ལྷ་མོ་དཔལ་ཆེན་མོའི་གཡང་སྐྱབས་ཀྱི་ལྷན་ཐབས་མཇུག་གི་ཆོ་ག་དགེ་ལེགས་ཆར་འབེབས།
ལྷ་མོ་དཔལ་ཆེན་མོའི་གཡང་སྐྱབས་ཀྱི་ལྷན་ཐབས་མཇུག་གི་ཆོ་ག་དགེ་ལེགས་ཆར་འབེབས་ཞེས་བྱ་བ་བཞུགས་སོ།། །།
སྲིད་ཞིའི་དཔལ་འབྱོར་ཀུན་སྡུད་པ། །ཤེས་རབ་ཕ་རོལ་ཕྱིན་མའི་དངོས། །དཔལ་མོ་དེ་ལ་ཕྱག་འཚལ་ནས། །གཡང་སྐྱབས་རྗེས་ཀྱི་བྱ་བ་འཆད། །དེ་ལ་གཉིས། ཉིན་རེ་བཞིན་བྱ་བ་དང་། སྒྲུབ་པ་གྲུབ་པའི་སྐབས་སུ་བྱ་བའོ། །དང་པོ་ནི། དཔལ་ཆེན་མོའི་གཡང་སྐྱབས་དངོས་གཞི་ཚར་གྲངས་སོང་བའི་དགོངས་མོའི་ཆར་བྱ་བའི་རིམ་པ་ལ་བརྒྱད། མཆོད་པ། བསྟོད་པ། ཐུགས་དམ་བསྐུལ་བ། ཕྱྭ་གཡང་འགུགས་པ། སྦ་བསྟིམ། ནོངས་བཤགས། བརྟན་བཞུགས། བཀྲ་ཤིས་བརྗོད་པའོ། །དང་པོ་ནི། མཆོད་པ་རྣམས་ཁ་གསོས་ལ། ན་མོ་བྷ་ག་བ་ཏེ། བཛྲ་སཱ་ར་པྲ་མཱརྡ་ནཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་
བཛྲེ། མ་ཧཱ་ཏེ་ཛོ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་མནྟོ་པ་སཾ་ཀྲ་མ་ནི་སརྦ་ཀརྨ་ཨཱ་བར་བི་ཤོ་དྷ་ན་བཛྲེ་སྭཱ་ཧཱ། ཞེས་པས་བྱིན་བརླབས་ལ། ཧཱུྃ། བསོད་ནམས་ཡེ་ཤེས་ཚོགས་ཀྱི་སྐུ། །དེ་བཞིན་གཤེགས་དང་རྒྱལ་བའི་སྲས། །དཔལ་གྱི་ལྷ་མོ་གྲོགས་མོ་བརྒྱད། །ཆོས་སྐྱོང་རྒྱལ་པོ་ཆེན་པོ་བཞི། །སྲིད་གསུམ་གཡང་བདག་འཁོར་བཅས་ལ། །འོ་མ་དང་སྦྱར་བདུད་རྩིའི་ཆུ། །ཡན་ལག་བརྒྱད་ལྡན་ཁྲུས་ཀྱི་རྫིང་། །མདངས་ལྡན་མེ་ཏོག་ཆུན་པོ་བསྟར། །སྤོས་དཀར་ཙན་དན་དྲི་བཟང་འཐུལ། །སྣང་གསལ་མར་མེ་ཉི་ལྟར་གསལ། །ག་བུར་གུར་གུམ་ངད་ལྡན་ཆབ། །སྦྲང་རྩི་བུ་རམ་འབྲུ་དཀར་ཟས། །སྣ་ཚོགས་
སྙན་པའི་སྒྲ་དབྱངས་རྣམས། །དངོས་གྲུབ་རྣམ་གཉིས་སྩོལ་བའི་ཕྱིར། །གུས་པས་འབུལ་གྱིས་བཞེས་སུ་གསོལ། །ཨོཾ་མ་ཧཱ་ཤྲཱི་དེ་བཱི་ས་པཱ་རི་བཱ་རེ་བྷྱཿ ཨརྒྷཾ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནེ་བི་དྱ་ཤབྡ་པྲ་ཏཱིཙྪ་སྭཱ་ཧཱ། རིན་ཆེན་གདུགས་དང་གསེར་ཉ་དང་། །གཏེར་ཆེན་བུམ་པ་པདྨ་བཟང་། །དུང་དཀར་གཡས་འཁྱིལ་དཔལ་བེའུ། །མཆོག་གི་རྒྱལ་མཚན་འཁོར་ལོ་སོགས། །དངོས་གྲུབ༴ གུས་པས༴ ཨཥྚ་མངྒ་ལཾ༴ ཕུན་ཚོགས་འཁོར་ལོ་རིན་པོ་ཆེ། །དྲི་མེད་བཙུན་མོ་ཁྱིམ་བདག་དང་། །ཅང་ཤེས་རྟ་དང་གླང་པོ་ཆེ། །ཕས་ཀྱི་རྒོལ་བ་ཚར་གཅོད་པའི། །དམག་དཔོན་རིན་ཆེན་སྣ་བདུན་པོ། །དངོས་གྲུབ༴ གུས་པས༴ སཔྟ་རཏྣ༴ ཡིད་འོང་ནགས་ཚལ་རལ་གྲི་དང་། །ཁང་བཟང་མལ་ཆ་ལྷ་ཡི་གོས། །སྦྲུལ་གྱི་ལྤགས་པ་མཆིལ་ལྷྭམ་སོགས། །དངོས་གྲུབ༴ གུས་པས༴ ཨུ་པ་སཔྟ་རཏྣ༴ མེ་ལོང་གི་ཝཾ་བ་མཆོག་ཞོ། །དཱུརྦ་བིལྦ་ལི་ཁྲི་དང་། །
ཡུངས་ཀར་གཡས་འཁྱིལ་བཀྲ་ཤིས་རྫས། །དངོས་གྲུབ༴ གུས་པས༴ ཨཥྚ་མངྒ་ལ་དྲ་བྱ༴ ཡིད་འོང་གཟུགས་དང་སྙན་པའི་སྒྲ། །ཡིད་འཛིན་དྲི་དང་རོ་བརྒྱའི་ཟས། །འཇམ་མཉེན་འཁྲིལ་ཆགས་རེག་བྱའི་མཆོག །དངོས་གྲུབ༴ གུས་པས༴ པཉྩ་ཀཱ་མ་གུ་༴ གཞན་ཡང་དངོས་བཤམས་ཡིད་ལས་སྤྲུལ། །ལྷ་དང་མི་ཡི་དཔལ་འབྱོར་ནི། །བདེ་བའི་ཡོ་བྱད་མ་ཚང་མེད། །ཟག་མེད་དགྱེས་སྐྱེད་ཅི་མཆིས་པ། །དངོས་གྲུབ༴ །གུས་པས༴ །སརྦ་པཱུ་ཛ༴ གཉིས་པ་བསྟོད་པ་ནི། ཧཱུྃ། །འགྲོ་བའི་མགོན་པོ་རྐང་གཉིས་གཙོ། །དྲན་པས་འཁོར་བའི་འཇིགས་པ་སེལ། །སྟོབས་བཅུའི་མངའ་བདག་རྫོགས་སངས་རྒྱས། །སྲས་དང་བཅས་ལ་ཕྱག་འཚལ་བསྟོད། །ཤེས་རབ་ཕ་རོལ་ཕྱིན་པ་མོ། །ནམ་མཁའ་མཛོད་ཀྱི་ཏིང་འཛིན་ལས། །སྒྲུབ་ལ་དངོས་གྲུབ་སྩོལ་བའི་ཚུལ། །དཔལ་གྱི་ལྷ་མོ་དེ་ལ་བསྟོད། །འགྲོ་ལ་དམིགས་མེད་ཐུགས་རྗེ་ཡིས། །ཐབས་མཁས་རང་བཞིན་སྐུར་སྤྲུལ་པ། །
འཁོར་གྱི་ལྷ་མོའི་ཚོགས་རྣམས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཟབ་ཅིང་རྒྱ་ཆེན་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །འཁོར་དང་བཅས་ལ་བསྟོད་པར་བགྱི། །ལྷ་ཡི་རྒྱལ་པོ་ལྷ་མིན་འཇོམས། །མཐའ་དག་བགེགས་ལ་དབང་སྒྱུར་བ། །གངས་རིའི་མདོག་ལྟར་རབ་ཏུ་དཀར། །ཚོགས་རྗེ་གཟི་བརྗིད་འབར་ལ་བསྟོད། །རིན་ཆེན་གཏེར་ལ་དབང་སྒྱུར་ཞིང་། །རྫུ་འཕྲུལ་ཆེ་ཞིང་འོད་དང་ལྡན། །མི་མགོན་དཀར་པོ་ཀླུ་ཡི་རྒྱལ། །དངོས་གྲུབ་ཀུན་བདག་ཁྱོད་ལ་བསྟོད། །ཤར་ཕྱོགས་སྐྱོང་བའི་རྒྱལ་པོ་ཆེ། །ལྷ་སྲས་རྨ་གཉན་སྤོམ་ར་ནི། །བཙུན་མོ་མཆེད་དང་བློན་འཁོར་བཅས། །རྨ་གཡང་ཆར་བཞིན་འབེབས་ལ་བསྟོད། །ཁྱེད་རྣམས་མཆོད་ཅིང་བསྟོད་པའི་མཐུས། །བདག་གཞན་འགྲོ་བ་མ་ལུས་པའི། །རྒྱུ་འབྲས་དབུལ་བ་ཀུན་སེལ་ཞིང་། །ཚོགས་གཉིས་དཔལ་དང་ལྡན་པར་མཛོད། །མདོར་ན་གནས་སྐབས་མཐར་ཐུག་གི། །མཐུན་
