བཀའ་དྲིན་ལྷ་མོའི་གསོལ་མཆོད་བསམ་དོན་ལྷུན་གྲུབ།
བཀའ་དྲིན་ལྷ་མོའི་གསོལ་མཆོད་བསམ་དོན་ལྷུན་གྲུབ་བཞུགས་སོ། །
ན་མོ་གུ་རུ་དྷེ་ཝ་དྷཱ་ཀི་ནཱི་སརྦ་སིདྡྷི་ཕ་ལ་ཧཱུྃ། །ཡེ་ཤེས་ལྷ་མོ་དྲིན་མོ་ཆེ། །ཚེ་རབས་སྔོན་ནས་འབྲེལ་བའི་ལྷ། །རིག་འཛིན་བརྒྱུད་སྲུང་དམ་ཚིག་ཅན། །རྣལ་འབྱོར་ཀུན་གྱི་གྲོགས་མཛད་མ། །བདག་གི་གདུང་བས་གསོལ་འདེབས་ན། །བྱམས་པའི་ཐུགས་ཀྱིས་རྗེས་དགོངས་ལ། །ཞི་བའི་སྤྱན་གྱིས་གཟིགས་སུ་གསོལ། །ངང་ཉིད་མཁའ་ལས་མ་གཡོས་ཀྱང་། །རྫུ་འཕྲུལ་ཤུགས་ཀྱིས་འབར་བའི་སྐུ། །ཨེ་ཀའི་ཀློང་ནས་བཞེངས་པའི་ཚེ། །བརྩེ་བའི་དགོངས་ཉམས་ཡ་ལ་ལ། །དགྱེས་པའི་འཛུམ་མདངས་ལམས་སེ་ལམ། །བྱིན་རླབས་འཇའ་ཟེར་གྱི་ལི་ལི། །པི་ཝཾ་གླིང་བུ་ཀྱུ་རུ་རུ། །དྲིལ་བུ་གཡེར་ཁ་སི་ལི་ལི། །རིག་སྔགས་གླུ་དབྱངས་ཙེ་རེ་རེ། །
སྟངས་སྟབས་ཕྱག་རྒྱ་ཁྲིགས་སེ་ཁྲིག །སྤྲུལ་པའི་མཁའ་འགྲོ་ཐིབས་སེ་ཐིབ། །དྲི་བཟང་ངད་པ་ཐུ་ལུ་ལུ། །བྲོ་བརྡུངས་ཤོན་སྐོར་སྒ་ར་ར། །སྟོང་ཁམས་ཁྱབ་པའི་རྫུ་འཕྲུལ་བཅས། །དམ་ཚིག་གསང་བའི་གནས་འདིར་གཤེགས། །དད་གུས་གདུང་བའི་དབྱངས་ལ་གསོན། །རང་མཐུན་དགྱེས་པའི་རྟེན་ལ་བཞུགས། །ལུས་ངག་ཡིད་གསུམ་གུས་པས་འདུད། །ཆག་ཉམས་འགལ་འཁྲུལ་ཅི་མཆིས་བཤགས། །དག་ཚངས་བཞེས་ལ་དངོས་གྲུབ་སྩོལ། ཧཱུྃ། མ་གཅིག་ཆོས་སྐུར་བཞུགས་པའི་ཚེ། །སྤྲོས་བྲལ་ཤེས་རབ་ཕ་རོལ་ཕྱིན། །རྣམ་པར་ཐར་པའི་སྐུ་མངའ་མ། །དུས་གསུམ་སངས་རྒྱས་སྐྱེད་པའི་ཡུམ། །བཀའ་
འབུམ་དོན་བརྒྱུད་ཐེག་དགུའི་མཛོད། །ནམ་མཁའི་ལུས་ཅན་འཁོར་འདས་གསོ། །མིང་ཚིག་བརྗོད་པའི་ཡུལ་ལས་འདས། །ཅི་ལྟར་བྱས་ཀྱང་ངོ་བོའི་མཁའ། །གང་དུ་སོང་ཡང་རང་བཞིན་ཀློང་། །སྣ་ཚོགས་རོལ་པ་ཐུགས་རྗེའི་དབྱིངས། །གནས་ཚུལ་བསམ་གྱིས་མི་ཁྱབ་ཀྱང་། །སོ་སོ་རང་རིག་ཀློང་དུ་གཅིག །འཁོར་ཚེ་སྐྱེ་གནས་ཐམས་ཅད་དུ། །རིགས་ཀྱི་ནུས་པས་དགེ་བསགས་ཏེ། །དལ་འབྱོར་ལུས་བླངས་ཆོས་སྒོར་ཞུགས། །ཐོས་བསམ་སྒོམ་སོགས་ཚོགས་གཉིས་སྤེལ། །རང་གཞན་ཆོས་མཐུན་དཔལ་འབྱོར་ཕྱུག །དེ་ཀུན་ཡེ་ཤེས་མ་མོའི་དྲིན། །མ་ནི་སྟོང་པ་སྐྱེ་བ་མེད། །མོ་ནི་རིག་པའི་སྙིང་པོ་ཅན། །ཟུང་འཇུག་ལྷན་སྐྱེས་ཀུན་བཟང་ཡུམ། །རྟོག་པའི་དྲྭ་བ་རྩད་ནས་གཅད། །ཉམས་བསྐང་མཚན་འཛིན་ལས་འདས་ཀྱང་། །བདག་ཅག་མ་རིག་འཁྲུལ་པ་ཡིས། །གཉིས་འཛིན་དབང་གྱུར་ཉེས་བསགས་པ། །རང་རིག་ཆོས་སྐུའི་ཀློང་དུ་བཤགས། །ལྟ་བ་གཡེལ་ནི་མ་གཡེལ་ཏེ། །གཞི་མེད་རྩ་བྲལ་རྟོགས་པས་བསྐང་། །སྒོམ་པ་ནོར་ནི་མ་ནོར་ཏེ། །ཡེངས་མེད་སྒོམ་མེད་དྲན་པས་བསྐང་། །སྤྱོད་པ་འཁྲུལ་ནི་མ་འཁྲུལ་ཏེ། །རང་བབ་ཤུགས་འབྱུང་ངང་དུ་བསྐང་། །བཅིངས་གྲོལ་མེད་པར་དག་གྱུར་ཅིག །རྟོགས་པ་དོན་གྱི་དངོས་གྲུབ་སྩོལ། །མ་གཅིག་ལོངས་སྐུར་བཞེངས་པའི་ཚེ། །
