དམ་ཅན་སྐྱེས་བུ་ཆེན་པོ་མཆེད་འཁོར་བཅས་པའི་མངའ་གསོལ་དགོས་འདོད་ཀུན་སྩོལ།
དམ་ཅན་སྐྱེས་བུ་ཆེན་པོ་མཆེད་འཁོར་བཅས་པའི་མངའ་གསོལ་དགོས་འདོད་ཀུན་སྩོལ་ཞེས་བྱ་བ་བཞུགས་སོ། །
ན་མོ་གུ་རུ་ཧ་ཡ་གྲཱི་བཱ་ཡ། དམ་ཚིག་ཅན་གྱི་སྲུང་མ་གཉེན་པོ་སྐྱེས་བུ་རྡོ་རྗེ་ལེགས་པ་ལ་མངའ་གསོལ་འབུལ་ན། ཕྱི་ནང་གསང་བའི་རྟེན་རྫས་སྤྱན་གཟིགས་མཆོད་པའི་ཡོ་བྱད་ཅི་འབྱོར་པ་བཀྲམ། རྒྱུན་ཏུ་གསེར་སྐྱེམས་ཙམ་ལ་དམིགས་པའི་རྟེན་བྱས་ཀྱང་རུང་ལ་བྱིན་གྱིས་བརླབ་པ་ནི། རང་ཉིད་ཡི་དམ་ལྷའི་ང་རྒྱལ་ལ་གནས་པས་བསང་སྦྱང་། སྟོང་པའི་ངང་ལས་རྒྱ་ཆེ་ཞིང་ངོ་མཚར་བའི་བཀོད་པ་ཚད་མེད་པ་དང་ལྡན་པའི་ཕོ་བྲང་ཆེན་པོའི་ནང་དུ། ཕྱི་ནང་གསང་བའི་རྟེན་སྐོང་སྒྲུབ་པའི་དམ་ཚིག་གི་རྫས་ཁྱད་པར་དུ་གྱུར་པ་རྣམས་དང་། ཐུགས་ལ་བཞེད་རྒུའི་མཆོད་པའི་ཡོ་བྱད་མ་ཚང་བ་མེད་ཅིང་བསམ་གྱིས་མི་ཁྱབ་པ་རྣམས་ཀྱིས་ས་དང་བར་སྣང་ནམ་མཁའ་ཐམས་ཅད་ཡོངས་སུ་གང་བར་གྱུར། ན་མཿསརྦ་སོགས་ནམ་མཁའ་མཛོད་ཀྱི་སྔགས་རྒྱ་དང་། ཨོཾ་བཛྲ་སྥ་ར་་ཁཾ། ལན་གསུམ་བརྗོད། རོལ་མོའི་སྒྲ་དང་བཅས་ཏེ། ཧཱུྃ། རྡོ་རྗེ་འཛིན་པའི་བཀའ་ཉན་ཐ་ཚིག་ཅན། །དབང་ཆེན་རྟ་མཆོག་རྒྱལ་པོའི་ཐུགས་ལས་སྤྲུལ། །སྨོན་ལམ་དབང་གིས་སངས་རྒྱས་བསྟན་པ་སྲུང་། །དམ་ཅན་སྐྱེས་བུ་ཆེན་པོ་རྡོ་རྗེ་ལེགས། །སྐུ་མཆེད་སུམ་བརྒྱ་དྲུག་ཅུ་འཁོར་དང་བཅས། །རྒྱ་བོད་མདོ་གཙང་གང་ན་བཞུགས་གྱུར་ཀྱང་། །རྣལ་འབྱོར་གདུང་བས་འབོད་ཅིང་སྤྱན་འདྲེན་ནོ། །དམ་ཚིག་དབང་གིས་འདིར་གཤེགས་དགྱེས་པར་བཞུགས། །གངས་དཀར་རྡོ་རྗེ་དཔལ་གྱི་ཡུམ་ཆེན་སོགས། །དགྱེས་སྡེ་བརྟན་མ་སྨན་འཁོར་བཅས་པ་དང་། །