རྐྱེན་ཡིད་ལ་གང་བསམ་པ། །འབད་མེད་ལྷུན་གྱིས་གྲུབ་པ་ཡི། །དངོས་གྲུབ་དུས་འདིར་སྩལ་དུ་གསོལ། །གསུམ་པ་ཐུགས་དམ་བསྐུལ་བ་ནི། ཧཱུྃ། དད་པ་དང་ནི་དམ་ཚིག་གིས། །བསྐུལ་ལོ་བསྐུལ་ལོ་ཐུགས་དམ་སྐུལ། །དེ་བཞིན་གཤེགས་པ་སྲས་དང་བཅས། །དམིགས་མེད་ཐུགས་རྗེ་ཆེན་པོ་ཡིས། །ལས་ངན་འདམ་དུ་བྱིང་བ་ཡི། །སེམས་ཅན་དབུལ་བས་ཉེན་པ་རྣམས། །མྱུར་དུ་སྐྱོབ་པར་མཛད་དུ་གསོལ། །མཆོག་ ཐུན་དངོས་གྲུབ་ཆར་ལྟར་ཕོབ། །བྱང་ཆུབ་སེམས་མ་དཔལ་ཆེན་མོ། །ཁྱོད་ཀྱི་མཚན་གྱི་རིག་པ་མཆོག །འཆང་དང་ཀློག་པའི་ཡོན་ཏན་ནི། །བདེན་པར་སྨྲ་བས་བཀའ་སྩལ་བའི། །བདེན་པའི་འབྲས་བུ་མི་སླུ་བར། །སྒྲུབ་མཆོག་བདག་དང་ཡོན་བདག་ལ། །ཟད་མི་ཤེས་པའི་འབྱོར་པ་ནི། །ནམ་མཁའི་མཛོད་ལ་དབང་སྒྱུར་མཛོད། །གྲོགས་མོ་ལྷ་མོ་བརྒྱད་དང་བཅས། །སངས་རྒྱས་སྤྱན་སྔར་ཞལ་བཞེས་པའི། །ཐུགས་དམ་གཉན་པོ་མ་བསྙེལ་བར། །
དཔལ་དང་སྐལ་པ་བཟང་ལ་སོགས། །སྲིད་ཞིའི་དཔལ་འབྱོར་ཅི་མཆིས་པ། །བདག་དང་ཡོན་བདག་རྣམས་ལ་སྩོལ། །མཐུ་ལྡན་རྒྱལ་པོ་ཆེན་པོ་བཞིས། །མདོ་སྡེ་འཛིན་ལ་སྲུང་བ་དང་། །ལོངས་སྤྱོད་སྤེལ་བར་དམ་བཅས་ལྟར། །མདོ་སྡེའི་དབང་པོར་སྐྱབས་གསོལ་བའི། །བདག་དང་རྒྱུ་སྦྱོར་ཡོན་བདག་གི། །འབྱོར་པའི་བགེགས་རྣམས་ཞི་བ་དང་། །མངའ་ཐང་ལོངས་སྤྱོད་འཕེལ་བར་མཛོད། །རྒྱལ་བའི་བསྟན་སྐྱོང་མཐུ་སྟོབས་ཅན། །སྲིད་གསུམ་གཡང་གི་བདག་པོ་རྣམས། །བླ་མ་སངས་རྒྱས་ཡི་དམ་ལྷས། །ཇི་ལྟར་བཀའ་བསྒོས་དྲན་མཛོད་ལ། །ལྷ་ཀླུ་མི་ཡི་སྣོད་བཅུད་ཀྱི། །བཀྲ་ཤིས་དགེ་མཚན་དྭངས་མའི་བཅུད། །ཕྱྭ་གཡང་དཔལ་འབྱོར་ཅི་མཆིས་པ། །གནས་འདིར་གཡང་གི་རྟེན་ལ་སྡུས། །སྟེང་ནས་ཆར་བཞིན་འབེབས་པར་མཛོད། །འོག་ནས་མཚོ་བཞིན་སྐྱིལ་བར་མཛོད། །བར་ནས་སྤྲིན་བཞིན་གཏིབས་པར་མཛོད། །འདོད་པའི་དོན་ཀུན་འགྲུབ་པ་ཡི། །བཀྲ་ཤིས་བདེ་ལེགས་སྩལ་
དུ་གསོལ། །བཞི་པ་གཡང་འགུགས་ཁུ་ཡེ་བྱ་བ་ནི། །གཟི་བྱིན་བསྐྱེད། །མདའ་དར་གཡབ། དབྱངས་དང་བཅས་ཏེ་འདི་སྐད་དོ། ཀྱེ། ཁུ་ཡེ་ཕྱྭ་དང་གཡང་བླན་ནོ། །གཡང་འགུགས་གཡང་བླན་གར་སྲིད་ན། །སྔོན་ཚེ་བསྐལ་པའི་དང་པོ་ལ། །སངས་རྒྱས་བསོད་ནམས་སྟོབས་ཆེན་པོས། །དུས་གསུམ་དགེ་བའི་ཕྱྭ་གཡང་བསྡུས། །རྗེས་འཇུག་འཚོ་བའི་ཆེད་དུ་བསྔོས། །བཅུད་མཆོག་ཟས་གཡང་དེ་ནས་སྲིད། །བར་དུ་སྤྱན་རས་གཟིགས་དབང་གིས། །གདོང་དམར་བོད་ལ་ཐུགས་རྗེ་བསྐྱེད། །དལ་འབྱོར་ཆོས་ལྡན་མི་བརྒྱུད་སྤེལ། །རིན་ཆེན་འབྲུ་སྣའི་གཏེར་སྒོ་ཕྱེས། །མི་གཡང་ནོར་གཡང་དེ་ནས་སྲིད། །དེ་རྗེས་སྲོང་བཙན་སྒམ་པོ་ཡིས། །རྒྱ་བལ་ནོར་གཡང་བོད་དུ་བླངས། །ཆབ་སྲིད་པདྨའི་མཚོ་ལྟར་རྒྱས། །དགེ་བཅུའི་ཆོས་ཀྱི་ལམ་བཟང་གཏོད། །དབང་ཐང་ཆོས་གཡང་དེ་ནས་སྲིད། །དེ་འོག་བཀྲ་ཤིས་འོམ་བུའི་ཚལ། །བྲག་དམར་དཔལ་གྱི་བསམ་ཡས་སུ། །མཁན་སློབ་ཆོས་གསུམ་ཞལ་འཛོམ་སྟེ། །དམ་པ་ཆོས་ཀྱི་སྒྲོན་
མེ་སྦར། །སློབ་དཔོན་ཆེན་པོའི་བྱིན་རླབས་དང་། །ཆོས་ཀྱི་རྒྱལ་པོའི་ཐུགས་བསྐྱེད་ཀྱིས། །འཇིག་རྟེན་དཔལ་མགོན་ནོར་གྱི་ལྷ། །མཆོད་ཅིང་བརྔན་ནས་ནོར་གཡང་བསྡུས། །མཐའ་བཞིའི་རྒྱལ་ཁམས་མ་ལུས་པའི། །བདེ་ལེགས་དཔལ་འབྱོར་ཕྱྭ་དང་གཡང་། །ཐམས་ཅད་བོད་ཀྱི་ཡུལ་དུ་བཀུག །རྒྱལ་པོའི་མངའ་ཐང་དར་ཞིང་རྒྱས། །གཙུག་ལག་དགེ་འདུན་ས་གཞི་གང་། །མངའ་བདག་ཆེན་པོའི་བསམ་པ་འགྲུབ། །གཡང་འགུགས་གཡང་ལེན་དེ་ནས་སྲིད། །ད་ལྟ་རྣལ་འབྱོར་སྒྲུབ་པ་པོས། །སྦྱིན་བདག་ཚེ་གཡང་སྤེལ་བའི་ཕྱིར། །བཀྲ་ཤིས་ལྷ་གཞི་དཀར་པོ་བཏིང་། །གཡང་རྟེན་སྣ་ཚོགས་གཅལ་དུ་བཀྲམ། །གཡང་གི་ལྷ་མོ་སྤྱན་དྲངས་ཏེ། །ཏིང་འཛིན་སྔགས་རྒྱའི་གཟི་བརྗིད་བསྐྱེད། །དར་དཀར་གཡབ་ཅིང་གཡང་བླན་ན། །ཆོས་ཀྱི་དབྱིངས་ཀྱི་བྱིན་རླབས་དང་། །རྒྱལ་བ་སྲས་བཅས་བདེན་པ་དང་། །ལྷ་མོ་འཁོར་བཅས་མཐུ་སྟོབས་ཀྱིས། །འཁོར་འདས་ལམ་གསུམ་དཔལ་འབྱོར་ཀུན། །ཁུ་ཡེ་ཕྱྭ་
