དམ་ཆོས་བདུད་ཀྱི་གཅོད་ཡུལ་གྱི་རྩ་གསུམ་ཆོས་སྲུང་བཅས་པའི་གཏོར་འབུལ་སྙིང་པོ་བཅུད་ལྡན།
དམ་ཆོས་བདུད་ཀྱི་གཅོད་ཡུལ་གྱི་རྩ་གསུམ་ཆོས་སྲུང་བཅས་པའི་གཏོར་འབུལ་སྙིང་པོ་བཅུད་ལྡན་ཞེས་བྱ་བ་བཞུགས་སོ། །
ན་མོ་གུ་རུ། གཅོང་ཡུལ་བརྒྱུད་པའི་རྩ་གསུམ་ཆོས་སྲུང་དང་བཅས་པ་ལ་སྤྱི་གཏོར་འབུལ་བར་སྤྲོ་ན། གཏོར་མ་དཀར་དམར་སྤྱི་ལྟར་བཤམ། མ་འཛོམ་ན་ཕྱེ་མར་རམ། ཟས་ཕུད། གསེར་སྐྱེམས་ཙམ་ལ་ཆུ་ཆང་བྲན་ཏེ། རཾ་ཡཾ་ཁཾ། །ཡེ་ཤེས་མེ་རླུང་ཆུ་ཡིས་དངོས་འཛིན་སྦྱངས། །བནྡྷའི་སྣོད་དུ་ཤ་ལྔ་བདུད་རྩི་ལྔ། །འོད་ཞུ་དམ་ཡེ་གཉིས་མེད་བདུད་རྩིའི་མཚོ། །འདོད་ཡོན་སྤྲིན་ཕུང་མཁའ་ཁྱབ་འཕྲོ་བར་གྱུར། ཨོཾ་ཨཿཧཱུྃ། ལན་གསུམ། ཏ་ཧོ་ཧྲཱི། ཿཞེས་བྱིན་བརླབས། ཧཱུྃ། འོག་མིན་མཁའ་སྤྱོད་གནས་ཡུལ་དུར་ཁྲོད་བརྒྱད། །སྲིད་གསུམ་རང་རང་བཞུགས་པའི་ཞིང་རྣམས་ནས། །གཅོད་ཡུལ་བརྒྱུད་པའི་བླ་མ་ཡི་དམ་དང་། །མཁའ་འགྲོ་ཆོས་སྐྱོང་བཀའ་སྲུང་འཁོར་དང་བཅས། །འདིར་གཤེགས་རང་མཐུན་དགྱེས་པའི་གདན་ལ་བཞུགས། །གུས་པས་ཕྱག་འཚལ་ཉམས་ཆགས་སྡིག་སྒྲིབ་བཤགས། །ཕྱི་ནང་གསང་བ་བླ་མེད་མཆོད་སྤྲིན་འབུལ། །ཁྱད་པར་དགྱེས་སྐོང་དམ་ཚིག་མཆོག་གི་རྫས། །སྨན་གཏོར་རཀྟ་ཚོགས་ཀྱི་འཁོར་ལོས་མཆོད། །དབྱངས་སྙན་ཡན་ལག་རྒྱ་མཚོས་གུས་པས་བསྟོད། །གཉིས་འཛིན་འཁྲུལ་རྟོག་རྩད་ནས་ཆོད་པ་དང་། །མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས། བཛྲ་ས་མཱ་ཛཿ པདྨ་ཀཱ་མ་ལཱ་
ཡ་སྟྭཾ། ན་མོ་ན་མཱ་མི། ཨོཾ་གུ་རུ་དྷེ་བ་ཌཱ་ཀི་ནཱི་དྷརྨཱ་པཱ་ལ་བྷཱུ་མི་པ་ཏི་ས་པཱ་རི་པཱ་ར་ཨི་དམ་བ་ལི༚་ཏ་ཁ་ཁ་ཁཱ་ཧི་ཁཱ་ཧི། སྔགས་ལན་བདུན་ནམ་གསུམ་གྱིས་ཕུལ་ལ། ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱ། ཧཱུྃ། །དམ་ཆོས་ཟབ་མོ་བདུད་ཀྱི་གཅོད་ཡུལ་ཉིད། །གང་ལས་བརྒྱུད་པའི་དཔལ་ལྡན་བླ་མ་མཆོག །སྟོན་པ་ཤཱཀ་ཐུབ་འཇམ་དབྱངས་སྨྲ་བའི་སེང་། །ཨརྱ་དེ་བ་མཁའ་སྤྱོད་སུམ་ཅུ་དྲུག །དམ་པ་རྒྱ་གར་སྐྱོ་སྟོན་བསོད་ནམས་སོགས། །ཕ་རྒྱུད་ཐབས་ཀྱི་བརྒྱུད་པའི་བླ་མ་དང་། །ཡུམ་ཆེན་ཤེར་ཕྱིན་རྫུ་འཕྲུལ་འཕགས་མ་སྒྲོལ། །མཁའ་འགྲོ་ཉེར་བཞི་སུ་ཁ་སིདྡྷི་སོགས། །མ་རྒྱུད་ཤེས་རབ་བརྒྱུད་པའི་བླ་མ་དང་། །རྡོ་རྗེ་འཆང་ཆེན་སངས་རྒྱས་སྐུ་བཞི་པོ། །གྲུབ་ཐོབ་ཕོ་མོ་ལྔ་བཅུ་རྩ་བཞི་སོགས། །གཉིས་མེད་དོན་གྱི་བརྒྱུད་པའི་བླ་མ་དང་། །བརྒྱུད་གསུམ་གཅིག་འདུས་དམ་པ་རྒྱ་གར་བ། །མ་གཅིག་ལབ་སྒྲོན་སྲས་མཆོག་གླང་ལུང་པ། །ཐོད་སྨྱོན་བསམ་འགྲུབ་སྲས་མོ་རྣམ་པ་གཉིས། །སྤྲུལ་པའི་སྐུར་བྱོན་ལ་འདུས་རྡོ་རྗེ་སྒྲོན། །ཁུ་སྒོམ་ཆོས་སེང་ཁམ་བུ་ཡ་ལེ་དང་། །དོལ་པ་ཟང་ཐལ་རྒྱ་ནག་གཅེར་བུ་སོགས། །བཀའ་བབས་བུ་ཆེན་བཅུ་དྲུག་གཙོར་གྱུར་པའི། །རིང་བརྒྱུད་ཉེ་བརྒྱུད་གཏེར་བརྒྱུད་བླ་མ་ལ། །
རང་བྱུང་ཡེ་ཤེས་མོས་གུས་མཆོད་གཏོར་འབུལ། །སྐྱེ་མེད་ཆོས་སྐུར་རྟོགས་པར་བྱིན་གྱིས་རློབས། །གསང་འདུས་དགྲ་ནག་གཤིན་རྗེའི་གཤེད་དམར་པོ། །རྡོ་རྗེ་འཇིགས་བྱེད་ལ་སོགས་ཕ་རྒྱུད་དང་། །བདེ་མཆོག་འཁོར་ལོ་ཀྱེ་རྡོར་སྒྱུ་འཕྲུལ་ཆེ། །གདན་བཞི་ཐོད་པ་ལ་སོགས་མ་རྒྱུད་དང་། །གཉིས་མེད་དཔལ་ལྡན་དུས་ཀྱི་འཁོར་ལོ་སོགས། །ཡི་དམ་རྒྱུད་སྡེ་བཞི་ཡི་ལྷ་ཚོགས་ལ། །ཕྱི་ནང་གསང་བ་དེ་ཉིད་གཏོར་མ་འབུལ། །དོན་གཉིས་གཅིག་ཅར་འགྲུབ་པའི་དངོས་གྲུབ་སྩོལ། །རྡོ་རྗེ་ཕག་མོ་རྡོ་རྗེ་བདག་མེད་མ། །ཁྲོས་མ་ནག་མོ་རིགས་བཞིའི་མཁའ་འགྲོ་མ། །ཡུལ་ཆེན་ཉེར་བཞི་གནས་མཆོག་སུམ་ཅུ་གཉིས། །དུར་ཁྲོད་ཆེན་པོ་བརྒྱད་ལ་སོགས་པ་ཡི། །གནས་གསུམ་དཔའ་བོ་རྣལ་འབྱོར་མ་རྣམས་ལ། །ལྷན་སྐྱེས་ཟག་མེད་བདེ་ཆེན་གཏོར་མ་འབུལ། །བརྟུལ་ཞུགས་ལམ་དུ་ལོང་བའི་གཟི་བྱིན་སྐྱེད། །མྱུར་མཛད་ཡེ་ཤེས་མགོན་པོ་ཨགྷོ་ར། །དུར་ཁྲོད་བདག་པོ་གནོད་སྦྱིན་མཆེད་དེ་བརྒྱད། །འབྲོག་གནས་མཆེད་ལྔ་དཔལ་མགོན་བདུན་ཅུ་གཉིས། །རྒྱལ་ཆེན་བཞི་སོགས་ཆོས་སྐྱོང་པོ་རྒྱུད་ལ། །རྨད་བྱུང་དམ་རྫས་རྒྱན་གྱི་གཏོར་མ་འབུལ། །རེ་དོགས་ཁུ་འཁྲིག་རྩད་ནས་ཆོད་པར་མཛོད། །དཔལ་ལྡན་རེ་མ་ཏི་དང་ཟློག་བྱེད་མ། །
