དགུང་ལོ་བཅུ་དྲུག་པ།

དགུང་ལོ་བཅུ་དྲུག་པ་ལྕགས་གླང་ལོར་གསུང་སྤྲུལ་རིན་པོ་ཆེ་ཡབ་སྲས་བསམ་ཡས་ཀྱི་རབ་གནས་སུ་ཕེབས་པའི་ཞག་ས་ཁྲབ་མོ་ཤོལ་ཁྲོད་དུ་གནང་བའི་དྲུང་དུ་ཕེབས་ནས་གསུང་སྤྲུལ་རིན་པོ་ཆེར་ཚེ་ཁྲིད་རྡོར་ཕྲེང་གི་དབང་རྒྱས་པ་སོགས་ཟབ་ཆོས་འགའ་ཞིག་གསན། དེའི་སོས་ཡབ་རྗེ་ཉིད་ཆུ་བོ་རིར་ཐེགས་པ་ཕྱིར་ཕེབས་ནས་ལོ་འདི་ནང་དུ་གཞན་ངོར་སྤྱན་མི་གསལ་བའི་ཚུལ་བསྟན་པའི་དབང་གིས་ཕལ་ཆེར་གདན་ས་རང་དུ་བཞུགས་ཏེ། སྤོ་བོ་སྤྲུལ་སྐུའི་གསོལ་དཔོན་སོགས་མདོ་ཁམས་དང་ལ་སྟོད་སོགས་ཕྱོགས་ཀྱི་ཆོས་ཞུ་བ་མང་པོ་ལ་དབང་རྣམས་ཡབ་རྗེ་དང་། ལུང་རྣམས་རྗེ་ཉིད་ནས་སྤྱན་ཚབ་མཛད་དེ་དབང་ལུང་གཏོས་ཆེ་བ་སྩལ་ཞིང་། ཕལ་ཆེར་ཡབ་རྗེ་ལས་འབེལ་གཏམ་གྱི་སྒོ་ནས་བསྐྱེད་རྫོགས་ཀྱི་ཟབ་གནད་མང་པོ་ལ་ཞུན་ཐར་གཅོད་པས་དུས་འདའ་བར་མཛད་དོ། །