དང་གཡང་དུ་ལེན། །ཕྱོགས་བཅུའི་སངས་རྒྱས་ཞིང་རྣམས་ཀྱི། །ངོ་མཚར་བཀོད་པ་རབ་འབྱམས་དང་། །རྩ་གསུམ་བྱིན་རླབས་དངོས་གྲུབ་དང་། །མཐུ་སྟོབས་ཕྲིན་ལས་གཡང་དུ་ལེན། །འཆི་མེད་གྲུབ་པའི་སྐུ་ཚེ་དང་། །རབ་བརྟན་རྡོ་རྗེ་བདུད་རྩིའི་བཅུད། །བློ་ལྡན་མཁས་པའི་རྣམ་དཔྱོད་དང་། །གྲུབ་པའི་ཉམས་རྟོགས་གཡང་དུ་ལེན། །འཕགས་སྐྱེའི་དགེ་འདུན་དར་རྒྱས་དང་། །མཁས་བཙུན་བཟང་གསུམ་ཐོས་བསམ་སྒོམ། །ཚངས་དབང་འཁོར་ལོས་སྒྱུར་རྒྱལ་གྱི། །མངའ་ཐང་དཔལ་འབྱོར་གཡང༴ སྟེང་ཕྱོགས་ལྷ་དང་འོག་ཕྱོགས་ཀླུ། །བར་ཕྱོགས་མི་ཡི་འཇིག་རྟེན་གྱི། །བརྟན་གཡོའི་དྭངས་མ་བཅུ་བཞི་དང་། །སྣོད་བཅུད་དགེ་མཚན་གཡང་དུ༴ །བཀྲ་ཤིས་རྫས་རྟགས་རྒྱལ་སྲིད་བདུན། །དཔག་བསམ་ཤིང་དང་འདོད་འཇོའི་བ། །མ་རྨོས་ལོ་ཏོག་རིན་ཆེན་རི། །གཏེར་བུམ་བཅུད་རྣམས་གཡང་དུ༴ རྒྱ་གར་ཆོས་དང་རྒྱ་ནག་ཁྲིམས། །སྟག་གཟིག་ནོར་དང་གེ་སར་སྟོབས། །ཧོར་གྱི་རྩལ་དང་། །
བོད་ཀྱི་ཚེ། །མཐོ་རིས་འབྱོར་པ་གཡང་༴ རྣམ་ཐོས་སྲས་ཀྱི་དཔལ་འབྱོར་དང་། །ཀུ་བེ་ར་ཡི་རྟ་གཡང་དང་། །གང་བ་བཟང་པོའི་ལུག་གཡང་དང་། །ཛམ་ལའི་ནོར་རྣམས་གཡང་༴ །ནོར་རྒྱུན་མ་ཡི་ཕྱུགས་གཡང་དང་། །ཞིང་ལྷ་ཚངས་པའི་འབྲུ་གཡང་དང་། །མི་ཐུབ་དགྲ་ལྷའི་གོ་མཚོན་གཡང་། །ཉི་ཟླའི་བཀྲག་མདངས་གཡང་༴ ཕྱུག་པོའི་ནོར་དང་བཙན་པོའི་སྟོབས། །འཕན་པོའི་བུ་དང་དར་པོའི་འཕྲུལ། །ལྷབ་ལྷུབ་གོས་དང་བང་མཛོད་ནོར། །བཅུད་ལྡན་ཟས་རྣམས་གཡང་༴། གཟུགས་བཟང་སྐད་སྙན་བློ་གྲོས་གསལ། །རང་བཞིན་བཟང་ལ་དགེ་བཅུ་སྤྱོད། །ཚེ་རིང་ནད་མེད་དབུ་འཕང་མཐོ། །བསོད་ནམས་དར་རྒྱས་གཡང་དུ་ལེན། །ཕྱོགས་ལས་རྣམ་པར་རྒྱལ་བའི་གཡང་། །འདོད་རྒུ་ལྷུན་གྱིས་གྲུབ་པའི་གཡང་། །མི་ཉམས་རྟག་ཏུ་བརྟན་པའི་གཡང་། །བཀྲ་ཤིས་དཔལ་འབྱོར་དགེ་ལེགས་ཀྱི། །ཕྱྭ་གཡང་ཐམས་ཅད་འདིར་ཁུག་ཅིག །ཉི་ཟླ་བཞིན་ཏུ་ཤར་ཞིང་བྱོན། །ལྷོ་སྤྲིན་བཞིན་ཏུ་འཐིབས་ཤིང་། །
བྱོན། ཆུ་ཆེན་བཞིན་ཏུ་འབྲུབས་ཤིང་བྱོན། །སྦྲང་ཆར་བཞིན་ཏུ་འབབས་ཤིང་བྱོན། །འཐོར་བ་སྡུས་ལ་ཉམས་པ་གསོས། །ཕྱྭ་ཡི་ཉི་མ་ཀྱི་ལི་ལི། །གཡང་གི་ཟླ་བ་ཏ་ལ་ལ། །ཕྱེ་འདི་རི་ལ་མ་བྲོས་ལ། །གཡང་འདི་སྒོ་ལ་མ་ཉམས་ཤིག །ཛ་ཡ་ཛ་ཡ་སིདྡྷི་ཧོཿ སྲིད་ཞིའི་དྭངས་བཅུད་གཡང་རྟེན་རྣམས་ལ་འུབ་ཀྱིས་བསྡུས་པར་མོས། །ལྔ་པ་སྦ་ཞིང་བརྟན་པར་བྱ་བ་ནི། ཧཱུྃ། དཀོན་མཆོག་རྩ་གསུམ་བྱིན་རླབས་དང་། །ཆོས་དབྱིངས་འགྱུར་མེད་བདེན་པ་ཡིས། །འཁོར་འདས་ཕྱྭ་གཡང་དྭངས་མའི་བཅུད། །བཀྲ་ཤིས་གཡང་རྟེན་རྣམས་ལ་ཐིམ། །ས་བཅུད་སེར་པོ་གསེར་ལ་བསྡུ། །ཆུ་བཅུད་ལན་ཚྭའི་སྙིང་པོར་བསྡུ། །མེ་བཅུད་འབར་བའི་ཤེལ་ལ་བསྡུ། །རླུང་བཅུད་སྲབ་འཇམ་དར་ལ་བསྡུ། །མཁའ་བཅུད་མེ་ལོང་གཙང་མར་བསྡུ། །སྤྲོས་པས་ཁམས་གསུམ་བཀྲག་མདངས་ལྡན། །བསྡུས་པས་རྟེན་ལ་གཟི་བྱིན་བསྐྱེད། །བརྟན་པས་མི་འགྱུར་རྡོ་རྗེ་འདྲ། །མི་ཉམས་ཉི་ཟླའི་གའུར་སྦ། །མི་ཤིགས་
རྡོ་རྗེའི་ཕྲེང་བས་བསྡམ། །བདུད་རྩི་ཐབ་སྦྱོར་རིག་སྔགས་ཀྱི། །བདེན་པའི་མཐུ་ཡིས་བགེགས་ལས་སྲུངས། །ཆོས་ཀྱི་དབྱིངས་སུ་བཅུད་སྦས་པས། །སངས་རྒྱས་ཀྱིས་ཀྱང་མི་གཟིགས་ན། །གནོད་བྱེད་བགེགས་ཀྱིས་ལྟ་ཅི་སྨོས། །ཆོས་ཉིད་ཐབས་ཤེས་སྐུ་གསུང་ཐུགས། །ཚད་མེད་ཡེ་ཤེས་ཕ་རོལ་ཕྱིན། ཁ་སྦྱོར་བདུན་གྱི་ཕྱག་རྒྱ་ལས། །ནམ་ཡང་འདའ་བར་མི་འགྱུར་ཞིང་། །ཚེ་གཡང་བཀྲ་ཤིས་འཕེལ་བར་ཤོག །ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། བཛྲ་རཀྵ་རཀྵ། གྲངས་ཁ་ཤས་བརྗོད། །འདི་ནི་ཕྱ་གཡང་བཀུག་པ་མི་འཐོར་མི་ཉམས་པའི་གནད་ཡིན་ནོ། །དྲུག་པ་ནོངས་བཤགས་ནི། །མ་འབྱོར་བ་དང་སོགས། ཡིག་བརྒྱ། ཨཱ་ལི་ཀཱ་ལི། རྟེན་འབྲེལ་སྙིང་པོ་ལན་གསུམ་བརྗོད་ལ་ལྷག་ཆད་ཁ་བསྐང་ཞིང་ནུས་པ་བརྟན་པར་བྱའོ། །བདུན་པ་བརྟན་བཞུགས་ནི། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་དཔལ་ཆེན་མོ་འཁོར་དང་བཅས་པ་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་
ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། །བྱེ་བྲག་ཏུའང་སྒྲུབ་པའི་རྟེན་འདི་རྣམས་ལ་བསྐྱེད་ཅིང་སྤྱན་དྲངས་པའི་ལྷ་ཚོགས་ཐམས་ཅད་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དེ་སྲིད་དུ་བརྟན་པར་བཞུགས་སུ་གསོལ། །བརྟན་པར་བཞུགས་ནས་ཀྱང་བདག་དང་སྦྱིན་པའི་བདག་པོ་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་འབྲུ་འཐོར། སྒྲུབ་པ་གྲོལ་ཉིན་ལྷ་ཀླུ་གཉན་གསུམ་གྱི་གཏོར་མ་སོགས་འཇོག་ཡུལ་མེད་ན། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །རང་རང་གནས་སུ་གཤེགས་ནས་ཀྱང་། །དུས་སུ་འབྱོན་པར་མཛད་དུ་གསོལ། །ཨོཾ་བཛྲ་མུཿཞེས་བརྗོད་ལ་ཡེ་ཤེས་པ་རྣམས་གཡང་རྟེན་དང་དབྱེར་མེད་དུ་བཞུགས་པར་མོས་ཏེ་གནས་ལུགས་ཀྱི་ངོ་བོ་སྐྱོང་། འཇིག་རྟེན་པ་ཐམས་ཅད་དགྱེས་བཞིན་ཏུ་རང་གནས་སུ་གཤེགས་པར་བསམ། བརྒྱད་པ་བཀྲ་ཤིས་བརྗོད་པ་ནི། ཕུན་སུམ་ཚོགས་པ་མངའ་
བ་སོགས་དཀོན་མཆོག་གསུམ་གྱི་བཀྲ་ཤིས་སྔོན་ཏུ་འགྲོ་བས་འོས་ཤིང་འཐད་པའི་བཀྲ་ཤིས་རྒྱས་བསྡུས་གང་རུང་བརྗོད་ཅིང་། བྱེ་བྲག་ཏུ། །རབ་འབྱམས་རྒྱལ་བ་མ་ལུས་སྐྱེད་པའི་ཡུམ། །ཐུགས་རྗེ་ཚད་མེད་ནོར་གྱི་ཆར་པ་འབེབས། །མ་རྒད་མདོག་ཅན་རིན་ཆེན་རྒྱན་གྱིས་བརྒྱན། །ལྷ་མོ་དཔལ་ཆེན་མོ་ཡིས་བཀྲ་ཤིས་ཤོག །གྲངས་མེད་གོང་ནས་མངོན་པར་བྱང་ཆུབ་ཀྱང་། །ཐུགས་རྗེའི་མཐུ་ཡིས་ནོར་སྦྱིན་སེམས་མའི་ཚུལ། །གསེར་མདོག་རིན་ཆེན་རྒྱན་ལྡན་མཛེས་སྡུག་མ། །ལྷ་མོ་ཆེན་མོ་བརྒྱད་ཀྱིས་བཀྲ་ཤིས་ཤོག །གང་སྔོན་སྦྱིན་པ་རྒྱ་མཚོའི་དགེ་བསགས་པས། །ཚེ་དང་ནོར་དང་མཐུ་ཡི་དཔལ་བརྙེས་ཤིང་། །སྒྲུབ་པ་པོ་ལ་དབྱིག་གི་ཆར་འབེབས་པའི། །གནོད་སྦྱིན་ནོར་སྐྱོང་རྣམས་ཀྱིས་བཀྲ་ཤིས་ཤོག །ཚངས་དང་བརྒྱ་བྱིན་རྒྱལ་པོ་ཆེན་པོ་བཞི། །རང་རང་སྡེར་བཅས་མཐུ་དང་དཔལ་ལྡན་པ། །སྟོན་པའི་དམ་ཆོས་སྐྱོང་བར་མཛད་པ་ཡི། །ལྷ་ཡི་དགེ་བསྙེན་རྣམས་ཀྱིས་བཀྲ་ཤིས་ཤོག །ཞེས་པ་རྣམས་དང་། །ཚེ་དང་བསོད་ནམས་དཔལ་འབྱོར་སྙན་གྲགས་དང་། །ནོར་དང་ལོངས་སྤྱོད་
འདོད་རྒུས་ཕོངས་མེད་པར། །གོང་ནས་གོང་དུ་འཛད་མེད་གཏེར་ལ་སྤྱོད། །སྦྱིན་པའི་ཕར་ཕྱིན་རྫོགས་པའི་བཀྲ་ཤིས་ཤོག །ཅེས་པ་ལ་སོགས་པ་རྣམས་ཀྱིས་མཐའ་རྒྱས་པར་བྱའོ། །གཉིས་པ་སྒྲུབ་པ་གྲོལ་བའི་ཉིན་བྱ་བའི་རིམ་པ་ལ་ལྔ། གཡང་གཏད། རྟེན་བཀོད་སྲུང་བཙུགས། སྒོ་བསྡམ། སྨོན་ལམ། མཆོད་བསྟོད་དོ། །དང་པོ་གཡང་གཏད་ནི། །གོང་གི་བརྟན་བཞུགས་གཤེགས་གསོལ་གྲུབ་མ་ཐག །བཀྲ་ཤིས་མ་བརྗོད་པའི་གོང་དུ་སྦྱིན་བདག་པོས་ལ་གཡང་རྫས་གཏད་པ་ནི། །ཀྱེ། དེ་རིང་དངོས་གྲུབ་རྒྱ་མཚོ་བརྡོལ། །རིན་ཆེན་འབྱུང་ལྡན་ནམ་ཡང་ལངས། །བཀྲ་ཤིས་གདུགས་ཀྱི་སྔ་དྲོ་ལ། །སྔགས་འཆང་རིག་འཛིན་བདག་ཅག་གིས། །མི་ཡི་གཡང་དང་ཕྱུགས་ཀྱི་རྩི། །ཕ་མཚུན་དགྲ་བླའི་བཀྲག་གཡང་བཅས། །བཀྲ་ཤིས་གཡང་རྟེན་བཅས་པ་རྣམས། །གཏི་མུག་རྨོངས་པའི་ལག་ཏུ་གཡང་མི་གཏད། །ང་རྒྱལ་དྲེགས་པའི་ལག་ཏུ་གཡང་མི་གཏད། །འདོད་ཆགས་གླེན་པའི་ལག༴ །ཕྲག་དོག་གཏུམ་པའི་ལག་ཏུ་གཡང་༴ །ཕ་སྤུན་ཕྱི་ཚེའི་ལག༴ བུ་སྲིང་མག་པའི༴ འདྲེ་
སྲིན་བྱུར་གསུམ་ལག༴ །མི་ལ་བསེ་རག་ལག༴ །གོང་འདྲེ་ཐེའུ་རང་ལག་ཏུ་གཡང་མི་གཏད། །ད་གཡང་གཏད་སུ་དང་གང་ལ་གཏད། །གཡང་གཏད་ཡོན་བདག་འདི་ལ་གཏད། །ལྷ་མདའ་དར་སྣའི་རྒྱན་ལྡན་ལ། །རིན་ཆེན་དངུལ་དཀར་མེ་ལོང་བཏགས། །དཔལ་ཆེན་ལྷ་མོ་འཁོར་དང་བཅས། །ཙན་དན་དྲི་བཞིན་འབྲལ་མེད་བཞུགས། །འཁོར་འདས་གཉིས་ཀྱི་ཕྱ་གཡང་འདུ། །དེ་རིང་ཡོན་བདག་ཁྱོད་ལ་གཏད། །རིན་ཆེན་གཡང་བཤོས་རྒྱན་ལྡན་འདི། །བརྗིད་ལྡན་རི་རབ་ལྷུན་པོ་བཞིན། །དགོས་འདོད་འབྱུང་བའི་ནོར་བུ་འདྲ། །དེ་རིང་ཡོན་བདག་ཁྱོད་ལ་གཏད། །གཡང་སྒྱེ་རིན་ཆེན་སྣ་ལྔའི་བཅུད། །དར་སྣ་རྔ་མའི་རྒྱན་གྱིས་བརྒྱན། །མི་ནོར་ཕྱུགས་གསུམ་འཕེལ་བའི་གཡང་། །དེ་རིང་ཡོན་བདག༴ གཡང་སྤེལ་པདྨ་འདབ་བརྒྱད་དང་། །གཡང་གི་གསེར་སྦྲུལ་འཁྱིལ་བ་དང་། །གཡང་ཕོར་མར་ཁུས་བཀངས་པ་ཡང་། །དེ་རིང་ཡོན་བདག༴། གསེར་དངུལ་གཡུ་སོགས་རིན་ཆེན་རིགས། །དར་སྣ་གོས་སྣ་གོ་མཚོན་དང་། །
ལོ་ཏོག་འབྲུ་དང་རྩི་བཅུད་མར། །བདུད་རྩི་ཇ་ཆང་འོ་མའི་མཚོ། །རོ་ལྡན་ཁ་ཟས་མང་པོ་སོགས། །སྣ་ཚོགས་གཡང་རྫས་འདི་རྣམས་ཀུན། །འདོད་རྒུའི་དཔལ་ཡོན་འབྱུང་བའི་ཕྱིར། །ཡིད་བཞིན་ནོར་བུ་རིན་ཆེན་འདྲ། །དེ་རིང་ཡོན་བདག་ཁྱོད་ལ་གཏད། །ཚེ་ཡི་རྟེན་ཕུར་མ་བུད་ཅིག །གཡང་གི་མཚོ་མོ་མ་སྐམ་ཞིག །བཀྲ་ཤིས་བདེ་ལེགས་འབྱུང་བར་ཤོག །སྐྱིད་ཀྱི་ཉི་མ་འཆར་བར་ཤོག །ཚེ་ཡི་རྟེན་ཕུར་ཚུགས་པར་ཤོག །གཡང་གི་རྒྱ་མཚོ་འཁྱིལ་བར་ཤོག །ནོར་གྱི་དཔལ་གཡང་འཕེལ་བར་ཤོག །སྲིད་ཀྱི་ཆུ་མིག་རྡོལ་བར་ཤོག །བླ་མེད་བྱང་ཆུབ་ཐོབ་པར་ཤོག །ཅེས་གཏད་ལ། སྐབས་འདིར་གོང་དུ་སྨོས་པའི་བཀྲ་ཤིས་རྣམས་རྒྱས་པར་བརྗོད། །མེ་ཏོག་འཐོར། རོལ་མོའི་སྒྲ་དང་བཅས་སྦྱིན་བདག་རང་གནས་སུ་བཏང་ལ་རྟེན་རྣམས་གང་དུ་བཞུགས་འོས་པ་དེར་བཀོད་ཅིང་། མི་ཉམས་མི་འཐོར་བའི་ཚག་དམ་པར་བྱའོ། །གཉིས་པ་རྟེན་བཀོད་ཅིང་སྲུང་བཙུག་པ་ནི། །རྟེན་ཡོད་པའི་སར་སྒྲུབ་པ་པོ་ཕྱིན་ལ། ཀྱེ། བཀྲ་ཤིས་
