རྒྱ་ཆེན་བཀའི་མཛོད་ཀྱི་དཀར་ཆག་མདོར་བསྡུས།
རྒྱལ་བས་ལུང་བསྟན་ཤིང་རྟ་ཆེན་པོ་འཇམ་མགོན་བླ་མ་ཐམས་ཅད་མཁྱེན་གཟིགས་ཀརྨ་ངག་དབང་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེའི་ཞབས་ཀྱི་གསུང་འབུམ་རིན་པོ་ཆེ་རྒྱ་ཆེན་བཀའི་མཛོད་ཀྱི་དཀར་ཆག་མདོར་བསྡུས་ཟབ་རྒྱས་རྒྱ་མཚོ་མཐའ་ཡས་ལ་འཇུག་པའི་གྲུབ་བོ་བཞུགས་སོ། །
ན་མོ་གུ་རུ་སརྦ་ཛྙཱ་དརྴ་གུ་་ས་མུ་དྲ་པཱ་ད་ཡེ། །བསམ་གྱིས་མི་ཁྱབ་ཆོས་ཀྱི་དབྱིངས་ནི་མཁའ་བཞིན་དྲི་མེད་ཀུན་གྱི་གནས། །དཔག་བར་མི་བཟོད་སྐུ་དང་ཡེ་ཤེས་ཉི་ཟླ་གཟའ་སྐར་བཀོད་པ་བཀྲམས། །མཐའ་ཡས་གདུལ་བྱའི་དཔལ་དུ་འབར་བའི་ཕྲིན་ལས་གཟི་བརྗིད་ནུབ་པ་མེད། །ཐུགས་རྗེའི་རང་བཞིན་སྐུ་གསུམ་སྣང་འགྲོས་ཀུན་ཁྱབ་དཔལ་ལྡན་བླ་མས་སྐྱོངས། །ངོ་མཚར་མཛེས་དཔལ་རང་བྱུང་མཁའ་ལ་དབང་པོའི་གཞུ་རིས་བཀྲ་བ་བཞིན། །སྣང་སྟོང་མཉམ་ཉིད་འདུས་མ་བྱས་པའི་གཤིས་ལུགས་མཛེས་མའི་ལྷུམས་བཟུང་བས། །མ་འགག་རྩལ་དང་རོལ་པའི་ཁྱེའུ་མཐའ་ཡས་གདུལ་བྱའི་ཁམས་བཞིན་རྩེ། །ཐབས་མཁས་གར་བརྒྱའི་ཉམས་འགྱུར་འབུམ་
གྱིས་སྲིད་ཞིའི་དགའ་སྐྱེད་སྣང་མཛད་སྲུང་། །གང་གི་མཁྱེན་བརྩེ་ནུས་པའི་མཚོ། །ཐུགས་རྗེ་མནྡཱ་རས་བསྲུབས་པས། །ངོ་མཚར་སྤྲུལ་པའི་ཟླ་དཀྱིལ་ཞིག །སྙིགས་ལྔའི་སྨག་ཏུ་ལྷམ་མེར་ཚེས། །པདྨ་རྒྱས་པའི་སྤྱན་རས་ཀྱིས། །ཤེས་བྱར་གྱུར་ཀུན་གཟིགས་མོ་རུ། །མེ་བཀྲམས་དངོས་འགའ་ཡོད་དམ་ཞེས། །ཐེ་ཚོམ་ཕྲིན་ལས་ཟབ་མོས་བཅད། །ཕུལ་བྱུང་ངང་ཚུལ་ཆ་ཕྲ་ཡང་། །འཕགས་ཆེན་བློ་ཡིས་དཔོག་དཀའི་གཏེར། །བློ་གྲོས་ཕ་མཐའ་ཡས་པའི་མཚོར། །ཆོས་ཚུལ་ཆུ་བོ་འབུམ་སྙེད་སྡུད། །བསྟན་པ་ཡོངས་ཀྱི་གསོས་གཅིག་ཏུ། །བླ་མ་ལྷ་དང་མཁའི་འགྲོའི་ཚོགས། །གང་ལ་གུས་པས་ཉེར་བསྐུལ་བ། །དེ་ཚེ་ལེགས་བཤད་རླབས་ཕྲེང་འཕྱུར། །
ཟབ་དང་རྒྱ་ཆེའི་གདམས་པའི་གཏེར། །མཛོད་ཆེན་རྣམ་ལྔའི་ཤིང་རྟའི་སྲོལ། །སྔོན་མེད་དེད་དཔོན་དེས་དྲངས་པའི། །ངོ་མཚར་གཏམ་ཙམ་སྐལ་བཟང་སྐྱེས། །འདི་ན་ལེགས་གསུང་ཐོར་བུའི་ཚོགས། །ཟབ་རྒྱས་རྒྱ་མཚོ་མཐའ་ཡས་ལས། །རིན་ཆེན་སྣ་ཚོགས་ཅི་དགའ་བར། །འདྲེན་ཕྱིར་གྲུ་བོ་འདི་སྐད་སྦྱིན། །ཞེས་པའི་ཚིགས་སུ་བཅད་པ་ཉུང་ཤས་ཀྱིས་གང་བཤད་པར་བྱ་བའི་སྐབས་དོན་གྱི་ལམ་ཡངས་པར་བྱས་ནས། འདིར་དུས་གསུམ་རྒྱལ་བ་ཀུན་གྱི་ཡེ་ཤེས་ཀྱི་སྐུ་གཅིག་པུ། །རབ་འབྱམས་མདོ་སྔགས་རྒྱ་མཚོའི་གླེགས་བམ། ཤེས་བྱ་ཀུན་མཁྱེན་སརྦ་ཛྙཱ་མ་ཧཱ་པཎྜིི་ཏ། འཇིག་རྟེན་གྱི་མིག་གཅིག་མ་ཧཱ་ལོ་ཙཱ་བ། ཟབ་རྒྱས་མཛོད་ཆེན་རྣམ་ལྔའི་ཤིང་རྟ་ཆེན་པོ། །ཐུབ་བསྟན་རིས་སུ་མ་ཆད་པའི་མངའ་བདག །གངས་ཅན་ཙམ་ན་ཆེ་བའི་རྡོ་རྗེའི་སློབ་དཔོན། རིགས་དང་དཀྱིལ་འཁོར་མ་ལུས་སྤྲོ་བསྡུའི་བྱེད་པོ་ཁྱབ་བདག་རྡོ་རྗེ་སེམས་དཔའ་མཚན་བརྗོད་པར་དཀའ་བ་དཔལ་ལྡན་བླ་མ་དམ་པ་མཆོག་གི་གསུང་གི་ཕྲེང་བ་ཟབ་པ་དང་རྒྱ་ཆེ་བའི་ཆོས་ཀྱི་འབྱུང་གནས། ཐུན་མོངས་རིག་པའི་གནས་ཀྱི་ལམ་ནས་བཟུང་ཐུན་མོངས་མིན་པ་ཐེག་དགུའི་མཐར་ཐུག་རྫོགས་པ་ཆེན་པོ་ཨ་ཏི་ཡོ་ག་ལ་ཐུག་གི་བར་མདོ་སྔགས་བཀའ་གཏེར་དག་སྣང་གི་ཆོས་སྡེ། ཡན་ལག་རིག་པའི་གནས་བཅུ་དང་བཅས་པའི་རིང་ལུགས་མཐའ་དག་གི་ནོར་གྱི་ཕུང་པོ་མཛོད་ཆེན་པོ་རྣམ་པ་ལྔའི་ཁོངས་སུ་གཏམས་པའི་ངོ་མཚར་རྨད་དུ་
བྱུང་བའི་ཕྲིན་ལས་ཉི་མའི་སྣང་ཆེན་ཛམ་བུའི་གླིང་ན་སྔར་མེད་གསར་དུ་བརྡལ་བས། ཐུབ་པའི་བསྟན་པ་ལ་སྟོན་པ་གཉིས་པའི་ཕྲིན་ལས་རྒྱ་མཚོའི་གོས་ཅན་ཀུན་ཁྱབ་ཏུ་བཀོད་པ་དེའི་ཚེ་ན། སྟོན་པའི་བསྟན་པ་ནི་གསལ་བར་བྱས། ཆོས་མིན་གྱི་མུན་པ་ནི་སྟོབས་ཉམས། ལྷ་དང་བཅས་པ་བསྟན་པ་ལ་དགའ་བདག་དགྱེས་པའི་འཛུམ་ཞལ་ཟླ་བ་ཚེས་པ་ལྟར་གསལ། ཤེས་རབ་རྣམ་དཔྱོད་དང་ཏིང་འཛིན་གྱི་ནོར་དང་ལྡན་པ་དག་གི་བློ་གྲོས་ཀྱི་རྩལ། ཉམས་རྟོགས་ཀྱི་གདིང་། མང་དུ་ཐོས་པའི་དཔལ། ས་ལམ་ཡོན་ཏན་གྱི་ལང་ཚོ་སོགས་ཉི་ཟེར་རྣོན་པོས་རེག་པའི་འདམ་སྐྱེས་ཀྱི་དགའ་བའི་ཚལ་ཇི་ལྟར་རྒྱས་པར་སྤེལ་བ་དེ་ལྟར་ཁོ་ནར་གྱུར་ཏོ། །དེ་ལས་མཛོད་ཆེན་པོ་གཞན་དག་གི་རྣམ་གཞག་དང་དཀར་ཆག་ངོ་མཚར་ཁྱད་དུ་འཕགས་པའི་རྒྱུ་མཚན་དང་འབྲེལ་བའི་ལེགས་བཤད་གཏམ་གྱི་རོལ་མོ་ཐམས་ཅད་མཁྱེན་ཅིང་གཟིགས་པའི་གསུང་གི་གདངས་ལ་འཆེལ་བའི་བློ་ལྡན་སྐལ་པ་བཟང་པོའི་རྣ་བའི་དཔྱིད་དང་སྙིང་གི་བཅུད་དུ་འཛད་པ་མེད་པར་བླངས་པ་དག་ལས་མཉན་པར་བྱ་བ་ཁོ་ནའོ། །འདིར་སྐབས་སུ་བབས་པ་གསུང་གི་བདུད་རྩིའི་ཕྲེང་བ་ཟབ་པ་དང་རྒྱ་ཆེ་བ་ཅི་རིགས་པའི་ཕྱོགས་སུ་གཏོགས་པ། མཛོད་ལྔའི་ས་ཁོངས་ནས་རྒྱ་ཆེན་བཀའི་མཛོད་ཀྱི་མཚན་གཞི། གསུང་འབུམ་ཐོར་བུའི་དཀར་ཆག་མདོ་ཙམ་སྤེལ་བ་ལ་ལྔ། གང་གི་མཛད་པོ་སློབ་དཔོན་གྱི་ཆེ་བ།
དེས་མཛད་པའི་ཆོས་ཀྱི་རྣམ་གཞག །བཞུགས་བྱང་དཀར་ཆག་དམིགས་སུ་སྨོས་པ། དེ་ཉིད་སྤར་དུ་ཇི་ལྟར་བསྒྲུབས་ཚུལ་དགོས་ཆེད་ཕན་ཡོན་དང་བཅས་པ། དགེ་བ་བསྔོ་ཞིང་སྨོན་ལམ་ཤིས་པའི་ཚིག་གིས་མཐའ་བརྒྱན་པའོ། །དང་པོ་ནི། སྔོན་གྱི་སྐུའི་སྐྱེས་པའི་རབས་ཀྱི་རྣམ་པར་ཐར་པ་སོགས་རྒྱན་པ་ནི་གཞན་དུ་གསལ་ལ། འདིར་ད་ལྟའི་ཚུལ་ལས་བརྩམས་ཏེ་དོན་གྱི་སྙིང་པོའི་རྣམ་པར་ཐར་པའི་ས་བོན་ཙམ་དྲི་ལན། བཤད་རྒྱུན་འདེགས་པའི་ཀ་ཆེན་བཅུ་ཕྲག་དང་སྒྲུབ་བརྒྱུད་འདྲེན་པའི་ཤིང་རྟ་ཆེན་པོ་བརྒྱད་སོགས་བསིལ་ལྡན་ཁ་བའི་ལྗོངས་ཀྱི་རྒྱལ་བསྟན་རིས་སུ་མ་ཆད་པ་མཐའ་དག་གི་རིང་ལུགས་བཤད་སྒྲུབ་གདམས་པ་རྒྱ་མཚོས་ཡོངས་སུ་གཏམས་པ་ནི་བདག་ཅག་གི་དཔལ་མགོན་བླ་མ་རྡོ་རྗེ་འཆང་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོ་ཞེས་ཡོངས་སུ་གྲགས་པའི་མཚན་གྱི་ཡི་གེའི་སྙན་པས་སའི་སྟེང་མ་ལུས་པར་ཁྱབ་པའི་བདག་ཉིད་དེ། འདི་ཉིད་ཏིང་ངེ་འཛིན་རྒྱལ་པོའི་མདོ་ལས། །གང་གི་ལག་ན་ཏིང་འཛིན་མཆོག་ཡོད་པ། །རྒྱལ་བ་བྱམས་པ་གྲགས་པ་མཐའ་ཡས་བཞིན། །སེམས་ཅན་རྣམས་ཀྱི་དོན་མང་བྱེད་འགྱུར་ཞེས། །བློ་གྲོས་མཐའ་ཡས་དེ་ནི་ངས་ལུང་བསྟན། །ཅེས་དང་། ལངྐར་གཤེགས་པ་ལས། དེ་ཡི་འོག་ཏུ་བྱས་དུས་ལ། །འདྲེན་པ་བློ་གྲོས་ཞེས་བྱ་བ། །ཤེས་བྱ་ལྔ་རྣམས་སྟོན་པ་པོ། །དཔའ་བོ་ཆེན་པོ་འབྱུང་བར་འགྱུར། །
ཞེས་སོགས་མཚན་དང་མཛད་པ་བཅས་སངས་རྒྱས་ཉིད་ཀྱིས་གསལ་བར་ལུང་བསྟན་པ་དང་། ཨོ་རྒྱན་ཆོས་ཀྱི་རྒྱལ་པོས་ཀྱང་གཏེར་ཁ་གསར་རྙིང་དུ་མ་ནས་རྡོ་རྗེའི་ལུང་གིས་འཁྲུལ་མེད་གསལ་བར་བསྔགས་པ་ལྟར། །སྟོན་པའི་ཉེ་གནས་ཀུན་དགའ་བོ། རྣམ་སྣང་སྤྲུལ་པའི་ལོ་ཆེན་བཻ་རོ་ཙ་ན་སོགས་འཕགས་བོད་ཀྱི་མཁས་གྲུབ་ཤིང་རྟ་ཆེན་མོ་དུ་མའི་རོལ་པར་བཞེངས་ནས་རྒྱལ་བསྟན་སྤེལ་བར་མཛད་པ་ལས། སྐུ་ཚེ་འདིར་ཡང་སྐྱེས་ཆེན་ངོ་མཚར་ཅན་བརྒྱུད་མར་བྱོན་པའི་ཁྱུང་དཀར་གྱི་གདུང་རིགས་ལ་བསམ་བཞིན་སྤྲུལ་པའི་སྣང་བརྙན་ཉི་མའི་དཀྱིལ་འཁོར་བཞད། གཞོན་ནུའི་དུས་ནས་ཕལ་བའི་ཚུལ་མཐའ་དག་ལས་འདས་པའི་འཕགས་ཆེན་སྤྲུལ་པའི་སྐྱེས་བུའི་ངོ་མཚར་མ་སྦས་གསལ་བར་མངོན། གནས་ལྔ་རིག་པའི་ཉི་མ་ཟེ་ཆེན་མ་ཧཱ་པཎྜི་ཏ་འགྱུར་མེད་མཐུ་སྟོབས་རྣམ་རྒྱལ་ལས་ཐུན་མོངས་རིག་གནས་ནས་ཐུན་མིན་རྫོགས་པ་ཆེན་པོའི་བར་གྱི་ཟབ་རྒྱས་ཆོས་ཚུལ་རྒྱ་མཚོར་གསན་བསམ་གདར་ཤ་ཆོད་པར་མཛད། ཏཱའི་སི་ཏུ་པདྨ་ཉིན་བྱེད་དབང་པོ་ལས་སྡོམ་པ་གསུམ་ཀའི་བཀའ་དྲིན་དང་། གནས་ལུགས་ལྷན་ཅིག་སྐྱེས་པའི་ཡེ་ཤེས་རྡོ་རྗེའི་བྱིན་རླབས་འཕོ་བའི་དོན་བརྒྱུད་ཀྱི་དབང་བསྐུར་བ་བརྙེས། རྒྱལ་སྲས་སེམས་དཔའ་ཆེན་པོ་དུ་མའི་ཞལ་སྔ་ནས་སྨོན་འཇུག་བྱང་ཆུབ་སེམས་ཀྱི་སྡོམ་པ་ལན་གྲངས་མང་དུ་བཞེས་ཏེ་རྒྱལ་བའི་སྲས་མཆོག་ཡོངས་ཀྱི་ཐུ་བོར་གྲུབ། ངེས་པར་
ཐམས་ཅད་མཁྱེན་གཟིགས་ཆེན་པོ་རྗེ་བླ་མ་འཇམ་དབྱངས་མཁྱེན་བརྩེའི་དབང་པོ་གཙོ་བོར་སྨོས་པའི་རྡོ་རྗེའི་སློབ་དཔོན་ཚད་དང་མཚན་ཉིད་ལྡན་ངེས་རྣམས་ལས་རྒྱུད་སྡེ་བཞི་དྲུག་གི་སྨིན་གྲོལ་གདམས་ངག་བཤད་བཀའ་མན་ངག་ཐམས་ཅད་རྫོགས་པར་གསན་ནས་དམ་ཚིག་གི་ར་བ་ལས་ནམ་ཡང་མི་འདའ་ཞིང་བསྐྱེད་རྫོགས་རྫོགས་པ་ཆེན་པོའི་ཉམས་བཞེས་ཀྱི་སྒོ་ནས་སུམ་ལྡན་རྡོ་རྗེ་འཛིན་པ་རྒྱ་མཚོས་ཞབས་རྟེན་གྱི་པདྨོ་ལ་སྤྱི་བོས་ཕྱག་བྱེད་པའི་བསྟན་འགྲོའི་མཆོད་སྡོང་གཅིག་པུར་གྱུར། ཐུན་མོངས་ཀྱི་རིག་པའི་གནས་བཅུ་ཕྲག་བརྒལ་བ། ཐུན་མིན་ནང་རིག་པ་དབུ་ཕར་འདུལ་མཛོད་བྱམས་ཆོས་གཙོ་བོར་གྱུར་པའི་མཚན་ཉིད་ཐེག་པའི་བཀའ་དང་དགོངས་འགྲེལ་ཐམས་ཅད་དང་། ཤིན་ཏུ་ཐུན་མིན་བཀའ་གཏེར་གསར་རྙིང་གི་རྒྱུད་སྡེ་ཆེན་པོ་ཇི་སྙེད་དགོངས་འགྲེལ་དང་བཅས་པར་གཞན་དྲིང་མི་འཇོག་པའི་མཁྱེན་པ་ནམ་མཁའི་ཀློང་ལྟ་བུར་གྱུར་པས་སརྦ་ཛྙཱ་མ་ཧཱ་པཎྜི་ཏ་ཞེས་མཚན་སྙན་གྲགས་པ་དོན་ལྡན་གྱི་གོ་འཕང་མཐོན་པོ་བརྙེས། མདོ་སྔགས་ཀྱི་ཆོས་ཚུལ་ཕྲ་རགས་ཐམས་ཅད་ཚོལ་བའི་ཕྱིར་དཀའ་བ་དུ་མ་ཁྱད་དུ་བསད་དེ་བཙལ་བའི་སྒོ་ནས་ཡོངས་འཛིན་ཁྱད་འཕགས་བཞི་བཅུ་ལྷག་པ་མཉེས་པ་རྣམས་པ་ལྔ་དང་ཞབས་ཏོག་དགུ་ཕྲུག་གི་སྒོ་ནས་བསྟེན་ཏེ་སྨིན་གྲོལ་གདམས་པའི་རྒྱུན་བོད་གངས་ཅན་འདིར་བཞུགས་སོ་འཚལ་ཕལ་ཆེར་གསན་བསམ་གྱིས་ཐུགས་སུ་ཆུད་པར་མཛད། །
གསན་བསམ་སྒོམ་པའི་ཕྱག་རྗེས་རྨད་དུ་བྱུང་བའི་བསྟན་བཅོས་ཀྱང་། ཐར་པ་དང་ཐམས་ཅད་མཁྱེན་པའི་ལམ་སྟེགས་ལྟ་བུ་ཐུན་མོངས་ཤེས་བྱའི་མཛོད། རིན་ཆེན་འབྱུང་བའི་མཚོ་ལྟ་བུ་རྒྱ་ཆེན་བཀའི་མཛོད་དང་ཟབ་མོ་གཏེར་གྱི་མཛོད་གཉིས། དེར་འགྲོ་བའི་གྲུ་གཟིངས་ལྟ་བུར་ཉམས་ལེན་གདམས་ངག་གི་མཛོད། རིན་པོ་ཆེས་རང་གཞན་གྱི་དབུལ་བ་སེལ་བ་ལྟ་བུ་ཐུན་མིན་གསང་བའི་མཛོད་བཅས་མཛོད་ཆེན་རྣམ་ལྔའི་ཤིང་རྟ་ཛམ་བུའི་གླིང་ན་སྔར་མེད་གསར་དུ་དྲངས་པའང་ང་རྒྱལ་ཆེ་འདོད་གྲགས་དང་འགྲན་ཕྱིར་རྙེད་བཀུར་ཁེ་འདོད་ཙམ་གྱིས་མ་ཡིན་པར་འཆོས་སྐྱོབ་ཀྱི་ཡོན་ཏན་ཀུན་ཚང་བའི་ལེགས་བཤད་རྨད་དུ་བྱུང་བ་གླེགས་བམ་བརྒྱ་ཕྲག་ལ་ཉེ་བ་འཇོག་པས་རྒྱལ་བསྟན་རིས་མེད་པའི་མིག་དང་སྲོག་ལྟ་བུར་མཛད། སྤྱིར་གང་གསན་པ་ཐམས་ཅད་ཉམས་བཞེས་སུ་མ་གནང་བ་མེད་ཅིང་། བྱེ་བྲག་ཐུགས་དམ་གྱི་རྩ་བ་འགའ་ཞིག་ལས་སྒྲུབ་ཚུལ་ཕྱོགས་ཙམ་མཚོན་ན། དཔལ་སྤུངས་སྒྲུབ་ཁང་ཆེན་མོར་ལོ་གསུམ་ཕྱོགས་གསུམ་གྱི་རིང་བཀའ་ཕྱག་ཆུ་བོ་གཉིས་འདྲེས་ཀྱི་གདམས་པའི་བཀའ་སྲོལ་སྟོན་དངོས་ཀྱི་ཚུལ་དུ་འདྲིལ་བའི་ཉམས་བཞེས་མཐིལ་ཕྱིན་པ་དང་། སྔ་ཕྱིར་བདེ་དགྱེས་གསང་གསུམ་ཕག་མོ་རྒྱལ་རྒྱ་མདུས་འཁོར་སོགས་རྒྱུད་སྡེ་རབ་འབྱམས་ཀྱི་བསྐྱེད་བཟླས་ཚད་དུ་འཁྱོལ་པ། རྫོགས་རིམ་ཟབ་མོ་ནཱ་རོ་ནི་གུའི་ཆོས་དྲུག་གི་ཉམས་བཞེས་བརྟན་པ་ཐོབ་པ། བཀའ་དགོངས་ཕུར་གསུམ།
ཡང་དག་སོགས་མདོར་ན་བཀའ་གཏེར་གསར་རྙིང་གི་ལྷག་པའི་ལྷ་རབ་འབྱམས་ཀྱི་བསྙེན་སྒྲུབ་དང་། འཇའ་ཚོན་དཀོན་མཆོག་སྤྱི་འདུས་སྔོན་འགྲོ་དངོས་གཞི་ལོ་གསུམ་རིལ་པོ་དང་། སྙིང་ཐིག་ཉམས་བཞེས་ལ་བརྟེན་ནས་ཁྲེགས་ཆོད་ཀ་དག་གི་དགོངས་པ་མངོན་དུ་གྱུར། ལྷུན་གྲུབ་སྣང་བཞིའི་ཡེ་ཤེས་ཟད་སར་འཁྱོལ། སྣང་སེམས་རོ་གཅིག་ཏུ་འདྲེས་པའི་མངོན་རྟགས་ཅི་རིགས་པ་མ་སྦས་གསལ་བར་ངོམས། ལྐོག་གྱུར་གྱི་དངོས་པོ་མངོན་སུམ་མཁྱེན་པ་སོགས་ཀུན་གྱི་མཐུན་སྣང་དུ་གྱུར། རྩ་གསུམ་ལྷའི་ཞལ་གཟིགས་ལུང་བསྟན་དབུགས་དབྱུང་རྒྱུན་མི་འཆད་པ་སྩལ། དམ་ཅན་སྲུང་མས་ཕྲིན་ལས་ཐོག་མེད་དུ་སྒྲུབ། ཁྱད་པར་ཟབ་མོ་མཛོད་ལྔའི་ཆོས་སྡེ་ཆེན་པོར་བསྡུས་པའི་ཟབ་ཆོས་ཕལ་ཆེར་ཐམས་ཅད་བླ་མ་དང་ལྷག་པའི་ལྷ་ལས་གསན་ཅིང་གནང་བ་ཁྱད་པར་ཅན་ཐོབ་པ་འབའ་ཞིག་དང་། སྐུ་ཚེ་རིལ་པོར་འཆད་རྩོམ་ཉམས་བཞེས་ཁོ་ནས་དུས་འདའ་བར་མཛད་པ་ལས། དོན་མེད་རྣམ་གཡེང་ཆུ་ཚོད་གཅིག་ཙམ་ཡང་མི་མཛད་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རྣམ་ཐར་བདག་ཅག་ཀུན་གྱི་མངོན་སུམ་པའི་གྲུབ་འབྲས་ཕྱག་རྗེས་བསྟན་འགྲོ་ཡོངས་ལ་ཕན་པ་འདི་དག་མཇལ་དུ་ཡོད་པ་དང་། །བསྐྱངས་པའི་བུ་སློབ་ཀྱི་རིམ་པའང་བསམ་གྱིས་མི་ཁྱབ་ཀྱང་། གཙོ་བོར་རྒྱལ་དབང་ཀརྨ་པ་བཅུ་བཞི་པ་དང་བཅོ་ལྔ་པ་སྐུ་གོང་འོག །ཏཱའི་སི་ཏུ་བཅུ་པ་བཅུ་གཅིག་པ་གོང་འོག །དཔལ་ལྡན་འབྲུག་པ་དང་དཔའ་བོ་སྐུ་ཕྲེང་
གོང་འོག །བྱང་སྟག་ལུང་པའི་རྣམ་འདྲེན་ཆེན་པོ་དག་དང་། ས་ངོར་གྱི་བསྟན་འཛིན། གསང་སྔགས་རྙིང་མའི་བསྟན་འཛིན་རྣམས་དང་། ཁྱད་པར་འཇམ་མགོན་བླ་མ་མཁྱེན་བརྩེའི་དབང་པོ་སོགས་དབུས་གཙང་ཁམ་གསུམ་གྱི་ས་དགེ་ཀར་རྙིང་གི་བླ་ཆེན། དགེ་བཤེས། རྒྱལ་བློན་སོགས་ཆེ་རྒུ་ཕལ་ཆེ་བས་ཞབས་པད་དུག་ཏུགས་པ་ལ་གངས་ལྗོངས་འདིར་འགྱུར་ཚད་ཀྱི་དབང་ཁྲིད་བཀླགས་ལུང་ལ་སོགས་པ་གང་ལ་གང་དགོས་ཀྱི་ཚུལ་དུ་ཐུགས་སྐྱོ་དུ་བ་མེད་པར་ལོ་ཟླ་ཉིན་མཚན་དུ་སྩལ། ཡོན་ཏན་ཐུགས་ཀྱི་གནས་མཆོག་ཙཱ་འདྲ་རིན་ཆེན་བྲག་ཏུ་སྒྲུབ་སྡེ་གཙུག་ལག་ཁང་རྟེན་དང་བརྟེན་པར་བཅས་པ་གསར་བསྐྲུན་རྙིང་གསོ། རྫོང་ཤོད་བདེ་གཤེགས་འདུས་པའི་སྒྲུབ་གནས་སུ་དགོན་སྡེ་གསར་སྤེལ། ཚོམ་བུ་ཚོགས་ཀྱི་སྒྲུབ་ཆེན་བརྒྱ་ཕྲག་ཕྱེད་གཉིས་ལྷག་བརྒལ་བ། སྐུ་གསུང་ཐུགས་རྟེན་བསམ་གྱིས་མི་ཁྱབ་པ་གསར་བཞེངས། དཀོན་མཆོག་གི་མཆོད་འབུལ། དགེ་འདུན་ལ་བསྙེན་བཀུར་སོགས་མདོར་ན་ཆོས་སྤྱོད་རྣམ་པ་བཅུའི་ཕྱག་རྗེས་བརྗོད་པར་དཀའ་བ་མཛད་པ་སོགས་ངོ་མཚར་བསམ་གྱིས་མི་ཁྱབ་པའི་རྣམ་པར་གྲགས་པའི་འོད་དཀར་གྱིས་གངས་ལྗོངས་སྐྱེ་རྒུའི་ཚ་གདུང་ལས་བསིལ་བའི་ཕྲིན་ལས་མཐའ་དག་རེ་ཞིག་གྲུབ་ཟིན་ནས། དགུང་གྲངས་གྱ་བདུན་པར་ནུབ་ཕྱོགས་ཤཱནྟ་པུ་རིའི་གྲོང་ཁྱེར་དུ་དཔའ་བོ་ཐོད་པའི་དུམ་བུའི་ཐུགས་ཀྱི་དབྱིངས་སུ་དགྱེས་པ་སྟོན་པའི་ཚུལ་མངོན་དུ་མཛད་
དོ། །གཉིས་པ་ནི། སྒྲ་སྦྱར་བསྟན་པ་དང་། དམ་པའི་ཆོས་བྱེ་བྲག་ཏུ་བཤད་པའོ། །དང་པོ་ལ་སྒྲ་དོན་དང་། དབྱེ་བ་གཉིས་ལས། དང་པོ་ནི། ཌུདྷྲྀ་྅་འཛིན་པའི་བྱིངས་ལས་དྷརྨ་སྟེ་འཛིན་པའི་དོན་ལས་ཆོས་ལ་འཇུག །གང་འཛིན་ན་ཤེས་བྱ་རང་སྤྱིའི་མཚན་ཉིད་སོ་སོར་འཛིན་པར་བྱེད་པའི་ཕྱིར་རོ། །གཉིས་པ་དབྱེ་བ་ནི། རྣམ་བཤད་རིག་པ་ལས། །ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །བསོད་ནམས་ཚེ་དང་གསུང་རབ་དང་། །འབྱུང་འགྱུར་ངེས་དང་ཆོས་ལུགས་ལའོ། །ཞེས་དོན་བཅུ་ལ་འཇུག་པར་བཤད་པ་ལས། །འདིར་བརྗོད་བྱའི་སྒོ་ནས་བསོད་ནམས་དང་། ལམ་དང་། མྱ་ངན་འདས་པ་གསུམ་དང་། རྗོད་བྱེད་ཀྱི་སྒོ་ནས་གསུང་རབ་ཀྱི་དགོངས་པ་འགྲེལ་པ་ལ་གོ་བར་བྱའོ། །གཉིས་པ་དམ་པའི་ཆོས་བྱེ་བྲག་ཏུ་བཤད་པ་ལ་བཞི། མཚན་ཉིད། ངོ་བོ། སྒྲ་དོན། རབ་དབྱེའོ། །དང་པོ་ནི། གང་ལ་དམིགས་ནས་སྲིད་པའི་སྡུག་བསྔལ་རྒྱུ་དང་བཅས་པ་མཐར་འབྱིན་པར་བྱེད་པའི་ཐབས་སུ་གྱུར་པ་དམ་པའི་ཆོས་ཀྱི་མཚན་ཉིད་དེ། སྡུག་བསྔལ་དག་ནི་ཐམས་ཅད་དང་། །སྒྲིབ་ཀུན་སེལ་བྱེད་དམ་པའི་ཆོས། །ཞེས་སོ། །དེའང་བརྗོད་བྱ་རྗོད་བྱེད་ཀྱི་སྒོ་ནས་ལུང་རྟོགས་གཉིས་ཏེ། མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོག་པའི་བདག་ཉིད་དོ། །ཞེས་སོ། །རྟོགས་པའི་ཆོས་ནི། མགོན་པོ་བྱམས་པས། གང་ཞིག་གང་
