣམས་བཟློག་པ་དང་། །བདུད་དང་བར་དུ་གཅོད་པ་རྣམ་མང་པོ། །སྡང་བའི་དགྲ་དང་གནོད་པའི་བགེགས་ལ་སོགས། །ཐམས་ཅད་རྡུལ་ཕྲན་བཞིན་དུ་བརླག་པར་མཛོད། །ཤ་ཁྲག་དམར་གྱི་གཏོར་མ་འདི་བཞེས་ལ། །བདག་གིས་བཅོལ་བའི་ཕྲིན་ལས་འགྲུབ་པར་མཛོད། །ཅེས་དང་། བྷྱོ། སངས་རྒྱས་ཤཱཀྱ་ཐུབ་པའི་སྤྱན་སྔ་རུ། །ཁྱོད་ཀྱིས་དེང་ནས་འཁོར་བ་ཇི་སྲིད་བར། །དཀར་པོའི་ཕྱོགས་ཀྱི་ནད་དང་སྡུག་བསྔལ་སོགས། །ཞི་བར་བྱ་ཕྱིར་ཚེ་དང་བསོད་ནམས་སྤེལ། །ནག་པོའི་ཕྱོགས་ནི་དགུགས་ཅིང་དབང་དུ་སྡུད། །སྨྱོ་འབོགས་བསད་པ་ལ་
སོགས་ལས་འདི་དག །བསྟན་པ་བསྲུང་ཕྱིར་ལས་འདི་འགྲུབ་པར་མཛད། །འདི་ལས་འདས་ན་རྒྱལ་བའི་བཀའ་བསླུས་པས། །དུས་གསུམ་རྒྱལ་བའི་རྡོ་རྗེའི་མགོ་འགས་ཤོག །དེ་སྐད་རྒྱལ་བའི་སྤྱན་སྔར་དམ་བཅས་པས། །ཁས་བླངས་བཞིན་དུ་ཕྲིན་ལས་འགྲུབ་པར་མཛོད། །རྣལ་འབྱོར་བདག་དང་བདག་གི་འཁོར་རྣམས་ལ། །ཞལ་ནས་བདུད་རྩི་ཆར་བའི་རྒྱུན་ཕོབ་ལ། །ནད་གདོན་སྡུག་བསྔལ་ཚོགས་རྣམས་ཞི་བར་མཛོད། །ཚེ་དང་དབང་ཐང་ལོངས་སྤྱོད་རྒྱས་པར་མཛོད། །ཟང་ཟིང་ལོ་ཐོག་འབྲུ་ཡི་ཕུང་པོ་དང་། །རིན་ཆེན་རྐང་འགྲོས་ཕྱུགས་རྣམས་འཕེལ་བར་མཛོད། །གཞན་ཡང་ཁྱེད་ལ་ཕྲིན་ལས་བཅོལ་བ་ནི། །བླ་མ་སྨོད་ཅིང་དཀོན་མཆོག་དབུ་འཕང་སྨོད། །བདག་གི་དགེ་ལ་བར་ཆད་བྱེད་པའི་དགྲ། །དགྲ་འདྲེ་བྱད་གསུམ་བྱེད་པའི་ལས་ངན་རྣམས། །ཁྱེད་ཀྱི་ཁོང་ནས་དུག་གི་རླུང་བུས་ལ། །འདུ་བ་རྣམ་བཞིའི་ནད་སོགས་ཁོང་ནས་སློང་། །པགས་གཞི་ས་ལ་ལྷུང་ནས་རྡེབ་ཏུ་ཆུག །དོན་སྙིང་རྣམ་ལྔ་ཁོང་ཁྲག་སྐྱུག་ཏུ་ཆུག །ལས་ངན་འཁོར་བཅས་བྲང་ཆེན་བརྡུང་དུ་ཆུག །སྨྲེ་སྔགས་ཆོ་ངེ་གནམ་དུ་འབོད་དུ་ཆུག །འཆི་བའི་དུས་འདིས་སྨྱོ་འབོག་བསད་པར་མཛོད། །གཅན་གཟན་མཁའ་ལྡིང་ལ་སོགས་ལྟས་ངན་ཕོབ། །བསྟན་པ་བསྲུང་བའི་ལས་རྣམས་འགྲུབ་པར་མཛོད། །ཨོཾ་རུ་རུ་རོ་རུ་བི་ཏིཥྛ་བ་ཏོ་སི་ཀ་མ་ལ་རཀྵ་
