བསླབ་བྱ།
མཚུངས་བྲལ་བླ་མ་སངས་རྒྱས་ཞབས་ལ་འདུད། །དམ་ཆོས་སྒྲུབ་ལ་བརྩོན་པའི་སྐལ་ལྡན་གྱི། །གསལ་འདེབས་འཕགས་བོད་མཁས་གྲུབ་གོང་མ་ཡི། །གཞུང་བཟང་ཐོས་ན་བློ་སྣ་ཆོས་ལ་འགྱུར། །དེ་བས་བྱིན་རླབས་ཅན་གྱི་གདམས་ངག་གཟིགས། །གང་ཟག་ཕལ་པའི་ཉི་ཚེའི་ཚིག་སྦྱོར་རྣམས། །རྣ་བར་སྙན་ཡང་སེམས་ལ་ཕན་མི་ཐོག །མི་ལུས་དལ་འབྱོར་ལོ་བརྒྱ་ཐོག་གཅིག་ཡིན། །ཆུད་ཟོས་བཏང་ནས་རང་གིས་རང་ཉིད་བསླུ། །དགེ་སྦྱོར་སྐྱེ་བར་ཉིན་མོའི་སྐར་མ་འདྲ། །དྲན་ཚེ་མ་བྱས་མི་སྡོད་མྱུར་དུ་ཡལ། །འཆི་བ་ཐོག་བབས་ནམ་འོང་ཆ་མེད་པས། །འདུ་ཤེས་ཀུན་གྱི་གཙོ་བོ་མི་རྟག་བསྒོམ། །རང་གི་ལས་བྱས་རང་ཉིད་ཁོ་ནས་སྨིན། །མ་བྱས་ལས་དང་ནམ་ཡང་མི་འཕྲད་ཕྱིར། །སྡིག་པ་ཕྲ་མོ་ལ་ཡང་དུག་ལྟར་འཛེམ། །འཇིག་རྟེན་ཕ་རོལ་རྣམ་སྨིན་ཤིན་ཏུ་ལྕི། །དགེ་རྩ་པྲ་ཡང་ཁྱད་གསོད་མེད་པར་བསྒྲུབ། །འདི་དང་གཏན་དུ་བདེ་སྐྱིད་ཕུན་ཚོགས་རྒྱུ། །སངས་རྒྱས་ཆོས་ཀུན་རྩ་བ་བྱང་ཆུབ་སེམས། །ལྷག་བསམ་གསེར་དང་འདྲ་བས་གཞི་བཟུང་ནས། །འགྲོ་ཀུན་ཕ་མ་མ་གྱུར་གཅིག་ཀྱང་མེད། །འཁོར་བ་སྡུག་བསྔལ་རྒྱ་མཚོར་བྱིང་བ་ལ། །བྱམས་དང་སྙིང་རྗེ་ཤས་མི་བཟོད་པ་ཡིས། །བདག་ཉིད་ཁོ་ནས་སངས་རྒྱས་སར་འགོད་པའི། །སེམས་འདི་ཡོད་ཕྱིན་ཅི་བྱས་ཆོས་སུ་
འགྱུར། །དེ་མེད་དགེ་རྩ་བསགས་ཀྱང་འཁོར་བའི་རྒྱུ། །གཅིག་ཆོག་ཉམས་ལེན་རྒྱལ་བའི་བཀའ་ལས་འབྱུང་། །དེ་ཕྱིར་བྱང་ཆུབ་སྦྱང་ལ་འདུག་པ་ཡི། །བསླབ་པའི་རིམ་པ་རང་གི་བློ་ནུས་དང་། །སྦྱར་ནས་ལེ་ལོ་མེད་པའི་ལག་བླང་གཅེས། །བཙོན་འགྲུས་མེད་པའི་ཆོས་སྒོར་ཞུགས་པ་རྣམས། །དད་པ་ཡོད་ཀྱང་སྙོམས་ལས་དགྲ་འདིས་ཕུང་། །ཞེ་སྡང་ལ་སོགས་ཉོན་མོངས་གློ་རྡེག་གིས། །ཐར་པའི་ས་བོན་མ་ཆོར་བཅོམ་སྲིད་པས། །དྲན་ཤེས་བྱ་རས་ཐུག་འཕྲད་གཉེན་པོར་སྟེན། །ཆོས་བརྒྱད་ཉོན་མོངས་མ་ཐུལ་ཆོས་པའི་གཟུགས། །ལྷ་དང་བཅས་པའི་འཇིག་རྟེན་ཁྲེལ་བའི་གནས། །དེ་བས་སེམས་རྒྱུད་ཆོས་དང་འདྲེས་པར་གཅེས། །བྱང་ཆུབ་ལམ་གྱི་རིམ་པ་མཐའ་ཡས་ཀྱང་། །ཐོག་པར་མེད་བློ་ཆོས་སུ་སོང་བ་དང་། །ཆོས་དེ་ལམ་དུ་ལོངས་ལ་འདུས་པ་ཡིན། །ལམ་གྱི་འཁྲུལ་སེལ་འཁྲུལ་སྣང་ཡེ་ཤེས་སུ། །ཚོགས་གཉིས་རྫོགས་ན་ཤུགས་ཀྱིས་འཆར་བ་ལགས། །དེ་སྐད་ཐུན་མོངས་བསླབ་བྱ་མདོར་བསྡུས་པ། །ཆོས་བློན་ཚེ་རིང་དོན་གྲུབ་དགེ་སྦྱོར་གྱི། །གསལ་འདེབས་ཕྱིར་དུ་ཆོས་གཟུགས་གུ་་པས། །སྨས་པའི་དགེ་བས་དམ་ཆོས་མཐར་ཕྱིན་ཤོག །སརྦ་དཱ་མངྒ་ལཾ།། །།