གིས་ཆགས་བྲལ་བ། །བདེན་གཉིས་མཚན་ཉིད་ཅན་དེ་ཆོས། །ཆགས་བྲལ་ཉིད་ནི་འགོག་པ་དང་། །ལམ་གྱི་བདེན་པ་དག་གིས་བསྡུས། །ཞེས་སྡུག་ཀུན་སྤོང་བྱེད་ཀྱི་ལམ་དང་། སྤངས་པ་འགོག་པའི་བདེན་པ་སྟེ་གཉིས་སུ་འགྱུར་ཞིང་། ལུང་གི་ཆོས་ནི་རྟོགས་པའི་ཆོས་ལ་འཇུག་བྱེད་ཀྱི་རྗོད་པ་ཕུན་སུམ་ཚོགས་པ་སྟེ། མངོན་བརྗོད་གཉིས་ཀྱི་བདག་ཉིད་དམ། ཡང་ན་རྟོགས་པའི་བསྟན་པ་ལྷག་པའི་བསླབ་པ་གསུམ་དང་། དེ་ཉིད་རྗོད་བྱེད་སྡེ་སྣོད་གསུམ་ནི་ལུང་གི་ཆོས་སུ་བཞག་པ་དག་གོ །གཉིས་པ་ནི། ལུང་གི་ཆོས་ལེགས་པར་གསུངས་པའི་བཀའི་ངོ་བོ། བརྗོད་བྱ་བསླབ་པ་གསུམ་སྟོན་པ། རྗོད་བྱེད་ངག་ཚིག་དྲི་མ་མེད་པ། སྒྲུབ་བྱེད་ཚད་མ་གསུམ་དང་ལྡན་པ། འབྲས་བུ་ཐོག་མཐའ་བར་དུ་དགེ་བ་ཅན་ཡིན་ཏེ། རྒྱལ་ཚབ་བྱམས་པས། བསླབ་པ་གསུམ་བརྗོད་ངག་ཚིག་དྲི་མ་མེད། ཚད་མ་གསུམ་ལྡན་ཐོག་མཐའ་བར་དགེ་བ། །དེ་ནི་ཆེན་པོར་གསུངས་པ་རྒྱལ་བའི་བཀའ། །བཟློག་པ་གཞན་གྱི་གཞུང་དུ་ཤེས་པར་བྱ། །ཞེས་དང་། གཞན་ཡང་རྒྱུད་བླ་མ་ལས། གང་ཞིག་དོན་ལྡན་ཆོས་དང་ཉེར་འབྲེལ་ཞིང་། །ཁམས་གསུམ་ཀུན་ནས་ཉོན་མོངས་སྤོང་བྱེད་གསུང་། །ཞི་བའི་ཕན་ཡོན་སྟོན་པར་མཛད་པ་གང་། །དེ་ནི་དྲང་སྲོང་གསུང་ཡིན་བཟློག་པ་གཞན། །ཞེས་བརྗོད་བྱ་དོན་ལྡན་གྱི་ཆོས་དང་ཉེ་བར་འབྲེལ་བ། བྱེད་ལས་ཁམས་གསུམ་གྱི་ཉོན་མོངས་སྤོང་བའི་ཐབས་
སུ་གྱུར་པ་འབྲས་བུ་མྱ་ངན་ལས་འདས་བཞི་བའི་ཕྱོགས་སུ་གཞོལ་ཞིང་འབབ་པའི་ངག། བདག་རྐྱེན་གཙོ་བོར་རྫོགས་པའི་སངས་རྒྱས་ལ་བརྟེན་ནས་བྱུང་བ་སྟེ་ཁྱད་ཆོས་བཞི་ལྡན་ནི་བཀའི་ངོ་བོའོ། །དགོངས་འགྲེལ་བསྟན་བཅོས་ནི། རྒྱུད་བླ་མ་ལས། གང་ཞིག་རྒྱལ་བའི་བསྟན་པ་འབལ་ཞིག་གི། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླངས། །ཞེས་དངོས་དང་བརྒྱུད་ནས་སངས་རྒྱས་ཀྱི་གསུང་རབ་ཀྱི་དགོངས་པ་འགྲེལ་པའི་དབང་དུ་བྱས་ནས་རྩོམ་པ་པོ་ལྟ་བ་ངན་པ་དང་ཐེ་ཚོམ་སོགས་རྣམ་གཡེང་མེད་པའི་བློ་གྲོས་ཅན་གྱིས་བཤད་པའི་ངག །ཐར་པ་ཐོང་བའི་ལམ་དང་རྗེས་སུ་མཐུན་པ་ཞིག་ཡིན་ལ། དེ་ལས་གཞན་ཡང་། ས་སྡེ་ལས། དོན་མེད་དོན་ལོག་དོན་དང་ལྡན། །ཐོས་རྩོད་སྒྲུབ་པ་ལྷུར་ལེན་དང་། །ངན་གཡོ་བརྩེ་བྲལ་སྡུག་བསྔལ་སྤོང་། །བསྟན་བཅོས་དྲུག་བྲལ་གསུམ་དུ་འདོད། །ཅེས་གསུམ་ཚན་གསུམ་ལས་སྔ་མ་གཉིས་རེ་དང་བྲལ་ཞིང་། ཕྱི་མ་རེ་རེ་དང་ལྡན་པ་གང་ཡིན་པ་ནི། རྣམ་བཤད་རིགས་པར། ཉོན་མོངས་དགྲ་རྣམས་མ་ལུས་འཆོས་པ་དང་། །ངན་འགྲོའི་སྲིད་ལས་སྐྱོབ་བྱེད་གང་ཡིན་པ། །འཆོས་སྐྱོབ་ཡོན་ཏན་ཕྱིར་ན་བསྟན་བཅོས་ཏེ། །གཉིས་པོ་འདི་དག་གཞན་གྱི་ལུགས་ལ་མེད། །ཅེས་བཤད་པ་ལྟར་འཆོས་སྐྱོབ་ཀྱི་ཡོན་ཏན་དང་ལྡན་པ་ནི་བསྟན་བཅོས་ཀྱི་ངོ་བོའོ། །
གསུམ་པ་སྒྲ་དོན་ནི། སཾ་དྷརྨ་དམ་པའི་ཆོས་ཏེ། དམ་པ་ནི་རྫོགས་པའི་སངས་རྒྱས་ཡིན་ལ། ཆོས་ནི་དེས་གསུངས་པ་དང་། ཡང་ན་དམ་པ་ནི་བྱང་ཆུབ་ཆེན་པོ་ཡིན་ལ། དེ་འཐོབ་བྱེད་ཀྱི་ཐབས་ནི་ཆོས་ཏེ་དམ་པའི་ཆོས་སོ། །བསྟན་བཅོས་ཀྱི་དབང་དུ་བྱས་ན། དམ་པ་ནི་རྒྱལ་བའི་སྲས་བསྟན་བཅོས་རྩོམ་པའི་རྒྱུ་ཚོགས་དང་ལྡན་པ། ཆོས་ནི་བཀའི་དགོངས་པ་འགྲེལ་པའི་ལེགས་པར་བཤད་པའོ། །རྗོད་བྱེད་བཀའ་དང་བསྟན་བཅོས་གཉིས་སུ་ངེས་པའང་། ལྷའི་བུ་བློ་གྲོས་རབ་གནས་ཀྱིས་ཞུས་པའི་མདོ་ལས། །ཆོས་རྣམས་བཀའ་དང་བསྟན་བཅོས་གཉིས་སུ་འདུ། །ལེགས་པར་གསུངས་དང་དེ་ཡི་དགོངས་འགྲེལ་པ། ཞེས་པ་སྟེ། སུ་བྷཱ་ཥི་ཏ་ལེགས་པར་གསུངས་པའམ་ལེགས་པར་བཤད་པ་སྟེ། གཞི་ལམ་འབྲས་གསུམ་མམ། བརྗོད་བྱ་རྗོད་བྱེད་ཕུན་སུམ་ཚོགས་པ་ཕྱིན་ཅི་མ་ལོག་པར་འདོམས་པར་བྱེད་པའོ། །བཞི་པ་རབ་ཏུ་དབྱེ་བ་ལ། དངོས་དང་། འཕྲོས་དོན་ནོ། །དང་པོ་ནི། བརྗོད་བྱའི་སྒོ་ནས་དབྱེ་ན། རྩ་ཤེས་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བསྟེན། །ཞེས་པ་ལྟར་བདེན་པ་གཉིས་སམ། དྲང་ངེས་གཉིས་དང་། །རྗོད་བྱེད་ཀྱི་སྒོ་ནས་དབྱེ་ན་གསུང་རབ་ཡན་ལག་བཅུ་གཉིས་ཏེ། འགྲེལ་ཆེན་སྙིང་པོ་མཆོག་ལས། །མདོ་སྡེ་དབྱངས་བསྙད་ལུང་དུ་བསྟན། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟ་བུ་བྱུང་དང་། །
སྐྱེས་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་དབབ་པའི་སྡེ། །གསུང་རབ་ཡན་ལག་བཅུ་གཉིས་སོ། །ཞེས་བཤད་པ་ལྟར་དང་། །གཉེན་པོའི་སྒོ་ནས་དབྱེ་ན། མགོན་པོ་བྱམས་པས། །སྡེ་སྣོད་དག་ནི་གསུམ་མམ་གཉིས་ཀྱང་རུང་། །བསྡུས་པའི་ཕྱིར་ན་རྒྱུ་ནི་དགུས་འདོད་དོ། །དེ་ཡིས་བག་ཆགས་རྟོགས་དང་ཞི་བ་དང་། །རབ་ཏུ་རྟོགས་པས་རྣམ་པར་གྲོལ་བར་བྱེད། །ཅེས་པ་ལྟར། སྤང་བྱ་ཉོན་མོངས་པ་ཐེ་ཚོམ་དང་། མཐའ་གཉིས་ལ་སྦྱོར་བ་དང་། ལྟ་བ་མཆོག་འཛིན་ཏེ་གསུམ་གྱི་གཉེན་པོར་བསླབ་བྱ། ཏིང་ངེ་འཛིན་དང་། ཚུལ་ཁྲིམས་དང་། ཆོས་རབ་རྣམ་འབྱེད་ཀྱི་ཤེས་རབ་སྟོན་པས། ཤེས་པར་བྱ་བ་ཁམས་བཅོ་བརྒྱད་དང་རྣམ་བྱང་གི་ཆོས་དང་། ཉོན་མོངས་འདུལ་བའི་ཐབས་དང་། ཆོས་དང་དོན་མ་ནོར་བར་ཤེས་ཤིང་འདོམས་པའི་སྒོ་ནས་རིམ་པ་བཞིན། མདོ་སྡེ་དང་། འདུལ་བ་དང་། མངོན་པའི་སྡེ་སྣོད་གསུམ་དུ་འདུལ། ཡང་ན་ཐེག་པ་ཆེ་ཆུང་གི་སྡེ་སྣོད་གཉིས་སུ་འདུའོ། །གདུལ་བྱའི་སྒོ་ནས་དབྱེ་ན། དམན་པ་ལ་མོས་པར་འདུལ་བའི་སྡེ་སྣོད། ཟབ་མོ་ལ་མོས་པར་མངོན་པའི་སྡེ་སྣོད། རྒྱ་ཆེ་བ་ལ་མོས་པར་མདོ་སྡེའི་སྡེ་སྣོད། །ཆགས་བཅས་ཀྱི་ལས་གྱིས་གདུལ་བ་ལ་གསང་སྔགས་ཀྱི་སྡེ་སྣོད་རྣམས་བསྟན་ཏོ། །ཡང་ན་དབང་པོ་བརྟུལ་པོ་རྒྱུ་ལ་མོས་པས་རྒྱུ་ལམ་དུ་བྱེད་པ་ལ་ཕར་ཕྱིན་ཐེག་པ། དབང་པོ་རྣོན་པོ་རྒྱུ་འབྲས་ལྷུན་གྲུབ་ལ་མོས་པས་འབྲས་བུ་ལམ་དུ་བྱེད་པ་ལ་
གསང་སྔགས་རྡོ་རྗེ་ཐེག་པ་གཉིས་སུ་འགྱུར་རོ། །ལྔ་པ་བདག་རྐྱེན་གྱི་སྒོ་ནས་དབྱེ་ན། ཞལ་ནས་གསུངས་པ། བྱིན་གྱིས་བརླབས་པ། རྗེས་སུ་གནང་བའི་བཀའ་སྟེ་གསུམ་མོ། །དེ་དག་གིས་རྒྱུ་མཚན་ཉིད་ཐེག་པའི་བཀའ་དང་དགོངས་འགྲེལ་གྱི་རྣམ་གཞག་ཕྱོགས་ཙམ་སྨོས་པ་དང་། འཕྲོས་དོན་འབྲས་བུ་སྔགས་ཀྱི་ཐེག་པ་ལའང་། ངོ་བོ་ནི་ལམ་དམན་པ་ལས་མཆོག་ཏུ་གྱུར་པའི་ཐེག་པ་གང་ཞིག །གཞི་མི་སྤངས་ལམ་དུ་བྱེད་པའི་ཐབས་ཁྱད་པར་དུ་འཕགས་པ། དཀའ་བ་མེད་པར་གཞན་དོན་དུ་བླ་ན་མེད་པའི་བྱང་ཆུབ་མྱུར་དུ་འགྲུབ་པར་བྱེད་པའི་ཐབས་ཀྱི་ཆ་གང་ཡིན་པའོ། །རྒྱུད་ཀྱི་ངེས་ཚིག་གི་དབང་དུ། གསང་འདུས་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ཞེས་བྱ་སྟེ། །རྒྱུད་དེ་རྣམ་པ་གསུམ་དུ་འགྱུར། །གཞི་དང་དེ་ཡི་རང་བཞིན་དང་། །མི་འཕྲོག་པ་ཡིས་རབ་ཕྱེ་བའོ། །རང་བཞིན་རྣམ་པ་རྒྱུ་ཡིན་ཏེ། །གཞི་ནི་ཐབས་ཞེས་བྱ་བ་ཡིན། །དེ་བཞིན་མི་འཕྲོག་འབྲས་བུ་སྟེ། །གསུམ་གྱིས་རྒྱུད་ཀྱི་དོན་བསྡུས་པའོ། །ཞེས་ཏནྟྲ་པྲ་བྷནྡྷ་ཁྱཱ་ཞེས་པའི་སྒྲ་ལས་རྒྱུན་ཆགས་པ་སྟེ། སེམས་ཉིད་གཉིས་སུ་མེད་པའི་ཡེ་ཤེས་རང་གི་མཚན་ཉིད་གསལ་ལ་མ་འགགས་པ། རྒྱུ་དང་ཐབས་དང་འབྲས་བུའི་གནས་སྐབས་ཐམས་ཅད་དུ་འབྲེལ་ཞིང་རྒྱུན་ཆགས་པ། ངོ་བོ་ཐབས་ཤེས་ཟུང་དུ་འབྲེལ་བའི་བདག་ཉིད་དུ་གནས་པ་ནི་རྒྱུད་ཅེས་བྱ་སྟེ། རྩེ་མོ་ལས། །རྒྱུད་
ནི་རྒྱུན་ཆགས་ཞེས་བྱ་སྟེ། །འཁོར་བ་རྒྱུད་དུ་འདོད་པ་ཡིན། །མྱ་ངན་འདས་པ་རྒྱུད་ཕྱི་མ། །ཞེས་འབྱུང་བ་ལྟར་རོ། །དེ་ལྟ་བུའི་རྒྱུད་སྡེ་དེ་ལ་སྤྱིར་གསང་སྔགས་དང་། །རྡོ་རྗེ་ཐེག་པ་དང་། འབྲས་བུའི་ཐེག་པ་རྣམས་མཚན་གྱི་རྣམ་གྲངས་ཅན་ཏེ། མནྟྲ་ཞེས་པའི་སྒྲ་ལས་མན་ཡིད་དང་ཏྲཱ་ཡ་སྐྱོབ་པའི་དོན་ཏོ། །ཡིད་མཚན་རྟོག་ལས་སྐྱོབ་པར་བྱེད་པའི་ཕྱིར་སྔགས་ཏེ། འདུས་པའི་རྒྱུད་ཕྱི་མ་ལས། དབང་པོ་དང་ནི་ཡུལ་རྣམས་ཀྱི། །རྐྱེན་གྱིས་གང་དང་གང་བྱུང་བའི། །ཡིད་དེ་མན་ཞེས་བྱ་བ་བཤད། །ཏྲ་ནི་སྐྱོབ་པར་བྱེད་པའི་དོན། །ཞེས་སོ། །ནང་གསེས་ཀྱིས་དབྱེ་བར། ཁ་སྦྱོར་གྱི་རབ་དབྱེ་དང་པོ་ལས། །ཁྱབ་འཇུག་དང་དབང་ཕྱུག་ཆེན་པོ་དང་། ཚངས་པ་དང་། ཉན་ཐོས་དང་། རང་སངས་རྒྱས་རྣམས་ཀྱི་སྤྱོད་ཡུལ་མ་ཡིན་པའི་ཕྱིར་གསང་བའོ། །ཞེས་དང་། རྩེ་མོ་ལས། །འདོད་ཆགས་མུན་པ་རྣམ་རྟུལ་ཞིང་། །ཉོན་མོངས་རྣམ་ཀྱང་རྣམ་པར་འདུལ། །མ་རིག་པ་ནི་ཟློག་བྱེད་པ། །དེ་ནི་རིག་སྔགས་རྣམ་པ་བརྗོད། །ཅེས་དང་། སངས་རྒྱས་ཆོས་རྣམས་འཛིན་བྱེད་ཅིང་། །ཆོས་རྣམས་འཛིན་པར་བྱེད་པ་དང་། །དགེ་བ་ཞེས་བྱ་འཛིན་བྱེད་པ། །གཟུངས་སྔགས་ཀྱི་ནི་མཚན་ཉིད་བརྗོད། །ཅེས་གུ་ཧྱའི་སྒྲ་ལས་སྣོད་མིན་ལ་གསང་བར་བྱ་དགོས་པས་གསང་སྔགས་དང་། །བིདྱའི་སྒྲ་ལས་རིག་པ་ཡེ་ཤེས་ཀྱི་ངོ་བོ་གསལ་བར་བྱེད་པས་རིག་སྔགས་དང་། དྷཱ་ར་ིའི་སྒྲ་ལས་ཡོན་ཏན་འཛིན་པར་བྱེད་པས་
གཟུངས་སྔགས་ཏེ་རྣམ་པ་གསུམ་དུ་བཤད་དོ། །གསང་སྔགས་རྡོ་རྗེ་ཐེག་པ་ཞེས་པའི་སྒྲ་དོན་ཀྱང་། རྡོ་རྗེ་ནི་སངས་རྒྱས་ཀྱི་སྐུ་གསུང་ཐུགས་རྡོ་རྗེ་སྟེ་འབྲས་བུ་དང་། ཐེག་པ་ནི་འདིས་དེར་འདོང་བར་བྱེད་པའི་ཕྱིར་ལམ་ལ་བྱ་སྟེ། གསང་འདུས་ལས། །འདོད་ཆགས་ཞེ་སྡང་གཏི་མུག་རྣམས། །རྡོ་རྗེ་ལ་དགའ་རྟག་པར་གནས། །དེས་ན་སངས་རྒྱས་རྣམས་ཀྱི་ཐབས། །རྡོ་རྗེ་ཐེག་པ་ཞེས་བཤད་དོ། །ཞེས་འབྱུང་བ་ལྟར་རོ། །འབྲས་བུའི་ཐེག་པ་ཞེས་བཤད་པ་ནི། འབྲས་དུས་ཀྱི་ཡོངས་དག་བཞི་གྲུབ་པ་ལ། དེ་དང་རྣམ་པ་མཐུན་པའི་ལམ་ད་ལྟ་ནས་འབྲས་བུ་ལམ་བྱེད་ཀྱི་ཚུལ་དུ་བསྒོམས་པས་ན་དེ་ལྟར་བྱ་སྟེ། གུར་ལས། །སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་དུ་ངེས་པར་འགྲུབ། །ཅེས་སོགས་གསུངས་སོ། །དེ་ལྟ་བུའི་ལམ་གྱིས་འབྲས་བུ་མངོན་དུ་བྱུང་བ་ཡང་སྐལ་པ་རབ་ཚེ་འདི་ཉིད་དུ་གྲོལ་བ་ནི། འདུས་པ་ལས། འདི་ཡིས་ཆོས་ཀྱི་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོས་རྣམ་པར་བརྒྱན། །ཚེ་འདི་ཉིད་ལ་འགྲུབ་པར་འགྱུར། །ཞེས་དང་། འབྲིང་བར་དོར་འགྲུབ་པ་ཡང་། ཡེ་ཤེས་ཐིག་ལེ་ལས། ཡང་ན་ལུས་ནི་སྤང་མ་ཐག །བརྩོན་པ་མི་ལྡན་པས་ཀྱང་འགྲུབ། །ཅེས་དང་། ཐ་མ་སྐྱེ་བ་བདུན་ནས་འགྲུབ་པ་ནི་གསང་བའི་མཛོད་ལས། དེ་ཡིས་སྐྱེ་བ་བདུན་ན་ནི། །མ་བསྒོམས་པར་ཡང་དངོས་གྲུབ་འཐོབ། །
ཅེས་དང་། སྐལ་པ་ཤིན་ཏུ་ཐམས་ཅད་སྐྱེ་བ་བཅུ་དྲུག་ནས་འགྲུབ་པར་འགྱུར་ཏེ། དམ་ཚིག་ལྔ་པར། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ན་འགྲུབ། །ཅེས་གསུངས་སོ། །དེ་བས་ན་བྱང་ཆུབ་ཆེན་པོ་ཚེོགས་མེད་པར་འགྲུབ་པའི་ཕྱིར་འབྲས་བུའི་ཐེག་པ་ཞེས་བྱའོ། །རྗོད་བྱེད་སྒྲའི་རྒྱུད་ནི། བརྗོད་བྱ་རྒྱུད་གསུམ་པོ་སྟོན་པའི་མིང་ཚིག་ཡི་གེའི་རྣམ་པར་རིག་པ་ལ་སྒྲ་སྤྱི་དང་དོན་སྤྱི་འདྲེས་མའི་རྣམ་པར་སྣང་བ་གང་ཡིན་པའོ། །རྡོ་རྗེ་རྩེ་མོ་ལས། སེམས་ཅན་ཀུན་ལ་ཕན་པའི་ཕྱིར། །སངས་རྒྱས་རྣམས་ཀྱི་ཆོས་ལོངས་རྫོགས། །སངས་རྒྱས་ཐུགས་རྗེས་བསྐུལ་ནས་ནི། །རྒྱུད་དོན་ཡང་དག་བྱུང་བ་ཡིན། །ཞེས་པའི་དོན་སྒྲའི་རྒྱུད་མཚན་ཉིད་པ་དང་བརྟགས་པ་བར་དབྱེ་བ་ཁ་ཅིག་བཞེད་དོ། །གོང་སྨོས་རྡོ་རྗེ་ཐེག་པའི་ཚུལ་འདི་ལ་རྒྱས་པར་ཕྱེ་ན། ཕར་ཕྱིན་ཐེག་པ་ལས་ཁྱད་པར་དུ་འཕགས་ཚུལ། རྒྱུད་སྡེའི་དབྱེ་བ་དང་གྲངས་ངེས། སོ་སོའི་སྒྲ་དོན། འདི་ལས་འཕྲོས་པའི་གཞུང་དང་ཟུར་བཀའི་བྱེ་བྲག་སོགས་དབྱེར་ཡོད་ཀྱང་འདིར་མ་སྤྲོས་པ་ཀུན་མཁྱེན་བུ་སྟོན་སོགས་ཀྱི་ལེགས་བཤད་གཞན་ལས་རྟོགས་པར་བྱའོ། །དེ་ལྟར་རྒྱལ་བའི་བསྟན་པ་མདོ་སྔགས་ཀྱིས་བསྡུས་པའི་ལུང་རྟོགས་གཉིས་ལྡན་གྱི་རིང་ལུགས་གང་ཞིག་བཤད་སྒྲུབ་ཀྱིས་འཛིན་པའི་ཚུལ་ཡང་། མཛོད་ལས། དེ་འཛིན་བྱེད་པ་སྨྲ་བྱེད་པ། །སྒྲུབ་པར་བྱེད་པ་ཁོ་ན་ཡིན། །
ཞེས་གསུངས་པ་ལྟར་བཤད་སྒྲུབ་གཉིས་ཡིན་ལ། གང་ལ་ཉན་བཤད་བྱ་བའི་ཆོས་ནི། རྗེ་ས་པ་གྱིས། ལུང་རིགས་རྗེས་སུ་གདམས་པའོ། །ཞེས་གསུངས་ཏེ། མདོ་རྒྱུད་བསྟན་བཅོས་དང་མཐུན་པའི་ལུང་། སྒྲ་ཚད་དངོས་སྟོབས་དང་མཐུན་པའི་རིགས་པ། ཆོས་ཉིད་ཟབ་མོ་དང་མཐུན་པའི་རྗེས་སུ་གདམས་པ་སྟེ་མཚན་ཉིད་གསུམ་མམ་གཉིས་སམ་གང་རུང་གཅིག་དང་ལྡན་ཡང་རུང་། དེ་རྣམས་ཀྱི་ནང་ནས་ཡིད་ཆེས་པའི་ལུང་དང་བརྒྱུད་པ་དྲི་མ་མེད་པ་ལས་འོངས་པའི་གདམས་ངག་གཙོ་ཆེ་སྟེ། ཤིན་ཏུ་ལྐོག་ཏུ་གྱུར་པ་དཔྱོད་པ་ལ་ལུང་ཉིད་ཚད་མ་ཡིན་པའི་ཕྱིར་དང་། ལུང་དོན་མན་ངག་བརྒྱུད་པའི་ངག་སྒྲོས་ཀྱིས་མ་བརྒྱན་ན་ཅི་བདེ་བར་ཉམས་སུ་མི་ལོན་པ་མང་དུ་ཡོད་པའི་ཕྱིར་དང་། གང་ཟག་ཁ་ཅིག་ལུང་གི་ཚིག་སྒྲ་ཇི་བཞིན་པ་ལ་ཞེན་ནས་དོན་དུ་མི་འགྱུར་བ་ཡང་དུ་མ་ཡོད་པ་གསུངས་པས་སོ། །དེ་སྐད་དུ་ཚད་མ་རྣམ་འགྲེལ་ལས། ལུང་ནི་ཡིད་ཆེས་ཚིག་ཡིན་ཏེ། །ཉེས་པ་ཟད་པ་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ཤེས་པར་བྱ། །ཞེས་དང་། རྒྱན་ལས། །དོན་སྒྲ་ཇི་བཞིན་ཡོངས་རྟོགས་ན། །བདག་ཉིད་སྙེམས་ཤིང་བློ་ཉམས་འགྱུར། །ལེགས་པར་གསུང་བའང་སྤངས་པས་ན། །བརླག་འགྱུར་ཆོས་ལ་ཁོང་ཁྲོ་སྒྲིང་། །ཅེས་གསུངས་པས་སོ། །ཡང་ན། འོད་ལྡན་ལས། །བསླབ་པ་
གསུམ་ནི་རབ་སྟོན་ཅིང་། །ཕྱག་རྒྱ་གསུམ་དང་ཡང་དག་ལྡན། །ཐོག་མ་བར་དང་མཐར་དགེ་བ། །སངས་རྒྱས་གསུང་དུ་མཁས་པས་རྟོགས། །ཞེས་གསུངས་ཏེ། །དེ་ཡང་བསྒྲུབ་བྱ་བསླབ་པ་གསུམ་ནི། །མདོ་ལས། །སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱོད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ཞེས་པའི་ཚིག་རྐང་པ་གསུམ་གྱིས་ཚུལ་ཁྲིམས་ཀྱི་བསླབ་པ་དང་། ཏིང་ངེ་འཛིན་གྱི་བསླབ་པ་དང་། ཤེས་རབ་ཀྱི་བསླབ་པ་གསུམ་གོ་རིམ་བཞིན་དུ་བསྟན་པར་གསུངས་སོ། །ཡང་ན་ཕྱག་རྒྱ་གསུམ་དང་ལྡན་པ་སྟེ། ཕྱག་རྒྱ་གསུམ་ནི། འདུས་བྱས་མི་རྟག་པ། མྱང་འདས་ཞི་བདེ། །ཆོས་བདག་མེད་པ་གསུམ་མོ། །ཡང་ན་མདོ་ལས། དམ་པའི་ཆོས་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཞེས་གསུངས་ཏེ། རྗོད་བྱེད་ལུང་གི་ཆོས་ནི་ཐོས་པ་ལས་དད་པ་སྐྱེ་བའི་རྒྱུ་ཡིན་པའི་ཕྱིར་ན་ཐོག་མར་དགེ་བ། བསམ་པ་ལས་དགའ་བ་སྐྱེ་བའི་རྒྱུ་ཡིན་པའི་ཕྱིར་བར་དུ་དགེ་བ། བསྒོམ་པ་ལས་ཇི་ལྟར་རྟོགས་པའི་བློ་སྐྱེ་བའི་རྒྱུ་ཡིན་པའི་ཕྱིར་ཐ་མར་དགེ་བ། ཀུན་རྫོབ་དང་དོན་དམ་པའི་བདེན་པ་གཉིས་སྟོན་པའི་ཕྱིར་དོན་བཟང་པོ། །ཚིག་དང་ཡི་གེ་འཇིག་རྟེན་ན་གྲགས་པ་ལྟར་བརྗོད་པས་བཟུང་སླ་བའི་
ཕྱིར་ཚིག་འབྲུ་བཟང་པོ་སྟེ་ལྔ་དང་། བརྗོད་བྱ་རྟོགས་པའི་ཆོས་ནི། ཕྱི་རོལ་པ་དང་ཐུན་མོངས་མ་ཡིན་པའི་ཕྱིར་མ་འདྲེས་པ་ཁམས་གསུམ་གྱི་ཉོན་མོངས་པ་ཐམས་ཅད་སྤོང་བའི་གཉེན་པོ་རྫོགས་པའི་ཕྱིར་ཡོངས་སུ་རྫོགས་པ། རང་བཞིན་གྱི་དྲི་མ་མེད་པའི་ཕྱིར་ཡོངས་སུ་དག་པ། གློ་བུར་གྱི་དྲི་མ་དང་བྲལ་བའི་ཕྱིར་ཡོངས་སུ་བྱང་བ་སྟེ་ཡོན་ཏན་བཞི་དང་ལྡན་པ་ཡིན་ཏེ། རྒྱན་ལས། །དད་དང་དགའ་དང་བློ་རྣམས་ཀྱི་རྒྱུ་ཕྱིར་ཆོས་འདི་དགེ་བ་ཡིན། །དོན་རྣམས་གཉིས་ལྡན་གཟུང་སླ་དང་། ཡོན་ཏན་བཞི་ཅན་ཚངས་སྤྱོད་སྟོན། །གཞན་དང་ཐུན་མོང་མ་ཡིན་ལྡན་པ་དང་། །ཁམས་གསུམ་ཉོན་མོངས་རྣམ་སྤོང་རྫོགས་བྱེད་དང་། །ངོ་བོ་ཉིད་དག་དྲི་མས་དག་པ་སྟེ། །ཚངས་སྤྱོད་ཡོན་ཏན་བཞི་ལྡན་ཡིན་པར་འདོད། །ཅེས་གསུངས་པ་ལྟར་རོ། །མདོར་ན་བཤད་བྱའི་ཆོས་ནི་སངས་རྒྱས་ཀྱིས་གསུངས། སྡུད་པ་པོས་བསྡུས། མཁས་གྲུབ་རྣམས་ཀྱིས་བཀྲལ། པཎྜི་ཏས་བཤད། ལོ་ཙཱ་བས་བསྒྱུར། བླ་མ་བརྒྱུད་པའི་མན་ངག་དང་། ལུང་གི་རྒྱུན་དང་ལྡན་པ། མཁས་པ་རྣམས་ལ་གྲགས་ཤིང་གྲུབ་པ་ཞིག་དགོས་ཀྱི། དེ་ལས་གཞན་དུ་གྱུར་པ་ལ་བཤད་སྒྲུབ་བྱས་ཀྱང་ཆོས་སུ་མི་འགྱུར་རོ། །དེ་ལྟར་རྒྱལ་བའི་བསྟན་པ་འབའ་ཞིག་གི་དབང་དུ་བྱས་ཏེ་དེའི་དགོངས་པ་འགྲེལ་པའི་དགའ་ཆོས་སྐྱོབ་ཀྱི་ཡོན་ཏན་དང་ལྡན་པའི་བསྟན་བཅོས་རྩོམ་པ་པོའམ་