མཁའ་བཞིའི་བདེ་ཀློང་འཁྱིལ་བ་ན། །བརྡ་དོན་རྟགས་སུ་རྫོགས་པའི་ཡུམ། །ཆེ་མཆོག་ཉིད་བཞི་མུ་ཁ་ལེ། །ནང་གསལ་བུམ་སྐུའི་རང་རྩལ་ལས། །མཁའ་ཁྱབ་ཞིང་སྐུའི་འདུ་འཕྲོ་ཅན། །རྟག་རྒྱལ་ཡེ་ཤེས་མ་ལྔར་ཤར། །རྣམ་སྣང་ཁྲོས་པ་འབུམ་ཕྲག་ཞལ། །དབུ་བརྒྱ་ཕྱག་སྟོང་རྗེ་བཙན་ཆེ། །དགེ་ཀུན་དགྱེས་པའི་བཟང་རྟོག་སྟེ། །མི་དགེ་ཁྲོས་པའི་ངན་རྟོག་ཉིད། །དེས་ན་འཁོར་འདས་མ་མོའི་གཡོས། །བདག་ཅག་མཐོ་རིས་ཡོན་ཏན་ལྡན། །འཕགས་པའི་ནོར་ལ་བློ་ཁ་ཕྱོགས། །དགེ་བསམ་བར་ཆད་མེད་པར་འགྲུབ། །གནས་སྐབས་མཐར་ཐུག་ཕུན་ཚོགས་ཀུན། །ཡེ་ཤེས་མ་མོ་ཁྱོད་ཀྱི་དྲིན། །མ་ནི་སེམས་ཉིད་སྤྲོས་བྲལ་སྟོང་། །མོ་ནི་ཤུགས་འབྱུང་སྙིང་རྗེ་ཆེ། །ཟུང་འཇུག་བདེ་བ་ཆེན་པོའི་ངང་། །ཆོས་ཀུན་ཡེ་ནས་དག་མཉམ་ཡང་། །མ་རྟོགས་ལས་ཀྱི་སྒྲིབ་བསགས་ཀུན། །སྐྱེ་འགགས་མེད་པའི་ཀློང་དུ་བཤགས། །མ་མོ་ལོག་ནི་མ་ལོག་ན། །ལོག་ན་རོ་མཉམ་ཆེན་པོར་བསྐང་། །མ་མོ་རྒྱུག་ནི་མ་རྒྱུག་ན། །རྒྱུག་ན་གཟུང་འཛིན་ཕྱལ་བར་བསྐང་། །མ་མོ་འཁྱམས་ནི་མ་འཁྱམས་ན། །འཁྱམས་ན་ཡུལ་མེད་གཉུག་མར་བསྐང་། །ལྷུན་རྫོགས་ཆེན་པོར་དག་གྱུར་ཅིག །བྱ་རྩོལ་བྲལ་བའི་དངོས་གྲུབ་སྩོལ། །མ་གཅིག་སྤྲུལ་སྐུར་ཁྲོས་པའི་ཚེ། །
སྨུག་ནག་ཁྲོས་མ་རག་གདོང་མ། །རྡོ་རྗེ་རལ་གཅིག་སྒྲོལ་བའི་ཡུམ། །ནམ་མཁའི་ལུས་ཅན་ལྷོ་སྤྲིན་གྱོན། །མི་སྲུན་ཤན་པ་ཤ་ཟ་མ། །ནམ་གྲུ་ནག་མོ་ཐུགས་ལས་སྤྲུལ། །མ་ལྔ་རྗེ་མོ་བཅུ་བཞི་དང་སྨན་མོ་ལྔ་བཅུ་རྩ་བརྒྱད་སོགས། །མཁའ་འགྲོ་ཡོངས་ལ་མངའ་དབང་སྒྱུར། །ལན་རེ་རྡོ་རྗེ་རྣལ་འབྱོར་མ། །དཀྱིལ་འཁོར་ཡོངས་ཀྱི་གཙོ་མོར་བཞུགས། །རྩ་ཐིག་རླུང་གི་འདུ་འཕྲོ་ཡི། །གནས་ཡུལ་ཀུན་ལ་དབང་ཡང་མཛད། །ཕྱི་ནང་ཁྱབ་པའི་ཆོ་འཕྲུལ་ཅན། །ཞུ་བདེའི་རང་བཞིན་འཁོར་འདས་གཡོ། །གསོལ་བཏབ་དངོས་གྲུབ་སྩོལ་མཛད་མ། །བདག་ཅག་སྔགས་ཀྱི་སྨིན་གྲོལ་ནོས། །རིམ་གཉིས་དབང་བཞིའི་དམ་ཚིག་འཆང་། །རྣམ་ཀུན་མཆོག་ལྡན་སྟོང་ཉིད་དང་། །མི་འགྱུར་བདེ་ཆེན་ལམ་དུ་བྱེད། །ཐོག་མཐའ་བར་དུ་དགེ་བ་ཀུན། །ཡེ་ཤེས་ལྷ་མོ་ཁྱོད་ཀྱི་དྲིན། །མ་ནི་ཡིད་ཆོས་སྐྱེ་བ་མེད། །མོ་ནི་རྩལ་སྣང་འགག་པ་མེད། །ཟུང་འཇུག་རྟེན་ཅིང་འབྲེལ་པར་འབྱུང་། །བསམ་གྱིས་མི་ཁྱབ་ཆོས་ཉིད་དབྱིངས། །མཚན་རྟོགས་སོ་སྐྱེའི་བློས་འཆིང་བ། །གཉིས་མེད་མཉམ་པའི་ངང་དུ་བཤགས། །མ་མོ་འཁྲུགས་ནི་མ་འཁྲུགས་ན། །འཁྲུགས་ན་ལྟ་བའི་རླབས་ཀྱིས་བསྐང་། །མ་མོ་ཁྲོས་ནི་མ་ཁྲོས་ན། །ཁྲོས་ན་སྒོམ་པའི་དྲོད་ཀྱིས་བསྐང་། །མ་མོ་ཞུད་ནི་མ་ཞུད་
ན། །ཞུད་ན་སྤྱོད་པའི་གཟེར་གྱིས་བསྐང་། །ཡིད་བྱེད་བྲལ་བར་དག་གྱུར་ཅིག །སྣང་སེམས་རོ་མཉམ་དངོས་གྲུབ་སྩོལ། བྷྱོ། ཐུགས་ཉིད་ཞི་ལས་མ་གཡོས་ཀྱང་། །སྙིང་རྗེས་གདུག་པ་འདུལ་སླད་དུ། །འདས་དང་མ་འདས་མཚམས་སྐྱོང་བ། །ཡེ་ཤེས་ལས་དང་འཇིག་རྟེན་གྱི། །རྗེ་མོ་དཔལ་ལྡན་རང་བྱུང་མ། །དོན་དམ་ཆོས་སྐུ་འགྱུར་མེད་ལ། །རྟགས་ཀྱི་ཕྱག་རྒྱ་སྣ་ཚོགས་ཤར། །མཐིང་ནག་ཆེན་མོ་འབར་བའི་སྐུ། །ལུས་ལས་ཉི་ཟླའི་འོད་ཟེར་སྤྲོ། །དཀར་མོ་ཡེ་ཤེས་ལྷ་མོའི་ཚོགས། །དགུ་ཁྲི་དགུ་འབུམ་སྟོད་ནས་འགྱེད། །ནག་མོ་འཇིག་རྟེན་མ་མོའི་ཚོགས། །དགུ་ཁྲི་དགུ་འབུམ་སྨད་ནས་འགྱེད། །སྨུག་མོ་ལས་ཀྱི་མཁའ་འགྲོའི་ཚོགས། །སུམ་བརྒྱ་དྲུག་ཅུ་སྐེད་ནས་འགྱེད། །ཡང་སྤྲུལ་ནམ་མཁའི་མུ་མཐར་ཁྱབ། །མ་ངེས་འདོད་དགུ་སྒྱུར་བའི་གཟུགས། །བསམ་གྱིས་མི་ཁྱབ་འཕྲུལ་མོ་ཆེ། །ས་བརྒྱད་ལ་གནས་སེམས་མ་སྟེ། །དུར་ཁྲོད་ཀུན་ཉུལ་སྲིན་མོའི་ཚུལ། །མཚན་གསོལ་མ་གཅིག་དཔལ་ལྷ་མོ། །གནས་ནི་རྩ་གསུམ་བྱང་ཤར་མཚམས། །རྟེན་ནི་ཡོངས་འདུས་དཔག་བསམ་ཤིང་། །མུ་ལེ་མཐིང་གི་རྒྱ་མཚོ་ན། །སྲིད་གསུམ་དབང་བསྒྱུར་ཐོད་པའི་མཁར། །མཐིང་ཤུན་འོད་ཀྱི་ཁྱིམ་དུ་རོལ། །ལྷ་
རྣམས་ཀུན་གྱིས་ཕྱག་བྱས་མ། །དྲེགས་བྱེད་ཀུན་གྱི་རྗེ་བཙུན་ཆེ། །མ་མོ་མཁའ་འགྲོའི་ཚོགས་བདག་མོ། །སྟོན་པས་དབང་བསྐུར་དམ་ཚིག་ཅན། །སྡེ་སྣོད་གསུམ་དང་འཁོར་རྣམ་བཞི། །བུ་ལྟར་སྐྱོང་བའི་དྲིན་ལྡན་མ། །ཐུགས་དམ་གཉེན་པོ་འདིར་བསྐང་གི། །གཡར་དམ་ཉམས་ཆག་སོར་སྩོལ་ཅིག །ཕྲིན་ལས་རྣམ་བཞིའི་དངོས་གྲུབ་སྩོལ། །དོན་དམ་དབྱིངས་སུ་དབྱེར་མེད་ཀྱང་། །རྣམ་པ་གཙོ་འཁོར་རང་རྒྱུད་ཚུལ། །ཁོལ་མོ་དཔལ་ལྡན་རེ་མ་ཏི། །དབང་ཕྱུག་སྲས་མོ་དྲེལ་ཞོན་མ། །སྦས་པའི་བུ་མོ་ཐལ་བའི་མདོག །གཏུམ་མོ་ཁྲོ་གཉེར་བེ་ཏཱ་ལི། །སྲོག་གི་བྱ་ར་བསེ་ཡི་གདོང་། །འཕུར་ཤེས་རྡོ་རྗེ་གསེར་མིག་འཁྱིལ། །ཡ་མཚན་འཕྲུལ་གྱི་གཤོག་པ་ཅན། །སྟོན་པའི་སྤྱན་སྔར་ཐུགས་བསྐྱེད་ཅིང་། །གསང་བདག་དབང་ཞུས་ས་ཡང་གཡོས། །འདོད་ཁམས་ཚོགས་ཀྱི་རྗེ་མོ་རུ། །ཨེ་ཀ་ཛ་ཊཱིས་དབང་བསྐུར་མ། །ནམ་ཟླ་དུས་བཞིར་མངའ་མཛད་ཅིང་། །སྐྱེ་འགྲོའི་སྲོག་དབུགས་ཁྲོམ་དུ་འདེབས། །ཚུལ་བཞིན་སྒྲུབ་ལ་སྙིང་ཉེ་མ། །རེ་ཏི་མཆེད་བཞི་སྤྲུལ་འཁོར་བཅས། །འདིར་གཤེགས་ཕུད་དང་གཏོར་མ་བཞེས། །རྣལ་འབྱོར་བསམ་དོན་འགྲུབ་པར་མཛོད། །སྔོན་ཆད་ལེགས་པའི་དོན་གྲུབ་པ། །ཁྱོད་ཀྱི་མཐུ་སྟེ་བཀའ་དྲིན་དྲན། །ད་དུང་སྙིང་པོའི་བར་དུ་ཡང་། །དྲིན་ལྡན་མ་ཡི་དྲིན་
