རབ་ཡིད་ཤིང་མོ་སྦྲུལ་ལོའི་ལྀ་ཐུའུ་འགོ་བརྗོད་ཀོ་ཀི་ལའི་དབྱངས་སྙན།
རབ་ཡིད་ཤིང་མོ་སྦྲུལ་ལོའི་ལྀ་ཐུའུ་འགོ་བརྗོད་ཀོ་ཀི་ལའི་དབྱངས་སྙན་ཞེས་བྱ་བ་བཞུགས་སོ། །
ཤྭཱསཱབནྡྷཧམཿ སྠི་རཱཙལཽ། བྷཱབཱབྷཱབམཧཱསུཁེཤུདྷཿ ཕལྱཾབསྟུབིབྷུསྶམཾཡུཛཻ། རཱདིརྦུདྡྷགུ་རུཾཤིརོཛཡེ་ཏྲ། སྡེབ་སྦྱོར་དག་པའི་སྣང་བའོ། བརྟན་དང་གཡོ་བའི་དུས་སྦྱོར་དབུ་མར་བཅིངས། །དངོས་དང་དངོས་མེད་བདེ་བ་ཆེན་པོར་དག །གཞི་དང་འབྲས་བུ་ཁྱབ་བདག་མཉམ་པར་སྦྱོར། །དང་པོའི་སངས་རྒྱས་བླ་མ་གཙུག་ན་རྒྱལ། །གཟུགས་དང་སྡུག་བསྔལ་འདུ་ཤེས་འཕེལ་བ་དང་། །གཉིད་སོགས་ཤེས་པ་མིན་པའི་དངོས་ཉམས་པས། ཁམས་དྲུག་བདག་ཉིད་དཀྱིལ་འཁོར་རྣམ་པ་ཅན། །སྐུ་ཡི་རྡོ་རྗེ་རྡུལ་དང་བྲལ་དེར་འདུད། །དབྱེ་བ་ལྔས་བཅིངས་གྲི་གུག་ལ་སོགས་རིགས། །ཡུལ་དང་ཡོན་ཏན་རང་བཞིན་གཞོམ་མེད་དབྱངས། །ལམ་གསུམ་དགའ་བ་འགགས་པ་གསུང་རྡོ་རྗེ། །སྤྲུལ་པ་བཞི་ཡི་ཆ་ལྡན་དེ་ལ་འདུད། །མཁྲིས་པ་ཉི་མ་བད་ཀན་རི་བོང་ཅན། །རྩ་ཡི་ཆུ་སྐྱེས་བདུད་རྩིའི་གནས་ཀྱི་ཆར། །སྲིད་པ་གསུམ་ཟོས་མུན་ཅན་རྣམ་མེད་ཀྱང་། །རྣམ་པ་ཀུན་ལྡན་ཐུགས་ཀྱི་རྡོ་རྗེར་འདུད། །ཕྱག་རྒྱ་སྒྱུ་མའི་རྗེས་མཐུན་དུ་མའི་གཟུགས། །དྲི་མེད་གློག་མཚུངས་སྣང་བྱེད་གཅིག་པུ་ཉིད། །སེམས་ཀྱི་རང་བཞིན་སེམས་ཀྱིས་འཁྱུད་གྱུར་པ། །ཡེ་ཤེས་རྡོ་རྗེ་འགྱུར་བ་མེད་དེར་འདུད། །མཆོག་
གསུམ་གཞན་ཏེ་རྡོ་རྗེའི་ཁང་པའི་སྒོར། །ཐུབ་པའི་ཚོགས་དང་ད་ལས་གཞན་པར་ཡང་། །འཇིག་རྟེན་ལས་འདས་མཆོག་གི་དབང་སྦྱིན་པ། །བྱང་སེམས་འཇམ་པའི་དཔལ་སོགས་སྤྱི་བོས་བཏུད། །མི་འགྱུར་བདེ་བས་ལུས་ཕུག་པ་ཡི་སྲོག །རྡོ་རྗེར་རབ་ཞུགས་ཡེ་ཤེས་མེ་བོ་ཆེས། །སྣང་མཛད་དུས་ཞབས་རྭ་འབྲོ་རང་བྱུང་ཞབས། །མཚུར་འཇམ་ཆོས་ཀྱི་སྤྱན་ལྡན་ལ་སོགས་བསྔགས། །མིང་དང་མིང་ཅན་ལས་འདས་ཡི་གེ་ཡང་། །རིགས་ཀྱི་ཁུངས་བརྡོལ་མི་འགྱུར་གནས་ཐོབ་པ། །ཀུན་མཁྱེན་ཉི་མས་ཤེས་དང་ཤེས་བྱའི་ལམ། །རབ་གསལ་ཆོས་ཀྱི་སྣང་བར་ཕྱག་བགྱིའོ། །གང་གསུང་ལས་སྐྱེས་གྲགས་པའི་རི་མོ་ཅན། །རིག་པའི་འཁྲུལ་འཁོར་ཆེན་པོས་མི་རིགས་པའི། །གྲུབ་མཐའ་སུན་འབྱིན་ཚད་མའི་ཚིག་བརྩམས་པ། །ངེས་ལེགས་མཚན་ཅན་སོགས་ལའང་གུས་བཏུད་ནས། །ཆོ་ག་བཞིན་ཏུ་སེམས་ལ་འབྲས་སྟེར་ཞི་བའི་གཟུགས། །སྡུག་བསྔལ་རྣམ་པ་བདེ་བའི་རང་བཞིན་བརྙན་པོ་ལྟར། །ཐུང་ངུ་རིང་པོའི་ཡོན་ཏན་ཆ་ལྡན་ཆོས་སོགས་ཀྱི། །བཟང་ངན་སྟོབས་གསལ་རྩིས་ཀྱི་བྱང་བུ་འདིར་དགོད་བྱ། ༈དེ་ཡང་སྙིང་རྗེའི་གཞན་དབང་གིས། །རྒྱུ་སྐར་རྣམས་ལས་ཟླ་བ་ལྟར།
རྩོད་ལྡན་གདུལ་བྱ་འདུལ་བ་ལ། །འདྲེན་པ་སྟོང་གིས་མི་བཀྲུན་པ། །པདྨའི་སྤྱན་ཡངས་ཤཱཀྱའི་ཏོག །བལྟམས་ནས་གཟུགས་མཁའ་ཀླུ་ལག་འདས། །སྒྲིབ་གསུམ་རྩད་བཅད་མངོན་བྱང་ཆུབ། །འཇིག་རྟེན་འདྲེན་པས་ཆོས་བསྟན་ཏེ། །སྟོང་ཕྲག་བཅུ་གཉིས་རྡོ་རྗེའི་ཚིག །རྗེས་བཞག་མྱ་ངན་ལས་འདས་པའི། །བགྲང་བྱ་མིག་ལག་འཁོར་ལོ་བརྒལ། །རྒྱལ་ཚབས་རིགས་སྔགས་འཆང་ཆེན་པོའི། །སྒྱུ་འཕྲུལ་རོལ་པས་འོད་མཐའ་ཡས། །མཚོ་དབུས་པདྨའི་སྡོང་བུ་ལས། །འཁྲུངས་ནས་བུག་མཁའ་འཁོར་ལོའོ། །རྡོ་རྗེའི་རིགས་ལྡན་འཇམ་པའི་དཔལ། །ས་སྐྱོང་རྫུ་ལ་ཞུགས་པ་དེས། །ཕྲེང་བ་འཛིན་པའི་སྡེབ་སྦྱོར་གྱིས། །རྒྱུད་ཆེན་བསྡུས་ནས་གཟུགས་མིག་མཁའ། །ཟུལ་ཐལ་དེ་སྲས་སྤྲུལ་པའི་སྐུ། །ཆུ་སྐྱེས་འཛིན་པས་དྲི་མེད་འོད། །སྣང་བྱས་བསེ་རུ་འཁྲིག་སྐྱོན་སོང་། །མེ་མཁའ་རྒྱ་མཚོ་ཚུགས་ནས་ནི། །ཟླ་ཟུང་ཉི་མའོ་གྲུབ་བརྒྱའི་མེས། །རྒྱལ་བས་ལུང་བསྟན་འཚོ་བྱེད་ཞབས། །སྲིད་ཞིའི་དཔལ་འབར་དུས་མཚམས་རི། །རབ་བྱུང་ཚུགས་ནས་སྐྱོན་ཀླུ་བརྒལ། །རང་བྱུང་ཐམས་ཅད་མཁྱེན་དེ་ཡིས། །རྩིས་གཞུང་བརྩམས་ནས་རྒྱུ་སྐར་མདའ། །སྐྱེས་སྦྱངས་བློ་གྲོས་ས་སྟེང་ན། །ཟླ་བྲལ་དོན་གྲུབ་འོད་ཟེར་གྱིས། །