འཆད་པ་པོའི་མཚན་ཉིད་ཀྱང་། གཙང་མཁས་གཞན་ལ་ཕན་པར་འདོད། །ཅེས་པ་ལྟར། ཚུལ་ཁྲིམས་དག་པས་ལུང་གཙང་བ། ཤེས་རབ་དག་པས་ལུས་རིགས་མཁས་པ། ལྷག་བསམ་དག་པས་གཞན་ལ་ཕན་པར་འདོད་པའི་མཚན་ཉིད་སུམ་ལྡན་ཏེ། དེའང་ཚུལ་ཁྲིམས་དང་མི་ལྡན་ན་ཡོན་ཏན་གྱི་གཞི་མེད་པས་རང་གཞན་གྱི་དོན་མི་འགྲུབ། གྲགས་པ་ངན་པ་འཕེལ། བསྟན་པ་དྲི་མ་ཅན་དུ་བྱེད་པས་ཡོན་ཏན་གྱི་གཞི་རྟེན་ཚུལ་ཁྲིམས་དག་པ་སྟེ། སུམ་བརྒྱ་པ་ལས། །ཚུལ་ཁྲིམས་དག་ཅིང་འདུལ་བའི་ཆོ་ག་ཤེས། །ནད་པར་སྙིང་བརྩེ་འཁོར་ནི་དག་པ་དང་། །ཆོས་དང་ཟང་ཟིང་ཕན་འདོགས་ལ་བརྩོན་པ། །དུས་སུ་འདོམས་པ་དེ་དག་བླ་མར་བསྔགས། །ཞེས་གསུངས་པ་ལྟར་རོ། །ཤེས་རབ་དག་པས་ལུང་རིགས་ལ་མཁས་པ་ལ་གསུམ་ལས། བཤད་བྱ་ལ་མཁས་པ་ནི། སྤྱིར་ཤེས་བྱ་རིག་པའི་གནས་ལྔ་དང་། སྡེ་སྣོད་ཐམས་ཅད་ལ། མཁས་པ། ཁྱད་པར་གང་བཤད་པར་བྱ་བའི་ཆོས་དེའི་ཚིག་དང་དོན་གྱི་ཆ་ལ་མཁས་པ་ཞིག་དགོས་ཏེ། དེས་སློབ་མའི་ཐེ་ཚོམ་གཅོད་ནུས་པས་སོ། །འཆད་བྱེད་ལ་མཁས་པ་ནི། གང་ནས་བཤད་ཀྱང་འབྲེལ། ཅི་ཙམ་བཤད་ཀྱང་རན། ཇི་ལྟར་བཤད་ཀྱང་འཐད་པ་གསུམ་གྱི་སྒོ་ནས་ངག་འབྲེལ་ཞིང་། རྗོད་བྱེད་ཀྱི་བརྡ་དག་པ་དང་། གཞན་དགའ་བར་ནུས་པའི་དབྱངས་དང་ལྡན་པའོ། །འཆད་ཚུལ་ལ་མཁས་པ་ནི། །
གདུལ་བྱའི་ཁམས་དང་། བསམ་པ་དང་། བག་ལ་ཉལ་དང་རྗེས་སུ་མཐུན་པར་བཤད་ཀྱི། དེ་དང་མི་མཐུན་པར་མི་འཆད་པ་སྟེ། ས་སྙིང་འཁོར་ལོ་བཅུ་པ་ལས། །བྱིས་པ་དབང་པོ་ཞན་ཅིང་ལེ་ལོ་ཞན། །ཐེག་པ་གཉིས་ལ་ནན་ཏན་མི་བྱེད་པ། །ཐེག་པ་ཆེན་པོའི་འཁོར་ལོ་ལྡན་མི་འགྱུར། །དེ་ནི་རྒྱ་ཆེན་ཐེག་པའི་སྣོད་མ་ཡིན། །ཞེས་དང་། །དེ་བཞིན་སྣོད་མིན་ཉན་ཐོས་ཐེག་པ་དག །ཐེག་ཆེན་བཤད་པ་ཐོས་ན་རྨོངས་འགྱུར་ཞིང་། །ཆད་པར་ལྟ་བ་ངན་སོང་ལྟུང་འགྱུར་བས། །དེས་ན་དབང་པོ་བརྟག་སྟེ་ཆོས་བསྟན་ཏོ། །ཞེས་གསུངས་ཤིང་། སྤྱོད་འཇུག་ལས་ཀྱང་། རྒྱ་ཆེན་ཆོས་ཀྱི་སྣོད་གྱུར་པ། །དམན་པའི་ཆོས་ལ་སྦྱར་མི་བྱ། །ཞེས་དང་། དམན་ལ་ཟབ་དང་རྒྱ་ཆེ་དང་། ཞེས་སོགས་གསུངས་བའི་སྣོད་ཀྱི་མཚན་ཉིད་ལ་མཁས་པ་དགོས་སོ། །ལྷག་བསམ་དག་པས་གཞན་ལ་ཕན་པར་བརྩོན་པ་ནི། ཟང་ཟིང་ལ་མི་ལྟ་བའི་ཡིད་ཀྱིས་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་པར་འདོད་པའི་སྙིང་རྗེས་ཀུན་ནས་བསླངས་ཏེ་ཆོས་རྣམས་ཀྱི་ཚིག་དོན་སློབ་མས་རྟོགས་ནས་ཉོན་མོངས་པའི་གཉེན་པོར་གྱུར་ཅིག་སྙམ་པའི་ཕན་འདོད་ཀྱི་བསམ་པ་དང་ལྡན་པ་སྟེ། རིན་ཆེན་ཕྲེང་བ་ལས། ཆོག་ཤེས་སྙིང་རྗེ་ཚུལ་ཁྲིམས་ལྡན། །ཉོན་མོངས་སེལ་བའི་ཤེས་རབ་ཅན། །དེ་དག་ལ་ནི་ཁྱོད་བརྟེན་ན། །ཁྱོད་ཀྱིས་མཁྱེན་གྱི་གུས་པར་མཛོད། །ཅེས་
གསུངས་སོ། །དེ་ལྟར་ཚུལ་བཞིན་རྩོམ་པའམ་བཤད་པ་དེ་དག་ལམ་དུ་འགྱུར་ཞིང་། བསྟན་པ་དང་གདུལ་བྱར་གནས་སྐབས་མཐར་ཐུག་ཀུན་ཏུ་ཕན་པའི་བཙས་སུ་འགྱུར་བ་ཡིན་གྱི། དེ་ལྟ་བུ་དང་མི་ལྡན་ན་བདུད་ཀྱི་ལས་སུ་གསུངས་པའི་ལུང་མཐའ་ཡས་པ་ཞིག་མཆིས་སོ། །གཞན་ཡང་། རྒྱན་ལས། །དེ་ལྟར་བློ་བཟང་སྐྱོབ་མེད་ལྡན་བརྩེ་བ་ཅན། །སྙན་པར་རབ་གྲགས་ཆོག་བཟང་ཤེས་ལྡན་པ་ཡིས། །བྱང་ཆུབ་སེམས་དཔའ་ལེགས་པར་སྨྲ་བ་ཡིན་པ་སྟེ། །བཤད་པས་སྐྱེ་བོའི་ནང་ན་ཉི་མ་བཞིན་དུ་ལྷམ། །ཞེས་གསུངས་པ་ལྟར་དང་། རྟོགས་པའི་བསྟན་པ་སྒྲུབ་པས་འཛིན་པ་འཁོར་ལོས་སྒྱུར་བའི་རྒྱལ་པོ་ལྟ་བུ་ལ། ལུང་གི་བསྟན་པ་རྒྱལ་སྲིད་རིན་པོ་ཆེ་སྣ་བདུན་ལྟ་བུ་ཤུགས་ལ་འཛིན་པའང་བརྒྱུད་པ་རིན་པོ་ཆེ་འདིས་བཞེད་ཅིང་། ཚུལ་བཞིན་བཤད་པ་ལ་བརྟེན་ནས་ཐོས་བསམ་སྒོམ་པའི་ཤེས་རབ་སྤྱི་དང་ཁྱད་པར་གྱི་སྣང་བ་ཐོབ་ནས་སྤངས་རྟོགས་རྫོགས་དགོས་པའི་ཕྱིར། འདིར་མཚན་ཉིད་དང་ལྡན་པའི་འཆད་པ་པོ་དང་བཤད་བྱའི་ཡན་ལག་ཡོངས་སུ་རྫོགས་པས་གོང་སྨོས་ཀྱི་ཡོན་ཏན་མ་ལུས་པ་དང་ལྡན་པ་ནི་རྗེ་བཙུན་བླ་མ་ཐམས་ཅད་མཁྱེན་པ་ཉིད་དང་། དེས་མཛད་པའི་བསྟན་བཅོས་ཡིད་བཞིན་གྱི་ནོར་བུ་རིན་པོ་ཆེའི་མཛོད་དག་ལ་མ་ཚང་བ་མེད་པ་ལེགས་པར་མངའ་བ་དང་། གཞན་ཡང་། འཐོར་བསྡུད་པ། ཟབ་མོ་དཀྲོལ་བ། འཁྲུགས་པ་བསྡེབ་པ་དང་། བཀའ་
སྤྱི་དང་བྱེ་བྲག་བའི་དགོངས་འགྲེལ་བླ་ན་མེད་པ། མདོ་སྔགས་གསར་རྙིང་རིག་གནས་དང་བཅས་པའི་དགོངས་དོན་ཕྱིན་ཅི་མ་ལོག་པར་བལྟ་བའི་མིག་ལྟ་བུ་དང་། ཕན་བྱེད་ཀྱི་མན་ངག་ཕྲ་མོ་ཚུན་མཚང་བ་མེད་པ་རྒྱལ་པོའི་བང་མཛོད་ཁ་ཕྱེས་པ་ལྟ་བུ་ནི་ཆོས་འདི་ལ་མངའ་བས། མཁས་གྲུབ་དང་ཆེན་པོར་གྲགས་པ་ཕལ་གྱིས་བདག་བསྟོད་གཞན་སྨོད་ཀྱི་ཚིག་གི་ཕྲེང་བ་ལ་དགོངས་འགྲེལ་དུ་བཏགས་པས་བྱིས་པ་རྣམས་ལ་བློའི་དྲི་མ་བསྐྱེད་པ་དང་། མདོས་གླུད་བསང་གསུང་སོགས་ཁྱབ་ཆུང་ཁོ་ན་མང་དུ་བྲིས་པའི་ཡི་གེའི་ཕུང་པོ་བརྩེགས་པ་ལ་གསུང་འབུམ་དུ་མིང་འདོགས་པ་རྣམས་དང་འདི་མི་མཚུངས་པའི་རྒྱུ་མཚན་མང་དུ་སྤྲོར་ཡོད་ཀྱང་དཔྱོད་ལྡན་གཟུར་གནས་རྣམས་ཀྱི་རིག་ངོར་མངོན་སུམ་དུ་འགྱུར་བས་སྨོས་སུ་མ་དགོས། བླུན་པོ་གཏི་ཐུག་དག་ལ་ནི་ཅི་ཙམ་བཤད་ཀྱང་གནད་ངེས་པའི་གོ་བ་མི་འཆར་བས་མ་སྤྲོས་སོ། །གཞན་ཡང་བསྟན་བཅོས་མཛད་པ་པོ་རབ་ཆོས་ཉིད་ཀྱི་བདེན་པ་མཐོང་བ། འབྲིང་ཡི་དམ་ལྷའི་གནང་བ་ཐོབ་པ། ཐ་མ་རིག་པའི་གནས་ལྔ་ལ་མཁས་པ་སྟེ་གསུམ་དུ་གསུངས་པའི་དོན་ཐམས་ཅད་རྗེ་བླ་མ་བདག་ཉིད་ཆེན་པོ་འདི་ལ་ངེས་པར་ཚང་བའི་ཚུལ་ངེས་གསང་ཟབ་མོའི་རྣམ་ཐར་དང་ཕྲིན་ལས་ཉིད་ལ་གུས་པས་མཇལ་བ་ཙམ་གྱིས་མཚོན་ནུས་ཀྱི། གཞན་དུ་སོ་སྐྱེ་མི་མཁས་པ་བདག་དང་བདག་འདྲའི་གྲོང་ཚིག་གི་ཕྲེང་བ་འཐད་འཐད་འདྲ་བའི་མཛེས་ཁྲིགས་རྡོ་ཆག་ལྷུ་
གཏུགས་ལྟ་བུས་བདག་བསྟོད་གཞན་སྨོད་ཀྱི་ཕྱོགས་སུ་ལྷུང་བའི་དྲི་མ་ཅན་གྱི་གཏམ་གྱིས་མཁས་པ་དགྱེས་པར་མི་འགྱུར་ཞིང་། བླུན་པོའི་བསྟོད་པ་ཕལ་ཆེར་སྨད་པའི་རྒྱུ་ཡིན་པའི་ཕྱིར་ན་བླ་མ་དང་བསྟན་པའི་ཞབས་ཏོག་ཏུ་འགྱུར་པའང་ཆེས་དཀའ་བས་སྨྲ་བ་མང་པོ་སྤྲོས་པ་བསྐྱུངས་སོ། །གསུམ་པ་མཚན་ཉིད་དེ་ལྡན་གྱི་ཆོས་ཀྱི་བཞུགས་བྱང་དཀར་ཆག་དམིགས་སུ་སྨོས་པ་ལ། བཀའ་བབས་བདུན་གྱི་ཤིང་རྟ་ཆེན་པོ་ཐམས་ཅད་མཁྱེན་པ་འཇམ་པའི་དབྱངས་མཁྱེན་བརྩེའི་དབང་པོའི་ཞལ་སྔ་ནས་དཀར་པོའི་ཆོས་ཀྱིས་འཁྱུད་པའི་ཟླ་བ་ཉ་བའི་གྲངས་ལྡན་གྱིས་བཅད་རྒྱ་མཚོ་མཐའ་ཡས་བཅོ་ལྔས་བསྡམས་པའི་ཐོ་བཀོད་གནང་བ་དང་མཐུན་པར་འགོད་པའི་དབང་དུ་བྱས་ཏེ། ཐོག་མར་གླེགས་བམ། ཀ། པ་ལ། དང་པོ་ཡུལ་ཁྱད་པར་ཅན་ལ་རྗེས་སུ་བསྔགས་པའི་བསྟོད་ཚོགས་ཀྱི་སྐོར་ཡོན་ཏན་རྒྱ་མཚོ་མཐའ་ཡས་པའི་མཛོད་ལ། སྟོན་བ་དོན་ཀུན་གྲུབ་པའི་དོན་གྱི་ཚུལ་ཅུང་ཟད་བསྔགས་པ་ཡངས་པའི་སྙིང་པོ། འཇམ་དཔལ་གཞོན་ནུར་གྱུར་པ། རྗེ་བཙུན་སྤྱན་རས་གཟིགས། དཔལ་རྡོ་རྗེ་འཛིན་པ། རྒྱལ་ཚབ་བྱམས་པ། སའི་སྙིང་པོ། སྒྲིབ་པ་རྣམ་སེལ། ནམ་མཁའི་སྙིང་པོ། ཀུན་ཏུ་བཟང་པོ་རྣམས་ཀྱི་རྣམ་ཐར་ཕྱོགས་གཅིག་གི་ཆ་ཤས་ལ་བསྔགས་པ་སྤྲིན་ཆེན་རྣམ་བརྒྱད། སྒྲོལ་མ་དཀར་མོ་ལ་བསྔགས་པའི་དོད་འཇོའི་ལྗོན་ཤིང་། སྒྲོལ་བསྟོད་བཻ་ཌཱུརྻའི་ཕྲེང་བ་ལ་ནང་གསེས་སུ་བདུད་རྩིའི་ལྗོན་ཤིང་། འཆི་མེད་གྲུབ་པའི་
ལྗོན་ཤིང་། གྲུབ་པའི་ངག །འཆི་མེད་རྡོ་རྗེའི་གླུ། སྙིང་གི་མེ་ཏོག་ཁ་བྱེ་བ། མོས་གུས་ཀྱི་ཏམྦུར། སྦྲང་རྩིའི་རླབས་ཕྲེང་། སྐྱ་རེངས་ཀྱི་ཕྲིན་པ། བདུད་རྩིའི་ཐིགས་པ། བདུད་རྩིའི་སྒྲ་དབྱངས། འཆི་བདག་གཡུལ་རྒྱལ། དཔག་བསམ་གྲིབ་བསིལ། བསམ་དོན་ལྷུན་གྲུབ། བར་ཆད་ཀུན་སེལ་སོགས། དཔལ་ཧེ་རུ་ཀ་འཁོར་ལོ་སྡོམ་པ་ལ་བསྟོད་ཕྱག་འཚལ་བ་བདེ་ཆེན་རོལ་པ། འཕགས་མ་གདུགས་དཀར་ཅན་ལ་བསྟོད་པ་བྱིན་རླབས་ཀྱི་སྣང་བ། རྨད་དུ་བྱུང་བའི་སློབ་དཔོན་ཆེན་པོ་ཟླ་བའི་ཞབས་ཀྱི་རྟོགས་པ་བརྗོད་པ་དབྱངས་ཀྱི་ཡན་ལག་བརྒྱད་ལྡན། ཕ་དམ་པ་སངས་རྒྱས་ལ་བསྔགས་པ་དཔའ་བོའི་རོལ་མོ། །རྗེ་རས་ཆུང་པ་ལ་བསྔགས་པ་རྡོ་རྗེའི་རྒྱུད་མངས། གྲུབ་ཆེན་ཁྱུང་པོ་རྣལ་འབྱོར་ལ་སྔགས་པ་ཨུ་དུམྦཱ་རའི་འཛུམ་ཟེར། དཔལ་ལྡན་ཕག་མོ་གྲུ་པ་ལ་བསྔགས་པ་སངས་རྒྱས་དགྱེས་པའི་རོལ་མོ། །ས་ཆེན་ཀུན་དགའ་སྙིང་པོ་ལ་བསྔགས་པ་ངོ་མཚར་མེ་ཏོག །གངས་ཅན་གྱི་གསང་ཆེན་བསྟན་པའི་བདག་པོ་ཁུ་དབོན་བརྒྱུད་པར་བཅས་པ་ལ་བསྔགས་པ་བརྗོད་པ་གཟི་བརྗིད་མཐའ་ཡས། ཆོས་རྗེ་ས་སྐྱ་པཎྜིི་ཏ་ལ་བསྔགས་པའི་ཚིག་ཕྲེང་མཚོ་བྱུང་མགྲིན་གླུ། ཀུན་མཁྱེན་དོལ་པོ། །བུ་སྟོན་ཐམས་ཅད་མཁྱེན་པ། རྒྱལ་བ་བོ་དོང་པ། གྲུབ་ཆེན་བརྩོན་འགྲུས་བཟང་པོ། །རྗེ་བཙུན་ཏཱ་ར་ནཱ་ཐ་བཅས་ལ་བསྟོད་པ་རེ་རེ། དཔལ་ཆོས་ཀྱི་རྒྱལ་པོ་དྷརྨཱ་ཀ་ར་ལ་མོས་གུས་ཀྱི་བདེན་
གཏམ་དུ་བསྔགས་པ་དང་། དཔལ་ཀརྨ་པ་ཆེན་པོ་ལ་བསྟོད་པ་རྒྱལ་བ་ཀུན་གྱི་ཕྲིན་ལས་གཟུགས་ཅན་ཞེས་པ། སྐྱབས་མགོན་སི་ཏུ་རིན་པོ་ཆེ་པདྨ་ཉིན་བྱེད་དབང་པོ་ལ་བསྔགས་པ་དཔལ་ལྡན་འགྱུར་མེད་ཅེས་པ། འགྲོ་མགོན་རས་ཆེན་སངས་རྒྱས་མཉན་པ། དཔལ་ཀརྨ་པ་ཆེན་པོ་བཅས་ལ་བསྔགས་པའི་བྱ་དཀའི་རེའུ་མིག་རེ་རེ། འཇམ་དབྱངས་མཁྱེན་བརྩེ་རིན་པོ་ཆེའི་ཁྱད་པར་གྱི་རྣམ་ཐར་ལ་ཆེད་དུ་བརྗོད་པ། འཇིག་རྟེན་དབང་ཕྱུག་དཔལ་ཀརྨ་པ་བཅུ་བཞི་པའི་ཞབས་ཀྱི་པདྨོོར་ཅུང་ཟད་བསྔགས་པ་ཀུན་བཟང་འཁོར་ལོའི་རེའུ་མིག །རྡོ་རྗེ་སེམས་དཔའ་བདེ་བ་ཆེན་པོའི་རྒྱལ་བ་ལ་བྱ་དཀའི་རྣམ་འགྱུར་མང་པོས་བསྔགས་པ་སྣང་བྱེད་ཉི་ཟླའི་རོལ་རྩེད་ཨེ་ཝྃ་འཕྲུལ་གྱི་རོལ་མོ། །བླ་མ་དགོངས་པ་འདུས་པའི་ལྷ་ཚོགས་ལ་བསྟོད་སྨོན་གསང་སྔགས་རྙིང་མའི་ཡུལ་དམ་པ་རྣམས་ལ་བསྔགས་པ། །ཀུན་མཁྱེན་ཀློང་ཆེན་རབ་འབྱམས། གཏེར་ཆེན་ཤེས་རབ་འོད་ཟེར། རྩེ་ལེ་པདྨ་ལེགས་གྲུབ། ཨོ་རྒྱན་གཏེར་བདག་གླིང་པ། གྲུབ་དབང་ཀརྨ་ཆགས་མེད་རྣམས་ལ་བསྔགས་པ་རེ་རེ། ལྷ་ལྡན་སྤྲུལ་པའི་གནས། བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་། ཁྲ་འབྲུག་བྱམས་པྃ་མི་འགྱུར་ལྷུན་གྱིས་གྲུབ་པ། འུ་ཤང་རྡོ་དཔེ་མེད་བཀྲ་ཤིས་དགེ་འཕེལ། ཟུར་མཁར་ངོ་མཚར་རྡོའི་མཆོད་རྟེན་རྣམས་ལ་ཆེད་དུ་བརྗོད་པ་རེ་རེ། གུང་ཐང་གི་གཙུག་ལགས་ཁང་གི་རྟོགས་པ་བརྗོད་པ། འོག་མིན་མཚུར་ཕུ། ཨོ་རྒྱན་སྨིན་གྲོལ་གླིང་། གྲྭ་ནང་བྱམས་པ་གླིང་གི་མཆོད་རྟེན་བཅས་ལ་ཆེད་དུ་བརྗོད་པ་རེ་རེ་བཅས་གཉིས་པ་ལམ་ཟབ་མོ་བླ་མའི་རྣལ་འབྱོར་གྱི་སྒོར་བྱིན་རླབས་རྒྱ་མཚོ་མཐའ་ཡས་
པའི་མཛོད་ལ། རྡོ་རྗེའི་ཡེ་ཤེས་འབེབས་པའི་བྱིན་རླབས་ལམ་ཟབ་ཀྱི་ཕྲེང་བ་ཡོངས་འདུས་ལྗོན་བའི་སྐྱེད་ཚལ་ལ་ནང་གསེས་སུ། བླ་མཆོད་ཡིད་བཞིན་ནོར་བུ། དེའི་ཡན་ལག་མཁའ་འགྲོའི་གཏོར་ཆོག །འཇིག་རྟེན་དབང་ཕྱུག་རྒྱལ་མཆོག་བཅུ་བཞི་པ་གཙོ་བོར་གྱུར་པའི་དཔལ་ལྡན་བླ་མའི་དཀྱིལ་འཁོར་མཆོད་ཅིང་གསོལ་བ་འདེབས་པ། གསུང་གི་དབང་ཕྱུག་སྤྲུལ་པའི་སྐུ་རྡོ་རྗེའི་རིགས་ལྡན་བླ་མའི་ངོ་བོར་མཆོད་ཅིང་གསོལ་བ་འདེབས་པ། བི་མ་མི་ཏྲའི་བླ་མའི་རྣལ་འབྱོར་ཕྱི་ནང་གསང་བ་སྒྲོན་མ་འཕྲུལ་འབྱེད། མངའ་བདག་མར་པ་ལོ་ཙཱའི་ཕྱི་ནང་གསང་སྒྲུབ། དེའི་དབང་ཆོག །རྗེ་བཙུན་མི་ལ་རས་པའི་བླ་སྒྲུབ་ཚོགས་མཆོད་དང་བཅས་པ། དེའི་དབང་བསྐུར་བྱིན་རླབས་ཀྱི་ཆོ་ག །དེའི་ཟིན་བྲིས། རྫོགས་ཆེན་མན་ངག་སྙིང་ཐིག་གི་བླ་མཆོད་ཀུན་བཟང་རྣམ་རོལ། རྗེ་ཉིད་ཀྱི་བླ་མའི་རྣལ་འབྱོར། ཀརྨ་པ་ཡབ་སྲས་གསུམ་གྱི་བླ་སྒྲུབ། ཀར་རབས་བཅུ་གཅིག་བླ་སྒྲུབ། རྒྱལ་དབང་བཅུ་བཞི་པའི་བླ་མའི་རྣལ་འབྱོར་ཉུང་གསལ། བྱམས་མགོན་བླ་མ་དབྱེར་མེད་དུ་སྒྲུབ་པའི་ཐབས། བླ་མ་མགོན་པོ་དབྱེར་མེད་དུ་སྒྲུབ་པའི་རྣལ་འབྱོར། ཤངས་པའི་བླ་མཆོད་ཡིད་བཞིན་ནོར་བུ། དེའི་ཡན་ལག་མཁའ་འགྲོ་སྡེ་ལྔའི་གཏོར་འབུལ། བློ་ལྡན་མཆོག་སྲེད། ཐོད་ཕྲེང་རྩལ། ཡིད་བཞིན་འཁོར་ལོ། རྣམ་སྣང་ལོ་ཙཱ་རྣམས་དང་སྦྱར་བའི་
བླ་མའི་རྣལ་འབྱོར་རེ་རེ། ངེས་དོན་བླ་མའི་རྣལ་འབྱོར་ཡེ་ཤེས་ཆར་འབེབས། བླ་མའི་རྣལ་འབྱོར་འོད་གསལ་གཅེར་མཐོང་། རིགས་གསུམ་བླ་མའི་རྣལ་འབྱོར་སྐལ་བཟང་འདོད་འཇོ། རྡོ་རྗེ་འཛིན་པ་ལུས་དཀྱིལ་དུ་སྒྲུབ་པའི་ཚུལ་ཐུན་མོང་མ་ཡིན་པ། གུ་རུ་གཙོ་འཁོར་གྱི་བླ་མའི་རྣལ་འབྱོར་སྡེ་དགེའི་མཛོད་པ་ཚེ་དོན་ངོར་གནང་བ། བླ་མའི་རྣལ་འབྱོར་ཟུང་འཇུག་མཆོག་སྦྱོར། བླ་མ་ཚེ་དཔག་མེད་པའི་རྣལ་འབྱོར་ཚེ་དབང་དངོས་གྲུབ་དཔལ་སྟེར་དང་། འཆི་མེད་མཆོག་སྦྱིན་བཅས། གསུམ་པ་ཡུལ་དམ་པ་རྣམས་ལ་གསོལ་འདེབས་དང་ཞབས་བརྟན་གྱི་སྐོར་བསོད་ནམས་རྒྱ་མཚོ་མཐའ་ཡས་པའི་མཛོད་ལ། མོས་གུས་ཀྱི་རབས་ལས་སྐྱེས་པའི་ཐུགས་རྗེ་མངོན་པར་བསྐུལ་བའི་ཚིག་ཕྲེང་སྐལ་ལྡན་འདོད་པ་འཇོ་བའི་བུམ་བཟང་ལ་ནང་གསེས་སུ། དྲིན་ལྡན་དང་འབྲེལ་ཐོགས་ཀྱི་བླ་མ་རྣམས་ལ་གུས་པའི་གདུང་ཚིག་རྡོ་རྗེ་གཉུག་མའི་གསང་ལམ། གསུང་རབ་ཡན་ལག་བཅུ་གཉིས་ཀྱི་གསོལ་སྨོན། འཕགས་པ་འཇམ་དཔལ་གྱི་ཐུགས་དམ་བསྐུལ་བའི་གསོལ་འདེབས། སྤྱན་རས་གཟིགས་ཀྱི་ཐུགས་རྗེ་བསྐུལ་བ་ཤློ་ཀ་ཉེར་ལྔ་པ། དུས་འཁོར་གསོལ་འདེབས། ཆོས་རྒྱལ་རིགས་ལྡན་རྣམས་ཀྱི་གསོལ་འདེབས། དཀྱིལ་འཁོར་ཀུན་གྱི་ཁྱབ་བདག་མཚོ་སྐྱེས་རྡོ་རྗེ་འཆང་ཆེན་པོའི་ཐུགས་རྗེ་མངོན་པར་བསྐུལ་བའི་བསྟོད་དབྱངས་ནོར་བུ་སྣང་ཡངས་ཀྱི་རྒྱན། ཨོ་རྒྱན་རྗེ་འབངས་ཀྱི་གསོལ་འདེབས་རྡོ་རྗེའི་ཚིག་
རྐང་། སངས་རྒྱས་ཀུན་དངོས་མ་ཧཱ་གུ་རུ་ལ་དད་པའི་གདུང་དབྱངས། སྐྱབས་གཅིག་སངས་རྒྱས་གཉིས་པའི་མཚན་གྱི་བྱེ་བྲག་ལ་བསྟོད་ཅིང་སྨོན་ལམ་དུ་གསོལ་བ་འདོད་འཇོའི་གཏེར་བུམ། སངས་རྒྱས་གཉིས་པའི་མཚན་གྱི་བྱེ་བྲག་དང་སྦྱར་བའི་གསོལ་སྨོན། གུ་རུའི་གསོལ་འདེབས་འདོད་རྒུ་ཡོངས་འདུས། གུ་རུ་མཚན་བརྒྱད་གསོལ་འདེབས་ནོར་བུའི་སྙིང་པོ་རྣམ་བརྒྱད། གུ་རུའི་གསོལ་འདེབས་བར་ཆད་ཀུན་སེལ། གུ་རུའི་གསོལ་འདེབས་དུས་གསུམ་རྒྱལ་བ་ཀུན་དངོས་སོགས་ཚིག་ལྔ་པ། མཁའ་འགྲོ་ཡེ་ཤེས་མཚོ་རྒྱལ་གསོལ་འདེབས། མཚོ་རྒྱལ་རྣམ་ཐར་གསོལ་འདེབས་མོས་གུས་གདུང་བའི་ཏམྦུར། ཀུན་འདུས་ཕྱག་འཚལ་མཆོག་དགའི་འདོད་འཇོ། བསྟན་པ་སྤྱིའི་གསོལ་འདེབས་བཀྲ་ཤིས་འབྱུང་གནས། རྩ་བ་གསུམ་ལྷག་པའི་ཐུགས་རྗེ་མངོན་པར་བསྐུལ་བ་རྡོ་རྗེ་རྟའི་མགྲིན་གླུ། ཚེ་སྒྲུབ་གསང་འདུས་བརྒྱུད་པའི་གསོལ་སྨོན་རབ་བརྟན་རྡོ་རྗེ། ཡང་དེའི་གསོལ་འདེབས་རྟག་བརྟན་རྡོ་རྗེ། རྫོགས་ཆེན་བརྒྱུད་པའི་བླ་མ་རྣམས་ཀྱི་གསོལ་འདེབས་ཁྱབ་བདག་ཀུན་བཟང་མ། མི་དབང་ལྷ་དར་ངོར་གནང་པ་བཀའ་བརྒྱུད་ཀུན་འདུས་ཀྱི་གསོལ་འདེབས། རྗེ་ལྷོ་བྲག་པ་ཆེན་པོ་ལ་གསོལ་འདེབས་དགྱེས་མཛད་དགྱེས་གླུ། ཡང་རྗེ་བཙུན་མར་པའི་རྣམ་ཐར་གསོལ་འདེབས་བདེ་ཆེན་སྙིང་པོ། མི་ལ་བཞད་པ་རྡོ་རྗེའི་རྣམ་ཐར་གསོལ་འདེབས་ངོ་མཚར་སྙིང་པོ། །མཉམ་མེད་སྒོམ་