དུར་ཁྲོད་བདག་མོ་སྤྱང་ཞོན་མཆེད་གསུམ་དང་། །ལས་བདག་མཚན་མོ་སྒྲ་སྒྲོགས་དབྱུ་གུ་མཆེད། །ཞིང་སྐྱེས་ཀུན་ཏུ་རི་སོགས་མོ་རྒྱུད་ལ། །སྣང་སྲིད་འདོད་ཡོན་རོལ་པའི་གཏོར་མ་འབུལ། །གློ་བུར་རྐྱེན་ངན་གྲོགས་སུ་འཆར་བར་མཛོད། །གཟའ་བདུད་རཱ་ཧུ་ལ་དང་གདོང་མོ་བཞི། །འབར་བ་སྤུན་བདུན་ཟངས་རི་བཙན་རྒོད་ཆེ། །ཀླུ་རྒྱལ་དྲག་པོ་ཟླ་སྐྱོང་ལ་སོགས་པ། །མ་གཅིག་བཀའ་ཉན་དམ་ཚིག་ལྡན་རྣམས་ལ། །དགྲ་བགེགས་ཤ་ཁྲག་རུས་པའི་གཏོར་མ་འབུལ། །ལྟས་ངན་ཐམས་ཅད་གཡང་དུ་ལོན་པར་མཛོད། །ཐང་ལྷ་མཁའ་རི་འོད་དེ་གུང་རྒྱལ་དང་། །ཤམ་པོ་ལ་སོགས་མགུལ་ལྷ་བཅུ་གསུམ་པོ། །བརྟན་མ་བཅུ་གཉིས་གཙོར་གྱུར་གཞི་གནས་བདག །གཅོད་ཡུལ་བསྟན་དང་དཀར་ཕྱོགས་སྐྱོང་རྣམས་ལ། །བཞེད་རྒུར་འཆར་བའི་འདོད་ཡོན་གཏོར་མ་འབུལ། །གཟན་བསྐྱུར་ལམ་དུ་འགྲོ་བའི་ཕྲིན་ལས་སྒྲུབས། །རྩ་གསུམ་ཆོས་སྐྱོང་དགྱེས་པའི་བྱིན་རླབས་ཀྱིས། །བདག་ཅག་འཁྲུལ་གཅོད་ཉམས་ལེན་གནད་ཐོག་ཕེབ། །ཚར་སློང་མཐར་ཕྱིན་ཉག་གཅིག་རྩད་ནས་ཆོད། །ཐོགས་བཅས་ཐོགས་མེད་དགའ་བྲོད་སྙེམས་བྱེད་བདུད། །རང་སར་ཞི་ཞིང་གཟུང་
འཛིན་འཁྲུལ་བ་ཞིག །ལུས་ལ་བདེ་བ་དག་ལ་ནུས་པ་འབར། །སེམས་ཉིད་དོན་རྟོགས་འགྲོ་དོན་ཕྱོགས་མེད་འགྲུབ། །ཆོས་སྐུ་ཡུམ་ཆེན་ཉིད་དང་དབྱེར་མེད་པར། །བློ་འདས་དབྱིངས་སུ་གྲོལ་བར་བྱིན་གྱིས་རློབས། །ལྷ་རྣམས་ནོངས་པ་གང་མཆིས་བཟོད་པར་གསོལ། །རང་གནས་གཤེགས་སམ་རྟེན་ལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་བཀྲ་ཤིས་ཚོགས། །གོང་ནས་གོང་དུ་འཕེལ་བའི་དགེ་ལེགས་སྩོལ། །ཅེས་བརྗོད། འདི་ནི་སྦྲ་མཐོ་བླ་མ་གཅོད་ཡུལ་གྱི་ཉམས་ལེན་མཐར་ཕྱིན་པ་ཀུན་དགའ་རྒྱལ་མཚན་ནས་གསུང་བསྐུལ་ངོར། བློ་གྲོས་མཐའ་ཡས་ཀྱིས་རྫོང་ཤོད་བདེ་གཤེགས་འདུས་པའི་ཕོ་བྲང་དུ་བགྱིས་པ་དགེ་ལེགས་འཕེལ།། །། །།