གྱིས་སྐྱོང་། །ཐུགས་དམ་མ་གཡེལ་ས་མ་ཡ། །ཡང་གཅིག་སྤྲུལ་པའི་ཆོ་འཕྲུལ་ནི། །དགའ་བ་ཚལ་དུ་བཞུགས་པའི་ཚེ། །ཡུམ་ཆེན་གཏུམ་མོ་དུད་སོལ་མ། །དུས་གསུམ་རྒྱལ་བའི་བསྟན་པ་སྲུང་། །སྒྲ་བཅུད་ཡིད་ཀྱི་མཚོར་འཁྲུངས་པ། །ཚངས་པའི་སྲས་མོ་དབྱངས་ཅན་མ། །སྨྲ་བ་ངག་གི་དབལ་རབ་སྟེར། །མི་ཕམ་མདངས་དགའི་རིར་བཞུགས་ཚེ། །ལྷ་མོ་པརྞ་ཤ་བ་རཱི། །ཡམས་ནད་རིམས་ནད་ཀུན་ལས་སྐྱོབས། །དཔག་བསམ་ལྗོན་ཤིང་སྲུང་བའི་ཚེ། །དཔལ་ལྡན་ལྷ་མོ་མ་རཱི་ཙྱཻ། །འཇིགས་བརྒྱད་ཆོམ་རྐུན་དགྲ་དཔུང་ཟློག །ནམ་མཁའ་འཕྲུལ་གྱི་ལྡིང་ཁང་ན། །དཀར་མོ་ཆེན་མོ་འོད་ལྡན་མ། ཁར་ཆད་ནད་གདོན་ཞི་བར་མཛད། །ཁྲོས་ནས་ལས་ལ་ཆས་པའི་ཚེ། །བསྟན་སྲུང་དྲག་མོ་དམག་ཟོར་རྒྱལ། །ཞིང་བཅུའི་མི་རོ་རེངས་པར་ཟ། །དལ་ཡམས་ནད་རིམས་ཟློག་པའི་ཚེ། །བདུད་རྩི་སྨན་གྱི་རྒྱལ་མོ་ཆེ། །ཟླ་བའི་བཅུད་སྡུད་སྐྱེ་དགུ་གསོ། །མོ་རྒྱུད་ཡོངས་ལ་མངའ་མཛད་ཚེ། །ཙིཏྟ་མཁའ་ལ་གཤོག་གཅིག་མ། །ཚེ་དབང་མ་བཞིའི་གཙུག་ན་བརྗིད། །རྡོ་རྗེ་བགེགས་ལ་དབང་སྒྱུར་ཚེ། །ཚོགས་བདག་ཡུམ་ཆེན་དབང་མོ་ཆེ། །མིང་པོ་རྒྱལ་པོའི་བཀའ་སྒྱུར་མ། །དབང་ཕྱུག་སྲས་མོར་སྤྲུལ་པའི་ཚེ། །དཀར་མོ་ཆེན་མོ་དུང་སྐྱོང་རྒྱལ། །ལྷ་བྲན་སྟོང་གིས་
ཕྱག་བྱས་མ། ཁམས་གསུམ་དབང་དུ་སྡུད་པའི་ཚེ། །སྲིད་པ་རྒྱལ་མོ་འགྲན་ཟླ་མེད། །སྣང་སྲིད་འཁོར་འདས་དབང་དུ་སྡུད། །བསིལ་བ་ཚལ་དུ་བཞུགས་པའི་ཚེ། །གཏུམ་མོ་ཆེན་མོ་ཙ་མུཎྜི། །འདོད་ཆགས་ཁྲག་ལ་མངའ་མཛད་མ། །རྡོ་རྗེ་གདན་གྱི་གནས་སྲུང་ཚེ། །མ་མོ་ཆེན་མོ་ཁ་འབར་མ། །རིམས་ཡམས་མཚོན་དལ་ཀུན་གྱི་བདག །བསྟན་དགྲའི་ཚེ་སྲོག་སྡུད་པའི་ཚེ། །མ་མོ་རྡོ་རྗེ་གློག་མ་སྤྲིན། །བོང་ཞོན་ཚོགས་བཅས་མཚན་མོར་རྒྱུ། །དགྲ་སྲོག་རྦད་ཀྱིས་གཅོད་པའི་ཚེ། །དགྲ་བླ་ཆེན་མོ་སྤྱང་ཞོན་མ། །སྒྲུབ་པོ་ཡོངས་ཀྱི་དྲོད་ཚད་ཉུལ། །བསྟན་པའི་བྱ་ར་མཛད་པའི་ཚེ། །དཀར་སྨུག་ནག་གསུམ་སྲིད་པའི་རྒྱལ། །དམ་ཚིག་ཅན་གྱི་དགྱེས་སྡེ་མོ། །རྫུ་འཕྲུལ་འོད་ཀྱི་གུར་ཁང་ན། །གནམ་ཕྱི་གུང་རྒྱལ་རྩི་ཡི་ལྷ། །སྨན་མོ་འབུམ་གྱི་ཚོགས་དཔོན་མཛད། །མིང་བརྒྱ་མ་ལ་མཚན་སྟོང་མ། །སྤྲུལ་དང་ཡང་སྤྲུལ་བསམ་མི་ཁྱབ། །སྣང་སྲིད་མ་མོའི་ལྷ་ཚོགས་རྣམས། །དམ་རྫས་གཏོར་མས་ཐུགས་དམ་བསྐང་། །འདོད་དགུ་འགྲུབ་པའི་དངོས་གྲུབ་སྩོལ། །ལན་རེ་སྤྲུལ་པ་མཛད་ཙམ་ན། །ཞི་མཛད་འབུམ་གྱི་གཙོ་མོ་སྟེ། །རྡོ་རྗེ་རིགས་ཀྱི་དཔལ་ལྷ་མོ། །དཀར་མོ་དུང་གི་ཐོར་ཚུགས་ཅན། །ཐུགས་རྗེ་རྟགས་ཀྱི་ཆ་ལུགས་མཛེས། །ནད་གདོན་བར་ཆད་ཞི་མཛད་མ། །འཁོར་དང་བཅས་པའི་