སི་ཧཱུྃ་བྷྱོཿ དགྲ་བགེགས་ཐམས་ཅད་མཱ་ར་ཡ་ཧཱུྃ་ཕཊ། །ཅེས་བརྗོད་ལ་གཏོར་མ་ཡང་ཐོག་ཏུ་འབུལ་ཞིང་འདོད་དོན་གསོལ་ལོ། །རྗེས་གཏང་རག་ཏུ། ཨརྒྷཾ་ནས་ཨ་མྲྀ་ཏ་རཀྟ་བ་ལི༚་ཏ་པཉྩ་ཀཱ་མ་གུ་་པྲ་ཏིཙྪ་སྭཱ་ཧཱ། བཅོམ་ལྡན་འདས་ཀྱི་སྤྱན་སྔ་རུ། སོགས། མཆོད་བསྟོད་ཉུང་འདུས་བྱ། མ་འབྱོར་པ་དང་སོགས་ཡི་གེ་བརྒྱ་པས་ནོངས་པ་འཆགས། རྟེན་ཡོད་ན་བརྟན་བཞུགས་སྤྱི་མཐུན་དང་། བཛྲ་ལཱ་སྱ་རཱ་ག་ཡཱ་མི་ཧཱུྃ། གིས་དམ་ཡེ་དབྱེར་མེད་རྟེན་རྫས་དང་བྲིས་སྐུ་ལ་བསྟིམ། རྟེན་མེད་པའི་རིགས་དང་འཇིག་རྟེན་པའི་འཁོར་རྣམས། གཙྪ་གཙྪ་སྭ་བྷཱ་བ་ནཱཾ་གྱིས་གཤེགས། རྟེན་ཡེ་ནས་མེད་ན། ཨོཾཱ་ཁྱེད་ཀྱི་སེམས་ཅན་སོགས་ནས་བཛྲ་མུཿཞེས་སེ་གོལ་ལན་གསུམ་བརྡབ་བས། སྒྲུབ་པ་པོ་ཁྱོད་ཀྱིས་ཇི་ལྟར་བསྒོ་བ་བཞིན་བྱའོ། །ཞེས་གསུང་ནས་ལྷ་མོ་འཁོར་བཅས་ཅོ་དིར་གྱིས་གཤེགས་པར་བསམ། བཀྲ་ཤིས་བརྗོད་པ་ནི། ཨོཾ་སྔོན་ཚེ་བཅོམ་ལྡན་ཐུབ་པའི་བསྟན་པ་ལ། སོགས་བརྗོད་ལ་རོལ་མོ་བསྒྲགས་ཅིང་མེ་ཏོག་གི་ཆར་དབབ། མཐར་བསྔོ་སྨོན་གྱི་རྒྱས་གདབ་པར་བྱའོ། །སྣང་སྲིད་མོ་རྒྱུད་དགྱེས་པའི་སྤྲིན་ཆེན་ལས། །འཛད་མེད་དངོས་གྲུབ་རྣམ་གཉིས་ཆར་འབེབས་པ། །ལམ་ཁྱེར་ལས་བྱང་སྐྱེ་ལྔའི་སྒྲ་དབྱངས་འདི། །རྒྱལ་བསྟན་ལང་ཚོ་མཛེས་པའི་དཔལ་དུ་ཤོག །ཅེས་པའང་དགེ་བའི་བློ་ཅན་ཀརྨ་དེ་བ་ཤྲཱི་ནས་མཎྜལ་བཅས་འདི་བཞིན་དགོས་ཞེས་ཆེ་ཐང་དུ་བསྐུལ་བའི་ངོ་མ་ལྕོགས་པར། པདྨ་གར་གྱི་དབང་ཕྱུག་རྩལ་གྱིས་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་སྨིན་ཟླའི་ཚེས་བཅུའི་ཉིན་འདོན་ཆ་རྣམས་བཀའ་གཏེར་སོར་བཤག་ལས་རང་བཟོ་མེད་པར་གྲུབ་པར་སྦྱར་བའི་ཡི་གེ་པ་ནི་མངྒ་ལམ་བགྱིས་པ་སྟེ། ནོངས་པ་གང་མཆིས་བཤགས་ཤིང་དགེ་བས་བསྟན་འགྲོ་ལ་ཕན་པར་གྱུར་ཅིག །མངྒ་ལཾ།