གཡང་གི་ར་བ་རུ། །འཁོར་འདས་བཅུད་ཀྱི་རྟེན་ཕུར་བཅུག །འདོད་རྒུ་འབྱུང་བའི་བང་མཛོད་འདིར། །ཕྱྭ་གཡང་འདུ་བའི་གཏའ་འཛུག་གོ། །བསོད་ནམས་དཔལ་ལས་གྲུབ་པ་ཡི། །འཁོར་ལོ་ནོར་བུ་བཙུན་མོ་དང་། །ཁྱིམ་བདག་རྟ་མཆོག་གླང་པོ་ཆེ། །ཕྱོགས་ལས་རྣམ་རྒྱལ་སྡེ་དཔོན་ཏེ། །རིན་ཆེན་སྣ་བདུན་གཡང་གི་རྟེན། །གཡང་རྣམས་རྟེན་ལ་འཁོར་བར་མཛོད། །རྒྱལ་བའི་མཚན་བཟང་ལས་གྲུབ་པ། །དཔལ་བེའུ་འཁོར་ལོ་པདྨ་གདུགས། །རྒྱལ་མཚན་དུང་དཀར་བུམ་པ་ཉ། །བཀྲ་ཤིས་རྟགས་བརྒྱད་གཡང་གི་རྟེན། །གཡང་རྣམས་རྟེན་ལ་འཁོར་བར་མཛོད། །སྲིད་ཞིར་དགེ་ལེགས་བྱེད་པའི་རྫས། །མེ་ལོང་དཱུརྦ་བིལྦ་ཞོ། །གི་ཝཾ་ལི་ཁྲི་ཡུངས་ཀར་དུང་། །བཀྲ་ཤིས་རྫས་བརྒྱད་གཡང་གི་རྟེན། །གཡང་རྣམས་རྟེན་ལ་འཁོར་བར་མཛོད། །རིན་ཆེན་ངར་ཟབ་ལྷབ་ལྷུབ་གོས། །གོ་མཚོན་འབྲུ་སྣ་ཟས་སྣ་དང་། །ཕྱུགས་ལུག་སྤུ་དང་དཀར་མངར་ཕུད། །བཀྲ་ཤིས་དགེ་མཚན་ཅན་རྣམས་
ཀྱི། །དཔལ་དང་འབྱོར་པའི་བཅུད་བསྡུས་ནས། །ཕྱྭ་ཡི་རྟགས་དང་གཡང་གི་རྟེན། །དམུ་ཞག་ངང་པ་མ་ཡལ་བར། ཁང་ཁྱིམ་འདི་རུ་ལེགས་བཀོད་པས། །ཕྱྭ་གཡང་མ་ཉམས་རྟེན་ལ་བཞུགས། །སངས་རྒྱས་བྱང་ཆུབ་སེམས་དཔའ་རྣམས། །དད་ཅིང་མོས་པའི་རྟེན་ལ་བཞུགས། །དཔལ་གྱི་ལྷ་མོ་འཁོར་དང་བཅས། །མདའ་དར་ལ་སོགས་རྟེན་ལ་བཞུགས། །སྟེང་འོག་བར་གསུམ་ནོར་ལྷ་རྣམས། །སྣ་ཚོགས་གཡང་གི་རྫས་ལ་བཞུགས། །འགོ་བའི་ལྷ་དང་སྐྱོབ་པའི་ལྷ། །རྒྱབ་བརྟེན་སྡོང་གྲོགས་མཛད་པའི་ལྷ། །དགྲ་ལྷ་ཡུལ་ལྷ་ཁྱིམ་ལྷ་རྣམས། །མ་འཁྱམས་མ་བྲོས་རྟེན་འདིར་བཞུགས། །སྲིད་པ་གསུམ་གྱི་ཕྱ་གཡང་སྡུས། །ཁྱིམ་ལྷ་གེལ་ཐུང་ཆེ་བཙུན་ལྷ། །མ་ལྷ་བུ་རྫི་འཕེན་པའི་ལྷ། །ནོར་ལྷ་རྨ་གཡང་བཙན་ཕྱུག་ལྷ། །ཐབ་ལྷ་རོག་པོ་གྲགས་འཛང་ལྷ། །སྒོ་ལྷ་སྟག་གཡག་དཔའ་དར་ལྷ། །གཡང་གི་ར་བ་སྒོ་བཞི་པོ། །མཐུན་པའི་རྫས་ལ་
རྟེན་ཆོས་ལ། །མི་ནོར་ཟས་གསུམ་སྲུང་བ་དང་། །དགྲ་འདྲེ་གདོན་གསུམ་ཐལ་བར་རློག །དུས་དང་རྒྱུན་ཏུ་དད་མོས་ཀྱིས། །མཆོད་པ་འབུལ་བ་དགྱེས་བཞེས་ལ། །འཁོར་འདས་ཕྱྭ་དང་གཡང་གི་བཅུད། །རྒྱུ་སྦྱོར་འདི་ཡི་སྤྱོད་ཡུལ་དུ། །འཛད་མེད་གཏེར་དུ་གྱུར་པ་དང་། །ཡོན་བདག་མི་ནོར་ཟས་གསུམ་བཅས། །དུས་རྣམས་ཀུན་ཏུ་སྲུང་བ་དང་། །དཔལ་འབྱོར་ལོངས་སྤྱོད་ཕྱྭ་གཡང་ཀུན། །མི་ཉམས་འཕེལ་རྒྱས་རབ་བརྟན་པས། །སྦྱིན་བདག་གནས་སྐབས་མཐར་ཐུག་ཀུན། །མི་འཛད་གཏེར་ལ་སྤྱོད་པར་ཤོག །གསུམ་པ་གཡང་སྒོ་བསྡམ་པ་ནི། ཀྱེ། ད་ནི་གཡང་ལ་སྲུང་བཀོད་འཚལ། །ཕྱྭ་གཡང་མི་ཉམས་སྒོ་བསྡམ་མོ། །འབྱུང་བའི་ལྷ་མོ་ཆེན་མོ་ནི། །དོན་དམ་རིགས་ཀྱི་ཡུམ་མཆོག་ལྔ། །མདའ་དར་བུམ་པ་ཕྱག་ན་འཛིན། །འབྱུང་བའི་དྭངས་བཅུད་འཁྱིལ་བའི་གཡང་། །ཕྱག་རྒྱ་ལྔ་ཡི་རྒྱས་ཐོབ་ལ། །ཕྱྭ་གཡང་ཕྱི་རུ་མ་བཏང་ཞིག། ཛམྦྷ་ལ་དང་གང་བ་བཟང་། །མ་ི་བྷ་དྲ་ཀུ་བེ་ར། །
རང་རྟགས་མཚོན་ཆ་ནེའུ་ལེ་བསྣམས། །གནོད་སྦྱིན་བྱེ་བའི་འཁོར་དང་བཅས། །སྲིད་གསུམ་དཔལ་འབྱོར་བསྡུས་པའི་གཏེར། །ཐུགས་དམ་བཞིན་ཏུ་སྲུང་མཛོད་ལ། །ཕྱ་གཡང་ཕྱི་རུ་མ་བཏང་ཞིག །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །མཐུ་ལྡན་ཆོས་ཀྱི་རྒྱལ་པོ་བཞི། །རིན་ཆེན་གོ་མཚོན་བརྗིད་དང་ལྡན། །དེ་རིང་ཐུགས་དམ་མ་བསྙེལ་བར། །བཀྲ་ཤིས་གཡང་གི་གཏེར་མཛོད་སྲུངས། །ཕྱོགས་བཞིའི་གདོན་ལ་བཀའ་ནན་སྩོལ། །ཕྱྭ་གཡང་ཕྱི་རུ་མ་བཏང་ཞིག །མཆོད་གི་སྒོ་མོ་ཐག་གི་འདེན། །གསེར་གྱི་འདན་བུས་ཐག་གི་བཀག །ཏིང་འཛིན་རྒྱས་བཏབ་མི་འཇིག་ཅིང་། །སྔགས་ཀྱི་རྒྱས་བཏབ་ཉམས་པ་མེད། །ཕྱག་རྒྱའི་རྒྱས་བཏབ་འགྲོལ་མི་སྲིད། །རྒྱ་གསུམ་གཡང་གི་སྒོ་ལ་གདབ། །མ་བཀྲོལ་བར་དུ་མི་འགྲོལ་བར། །མི་གཡང་ཕྱུགས་རྩི་བརྟན་གྱུར་ཅིག །ཤར་སྒོ་ཤིང་སྟག་སྐྱ་བོས་སྲུངས། །ལྷོ་སྒོ་གཡུ་འབྲུག་སྔོན་པོས་སྲུངས། །ནུབ་
