ཟླ་བ་སྒྲ་གཅན་ལ་འཇུག་པའི་གཏམ་དྭངས་ཤེལ་མེ་ལོང་།
ཟླ་བ་སྒྲ་གཅན་ལ་འཇུག་པའི་གཏམ་དྭངས་ཤེལ་མེ་ལོང་ཞེས་བྱ་བ། འགྱུར་མེད་སྟོང་ཆེན་ཐིག་ལེ་རུ། །སྣང་བ་དཀར་དམར་རྣམ་དག་པས། །སྲིད་ཞི་བདེ་བ་ཆེན་པོར་བསྡོམས། །བླ་མ་དུས་ཀྱི་འཁོར་ལོར་འདུད། །ཇི་ལྟར་ཀཱ་ཤི་མདངས་དགའི་ཁྱིམ། །མར་མའི་ཟེར་གྱིས་སྣང་བ་ཡིས། །ཕྱི་རོལ་དག་ཀྱང་སྣང་བྱེད་པ། །ཕྱི་ན་གནས་མིན་ནང་ན་མིན། །དེ་བཞིན་བར་དུའང་མི་གནས་པ། །རྒྱུ་རྐྱེན་རྟེན་ཅིང་འབྲེལ་འབྱུང་ཚུལ། །ཀུན་རྫོབ་ཡང་དག་མིན་རྟོག་པར། །འཁྲུལ་པའི་གཞན་དབང་མང་བར་ཟད། །འོན་ཀྱང་གཤིས་ཀྱི་དག་པ་ལ། །ཡོན་ཏན་འཁོར་ལོའང་ཟུང་འཇུག་པས། །རང་བཞིན་རྡོ་རྗེའི་གནས་སྣང་ཉིད། །ཐིག་རླུང་རྩ་ཡི་འདུ་འཕྲོ་ལས། །དག་བྱ་དག་བྱེད་དག་འབྲས་བུ། །ཕྱི་ནང་གཞན་དང་གསུམ་འབྲེལ་བས། །བདེན་མིན་རྫུན་མིན་ཤེས་བྱ་ཡི། །མཚན་གཞི་མཚན་ཉིད་འབྱམས་ཀླས་ཕྱིར། །ཆགས་སྟོང་ཟད་དང་འཕེལ་བ་ཡི། །དུས་གསུམ་ཚང་བའི་དཀར་ནག་ཚིག །སྟོང་ཆེན་མུན་པའི་མཚམས་ཞུགས་པས། །གོ་ལའི་དོགས་སུ་ཆུ་ཤེལ་གྱི། །དཀྱིལ་འཁོར་ལ་བསྟེན་བསིལ་བའི་ཟེར། །འབད་ནས་སྤྲོ་བ་ནམ་མཁའི་ནོར། །བསོད་ནམས་ལྡན་པའི་སྒྲ་གཅན་གཟས། །མུན་རུག་ནས་བཟུང་ཆུ་ཚོད་གྲངས། །དུས་དང་
འཁྲིག་པ་འདས་པའི་མཚམས། །ཐུན་གསུམ་ཐ་མ་ཐོ་རེངས་སུ། །ཤར་དང་ཉེ་བའི་ཕྱོགས་དག་ནས། །དབྱུ་གུ་གཟུགས་དང་བསེ་རུའི་ཡུན། །དཀྱིལ་འཁོར་རིལ་པོ་བཟུང་ནས་བསྒྲིབ། །ཐོག་མཐར་དུད་ཀ་བར་དུ་ནི། །ཟངས་ཁོག་ལྟ་བུའི་མདོག་ཏུ་འགྱུར། །སྡང་བས་ཐོས་པའི་མི་སྡུག་ལུས། །མ་སོས་པར་ཡང་གཞན་ཏུ་འགྲོ། །དེ་ཚེ་དགེ་སྡིག་གང་བྱས་ཀྱང་། །བྱེ་བ་བདུན་ཏུ་འགྱུར་གསུངས་ཕྱིར། །སྡིག་པ་བཀྲུ་དང་བསོད་ནམས་སྤེལ། །བྱང་ཆུབ་སེམས་ལ་བློ་སྦྱངས་ཞིང་། །རིམ་པ་གཉིས་ལ་རབ་ཞུགས་པའི། །ཕྱི་ནང་གསང་བའི་རྣལ་འབྱོར་གྱིས། །སྦྱིན་སྲེག་བཅུད་ལེན་སྨན་སྦྱོར་བྱ། །ཁྱད་པར་སྤྲོས་མེད་རྡོར་བཟླས་དང་། །ནང་གི་ཚུལ་ལ་མཉམ་པར་འཇོག། འབྲུ་བཅུད་རྒྱས་ཤིང་ཆོས་དང་ནོར། །འཕེལ་སོགས་མཚན་ལྟས་བཟང་བར་བཤད། །དགེ་བར་གྱུར་ཅིག་རྣམ་དཀར་གྱི། །བྱ་བས་འཇིག་རྟེན་ཕ་རོལ་ཏེ། །རྩོད་པས་རྣམ་པར་ཉམས་པའི་མུན། །རྫོགས་ལྡན་སྣང་བ་གསར་བས་སོ། །འདི་ལྟར་བརྗོད་ལས་བྱུང་བའི་དགེས། །བརྗོད་མེད་དེ་ཉིད་རབ་རྟོགས་ནས། །མཐའ་ཡས་འགྲོ་ཀུན་རྣམ་མཁྱེན་གྱི། །གོ་འཕང་བདེ་བླག་ཐོབ་གྱུར་ཅིག །ཅེས་པའང་ལྔ་རིག་སྨྲ་བའི་བཙུན་པ་ཡོན་ཏན་རྒྱ་མཚོས་སྤེལ་བ་སརྦ་མངྒ་ལཾ།། །།