ཐུགས་དམ་བསྐང་། །མི་མཐུན་འཇིགས་བརྒྱད་ཞི་བར་མཛོད། །ལན་རེ་སྤྲུལ་པ་མཛད་ཙམ་ན། །རྒྱས་མཛད་འབུམ་གྱི་གཙོ་མོ་སྟེ། །རིན་ཆེན་རིགས་ཀྱི་དཔལ་ལྷ་མོ། །སེར་མོ་གསེར་གྱི་ལན་ཕྲན་ཅན། །ཐུགས་རྗེ་རྟགས་ཀྱི་ཆ་ལུགས་བརྗིད། །ཚེ་བསོད་དཔལ་འབྱོར་རྒྱས་མཛད་མ། །འཁོར་དང་བཅས་པའི༴ །མཐུན་རྐྱེན་འབྱོར་དྲུག་རྒྱས་པར་མཛོད། །ལན་རེ་སྤྲུལ་པ༴ །དབང་མཛད་འབུམ་གྱི༴ །པདྨ་རིགས་ཀྱི༴ །དམར་མོ་ཟངས་ཀྱི་རལ་པ་ཅན། །ཐུགས་རྗེ་རྟགས་ཀྱི་ཆ་ལུགས་རྔམས། །སྣང་སྲིད་འཁོར་འདས་དབང་སྡུད་མ། །འཁོར་དང་བཅས་པའི༴ །མོས་བཞིས་སྣང་བ་དབང་དུ་བསྡུས། །ལན་རེ་སྤྲུལ་པ༴ །དྲག་མཛད་འབུམ་གྱི༴ །ལས་ཀྱི་རིགས་ཀྱི༴ །ལྗང་མོ་གཡུ་ཡི་ཟུར་ཕུད་ཅན། །ཐུགས་རྗེ་རྟགས་ཀྱི་ཆ་ལུགས་གཏུམ། །དགྲ་བགེགས་ལོག་འདྲེན་བསྒྲལ་མཛད་མ། །འཁོར་དང་བཅས་པའི༴ །ཉོན་མོངས་བདུད་བཞི་དབྱིངས་སུ་སོད། །ས་ཁམས་ཤ་ལས་སྐུ་སྤྲུལ་པ། །ཞུ་མཛད་དབྱིངས་རུམ་དཔྱིད་ཀྱི་རྒྱལ། །རླུང་ལ་གནས་ཤིང་འཚུབས་མ་འདྲེན། །འཛིན་བྱེད་སེར་མོའི་ཐུགས་དམ་བསྐང་། །ཆུ་ཁམས་ཁྲག་ལས་སྐུ་སྤྲུལ་པ། །རྒྱས་མཛད་གློག་འགྱུ་དབྱར་གྱི་རྒྱལ། །སྤྲིན་ལ་གནས་ཤིང་ཐོག་སེར་འབེབས། །སྒྲོལ་
བྱེད་སྔོན་མོའི་ཐུགས་དམ་བསྐང་། །མེ་ཁམས་དྲོད་ལས་སྐུ་སྤྲུལ་པ། །སྨིན་མཛད་གློག་ལྕམ་སྟོན་གྱི་རྒྱལ། །རི་རབ་ལ་གནས་བཅུད་ཀྱང་ལེན། །སྟོབས་བྱེད་དམར་མོའི༴ །རླུང་ཁམས་དབུགས་ལས་སྐུ་སྤྲུལ་པ། །སྡུད་མཛད་གློག་སྤྲིན་དགུན་གྱི་རྒྱལ། །ཆུ་ལ་གནས་ཤིང་ཁྲག་རྗེས་གཅོད། །རྒྱུག་བྱེད་ནག་མོའི་ཐུགས་དམ་བསྐང་། །ཡང་སྤྲུལ་འཇིག་རྟེན་མ་མོའི་ཚོགས། །བརྟན་སྐྱོང་ཡ་མ་བཅུ་གཉིས་སོགས། །བསམ་གྱིས་མི་ཁྱབ་རྩིས་ལས་འདས། །བཀའ་ཉན་བདུད་བཙན་གཤིན་རྗེ་གིང་། །སྡེ་བརྒྱད་སྡོང་ཟླ་ཡང་འཁོར་སོགས། །གཙོ་འཁོར་སྤྲུལ་པར་བཅས་པ་རྣམས། །ད་ལྟ་གནས་འདིར་བདག་བསྐང་གི། །ཐུགས་དམ་དབང་གིས་གཤེགས་ནས་ཀྱང་། །དམ་ཚིག་དབང་གིས་དགྱེས་པར་བཞུགས། །སྲུང་སྐྱོབ་ཚེ་དབང་དངོས་གྲུབ་སྩོལ། །ཕྲིན་ལས་འགྲུབ་པའི་སྡོང་གྲོགས་མཛོད། །ཕྱི་མཆོད་ཉེར་སྤྱོད་རྣམ་ལྔ་དང་། །ནང་མཆོད་འདོད་པའི་ཡོན་ཏན་ལྔ། །གསང་མཆོད་སྦྱོར་སྒྲོལ་དགོངས་པ་ཡིས། །མ་མོ་འཁོར་བཅས༴ །བཀྲ་ཤིས་རྟགས་བརྒྱད་རྒྱལ་སྲིད་བདུན། །ཉེ་བའི་རིན་ཆེན་རྣམ་བདུན་དང་། །རིན་ཆེན་དཀོར་ཆ་དུ་མ་ཡིས། །མ་མོ་འཁོར་བཅས༴ །མ་རྨོས་ལོ་ཏོག་འདོད་འཇོའི་བ། །གཏེར་གྱི་བུམ་པ་
དཔག་བསམ་ཤིང་། །ཁྲུས་རྫིང་སྐྱེད་མོས་ཚལ་མཆོག་གིས། །མ་མོ་འཁོར་བཅས༴ །གསེར་ཉི་དུང་ཟླ་དངུལ་གྱི་སྐར། །རིན་ཆེན་འཇའ་འོད་བདུད་རྩིའི་སྤྲིན། །འདོད་རྒུའི་གྲུ་ཆར་འཇོ་བ་ཡིས། །མ་མོ་འཁོར་བཅས༴ །བཻ་ཌཱུ་དབང་སྔོན་པད་རཱཀ་དང་། །མ་རྒད་མུ་ཏིག་ཀེ་ཀེ་རུ། །གསེར་གཡུ་དངུལ་ཟངས་ལྕགས་སོགས་ཀྱིས། །མ་མོ་འཁོར་བཅས༴། བཟང་པོ་དྲུག་དང་འབྲས་བུ་གསུམ། །ག་བུར་གི་ཝཾ་ཙནྡན་སོགས། །འབྱུང་བཅུད་དྭངས་མའི་སྨན་རྣམས་ཀྱིས། །མ་མོ་འཁོར་བཅས༴། ནས་འབྲས་གྲོ་སྲན་ཏིལ་དང་ཁྲེ། །སོ་བ་ཡུངས་ཀར་ཇུད་རྩེ་སོགས། །འབྲུ་བཅུད་རིན་ཆེན་རིགས་རྣམས་ཀྱིས། །མ་མོ་འཁོར་བཅས༴ །བྱ་གཅན་རི་དྭགས་གཡུང་དྭགས་དང་། །ཆུ་གནས་ས་འཛུལ་སྣ་ཚོགས་པ། །ཡིད་འཕྲོག་ཉམས་རྩལ་ལྡན་པ་ཡིས། །མ་མོ་འཁོར་བཅས༴ །གཟུགས་མཛེས་སྒྲ་སྙན་དྲི་བསྲུང་ཞིམ། །རོ་བདའ་རེག་བྱ་འཇམ་ལ་སོགས། །མཁོ་དགུའི་ཡོ་བྱད་སྣ་ཚོགས་ཀྱིས། །མ་མོ་འཁོར་བཅས༴ །ལྷུན་པོ་གསེར་རི་རོལ་མཚོ་བདུན། །གླིང་བཞི་གླིང་ཕྲན་མ་ལུས་པ། །མཆོད་པའི་ཡོ་བྱད་ཀྱིས་བསྐངས་ཏེ། །མ་མོ་འཁོར་བཅས༴ །ཐོད་མཁར་དྲག་པོའི་གཞལ་ཡས་ཁང་། །དུར་ཁྲོད་བཀོད་པ་འཇིགས་སུ་རུང་། །
རྔམ་བརྗིད་རྒྱན་སྤྲས་གནས་ཀྱི་རྫས། །མ་མོ་འཁོར་བཅས༴ །ཞིང་གི་བླ་བྲེ་འཕན་གདུགས་བྲེས། །རོ་སྐྲའི་རྔ་ཡབ་མི་མགོའི་ཏོག༴ །ཙིཏྟའི་འཕྱང་འཕྲུལ་རྒྱན་གྱི་རྫས། །མ་མོ་འཁོར་བཅས༴ །ཁྲག་མཚོ་འཁྲུགས་ཤིང་རྟ་རླུང་འཚུབས། །བམ་རོ་གཅལ་བཀྲམ་བོང་དྲེལ་བརྗིད། །པད་ཉི་རོ་གདན་བཞུགས་པའི་རྫས། །མ་མོ་འཁོར་བཅས༴ །ཚིལ་ཆེན་བསུར་དང་གུ་གུལ་དྲི། །སྤོས་དཀར་སི་ལའི་དུད་སྤྲིན་དང་། །གཡབ་དར་འབོད་བསྐུལ་རྫས་རྣམས་ཀྱིས། །མ་མོ་འཁོར་བཅས༴ །ཁྲག་མཆོད་དབང་ལྔའི་མེ་ཏོག་དང་། །ཚིལ་གསུར་ཞུན་མེ་མཁྲིས་པའི་ཆབ། །ཤ་རུས་ཟས་སྦྱར་མཆོད་པའི་རྫས། །མ་མོ་འཁོར་བཅས༴ །མི་རྐང་གླིང་བུ་ལྟག་སྤྲོད་རྔ། །རོལ་མོ་སིལ་སྙན་རྔ་དུང་དྲིལ། །སྙན་བརྗིད་གདངས་དབྱངས་གཤེགས་པའི་རྫས། །མ་མོ་འཁོར་བཅས༴ །ཤེལ་སྒང་ཙ་ར་མཁའ་ལྡིང་ནག །བོང་དྲེལ་ཅང་ཤེས་དར་སྣས་བརྒྱན། །ཕྱེ་པ་དུང་ཕྱུར་ཕྱི་ཡི་རྟེན། །མ་མོ་འཁོར་བཅས༴ །མདའ་དར་མེ་ལོང་རྨ་བྱའི་གསོབ། །ནལ་བུ་སེང་གེའི་རྒྱལ་མཚན་དང་། །རེ་ལྡེ་བནྡྷ་ནང་གི་རྟེན། །མ་མོ་འཁོར་བཅས༴ །ཤིང་ལོ་རླུང་བསྐྱོད་རྡོ་སོལ་དང་། །མཚལ་འབྲས་སྲོག་གི་འཁོར་ལོས་བཀང་། །མི་དབང་འབྲས་སོགས་གསང་བའི་རྟེན། །མ་མོ་འཁོར་བཅས༴ །ལུགས་སུ་བླུག་དང་རིས་སུ་བྲིས། །
འབུར་དུ་གཏོད་དང་གསང་བའི་འབག །སྐུ་བརྙན་ལྷ་སྒོམ་སྐུ་ཡི་རྟེན། །མ་མོ་འཁོར་བཅས༴ །ཅང་ཏེ་གསང་བའི་རྔེའུ་ཆུང་། །མཆོག་ཆེན་མཆོག་ཕྲན་མདངས་ལྡན་གླུ། །སྙིང་པོ་འཛབ་བཟླས་གསུང་གི་རྟེན། །མ་མོ་འཁོར་བཅས༴ །གནམ་ལྕགས་རལ་གྲི་ཕུར་བུ་ཞགས། །འཁོར་ལོ་ཁ་ཊྭཱཾཾ་ཐོད་ཁྲག་མདུང་། །ཕྱག་རྒྱ་ཏིང་འཛིན་ཐུགས་ཀྱི་རྟེན། །མ་མོ་འཁོར་བཅས༴ །དར་ནག་རྒྱལ་མཚན་བ་དན་དང་། །ཁྲམ་ཤིང་ནད་རྐྱལ་མཚོན་དྲུ་ཤོ། །ནེ་ལེའི་རྐྱལ་པ་ཡོན་ཏན་རྟེན། །མ་མོ་འཁོར་བཅས༴ །སྣ་ཚོགས་མཚོན་དང་རྫས་ཀྱི་ཐུན། །དགྲ་བགེགས་ལིང་ག་བྲུབ་ཁུང་སོགས། །དྲག་པོའི་ལས་སྦྱོར་ཕྲིན་ལས་རྟེན། །མ་མོ་འཁོར་བཅས༴ །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་བསྒྲལ་བའི་ཤ །དངོས་གྲུབ་འགུགས་པའི་ལྕགས་ཀྱུ་ལྔས། །མ་མོ་འཁོར་བཅས༴ །བཞི་མཉམ་གླ་རྩི་སི་ཧླ། །ག་བུར་གོ་རོ་ཙ་ན་སྟེ། །ཡེ་ཤེས་གསལ་བའི་སྒྲོན་མེ་ལྔས། །མ་མོ་འཁོར་བཅས༴ །བྱང་ཆུབ་སེམས་དངོས་ར་ས་ཡ། །རྩ་བརྒྱད་སྟོང་སྦྱར་ཨ་མྲྀ་ཏ། །མཐིང་ཕོར་ཛ་གད་བཅུད་ཀྱིས་བལྟམས། །མ་མོ་འཁོར་བཅས༴ །སྤང་རམས་འབྲི་མོག་ཁུག་ཆོས་དང་། །རྒྱ་སྐྱེགས་མཚལ་དཀར་སིནྡྷུ་ར། །འབྱུང་བ་བཅུད་འདུས་རཀྟ་ཡིས། །མ་མོ་འཁོར་བཅས༴ །རྩལ་
ཆེན་སེང་སོགས་རྔམས་པ་དགུ། །ཆུ་སྲིན་ལ་སོགས་གདུང་བ་སྟོང་། །སྙིང་ཁྲག་རྦ་རླབས་འཁྱིལ་བ་ཡིས། །མ་མོ་འཁོར་བཅས༴ །པདྨ་མཱུ་ལ་རཀྟ་དང་། །གུ་ཧྱ་རཀྟ་ཁྲག་ཆེན་གྱི། །བཅུད་ལྡན་ཐོད་པ་ལྕང་ལོ་འདིས། །མ་མོ་འཁོར་བཅས༴ །ནལ་བུ་ཞིང་བཅུའི་དགྲ་བགེགས་སོགས། །སྙིང་དང་རྩ་ཡི་ཁྲག་རུལ་ཏེ། །ཁྱད་པར་མཉེས་པའི་མཆོད་རྫས་ཀྱིས། །མ་མོ་འཁོར་བཅས༴ །ཚེ་གལ་མཐུན་སྡེབ་སྦོད་ཀྱིས་བྲན། །དཀར་རྩི་དམར་རྩི་མཱཾ་སས་བརྒྱན། །མཐིང་གུར་བརྗིད་ལྡན་བ་ལི༚་ཏས། །མ་མོ་འཁོར་བཅས༴ །ཟླ་རྒྱས་ཟླ་ཕྲམ་ཁུར་བ་དང་། །ཤིང་ཏོག་མེ་ཏོག་རྒྱུ་མཆོག་ལྔ། །བཟའ་བཙང་བལྡག་གཞིབ་བཏུང་བ་ཡིས། །མ་མོ་འཁོར་བཅས༴ །མངར་སྐྱུར་ལན་ཚྭ་ཁ་ཚ་བསྐ། །རོ་བརྒྱ་ལྡན་པའི་ཞལ་ཟས་མཆོག །མ་ཚང་མེད་པའི་གཏོར་ཆེན་གྱིས། །མ་མོ་འཁོར་བཅས༴ །མཚན་ལྡན་བནྡྷ་མ་རལ་དང་། །སྲོག་མེད་དབུགས་དང་དབུགས་མེད་སྲོག །བམ་ཆེན་དབང་པོ་ཚང་བ་ཡིས། །མ་མོ་འཁོར་བཅས༴ །རྟེན་གཏོར་རྒྱུན་གཏོར་དུས་གཏོར་དང་། །རྟག་གཏོར་ལ་སོགས་སྒྲུབ་པའི་རྫས། །ཐུགས་ལ་དགྱེས་དགུའི་མཆོད་སྤྲིན་གྱིས། །མ་མོ་འཁོར་བཅས༴ །ཏ་ན་ག་ནའི་རོ་ལང་ཅན། །ཟབ་མོ་ག་་ཙཀྲ་དང་། །པཱུ་ཛ་ཚོགས་ཀྱི་ཡོ་བྱད་ཀྱིས། །མ་མོ་འཁོར་བཅས༴ །མདོར་ན་སྣང་སྲིད་
འཁོར་འདས་ཀུན། །ཀུན་བཟང་མཆོད་པའི་སྤྲིན་ཕུང་ནི། །སྒྱུ་འཕྲུལ་དྲ་བར་བྱིན་རླབས་ཏེ། །མ་མོ་འཁོར༴ །རང་གསལ་ཡེ་ཤེས་མ་མོའི་སྲོག །འཁོར་གསུམ་མཚན་རྟོག་ཀུན་བྲལ་བ། །སྣང་སྲིད་གཞིར་བཞེངས་དགོངས་པ་ཡིས། །མ་མོ་འཁོར༴ །སྣང་བ་ཐབས་ཆེན་ཡབ་ཀྱི་མཁའ། །སྟོང་པ་ཤེས་རབ་ཡུམ་གྱི་ཀློང་། །ཟུང་འཇུག་བདེ་ཆེན་འཁོར་ལོ་ཡིས། །མ་མོ་འཁོར་བཅས༴ །སྣང་སྟོང་རྩ་གནས་རྡོ་རྗེའི་སྐུ། །གྲགས་སྟོང་རླུང་སྔགས་རྡོ་རྗེའི་གསུང་། །རིག་སྟོང་ཐིག་ལེ་རྡོ་རྗེའི་ཐུགས། །མཉམ་རྫོགས་ཁྱབ་བརྡལ་ངང་དུ་བསྐང་། །བདག་ཅག་མ་རིག་དབང་གྱུར་པས། །བཅས་དང་རང་བཞིན་ལས་གྱུར་པ། ཁ་ན་མ་ཐོའི་ཉེས་པ་རྣམས། །གནོང་འགྱོད་དྲག་པོས་མཐོལ་ཞིང་བཤགས། །སྡོམ་གསུམ་སྤྱི་དང་ཁྱད་པར་དུ། །གསང་སྔགས་ཟབ་མོའི་དམ་འགལ་ཞིང་། །ཉམས་དང་ཚོགས་འདྲེས་སྤྱོད་ལམ་རྩིངས། །གང་མཆིས་འགྱོད་པས་མཐོལ་ཞིང་བཤགས། །ཁྱད་པར་ལྷ་མོ་དཔོན་གཡོག་གི། །རྩ་བ་ཡན་ལག་དམ་ཚིག་རིགས། །རྟེན་རྫས་མ་ཚང་བསྙེན་སྒྲུབ་གཡེལ། །ལྟ་སྒོམ་གོལ་ཞིང་དུས་མཆོད་ཆག །ཐེ་ཚོམ་ཁུ་འཕྲིགས་སྤང་ལེན་བྱས། །མེ་རླུང་སྐེད་བཅད་སྦྲུམ་མ་སྨད། །བོང་དྲེལ་བྱ་ནག་བརྡུང་བཏགས་སོགས། །མི་ཤེས་ལེ་ལོའི་དབང་གིས་ནི། །ཐུགས་འགལ་ཅི་མཆིས་བཟོད་པར་གསོལ། །བྱང་དག་ཚངས་པའི་དངོས་གྲུབ་སྩོལ། །སེམས་ཉིད་གདོད་ནས་འདུས་མ་བྱས། །
རྣམ་རྟོག་གློ་བུར་འཁྲུལ་བ་ཉིད། །བྱ་བྱེད་བག་ཆག་མཁའ་ལྟར་དག །ཡེ་སྟོང་བཟོ་མེད་གཉུག་མའི་གཤིས། །དགེ་སྡིག་བསྲུང་མཚམས་ལས་འདས་དང་། །རང་བབ་རྒྱུན་གྱི་རྣལ་འབྱོར་ལ། །བཅོས་མའི་དག་ཚངས་འཁྲུལ་པའི་བློ། །འོན་ཀྱང་སྒྱུ་མའི་རོལ་པ་ཡིས། །རྟེན་འབྱུང་སྣང་ལ་མ་འགགས་པར། །བསྐང་ཞིང་བཤགས་པས་དགྱེས་གྱུར་ཏེ། །གཡར་དམ་གཉན་པོ་སོར་ཆུད་མཛོད། །དབྱིངས་ནས་ཐུགས་རྗེའི་དགྱེས་དགོངས་ལ། །གྲུབ་པ་བརྒྱད་དང་ཕྲིན་ལས་བཞི། །མཆོག་ཐུན་དངོས་གྲུབ་དུས་འདིར་སྩོལ། །ནད་གདོན་གྲིབ་དང་ལྟས་ངན་བྱུར། །དུས་མིན་འཆི་སོགས་ཆོས་མཐུན་གྱི། །བར་དུ་གཅོད་པ་མཐའ་དག་སོལ། །སྔོན་ལས་འཕྲལ་རྐྱེན་ལས་གྱུར་པའི། །བྱད་སྟེམས་སྲི་ཀེག་མི་མཐུན་ཕྱོགས། །གཟུགས་ཅན་གཟུགས་མེད་འཚེ་བ་ཟློག །ནད་མུག་མཚོན་གྱི་དལ་ཡམས་སོགས། །མ་མོ་འཁྲུགས་པའི་དབང་གྱུར་པའི། །བཀའ་ཆད་དགྲ་དང་བགེགས་ལ་ཕོབ། །སངས་རྒྱས་བསྟན་པ་དར་རྒྱས་སྤེལ། །བསྟན་འཛིན་སྐྱེས་བུའི་སྐུ་ཚེ་བསྲིངས། །རྣལ་འབྱོར་ཚེ་དབང་མཐུ་རྩལ་བསྐྱེད། །ཡུལ་ཁམས་ཀུན་ཏུ་བདེ་ལེགས་ཀྱི། །བཀྲ་ཤིས་སྣང་བས་ཁྱབ་པར་མཛོད། །མདོར་ན་ཆོས་མཐུན་འདོད་པའི་དོན། །ཐོགས་མེད་ལྷུན་གྱིས་གྲུབ་པ་ཡི། །ལེགས་ཚོགས་མི་ཉམས་གོང་
འཕེལ་མཛོད། །ཡེ་ཤེས་ལྷ་མོས་དབྱིངས་ནས་གཟིགས། །ལས་ཀྱི་མ་མོས་དངོས་གྲུབ་སྩོལ། །འཇིག་རྟེན་མ་མོས་སྡོང་གྲོགས་མཛོད། །མ་གཅིག་བཞིན་ཏུ་བྱམས་པས་སྐྱོངས། །སྲིང་གཅིག་བཞིན་ཏུ་གདུང་བས་དགོངས། །སྙིང་གྲོགས་བཞིན་ཏུ་འབྲལ་མེད་འགྲོགས། །བྲན་མོ་བཞིན་ཏུ་ཅི་བཅོལ་སྒྲུབས། །རྩེ་གཅིག་གདུང་བས་མཆོད་བསྟོད་ན། །ཐུགས་རྗེ་ཐུགས་དམ་མ་གཡེལ་བར། །རྟག་ཏུ་དགྱེས་པས་དགོངས་ནས་ཀྱང་། །འདི་ནས་བྱང་ཆུབ་སྙིང་པོའི་བར། །འདོད་པའི་ཕྲིན་ལས་གྲུབ་པར་མཛོད། །ཅེས་རང་རིགས་ཆོ་འབྲང་གི་བརྒྱུད་སྲུན་ཐུན་མིན་ཏུ་གྲགས་པའི་ཕྱིར། ནགས་ཁྲོད་ཀུན་བཟང་བདེ་གླིང་དུ་གུ་་སཱ་རས་ཐུན་མཚམས་སུ་ཆེད་དུ་བརྗོད་པ་ཡེ་ཤེས་ལྷ་མོས་རྗེས་སུ་འཛིན་པའི་རྒྱུར་གྱུར་ཅིག །ཤུ་བྷཾ།། །།