སྡོང་ཟླ་སྡེ་བརྒྱད་ཕོ་ཉ་བྲན་གཡོག་རྣམས། །མངའ་གསོལ་མཆོད་པ་བཞེས་ཕྱིར་འདིར་གཤེགས་ཤིག །མཆོད་ཡོན་མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་གླུ་གར་སྙན་པའི་དབྱངས། །གཟུགས་སྒྲ་དྲི་རོ་རེག་བྱ་འདོད་ཡོན་ལྔས། །དམ་ཅན་སྐྱེས་བུ་འཁོར་བཅས་མངའ་གསོལ་ལོ། །བཀྲ་ཤིས་རྟགས་བརྒྱད་རྒྱལ་སྲིད་རྣམ་པ་བདུན། །རིན་ཆེན་སྨན་སྣ་དར་ཟབ་སྙིང་པོ་ལྔ། །འཕན་གདུགས་རྒྱལ་མཚན་བ་དན་རུ་མཚོན་གྱིས། །དམ་ཅན་སྐྱེས་བུ༴ །བདུད་རྩི་སྨན་མཆོད་རཀྟའི་ཨརྒྷཾ་དང་། །རྟེན་གཏོར་རྟག་གཏོར་མཆོད་པའི་བ་ལི༚་ཏ། །ཇ་ཆང་འོ་མ་གསེར་སྐྱེམས་ཕུད་རྒོད་ཀྱིས། །དམ་ཅན༴ །དཀར་གསུམ་མངར་གསུམ་ཤིང་ཏོག་འབྲུ་ཡི་རིགས། །འདབ་ཆགས་གཅན་གཟན་རི་དྭགས་གཡུང་དྭགས་སོགས། །ལྷ་མིའི་དཔལ་འབྱོར་རྨད་དུ་བྱུང་བ་ཡིས། །དམ་ཅན༴ །སྟག་གཟིག་གུང་སོགས་གཡང་གཞིའི་རིགས་གྱུར་དང་། །རྒྱན་དང་བཀོད་པའི་ཁྱད་པར་རྣམ་མང་སོགས། །སྤྱན་གཟིགས་དཀོར་ཆ་དཔག་ཏུ་མེད་པ་ཡིས། །དམ་ཅན༴ །ཁྲབ་རྨོག་རལ་གྲི་མདའ་མདུང་ཕུབ་ལ་སོགས། །སྲ་བརྟན་རྣོ་གཅོད་འབར་བའི་གོ་མཚོན་དང་། །དགྲ་བགེགས་བསྒྲལ་བའི་ཤ་ཁྲག་དོན་སྙིང་གིས། །དམ་ཅན༴ །གནམ་ལྕགས་ཐོ་ཆེན་གསེར་གྱི་རྡོ་རྗེ་དང་། །མགར་གྱི་སྦུད་པ་ལྷབ་ལྷུབ་དམར་ནག་བེར། །ར་སྐྱེས་སེང་གེ་རྒྱན་གྱིས་སྤྲས་
པ་ཡིས། །དམ་ཅན༴ །སྐུ་གཟུགས་བླ་རྡོ་སྲོག་གི་འཁོར་ལོ་དང་། །སྨྱུག་རྒོད་ཁྲབ་བྱང་རྔ་ཁྲབ་ཟངས་མའི་ཁབ། །མེ་ལོང་དུང་འབུ་འུག་སྒྲོའི་མདའ་དར་གྱིས། །དམ་ཅན༴ །ར་ཡི་དབང་པོ་རྣམ་ལྔར་ཡི་ལགས། །ར་ཤ་ར་ཁྲག་ར་ཚིལ་གསུར་དུད་སོགས། །ཁྱད་པར་མཉེས་པའི་མཆོད་རྫས་སྣ་ཚོགས་ཀྱིས། །དམ་ཅན༴ །གསང་བའི་མདོས་ཆེན་ཕུན་ཚོགས་ནོར་གྱི་དབྱིག །བརྟེན་སྒྲུབ་སྐོང་བའི་དམ་རྫས་ཕྱི་ནང་གསང་། །དངོས་འབྱོར་ཡིད་སྤྲུལ་ནམ་མཁའི་ཁམས་གང་བས། །དམ་ཅན་སྐྱེས་བུ་འཁོར་བཅས་མངའ་གསོལ་ལོ། །འོག་མིན་ཞིང་བཞུགས་ཡེ་ཤེས་རྡོ་རྗེ་ལེགས། །ཕྱག་རྡོར་འཁོར་བཞུགས་ལས་ཀྱི་རྡོ་རྗེ་ལེགས། །ནུབ་ཕྱོགས་ཕ་ཝཾ་ལོང་བུའི་མཁར་བཞུགས་པའི། །འཇིག་རྟེན་རྡོ་རྗེ་ལེགས་པ་མངའ་གསོལ་ལོ། །རྒྱ་གར་ཡུལ་བཞུགས་ཆོས་རྒྱལ་སུམ་བརྒྱ་དང་། །རྒྱ་ནག་ཡུལ་བཞུགས་ཁྲིམས་རྒྱལ་སུམ་བརྒྱ་དང་། །འབྲོག་ཡུལ་བཞུགས་པའི་མཁན་པོ་སུམ་བརྒྱ་དང་། །བོད་ཡུལ་དབུས་བཞུགས་སྔགས་པ་དྲུག་ཅུ་སྟེ། །གནམ་ས་ཕྱེད་ལ་མངའ་དབང་སྒྱུར་མཛད་ཅིང་། །ཛམ་བུའི་གླིང་ཀུན་ཁྱབ་པའི་རྫུ་འཕྲུལ་ཅན། །བསྟན་དང་རྣལ་འབྱོར་སྐྱོང་བའི་དམ་ཚིག་ཅན། །སྐུ་མཆེད་སྤྲུལ་འཁོར་བཅས་པ་མངའ་གསོལ་ལོ། །ལྷ་ཁང་སྒྲུབ་གནས་བརྒྱ་དང་རྩ་བརྒྱད་སྐྱོང་། །གནས་གཏེར་བྱེ་བ་ས་ཡའི་སྲུང་མ་མཛད། །དམ་ལྡན་སྲུང་མ་དམ་
ཉམས་མནའ་ཟན་གཤེད། །སྐྱེས་མཆོག་འཁོར་དང་བཅས་པ་མངའ་གསོལ་ལོ། །ལྷ་ཡི་འཁོར་སྐྱོང་རྡོ་རྗེ་ལེགས་པ་སྟེ། །གཟའ་ཡི་འཁོར་སྐྱོང་སེར་སྐྱ་ནག་པོར་གྲགས། །བདུད་བརྩོན་འཁོར་སྐྱོང་དུག་མདའ་རོལ་པ་ནག། མགར་ནག་གནོད་སྦྱིན་སྡེ་དཔོན་མངའ་གསོལ་ལོ། །སྨན་གྱི་སྡེ་དཔོན་རྡོ་རྗེ་བདེ་ལྡན་རྩལ། །ཀླུ་ཡི་སྡེ་དཔོན་རྡོ་རྗེ་ཁྱུང་གཤོག་རྩལ། །རྒྱལ་སྲིན་སྡེ་དཔོན་རྡོ་རྗེ་འབར་བ་དང་། །རྡོ་རྗེ་གྲགས་ལྡན་ཆེན་པོ༴ །ཟབ་ལུང་སྒོ་སྲུང་གཙང་བཙན་གཉེན་པོ་སྟེ། །བན་སྔགས་བོན་སྐྱོང་སྐྱེ་བོའི་དགྲ་བླ་བ། ཁམས་ཀྱི་ཨ་ཇོ་རྒྱ་བོད་ཚོང་གི་དཔོན། །དམག་དཔོན་ཇག་དཔོན་ཆེན་པོ༴ །ལྷ་དང་གཤིན་རྗེ་བདུད་དང་བཙན་གྱི་གིང་། །དགྱེས་སྡེ་གསང་བའི་ཡུམ་ཆེན་བརྟན་མའི་འཁོར། །བྱ་ཁྲ་གཅན་གཟན་མཆེ་བ་ཅན་ལ་སོགས། །ཟ་བྱེད་ཕོ་ཉའི་ཚོགས་རྣམས་མངའ༴། ཕྱི་ནང་བར་གྱི་བློན་པོ་ཆེ་དགུ་དང་། །མོན་ནག་མདའ་ར་མོན་མོ་གླུ་ལེན་ཚོགས། །ལས་བྱེད་རུ་འདྲེན་ཞུ་བ་ཅན་དམག་གི་དཔུང་། །བཙན་འཁོར་སུམ་བརྒྱ་དྲུག་ཅུ་མངའ༴ །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །སྤྲུལ་པ་ཕྱག་བརྙན་བདུད་བཙན་བུད་མེད་འབུམ། ཁམས་ཀྱི་གནོད་སྦྱིན་ནག་པོ་ལ་སོགས་པ། །དམ་ཅན་སྐྱེས་བུ་འཁོར་བཅས་མངའ་གསོལ་ལོ། །རྩེ་གཅིག་ཁྱོད་བསྟེན་གུས་པས་མངའ་གསོལ་ན། །དགྱེས་པའི་འཛུམ་ཞལ་ཡར་ངོའི་ཟླ་ལྟར་སྟོན། །རྟག་
ཏུ་བརྩེར་དགོངས་སྒྲུབ་པའི་རྟགས་མཚན་ཕྱུངས། །སངས་རྒྱས་བསྟན་སྲུང་བསྟན་འཛིན་མངའ་ཐང་སྤེལ། །བསམ་པའི་དོན་སྒྲུབ་རེ་འདོད་ཡིད་བཞིན་སྐོངས། །ཚེ་སྲིངས་དཔལ་སྐྱེད་སྙན་དང་གྲགས་པ་སྒྲོགས། །སྡང་བའི་དགྲ་སོད་གནོད་པའི་བགེགས་རྣམས་ཐུལ། །མི་ལ་ན་ཚ་ཕྱུགས་ལ་གོད་ཁ་དང་། །ལོ་ཉེས་ཁ་སྨྲ་གླེང་བརྗོད་མ་བཏང་ཞིག །ཉེས་པ་ཀུན་ཟློག་ཕུན་ཚོགས་བཀྲ་ཤིས་སྐྱེད། །དཀོར་གྱི་བདག་པོ་ཚོང་གི་དཔོན་པོ་དང་། །བྱེས་ཀྱི་ལམ་ལྷ་དམག་གི་དཔོན་པོ་མཛོད། །མཉམ་གཉིས་འགྲན་ན་རྒྱལ་བའི་རུ་མཚོན་ཚུགས། །མཐུ་རྩལ་ནུས་སྐྱེད་དབུ་འཕང་དགུང་དུ་བསྟོད། །ཉིན་གྱི་བྱ་ར་མཚན་གྱི་མེལ་ཚེ་མཛོད། །གཞི་བྱེས་ཀུན་ཏུ་སྲུང་སྐྱོབས་མ་གཡེལ་བར། །ཇི་ལྟར་བཅོལ་བའི་ལས་རྣམས་མྱུར་འགྲུབ་མཛོད། །ཅེས་པ་ཙམ་མོ། །ཚིག་ལྷུག་པའི་གསོལ་སྨོན་སྦྱར་བ་སྤྲོ་ན། ཧོཿའཛམ་བུའི་གླིང་གི་སྐྱེས་མཆོག །རིག་པ་ཅན་གྱི་རྒྱལ་པོ། ཉི་མ་ནུབ་ཕྱོགས་ཀྱི་སྲོག་བདག །རྣལ་འབྱོར་ཡོངས་ཀྱི་ཆོས་སྐྱོང་། རིན་ཆེན་གཏེར་གྱི་བདག་པོ། སྐྱེ་བོ་ཡོངས་ཀྱི་དགྲ་ལྷ། བན་བོན་ཡོངས་ཀྱི་སྲུང་མ། རྒྱ་ཡི་ཨ་སེ་ཆེན་པོ། ཁམས་ཀྱི་གནོད་སྦྱིན་ཆེན་པོ། བོད་ཀྱི་ཨ་ཇོ་ཆེན་པོ། གནམ་ས་ཕྱེད་ཀྱི་མངའ་བདག །དམ་ཅན་སྐྱེས་བུ་ཆེན་པོ་རྡོ་རྗེ་ལེགས་པ། དགྱེས་སྡེ་བརྟན་མ་བཅུ་གཉིས། བཀའ་སྡོད་གིང་ཆེན་སྡེ་བཞི། མཆེད་འཁོར་སུམ་བརྒྱ་དྲུག་ཅུ། སྡོང་ཟླ་