གྲུབ་མཐའི་རྩིས་བརྩམས་རི་དང་པོ། །འཇམ་པའི་རྡོ་རྗེ་མི་ཟོལ་གྱིས། །དམུས་ལོང་རྣམས་ལ་མིག་སྦྱིན་པ། །བསྟན་པའི་ཉིན་བྱེད་ཤར་ནས་ལོ། །ཐུབ་པ་ཡིད་སོང་མཁས་མང་གི། །ཁྱུ་མཆོག་རྗེ་དབོན་ཀརྨ་ཡིས། །རྩིས་གཞུང་སྤེལ་ནས་མེ་དྲག་འདས། །ལྷས་བསྟན་སེངྒེའི་ཁྲི་ཆེན་པོར། །རྣམ་པར་གནོན་པས་རྒྱུད་ཀྱི་རྒྱལ། །ལེགས་གསུངས་བགྲང་བྱ་ཉེར་གཅིག་དང་། །གནམ་བརྐོས་ཏཱ་ཚིན་ཏའོ་ཀོང་ཆེ། །ཁྲིར་བཞུགས་དེ་ཉིད་བརྒལ་བའི་ལོ། ༈འཕགས་ཡུལ་ལྷོ་ན་དགའ་བ་དང་། །ཤར་བས་སྣ་ཚོགས་དབྱིག་ཏུ་འབོད། །མ་ཧཱ་ཙི་ནར་ཡི་ཟི་ཞེས། །ཁོང་ནོང་ལྷ་ཡི་བླ་མའི་ཀླུང་། །འབྱུང་བ་སུམ་ལྡན་ཤིང་མོ་སྦྲུལ། །བཞིན་རས་མཚམས་སྤྲིན་གསར་པའི་དཔལ། །སིནྡྷཱ་བཱ་རའི་ཐོད་ཀྱིས་དཀྲིས། །མ་རྒད་བཞུས་པའི་རལ་གུ་ཡང་། །གནམ་སྔོན་དུམ་བུར་གྱུར་པས་བསྡོམས། །ཕོ་བྲང་དབུས་ན་མིག་སྨན་གྱི། །ཁུ་བས་བཀུས་པའི་གདན་ལ་རོལ། །དེ་འབྲས་ལོ་བཤད་རིགས་མང་པོར། །ལོ་ཁོག་འབྲིང་ཞིང་སྐྱེ་བོ་བདེ། །ནད་དང་འཐབ་རྩོད་ཅུང་ཟད་དཀོན། །ནམ་སྟོད་ཐན་ལ་ནམ་སྨད་ཞོད། །གྲོ་ནས་འབྲིང་དུ་སྨིན་ཞེས་བཤད། །ཁྱད་པར་སྦོར་ཐང་གསེར་གྱི་རྩིས། །ས་གླང་དཔྱད་ལས་ར་བ་བཞིར། །
རླུང་དང་རྩྭ་ཤིང་སྐྱེ་ཕུལ་ཆེ། །གྲོང་ཁྱེར་མེས་གཞོམ་བར་ཁམས་བཙའ། །འབྲིང་པོ་བཞི་ལ་ཞོད་དཀོན་ཙམ། །ཡུལ་སྤྱིར་སད་སེར་ཤི་ཆད་མང་། །བཞོན་མང་ལོ་ཏོག་བུངས་ཆེན་སྐྱེ། །ཕྱུགས་དང་རྒན་བདེ་གཞོན་བྱིས་རྩུབ། །མི་ཀག་ཕྱུགས་ལ་ཡོ་བར་སྲིད། །མྱ་ངན་དང་ནི་ནང་འཐབ་འབྱུང་། །ཆར་ཆེ་སྐྱེ་དགུ་བྲེལ་ཟིང་འཚུབ། །ཟོང་དང་དགྲ་ཟླའང་འབྲིང་དུ་འགྱུར། །སོས་འབུད་ཅུང་ཕྱི་སྟོན་མཇུག་རིང་། །གྲུབ་པའི་ལོ་བདག་ཉི་མའི་བུས། །ནད་མུག་ཆོམ་རྐུན་མི་མཐུན་འབྱུང་། །ནོར་འབྲུ་ཆར་པའང་དཀོན་ཞེས་གསུངས། །བསྡུས་རྒྱུད་བདག་པོ་ཟླ་བའི་བུས། །འགྲོ་བ་ཆོས་ལྡན་ལྷ་ལྟར་རྩེ། །ཆར་ཆེ་འབྲུ་འཕེལ་ནད་རིགས་དཀོན། །སྨན་དང་རྩི་བཅུད་ཤིང་ཏོག་རྒྱས། །ལོ་ལེགས་ཡོན་ཏན་ཅན་དང་ནི། །སྒྱུ་མ་ཟོག་པོས་ས་སྟེང་འགེངས། །རྒྱལ་ཁ་དགེ་བའི་བློན་པོས་སྒྱུར། །འཇིག་རྟེན་ཕན་བདེས་སྐྱོང