པོ་པའི་རྣམ་ཐར་གསོལ་འདེབས་ཡེ་ཤེས་སྙིང་པོ་གསུམ་བླ་མ་བཀྲ་ཤིས་ཞུས་ངོར་གནང་བ། ཇོ་ནང་རྗེ་བཙུན་རིན་པོ་ཆེའི་སྐྱེ་ཕྲེང་གསོལ་འདེབས་འཇིག་རྟེན་དབང་ཕྱུག་མ། ཇོ་ནང་ཆོས་སྤྱོད་ཀྱི་ཁ་སྐོང་ཀུན་མཁྱེན་ཆེན་པོའི་གསོལ་འདེབས་ནང་གསེས་སུ། ཕྱོགས་བཅུ་དུས་གསུམ་སོགས། ཀུན་མཁྱེན་ཤེས་རབ་སོགས། ངན་འགྲོའི་སེམས་ཅན་སོགས། ཆོས་སྐུའི་ཞིང་དུ་སོགས། རིག་འཛིན་མི་འགྱུར་རྡོ་རྗེ་ཡབ་སྲས་གསུམ་ལ་གསོལ་བ་འདེབས་པ་སྒྱུ་འཕྲུལ་དྲྭ་བའི་རོལ་མོ་ཤློ་ཀ་རེ་རེ་དང་མཇུག་ཏུ་གསེར་པ་ཨོ་རྒྱན་ལྷུན་གྲུབ་ལ་གནང་བའི་ལྷ་རྩེ་ཡེ་ཤེས་རྒྱལ་མཚན་གསོལ་འདེབས་ཤློོ་ཀ་གཅིག །རྩེ་ལེ་པདྨ་ལེགས་གྲུབ་གསོལ་འདེབས། སྙིང་པོ་གྲུབ་པ། གཏེར་ཆེན་འགྱུར་མེད་རྡོ་རྗེའི་སྐྱེས་རབས་གསོལ་འདེབས། ཏཱའི་སི་ཏུ་པདྨ་དབང་ཆེན་གྱི་གསོལ་འདེབས་མོས་གུས་ཀྱི་ཆུ་སྐྱེས། ཡང་དེའི་གསོལ་འདེབས་རྒྱལ་བ་ཀུན་གྱི། ཀཾ་ཚང་ཆོས་སྤྱོད་ཁ་སྐོང་རྒྱལ་དབང་བཅུ་བཞི་པའི་རྣམ་ཐར་གསོལ་འདེབས། འབེ་ལོ་ཚེ་དབང་ཀུན་ཁྱབ་གསོལ་འདེབས་ཀུན་མཁྱེན་བྱམས་མགོན་མ། རིགས་གསུམ་མགོན་པོའི་གསོལ་འདེབས། རྡོར་སློབ་ཀརྨ་བསྟན་འཛིན་གསོལ་འདེབས་སྤྱན་རས་གཟིགས་དངོས། རྗེ་རང་ཉིད་ཀྱི་གསོལ་འདེབས་ཡོན་ཏན་རྒྱ་མཚོ། བྱང་ཆུབ་སེམས་དཔའ་དང་། མཁའ་ཁྱབ་གཉུག་མ་བཅས་སྒྲོལ་མའི་གསོལ་འདེབས་འཇམ་དཔལ་བསྟན་དར་ངོར་མཛད་པ། སྐྱེས་ཆེན་ཡོངས་འཛིན་མ་
ཚོགས་གཉིས་རྡོ་རྗེའི་ངོར་མཛད་པ། ངོ་བོ་སྤྲོས་བྲལ། རྣམ་སྣང་རྡོར་སེམས། རང་བྱུང་ཡེ་ཤེས། སངས་རྒྱས་ཀུན་འདུས་བཅས་ཀྱི་ཚིག་མགོ་ཅན་ལེ་ཚན། ཞབས་བརྟན་མཁའ་ཁྱབ་མ། གསེར་ཐལ་ལྷ་རྩེ་བླ་མར་གནང་བ་ན་མོ་གུ་རུ་བྷྱཿརྒྱལ་ཀུན་སྐུ་ཡི་སོགས། མཁྱེན་བརྩེ། མཁན་པད་རྡོར། རྗེ་རང་ཉིད་བཅས་ཀྱི་གསོལ་འདེབས་ཤློོ་ཀ་རེ་མཇུག་སྨོན་བཅས། དགེ་བཤེས་བསྟན་འཛིན་བཟང་པོར་སྩལ་བའི་རྗེ་ཉིད་ཀྱི་གསོལ་འདེབས་ཀ་དག་ལྟ་བ། གསང་འདུས་མི་བསྐྱོད་པ་འགོས་ལུགས་ཀྱི་བརྒྱུད་པའི་གསོལ་འདེབས། ཤངས་པའི་ངོ་མཚར་རིན་ཆེན་བརྒྱུད་པའི་རྣམ་ཐར་གསོལ་འདེབས་རྡོ་རྗེ་འཆང་ནས་མཉྫུ་གྷོཥ་ཡན་འཇུག་སྨོན་ལམ་བཅས། སྨོན་རྒྱལ་པད་སྤྲུལ། གྲུབ་དབང་གཡུ་དྲུང་ཕུན་ཚོགས། བོན་གཏེར་ཚེ་དབང་གྲགས་པ་བཅས་ཀྱི་གསོལ་འདེབས། རྟོགས་ལྡན་ཀརྨ་བདེ་གསལ། མཁན་ཆེན་ཟླ་བཟང་། ཀརྨ་འོད་གསལ་འགྱུར་མེད། རྫོགས་ཆེན་དཔལ་སྤྲུལ། གཏེར་ཆེན་མཆོག་གླིང་རྣམས་ཀྱི་གསོལ་འདེབས། འཇམ་དབྱངས་མཁྱེན་བརྩེའི་ཞབས་བརྟན་རྡོ་རྗེ་འཆང་ཆེན་གསོལ་འདེབས་སུ་ཞབས་བསྒྱུར་བ། དེའི་འཁྲུངས་རབས་རགས་བསྡུས་ཀྱི་གསོལ་འདེབས། རྟོགས་ལྡན་ཚོགས་གཉིས། ཛཾ་ཐང་དགེ་སློང་ངག་དབང་ཆོས་འཕེལ། ཀརྨ་བཀྲ་ཤིས་འོད་ཟེར་རྣམས་སོ་སོའི་གསོལ་འདེབས། གཏེར་ཆེན་
མཆོག་གླིང་རྣམ་ཐར་གསོལ་འདེབས་བཀྲ་ཤིས་འཁྱིལ་བའི་སྒྲ་དབྱངས། རྗེ་རང་ཉིད་ལ་གཞན་བསྐུལ་ངོར་གསུངས་པའི་གསོལ་འདེབས་ལེ་ཚན་རིགས། རྩ་གསུམ་སྤྱི་བསྡུས་རིགས་ལ། རྟག་བརྟན་རྡོ་རྗེ། རྫོགས་ཆེན་བླ་བརྒྱུད་སྤྱིའི་གསོལ་སྨོན། སྒྲུབ་སྡེ་བཀའ་བརྒྱད་འདུས་པའི་ལྷ་དང་རིག་འཛིན་རྣམས་ལ་གསོལ་འདེབས་དཔལ་ཆེན་དགྱེས་གླུ། འཇམ་དཔལ་སྐུའི་ལྷ་ཚོགས་ཀྱི་དཀྱིལ་འཁོར་དང་བཀའ་བབས་རྣམས་ལ་གསོལ་འདེབས། གནམ་ཆོས་འོད་ཆོག་བརྒྱུད་འདེབས་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སོགས། གཞན་སྟོང་དབུ་མའི་བརྒྱུད་འདེབས་ཁ་སྐོང་འཕྲོ་མཐུད། གསོལ་འདེབས་ཆོས་སྐུའི་ཞིང་དུ་སོགས། བསྟན་པ་སྤྱིའི་གསོལ་འདེབས། ཙཱ་རིའི་གསོལ་འདེབས་མཁའ་ཁྱབ་མ། བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་གསོལ་འདེབས། ཙཱ་འདྲ་རིན་ཆེན་བྲག་གི་གསོལ་འདེབས་རྒྱས་བསྡུས་གཉིས། རྫོང་ཆེན་ཁམ་ཕུག་གསོལ་འདེབས། ཨ་ལོའི་དཔལ་དེའུ། གསས་མཁར་གཉིས་པ་གཡུང་དྲུང་བཀོད་པའི་གསོལ་འདེབས་བཅས། མྱུར་འབྱོན་སྐོར་ལ། པདྨ་ཉིན་བྱེད། དབོན་སྤྲུལ་གསུམ་པ་བསྟན་འཛིན་ཕྲིན་ལས། མཆོག་གྱུར་གླིང་པ། དེའི་ཞབས་བརྟན། དེ་ཉིད་ཀྱི་ཐུགས་དམ་བསྐུལ་བའི་གསོལ་འདེབས་སྨོན་ཚིག་དང་འབྲེལ་བ་རིགས་ལྡན་ཌཱ་ཀི་མ་ཧཱ་སུ་ཁ་དྷརྨ་དཱི་བེའི་ཞུས་ངོར་གནང་བ། འཇམ་
དབྱངས་མཁྱེན་བརྩེ། དབོན་ངག་དབང་། ཛཾ་ཐང་ཆོས་རྗེ། རྫོགས་ཆེན་སླིང་སྤྲུལ། འཇང་ལྷུན་གྲུབ་སྤྲུལ་སྐུ། མཁན་ཆེན་ཟླ་བཟང་། བྲག་གཡབ་སྐྱབས་མགོན། མཁར་མགོ་བླ་མ། སྒྲུབ་དཀར་སྤྲུལ་སྐུ། ཀཿཐོག་རྨོག་ཚ། མདོ་སྔགས་མཆོག་སྤྲུལ། དཔལ་ཡུལ་རྒྱ་སྤྲུལ། ཟུར་མང་གར་དབང་། ཚེར་ལུང་དྲུང་སྤྲུལ། རྣམ་གླིང་དགོན་གསར་སྤྲུལ་སྐུ་བཅས་ཀྱི་མྱུར་འབྱོན། ཞབས་བརྟན་སྐོར་ལ། བཀའ་དྲིན་ཆེ་བའི་བླ་མ་མཆོག་རྣམས་ཀྱི་ཞབས་བརྟན་བདུད་རྩིའི་ཕྲེང་བ། རིས་མེད་བསྟན་འཛིན་རྣམས་ཀྱི་ཞབས་བརྟན་རྡོ་རྗེའི་ཕྲེང་བ། རྡོ་རྗེ་འཆང་པདྨ་ཉིན་བྱེད་དབང་པོའི་ཞབས་ཀྱི་པདྨ་བསྐལ་བརྒྱར་བརྟན་པའི་གསོལ་འདེབས་སྙན་ཚིག་དང་བརྒྱའི་ཨུཏྤལ་ལེགས་སྦྱར་ངག་གི་བདུད་རྩི། གཞན་ཡང་། སྲིད་ཞི་ཀུན་ཁྱབ། སྤྲོས་མཐའ་ཀུན་བྲལ། གཞི་རྒྱུད་སྐད་ཅིག །སྐད་ཅིག་བསྐལ་པ་བཅས་ཀྱི་དབུ་ཅན། ཀརྨ་པ་བཅུ་བཞི་པའི་ཞབས་བརྟན་གསོལ་འདེབས་ཡ་ཐཱ་སིདྡྷ། རྒྱལ་དབང་བཅུ་གཅིག་པ་དང་ཀུན་གཟིགས་འབྲུག་པ་རིན་པོ་ཆེར་ཞབས་བརྟན་དུ་གསོལ་བ་སྐད་གཉིས་ཤན་སྦྱར། མཆོག་སྤྲུལ་རིན་པོ་ཆེ་ཀརྨ་ངེས་དོན་བསྟན་འཕེལ་གྱི་ཞབས་བསྟན་གསོལ་འདེབས་འཆི་མེད་གྲུབ་པའི་རོལ་མོ། །ཀུན་གཟིགས་འཇམ་པའི་རྡོ་རྗེའི་ཞབས་བརྟན་གསོལ་འདེབས། ཀརྨ་པ་མཁའ་ཁྱབ་རྡོ་རྗེའི་ཞབས་བརྟན་རྒྱས་བསྡུས། སི་ཏུ་མཆོག་སྤྲུལ་ཞབས་
བརྟན་དཔལ་ལྡན་རིགས་བརྒྱའི་ཁྱབ་བདག །ཀརྨ་ངེས་དོན་བསྟན་འཕེལ། དབོན་སྤྲུལ་བསྟན་འཛིན་ཕྲིན་ལས། མཚུར་ཕུའི་རྗེ་དབོན། རྣམ་གཉིས། ཀུན་མཁྱེན་འཇམ་དབྱངས་མཁྱེན་བརྩེའི་ཞབས་བརྟན་ཚེ་འོད་དཔག་མེད་དང་། གཙང་རྟག་དམ་པའི་སྐུ། ཡང་། ཤྲཱི་ཤྲཱི་ཤྲཱི། རྡོ་རྗེ་འཆང་ཆེན་སོགས་ཚན་གཉིས། གཏེར་ཆེན་མཆོག་གླིང་ཞབས་བརྟན་རྒྱལ་ཀུན་གསུང་རྡོར་མ་དང་། དགེ་ལེགས་ཕུན་ཚོགས་མ། མཁན་ཆེན་ཟླ་བཟང་། དྲུང་རཏྣ་ཐཱིའི་སྤྲུལ་སྐུ། །ལྕགས་ལ་མཁན་པོ། །དཔལ་སྤྲུལ་རིན་པོ་ཆེ་ཨོ་རྒྱན་འཇིགས་མེད་ཆོས་ཀྱི་དབང་པོ། །གཙང་པ་ཆེན། བྲག་གཡབ་སྐྱབས་མགོན། ཚེ་དབང་གྲགས་པ། དཔལ་ཡུལ་ཀརྨ་འགྱུར་མེད་ཡང་སྤྲུལ། ཟླ་བཟང་ཡང་སྲིད། འཇང་དཔལ་གསལ་སྤྲུལ་སྐུ། རྡོ་བྲག་སྤྲུལ་སྐུ། ལྷུན་རབ་ཡང་སྲིད། ཀརྨ་བསྟན་འཕེལ་སྤྲུལ་སྐུ། ཨ་གྲོ་སྤྲུལ་སྐུ། ཚབ་ཚ་གདུགས་དཀར་སྤྲུལ་སྐུ། དཔལ་ཁྱིམ་སྔགས་སྤྲུལ། ཞེ་ཆེན་དབོན་སྤྲུལ། མཁར་མགོ་རབ་མཛེས་སྤྲུལ་སྐུ། བསྟན་གཉིའི་ཡང་སྲིད། སྡེ་དགེ་ས་སྐྱོང་བཅས་ཀྱི་ཞབས་བརྟན་རྣམས་སོ། །གསུང་སྐོར་ལ་གང་མཆིས་འདིར་བཀོད་མོད། ཞབས་བརྟན་སྐོར་དང་མྱུར་འབྱོན་སྣ་ཚོགས་མཁོ་གལ་མེད་པ་ཕལ་ཆེར་བཀའ་ལྟར་སྤར་དུ་འཁོད་མེད་པའང་ཤེས་པར་བྱའོ། ༈། ། པ་ལ། བཞི་པ་སྔ་ཕྱིའི་འགྱུར་གཉིས་ལས་
བྱུང་བའི་ལྷག་པའི་ལྷ་རབ་འབྱམས་ཀྱི་སྒྲུབས་ཐབས་དང་ཟིན་བྲིས་ཀྱི་སྐོར་དངོས་གྲུབ་རྒྱ་མཚོ་མཐའ་ཡས་པའི་མཛོད་ལ། རྙིང་མའི་སྐོར་དང་གསར་མའི་སྐོར་གཉིས་ལས། དང་པོ་རྙིང་མ་ལ་བཀའ་གཏེར་གཉིས་ཀྱི་དང་པོ་བཀའ་མ་ལས། སོ་ལུགས་ཡང་དག་ཟླ་གམ་དགུ་པའི་སྒྲུབ་ཁོག་བདེ་ཆེན་རོལ་མཚོ། དེའི་བསྙེན་ཡིག་བདེ་ཆེན་དོན་གསལ། མཁོན་ལུགས་ཡང་དག་ཟླ་གམ་དགུ་མའི་སྒྲུབ་ཐབས་ཁྲག་འཐུང་མངོན་པར་རོལ་པ། དེའི་དབང་ཆོག་ཁྲག་འཐུང་མངོན་འབྱུང་། ཟླ་གམ་གཅིག་མའི་བསྙེན་པ་དང་རྒྱུན་གྱི་རྣལ་འབྱོར་ཐུགས་ཀྱི་ཐིག་ལེ། མཁོན་ལུགས་ཟླ་གམ་དགུ་པའི་ཞི་བའི་སྦྱིན་སྲེག་ཉེས་པ་ཀུན་སྦྱོང་། མཁོན་ལུགས་རྡོ་རྗེ་ཕུར་་ཇོ་ནང་ནས་བརྒྱུད་པ་བདུད་འཇོམས་རོལ་པའི་རྒྱུད་གཞུང་གསལ་བྱེད་ཀྱི་ཡན་ལག་དང་བཅས་རིག་མཆོག་འབུམ་སྡེའི་དགོངས་པ་འདུས་པ་སྔ་ན་མེད་པའི་ངོ་མཚར་གསང་བ་ཆེན་པོས་ཁྱད་པར་དུ་བྱས་པའི་གླེགས་བམ་དེ་ཉིད་ཀྱི་དཀར་ཆག་བརྒྱུད་ཡིག་ལྟར་ཚང་བར་བཞུགས་སོ། ༈། ག། པ་ལ། རྣམ་འཇོམས་ཁྲོ་དཀར་གྱི་གཟུངས་མཆོག་དབང་བསྐུར་དང་བཅས་དག་བྱད་ཤེལ་གྱི་བུམ་བང་། ཁྲོ་ནག་ལྷ་བཅོ་ལྔ་པའི་སྒྲུབ་ཐབས་གཟུངས་ཆོག་དང་བཅས་པ་སྦྱོང་བྱེད་རྡོ་རྗེའི་བུམ་པ། དེའི་དབང་བསྐུར་བའི་ཆོ་ག་སྨིན་ཡེ་ཤེས་བུམ་པ་བཅས། གཉིས་པ་གཏེར་མའི་སྐོར་ལ། རཏ་གླིང་ཐུགས་རྗེ་ཆེན་པོ་གསང་བ་འདུས་
འི་སྐྱེ་བདུན་མྱང་གྲོལ་དང་འབྲེལ་བའི་སྒྲུབ་ཆེན་གྱི་ཁོག་དབུབ་ལག་ལེན་གཞན་ཕན་གཏེར་མཛོད། དེའི་སྒྲུབ་ཆེན་དཀྱུས་མ་དང་བུམ་སྒྲུབ་གཉིས་ཀའི་ཐུན་བཟུ་འཛབ་དགོངས་ཀྱི་རིམ་པ། སྐྱེ་བདུན་སྒྲུབ་པའི་དམིགས་པ་རྒྱ་ཅན་གྱི་སྔགས་ཤམ་གུད་སྤས། གསང་འདུས་ལས་བཞིའི་སྦྱིན་སྲེག་གི་ཆོག་དངོས་གྲུབ་དཔལ་འབར། དེའི་རིགས་དྲུག་གནས་འདྲེན་གྱི་ཆོ་ག་ཐར་པའི་སྒོ་འབྱེད། རྟགས་ཅན་འདི་དག་ཐུགས་གསང་འདོན་ཆའི་སྐོར་ལ་ས་དུ་ཡོད། དེའི་རྒྱུན་གྱི་རྣལ་འབྱོར་གྱི་དབང་ཆོག་དངོས་གྲུབ་ཆར་རྒྱུན། དེའི་དབང་བཤད། ནོར་བསྙགས་དང་མཁའ་རི་གཉིས་ཀྱི་གཏོར་ཆོག །ཚེ་སྒྲུབ་གསང་བ་འདུས་པའི་ནང་སྒྲུབ་ལྷན་ཐབས། དེའི་ལས་བྱང་གི་ཟུར་འདེབས་བཅས་དེར་སྤར་ཟུར་དུ་ཡོད། སྒྲུབ་ཆེན་བཀའ་བརྒྱད་བདེ་གཤེགས་འདུས་འི་སྒྲུབ་དབང་ཆེན་མོའི་ལག་ལེན་གསལ་བར་བྱེད་པའི་ཡི་གེ་བདེ་ཆེན་སྣང་བྱེད། དེའི་བསྙེན་པའི་ཡི་གེ་ཏིལ་མར་སྒྲོན་མེ། རྩ་གསུམ་སྙིང་བཅུད་བླ་མ་དགོངས་པ་འདུས་པའི་དབང་བསྐུར་གྱི་ལག་ལེན་དངོས་གྲུབ་རྒྱ་མཚོའི་ཆུ་རྒྱུན། དེའི་དཔའ་བོ་རྐྱང་སྒྲུབ་དང་གསལ་བྱེད་ཐུགས་ཀྱི་ནོར་བུའི་བསྙེན་སྒྲུབ་ཀྱི་ཡི་གེ་བདུད་རྩི་སྟོང་གི་ཟབ་བཅུད། དེའི་དབང་ཆེན་སོགས་ལ་ཉེ་བར་མཁོ་བའི་ལྷན་ཐབས་ཞི་བའི་སྲེག་བླུག་བསྡུས་པ་ཟླ་བའི་སྣང་བ། དེའི་སྒྲིབ་སྦྱོང་ཡེ་ཤེས་འོད་འཕྲོའི་ལག་ལེན་གསལ་བྱེད་འཁྲུལ་མེད་
གནད་ཀྱི་གཟེར་བུ། དེའི་སྐོང་ཆོག་ཆེན་མོའི་ཟིན་བྲིས་གྲུབ་པའི་ངག་གི་མེ་ལོང་། དེའི་སྒྲུབ་པའི་པྲ་ཁྲིད་ཆེན་མོའི་ལག་ལེན་གསལ་བྱེད། དེའི་སྒོ་ནས་བདུད་རྩི་སྨན་གྱི་སྒྲུབ་བའི་ལག་ལེན་གསལ་བྱེད་བཅས། རྟགས་ཅན་རྣམས་དགོངས་འདུས་འདོན་ཆའི་སྤར་ཟུར་དུ་མཆིས་པའི་གྲ་ལན་བཞུགས། རཏྣ་གླིང་པའི་ཕུར་པའི་སྐོར་ལ། སྒོམ་ཁོག་ཡེ་ཤེས་སྤྱན་འབྱེད། བསྙེན་ཡིག་རྡོ་རྗེ་ཕུར་པ་བཀའ་གཏེར་སྤྱི་ཁྱབ་བརྒྱུད་པར་བཅས་པ་ལ་གསོལ་བ་འདེབས་པ་བདུད་འཇོམས་རྡོ་རྗེའི་གླུ་དབྱངས། ཕུར་པ་ཡང་གསང་བླ་མེད་ཀྱི་སྟོད་ལས་ཀྱི་སྒྲུབ་ཁོག་ཕྲིན་ལས་མངོན་པར་འབྱུང་བ། སྨད་ལས་དུག་ཕུར་ནག་པོའི་སྒྲུབ་ཁོག་གཅིག་ཤུར་ལས་ཀྱི་སྤུ་གྲི། གདབ་ཁའི་འདོན་འགྲིགས་འཁྲུལ་བྲལ་རྡོ་རྗེའི་ཐོག་ཟེར། ཕན་འདོགས་མེའི་སྦྱོར་བ་བྱ་གྲུབ་འབར་བ་འཁྱིལ་བ། ཚར་བཅོད་མེའི་ལས་སྦྱོར་བལྟས་ཆོག་ཏུ་བཀོད་པ་གདུག་པ་ཀུན་བསྲེག །ལས་བྱང་ལ་ཉེ་བར་མཁོ་བའི་ཟུར་འདེབས་ཕྱོགས་གཅིག་ཏུ་བསྒྲིགས་པ་ཨིནྡྲ་ནཱི་ལའི་དོ་ཤལ་བཅས་རཏ་ཕུར་གྱི་ཕྱོགས་སུ་སྔོན་ཆད་མ་བྱོན་པའི་རྒྱུད་ལུང་མན་ངག་གི་དགོངས་བཅུད་སྙིང་པོར་ཕྱུང་བའི་ལེགས་བཤད་རྣམས་ལས་རྟགས་ཅན་རིགས་རཏ་ཕུར་འདོན་ཆ་ཚད་མའི་སླར་ཟུར་དུ་བཞུགས་པར་མཆིས། རྒྱལ་དབྱངས་བདུད་ལས་རྣམ་པར་རྒྱལ་བའི་བཞད་སྒྲ། ཕུར་བ་ཡང་གསང་བླ་མེད་ཀྱི་དྲག་པོའི་སྦྱིན་སྲེག་ལག་ལེན། རཏ་གླིང་
རྟ་མགྲིན་གསང་འདུས་ལ་གསང་བདག་རྡོ་རྗེ་གཏུམ་པོའི་གསང་སྒྲུབ་མེའི་འཁོར་ལོའི་རྒྱུན་ཁྱེར་གནམ་ལྕགས་ཚ་ཚ། རཏ་གླིང་ཐུགས་སྒྲུབ་ཡང་འདུས་སྒྲུབ་ཁོག་རྙེད་ན་འདིར་འཛུད། ཞི་ཁྲོ་དགོངས་པ་རང་གྲོལ་གྱི་བླ་བརྒྱུད་ཕྱག་འཚལ་ཉེས་ལྟུང་རང་གྲོལ། བརྒྱུད་པའི་དོན་སྐོང་འབྲེལ་ཚད་རང་གྲོལ། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ཚེ་འདས་གནས་འདྲེན་འགྲོ་དྲུག་རང་གྲོལ་བཀླག་ཆོག་ཏུ་བསྡེབས་པ་ཡིད་གཉིས་རང་གྲོལ། ཡང་གནས་འདྲེན་བསྡུས་པ་ཐུགས་རྗེའི་ལྕགས་ཀྱུ་ཁྱེར་བདེར་བཀོད་པ། པད་གླིང་ནོར་རྒྱམ་ཟིན་བྲིས་རིན་ཆེན་སྒྲོན་མེ། སྐྱེར་སྒང་པའི་རྟ་མགྲིན་གསང་སྒྲུབ་ཀྱི་ལས་བྱང་དྲེགས་འདུལ་གྱི་ཟུར་འདེབས་པདྨ་རཱ་གའི་ཕྲེང་བ། འདི་ཡང་སྤར་ཟུར་དུ་ཡོད། འཇའ་ཚོན་སྐོར་ལ། རྫོགས་ཆེན་དཀོན་སྤྱིའི་རིག་འཛིན་བརྒྱུད་འདེབས་བྱིན་རླབས་ལྕགས་ཀྱུ། ཡང་ཟབ་དཀོན་མཆོག་སྤྱི་འདུས་དང་ཞི་ཁྲོ་ངེས་དོན་སྙིང་པོའི་ཕྱག་ལེན་ཆོག་བསྒྲིགས་བཀླག་ཆོག་ཏུ་བཀོད་པ་འཇའ་ཚོན་དགོངས་རྒྱན། དཀོན་སྤྱིའི་བསྙན་ཡིག་བཀླག་ཆོག་ཏུ་བཀོད་པ་པདྨའི་ཞལ་ལུང་། རྫོགས་རིམ་ཁྲིད་ཡིག་ཁམས་གསུམ་ཡོངས་གྲོལ། ལས་བཞིའི་སྦྱིན་སྲེག་བཀླག་ཆོག་ཏུ་བཀོད་པ་ཕྲིན་ལས་འོད་ཟེར་ཏེ། རྟགས་ཅན་འདི་དག་ཀྱང་སྤར་ལོགས་སུ་མཆིས། ཐུགས་རྗེ་ཆེན་པོ་ངན་སོང་རང་གྲོལ་གྱི་བརྒྱུད་འདེབས་ཐུགས་རྗེའི་ཆུ་རྒྱུན། དེའི་ནང་སྒྲུབ་རྒྱུན་ཁྱེར་བྱིན་
རླབས་རྒྱ་མཚོ། ཚེ་དཔག་མེད་གནམ་ལྕགས་རྡོ་རྗེ་དངོས་གྲུབ་ཀུན་འདུས་ཀྱི་སྐོང་བ་འཆི་མེད་འདོད་འཇོའི་རྔ་སྒྲ། ཟབ་ཆོས་རྟ་ཕག་ཡིད་བཞིན་ནོར་བུའི་བརྒྱུད་པའི་གསོལ་འདེབས་ཟུང་འཇུག་རོལ་མོ་བཅས། དགོངས་གཏེར་བསམ་པ་ལྷུན་གྲུབ་བརྒྱུད་འདེབས་དངོས་གྲུབ་ཆར་འབེབས། སྟག་ཤམ་ཡི་དམ་དགོངས་འདུས། སྤྱི་སྡོམ་སྤྲོས་བཅས་དབང་ཆེན་སྨིན་གྲོལ་རྒྱ་མཚོ། དབང་རྐྱང་ལུགས་སུ་བསྐུར་བའི་ཟིན་ཐོ། །ཡེ་ཤེས་མཁའ་འགྲོ་བདུད་འདུལ་དྲག་མོའི་བསྙེན་སྒྲུབ་ཀྱི་ཡི་གེ་མདོར་བསྡུས་གནམ་ལྕགས་ལྡེའུ་མིག །ཆོས་གླིང་ཟབ་ལམ་ཐུགས་ནོར་རྩ་བའི་སྒྲུབ་ཆེན་དང་སྨན་སྒྲུབ་གཉིས་ཀྱི་སྒྲུབ་ཁོག་ཟུང་འབྲེལ་དུ་བཀོད་པ་གྲུབ་གཉིས་བདུད་རྩིའི་ཟ་མ་ཏོག །ཟབ་ལམ་ཐུགས་ནོར་ལས་བཞི་མཆོག་ལྔའི་སྦྱིན་སྲེག་གི་ལག་ལེན་འདུས་གསལ་དུ་བཀོད་པ་ནོར་བུ་སྣ་ཚོགས་མདོག་ཅན། ཡོན་དགེ་མི་འགྱུར་རྡོ་རྗེའི་ཟབ་གཏེར་གྲོ་ལོད་དབང་ཆོག་བཅས་བཞུགས། ༈། གླེགས་བམ། ང་། པ་ལ། མཆོག་གླིང་གཏེར་གསར་རྩ་བའི་ཐུགས་སྒྲུབ་དགོངས་པ་ཀུན་འདུས་ཀྱི་དབང་བསྐུར་གྲུབ་གཉིས་བདུད་རྩིའི་བཅུད་འབེབས། ཐུགས་སྒྲུབ་བར་ཆད་ཀུན་སེལ་གྱི་རྩ་བའི་དབང་གི་ཆོག་ཁྲིགས་བཀླགས་ཆོག་ཏུ་བཀོད་པ་མུ་ཏིག་ཆུན་པོ། །བར་ཆད་ཀུན་སེལ་གྱི་རྒྱུན་གྱི་གཏོར་འབུལ་མོས་ལྡན་དགའ་བྱེད། ཐུགས་སྒྲུབ་བར་ཆད་ཀུན་སེལ་གྱི་ཁྱད་
པར་གྱི་སྲུང་མདང་ནོར་བདག་གཏོར་འབུལ་རྒྱུན་ཁྱེར། ཀུན་འཁྱིལ་མཆེད་གསུམ་གཏོར་འབུལ། གཏེར་གསར་སྒྲོལ་མ་འཇིགས་པ་ཀུན་སེལ་ལས་སའི་འཇིགས་སྐྱོབ་སྒོམ་བཟླས། མེའི་འཇིགས་སྐྱོབ་སྒོམ་བཟླས། ཐུགས་སྒྲུབ་བར་ཆད་ཀུན་སེལ་ཆ་ལག་སྨེ་བ་བརྩེགས་པའི་སྒྲུབ་ཐབས་ཁྱེར་བདེ། རྡོར་སེམས་ཐུགས་ཀྱི་ཐིག་ལེ་ལས་བདུད་རྩི་སྨན་གྱི་བྱིན་འབེབས་དངོས་གྲུབ་ཆུ་འཛིན་སྨན་སྒྲུབ་སྤྱི་ལ་སྦྱར་ཆོག་པ། རྡོ་རྗེ་སེམས་དཔའི་སྒོམ་བཟླས་རྒྱུད་སྡེ་བཞི་སྦྲགས་བཅས། མདོ་ཆོག་སྐོར་དང་གསར་མའི་ཕྱོགས་ཀྱི་ཆོག་སྒྲུབས་ཐབས་དབང་ཆོ་ག་སོགས་ཀྱི་སྐོར་ལ། འཕགས་མ་སྒྲོལ་མ་བཀྲ་ཤིས་དོན་གྲུབ་མའི་སྒྲུབ་ཐབས་བཀྲ་ཤིས་ཆར་འབེབས། སྒྲོལ་མ་རྣལ་འབྱོར་མའི་རྒྱུན་ཁྱེར་དམ་ཚིག་ངེས་པའི་ཐིག་ལེ། དཔལ་དུས་ཀྱི་འཁོར་ལོའི་སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་དུ་བྱིས་པ་འཇུག་པའི་དབང་བསྐུར་བཀླག་ཆོག་ཏུ་བཀོད་པ་ཡེ་ཤེས་རྒྱ་མཚོའི་བཅུད་འདྲེན། བཅོམ་ལྡན་འདས་མ་སྒྲོལ་མ་རྣལ་འབྱོར་མའི་རྩ་བའི་དབང་བསྐུར་གྱི་ཆོ་ག་བཀླག་ཆོག་ཏུ་བཀོད་པ་ཨུཏྤལ་ལྗོན་ཤིང་། དེའི་རིག་པ་གཏད་པའི་ཆོ་ག་ཡེ་ཤེས་སྒོ་འབྱེད། དེའི་མཆོད་ཆོག་མདོར་བསྡུས་བདེ་ཆེན་རོལ་མོ། །སྒྲོལ་མ་འཇིགས་པ་བརྒྱད་སྐྱོབ་ཀྱི་སྒོམ་བཟླས་རྡོ་རྗེའི་ཡ་ལད། བཅོམ་ལྡན་འདས་འོད་དཔག་མེད་འཁོར་དང་བཅས་པ་མཆོད་ཅིང་གསོལ་བ་གདབ་པའི་ཆོ་ག་ཐར་