སྒོ་གཉན་བྱ་དམར་པོས༴ །བྱང་སྒོ་རུས་སྦལ་རྒྱ་བོས༴ ཕྱི་སྒོ་གསེར་གྱི་མི་བོ་དང་། །ནང་སྒོ་ལྕགས་ཀྱི་མི་བོ་ཆེས། །སྲུང་ལ་ཕྱྭ་གཡང་བརྟན་པར་མཛོད། །སྒོ་སྲུང་མཐུ་རྩལ་མ་ཆུང་ཅིག །བཀྲ་ཤིས་གཡང་རྟེན་མ་འཆུག་ཅིག །འདྲེ་སྲིན་ནང་དུ་མ་ཞུགས་ཤིག །བཀྲ་ཤིས་བདེ་ལེགས་ཕུན་ཚོགས་ཤོག །ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། བཞི་པ་སྨོན་ལམ་གདབ་པ་ནི། འདོད་པའི་ཁམས་ན་ལོངས་སྤྱོད་པའི། །དངོས་གྲུབ་བདག་གིས་ཀུན་ཐོབ་ནས། །བླ་མ་ཡི་དམ་དཀོན་མཆོག་མཆོད། །ཕྲིན་ལས་རྣམ་བཞི་རྫོགས་པར་ཤོག །རིན་ཆེན་སྣ་བདུན་ལོངས་སྤྱད་ནས། །གཏེར་གྱི་དངོས་གྲུབ་ཕྱུགས་རྣམས་དང་། །གཟི་བརྗིད་དང་ལྡན་དཔལ་ཆེན་མོས། །རྟག་ཏུ་བདག་ལ་སྲུང་གྱུར་ཅིག །བང་མཛོད་འབྲུ་དང་འདོད་འཇོའི་བ། །རྒྱལ་མཚན་འཁོར་ལོས་སྒྱུར་བ་དང་། །ཐོགས་མེད་རྫུ་འཕྲུལ་གྲུབ་ནས་ནི། །ལམ་མཆོག་བདེ་ལ་གནས་པར་ཤོག །ཅེས་དང་། ཉི་མ་ཐམས་ཅད་དགེ་བ་ཡིན། །རྒྱུ་སྐར་ཐམས་ཅད་བཟང་པོ་ཡིན། །སངས་རྒྱས་ཐམས་ཅད་རྫུ་འཕྲུལ་ཆེ། །དགྲ་བཅོམ་རྣམས་ནི་ཟག་པ་
ཟད། །བདེན་པའི་བདེན་ཚིག་འདི་བརྗོད་པས། །བདག་ཅག་རྟག་ཏུ་བདེ་ལེགས་ཤོག །ཛ་ཡ་ཛ་ཡ་སུ་ཛ་ཡ། །ཞེས་བརྗོད། སྨོན་ལམ་འདི་དགོངས་རེ་བཞིན་བརྟན་བཞུགས་ཀྱི་གཤམ་དུ་བྱས་ཀྱང་ལེགས་སོ། །ལྔ་པ་ནི། རྟག་ཏུ་མི་ཉམས་པའི་རྟེན་ཡོད་ན་སླར་ལྷ་མོ་རྟེན་དང་བརྟེན་པར་བཅས། ཕྱི་རོལ་གྱི་སྒོ་སྲུང་རིམ་པ་རྣམས་དང་བཅས་པ་སྐད་ཅིག་གིས་གསལ་བཏབ་སྟེ། །མཆོད་བསྟོད་རྒྱས་བསྡུས་བློ་ཡིས་གང་ལྕོགས་དང་། སླར་ཡང་བརྟན་བཞུགས་བརྗོད་ཅིང་མེ་ཏོག་འཐོར་ལ་སྦྱིན་བདག་དེས་ཀྱང་དེ་ལྟར་བསྒྲུབས་པའི་རྟེན་རྣམས་ལྷ་མོ་འཁོར་བཅས་དངོས་སུ་མོས་ལ་དད་ཅིང་གུས་པས་དུས་དང་རྒྱུན་ཏུ་མཆོད་ཅིང་གསོལ་བ་སྙིང་ནས་བཏབ་ན། །ཡིད་ལ་འདོད་པའི་དཔལ་ཡོན་དང་ཕུན་སུམ་ཚོགས་པ་མཐའ་དག་ཡིད་བཞིན་གྱི་ནོར་བུ་ལ་གསོལ་བ་བཏབ་པ་ལྟར་ངང་གིས་རྒྱས་པར་འགྱུར་རོ། །སྤྱན་རས་གཟིགས་དབང་ཨ་རཱ་གའི། །གསུང་བཟང་བྱིན་རླབས་དཔལ་འབར་བ། །ཁུངས་བཙུན་ཉམས་ལེན་བདེ་བའི་ཕྱིར། །གྲོང་སྔགས་ཀུན་གྱི་ཁ་བརྒྱན་ཀྱང་། །བློ་རྨོངས་ལ་དགོངས་བསྡུས་དྲག་པས། །ལྷན་ཐབས་མེད་ན་ལག་ལེན་དཀའ། །དེ་བས་མཆོག་དང་དམན་པས་ཀྱང་། །རང་འདོད་ལྷན་པ་ཅི་ཡང་གདབ། །ཚུལ་འདིར་སྔོན་གྱི་བག་ཆགས་ཀྱིས། །གོམས་པ་ཀློང་དུ་གྱུར་པས་ན། །ཚད་མར་འདོད་ནས་སྦྱར་བའི་དགེས། །ཆོས་ལྡན་དཔལ་འབྱོར་རྒྱས་བྱེད་ཤོག །ཅེས་པའང་བསྟན་པའི་ཤིང་རྟ་འདྲེན་པ་
དབོན་སྤྲུལ་རིན་པོ་ཆེས་ཐུགས་བསྐྱེད་ཟབ་མོས་ནན་བསྐུལ་གནང་བ་ལྟར། ཀརྨ་ངག་དབང་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེས་འགྲུབ་པའི་སྦྱོར་བ་དང་ལྡན་པའི་དཀར་ཕྱོགས་ཀྱི་དུས་ཚེས་བཟང་པོ་ལ་སྦྱར་བ་གཞན་ལ་ཕན་པར་གྱུར་ཅིག། །།དགེ་ལེགས་འཕེལ།། །།
ཨ་ཧོ། འཁོར་འདས་སྣང་བ་འདི་ཀུན་གང་ནས་ཀྱང་མ་འོང་། །གཏད་མེད་རྒྱ་ཡན་ངང་དུ་རང་བབས་ལ་འབྱམས་འདུག །རྫུན་ཕུག་དབྱིངས་སུ་གཏིབས་པའི་རྣལ་འབྱོར་འདྲ་ཡོད་ན། །དགག་སྒྲུབ་ཆུ་ཡི་རི་མོ་རང་ཡལ་ཐོང་བཏང་། །གཉིས་རྟོགས་མཚན་མ་ཐ་དག་གཤིས་ལུགས་ལ་མི་གནས། །གཏད་མེད་རྒྱ་ཡན་ཀློང་ན་འཛིན་མེད་དུ་བཞག་ནས། །བྱ་ལམ་རྗེས་མེད་གཏོང་བའི་རྣལ་འབྱོར་འདྲ་ཡོད་ན། །སྒྱུ་མའི་རང་ཚུགས་མི་ཐུབ་ཅོག་འགྱེལ་ལ་ཐོང་ཞིག །གཏད་མེད་རྒྱ་ཡན་ངང་དུ་ཐོག་མེད་དུ་འཇམས་ཀྱང་། །གནས་ལུགས་དངོས་པོའི་དོན་དུ་དེ་ཉིད་ལས་གཞན་པའི། །བསྒྲུབ་བྱ་སྒྲུབ་བྱེད་གྲུབ་འབྲས་ཇི་ཙམ་ཞིག་བཙལ་ཀྱང་། །བློས་བྱས་ཀུན་བརྟགས་ཉིད་ལས་མི་རྙེད་པ་ཤེས་བྱུང་། །གཏད་མེད་རྒྱ་ཡན་ངང་དུ་སྐྱིད་ཉལ་གྱིས་ཆོག་པའི། །བྱ་བྲལ་བློ་བདེའི་གདིངས་འདི་མ་ཐོབ་པ་ཕྱིན་ཆད། །བྱ་བ་ཇི་ལྟར་བཏང་ཡང་བྱ་བྱེད་ཀྱི་བང་ཆེན། །ལྟ་སྒོམ་ཇི་ལྟར་ལེགས་ཀྱང་བཟང་རྟོག་གི་ཁ་བསྣོན། །གཏད་མེད་རྒྱ་ཡན་ངང་དུ་འབྲལ་མེད་དུ་འགྲོགས་པའི། །རང་རིག་ཟང་ཐལ་ཆེན་པོ་སྒྲིབ་མེད་ཀྱི་ཞལ་རས། །གཅེར་མཐོང་རང་ས་ཟིན་པའི་དུས་ཚོད་ལ་སླེབ་ཚེ། །ཐོས་སྒོམ་བྱིས་པའི་རོལ་རྩེད་ཉམས་མཚར་གྱི་ལྟད་མོ། །གཏད་མེད་རྒྱ་ཡན་ངང་དུ་རེ་དོགས་ཀྱིས་མ་བཅིང་། །བག་ཕེབ་ཉལ་བར་ནུས་