ལྷ་སྲིན་སྡེ་བརྒྱད། འཁོར་ཚོགས་བྱེ་བ་འབུམ་ཕྲག །སྤྲུལ་པ་ཡང་སྤྲུལ། ཕོ་ཉ་ཕྱག་བརྙན་འཁོར་དང་བཅས་པ་རྣམས་གསོལ་ལོ་མཆོད་དོ། །བསྟོད་དོ་བརྔན་ནོ། །བསྒྲུབ་བོ་བརྟེན་ནོ། །བདག་ཅག་འཁོར་དང་བཅས་པ་རྣམས་ཀྱི་འགལ་རྐྱེན་སོལ་ལ་མཐུན་རྐྱེན་སྒྲུབས་ཤིག །བསམ་པ་སྒྲུབས་ལ་རེ་བསྐོངས་ཤིག །དམ་ཚིག་གི་གྲོགས་པོ་དང་རྡོ་རྗེའི་བཀའ་སྡོད་མཛོད་ཅིག །སྡོད་པའི་གནས་མལ་དང་། མཁོ་བའི་ཡོ་བྱད་སྲུངས་ཤིག །ན་ཚ་གོང་ཁ་དང་ཁ་སྨྲ་གླེང་བརྗོད་ཟློག་ཅིག །བྱད་ཁ་རྦོད་གཏོང་དང་ཆག་ཆེ་ཉམ་ང་ཟློག་ཅིག །དགྲ་རྐུན་ཇག་གསུམ་དང་གདོན་བགེགས་བར་ཆད་ཟློག་ཅིག །གཞི་ལ་སྡོད་ན་མགོན་སྐྱབས་མཛོད་ཅིག །བྱེས་སུ་འགྲོ་ན་ལམ་ལྷ་མཛོད་ཅིག །ལམ་འཕྲང་འཇིགས་སར་སྐྱེལ་བསུ་གྱིས་ཤིག །ཆུ་ལ་འགྲོན་སྒྲོལ་འདོན་གྱིས་ཤིག །ཚོང་དང་དམག་ལ་དཔོན་པོ་གྱིས་ཤིག །དགྲ་དང་རྩོད་ན་ཕ་རོལ་གནོན་ཅིག །མི་མཉམ་པ་དང་མཉམ་དུ་ཆུག་ཅིག །མཉམ་གཉིས་གོང་དུ་རྒྱལ་ཁ་ཐོན་ཅིག །ཚེ་བསོད་དཔལ་འབྱོར་སྙན་གྲགས་སྤེལ་ཅིག །མདོར་ན་ལུས་དང་གྲིབ་མ་བཞིན་དུ་མི་འབྲལ་བར་འགྲོགས་ལ་ཅི་བཅོལ་བའི་ཕྲིན་ལས་མ་ལུས་པ་སྒྲུབ་པ་དང་། བཀྲ་ཤིས་བདེ་ལེགས་ཕུན་སུམ་ཚོགས་པར་མཛད་དུ་གསོལ། །ཅེས་བརྗོད་ལ་གསེར་སྐྱེམས་ཕུད་མཆོད་ནམ་མཁའ་ལ་འཐོར་ཞིང་རོལ་མོ་དང་
དབྱངས་ཀྱིས་གཟེངས་བསྟོད་པར་བྱའོ། །ཞེས་པ་འདིའང་སྡེ་བཞི་དགེ་བ་བཅུ་ལྡན་གྱི་རྒྱལ་ཁབ་ཆེན་པོའི་ལུགས་ཟུང་གཉེར་སྤྱོད་བཀྲ་ཤིས་དོན་ཀུན་གྲུབ་པའི་གསུང་བསྐུལ་ངོར། པདྨ་གར་དབང་བློ་གྲོས་མཐའ་ཡས་ཀྱིས་ཙཱ་འདྲ་རིན་ཆེན་བྲག་གི་སྒྲུབ་གནས་སུ་དམ་ཅན་རྒྱུ་བའི་ཉི་མ་བཟང་པོར་སྦྱར་བ་དགེ་ལེགས་འཕེལ།། །།