པའི་ཤིང་རྟ། འོད་དཔག་མེད་ཀྱི་ཆོ་ག་གཤིན་པོ་རྗེས་འཛིན་དང་བཅས་པ་བདེ་ཆེན་གྲོང་དུ་བགྲོད་པའི་ཤིང་རྟ། རྗེ་བཙུན་འཕགས་པ་འཇམ་དཔལ་དབྱངས་དཀར་པོའི་སྒོམ་བཟླས་སྙིང་གི་མུན་སེལ། རྗེ་བཙུན་སྨྲ་བའི་སེངྒེའི་སྒོམ་བཟླས། འཇམ་དཔལ་ཆོས་དབྱིངས་གསུང་དབང་ནམ་མཁའ་དྲི་མེད་ཀྱི་བསྙེན་པའི་ཆོ་ག་བསྡུས་པ་ཟབ་མོའི་ཡེ་ཤེས་ལ་འཇུག་པ་འཇམ་དབྱངས་བླ་མེད་ལུགས་ཀྱི་བླ་མའི་རྣལ་འབྱོར། དེའི་བརྒྱུད་འདེབས་སྨོན་ལམ་དང་བཅས་པ་བྱིན་རླབས་བདུད་རྩིའི་སྣང་གཏེར་མཉྫུ་གྷོ་ཥས་མཛད་པ། བཅོམ་ལྡན་འདས་དེ་བཞིན་གཤེགས་པ་རྫོགས་པའི་སངས་རྒྱས་དཔའ་བོ་བདུན་སྒྲུབ་ཅིང་མཆོད་པའི་ཆོ་ག་ཚོགས་གཉིས་བདུད་རྩིའི་ཆུ་གཏེར་རྒྱས་པ། ཐར་པ་ཆེན་པོ་ཕྱོགས་སུ་རྒྱས་པའི་ཆོག་མན་ངག་ལྟར་བཀོད་པ་ཉེས་པའི་གདུང་སེལ། མདོ་ཆོག་རྣམས་ལ་སྦྱར་བར་བྱ་བའི་གཤིན་པོ་རྗེས་འཛིན་ཐར་ལམ་སྣང་བྱེད། སྟོན་པ་ཉེ་བའི་སྲས་བརྒྱད་འཁོར་དང་བཅས་པ་དཀྱིལ་འཁོར་གཅིག་ཏུ་མཆོད་ཅིང་བསགས་སྦྱང་བྱ་བའི་ཆོ་ག་རྒྱལ་སྲས་དགྱེས་པའི་ལམ་འཇུག །དེའི་ཡན་ལག་ཏུ་ཐུབ་དབང་ཉེ་སྲས་བརྒྱད་ཀྱི་མཚན་བརྒྱད་བཀའ་འགྱུར་ནས་ཕྱུངས་པ། ཐུབ་དབང་དང་ཉེ་བའི་སྲས་བརྒྱད་ཀྱི་སྒོམ་བཟླས་ཀྱི་ལུང་འབོགས་ཚུལ་བྱང་ཆུབ་སྤྱོད་པའི་ཤིང་རྟ། ནམ་མཁའི་སྙིང་པོའི་བཤགས་ཆོག་གི་བརྒྱུད་འདེབས། ཨིནྡ་ནཱི་ལའི་ཕྲེང་། འཕགས་པ་ནམ་མཁའི་
སྙིང་པོའི་བཟླས་ལུང་སྒྲུབ་ཐབས་ལྟུང་བ་བཤགས་པའི་ཆོ་ག་དང་བཅས་པ་འཕགས་པའི་ལམ་གྱི་ཤིང་རྟ། སྟོན་པ་གནས་བརྟན་ཆེན་པོ་འཁོར་དང་བཅས་པ་ལ་མཆོད་ཅིང་གསོལ་བ་འདེབས་པའི་ཆོ་ག་སྙིང་པོར་དྲིལ་བ་འཕགས་པའི་ལམ་འཇུག །རྙིང་མ་བཀའ་མའི་ཁོངས་སུ་གཏོགས་པ་འཕགས་པ་འོད་ཟེར་དྲི་མེད་ཀྱི་རྒྱུན་གྱི་བཟླས་པ་བྱ་ཚུལ་འཆི་མེད་འབྱུང་བ། མཆོད་རྟེན་བརྒྱ་རྩ་བརྒྱད་གདབ་པའི་ཆོ་ག་མཁན་ཆེན་ཞི་འཚོས་མཛད་པ་ལས་ཉུང་ངུར་བསྡུས་པ་དྲི་མེད་ལམ་འཇུག །གཙུག་ཏོར་དྲི་མ་མེད་པའི་གཟུངས་དང་འབྲེལ་བར་སཱཙྪ་གདབ་པའི་ཆོ་གའི་ལག་ལེན་དྲི་མེད་ཀུན་སྣང་། འཕགས་པ་བཅུ་གཅིག་ཞལ་དཔལ་མོ་ལུགས་ཀྱི་སྒྲུབས་ཐབས་དང་འབྲེལ་བའི་སྨྱུང་བར་གནས་པའི་ཆོ་ག་གཞན་ཕན་ཀུན་ཁྱབ། འཕགས་པ་བཅུ་གཅིག་ཞལ་དཔལ་མོ་ལུགས་ཀྱི་རྗེས་གནང་དང་གསོ་སྦྱོང་ཡན་ལག་བརྒྱད་པའི་སྡོམ་པ་འབོག་ཆོག་གཞན་ཕན་རབ་འབྱམས། བཅུ་གཅིག་ཞལ་དཔལ་མོ་ལུགས་དང་འབྲེལ་བར་སྨྱུང་གནས་སབ་པའི་ལག་ལེན་གསེར་སྡོང་གཡུའི་ཕྲ་ཚོམ། ཡན་ལག་བརྒྱད་པའི་གསོ་སྦྱོང་སྨང་གནས་སྒྲུབ་ཐབས་དང་འབྲེལ་བའི་ཕན་ཡོན་མདོར་བསྡུས་སྐལ་ལྡན་ངལ་གསོ། །སྨན་བླའི་མདོ་ཆོག་གི་བཤམ་བཀོད་ཟིན་བྲིས། སྨན་བླའི་སྟོང་མཆོད་ལག་ལེན། བཅོམ་ལྡན་འདས་ཀུན་རིག་རྣམ་པར་སྣང་མཛད་ཀྱི་ཆོ་གའི་ཟིན་བྲིས། བཅོམ་ལྡན་འདས་མི་
འཁྲུགས་པའི་ཆོ་ག་མངོན་དགའི་ཞིང་གི་རྒྱན་མཛེས་བྱེད་ལྷན་ཐབས་ཨིནྡྲ་ནཱི་ལའི་ཆུན་འཕྱང་། ཚེ་དཔག་མེད་མཚན་བརྒྱ་རྩ་བརྒྱད་ཀྱི་གཟུངས་རིང་འདོན་པའི་གདམས་ངག་ཚིགས་བཅད་མ། །བཅོམ་ལྡན་འདས་དམ་ཚིག་རྡོ་རྗེའི་སྒོམ་བཟླས་མདོར་བསྡུས། བཅོམ་ལྡན་འདས་གདུགས་དཀར་མོའི་བསྐྱེད་བཟླས་རྒྱུན་ཁྱེར་རྡོ་རྗེ་འབར་བ། ལྷ་མོ་འོད་ཟེར་ཅན་གྱི་སྒོམ་བཟླས་རྣམས་བཞུགས་སོ། ། གླེགས་བམ། ཅ། པ་ལ། ལྔ་པ་མདོ་སྔགས་ཀྱི་དགོངས་བཅུད་སྙིང་པོར་དྲིལ་བའི་ཁྲིད་ཡིག་གི་སྐོར་ཟབ་དོན་རྒྱ་མཚོ་མཐའ་ཡས་པའི་མཛོད་ལ། ཕྱག་ཆེན་སྔོན་དངོས་ཀྱི་ཁྲིད་ཡིག་ངེས་དོན་སྒྲོན་མེ། རྫོགས་པ་ཆེན་པོ་བླ་མ་ཡང་ཏིག་གི་ཁྲིད་ཡིག་དྲི་མེད་ཞལ་ལུང་། དུས་འཁོར་འབྲོ་ལུགས་ི་བརྒྱུད་འདེབས་རྡོ་རྗེ་འབེབས་པ་ཆེན་མོ། སྦྱོར་དྲུག་སྟན་གཅིག་མའི་དམིགས་ཁྲིད་མདོར་བསྡུས་སྙིང་གི་ཐིག་ལེ། དུས་འཁོར་ལྷན་སྐྱེས་ཀྱི་རྒྱུན་ཁྱེར་དང་རྣལ་འབྱོར་ཡན་ལག་དྲུག་པ་སྟན་ཐོག་གཅིག་ཏུ་ཉམས་སུ་ལེན་པའི་དམིགས་སྡོམ་ལྷན་སྐྱེས་གྲུབ་སྟེར། རྒྱུད་སྡེ་ལྔ་གཙོ་བསྡུས་ལ་བརྟེན་པའི་དཀྱིལ་འཁོར་མཆོད་ཆོག་བདག་འཇུག་དང་བཅས་པ་སྨིན་གྲོལ་སྙིང་པོ། །དེའི་བསྙེན་ཡིག་ཟབ་དོན་སྙིང་པོ། །ནི་གུ་ཆོས་དྲུག་ཁྲིད་བསྡུས་སྟན་ཐོག་གཅིག་མའི་ཉམས་ལེན་ཡེ་ཤེས་ཌཱ་ཀིའི་ཞལ་ལུང་། ཤངས་པའི་གསེར་ཆོས་ཁྲིད་ཆེན་རྣམ་ལྔ་ལས།
མེ་ཏོག་མཁའ་སྤྱོད་དཀར་དམར་གྱི་ཉམས་ལེན་དབུ་མའི་མདུད་འགྲོལ། ལྷ་བཞི་དྲིལ་སྒྲུབ་ཀྱི་ཉམས་ལེན་ཡེ་ཤེས་རང་གསལ། དེའི་ཁྲིད་ཡིག་ཡེ་ཤེས་འོད་འཕྲོ། ཤངས་ལུགས་མཁའ་འགྲོ་སྡེ་ལྔའི་གཏོར་འབུལ། བཀའ་བབས་དྲུག་ལྡན་གྱི་བརྒྱུད་འདེབས་མུ་ཏིག་ཕྲེང་བ། ལྕགས་ཟམ་ལུགས་ཀྱི་ཡིག་དྲུག་ཉམས་ལེན་གཞུང་གསལ་བྱེད་དང་བཅས་པ་ཡིག་རྙིང་། དེའི་སྒོམ་བཟླས་ཀྱི་ངག་འདོན་མདོ་སྔགས་ཡང་བཅུད། གྲུབ་ཐོབ་ཆེན་པོ་དགེ་སློང་པདྨ་དཀར་པོའི་དུས་ཐུགས་རྗེ་ཆེན་པོར་གསོལ་བ་བཏབ་པའི་རྡོ་རྗེའི་གསུང་། ཡིག་དྲུག་བསྒོམ་ལུང་འབོགས་ཚུལ་གཞན་ཕན་མཁའ་ཁྱབ། བདེ་མཆོག་དཀར་པོའི་རྫོགས་རིམ་དང་ཚེ་ཁྲིད་བདུད་རྩིའི་གོང་བུ། ཚེ་དཔག་མེད་གྲུབ་རྒྱལ་ལུགས་ཀྱི་བསྐྱེད་རྫོགས་ཀྱི་ཁྲིད་ཡིག་འཆི་མེད་བདུད་རྩིའི་ཆུ་གཏེར། ལུས་མཆོད་སྦྱིན་གྱི་ཟིན་བྲིས་མདོར་བསྡུས་ཀུན་དགའི་སྐྱེད་ཚལ། བློ་སྦྱོང་དོན་བདུན་མའི་ཁྲིད་ཡིག་བཅས། གཞན་སྟོང་དབུ་མའི་ལྟ་ཁྲིད་རྡོ་རྗེ་ཟླ་བ་དྲི་མ་མེད་པའི་འོད་ཟེར། སྤྲོས་མེད་རྒྱུན་གྱི་ཉམས་ལེན་ཀུ་སཱ་ལིའི་བདུད་རྩི་བཅས། དྲུག་པ་རྣམ་བཤད་དང་འབེལ་གཏམ་དྲིས་ལན་གྱི་སྐོར་ལུང་རིགས་རྒྱ་མཚོ་མཐའ་ལས་པའི་མཛོད་ལ། ཐོག་མར་རྣམ་བཤད་ལ། རིང་འཚོའི་ཆོ་ག་སྒྲུབ་པའི་རྣམ་པར་བཤད་པ་འཆི་བདག་བསླུ་བའི་རྟོག་པའི་དོན་འགྲེལ་ཚེ་དབང་དགའ་བ་འཁྱིལ་བའི་ཐིག་ལེ། བཀའ་བརྒྱད་བདེ་གཤེགས་འདུས་
པའི་སྒྲུབ་ཆེན་གྱི་སྟོང་ཐུན་གདོང་ལྔའི་གད་མོ། །ཚོམ་བུ་ཚོགས་སུ་སྒྲུབ་པའི་གཏོང་ཐུན་གསལ་བར་སྤྲོས་པ་ཚངས་པའི་ང་རོ། །ཐུགས་གསང་དགོངས་འདུས་གཏོང་ཐུན་སྒྱུར་སོ་ཅན། ཚོགས་མཆོད་ཀྱི་དེ་ཉིད་མདོར་བསྡུས་སྨོས་པ་སྒྱུ་འཕྲུལ་རྒྱན་གྱི་རོལ་མོ། །འབེལ་གཏམ་སྐོར་ལ། ལྟ་བ་གཏན་ལ་འབེབས་པ་ལས་འཕྲོས་པའི་གཏམ་སྐབས་ལྔ་པ་ལུང་དང་རིགས་པའི་མེ་ཏོག་རབ་ཏུ་དགོད་པ། རིས་མེད་ཆོས་ཀྱི་ཕྱུག་ཁུངས་མདོ་ཙམ་སྨོས་པ་བློ་གསལ་མགྲིན་པའི་མཛེས་རྒྱན། ཆོས་གྲྭ་ཆེན་པོ་ཐུབ་བསྟན་ཆོས་འཁོར་གླིང་གི་འདུས་པ་རྒྱ་མཚོར་བསླབ་བྱའི་གཏམ་དུ་གསོལ་བ་ཚོགས་མཆོག་ཀུན་ཏུ་དགའ་བའི་རྣ་རྒྱན། རང་གཞན་ལ་ཉེ་བར་མཁོ་བའི་འབེལ་གཏམ་དང་ལྡན་ཀུན་ཏུ་དགའ་བའི་རྣ་རྒྱན་ལེའུ་ཚན་ལྔ་པ། ཆོས་རྒྱལ་སེ་ན་ཤུ་བྷཱའི་གཉེན་སྟོན་གྱི་སྐབས་འབེལ་བའི་གཏམ་དུ་བྱ་བ་ཡིད་ཅན་ཀུན་ཏུ་དགའ་བའི་རྣ་རྒྱན། ཤུ་བྷ་འབྲུག་དགུ་སླིང་སོགས་ཀྱི་བཅའ་ཡིག་བླང་དོར་མིག་འབྱེད། སི་ཏུ་པདྨ་ཀུན་བཟང་ཁྲིར་འཁོད་སྐབས་ཉེར་མཁོའི་མཎྜལ་རྒྱས་བཤད། དུས་དེར་རྗེ་ཉིད་ཀྱིས་གསང་སྙིང་སྤྱི་དོན་གསུང་སྐབས་མཛད་པའི་དེའི་སྤྱི་དོན། མཐོང་གྲོལ་ཞྭ་དམར་ལོ་རྒྱུས། དཔའ་བོའི་དབུ་ཞྭའི་བཤད་པ་མདོར་བསྡུས། དབང་བསྐུར་བྱིན་རླབས་སོགས་ཀྱི་རབ་དབྱེ་ཉུང་བསྡུས་བློ་དམན་ཉམས་དགའ། ངེས་དོན་དབུ་མའི་འཁྲུལ་འཇོམས་ལེགས་བཤད་གསེར་
གྱི་ཐོ་བ་བཅས། དྲིས་ལན་སྐོར་ལ། ཚེ་སྒྲུབ་ཏིང་ངེ་འཛིན་གྱི་དོགས་སེལ་འོད་ཀྱི་ཐུར་མ། དྲིས་ལན་རྣ་བའི་བདུད་རྩི། བླ་མ་པད་ནོར་དྲིས་ལན། ཁོ་བོ་བཀྲ་ཤིས་ཆོས་འཕེལ་གྱིས་དྲི་བ་ཞུས་ལན། བློ་གསལ་ཀར་དགའི་དྲིས་ལན། འཇམ་དཔལ་རྡོ་རྗེ་ལྷ་བཅུ་གསུམ་མའི་སྟ་གོན་སོགས་ཀྱི་ཟིན་བྲིས། སྐྱབས་ཆེ་སྒྲུབ་བརྒྱུད་སྤྲུལ་སྐུས་དྲིས་ལན། རྡོར་བྲག་སྤྲུལ་སྐུས་དྲིས་ལན་སོགས་བཞུགས་སོ། ༈། ། པ་ལ། བདུན་པ་རྡོ་རྗེའི་གླུའི་སྐོར་ངེས་དོན་རྒྱ་མཚོ་མཐའ་ཡས་པའི་མཛོད་ལ། གཉུག་མའི་དེ་ཉིད་གསལ་བར་སྟོན་པ་ཐལ་བྱུང་དོ་ཧའི་གླུ་ཕྲེང་རྡོ་རྗེ་ཕ་ལམ་གྱི་ཕྲེང་བ་ཞེས་བྱ་བའི་ནང་གསེས་སུ། འཆི་མེད་གྲུབ་པའི་རྒྱལ་བ་བཀའ་དྲིན་ཅན་རྣམ་པ་གཉིས་ལ་ཐུགས་རྗེ་བསྐུལ་བའི་གདུང་དབྱངས་དཔྱིད་ཀྱི་དབྱངས་སྙན། གྲུབ་ཐོབ་རྒྱ་མཚོའི་ཁྱུ་མགོ་བཀའ་བརྒྱ་ཀྱི་སྟོན་པ་བཀའ་དྲིན་ཅན་རྣམས་ཀྱི་ཐུགས་རྗེ་མངོན་པར་སྐུལ་བའི་གླུ་དབྱངས་བུ་ཆུང་མ་ལ་འབོད་པའི་གདུང་དབྱངས། གཏན་སྐྱབས་འཁོར་ལོའི་མགོན་པོ་རྡོ་རྗེ་འཆང་ཆེན་པོའི་རྣམ་ཐར་མངོན་པར་དྲན་པའི་མོས་གུས་ཀྱི་གདུང་དབྱངས་ལྷར་བཅས་རྣ་བའི་བཅུད་ལེན། ཐུན་མོང་སྔོན་འགྲོའི་གླུ་དཔལ་རྡོ་རྗེ་འཆང་ཆེན་མ། སྐྱབས་འགྲོའི་མགུར་སྐྱབས་མཆོག་གསུམ་ཀུན་འདུས་མ། སེམས་བསྐྱེད་ཀྱི་མགུར་དམིགས་མེད་སྙིང་རྗེ། དྲིན་ལྡན་ཀརྨ་དགེ་ལེགས་ཡེ་ཤེས་བཟང་པོས་ཉམས་ལེན་
སྐྱོང་ན་ཕྱི་རོལ་གཏོར་མའི་གོ་ཆོད་མིན་གསུང་ལན་བྱུང་རྒྱལ་དུ་ཕུལ་བ་རྗེ་པདྨའི་མཚན་ཅན། རྗེ་ཉིད་ལ་སྙིང་བརྩེ་བ་མང་པོས་ཁྱོད་མཁོས་ཁ་ཐབས་ཞན་འདུག་ཟེར་བའི་ཚེ་རང་གིས་རང་ལ་དཔའ་བཀོན་པའི་མགུར་ཆོས་ཉིད་བདེན་པ་མ། རྗེ་ཉིད་སྐུ་བསྙུན་པའི་ཚེ་ཅུང་ཟད་དྭངས་སྐབས་སྡུག་བསྔལ་དང་གདོང་འཕྲད་བྱུང་དུས་སྟོང་ཉིད་སྙིང་རྗེའི་བསྲེ་བ་ལས་གཞན་གང་གིས་ཀྱང་ཕན་མི་ཐོགས་པའི་ཚུལ་གཏིང་ནས་དགོངས་ཏེ་ཐོལ་བྱུང་དུ་བཞེངས་པ་མགུར་རྗེ་བླ་མ་སངས་རྒྱས། ཉེ་གནས་ཀྱི་གོ་མ་ཆོད་བྱུང་དུས་གཞན་རྣམས་ཀྱིས་ཁྱེད་ཅི་བྱུང་བྱས་པས་དུས་རྒྱུན་མ་ལོ་མ་ཉན་རྐྱང་རེད་གསུང་སྐབས་རྗེ་ཉིད་ལ་ཉིད་ཀྱིས་ཐུགས་གསོས་ཀྱི་ཚུལ་དུ་གསུངས་པའི་མགུར་ཕ་བླ་མ་དུས་གསུམ་སངས་རྒྱས་ཞེས་པའི་དབུ་ཅན། ཡུལ་སྣང་སྒྱུ་མའི་བསླུ་ཁྲིད་རྣམ་གཡེང་སོགས་ལ་གཏིང་ནས་ཐུགས་ཁྲེལ་བ་ཞིག་གིས་རྐྱེན་བྱས་ནས་བཞེངས་པའི་མགུར་དཔལ་རྫོགས་པའི་སངས་རྒྱས་ཀརྨ་པ་ཞེས་པའི་དབུ་ཅན། རྗེ་ཉིད་ལུགས་ཟུང་གཉིས་ཆར་རང་ཐག་སྔར་ནས་ཆོད་ཟིན་པས་འཕྲལ་སྣང་གིས་ཐུགས་བློ་འགྱུར་ལྡོག་མེད་པའི་གསལ་འདེབས་སུ་བཞེངས་པའི་མགུར་ང་སྦྲང་པོ་ཟ་ཉལ་བྱེད་པ་ལ་སོགས་ཅན། དཔལ་སྤུངས་དབེན་རིར་ཐུགས་སྣང་དྭངས་སྐབས་སུ་བཞེངས་པའི་མགུར་ཕ་དྲན་ཆོག་གི་རྒྱལ་པོ་སོགས་ཅན། རིག་འཛིན་གྱི་རྣལ་འབྱོར་མངྒ་ལའི་བཞེད་ོར་གསུངས་
པའི་མགུར་སྐྱབས་དུས་གསུམ་ཀུན་མཁྱེན་མ། དད་དམ་འགྱུར་མེད་ཚེ་དབང་ནས་ཉམས་ལེན་དྲི་བའི་དོགས་སེལ་དུ་བཞེངས་པའི་མགུར་ཆོས་རྒྱལ་ཟླ་འོད་གཞོན་ནུ་ཞེས་པའི་དབུ་ཅན། དགེ་སློང་ཀརྨ་དབང་ལྡན་ལ་གསུངས་པའི་མགུར་རྗེ་པདྨའི་མཚན་ཅན། པྲཛྙཱའི་མཚན་ཅན་ལ་གནང་བའི་མགུར་སངས་རྒྱས་ཀུན་དངོས་མ། པད་འབྱུང་བླ་མ། ན་མོ་གུ་རུ་བཀའ་བརྒྱུད་གྲུབ་པའི། རྗེ་དྲིན་ལྡན་གྱི་རྩ་བའི་བླ་མ། དཔལ་ལྡན་བླ་མ་བཅས་བསྐུལ་བ་པོ་སོ་སོའི་ངོར་གསུངས་པའི་མགུར་ཆུང་བཞི། དུས་ངན་བླ་སློབ་འབྲེལ་ཚུལ་ལ་ཐུགས་སྐྱོ་ནས་བདེན་པར་གསུངས་པའི་མགུར་མཚན་ལྡན་གྱི་བླ་མ་རིན་པོ་ཆེ་སོགས། སྙིགས་མ་མཐར་ཐུག་པའི་དུས་སུ་སྐྱེ་བོ་མི་སྲུན་པ་རྣམས་ཀྱི་འགྱུར་བས་སྐྱོ་ཤས་ཁ་ཙམ་མིན་པར་སྐྱེས་ཏེ་ཐལ་བྱུང་སྨྲེ་སྔགས་ཀྱི་མགུར་དུས་དེང་སང་སྙིགས་མའི་མཐའ་ལ་ཐུག །ཅེས་སོགས། རང་བཞིན་སྙིགས་དུས་ཀྱི་སྤྱོད་ཚུལ་ཡང་ལ་སྐྱུགས་བྲོ་བ་དུ་བྲོ་ལ་ཉམས་མཚར་བས་ན་བུན་གྱི་ཕྲེང་བ་བཞིན་དུ་གཡེང་བར་མཐོང་ནས་དབེན་པའི་རི་ངོགས་སུ་བཞེངས་པའི་མགུར་ཁྱོད་མདོ་མེད་མི་དེ་སོགས། ཛཾ་ཐང་དགེ་སློང་རྗེ་དབོན་དམ་ཆོས་ལ་གསུངས་པའི་མགུར་སངས་རྒྱས་ཀུན་འདུས་རྩ་བའི་བླ་མ་སོགས། སྐྱབས་ཆེ་སྒྲུབ་པ་བསམ་མེ་ལ་གསུངས་པ་ན་མོ་གུ་རུ་རང་སེམས་གདོད་ནས་སོགས། འཇམ་དབྱངས་མཁྱེན་བརྩེའི་ཞུས་ངོར་གསུངས་པའི་མགུར་གྱི་སྐོར་ལ། མཉམ་མེད་དྭགས་པོ་
བཀའ་རྒྱུད་ཀྱི་ལྟ་སྒོམ་ལ་ངེས་པ་ཆ་ཙམ་རྙེད་པའི་གླུ་གཉུག་མ་རང་ཤར། ཟབ་ལམ་ནཱ་རོ་ཆོས་དྲུག་གི་གསང་དོན་ངེས་པས་དྲངས་པའི་གླུ་ཟབ་དོན་རྒྱན་གྱི་མེ་ཏོག། ཟམ་ལམ་ནི་གུ་ཆོས་དྲུག་གི་རྡོ་རྗེའི་གནས་ངེས་པའི་མགྲིན་གླུ་ཀ་ལ་པིངྐའི་སྒྲ་དབྱངས། བླ་ན་མེད་པའི་རྡོ་རྗེའི་རྣལ་འབྱོར་ཡན་ལག་དྲུག་གི་གནས་ལ་དད་པའི་པདྨོ་མཆོག་ཏུ་རྒྱས་པའི་དབྱངས་ཚིག་རིགས་ལྡན་དགྱེས་གླུ་བཅས། དཀར་མོ་སྟག་ཚང་དུ་གསུངས་པ་རྗེ་འཆི་མེད་པདྨའི་མཛད་པ་དྲན་སོགས། རྗེ་ཉིད་བོད་ཡུལ་ལྷོ་དབུས་ཀྱི་སྒྲུབ་གནས་རྣམས་སུ་ཕེབས་སྐབས་མགུར་དུ་བཞེངས་པའི་སྐོར་ལ། སྒྲུབ་གནས་ཆེན་པོ་བྲག་དམར་གཡའ་མ་ལུང་། བསམ་ཡས་མཆིམས་ཕུ། ཡར་ལུང་ཤེལ་བྲག །མཁར་ཆུ་ལྕགས་ཕུར་ཅན། ལྷོ་གྲོ་བོ་ལུང་དང་མི་ལའི་སྲས་མཁར། གཉའ་གཉའ་ལུང་བསྟན་ཕུག །དཔལ་ཀུན་ཏུ་བཟང་པོའི་ནགས་ཁྲོད། སྒྲུབ་མཚོ་པདྨ་གླིང་རྣམས་སུ་བཞེངས་པའི་གསུང་མགུར། རྫོང་ཤོད་དུ་གསུངས་པའི་ན་མོ་གུ་རུ་བྷྱཿསོགས། གཞི་མེད་ཀློང་གྲོལ་མ། རྩེ་མོ་བྱུང་རྒྱལ་མ་ལ་སོགས་པའོ། །བརྒྱད་པ་སྐལ་པ་བཟང་པོའི་ཚོགས་ལ་གཙོ་བོར་དགོང་ཏེ་ཞལ་གདམས་སུ་གནང་བ་བསྟན་པ་རྒྱ་མཚོ་མཐའ་ཡས་པའི་མཛོད་ལ། རང་གཞན་ལ་གཏན་གྲོས་སུ་གདམས་པ་སྙིང་གི་བདུད་རྩི་ཞེས་བྱ་བ་ལས་ནང་གསེས་སུ་རང་ཉིད་ཀྱིས་དམ་བཅའ་བདུན་པ་མཛོད་
པ་ཚིག་ལྷུག་པའི་མཇུག་ཏུ་ཚིགས་བཅད་རེ་དང་རྗེས་སུ་རང་དྲན་གསོ་བའི་མགུར་བཞི་ཚན་སུམ་ཅུ་པ། རང་ལ་གྲོས་འདེབས་དང་ལྷག་པའི་ལྷའི་ཐུགས་རྗེ་བསྐུལ་བའི་སྨོན་ཚིག་གི་ཚུལ་དུ་གསུངས་པ་བཀའ་བརྒྱུད་བླ་མ་སོགས། རང་ཚུལ་ལ་དཔག་སྟེ་གདམས་ངག་གི་ཚུལ་དུ་ཅུང་ཟད་བརྗོད་པ། ཚུལ་ཁྲིམས་རྒྱ་མཚོར་གནང་བ་སངས་རྒྱས་ཀུན་དངོས་རྩ་བའི་བླ་མ་པདྨ་ཉིན་བྱེད་སོགས་ཚིག་ལྷུག་མ། དགེ་སློང་ཀརྨ་ཕན་བདེ་བདེའི་ཞུས་ངོར་གསུངས་པ་མཆོག་གསུམ་ཀུན་འདུས་སོགས་ཚིག་ལྷུག་མ། དགེ་བཤེས་བསྟན་འཛིན་བཟང་པོས་ཞུས་ངོར་གསུངས་པ་དྲན་ཆོག་མགོན་པོ་སོགས་ཚིག་ལྷུག་མའི་རྗེས་སུ་ཀྱེ་ཧོ་ཡང་གཅིག་གསོན་དང་། ཨ་ཧོ་ཚེ་འདིའི་སྣང་བ་སོགས་མགུར་གྱི་ཚུལ་དུ་གསུངས་པ་གཉིས། ཆོས་མཛད་མོས་ལྡན་འགའི་དགེ་སྦྱོར་གསལ་འདེབས་སུ་གསུངས་པ་ཉོན་མོངས་པའི་ཉེས་དམིགས་སྤང་བསྒྱུར་ཤེས་གསུམ་གྱི་ལམ་དུ་ཁྱེར་ཚུལ་དེ་དག་ལྔ་ལྡན་ལྟར་སྟན་ཐོག་གཅིག་ཏུ་ཉམས་སུ་ལེན་ཚུལ་སོགས་ཀྱི་ཞལ་གདམས་ཚིགས་སུ་བཅད་པ་དང་ལྷུག་པ་སྤེལ་མ་རྩ་གསུམ་ཀུན་འདུས་སོགས། སྒྲུབ་པ་ལ་སྙིང་པོར་མཛད་པ་བླ་མ་འོད་འཕྲོས་བསྐུལ་ངོར་མཛད་པའི་ཞལ་གདམས་ཚིག་ལྷུག་མའི་མཇུག་ཏུ་ཨ་ཧོ་བློ་གྲོས་མཐའ་ཡས་སོགས་ཀྱི་གསུང་མགུར་ཡོད་པ། རྟ་རྣ་དགོན་དམར་སྤྲུལ་སྐུས་ཞུས་ངོར་གནང་བ་རྗེ་དཔལ་ལྡན་བླ་མ་རིན་པོ་ཆེ་སོགས།