པའི་སྒོམ་ཆེན་འདྲ་ཡོད་ན། །ཚེ་གཅིག་ཁུར་ལྕིས་ནོན་པའི་ལུས་སེམས་ཀྱི་ངལ་དུབ། །ཡེ་གྲོལ་ཀ་དག་དབྱིངས་སུ་སྐད་ཅིག་གིས་སངས་འདུག །གཏད་མེད་རྒྱ་ཡན་མ་འདི་ཕྱོགས་ཙམ་ཡང་མ་ཤེས། །གཏད་སོ་ཡོད་རློམས་རྣམས་ཀྱང་གཉིས་འཛིན་གྱི་རྒྱབ་སྐྱོར། །གཏད་མེད་མུན་རྡོ་འཕེན་རྣམ་འཁོར་བ་ཡི་གཏན་སྲིད། །ཨ་ཧོ་ངོ་མཚར་རེ་ཆེ་སེམས་ཀྱི་འཁྲུལ་ལུགས། །གཏད་མེད་རྒྱ་ཡན་དབྱིངས་འདི་ཆོས་ཉིད་ཀྱི་གནས་གནས་ལུགས། །རང་གསལ་ཡེ་ཤེས་ཉིད་དང་འདུ་འབྲལ་ནི་མེད་ཀྱང་། །རང་ངོ་རང་གི་མ་ཤེས་ཡུན་རིང་ཞིག་འཐུམ་པར། །བླ་མའི་བྱིན་རླབས་མཐུ་ཡིས་གཉིད་མཐུག་དེ་བརྟོལ་ལོ། །གཏད་མེད་རྒྱ་ཡན་ཉེ་ལམ་རྩ་བ་འདི་བོར་ནས། །ཐོས་སྒོམ་བསམ་མནོ་མང་པོས་རིང་ལམ་དུ་སྙེགས་ཀྱང་། །ཀ་དག་གཉུག་མའི་རྒྱལ་ས་ཟིན་དུས་ནི་མི་པས། །ཆོས་པ་ཕལ་གྱི་མི་ཚེ་སྟོང་ཟད་རང་སྣང་ངོ་།། ༈ །།འཁོར་འདས༴ ཐོང་ཞིག །ལས་དང་ལས་ཀྱི་འབྲས་བུ་དངོས་གནས་ལ་མ་གྲུབ། །གཏད་མེད་རྒྱ་ཡན་ངང་དུ་དགག་སྒྲུབ་ཀུན་སྤངས་ནས། །རྣམ་སྨིན་སད་ལ་སྐུར་བའི་རྣལ་འབྱོར་འདྲ་ཡོད་ན། །མ་སྐྱེས་མཉམ་པ་ཉིད་ཀྱི་ལ་ཆེན་དེ་ཟློས་ཤིག །ཐོས་ལོ་བྱས་ལོ་མང་པོས་འཆི་ཁ་རུ་སླུ་ངེས། །གཏད་མེད་རྒྱ་ཡན་ཆེན་པོའི་གནས་ལུགས་ཉིད་སྐྱོང་སྟེ། །བློ་བདེ་ཚགས་སུ་ཚུད་པའི་རྣལ་འབྱོར་འདྲ་ཡོད་ན། །སྙིང་པོའི་བསྟན་དང་མཇལ་བའི་དོན་འབྲས་རེ་ལོང་ཞིག །
རེ་དོགས་ཁུ་འཁྲིག་རྟོག་པ་བར་ཆད་ཀྱི་སྡུན་བསུ། །གཏད་མེད་རྒྱ་ཡན་ངང་དུ་ཅི་དགའ་རུ་བོར་ནས། །གང་བྱུང་ལམ་དུ་ཁྱེར་བའི་རྣལ་འབྱོར་འདྲ་ཡོད་ན། །རྐུན་པོའི་ནང་ཕྱོགས་སླེབ་དུས་མགོ་བོ་ནས་སྡུངས་ཤིག །ཞེ་འདོད་རང་འཁྲིས་བྱས་ཀྱང་བདག་གིར་གཏན་མེད་པས། །གཏད་མེད་རྒྱ་ཡན་ངང་དུ་བདག་རྟོག་རྩད་བཅད་ནས། །ཞེན་འཛིན་ལིང་བསྐྱུར་བྱེད་པའི་རྣལ་འབྱོར་འདྲ་ཡོད་ན། །སྡུག་བསྔལ་གཏན་དུ་འབྱུང་བའི་རྩ་བ་འདི་ཆོད་ཅིག །ཉེ་རིང་ཆགས་སྡང་བྱ་བའི་ཡུལ་སྣང་ཀུན་མི་བདེན། །གཏད་མེད་རྒྱ་ཡན་ངང་དུ་རང་བཅིངས་འདི་ཀློད་ནས། །བཏང་སྙོམ་ཉལ་བར་ནུས་པའི་རྣལ་འབྱོར་འདྲ་ཡོད་ན། །འཁོར་བའི་བཙོན་སྲུང་བྱུང་དུས་དྲན་རྫི་རེ་སྟོན་ཅིག །གེགས་དང་གོལ་སའི་སྤྲིན་ཚོགས་ཁོ་རང་ཡང་རྫུན་པས། །གཏད་མེད་རྒྱ་ཡན་དབྱིངས་སུ་རྫུན་ཕུག་འདྲ་གཏིབས་ནས། །བློ་སྣ་ཚབ་ཚུབ་མེད་པའི་རྣལ་འབྱོར་འདྲ་ཡོད་ན། །རིག་པ་ཁེར་འདོད་ཉིད་ཀྱིས་རང་ཡལ་ལ་ཐོང་ཞིག །གཏད་ས་གང་ཡང་མེད་པའི་རྒྱ་ཡན་གྱི་ངང་དུ། །འགྲོ་དྲུག་ཐོག་མེད་དུས་ནས་རྨི་ལམ་ལྟར་ཁྱམས་ཀྱང་། །གཤིས་ལུགས་གཟའ་གཏད་མེད་པའི་རྒྱ་ཡན་འདི་བོར་ནས། །ལེགས་རྟོགས་རྒྱ་འབྱམས་དྲྭ་བས་ཐར་མེད་དུ་བཅིངས་འདུག །ཐོག་མེད་འཁྲུལ་སྣང་རྟོག་པ་སྐད་ཅིག་མའི་རང་གཟུགས། །གདོད་མའི་དབྱིངས་ལས་མ་བྱུང་མ་སྐྱེས་པ་ཤེས་ནས། །གཏད་
མེད་རྒྱ་ཡན་ཆེན་པོར་སོར་བཞག་གི་དགོངས་པས། །འབད་རྩོལ་མེད་པར་ཕྱམ་གཅིག་རྣམ་གྲོལ་དུ་གྱུར་ཅིག། ༈ །བྱ་བྲལ་ཅོག་བཞག་གནས་ལུགས་བླ་མའི་ཞབས། །འབྲལ་མེད་རང་རིག་ཀློང་དུ་ལྷམ་མེར་བསྟི། བྱ་བྱེད་སྒྱུ་མས་བསླུས་པའི་འགྲོ་བ་དྲུག །བྱར་མེད་ཀློང་དུ་གྲོལ་བར་བྱིན་གྱིས་རློབས། །བྱ་བྲལ་ཅོག་བཞག་ཀློང་འདིར་མ་བསྡད་ན། །བྱ་བྱེད་ཐམས་ཅད་སྒྱུ་མའི་འཁྲུལ་འཁོར་འདྲ། །བདེན་པ་མེད་ཀྱང་ཆགས་སྡང་ལས་འབྲས་གསོག །བྱ་བྲལ་རྣལ་འབྱོར་བློ་བདེའི་མགོ་བོ་ཚུགས། །འཇིག་རྟེན་འཁྲུལ་པའི་བྱ་བ་རྨི་ལམ་འདྲ། །དོན་ལ་ལྟ་ཅི་ཀུན་རྫུབ་ཏུ་ཡང་སླུ། །མི་བདེན་བདེན་པར་འཛིན་པ་འདི་བཏང་ནས། །བྱ་བྲལ་ཅོག་བཞག་ངང་དུ་བསྡད་ན་ལེགས། །ཐོས་བསམ་སྒོམ་པར་འཛིན་པའི་བཟང་རྟོག་ཀྱང་། །གནས་ལུགས་དོན་དང་རྒྱང་ཐག་ཤིན་ཏུ་རིང་། །བློས་བྱད་ལོག་པའི་ང་རྒྱལ་མི་བྱེད་པར། །བྱ་བྲལ་ཅོག་བཞག་ངང་དུ་བསྡད་ན་ལེགས། །རང་འདོད་ཕུགས་སུ་བཅུག་པའི་དགེ་སྦྱོར་ཡང་། །བྱང་ཆུབ་ཆེན་པོའི་ལམ་དང་རྒྱབ་འཛོལ་བས། །བྱ་དཀའ་རང་བཅིངས་འཁུར་པོ་བོར་ནས་ཀྱང་། །བྱ་བྲལ་བཅོག་བཞག་ངང་དུ་བསྡད་ན་ལེགས། །ཆོས་དང་ཆོས་མ་ཡིན་པའི་བྱ་བྱེད་ཀུན། །གསེར་དང་ཐག་པའི་སྒྲོག་གིས་བསྡམས་པ་བཞིན། །མཐོ་དམན་ཙམ་ལས་སྲིད་པའི་བཙོན་རར་བཅིངས། །བྱ་
