དགུང་ལོ་ཉེར་བཞི་པ།
དགུང་ལོ་ཉེར་བཞི་པ་ས་བྱ་ཧོར་ཟླ་དང་པོའི་ཚེས་བདུན་ནས་བཟུང་ཞི་ཁྲོ་རིགས་བསྡུས་དོང་སྤྲུགས་ཀྱི་དཀྱིལ་འཁོར་རྡུལ་ཚོན་ལ་བརྟེན་པའི་སྒྲུབ་མཆོད་སྦྱིན་སྲེག་དང་བཅས་པ་ཆོ་འཕྲུལ་གྱི་རིང་རྒྱས་པར་མཛད། དཀྱིལ་འཁོར་དེའི་སྟེང་ནས་གཅུང་རྒྱལ་སྲས་རིན་པོ་ཆེས་དབུས་ཆོག་རོགས་ཀྱི་བན་གཙང་བ་བདག་ཅག་བཅུ་སྐོར་ཙམ་ཡོད་པར་དབང་བཀའ་ཡང་སྩལ། དེ་ནས་ཟླ་ཤས་ཀྱི་བར་གཟིམ་ཆུང་འཆི་མེད་སྦུག་ཏུ་སྐུ་མཚམས་དམ་པར་མཛད་དེ་ཐུགས་དམ་ལ་རྩེ་གཅིག་ཏུ་བཞུགས་ཤིང་སྣ་དཀར་རྩེའི་ཞབས་དྲུང་སྔགས་འཆང་ཆེན་པོ་ཆེད་དུ་ཕེབས་པར་དགོངས་བཞེད་ལྟར། རིག་འཛིན་ཡོངས་འདུས་ཀྱི་དབང་ལུང་། ཞི་ཁྲོ་དགོངས་པ་རང་གྲོལ་གྱི་ལུང་། དམ་པ་དམར་པོའི་བདུད་རྩིའི་དབང་ལུང་། ཕྲེང་པོ་བའི་གྲོལ་ཐིག་གི་དབང་དང་བསྟན་སྐྱོང་མའི་སྲོག་གཏད་རྣམས་སྩལ། ཧོར་ཟླ་བརྒྱད་པའི་ནང་དུ་གོང་ནས་བཟང་ཡུལ་གྲོང་གསར་གྱི་ས་རིགས་སྐོར་སྦྱོར་འཇགས་སྩལ་བ་རྩིས་བཞེས་སུ་ཡུམ་གྱིས་ཕེབས་པ་ན་ཡུམ་དེར་སྐུ་ཤིན་ཏུ་སྙུན་པ་བྱུང་བར་ད་རེས་སྙུན་པ་འདིས་སྐྱོན་པ་མི་ཡོང་བ་འདུག་སྟེ་སྐུའི་རིམ་གྲོར་འགྲོ་གསུངས། སྐད་ཆ་གསན་མ་ཐག་རྗེ་ཉིད་གཅུང་རིན་པོ་ཆེ་དང་བཅས་དར་གླིང་ནས་སྲོད་འཁོར་ལ་ཐེགས་པས་བཟང་ཡུལ་བཀྲ་ཤིས་སྟེང་དུ་ཐོ་རངས་ཁར་ཕེབས། དེར་གྲུབ་ཆེན་རིན་པོ་ཆེ་དང་བཀྲ་ཤིས་ཚེ་འཕེལ་སོགས་ཀྱིས་སྨན་བཅོས་དང་དབང་བྱིན་རླབས་སྤོང་དག་སོགས་སྐུ་རིམ་ལ་ཐུགས་བརྩོན་མཛད་པས་མི་རིང་བར་སྐུ་དྭངས། དེ་ནས་སྡེ་སྲིད་ཁྲི་ཕེབས་ཀྱི་དུས་དང་བཅས་སྤྱན་འདྲེན་བཀའ་ཤོག་བྱུང་བ་བཞིན་སྒྲགས་ལ་བརྒྱུད་སྐྱིད་ཤོད་དུ་ཕེབས། ཞག་འགའ་ཡར་བྱང་གླིང་བཀའ་བརྒྱད་སྨད། ཟུར་ཁང་རྣམས་ནས་སྤྱན་དྲངས་པར་འཕྲལ་སེལ་གྱི་བྱིན་རླབས་འགའ་རེ་མཛད་ཅིང་། གོང་ནས་གསོལ་ཆས་ཀྱི་ཟུར་གསོས་རྒྱ་ཆེ་བ་སྩལ། ཟླ་བ་བརྒྱད་པ་རྟིང་མའི་ཚེས་བཅུ་གཅིག་གི་ཉིན་ཕོ་བྲང་ཆེན་པོར་རྒྱལ་མཆོག་དམ་པའི་ཞལ་དཀྱིལ་མཇལ་དུ་ཕེབས། དེ་ཉིན་ནས་བཟུང་རྒྱལ་བ་མཆོག་གི་སྐུ་ཞབས་སུ། ཕྱག་རྡོར་སྙན་བརྒྱུད། ཀུན་མཁྱེན་ཆེན་པོའི་མཛོད་བདུན། ངལ་གསོ་སྐོར་གསུམ། གསུང་འབུམ་ཐོར་བུ། ཟབ་མོ་ཡང་ཏིག་གི་ལུང་རྣམས་ཞག་བཅུ་གཉིས་ཀྱི་ཁོངས་སུ་རྫོགས་པ་དང་། ཉི་ཤུ་གསུམ་ནས་བཟུང་འཕགས་པ་ལྷ་ཁང་དུ། པད་གླིང་། རྡོར་གླིང་། རཏྣ་གླིང་པ་རྣམས་ཀྱི་གཏེར་ཆོས་དང་། ཕྱག་རྡོར་སྙན་བརྒྱུད་སོགས་གཙོ་བོར་གྱུར་པའི་དབང་བཀའ་ཆེ་བ་ཕྱེད་ཉིས་བརྒྱ་སྐོར་དང་། རྗེས་གནང་བྱིན་རླབས་ཁ་ཤས་བཅས་ཞག་དགུའི་ཁོངས་སུ་རྫོགས་པར་འབུལ་བ་མཛད། རཏྣའི་རྟ་མགྲིན་གསང་འདུས་ཀྱི་དབང་གི་ཉིན་ཆུ་མིག་དགོན་གསར་བའི་ནང་རྟེན་གཏེར་ཁ་དེ་ཁའི་རྟ་མགྲིན་གྱི་ཕུར་པ་ཕུལ་བ་འགྲིག་པས་རྒྱལ་མཆོག་དམ་པ་ཡང་རྟེན་འབྲེལ་གྱི་ལ་ཉེ་ལེགས་པར་འདུག་གསུང་མཉེས། དེ་ནས་མི་དབང་བློ་བཟང་མཐུ་སྟོབས་ཁྲིར་ཕེབས་པའི་ཁྲི་འབུལ་བཞེས་རིང་། ཆོས་རྗེ་དཀོན་མཆོག་ལྷུན་གྲུབ་ལ། ཡང་བཟློག་གི་དབང་ལུང་ཆ་ཚང་དང་རླུང་འཁོར། སྔགས་སྡེབས་སོགས་དྲག་སྔགས་ཀྱི་ཕྱག་ལེན་མང་པོ་གསན་ཅིང་། ཁྲི་འབུལ་དུ་བྱོན་པའི་གྲས་ནས་རྙིང་ལུགས་གཙོར་གྱུར་གྱི་བླ་མ་མང་པོ་ཕེབས་པར་གཞི་ལེན་དང་ཆོས་འབྲེལ་ཡང་མང་དུ་སྩལ། ཁྲི་འབུལ་གྱི་ཐུགས་གཡེང་གྲུབ་ནས། སླར་ཡང་གོང་དུ་རྙིང་མ་རྒྱུད་འབུམ་དང་པད་གླིང་དང་རཏྣ་གླིང་པའི་གཏེར་ཆོས་ཡོངས་རྫོགས་ཀྱི་ལུང་། གཞན་ཡང་རྡོར་གླིང་། སངས་རྒྱས་གླིང་པ། ལྷོ་ལས་འཕྲོ་གླིང་པ། ཤེས་རབ་མེ་འབར་སོགས་ཀྱི་གཏེར་ཆོས་རགས་རིམ་བཅས་ཁྱོན་བཀའ་གཏེར་གྱི་པོད་ཆེན་བརྒྱ་ལྷག་ཙམ་གྱི་དབང་ལུང་མན་ངག་གི་བཀའ་རྣམས་དང་། གཙོ་བོར་རྫོགས་རིམ་ངེས་དོན་སྙིང་པོ་མྱོང་ཁྲིད་ཀྱི་ཚུལ་དུ་འབུལ་བར་མཛད། རྒྱལ་བ་མཆོག་གི་ཕྱག་ཞབས་སྙུན་ཚུལ་བསྟན་པའི་སྐུ་རིམ་དུ་དྲག་དམར་གྱི་གཏོར་བཟློག་ཅིག་མཛད་པ་ཚུགས་ནས་ཞག་གསུམ་ན་སྤྱན་ལྟས་འགྱུར་ཞིང་སྐུ་བདེ་འགོ་གཏད་པ་དང་། དེ་རྗེས་གདོན་འགྲོལ་ཞིག་འབུལ་བར་མཛད་སྐབས་ལྟས་ངོ་མཚར་བ་ལྟར་སྐུ་གཞི་མེད་དུ་དྭངས།