ནཱ་ཐ་ལཀྵྨཱིའི་ངོར་གསུངས་པ་རྗེ་འགྲན་ཟླ་ཀུན་བྲལ་མ། གཤེན་བཙུན་དྲུང་མུའི་མིང་ཅན་ལ་གསོལ་འདེབས་གསུངས་པ་རྒྱལ་བ་ཀུན་འདུས་མ། བན་ཆེན་དགོན་གྱི་ཚེ་མཚམས་དགེ་འདུན་ངོར་གནང་བ་ན་མོ་གུ་རུ་བྷྱཿཐོག་མར་ནམ་འཆི་ཆ་མེད་སོགས། ན་མོ་གུ་རུ་ཞི་གནས་རྩེ་གཅིག་སོགས་ཚིག་རྐང་བཅུ་གཅིག་པ། རྡོར་སློབ་རཏྣ་ལ་གནང་འི་ཞལ་གདམས་བླ་མ་ཡི་དམ་དབྱེར་མེད་ཕྲིན་ལས་ཀྱི་སོགས། དགེ་འདུན་ཕུན་ཚོགས་རོར་གསུངས་པ་ཕ་རྗེ་བཙུན་གྱི་རྒྱལ་པོ་སོགས། སྒྲུབ་ཆེན་དོན་དམ་གྱི་རྣལ་འབྱོར་རྗེ་དབོན་བླ་མ་རིན་པོ་ཆེ་ཆོས་གྲགས་རྒྱ་མཚོ་ཞུས་ངོར་གཡུ་ཐོག་རྣམ་རྒྱལ་དགོན་དུ་གསུངས་པ་རྡོ་རྗེ་འཆང་དངོས་མ། ཡང་དགོན་དེ་ཉིད་དུ་བླ་མ་ཀརྨ་འཆི་མེད་ཀྱི་ངོར་གསུངས་པ་རྗེ་བཀའ་བརྒྱུད་བླ་མའི་ཞབས་ལ་འདུད་སོགས། འཇམ་པའི་རྡོ་རྗེ་དཔོན་སློབ་རིན་པོ་ཆེའི་རིགས་དབོན་གང་དེའི་བཞེད་ངོར་གསུངས་པ་རྗེ་བཙུན་མ། གུ་རུ་བྷྱཻ་ཥ་འི་བཞེད་སྐོང་དུ་གསུངས་པ་བཀའ་བརྒྱུད་གདུང་འཚོབ་མ། ཇ་ཐང་དགེ་སློང་དམ་ཆོས་ལ་གནང་བ་ན་མོ་གུར་ཝེ། སོ་སོར་སྡུད་པའི་སོགས། སྒྲུབ་བརྒྱུད་མཁན་པོ་བདེ་ལྡན་ངོར་གསུངས་པ་ཕྱག་ཆེན་ལྷན་སྐྱེས་མ། དཀོན་མཆོག་བསྟན་སྐྱོང་ལ་གསུངས་པ་ལས་དང་པོ་པའི་ངོ་བོ་སྐྱོང་ཚུལ་ལ་སོགས། དྷརྨ་དྷ་རའི་ངོར་གསུངས་པ་སྐྱབས་གནས་ཀུན་འདུས་མ། སྡེ་གཉེར་ཚེ་དོན་ལ་གསུངས་པ་མཚུངས་བྲལ་བླ་མ་
སོགས། སྒྲུབ་བླ་མ་དགེ་ལེགས་རབ་རྒྱས་ཀྱི་ཉམས་བཞེས་གསལ་འདེབས་སུ་གསུངས་པ་བཀའ་བརྒྱུད་བླ་མ་སོགས། དེ་བེནྡྲ་ལ་གསུངས་པ་གུ་རུ་པདྨར་བདག་ཕྱག་འཚལ་སོགས། རི་ནང་མཁའ་འགྲོ་མ་ལ་གསུངས་པ་རིགས་དྲུག་ཁྱབ་བདག་མ། དྷཱ་ཛའི་མཚན་ཅན་ལ་གསུངས་པ་ལུང་དང་རིགས་པའི་སོགས། རིག་འཛིན་གྱི་རྣལ་འབྱོར་མངྒ་ལའི་ངོར་ཞུས་ལན་སྐྱབས་དུས་གསུམ་མ། ཀརྨ་པ་མཁའ་ཁྱབ་རྡོ་རྗེས་རྟོགས་འབུལ་གསུང་ལན་བཀའ་བརྒྱུད་གྲུབ་ཐོབ་རྒྱ་མཚོ་སོགས། འབྲས་ལྗོངས་ཡ་སྤ་བླ་མའི་ངོར་གནང་བ་དལ་འབྱོར་སོགས་ཤླ་ཀ་གཉིས་མ། རྫོགས་ཆེན་དགེ་མང་མཆོག་སྤྲུལ་ངོར་གནང་བ་མ་ཧཱ་གུ་རུ་སོགས་ཏེ་ཞལ་གདམས་སྣ་ཚོགས་ཀྱི་སྐོར་དང་། ལམ་ཞུགས་ཀྱི་གང་ཟག་ལས་དང་པོ་པ་ལ་ཕན་པའི་བསྐྱེད་རྫོགས་ཀྱི་གནད་བསྡུས་ཀརྨ་དཔལ་ལྡན་ལ་གནང་བ། སྡེ་དགེའི་གཉེར་ཆེན་རྒྱ་མཁར་བསོད་ནམས་ལ་གནང་བའི་བསླབ་བྱ་ལེགས་པར་བརྗོད་པ་སྐབས་བཞི་བ་བཅས་སོ། །དགུ་པ་བརྡ་སྤྲོད་པ་ཡན་ལག་དང་བཅས་པའི་གཞུང་རིག་པ་རྣམས་ལ་མཚན་དུ་གསོལ་བ་ལེགས་སྦྱར་རྒྱ་མཚོ་མཐའ་ཡས་པའི་མཛོད་ལ། བརྡ་སྤྲོད་གཞུང་ལུགས་ཀྱི་མཚན་ི་མངོན་བརྗོད་ཕྲེང་བར་བསྟར་བ་ལྷའི་རྔ་བོ་ཆེའི་སྒྲ་དབྱངས་ཞེས་བྱ་བ་ལས་ནང་གསེས་སུ། དཔལ་ལྡན་ཀརྨ་པ་ཐེག་མཆོག་རྡོ་རྗེ། རྗེ་དབོན་བསམ་གཏན་སྤྲུལ་པའི་སྐུ་ཀརྨ་
ཐེག་མཆོག་བསྟན་འཕེལ། ཐམས་ཅད་མཁྱེན་པ་འཇམ་དབྱངས་མཁྱེན་བརྩེའི་དབང་པོ། དཔལ་ཡུལ་རྒྱ་སྤྲུལ་རིན་པོ་ཆེ། ཀརྨ་ཆོས་ཀྱི་དབང་ཕྱུག །ཀརྨ་ཤེས་རབ་རྒྱ་མཚོ། ཀརྨ་ངེས་དོན་བཅས་སོ་སོའི་མཚན་རྟགས་བསླབ་བྱ་དང་འབྲེལ་བ་སྐད་གཉིས་ཤན་སྦྱར་སུམ་འབིད་ཅན་བཅས། བཅུ་པ་མཆོད་འབུལ་དང་ཆབ་ཤོག་གི་སྐོར་ལེགས་སྤྱད་རྒྱ་མཚོ་མཐའ་ཡས་པའི་མཛོད་ལ། ཡུལ་དམ་པ་རྣམས་ལ་མཆོད་འབུལ་གྱི་ཡི་གེ་རྫོགས་ལྡན་སྤྲིན་གྱི་བླ་བྲེ་ལས་ནང་གསེས་སུ། འཇིག་རྟེན་དབང་ཕྱུག་ཀརྨ་པར་མཆོད་པའི་སྤྲིན་ཆེན་པོ་སྤྲོས་པའི་ཚིགས་སུ་བཅད་པ་རིགས་གསུམ། སྐྱབས་མགོན་རྡོ་རྗེ་འཆང་པདྨ་ཉིན་བྱེད་དབང་པོར་མཆོད་སྤྲིན་སྤྲོས་པའི་ཚིགས་སུ་བཅད་པ་རིགས་ལྔ། དཔལ་ལྡན་དཔའ་བོའི་འབུལ་ཡིག་རིགས་གཉིས། གཏེར་ཆེན་མཆོག་གླིང་ལ་འབུལ་ཡིག་ཚན་གཉིས། རང་དང་གཞན་བསྐུལ་གྱི་ངོར་བསྐུར་ཡིག་ཚིགས་བཅད་མཚོ་བྱུང་མགྲིན་པའི་རོལ་རྩེད་ལས་ནང་གསེས་སུ། དཔལ་ཀརྨ་པ་ཐེག་མཆོག་རྡོ་རྗེ། འབྲུག་པ་ཐམས་ཅད་མཁྱེན་པ། རྒྱལ་དབང་བཅོ་ལྔ་པ། ཞེ་ཆེན་དཔོན་སྤྲུལ་རིན་པོ་ཆེ། གཏེར་ཆེན་མཆོག་གླིང་རྣམས་ལ་ཕུལ་བའི་ཆབ་ཤོག །མཁས་དབང་སྒྲུབ་པ་པོ་ཞིག་གི་མཆིད་ལན། རྗེ་པདྨ་ཉིན་བྱེད་ཞལ་སྔ་ནས་ལྕང་ཀྱ་སྤྲུལ་སྐུར་འབུལ་བའི་གསུང་ཚབ། འགུ་ལོག་གྱི་ལིང་
ཐུགས་རྡོར་ལ་ཕུལ་བ། པདྨ་ཉིན་བྱེད་ཞལ་སྔ་ནས་འབྲུག་པ་རྒྱལ་དབང་ཆོས་རྗེ་ལ་གནང་བའི་གསུང་ཚབ། ཨ་མཆོག་དགེ་བཤེས་ཆེན་པོར་རྗེ་པདྨའི་གསུང་ཚབ། འཕེལ་ཚ་བླ་མ་བསོད་ནམས་རྣམ་རྒྱལ་ལ་ཕུལ་བ། རྫོགས་ཆེན་རྡོར་རབ་ལ་སྤྲིངས་པ། ཨ་མཆོག་སྤྲུལ་སྐུ་ལ་ཕུལ་བའི་གསུང་ལན། ཧོར་དགོན་གསར་ཆོས་རྗེ་ལ་ཕུལ་བ། ནང་ཆེན་རྒྱལ་སྲས་སྤྲུལ་སྐུ་ཨ་བདེ་ལ་ཕུལ་བ། སྦྱང་ཡོན་བློ་གྲོས། སྙིང་པོའི་རིང་ལུགས། རྣམ་ཐར་བཞིར་འཇུག་མ་བཅས་གསུམ་པོ་དབོན་རྒན་མཆོག་སྤྲུལ་གསུང་ཚབ། མཚུར་གྲྭ་སྦྱིན་པ་མཐར་ཕྱིན་མཆིད་ལན། མཁས་གྲུབ་དཀོན་མཆོག་ཐུབ་བསྟན་རྒྱ་མཚོའི་དྲུང་དུ་ཕུལ་ཡིག །འཇམ་དབྱངས་མཁྱེན་བརྩེ། དྲུང་ཆེན་རིག་འཛིན། སྡེ་དགེ་ལྷ་སྲས། སྡེ་དྲུང་ཕྲིན་ལས་རྒྱ་མཚོ་སོགས་ལ་གནང་བའི་ཆབ་ཤོག་རྣམས་དང་། ལྷ་ལྡན་སོགས་ཀྱི་གནས་བསྟོད་ཕལ་ཆེར་འདིར་མཆིས་ཀྱང་། གོང་གི་གླེགས་བམ་ཀ་པའི་ནང་དུ་གཏོགས་པ་ཤེས་དགོས་ཤིང་། འགལ་བ་ནི་ཆེར་ཡོད་པར་ནི་མ་མཐོང་མོད། ཅུང་ཟད་འཆོལ་བར་དོགས་སོ། །བཅུ་གཅིག་པ་དཀར་ཆག་ལོ་རྒྱུས་དང་ཞལ་བྱང་གི་སྐོར་ངོ་མཚར་རྒྱ་མཚོ་མཐའ་ཡས་པའི་མཛོད་ལ། ཐུབ་དབང་རྡོ་སྐུའི་དཀར་ཆག །དྲན་པ་ཡེ་ཤེས་སྐུ་འབུམ་དཀར་ཆག་སྔར་གྲགས་སོར་བཞག་ཏུ་བརྗོད་པ་རཏྣའི་གླིང་བུ། ལྷུན་གྲུབ་སྟེང་ཕོ་བྲང་གི་ཐུབ་དབང་
རྟེན་གསུམ་མཐོང་གྲོལ་ལྷ་ཁང་ཛཾ་གླིང་བཀྲ་ཤིས་འོད་འབར་གྱི་དཀར་ཆག་རྫོགས་ལྡན་དཔྱིད་ཀྱི་དབྱངས་སྙན། རྩ་གསུམ་མཆོད་སྡོང་ཆེན་མོ་བྱིན་རླབས་དཔལ་འབར་རྟེན་དང་བརྟེན་པ་བཅས་པའི་དཀར་ཆག་ལེགས་བཤད་རྨད་དུ་བྱུང་བའི་སྨད་ཆ་ཅུང་ཟད་འབྲོ་ཅན་དུ་གྱུར་པ་རྗེ་ཉིད་ཀྱི་བཀས་གནང་བ་ལྟར་ཕྱིན་ཆད་ཁོ་བོས་མཐའ་བསྡུས་པ། ཤངས་པའི་ངོ་མཚར་གསེར་ཆོས་རིན་པོ་ཆེའི་དཀར་ཆག །རྗེ་བཙུན་ཏཱ་ར་ནཱ་ཐའི་བཀའ་འབུམ་གྱི་དཀར་ཆག །ཤེར་ཕྱིན་སྟོང་ཕྲག་བརྒྱ་པའི་གླེགས་བམ་གྱི་དཀར་ཆག་མདོར་བསྡུས་ངོ་མཚར་དཔལ་སྐྱེད། དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་རྟེན་དང་རྟེན་པར་བཅས་པའི་དཀར་ཆག་ཆེན་མོ་བཅས་བཞུགས། ༈ གླེགས་བམ། ཇ་པ་ལ། གྲུབ་དབང་འཛི་སྒར་མཆོག་གི་སྤྲུལ་པའི་སྐུའི་གདུང་རྟེན་དཀར་ཆག །མཆོག་གཟིགས་བླ་མ་དམ་པ་གཡུང་དྲུང་ཕུན་ཚོགས་ཀྱི་གདུང་རྟེན་དཀར་ཆག །གཏེར་དབོན་ངག་གི་དབང་པོའི་གདུང་རྟེན་དཀར་ཆག །རིང་བསྲེལ་རྣམ་བཞི་བདུད་རྩི་ལྔ། མྱང་གྲོལ་རྟེན་འདུས། ཉེར་མཁོའི་རྫས་རྣམས་གཅིག་དྲིལ་གྱི་དཀར་ཆག །དེའི་ཁ་སྐོང་། ཁྱད་པར་བཅུ་གསུམ་དང་ལྡན་པའི་རྩ་བརྒྱད་སྟོང་སྦྱར་གྱི་རྟོགས་བརྗོད། བདུད་རྩི་ཆོས་སྨན་ཕན་ཡོན་ཟུར་བཀོལ། དབེན་པ་ཟླ་མཛེས་ཀྱི་དཔེ་དེ་བས་འཕྲུལ་གྱི་ལྡེའུ་མིག །དཔལ་གྱི་ཙཱ་རི་པའི་བསྔགས་
བརྗོད། ཙཱ་འདྲའི་གནས་ཡིག་རྒྱས་པར་བཀོད་པ། དེའི་གནས་འདུས་དགེ་སྐུལ་སྒོ་བྱང་སྔ་ཕྱི་གསུམ། རྫོགས་ཆེན་ཁམ་ཕུག་སོགས་ཀྱི་གནས་བསྟོད་གོང་གསལ་འགའ་ཞིག་འདིར་མཆིས། སྦར་བྱང་སྐོར་ལ། རྣམ་ཐར་ཟངས་གླིང་མ། བླ་མ་དགོངས་འདུས། བཀའ་བརྒྱད་དང་རྡོར་སེམས། ཐུགས་རྗེ་གསང་འདུས། དཀོན་མཆོག་སྤྱི་འདུས། གསོལ་འདེབས་ལེའུ་བདུན་མ། ཚེ་སྒྲུབ་ཐབས་ཤེས་ཁ་སྦྱོར། རྒྱལ་བ་ཀུན་འདུས། ཕྱག་བཞི་པའི་སྐོང་ཟློག་སོགས། སྨན་བླའི་ཆོ་ག །ཀར་རབས་རིམ་བྱོན་མཆོད་ཆོག །མདོ་སྡེ་རྒྱན་འགྲེལ་ཐོགས་ཊཱིཀ་ཀྱི་སྤར་བྱད་བཅས། མཁའ་སྤྱོད་དབང་པོ་སོགས་དང་། ཐུབ་བསྟན་སྙིང་པོ་མ་གཉེས་མཆོག་སྤྲུལ་བྱང་ཆུབ་ཆོས་ཀྱི་སེང་གེའི་ངོར་གནང་བ། དཔལ་ཡུལ་ལྷ་སྤྲུལ་གཟི་སྤྲུལ་རྣམ་གཉིས་ནས་ཤེར་ཕྱིན་སྟོང་ཕྲག་བརྒྱ་པའི་གླེགས་བམ་བཅུ་གཉིས་དང་བརྒྱད་སྟོང་པ་བཅས་ཀྱི་སྤར་བཞེངས་པའི་སྤར་བྱང་སྨོན་ཚིག་བཅས། དགོངས་འདུས་ཞལ་ཐང་བཅུ་གཅིག །བཀའ་བརྒྱད་ཞལ་ཐང་གྲྭ་ཚར་བཅུ་གཅིག་བཅས་སོ་སོའི་ཞལ་བྱང་། ཐུབ་དབང་གནས་བརྟན་གཙོ་འཁོར་བདུན་ཚར་གྱི་རྒྱབ་བྱང་། རྫོགས་ཆེན་བརྒྱུད་པའི་ཞལ་ཐང་རྒྱབ་བྱང་བཅས། བཅུ་གཉིས་པ་ཉེར་མཁོ་སྣ་ཚོགས་ཀྱི་སྐོར་ཕན་བདེ་རྒྱ་མཚོ་མཐའ་ཡས་པའི་མཛོད་ལ། ཞི་ཁྲོ་དགོངས་པར་གྲོལ་བསྙེན་ཡིག །འཇམ་དཔལ་བྱིན་རླབས་སོགས་མདོ་སྔགས་
གླིང་པའི་གསོལ་འདེབས་སྨོན་ལམ། པད་གླིང་ཀུན་བཟང་དགོངས་འདུས་སྨིན་གྲོལ་འབོགས་ཚུལ། ཚོགས་བདག་གཏོར་འབུལ། བླ་མ་གསང་འདུས་དབང་སྐུར་ལག་ལེན། ལྷ་རྩེའི་བཅའ་ཡིབ། མཆོག་གླིང་ཐུགས་སྒྲུབ་ཡན་ལག་རྣམ་པ་གཉིས་ཀྱི་སྒྲུབ་ཁོག །རྟེན་ལ་ནང་གཞུག་འབུལ་བའི་ལག་ལེན། གསེར་འཕྲུའི་ལག་ལེན། གནོད་སྦྱིན་འཁོར་ལོའི་བཅའ་སྒྲུབ་རྗེས་གནང་བཅས། ཆོས་འཆད་ཉན་སྐབས་སུ་ཉེར་མཁོའི་མཚམས་སྦྱོར་ཆོས་བཤད། མི་ཏྲ་བརྒྱ་རྩའི་དབང་བཤད། སྨྱུང་གནས་ཕན་ཡོན། སྨན་ཆོག་ཕན་ཡོན། སྨན་ཆོག་གཞན་ཕན་བདེར་འཇུག་དང་འབྲེལ་བའི་སྟོང་མཆོད་ལག་ལེན། གཞི་གསུམ་གསོ་སྦྱོང་ཆོ་ག །དབྱར་གནས་དང་དགག་དབྱེའི་ལས་ཆོག །ཐེག་ཆེན་གསོ་སྦྱོང་། ཐེག་ཆེན་གསོ་སྦྱོང་བསྡུས་པ། སོ་ཐར་གྱི་བཤགས་སྡོམ་ཞིག་ནས་གསོ་སྦྱོང་དང་འབྲེལ་བ། ཤིང་རྟ་ཆེན་པོ་གཉིས་ཀྱི་བཀའ་སྲོལ་དང་འབྲེལ་བའི་བྱང་སྡོམ་ཉེས་བཤགས། གསང་སྔགས་གསར་རྙིང་རྡོ་རྗེ་ཐེག་པའི་དམ་ཚིག་ཉེས་ལྟུང་བཤགས་པ་ཀུན་བཟང་ཁྲུས་ཆུ་ཁ་སྐོང་བཅས། རྡོ་རྗེ་ཐེག་པའི་ཉེས་ལྟུང་ཕྱིར་བཅོས། ཉེས་བཤགས་མདོར་བསྡུས་དག་བྱེད་བདུད་རྩིའི་ཟིགས་མ། ཐུན་མཚམས་ཉམས་ལེན། བཏགས་གྲོལ་བཀླག་ཐབས། བཅོམ་ལྡན་འདས་རིག་བྱེད་མའི་སྐོང་པ་དངོས་གྲུབ་འགུགས་པའི་ལྕགས་ཀྱུ། རྒྱུན་ཁྱེར་ལུས་སྦྱིན་འཁྲུལ་
རྟོག་གཅོད་པའི་རལ་གྲི། གཅོད་ཡུལ་རྒྱ་མཚོའི་སྙིང་པོ། །གསུར་མཆོད་འདོད་ཡོན་སྤྲིན་ཕུང་། རི་ཁྲུས་ཁྱིམ་ཁྲུས་གངྒཱའི་ཟེགས་མ། ཤེར་ཕྱིན་བདུད་ཟློག་རྣམ་ཐར་སྟོབས་སྐྱེད། སྒྲོལ་མའི་གཡུལ་མདོས། བཙའ་གཏོ་གཞུང་ཡན་ལག་བཅས་ཚན་གཉིས། རྒྱལ་དབྱངས་སྤྱི་འགྲོ་བཅས། བསང་ཡིག་སྐོར་ལ། རྒྱུན་བསང་དགེ་ལེགས་སྤྲིན་ཕུང་། འཇའ་ཚོན་གཏེར་བྱོན་རྣམས་ཀྱི་བསང་མཆོད་ཞིང་ཁམས་ཀུན་ཁྱབ། ཕུར་བ་ཡང་གསང་བླ་མེད་ཀྱི་སྲུང་མར་བཅས་པ་ལ་རྒྱུན་གྱི་བསང་མཆོད་སྲེག་བླུགས་འབུལ་ཆོང་། །བླ་མའི་ཐུགས་སྒྲུབ་བར་ཆད་ཀུན་སེལ་ལས་བླ་མ་ནོར་ལྷའི་བསང་མཆོད། གེ་སར་བསང་མཆོད་དགོས་འདོད་ཆར་འབེབས། འབའ་ལུང་གངས་མཚོ་གཉན་པོ། །རྒྱལ་རོང་ཁྲོ་ཆུའི་གཞི་བདག་སྤྱི། རྡོ་ཡུལ་གྱི་གཞི་བདག་སྤྱིའི་བསང་མཆོད། ཡུལ་ལྷ་གཙོ་བོར་གྱུར་བའི་བསང་བསྡུས་ཕུན་ཚོགས་དགེ་ལེགས་ལ་གནང་བ། རྗོད་ཤོད་ཀྱི་བསང་སྔོན་ཚེ་དཔལ་ཆེན། དེའི་སྲུང་མ་རྣམས་ཀྱི་གཏོར་བསྔོ་དཔལ་ཆེན་ཐུགས་སྤྲུལ་མ། འཛིང་གི་ཡུལ་སྐྱོང་ཁིས་ར་མཆེད་གསུམ་བསང་བསྡུས། གནས་མཆོག་འབུར་མོ་བྲག་དཀར་བསང་མཆོད། རྒྱུན་བསང་ལྡེབ་ཤར། ཡུལ་བདག་ཧ་ཁྲའི་བསང་། ཡུལ་བདག་གིས་ར། རྨ་ཐམ། དཔའ་འོག་ཡུལ་ལྷ་སྤྱི་བསྡུས་བཅས་ཀྱི་བསང་། ཏྲེ་ཤོད་ཞེད་མཆེད་བརྒྱད། གནས་མཆོག་རྫོང་
ཆེན་ཁམ་ཕུག །ཞི་མཛད་གནས་ཀྱི་ཡང་མཛོད་ཨ་ལོའི་དཔལ་དེའུ་རྣམས་ཀྱི་བསང་། འདན་ཡུལ་གཞི་བདག་རྣམས་ཀྱི་བསང་དང་གསེར་སྐྱེམས། ཟླ་ཀླུང་གཞིར་དག །མདོ་སྨད་ཐང་ལྷའི་ཡུལ་སྐྱོང་། ཁྲ་འབོའི་ཡུལ་བདག་ལྷ་བཙན་ཀླུ་གསུམ་རྣམས་ཀྱི་བསང་མཆོད། འབྱུང་སྤྱིའི་ཉེས་སེལ་གཙུག་ལག་གི་གྱེར་གཏོ་ཆེན་མོའི་བཅའ་གཞི་ལག་ལེན་བཅས་སོ། །བཅུ་གསུམ་པ་ཆོས་སྲུང་དང་ནོར་ལྷ་གཞི་བདག་གི་གསོལ་མཆོད་སྐོར་ཕྲིན་ལས་རྒྱ་མཚོ་མཐའ་ཡས་པའི་མཛོད་ལ། རྡོ་རྗེའི་ཆོས་སྲུང་རྣམས་ལ་ཕྲིན་ལས་སུ་གསོལ་བ་དོན་གཉིས་གྲུབ་པའི་དཔྱིད། མ་མགོན་ཞལ་སྦྱོར་གྱི་རྣལ་འབྱོར་དང་འབྲེལ་བའི་ཕན་བྱེད་མན་ངག་ཕྲན་ཚེགས། དེའི་བསྙེན་ཟིན་མཉན་སྤྲུལ་ལ་གནང་བ། དཔལ་ཡེ་ཤེས་ཀྱི་མགོན་པོ་བེར་ནག་ཅན་ལྕམ་དྲལ་མདོས་ཀྱིས་ཐུགས་དམ་སྐོང་བའི་རིམ་པ་བལྟས་ཆོག་ཏུ་བསྡེབས་པ་སྒྲུབ་བརྒྱུད་བསྟན་པའི་བ་དན། འདི་ཉིད་སྤར་ཟུར་དུ་ཡོད། ཀར་ལུགས་མ་མགོན་འཁོར་ལྔ་རྗེས་འབྲང་དང་བཅས་པའི་གསོལ་ཁད་མ་ཅན་དགྱེས་རོལ། སྐོང་བ་མཉེས་པ་སུམ་ལྡན། མགོན་པོ་ཕྱག་དྲུག་གི་གཏོར་སྒྲུབ་ལག་ལེན། དེའི་སྤོས་སྦྱོར་རྒྱས་བསྡུས་ཀྱི་ལག་ལེན་བཅས་བཞུགས་སོ། ༈ གླེགས་བམ། ཉ་པ་ལ། མྱུར་མཛད་ཡེ་ཤེས་ཀྱི་མགོན་པོ་མཐིང་དཀར་གཉིས་ཀྱི་མངའ་གསོལ་དགེ་ལེགས་སྤྲིན་ཕུང་། གཏོར་ཆོག་
ཕྲིན་ལས་གཏེར་མཛོད་ཀྱི་ཁ་སྐོང་། མགོན་དཀར་ལས་གཞུང་རཏྣའི་བང་མཛོད། བཀའ་ཆེན་བཅུ་གསུམ་གྱི་དབང་ཆོག །རྟགས་ཅན་འདི་དག་གི་སྤར་ཟུར་དུ་མཆིས། དཔལ་ལྡན་སྔགས་སྲུང་མའི་ཕྲིན་ལས་རྡོ་རྗེ་ནོར་བུའི་ཕྲེང་བ། དུད་སོལ་མ་གཙོ་བོར་གྱུར་པའི་ལྷ་མོ་སྤྱིའི་གསོལ་མཆོད་སྐྱེ་བ་ལྔ་པའི་སྒྲ་དབྱངས། བཀའ་དྲིན་ལྷ་མོའི་གསོལ་མཆོད་བསམ་དོན་ལྷུན་གྲུབ། ཡེ་ཤེས་མགོན་པོ་ཏྲཀྴད་ཀྱི་བསྐང་གསོལ་ལས་བཞི་མྱུར་འགྲུབ། ཛམ་བྷ་ལ་དཀར་པོའི་བསྟོད་པ་དངོས་གྲུབ་ཆར་འབེབས། རྨུགས་འཛིན་དམར་པོའི་སྐོང་བ་ལོངས་སྤྱོད་ཆར་འབེབས། འཕགས་པ་ཛཾ་བྷ་ལ་དམར་པོའི་གཡང་ཆོག་གི་ཆ་ལག་གཡང་འགུགས་པདྨ་རཱ་གའི་ལྕགས་ཀྱུ། རྣམ་སྲས་མདུང་དམར་ཅན་གྱི་སྐོང་གསོལ་རིན་ཆེན་ཆར་འབེབས། དཔལ་ལྡན་རིགས་བྱེད་མའི་སྐོང་བ་དངོས་གྲུབ་འགུགས་པའི་ལྕགས་ཀྱུ། གཏེར་གསར་རྣམ་སྲས་གཏོར་མའི་ཟིན་བྲིས། གཏོར་བསྔོ་རིག་འཛིན་དགའ་སྟོན། གཅོད་ཡུལ་གཏོར་འབུལ། དམ་ཅན་མཆོད་བསྟོད་གསོལ་སྐོང་བསང་སོགས་ཕྱོགས་བསྡུས་ལེགས་པ་ཀུན་ཚང་། དེའི་མངའ་གསོལ་དགོས་འདོད་ཀུན་སྩོལ། ཞིང་སྐྱོང་དབང་པོའི་གསོལ་སྐོད་ཉུང་བསྡུས། སུ་ཁ་སིདྡྷིའི་སྐོང་བ་ཕྲིན་ལས་མྱུར་འགྲུབ། དཔལ་ཆེན་མའི་གཡང་སྒོ་འབྱེད་པའི་ཆོ་ག་རིན་ཆེན་ལྡེའུ་མིག །གཡང་ཆོག་ཟུར་འདེབས་
ཡོངས་འདུས་སྙེམ། དེའི་བསང་མཆོད་ནོར་བུའི་ཆར་སྤྲིན། དེའི་གཏོར་འབུལ་དངོས་གྲུབ་གཡང་འཁྱིལ། མཇུག་ཆོག་དགེ་ལེགས་ཆར་འབེབས། དཔལ་ཆེན་མའི་གཡང་སྐྱབས་སྐོར་རྟགས་ཅན་འདི་རྣམས་སྦར་ཟུར་དུ་ཡོད། དུར་བདག་གཏོར་འབུལ། ནོར་བསྙགས་དང་མཁའ་རིའི་གསོལ་མཆོད། ཉེ་བའི་འཐུང་གཅོད་རོང་བཙན་ཁ་བ་དཀར་པོའི་གནས་བདག་རྩ་གསུམ་ཞིང་སྐྱོང་གི་མཆོད་ཕྲན་འདོད་འཇོའི་བ་མོ་བཅས། གོང་གི་གཞི་བདག་བསང་མཆོད་ཀྱི་སྐོར་རྣམས་འདིར་གཞུག་པར་འོས་འདུག་ཀྱང་སྔོན་གྱི་དཀར་ཆག་རྩ་ཐོལ་འདི་ལྟར་མཛད་འདུག་པ་ལྟར་བཀོད་མོད། དོན་གྱི་གོ་རིམ་དེ་ལྟར་ཤེས་དགོས་སོ། །བཅུ་བཞི་པ་ཐུན་མོང་རིག་པའི་གནས་ཀྱི་བསྟན་བཅོས་ཀྱི་སྐོར་ལེགས་བཤད་རྒྱ་མཚོ་མཐའ་ཡས་པའི་མཛོད་ལ། འདུལ་བ་མདོ་རྩ་བ་ལས་གསུངས་པའི་རི་མོ་བྲི་ཡིག་ཚངས་པའི་པ་ཏྲ། བྱ་སྤྱོད་རྣལ་འབྱོར་གསུམ་གྱི་རྒྱུད་སྡེའི་དཀྱིལ་འཁོར་རྣམས་ཀྱི་གཙོ་འཁོར་རགས་བསྡུས་ཞལ་ཐང་བཀོད་ཡིག་ནོར་བུ་ཆུ་ཤེལ་གྱི་ཕྲེང་བ། པདྨ་བཛྲའི་གནས་འདྲེན་ཙཀླིའི་བཀོད་ཡིག །སྐད་གཉིས་ཤན་སྦྱར་ལ་ཉེ་བར་མཁོ་བའི་ཟིན་བྲིས་ལས་དང་པོ་པ་འཇུག་པའི་རོལ་མཚོ། ཚེ་དཔག་མེད་ལ་སོགས་པའི་གཟུངས་ཀྱི་སྒྲ་སྒྲུབ་ནོར་བུ་སྐར་མདོག་གི་ཕྲེང་བ། བརྡ་སྤྲོད་པ་ཙནྡྲ་པའི་སྐབས་སུ་ཉེ་བར་མཁོ་བའི་ཏིང་མཐའི་དཔེ་བརྗོད་ཉུང་