་བར་དྲན། །ཐ་སྐར་ལོར་ཞུགས་འབྲུ་རྒྱས་བདེ། །གཉིས་ནག་དབུས་ཞུགས་མི་འབྲུ་སྙི། །ཡུལ་འཕོ་ཆུ་ཆེ་འབྲུ་མི་སྨིན། །ལོ་ནག་མཆེ་བ་ཅན་ཡིན་པས། །དགེ་ལས་རྔམས་ཆེན་ལས་ཀུན་འཛེམ། །ཐེ་སེ་ལྷོ་སྟོད་ཧལ་ཁྱི་ནི། །ཤར་སྟོད་ཟིན་ཧུང་ནུབ་བྱང་གནས། །ལྷོ་སྨད་ནུབ་སྨད་ཕྱོགས་དག་གཙང་། །ལས་སྣེ་བྱ་ལོ་ང་བདུན་པ། །གླང་ལོ་བཅུ་བདུན་ལོན་པ་དགེ། །སླར་སྨྲས་པ། ཁ་དོག་གང་
གིས་མུན་པ་ཡང་། །དཀར་པོར་ལེགས་བསྒྱུར་དགེ་བའི་འོད། །དུ་མ་སྦུངས་པ་མི་ཡི་དབང་། །བརྩོན་པས་བསོད་ནམས་མཁའ་ལ་དྲོངས། །རྡོ་རྗེའི་སྣ་ལྡན་མི་གཙང་ལ། །ཞེན་པས་དཔེར་འོས་འགྲོ་འདི་ཡི། །ལེགས་སྤྱོད་མིན་ལ་འཛའ་བའི་སེམས། །དུས་ཀྱི་སྡོང་ཟླར་ལྷགས་པ་བཞིན། །བྱང་སེམས་ཀུན་དང་ནོར་གཅིག་ཏུ། །བྱས་པའི་ལྷག་བསམ་ཆབ་གྱིས་ནི། །བཀྲུས་པས་ལས་དང་འབྲས་བུ་ལ། །ཡིད་ཆེས་བརྩམས་པ་དོན་ལྡན་ཤོག །སྲིད་གསུམ་དངོས་མེད་མངོན་སུམ་ཟ་བའི་མིག །མ་བལྟས་བརྟན་གཡོ་ཀུན་གྱི་སྲོག་མཐོང་བར། །བདེན་པ་དེ་དང་གཤིས་ཀྱི་མཛའ་བའི་དགེས། །བསམ་དགུའི་དཔལ་འབྱོར་ཡོངས་སུ་དར་བར་བསྔོ། །རང་རྒྱུད་སྲིད་དང་ལྷན་ཅིག་མི་གནས་ཀྱང་། །སྲིད་པའི་རི་མོ་འབྲི་བའི་རྡོ་རྗེ་ཅན། །གཟུགས་སུ་སྣང་བ་སི་ཏུ་ཐམས་ཅད་མཁྱེན། །སྲས་བཅས་བསྐལ་པ་རྒྱ་མཚོར་ཞབས་བརྟན་གསོལ། །ལྷ་རིགས་ཐིག་ལེའི་བཅུད་སྨིན་བོད་ཆེན་གྱིས། །ས་ཡི་ཚངས་པ་མི་བདག་མཆེད་དང་ལྕམ། །སྐུ་ཚེའི་གཡུང་དྲུང་འཁྱིལ་ལས་སྡེ་བཞི་དང་། །དགེ་བཅུའི་ཆབ་སྲིད་ཤིན་ཏུ་བདོ་གྱུར་ཅིག །ཡང་སྲིད་ཞིང་བརྒྱར་རིན་ཐང་མེད་པའི་ནོར། །བཅལ་ཡང་རྣ་བར་མི་ཁུག་དཀོན་མཆོག་གི། །མཚན་སྙན་འབྱུང་བ་
བསྟན་པའི་གཟུགས་བརྙན་ཀྱང་། །རྣལ་མར་གནས་ཏེ་ས་སྟེང་ཁྱབ་གྱུར་ཅིག །མཚན་མ་ལས་འདས་མི་ཤིགས་བདེ་བ་ཆེའི། །འོད་ཟེར་མྱུ་གུ་གསར་པས་ལེགས་བརྡོལ་བ། །མངོན་པར་མཐོ་དང་ངེས་ལེགས་དགའ་ཚལ་ན། །འགྲོ་ཀུན་ཡང་དག་ལྟ་བས་གར་བྱེད་ཤོག །སུ་ཁ་སཱདྷུ་ལཀྵྨཱི་བྷ་བནྟུ།། །།