དགུང་ལོ་བཅུ་གསུམ་པ།
དགུང་ལོ་བཅུ་གསུམ་པ་ས་ཁྱི་ཧོར་ཟླ་གསུམ་པའི་ནང་དུ་བོན་ལུང་རིན་པོ་ཆེ་དང་མཉམ་དུ་དབུས་སུ་བཏེག་ནས་གྲྭ་ཕྱི་བྲག་སྒྲུབ་ཏུ་གསུང་སྤྲུལ་རིན་པོ་ཆེ་ཡབ་སྲས་བཞུགས་པའི་སར་ཡབ་རྗེ་རིག་འཛིན་ཆེན་པོ་ཡང་ཕེབས་འདུག་པའི་ཞབས་ཕྱིར་དཀྲིས་ཏེ་དར་གླིང་དུ་ཕེབས། དེ་ནས་མི་རིང་བར་གཅུང་རྒྱལ་སྲས་རིན་པོ་ཆེའི་གཟིམས་སྤྱིལ་གྱི་ཨར་ལས་སྟོབ་པར་ཡབ་སྲས་ལྷན་དུ་འཕྱོངས་རྒྱས་དཔལ་རིར་ཐེགས་ཏེ། ཡབ་རྗེའི་དྲུང་དུ་སྤྲུལ་པའི་སྐུ་འཕྲིན་ལས་རྣམ་རྒྱལ་བའི་ཞོར་ལ་པཎ་ཆེན་གྱི་རིག་འཛིན་ཡོངས་འདུས་དང་། ཞིག་པོ་གླིང་པའི་གཏེར་ཆོས་ཡོངས་སུ་རྫོགས་པའི་དབང་ལུང་། ཞིག་གླིང་དང་སོག་ཟློག་པའི་བཀའ་འབུམ་གྱི་ལུང་རྣམས་དང་སྔགས་སྡེབས་དང་རླུང་འཁོར་སོགས་ཀྱི་ཕྱག་ལེན་ཡང་གསན་ཞིང་། པཎ་ཆེན་ལུང་རིགས་རྒྱ་མཚོ་དང་ཐབས་ཅིག་ཏུ་བླ་མ་ཡང་ཐིག་གི་དབང་ལུང་མྱོང་ཁྲིད་དང་བཅས་པ། གྲུབ་མཐའ་མཛོད། ཡིད་བཞིན་མཛོད་རྩ་འགྲེལ། གཡུ་ཐོག་སྙིང་ཐིག སྨན་དཔྱད་རྒྱུད་བཞི། བདུད་རྩི་བུམ་པ་སོགས་མང་དུ་གསན། གཙོ་བོར་ཡང་ཐིག་གི་ཁྲིད་ཉམས་ཁྲིད་དུ་མཛད་པས་ཏིང་ངེ་འཛིན་ཁྱད་པར་ཅན་འཁྲུངས་ཏེ། ཡབ་རྗེའི་ཞལ་ནས། གཞན་གྱིས་ལོ་ཟླར་བསྒོམས་པ་ལས་ཁོས་ཞག་རེ་བསྒོམས་པ་ཏིང་ངེ་འཛིན་སྐྱེ་ཚུལ་བཟང་བར་འདུག་ཅེས་ཤིན་ཏུ་མཉེས་པར་གྱུར། ཡབ་རྗེའི་ཞབས་ཕྱིར་པཎ་ཆེན་ལུང་རིགས་རྒྱ་མཚོ་ལའང་བྲག་དམར་འོ་བྲན་ལུགས། ཀར་ལུགས་ཀྱི་ཆོས་སྤྱོད་རབ་གསལ། ཀུན་རིག་སྒྲུབ་དཀྱིལ་རྣམ་གྲོལ་སྒོ་ཅན། ཆ་ལག་ཕུང་པོ་རྣམ་པར་སྦྱོང་བ་དང་བཅས་པའི་ལུང་། ཆོས་སྐྱོང་མ་མགོན་འཁོར་ལྔའི་རྗེས་གནང་དང་སྐང་གསོའི་ལུང་རྣམས་གསན། དེ་ནས་དཔལ་འབྱོར་ཆོས་སྡིངས་སུའང་ཐོགས་ཤིག་བཞུགས་ནས་རིམ་པར་དར་གླིང་དུ་ཕེབས་ཏེ། ཡབ་རྗེ་རིག་འཛིན་ཆེན་པོ་ལ་གསང་སྙིང་གི་རྒྱ་འགྲེལ་སྤར་ཁབ་དང་། བོད་འགྲེལ་གཡུང་ཊཱིཀ་གི་བཤད་པ་རྒྱ་ཆེར་གསན་ཞིང་། དཀོན་ཅོག་འགྲེལ། ཕྱོགས་བཅུ་མུན་སེལ་སོགས་ཀྱི་ལུང་ཡང་སྐབས་ཅི་རིགས་པར་གསན། གཞན་ཡང་སྒོ་མོ་ཆོས་རྗེ་ཤཱཀྱ་རིན་ཆེན་དང་མཉམ་དུ་དབུ་སེམས་གཉིས་ཀྱི་ཐུགས་བསྐྱེད། ཐེག་མཆོག་མཛོད། ངལ་གསོ་སྐོར་གསུམ་རྩ་འགྲེལ། སྤྱི་དོན་བསྡུས་དོན་ཁྲིད་ཡིག་དང་བཅས་པ། རང་གྲོལ་སྐོར་གསུམ། སེམས་ཉིད་རང་གྲོལ་གྱི་དོན་ཁྲིད། ཟབ་མོ་ཡང་ཐིག སྙན་བརྒྱུད་གསང་སྐོར་སོགས་དབང་ལུང་མན་ངག་མང་པོ་དང་། ཀརྨ་གླིང་པའི་སྙན་བརྒྱུད་ཀྱི་འཕོ་བའང་གསན། དེའི་ཚེ་གནད་གསུམ་བཅུན་པར་མཛད་པ་ཙམ་གྱིས་དབུ་གཙུག་འཕར་བ་སོགས་འབྱོངས་པའི་རྟགས་མངོན་དུ་གྱུར། ཨ་བྷ་ཡའི་རྣམ་འཕྲུལ་ཆོས་རྗེ་ཤཱཀ་རིན་པ་ལས་གསོ་རིག་པ་གཅེར་མཐོང་གི་ཁྲིད། དམ་པའི་མཁྱུད་སྤྱད་དཀར་ནག་ཁྲ་གསུམ། མགོན་པོ་ཨ་གྷོ་རའི་སྐོར་རྣམས་གསན། སྐབས་ཤིག་ཡབ་རྗེའི་དྲུང་དུ་མ་ཏི་ལུགས་ཀྱི་འཇམ་དཀར་གསན་ནས་ལྷག་པའི་ལྷར་བསྙེན་པར་མཛད་ཅིང་། ཁྱད་པར་ཟླ་བ་གཟས་བཟུང་བ་དང་བསྟུན་ཆོས་རྗེ་ཤཱཀ་རིན་པ་དང་མཉམ་དུ་མ་ཤའི་ལས་སྦྱོར་མཛད་པ་ན་རྗེ་ཉིད་ཀྱི་དེ་ལ་མྱུ་གུ་རིང་པོར་ཐོན་པས་ཁོང་པ་ཡང་ཆེས་ཆེར་ལྷག་པའི་ཡ་མཚན་སྐྱེས་ཤིང་། དེ་ནས་ཐུགས་རབ་ཀྱི་རྩལ་ཐོགས་པ་མེད་པར་གྱུར་ཏེ། ད་ལྟ་ཡང་ཆོས་འཆད་རྩོམ་སོགས་གློ་བུར་དུ་མཛད་དགོས་པའི་རིགས་ལ་གཟིགས་རྟོག་མ་གྲུབ་ན་དར་རེ་བཞུགས་རྗེས་ཐོགས་པ་མེད་པར་ཤར་གྱིས་འོང་བས་ལྷག་པའི་ལྷས་རྗེས་སུ་བཟུང་བར་གོར་མ་ཆག་སྙམ་མོ། །གང་ཐུགས་དྲི་བྲལ་དངུལ་དཀར་མེ་ལོང་ངོས། །འཇམ་དབྱངས་མཁྱེན་པའི་གཟུགས་བརྙན་ཤར་བ་ན། །ཤེས་བྱའི་ཆོས་ཀུན་གཟིགས་པའི་སྤྱན་ཡངས་པོ། །དཔལ་ལྡན་ནོར་གྱི་རྩ་ལག་ཇི་བཞིན་གྱུར། །