དུ་རྣམ་གསལ། ལུང་སྟོན་པ་ཀཱ་ལཱ་པའི་རྣམ་བཤད་ཟླ་བའི་འོད་ཟེར་ལས་ཀུན་བཤད་ཀྱི་འགྲེལ་པ་སྟོན་ཀའི་ཟླ་འོད། དངུལ་ཆུ་བཙོ་བཀྲུ་ཆེན་མོའི་སྦྱོར་བས་གྲུབ་པའི་བཅུད་ལེན་དུ་བསྒྱུར་བའི་ལག་ལེན། ལྕགས་བརྒྱད་ཁམས་བརྒྱད་ཀྱི་དུག་འདོན་ཐལ་སྨན་གྱི་ཆོ་ག་འདི་གཉིས་སྔར་ཟུར་དུ་བཞུགས། ནད་སྨན་སྤྲད་པའི་ལག་ལེན། འཚོ་བྱེད་ལས་དང་པོ་བ་ལ་ཉེར་མཁོའི་ཟིན་ཏིག་གཅེས་པར་བཏུས་པ་བདུད་རྩིའི་ཐིགས་པ། ཟླ་ཤེལ་རིལ་བུ་སྤྱི་དང་ཁྱད་པར་བ་སྦྱོར་ཚུལ་བདུད་རྩིའི་མྱུ་གུ་བཅས་བཞུགས། ༈ གླེགས་བམ། ཏ་པ་ལ། སྐར་རྩིས་ཀྱི་ལག་ལེན་ལེགས་བཤད་ཀུན་བཏུས། ཤིང་སྦྲུལ་ལོའི་ལིའུ་ཐུའི་མགོ་རྒྱན། ཉི་མ་ལ་སྒྲ་གཅན་འཇུག་པའི་གཏམ་ནོར་བུའི་མེ་ལོང་། ཟླ་བ་སྒྲ་གཅན་ལ་འཇུག་པའི་གཏམ་དྭངས་ཤེལ་མེ་ལོང་། ཙཱི་ནའི་ས་དཔྱད་གསར་འགྱུར་ལུགས་ཀྱི་སྒོ་འབྱེད་འཕྲུལ་གྱི་ལྡེའུ་མིག །བག་མ་ལ་དགེ་བའི་ལས་ཕྲན་བདུན་གྱི་ཆོ་ག་བཀྲ་ཤིས་དཔལ་སྐྱེད། མདོ་ཁམས་སྡེ་དགེའི་རྒྱལ་ཁབ་ཏུ་བོད་བློན་མདོ་མཁར་བའི་བཙུན་མོ་བྱོན་སྐབས་མདའ་དར་འཛུགས་པའི་འབེལ་ཏམ། ཡིག་བསྐུར་རྣམ་གཞག་དབྱངས་ཅན་རྒྱུད་མངས་བཅས། བཅོ་ལྔ་པར་སྔོ་སྨོན་ཤིས་བརྗོད་ཀྱི་སྐོར་ཡིད་བཞིན་འདོད་འཇོ་དགེ་ལེགས་རྒྱ་མཚོ་མཐའ་ཡས་པའི་མཛོད་ལ། ལེགས་སྦྱང་བྱང་ཆུབ་ཀྱི་རྒྱ་མཚོར་སྤེལ་བའི་ཚིག་གི་ཕྲེང་བ་
ཟླ་འོད་བདུད་རྩིའི་ཆར་པ་ཞེས་བྱ་བ་ལས་ནང་གསེས་སུ། སྤྱི་འགྲོ་ཁྱེར་བདེའི་བསྔོ་བའི་ཡོན་བཤད་དང་བཅས་པ་སཱ་ལ་ཆེན་པོའི་ས་བོན། ཆགས་མེད་རིན་པོ་ཆེས་མཛད་པའི་བསྔོ་བ་རྒྱས་པའི་དོན་བསྡུས། སྒྲོལ་དཀར་སྨོན་ལམ་བསམ་འགྲུབ་ལྷའི་ལྗོན་ཤིང་། གསོལ་འདེབས་སྨོན་ལམ་ཐོར་བུ་གཞན་ཕན་སྣང་བ། དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པ་དང་རྗེས་སུ་མཐུན་པར་གདབ་པ་འབྲེལ་བཅས་གཏན་བདེའི་ས་བོན། ལྟ་ན་སྡུག་པའི་ཞིང་གི་སྨོན་ལམ་རྣམ་པར་རྒྱལ་བའི་ལྗོན་ཤིང་། བློ་སྦྱོང་སྨོན་ལམ་བྱང་སེམས་རྒྱ་མཚོའི་འཇུག་ངོགས། རྗེ་ཉིད་ཀྱིས་སྙིང་ནས་གདབ་པའི་སྨོན་ལམ་ཚིག་ལྷུག་མ་མགོར་ངེས་པར་ལེགས་པའི་ལམ་ཚང་ལ་མ་ནོར་བ་སྟོན་ཅིང་སོགས་ཡོད་པ། དགོངས་འདུས་སྐུ་རྟེན་གསུང་རྟེན་བཞེངས་གྲུབ་པའི་སྐབས་སྨོན་ལམ་མཛད་པ། ཇོ་ནང་བསྟན་འབར་མ། ཤམྦྷ་ལའི་སྨོན་ལམ་ཤློ་ཀ་གཉིས་པ། ཡན་ལག་བདུན་པ་ཚིགས་སུ་བཅད་པ། བླ་མ་ལྔ་བཅུ་པའི་བསྡུས་དོན་སྨོན་ལམ། བསྟན་པ་སྤྱི་སྨོན་ཐར་པའི་གྲུ་ཆེན། རྣམ་དཀར་སྨོན་ལམ་ལྷག་བསམ་ཟླ་འོད། བདུད་རྩི་སྨན་གྱི་སྨོན་ལམ། སྒྲུབ་དགེ་ལེགས་རབ་རྒྱས་ལ་གནང་བའི་སྨོན་ལམ་སྐྱབས་གནས་དཀོན་མཆོག་མ། ཡང་རྩ་གསུམ་ཀུན་འདུས་ཤློ་ཀ་གཅིག །ཁྱེད་ནི་རང་བྱུང་། རྒྱལ་ཀུན་སྤྱི་གཟུགས། ཐེག་ཆེན་རིགས་སད། བསླུ་མེད་དཀོན་
མཆོག །བདག་ནི་འདི་བཟུང་བཅས། སྨོན་ལམ་འདོད་གསོལ་འདུན་དང་སྨོན་ལམ་ལས་བྱུང་། གཏེར་ཆེན་མཆོག་གླིང་ནས་སེང་ཆེན་གནམ་བྲག་གི་ཟབ་ཆོས་སྡེ་དྲུག་རྟེན་དང་དམ་རྫས་གཏེར་ནས་སྤྱན་དྲངས་སྐབས་གཏེར་ཚབ་ཏུ་འབུལ་རྒྱུའི་འདོད་གསོལ་སྨོན་ཚིག་བཅས། ཏཱའི་སི་ཏུའི་སྐྱེས་རབས་དང་སྦྱར་བའི་ཤིས་བརྗོད་ཉིན་བྱེད་སྣང་བ། ཤིས་པ་བརྗོད་པའི་ཚིག་ཕྲེང་སེང་གེའི་སྒྲ་བཅས་བཞུགས་སོ། ༈ གླེགས་བམ། ཨ་པ་ལ། རྗེ་ཐམས་ཅད་མཁྱེན་པ་ཉིད་ཀྱི་རྣམ་ཐར་རྒྱས་པ་དང་སྐྱེས་རབས་བཅས་དཔལ་ཡུལ་མཆོག་སྤྲུལ་རིན་པོ་ཆེ་ཨོ་རྒྱན་མདོ་སྔགས་ཆོས་ཀྱི་ཉི་མ་དང་། སྡེ་གཉེར་བཀྲ་ཤིས་ཚེ་འཕེལ་མཆེད་ཞལ་ནས་ཡོན་སྦྱར་ཏེ་སྤར་དུ་བསྒྲུབས་པ་དང་། དེའི་ཞལ་སྐོང་འདས་རྗེས་ཀྱི་རྣམ་ཐར་རགས་བསྡུས་ཁོ་བོས་བྱས་པ་ཧོར་ཁང་ཛ་སག་བཀའ་བློན་བསོད་ནམས་སྟོབས་རྒྱལ་མཆོག་གིས་སྤར་དུ་བསྒྲུབས་པ་བཅས་དང་། དཀར་ཆག་ཟབ་རྒྱས་རྒྱ་མཚོ་མཐའ་ཡས་ལ་འཇུག་པའི་གྲུ་བོ་བཅས་བཞུགས་པ་ལགས་སོ། །རྣམ་ཐར་ཡང་གོང་ས་བཅད་བཅུ་གཅིག་པའི་ཁོངས་སུ་བསྡུ་འོས་ཀྱང་འདིར་ཡང་མི་འགལ་བས་བཀོད་དོ། །གཞན་ཡང་གསན་ཡིག་རིན་པོ་ཆེ་གླེགས་བམ་ཨེ་ཝྃ་གཉིས་ཀྱི་སྨད་ཆ་ཕལ་ཆེ་བ་ཁོ་བོར་བཀས་གནང་བ་བཞིན་གསན་ཐོ་གང་བཞུགས་དང་བརྒྱུད་པའི་ངེས་པ་ཡིད་ལ་གང་ངེས་རང་ནུས་དང་འཚམས་པར་མཐའ་དབྱུང་བའི་ཞབས་
འདེགས་འགྱིས་པར་རློམ་པ་དང་། ཀུན་མཁྱེན་ཆོས་ཀྱི་རྒྱལ་པོ་རྗེ་བླ་མ་འཇམ་དབྱངས་མཁྱེན་བརྩེའི་དབང་པོའི་ཕྱི་ནང་གསང་བའི་རྣམ་ཐར་རྨད་དུ་བྱུང་བ་གླེགས་བམ་གཅིག་མཛད་པ་རྗེ་དབོན་སྐལ་བཟང་རྡོ་རྗེས་སྤར་དུ་བཀོད་པ་སྡེ་དགེ་ལྷུན་གྲུབ་སྟེང་གི་རྒྱལ་ཁབ་སྤར་ཁང་ཆེན་མོར་བཞུགས་པ་འདི་དག་ཀྱང་བཀའ་འབུམ་ཐོར་བུའི་ཁོངས་སུ་གཏོགས་པ་ཡིན་ནོ། །གཏེར་གསར་ལམ་རིམ་ཡེ་ཤེས་སྙིང་པོའི་འགྲེལ་ཆེན་པུ་སྟ་ཀ་གཅིག་ཀྱང་བཀའ་འབུམ་ཐོར་བུའི་གྲལ་རྣམ་བཤད་ཀྱི་ཕྱོགས་སུ་འོས་ཀྱང་། འདི་ཉིད་བསྐྱེད་རྫོགས་རྫོགས་པ་ཆེན་པོའི་ལམ་གྱི་རིམ་པ་ཟབ་ཅིང་འདྲིལ་བས་རིན་ཆེན་གཏེར་མཛོད་ཆེན་པོའི་རྒྱབ་ཆོས་སུ་རྩ་འགྲེལ་སྟབས་གཅིག་ཏུ་བཞུགས་པར་འོས་ཞེས་ཁོ་བོས་ཀྱང་རྗེ་བླ་མར་སྙན་གསོལ་ཕུལ་བ་བཞིན་ཆོས་མཛོད་ཆེན་པོ་དེར་གཞུག་པར་མཛད། དེ་བཞིན་ཀྱེ་རྡོར་རྩ་རྒྱུད་བརྟག་པ་གཉིས་པའི་སྤྱི་དོན་དང་ཚིག་འགྲེལ། ཟབ་མོ་ནང་དོན་འགྲེལ་པ། རྒྱུད་བླ་མའི་འགྲེལ་པ། སྙིང་པོ་བསྟན་པ་དང་རྣམ་ཡེ་འབྱེད་པའི་འགྲེལ་པ་བཅས་ལེགས་བཤད་རྨད་དུ་བྱུང་བའི་རྡོ་རྗེའི་གསུང་རྣམས་ནི་མར་རྔོག་གི་རྒྱུད་སྡེ་རིན་པོ་ཆེ་རྣམས་ཕྱོགས་སུ་བསྡུས་པ་བཀའ་བརྒྱུད་སྔགས་མཛོད་ཆེན་པོའི་རྒྱབ་ཆོས་སུ་དེ་དང་ལྷན་ཅིག་གཞུག་པར་མཛད་པ་དང་། དཔལ་ལྡན་ཨ་ཏི་ཤ་ནས་ཀཾ་ཚང་ལ་བརྒྱུད་པའི་རྗེ་བཙུན་སྒྲོལ་མ་དཀར་མོའི་སྐོར་གྱི་ཡིག་ཆ་ཟླ་བ་འདོད་འཇོ།
ཚེ་ཁྲིད་དང་བཅས་པའང་བཀའ་མཛོད་སོགས་ལོགས་སུ་བཞུགས་པ་དང་། ད་དུང་གསུང་སྐོར་འདི་རིགས་ཀྱི་དབྱེ་བསྡུ་འགྲིགས་རིམ། སྦར་སྔ་ཕྱི་ལ་ཞུ་བཅོས་སོགས་བདག་སོགས་རྨོངས་བློས་མ་རྟོགས་པའི་ཆ་ཅི་མཆིས་པ་མཁས་པ་རྣམས་ཀྱིས་ལེགས་པར་དཔྱད་པ་དང་། འབྱོར་ལྡན་དབང་རིས་ཅན་གྱིས་ཞབས་འདེགས་སྲི་ཞུ་བླ་ལྷག་ཏུ་འབུལ་འོས་པ་བཅས་འཕྲོས་སུ་སྨོས་བའོ།། །བཞི་པ་དེ་དག་ངོ་མཚར་འཕྲུལ་གྱི་ཕྱི་མོར་ཇི་ལྟར་བསྒྲུབས་པའི་ཚུལ་ལའང་སྤར་དུ་བཞེངས་ཚུལ། དེའི་དགོས་ཆེད་དང་ཕན་ཡོན་སྨོས་པའོ། །དང་པོ་ནི། ཛམ་གླིང་མཛེས་པའི་རྒྱན་གཅིག་རྨད་དུ་བྱུང་བའི་ཤིང་རྟ་ཆེན་པོ་ཀུན་མཁྱེན་འཇམ་མགོན་བླ་མ་རིན་པོ་ཆེའི་ཕྲིན་ལས་ཀྱི་གཙོ་བོ་ངོ་མཚར་མཛོད་ཆེན་རྣམ་ལྔ་ཞེས་སྔོན་མེད་པའི་བཀའ་བབས་ཆེན་པོ་ཐུན་མོང་མ་ཡིན་པ་བརྙེས་པ་ལས། ཐུན་མོང་མིན་པའི་མཛོད་ཀྱི་བརྡར་བཏགས་པའི་མཚན་གཞི། རྗེ་ཉིད་ལ་ཀུན་དང་ཐུན་མོང་དུ་མ་གྱུར་པའི་ངོ་མཚར་གསང་བ་ཆེན་པོ་ཟབ་གཏེར་གྱི་བཀའ་བབ་རྒྱ་ཆེ་བ་མཆིས་ཀྱང་གདུལ་བྱའི་བསོད་རྣམས་དང་སྐལ་བར་ལྟོས་པའི་རྟེན་འབྱུང་ཕལ་མོ་ཆེའི་གཞན་དབང་ལས་ཡོངས་སུ་རྫོགས་པ་ཕྱག་ཏུ་བཞེས་མ་གྲུབ། མཛོད་ལྔ་གཅིག་ཏུ་འདུས་བརྒྱུད་ལུང་མན་ངག་རྒྱ་མཚོའི་མཛོད་ཆེན་པོ་རྩ་གསུམ་དགོ་དྭང་འདུས་པ་གཙོས་མཁའ་འགྲོ་གསང་བའི་བརྡ་རིས་ཇི་སྙེད་ཅིག་ཕྱག་ཏུ་སོན་པའང་ཐུན་
མོང་གི་སྤྱོད་ཡུལ་དུ་ཡོངས་སུ་རྫོགས་པར་ལོངས་སྤྱོད་དུ་ཡོད་པ་ཞིག་གཏན་ལ་ཕེབས་སྐབས་མ་བྱུང་བ། དེས་ན་དེའི་ས་ཁོངས་སུ་རྒྱ་ཆེར་མ་མཆིས་པ་ཙམ་ལས། གཞན་ཟབ་ཅིང་རྒྱ་ཆེ་བའི་གདམས་པ་རྒྱ་མཚོའི་སྙིང་པོ་ངོ་མཚར་ཨུ་དུམྦཱ་ར་ལྟ་བུའི་ཆོས་མཛོད་ཆེན་པོ་གཞན་བཞི་པོའི་ངོ་མཚར་བཀའི་བསྡུ་བ་ཐམས་ཅད་མཚར་བ་མེད་པར་ལེགས་པར་རྫོགས། རེ་རེའང་ཚར་གྲངས་ཀྱི་འཆད་སྤེལ་བཀའ་དྲིན་བསྐྱངས་པས་བསྟན་རྒྱུན་རིང་དུ་བསྲིངས། ཐུགས་བསྐྱེད་སྨོན་ལམ་ཟབ་མོའི་སྟོབས་ཀྱིས་དེ་དག་སྤར་གྱི་གླེགས་བུར་ཡུན་རིང་པོར་མ་ཐོགས་པར་འཁོད་པས་བསྟན་འགྲོའི་གསོས་སྨན་བླན་མེད་པ་ཡིད་བཞིན་ནོར་བུའི་བང་མཛོད་ལ་ཅི་དགའ་བར་སྤྱོད་དུ་ཡོད་པ་དེ་བཞིན། རྒྱ་ཆེན་བཀའི་མཛོད་གསུང་འབུམ་རིན་པོ་ཆེ་གླེགས་བམ་ས་བཅུའི་གྲངས་ལྡན་འདི་ཉིད་ཀྱང་། ཟབ་རྒྱས་མདོ་སྔགས་རིག་གནས་དང་བཅས་པའི་བསྟན་པའི་མིག་ཏུ་མེད་ཐབས་མེད་པས་ཕྱིན་ཆད་བསྟན་འཛིན་ཕོངས་ཀྱི་ངག་ལོན་ཏུ་ནོས་བུ་རྩེ་འབྲག་བརྒྱས་མི་མཚོན་པའི་གཅེས་ནོར་དུ་མཐོང་བའི་ཐུགས་སྲས་དང་སློབ་དག་གིས་སྤར་གྱི་ཞབས་འདེགས་སྒྲུབ་པའི་ཐུགས་ཀྱི་བཞེད་པ་ཟླ་བའི་དཀྱིལ་འཁོར་དྲི་མ་མེད་པ་ལྟར་ཤར་བ་ལས། ཐོག་མར་རྗེ་བླ་མའི་ཟབ་རྒྱས་གདམས་པ་རྒྱ་མཚོའི་གཏེར་མཛོད། ཐུགས་ཟིན་གྱི་སློབ་མའི་ཐུ་བོ། །གདན་ས་
གཉིས་བརྗོད་ཤོང་བདེ་གཤེགས་འདུས་པའི་ཕོ་བྲང་ཆེན་མོའི་ཆོས་གྲྭ་རྟེན་དང་བརྟེན་པར་བཅས་པ་བོད་ཁམས་གཡོ་འཁྲུགས་ཀྱི་གཟེར་བསྡོམ་པའི་སྙིང་པོ་ས་གནད་ཀྱི་མེ་བཙའ་ཨོ་རྒྱན་རྡོ་རྗེའི་ལུང་དོན་མཐར་ཕྱིན་གྱི་ཞབས་འདེགས་སོགས་ཆོས་དང་མཐུན་པའི་མཉེས་པ་ལྔ་དང་ཞབས་ཏོག་དགུ་ཕྲུག་གི་སྒོ་ནས་བླ་མའི་ཕྲིན་ལས་བསྒྲུབ་པ་ལ་དལ་བ་དང་སྐྱོ་བའི་དྲི་མ་མེད་པ་སྔོན་གྱི་བཀའ་བརྒྱུད་གོང་མ་རྣམས་ཀྱིས་བླ་མ་བསྟེན་པའི་ངང་ཚུལ་ལ་ཕྱོགས་པའི་ཉེ་གནས་བླ་མ་འཇམ་དབྱངས་དགེ་ལེགས་ནས་རྗེ་བླ་མའི་བསྟན་པ་ལ་གཅིག་ཏུ་འདུན་པའི་བྱ་བ་ལས་ཀྱི་འཁོར་ལོ་ཕྲ་རགས་ཐམས་ཅད་ཐང་ལྷོད་མེད་པར་བརྩོན་པ་བདག་གིར་མཛད་དེ་དད་རྫས་ཀྱི་དངོས་པོ་ཐ་ན་ཁབ་སྐུད་ཙམ་ཡང་གནས་མིན་དུ་ཆུད་མ་ཟོས་པར་རྣམ་དཀར་བྱ་བའི་དངོས་པོའི་ཚོགས་སུ་སྨིན་ངེས་པའི་རྟོགས་བརྗོད་དཔྱོད་ལྡན་ཡིད་ལ་རི་མོར་བྲིས་པ་དང་། དངོས་རྫས་རྒྱ་ཆེ་གྲངས་མང་རྗེ་རང་ཉིད་ཀྱི་ཕྱག་ཏུ་ཕུལ་བ་སོགས་དམ་པའི་རྣམ་ཐར་རང་འཁྲིས་ཀྱི་དྲི་མ་མེད་པ་ལ་ཞུགས་པས་ཕྱིན་ཆད་ཕུག་ནོར་དུ་བགྱི་བའི་གསོག་འཇོག་རྒྱ་ཆེ་བ་གང་ཡང་མ་མཆིས་མོད། སྨར་ཟོང་གི་དངོས་པོ་ལྟོས་ཆེ་བ་རྣམ་དཀར་བསྟན་བཙས་འདིར་སྨིན་པར་མཛད་པ་དེའི་ཚེ། ཐུབ་བསྟན་ཡོངས་སུ་རྫོགས་པའི་བཤེས་གཉེན། དོན་གྱི་རྡོ་རྗེ་འཛིན་པའི་མཁན་ཆེན་རྗེ་བླ་མའི་ཐུགས་ཀྱི་སྲས་མཆོག་ཀརྨ་བཀྲ་ཤིས་འོད་ཟེར་ཞི་བའི་སྙིང་པོ་
མཆོག་གི་ཞལ་སྔ་ནས་བླ་མའི་བསྟན་ལ་རྒྱུ་མཚན་གལ་གནད་མཁྱེན་པའི་གུས་སྤྲོ་ཆེན་པོས་འགན་བཞེས་གནང་སྟེ་ལོ་སྔ་ཕྱི་གཉིས་ཙམ་ལ་སླར་བརྐོས་སོ་སོར་བཀྲམས་སྡུད། ཞུ་དྲག་བརྐོ་བཙུགས་སོགས་ཕལ་ཆེར་ཕྱག་བསྟར་གྱིས་ཐུགས་འགན་བླ་ལྷག་ཏུ་བཞེས་པས་གླ་ཆས་གནང་སྦྱིན་སོགས་རང་ཉིད་ཀྱི་ཕྱག་རྫས་དངོས་པོའང་མ་ཉུང་ཙམ་པ། ནང་ནས་ཐོག་མར་དགེ་བའི་ལམ་སྲོལ་ལེགས་པར་ཕྱེས། དེ་བཞིན་དུ་རྗེ་བླ་མའི་གདན་སའི་སྙིང་པོ་ཡང་ཁྲོད་ཀྱི་ཉེ་གནས་དམ་པ་ཚེ་རིང་དོན་གྲུབ་པས་ཀྱང་སྤྱིར་བླ་མ་རྡོ་རྗེ་འཆང་གི་དགོངས་པའི་བཞེད་པ་རང་ཉིད་ཀྱིས་སྐོང་འོས་གང་མཆིས་ཆེ་ཕྲ་ཐམས་ཅད་སྙིང་ཐག་པ་ནས་གུས་པ་ཆེན་པོས་བསྒྲུབ་པའི་སྲི་ཞུའི་བྱ་བ་ཐམས་ཅད་ཐང་ལྷོད་མེད་པར་ཤ་ཐུབ་རུས་ཆོད་དུ་ཞུས་པས་ཐུགས་གཏིང་ནས་མཉེས་པས་ཐར་པའི་ལམ་གྱི་སྲོག་རྩ་ཚུགས་པའི་བསྔགས་འོས་ཀྱི་ཡོན་ཏན་དང་ལྡན་ལ། ཁྱད་པར་གདམས་ངག་རིན་པོ་ཆེའི་མཛོད་སོགས་ཟབ་རྒྱས་གསུང་གི་ཕྲེང་བ་ཇི་སྙེད་པ་འབྲི་བརྐོ་རྒྱུན་མི་འཆད་པའི་རྣམ་དཀར་ཁོ་ནའི་བཅས་སུ་ཕྱག་རྫས་ཕོངས་པ་མེད་པར་གཏོང་པའི་བྱ་བ་ལ་བརྒྱུད་མར་ཞུགས་བཞིན་པ་ན། འདིར་ཡང་གོང་གི་འཕྲོས་སྤར་གསར་བརྐོ་དང་ཞུས་དག་བརྐོ་བཙུག་སོགས་ལག་བསྟར་གྱི་ཆས་ཡོན་ཟས་ནོར་དངོས་པོ་གང་ལ་ཅི་འདོད་པས་ཚིམས་པར་བྱས་ཏེ་བར་དང་ཐ་མ་དགེ་བའི་བྱ་བས་ཡོངས་སུ་
རྫོགས་པར་གྲུབ་པའི་ཞུས་དག་ཀྱང་སྔ་མ་ཕལ་ཆེར་མཁན་ཆེན་ཆོས་རྗེ་མངྒ་ལར་སྨིའི་གཟིགས་པས་གཙང་བར་མཛད། ཕྱིས་གླེགས་བམ་ཡོངས་རྫོགས་འགྲུབ་རིམ་བཞིན་བློ་གསལ་བྱང་འདྲེན་པ་ཀརྨ་ཡེ་ཤེས་རྒྱ་མཚོས་དཔྱད་པ་གསུམ་གྱིས་གཏན་ལ་ཕབ་སྟེ་གཙང་བར་བྱས། དེ་བཞིན་སྔ་ཕྱིའི་སྤར་གྱི་མགོ་ལུང་ཞབས་འདེགས་ལ་རྟག་གུས་ཀྱི་ལྷག་བསམ་བརྩོན་པ་མི་འདོར་བ་གསེག་གཅོད་འཕྲུལ་གྱི་ཁ་ལོ་བསྒྱུར་མཁས་དོ་དམ་པ་གྲོང་ཉིན་མགོན་པོ་ནས་བླ་མའི་བསྟན་ལ་གུས་པ་ལྷུར་བླངས་ཏེ་ཐང་ལྷོད་མེད་པའི་ཞབས་འདེགས་ཀྱི་སྒོ་ནས་ལེགས་པར་གྲུབ་པའི་ཚེ་གླེགས་བམ་གྱི་བགྲིགས་རིམ་སོགས་རྨོངས་བརྟུལ་ཁོ་བོ་ཅག་གིས་ཀྱང་ཅུང་ཟད་དཔྱད་པའི་ཁུར་བླངས་ཁུལ་བགྱིས་མོད། ཞུས་དག་སོགས་ཀྱང་། དཔལ་ཁང་ལོ་ཙཱ་བས། སོ་སོ་རིག་བཞིས་དགུ་པ། །མ་ཐོབ་དེ་སྲིད་ཆོས་ཀུན་གྱི། །ངེས་ཚིག་ཤེས་མིན་དེ་ཡི་ཕྱིར། །མཐའ་དག་སྡེབ་སྦྱོར་སུ་ཡིས་ཤེས། །ཞེས་གསུངས་པ་ལྟར་ནོར་འཁྲུལ་མ་རིག་པའི་ཆ་ཅི་རིགས་པ་བྱུང་སྲིད་ནའང་རང་རང་གིས་གལ་ཆུང་གཡས་ཆུང་དུ་འཇོག་པའི་གང་བྱུང་དེས་ཆོག་གི་ཧོར་ཆོད་བྱས་རིགས་ནི་མེད་པར་རློམ་ན། སླན་ཅད་བླ་མ་རྗེའི་ཞལ་སློབ་མཁས་པའི་དབང་པོ་བཟང་ལ་མང་བ་རྣམས་ཀྱིས་བདག་སོགས་རྨོངས་པའི་དབང་གིས་མ་ཤེས་འཁྲུལ་བས་མི་རིགས་མི་འཐད་པའི་ནོངས་པའི་དྲི་མ་གང་མཆིས་རིགས་པའི་ལམ་དུ་བསྲང་པའི་
དཔྱད་པས་གཙང་བར་མཛད་གལ་ཆེ་ཞིང་། དེ་ལྟར་གྲུབ་པའི་སྤར་གྱི་ཚོགས་དེ་དག་ཀྱང་སྡེ་བཞི་དགེ་བཅུའི་དཔལ་གྱིས་མངོན་པར་མཐོང་བའི་རྒྱལ་ཁབ་ཆེན་པོའི་བྱེ་བྲག །མདོ་ཁམས་བཀའ་བརྒྱུད་ཀྱི་གདན་ས་ཆེན་པོ་དཔལ་སྤུངས་ཐུབ་བསྟན་ཆོས་འཁོར་གླིང་གི་སྤར་ཁང་ཆོས་ཀྱི་བང་མཛོད་བྱམས་ཆེན་དགྱེས་པའི་དགའ་ཚལ་མཛོད་ལྔ་འདུས་པའི་གཞལ་མེད་ཀྱི་ཁད་པར་བཞུགས་སུ་གསོལ་ནས། ཕྱོག་མཐས་གཏུགས་པའི་བསྟན་འགྲོ་རིས་སུ་མ་ཆད་པའི་ཕན་བདེ་སྤེལ་བའི་དོན་དུ་ཆོས་ཀྱི་སྦྱིན་པ་ཉི་ཟླའི་སྣང་བ་ཡོད་པ་ད་སྲིད་དུ་རྒྱ་ཆེར་འཕེལ་བའི་ཉེར་བསྡོགས་ལ་གཞོལ་བར་མཛད་དོ། །ཆོས་མཛོད་ཆེན་པོ་འདི་སྤར་དུ་བསྐྲུན་པ་དེའི་ཚེ་ན་གོང་དུ་སྨོས་པའི་དད་སློབ་དག་གིས་བཞེངས་པ་དང་། ཉེར་མཁོའི་སྐོར་ཚན་རེ་གཉིས་གདན་ས་འདིར་སྔར་ནས་བརྐོས་ཟིན་པ་མ་གཏོགས་དེ་འཕྲོས་ཐམས་ཅད་གདན་ས་ཕན་ཚུན་གྱི་མཛོད་པ་ཟུང་དང་། མཁན་ཆེན་བླ་མ་མངྒལ་བཅས་ཀྱིས་ཟས་གོས་ནོར་གྱི་བྱེ་བྲག་གཏོས་ཆེ་བ་གཏོང་ནས་མཐའ་རྫོགས་པར་མཛད་པའི་སོང་ཐོ་རེ་རེ་བཞིན་འགོད་སྲོལ་འདུག་མོད། དམ་བུན་གཏོང་བའི་སྤྲོད་ལེན་ལྟ་བུའི་རྩིས་བཤར་ནི་མ་དགོས་པ། དེས་ན་ལེགས་བྱས་རྒྱ་ཆེན་པོ་འདིའི་ཤུགས་ལས་ཤེས་པར་འགྱུར་བས་དགེ་བ་སྤྱོམས་པའི་ངལ་བ་མ་བྱས་སོ། །གཉིས་པ་དགོས་ཆེད་དང་ཕན་ཡོན་ནི། །སྐྱེས་
རབས་ལས། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ནས། །སྐྱེ་རྒ་ན་འཆིའི་རྦ་རླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་འདོད། །ཅེས་དང་། མགོན་པོ་ཀླུ་སྒྲུབ་ཀྱིས། །དགེ་པ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཟོབ་པར་ཤོག །ཅེས་གསུངས་པ་ལྟར་གཙོ་བོར་རྒྱལ་བའི་བསྟན་པ་སྤྱི་དང་ཁྱད་པར་ཀུན་མཁྱེན་བླ་མ་རིན་པོ་ཆེའི་མཛོད་ཆེན་རྣམ་ལྔའི་བསྟན་པ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་ལ་མི་ཉམས་ཡུན་རིང་དུ་གནས་པ་དང་། རྗེ་བླ་མ་མཆོག་གི་ཟབ་དགོངས་ཀྱི་ལྷག་མ་ཆོས་ཀྱི་དབྱིངས་སུ་རྫོགས་པ་སོགས་བསྟན་པའི་རྩ་ལག་གོང་མ་ཞི་བར་གཤེགས་པ་རྣམས་ཀྱི་ཐུགས་དགོངས་ཡོངས་སུ་རྫོགས་པ་དང་། ད་ལྟར་ཞལ་བཞུགས་པའི་བསྟན་འཛིན་གྱི་སྐྱེས་བུ་རྒྱལ་བསྟན་ལ་ཕན་པའི་ཕྲིན་ལས་ཅན་ཕྱོགས་གང་ན་ཚུལ་ཇི་ལྟ་བུས་སུ་བཞུགས་པ་ཐམས་ཅད་ཞབས་པད་བསྐལ་བརྒྱར་བརྟན་ཅིང་བསྟན་འགྲོའི་དོན་རླབས་པོ་ཆེ་སྒྲུབ་པའི་ཕྲིན་ལས་ཕྱོགས་མཐར་རྒྱས་པ་དང་། རིས་སུ་མ་ཆད་པའི་དགེ་འདུན་བཙུན་པ་རྣམས་ཐུགས་མཐུན་ཁྲིམས་གཙང་བའི་སྒོ་ནས་མདོ་སྔགས་བཤད་སྒྲུབ་འཁོར་ལོ་གསུམ་གྱི་བྱ་བས་བསྟན་མཆོག་མཛེས་པར་སྒྲུབ་པ་དང་། གངས་ཅན་གྱི་ལྗོངས་མཐའ་དབུས་
