བདུད་རྩི་སྨན་གྱི་སྨོན་ལམ་བདུད་རྩིའི་མྱུ་གུ།
བདུད་རྩི་སྨན་གྱི་སྨོན་ལམ་བདུད་རྩིའི་མྱུ་གུ་ཞེས་བྱ་བ། རྩ་བརྒྱུད་བླ་མ་རྒྱལ་བ་སྲས་དང་བཅས། །ཡི་དམ་ཌཱ་ཀི་དམ་ཅན་ཆོས་སྐྱོང་ཚོགས། །གཞི་ལམ་འབྲས་བུའི་རང་བཞིན་བདེན་པ་དང། །རྣམ་དག་ལྷག་བསམ་དགེ་བའི་མཐུ་སྟོབས་ཀྱིས། །རྡོ་རྗེ་སློབ་དཔོན་འདུས་པ་རྒྱ་མཚོ་སོགས། །ཁམས་གསུམ་སྒྲིབ་གཉིས་བག་ཆགས་མ་ལུས་པ། །ཡོ་ག་གསུམ་གྱི་རྣལ་འབྱོར་མཐུས་བཅོམ་སྟེ། །དཀྱིལ་འཁོར་གསུམ་དུ་མངོན་པར་བྱང་ཆུབ་ཤོག །ཟག་བཅས་ཕུང་པོ་ཁམས་དང་སྐྱེ་མཆེད་སོགས། །ཟག་མེད་ལྷ་ཡི་ཕྱག་རྒྱར་སྨིན་ཅིང་རྫོགས། །བཟའ་དང་སྤྱད་པའི་དམ་ཚིག་ལ་སོགས་པར། །སྒྲ་བཞིན་སྤྱོད་པའི་བརྟུལ་ཞུགས་རྩལ་རྫོགས་ཤིང། །ཕྱོགས་བཅུ་རྣལ་འབྱོར་འདུས་པའི་ཇི་སྙེད་པ། །བར་ཆད་མེད་པར་བསྒྲུབས་པ་མཐར་ཕྱིན་ཏེ། །སྐྱེ་བ་འདིའམ་བར་དོའི་གནས་སྐབས་སུ། །རིག་འཛིན་རྣམ་བཞིའི་གོ་འཕང་མཆོག་ཐོབ་ཤོག །འདིར་འདུས་བདག་གཞན་ཕ་མ་སློབ་དཔོན་སོགས། །བཟང་ངན་བར་མའི་ལས་ཀྱིས་འབྲེལ་ལོ་འཚལ། །མཁའ་སྤྱོད་བདེ་ཆེན་པདྨ་འོད་ཞིང་དུ། །ཚོམ་བུ་གཅིག་འདུས་གསང་བའི་མཛོད་འཛིན་ཤོག །ཆོས་ཅན་དུག་ལྔའི་རྟོགས་ཚོགས་ཇི་མཆིས་པ། །ཆོས་ཉིད་ཡེ་ཤེས་བདུད་
རྩི་ཆེན་པོར་གྲུབ། །ཉོན་མོངས་ནད་ཀྱི་མིང་ཡང་མི་འབྱུང་བར། །འཕགས་པའི་དགའ་བདེས་རྟག་ཏུ་འཚོ་བར་ཤོག །སྔོན་བྱོན་གྲུབ་པའི་རིག་འཛིན་མཆོག་རྣམས་དང། །དབྱེར་མེད་གོ་འཕང་བདག་གིས་མྱུར་འགྲུབ་ཅིང། །ཐབས་མཁས་ཕྲིན་ལས་རོལ་པ་བསམ་ཡས་རྣམས། །བདེ་བླག་ཉིད་འགྲུབ་འགྲོ་བའི་སྒྲོན་མེར་ཤོག །རྩ་བརྒྱད་ཡན་ལག་སྟོང་སྦྱར་སྨན་ཆེན་པོ། །རང་བྱུང་ཡེ་ཤེས་ལྔ་ཡི་རང་བཞིན་ཅན། །སྣང་སྲིད་བདུད་རྩིའི་དཀྱིལ་འཁོར་ཡོངས་གྲུབ་ནས། །རྒྱུ་དང་འབྲས་བུའི་ནད་ཀུན་སེལ་བར་ཤོག །བདུད་རྩིའི་ཕོ་བྲང་མཐོང་ཐོས་དྲན་རེག་ཀུན། །སྐྱེ་བ་ཀུན་ཏུ་དངོས་འཛིན་དུག་བཅོམ་ནས། །ཡེ་ཤེས་སྨན་གྱི་ལུས་ཅན་དབུགས་འབྱིན་པའི། །སྨན་པ་ཆེན་པོ་འགྲོ་བའི་བླ་མར་ཤོག །སྒྲུབ་པའི་རྫས་མཆོག་བདུད་རྩི་ཨ་མྲི་ཏ། །དྲི་ཙམ་ཚོར་བའི་མི་དང་མི་མིན་ཀུན། །འོད་གསལ་རྡོ་རྗེ་ཐེག་པའི་རིགས་སད་ནས། །ཟབ་མོའི་ལམ་ལ་འཇུག་པའི་སྐལ་ལྡན་ཤོག །གང་གི་མྱོང་བས་ལས་ཉོན་མོངས་སུ་བྱང། །ལུས་སེམས་སྡུག་བསྔལ་ཟུག་རྔུ་མོད་ལ་ཞི། །སྒོ་གསུམ་རྡོ་རྗེ་གསུམ་གྱི་བྱིན་ཞུགས་ནས། །རྟོགས་པའི་གདིང་ཐོབ་ཕྱིར་མི་ལྡོག་གྱུར་ཅིག །གང་དུ་བཞུགས་པའི་ཡུལ་ཕྱོགས་རྒྱལ་ཁམས་སུ།
ནད་གདོན་མུ་གེ་འཁྲུགས་རྩོད་མཐའ་དག་ཞི། །ལོ་ལེགས་ཕྱུགས་འཕེལ་ཚེ་རིང་དཔལ་འབྱོར་རྒྱས། །ཐམས་ཅད་དགེ་ལ་ངང་གིས་འཇུག་པར་ཤོག །གང་དུ་ཕྱིན་པ་ཙམ་གྱིས་བཀྲ་ཤིས་ཤིང། །བསྟན་འགྲོའི་རྒུད་པ་མུན་ལ་ཉི་བཞིན་བཅོམ། །ཆོས་ལྡན་འབྱོར་པ་ཡར་གྱི་ངོ་བཞིན་རྒྱས། །མི་མཐུན་རྐྱེན་བྲལ་མཐུན་རྐྱེན་ལྷུན་གྲུབ་ཤོག །གང་དུ་བསྒྲུབ་པའི་གནས་གྱུར་མ་ལུས་པར། །རྩ་གསུམ་ཆོས་སྐྱོང་རྒྱ་མཚོས་བུ་ལྟར་དགོངས། །དཀར་ཕྱོགས་དབུ་ཕང་མཐོ་ཞིང་དགྱེས་པས་སྐྱོང་། །གྲུབ་པའི་འདུས་པ་རྒྱུན་ཆད་མེད་འབྱོན་ཤོག །ཡང་སྲིད་ཀུན་ཏུ་གསང་བའི་ཐེག་པ་འཛིན། །གསང་ཆེན་ལམ་གྱིས་འཁོར་བ་དོང་ནས་སྤྲུགས། །ཟག་མེད་བདེར་རོལ་དཔལ་ཆེན་ཆེ་བའི་མཆོག །སྐྱེ་འདི་ཉིད་ལ་ཡོངས་སུ་འགྲུབ་གྱུར་ཅིག །ཅེས་པའང་ཡར་ལུང་བསམ་འགྲུབ་ཤེལ་གྱི་བྲག་ཏུ་གངས་ཅན་བསྟན་འགྲོ་སྤྱིའི་རིམ་གྲོར། རྒྱལ་དབང་ཀརྨ་པ་དང་གཞུང་ས་རིན་པོ་ཆེ་རྩེ་ཤོད་ཀྱི་དགོངས་བཞེད་ལྟར་གཏར་གཏེར་གསལ་སྒྱུ་འཕྲུལ་དྲྭ་བའི་སྒོ་ནས་བདུད་རྩི་སྨན་གྱི་སྒྲུབ་ཆེན་བགྱིས་པའི་སྐབས་སུ། པདྨ་གར་གྱི་དབང་ཕྱུག་བློ་གྲོས་མཐའ་ཡས་པའི་སྡེས་བྲིས་པ་དགེ་ལེགས་འཕེལ།། །