བྲལ་ཅོག་བཞག༴ །ནམ་མཁའ་འདི་ཡང་བྱ་བྲལ་ཅོག་བཞག་ཡིན། །ཀུན་ལ་ཁོད་སྙོམས་ཁྱབ་ལ་ཡངས་པ་ཆེ། །སྤྲིན་དང་ཁ་ཆར་སེར་བུ་ཅི་རྒྱུ་ཡང་། །དགག་སྒྲུབ་མེད་པར་རང་བྱུང་རང་ལ་ཐིམ། །ཀ་དག་གཞི་ཡི་གནས་ལུགས་དེ་དང་འདྲ། །བྱ་བྲལ་ཅོག་བཞག་ལྟ་བའི་རྒྱལ་པོ་ལ། །འཁོར་འདས་སྣང་བའི་སྤྲིན་གྱིས་གོས་པ་མེད། །ད་ནི་ནམ་མཁའ་ལྟ་བུའི་དོན་ལ་ལྟོས། །རྒྱ་མཚོ་འདི་ཡང་བྱ་བྲལ་ཅོག་བཞག་ཡིན། །འཕེལ་འགྲིབས་མེད་པར་རྟག་ཏུ་རང་སོར་གནས། །རླང་པ་ན་བུན་ཆུ་རླབས་ཅི་གཡོས་ཀྱང་། །ཕན་གནོད་མི་བྱེད་རང་བྱུང་རང་ལ་ཐིམ། །ཆོས་དབྱིངས་གདོད་མའི་གཤིས་ལུགས་དེ་དང་འདྲ། །བྱ་བྲལ་ཅོག་བཞག་སྒོམ་པའི་རྒྱལ་པོ་ལ། །རྣམ་རྟོག་ཇི་ཙམ་གཡོས་ཀྱང་ཕན་གནོད་མེད། །ད་ནི་རྒྱ་མཚོ་ལྟ་བུའི་དོན་ལ་སྒོམ། །ས་གཞི་འདི་ཡང་བྱ་བྲལ་ཅོག་བཞག་ཡིན། །བཟང་ངན་ཐམས་ཅད་བླང་དོར་མེད་པར་བརྟེན། །ནམ་ཟླ་དུས་བཞིའི་འགྱུར་ལྡོག་ཅི་བྱུང་ཡང་། །འཕོ་འགྱུར་མེད་པར་རང་བཞིན་ཉིད་དུ་གནས། །ཆོས་ཉིད་ཀུན་གཞིའི་རང་བཞིན་དེ་དང་འདྲ། །བྱ་བྲལ་ཅོག་བཞག་སྤྱོད་པའི་རྒྱལ་པོ་ལ། །སྒྲོ་སྐུར་ཇི་ལྟར་བྱས་ཀྱང་རེ་དོགས་མེད། །ད་ནི་ས་གཞི་ལྟ་བུའི་སྤྱད་པ་སྤྱོད། །ཉི་ཟླ་འདི་ཡང་བྱ་བྲལ་ཅོག་བཞག་ཡིན། །རང་བཞིན་འོད་གསལ་སྣང་བ་བཟང་
ཐལ་ཁྱབ། །བར་སྣང་སྤྲིན་ཚོགས་འདུ་འགོད་ཅི་བྱས་ཀྱང་། །རང་གི་ངོ་བོར་ནམ་ཡང་སྒྲིབ་པ་མེད། །རང་བྱུང་རིག་པ་ཡེ་ཤེས་དེ་དང་འདྲ། །བྱ་བྲལ་ཅོག་བཞག་རང་རིག་འོད་གསལ་ལ། །སེམས་ཀྱི་རྟོག་ཚོགས་ཅིས་ཀྱང་གོས་པ་མེད། །ད་ནི་ཉི་ཟླ་ལྟ་བུའི་རིག་རྩལ་སྐྱོང་། །ཡོད་དང་མེད་པ་གཉིས་ཀ་མཐའ་ཡིན་ཏེ། །གཉིས་མེད་ཉིད་ཀྱང་བློ་ཡིས་འཛིན་རྟོག་ཡིན། །བྱ་བྲལ་ཅོག་བཞག་ཆེན་པོར་ལ་བཟླས་ན། །བློ་འདས་རྫོགས་པ་ཆེན་པོའི་དགོངས་པ་རྟོགས། །སྒོམ་དང་མི་སྒོམ་གཉིས་ཀ་མཐའ་ཡིན་ཏེ། །ངེས་ཤེས་ཙམ་ཡང་བློ་ཡི་འཛིན་རྟོག་ཡིན། །བྱ་བྲལ་ཅོག་བཞག་ངང་དུ་ཀློད་པ་ན། །རང་བྱུང་རིག་པས་རང་གི་གཏན་སྲིད་ཟིན། །རེ་དོགས་དགག་སྒྲུབ་གང་ཡིན་མཐར་འཛིན་སྐྱོན། །མཉམ་ཉིད་དབྱིངས་སུ་རྩིས་མེད་ཕྱམ་བརྡལ་ནས། །བྱ་བ་བྲལ་བའི་ཅོག་བཞག་ཆེན་པོ་ལས། །གཡེ་བ་མེད་པ་གནས་ལུགས་ལྷུམས་སུ་ཚུད། །རེ་དང་དོགས་པའི་མི་འཆིངས་ནམ་མཁའ་ལྟར། །བློས་བྱས་རྗེས་སུ་དཔག་པའི་བྱ་བ་བྲལ། །མངོན་སུམ་ཉིད་ལ་ཅོག་གེར་བཞག་པ་བཞིན། །རྣལ་འབྱོར་ཆེན་པོ་ལྟ་སྒོམ་ཕྲང་ལས་རྒྱལ། །དགག་ཏུ་མེད་ཅིང་སྒྲུབ་ཏུ་ཅང་མ་མཆིས། །སྤང་བླང་བློ་ཡི་རི་མོ་དབྱིངས་སུ་ཡལ། །ཡིད་བྱེད་བྱ་བ་མཐའ་དག་བྲལ་བ་ཡི། །གནས་ལུགས་ཅོག་གེར་བཞག་པའི་སྒོམ་ཆེན་སྐྱིད། །བྱ་བྱེད་མང་བས་སངས་
རྒྱས་ཐོབ་སྙམ་ན། །ཐོག་མར་འཁོར་བར་འཁྱམས་བྱེད་རྩ་བ་ཆོད། །ད་དུང་དེ་ལ་ཁ་བསྣོན་རྒྱག་དགོས་ན། །བྱ་བྲལ་ཅོག་གེར་མ་བཞག་བྱ་རྒྱུ་ཚོལ། །ཤེས་རབ་ཟབ་ཀྱང་འདི་ཡི་གཏིང་མ་དཔོགས། །བློ་གྲོས་ཆེ་ཡང་འདི་དོན་བློར་མ་ཤོངས། །བརྩོན་པས་བསྒོམས་ཀྱང་འདི་ཕྱོགས་ཆར་མ་ཉེ། །བྱིས་པའི་རང་བཞིན་གཤིས་འདི་ཨེ་མ་མཚར། །བྱ་བྲལ་ཅོག་བཞག་དགོངས་པ་མ་འཁྲུལ་བར། །ཡེ་སངས་རྒྱས་པ་གདོད་མའི་མགོན་པོའི་ཀློང་། ཁམས་གསུམ་འགྲོ་ཀུན་སྐད་ཅིག་བྱང་ཆུབ་སྟེ། །བྱ་བྱེད་འཁྲུལ་པའི་འཁོར་ལོ་ཞིག་གྱུར་ཅིག། །།གསུང་མགུར་ཞལ་གདམས་འདི། གུས་ཕྲན་སངས་རྒྱས་ཀརྨ་བསོད་ནམས་སྟོབས་ལྡན་སྡེ་དགེ་རྫོངས་ཤོད་བདེ་གཤེགས་འདུས་པའི་ཕོ་བྲང་གནས་མཇལ་དུ་འགྲོ་སྐབས་ཙིཏྟ་སྙིང་ཕུག་འཇམ་མགོན་བླ་མ་གུ་་ས་རའི་གཟིམ་ཆུང་ལྷ་ཁྲིའི་སྲུབ་ནས་ཤོག་དྲིལ་ཆུང་ངུ་ཞིག་རྙེད་པ་ཁ་ཕྱེས་ལྟས་པས་འཇམ་མགོན་རིན་པོ་ཆེའི་ཕྱག་བྲིས་འཁྲུལ་མེད་འདུག་པ་རུམ་ནང་དུ་བཅུག་པ་གྲོགས་ཤོལ་རྫོགས་བླ་མ་ཚེ་དབང་རབ་བརྟན་དང་རྒྱལ་རོང་འོད་ཟེར་གཉིས་ཀྱིས་ཤེས་གསལ་ལྟར། གསུང་འདི་ཀོང་སྤྲུལ་བཀའ་འབུམ་ནང་དུ་ཡོད་ཆགས་བྱས་ཕྱག་བྲིས་འདི་དད་བརྟེན་ལྷུང་བཟེད་ནང་དུ་བཅུག་པ་ལྷུང་བཟེད་ནང་ཕག་མོའི་སྐུ་འདྲ་ཡོད་པ་། །ཀཿཐོག་རྨོག་རྩ་སྤྲུལ་སྐུས་མཁྱེན་ནས་སྐུ་འདྲ་ཞོར་ཤོག་དྲིལ་གཟིགས་པ་ལོ་རྒྱུས་ཞུས་པ་ཕྱག་བྲིས་འཁྲུལ་མེད་རེད་གསུངས། །འདི་བཀའ་འབུམ་ནང་དུ་མི་བཞུགས་གསུངས། དཔེ་བཅད་མཛད་སོང་། །རྗེས་སོར་བཀའ་འབུམ་ཞིབ་བལྟས་བགྱིས་པས་མི་བཞུགས་རང་གི་ཆོས་བསྐལ་དངོས་གྲུབ་ཡིན་པར་ངེས་ཤེས་འདྲོངས་ཞིང་བཀའ་དྲིན་དྲན་ནོ། །ལོ་རྒྱུས་གོང་གསལ་བཞིན་སྤུ་བོ་སངས་རྒྱས་སྤྲུལ་སྐུ་ལས་ཕྱག་དཔེ་ཐོབ་པ་ཁ་སྐོང་དུ་སྤར་བསྐྲུན་ཞུས་པ་ལགས་སོ། །དགེའོ། །མངྒ་ལཾ། །