ཀུན་ཏུ་ལེགས་བྱས་ཀྱི་མཐུ་ཟླ་འོད་རྗེས་སུ་སོན་པ་འདི་ཉིད་ཀྱིས་ཁྱབ་སྟེ་དཀར་ཕྱོགས་སྐྱོང་བ་རྣམས་ཀྱི་སྟོབས་ལྷག་པར་བདོ་བས་ས་ལ་སའི་བཅུད་ཕུན་སུམ་ཚོགས་ཤིང་། དུས་དང་མཐུན་པའི་དྲོད་དང་ཆར་དུས་སུ་འབབས་པས་ལོ་ཏོག་དང་འབྲས་བུ་ཕུན་སུམ་ཚོགས་པ་སྨིན་ནས། སྐྱེ་རྒུ་རྣམས་ཆོས་འབྱོར་ཚེ་དང་མངའ་ཐང་གོང་འཕེལ་དུ་བྱེད་ཅིང་། ནད་ཡམས་མཚོན་འཁྲུགས་བཀྲེས་སྐོམ་དབུལ་ཕོངས་སོགས་མི་འདོད་རྒུད་པའི་མིང་ཡང་མེད་པར་རྫོགས་ལྡན་གསར་པའི་དུས་སྟོན་ལ་ལོངས་སྤྱོད་པ་དང་། ས་གཞི་སྐྱོང་བ་ཐམས་ཅད་ཀྱི་སྟོབས་འབྱོར་དགུང་དུ་འཆེལ་བས་འཇིག་རྟེན་དགེ་བཅུའི་ཁྲིམས་ཀྱིས་བདེ་བར་བསྐྱང་ཞིང་། རྒྱལ་བསྟན་རིན་པོ་ཆེ་ལ་ཕུ་དུད་དང་གུས་པས་བསྙེན་བཀུར་བ་སོགས་ཆོས་ལྡན་རྒྱལ་པོའི་རྣམ་ཐར་འཛིན་པ་དང་། རྒྱ་ཆེན་ཆོས་མཛོད་འདི་ཉིད་ཀྱི་བདག་པོར་གྱུར་པ་རྗེ་བླ་མ་རྡོ་རྗེ་འཆང་ལ་ལྟོས་པའི་འབྲེལ་ཐོགས་ལུས་ཅན་ཀུན་དང་། ནམ་མཁའི་མཐས་གཏུགས་པའི་འགྲོ་བ་མ་ལུས་པ་ཚེ་རབས་དུ་མར་བསགས་པའི་སྒྲིབ་གཉིས་ཀྱི་དྲི་མ་དྲུང་ནས་བཅོམ་སྟེ། འཁོར་ལོ་བཞི་དང་ལྡན་པའི་རྟེན་བཟང་རིམ་པར་བརྒྱུད་དེ། རྒྱལ་བའི་བསྟན་པ་རིན་པོ་ཆེ་ཐོས་བསམ་སྒོམ་གསུམ་གྱི་སྒོ་ནས་རྒྱུད་ལ་ལེགས་པར་འབྱོར་ཞིང་། རིང་མིན་ཁྱབ་བདག་རྡོ་རྗེ་སེམས་དཔའི་གོ་འཕང་མྱུར་དུ་འཐོབ་པ་བཅས་ཀྱི་ཆེད་དུ་སྦྱོར་བ་འདི་ལྟ་བུ་
རྩོམ་པ་ལ་ཉེ་བར་ཞུགས་སོ། །དེ་ལྟར་བགྱིས་པའི་ཕན་ཡོན་ཀྱང་། ཆོས་ཀྱི་ཚུལ་ལ་རབ་ཏུ་རྟོག་ཅིང་མོས་ལ་སེམས་དྭང་བས་ཉན་པ་དང་། འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། རབ་ཏུ་འདོན་པ་དང་། སྟོན་པ་དང་། ཉེ་བར་སྟོན་པ་དང་། ལུང་འབོགས་པ་དང་། ཁ་ཏོན་བྱེད་པ་དང་། གཞན་དག་ལའང་རྒྱ་ཆེར་ཡང་དག་པ་སྟོན་པ་དང་། དེའི་དོན་རྣམ་པར་འགྲེལ་པ་དང་། ཡིད་ཀྱིས་རྗེས་སུ་རྟོག་པ་དང་། ཡོངས་སུ་དཔྱོད་པར་བྱེད་པ་དང་། ཆུང་ངུ་ན་གླེགས་བམ་དུ་ཆུད་པར་བྱས་ཏེ་འཆང་ངམ་བཞག་ནས་མཆོད་པ་སྣ་ཚོགས་ཀྱིས་མཆོད་པ་དེ་ལ་བསོད་ནམས་ཀྱི་ཕུང་པོ་ཚད་བཟུང་མེད་པར་རྒྱལ་བའི་ཡུམ་སོགས་ལས་ལན་གཅིག་མ་ཡིན་པར་གསུངས་ཤིང་། གཞན་ཡང་གསེར་འོད་དམ་པ་ལས། ང་ཡོངས་སུ་མྱ་ངན་ལ་འདས་པའི་འོག་ཏུའང་འཐོར་ཞིང་ནུབ་པར་མི་འགྱུར་བར་བྱེད་པ་དེ་ནི་བླ་ན་མེད་པའི་བྱང་ཆུབ་ཀྱི་རྒྱུ་ཡང་དག་པ་ལེན་པས་བསོད་ནམས་ཇི་སྙེད་ཅིག་འཐོབ་པར་འགྱུར་བ་ནི་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བརྗོད་ཀྱང་མཐར་ཐུག་པར་མི་འགྱུར་རོ། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། རིགས་ཀྱི་བུའམ་རིགས་ཀྱི་བུ་མོ་ལ་སོགས་པ་གང་ལ་ལ་ཞིག། མཆོད་པ་དང་བཀུར་སྟི་བྱས་ནས་ཡི་གེར་བྲིས་ཏེ་རྒྱ་ཆེར་སྤེལ་བ་
དང་། གཞན་དག་ལ་ཡང་དག་པར་སྟོན་པར་བྱེད་པས་ཐོབ་པའི་བསོད་ནམས་གང་ཡིན་པ་དེའང་དེ་བཞིན་ནོ། །ཞེས་གསུངས་པ་ལྟར། རྒྱལ་བའི་བཀའ་དྲི་མ་མེད་པའི་དགོངས་པ་སྙིང་པོར་བྱས་པའི་ལེགས་བཤད་མདོ་སྔགས་ཡན་ལག་དང་བཅས་པའི་དགོངས་འགྲེལ་འདི་དག་ལ་བྱ་བ་བྱས་པའི་འབྲས་བུའང་བཀའ་དངོས་ལ་བྱས་པའི་རྣམ་སྨིན་དང་དབྱེ་བ་མ་མཆིས་ལ། རྗེ་བླ་མའི་བསྟན་པ་ཞེས་བྱ་བ་ཡང་གསུང་རབས་ཆོས་ཀྱི་མཛོད་འདི་དག་ལ་བྱ་ཡིས། ཁང་མཁར་གནག་ཕྱུགས་ཟས་ནོར་ལོངས་སྤྱོད་འཁོར་འབངས་གཉེན་འདབས་ལ་བགྱི་བ་མ་ཡིན་པ་དེང་། དེང་གི་དུས་འདིར་མཛོད་ལྔའི་ཤིང་རྟ་ཀུན་མཁྱེན་བླ་མ་ཉིད་ཡི་གེའི་གཟུགས་སུ་བཞེངས་པས་སྟོན་པ་དང་བསྟན་པ་གཉིས་ཀའི་ངོ་བོར་གྱུར་བས་འདི་ལ་བྱ་བ་བགྱིས་པ་དག་བླ་མའི་ཞབས་ཏོག་ཐམས་ཅད་ཀྱི་ཕུལ་དང་མཆོག་རབ་དམ་པར་འགྱུར་བའི་ཕན་ཡོན་འཛད་དུ་མེད་པ་གོང་གི་ལུང་དེས་ཤེས་པ་དང་། གཞན་ཡང་སྐྱེ་འགྲོའི་བདེ་སྐྱིད་ཐམས་ཅད་སངས་རྒྱས་ཀྱི་བསྟན་པ་རིན་པོ་ཆེ་ཁོ་ན་ལ་རགས་ལས། བསྟན་པའང་དེ་འཛིན་གྱི་སྐྱེས་བུ་དམ་པ་རྣམས་ལ་རགས་ལས། དེ་རྣམས་ཀྱང་བདེ་བར་གཤེགས་པའི་གསུང་རབ་རིན་པོ་ཆེ་དང་། དེའི་དགོངས་པ་ཕྱིན་ཅི་མ་ལོག་པར་འགྲེལ་བའི་དབང་བརྙེས་པའི་མཁས་གྲུབ་ཀྱི་གསུང་ལ་ཐོས་བསམ་སྒོམ་གསུམ་བྱས་པ་ལས་
འབྱུང་། དེའང་ཡི་གེའི་ཕྱི་མོ་འཁྲུལ་མེད་དཔྱད་པས་གཙང་བར་བྱས་པ་ལས་འབྱུང་བའི་ཕྱིར། བསྟན་དང་འགྲོ་བའི་ཕན་བདེའི་རྩ་ལག་དམ་པ་གཅིག་པུར་གྲུབ་པ་ཉིད་ནི་དགོས་ཆེད་དང་ཕན་ཡོན་གྱི་སྙིང་པོར་བཟུང་བར་བྱའོ། །རྩ་བའི་ལྔ་པ་ཡོངས་སུ་བསྔོ་ཞིང་སྨོན་ལམ་ཤིས་པའི་ཚིག་གིས་མཐའ་བརྒྱན་པ་ནི་སྨྲ་དབང་དཎྜིིའི་དགོངས་པའི་ཉམས་ཀྱིས་སྤུད་དེ་ཅུང་ཟད་སྨྲ་བ་ལ་ཞུགས་པ་ནི་འདི་ལྟ་སྟེ། །ཨོཾ་སྭ་སྟི་ཤྲཱི་མངྒ་ལ་བརྡྷནྟུ། །སྤྲོས་དང་མཚན་མ་ནམ་མཁའི་གླང་པོ་མི་དམིགས་དྲི་ཡི་བཞོན་པས་ནི། །མཐའ་བྲལ་དག་པའི་མཁའ་དབྱིངས་འགྲམ་ངོགས་གཟུགས་སྐུ་ཉི་ཟླའི་ཚོམ་བུས་མཛེས། །གང་འདུལ་ཕྲིན་ལས་འོད་རིས་བྱེ་བས་སྲིད་ཞིའི་སྨག་ཆེན་མ་ལུས་ཟོས། །སྐུ་གསུམ་བདག་ཉིད་རྒྱལ་དང་སེམས་དཔས་དང་པོ་ཉིད་དུ་རྟག་སྐྱོངས་ཤིག ༡། རྣམ་དག་སྨོན་ལམ་རྒྱ་མཚོའི་མཐར་གཤེགས་དོན་གཉིས་ནོར་བུས་འབྱོར་བའི་མཛོད། །གདོད་ནས་རབ་བརྙེས་ཐུབ་བ་རྣམས་ཀྱི་ཐུབ་མཆོག་ཟས་གཙང་རྒྱལ་པོའི་སྲས། །ཆོས་ཀྱི་གདུང་འཚོ་བ་དཔའ་བོ་ཆེན་པོ་མཉྫུ་ཤྲཱི་དང་སྤྱན་རས་གཟིགས། མཐུ་ཆེན་ཐོབ་དང་ཀུན་ཏུ་བཟང་སོགས་བསོད་ནམས་སྤེལ་ཕྱིར་གྲོགས་སུ་སྦྱོན། ༢། ཆོས་ཀྱི་རྗེས་སྐྱེས་དགྲ་བཅོམ་འཕགས་ཚོགས་བདེན་ཚིག་གྲུབ་པའི་ལྷ་དང་མིའི། །དྲང་སྲོང་ཆེ་རྣམས་མངོན་འདོད་འབྲས་བཟང་བཟང་རྒུའི་ཁ་ཟས་རོ་བརྒྱ་
པས། །ནམ་ཡང་མི་མཚོན་ཞི་སྒོ་གཅིག་པུ་རྣམ་མཁྱེན་རོ་བདའ་མྱང་བའི་སླད། །ཡོངས་བསྔོ་སྨོན་པའི་ཡིད་ཀྱི་དོ་ར་ར་དགའ་བའི་གཉེན་དུ་གར་མཛོད་ཅིག༣། གཏིང་མཐའ་མི་མངོན་འཁོར་བའི་གཟེབས་འདི་པདྨའི་ཚལ་ལྟར་དགྱེས་རོལ་པས། །ཕན་མཛད་ཕྲིན་ལས་ཕྱོགས་དང་དུས་དང་གནས་སྐབས་ཀུན་ཏུ་རབ་འབྱེད་པ། །ཉི་མ་སྟོང་གི་གཟི་བརྗིད་མོག་མཛད་ཀུན་ཕན་འོད་ཀྱི་དཀྱིལ་འཁོར་ཅན། །དཔལ་ལྡན་བླ་མ་ཆོས་ཀྱི་ཉི་མའི་ཕྲིན་ལས་བཟང་པོའི་རེ་ཁཱ་འདིར། ༤། གཅིག་ཏུ་གུས་ལྡན་འདམ་སྐྱེས་གཞོན་ནུ་ཡོངས་སུ་བྱེ་བའི་ཚལ་མཚུངས་པ། །བློ་ལྡན་རྣམས་ཀྱི་བློ་གྲོས་དག་པའི་འདུ་བྱེད་བཟང་པོས་ཉེར་བསྐྲུན་ལས། །ལེགས་བྱས་རྨད་བྱུང་འདོད་འབྱུང་གཏེར་གྱི་དཔལ་ཡོན་ཐུང་ངུར་བཏང་བཟོད་པའི། །རྣམ་དཀར་རྒྱུ་འབྲས་དུས་རིང་མི་འཛད་ལྷ་ཡི་ཆུ་བོ་གངྒཱའི་རྒྱུན། ༥། རྣམ་མཁྱེན་རྒྱ་མཚོར་རོ་གཅིག་གྱུར་ལས་ཕན་བདེའི་འདོད་འཇོ་ནོར་བུའི་གཏེར། །བསྟན་དང་སྐྱེ་རྒུའི་ལོངས་སྤྱོད་མཆོག་ཏུ་འཁོར་བའི་ཕྱི་མཐར་གཏུགས་པ་མེད། །དེ་སྲིད་དགེ་བའི་ནོར་གྱི་གྲུ་ཆར་རྟག་ཏུ་འབབས་པའི་དགའ་སྟོན་གྱིས། །སྲིད་ཞིའི་ཕོངས་པའི་རྒུད་པ་མཐའ་དག་མིང་གི་ལྷག་མ་ཉིད་གྱུར་ཅིག༦། རིས་སུ་མ་ཆད་ཐུབ་པའི་བསྟན་པ་མདོ་སྔགས་རིག་གཞུང་ཡན་ལག་བཅས། །ཕན་བདེའི་གཞི་
རྟེན་དཔག་བསམ་ལྗོན་བཟང་མཆོག་ཏུ་རྒྱས་པའི་གྲིབ་བསིལ་དུ། །ཐོས་བསམ་སྒོམ་པའི་བྱ་བར་བརྩོན་བཞིན་བདེ་བར་ངལ་འཚོ་བརྟེན་པ་ཡི། །བདེ་བའི་ལོངས་སྤྱོད་རྨད་དུ་བྱུང་ལ་དགའ་བའི་སྟོན་མོ་འཕེལ་གྱུར་ཅིག༧། ཆོས་བཞིན་སྤྱོད་ཅིང་ཆོས་བཞིན་འདོམས་པའི་ཕན་མཛད་དགེ་བའི་བཤེས་གང་ཡིན། །འཆད་རྩོད་རྩོམ་པས་བསྟན་པ་འཛིན་མཛད་སྐྱེས་བུ་ཉི་མ་གང་སུ་དག །ཆོས་ཀྱི་ཁྲི་ལ་ཞབས་པད་མི་གཡོ་རྡོ་རྗེའི་ཆོས་བདུན་ངོ་བོ་རུ། །འཚོ་ཞིང་གཞེས་ནས་ཕྲིན་ལས་འོད་རིས་ཕྱོགས་དུས་ཀུན་ཁྱབ་ནུབ་མེད་ཤོག༨། ཤིང་རྟ་ཆེན་པོ་རྣམ་བརྒྱད་རིང་ལུགས་བཀྲ་ཤིས་ཀུན་གྱི་བཀྲ་ཤིས་པའི། །ངོ་མཚར་ཆོས་མཛོད་རྒྱ་མཚོའི་བདག་ཉིད་ཆོས་ཀྱི་འཁོར་ལོས་སྒྱུར་བ་ཡི། །རྗེ་བཙུན་བླ་མའི་དགོངས་པ་གང་ཡིན་མྱུར་དུ་བསྐངས་ནས་ཐུགས་རྗེའི་རྩལ། །མཆོག་གི་སྤྲུལ་པའི་ཉིན་བྱེད་མྱུར་གསལ་ཕྲིན་ལས་འོད་སྣང་རྒྱས་གྱུར་ཅིག༩། ཛམ་བུ་གླིང་འདིར་སྔ་ན་མ་བྱོན་ངོ་མཚར་ཨུ་དུམྦཱར་དང་། །སངས་རྒྱས་བྱོན་མཚུངས་ཟབ་རྒྱས་གདམས་པ་ནོར་བུའི་གཏེར་མཆོག་མཛོད་ཆེན་ལྔའི། །ཤིང་རྟའི་ལམ་སྲོལ་ནམ་ཡང་མི་ནུབ་དུས་རིང་བསྟན་པ་རིས་མེད་ཀྱི། །སྲོག་གི་ཟུངས་སུ་ཉི་ཟླའི་བགྲོད་པ་ཇི་
སྲིད་དེ་སྲིད་སྣང་གྱུར་ཅིག༡༠། གངས་ཀྱི་རི་ཡིས་ཁོར་ཡུགས་མཛེས་པ་བྱང་ཕྱོགས་བསིལ་ལྡན་མཐའ་དབུས་སུ། །ནད་མཚོན་མུ་གེ་དུས་ཀྱི་འཇིགས་པ་མཚོན་ཆ་རྣོན་པོའི་རེག་བྱ་གང་། །རྣམ་དཀར་བཟང་པོ་རྒྱལ་བས་བསྔགས་པའི་ལེགས་དཔལ་རབ་བརྟན་རྡོ་རྗེའི་གོ། འདི་དག་མཐུ་ཡིས་གླགས་ལྟའི་གོ་སྐབས་ནམ་ཡང་རྙེད་པར་མ་གྱུར་ཅིག༡༡། ནད་མེད་ཚེ་རིང་འབྱོར་པས་མངོན་མཐོ་ངེས་ལེགས་ལམ་བཟང་བདེར་ཞུགས་ནས། །གནས་སྐབས་ཕན་དང་མཐར་ཐུག་བདེ་བའི་རྒྱུ་འབྲས་བཟང་པོ་མྱང་གྱུར་པའི། །སྐྱེ་རྒུ་རྣམས་ཀྱིས་ས་ཆེན་འགེང་ཞིང་རྩོད་ལྡན་བརྟན་པ་ཅིག་ཅར་འཕྲོག །རྫོགས་ལྡན་དང་པོའི་དགའ་སྟོན་མགྲོན་ཁུག་བདེ་སྐྱིད་གླུ་དབྱངས་སྙན་གྱུར་ཅིག༡༢། མཐོ་རིས་པ་རྣམས་ཡང་དག་ལྟ་ལ་ཡིད་རབ་ཞུགས་པ་དེས་དྲངས་ཏེ། །རྣམ་མཁྱེན་རྒྱལ་བའི་ཁང་བཟང་ཉམས་དགར་ཞེན་མེད་རོལ་པའི་རྩེད་འཇོ་བཅས། །གཞན་དོན་ལས་ལ་མཐུ་ཆེན་རབ་བརྙེས་ཕན་བདེ་སྦྱིན་པའི་བྱེད་པོ་རུ། །མྱུར་དུ་བྱང་ཆུབ་སྤྱོད་པ་མཆོག་གི་ལོངས་སྤྱོད་ཐང་མར་བརྡལ་གྱུར་ཅིག༡༣། ངན་པར་སོང་བའི་དམྱལ་དང་ཡི་དྭགས་དུད་པར་འགྲོ་བའི་གནས་ངན་ལེན། །ལས་ཀྱིས་བྲིས་པའི་གནས་རིས་དེ་དག་མྱུར་དུ་རང་སར་ཡལ་གྱུར་ནས། །ཞི་བ་མཆོག་གི་
པདྨའི་ཚལ་ན་བདེ་བར་ངལ་འཚོ་དགེ་བའི་མདངས། །ཅི་ཡང་གསལ་བའི་མཛེས་པ་རབ་ངོམས་རྟག་ཏུ་གཞན་ཕན་མཐུ་ལྡན་ཤོག། ༡༤། བརྩེ་མེད་རླངས་པོའི་སེམས་ཀྱི་ཚེར་མས་རང་དང་གཞན་ལ་འཚེ་སྦྱིན་པའི། །ཤ་ཟ་སྲིན་པོ་བདུད་རིས་འབྱུང་ཚོགས་རྩུབ་མོའི་བསམ་སྦྱོར་རབ་འདོར་ནས། །ཞི་བ་བསིལ་བ་བདེ་ལེགས་སྒོར་གྱུར་བྱམས་དང་སྙིང་རྗེའི་བདུད་རྩི་ཡིས། །རང་རྒྱུད་རླན་བྱས་ཕན་སེམས་བཟང་པོའི་མྱུ་གུ་ཅི་ཡང་འཁྲུངས་གྱུར་ཅིག༡༥། མི་སྲུན་སེམས་ཀྱི་ཞིང་ས་དག་ན་ལོག་པའི་སྨོན་ལམ་བཏབ་པའི་འབྲས། །ཀླ་ཀློ་ལྷ་མིན་གདུག་པའི་དཔུང་གིས་རྒྱལ་བའི་བསྟན་ལ་སྐབས་བཙལ་བའི། །བྱ་བ་དེ་ལ་གཅིག་ཏུ་བྲེལ་གང་ལེགས་བྱས་འདི་མཐུའི་སྐྱེས་བྱིན་པས། །ཕྱིན་ལོག་བསམ་སྦྱོར་མོད་ལ་དོར་ནས་བསྟན་འདིས་གདུལ་བའི་ཞིང་གྱུར་ཅིག༡༦། ས་ཆེན་ཁྱོན་འདི་ཆོས་དང་སྲིད་ཀྱི་ཕྲིན་ལས་གདུགས་དཀར་ཁྱབ་བཀོད་པ། །བསྟན་པའི་རྩ་ལག་འགྲོ་བའི་མགོན་གྱུར་འཇམ་དབྱངས་གོང་མ་མཆོད་ཡོན་གྱི། །ཆབ་སྲིད་མི་ཉམས་ནམ་མཁའི་མཐའ་ཀླས་གོང་ནས་གོང་དུ་རྒྱས་པའི་གཉེན། །ཡར་གྱིས་བསྐྱེད་པའི་ཟླ་བ་ཇི་བཞིན་ལེགས་བྱས་འདིའི་མཐུ་དེར་སྨིན་ཤོག༡༧། འདི་དང་འདིར་འབྲེལ་ལྟོས་པར་བཅས་གང་གནས་སྐབས་མཐོ་རིས་ཡོན་ཏན་
འབྱོར། །སྡིག་ལྟུང་སྒྲིབ་པའི་རྩ་བར་བསྟོང་བསོད་ནམས་ཡེ་ཤེས་ཚོགས་ཆེན་རྫོགས། །མཐར་ཐུག་རྡོ་རྗེ་བཞི་ཡི་རང་བཞིན་དཔལ་ལྡན་བླ་མའི་གོ་འཕང་མཆོག །མྱུར་བ་ཉིད་ཐོབ་དོན་གཉིས་ནོར་ལ་རང་དབང་སྤྱོད་པ་ཉིད་གྱུར་ཅིག༡༨། རིས་སུ་ཆད་མེད་ཐུབ་བསྟན་ཡོངས་ཀྱི་དགོངས་པ་འགྲེལ་པའི་བསྟན་བཅོས་ཆེ། །འཕགས་པའི་ཡུལ་གྱི་ཤིང་རྟ་མཆོག་རྣམས་ལེགས་པར་བཤད་དང་ཚུལ་མཚུངས་པ། །དཔལ་ལྡན་ཆོས་རྗེའི་གསུང་གི་མཛོད་རྣམས་ཁོར་ཡུག་ཆུ་ཡི་སྐ་རགས་ཅན། །རི་བོའི་ཁོངས་ནས་ཡོངས་སུ་ཁྱབ་ཅིང་རྟག་ཏུ་ཉམས་པ་མེད་གྱུར་ཅིག༡༩། སྨོན་པའི་ངག་གི་ས་བོན་འདི་ཀོ་པདྨའི་སྣལ་ལྟར་རབ་ཕྲ་ཡང་། །དོན་གྱི་ཞིང་ས་མཆོག་ཏུ་གཤིམ་ལ་འབད་པས་བཏབ་པར་རློམ་པ་ལ། །སྐྱབས་གསུམ་ངོ་བོ་བླ་མ་མཆོག་གི་ཐུགས་བསྐྱེད་སྨོན་པའི་ཆབ་ཀྱིས་བྲན། །དོན་གཉིས་རྫོགས་པའི་ལྗོན་པ་བཟང་པོ་སྲིད་ཞིའི་གྲིབ་བསིལ་སྣུམ་ལྡན་ཤོག༢༠། ཕུན་སུམ་ཚོགས་ཀུན་ཡོངས་སུ་འདུ་བ་ཆུ་ཀླུང་རྒྱ་མཚོར་གཞོལ་བ་བཞིན། །བསྟན་པ་རིན་ཆེན་དེར་འཛིན་བཅས་ཏེ་བཀྲ་ཤིས་ཀུན་གྱི་སྙིང་པོའི་དཔྱིད། །རྟག་པར་འབར་བའི་གཟི་བརྗིད་མི་ནུབ་ཉི་མ་བྱེ་བའི་འོད་མདངས་ཀྱིས། །ས་གསུམ་ཀུན་སྣང་རྒུད་པའི་མུན་བཅོམ་བཀྲ་ཤིས་འཛམ་གླིང་ཀུན་ཁྱབ་ཤོག༢༡། སླར་ཡང་སྨྲས་པ། །གང་ཞིག་དོན་ལྡན་ཆོས་དང་ཉེར་འབྲེལ་
ཞིང་། །ཁམས་གསུམ་ཉོན་མོངས་མེ་འཇིལ་ཞི་བའི་སྒོ། །རྣམ་གཡེང་མེད་ཡིད་ཅན་གྱིས་རབ་བཤད་པའི། །ཐར་པའི་ལམ་སྟོན་འཆོས་སྐྱོབ་ཡོན་ཏན་ཅན། །ཐབ་པའི་དགོངས་པ་འགྲེལ་ལ་མི་འཇིགས་པའི། །སྤོབས་པ་ནམ་མཁའི་ཀློང་ལྟར་རབ་ཟབ་པ། །ཀུན་མཁྱེན་ཆོས་ཀྱི་རྒྱལ་པོའི་ལེགས་གསུང་མཛོད། །འདིར་བརྟེན་སྲིད་ཞིའི་དབུལ་བ་གཅིག་ཅར་འཇོམས། །དེ་ཕྱིར་འཕྲུལ་གྱི་ཕྱི་མོ་ལངྐའི་གྲོང་། །གཅིག་ལས་དུ་མར་འཆར་བ་བཟོའི་རིག་བྱེད། །ངོ་མཚར་རྒྱལ་བའི་ཕྲིན་ལས་འདིར་དྭངས་པའི། །ཚུལ་ལས་བརྩམས་ཏེ་གཏམ་གྱི་སྦྱོར་བ་བྱས། །དཀར་པོ་རྣམ་པར་འཆར་བའི་སྣང་བ་གསར། །ཅུང་ཟད་ཐོབ་པ་མཆིས་གང་བདག་དང་གཞན། །བྱང་ཆུབ་ཆེན་པོའི་ཤུལ་ལམ་མཚོན་པའི་ཕྱིར། །ཡོངས་བསྔོའི་རྒྱས་བཏབ་རྒྱལ་བའི་རྗེས་སུ་སློབ། །དཔལ་ལྡན་བླ་མའི་བསྟན་པ་རྒྱས་པ་དང་། །མཁའ་ཁྱབ་འགྲོ་ཀུན་དེ་ཡི་གོ་འཕང་ལ། །ཚོགས་མེད་ཕྱིན་ཏེ་དོན་གཉིས་ནོར་བུའི་གཏེར། །བསམ་རྒུ་འབྱོར་བའི་དཔལ་དུ་ཐོབ་པར་ཤོག། བདག་སོགས་སྐྱེ་དང་ཚེ་རབས་བརྒྱུད་མ་རུ། །བླ་མ་མཆོག་གི་བསྟན་ལ་སྲི་ཞུའི་སྒོ། །གོང་ནས་གོང་དུ་སྤེལ་བའི་མཐུ་སྟོབས་དང་། །ལྡན་པའི་དལ་རྟེན་ལྗོན་བཟང་བཟུང་གྱུར་ཅིག། ནམ་ཞིག་བསྐལ་བཟང་རྒྱལ་བ་བརྒྱ་ཕྲག་བཅུའི། །ངོ་མཚར་མ་ལུས་བཟླུམས་པ་མོས་པའི་མཚན།
ཞིང་འདིར་རྒྱལ་རྔ་ཐོག་མར་བསྒྲགས་པ་ཡི། །ཞི་བའི་དབྱངས་སྙན་རྣ་བར་སིམ་གྱུར་ཅིག །ཅེས་ཀུན་མཁྱེན་ཆོས་ཀྱི་རྒྱལ་པོ་འཇམ་མགོན་བླ་མ་ཐམས་ཅད་མཁྱེན་པའི་གསུང་འབུམ་རིན་པོ་ཆེ་གླེགས་བམ་ས་བཅུའི་གྲངས་ལྡན་སྤར་དུ་ཇི་ལྟར་བསྒྲུབས་པའི་ཚུལ་ལས་བརྩམས་པའི་དཀར་ཆག་མདོར་བསྡུས་པའི་ཚིག་གི་ལམ་དུ་དྲངས་པ་འདིའང་། སྣང་མཛད་འཇམ་པའི་རྡོ་རྗེ་ལོ་ཆེན་བླ་མ་ཐམས་ཅད་མཁྱེན་གཟིགས་ཆེན་པོ་ཉིད་ཀྱི་ཞབས་རྡུལ་སྤྱི་བོར་རེག་པའི་སྐལ་བཟང་སློབ་བུའི་ཐ་ཤལ་དུ་གཏོགས་པ། དུས་ངན་སྐྱེ་བོའི་ཁྲོད་ན་བྱ་རོག་དཀར་པོའི་ངང་ཚུལ་ཅན་མུ་ཅོར་སྨྲ་བའི་རྨོངས་བརྟུལ་ཀརྨ་བཀྲ་ཤིས་ཆོས་འཕེལ་བློ་གྲོས་རྒྱ་མཚོའི་སྒྲ་དབྱངས་སམ། འབྱུང་དུ་རུང་བའི་ཡོན་ཏན་ལ་སྨོན་པའི་བཏགས་མིང་དུ་སྒྲ་དབྱངས་སྙིང་པོའི་ཟླ་བ་ལེགས་བཤད་འོད་སྣང་རབ་ཏུ་རྒྱས་པའི་སྡེས་གངས་རིའི་ལྗོངས་ཀྱི་ཤམྦྷ་ལ་དཔལ་སྤུངས་ཐུབ་བསྟན་ཆོས་འཁོར་གླིང་གི་ཆོས་གྲྭ་ཆེན་པོར་སུག་བྲིས་སུ་བགྱིས་པ་དགེ་ལེགས་འཕེལ།། །།